عندما تشرق شمس المحبه - الفصل 30 - بقلم أمل الذكريات - مكتملة | روايتك

الجزء الثلاثون مرت الأيام بطيئة كئيبة مملة وثقيلة وحزينة ع ناس ..ومرت سريعة وخفيفة وسعيدة ع ناس آخرين .. مازالت علاقة نهى بريان يكنفها البرود ويغلفها التوتر والتفكك وصارت ع حافة الانهيار..راح ريان لبيت صقر يأخذ نهى فـ حال وصول المسج له ...أرسل لها مسج مثله "تجهزي بعد ساعة بمر أخذك "..وكأن هذي لغة حوارهم الجديدة مع بعض ..بعد ما كانوا يتحينون الفرصة ع شان يكلمون بعض!... رجعت نهى بيت خالها نهى القديمة بنت العمة المكسورة الحزينة ..ابتعدت عن الكل وأولهم ريان ..نقلت أغلب أغراضها من جناحها الخاص لغرفتها القديمة ..وأقامت فيها ..لازمت غرفتها أقلب الوقت وتعذرت عن غيابها عنهم .. بأن الحمل يتعبها وتتكلف من كثرة الحركة !!.. وما كان حال ريان أحسن من حالها ..نسج حول نفسه قوقعة ..وعزل نفسه هو الثاني عن أهل البيت لأنه وببساطة ما لقى حل لمصيبته وللمعضلة اللي اعترضت طريقه...رجع فارس من فرنسا وقعد معه ع شان يعرف وش الي صار له ويفهم أبعاد الموضوع ..لكنهم وصلوا لطريق مسدود الشكوك تحيط بالوكيل لكن ما عندهم أي دليل ضده ..حتى تستسلموا هم للهزيمة مجبرين لا مخيرين أو مختارين!.. انتهت إجازة نصف السنة اللي كانت كلها ع بعضها عشر أيام بس ..وفتحت المدارس ...وبطبيعة الحال الكل رجع يداوم عدا ريان اللي قرار إيقافه ما أُلقي !.. رجع ريان من المسجد بعد ما صلى فيه بمعية أبوه ..دخلوا صالة البيت الكبيرة واللي كانت خالية من الناس ..تخطى أبوه متجه لصومعته اللي لازمها فـ الايام الاخيرة ...وقف لما سمع أبوه يناديه :لحظة ريان !.. التفت ريان يطالع أبوه من غير ما يتكلم !.. قرب أبو فارس منه حط يده ع كتفه :ممكن نتكلم شوي !.. قطب ريان حواجبه :خير يبه !.. هز غانم رأسه :إن شاء الله خير!.. ساقه أبوه إلى أحد الغرف المعزولة ع شان يتكلمون براحتهم ومن غير ما أحد يسمعهم !.. اتخذوا أماكنهم جنب بعض ...الصمت والهدوء يحيط بهم ويلفهم بردائه ..كان ريان منزل رأسه بينما استغل أبوه الوضع ب تأمل هيئته وشكله ..الثوب مكسر وغير مكوي وشماغه ما كان حاله أحسن من حال الثوب وذقنه لا هو محلوق ولا هو مرتب !... كتف غانم يده :ليه ما داومت هـ الأسبوع بالمدرسة !... فرقع ريان أصابعه يخفف حدة توتره طالع أبوه:بس..عندي إجازة !.. رفع غانم حاجبه :وش مناسبة هـ الإجازة يعني مهي بالعادة!.. هز ريان أكتافه :عادي من غير مناسبة ..تعبان وأبقى أريح وما عندي فرصة إلا الحين قبل ما نبدأ الدروس وننزحم !.. عظ غانم ع شفته :مهو عيب عليك تكذب ..رجال طول بعرض وشواربك فـ وجهك وتكذب ع أبوك !.. نزل ريان رأسه ....ساكت !.. تنهد غانم بهدوء :ليه ما قلت لي أنك موقوف عن العمل !.. فتح ريان عيونه ع أخرهم ورفع رأسه يطالع أبوه :من قال لك !.. تفحصه غانم بنظراته :لمتى ناوي تسكت وما تقول !.. كرر ريان سؤاله بإلحاح :أبوي من اللي قال لك !.. هز غانم رأسه :مهو مهم من اللي قال لي المهم أني عرفت !.. زم ريان شفته :فارس هو اللي قال لك !.. أخذ غانم نفس :فارس وإلا غيره وش يفيدك إذا عرفت !.. هز ريان رجله بتوتر :المهم أني أعرف وبس !.. حك غانم ذقنه :ليه ما قلت لي أنهم وقفوك عن العمل !.. انفعل ريان بعصبية :وش تبقاني أقول ..أقول لك أنهم وقفوني بذنب أنا ما سويته ولا ارتكبته متهميني بأمانتي ونزاهتي وشرفي أني أبيع الأسئلة ع الطلاب وأوزعها قبل موعد الامتحان لا ولا كفاهم كل هذا حتى اتهموني أني أخذ من الطلاب رشوة حتى أنجحهم ..وش أقول وش أخلي !.. سكت غانم لحظات فرك وجهه تفحص ريان بنظراته :طيب ليه تخليني أخر من يعلم !.. تجنب ريان النظر فـ وجه أبوه :لأني ما أبقى أشغلك معي بمشاكلي !.. رد غانم بانفعال ممزوج باستنكار :نعم .. ما تبقى تشغلني بمشاكلك ..طيب وأنا وش طبيعة عملي ..أحل مشاكل الناس اللي يستعينون فيني وولدي اللي يهمني أمره ما يبقي يشغلني بمشاكله عجيب والله !!... نزل ريان رأسه :أنا آسف يا أبوي بس أنت عودتنا أن إحنا نحل مشاكلنا بأنفسنا !.. تنهد غانم بهدوء :وش معنى استعنت بفارس !... شبك ريان أصابعه بعض :فارس أخوي الكبير ..قريب لنفسي يفهمني حتى لو ما تكلمت وهو عنده علم عن بعض مشاكلي بالمدرسة !.. انفعل غانم بغيظ :بس أنا أبوك تفهم وش معنى أبوك !.. نزل ريان رأسه ووجه نظراته للأرض وما رد !.. أخذ غانم نفس يهدي انفعالاته :طيب كان اعتبرتني فارس وخبرتني!.. هز ريان أكتافه :مدري ما بقيت أزعجك أو أحرجك مع زملائك بالعمل ..وبعدين أنا كنت فـ حالة ما يعلمها إلا ربي ... كنت محتار ومتوتر وذهني مشتت وأفكاري ضايعة !.. حط غانم يده ع ركبته :والحين وش ب تسوي !.. زفر ريان بقهر :ما أعرف .. ب انتظر لـ ما يطلع قرار إرجاعي لتدريس !.. حرك غانم يده :وإذا طلع القرار و أرجعوك للتدريس .. فأنت ب ترجع للمدرسة ع أنك ريان اللي باع الاسئلة وسربها وارتشى ..تم مُعاقبته بإيقافه ولما انتهت المدة رجعوه يمارس عمله بشكل طبيعي هذا إذا ما تم تحويلك لمدرسة ابتدائية أو نقلوك للمدرسة ثانية ..هذا إذا ما نقلوك لهجرة أو قرية .. هذا إذا ما منعوك فترة تدريسك من كتابة أسئلة امتحانات نهائية!!.. عظ ريان ع شفته بغيظ :أف كل هذا طيب ليه !.. هز غانم رأسه :أجل وش تظن !.. بلع ريان ريقه :وش الحل !.. حك غانم ذقنه :قبل ما أقول لك الحل ..قل لي بالأول من تظن أنه سوى فيك الحركة هذي من اللي بينك وبينه مشاكل فـ المدرسة حتى يشتكي عليك.. أحد طلابك أحد زملاؤك من المدرسين أحد الاداريـــ رد ريان بسرعة :الوكيل !.. ضيق غانم فتحة عيونه :طيب وش نوع المشاكل اللي بينكم !.. أشر ريان بيده ع نفسه : أنا مدري وش فيه عليّ أنا اتجنبه قد ما أقدر ولا أحتك فيه..بس حاط نقره من نقري من السنة الماضية ..يغير جدول حصصي مرتين ثلاث مرات فـ الأسبوع ولا يبلغني تضيع عليّ الحصص والدروس ولما أحاججه يتهمني بالتهاون وعدم الحرص .. قدمت ع التدريس فـ وقت المسائي "الليلية " وهو المكلف برفع أسماء المدرسين للإدارة التعليم ..وما نزل أسمي ضمن المدرسين اللي نزلت اسمائهم وقلت يمكن هو له يد بس ما أحط بذمتي ...وما حاججته أو ناقشته ..وأخر موقف واللي أتوقع أنه ما سوى اللي سواه إلا بسببه ..كنت أراقب ع أحد اللجان وضبطت ولد يغش ولما أخذته للإدارة ما كان موجود إلا الوكيل ولما قلت له أن الولد ضبطته يغش ..قال لي اتركه وخله يرجع للجنة يمتحن حاله حال الطلاب وما كأن شيء صار ... قلت له كيف نرجعه المفروض ينحرم من الامتحان ع شان يتأدب وما يكررها ..قال لي مش من صالحك تحرم الولد من الامتحان ..وطبعا نفذ اللي برأسه ودخل الولد اللجنة يمتحن!.. قطب غانم حواجبه :طيب وش يخليه يرجع الولد للجنة !... ميل ريان فمه ع شبه ابتسامة ساخرة :لأن الولد ولده !.. هز غانم رأسه :أهــا !.. تنهد ريان بهدوء :الحين وش الحل !.. قلب غانم عيونه يفكر :لحظة ..المدير وينه من كل هـ الأحداث !.. قطب ريان حواجبه :وش تقصد !.. حط غانم رجل ع الأخرى :ليه أخذت الولد للوكيل ما أخذته للمدير مباشرة مدام أمورك مو تمام مع الوكيل !.. سكت ريان يفكر ويسترجع ذاكرته :أنا أخذته للإدارة مكتب المدير لكنه ما كان موجود واللي شفته فـ مكتبه الوكيل نايب عنه واضطريت أتكلم معه!.. حك غانم ذقنه :والمدير كان يغيب بكثرة !.. عظ ريان ع شفته :أي تقريبا ما كان يجي المدرسة دائما ..وأحيانا يجي نص دوام ويطلع .. وش تفكر فيه!.. كتف غانم يده :أنت قلت أنك ما سربت الاسئلة ولا بعتها ولا استلمت من الطلاب شيء.. هز ريان رأسه وطالع أبوه باهتمام وكأنه يقول له أكمل .. أكمل غانم بهدوء :قلت بعد أن يد طالت الأسئلة .. ورد عليك المدير بأنهم يستلمون الأظرف مسكرة ويسلمونها يوم الامتحان مسكرة !.. فتح ريان عيونه مصدوم مستغرب أبوه وش دراه بالحوار اللي صار بينه وبينهم إذا كان ما قال لأي أحد عنه حتى لفارس !!.. بلع ريقه :أبوي أنت وش دراك عن اللي الكلام اللي قلته يوم التحقيق!... شبك غانم أصابعه بعضهم :أستاذ صالح اللي كان من إدارة التربية واللي حقق معك كلمني يستفسر إذا رفعت خطاب تظلم لـ إدارة التربية بخصوص الإيقاف وإلا لا ..ولما سألته هو وش يقصد وأي تظلم وأي خطاب ..سألني عن واحد اسمه ريان غانم يدرس علوم فـ المتوسطة "......." إذا كان ولدي وإلا لا ... لأنه قارن بين الاسمين اسمي واسمك طبعا قلت له أنك ولدي قال أنك موقوف عن العمل بسبب تسريبك لأسئلة امتحانك قبل يوم الامتحان ..وغيره الرشوة والمبالغ اللي تأخذها من الطلاب ..طبعا انكرت كلامه وما صدقته أنا عارفك زين أنت ولدي ربيتك ع يدي مستحيل تصدر منك تصرفات مثل هذي مهما كان ..نادني فـ مكتبه ع شان أتأكد بنفسي ..رحت له أطلعني ع نص الشكوى والتحقيق .. وورقة أسئلة الامتحان ..ما أقدر أوصف لك شعوري ذاك الوقت جمدت فـ مكاني حاولت أستوعب اللي صار ما قدرت ..ولا مية مرة قرأت الأوراق اللي بين يدي لأني وبصراحة مو مصدق أي شيء من اللي يقوله ..سألت فارس بعد ما رجع من سفره لأني عارف ما راح تلجأ لــأحد إلا له مهما صار لك ..إذا كان عنده علم باللي صار وأكد الكلام وقال أنك فعلا موقوف عن العمل بسبب تسريب أسئلة الامتحان واستغلال الطلاب ولا تدري من هو اللي سوى فيك كذا !.. علت وجه ريان الصدمة الاستغراب استنكار :طيب ما قال لك من هو مقدم الشكوى !.. هز غانم رأسه :لا أنا ما سألته وهو ما قال !.. زفر ريان بضيق :والحين وش نسوي وش تنصحني فيه !.. حك غانم ذقنه :قبل ما أقول لك وش تسوي ..ورقة الطالب الغاش اللي علمت عليه والبراشيم وينها !.. سكت ريان لحظات يتذكر :ع ما أظن أنها مع أغراضي فوق!.. حرك غانم يده :أظن هذي ما تنفع لازم تكون متأكد !.. قطب ريان حواجبه :طيب ليه تسأل عنها وش نحتاجها فيه !.. عدد غانم ع أصابعه :ترفع خطاب تظلم للإدارة التربية تطالب بإعادتك إلى العمل ..وترفق مع الخطاب شكوى تذكر فيه كل الخلافات اللي صارت بينك وبين الوكيل وتحط ورقة الطالب الغاش والبراشيم وطالبهم باتخاذ الاجراء اللازم معه وبخصوصه !.. هز ريان رأسه :طيب ومتى أرفع الخطاب وش هي الاجراءات والخطوات !.. تنهد غانم بهدوء :بكرى رح معي المكتب ونكتب الخطاب سوى بس أهم شيء تكون معك الورقة والبراشيم !.. شعر ريان بالراحة وانفرجت أساريره وقف :خلاص بروح فوق وأشوف إذا ما زالت الورقة مع أغراضي وإلا رميتها وإن شاء الله ألقاها !.. أشر غانم بيده لـ ريان علامة أجلس : لحظة ريان ...أقعد أنا ما خلصت كلامي !.. قعد ريان مبتسم :أمرني يا أبوي !.. شبك غانم أصابعه بعضهم :نهى !... جمدت ملامح ريان وتساءل بحذر :وش فيها نهى !.. زم غانم شفته :نهى راحت بيت أبوها بحال ورجعت بحال ثاني !!... ضيق ريان فتحة عيونه :وش تقصد !.. تنهد غانم بهدوء :من تزوجت نهى والكل يشوف فـ عيونها السعادة والفرح والهناء وراحة البال ..لكن من بعد اللي صار لك ونهى انقلبت مية وثمانين درجة وللأسوأ رجعت نهى بنت خلود وصقر المشتتة بين أمها وأبوها ..يا أبوي لا تخلي مشكلة مثل هذي تأثر عليكم وع علاقتكم بعض ..وين الوعد اللي وعدته لها أنك تحافظ عليها وتصونها وتقدرها وتعزها وتحميها ..وهذا أنت غدرت بالعهد وخنت والوعد وتخليت عنها فـ أول محنة تجيك !.. طالع ريان أبوه فاغرا فاه تذكر نهى اللي نساها الفترة الماضية اللي تخلى عنها تخلى عن حبه عن حلمه اللي حارب الكل حتى يوصل له .. قلب كلام أبوه عدد من المرات فـ رأسه وكان كلام أبوه مثل الناقوس اللي يدق أجراسه فـ رأسه ...آه يا نهى يا حُبي ويا أملي ويا حاضري ومستقبلي ويا حياتي ويا روحي .. يا شريانا يتدفق بين أضلعي ويسقي ويغذي روحي وجسدي ..يا نورا سطع فـ طريقي وأضاء دربي ..نهى كم أحن واشتاق إليكِ ..نهى ماذا عساي أن أقول أو أفعل !!... وقف ريان من غير ما يرد ع أبوه..متوجه للإنسانة اللي هجرها من أيام وكأنها سنين ودهور.. كان يجر خطواته فـ ممرات البيت جر ..كان يقدم خطوة ويرجع خطوات..بأي الوجوه سيقابلها ..وأي المبررات سيسوقها لها كي تبرر فعلته وجريرته وقسوته معها !!.. وقف عند باب غرفة لمى يشحذ همته ..ويسترجع أنفاسه ..هو فـ الأساس ما يعرف نهى وين تكون لكنه توقع أنها تكون فـ غرفة لمى بما أنها أقرب وحدة لها بالبيت من بعده.. فتح الباب بعد ما استأذن بالدخول ..دارت عيونه تدور نهى فـ أرجاء الغرفة لكن ما عاينها ..بس شاف لمى تثرثر بالجوال .. بلع ريقه بتوتر :لمى وين نهى !.. ابعدت لمى الجوال عن أذنها هزت أكتافها :مدري اليوم أنا ما شفتها !.. هز ريان رأسه وجر نفسه يطلع من الغرفة ...رجعت لمى تكلم :أيوه لؤي ..لا بس هذا ريان يسأل عن زوجته ..أي وش كنا نقول ....وهذا أخر شيء سمعه ريان قبل ما يسكر الباب ..دار بخطواته فـ اتجاه أخر ..قصد غرفة لينا ومي مدام أنها مو عند لمى فأكيد هي عندهم ..راح الغرفة وقبل ما يوصل عند الباب لفت انتباهه باب الغرفة المسكر المقابلة لغرفة لينا ..علق نظراته ع الباب .. احتمال نهى تكون فـ ذا الغرفة ..ليه ما جاه هـ الوارد ..هذي غرفتها القديمة وأكيد أنها رجعت فيها مدام أنهم ما استغلوها بعد زواجها ..غير خطواته واتجه لها .. منظر الغرفة من الخارج يوحي أنها خالية لأنها كانت ظلمة وكانت هادية ..فتح الباب بهدوء قابله ظلام دامس ..دخل وسكر الباب بعده ...فتح النور وشاف نهى قاعدة ع السرير متكورة ع نفسها تحشر رأسها فـ زاوية صغيرة بين قدميها ..قرب منها بهدوء قعد جنبها ع السرير ..حط يده ع كتفها .. انكمشت نهى ع نفسها ..تنهدت بضيق ..آه..هـ اليد يا ما احتوتها وطبطبت عليها ..رفعت رأسها تتأكد من احساسها وتوقعها وإلا شوقها الغالب عليها يصور لها أشياء ويخليها تتخيله..بس كيف تخطئه وهذي ريحته ..طاحت عينها فـ عيونه وتعلقت نظراتهم بعض لحظات ..آهـ يا ريان وش جاي تسوي ..جاي تكمل عليّ ..آهـ يا ربي رحمتك .. وانهمرت دموعها مثل السيل وشيء طبيعي تنفر منه كرامتها ما تسمح لها تذل وتهين نفسها له أكثر أو تستسلم له بسهولة ابعدت كتفها عن يده !.. شد ريان ع كتفها ب يدينه اثنتين احتضنها وضمها بين ذراعيه ..انهارت نهى أكثر وبكت كما لما تبكي فـ أي يوم من الأيام .. مسح ريان بيده ع شعرها وهمس :عارف أني غلطان ولا أي عذر فـ الدنيا يبرر فعلتي اللي سويتها فيك ..لكن مصيرك تعرفين وش اللي فيني وإن شاء الله تعذريني !.. استمرت نهى فـ بكائها ..تشبثت بريان بكل قوتها الأمان ما تلقاه إلا معه ولا تذوق طعم الحنان إلا منه ..بكت وبكت وطلعت كل الكبت اللي تحس فيه !!.. مازال ريان شاد بقبضته عليها ..ما تفوه بأي كلمة وتركها تنفس عن كبتها ببكائها يمكن ترتاح بعض الشيء ولام نفسه بدل المرة ألف ع غبائه وغدره وجفائه وقسوته معها لما شاف الحال اللي وصلت لها!.. : : : بالمستشفى وتحديدا عند فارس بعد ما انهى مروره اليومي ع مرضاه راح مكتبه الخاص فيه.. قعد يقرأ التقارير الخاصة لبعض المرضى لدرجة أنه اندمج معهم ونسى نفسه ..انفتح باب المكتب بفجاجة وبدون استئذان رفع رأسه يشوف اللي تهجم عليه وتجرأ ودخل من غير ما يستأذن ..عانقت عيونه وجه المتهجم عليه .. ابتسم فارس بسخرية ممزوجة باستهزاء :أهلا ...أهلا !.. قرب حمود منه وهو يرعد ويزبد :لا أهلا ولا سهلا ..هي كلمتين ورد غطاهم .. مثل ما وعدتني أنك تقدر قيمة العمارة وتعطيني حقي منها..تنفذ وعدك وتعطيني حقي الحين !.. اسند فارس ظهره ع الكرسي وحط رجل ع رجل :أنا ما وعدتك أني أعطيك حاجة حتى أعطيك إياها الحين !.. عظ حمود ع شفته بغيظ :لا تقعد تلف وتدور أظن أنك عارف أنا وش أقصد لما شفتك عند بندر ولد أخوي قلت لي ب نقدر قيمة العمارة ونعطيك حقك بس اصبر علينا ..