الفصل 11
الجزء 11:
________________________________
سما خرجت من أوضتها / في إيه يا نور عملتلك إيه أنا
نور باستهزاء / أهلا بالفنانة
أنس / نور لو سمحت ماتتكلمش معاها بالطريقة دي وقولنا إيه اللي حصل
سلوى / إيه المصيبة اللي عملتيها تاني ما أنتي خلاص مابقتيش تعرفي تعملي حاجة غير المصايب
سما بصوت عالي / بقولك إيه أنا ماعملتش حاجة ومسمحش لحد يتكلم معايا كدة
نور بصوت عالي / كمان لكي عين تتكلمي وتعلي صوتك
أنس / سما طول اليوم معانا ومعملتش إي حاجة تعصبك بالطريقة دي
نور طلع تليفونه وجاب فيديو وإداه لأنس وقاله / أتفضل شوف الفنانة العظيمة عملت إيه
( الفيديو كان لما سما بتغني مع الشاب في الديسكو يوم ما نور ضربها )
سلوى أخدت التليفون وشافت الفيديو والكل شافه بس سما طبعا سمعت الصوت وعرفت الفيديو دا في ايه )
سما / الفيديو دا حضرتك من يوم ماكنت في الديسكو أخر مرة
نور / وهو دا اللي فرق معاكي الفيديو من أمتي مش فارق معاكي إن الفيديو دا على مواقع التواصل كلها
سلوى بغضب/ فضحتينا يا سما
سما / إنتي بتقولي إيه فضحتك علشان بغني
نور / نعم تغني هو أنتي بتسمي دا غنى
سما / أيوة غنى
نور بعصبية / بصي أنا كدة جبت أخري معاكي وأعملي حسابك مافيش خروج من باب الشقة دي لا لوحدك ولا مع حد ولا في مرواح للشركة ولا في شغل
سما / نعم إيه اللي أنت بتقوله دا
نور / بقول إن رجلك لو خطت بره عتبة الباب دا هكسرهالك سامعه
( نور قال كدة وخرج ورزع الباب وراه )
سلوى / منك لله حرام عليكي اللي أنتي بتعمليه فينا دا
سما / أنا ' أنا اللي بعمل فيكوا أنا معقولة أنتي أمي
أنس / أهدي يا سما
سما بعصبية / متقوليش أهدي
أنا جيت على نفسي كتير علشان خاطرها
أتجوزت البني آدم اللي جرحني وكسرني وأتخلى عني علشانها
وهي ولا هي هنا بتشجعه علشان يفرض سيطرته عليا بتشجعه علشان يكسر قلبي تاني بس خلاص خلصت أنا مش قاعدة في البيت دا تاني سامعه مش هقعد معاكي في بيت واحد وأبقي خلي نور ينفعك
( سما قالت كدة ودخلت أوضتها وبتجهز شنطتها علشان تمشي وتالين معاها جوة هي ومديحة بيمنعوها بس هي مسمحتش لحد يتدخل وأخدت شنطتها وخارجة من باب الشقة وأنس ماسك زراعها )
أنس / سما أنتي أتجننتي إيه اللي أنتي بتعمليه دا
سما / سيبني يا أنس بقولك سيبني همشي يعني همشي
أنس / يعني هتروحي فين يا سما دلوقتي طيب أصبري أنا هنزل معاكي
سلوى خرجت من أوضتها ومسكت أيد أنس وخليته يسيب سما / سيبها يا أنس تخرج
أنس / إيه اللي أنتي بتقوليه دا يا طنط
سلوى / بقولك سيبها تمشي على الأقل هرتاح من المصايب اللي بتعملهالي
( سما أتصدمت ماكنتش فاكرة إن هي هتهون على أمها بالطريقة دي وراحت خارجة ونزلت جرى أما أنس وقف مكانه من الصدمة مش مستوعب إيه اللي حصل وبعد ما سما نزلت )
مديحة / أنت هتفضل واقف مكانك كدة يا أنس أنزل ألحقها
سلوى عنيها مليانة دموع / مافيش داعي
تالين / أنتي بتقولي إيه يا طنط دي ممكن تعمل حادثة ولا يجرالها حاجة
سلوى / لا ماتقلقيش نور مستنيها تحت وهو هياخدها
