الفصل 2
.
البـارت 2 ••
الكنــز المـخـفـي 💎
👌🏻👇🏻 😍
📚 @rewayatyamania 🇾🇪
بسمة: خلاص يا نور خرجنا لكن لاتدي سيرتهم
نور ضحكت: بتخافي
بسمة: وانتي ياسعم مابتخافيش؟؟
نور: لا ولا اي شي بيخوفني في هذه الدنيا
بسمة: قدو باين انرفضتي وبكيتي وتحسستي
نور: يا سامجة مادخل الخوف بالزعل انا قلت لش معي احساس بس قوية
بسمة: خلي قوتش تنفعش بنقلش اهتمي بنفسش نعمي شعرش وبيضي واتسبري
نور: عشان انخطب؟
بسمة: طبعا
نور: وليش مايشلني مثل مانا بسمرتي وشعري الكيرلي وابتسامتي الحالية هذه
بسمة: مشكلتش مسايرتش للعجايز خلتش الثقة عندش ألف ، ابسري كيف قد البنات
نور: مااشتيش اوقع مثل حد ، اشتي اجلس مثل ما انا بطباعي بدون كلفة بين اتعب لما اقلدكن حياتكن تعب كلها عرض عشان الناس، اشتي اعيش لنفسي مافيها ألبس ابو خمسمية
بسمة: يع امد يعرفوا ان فوقش ممسحة
نور: من هم
بسمة: الناس
نور: يعرفوا عتدي عيشتروا لي الغالي !
بسمة: بس لغاجة محد عيصاحبش ولا يخطبش ولايحبش عتجلسي فقرية عمرش كله
نور ببرود: عااادي
بسمة: طز فيش يانوررر من صدق طز حتى ابن السواق ماعيقبلش بش لو تعاندي هكذا وانتي حرة
نور: ماعليش من النصايح جابريني مافعلتي مع اخوش زد رجع لش ذهبش!
بسمة: ماشي ولاسخيت احارش به لحد
نور: مش محارشة بس لاتخبي الموضوع عن امش كلميها الولد اين بيجي بالفلوس هذه كلها واحد يفتجع لو حد بيبتزه
بسمة: صح تصدقي بين افقدش واوقات كثيرة اشتي اكلمش كل شي اول بأول ، من بتجابري وانا مابحد؟؟
نور بضحكة: بين اجابر الشجر والعصافير تصدقي
بسمة: سهل الجنان اوله تعلام
صوت هزاز تلفون تلفتين لبعض
نور: الحمدلله مش هم الجن ، هذه رسالة فيس
بسمة: من رسل لش
نور: واحد سامج احظره ويرجع
بسمة: قلت لش ماعتخلي لش حد لاتحبي ولاتنحبي ولا شي بطباع جدتي هذه اللي فيش
نور: انتي يا اخرف واجنن ساعش يا اما طبع جدتش ، ايوه انا جدتش ماشجابر واحد تافه مايفهم على روحه
دخلين البيت وقت اذان العشاء..
@rewayatyamania المصدر الأول للروايات
في الحوش حق بيت جيرانهم بيتكلم في التلفون: إلا متأكد والله انها هي ابدأ الخطة ذلحين؟؟ بين احس الآن وقت مناسب
الرجال اللي بيكلمه في التلفون: تمام الآن جايي، بس ظلام ياصهيب
ابن الجيران صهيب: عادو احسن مانشتي إلا ظلام محد يدرا من وين المكان
الرجال اللي معه: الآن جاي يا فندم
صهيب: اقلك ابرد لك من الالقاب هذه
الرجال: حاضر ولايهمك العفو
صهيب قفل التلفون وجالس في الحوش بيتمشى وهو بيفكر
.
.
بيت جيرانهم (بيت المنذر)
نور جالسة مع اهلها واعمامها ونسوانهم وجنبها بسمة بتتفرجهم
بسمة قربت تشاورها: شوفي آخرتش ساع مرة عمي سمير الاولى اللي مصدقة الجو والخرطة اللي خرطها عليها بدقنته ومطواعته انها عتدخل الجنة حين سمحت له يتزوج وهو تزوج لانها مابتهتم بروحها ساع الثالثة اللي جنبه
نور قربت ترد عليها وتشاورها: شفتي قلتي الثالثة يعني عادها حريوه مصيرها مصير الاولى والثانية عيكسر لها اظافرها بأسم الحرام والفتنة والغيرة ويخليها تغسل بيدها عشان تقاطع الاجهزة المستوردة من الكفره
بسمة: ابسري مااحلى زوجة عمي انور كأنها حريوه وقدلها سبع سنين الاناقة واللبس الحالي والدلع..
نور: دائماً انتي بتغريش المظاهر يا بسمة، بس قلي لي هي مرتاحة؟؟؟ والا كل يومين وهي عند جدتي تتصل وتبكي وتشكي منه وكيف بيجابر بنات بالتلفون
بسمة: والله انش مملة مادخلنا بمشاكلهم بين اقلش شوفي مااحلاها
نور: ليش ماتقلي مااحلاها مرت عمي فؤاد احلى واحدة ايش مافعل زوجها من مشاكل مع جدتي واعمامي وقلبنا عليها حالية لاعندنا مابتتغيرش وتجي في اي مواقف وواجب ومتواضعة وطيبة
بسمة: ايوه بس تحسيها قديمة قوي
نور: امانة غيري المواضيع يا بسمة بتغاثيني قدش ساع الجهاز حق المحاسب اللي يطرح الباركود ويسعر كل شي ما احبش هكذا
بسمة انكسفت لمحت في المطبخ واقفات بنات عمها بيضحكين ويفعلين لهن قهوة: عتقومي تشربي معنا لاتيه والا مايعجبش الا القشر يمه حنجه؟
نور بابتسامة عريضة هزت حواجبها: قشر طبعا انتين والغساول الباردة تمغص البطون قلك لاتيه، وقامت من بقعتها سارت ورا الطاقة جلست تجابر مرة عمها فؤاد..
فجأة سمعوا صوت قارح اهتر الزجاج اللي وراها نزل للارض وطار اللوال الخشب اللي ورا نور دهفها لوسط الغرفة
كلهم بيتساءلوا ايش في ايش هذا الصوت؟؟
اللي يرد هذا يمكن دبة غاز قرحت
اعمامها كلهم قاموا يشتوا يخرجوا
الجدة كانت ماسكة نور صيحت: لا ولا حد يخرج اجلسوا نبسر اول ايش هذا لايرجع فوقكم راجع او رصاص او حد بيتقاتل مع حد
كلهم شافو نور: فيش شي؟ حصل لش شي؟
.
.
في حوش الجيران (صهيب الشخص الغامض في الحارة مجهول الهوية مش اجتماعي)
صهيب: اووف ماتوقعت يوصل اضرار بيت الجيران
الرجال اللي معه متوتر: العفو انا حسبتها بس...
📚 @rewayatyamania 🇾🇪