وصبرت عليكم وإلى الحين ما شفت حاجة !!.. حك فارس رأسه :عندك دليل ع أني وعدتك أني ب قدر قيمة العمارة وأعطيك حقك منها!.. فرقع حمود أصابعه يكبت قهره :أنت عارف وأنا عارف وماله داعي نضحك ع بعض فأخذ الموضوع من قاصره وأعطني اللي لي وخلني أشوف طريقي!.. ابتسم فارس باستهزاء :ليه وأنا ماسكك حتى أخليك ..ما راح أعطيك شيء وش ب تسوي يعني !. زم حمود شفته بعصبية :شف عندك مهلة يومين تعطيني حقي ...وإذا ما وصلني حقي قسم بالله لــ أخليك تندم !.. شبك فارس أصابعه ورد بنبرة باردة عكس محدثه اللي يقلي من القهر والغيظ:يعني ب تشتكي عليّ بالمحكمة !.. مرر حمود نظراته اللي يتطاير منها الشرار ع فارس :حقي أخذه بيدي ما أعتمد ع غيري يأخذه عني ..أشر بإصبعه ..يومين بس هم اللي عندك وراجع لك !.. تقدم فارس بجسمه واتكأ ع المكتب أشر بيده علامة روح :أعلى ما فـ خيلك أركبه واللي ما تواصله ب رجلك واصله ب يدك!.. جر حمود نفسه وهو يسخط ويشتم :راجع لك راجع لك والله لـأخليك تندم والله لـ أعلمك من هو حمود ..صبرك عليّ بس !.. توارى حمود خلف الباب !.. زفر فارس بتعب هو عارف أن حمود مو سهل ويبقي له بال طويل والله يعينه ع الأيام الجاية !.. قطع تفكيره وحيرته صوت مسج فـ جواله ..أخذه وفتح المسج يقرأه كان من ريم "فارس إذا كنت فاضي دق عليّ ".. تنهد فارس بهدوء كأن قلبها حسها أنه فيه شيء ..دق ع رقمها وما طول فـ الانتظار أتاه الرد بسرعة ..مرحبا فارس !.. اسند فارس ظهره ع الكرسي :أهلين ريم كيف الحال !.. ابتسمت ريم بهدوء :الحمد لله تمام ..أنت كيفك وكيف يومك معك !!.. زفر فارس بتعب :يومي متعب أنتي عارفة شغل الدكاترة !!.. تنهدت ريم بهدوء :الله يعنيك !!.. حك فارس جبهته :أجمعين ..أنا أبقى أفهم وش هـ البخل اللي عندك ليه ما تتصلين ع طول لازم مقدمات ليه ترسلين لا تخافين فاتورتك أنا ب سددها!!.. ضحكت ريم :وش أسوي يعني أنت عارف المسجات عملية يعني إذا كنت مشغول مو فاضي فشيء طبيعي ما راح ترد عليّ و ب تعطيني مشغول يعني يرضيك ألقط وجهي بعد ما بعثرته!!. ضحك فارس بقهقهة :يقال أنك تخففين دمك الحين !!.. عضت ريم ع شفتها :شفت كيف دمي خفيف !!.. ابتسم فارس بهدوء :آه منك أنتي...خلصتي محاضراتك !!... بلعت ريم ريقها :أي خلصت ..إذا ما عليك أمر وإذا كنت فاضي تمر تأخذني الحين ترجعني البيت !!.. طالع فارس ساعته :أممممم بعد ربع ساعة بمر أخذك كوني جاهزة !!.. ضحكت ريم :مو مشكلة إذا ع ربع ساعة ب انتظرك!!... ابتسم فارس بخبث :طيب إذا كنت ب تأخر أكثر من ربع ساعة وش ب تسوين يعني !!... سكتت ريم لحظات :يعني وش ب أسوي ب اتصل ع أمي و ب أخليها ترسل لي السواق !!.. تنهد فارس بهدوء :لا تتصلين عليها ولا شيء ربع ساعة بإذن الله وأكون عندك !!... زفرت ريم بكل قوتها :انتظرك لا تتأخر عليّ !!.. ضغط فارس بيده ع رأسه :لا تخافين ما راح أتأخر ..لأن حتى أنا ودي أستأذن من دوامي وأرجع البيت ..بس أحسبي ربع ساعة وأكون عندك ..سلام!!.. سكر فارس من ريم علق نظراته ع الجوال بضع لحظات ورجع للورقة اللي كان يشتغل فيها قبل ما يقطع عليه حمود ... وبمجرد ما سمع صوتها نسى حمود واللي جابوا حمود .. من بعد ما تحسنت علاقتهم بعض ومشاويرها الخاصة فيها هو اللي يقوم بها .. يوصلها الجامعة الصباح قبل ما يروح المستشفى ويرجع يأخذها متى ما انتهى دوامها إذا كان فاضي وما عنده شيء يتعارض مع موعد خروجها!!.. حاول أنه يركز بالورقة اللي قدامه لكن عبث ما قدر تفكيره كان عند اللي هناك تنتظره .. رتب الاوراق بالملف وحطه وسط الدرج وقف وأخذ جواله ومفتاحه وطلع من مكتبه و ب يكمل شغله بوقت لاحق !!.. : : كانوا فايز وسلطان بأحد المقاهي قاعدين يفكرون ويحللون بالمصيبة اللي طاحت ع رأسهم بعد سرقة المحل ..ما زالت تحقيقات الشرطة إلى الآن والتحريات جارية ..لكنهم ما وصلوا لأي دليل أو خيط يقودهم للفاعل..والشركاء الأربعة ما أصلحوا أي شيء مما فسد بالمحل لأن ما عندهم مال يكفي لإصلاح ما أُفسد..لأنهم حطوا كل ما يملكون بإيجار المحل والباقي ابتاعوا به الأجهزة والبضاعة بمختلف أنواعها!!.. تفحص سلطان فايز بنظراته :تتوقع من له يد باللي صار لمحلنا !!.. هز فايز أكتافه:مدري .. ما أشك بأي شخص ..يعني من اللي آذيناه حتى ينتقم منا!!.. تنهد سلطان بضيق :طيب وش نسوي الحين ..نقعد كذا عاطلين عن العمل !!.. رد فايز بنبرة باردة :يعني وش فـ يدنا نسويه قل لي عطي رأي عطني حل !!.. تأفف سلطان بقهر :يا أخوي لا تصير سلبي ..نايف وتركي عندهم وظيفة حكومية يقدرون يحسنون أوضاعهم منها ..لكن إحنا ضاع أملنا ومستقبلنا لما ضاع المحل من بين أيدينا!!.. هز فايز أكتافه بلا مبالاة :مو مشكلة ندور ع أي عمل نحسن أوضاعنا منه حالنا حالهم !.. ضحك سلطان باستخفاف :أكيد أنت تمزح وش الوظيفة اللي تقبلنا وإحنا ما معنا شهادات !!.. رفع فايز حاجبه :أنا ما قلت وظيفة مثل أخوك و خويه ..إحنا ب ندور أي محل ونشتغل فيه !!.. شهق سلطان بصرخة :نعم بعد ما كنا مالكين أحد المحلات وأمرين وناهين فيه ..نروح نشتغل عمال فـ محل !!.. تنهد فايز بهدوء :ما عندنا أي مؤهلات حتى نقعد نتشرط ..وما يناسبنا غير هـ الشغله !!.. سكت سلطان ع مضض ما عنده خيار !!.. حك فايز جبهته :وش رأيك نشتغل عند عمك فـ أحد محلاته !!.. فتح سلطان عيونه ع أخرهم :نعم ..من جدك ما لقيت إلا عمي ما أظنه يشغلنا عنده !!.. أخذ فايز نفس :هذا هو شغل رائد عنده ..يقول أنه أخته صديقة بنت عمك وهي اللي توسطت له عند أبوها !!.. بلع سلطان ريقه :هذا أنت قلتها بنته هي اللي توسطت له عند أبوها ..يعني إحنا من اللي ب يتوسط لنا عنده !!.. هز فايز أكتافه :خل نحاول ما أظن ب نخسر شيء !!.. هز سلطان رأسه وتمتم :نحاول .. نحاول!!.. سكتوا الاثنين والأفكار تميد بهم من كل جانب ..هذا حالهم بعد سرقة المحل ما صار عنده لا عمل ولا وظيفة تشغلهم ..حتى أعمالهم مع الزعيم خفت وما صاروا يروحون له دائما ..عدا الاجتماعات اللي تكون من فترة وفترة !!.. نغمة الرسالة بصوتها المميز زعزعت الجو الهادي الساكن من حولهم .. تأفف فايز بضيق وطلع جواله فتح ع الصندوق الوارد رسالة من رقم غريب .. قرأها علامات الحيرة والاستغراب تجمعت فـ وجهه .. استغرب سلطان حال خويه سأله :فايز وش فيها الرسالة من وين !!.. ما قدر فايز يرد حاول يستجمع أنفاسه يحس الهواء اختفى من حوله ..ناول سلطان الجوال !!.. أخذ سلطان الجوال وهو يوزع نظراته ع فايز والجوال قرأها وما كان حاله أحسن من حال خويه ..كرر قرأتها عدد من المرات يبقي يستوعب يصدق لكنه ما قدر.. يبقى يعرف من المرسل الرقم أول مرة يمر عليه "اللي صار للمحل ما هو إلا قرصة أذن ع شان تتعلمون ما تلعبون بذيلكم مرة ثانية "..طالعوا بعض من غير ما يتكلمون وسكنت وجههم الحيرة والصدمة والدهشة والاستغراب !!.. * * * انجلت الغمامة السوداء اللي غيبت شمس السعادة والراحة من حياة ريان العملية والاجتماعية .. رفع خطاب تظلم للإدارة التربية والتعليم وضح فيه كل المشاحنات والخلافات بينه وبين الوكيل وما نسى الموقف الأخير اللي صار بينه وبين الوكيل أيام الامتحانات لما ضبط الولد يغش ..وسلم الادارة ورقة الطالب والبراشيم وبين لهم موقف الوكيل وتحيزه للطالب اللي يكون ولده ..استدعي الوكيل بما أن الشكوى ع ريان مقدمة من طرفه ..اعترف الوكيل أنه مد يده وفتح الظرف المسكر وأخذ ورقة من ورق الامتحان وكمل باقي التمثيلية ..تم معاقبة الوكيل بتحويله مراقب فـ مدرسة ابتدائية .. ألقوا قرار الايقاف ورجعوا ريان إلى عمله.. وباشر دوامه فـ ثاني يوم من صدور القرار !!.. أما بالنسبة لعلاقته ب نهى رجعت ع طبيعتها من بعد ما راضها ..شرح لها كل اللي صار له فـ المدرسة ..التمست له العذر ..لأنها عارفة أن مالها حياة من غيره .. وما تبقي طفلها القادم يعيش نفس حياتها مشتت بين أمه وأبوه..ووعدها ما يتخلى عنها مهما كانت ظروفه ومهما يصير له !!.. وما زالت علاقة نهى ب أبوها مثل ما هي عليه فـ أخر زيارة ..تكررت زياراتها لبيت أبوها بمعية ريان أو خصصت لها يوم تزور أبوها وتقضي يوم عنده ..حالها حال كل البنات ..طبعا ما أعجب زوجة أبوها الحال فكانت ترمي عليها نغزات وتضايقها..لكن نهى تحاول تتجنبها قد ما تقدر ما تبقي تخسر أبوها بعد ما حن عليها بسبب إنسانة حاقدة !!.. * * * تتابعت الأيام فـ مرورها ..مرت أيام وتلتها أسابيع لتليها الشهور..حياة الجميع مستقرة ومثل ما هي عليه وما فيها أي جديد يذكر وما فيها أي طارئ يزعزع استقرارهم أو هدوئهم..الجدير بالذكر أو الحدث المهم اللي صار و الكثيرين انتظروه هو زواج لمى و لؤي وأسيل وناصر اللي كان فـ نفس الفترة وفـ بداية إجازة الصيف بالتحديد!!.. مر شهر كامل ع زواج ناصر وأسيل ،،، و لؤي ولمى .. بعد انتهاء حفل الزواج سافر كلا ع حدى مع زوجته.. قضوا شهر عسلهم خارج البلاد وبعد انقضاء الشهر عادوا إلى ديارهم سالمين غانمين !!.. فـ بيت أبو ناصر وفـ جناح ناصر بالتحديد.. كان ناصر فـ غرفة نومهم يحاول أنه يصحي أسيل من النوم يبقها تقوم..لكن كل محاولاته باءت بالفشل .. لهم أسبوع من رجعوا من شهر العسل اللي قضوه فـ أسبانيا ..واليوم أول أيام دوامه !!.. قعد ع الأرض واتكأ بركبته بجنب السرير أو الجهة اللي نايمة عندها أسيل ..أخذ وردة وداعب أنفها فيها همس :أسولتي ما صارت رحت الدوام وأنتي نايمة ورجعت وأنتي بعد نايمة !!.. أحست أسيل بشيء يتحرك فـ وجهها ..فركت وجهها تبعد اللي مضايقها !!.. ابتسم ناصر بخبث وزاد بالحركة :حبيبتي ما صار هذا النوم ..تدرين أنتي كم الساعة الحين .. الساعة ثلاث إلا ربع ما باقي شيء ويأذن العصر وأنتي ما قمتي !!.. تأففت أسيل بضيق :أفف طلول مالي خلقك خلني أنام رجاء لا تزعجني !!.. فتح ناصر عيونه ع أخرهم :وش طلول أنا ناصر لنا شهر من تزوجنا وما فـ بالك إلا طلول انسيه تراه فـ بيت أهلك مو عندنا ..قومي يا كسولة حرام عليك الساعة ثلاث وأنتي ما قمتي!!.. فتحت أسيل عيونها تحاول تستوعب الوضع دارت عيونها بكل الاتجاهات لـ حد ما استقرت نظراتها ع ناصر :أوه ناصر حرام عليك خلني أنام والله أني ما شبعت !!.. فتح ناصر عيونه ع أخرهم :وش أخليك تنامين تدرين كم الساعة الحين الساعة ثلاث إلا ربع يعني رحت المحل وأنتي نايمة ورجعت بعد وأنتي نايمة ما يصير كذا تقضين وقتك كله بالنوم !!. قعدت أسيل وأسندت ظهرها ع حافة السرير مررت يدها ع شعرها ترتبه :حرام عليك ناصر والله أني أحس بجسمي مكسر وحيلي مهدود ما أخذت كفايتي من النوم !!.. قعد ناصر جنبها رد بانفعال :وش ودك يعني تنامين أكثر من هـ الوقت الساعة ثلاث ما تفهمين يعني يرضيك أقعد لحالي!!.. تمغطت أسيل : وش أسوي يعني ما نمت إلا بعد صلاة الفجر فشيء طبيعي أبقى أنام زيادة!!.. جر ناصر شعرها بلين :وش يخليك تسهرين للفجر أبقي أفهم أنا !!.. هزت أسيل أكتافها :ريم نايمة هنا ونادتني جود أسهر معهم !!.. قطب ناصر حواجبه :غريبة ريم تنام هنا ولا مرة نامت عندنا من تزوجت !!.. حكت أسيل مقدمة رأسها :ع ما أظن أن فارس عنده مناوبة بالمستشفى فـ جات هي هنا ..طاحت عيونها تلقائيا ع ساعة المنبه وطالعت الوقت أخذتها ..طالعت ناصر ..ناصر كم الساعة الحين ..ثلاث إلا ربع هـــا .. حطتها قدام وجهه !!.. طالعها ناصر وضحك :وش أسوي لك ع شان تقومين عجزت معك !!.. عضت أسيل ع شفتها بغيظ :ثلاث إلا ربع هـا ..والساعة توها تسع وربع بس أنا الغلطانة اللي أسمع كلامك !!... ابتسم ناصر بهدوء :قومي واتركي الدلع عنك ..صيري زوجة سنعة ودعيني قبل ما أروح دوامي واستقبليني إذا رجعت !!.. ضحكت أسيل :عيوني ما طلبت تأمر أمر أنت كم ناصر عندي .. واحد هو ربي يحفظه ويخليه لي !!... دقها ناصر بذراعه :لا والله قاعدة تخففين دمك الحين أنتي !!... وقفت أسيل :لا والله أنا ما أعرف ألف وأدور ..غمزت بعينها ..وأهم شيء أني ما أكذب !!.. ضحك ناصر بقهقهة :أقول عجلي الله يرضى عليك ..ما أبقى أتأخر ع دوامي فـ أول يوم !!.. هزت أسيل رأسها ..وكملت طريقها متجهة للحمام ..لكنها وقفت والتفت ع ناصر :متى ب ترجع من دوامك !!.. رفع ناصر حاجبه :ليه تسألين !!.. حطت أسيل يدها ع خصرها واليد الثانية مررتها ع شعرها:ع شان أكون فـ انتظارك لما ترجع !!.. وقف ناصر وقرب منها :لا يكون ب ترجعين تنامين بعد ما أطلع !!.. هزت أسيل رأسها :شيء أكيد !!.. تأفف ناصر بقهر :أف يا القهر .. خلصي بسرعة لا تأخريني يكفي الوقت اللي ضاع !!.. هزت أسيل أكتافها :إذا كنت تحس نفسك متأخر رح لا تنتظرني!!.. حط ناصر يده ع خصره :ودك أنتي أروح ع شان ترجعين تنامين يا كسولة ما فيه رجلي ع رجلك ..يله خلصينا بسرعة !!.. ضحكت أسيل برقة : يعني ما فـ مفر!!.. هز ناصر رأسه جرها للحمام :أي ما فـ مفر يله عجلي !!.. دخلت الحمام تستحم ..وبعد وقت قصير نسبيا ..كانت جاهزة نزلت هي وناصر بمعية بعض!!. : : : بالصالة بالدور التحتي ما كان فيه غير أم ناصر وريم اللي كانت قاعدة تنتظر فارس يجي يأخذها بعد ما يطلع من المستشفى ..دخلوا ناصر وأسيل الصالة وسلموا ع أم ناصر وقعدوا معهم .. انتبه ناصر لنظرات أمه اللي تطالعهم بها .. ما ارتاح لنظراتها ولا عرف يفسرها !!.. قرب من أمه وقبل رأسها :صبحك الله بالخير يمه !!.. ردت أم ناصر بهدوء :الله يصبحك بالنور والسرور!!.. قربت أسيل منها وقبلت رأسها:صبحك الله بالخير خالتي !!.. ردت أم ناصر من غير نفس بعد صمت دام للحظات:أهلا صباح النور !!.. همس ناصر لـ أسيل الواقفة جنبه :شوفي ريم نايمة فـ نفس الوقت اللي أنتي نايمة فيه وصحت قبلك !!.. تأففت أسيل :أف ناصر خلصنا من هـ الموضوع !!.. قعد ناصر جنب أمه :أمي وين أبوي !!.. لوت أم ناصر فمها :أنت شفت ساعتك قبل ما تسأل !!.. رفع ناصر حاجبه :شـ فيها ساعتي !!.. تنهدت أم ناصر بضيق :أقصد الوقت !!.. هز ناصر رأسه :أي شفت الوقت ..الساعة تسع ونص !!.. حركت أم ناصر يدها :هذا أنت قلتها تسع ونص يعني أبوك طلع من بدري ما جت الساعة الثمان إلا هو رايح المحل..بس أنت اللي مدري وش فيك تزوجت وتكاسلت مهي من عادتك تروح المحل فـ وقت متأخر !!.. تضايقت أسيل اللي كانت تسمعهم من النغزة نزلت رأسها !!.. حس ناصر بأسيل ما يدري وش فـ أمه تنحنح يعدل نبرة صوته غمز بعينه :خبرك عاد معرس جديد ولازم يتدلع !!.. ردت أم ناصر بنبرة جافة ممزوجة ببعض الاستهزاء :أي الله يهنيك!!.. تضايق ناصر من أسلوب أمه بس ما يقدر يقول لها شيء لأنه عارفها ما راح تتقبل ..فترك الحوار معها مؤقتا كي يسلم من نغزاتها .. طالع ريم اللي قاعدة وهي لابسة عباتها :ريم وش فيك قاعدة ب عباتك وين ب تروحين!!.. شبكت ريم أصابعها بعض :انتظر فارس ب يجي الحين يأخذني !!.. ضيق ناصر فتحة عيونه :غريبة نايمة أمس عندنا مهي بالعادة !!.. هزت ريم أكتافها:عادي بس لأن فارس كان عنده مناوبة بالليل و ب يتأخر ع شان كذا نمت هنا !!.. حك ناصر جبهته :ما أنتم ناوين تسافرون بالإجازة هذي يا ريم !!.. هزت ريم رأسها :ما أظن لأن فارس حاليا ما عنده إجازة وإذا طلع إجازة ب تكون فـ نهاية شهر ثمانية أو شهر تسعة وأنا قدمت ع صيفي بالجامعة بما أن فترة الدراسة قصيرة !!.. ابتسم ناصر بهدوء:أبوي يقول احتمال أنه يسافر و ب يأخذ معه أمي وجود تروحين معنا ما راح نطول كثير!!.. شبكت ريم أصابعها بعض :لازم أشاور فارس بالأول إذا يبقي يروح لأنه إذا راح ب أروح وإذا ما راح أنا مني رايحة!!.. غمز ناصر بعينه :يا عيني ع الحب والوفاء والإخلاص !!.. استحت ريم وتوردت خدودها وجهت أنظارها لــ رجلها !!.. هزت أم ناصر رجلها :يعني أنت ب تسافر معنا أنت وزوجتك !!.. ضحك ناصر :أكيد يمه ولا ما ودكم أني أروح معكم !!.. زفرت أم ناصر بضيق :بس أنت توك راجع من السفر وأبوك ما يقدر يترك مسئولية المحلات للعمال فلازم واحد منكم يقعد يا أنت يا هو !!.. قطب ناصر حواجبه :عادي ما فيها شيء نروح أنا وهو وبندر موجود يتكفل بكل شيء !!.. كتفت أم ناصر يدها :أبوك ما قال لك أنهم احتمال يروحون معنا !!.. أخذ ناصر نفس يهدي انفعالاته ..