الفصل 2
الجزء الثاني:.
مازال الوضع بين أم ناصر وأبو ناصر غير مستقر والعلاقة بينهم من سيئ إلى أسوأ
كانت أم ناصر تحاول قد ما تقدر أن البنات ما يحسون بشيء وكانت طبيعة عمل أبوهم وغيابه تخليهم ما يحسون
ودراستهم تقريبا ما خذه أغلب وقتهم
أما أبو ناصر ما يهمه تصرفاته كل حركة أو فعل يصدرون منه قاصده وبعمد وكان قصده بالحركات
هذي تطفي النار اللي تشتعل بقلبه ضد نسيبه
كانت في غرفته تصحيه
........يله ناصر قم تأخرنا على دوامنا قم وصلنا
ناصر:أفففففففف منك أزعجتيني وين السواق ما يوصلكم
ريم:السواق سيارته خربانة وإلا شرايك تعطيه مفاتيح سيارتك
ناصر: لا تكفين كان يدمرها أففف أمري لله أوصلكم أنا
نزلت تحت وشافت جود حالها ماهو أحسن من حال أخوها
كانت ضامة شنطتها وجالسة عالكنب ونايمة وراسها يجي ويروح قربت ريم منها وطلت في وجهها
وحست فيها جود :يمه خوفتيني
ريم:ما شبعتي نوم
جود:كل منك يادبه سهرتيني معك .......أقعدي معي ما أقدر
أواصل لحالي عندي امتحان بكرة
ريم: إحمدي ربك إنك نمتي ما هوب أنا مواصلة وبروح أمتحن
جات: أمهم صحيتم تعالوا إفطروا قبل ما تمشون
ريم:متأخرين ماراح يمدينا الوقت
جود:أنا ماراح أروح معكم بنتظر أبوي أروح معه
أم ناصر:لا أبوك دوامه متأخر روحي معهم عشان ما تتأخرين
نزل ناصر وراح يوصل خواته لدوامتهم
ريم فتاة عاقلة ورزينة وهادية وثقيلة وحساسة يعترها أحيانا حزن إنطوائية وغير إجتماعية
بخلاف جود اللي هي إجتماعية وتحب المزح والفرفشة
^^^^^^^^^
وبعدهم صحى أبوهم عشان يروح دوامه شاف أم ناصر كالعادة جالسة بالصالة
مر جنبها وطنشها كأنه ما يشوفها وهذا الشيء حز بخاطرها وترك أثر في نفسها
&&&&&&&&&&&&&
........تو بدري كان ماجيت ...؟
سلطان:هه يبه
راشد أبو تركي:ياولد استح على وجهك جاي تتسحب مثل الحرامية ما عندك بيت تجي تنام فيه
ما عندك أهل يحاتونك وينتظرونك عشان تطمنهم عليك
المفروض أنك ذا الوقت تستعد تروح شغلك مو ترد من سهراتك
ويعني يومين تغيب عن البيت ولا أحد يدري أنت وين .
سلطان وهو متململ يبه وأنا وش مغيبني عن البيت غير أشغالي وأعمالي .
تركي وهو نازل من الدرج وبإستهزاء:أي واضح...عاد والشغل اللي يستحق أنك تغيب عشانه
سلطان:أسكت أنت مالك دخل فيني ولا عليك مني ..
أبو تركي:طيب وش طبيعة العمل اللي يخليك تغيب يومين عن البيت
سلطان وهو مرتبك:هه بعدين راح أخبرك يبه عن طبيعة العمل.
الأم جاتهم لما أسمعت أصواتهم عالية:سلطان يمه جيت بالي مشغول بك
أتصلت على جوالك أكثر من مرة أبي أتطمن عليك
لكني لقيته مقفول ..خوفتني عليك وينك فيه
سلطان بكل ثقة وبرود: طبيعة العمل تخليني أقفل جوالي ...
ونسيت لا أخبركم قبل ما أمشي لدوام أني راح أتأخر وأغيب عن البيت فترة طويلة
أم تركي:ياولدي الله يهديك مره ثانية لا تنسى إطمنا طول الوقت يمضى وأنا قاعدة أحاتيك عاد لا تعيدها مره ثانية ....
تعال ياوليدي أجهز لك أكل أكيد أنت جوعان وما أكلت شئ بس وش ذا الشغل اللي يخليكم تواصلون الليل بالنهار..
سلطان: يمه أشغال كثيرة وأعمال موظفيها يواصلون الليل بالنهار
وبعدين يمه اللي يبي الرزق ما همه الشغل في الليل وإلا في النهار ....
