الفصل 2
الجزء 2:
كنت فكرك هتموتي بعدي
كنت خايف عليكي من بعدي
بس خلاص انتي عيشتي
اتمنالك اجمل حياة في بعدي
يلي معاكي بنسي الدنيا والناس
بعدك انتي مافيش حب خلاص
________________________
البارت الثاني خلص لما ممدوح حكا كل تفاصيل سفر سما لنور
نور بدهشه :- ياااه سمايا سفرت وهتشتغل كمان وهتعمل لنفسها حياة جديدة وتبني مستقبل وأنا اللي كنت خايف عليكي تعملي حاجة في نفسك بعد الكلام اللي قولتهولك
بس يلا كدة أحسن علشان محسش.بالذنب بسببها
عايدة ( الدادة اللي بتهتم نور من وهو صغير ) :- نور بيه انت بتكلم نفسك
نور :- لا يا داده أنا كنت بتكلم في التليفون
عايدة :- طيب احضرلك العشا
نور :- لأ اتعشيت تصبحي علي خير
__________
في دبي
أشرقت الشمس لتملئ بضيها المكان وتعلن عن بداية أول يوم لسما بهذه البلد
( صحيت نور وقامت اخدت شاور وليست ازدال الصلاة وصلت وبعدين لبست لبس كلاسيكي عبارة عن جيب قصير اسود وفوقه بلوزة باللون الأبيض بثلث كم ولكن في غاية الروعة ورفعت شعرها بطريقة تديها سن أكبر من سنها واديها منظر حلو وخرجت من اوضتها كانت مديحة صحيت وبتحضر الفطار وخلصته وأنس كمان صحي وخرج في نفس الوقت اللي خرجت فيه سما )
سما :- صباح الخير
مديحة :- صباح الجمال والسعادة لقلبك يا حبيبتي
أنس :- بيصفر واو لأ بجد عجبتيني ايه النشاط ده كله استمرى بقى عايزك كل يوم كدة
سما :- على فكرة انت مقولتش صباح الخير لسه
أنس :- متقلقيش يا أختي ما انتي هتفضلي في خلقتي كل يوم هبقي اقولك بكرة
سما :- لا مافيش بكرة ادخل الأوضة تاني وبعد كدة اخرج قول صباح الخير
أنس :- لا والله بت انتي همد ايدي عليكي ماتنسيش اني اخوكي الكبير
سما :- يامي يامي تصدق خوفت
أنس :- خلاص طالما خوفتي مش هأذيكي علشان صعبتي عليا
سما :- لا والله بجد طيب خود بقى ( حدفته بخدادية من اللي على كراسي الصالون )
أنس :- كدة ماشي انتي الحرب وجبتيه لنفسك تعالى بقى ( فضلوا يجروا مع بعض ويهزروا شوية لحد ما مديحة حطت الفطار على السفرة )
مديحة :- يلا يا حبايب قلبي علشان متتاخروش على شغلكم
انس وهو رايح على السفرة :- حاضر يا ست الكل بس كنت بعلم البت دي الأدب
سما سبقته على السفرة :- ما تقولش بت البت دي رايحة تشتغل في نفس الشركة اللي انت بتشتغل فيها 😝
مديحة :- والله يا سما انتي جيتي عملتلنا حس ومليتي علينا البيت
أنس :- ماهو أنا بقولها تخنتي مش مصدقة شفتي اهي بتقولك مليتي علينا البيت ههههه
سما :- بس ياض انت ياض
أنس :- ياض لا أنا كدة اغير رأيي مافيش شغل معايا في الشركة
( وفضلوا يهزروا وهما بياكلوا وخلصوا ومشيوا على الشركة اللي سما هتشتغل فيها مع انس وطول الطريق في عربية أنس بيشرحلها حاجات في الشركة وطريقة شغلهم وطبعا بما أن أنس بيشتغل في الشركة بقاله أكثر من 4 سنين اكيد ليه منصب هناك اداري أما سما فهي لسه هتكون موظفة جديدة وتحت التمرين كمان لمدة شهر ووصلوا واستلمت شغلها وأنس بيوديها مكتبها اعرفها فين مكتبه وكانت مبهورة بكل حاجة في الشركة والبناء الضخم بتاعها وبالمكاتب وبكل حاجة ) وكان مكتب سما مشترك مع بنت تانية اسمها تالين لبنانية( بس ايه صاروخ )
