البارت 4
(وعدتك وعد ما يترك الحر)
[صلي عالنبي ولا تخلوا الرواية تشغلك عن ذكر الله]
*
*
البارت 4 (الفاجعة )
.
.
ليان ووسن دخلوا الكوفي وجلسوا على طاولة ..
ليان تعدل الطرحة:مو كأنهم تأخروا ..
وسن :الحين بيجون ..
سارة وهنا دخلوا المكان يتلفتوا يمين يسار ..
سارة :وينهم ؟
هنا تأشر على احد الطاولات:هذولا هم..
سارة:ايي يله ..
اتجهوا لطاولة وسن وليان ..
إلتفتت ليان على البنات وقفت وهي تسلم:هلا والله..
سلموا على بعض ..
هنا :طلبتوا شي؟
وسن :لا
هنا :اي احسن عشان نبدأ نحوس..
ليان :ايوة بس قعدنا على اتفاقنا ..
هنا :ايوة يله مشينا ..
البنات:يله..
مشوا البنات لين وقفوا على محل ملابس ..
تكلمت ليان بحماس:بنات شرايكم ندخل ..
وسن:مو وقتك ..
سارة :عادي بندخل نعمل لفة ونطلع..
وسن:انا بروح الحمام من بتجي معي؟
هنا:بجي معك ..
وسن :يله..
سارة وليان قعدوا يدوروا لين وقفوا جمب محل..
ليان إلتفتت لسارة:تصدقي عاجبني فستان من ذا المحل شفته قبل شهر يمكن..
سارة :وليش ما اخذتيه..
ليان : كنت مستعجلة ابي اروح ،بس اذكر المحل..
سارة : ندخل؟..
ليان:تمام
.
.
قاعدة على جوالها ومندمجه..
فجأة تدخل أمها ..
غلا عدلت جلستها وناظرت في أمها:وش يماه؟
ام حاشد مشت اتجاه السرير وجلست فيه :ماغيرتي رأيك؟
غلا لفت وجهها بزعل:يمه خلاص لاتناقشيني..
ام حاشد بجدية: فكري زين واذا عالدراسة نخلي الزواج بعد الدراسة..
غلا:يمه خلاص انا مو مرتاحة لهالرجال والله يوفقه مع بنت الحلال بعدين انا مخطوبة مايصير تجي كل مرة تسأليني..
ام حاشد:مين المخطوب؟ انتي عايشة بوهم قديم الولد لا اجى ولاتكلم بموضوع الخطبة يعني ناسينا وناسيك..
غلا عبست:يممه!
ام حاشد بحدة:انا قلت الصدق الولد سافر المدينة قبل خمس سنين وللحين مارد ولاتكلم وحتى أهله ما أعلنوا ان ولدهم خاطب..
غلا وقفت وتكلمت بنبرة حادة: يمكن مشغول ،يمكن يفكر يأخر شوية لاتقعدي تعايريني يمه ..
ام حاشد باستغراب:انا اعايرك ؟
غلا أزاحت نظرها:ايوة وتبغي تغصبيني على حد ما ابيه..
ام حاشد ماقدرت تمسك يدها عن الكف ..
غلا ماسكة خدها بصدمة وتطالع الأرض..
ام حاشد بنبرة عالية:انا اعايرك يابنتي؟ ..اقوول بعدي هالأفكار من راسك وعزام هذا انسيه تراه مايصلح لك والله في ازين واحسن منه بس انتي ماتبي الستر..
غلا ناظرت أمها وتحركت شفتها عشان تبرر لكن سرعان ماوقفتها ام حاشد:اشش ولا كلمة ،انا استاهل اجيت اكلمك ..
غلا طاحت دموعها غصب عنها ..تكلمت بإنكسار :يمه تكفين ما ابي هالرجال..
ام حاشد:براحتك بس هذي اخر فرصة بعدها اذا تقدم لك اي حد وانا وابوك موافقين عليه مابناخذ رأيك..ناظري نفسك بتكملي الخمسة وعشرين سنة والوضع هذا مايرضينا ..
غلا واقفة تناظر أمها اللي طلعت من الغرفة وسكرت الباب ..طاحت وهي تبكي ماتدري كيف تتصرف ..تحس أمها قست عليها والدنيا كلها واقفة ضدها ..ناظرت جوالها اجتها رسالة من اخت عزام ..رمت الجوال ونطقت:كلكم زي بعض..
.
.
ليان تأشر على احد الفساتين :شوفي هذا هو !
سارة تدور بعيونها:وينه؟
ليان :هذاك هذاك الأسود ..
سارة طالعت :واو يجنن ..
ليان :قلت لك ..
سارة : بيطلع عليك روعة ..
ليان :ناخذه ؟
سارة:اي خذيه وش منعك؟
ليان :اوكي..