أنس / نعم حضرتك بتقولي إيه أنا مستحيل أسمحله يعمل كدة
سلوى بحزن / ماتخافش يا أنس وصدقني والله العظيم نور مستحيل يأذي سما وهو هيرجعها تاني بس بعد كام يوم تكون هديت ورجعت لعقلها
( دا اللي حصل بعد ما سما نزلت نروح بقى لسما في الشارع )
سما نازلة تايهه وحزينة جدا وعايزة تعيط بس مش عارفة كأن الدموع أتحجرت في عنيها ونور جه وقف أدامها بالعربية ونزلها )
نور / أركبي يا سما
سما بهدوء على عكس اللي جواها / مش هركب وأمشي من هنا
( نور شدها من أيديها ركبها العربية وربطلها الحزام غصب عنها وحط شنطتها على كرسي العربية ورا ومشى وطول الطريق سما ما بتتكلمش بس رجعت رأسها لورا سندتها على الكرسي وغمضت عنيها
نور وصل القصر بتاعه ونزل وبيطلب من سما تنزل بس ما بتنزلش ولا حتى بترد عليه ولا بتتحرك
نور جري عليها ولقاها فقدت وعيها شالها بسرعة ودخلها أوضة في القصر ونيمها على السرير )
نور / داده يا داده
الداده / نعم يا نور بيه إيه دا
نور / أطلبي الدكتور بسرعة
( الدكتور كشف على سما وقال إن ضغطها واطي بسبب قلة الأكل والنوم كمان وإنه لازم يعملها تحليل ويتعلقلها محاليل
وفعلا الدكتور أخد عينة من دم سما وبعتها على معمل التحاليل وعلق لسما المحاليل وبعد ما خلص كل حاجة )
نور / خير يا دكتور
الدكتور / حضرتك عندها أنيمية حادة من قلة الأكل وكمان ما بتنامش كويس
نور / طيب ودي علاجها إيه
الدكتور / حضرتك أنا كتبتلها على علاج أهوه ولازم تاخد الحقنة دي يوم بعد يوم وكمان لازم تاكل كويس وبالذات الأكل اللي فيه حديد وياريت تنام كويس على أد ما تقدر وتلتزم بالعلاج لأنه فيه فاتح للشهية
نور / تمام يا دكتور شكرا
الدكتور / لا شكر على واجب بس ياريت حضرتك تسيبها نايمة لحد ما تصحي براحتها
( مشي الدكتور ونور فضل طول الليل قاعد جنب سما لدرجة إنه نام على الكرسي جنبها )
طلع النهار ونور صحي لقى نفسه قاعد على الكرسي فقام فتح ستائر الأوضة. فسما صحيت بسبب الضوء )
نور / صباح الخير إيه كل دا نوم
سما لسه مافتحتش عنيها كويس / أنا فين
نور وهو مبتسم / طيب قولي صباح النور الأول وعمتا يا ستي انتي في بيتك
سما بتبص حواليها / إيه دا دي مش أوضتي أنا مش في شقتنا
نور قعد جنبها على السرير / يا حبيبتي أنا ماقولتش إنك في شقتكوا أنا بقولك أنتي في بيتك
سما جت تقوم ماقدرتش لأنها دايخة جدا ومش قادرة حتى تفتح عنيها كويس
نور / حبيبتي خليكي مرتاحة ماتقوميش علشان أنتي لسه تعبانة
سما نامت تاني على السرير وغمضت عنيها
وشوية والداده جابت الفطار زي ما نور قالها وسابته جنب السرير
نور / يلا يا سما قومي كولي وبعدين أبقي أرجعي نامي
سما / مش عايزة أكل سيبني في حالي
نور / وبعدين قومي يلا كولي بلاش دلع علشان مخلكيش تاكلي غصب عنك
( نور سندها وقعدها على طرف السرير وقرب منها الطربيزة النقالة اللي عليها الأكل وسما حاسة إن جسمها تقيل ومش قادرة تحرك جسمها ولا حتى أيديها
نور لما حس بيها بقى بيأكلها هو لأيديه
وسما بتمضغ الأكل بالعافية وتبلعه وبعد شوية