سما :- هاي اذيك أنا سما وانتي
تالين :- أنا تالين من لبنان انتي شكلك مصرية صح
سما :- هههه أيوة ايه ما ينفعش أكون زميلتك
تالين :- لا بالعكس ذا انا مبسوطة جدا بيكي
( أتعرفوا على بعض واعجبوا ببعض جدا وكان يوم جميل جدا وبداية مبشرة لسما وبدأت تتعلم الشغل وتستوعبه وتتعرف على الناس اللي بتتعامل معاهم وانتهى اليوم وأنس مراحلها علشان يمشوا ونزلوا وركبوا العربية ) اتصلت سما بابوها وأمها علشان تكلمهم سما :- يا بابا كل حاجة هنا تجنن حتى الشغل مبسوطة اوى انا بجد فرحانة يا بابا
سلوى أمها :- ايه يا ست سما ماشبعتيش من الكلام مع بابا مافيش ليا شوية
سما :- لأ طبعا دا انتي ست الكل يا حبيبتي
( استمرت المكالمة 10 دقائق وخلصت سما المكالمة ) وأنس كل ده جنبها في العربية
أنس :- يا ام الرغى فصلتيني كل ده كلام ايه بالعة راديو
سما :- أخرس وسوق وانت ساكت مش لازم اطمنهم عليا
أنس :- طيب بقولك اتعرفتي على تالين
سما :- ايه ده انت قلبت كدة ليه على كيوت ورومانسي في ايه احكيلي
أنس :- تخلصي بقى بطلي رغى اتعرفتي عليها ولا لأ
سما بغمزة :- أيوة اتعرفت عليها بس شكلها جامدة 😉
أنس :- هي جامدة بس دي حتة منجاية
سما يضحك :- أيوة أيوة الصنارة غمرت يا كبير يا ابو الانانيس
أنس :- يا اختي اهدي دا مجرد إعجاب مش اكتر ومن طرفي أنا بس كمان. المهم خلاص احنا وصلنا عايزك تاكلي وتغيري هدومك علشان نخرج
سما :- لا يا عم انا هغير هدومي وهقعد اقرأ في الورق دا شوية علشان أتعلم منه وأنام مش عايزة اخرج
أنس :- سما أنا مش هغصبك على حاجة ابدا بس عايزك تعرفى حاجة واحدة الحياة مابتوقفش على حد ولازم احنا كمان نعيش حياتنا وننسى و
مقاطعته سما :- أنس بلييز مش عايزة اتكلم في الموضوع ده وياريت ماتفتحهوش تاني ابدا وتسيبني على راحتي
( احترم أنس كلام سما جدا ومافتحش الموضوع ده تاني ومرت أيام وشهر على وجود سما في دبي وهي من الشركة للبيت ومن البيت للشركة وما تعرفش اي مكان في البلد غير الطريق من الشركة للبيت واللي بياخد ربع ساعة في العربية مع انس وجه اليوم اللي سما لازم تجتمع فيه مع المدير العام للشركة هي والمتدربين الجداد علشان يمضوا العقود وقبل اليوم ده باليل )
في اوضة سما
مديحة :- يعني خلاص يا حبيبتي بكرة هتمضي العقد
سما :- أيوة يا طنط ادعيلي ربنا يوفقني
مديحة :- بدعيلك والله على طول انتي وأنس ربنا يسعدك يا بنتي يا رب هسيبك أنا بقى علشان تنامي وتستدعي كويس
سما :- باست ايديها وقالتلها شكرا يا طنط
(وخرجت مديحة وسابت سما لوحدها وسما مسكت الفون ودخلت على الفيس لصفحة نور ودا اللي هي بتعمله من وقت للثاني علشان تشوف صوره أو تعرف اي حاجة عنه بس للأسف ما بتلاقيش أي أخبار )
إلى متى سوف يطول انتظاري
إلى متى سيستمر عذابي
حبيبي ارجع بقى يلا خلاص قلبي قرب يموت من كتر عذاب الفراق معقولة كل ده ماحستش ببعادي دا انا سبت مصر كلها علشان ابعد عنك خالص واوحشك وترجعلي