ما يدري وش فـ أمه قالبة عليه ما رد عليها وغير الموضوع:أفطرتم وإلا بعدكم !!.. ردت أم ناصر باقتضاب :أي أفطرنا قبل ما يروح أبوك المحل يعني تسوي روحك ما تدري وكأن نظام بيتنا جديد عليك !!.. فغر ناصر فاه مستغرب من أسلوب أمه معه رد بأسلوب يحاول فيه جذب اهتمامها:يوه وهذاني عامل حسابي أفطر معكم تراني ما أفطرت وأبي فطور !!.. أشرت أم ناصر ع أسيل وطالعتها بطرف عينها :ليه ما أفطرت مع ست الحسن والدلال ع الأقل تفتح نفسك للأكل وليه ما تصير حرمة سنعة وتجهز أكلك قبل ما تطلع !!.. فرقعت أسيل أصابعها تكبت غيظها وقهرها ما تدري وش سر الهجوم اللي شنته عليها خالتها ضغطت ع أصابعها بقوة تمنع دموعها لا تنزل ...حاولت .. حاولت مستميتة تمنعها لكنها ما قدرت ..مسحت دمعة خانتها بظهر كفها قبل ما أحد يلاحظها !!.. عض ناصر ع شفته ..طالع أسيل وانتبه للتغير اللي أصابها ..تصنع الضحكة :وش فيك يمه هي عروس جديدة ب ندلعها الحين قبل ما يطيح كرتها وإلا هي فيها الخير والبركة!!.. لوت أم ناصر فمها :أي الله يهني سعيد ب سعيدة .. طالعت ريم ..ماما ريم قومي جهزي لـ أخوك الفطور !!.. وقفت أسيل :خليك ريم أنا أروح أجهز له الفطور .. بعد أذنك خالتي ممكن أروح المطبخ !!.. طالعتها أم ناصر بطرف عينها :ليه وأحد قال لك أن المطبخ قافلينه بمفتاح !!.. وقفت ريم بعد ما شالت عباتها عنها :انتظري أسيل لحظة بروح معك !!.. مشت أسيل وبجنبها ريم متجهين للمطبخ ولما تواروا عن نظرات ناصر اللي تشيعهم ..التفت ع أمه :يمه وش فيك ع أسيل حاطة نقرك من نقرها سوت لك هي حاجة حتى تكلمينها من طرف خشمك !!.. رفعت أم ناصر حاجبها :لا والله من متى وأنت ترفع صوتك عليّ وإلا لما تزوجت ست الحسن والدلال صار يحق لك كل شيء !!.. تنهد ناصر بهدوء :يمه أنا ما رفعت صوتي عليك ..وأنا ما قلت إلا الحق أسيل وش سوت لك حتى تعاملينها كذا !!... هزت أم ناصر رجلها بتوتر :أكره أمها وأشوفها فـ وجه بنتها!!.. تنهد ناصر بهدوء :أنسي أن عمتي منى تكون أم أسيل ع شان خاطري أنا ما أبقي أمي وزوجتي يكونون مختلفين وبعدين يا أمي انسي اللي راح وافتحي صفحة جديدة ما أضن أن عمتي منى ضايقتك بشيء بعد ما أخذت بنتها وبعد ما صالحها أبوي ورجعت المياه لمجاريها !!.. ردت أم ناصر بانفعال :ب هـ السهولة تقول لي أنسى يا ما ذقت الويل منها ويا ما شفت منها أشياء وأشياء و ب هـ البساطة تقول لي انسي !!.. شبك ناصر أصابعه بعضهم :نصيحة مني يمه حسني معاملتك لأسيل مو عشاني أنا ع شان أبوي لأنه لو شاف معاملتك لها صدقيني ما راح يعدي الموضوع بالساهل هو خطبها من نفسه حتى يصلح علاقته بإخوانه وشفتيه وش سوى حتى يشتري خواطرهم ..وما راح يرضى بأي شيء يهد اللي بناه وصلحه ولو صار شيء أو استجد حاجة بعلاقته بإخوانه ب يضحي بخاطرك ويشتري خواطرهم لأنه مو مستعد يخسرهم مرة ثانية بعد ما لقاهم واحتوه وأنتي تعرفين أبوي أكثر مني ما يحتاج أقول لك عنه !!.. سكتت أم ناصر ع مضض كلام ناصر صحيح أبو ناصر أجبر بنته ع الزواج من ولد أخته حتى يقوي علاقته بها وزوج ولده من بنت أخته الثانية حتى تقوى العلاقة وما راح يتنازل أبد عنهم بعد ما لقاهم !!.. : : : أما بالمطبخ عند ريم وأسيل .. بدأت أسيل ترتب الأغراض اللي طلعتهم من الثلاجة بالصينية ..كانت تتحرك بالمطبخ بصمت و بهدوء .. لاحظت ريم صمتها وهدوئها وأحست بأن فيها شيء ..مهو بس أحست إلا أيقنت ما فـ وحدة تسمع نغزات مثل نغزات أمها وما تتحسس .. قربت ريم منها وحطت يدها ع كتفها :أسيل لا تزعلين من أمي تراها ما تقصد !!.. كانت أسيل ساكتة ومنزلة رأسها !!.. تنهدت ريم بهدوء :لازم تتحملين اللي حولك وتوسعين صدرك ولا تدققين ع كل شيء لأنك ب تتعبين .. أمي أكيد أنها متضايقة من شيء وصرتي أنتي فـ وجهها فعشان كذا نفست غضبها فيك !!.. ردت أسيل بانفعال :أي يا ريم بس أنا ما سويت لها شيء حتى تنغزني بالكلام كذا!!.. هزت ريم رأسها :أدري أنك ما سويتي لها شيء ..يمكن تكون هي متضايقة لأن أبوي متعب نفسه بالشغل ولا هو راضي يأخذ راحة ...وناصر مو ع باله أي شيء وموسع صدره ع الأخر سافر بالأول ع شان شهر العسل ولما رجع قعد أسبوع بالبيت والحين يبقي يسافر مرة ثانية ونفس الشيء ب يصير كل شيء فوق رأس أبوي !!.. هزت أسيل أكتافها :أي يا ريم بس أنا ما طلبت من ناصر يقعد معي ويترك الشغل ع خالي !!.. ابتسمت ريم بود :أدري أنك ما قلتي له ..بس أحد يشوفك ويشوف جمالك ويطلع ويخليه !!.. بادلتها أسيل الابتسام :الله يجبر بخاطرك مدري لو ما كنتي معي وش ب أسوي أقلها يمكن أروح بيتنا لأهلي !!.. رفعت ريم حاجبها :أف عاد ما توصل لـهـ الدرجة المفروض اللي يصير بينك وبين زوجك وأهله ما يطلع لـأي أحد لأنك ما تدرين وش ردود الأفعال يمكن أهلك يحاولون يتدخلون وبدل ما يصلحون يفسدون !!.. رفعت أسيل يدها :أف ....عاد لا تقولين !!.. ضحكت ريم :قلت وخلصت !!.. عضت أسيل ع شفتها وما علقت !!.. أشرت ريم بيدها :يله عجلي وجهزي فطور رجلك قبل ما ينقلب كل شيء ضدك !!.. تنهدت أسيل بضيق :صدقيني يا ريم أن ناصر ما قال لي أنه يبقي يفطر قبل ما يطلع كان جهزت له كل شيء قبل ما أنزل بس هو ما قال لي وإلا أنا ما أحب أحد ينتقدني ولا أحب أطلع مقصرة فـ أي شيء من واجباتي!!.. هزت ريم رأسها :عارفة بس يا أسيل فـ أشياء ما يحتاج زوجك يطلبها منك المفروض أنتي من نفسك تجهزينها له ..ملابسه أكله شربه ..أجمل شعور هو لما تقومين بخدمة زوجك بنفسك وتعتنين وتهتمين فيه بنفسك من غير ما تعتمدين ع أمه أو أخواته أو حتى الشغالة ..هو ما تزوج إلا ويبقي يستقر ..لا تعطين أيا كان فرصة حتى ينتقدك أو يدور لك ع زلة !!.. سكتت أسيل تسمع !!.. كملت ريم كلامها :أنتم فـ بداية حياتكم وشيء طبيعي تواجهكم بعض المطبات لا تخلينها تأثر ع حياتكم ..وحاولي قد ما تقدرين تتفادينها ..وإذا كنتي تبقين تستشيرين أحد فـ أمور تجهلينها فاستعيني بأحد ثقة ينصحك وما يستقل جهلك وعدم معرفتك !!.. تنهدت أسيل بهدوء :أنا لو ب استعين بأحد فهو أنتي لأن ما عندي أحد أثق فيه غيرك !!... ابتسمت ريم بهدوء :وأنا موجودة متى ما بقيتيني ب تلقيني لك عون وسند بإذن الله !!.. قاطع كلامهم وحديثهم ...ناصر اللي دخل عليهم المطبخ :ما خلصتم حشى ما صار هذا فطور!!.. تبادلوا أسيل وريم النظرات..غمزت ريم بعينها لـ أسيل ع شان ترد ..وانسحبت هي من المطبخ بهدوء !!.. ابتسمت أسيل بهدوء :ثواني ويكون جاهز ..بس وين تبقي تفطر فيه !!.. قرب ناصر منها :أسيل ما أبقيك تضايقين من أمي ولا تأخذين ب خاطرك منها تراها ما تقصد شيء !!.. هزت أسيل أكتافها :عادي ناصر ما صار شيء لا تشغل بالك !!.. حط ناصر يده ع خصره :لا والله ما أشغل بالي وهـ الدموع وش تفسيرها!!.. تجنبت أسيل النظر فـ عيونه :أنا ما صحت !!.. كتف ناصر يده : أي واضح أضحكي ع أحد غيري ما يفهمك!!.. زمت أسيل شفتها بقوة :أنا أقول لك ما صحت أف يعني غصب ب طلعني أني صحت !!.. تنهد ناصر بهدوء :حبيبتي أسولتي أبقيك تتحملين أمي وتصرفاتها وطولين بالك عليها ..تعرفين أنتي الغيرة عاملة عمايلها أنا ولدها الوحيد والغالي عندها وفجأة تجي وحدة تشاركها فيه ..بس ما أبقاك تشيلين عليها حاولي قد ما تقدرين تتقربين منها وتغيرين نظرتها تجاهك !!.. زفرت أسيل بكل قوتها :الله يعيني ويصبرني !!.. ابتسم ناصر :إن شاء الله أنتي قدها وقدود ...أقول حبيبتي ما فـ فطور يعني أروح وأنا جايع !!.. ميلت أسيل فمها عن شبه ابتسامة :ثواني وأحلى فطور يكون عندك !!.. تحركت أسيل ع عجل وكملت تجهيز الفطور ولما خلصت تقدم ناصر وحمل الصينية وطلعوا يفطرون بغرفة الطعام أصد وأهدى !!.. : : : لما طلعت ريم من المطبخ راحت لأمها الصالة ..انتبهت عليها أمها اللي كانت تقلي وتفور من الغضب !!.. كتفت أم ناصر يدها وهزت رجلها بغيظ:راح أخوك لست الحسن والدلال زوجته يراضيها !!.. قربت ريم منها قعدت جنبها : أمي وش فيك ع أسيل تراها ما سوت لك حاجة حتى تتضايقين منها بذا الشكل !!.. تأففت أم ناصر بقهر :أكره أمها وما أطيقها وشيء طبيعي أكرهها حتى هي وما أطيقها !!.. ضيقت ريم فتحة عيونها :ليه وش سوت لك عمتي منى !!.. حركت أم ناصر يدها :أول ما تزوجت أبوك كانت هي أكثر وحدة تأذيني وهي اللي حرضت عمك وعمتك ع أبوك وخلتهم يقاطعونه !!.. رفعت ريم حاجبها مستنكرة :هذا شيء قديم راح وانتهى !!.. انفعلت أم ناصر بعصبية :عندكم شيء قديم راح وانتهى وإلا أنا يتجدد فـ داخلي من أشوف منى أو أحد من طرفها !!... بلعت ريم ريقها :طيب مدام أنك ما تحبين عمتي ولا أي أحد من طرفها ليه وافقتي ع زواج ناصر من أسيل !!.. ضحكت أم ناصر باستخفاف :ليه وأبوك شاورني حتى أرفض أو أوافق !!... حكت ريم مقدمة رأسها : بس يا أمي صار هذا واقع وما نقدر نغيره أو نرفضه ..وبعدين وش دخل أسيل حتى تكرهينها أي شيء بينك وبين عمتي لا تدخلونا إحنا فيه وناصر وأسيل مالهم ذنب باللي بينكم !!.. عضت أم ناصر ع شفتها بغضب :ريم مالي خلقك أنتي الثانية ..وأنا أسوي اللي يعجبني ما أحد له دخل باللي أسويه !!.. هزت ريم رأسها :يا أمي اعتبري أسيل وحدة من بناتك وعامليها مثل ما تحبين الناس تعامل بناتك !!.. رصت أم ناصر ع أسنانها بشدة :ما أقدر أنتي تطلبين المستحيل لو كانت وحدة غير بنت منى والله لأني أعاملها مثل ما أعمالكم وأحسن !!.. مررت ريم يدها بشعرها :أمي ترضين عمتي بدرية تعاملني مثل ما تعاملين أنتي أسيل !!.. ضيقت أم ناصر عيونها كأنها تفكر : بدرية غير !!.. هزت ريم رأسها :حتى ولو ما فـ أحد أحسن من أحد .. وعمتي منى لما تشوف تعاملك مع بنتها فأكيد ب توصله لعمتي بدرية وعمتي بدرية ب تأخذ حق أختها منك فيني .. وأنا ما أبقي أي شيء يأثر ع علاقتي بفارس وما أظن أن ناصر ب يرضى بأي شيء يأثر بعلاقته بأسيل!!. تذمرت أم ناصر بحنق :أشوف أنكم استغنيتم عني بهم !!.. ابتسمت ريم بود :أمي أنتي الخير والبركة مستحيل نستغنى عنك لكن إذا شفناك ع خطأ ما يمنع أن إحنا نوجهك..انسي اللي راح وعمتي منى الحين غير عن الأول لا تخلين الحقد والكره يعمون عيونك وصيري أحسن منها وبيني لها أنك ما تحملين فـ قلبك شيء من ناحيتها من خلال تعاملك مع أسيل !!.. زفرت أم ناصر بكل قوتها :أنتي وأخوك عسى ما أتكلم إلا سكتوني !!.. طالعتها ريم بنظرة ترجي :أمي وبعدين قلت لك انسي شوي ..أسيل من جت عندكم البيت أخذت أسبوع قد مرة شفتي منها شيء يضايقك !!.. تنهدت أم ناصر بضيق :لا يغرك كل هذا تمثيل !!.. هزت ريم رأسها وسايرت أمها :اعطيها فرصة لشهر راقبي تصرفاتها معك ومع أهل البيت وإذا شفتي منها شيء يضايقك سوي معها اللي تبقين وما راح أحد يلومك بعدين!!.. قلبت أم ناصر عيونها ساكتة تفكر !!.. سكتت ريم بالمثل خلت أمها لـ أفكارها يا إما تقتنع وإما لا !!.. دق جوال ريم وبدد السكون اللي هم فيه ..عرفت من النغمة أن فارس هو المتصل راحت لـ شنطتها فتحتها وأخذت الجوال منه !!.. ابتسمت بهدوء وردت :مرحبا فارس !!.. تنهد فارس :أهلين ريم ..أنا بره يله ..اطلعي !!.. هزت ريم رأسها :إن شاء الله .. سكرت الجوال ولبست عباتها وقربت من أمها تسلم عليها :أمي ما أوصيك فكري بكلامي زين وحاولي أنك تتقبلين أسيل أدري أنه ب يكون صعب بالبداية بس أكيد ب يسهل بعدين!!.. هزت أم ناصر رأسها :لا تحاتين أنتي روحي لزوجك لا تتأخرين عليه !!.. هزت ريم رأسها وطلعت تحث خطاها .. وكانت خطواتها أقرب للركض من المشي .. ركبت السيارة اللي كانت واقفة عند الباب !!.. سكرت ريم الباب بهدوء سلمت :السلام عليكم !!.. همس فارس ورد :وعليكم السلام !!.. قعدت ريم مقابلته وأعطت الباب ظهرها :سلامات فارس ..ليه تأخرت من الساعة سبع ونص وأنا انتظرك !!.. تنهد فارس بهدوء :الله يسلمك ..الدكتور وائل عنده عملية وطلب مني أدخل معه كمساعد ونسيت لا اتصل عليك أبلغك أني ب أتأخر !!.. ضيقت ريم فتحة عيونها :مو تعب عليك سهران أمس بالمناوبة والصبح تدخل عملية !!.. هز فارس أكتافه :أمس ما كان فيه زحمة عندي فنمت شوي بالمكتب !!.. شبكت ريم أصابعها بعض :فارس شـ كلك تعبان فيك شيء تحس بحاجة !!.. التفت فارس يطالعها :لا ما عليك ارهاق بسيط ...وين تبقين نروح !!.. هزت ريم أكتافها :وين بعد البيت !!.. طالع فارس الطريق أمامه:أنا ما أبقى أروح البيت !!... ما ردت ريم سكتت !!.. التفت فارس يطالعها :ما قلتي وين نروح !!.. أشرت ريم بيدها عليه :بس أنت تعبان خلها لوقت ثاني !!... أشر فارس بيده ع نفسه :ما عليك أنا طفشان وملان وما أبقي أروح البيت ...قولي وين نروح !!.. رفعت ريم حاجبها :متأكد أن ما فيك شيء !!... هز فارس رأسه بإصرار :أي متأكد أن ما فيني شيء يعني وش ب يكون فيني !!.. تنهدت ريم بضيق :بس أنا متأكدة أن فيك شيء ...قولي فارس وش فيك شكلك ما يطمن يعني بالله عليك واحد مرهق ويبقى يطلع ويروح ويتمشى هذا بدل ما يروح البيت يرتاح ..شيء مضايقك ومكدر عليك صح وإلا أنا غلطانة؟؟؟!!... زفر فارس بكل قوته :طبعا غلطانة ..صدقيني ما فيني شيء ولا فـ شيء مضايقني أو مكدر عليّ ارتاحي ولا تحاتين !!.. كتفت ريم يدها :فارس إذا ب تكذب أكذب ع أحد غيري أنا ريم أعرف كل تغير يصيبك وأحس فيك إذا كنت مرتاح أو متضايق يعني أنا حافظة كل الحالات اللي تمر أنت فيها !!.. حط فارس يده ع يدها وضغط عليها :صدقيني ما فيني شيء ارتاحي أنتي ولو فيني شيء ب أقول لك ليه ما أقول يعني لا تشغلين بالك !!.. أشرت ريم بإصبعها :ب أكذب نفسي و ب أصدقك بأن ما فيك شيء !!... ابتسم فارس بهدوء :وين تبقينا نروح !!!..... همست ريم :البحرين !!.. كرر فارس كلمتها :البحرين ...شـ معنى !!.. هزت ريم أكتافها :عادي مو أنت تقول أنك مو تعبان خل نروح نتمشى هناك قبل ما أبدأ الصيفي وانزحم !!.. هز فارس رأسه :نروح البحرين بس ب نروح البيت بالأول نأخذ جوازاتنا وأغير ملابسي ونعطي أهلي خبر !!.. أسندت ريم ظهرها ع المرتبة وقابلت الطريق أمامها:ع راحتك !!.. تنهد فارس وسكت كان متضايق ومهموم تكرار زيارات حمود وتهديداته بالآونة الخيرة مما خلاه يضيق ذرعا ب هـ الوضع فكر أنه يعطيه مبلغ ويرتاح منه ومن شره لكن خاف أنه يتعود ويكرر حركاته هذي كل ما احتاج للفلوس !!.. : :: فـ بيت أبو ناصر ..كانت أسيل وأم ناصر قاعدات بالصالة لحالهم بعد ما راحت ريم بيتها وبعد ما طلع ناصر للمحل... كانوا ساكتين ولا وحدة فيهم تتكلم وكأن كل وحدة قاعدة لحالها .. وقفت أم ناصر واختفت عن أنظار أسيل ورجعت وهي ماسكة عباتها !!.. نزلت جود من فوق توها صاحية من النوم ..وزعت أنظارها ع أمها وأسيل!! .. تفحصت جود امها اللي كانت تلبس عباتها بنظراتها :ماما وين ب تروحين الحين !!.. تنهدت أم ناصر بهدوء :بروح لـ بيت أم بندر !!... حطت جود يدها ع خصرها :وش فيها خالتي هند !!.. هزت أم ناصر أكتافها :ما فيها شيء ليه تسألين !!... مررت جود يدها بشعرها :أسال عادي ... أقصد ليه ب تروحين لها !!.. زمت أم ناصر شفتها :مليت وأنا قاعدة بروحي قلت أروح أتسلى شوي عندها مدام أني فاضيه!!. تضايقت أسيل من هـ النغزة نزلت رأسها و دخلت أصابعها بشعرها تخفف حدة غيظها !!... ضيقت جود فتحة عيونها :وين ريم عنك !!.. شبكت أم ناصر أصابعها بعض :راحت بيتها طلع فارس من المستشفى ومر أخذها !!.. تأففت جود بضيق :وأنا أظن أنها ب تقعد اليوم كله عندنا هنا بالبيت !!... حركت أم ناصر يدها :لا وش يقعدها عندنا .. مدام أن زوجها خلص دوامه و ب يقعد فـ بيته تروح بيتها أولى لها .. أنا بمشي الحين تبقين شيء !!.. هزت جود رأسها :أي بروح معك لبيت خالتي من زمان عنها !!.. قعدت أم ناصر : روحي غيري ملابسك بسرعة ما نبقي نتأخر !!.. ابتسمت جود :ماله داعي أغير ملابسي .. بروح كذا !!... مررت أم ناصر إصبعها ع جود من فوقها لـ تحتها: ب تروحين بالبيجامة ..