يله يمه تكفين حطي لي فطور حدي جوعان ونعسان .
مشى ورى أمه وهو يرمي على أخوه نظرات تحدى وغرور وثقة ..
تركي في نفسه:هين يا سلطنوه إن ما كسرت رأسك ونزلت خشمك الأرض وبينت حقيقتك للوالد ما أكون أنا تركي..
طلعه من تفكيره صوت أبوه....تركي أيش فيك واقف يله قم نفطر قبل ماتروح للدوام..
تركي:لا يبه أنا متأخر بروح للدوام أفطر أنت فيه العافية...............مع السلامة
هذه عائلة أبو تركي راشد أخو سلمان أبو ناصر
تركي إنسان حقود وأناني ما يحب إلا نفسه ويحقد على الكل حتى أقربهم اللي هو أخوه
سلطان:شخصية غامضة ومركبة مغرور لأبعد الحدود وشايف نفسه ومتكبروما يهمه أحد غير نفسه
&&&&&&&&&&&&&&
....ها ياغانم وش قلت في الكلام اللي قلت لك
غانم:والله يابدرية كلامك عين العقل وأنا واثق فيك وفي كل
قراراتك وكل خطوة راح تخطينها تلقيني معك
لكن ماأنتي خايفة من ردة فعل أخوك راشد وأختك منى ..
بدرية:ياغانم طول عمري وأنا أسمع كلامهم وأمشي وراهم لأني ما أبي أزعلهم
لكن وش إستفدت من هذا كله كل ما نجتمع تنقلب إجتماعاتنا لهم ونكد
وبالصراحة إلى هنا وخلاص راح أكلمهم وأقنعهم وأنا بسوي اللي على والباقي بخليه على ربي
غانم:الله معك وربي يقدم لك اللي فيه الخير ..
**صباح الخير عالحلوين**
غانم:صباح النور هلا وغلا ببنتي لمى تعالي أقربي مني
جات وسلمت على أمها وأبوها وجلست جنب أبوها وقرب منها
وهمس في أذنها من الأحلى أنا وإلا أمك
لمى:هههه إثنينكم حلووووووويين
غانم:لا ياحبيبتي حددي
لمى:يباااااااااااه عااااااااد
غانم:خايفة من أمك
كانت تشوفهم يتهامسون ولاتعرف أيش يقولون : أنتم وش عندكم تتساسرون على الصبح
غانم:ماعندنا شئ.... وألتفت على لمى وين نهى بنت عمتك
لمى :اليوم محاضراتها متأخرة ..إلا لينا راحت للمدرسة وإلا لا
بدرية: راحت من بدري مع ريان وأنتي ليه توك تصحين وشفي عيونك حمر
لمى: يمه منهم ذا الاثنين أبد يخافون يفوتهم شئ حتى الطابور بيحضرونه
بدرية:وأنتي ما تتركينهم في حالهم أبد يله قومي افطري قبل ما تمشين للجامعة ..
لمى وهي تناظر ساعتها:ماراح يمديني حدي متأخرة يله يبه حنا متأخرين
وهذاني مشيت عشان اخلي حبيابك في حالهم ..
بدرية:خير أيش عندك متأخرة
لمى:أمممم راحت على نومة
غانم:الله يهديك يا بنتي يله قومي ..
طلع غانم مع لمى وترك بدرية مع أفكارها
والقرار اللي في بالها واللي شاورت أبو فارس عنه وفي قرارة نفسها في أقرب فرصة راح تنفذه ...
بدرية هي أخت سلمان أبو ناصر وزوجها غانم أبو فارس موجه تربوي
عيالها:فارس عمره27سنة يدرس بالخارج وقريب راح يرجع.
ريان عمره25سنة مدرس مادة علوم في مدرسة متوسطة
لمى تدرس بالجامعة عمرها 20سنة وتخصصها لغة عربية
لينا تدرس بالمتوسط وعمرها 13سنة
وأخر العنقود مي وعمرها 5سنوات.
*******************
كان يصحح أكوام الدفاتر اللي على مكتبه جاه طالب:أستاذ ريان
يقول لك الوكيل إنت الآن علينا
ناظر في ساعته :أففف ما باقي إلا ثلث ساعة وتنتهي الحصة ..
سمعه زياد :خير ريان ماهي بالعادة تنسى حصتك ..
التفت ريان على طالب :رح الفصل وأنا بجي وراك...