خلاص مش قادرة قلبي بيزف كل يوم أوجاع ارجع بقى ارجع يا (نور سماك ) فاكر لما بعدت عنك يومين بس عملت ايه فاكر ارجع بقى
فلاش باااااك
نور وسما قاعدين مع. بعض في مكان رومانسى بيحتفلوا بعيد ميلاد سما
نور :- حبيبتي كل سنة وانتى معايا كل سنة وانتى في حضني وحبك ساكن جوايا
سما :- حبيبي أنا أسعد انسانة في الدنيا وعايزة أفضل معاك على طول
نور:- حبيبتي انا كمان نفسي نبعد عن الدنيا كلها ونكون في دنيا لوحدنا أنا وانتي وبس
امتى بقى تيجي بيتي وتكوني مراتيبقي يا سمايا
سما :- خلاص يا حبيبي كلها كام شهر واتخرج ونتجوز يا نور سماك
نور ضمها وهما بيرقصوا رومانسى وشالها لف بيها لحد ما تعبوا هما اللي اتنين ونور وقف بيها بس هي كانت داخت فل بقيت في حضنه لحد ما راحوا قعدوا مع بعض نور قرب اوى من سما وبيشم في عطرها وبيحسس على شعرها ونفسهم بيقرب اكتر من بعض
ونور عينه على شافيفها مش قادر يبعد عنيه عنهم وبالفعل طبع قبلة طويلة عليهم وضم سما ليه اكتر حتى كادت أن تعتصر ضلوعها بين يديه حتى فاقت سما من حالة التوهان وفضلت تقاومه لحد ما ساب شافيفها وبعد عنها
سما ضربت نور بالقلم وجريت بأقصى سرعة أما نور فضل واقف مكانه ما اتحركش مصدوم من اللي سما عملته.
أما سما فوصلت لبيتها وجريت على اوضتها تعيط ابوها شافها وهي داخلة بتعيط وراحلها
عادل :- سما حبيبتي بتعيطي ليه مالك
سما :- مافيش يا بابا أنا بس تعبانة شوية
عادل :- هو ايه اللي مافيش انتي مش كنتي بتحتفلي بعيد ميلادك مع نور فهميني هو عمل حاجة ضايقتك
سما :- مسحت دموعها لا يا بابا مافيش دا سوء تفاهم بس
عادل :- طيب يا ستي براحتك هطلع أنا منها وما تقلقيش دلوقتي يتصل يصالحك وياريت تصالحيه على طول لحسن ييجي هنا زي المرة اللي فاتت تماتك تعملنا مصيبة
سما وهي بتبتسم :- حاضر يا بابا
( وفضلت سما سهرانة طول اليل مستنية ان نور يتصل يصالحها بس للاسف النهار طلع ونور ما اتصلش وسما قامت غيرت هدومها وراحت الجامعة علشان تحضر المحاضرات بتاعتها وقالت اكيد هييجي يصالحني في الجامعة ووصلت سما الجامعة وحضرت أول محاضرة وخرجت الكافتريا مع صحبتها مستنية المحاضرة التانية اللي باقي عليها نص ساعة
نسمه صاحبتها :- مالك يا سما شكلك متغير وزعلانة
سما :- لا ابدا مافيش أنا كويسة
نسمه :- عليا أنا بردو دا أنا صحبتك حبيبتك وبعدين انتي مش كنتي امبارح بتحتفلي بعيد ميلادك. مع نور حصل ايه احكيلي
سما حكت الموضوع لنسمه كله :- بس يا ستي ولحد دلوقتي لا اتصل صالحني ولا اعتذرلي على اللي هو عمله
نسمه :- بصي يا سما انتي تعرفى نور بقالك سنتين وعمالين تخرجوا مع بعض وتبقوا لوحدكوا وهو اتعود انه كل حاجة يعملها انتي بتقبليها وبتاخديها عادي فهو بالنسبالة اللي حصل عادي وانتي بالنسبالة اللي غلطتي
سما :- لا طبعا انا مستحيل أكون في نظره كدة وهو هيجي ويصالحني
( خلص اليوم ورجعت سما للبيت ونور بردو ما اتصلش سما قلقت عليه اوى وخافت يكون حصله حاجة فاتصلت هي بيه مرة واثنين وثلاثة وهو ماردش قالت تستنى شوية يمكن عنده ميتنج ودلوقتي يتصل بيا بس بردوا ما اتصلش قلقت أكثر لأن نور عمره ما اهملها كدة فل بعتتله رسالة