روحي غيري وإلا ما فـ روحة من الأساس !!... ضحكت جود :وش فيك يا ماما إحنا مو رايحين لغرب ما فـ أحد غير خالتي هند وهي متعودة تشوفني بكل حالاتي !!... انفعلت أم ناصر بعصبية :جود ترى مالي خلقك ب تروحين معي غيري ملابسك بالأول وإلا أقعدي بالبيت !!... اشرت جود بيدها :خلاص .. خلاص هدي يا أم ناصر بروح أغير ملابسي بس لا تروحين عني !!... أخذت أم ناصر نفس :عجلي ع شان نرجع قبل صلاة الظهر !!.. هزت جود رأسها :إن شاء الله ..لفت ب تروح للدرج ..انتبهت لـ أسيل اللي كانت وراهم .. قربت منها :أسول تروحين معنا بيت خالتي هند !!.. طالعت أسيل أم ناصر تشوف رد فعلها هزت أكتافها :مدري !!.. مدت جود يدها توقف أسيل :روحي معنا مدام ناصر مو موجود !!.. وزعت أسيل نظراتها ع جود وأمها :مدري لازم أسأل ناصر بالأول !!... حطت جود يدها ع خصرها:قومي ب نروح ونرجع وناصر ما رجع !!. علقت أسيل نظراتها ع أم ناصر :حتى ولو لازم أسأله !!... صرخت أم ناصر عليهم :وبعدين معكم يعني مطولين أنتم خلصونا بسرعة وإلا أروح وأخليكم !!.. فهمت أسيل من كلام أم ناصر أن روحتها معهم مرحب فيها ..وقفت :بروح أكلم ناصر فوق و برد لكم خبر !!.. زمت أم ناصر شفتها :وإحنا ب ننتظر لما تروحين تكلمينه وترجعين ..ترانا مو فاضين لك ..هذا التليفون قدامك كلميه !!... ارتبكت أسيل وتوترت !!.. انقذت جود الوضع بدون قصد :أسول تلقين النوتة جنب التليفون و ب تلقين رقم ناصر فـ أول صفحة إذا كنتي مو حافظته بروح أغير وأنزل بسرعة!!... هزت أسيل رأسها .. وراحت عند التليفون رفعت السماعة وما يحتاج أنها تستعين بالنوتة لأنها حافظة رقمه .. دقت بأصابع مرتجفة لأنها لاحظت أنظار أم ناصر عليها !!... رد ناصر عليها :هلا !!.. تنحنحت أسيل تعدل نبرة صوتها :مرحبا ناصر !!.. رد ناصر ع عجل :تبقون حاجة !!.. تفاجاءت أسيل من أسلوبه بس تجاهلت الوضع مؤقتا :ناصر أنت وينك !!.. شد ناصر ع أسنانه :يعني أنا وين ب أكون أنا بالمحل تبقون شيء !!.. فهمت أسيل من أسلوبه الرسمي أنه معه أحد :جنبك أحد !!... زفر ناصر بكل قوته :أي تبقون شيء !!... انتبهت أسيل لنظرات أم ناصر اللي مركزة معها :هــا ..أي خالتي و جود ب يروحون عند خالة أم بندر عادي أروح معهم !!... تنهد ناصر بهدوء :أي عادي بس لا تتأخرون بعد صلاة الظهر مباشرة بكون بالبيت .. أنا مشغول الحين فـ أمان الله !!.. ما ردت أسيل عليه لأنه سكر وما أعطاها فرصة ترد !!.. طالعت أسيل أم ناصر :رضى ناصر أروح معكم ..بروح فوق ب أجيب عباتي ونازلة !!.. انتظرتها ترد أو تعلق لكنها ما علقت... تنهدت بهدوء وراحت فوق ع عجل تلبس عباتها ..أخذتها ولبستها .. وكلها عشر دقايق وكانوا متجهزين وطالعين من البيت متوجهين للبيت أم بندر اللي كان بجنب بيتهم !!... : : : فـ صالة بيت أم بندر كانوا الأربعة ملتفين وجالسات جنب بعض يتكلمون !!.. وزعت أم بندر نظراتها عليهم :حيا الله من جانا تو ما نور بيتنا !!.. غمزت جود بعينها :طول عمري أشوف بيتكم منور يا خالتي كيف تقولين توه منور !!.. خزتها أمها :عيب يا بنت استحي ع وجهك !!.. حركت أم بندر يدها :خليها يا خديجة ليه تسكتينها يا حبي لها دمها خفيف !!.. ضحكت جود :تسلمين يا خالتي ما أحد يقدر مشاعري ب هـ الكون غيرك أنتي !!.. شاركتها أم بندر الضحك :لا تعتبين ولا تشرهين عليهم يا بنتي لأن ما عندهم نظر !!... فتحت جود ذراعها ع وسعهم :فديتك يا خالتي ويلومني فـ حبك !!... ابتسمت أم بندر بهدوء :والله وأنا بعد أحبك !!.. هزت أم ناصر رأسها :الله يعيني ع ذا البنت أبد ما تعرف تقعد ساكتة !!... أشرت أم بندر بيدها :وش عندك عليها خليها تأخذ راحتها ما فـ أحد غريب !!.. زفرت أم ناصر بكل قوتها وما ردت !!... طالعت أم بندر أسيل الساكتة :شـ فيك يا أسيل ساكتة ما تتكلمين لا تستحين ترى إحنا أهل !!... تنهدت أسيل بهدوء :مني مستحيه ساكتة لأني أسمعكم !!..... ابتسمت أم بندر بمحبة :اعذريني يا أسيل المفروض أجي عندك وأبارك لك وأجيب هديتك لـحد عندك بس ما فضيت الأسبوع اللي راح وكنت ناوية أجيكم اليوم بس أنتم سبقتوني !!.. بادلتها أسيل الابتسام : ماله داعي يا خالة تكلفين ع نفسك وأهم شيء نشوفك وقعدتك تسوى ملايين الهدايا !!... هزت أم بندر رأسها : وشو اللي ماله داعي ..يا بنتي غلاتك من غلات ناصر ومثل ما هو ولدي فأنتي بنتي !!... دقتها أم ناصر بذراعها :أي وشو له تكلفين ع نفسك احتفظي بفلوسك خليها تنفعك فـ شيء أهم وإلا هي شبعانة هدايا وناصر مو مقصر عنها بشيء!!... تنهدت أسيل بضيق توقعت أن أم ناصر لما وافقت أنها تروح معهم أنها مرحبة بوجودها معهم ما توقعت أنها ب تكمل هجومها عليها !!... رفعت أم بندر حاجبها مستنكرة :الخير واجد ولله الحمد ..وهديتي غير وأنا أعدها وحدة من بناتنا واللي لهم لها !!.. شبكت أم ناصر أصابعها :والله مدري وشو له تكلفين نفسك ع ناس ما تسوى !!.. فتحت أم بندر عيونها ع أخرها :أهــا !!... فرقعت أسيل أصابعها تكبت قهرها ندمت ع أنها جت معهم لو تدري أنها ب تسمع الكلام هذا قعدت فـ بيتهم أحسن لها ..تذكرت كلام ريم وسعي صدرك .. حاولت تهدي نفسها وتتناسى الهجوم هذا وتوسع صدرها وتأخذ وتخلي !!.. وزعت أم بندر نظراتها ع أسيل وجود .. ابتسمت فـ وجه جود :حبيبتي جود روحي المطبخ هاتي سكر الشاهي ما فيه طعم سكر !!.. فتحت أم ناصر عيونها مستغربة !!.. وقفت جود مبتسمة :إن شاء الله خالتي !!... طالعت أم بندر أسيل مبتسمة :أسيل إذا ما عليك أمر روحي فوق وهاتي جوالي ب تلقينه بالصالة ع وحدة من الطاولات !!... وقفت أسيل مترددة :ما في أحد فوق !!.. هزت أم بندر رأسها :لا بندر طالع مو موجود !!... هزت أسيل رأسها .. وراحت تمشي بخفة متجهة للدرج !!.. رفعت أم ناصر حاجبها مستنكرة :الحين أبقي أفهم ليه قومتي البنات و الشاهي مدبول سكر وجوالك هذا هو جنبك !!... عضت أم بندر ع شفتها بغيظ :خليك مني الحين ... شـ فيك ع البنت !!... قطبت أم ناصر حواجبها :أي بنت !!.. كتفت أم بندر يدها :أي بنت بعد فـ غيرها مرة ولدك أسيل !!... زمت أم ناصر شفتها :خير وش فيها !!.. هزت أم بندر رأسها بأسف :وش فيها اسألي نفسك لا تسألني أنا وش سوت لك حتى تغطين عليها ذا النغزات .. وش هـ الرعب اللي انتي مسببته لها تطالعك قبل ما تتكلم تخاف منك الله يهديك !!.. عضت أم ناصر ع شفتها بغيض وما ردت !!.. تنهدت أم بندر بهدوء :ترى ناصر هو اللي اتصل عليّ لما عرف أنكم جاين عندي وطلب مني أكلمك بخصوص زوجته ..كأنك تبقين السعادة لولدك فعاملي زوجته بما يرضي الله!!.. أشرت أم ناصر بإصبعها :هند ترى مالي خلق توني خالصة من ريم وناصر فالله يخليك لا تزيدني !!... رفعت أم بندر حاجبها :لا أزيدك هـــا.. دائما الغلطان ما يبقي أحد يوجهه أو ينبهه وعمره ما اعترف بالغلط ع نفسه .. والله إذا ما عاملتيها زين أنتي اللي ب تندمين بعدين إذا قرر ولدك يستقل بحياته وخصوصيته مع زوجته وراح يدور ع راحته بعيد عنكم !!... تأففت أم ناصر بضيق :اسمعي هند كأنك ب تعيدين وتزيدين ب هـ الموضوع ترى بروح بيتي!!. أخذت أم بندر نفس :اقعدي مكانك ولا تروحين بيتك تراهم كلمتين ورد غطاهم اللي تسوينه لها ب يرجع لبناتك حطي ذا الشيء فـ بالك زين ..ترى الدنيا ديـ .. قاطعتها أم ناصر بهدوء وثقة :ريحي عمرك بدرية والنعم منها ما شفنا منها إلا كل خير وريم مرتاحة معها ومع ولدها !!.. هزت أم بندر رجلها :لا تقولين بدرية ما بدرية إذا كانت بدرية حبيبة مع بنتك فأنتي نسيتي جود اللي ما تدرين نصيبها مع من ويمكن تأخذ واحد أمه تطلع عيونها وتسوي فيها مثل ما تسوين لـ أسيل !!.. شدت أم ناصر ع أسنانها بحنق :لا تقعدين تفاولين ع بنتي إن شاء الله مو صاير لها إلا الخير !!.. زفرت أم بندر بكل قوتها :أنا ما أفاول عليها أنا انبهك وأفتح عيونك ع أشياء أنتي ما تشوفينها أو تسوين روحك أنك ما تشوفينها ...أنتي شفتي كيف أبو ناصر يتقرب من إخوانه زوج ناصر لبنت أخته وزوج ريم لولد أخته ومهي بعيدة يزوج جود لـ واحد من عيال راشد أو يزوجها لولد منى وعاد أنتي عارفة طبع شيخه وطبع منى ما يحتاج أقول لك أن الدنيا دين!!... سكتت أم ناصر ع مضض وهي تغلي وتفور من الغيظ والقهر !!.. دخلت أسيل عليهم ..طالعت أم ناصر بالبداية تشوف انفعالاتها .. وطالعت أم بندر .. بلعت ريقها :خالتي ما شفت الجوال !!!.. أخذت أم بندر الجوال من جنبها ومدته لـأسيل :هذا هو لقيته عند التلفزيون ..ما عليه حبيبتي اتعبناك !!.. قربت أسيل منهم وقعدت فـ مكانها السابق :عادي خالتي ما فيها تعب ولا حاجة !!.. طالعت أم بندر أم ناصر لكزتها :كملي بيالتك ولا تأخذين ع خاطرك مني أنا سترك وغطاك وبعدين إحنا نتناقش عادي لا تكبرين الموضوع !!.... أخذتها أم ناصر وارتشفتها ببرود متجاهلة أم بندر والتعليق عليها !!!... : : : دخلت جود المطبخ وما شافت الشغالة ع شان تسألها أو تعطيها إياه..فبدأت تدور السكر عند الأرفف والأدراج ما عندها أدنى علم وين ممكن تلقاه ...لكن تجرب حظها .. اخذت وقت طويل وهي تدور عليه لـ احد ما انفتح باب المطبخ عليها ...سمعت صوت الباب يفتح وتوقعت أنها الشغالة ومن غير ما تلتفت عليها "ليلي وين السكر "!!.. ما كانت الشغالة هي اللي داخلة كان بندر .. وقف عند الباب لما شافها وحدد هويتها بسرعة ما يحتاج لتفكير ابتسم بهدوء وتمتم بينه وبين نفسه "أوه جود من متى ما شفتها من زمان عنها "!!.. دخل لوسط المطبخ وفتح أحد الأدراج وأخذ السكر وناولها إياه :خذي جود هذا السكر !!.. انكمشت جود ع نفسها والتفت ع مصدر الصوت وشافت بندر وجمدت فـ مكانها وتخدرت أطرافها ما قدرت تحرك يدها وتمدها ع شان تأخذ السكر منه !!... استغرب بندر من ردة فعلها ضحك :شـ فيك جود خذي السكر ما خبرتك تستحين !!... ما تحركت جود ولم تبدي أي رد فعل تحس نفسها مخنوقة والحرارة تغزو جسمها والدم يتصاعد إلى وجهها تدريجيا ..استنشقت الهواء المحيط بها كله حتى اختفت ذرات الهواء من حولها.. أفكارها تدور برأسها هذا بندر من زمان ما شفته أخر مرة لما كنا بالبحرين..ومن بعد ما تزوجت ريم وهو منقطع عنا ....أف يا ربي نسيت أني أتغطى عنه ..كل منك يا ريموه أنتي اللي قلتي لي تغطي عنه ع شان لو خطبك يشوفك تغيرتي يشوفك وحدة ثانية غير البزر اللي هو يعرفها يا ربي وش هـ الإحراج اللي أنا فيه !!... تعلقت أنظارهم ع بعض كل واحد فيهم مسترسل بنظراته !!... كرر بندر نداءه :جود بسم الله عليك وش فيك ...تسمعين أقول لك خذي السكر!!... مدت جود يدها وأخذته منه بأصابع مرتجفة وأعطته ظهرها ب تطلع :المفروض تطق الباب قبل ما تدخل!!... حط بندر يده ع خصره :وليه إن شاء أطق الباب قبل ما أدخل تراني فـ بيتي مو فـ بيت أحد غريب حتى أستأذن !!... بلعت جود ريقها :لأن إحنا تغطينا عنك!!.. قطب بندر حواجبه :أنتم من !!... أشرت جود ع نفسها وصوتها بالكاد يوصل له :أنا تغطيت عنك !!... ضحك بندر :الله أكبر الحين أنتم وأنتم وبالأخير تكونين أنتي لحالك ..وليه إن شاء الله تغطيتي !!. هزت جود أكتافها :ريم قالت لي !!... رفع بندر حاجبه :وليه قالت لك !!.. اسرعت جود بخطواتها ب تطلع :مدري اسألها !!... توارت عن أنظاره ووقف يفكر حائر ..من يصدق أن ذي ب يجي يوم وتتغطى عنه ...هو عاش وتربى معهم ما جاء فـ باله أبد أنها ب تتغطى عنه و ب يكون مثل الغريب عليهم .. لكن الشرع شرع والدين دين ما يقدر يعترض أو يقول شيء أمام أحكام ربه .. لكنها تغيرت كثير عن أخر مرة شافها فيها حلوت وصارت ملامحها ناعمة وصارت هادية غير البنت الدفشة اللي هو يعرفها ... استغفر ربه البنت ما تحل له لا يقعد يفكر فـ تفاصيل وجهها وجسمها !!... دخلت جود الصالة بهدوء وسكينة كأن ع رأسها الطير ..حطت الأغراض ع الطاولة .. وقعدت جنب أسيل !!... طالعتها أسيل مستغربة :مو كأنك سكنتي بالمطبخ !!.. بلعت جود ريقها بتوتر :كنت أدور ع السكر !!... شبكت أسيل أصابعها بعض :أي سكر واللي يرحم والديك اشربوا الشاهي والقهوة وأنتي توك تجين !!... ما ردت جود لأنها فـ الأساس ما سمعتها تحس بنبضات قلبها تتسارع وكأن قلبها ب يطلع من مكانه .. يمكن خوف أو رهبة ..أو ربما نظرتها له اختلفت عن السابق بالأول كانت تشوفه ولد الجيران وأخ لأنه متربي معهم والحين لا ..تشوفه الفارس اللي ب ترتبط فيه واللي علقت أحلامها عليه !!.... استغربت أسيل تجاهل جود لها هزتها من كتفها :جود .. جود !!.. صحت جود من اغماءها أو حلمها اللي بدأ ب التكون :هـــا وش تبقين !!.. تنهدت أسيل بهدوء :لي ساعة أكلمك وأنتي أبد مو معي !!... كتفت جود يدها :خير وش تبقين !!... حركت أسيل يدها :خلاص هونت ما أبقي شيء !!.. تأففت جود بضيق :كيفك !!... وانتبهت لـأمها اللي وقفت تلبس عباتها معلنة انتهاء الزيارة القصيرة .. ووقفوا هم بالمثل لبسوا عبياتهم ورجعوا لبيتهم !!..فـ أحد المقاهي كان سلطان وفايز ورائد مجتمعين مع بعض ... مازالت علاقتهم ب رائد ماشية حتى بعد ما انقطعت علاقتهم العملية مع بعض !!... كتف سلطان يده :مرتاح يا رائد بشغلك الجديد !!.. ابتسم رائد براحة :أي ولله الحمد والمنة !!.. حك فايز جبهته :و كيف الراتب عساه زين !!.. هز رائد رأسه:أي ولله الحمد استلم ألفين ريال وقابل لزيادة.. والإجازات يمشي لي راتب فيها !!. رفع سلطان حاجبه:غريبة..مع أن القطاعات الخاصة ما فيها حوافز ولا مميزات والإجازة مهي محسوبة .. شغلك يعتبر باليومية والراتب ع عدد الأيام اللي اشتغلتها !!.. هز رائد أكتافه :مدري والله !!.. حك فايز ذقنه :طيب هو يعامل كل العمال اللي عنده معاملة واحدة وإلا ناس وناس !!... ضيق رائد فتحة عيونه :وش قصدك !!... قلب فايز عيونه :اللي أقصده يعني يعطيك أنت الفين والعمال اللي معك بعد رواتبهم الفين ..وإلا أكثر منك أو أقل منك !!... هز رائد أكتافه:مدري ما سألت ولا أحد قال لي !!.. ابتسم سلطان بود :الله يعطيك خيرها ويكفيك شرها !!... بادله رائد الابتسامة:إلا أنتم ما لقيتم لكم وظيفة أو أي عمل !!... هز فايز رأسه :لا والله إلى الحين دورنا بكل مكان وما لقينا !!... وزع رائد نظراته عليهم :ما ودكم تجون تشتغلون معي بالمحل!!... تنهد فايز بهدوء :رحنا وسألنا إذا كان فيه وظايف عنده وقال ما فـ شاغر !!.. رفع رائد حاجبه :غريبة .. مع أن هذا عمك يا سلطان ليه ما تكلم أبوك حتى يكلمه !!... زفر سلطان بكل قوته :أنا أحب أعتمد ع نفسي .. واحتمال أبوي ما يوافق يكلمه..وصحيح أنه عمي بس ما أتوقع أنه يتقبل الواسطة بشغله !!... كتف رائد يده :طيب حاولوا أنا شغلني بالواسطة ..أختي كلمت بنته وهو وافق وشغلني عنده !!.. أشر سلطان بيده عليه :هذا أنت قلتها بنته وفـ فرق بين أخوه وبنته !!... هز رائد رأسه متفهم بينما شرد الاثنان بأفكارهما !!.. : : : فـ بيت غانم أبو فارس وبأحد المجالس كانوا الشباب مجتمعين .. من بدأت الإجازة وهم دائما يجتمعون إما فـ بيت واحد منهم أو فـ أحد المقاهي ... ويكون وقت تجمعاتهم بعد صلاة العشاء مباشرة وطالع !!.. كتف لؤي يده :سافروا أهلك لمكة يا ناصر !!... تنهد ناصر بهدوء :أي سافروا أمس الفجر !!... ابتسم لؤي :وليه ما رحت معهم !!.. عظ ناصر ع شفته بغيظ :تنكت أنت وجهك !!... فتح لؤي عيونه ع أخرهم :والله أني أتكلم جد ليه ما رحت معهم !!.. شبك ناصر أصابعه بعضهم :بالله عليك إذا رحت أنا من ب يقعد يتابع الشغل بالمحلات إذا كان أبوي وبندر راحوا مع بعض !!.. قطب فارس حواجبه :الحين بندر ما أخذ صيفي !!... هز ناصر رأسه :إلا أخذ !!.. حك فارس ذقنه :أجل ليه سافر مدام أن عنده دراسة !!.. كتف ناصر يده :مواعيد محاضراته السبت والأحد ..