أشرت لواحد من العمال يطلع لها الفستان ..
جا العامل وطلع واحد :ذا مناسب؟
ليان:ايوة، في غرفة قياس؟
العامل أشر لزاوية المحل:ايوة هناك..
ليان اخذت الفستان:شكرا..
سارة :متأكدة من المقاس..
ليان :ايوة لاتقلقي..
سارة :يلا ادخلي وانا بنتظر هنا ..
ليان :تمام ..
.
.
أم حاشد دخلت الصالة طالعت ابو حاشد اللي جالس عالكنبة يتصفح كتاب ..
ام حاشد جلست قريب منه وتكلمت:ابو حاشد ..
ابو حاشد نزل نظارته وقفل الكتاب:وش قالت؟
ام حاشد تنهدت:عنيدة هالبنت..
ابو حاشد تجمدت ملامحه ونطق:انا أفكر ألغي هالخطوبة ..
ام حاشد طالعت زوجها بدهشة..
ابو حاشد كمل:صحيح ماهي خطوبة رسمية لكن شكل عزام مو عاجبه الوضع من البداية..
ام حاشد :طيب اش رايك تسأله..
ابو حاشد بحزم:لا أعوذ بالله انا بنتي ماهي لعبة عند أحد واللي مايبغاها بستين ..
ام حاشد نزلت نظرها:ايوة صحيح ..
ابو حاشد :خلاص اول ما أوصل المدينة بفتح الموضوع معاه وما أبغاه يناقشني ،غلا بنتي الوحيدة وابيها تكون مع واحد يحبها ويصونها..
ام حاشد :مابتاخذ رأيها ..
ابو حاشد رفع كفه:لا ولا تكلميها انتي بعد ..
ام حاشد زمت شفتها:امرك..
.
.
في المطعم ..
جلسوا البنات على طاولة ..
ليان تنهدت:اه تعبت ابي انام..
هنا:وانا لي يومين ما انام زي البشر ..
اجا الجرسون ومعاه الايباد:ها وش طلبكم ؟
سارة :انا ابغى شاورما ..
وسن :وانا زيك..
ليان :وانا ابي بيتزا ..
التفتت هنا للجرسون:ثنتين شاورما ووحدة بيتزا وسط..
بعد ما أخذ الطلب ..
ليان وقفت :بروح المغسلة ..
وسن :اجي معك..
ليان:لا خليك..
مشت للمغسلة لكن لاحظت حركة مألوفة...دققت نظرها وابتسمت بخفة :هذي رهف..
ناظرتها ليان وراحت تسلم عليها بابتسامه:هلا رهف وش هالصدفة الحلوة ..
رهف ابتسمت :هلا حبيبتي شلونك ..
ليان :بخير حياتي اجيتي مع البنات؟
رهف تلفتت حولها:لا اجيت مع اخوي ..
ليان :اها حلو ،يله نلتقي بالجامعة ..
رهف ناظرتها باستغراب :اا لحظة انتي مع مين جيتي؟
ليان :مع بنات عمي ..
رهف ناظرتها باستغراب:ااها..طيب ،انتي مادريتي عن شي؟
ليان ابتسمت مستغربة:وش اللي مادريت عنه ..
فجأة اجا اخو رهف :هيي رهف ..
رهف إلتفتت بارتباك:اا يله يله جاية ..
ليان طالعتها :يله مع السلامة ..
رهف لفت :مع السلامة..
وبسرعة راحت لعند أخوها ..
ليان هزت كتوفها وكملت طريقها للمغسلة ولاتعرف سبب تصرف رهف الغريب ..
رهف تكلم اخوها :شفيك هذي وحده معي بالجامعة ..
عزام زم شفته :اها طيب..
رهف عضت شفتها :بس يعني..
عزام :بس وش؟
رهف :هذي بنت سالم اللي قلت عليه..
عزام وقف وناظرها بحدة وإشمئزاز:وش قلتي ؟
رهف خافت من رده:بس شكلها للحين ماتدري..
عزام :وكمان تكلميها طبيعي..اقول اسمعي من اليوم انسي اللي بينك وبينها ...
رهف بربكة :حرام البنت ماسوت لي شي..
عزام بصرامة :كلمة وحدة هالبنت الحين ماهي من مستواك..
رهف ماتدري هل لازم تسمع كلام اخوها او لا..ولكن ماعندها خيار ثاني..هزت راسها بالموافقة ورجعوا لطاولتهم..
عائلة غانم الراعدي..
الاب :غانم متوفي
الأم :شريفة ٤٦سنة
عزام :ماسك تجارة ابوه وتاجر معروف 27سنة..
رهف:21 سنة تدرس إدارة أعمال.
.
.
حازم قاعد بين أصحابه ..