( حبيبي انت كويس فيك حاجة رد عليا علشان انا قلقانة عليك)
بس بردو نور ما اتصلش راحت سما غيرت هدومها وقالت لازم اعرف هو كويس ولا لأ وراحت الشركة بتاعته تسأل عنه وتطمئن عليه وهي نازلة من التاكسي عند شركته شافته خارج من الشركة فوقفت بعيد ورثت عليه علشان ييجلهاا بس للاسف شافت نور وهو بيطلع الموبايل وشاف الاتصال ومردش عليها وركب عربيته ومشي وهي رجعت البيت تاني زعلانة لأن دي اول مرة نور يعمل كدة معاها وراحت بعتاله رسالة
( خلاص يا نور لو عايز تبعد أبعد وأنا مش هتصل عليك تاني ولا هتشوفني تاني ) وقفلت تليفونها ونامت
أما نور فكان قافل موبايله علشان مايكلمهاش ونام هو كمان بس اول ما صحي الصبح فتح موبايله واتفاجأ بالرسالة
ولبس هدومه بسرعة وخرج وكل ده وهو بيحاول يتصل بيها لكن تليفونات مقفول
وفي الوقت ده كانت سما صحيت وراحت جامعتها وقاعدة في المحاضرة وطبعا نور عارف مواعيد محاضرات سما كلها وعارف أنها هتكون في الجامعة وفعلا راحلها الجامعة وكمان مراحلها مكان المحاضرة بتاعتها وخبط على الباب ودخل
الدكتور اللي في المحاضرة :- مين حضرتك وازاي تدخل كدة
نور وهو في قمة غضبه :- ................
__
ّ
رواية ( ومازال قلبي ينزف ) الفصل الرابع
__________________
البارت الثالث خلص لما نور دخل لسما المحاضرة
الدكتور راشد :- انت مين وازاي تدخل المحاضرة كدة
نور :- أنا نور عز وأظن اني خبطت قبل ما ادخل
الدكتور راشد :- طيب وحضرتك عايز إيه
نور :- عايز الآنسة سما عادل دلوقتي
الدكتور راشد :- نعم أنت مجنون انت داخل بالطريقة دي وعايز طالبة تخرج معاك من المحاضرة انت انسان
نور يقاطعه :- ما تغلطش لو سمحت انت متعرفش أنا مين وبعدين انا عايزها في حاجة مهمة لأن في إنسان بين الحياة و الموت وعايز يشوفها قبل ما يموت
(كل ده بيحصل وسما اساسا قلبها خلاص وقف مش مستوعبة ايه اللي بيحصل وقلقانة لأنها عارفة ان نور متهور )
نور :- يلا يا آنسة سما قومى معايا لو سمحتي
سما بتبص للدكتور وبتتكلم بتوتر :- دكتور هو أنا ممكن اخرج حضرتك يعني بعد اذنك
الدكتور راشد :- لو عايزة تخرجي اخرجي يا سما أنا هأذنلك تخرجي لأن المحاضرة قربت تخلص بس ياريت بعد ما تشوفي الإنسان اللي بين الحياة والموت تيجيلي مكتبي
نور وهو خلاص شوية وهينفجر وهاين عليه يشيل سما ويجري بيها على بره :- قالك امشي اتفضلي اخلصي
سما وهي بتقوم علشان تخرج بتبص للدكتور :- متشكرة يا دكتور
نور شد أيد سما جامد وخدها وخرج وهي ماشية معاه وهو بيشدها من ايديها جامد وكل اللي في الجامعة بيبصوا عليهم
سما :- ايه اللي انت بتعمله ده سيب ايدي الكل بيتفرج علينا انت اتجننت
( سما بتتكلم ونور ما بيردش عليها لحد ما دخلوا العربية ونور قفل الباب جامد بدرجة افزعت سما ولما هو عمل كدة سما بعدها ماقالتش كلمة واحدة لحد ما وصلوا المقطم
في مكان هادي متعودين ان لما يكون في مشكلة بينهم أو نور عايز يحكي حاجة مهمة لسما يروحوا المكان ده )
نور نزل من العربية ومشي وقف بعيد شوية و سما نزلت هي كمان وراحت وراه
