الفصل 1.2.3
*ـرواية: `المشاكسه_و_العنيد`🦋*
… `(1/2/3)`
#المشاكسه_والعنيد 1
لو سمحت انا كل حاجتي اتسرقت موبايلي وفلوسي وكل حاجه ومش عارفه اروح ممكن تقطعلي تذكره علشان اعرف اروح بس
بص ع الموبايل ال ف ايدها بتعجب
ارتبكت وحطته بسرعه ف جيبة السويت شيرت ال لابساه وقالت بإبتسامه مصطنعه وتوسل
: بعد إذنك يعني
مردش عليها وسابها ومشي
جريت ووقفت قدامه وقالت بغضب
: دقيقه حداد ع الرجاله ال ماتوا ف الحرب
سابها ومردش عليها
قعدت تاني ع الرصيف بإحباط بتفكر هتعمل اي
طلع من بوابة قطع التذاكر بص عليها لقاها قاعده ع الرصيف قرب منها بدون كلام
وقفت وقالتله : عايز اي
لزق التذكره على جبهتها وقال : مع ان لسانك طويل ومتستهليش
وسابها ومشي
مسكت التذكره بسرعه قبل ماتطير وجريت ناحيته وقالت
: كنت عارفه انك إنسان محترم
سابها ومشي
جريت ومشيت جمبه وقالت : كنت عايزه اعرف بس التذكره دي تودي فين
قالها : انتي عايزه تروحي فين
قالت بتفكير: مش عارفه
يوسف : انا كنت عارف م البدايه انك بتلعبي
طيف : لا لا انا بجد كنت محتاجه التذكره
يوسف : طب وسعي كدا ياانسه علشان القطر هيمشي
طيف لحقته وركب القطر وراه وقعدت جمبه وقالت: هي آخر محطه القطر رايحها فين
يوسف : ياصبر ايوب انتي عايزه تروحي فين مش فاهم
طيف : عايزه اروح المنيا
يوسف بضيق : انا نازل المنيا اقعدي ساكته بقى علشان انا خلقي ف رقبتي وكلمه واحده زياده هشيلك ارميكي تحت القطر تمام
طيف بتعجب : ياساتر اي العنف داه
يوسف: ها بتقولي حاجه
طيف بإشاره : تؤ تؤ
بعد شويه
طيف :هو ممكن أسأل سؤال
يوسف: لا
طيف : هو انت متعصب اوي كدا ليه
يوسف : ملكيش دعوه
طيف : واضح انك بتمر بظروف صعبه تعرف انا كمان بمر بظروف منيله بستين نيله
يوسف : معتقدش انها انيل من الظروف ال انا بمر فيها
طيف بحزن وإحباط : جايز
يوسف بصلها وقال بتعجب : شكلك بنت ناس يعني اي ال ممرمطك ف سكك القطر كدا
طيف همست له قائله : اصل انا هربانه
يوسف بتعجب: هربانه !
طيف : ايوا هربت علشان عمتو عايزه تجوزني لإبن صاحبتها غصب عني يرضيك اتجوز قرد
يوسف بنظره صادمه : قرد ! هي عايزه تجوزك قرد
طيف : لا بس ال عايزين يجوزوني ليه شبه القرد بالظبط متفرقهمش عن بعض
يوسف : طب ماتقوليلهم انك مش موافقه
طيف بإحباط : قولت كتير محدش عايز يسمعني وعمتو من يوم مابابا مات وهي بتقول انه كان موصيها عليا ولا يمكن تسبني الا لما تجوزني
يوسف بتعجب : بس الهروب مش حل خالص
طيف : مانا لما اكتشفت انه مش حل قررت ارجع اهوه ومش بإيدي حاجه تانيه
يوسف : تعرفي ان موضوعك شبه موضوعي
طيف بلهفه : عايزين يجوزك لواحد شبه القرد بردو
بصلها بإشمئزاز
طيف : اقصد واحده شبه القرده
يوسف : ياريت شبه القرده دي حاجه كدا شبه الزومبي مفروض يخوفوا بيها العيال الصغيره
طيف بخوف : ياماما طب وانت مرفضتش ليه