فهو راح أمس الاثنين و ب يرجع هو وأمه قبل أهلي ع الجمعة تقريبا!!... حرك لؤي يده :ناصر وش صار الحين ع محل عيال عمك عرفوا الشرطة من اللي سرق محلهم !!.. هز ناصر أكتافه :مدري عنهم إلى اليوم والمحل مسكر!!... ضيق فارس فتحة عيونه :خير ناصر عيال عمك يعني عيال خالي راشد سلامات وش فيهم !!.. زفر ناصر بكل قوته :أبد سلامتك من فترة فتحوا محل لهم أخذوا من افتحوه أربعة خمسة شهور تقريبا ومن فترة قريبة انسرق المحل !!... زم فارس شفته :أف لا حول ولا قوة إلا بالله .. وكيفهم الحين وأخبار نفسيتهم !!... هز ناصر أكتافه :والله مدري بس وش تظن ب يصير فيهم أي ناس يتعرضون للسرقة ب ينهارون ونفسيتهم ب تصير دمار !!... تنهد فارس بهدوء :الله يكون بعونهم !!... دخل ريان المجلس حامل بيده صينية الشاهي والقهوة !!... ابتسم لؤي :هلا ..هلا ب أبو غانم يا هلا يا مرحبا !!... التفت ريان يمين ويسار يدور من يكون أبو غانم ولما ما عاين أحد غريب قطب حواجبه :من هو أبو غانم !!... أشر لؤي عليه :بعد من يكون أنت أبو غانم فـ أحد غيرك ب يصير أبو قريب !!... حط ريان الصينية ع الطاولة قعد مقابله :و من اللي قال لك أني ب أسمي غانم من الأساس !!. فتح لؤي عيونه ع أخرهم :يعني ما راح تسمي ع أبوك !!.. هز ريان رأسه :أي ما راح أسمي عليه !!... حك ناصر ذقنه:أجل أنت ما تحب أبوك هـ اللي ما راح تسمي عليه !!.. هز ريان أكتافه :ما يصير حبي لأبوي إلا إذا سميت عليه ..لا والله فـ طرق ثانية تثبت أني أحب أبوي حتى لو ما سميت عليه !!... هز ناصر رأسه :صراحة أنا عن نفسي شيء أساسي لازم أسمي ع الوالد أول ولد ب يجيني ب يكون أسمه سلومي من الحين نادوني أبو سلمان !!... أيده لؤي :وأنا بعد نفس الشيء ب سمي ولدي ع الوالد ما أظن أني ألقى اسم أحسن من أسمه !!.. ضحك ريان :الله أكبر الحين كل واحد قرر اسم عياله كأنهم جاهزين الحين بس ينتظرون إشارة منكم !!.. حرك لؤي يده بحماس : ما على الله ببعيد اللي رزقك قادر ع أنه يرزقنا !!... أشر ناصر بيده : لا تقعد تشوف نفسك علينا أنك ب تصير أبو قبلنا إن شاء الله ما تجي السنة الجاية إلا كل واحد فينا عنده بزر !!... هز ريان رأسه :الله يرزقكم !!... طالع لؤي فارس الساكت :وأنت فارس ما قلت لنا وش رأيك مع أو ضد تسمي ع أبوك وإلا لا !!. طالعه فارس بهدوء :خل العيال يجون بالأول بعدين نفكر بأسمايهم .. وقف .. عن أذنكم يا شباب البيت بيتكم بروح أنام !!... رفع ناصر حاجبه :وين تو بدري وش عندك ع النوم من الحين !!... حط فارس يده ع خصره : الله يخلف عليّ عندي دوام بدري مو مثلكم متى ما بقيتم تداومون داومتم !!... رد لؤي يقايضه :تصبح ع خير أحلام تعيسـ قصدي أحلام سعيدة !!... رفع فارس حاجبه وزم شفته ..وأعطاه ظهره وطلع من المجلس !!.. طالع ناصر ريان :شـ فيه فارس شكله متضايق !!... هز ريان رأسه :ما فيه شيء وبعدين فارس ما يحب يبين لأي أحد اللي يحس فيه !!... كتف لؤي يده :الحين ريان ما عرفت وش السبب اللي خلى وكيل مدرستكم يتربص بك شر !!... تصنع ريان الكحة :كح ..كح أف وش هـ الغبرة اللي طلعت يا أخي هـ الموضوع صار قديم وش ذكرك به !!.. هز لؤي أكتافه : جاء فـ بالي وأبقي أعرف وش يخليه يكيد لك !!... ملأ ريان رئتيه بالهواء وتحمس وهو يسرد:الله يسلمك أول ما تعينت بالمدرسة حالي حال أي واحد لازم يفرض شخصيته فـ البداية ..كان عدي حصة ب .. قاطعه لؤي .. ما عندك فوزية ..سكت ريان ورفع حاجبه معصب ..ما راح أكمل .. حرك ناصر يده :يا أخي كمل ما عليك منه أنا معك ع الخط عندك حصة وبعدين !!... تنهد ريان بهدوء :عندي حصة بأحد الفصول دخلت الفصل وشفته مقلوب فوق تحت فوضى لا قد توصف سألت من اللي مسبب هـ الفوضى وأشروا لي ع خمسة طلاب أنهم هم مسببين الفوضى فـ الفصل عاد أنا ما أقول لكم وش سويت مسكت المسطرة وضربت كل واحد فيهم ع يده ضربة وحدة .. قاطعه ناصر يستفهم :مو الضرب ممنوع عندكم بالمدارس !!.. هز ريان رأسه :قلنا لك نبقي نفرض الشخصية !!.. رفع لؤي حاجبه :وما لقيت إلا الضرب !!.. هز ريان أكتافه :هذا اللي ينفع مع الطلاب هـ الأيام !!.. ضيق ناصر فتحة عيونه :طيب الوكيل وينه من هـ الأحداث مدرس ويعاقب طلابه هو وش دخله حتى يرز عمره ويكيد لك !!.. ضحك ريان بقهقهة :اصبر يجيك العلم الحين طبعا أنا ما أعرف هـ الأولاد عيال من ومنهم آباءهم عاقبتهم كلهم بنفس العقاب ضربتهم فـ البداية وخليتهم يرتبون الفصل وينظفونه بعد فوضتهم ..انتهت الحصة وطلعت من عندهم قعدت ربع ساعة فـ غرفة المدرسين إلا الوكيل يناديني يبقيني أروح له طبعا ما استغربت أنه يناديني لأن إحنا نتعامل معه مباشرة المهم رحت له وشفت واحد من الطلاب الخمسة فـ مكتبه .. تجاهلت الولد وسألته خير ليه مناديني .. قال بأي حق تمد يدك ع ولدي ..دوروني فـ مكاني ما تلقوني لكني تشجعت وتجرأت وعطيته العين الحمراء .. الولد مشاغب دخلت الفصل وهو أربعة غيره مسوين فوضى وإزعاج بالفصل ..واللي صار ع زملاؤه صار عليه ما فـ أحد أحسن من أحد ...رد عليّ اعتذر منه قدام زملاؤه اللي اهنته قدامهم .. عصبت وتنرفزت ورديت عليه ما راح اعتذر منه المفروض هو اللي يعتذر مني مهو أنا اللي اعتذر لا تخليه يستقوي اليوم أنت معه بالمدرسة وتتحامى عنه لكن بعدين إذا انتقل للثانوي ما راح تكون معه ..طلعت وتركته ومن بعدها أظن والله أعلم حط عليّ حطة وحدة !!... كتف ناصر يده :والحين وش صار ع الوكيل !!.. أخذ ريان نفس :حولوه مدرسة ابتدائية !!.. شبك لؤي أصابعه بعض :لو أنا منك ما أرضى إلا ب فصله !!.. تنهد ريان بهدوء :عنده عيال وأهل وش ذنب عياله إذا فصلناه !!.. ابتسم ناصر باستهزاء:يا حنون !!.. هز ريان أكتافه:من عفى وأصفح فأجره ع الله...نبقي الأجر من رب العالمين وإلا هو ما همنا ولا كسر خاطرنا !!... تنهد لؤي بهدوء :الله يعطيك ع قد نيتك !!.. وقف ريان وتقدم من عند الصينية :لهينا بالسوالف ونسينا ما نضيفكم !!.. هز لؤي رأسه باستخفاف :بدري !!... لوى ريان فمه :بدري من عمرك !!.. قدم ريان الضيافة لهم وقضوا ليلتهم بالسوالف بالمواضيع المهمة وغير المهمة !!... : : : دخل فارس جناحه بهدوء وأفكار كثيرة تعصف برأسه ..وكلام الشباب مشغل الحيز الأكبر من تفكيره ما فـ أي أحد فـ هـ الدنيا ما يتمنى يكون عنده عيال ..عمره ما فكر ب هـ الموضوع ..حتى لما يسمع دعوات من أمه أو جدته بأن الله يرزقه ويعطيه ..ما يعطي أي أهمية للموضوع لكن كلام الشباب اليوم بالرغم أنه عادي إلا أنه حرك شيء داخله وخلاه يتعمق ب تفكيره ويشوف الموضوع بنظرة ثانية مختلفة..تنهد بهدوء وكمل طريقه لداخل شاف ريم قاعدة بالصالة تطالع التلفزيون ومشغلة إضاءة خفيفة .. إضاءة الأبجورات بس .. قرب منها شال شماغه من ع رأسه ورماه ع جنب فتح بعض أزرار ثوبه وقعد جنبها من غير ما يتكلم ..حط رأسه ع رجولها وتمدد بباقي جسمه ع الصوفا وغطى عيونه بذراعه.. جفلت ريم وتفاجاءت من حركته وجمدت فـ مكانها وما عرفت كيف تتصرف ... أطفأت التلفزيون هذا الشيء الوحيد اللي قدرت تسويه .. اسندت ظهرها وفرشت يدها اليسار ع الصوفا جنبها واثنت يدها اليمين ع بطنها .. علقت نظراتها الباردة والفاترة ع وجه فارس المغطى .. حسها قلبها أنه فيه شيء بس ما قدرت تسأله..خافت لو سألته أنه ب يفهمها غلط و ب يتضايق و ب يقوم خلته ع راحته وإذا بقى يتكلم هي موجودة تسمعه متى ما نوى يتكلم.. ضلوا ع وضعهم هذا الليل كله .. حاولت ريم كذا مرة تحط يدها ع شعره تمسحه لكنها تتراجع فـ أخر لحظة.. جراءتها تخونها وحياها يمنعها ..اسندت رأسها وغمضت عيونها وبين لحظة والثانية تفتح عينها تشوف فارس تطمن عليه ..فتحت عيونها ولقته منكمش ع نفسه شكله بردان .. احتارت وش تسوي له تقومه وتخليه يروح الغرفة ينام وإلا تروح تجيب له غطاء تغطيه فيه وهو هنا..اختارت الثاني ع الأول رفعت رأسه من ع رجلها وحطته ع مخدة صغيرة وراحت للغرفة وجابت غطاء وغطته به .. لاحظت كيف رجع جسمه تمدد يعتبر أنه فعلا كان بردان قعدت مكانها ورجعت ع وضعها السابق خلت رأسه ع رجلها وأسندت رأسها ع الصوفا ونامت نوم متقطع بين الإغفاءة والصحوة !!... سمعت ريم أذان الفجر .. فتحت عيونها وشافت الوضع ع ما هو عليه ما زال فارس نايم احتارت تقومه الحين وإلا تنتظر إلى قبل وقت الإقامة بعشر دقايق أحسن ... تركته إلى وقت الإقامة هذا أحسن شيء... حس فارس وتحرك فتح عيونه ودارت فـ جميع الاتجاهات لـ حد ما استقرت ع ريم علق عيونه عليها لـ حد ما استوعب الوضع.. رفع رأسه من ع رجلها وعدل وضع جلوسه .. تمغط ينشط أجزاء جسمه .. مسح وجهه وفرك عيونه ..حك رأسه طالع ريم :ليه خليتيني أنام هنا طول الليل كان قومتيني أروح أنام بالغرفة !!.. هزت ريم أكتافها:ما بقيت أزعجك !!.. هز فارس رأسه :عسى ما ضايقتك !!.. تنهدت ريم بهدوء :طبعا لا راحتك هي راحتي !!.. طالع فارس ساعته :بروح أتسبح وأنتي جهزي ملابسي الله يعافيك لازم أكون بالمستشفى بعد نص ساعة عندي عملية اليوم الساعة سبع !!.. مررت ريم يدها بشعرها :ما تقدر تعتذر عن العملية أحس أنك ما أخذت كفايتك من النوم !!... زفر فارس بكل قوته :لا تحاتين أنا متعود ع النوم كذا وبعدين ما راح أكون لحالي اللي ب أسوي العملية الدكتور وائل ب يكون معي لأن عملياتنا الحين صارت أغلبها مع بعض !!.. وقفت ريم :الله يعينكم بروح أجهز ملابسك!! .. وقف فارس بالمثل ..دخل دورة المياه استحم ع عجل وطلع للمسجد بعد ما لبس ملابسه .. بعد ما صلت ريم الفجر راحت المطبخ تجهز فطور لفارس ع شان يفطر قبل ما يروح دوامه .. أخذت وقت وهي تجهز الفطور..رصت الأطباق وبعض الأصناف اللي قدرت تحضرها سريع .. وبعض المعلبات اللي طلعتها من الثلاجة ع الطاولة .. تزامن انتهائها من تجهيز الفطور دخول فارس الجناح راجع من المسجد .. سمعت صوت الباب يفتح ويتسكر ..راحت تنادي فارس يجي يفطر ..وقفت عند باب المطبخ أسندت كتفها ع حافة الباب.. وعلقت نظراتها ع فارس اللي كان يمشي باتجاهها ..ما قدرت تنطق بأي كلمة لأنها أسرها بنظراته وما قصرت هي سرحت فيه.. تحب تشوفه وتتأمله تحس بفرحة وراحة وسعادة لما تشوفه ولما تكون قريبة منه ..لكن جراءتها وحياها يخونونها من التعبير عن مشاعرها تجاهه أو له .. يمكن اهتمامها والعناية فيه والقيام بخدمته هي أكبر تعبير عن حبها وهيامها وعشقها المجنون له !!.. قرب فارس منها بخطواته الثابتة والهادية والرزينة قرب وجهه من وجها وباس خدها بكل رقة وهدوء وكمل طريقه لغرفته من غير ما يقول أي شيء.. جمدت ريم فـ مكانها وتخدرت أطرافها وتسارعت دقات قلبها وتصاعد الدم إلى وجهها.... وقفت فـ مكانها لحظات تستوعب اللي صار.. ولما استوعبت اللي صار شافت فارس طالع من الغرفة بعد ما غير ملابسه ولبس ملابس العمل .. يعني أنه ب يطلع الحين ب يروح المستشفى !!... استجمعت قوتها وهدأت نفسها بلعت ريقها :فارس تعال الفطور جاهز !!... طالع فارس ساعته :ما أقدر أفطر .. ما معي وقت مستعجل حدي !!.. هزت ريم رأسها :ما يصير تطلع من البيت وأنت ما أكلت وما تدري كم تأخذ العملية من وقت!!. زفر فارس بكل قوته :عنيدة !!.. رفعت ريم حاجبها :وعسى ما أطلب منك شيء وإلا أقول لك حاجة إلا كررت هـ الكلمة !!.. تقدمها فارس يدخل المطبخ :حقك علينا .. وقف عند الطاولة أخذ الحليب وصب له كمية فـ الكوب واكتفى به ..يشرب كمية شوي ويطالع الساعة شوي !!... كانت عيون ريم عليه تراقبه ما أعجبها اللي يسويه قربت منه وأخذت توست ودهنتها بالجبن والمربى وناولته إياها :خذ أكل هذي !!.. كشر فارس بوجهه :ما أبقى أكل ...مالي نفس !!... أصرت ريم عليه يأكل :فارس الله يخليك ع شاني أكلها !!.. ابتسم فارس وأخذها والتهمها بسرعة وشرب الحليب ... ولما انتهى من الأكل وقف عند المغسلة وغسل يده وتوجه عند الباب ب يطلع ..التفت عليها :ريم أنا ماشي الحين تبقين شيء !!... هزت ريم رأسها :لا سلامتك .. بس ب تتأخر !!... هز فارس أكتافه :والله مدري ع حسب يعني احتمال أمر ع المرضى أو أروح العيادات بعد ما اطلع من العملية واحتمال بعد ارجع البيت مدري ع العموم أكيد اني ب اتصل إذا كنت برجع ..وأنتي لا تقعدين هنا لحالك انزلي عند أهلي وسعي صدرك معهم !!.. تنهدت ريم بهدوء:إن شاء الله لا تشغل نفسك فيني أدبر نفسي !!... أخذ فارس نفس: إذا احتجتي شيء كلميني ع الساعة ثمان ونص تسع ع هـ الحدود تكون العملية منتهية إن شاء الله !!... طلع فارس من المطبخ أما ريم فبدأت بترتيب المطبخ وتغسيل الصحون بشكل سريع ..لأنها تبقي تروح تنام لأنها ما نامت بالليل إلا غفوات !!.. : : : فـ بيت بدرية بعد صلاة المغرب نزلت ريم من جناحها.. مرت بمحاذاة الصالة ما شافت أحد .. استنتجت ع طول أنهم فـ الغرفة اللي يقعدون فيها.. توجهت لهم .. دخلت وشافت الجدة وخلود وبدرية بس هم اللي جالسات.. تضايقت من وجود خلود بس ما بينت كملت طريقها لهم سلمت عليهم وشاركتهم الجلسة !!... ابتسمت الجدة بود:هلا بنتي ريم شـ لونك يمه !!.. بادلتها ريم الابتسامة:هلا بك يا جدتي..الحمد لله الله يسلمك بشريني أنتي عنك وعن صحتك !!... تنهدت الجدة بهدوء :الحمد لله يا بنتي ع كل حال ..إلا وين فارس عنك خليه يجي يقعد معنا من زمان ما شفناه !!... مررت ريم يدها بشعرها :فارس مو موجود راح المستشفى !!... هزت الجدة رأسها :أي الله يعينه ...إلا أنتي وينك فيه لنا كم يوم ما شفناك!!... هزت ريم أكتافها :انشغلت شوي مع أهلي ب يسافرون وكنت عندهم اجهز معهم اغراضهم ..وسافروا هم من هنا وبدأت الدراسة الصيفي .. ورجعت انشغلت مرة ثانية !!.. كتفت الجدة يدها:وش لك فيها يا بنتي تعب وضيق و ب تشغلك ع بيتك وزوجك !!.. هزت ريم رأسها:لا ما فيها لا تعب ولا شيء وبعدين ما راح تشغلني عن فارس هو هـ الأيام مضغوط بالعمل شغله متزايد .. وأنا أقعد طول الوقت فاضيه لا شغله ولا مشغله أروح أدرس أتسلى وألهي عمري وكلها شهرين ومنتهية المسألة !!.. تدخلت خلود المستمعة :صدق يمه اللي ما عندها عيال يسلونها ويشغلونها تحتاج لمن يشغلها ويسليها يمكن تنفعها دراستها إذا كملتها ..إذا مو الحين بعدين !!.... عضت ريم ع شفتها بغيظ .....وما ردت !!.... ابتسمت الجدة بهدوء :الله يعطيها ويرزقها !!... كتفت بدرية يدها :وش أخبار أسيل عسى مبسوطة !!... هزت ريم رأسها :أي الحمد لله !!... حطت الجدة يدها ع ركبتها :كان ودنا رحنا نسلم عليها ونبارك لها بعد ما رجعت بس ما صار عندنا وقت .. والحين فشلة سافرت مرة ثانية وإحنا ما رحنا ولا باركنا لها !!... حكت ريم جبهتها :لا أسيل وناصر ما سافروا مع أهلي موجودين هم بالبيت!!... ضيقت الجدة فتحة عيونها :ليه ما راحم !!.. هزت ريم أكتافها :ناصر ماسك الشغل ما يقدرون يتركونه للعمال لازم أحد يقعد يتابع الشغل هنا !!.. هزت بدرية رأسها :أجل نروح لـ منى بيتها ونبارك لهم هي وأسيل بالمرة !!.. هزت ريم رأسها :خلاص وأنا أكلم أسيل وأتفق معها .. إلا وش أخبار لمى ما أشوفها تجي هنا !!... ابتسمت بدرية بهدوء :لاهية الله يعنيها مع أهل زوجها وعزايمهم !!... تنهدت ريم بهدوء:الله يعينها !!.. رفعت خلود حاجبها :أقول ريم ما تدرين وش اللي أخر حملك إلى الحين !!... بلعت ريم ريقها وردت بثقة :والله هذا شيء من عند الله مدري عنه ... إذا كان الله كاتب لي أحمل اليوم وإلا بكرى حملت !!... زمت خلود شفتها:أصدق يعني لما سافرتم فرنسا .. ما رحتم مستشفى ولا كشفتم عن أسباب تأخير الحمل !!.. هزت ريم أكتافها :وليه نكشف إحنا مش مستعجلين !!... تظاهرت خلود بالصدمة :أهــا أجل أنتي تأخذين موانع !!.. انفعلت بدرية بعصبية :خلود لو سمحتي لا تتدخلين فـ اللي مالك فيه ..