سما :- ممكن افهم ايه اللي انت عملته ده وازاي تجرجرني زي الحمارة كدة من وسط المحاضرة
نور بصوت عالي :- علشان انتي فعلا حمارة وماينفعش معاكي غير كدة
سما :- نور مسمحلكش تعاملني كدة او تكلمني بالأسلوب ده وانا غلطانة اني جيت معاك هنا مع ان مافيش اى حاجة تربطنا ببعض سما قالت كدة وماشية من قصاده
نور مسكها من ذراعها جامد :- قلتلك قبل كدة مليون مرة لما اكون بكلمك ماتسبينيش ولا تديني ضهرك فاهمه وبعدين ايه الرسالة اللي انتي بعتهالي دي ها ممكن تفهميني ماتردي
سما :- والله الرسالة دي ردي على اللي انت عملته فيا اليومين اللي فاتوا
نور :- أنا وأنا عملتلك ايه ان شاء الله ضربتك رفعت ايدي عليكي
سما :- لا حضرتك بتتجاهلني ولا كأني موجودة وكمان غلطت في حقي ومافكرتش تعتذرلي وبعدها كمان لما أنا قلقت عليك حاولت اكلمك مردتش قلت يمكن مشغول بعتلك رسالة بردو ماردتش ورحتلك الشركة علشان اشوفك لقيتك نازل واتصلت عليك علشان تشوفني ونتكلم مع بعض فصلت التليفون ومشيت ولا كان في واحدة قلقانة عليك
نور :- سما انتي عارفة انتي عملتي ايه انتي رفعتي ايدك عليا انتي عملتي حاجة قسما بالله لوحد غيرك فكر بس يعملها ادفنه حي
سما :- أنا عملت كدة بسبب اللي انت عملته معايا انت اتجرات معايا زيادة عن اللزوم وده كان رد فعل طبيعي
نور :- هو فعلا رد فعل طبيعي لما واحد يعمل كدة مع واحدة لا تعرفه ولا يعرفها إنما انتي ملكي وأنا اعمل فيكي اللي انا عايزه فاهمه
سما بدموع :- لا مش فاهمه و مش من حقك تعمل كدة أنا اذا كنت بسمحلك تترمى في حضني فا دا لأنك بتكون محتاجله لما الدنيا تديق بيك بس ماكنتش فاكرة أن ده هيخليك تتجرأ على تصرف زي ده
نور قرب منها ومسح دموعها :- سما لو سمحتي ما تعيطيش أنا والله ما كنت أقصد احنا نعرف بعض بقالنا اد ايه عمري عملت كدة انا بس علشان مشتقلك اوى وانتي مصممه ما نتجوزش غير بعد ما تخلصي جامعة وأنا تعبت ومحتاجلك جنبي
سما :- ..........
نور :- خلاص بقا يا سما حقك عليا لو عايزاني ابوس رأسك ابوسها اهوه
سما :- بس بقى هو انت كل حاجة عندك بوس واحضان أبعد يا عم كدة
نور :- عم!!! تصدقي انتي رخمة بس بصراحة البوسة كانت جامدة ماتجيبي واحدة كمان
سما :- نور بطل لحسن والله ما تشوفني تاني
نور :- خلاص بهزر معاكي ايه مابتعرفيش تهزري بس يا سما ان عايز اقولك على حاجة
سما :- اتفضل قول اللي انت عايزه
نور :- انتي دخلتي حياتي عوضتيني عن وجود أمي اللي اتحرمت منها من وأنا صغير وعن الاخت اللي كان نفسي تكون عندي وبقيتي ليا كل حاجة
فيا ريت مش اى حاجة تحصل بينا تقولي هسيبك وأبعد عنك لأني مش هسمحلك تعملي كده حتى لو هتكوني ليا غصب عنك فاهمه
سما :- حاضر عمري ما هبعد عنك إلا لو انت اللي طلبت مني كدة
نور :- وأنا عمري ما هطلب كدة دا انا بعدت عنك اهوه يوم واحد وكنت هموت ولو حضرتك كنتي صبرتي شوية ووثقتي في حبي كنت هجيلك النهاردة واقولك حبيبتي الحقيني بموت من غيرك
سما :- بجد يا نور عمرك ما هتبعد عني وتسيبني
نور :- يا بت انتي سمايا وانتي عمري ومستحيل ابعد عنك ابدا ودا وعد مني
