وعدتك وعد ما يترك الحر - البارت 3 - بقلم ميس اليمامي | روايتك

وعدتك وعد ما يترك الحر [صلي عالنبي ولا تخلوا الرواية تشغلك عن ذكر الله] * * البارت 3 (مجرد توقيع) . . دخل حازم للمجلس وهو يعرج والصحن بيده .. حط الصحن بالأرض.. كشرت ملامحه بألم .. احمد :وش فيك تعرج .. حازم :كان في كاسة مكسورة بالمطبخ وانجرحت رجلي فيها .. صالح بضحكة:اكيد بتكون وحدة من الخدم ماتشوف.. فيصل ببراءة:لا انا شفت سعاد كانت بالمطبخ وطاحت كاسة من يدها .. حازم تجمد .. صالح انحرج ..وفيصل حس انه قال شي غلط .. . . ليان بضحكة :هههه تخيلوا واجي اشوف حازم متعور من الكاسة ورجله تنزف .. وسن تكمل الضحك:بعدين حازم لما يتعور يعصب ههههههه.. ليان :ايوة عصب علي لاني ضحكت .. وسن :ههههه.. سعاد تسمعهم والعبرة تخنقها من الاحراج ومن ضحكهم عليها.. ليان لاحظت سكوتها :سعاد وشفيك؟ سعاد بصوت مخنوق:ولا شي.. ليان باستغراب:زعلتي! وسن :ترا ماقلنا شي .. سعاد مشت بتطلع :بروح الحمام.. طلعت سعاد وهي مخنوقة ماتدري هل هي زعلانة من ضحك البنات عليها أو من الاحراج اذا حازم عرف انها كسرت الكاسة .. تلخبطت مشاعرها وصار ودها تطلعها على شكل دموع مثل ماتعودت.. بدون ماتحس مشت للممر اللي يودي للحوش والهواء صار يلعب بشعرها ونزلت منها دمعتين.. بنفس الوقت.. صالح كان يكلم صاحبه عالجوال ..شاف سعاد واقفة من بعيد ..فار دمه ونطق ينهي المكالمة :يله بعدين اكلمك .. قفل الخط ومشى بسرعة جنونية وحس الغضب سيطر عليه ..قرب ناحية سعاد ومسكها من ذراعها بقوة وهو ينطق مع تشديد الحروف:اش عندك هنا يله انقلعي لداخل .. سعاد اللي مفجوعة من ظهوره المفاجئ نطقت بنبرة مرتجفة:اشفييك انت الثاني ! صالح رفع نظره لفوق وهو يتمتم ..رجع ناظرها بجد:انتي وش طلعك والبيت فيه شباب ماتستحين شوفي وش لابسة .. سعاد ناظرت لبسها بعبط:وش فيه؟ فستان طويل ! صالح رفع صوته :ولو حد شافك؟يله انقلعي لفوق .. وفك قبضة يده من ذراعها .. سعاد مسكت مكان قبضته بألم:آي خسيس .. ومشت لفوق بسرعة قبل لاتنفجر قدامة .. صالح واقف مكانه يناظرها تصعد مع الدرج ..مايدري وش تفكر اخته .. اخذ نفسه ورجع للمجلس بهدوء .. . . بعد ثلاث ايام.. خالد دخل على مكتب مديره عزام .. عزام إلتفت له:هلا خالد .. خالد جلس على كرسي :والله جيت اسأل عن المشروع ولوين وصل الاتفاق.. عزام :كل شي مشى على المسطرة ..امس رحت لشركة سالم اجتمعنا واتفقنا على كل شي باقي يوقعوا على الأوراق .. خالد ابتسم ودق صدره:ماعليك انا اروح لهم اليوم اخلي كل واحد يوقع وكل شي تحت عيونك .. عزام :انا واثق فيك تنوب عني .. خالد اتسعت ابتسامته :وانا عند حسن ظنك..يله استأذنك .. عزام :اذنك معك .. طلع خالد وعزام ارتكى عالكرسي وافكاره تجيبه وتوديه ..قطع سرحانة صوت رنة اتصال .. فتح الخط بسرعة :هلا ..اهلين خالي ..الله يحييك ..جاي فسحة...طيب تعال اقعد عندنا ..لا ضروري ...ماعليك زود ..الله يحييك بأي وقت ..يله مع السلامة .. وقفل الخط .. . . ابو حاشد قفل المكالمة وناظر بشنطته حق السفر .. تنهد وهمس :وين بلاقيك ياسالم .. دخلت زوجته الغرفة وبيدها كوب قهوة ..أعطته لابو حاشد :سم.. ابو حاشد:سم الله عدوك .. ام حاشد جلست بالكنبة :وش صار مع ولد اختك .. ابو حاشد :الحين اتصلت عليه وكلمته رحب فيني شكلي بقعد عنده أول يومين .. ام حاشد :وليه مو كل المدة؟ ابو حاشد :ما احب أثقل حتى لو بيت اختي .. ام حاشد :اي احسن.. . . سلطان واقف مكانه ينتظر الشخص اللي تواعدوا يتقابلوا .. اعتدل بوقته وهو يشوفه يقترب ناحيته تكلم :شلونك خالد.. خالد ناظره ببرود:بخير ..ندخل الكوفي .. سلطان بتردد:اا اي .. دخلوا الكوفي وجلسوا على أقرب طاولة .. خالد:وش جابك ؟ سلطان باستغراب:مو انت اللي قلت لي اجي ؟ خالد :بس انت مارديت على رسالتي الصباح.. سلطان :والحين انا وش قدامك ؟ خالد :اي بس لاتعيدها.. سلطان لوى شفته بسخرية: حاضر سيدي.. خالد ناظر سلطان بجد:وش جمعت لي ؟ سلطان ارتبك ومن ثم ابتسم ابتسامة غريبة :احلا تجميعة .. خالد :وش؟ سلطان طلع من شنطة الظهر ملف وحطه قدامه.. خالد ناظر الملف بلهفة:وش ذا ؟ سلطان :هذا ملف عن حازم .. خالد بهتت ملامحة:وش اللي حازم ..وين اللي قلت لك ابغى شي عن سالم؟ سلطان :وش دخل سالم؟ من البداية انا قلت لك ابي اقهر حازم مب عمي سالم ؟ خالد زم شفته ،رجع ناظر الأوراق واخذها بهدوء ،نطق :وش هي بالضبط ؟ سلطان:مدري وش بالضبط بس شكلها أوراق رسمية بتفيدك بتوريط حازم..انا صورتها بجوالي وطبعتها لك .. لاتنسى أبغاه يتأدب ويعرف مقامه .. خالد ابتسم من طرف فمه وهو يتصفح الأوراق :هه من ذي الناحية لاتخاف ..ومو بس حازم حتى ليان .. سلطان قطب جبينه فجأة وقف:لحظة ..ووش دخل ليان؟ خالد ابتسم بخبث :لا لا بس بخليها تشوف اخوها مقهور وتنكسر عليه .. سلطان رجع يجلس ،ناظره بشك: خالد ! امشي على اتفاقنا وليان لاتقرب صوبها .. خالد رفع حاجب وببرود:لسى تحبها .. سلطان عض شفته وهمس:اكرهها .. وقف:يلا انا رايح .. . . ليان قاعدة بغرفتها تكلم بالجوال.. اعتدل بجلستها وهي تنطق بحماس:ومتى الطلعة؟...اقول لك خليها بعد العصر عشان نطول ....لا بكلمها ..سارة وش فيك ؟...مافي داعي لصديقاتك خليها مرة ثانية ...ايوة...اول شي المول وبعدين حديقة ولا ملاهي ... اي حلو اصلا الدراسة قربت ..اوكيه يلة باي.. قفلت المكالمة وهي مبتسمة بفرح..نطت من سريرها وطلعت من الغرفة .. . . قاعد بالأرض ومشاعر القهر تكسيه..ناظر قضبان الحديد اللي مانعته يطلع من ذا المكان ..تنهد بضيق وهو يحسب بأصابعه:٧٥..٧٦..٧٧.. ابتسم بفرح مابقى إلا ثلاث أيام ويطلع من السجن .. فز على صوت احد المساجين :هيي عطني المخدة اللي تحتك .. عبد الله ناظر المخدة اللي جالس عليها ورجع طالعه :خير ماتستحي على وجهك ..وين مخدتك انت.. السجين رفع حاجب باستهزاء :ترفع صوتك علي ! اقول قوم احسن لك مخدتي ماعاد تنفع .. عبد الله:مابعطيك ياخي ماهو غصب .. السجين ضحك بصلابة:هههه .. دفع عبد الله لورا واخذ المخدة .. عبد الله طايح مصدوم من وقاحة الرجال .. تكلم بغضب وهو يقوم :اسمع ياقليل الحياء انا مابسكت لك ذي المرة زودتها .. تقدم لعنده لكن اثنين من أصحاب الرجال صرخوا عليه بصوت واحد يدافعون عن صديقهم.. عبد الله رجع خطوتين لورا وهو يهمس :الله ياخدكم .. . . خالد طلع من مكتبه متجه لمكتب عزام ..دخل بعد ماطرق الباب .. جلس على الكرسي بابتسامة واسعة .. عزام :خير ان شاء الله.. خالد:عندي لك خبر ..في شركاء اجانب يبغوا يدخلوا معنا شراكة .. عزام عقد حواجبه :من أي شركة .. خالد :شركة( ....). عزام:ووش الفايدة ؟ خالد :مبلغ ضخم .. . . سالم بمكتبه .. رد عالمكالمة ؛هلا عزام .. عزام :في فرصة ذهبية ولازم مانفوتها .. سالم :وش في؟ عزام:في شركاء اجانب يبغوا يدخلوا معنا شركاء والمبلغ اللي حاطينه مغري وذي فرصة حلوة.. سالم :اها وكيف سمعة الشركة .. عزام :هذولا من(...)