وأنا ألف مرة قلت لك مالك شغل فـ عيالي وزوجاتهم !!... ضحكت خلود باستخفاف :أكيد لأنها بنت أخوك ب تدافعين عنها .. و مو بعيدة تكونين متفقة معها ع أنها تأخذ الموانع .. وإلا بنتي وهقتوها بالحمل من أول شهر!!.. شبكت ريم أصابعها بعض وردت بانفعال:والله هذا شيء راجع لنا وما نسمح لأي أحد يتدخل فيه !!... حركت خلود الخاتم اللي بأصبعها :بس ما أظن فارس يصبر كثير .. أكيد وده يشوف عياله حاله حال غيره .. نهى قربت ولادتها .. باقي الدور عليكم يله شدي حيلك !!.. تأففت ريم بضيق :قلت لك هذا شيء راجع لنا ما نسمح لأي أحد يتدخل فيه يا ليتك تشغلين نفسك بنفسك !!.. أشرت خلود بأصبعها عليها :ليه عصبتي و انفعلتي كذا أشوفكم ما ترضون بكلام الحق !!... زمت ريم شفتها :أي حق اللي أنتي تقصدينه .. التدخل بخصوصيات الناس هو الحق اللي تقصدينه !!.. مررت خلود يدها ب شعرها :نصيحة مني أسمعيها أنا أكثر وحدة عارفة فارس إذا كان ساكت اليوم ما راح يسكت بكرى .. وإذا عرف بموضوع الموانع ما راح يعدي الموضوع بالساهل.. فاتركي الموانع احسن وشدي حيلك !!.... وقفت ريم وهي تقلي من الغيظ والقهر .. طلعت من الغرفة من غير ما ترد ع خلود اللي أكلت فـ نفسها من الغيرة والحسد !!.. انفعلت بدرية بعصبية :هيه أنتي كذبتي الكذبة وصدقتيها .. أي موانع أو أي خرابيط اللي تجيبينها من عقلك ..اسمعي هذي أخر مرة اشوفك وإلا أسمعك تضايقين فيها ريم وتكررين عليها هـ الموضوع .. وقسما بالله إذا سمعتك مرة ثانية ب أقول لـ غانم يتصرف معك !!... طلعت بدرية ورى ريم تطيب خاطرها بكم كلمة .. لكنها ما شافتها لأن ريم راحت جناحها تركض .. دخلت جناحها وع غرفتها ع طول وانهارت تبكي .. أكيد تضايقت من كلام خلود ..يعني هو ع كيفها تحمل هذا شيء من عند الله وإلا هي ودها باليوم قبل بكرى ع الأقل تقوى علاقتها بفارس أكثر بكت ... بكت كما لم تبكي فـ أي يوم من الأيام لـ حد ما نامت !!.. : : : بالليل وبجناح ريان ونهى .. كانت نهى نايمة فجأة وبدون سابق إنذار أحست بحرارة تسري فـ جسمها لـ حد ما بدأ يعرق وآلام تنهش فيه ..غزت أسفل ظهرها وبطنها .. تقلبت أكثر من مرة عل وعسى تخف آلام شوي لكنها بدل ما تخف تزيد.. حاولت تتحمل وتتغلب ع تعبها لكنها ما قدرت.. حطت يدها ع بطنها تخفف الألم واليد الثانية مررتها قدام وجهها تبرد عليها وتخفف من الحرارة اللي تحس بها .. لكن قبضة يدها ما سوت شيء لها آلامها تزيد ما تخف والحرارة تزيد ..طاحت عيونها ع ريان النايم جنبها هزت كتفه باللي قدرت عليه من قوة لكنه ما أبدأ أي رد فعل .. حاولت تصرخ وتناديه لكن صوتها ما أسعفها وما طلع.. رجعت تهزه مرة ثانية .. حس هو بيدها لكنه ما استوعب .. وابعد جسمه عن مصدر الاهتزاز ... حطت يدها ع شعره وجرته بكل قوة تملكها عل وعسى يقوم ..تحرك يمين وشمال فتح عيونه ورجع أغمضهم مرة ثانية ..آلامها تزيد وريان مو حاس فيها ..عدلت وضع جلوسها وحطت يدينها اثنتين ع ظهره وهزته بعنف يمكن يحس ...أخيرا حس ريان بشيء يهزه بعنف.. انقلب ع ظهره وفتح عيونه وطالع جهة نهى ..وشافها كيف تتلوى من الألم ..ارسلت الإشارات لـ رأسه واستوعب الوضع ..نط وقعد جنبها.. مسك ريان ذراعها بيد وباليد الثانية مسح ع شعرها والخوف متملكه :نهى وش فيك وش تحسين فيه !!... عضت نهى ع شفتها من الألم :آه .. مدري .. مدري..آه أحس أني مخنوقة وروحي ب تطلع !!... ارتبك ريان وتوتر... مسح ع شعرها أبعد عنها البطانية يخليها تتنفس وتخف الحرارة عنها : الحين وش تحسين فيه خفت الحرارة منك !!.. عضت نهى ع شفتها من الألم وما قدرت تنطق !!... قطب ريان حواجبه :أنتي وش تحسين فيه وين مكان الألم !!... أشرت نهى ع بطنها :بطني وظهري يؤلموني ومني قادرة أتحمل آه..آه !!... ضيق ريان فتحة عيونه :يمكن أنتي ما أخذة برد متعرضة أنتي لهواء بارد !!... شهقت نهى بصرخة :لا وش برده .. آه ...آه ... شكلي ب أولد ...أحس روحي ب تطلع الحقني يا ريان !!.. طالعها ريان بغباء : ب تولدين الحين مو كأن بدري ع ولادتك !!.. تجمعت دموعها فـ عيونها من الألم اللي تحس فيه :آه الحقني الله يخليك مهو وقت أسألتك روحي ب تطلع آي يا بطني .. ريان الله يخليك حاسة أني ب أموت !!.. مسكها ريان من ذراعها :بسم الله عليك ...أذكري ربك ..قومي ع شان أخذك للمستشفى !!... انكمشت نهى ع نفسها :آي ..آه مني قادرة أقوم رح ناد خالتي خلها تجي .. ما أقدر اتحرك !!.. نط ريان من السرير وصار يدور بعشوائية متلخبط ما يدري وش يسوي .. ما يقدر يترك نهى ويروح لأمه وما يقدر يصبر أكثر ويروح الوقت عليهم وهم ما سووا شيء وما يدري يقوم نهى ويروحون لأمه مع بعض..ما عنده وقت يقرر ويختار .. فاختار الاول ع الثاني يروح ينادي أمه ويخلي نهى بالجناح لـ حد ما تجي أمه وتشوفها...طلع من الجناح يركض لدرجة أنه صدم بأحد وما استوعب إلا لما سمع صوته :ريان وش فيك تركض كذا ترانا بالليل مو بالصبح !!.. أشر ريان ع جهة جناحه :نهى... نهى !!.. قطب فارس حواجبه وطالع الجهة اللي يأشر عليها ريان :خير وش فيها نهى !!... بلع ريان ريقه : مدري وش فيها شكلها ب تولد ومني عارف وش أسوي ..صح ب أروح لأمي أخليها تروح لها تشوفها أكيد هي تعرف !!... سمى فارس عليه وهدأ من روعه :أذكر ربك رح أنت عند نهى وأنا بروح عند أمي وأناديها لكم !!.. هز ريان رأسه :أي تسوي خير ...تسوي خير !!... رجع ريان لجناحه لنهى يركض...بينما فارس راح لأمه جناحها الخاص فيها !!.. دق الباب عدة دقات متتابعة ومتواصلة لـ حد ما فتحت له أمه الباب !!.. استغربت بدرية وجود فارس عندها هـ الوقت :خير يمه فارس!!... تنهد فارس بهدوء :روحي لنهى تعبانه وشكلها ب تولد!!... تلخبطت بدرية :هـا .. نهى ب تولد يوه ..مو كأن بدري عليها ... يا ربي ع بنتي الله يعينها المسكينة !!... بلم فارس وطالعها مستغرب !!... رفعت بدرية حاجبها وكأنها استوعبت:أنت وش دراك ب نهى !!... عظ فارس ع شفته :تقابلت مع ريان بالممر وحالته حالة وقال لي أن نهى تعبانه و مهو عارف يتصرف خليته يقعد عندها وجيت لك أناديك .. يله يمه روحي لهم لا تتأخرين عليهم لأنهم أكيد ينتظرونك !!.. كتفت بدرية يدها :أنت الحين من وين جاي !!.. زفر فارس بكل قوته :من وين بعد من المستشفى !!... اعطاها ظهره ب يروح لجناحه... ضيقت بدرية فتحة عيونها :وأنت الحين وين ب تروح !!... التفت فارس يطالعها : بعد وين بروح أكيد جناحي توني راجع من المستشفى تعبان وأبقى أنام !! ردت بدرية بانفعال :نعم وش هـ البرود اللي عندك زوجة أخوك ب تولد وأنت ب تنام !!.. حرك فارس يده :وش أسوي يعني !!.. عضت بدرية ع شفتها بغيظ :لا تسوي شيء ريح عمرك !!.. تنهد فارس بهدوء :أمي من جدي أتكلم وش أسوي هي ب تولد وأنا وش دخلني!!.. أخذت بدرية نفس تهدي انفعالاتها :أحر ما عندي أبرد ما عندك ..أقول لك زوجة أخوك ب تولد تقول لي بروح أنام ...ليه ما تروح معنا احتمال نحتاجك مهو احتمال إلا أكيد !!.... هز فارس رأسه : وش له تحتاجوني أنا مو مختص بالتوليد ونهى ولله الحمد ما تعاني من أمراض ثانية حتى أكون معكم ... روحتي معكم مالها فايدة والدكاترة المختصين هناك يكفون و يوفون !!... أشرت بدرية بإصبعها :لو ريم هي اللي ب تولد ب تقعد باليت ومنت رايح معها !!... سكت فارس لحظات بلع ريقه :هذا أنتي قلتيها ريم ..ريم زوجتي وأكيد بروح معها بصفتي زوجها مو دكتور يشتغل بالمستشفى .. وهذا ريان ب يروح معها لأنه زوجها... يمه تأخرتي ع ريان ونهى روحي الله يرضى عليك والله يسهل عليها ولادتها !!... زفرت بدرية بكل قوتها ورجعت دخلت تغير ملابسها وتأخذ عباتها من توترها وارتباكها قالت الكلام هذا لفارس بس هي ما تقصده بالمعنى الصريح !!... : : : بينما فارس كمل طريقه لجناحه..وشوقه يسبقه للي تنتظره داخل .. يشتاق لها ويوله عليها .. يحب يشوفها ويتأملها ..ابتسامتها فـ وجهه تنسيه همومه وتعبه وضيقه وكدره.. تحس فيه إذا كان متضايق أو مهموم من غير ما يتكلم .. لكنه يتظاهر بأن ما فيه شيء .. لأنه ما يبقي يكدرها ويضايقها ويخليها تشيل عنه الحمل!!.. .. فتح باب الجناح بهدوء وقابله ظلام دامس ..وهدوء وسكون وصمت .. ما شاف ريم فـ مكانها المعتاد اللي تحب تنتظره فيه .. كمل طريقه للمطبخ شافه نفس الشيء أظلم وهادي.. راح لغرفة النوم وشافها نايمة ع السرير منكمشة ع نفسها واللمبات "اللأنوار" تشتغل .. استغرب أنها نايمة مو بالعادة تنام وهو ما رجع.. وفوق هذا نايمة بملابسها ما غيرتها بملابس النوم ..دائما تنتظره وما تنام إلا إذا رجع ..قرب منها وطل فـ وجهها يمكن تكون تعبانه ع شان كذا نامت .. قعد ع ركبته بجنب الجهة اللي نايمة هي فيها .. مد يده وتحسس وجهها لقاه بارد ومبلل رفع يده وطالعها لقى أثر بلل فيها ...شكلها باكية قبل ما تنام .. حط يده ع مخدتها ولقها مبللة وأثر رطوبة فيها .. وتيقن أنها باكية ..بس ما يدري وش فيها .. ولا يعرف وش الأسباب اللي تخليها تتضايق وإذا سألها دائما تتهرب .. وتقول ما فيني شيء .. يا ربي متى نرتاح من هـ العذاب !!... : : : بالمستشفى كان ريان يقرع الرواق الطويل ذهابا وإيابا لهم ساعة من دخلوا نهى غرفة الولادة وهي إلى الآن ما طلعت ولا فـ أي خبر عنها .. الدكتورة والممرضات من دخلوا معها ما طلعوا وقلبه يرفرف يتوق إلى سماع خبر يفرحه ..كان يحاتي نهى شكلها ما يطمئن أبد .. خايف يصيبها شيء .. ولو صار لها شيء أكيد هو ب يروح فيها لأنه ما يتحمل يعيش من غيرها .. تعوذ من إبليس وذكر ربه ودعاه يقوم نهى بالسلامة !!... نادته أمه تبقيه يرتاح :ريان يمه تعال اقعد ما يفيدك اللي تسويه!!.. وقف ريان جنبها :يمه ما فيني حيل أقعد !!... أشرت بدرية بيدها :يعني ب تتم طول الوقت كذا واقف .. هد نفسك الله يرضى عليك !!.. حك ريان جبهته :مو كأنهم يمه طولوا !!... هزت بدرية أكتافها :عادي يا ولدي الولادة تأخذ وقت !!... تأفف ريان بضيق :ليتني دخلت معها أحسن من الوقفة هنا !!.. شبكت بدرية أصابعها بعض :طول بالك يا ولدي اصبر !!.. ضغط ريان ع رأسه بقوة :من وين أجيب الصبر يمه !!.. مرت دكتورة من جنبهم وانتبهت له .. وقفت مقابلته :مرحبا استاذ ريان ...سلامات وش فيكم !!.. رفع ريان رأسه واستبشر خير لما شافها هذي دكتورة نهى اللي متابعة حملها :جايبين نهى تولد دخلت غرفة الولادة من ساعة وبعدها ما طلعت ولا في أي خبر عنها !!!... ابتسمت الدكتورة :ما شاء الله ... أي ..صح هي دخلت الشهر التاسع ع ما أظن من أسبوع..الله يطمنكم عليها !!... بلع ريان ريقه :دكتورة ممكن أدخل معها ..أبقى أكون جنبها ..أكيد هي تحتاجني الحين لازم أكون معها !!... تفهمت الدكتورة الوضع مهو أول واحد يطلب الطلب هذا.. هزت رأسها .. دخلت غرفة الولادة ولحظات وهي طالعة .. ونادته يدخل عند نهى !!.. دخل ريان متجاهل الكل قرب من السرير..قعد ع ركبته .. مسك يد نهى وقرب فمه من أذنها همس :حبيبتي قوي نفسك وتحملي عارفك أنتي قوية !!... غمضت نهى عيونها من شدة الألم :حاسة نفسي ب أموت !!... ضغط ريان ع يدها :بسم الله عليك إن شاء الله مو صاير لك إلا الخير .. وإن شاء الله تولدين وتقومين بالسلامة ونربي بنتنا أو ولدنا مع بعض !!.. ضغطت نهى ع يده وكأنها أحست بالأمان لما صار جنبها :خلك معي لا تروح !!... مسح ريان ع رأسها :مني رايح ب أقعد معك لـ حد ما تولدين !!.. ما ردت نهى عليه .. ضغطت ع يده بكل قوتها .. مسح ريان ع رأسها باليد الثانية وقرأ عليها بعض الآيات والسور ونفث عليها !!... صرخت نهى صرخة شقت سكون الليل .. تبعها صرخة وليد خرج إلى هذه الدنيا .. ارتعب ريان من صرختها وخاف عليها .. علق نظراته ع وجهها .. شافه كيف لانت ملامحه وكيف هدأت نفسها وانتظم تنفسها !!... حمد ريان ربه أنها صارت بخير وزال عنها الخطر !!... طلع ريان من غرفة الولادة رغما عنه بعد تمت عملية الولادة .. وخروج المولود للدنيا ...توج حُب ريان ونهى ب ثمرة صغيرة .. بنوتة حلوة اتفقوا ع تسميتها ليان !!... : ::فـ اليوم الثاني طبعا انقلوا نهى لجناح خاص .. توالت الزيارات عليها .. زارها أبوها وإخوانها .. جدتها وخالها وأخوات ريان لينا ولمى ومي .. أما بدرية فهي كانت المرافقة لـ نهى فترة بقائها بالمستشفى ..انتهى موعد الزيارة وطلعوا الكل من نهى عدا بدرية وريم اللي جت تزورهم فـ وقت متأخر !!.. حطت ريم رجل ع رجل :عسى ما تكلفتي بالولادة يا نهى !!.. تنهدت نهى بتعب :شيء لازم أنك تتكلفين مصيرك تجربينها وتعرفينها !!... مس كلامها وتر حساس عند ريم اللي نزلت رأسها وهمست :الله يعين !!.. لاحظت بدرية التغير اللي صار لها :ما ودك يا ريم تشوفين البنت الصغيرة !!... رفعت ريم رأسها وابتسمت ابتسامة متكلفة :إلا أكيد !!.. ابتسمت نهى :تعالي خذيها !!... أخذت ريم البنت الصغيرة من نهى وحطتها فـ حضنها :بسم الله .. رفعت رأسها تطالع نهى ...نايمة !!.. هزت نهى رأسها :أي نايمة الله يعني عليها بالليل خوفي وقت نومنا تصحى وتجننا!!!.... مسحت ريم بيدها ع رأس البنت :الله يخليها لكم ...متى جابوها لك !!.. ابتسمت نهى :اليوم الظهر !!.. ابتسمت ريم :أبقاها تفتح عيونها أشوف شكلها !!... ضحكت نهى :اليوم كل اللي زارونا ودهم يشوفونها بس هي تتغلى عليهم نايمة مو معبرة أحد !!... ضيقت ريم فتحة عيونها :وش سميتوها !!.. شبكت نهى أصابعها بعض :ليان !!... سكتت ريم لحظات بعد ما استوعبت :ليان ريان حلو جايك نغمة !!... ضحكت نهى :الله يحلي أيامك .. لا يغرك ريان مختار أسماء عيالنا كذا نهاية الاسم الألف والنون يبقيهم يكونون ع وزن واحد !!... مدت بدرية يدها تأخذ البنت من ريم :خليني أخذ البنت عنك يا ريم !!... حركت ريم يدها :لا خليها عندي شوي !!.. تنهدت بدرية بهدوء :أخاف تضايقك !!... ابتسمت ريم بهدوء :مدام أنها نايمة وساكتة ب أخليها عندي وإذا صاحت ب أعطيكم إياها !!.. رفعت نهى حاجبها :تصيحينها وتعطينا إياها !!.. ضحكت ريم :مو أنتي أمها وهي بنتك تحمليها!!... شبكت بدرية أصابعها بعض :عقبال ما تشيلين عيالك !!... بلعت ريم ريقها بتوتر وجهت أنظارها للبنت الصغيرة:تسلمين يا عمتي !!... طالعت نهى بدرية :مو كأن ريان تأخر يا خالتي !!.. كتفت بدرية يدها :ليه هو قال أنه ب يجي !!... هزت نهى رأسها :أي هو قال أنه ب يجي بعد ما تنتهي الزيارة !!.. هزت بدرية أكتافها :ما تدرين يمكن شيء أخره الغايب عذره معه !!... هزت نهى رأسها وسكتت ما علقت !!.. ابتسمت ريم بفرح لما شافت البنت فتحت عيونها:أخيرا تكرمت علينا وفتحت عيونها .. يا حلو البنات ..لا إله إلا الله .. يا ربي يسلمهم !!.. طالعتها نهى مبتسمة :حظك حلو هـ اللي قامت وهي عندك !!... ضحكت ريم :أبقى أحدد من تشبه بس مني قادرة مالها إلا يوم ما بعد يطلع الشبه زين !!.. أشرت نهى ع نفسها :فديتني أكيد ب تطلع عليّ!!.. ابتسمت بدرية :مداح نفسه يا نهى !!.. عضت نهى ع شفتها :لا تحطميني عاد !!.. حركت ريم يدها :إلا والله يا حظها إذا طلعت تشبه لك قمر ما شاء الله عليك !!... ضحكت نهى :الله يجبر بخاطرك !!.. طالعت بدرية ساعتها :حبيبتي ريم السواق تحت روحي معه البيت قبل ما يتأخر الوقت !!.. هزت ريم رأسها :خليه يروح .. برجع مع فارس !!.. عضت بدرية ع شفتها :أنتي كلمتيه خليته يجيك !!... أشرت ريم بأصبعها :لا .. فارس موجود هنا المستشفى !!... رفعت بدرية حاجبها :توه مداوم !!... زمت ريم شفتها :لا هو مداوم طول اليوم طلع بس وقت البريك جاء البيت تغدى ورجع !!... ركزت بدرية أنظارها ع جهة معينة :غريبة ما مرنا !!... ميلت ريم رأسها :مدري عنه .. بس تلقينه انشغل شوي هـ الفترة هو مضغوط ع الأخر يوميا يدخل عمليات !!... زفرت بدرية بكل قوتها :أي الله يعينه !!... وقفت ريم وأعطت ليان أمها وصلحت عباتها : الحمد لله ع سلامتك ..