يوسف : بحاول مع امي مش راضيه ومنزلاني من السفر مخصوص علشان نقرا الفاتحه وتبقى خطيبتي رسمي
طيف بحزن : حاسه بيك يااسمك اي هو صحيح انت اسمك اي
يوسف بحده : إحنا هنتصاحب ولا اي بصي قدامك تاني
طيف ربعت ايدها بضيق وبصت قدامها وهي بتقول: هو احنا ف لجنه ولا اي
يوسف رجع راسه لورا وغطا وشه بالكاب ال كان لابسه وقال : انا هنام مش عايز اسمع صوتك خالص لحد مانخلص
بعد شويه راح ف النوم وهي بدأت الأفكار الشيطانيه تهل عليها قالت لنفسها
:راجع من سفر واكيد معبي محفظته ولو فيها فلوس انا كدا ممكن اهرب اسبوع بحاله ومعايا فلوس تكفيني
بدأت تمد أيدها ناحية جييه بتسلل
يوسف حط ايده ع ايدها وقال بثبات وهو مغمض عينه : اياكي تفكري تعملي كدا علشان انتي متعرفيش انا ممكن اعمل اي
طيف شدت ايدها ورجعت لورا بخوف وقالت بهمس: دا مركب عين تالته دا ولا اي
يوسف : ششششش عايز انام
بعد مده صحي من النوم وبص جمبه يمين وشمال ملقهاش حط بسرعه ايده ع جيبه طلع محفظته واطمن ورجع لورا
: اخيرا خلصت منها دا زي مايكون كان كابوس
فتح محفظته وبدأ يبص على أول صوره بنظره رومانسيه
فجأه لقى ال بتقوله
: حبيبتك دي
بص بسرعه جمبه لقا طيف قال بتعجب
: انتي تاني
قعدت ومدتله عسليه وقالت: كنت بجيب عسليه
يوسف بضيق زق أيدها لبعيد وقال : مش عايز
فتحة العسليه وقالت : وفرت
يوسف رجع سرح ف الصوره ال ف ايده
طيف وهي بتاكل: شكلك بتحبها اوي
يوسف بحزن: حصل
طيف : طب ماتتجوزها
يوسف : اتجوزها ازاي بس وامي مش موافقه
طيف وهي تأكل : اي رجالة آخر الزمن دي انت راجل يعني محدش يقدر يغصبك ع حاجه
يوسف بضيق : خليكي ف حالك يااسمك اي
طيف وهي بتاكل العسليه : طيف اسمي طيف
يتبع.......
#المشاكسه_والعنيد 2
: وصلنا يلا قومي انزلي قبل القطر مايتحرك
طيف وهي بتفرك ف عيونها : المانيا دي
يوسف : اسمها المنيا مش المانيا انا نازل
وسابها ونزل
لحقته بسرعه وقالتله : شكراً ع تمن التذكره
يوسف : مكنتش تذكره ب 12 جنيه روحي روحي يلا وبطلي تلحقيني انا زهقت منك وجبت اخري خلاص
وسابها ومشي
وقفت تكلم نفسها
: تصدق انا غلطانه فعلاً
بصت حواليها لقت الناس رايحه وجايه قالت بإحباط
: عمتو هتعمل مني صوابع كفته اقولها انا كنت فين دلوقتي
اتنهدت وفتحت موبايلها أخيراً لقت اكتر من 30مكالمه فائته
فجأه موبايلها رن ردت وقالت : عمتو حبيبتي وحشتيني اوي
عمتها : انتي فين دانا هطلع روحك العريس ع وصول وانتي اختفيتي روحتي فين بجالك 6ساعات
طيف بإرتباك: كنت كنت
عمتها : انتي هتأتأي انطقي انتي فين
طيف بخوف : بصراحه انا ف محطة القطر تعالي خديني
"ف المنزل"
:انتي يابت يامجصوفة الرجبه كنتي بتعملي اي ف محطة القطر انطقي
طيف بوجع : ياعمتو استني هفهمك بس بالراحه سيبي شعري بقى
: دانا هقطعهولك