بااااااااااااك
نرجع للوقت الحالي
سما وهي بتفتكر الموقف دا نامت ومصحيتش غير على صوت المنبه وقامت وجهزت نفسها بعد ما صلت الصبح وخرجت فطرت مع أنس وراحوا على الشركة وأنس راح مكتبه وهي راحت عند قاعة الاجتماعات
سما قعدت فى الاستراحة مستنية الاجتماع وشافت واحد دخل وهو متوتر وبعدين خرج كلم السكرتيرة شوية وبعدين خرج في المكان اللي بيطل على الشارع واللي تقدر تشوف منه البنايات العالية سما راحت وراه وكلمته
سما بعد ما وقفت جنبه :- على فكرة مافيش حاجة تستاهل التوتر دا كله
الشاب :- عفوا انتي بتتكلمي معايا أنا
سما بفرحة :- ايه دا انت مصري أنا بحسبك ايماراتي أو لبناني
الشاب :- أيوة مصري ايه غريبة دي
سما :- لأ طبعا دي حاجة حلوة اوي انا مبسوطة ان في متدرب جديد مصري زيي
وبعدين انا ملاحظة أنك متوتر زيادة عن اللزوم دا حيالله اجتماع مش هتتشنق جوه
الشاب :- يعني انتي عايزة تفهميني انك مش متوترة
سما :- واتوتر ليه طالما واثقة في نفسي وفي شغلي وبعدين لو ربنا مش كاتبلي اكون هنا مش هكون هنا فعادي أنا راضية بقضاء ربنا
الشاب :- نظرية حلوة وأنا أتشرفت بمعرفتك ( ومد ايده ليها ) أنا ساهر
سما سلمت عليه :- وأنا سما واتشرفت بيك أنا كمان
ساهر :-انتي هنا من أمتي
سما :- من 5 دقائق أصلي حبيت اكون هنا قبل الاجتماع بشوية
ساهر ضحك :- أنا قصدي انتي بتشتغلي هنا من امتي
سما :- سوري بحسبك بتسالني عن الاجتماع أنا بشتغل هنا بقالي 35 يوم وانت
السكرتيرة جت :- الاجتماع بدأ يا فندم
سما :- نهار ابيض زمان المدير دخل يلا بسرعة علشان ما يخدش عننا انطباع غلط
(جريت سما على الاجتماع وهو ماشي وراها بيضحك ودخلوا قاعة الاجتماعا والكل قاعد مكانه بانتظار المدير ودخل ساهر وقعد على كرسي المدير )
سما لنفسها :- هو اهبل دا ولا ايه دا قعد على كرسي المدير
ساهر :- أحب اعرفكم بنفسي مستر ساهر المدير العام للشركة
سما لنفسها :- يا حلاوة
(ثم أكمل ساهر حديثه عن العمل وتم توظيفهم وتوقيع العقود بالعمل لمدة سنة في الشركة وخلص الاجتماع)
ساهر :- دلوقتي تقدروا تتفضلوا على مكاتبكوا بس استنى انتي يا بشمهندسة سما
سما :- أيوة يا فندم
ساهر بضحك :- لو كنتي وقفتي دقيقة كمان كنت قولتلك اني في الشركة بقالي سنتين وأنا المدير العام
سما :- حصل خير يا مستر ساهر عادي
ساهر :- طيب فرصة سعيدة يا آنسة سما وفي إي وقت تحتاجي حاجة أنا موجود
سما :- شكرا يا فندم عن اذنك
( سما بقت في القسم اللي أنس هو مديره وطبعا معاها تالين واليوم خلص وهي مع أنس في العربية وحكيت له على الموقف بتاع ساهر )
أنس :- هههههههههههههههههههههههههه يخرب بيتك يا مجنونة انتي أي حد تتكلمي معاه كدة 😂😂😂
سما :- ما خلاص يا عم خف شوية مش نقصاك هي
أنس :- عم مين يا ماما أنا رئيس القسم بتاعك يا شطورة 😏
سما :- الكلام ده هناك مش هنا يا اخوية
أنس :- بس يا بتاعة ساهر هههه دا انتي مسخرة وربنا