سما بتعب وصوت ضعيف / كفاية أنا تعبت عايزة أنام
نور / طيب أستني أشربي العلاج الأول
( نور ساعدها تنام تاني بعد ما أخدت العلاج
سما فضلت نايمة ونور خرج وطلع لابوه حكاله على اللي حصل وعرفه إنه مش هيقدر يروح الشغل ويسيب سما لوحدها
وبعد ما خلص مع أبوه نزل أطمن على سما وخرج من أوضتها
نور / داده يا داده
الداده / نعم يا نور بيه
نور / أنا طالع أنام شوية لما سما هانم تصحى صحيني على طول
الداده / حاضر يا بيه
( طلع نور ينام شوية والساعة 4 العصر الداده طلعت تصحيه علشان ينزل بسرعة )
سما صحيت من النوم وكانت أحسن من الصبح فقامت من السرير وبتشوف هي فين لقيت نفسها في مكان غريب ولقيت الشوذ بتاعتها جنب السرير فلبستها و خرجت من الأوضة وشافتها الداده
الداده / الحمد لله على سلمتك يا سما هانم
سما / سما هانم مين أنا فين هنا
الداده / حضرتك في قصر نور بيه عز
سما بصوت عالي / نعم وأنا إيه جابني هنا
الداده / نور بيه جاب حضرتك بالليل وكنتي تعبانة
سما / هي حصلت يستغل تعبي ويجيبني بيته ماشي يا نور
( سما خرجت ورايحة بأتجاه بوابة القصر بسرعة وهي حافية )
في الوقت دا كان نور نزل جري لما الداده صحيته
نور لسما / على فين يا سما
____________________
نكمل في الفصل اللي جاي
عايزة أعرف رأيكم
وتوقعاتكوا
يا تري سما هتعمل إيه
ونور هيتعامل مع سما أزاي
رواية ( ومازال قلبي ينزف) الفصل الثاني والعشرون بقلم :-أسماء أبوشادي
___________________________________
نور / على فين يا سما
سما / همشي من هنا يا نور
نور / طيب ممكن تدخلي معايا علشان أنتي لسه تعبانة
سما / طول ما أنا هنا هفضل تعبانة فأحسنلك وأحسنلي خليني أمشي من هنا
( نور شال سما على كتفة ودخلها وهي بتضربه بأيديها على ظهره وبعد ما دخلها الأوضة اللي هي قاعدة فيها )
نور / بصي بقى خروج من هنا ممنوع والطريقة اللي أتكلمتي بيها دي ممنوع تتكلمي بيها تاني ولو مش عايزاني ازعلك تبقى تسمعي الكلام مفهوم
أنا هسيبك نص ساعة تاخدي شور وتغيري هدومك وهتلاقي حاجتك الداده حاطتها في الدولاب
( نور قال كدة وخرج )
سما / والله يا نور لا أطفشك من بيتكوا زي ما طفشتني من بيتنا
( بعد نص ساعة نور خبط عليها مردتش فقلق وراح داخل لقاها بتسرح شعرها أدام المراية )
سما / أزاي تدخل من غير ما أسمحلك
نور / أنا خبطت كتير وأنتي ماردتيش
سما / يبقى تفضل واقف بره لحد مارد
نور / اللهم طولك يا روح يلا علشان نتغدا
( خرجوا أتغدوا على السفرة وسما كانت جعانة جدا من أثر علاج فتح الشهية اللي اخدته الصبح فأكلت كتير خصوصا إن نور طلب من الداده تعمل الأكل اللي سما بتحبه من زمان وبعد الأكل سما دخلت أوضتها وقعدت تتفرج على التلفزيون وشوية ونور رحلها خبط على الباب وسما بردو ماردتش فهو دخل )
نور / ماقولتيش أدخل ليه ولا مش سامعة الخبط دا كله
سما بستهزاء / على أساس إني لو ماقولتش مش هتدخل
نور / أووووووف بقولك إيه أنا مش فاضيلك أنا داخل المكتب بتاعي هنا جنبك لو عوزتي حاجة تعالى
سما / أيش ياخد الريح من البلاط