طيف بوجع : يعني يرضيكي اروح للعريس قرعه عايزاهم يقولوا العروسه القرعه اهي ماتقولي حاجه ياماما
والدتها : بصراحه تستاهلي حد قالك تسيبي البيت وتمشي
طيف : خلاص ياماما شكراً متقوليش حاجه
عمتها : انطقي كنتي فين
طيف بوجع : طب سيبي شعري وانا هتكلم
عمتها سابتها وقعدت وهي بتاخد نفسها من الزعيق والعصبيه وقالت
: انطقي اتكلمي هتموتيني منك لله
طيف عدلت شعرها وقالت: بصراحه كدا انا كنت ناويه اهرب
عمتها : يامصيبتي تهربي انتي اتجننتي يابنت سليم فينك يا اخويا تشوف بنتك بتعمل فينا اي
طيف بإحباط : ماانتوا ال عايزين تجوزوني عافيه
عمتها : البنت عندنا ف الصعيد لو عدت العشرين تبجي بايره يابايره
طيف : طب ماتسبوني ارجع القاهره البنت بيسموها بايره لما تعدي الاربعين كدا
عمتها بحده : انتي بتتمسخري علينا مش مالين عينك إحنا امال داحنا مصدقنا نلاقي حد يرضى بيكي اطلعي بسرعه جهزي نفسك فاضل نص ساعه والضيوف يكونوا هنا
طيف بذمجره : يوووه بقى
والدتها بحده : ع أوضتك إنجزي
_______
في منزل يوسف
ياماما افهمي انا بحب واحده تانيه مش عايز اتجوز ال انتي جيباهالي دي
والدته: عيب يايوسف انت مش صغير ع الكلام داه وانت عارف ان البنت بتاعت اسكندريه دي انا مبحبهاش
يوسف قعد وقال : مش لازم انتي تحبيها انا بحبها
والدته بحده : جوازك م البنت دي هيكون ع جثتي
يوسف بضيق: طب من الآخر كدا انا مش هينفع اتجوز البنت ال انتي عايزه تجوزهالي وانا مبفكرش ف الجواز دلوقتي تمام
والدته قعدت جمبه وقالت بصدمه: وه كبرت يايوسف وبقيت تعصى كلام امك قعدتك ف القاهره نستك الأصول باين يعني دا جزاتي بعد ما بعتك تتعلم هناك وكمان سبتك تشتغل هناك وكل طلباتك كانت أوامر ، بتردلي الجميل وتطلعني صغيره قدام الناس ال مستنيانا دانا جوزت اخواتك كلهم محدش فيهم قالي بتعملي اي ياأمي ع العموم تشكر ياحبيبي
لسه هتقوم قام يوسف مسك ايدها وقالها : انا مش عايزك تزعلي مني بس انا موافق اعمل اي حاجه الا موضوع الجواز داه
والدته : طب تعالى ع نفسك وشوفها وبعدين أحكم انا متأكده انها هتعجبك عندك اخواتك الصبيان كلهم انا مجوزاهم ومرارتهم زي البدر بينورا ف الضلمه خدها وع ضمانتي
يوسف: ياما انا مبتكلمش ع الشكل في حاجات تانيه لازم تكون ف شريكة حياتي اولها اني اكون بحبها
والدته: بلا حب بلا كلام فاضي البنت متعلمه علام عالي وبنت نسب وحسب وحلوه وكانت جايه زياره لعمتها هنا وانا شوفتها والبنت عجبتني وقصر الكلام بقى علشان مبقاش فيا حيل للمناهده هتيجي تشوفها ولا هتعصى أمري
يوسف بتردد: بس ..
والدته وقفت وقالت : مابسش البس هدومك وانزلي علشان منتأخرش ع الناس
يوسف بإحباط : حاضر يااما
_______
"في منزل طيف"
طيف دخلت بصنية العصير تقدمها للضيوف
والدة يوسف بفرح : اهلا بعروستنا اهلا
يوسف رفع وشه علشان يشوفها قال بصدمه
: هو انتي !
طيف بصتله وقالت بصدمه : هو انت!