وتتربى فـ عزكم..نشوفك ع خير !!.. حركت بدرية يدها :وين يا ريم فارس دق عليك !!... هزت ريم رأسها :لا بروح له مكتبه !!... هزت بدرية رأسها :طيب دقي عليه وقولي له أنك تنتظرينه هنا وخليه يجيك إذا خلص شغله!!.. ضحكت ريم بمرح :لا بروح أفاجئه !!... ابتسمت نهى :والله أنك حركات.. خليه يجي أحسن لك من روحتك له !!.. هزت ريم أكتافها : لو قلت أني موجودة هنا ب يأخذ راحته بالشغل وينسى نفسه لكن إذا رحت له ع الأقل يحاول ينهي شغله ويرجع البيت يرتاح بكرى نفس الشيء عنده دوام من الصباح !!.. هزت بدرية رأسها :خلاص يا بنتي روحي لفارس لا تتأخرين .. وتروحين ما تلقينه .. وكلميني إذا صرتي عنده ع شان ما أحاتيك !!.. هزت ريم رأسها :إن شاء الله !!.. طلعت ريم من الغرفة متوجهة لفارس وبعد لحظات دخل ريان عليهم الغرفة !!.. قرب ريان من أمه وسلم عليها ..قبل رأسها .. وراح لنهى اللي تلاعب بنتها باس خدها قعد جنبها ع السرير..وناولها كيس :هذا هدية ليان وأم ليان !!... ابتسمت نهى بهدوء :تسلم .. تعيش وتجيب لنا !!.. ضيقت بدرية فتحة عيونها :شـ فيك تأخرت يا ريان انشغل بال نهى عليك !!... طالع ريان نهى وابتسم فـ وجهها وبعدين طالع أمه :مريت السوق وأنتي عارفة السوق زحمة وبالموت قضيت أشغالي !!.. هزت بدرية رأسها :الله يعينك ويساعدك !!... قطب ريان حواجبه :صح ..وأنا جاي عندكم شفت وحدة طلعت منكم من هي !!... تنهدت نهى بهدوء :هذي ريم طلعت من هنا وراحت لفارس !!... كتفت بدرية يدها :كلمك فارس اليوم يا ريان !!.. هز ريان رأسه :أي كلمني اليوم الصباح بارك لي وسألني إذا كنت أبقى حاجة أو محتاج لشيء أكلمه هو موجود بالمستشفى .. ليه تسألين !!.. زفرت بدرية بكل قوتها :لأنه ما مر علينا .. مهو عادته ما يمر ولا يسأل !!... زمت نهى شفتها :بس يا خالتي ريم قالت لك أنه مشغول !!.. هزت بدرية أكتافها :حتى ولو يفضي نفسه خمس دقايق ويمر لكنه اليوم أبد ما كأنا معه بالمستشفى !!.. رد ريان يمزح :يمكن زعلان !!.. هزت بدرية رأسها وهمست :يمكن مو يمكن إلا أكيد!!... رفع ريان حاجبه :أنا أمزح وأنتي أخذتيها جد!!.. زفرت بدرية بكل قوتها :بلاك ما تدري !!.. ضيق ريان فتحة عيونه :خير وش صاير !!.. تنهدت بدرية بهدوء وسردت له اللي صار بينها وبين فارس لما جاء يخبرها عن نهى !!.. هز ريان رأسه :ما أظن أنه خذ بخاطره أكيد أنه مشغول !!.. سكتت بدرية وما علقت لأن المبرر الوحيد عن غياب فارس أنه أخذ ع خاطره منها بعد كلامها له أمس .. مع أنها ما كانت قاصدته بالمعنى الصريح .. طلع منها بسبب توترها وارتباكها وخوفها ع نهى !!.. أخذ ريان بنته من عند أمها :هاتي عنك ليان خليني أشوفها !!.. تنهدت بدرية بهدوء :بشويش عليها بالهدواة !!.. تأفف ريان :اللي يسمعك يمه يقول أول مرة يمسك بزر !!.. هزت بدرية رأسها :واللي يسمعك يقول متعود يمسك بزران !!... كتمت نهى ضحكتها :لا وأي بزر بنتي .. الله يخليك لا يجي بنتي شيء تراني تعبانه فيها !!... مط ريان شفته بغيظ :بنتي وبنتي .. تراها بنتي حتى أنا وإلا نسيتي !!... ابتسمت نهى :لا وأنا أقدر أنسى !!... تنهدت بدرية بهدوء :الله يخليها لكم ويجعلها صالحة بارة فيكم !!.. ابتسم ريان :تسلمين يمه .. ونظراته تتوغل فـ بنته وفـ أدق التفاصيل وجهها أنفها فمها عيونها ويدها اللي ما تجي ربع إبهامه ..مسك يدها الصغيرة بإبهامه وقربها لفمه ولثمها بالقُبل !!... سرحت نهى فيه وفـ بنتها ياه شعور جميل وإحساس حلو وهي صارت أم وعندها طفل خرج من بين أحشائها .. وهو.. الحين هي تحس بأحلى لحظات حياتها وهي بجنب من تحب زوجها حبيبها وبنتها وهو أول من أعطتاها هـ اللقب لقب ماما !!... أسندت بدرية ظهرها ع الكرسي :ريان منت ناوي تروح !!... رفع ريان رأسه وطالع أمه :وين أروح !!.. كتفت بدرية يدها :البيت بعد وين !!.. ابتسم ريان بهدوء :ومن قال أصلا أني بروح البيت ..أنا ب اقعد هنا عند زوجتي وبنتي !!.. أشرت بدرية بيدها ع نفسها :بس أنا موجودة هنا معهم !!... ضحك ريان :لا يمه أنتي روحي البيت وارتاحي وأنا ب أقعد معهم !!.. هزت بدرية أكتافها :وأنت ب تعرف تتصرف لو احتاجوك فـ شيء !!.. أصر ريان ع رأيه :مني طالع من هنا إلا رجلي ع رجلهم ..حتى لؤي قلت له مني مداوم عنده بالشركة إلا إذا طلعوا أم ليان وليان من المستشفى !!.. وقفت بدرية :أجل أنا بروح أدخل الغرفة الثانية أنام فيها وإذا نامت ليان جيبها لي تنام معي لأني عارفة أنك ما راح تخليها لا هي ولا أمها ينامون .. الله يهديك !!... هز ريان رأسه .. توارت أمه عن أنظاره !!.. تفحص ريان نهى بنظراته وأطال النظر :اشتقت لك !!.. ابتسمت نهى :أنا اليوم كله معك متى أمداك تشتاق لي !!.. قرص ريان خدها بلين :وأنتي جنبي اشتاق لك فما بالك وأنتي بعيدة عني .... يعني أنتي ما اشتقتي لي !!.. عضت نهى ع شفتها وردت باقتضاب :أي !!.. رفع ريان حاجبه :حطي عينك بعيني أشوف !!... تجنبت نهى النظر بعيونه وسألته :تعشيت !!.. ضحك ريان :عاش مصرف !!.. زمت نهى شفتها :ريان قصر صوتك خالتي معنا فشلة تسمعنا!!.. تنهد ريان بهدوء :أمي عادي عارفة باللي بقلبي لا تخلينها حجة !!... تأففت نهى :عطني ليونة أرضعها !!... ضم ريان بنته لصدره :خليها حبيبة أبوها ع الأقل هي أحسن من أمها تراعي مشاعر أبوها !!.. تمددت نهى ع ظهرها :أجل أنا بنام وخلك معها..رضعها أنت وغير ملابسها أنت ونومها بعد أنت !!... مسح ريان ع شعر بنته :مو شغلك أنتي نامي وخليني مع بنتي لحالنا نتفاهم ع كيفنا !!... غمضت نهى عيونها ..وغطت وجهها توهمه أنها بتنام ..أما هو قام وقعد ع أحد الكراسي ..وقعد يتأمل بنته بنظرات الأب الحنون العطوف ع عياله !!... : : : توجهت ريم لأحد أقسام المستشفى واللي يتواجد فيه مكاتب الأطباء ..قصدت مكتب فارس اللي عارفة موقعه بالضبط .. كانت تسرع فـ خطواتها .. مرت من جنب أحد الحراس"رجال الأمن " اللي واقفين عند المكاتب ..واستغرب هيئتها ووجودها بالمكان الممنوع ... واللي يمرون منه المصرح لهم فقط حاول يوقفها لكنها ما استجابت له .. ناداها :يا أخت ممنوع تتدخلين هنا.. كملت طريقها متجاهلة ندائه .. ما تبقي توقف وتصرح عن هويتها وخاصة وقفوا بعض الفضوليين يستكشفون أمرها..لحقها الحارس .. وأسرعت من خطواتها .. وصلت مكتب فارس .. وقفت تستجمع أنفاسها اللي تلهث ..فتحت الباب ودخلت ودخل وراها الحارس وزع نظراته عليها وع فارس :يا أخت ممنوع تدخلين هنا .. ممكن تتفضلين معي !!.. كان فارس مندمج بشغله وأوراقه سمع الباب يفتح من غير أحم ولا دستور وحس بإزعاج وفوضى وشوشرة رفع رأسه يشوف اللي تهجم عليه ودخل من غير استئذان .. وشاف ريم وراها الحارس .. وقف فارس وزع نظراته بين الحارس وريم !!.. تكلم الحارس بانفعال :آسف دكتور حاولت أمنعها لكني ما قدرت ..رفضت توقف وتسمعني !!.. أشر فارس بيده علامة رح :تقدر تروح.. هذول الأهل !!... عظ الحارس ع شفته :أسف ما كنت أعرف .. طلع الحارس وسكر الباب وراه !!.. وأسرع فارس بخطواته مسك يدها :خير ريم وش جابك هنا أحد تعبان أمك فيها شيء أحد من أهلي أحد من أهلك تعبان أو فيهم حاجة !!!... طالعته ريم مستغربة :لا فارس .. كلهم طيبين ما فيهم شيء !!... ضيق فارس فتحة عيونه :ليه جاية هنا !!... أبعدت ريم الغطاء عن وجهها ولفت حجابها حول رقبتها:أفهم من كلامك أنك متضايق من وجودي هنا وأنه مو مرحب فيه !!... رد فارس بسرعة :طبعا لا .. بس مستغرب من جيتك المفاجأة لي يعني ما اتصلتي وما قلتي أنك ب تجين !!... تنهدت ريم بهدوء :فارس وش فيك نسيت أن نهى هنا منومة جيت أزورها ..ولما طلعت من عندها قلت أمرك !!.. زفر فارس بكل قوته لما تذكر أحداث الأمس :أف طيحتي قلبي ما جاء فـ بالي إلا الشين !!.. ابتسمت ريم بهدوء :بسم الله ع قلبك !!.. رفع فارس حاجبه :تخافين عليّ!!... تجنبت ريم النظر بعيونه :أكيد إذا ما خفت عليك ب أخاف ع من !!.. أحاط فارس كتفها بذراعه :يا قلبي أنتي !!.. جمدت ريم فـ مكانها وتوردت خدودها كلمة وحركة بسيطة قالها وسواها لكن مفعولها قوي بالنسبة لها !!.. لا حظ فارس التغير اللي صار لها ..جرها وقعدها ع الكرسي المقابل مكتبه :كان اتصلتي فيني وخبرتيني أنك عند نهى وأنا طالع أمر أخذك !!... هزت ريم أكتافها :ريان ب يجي لهم واستحيت أقعد عندهم أخاف أني أقيده .. قلت أجي عندك وأقعد معك ونرجع البيت مع بعض !!.. اسند فارس ظهره ع الكرسي وحط رجل ع رجل :شوفي عندي شغل لـ رأسي أبقي أخلصه فلو سمحتي لا تزعجيني مع أني عارف أني ما راح اشتغل وأنتي عندي.. افتحي الثلاجة وخذي اللي تبقين مو تقولين ما ضيفتني لما جيت مكتبك !!.... حكت ريم جبهتها :صح فارس ما تقدر تأجل شغلك لبكرى عمتي سألتني عنك تقول ما مريتهم اليوم !!... هز فارس أكتافه :أولا راح عن بالي أنهم معي بالمستشفى وبعدين انشغلت وما فضيت !!.. تنهدت ريم بهدوء :إذا كان فـ وقت نمر عليهم قبل ما نطلع ..وإلا شـ رأيك !!.. هز فارس رأسه :اللي تشوفينه .. نزل رأسه ورجع لأوراقه ... بينما ريم انتقلت ببصرها حول أرجاء المكتب ..كان مكتب عادي ما كان فخم لدرجة كبيرة.. وقفت عند النافذة تشوف وش المنظر اللي تطل عليه ..تأففت بضيق وأحست بالملل وهذا مالها إلا خمس دقايق .. راحت للثلاجة فتحتها وطالعت محتوياتها ..أخذت علبتين عصير فتحت علبة وحطتها ع المكتب قدام فارس :فارس خذ اشرب !!.. هز رأسه من غير ما يتكلم .. تأففت بملل ورجعت لمكانها السابق .. لفت انتباهها مكتبة كتبه ..راحت لها تطلع ع الكتب وأسمائهم .. مرت ع الكتب واحد ..واحد لـ حد ما طاحت يدها ع أحد الكتب اللي شدها عنوانه .. تصفحته بصمت ..التفت ع فارس شافته منهمك بأوراقه .. راحت له .. وقفت ورى الكرسي ومدت الكتاب :فارس ليه ما قلت لي أن عندك الكتاب هذا !!.. رفع فارس رأسه وطالع الكتاب الممدود مد يده يأخذه :أشوفه .. قرأ عنوانه .. رفع رأسه وطالعها وأنتي سألتيني عنه حتى أقول لك أنه عندي !!... هزت ريم أكتافها :إلا قلت لك أن الكتاب هذا من ضمن مراجع المادة اللي أدرسها الحين !!.. مسك فارس الكتاب بيد وباليد الثانية جرها وخلاها توقف مقابلته :ما قلتي لي أول مرة أسمع الكلام هذا الحين !!.. اسندت ريم جسمها ع المكتب هزت أكتافها: أهــا..صح يمكن ما قلت لك أنت شكلي قلت لبندر عنه لما كنا نتكلم عن المواد والكتب !!.. تصفح فارس الكتاب :شفتي كيف أنك ظالمتني !!... عضت ريم ع شفتها :طيب ممكن أخذه !!.. رفع فارس حاجبه :ليه وش تبقين فيه !!.. شبكت ريم أصابعها بعض :الدكتورة طلبت منا نشتريه بس ما رحت للمكتبة حتى اشتريه ومدام أنه عندك فعادي أخذه صح وإلا لا !!... اسند فارس ظهره ع الكرسي :الكتاب وصاحبه تحت أمرك !!... ابتسمت ريم وهمست:تسلم لي يا رب !!... اكتفى فارس بابتسامة هادية !!... انفتح الباب من غير استئذان .. تقدم فارس يشوف من اللي دخل عليه .. ورفع حاجبه لما شاف أنها بشاير ..ما علق انتظر أنها تقول اللي تبقي بس ما تكلمت .. التفت ريم نص التفاتة تشوف اللي دخل .. ولما شافتها هزت رجلها وتأففت بضيق !!.. وزعت بشاير نظرات القهر والحقد والغيرة ع ريم وفارس وانتظرته يعبرها لكنه ما أعطاها وجه .. وشافته يتهامس مع ريم !!.. حط فارس يده ع رجل ريم يثبتها :شـ فيك !!.. شدت ريم ع أسنانها بغيظ :ما أطيقها وأكرهها خلها تنقلع تطلع بره !!.. هز فارس رأسه :روقي حياتي ما يسوى عليك .. لا تخلين هـ الأشكال تأثر فيك !!... كلامه مثل السحر سرى مفعوله وقفت ريم عن الهز وابتسمت .. ابتسم فارس لها .. رفع وجهه لبشاير بعد ما رجع وجهه لطبيعته الجدية :خير دكتورة في شيء !!.. عضت بشاير ع شفتها بغيظ :أبقى أسأل عن الأسماء اللي ب يحضرون عمليات هـ الاسبوع !!.. مسك فارس قلم وقلبه :التشكيلة مو عندي عند الدكتور وائل ورئيس القسم روحي اسأليهم !!... ضربت بشاير برجلها الأرض بكل حنق .. وطلعت تجر خيبتها وراها بعد ما صفقت الباب بكل قوتها !!... زفرت ريم بكل قوتها :ما بقت تروح الله يأخذ روحها !!... مسك فارس يدينها وحطهم بين كفينه :حياتي لا تدعين عليها .. ما يجوز تدعين ع أحد لأن الدعوة ترجع لك سواء كانت خير أو شر .. عاد أنتي دعيتي عليها أن الله يأخذ روحها .. عاد إذا رجعت لك الدعوة وربي أخذ روحك أنا بتم بروحي !!... تجنبت ريم النظر فـ عيونه :لا ما راح تم بروحك لأنك ب تلحقني ما تصبر ع فراقي !!... جر فارس شعرها بلين :مرة واثقة !!... هزت ريم رأسها :أكيد ...إلا صح فارس أنت كيف تخليها تدخل عليك من غير ما تستأذن !!.. اشر فارس بإصبعه :هذي أول مرة تسويها ..تلقين أحد قال لها أنك عندي وجت تستكشف .. بس شكلها انصدمت لما شافتك !!... تأففت ريم بضيق :ممكن تغير الموضوع لأن طاريها يجيب لي الهم !!.. وقف فارس :قومي نروح ..من تكونين عندي أبد ما أعرف اشتغل !!... رفعت ريم حاجبها :ليه !!... عظ فارس ع شفته :هــــــا ولا شيء !!... طلعوا فارس وريم من مكتبه بمعية بعض.. تأبطت ريم ذراعه متعمدة عارفة بالعيون اللي تراقبها .. كانوا يمشون بهدوء وصمت !!.. : : : توجهوا للمصعد وفـ ثواني كانوا بوسطه.. ضغط فارس ع زر رقم الطابق المنومة نهى فيه ..كانت ريم متابعة كل حركة يسويها !!.. شبكت ريم أصابعها بعض :فارس .. طالعها فارس :عيونه !!.. ابتسمت ريم بإحراج وكملت:ما نمر نأخذ شيء لنهى قبل ما ندخل عليها !!... ضيق فارس فتحة عيونه :شيء مثل أيش !!.. قلبت ريم عيونها :شف أنا أخذت لها علبة شوكلاتة وش رأيك أنت تأخذ لها ورد تغير يعني !!.. طالع فارس ساعته :ما أظن يمدينا نروح نشتري ونرجع ع كذا ب نتأخر !!.. هزت ريم أكتافها :ماله داعي نروح نأخذ لها من بره المستشفى نأخذ لها من هنا .. تحت عند الاستقبال كشك يبيع و ورد وهدايا نروح نشوف ونختار صراحة فشلة تدخل ويدك فاضيه !!.. هز فارس رأسه :نروح مو مشكلة !!.. وضغط ع زر الطابق الأرضي ...لحظات وهم بره المصعد طلعوا واتجهوا للكشك ..طبعا المستشفى كان فاضي الحين من الزوار وما كان فيه إلا العمال والموظفين بس .. وقفوا عند الكشك .. وشافوا أشكال بعض الهدايا المعروضة وبعض باقات الورد .. احتاروا وش يختارون يأخذون من الأشياء المعروضة وإلا يطلبون العامل يصمم لهم شيء من اختيارهم وع ذوقهم .. أخذوا وقت وهم يتشاورون.. وتأفف العامل منهم ..كان يوزع نظراته عليهم بغيض .. كان متوجس خيفة منهم بأنه ب يتعب معهم وفـ الأخير يروحون من غير ما يشترون حالهم حال غيرهم من الناس !!... حط فارس يده ع خصره :هـا وش نختار !!... هزت ريم أكتافها :مدري أشكالهم حلوة وروعة بالمرة ..ما تدري وش تأخذ وش تخلي !!... أشر فارس ع لعبة :وش رأيك نأخذ هذي للبنت !!.. هزت ريم رأسها :لا ما يصلح توها صغيرة وش فمهما بالألعاب .. الحين نبقي شيء عادي نأخذه معنا لهم الحين بما أنهم بالمستشفى..وإذا طلعت نهى بالسلامة نهديهم شيء له القيمة !!... كتف فارس يده :أجل اختاري أنتي ...أنتي تعرفين للهدايا أكثر مني لأنها شغلتكم يا البنات !!... حركت ريم يدها :قلت لك من البداية نأخذ لها ورد .. الورد يفتح النفس ويشرح الصدر !!.. اشر فارس بيده ع الباقات :هذا هم اختاري اللي تبقين !!.. سكتت ريم لحظات تفكر :أممم مدري أحس أن القاعدة"السلة " تجيك حلوة بس التنسيق مو حلو أو شكل الورد مو حلو .. وش رأيك !!... حك فارس جبهته :اختاري الورد والقاعدة ..