( اشتغلت سما في الشركة بكل ضمير وبكل طاقتها حتى وقت الراحة في الشركة ما كنتش بتاخده وكانت بتقعد تشتغل ومرت الأيام سريعة على الكل إلا سما بتعد الأيام والسعات وهي مستنية على أمل أن في يوم تلاقي نور قصادها يخطفها من دنيتها ويروحوا على الدنيا اللي كانوا بيحلموا بيها )
وفي يوم انس طلب من سما أنهم يروحوا يتغدوا مع بعض بعد الشغل بره وطلب منها تقنع تالين تروح معاهم وطبعا سما ماكنتش عايزة تخرج بس لما عرفت ان أنس عايز يتقرب من تالين فاضطرت توافق علشان تساعده
وبالفعل عرضت سما على تالين تتغدا معاها هي وأنس
تالين :- حبيبتي انتي وياه راح تتغدوا سوا ليش انا لحتى اكون عازول بيناتكم
سما :- هههه عزول مين يا ماما انتي أنس دا اخوية ومتربيين سوى
تالين بفرحه :- عم تحكي الصدق
سما :- يا لهوى ايه الفرشات والقلوب اللي ملت المكتب دي كلها
تالين :- شو عم تقصدي
سما :- لا ما تخديش في بالك واه يا ستي أنس اخوية يلا بقى
( وبالفعل نزلوا التلاتة مع بعض تالين وسما وانس وهما في الاصانصير قابلهم ساهر وطبعا ساهر عارف أنس وبيدردشوا مع بعض في أوقات لأنه بصفته رئيس قسم في تعامل بينهم كتير وساهر من الشخصيات اللي بتحب تتعامل مع كل الناس مش من المتحفظين )
أنس :- أهلا مستر ساهر ازيك عامل ايه
ساهر :- أهلا يا بشمهندس أنس أنا تمام الحمد لله ثم رحب بتالين وبص على سما وقالها
بشمهندسة سما ازيك
سما بتوتر وحرج :- الحمد لله ك كويسة الحمد لله
ساهر :- وياتري الشغل معانا عجبك أنا عرفت انك في القسم اللى بشمهندس أنس بيديره
سما :- الحمد لله الشغل تمام
( كل ده في الاصانصير وأنس واقف معاهم هو وتالين وأنس هيموت ويضحك وماسك نفسه بالعافية لأنه افتكر الموقف اللي سما حكيتهوله وأول ما خرجوا من الاصانصير وساهر استأذن ومشي أنس عند عربيته وقع من طوله من كثر الضحك )
سما وهي بتضرب أنس على كتفه :- قوم هتفضحنا الناس بتتفرج علينا بقى ده شكل مدير يا ناس
تالين :- طيب ممكن تحكيلنا انت ليش عم تضحك
أنس لسه بيضحك وبيشاور على سما وفي الاخر انس قام ودخلوا العربية وراحوا المطعم
سما :- ماشي يا أنس بس لما نروح البيت هخليك تضحك من قلبك
أنس وهو بيضحك :- ك ك ك كويسسة ههههه😂😂
سما :- كمان بتتريق عليا
تالين :- سما احكيلي انتي شو صاير
أنس :- اصبري بس انا هحكيلك وحكالها علي الموقف باختصار وفي الوقت ده كانوا وصلوا المطعم وتالين وأنس عمالين يضحكوا وأول ما وصلوا اتفاجئوا ان ساهر كمان بيتغدا في نفس المطعم
ساهر :- حلوة بجد الصدفة دي اتفضلوا بقى اتغدوا معايا
أنس :- لا مش عايزين نتطفل على حضرتك خليك مرتاح
ساهر :- لاحظ أن أذا كنت انت مدير قسم فأنا مدير الشركة اتفضل اقعد
( وقعدوا كلهم مع بعض وطبعا سما سابت تالين تقعد قصاد أنس وقعدت هي قصاد ساهر وعاملين يتكلموا )
ساهر :- بشمهندس أنس هو انت كنت بتضحك على ايه لما خرجتوا من الشركة أنا شفتك وانت قاعد وعمال بتضحك وبجد عايز اعرف ايه بيضحكك اوى كدة
أنس بص لسما اللي جابت ألوان احمر في اصفر وفضل يضحك
ساهر ضحك :- اوه أنا كدة عرفت انت كنت بتضحك على ايه ( بص لسما ) هو انتي حكيتيله الموقف
سما وهي بتبص لأنس بغيظ :- للأسف ايوة
أنس :- هههههه ماتبصليش كدة علشان بخاف