عمتها : مالكوا ياحبايبي في اي
طيف حطت الصينيه وقالت : بس مش دا ال ورتوني صورته
يوسف : ايوا فعلاً مش دي ال ورتوني صورتها
ضحكوا كلهم
والدة يوسف : ههههه احنا قررنا نعمل فيكوا مقلب ونوريكوا صور مختلفه بس اي رأيك ف العروسه قمر مش كدا
يوسف بصدمه وهو ينظر لطيف : اه مانا واخد بالي
طيف بصدمه : دا اي المصيبه دي
عمة طيف : قومي ياام يوسف عايزه اوريلك حاجه
وقامت غامزالها علشان يسيبوهم لوحدهم
أول ما باب الأوضه اتقفل عليهم قاموا الاتنين من مكانهم ووقفوا قصاد بعض
بصوا لبعض بحده ولمدة ثواني
طيف : استوب اي جو الدراما الهندي داه اقعد اقعد
يوسف قعد وقال : دانا كان عندي اعمل حادثه واتفرم تحت عربيه ولا إني اتجوزك
طيف بسخريه : دا ع اساس اني هموت واتجوزك مش كدا
يوسف : بقولك اي لا انتي طيقاني ولا انا طايقك يبقى نخلص الموضوع داه وتقومي تقوليلهم مش عايزاه
طيف : ياسلام طب ماتخلصه انت وتقول مش عايزها
يوسف : انا قولتلك اني والدتي مش موافقه ومصره تجوزني ليكي
طيف : وانا عمتو بردو مصره تجوزني ليك
يوسف : طب واي الحل
طيف : الحل اننا نسبتلهم اننا مش مناسبين لبعض وبكدا يقتنعوا ويفركشوا الجوازه
يوسف : وهنعملها ازاي دي
طيف مدت ايدها ليه
يوسف بتعجب سلم عليها
طيف شدة ايدها وقالت: اي احنا هنتصاحب بقولك ايدك على ألف جنيه عربون
يوسف : نعم يااختي الف اي
طيف بغرور : اهو علشان نعم يااختي دي بقوا الف ونص
يوسف : انتي بتهزري فلوس اي ال انتي عايزاها بالظبط
طيف بغرور: مش هخلصك م الجوازه دي وهجوزك حبيبتك ودا عايز مجهود وانا بحب استغل الفرص بصراحه
يوسف : مانتي معايا ف نفس المركب هنهزر
طيف : لا يابابا انا مش فارق معايا انا لا عندي حبيب ولا قريب وموافقه اتجوزك عادي ف هاتجيب الفلوس ولا اطلع اقولهم موافقه
يوسف : انا شكلي وقعت مع واحده مش سهله
طيف بضحك : باين الست الوالده بتحبك اوي علشان كدا وقعت فيا
يوسف بضيق: اسكتي خالص
وقام مطلعلها الف جنيه ومديهولها
طيف بعد ماعدت الفلوس قالتله ناقص 500
يوسف : ال 500 دول هتاخديهم بعد المهمه ماتخلص
طيف بتفكير : اممم تمام اتفقنا
حطت الفلوس ف جيبها وقامت بدون اي مقدمات مصوته
يوسف بذهول : اي دا في اي
دخلوا اهلهم بسرعه
طيف بتمثيل وبكاء اترمت ف حضن والدتها: ضربني ياماما ضربني
والدة يوسف : اي ال انت عملته داه يايوسف
عمة طيف: معقول تمد ايدك عليها من دلوقتي
طيف رفعت راسها وقالت بصدمه : يعني المشكله ف دلوقتي لكن بعد كدا عادي
وبعدين راحت مكمله عياط وقالت: انا لا يمكن اتجوزه لا لا لا
وقامت غمزاله
يوسف بإرتباك : ايوا انا ضربتها علشان اشوف هتقدر تستحمل الضرب بعد كدا ولا لا مش هتبقى مراتي ولازم اخد بالي من كل حاجه
والدتها: انت اتجننت وجي تمد ايدك ع بنتي وف بيتي كمان اي التهريج دا ياام يوسف
والدة يوسف : ياجماعه اكيد سوء تفاهم يوسف ابني مبيعرفش يضرب قطه هيضرب بنتكوا ازاي ماتقول انك بتهزر يايوسف
يوسف : لا مبهزرش ياماما انا فعلاً ضربتها وانتي عارفه لما الحاله بتجيلي اي ال بيحصل
طيف ببكاء وتمثيل : وكمان بتيجله الحاله عايزني اتجوز واحد مريض دا لايمكن يحصل
عمتها : حالة اي دي كمان ياام يوسف
والدة يوسف: انا زي زيكوا معرفش حاجه حالة اي دي ياواد
يوسف : الحاله ياماما الحاله انتي هتفضلي مخبيه ع الناس لحد امتى خلاص احنا هنناسب بعض ولازم كل حاجه تبقى واضحه م البدايه ولو مش عاجبهم خلاص كل واحد يروح لحاله
طيف : ايوا طبعاً مش عاجبنا
يوسف : اشطا اوي سلام عليكوا
طيف : وعليكم السلام متجيش عندنا تاني
والدة يوسف : وه استنا ياواد
يتبع........