نور بأستغراب / نعم إنتي قولتى إيه
سما / ماتاخدش في بالك
نور / المهم لو حبيتي تخرجي تتمشي في الجنينة مافيش مشكلة بدل ماتفضلي قاعدة في الأوضة كدة
( نور قال كدة وساب سما قاعدة في أوضتها
أوضة سما بتطل على الجنينة ومنظر الجنينة يسحر فخرجت قعدت شوية فيها وأتمشت شوية وبعد كدة رجعت قعدت فى أوضتها )
في أوضة المكتب بتاع نور
أبو نور / السلام عليكم
نور / وعليكم السلام بابا حضرتك جيت أمتي
أبو نور / لسه جاي قولت علشان نتعشى كلنا سوى وأطمن على سما
نور / طيب ماشي على ما حضرتك ترتاح شوية تكون الداده حضرت الأكل وأنا هنادي على سما
( في أوضة سما خبط نور وكالعادة ماردتش عليه وهو دخل )
نور / يا بنتي أنتي عايزة تجننيني مابترديش ليه لما بتزفت أخبط على الباب
سما / ___
نور / ما تردي هو أنتي طارشة
سما ببرود / خير الرد على السفهاء الصمت
نور / إيه يعني أنتي قصدك أنا سفيه
سما / هو أنا قولتلك كدة
نور / أومال أنتي مش بتقولي خير الرد على السفهاء الصمت وأنتي مابترديش عليا يبقى معنى كدة إني سفيه
سما / طيب أزاي مابردش عليك وأزاي قولتلك خير الرد على السفهاء الصمت ما أنا كنت سكتت أحسن وأنت هتفهم لوحدك
نور / بقولك إيه يلا علشان نتعشى
سما / أنا مابتعشاش وأنت عارف كدة
نور / لا من هنا ورايح مافيش نوم من في عشا يا سما
سما بصوت عالي / بقولك أنا مابتعشاش هو بالعافية
نور / سماااا قولت يلا يبقى يلا علشان تاخدي العلاج بعد العشا
سما / هو أنا مش خدته الصبح
نور / ماهو الصبح وبالليل ويلا بقى
وكنت عايز أقولك حاجة قبل ما نخرج بابا برة وياريت يا سما تتكلمي معاه بأسلوب كويس لأني أنتي عارفة بابا بالنسبالي إيه ماشي
سما / لأ واقف
نور / قصدك إيه
سما / قصدي سمعتك يلا علشان العشا
( قعدوا على السفرة هما التلاتة )
أبو نور/ عاملة إيه دلوقتي يا سما
سما / كويسة
أبو نور / الحمد لله يارب دايما
سما / يارب
( نور بيبص لسما علشان تتكلم كويس بس هي عاملة نفسها مش واخدة بالها وشوية وقامت وقفت )
سما / الحمد لله شبعت
نور / أقعدي كملي أكلك الأول
سما / بقولك شبعت
( نور بصلها بصة واحدة بس فقعدت وكملت أكل من غير أي كلام وخلصت طبقها وبعد كدة راحت أوضتها ونور راح معاها إداها العلاج وسابها وخرج )
سما قاعدة في أوضتها وبعد العشا بساعتين حاسة إنها هتموت من الجوع ودا بردو من تأثير العلاج
سما / أومال لو مكنتش أتعشيت كان حصلي إيه بقى
شوية والباب خبط ونور دخل معاه كوباية لبن وطبق فاكهه
نور / أتفضلي
سما / أنا مش عايزة حاجة أنا مش لسه واكلة
نور / بصي أنا مش متحرك من هنا غير لما تشربي اللبن وتاكلي على الأقل تفاحة فريحي نفسك وأسمعي الكلام
سما شربت اللبن بالعافية وأكلت تفاحة زي ما قال وبعد ما خرج أفترست طبق الفاكهه كله ونامت بعدها على طول
طلع النهار ونور صحي ونزل لقى الداده تحت
الداده / صباح الخير يا نور بيه
نور / صباح النور يا داده سما صحيت
الداده / لا يا بيه هي ماخرجتش من أوضتها لسه فتقريبا لسه نايمة