ما أدري وش سالفته ذا الوكيل تخيل يغير الجدول على كيفه ولا يبلغني بالتغيير
إلا إذا مضت نصف الحصة يرسل لي أحد الطلاب يخبرني
زياد:طيب ليه
ريان: ما أدري تخيل من بداية السنة وهو متسبب على كأن ما
في أحد بالمدرسة إلا أنا ...وأخذ أغراضه وطلع للفصل..
وعند باب الفصل شاف الوكيل واقف :بدري أستاذ ريان
ريان وبنبرة ثقة:بعد الحصة راح أمرك عن أذنك ما عندي وقت راح أبدأ بالدرس ..انتظرني يا أستاذ في مكتبك ..
وقفل باب الفصل في وجه الوكيل وهو يغلي في داخله من برود وثقل دم الوكيل.
&&&&&&&&&
نزلت الصالة وشافت بدرية مع مي اللي جالسة تلعب .
صباح الخير أم فارس
أم فارس:صباح النور والسرور كيف أصبحتي
خلود:الحمد لله بخير ..وين أمي وإلا مابعد تصحى
أم فارس:إلا صحت من وقت ودخلت غرفتها تصلي الضحى ..
شافت مي عمتها وعلى طول راحت لها
مي:أميمه توك تثحين"عميمه توك تصحين
خلود:أي حبيبتي
مي:أنا من زمان صحيت وفطرت وقعدت ألعب لوحدي ماعندي
أحد يلعب معي كلهم راحوا المدرسة ..
خلود: أنتي شاطرة وحلوة بعد ليه ما تروحين المدرسة
مي:ماما تقول لي لما تكبرين تروحين
التفت خلود على بدرية :ما أنتي ناوية تسجلينها في الروضة ..
بدرية:إلا بس إن شاء الله على بداية السنة الجاية .
طلعت الجدة اللي هي أم غانم وشافت بنتها ومرت ولدها
جالسين بالصالة جلست معهم..
الجدة لولوة:متى ناوية تروحين لبيتك يا خلود
خلود:مليتوا مني يمه
الجدة:ماهي بالعادة طولين عندنا كلها يومين تجين تزورينا وتشوفين بنتك فيها وترجعين لجدة
خلود:تدرين ما أقدر أترك بو هشام فترة طويلة وإلا هو ما وده أجي أزوركم
وأطول عندكم بس هو مقدر الظروف أني أجي أشوف بنتي اللي أبوها ما نعها أنها تزورني
وإلا تدخل بيتي ,ولو واحد غيره منعني
أني أزوركم.. أو حتى أشوف بنتي
الجدة:مسكينة نهى هي الوحيدة الضايعة بينك وبين أبوها
خلود:وشو اللي عامله أبوها بعد
الجدة: وأنتي أي شئ يصير تحطينه على أبوها أجلسي معها واسألي عن أحوالها
خلود:سألتها عن أحوالها وقالت لي كل شئ تمام ......
.وأبوها يكرهني ويعلمها تكرهني
الجدة: بنتك كتومة ومو كل شئ تقوله أو تشتكي منه أنا أبيك تجلسين معها وتسألين عن أحوالها
وتتقربين منها
تخلينها تثق فيك تحسسينها أنك أنتي أمها ومصلحتها تهمك ...
خلود:يمه أنتي تكبرين المواضيع ...تلقينه دلع بنات وإلا الدراسة اللي هي شاغلة بالها
الجدة :أنا اللي مربيتها وأعرفها أكثر منك قولي ذا الكلام لحد ما تضيع البنت من أيدينا
خلود وعشان تفتك من إلحاح أمها:خلاص راح أشوفها وأجلس معها وأشوف وشو اللي ناقصها
مع أني عارفة أنك تكبرين المواضيع على أقل شئ ..
خلود أخت غانم أبو فارس مطلقة من أبو نهى وما عندها منه إلا نهى وعمرها 20سنة
ومتزوجة من رجال ثاني وعندها منه ولد أسمه معاذ وعمره 6سنوات
*********************
كان في مكتب الوكيل ويحاول أنه يسيطر على أعصابه:
ليه ما تخبرني قبل بوقت عن التغيير اللي يصير بالجدول..
الوكيل ويسوي روحه مندمج بالأوراق اللي قدامه وبكل برود : أنسى لا أخبرك
ريان:ياسلام عليك ... تنسى ومن يتحمل مسئولية نسيانك وإلا
راح تعوضني بحصص إضافية
أعوض اللي يفوت من الدروس..
الوكيل:هذا ماهو ذنبي ...قلبك عالمنهج احرص عالحصص ولا تفوت شئ منها
ريان:أتوقع أني أسألك عن الجدول بعد ما ينتهي الطابور وتقول كل شئ تمام ...بس أنا أبي أعرف ليه أنت مترصد لي.