حاجه خفيفه كدا يارب تعجبكوا💙🙈
بقلم #Malak_mohamed
#المشاكسه_والعنيد 3
"في قاعة الأفراح "
طيف وهي تنظر حولها بذهول
: هو انا قولت اني هفركش الجوازه دي وقومت مشوحه بإيدي كدا
يوسف وهو ينظر حوله بصدمه أيضاً
: تخيلي
طيف بصدمه : وانت ازاي صدقتني
يوسف : علشان غبي
طيف : كان قلبي حاسس
يوسف : انتي تخرسي خالص
________
في المنزل
طيف ويوسف قاعدين ع الأرض وكل واحد حاتط ايده ع خده
يوسف بإحباط : انتي عليكي ألف جنيه ليا
طيف بإحباط : احنا ف اي ولا ف اي
يوسف : هو مش انتي سبب ال احنا فيه داه قال انا هفركشلك الجوازه قال
طيف : ماهو بردوا مكنش لازم تصدقني اذا كنت انا مبصدقنيش
يوسف بغيظ : وانتي جايه تقولي دلوقتي
طيف : بص لنص الكوبايه المليان ع الأقل اتبسطنا شويه وهيصنا بصراحه كان فرح جامد اوي محضرتش زيه من زمان ولا الأكل ياسلام ريحته وصلاني هنا ف الصاله
يوسف بصلها ومسك ايدها وقال : طيف انا حقيقي حقيقي بكرهك اوي
طيف بصتله بنفس النظره وقالت : وانا كمان جعانه اوي اوي
يوسف زق ايدها وقال : جعانه !
طيف وقفت وقالت : ايوا جعانه خليك انت قاعد زي النسوان وحاتط ايدك ع خدك انا رايحه اكل دي فرصه متتعوضش
لحقها ع المطبخ وقال: انتي ليكي نفس تاكلي ف الورطه ال احنا فيها دي
طيف وهي بتفتح الحلل : وذنب معدتي اي مش فاهمه وبعدين انا مبعرفش افكر وانا جعانه
يوسف : انتي لسه هتفكري ماهو موصلناش هنا غير افكارك المتكلفه
طيف وهي بتحط صباع المحشي ف بوقها :مشكلتك انك درامي اوي ماتنشف كدا قولتلك هنطلق مكبر الموضوع ليه
يوسف بسخريه : انا خايف امشي وراكي تاني ابص الاقي نفسي بوصل ابننا للمدرسه
طيف شرقت : اهؤ اهؤ ابننا مين تف من بوئك ياجدع تاخد صوباع محشي وربنا طعمه جامد
يوسف : اي البرود ال انتي فيه داه انتي حتى مش خايفه
طيف وهي بتاكل: وهخاف من اي
يوسف قرب منها بمكر وقال : يعني اتقفل عليكي الباب مع واحد دي حاجه متخوفش!