فجأة اجاه اتصال ..فتح الخط وسرعان ماعقد حواجبه بصدمة واستغراب:وش تقوول انت؟
وقف بارتباك ووجهه مخطوف من الخوف:الحين الحين..اي جاي ..قفل الخط ولف ظهره طالع من المكان ..طاح مفتاحه بالأرض ورجع ياخذه ..
واحد من العيال :وش فيك مفجوع !
حازم ناظره بنظرة ضياع وتوتر ..اخذ نفسه وطلع بدون مايرد عليهم ..
.
.
وسن أشرت للسواق يوقف السيارة ببداية شارعهم :هنا وقف ..
طلعوا وسن وليان من سيارة التكسي ليان استنشقت الهواء :اااه احس الجو اليوم حلو ..
وسن ابتسمت :نفس شعوري ..
ليان ضحكت بخفة وفي نفسها شعور غريب:ههه اول مانوصل بنام مابتلاقوني لين بكرة ..
وسن وهي تمشي:صدقتك بجي الساعة اربع وانتي صاحية ..
ليان رفعت حاجب:يعني انا كذابة ؟
وسن تخفي ابتسامتها:تقدري تقولي ..
ليان دفعتها بخفه :حمارة..
وسن ضيقت عيونها وكشرت بملامحها فجأة ..
ليان ناظرتها :وش فيك، عورتك؟
وسن بنفس النظرات:ذاك بيتنا
ليان قطبت حواجبها:وش ؟
طالعت بنفس الاتجاه وبصدمة :ايوة صحح..
وسن صرخت :وش جاب الشرطة؟ ..
ليان بهتت ملامحها :ياويييلييي...
رفعوا عباياتهم بيدينهم وسرعوا بالركض للبيت ..
ناظروا الشرطة المحوطة البيت ورجال الشرطة داخلين طالعين من البيت ويطلعوا العفش والأثاث لبرا..
ليان دارت الدنيا بعيونها ما كانت راضية تصدق اللي تشوفه.
طالعت يمينها وياليتها ماطالعت..ابوها كان مكبل وماسكينه اثنين رجال شرطة وأمهم منهارة بالأرض والدنيا متكالبة عليها..
وسن صرخت وهي تمسك راسها:يممممههه..
ركضت وسن لعند أمها ونزلت لمستواها وهي تصرخ بدون وعي :يممه وش فيي كلميني يمه انا ..
طالعت ابوها: اا يببه يبه ليش ماترد عليا وش يحصل ؟
ليان طالعت البيت اللي قضت فيه كل عمرها وعاشت فيه اجمل اللحظات بين أهلها..اجاها غضب شديد وهي تناظر الرجال اللي يطلعوا أثاث البيت ..ركضت لعند واحد منهم :هي اترك الكنبة هذي حقنا اتركههاا..
إلتفتت لواحد ثاني وصرخت عليه :هذا سرير حازم..
لكنها ماشافت منهم رد ..رجعت خطوتين لورا وهي تمسك على راسها وتهزه يمين شمال ..إلتفتت لعند أبوها ..
سرعان ماركضت ناحيته :يبه حرام عليهم شايف ايش سووا؟
سالم ماطالعها ،كان نظره للأرض وملامحه مو باينه ..
ليان صرخت لحد ما تأذت احبالها الصوتية :يببببه! لاا تخليهم ياخذوك،انت سالم الناصري لاترضى على نفسك يبه ..
وصل حازم للمكان ناظر الوضع بأكمله قلبه تفطر من هالمنظر المؤلم ..امه طايحه عالأرض وابوه مكبل واخواته منهارات..والبيت بحاله صعبه ..
توجه لعند ابوه :يبه الله يحفظك لاتنزل رأسك ارفعه يبه مثل مارفعت روسنا فيك يبه لاتنزله انا معك وكلنا معاك لاتخاف ..
سالم رفع راسه ودمعة ألم ارتسمت على عيونه رغم محاولته اخفائها..همس:حازم امانتك أمك واخواتك..
حازم باس راس أبوه :ولا يهمك يبه لاتوصيني عليهم ..
ليان طالعت حازم وشدت بقميصة وهي تتشهوق وبصوت مبحوح:حازم ماتشوف اللي يسووه فينا وفوق ذا ابوي ..والله ماسوى شي ليه يرضى على نفسه ..
حازم مسك يدها يهديها :لاتخافي ،الموضوع بينحل بس ابوي مايقدر يواجه الشرطة الحين..
وسن قامت وحضنت أبوها بكل قوتها ونفسها لو الدنيا توقف هنا..
ليان طالعت ابوها وبغت تتكلم لكن منعتها الغصة وغمضت عيونها بهدوء وكل الأصوات انخلطت عليها والطنين يزيد في مسامعها وبعدها ما حست بنفسها..
.
.
انتهى البارت ..
انتظروا القادم❤️🔥👀