الوكيل بغرور:ومن تكون عشان أترصد لك....تفضل وهو يأشر عالباب ما عندي وقت أضيعه معك وانتبه لحصصك..
طلع وهو منقهر من ذا الوكيل اللي مطلع قرونه ولا يعرف كيف يوقفه عند حده...
ريان:شاب منظم ودقيق وعملي أهم شيء عنده عمله ووظيفته اللي يحبها
&&&&&&&&&&
اليوم كان أخر يوم في امتحاناتها النصفية "أعمال السنة الشهرية"
وهاليوم يكون عند بعض البنات يوم عيد يفلونها فل سواء في البيت أو في الجامعة لكنه عندها غير
تحس بملل وضيق ويمكن بعض التوتر وعشان تطلع من اللي هي فيه قررت أنها تنزل تحت وتشوف أهلها
اللي انقطعت عنهم فترة الامتحانات نزلت الصالة
وشافت أمها لوحدها
يمه وينهم عنك أشوفك لوحدك..
أم ناصر:هذا حالي يومياً أبوك ها لوقت يكون بالمحل وناصر نايم وجود هنا شوي وفوق شوي
وأنتي الامتحانات ما خذتك منا
نبرة الصوت كسرت خاطرها وحست بمعاناة أمها في جلوسها لوحدها خلاص من اليوم ورايح ماراح تجلسين لوحدك
أنا خلصت من الامتحانات وبجلس دوم معك
........ أنا جيييييييييييييت.........
ريم وهي تحرك يدها وباستخفاف :ويعني إذا جيتي خير ياطير..
أم ناصر:هلا وغلا بــ جودي تعالي اجلسي جنبي.
جود:يا بعد قلبي يمه هذي الناس اللي تفهم مهوب خيريا طير لو جيتي
ريم التفتت على أمها :أنا بروح لغرفتي تبين شيء قبل ما أروح
أم ناصر: لا سلامتك ..بس وين بتروحين حنا ما صدقنا تخلصين
امتحانات وتجلسين معنا واللحين بتروحين عنا..
ريم استحت من أمها :وهذي قعدة ها وش رايك ياأم ناصر
جود:هيه أنتي أنا أبي عصير برتقال فرش
ريم وتسوي روحها أنها ما تسمع:نعم أحد قال شئ أحد تكلم
جود:أي أنا أبي عصير برتقال فرش
ريم وهي تناظر يدين ورجلين جود:هذا يدينك ورجليك سليمين ما فيهم شيء
وأتوقع أنك تعرفين طريق المطبخ هذا هو قدامك
روحي وهاتي لك اللي تبينه
جود:بس عصيرك يمدحونه
أم ناصر:جود ودنا بعصير بس من إيدينك أنتي روحي هاتي لك ولي ولأختك.
ريم:ما أبي أخاف أتسمم لو شربت شيء من يدينها
جود:لا تخافين لو تسممتي أقرب سيارة إسعاف تجي تأخذك
والتوصيل عندهم بالمجان والإقامة عندهم بالمجان بعد ..
أم ناصر:يله جود بلا كثر حكي وروحي هاتي العصير
جود: ثواني ويجي أحلى عصير لأحلى خديجة أم ناصر وباست أمها على خدها وراحت المطبخ
^^^^^^^^^
كان جالس في غرفته وبيده أوراق يراجع حساباتها تذكر كل الأحداث اللي صارت لهم في الفترة الماضية
لما عرف أن خالهم سرقهم وهرب
خالهم اللي طول عمره
ساكن معهم وأكل وشرب معهم ومن أكلهم وعاش نفس
عيشتهم يدير بعض أملاكهم طول عمره يسمع أمه
تحذر أبوه من أنه يتعامل مع خاله هذا بالذات
وتحتفظ بالأسباب
لكن خاله هذا ذكي وخبيث
يعرف يلف ويدور ويأكل عقل اللي قدامه بأفعاله وتصرفاته وكلامه
وفوق كل هذا حويط من الدرجة الأولى قدر يحول لحسابه
من المحل اللي يديره مبلغ على
دفعات بدون ما يأخذ هو وأبوه أي خبر
كان يفكر بعمق لأن الأيام تمضي وهو إلى الآن لم يحرك ساكن
ويوفي لأبوه الوعد بأن يرجع المبلغ اللي سرقه خاله مع أن أبوه قال له لا يتعب نفسه
لكنه ماراح يرتاح إلا إذا عوض الخسارة
&&&&
تعبت من كثر التفكير الأسبوع اللي تجي فيه أمها تزورهم يعتبر من أثقل الأسابيع