رفعت السكينه ال جمبها ع الرخامه وقالت بثقه: لا متخوفش خاف انت ع نفسك
يوسف بلع ريقه بخوف ورجع لورا وقال : اعوذ بالله انا داخل انام دا لو جالي نوم يعني
طيف حطت السكينه وقالت ببرود : شطور اتكل ع الله يالا
_______
صباح يوم جديد
الباب عمال يخبط
يوسف قام وهو بيفرك ف عيونه وفتح الباب وهو بيقول
: في اي ع الصبح
والدته زقته ودخلت وهي بتزغرت
:لولولولوي صباحيه مباركه ياعريس
يوسف قعد وهو بيقول: صباحية اي بس وزفت اي
والدته : امال طيف فين
يوسف : معرفش
والدته : ازاي متعرفش يعني
يوسف : انا مالي ومالها دوري عليها ف المطبخ تقريبا بايته ف حلة المحشي جوه
والدته بتعجب: مالك ومالها اي داه هي مش مراتك
يوسف : ايوا بردو اعملها اي
والدته بتعجب: لا اله الا الله انا هروح اشوفها فين
فتحت باب أوضة النوم ودخلت لقيتها نايمه قالت بالراحه
: طيف يابنتي قومي
قامت مخضوضه وسحبت سكينه من تحت المخده وقالت بفزع
: خليك مكانك احسنلك
والدة يوسف برعب : انا مكاني اهو والله
طيف بتعجب : اي دا هو انتي ياطنط
والدة يوسف : في اي يابنتي سكينة اي ال معاكي دي
طيف رجعت السكينه تاني تحت المخده وقالت : دي لزوم الاطمئنان وكده
والدة يوسف : لا حول ولا قوة الا بالله انا راجعه شقتي تاني هو يقولي دوري عليها وانتي مسكالي سكينه دا اي شغل الجنان داه
وخرجت بسرعه
طيف قامت من ع السرير وخرجت لبره لقت يوسف قاعد ماسك موبايله
قعدت وقالت : صباااحو
يوسف : صباااحو اي انتي داخله ع قهوجي
طيف بضيق: ابتدينا خناق
فجأه موبايله رن بص فيه وارتبك
طيف ببرود : رد عليها عادي انا كدا كدا قايمه اكمل نوم
سابته ودخلت اوضتها
يوسف: ازيك يانورهان
نورهان ببكاء: اتجوزت بردو يايوسف وسبتني
يوسف بحزن: الموضوع مش زي مانتي فاهمه هي مبتحبنيش ولا انا بحبها واتفقنا ع الطلاق بس مضترين نستنى شويه علشان كلام الناس وتعب امي
نورهان ببكاء : هتفضل تكدب عليا لحد امتى بس انت خنتني وكسرت قلبي انا مش مسمحاك
يوسف بحزن: صدقيني انا بحبك انتي
نورهان ببكاء: ال بيحب حد مبيستغناش عنه بسهوله وانت بعتني علشان واحده امك جابتهالك
يوسف: كان غصب عني صدقيني
نورهان ببكاء : مفيش راجل بيتغصب ع حاجه انا بندم ع اليوم ال عرفتك فيه
يوسف : انا متغصبتش بس مقدرتش ارفض علشان والدتي تعبانه وخفت يحصلها حاجه بسببي
نورهان ببكاء: كفايه حجج كدابه بقى
وقفلت الموبايل
يوسف رمى الموبايل بعصبيه وقال : كله من البني أدمه ال جوه دي
قام رحلها ودخل عليها الأوضه وهو مدايق
طيف بصتله وقالت : مش تخبط
يوسف بعصبيه : انتي إنسانه معندهاش دم حياتي خربت بسببك وانتي ولا على بالك والبنت ال بحبها بعدت عني بسبب واحده زيك
طيف بصدمه: بسببي انا ! يعني مش بسببك انت
يوسف : لو بسببي انا فيبقى بسببي علشان مشيت ورا كلام واحده زيك قالتلي انها هتعرف تفركش الجوازه دي وانتهى بيا المطاف معاها ف شقه واحده
طيف بعصبيه : انت واحد معندكش دم واناني وكل تفكيرك ف نفسك وحياتك وبس انما انا مش مهم
يوسف : دا اكيد واحده زيك هتفرق معايا ف اي يعني اذا كان اهلك كانوا عايزين يخلصوا منك ودبسوني انا فيكي
طيف وهي بتداري دموعها: واضح اني بتعاير تمام انت عندك حق عايز اي مني دلوقتي
يوسف بحده : عايزك تصلحي كل العك ال سببتيه ف حياتي
طيف بتعجب : اموت نفسي علشان ترتاح يعني ولا اي بالظبط
يوسف بعصبيه : ياريت كان ينفع
طيف بصدمه: للدرجادي انا تقيله ع قلبك
يوسف بحده: جدا
طيف وقفت من مكانها وقربت منه وبصت ف عيونه وقالت
: متستفزنيش علشان هتندم
وسابته ومشيت
يوسف لحقها ومسكها من دراعها وقال
: هتعملي اي يعني
طيف بصت ف عيونه بكل ثقه وغرور وقالت: هخليك تحبني ووقتها هتعرف قيمتي كويس اوي
يوسف بسخريه : واحده زيك معندهاش مشاعر وحياتها عباره عن تفاهه هتعرف تخليني احبها
فجأه رن جرس الباب
يتبع.....