سما :- بتخاف معلش يا أخوية بس لما نروح بس شوف مين هيحوشك عني
ساهر :- ايه دا هو انتوا عايشين مع بعض
أنس :- للأسف عايش معاها في بيت واحد
ساهر :- وعلي كدةانتوا تعرفوا بعض من قبل ما سما تشتغل في الشركة
أنس :- طبعا سما أختي الصغيرة وأنا اللي مربيها على ايدي وأنا اللي طلبت منها تيجي تشتغل هنا
سما :- وأنا اقول انا طلعت مش متربية ليه اتاري بسببك
تالين :- لا بجد دي حاجة حلوة جدا
سما وأنس بصوا لتالين :- انتي اتكلمتي مصري
تالين :- طيب وشو المشكلة انتي معي بنفس المكتب صارلك شهرين ومستر أنس أنا من يوم ما وصلت الشركة من 6 شهور وهو بيحكي معي مصري وكمان انا عندي صحاب كتير مصريين
أنس بس لتأبين بانزعاج :- والصحاب دول يا تري بنات ولا شباب
تالين :- يعني من الصنفين مشكل
( في اللحظة دي سما سرحت وتاهت بتفكيرها وعنيها ظهر فيها حزن شديد ما حدش اخد باله منها غير ساهر اللي قاعد قصادها )
سما :- يا نهار ابيض أنا نسيت حاجة مهمة اوى فى الشركة ولازم أرجع أجيبها
أنس :- نعم ايه يا ماما الاستعباط ده احنا لسه جايين حاجة ايه اللي انتي نسيتيها
سما :- حاجة مهمة جدا خليكوا انتوا وأنا هجيبها و هروح
أنس :- لأ طبعا انتي ماتعرفيش حاجة هنا خالص اصبري شوية نخلص اكل كلنا ونمشي
سما برجاء :- أنس بلييييز خليني امشي والله هبقى كويسة ماتقلقش عليا
ساهر اتكلم قبل ما أنس يتكلم :- خلاص يا جماعة أنا هوصلك يا بشمهندسة سما أنا خلصت
أنس :- لا ما ينفعش نتعب حضرتك
ساهر :- لا مافيش تعب أنا هعدي على الشركة هخلص شوية بسرعة تكون هي جابت الحاجة بتاعتها واوصلها للبيت يلا يا بشمهندسة
سما :- خلاص يا أنس ماتقلقشي وأول ما اروح هكلمك
أنس :- خلاص يا سما روحي وخلي بالك من نفسك
( ومشيت سما مع ساهر وبقيت تالين مع أنس )
عند أنس وتالين
تالين :- طيب ليش هيك ما كنا رحنا وياهم
أنس. :- انتي هترجعي لليش وهيك تاني ليه خليكي في المصري شوية ممكن
تالين :- اوك
انس :- تالين ممكن اسالك سؤال
تالين* اتفضل اسأل
أنس :- انتي مرتبطة يعني في حد في حياتك
تالين :- لا مش مرتبطة ومافيش حد في حياتي
أنس :- طيب ليه انتي انسانة جميلة ومحترمة ومليون واحد يتمناكي
تالين :- صراحة ما بفكرش في الموضوع ده لانى عايزة ابني مستقبلي وابقى مهندسة كبيرة
أنس :- طيب بصي يا تالين من غير لف ودوران أنا معجب بيكي وعايز ارتبط بيكي
________________
في العربية عند ساهر وسما
ساهر :- مش عايزة تقولي هربتي ليه
سما :- هربت !! وأنا ههرب من ايه
ساهر :- على فكرة انتي مابتعرفيش تكذبي واللي جواكي بيبان في عنيكي
سما :- مستر ساهر ممكن تقف على جنب
( ساهر وقف بالعربية راحت هي نازلة ومشيت فنزل هو كمان مشي وراها بسرعة ومسكها من دراعها )
ساهر :- سما انتي بتعملي ايه استني
سما شدت أديها منه :- وانت مال أهلك زعلانة ولا هربانة ومالك باللي يبان في عنيا وبعدين انا اسمي البشمهندسة سما وغور بقى من هنا بدل ما اعمل فيك جريمة
سابته ومشيت وهو اتصدم من اللي هي عملته وركب عربيته ومشي هو كمان
______________________