هذي شركة معروفة واذا دخلت معنا ترى لنا فايدة كبيرة .. سالم :اي اعرفهم ،طيب ومتى نقابلهم .. عزام :الشركاء الاجانب مستعجلين عشان كذا في اجتماع طارئ بشركتي بعد ساعة يحضر فيه كل الشركاء.. سالم :يله ان شاء الله .. عزام :يله انا ببلغ البقية .. . . وسن قاعدة بالصالة بيدها صحن فواكة .. نزلت ليان من غرفتها ..ناظرت أمها ووسن..جلست جمب وسن وارتكت على الكنبة ..أخذت من وسن عنقود عنب وهي تقول:وسن تجهزي .. وسن طالعتها بغضب :ليش اخذتيه؟ ليان قطبت جبهتها وطالعت العنقود:وش فيها ! وسن ازاحت نظرها :والله! ام حازم وهي تقلب بالتلفزيون:ليان اتصلي على فيصل خليه ياخذكم مع السواق لاتروحوا لوحدكم .. ليان:وحازم وينه؟ ام حازم:راح مع ابوك اجتماع بشركة عزام.. ليان:خلاص الحين اتصل على فيصل.. ليان دقت عليه تنتظر رد .. . . فيصل قاعد بالملعب تبع الحي ،فجأة وهو وسط الانسجام باللعب اجاه اتصال ..طنش وهو يكمل لعب بكل حماس ..جات الكورة لعنده وعلى طول ركلها بكل قوته وسدد عالمرمى ..صرخ فريقه بفرح:جوووووول... فيصل مسح على جبهته بتعب ..انعادت رنة الاتصال من جديد، ..طلع جواله شاف اسم ليان ينور الشاشة ..تأفف :وش معاها ذي ؟ فتح الخط :ها وش تبغي ؟ ليان :امي قالت تجي بعد نص ساعة .. فيصل عقد حواجبه :انا قاعد ألعب مو فاضي .. ليان :إلا فاضي .. فيصل صرخ :الله ياخذ ابليس .. وقفل الجوال ورجعه لمخباه .. تكلم واحد من أصحابه:وش عندك ؟ فيصل ابتسم بحماس :نكمل لعب .. . . دخل سالم الإجتماع بثوب راقي ومنظر مهيب والى جانبه حازم ..طالع الحاضرين.. عزام جالس يترأس الطاولة والباقي ناصر وماجد ورجال من الشركة الأجنبية وكان خالد جالس وإلى جانبه رجال بنظارة رفيعة وابتسامة باردة.. ألقوا السلام والكل رد عليهم .. عزام :حيا الله استاذ سالم الحين الكل موجود.. سالم :حياك ياولدي.. خالد بابتسامة :هذا الأستاذ فهد المحامي الممثل للشركة الأجنبية سالم مد يده يصافحه:تشرفنا.. فهد هز رأسه بهدوء:الشرف لنا، أستاذ سالم. مشروعكم واعد جدًا. الكل جلس بعد ما تصافحوا.. عزام بدأ يتكلم :بما إن الأجتماع مستعجل كل شي بيتم بسرعة على إتفاقنا .. الكل هز راسه بالموافقة .. وبدأ النقاش بشكل مرتب ..كل واحد يقول اللي عنده .. المحامي فهد:الحين تم الإتفاق على المبالغ باقي نكتب أوراق العقود .. فهد فتح الملف الأزرق،كل الأوراق مرتبة، أختام، جداول أرقام تبهر .. فهد وهو يقلب الصفحات إلتفت لسالم :استاذ سالم الاتفاق واضح... شركتكم تدخل بنسبة كبيرة، والعائد خلال ستة أشهر فقط.. سالم ابتسم بثقة: أعرف شغلي زين... فهد أشار لبند وسط الأوراق: هذا بند الضمان المالي، إجراء روتيني مجرد إجراء شكلي لو حصل أي تأخير.. سالم ما ركز..لكنه يعرف طبيعة شغله .. سالم وهو يسحب القلم:طبيعي كل الصفقات فيها ضمان.. خالد قرب له الملف: هنا بس.. سالم وقّع..ثم ختم.. مرت لحظة صمت والكل يناظر الأوراق وينتظر دوره.. فهد جمع الأوراق بهدوء وابتسامة خفيفة .. خالد نظر لسالم نظرة قصيرة مافهمها سالم لكنها كانت تعني الكثير.. إلتفت لعزام:وانت استاذ عزام أيضا شركتكم عليها نسبة كبيرة والمردود لها أكبر .. أعطاه الورقة والختم :خذ وقع.. عزام اخذ الورقة ووقع وختم عليها .. . . انتهى البارت يا حلوين 😘 احبكم واتمنى تدعموني بتصويت وتعليق لأنها أول رواية انشرها ..