ونقول له يرتبه ع حسب اللي نبقي !!.. وزعت ريم نظراتها ع الأشكال المعروضة .. تختار الشكل اللي تبقيه !!.. تأفف العامل بضجر :هيه أنتا أيش يبقا قول بسرعة !!... رفع فارس حاجبه :لا والله هذا اللي ناقص ما بقى إلا تطقني !!... رد العامل بانفعال :أنتا ساعة يوقف بس يشوف بعدين يروح ما في يشتري !!.. عظ فارس ع شفته بغيظ أشر ع بعض المعروضات :شف نزل هذي وهذي و هذي !!... نزلهم العامل متأفف .. حطهم ع البنش قدام فارس .. تحسس فارس الورد بيده : ما فـ ورد نوع ثاني غير هذا!!.. مط العامل شفته :لا هذا كل ورد هنا .. الورد نوع ثاني يجي صبح بس هذا "لا هذا كل الود اللي هنا ..الانواع الثانية تجي الصبح وهـ النوع اللي باقي "!.. زم فارس شفته :شف أنا أبقي ثلاث باقات ورد ..بس ما أبقى هذا أنا أبقى شيء ثاني أنا ب أقول أيش يبقي وأنت سوه زين !!.. هز العامل رأسه :معلوم !!... همست ريم لفارس :إحنا نبقي وحدة ليه ثلاث !!.. رد فارس بنفس الهمس :مو شغلك!!.. سكتت ريم وما علقت !!.. شرح فارس للعامل الشكل اللي هو يبقيه .. وبما أن العامل متمرس فهم ع طول .. وشرع فـ تصميمها .. أنهى الباقة الأولى بسرعة ..وناولها لفارس يشوفها !!.. ابتسم فارس بهدوء :بكم هذي !!.... قال العامل السعر له .. انقده فارس الفلوس :شف أنا ب أخذ هذي الحين وبعد ساعة ب أجي أخذ الباقي !!.. هز العامل رأسه :عطني عربون أول !!.. ضيق فارس فتحة عيونه :وش له عربون أنا إذا جيت أخذهم ب أعطيك الفلوس مرة وحدة !!... أصر العامل ع موقفه :عطني عشرة ريال الحين بس و إذا فـ يجي كمل باقي فلوس !!.. فتح فارس عيونه ع وسعهم "أف طلع مو هين ": الحين أنا ما عندي فلوس بروح صراف وأسحب فلوس وأجي !!.. استغربت ريم من تصرفاته الغريبة ..همست له :فارس معي فلوس ماله داعي تروح الصراف ..أنا أعطيك وما بيني وبينك حساب !!... طالعها فارس شد ع أسنانه:ممكن تسكتين ..أنا أعرف اتصرف !!... تضايقت ريم من أسلوبه معها زفرت بكل قوتها !!... أخذ فارس الباقة :أنا الحين بروح و ب أجي بعد ساعة أخذ الباقي معلوم !!.... هز العامل رأسه k ما فـ مشكلة !!... مسك فارس ذراع ريم بيده :يله مشينا !!... انساقت ريم معه من غير ما تقول شيء .. دخلوا المصعد ضغط فارس ع زر الطابق المنومة نهى فيه ..وقف المصعد عند الطابق اللي يبقونه ..طلعوا منه وقفوا فـ الممر.. طالع فارس ريم :وين غرفة نهى !!.. هزت ريم أكتافها بعدم اكتراث :مدري !!... قطب فارس حواجبه :طيب كم رقم غرفتها !!... شتت ريم نظراتها :مدري !!... زم فارس شفته بغيظ :كيف ما تدرين !!... عضت ريم ع شفتها بقهر :دق ع ريان وأسأله !!.. قرب فارس منه وهمس :شـ فيك وش صار هـ اللي يخليك تكلمني من طرف خشمك !!.. تأففت ريم بضيق :أنا وإلا أنت ممكن تفهمني وش الأسلوب اللي كلمتني فيه من شوي عند راعي المحل .. مو شغلك .. وممكن تسكتين !!... ضحك فارس بقهقهة !!.. ضربت ريم الأرض برجلها بكل حنق .."أحر ما عندي أبرد ما عنده": ممكن تفهمني وش اللي يضحكك !!... مسك فارس ذراعها وجرها معه :روحي أنتي مو فاهمة شيء ..أنا قلت يسوي لنا ثلاث وإحنا نبقي وحدة عناد فيه .. ليه يزمر عليّ .. من فاكر نفسه حتى يتأفف ويصارخ عليّ .. وبعدين أنا معي فلوس بس ما أبقي أعطيه!!... حطت ريم يدها ع يده :يعني أنت الحين ما راح ترجع تأخذهم !!.. هز فارس رأسه : طبعا ما راح أخذهم خليه يتأدب !!... وجهت ريم نظراتها للأرض :يوه حرام والله مسكين!!... تنهد فارس بهدوء :خليه يتأدب ع شان ما يرفع صوته ع الناس وكأنهم عبيد عنده !!.. طالعته ريم وغمزت بعينها:تصدق عاد أني فرحت لما قلت للعامل تبقي ثلاث باقات قلت يمكن ب تهديني حتى أنا وحدة منهم...بس المفروض أنك تفاجئني مو تطلبها وأنا جنبك .. بس طلعت ع نياتي وفـ بالك شيء ثاني !!... ابتسم فارس بهدوء : ما قلتي وين غرفة نهى !!... تنهدت ريم بهدوء :مدري لحظة أطلع جوالي أشوف لمى ارسلت لي رقم الغرفة !!.. طلعت جوالها .. وفتحت ع رسالة لمى ناولت فارس الجوال يقرأها ويشوف !!.. : : : كانوا واقفين عند غرفة نهى بالضبط .. دق فارس الباب عدة دقات .. ووقفوا ينتظرون الرد شبكت ريم أصابها بعض :فارس لو اتصلت ع ريان وسألته إذا كان يناسبهم نزورهم ما كان أحسن !!... رفع فارس حاجبه وسكت لحظات :نفاجئهم أحسن !!.. هزت ريم أكتافها :يمكن ناموا ..أو ريان رجع البيت !!.. ابتسم فارس بهدوء :أمي موجودة تكفي وتوفي !!.. عاود فارس الدق ع الباب !!.. : : : بالجهة المقابلة بالغرفة .. مازال ريان يلاعب بنته لدرجة أنها تنام .. ويقومها من النوم يضايقها ويلهيها شوي وترجع تصيح أو تنام .. أما نهى كانت متمددة ع السرير تراقب ريان وبنتها .. وبدرية بالغرفة الثانية من دخلت تنام ما طلعت !!.. سمع ريان الباب يدق طالع نهى اللي تكلمت : غريبة من ب يجي لنا الحين !!.. هز ريان أكتافه :يمكن أحد من الممرضات !!.. هزت نهى رأسها .. ساكتة ما ردت ولا علقت !!.. وقف ريان وقرب منها وحط ليان جنبها :ب أروح أشوف ...راح يفتح الباب !!.. فتح ريان الباب وطلع فـ وجهه فارس ومعه وحدة متغطية وبكل تأكيد ب تكون زوجته ريم.. وزع ريان نظراته عليهم :يا هلا حيا الله من جانا !!... ابتسم فارس :الحمد لله ع سلامة نهى .. ومبروك ما جاكم !!.. بادله ريان الابتسامة :الله يسلمك ويبارك فيك !!.. لصقت ريم بفارس وهمست مازالت تتعامل مع ريان بحدود :الحمد لله ع سلامة أم ليان .. ومبروك ما جاكم !!.. رد ريان بهدوء :الله يسلمك ويبارك فيك !!... حك فارس جبهته :آسفين ع الازعاج دارين أنه مو وقت زيارة بس قلنا نمر نسلم قبل ما نطلع !!. تنهد ريان بهدوء :حياك الله وأنت تجي فـ أي وقت ما أنت غريب ... لحظة بس أخلي نهى تتغطى وأخليك تدخل !!.. حط فارس يده ع خصره :لا يكون نايمين وأزعجناكم ..إذا كانت نهى مرتاحة لا تزعجها .. ونرجع لكم بكرى !!.. أشر ريان بإصبعه :لا وش دعوة عن نفسي وزوجتي وبنتي مو نايمين أما بالنسبة لأمي مدري عنها لأنها دخلت من وقت تقول ب تنام بس مدري عنها نامت أو لا .. عن أذنكم دقايق بس !!.. هز فارس رأسه :خذ راحتك !!.. رجع ريان لداخل .. وناول نهى عباتها وقال لها تتغطى لأن فارس بره .. وراح لأمه ... كانت بدرية متمددة ما غمض لها جفن خاطرها متكدر تحاتي فارس متضايقة بسبب الكلام اللي قالته له .. شافت ريان داخل عليها !!.. قعدت بدرية :وش فيك يا ريان الله يهديك لا نمت أنت ولا خليت زوجتك وبنتك ينامون !!... ابتسم ريان بهدوء :إن شاء الله ب ينامون يعني الدنيا ب تطير لاحقين ع النوم !!.. تنهدت بدرية بهدوء :الله يهديك !!.. حك ريان جبهته :أمي فارس وريم بره جايين يزورون نهى ويباركون لـ... قاطعته بدرية :خل فارس يجي عندي بسرعة !!... هز ريان رأسه .. وراح لفارس وريم وأعطاهم الأذن بالدخول !!.. دخل فارس وقف مقابل نهى ونظراته للأرض :الحمد لله ع سلامتك يا أم ليان ومبروك ما جاكم !!.. ردت نهى بهدوء :الله يسلمك ويبارك فيك !!.. جر ريان فارس :تعال نروح للوالدة !!.. حرك فارس يده :خلني أشوف أول حفيدة بالعايلة وأسلم عليها !!.. ضحك ريان :ما عليه رح أنت عند أمي وأنا ب أجيبها لك خل نترك بالبنات يأخذون راحتهم !!.. هز فارس رأسه :أها .. مدام كذا يله أجل !!... دخل فارس عند أمه بينما ريان راح لبنته وأخذها .. طالعت نهى ريم الواقفة مكانها :تعالي ريم ارتاحي ليه واقفة !!.. ابتسمت ريم وتقدمت من نهى حطت الباقة قريب منها وقعدت ع الكرسي جنب السرير !!.. شبكت نهى أصابعها :ليه ريم كلفتم ع أنفسكم ماله داعي !!... كتفت ريم يدها :الورد للورد .. ما فيها أي كلافة ولا شيء وهذا شيء بسيط من فارس لكم!!.. ابتسمت نهى :تسلمون !!... بادلتها ريم الابتسام :الله يسلمك.. ما قالوا لك متى تطلعين !!.. هزت نهى أكتافها :ما أحد قال لي شيء وريان يقول اقعدي لـ بعد بكرى ع الأقل نكون ارتحنا!!.. هزت ريم رأسها :الله يكون بالعون.. نهى إذا كنتي ب تنامين نامي لا تشغلين نفسك بي!!.. تمددت نهى ع ظهرها :لا وش دعوة أنام ع الأقل جيتي وسليتيني ريان مطنشني ومقابل ليونة يلاعبها ويضحك معها وما كأني معهم !!... غمزت ريم بعينها :أوه شكل الغيرة بدأت بينكم !!... اكتفت نهى بالضحك وما علقت !!... أما ريم نزلت رأسها تفكر كم أخذت هي وفارس من تزوجوا ..ما حملت وما بان عليها شيء ..وفارس عمره ما صرح أو لمح برغبته بالعيال بس ما فـ أي اثنين متزوجين وسعيدين بحياتهم ما يتمنون يكونون أم وأب ...يا رب ارزقني ولا تحرمني !!.. : : : دخل فارس ع أمه ... اللي من شافته مقبل عليها وقفت تهلي وترحب فيه .. ابتسمت بدرية :هلا والله يا حيا الله من جانا هلا بالغالي !!.. استغرب فارس الترحيب والاستقبال التفت يمين وشمال إذا كان معه أحد أو لا ولما شاف نفسه بس مع أمه أشر ع نفسه :أوه هذا كله لي !!... هزت بدرية رأسها :أكيد لك تشك أنك غالي !!.. قرب فارس منها وسلم عليها :لا طبعا عارف ب غلاي عندك .. تستاهلون سلامة أم ليان مبروك ما جاكم !!... ابتسمت بدرية :الله يسلمك ويبارك فيك.. قعدت :وينك يا أبوي ما شفناك اليوم عسى ما شر ما مريتنا !!... هز فارس رأسه وقعد جنبها :انشغلت شوي اليوم وصراحة نسيت أنكم هنا معي بالمستشفى !!... تنهدت بدرية بهدوء :صراحة خفت أنك أخذت ع خاطرك من كلامي أمس !!... ضيق فارس فتحة عيونه :أي كلام !!... كتفت بدرية يدها :الكلام اللي أمس قلته لك لما جيت تقول لي عن نهى أنها تعبانه !!.... هز فارس أكتافه بعدم اكتراث :أصلا أنا نسيته وراح عن بالي .. وبعدين يمه أنا ما أخذت ع خاطري لأنه كلام عادي فـ نظري ريحي بالك مو أنا اللي أكبر الأمور الصغيرة والتافهة !!.. حطت بدرية يدها ع ركبته :الله يكملك بعقلك يا ولدي والله أنك ريحت قلبي !!... انتبه فارس ع ريان اللي دخل وهو شايل بنته :يا ربي يسلمهم .. ما أصدق أن ريان صار أبو!!... ضحك ريان ونفخ نفسه :لا يا حبيبي صدق .. ناوله البنت .. وهذي أكبر دليل !!... أخذها فارس وتأملها شوي :لا إله إلا الله ما شاء الله تبارك الرحمن ..اللهم صلي ع محمد .. ملامحها ما بانت زين لأنه يمكن مالها إلا يوم ... رفع رأسه يطالع ريان .. بس مو كأنها نتفه !!.. رفع ريان حاجبه :لا تقعد تتمسخر ع بنتي .. ب نشوف بنتك كيف ب يكون شكلها إذا جت !!... مس كلامه وتر حساس عند فارس اللي سكت لحظات.. ضحك بقهقهة ..أصلا بنتي ما راح أخلي أي أحد يمسكها أو يشوفها !!... حرك ريان يده بانفعال :ومن تكون بنتك بالله هـ اللي ما راح تخلي أحد يمسكها !!... تنهد فارس بهدوء :بنت فارس وريم وهذا يكفيها !!... هز ريان رأسه :ما أقدر يا واثق ..هذا هي ما جت وكبرت رأسها أجل لو هي موجودة وش كنت ب تسوي !!.. تضايق فارس وبان ع ملامح وجهه .. وجه نظراته للبنت وتفحص وجهها بنظراته !!.. ابتسمت بدرية بهدوء :إن شاء الله تجي !!.... ناول فارس البنت ريان ووقف : يله أنا ماشي تأمرون ع شيء !!.. طالعته بدرية :وين بدري يا ولدي ..اقعد شوي معنا !!... تنهد فارس بهدوء :ب أروح البيت أرتاح وأنام بكرى عندي دوام بدري وتعرفين لازم أريح .. وريم بعد عندها دوام !!.. هزت بدرية رأسها :ليه يا ولدي خليتها تدرس بالصيف كان خليتها ترتاح !!... رفع فارس حاجبه :أنا خليتها هي تبقي تقول المدة قصيرة شهرين بس .. وأنا تركتها ع راحتها .. يله تصبحون ع خير!!... ردوا عليه :وأنت من أهل الخير !!.. راح فارس للغرفة الثانية تنحنح ودخل بعد ما تغطت نهى نادى ريم وراحوا لبيتهم !!... : : : طالع ريان أمه : ما تلاحظين يمه أن فارس تضايق لما جبنا سيرة العيال !!... هزت بدرية أكتافها :لا ما لاحظت !!.. تنهد ريان بهدوء :يا أمي ترى مو أول مرة ألاحظه يتضايق هذي ثاني مرة أشوفه .. من أحد يجيب له طاري العيال يتضايق ويطلع من المكان !!.. زفرت بدرية بكل قوتها :الله يرزقه ويعطيه !!... ضيق ريان فتحة عيونه :مو كأن زوجته طولت ما حملت تتوقعين يمه في زوجته شيء اللي تأخر حملها إلى الحين !!... ردت بدرية بانفعال :ريان شـ فيك صاير عمتك !!... قطب ريان حواجبه :ليه وش فيها عمتي !!... أخذت بدرية نفس تهدي انفعالاتها :أبد من تقعد مع ريم تسألها ليه ما حملتي .. رحتي كشفتي وإلا لا .. وأسئلة تافهة وسخيفة !!... زم ريان شفته :وهي وش ترد عليها!!... حركت بدرية يدها :مسكينة ريم بالعة الهم وساكتة ما ترد عليها !!... هز ريان رأسه :طيب وفارس ساكت لها حتى هو وإلا قال لها شيء !!... هزت بدرية أكتافها :عمتك ما تسألها بوجود فارس ..بس أكيد زوجته توصل له كل شيء .. وهو إلى الحين ساكت وما قال لعمتك أي شيء وما يندرا وش ورى سكوته !!.. قلب ريان عيونه :ما أظن ريم توصل له شيء لأن لو وصل له شيء ما راح يسكت أكيد أنه ب يرد ع عمتي بنفسه و ب يوقفها عند حدها وما راح يخليها ع راحتها تخرب حياته وتخرب ما بينه وبين زوجته !!... ميلت بدرية رأسها :يمكن كل شيء جايز .. مدت يدها ..عطني ليونة .. وأنت رح لنهى اقعد معها شوي !!... ابتسم ريان وناولها البنت.. وراح هو لـ نهى !!.. فكرت بدرية بكلام ريان أكيد ريم ما توصل لفارس شيء لأنه لو يوصله ما استمرت العمة ب حركاتها وهجومها ع ريم !!.... : : : فـ بيت راشد .. بما أن الوقت متأخر .. كان يعم البيت الهدوء والصمت والسكون.. راشد وزوجته فـ غرفتهم نايمين ..أما عيالهم كل واحد منهم بغرفته .. سهران بطريقته الخاصة !!.... فجأة وبدون سابق إنذار .. صدر إزعاج وفوضى زعزع سكون البيت الهادي.. كان صوت جرس الباب يرن ومتواصل برنينه بالإضافة إلى ضرب الباب بعنف ... فزعوا أهل البيت مذعورين كلهم من الصوت .. وتوجسوا بأنفسهم خيفة تدافعوا ع الدرج وطلعوا للفناء الخارجي .. فتح تركي بما أنه الأسرع الباب ع مصراعيه !!.. ووقفوا مصدومين ومستغربين من اللي الأشخاص اللي كانوا عند الباب .. وزعوا النظرات الحيرى فيما بينهم وكأن عيونهم تنطق وش جاب الشرطة للبيت بذا الشكل وفـ هـ الوقت المتأخر من الليل !!.. تقدم راشد وقف عند الباب استجمع قوته :خير يا حضرة الضابط!!... وزع الشرطي نظراته عليهم :هذا منزل سلطان راشد !!!.. هز راشد رأسه :أي خير وش تبقون فيه !!... زم الشرطي شفته :وينه !!.. تقدم سلطان عند الباب :نعم أنا سلطان !!.. مد الشرطي ورقة قدامه :معنا أمر ب تفتيش البيت وإلقاء القبض عليك !!... فرك راشد وجهه من الصدمة:ليه هو وش مسوي حتى تقبضون عليه !!... هز الشرطي أكتافه :متهم بقضية !!.. ضيق سلطان فتحة عيونه :قضية وشو !!... رد الشرطي بانفعال :بالمركز تعرف ..الحين نبقي نفتش البيت !!... انفعل راشد بغيظ :عندنا حريم بالبيت !!... هز الشرطي رأسه :أدخل واسترهم هذا ما يمنع التفتيش !!... عظ تركي ع شفته بغيظ :بأي حق تفتشون بيتنا .. جاينا أخر الليل وتبقون تفتشون بأي حق !!.. تنهد الشرطي بهدوء :يا أخوي هذي أوامر عليا ما أحد يقدر يناقشها أو يعارضها خلنا نفتش ونخلص !!... سكتوا ع مضض ولفوا كلهم لداخل .. لكن استوقفهم الشرطي :لحظة سلطان يبقي معنا !!... قطب سلطان حواجبه :ليه !!... كتف الشرطي يده :لدواعي أمنية !!... دخل راشد وتركي بوسط البيت أمروا شيخه تلبس عباتها لأن الشرطة ب تدخل تفتش !!.. بدأت شيخه بأسلتها الفضولية :ليه يفتشون وش يدورن عليه حتى يفتشون بيتنا !!... هز تركي أكتافه :ما ندري بس متهمين سلطان بقضية !!... شهقت شيخه بصرخة :يا ويل حالي ع ولدي ..أكيد هم غلطانين .. ولدي سلطان ما سوى شيء !!... شد راشد ع أسنانه بغيظ :يا حرمة قصري صوتك والبسي عباتك وخلصينا !!... راحت شيخه تلبسها وهي تدعي وتتحسب !!... دخلوا الشرطة وقاموا بالتفتيش ... وكان رئيسهم واقف بالصالة مع راشد وعياله.. وكانت شيخه قاعدة بأحد الزوايا تراقب الوضع ... انتهت عملية التفتيش بأنهم ما لقوا اللي يبحثون عنه ... لكنهم ساقوا سلطان معهم .. بما أنه متهم بأحد القضايا اللي ما قالوا أي شيء عنها !!... : : : انتهى الجزء الثلاثون