نور راح على أوضة سما خبط ودخل بس مالقهاش في الأوضة وهو بيدور عليها بعنيه في الاوضة كانت سما خارجة من الحمام ولبسه بورنس قصير وأول ماشافت نور
سما / ععععععععععععع إيه دا إيه دخلك هنا
نور ببرود / وإيه المشكلة دي أوضة مراتي
سما / مراتك مين والناس نايمين ماتدخولش هنا تاني غير لما أنا أسمحلك تدخل
نور / طيب ما أنا بخبط وأنتي مابترديش أعملك إيه
سما / ماردتش تبقى ماتدخلش و
قلطعها نور / أدامك 10 دقايق تكوني خلصتي لبس ماشي
( نور خرج ورجعلها بعد 10 دقايق ومعاه ممرضة خبط والمرة دي ردت عليه )
سما / أدخل
نور بعد ما دخل / دي ممرضة هتساعدك علشان تاخدي العلاج
سما / مش محتجاها أنا أعرف أهتم بنفسي
نور / مش عايز كتر كلام أنا مستنيكي على الفطار تاخدي العلاج وتحصليني
نور خرج وبعد شوية سمع سما بتصرخ على أخرها فجري راح على أوضتها
نور / في إيه مالك يا سما
سما / ألحق المجنونة دي عايزة تديني حقنة
نور بدهشة / يعني أنتي بتصرخي علشان كدة بس
سما / هو إيه اللي بس أنا مابحبش الحقن
نور / بس أنتي لازم تخديها ضروري
سما / على جثتي أنت تعرفني بقالك ييجي 5 سنين عمرك سمعتني بقول أخدت حقنة
نور / ههههههههههههه أنتي بجد بتخافي من الحقن
سما / أنا مابقولش حاجة تضحك أنا مش هاخد حقن
نور بهدوء / سما أهدي دي حقنة فيتامينات وحديد يعني مش هتحسي بيها
سما بصوت عالي / حقنة حديد حقنة أسمنت أنا مش هاخد حقن خااااالص
نور بعصبية / سما وبعدين ماتخلينيش أقولك هتاخديها غصب عنك
سما / وأنا مش هاخد حاجة يا نور ماليش في
( نور والممرضة مقدروش يقنعوا سما تاخد حقن فنور خرج أتصل بالدكتور وقاله والدكتور غيرهاله بنوع كبسول قوي علشان يجيب نتيجة ونور رجع تاني لسما )
نور / بصي يا سما أنا ممكن أخليكي تاخدي الحقنة غصب عنك بس أنا مش هعمل كدة بس بشرط
سما / إيه هو
نور / هجيبلك بنت من البيوتي سنتر تغيرلك لون شعرك ده لأنه مضايقني
سما / مايضايقك هو شعري أنا ولا شعرك أنت أنا مش هغير حاجة
نور / خلاص أنتي حرة بس أنا عايز أقولك حاجة الحقن دي كل يوم حقنة منها
سما / لأ خلاص أنا موافقة
( خرجوا فطروا مع بعض وكان أبو نور مشي على الشركة وبعد الفطار البنت اللي بعتها البيوتي سنتر وصلت ودخلت عند سما الأوضة وبعد ساعتين البنت خرجت ومشيت ونور راح على أوضة سما وأول ما شافها عقله طار وقلبه فضل يدق بسرعة
وراح عند سما وعينه فيها دموع مش عايزة تنزل وأخدها في حضنه وحط رأسها على صدره علشان تسمع دقات قلبه وضمها ليه جامد جدا لدرجة إنه كان هيكسر ضلوعها
نور / وحشتيني أوي يا سمااااايااااا
___________________________
نكمل في الفصل الجاي
وعايزة أعرف رأيكم وتوقعاتكوا
يا تري سما هتعمل إيه ونور رد فعله هيكون إيه
ولو سمحتوا الناس اللي بتكلمني على الخاص
أنا والله أول ما بكتب الحلقة على الفون بنزلها على طول ولما مابردش أحيانا على الخاص
دا بيكون غصب عني مش تكبر مني والله العظيم أبدا بدليل إني أنا برد على كل التعليقات وببقي مبسوطة جدا بيها وبتشجعني كتير جدا والناس اللي عايزة تعرف أنا أسمي أسماء ولا أميرة