لأنها تعيش في دوامة كبيرة أسسها أمها وأبوها هذي نهى بنت
خلود تزوجت أمها
بعد طلاقها واستقرت بعد زواجها
وجابت ولد وتعيش عيشة هادية وهانئة
وكذلك أبوها اللي تزوج بعد زواج أمها وجابت زوجته عيال
واستقرت حياته وصارت هي ضحية طلاقهم وكرههم لبعض
تعيش عند جدتها في بيت خالها أمها تزورها من فترة لفترة وما إن أمها تمشي تروح لبيتها
إلا يدخل الحنان فجأة لقلب أبوها يجي يأخذها تجلس يومين عنده ويفتح معها صفحات تحقيق
أمك أيش قالت لك وأمك أيش عطتك
أمك تكرهني وتعلمك تكرهيني
ونفس الشيء الأسئلة نفسها تكررها أمها لها
كرهت حياتها والسبب دوامة أمها وأبوها اللي عيشوها فيها
قررت ترتاح من هالتفكير اللي سيطر عليها وتروح لبنات خالها تجلس معهم
راحت أولالــ لينا لكنها شافتها تذاكر فما حبت تضايقها فقررت تروح لــ لمى النايمة وتصحيها
...لمووووو يله أصحي
لمى:أفففففففف منك خليني أكمل نومي
نهى:طيب ما شبعتي نوم من الظهر وأنتي نايمة
لمى:أفففف منك يعني شايفتني مثلك نايمة طول اليوم ولا
مداومة وجاية تحسديني على كم ساعة نمتها
نهى:قومي ملانة وأبيك تجلسين معي.....بنزل تحت واتبعيني لا تتأخرين على
رجعت لمى تنام وغطت نفسها بالبطانية
لكن نهى انتبهت لها وجرت البطانية منها ...يله قومي بلا كسل واتبعيني لأجيب لك كوباية ماي وأكبها على راسك
نهى يمه منك يا شريرة هذاني قمت يله
نزلت نهى تحت وشافت مي تلعب لوحدها :ميونة وين الماما والجدة
مي:ما أعلف كلهم راحوا بله "ما أعرف كلهم راحوا بره "
نهى بنت حزينة وهادية تعيش حياة قلق وتوتر ومذبذبة بين أمها وأبوها
أحيانا لما تكون مع لمى تتحول إلى شخصية مرحة
%%%%%
سمعت خطواته على الدرج وعلى طول وبدون مقدمات
: ياربي ظلمت الصالة
ريم:وأنتي أبد ما تتركين حد في حاله
ناصر :قصدك نورت الصالة
أم ناصر:إلا نورت الصالة بجية ناصر شيخ الشباب
جود: القرد بعين أمه خخخخخ
أم ناصر:قص بلسانك استحي على وجهك هذا أخوك الكبير
ريم: هزئوها خخخخخخخخخخخ
جود:أففففف كلكم علي
ناصر قرب منها وبهمس:صيري عاقلة ومؤدبة ولسانك هذا لا طولينه ويصير الكل معك مهوب عليك
جود وتبي تقهره:كح كح يمه ألحقيني أحس باختناق كح كح
أم ناصر خافت عليها: بسم الله عليك يا بنتي ..افتح يا ناصر الباب أو النافذة خل الهواء يدخل
ريم:يمه اتركيها تراها كذابة
ناصر:حرام جود ارحمي بيتنا من صواريخك ترى اشوي والسقف بيطيح علينا
جود:سخيفين
ترن ترن ترن جرس الهاتف
ناصر:سمعتم هذا الدليل
راحت جود وهي تركض قبل لا حد يرد قبلها
ريم :اشوي اشوي ما حد يلحقك ولا حد راح يرد قبلك
المتصل وبصوت مرتفع :ألو من يتكلم
جود :ألو هلا أنتي من بقيتي وهي ما هي قادرة تميز صاحب الصوت
بس توقعت من ارتفاع الصوت أن أحد من أهل أمها بس كيف يكونون من أهل أمها
والمتصل يكلمها بالعربي
المتصل وبنفس الارتفاع: أنا أم بندر أمك في
جود:هلا خالتي أنا جود كيف حالك ومن وين تكلميني
أم بندر وهي مازالت رافعة صوتها: أنا في بيتي
جود:بس ليه أنتي رافعة صوتك
أم بندر:خير أيش تقولين ما أسمعك زين والتفتت على بندر اللي رافع صوت التلفزيون ويتابع المباراة
وط على التلفزيون خل اسمع زين
بندر:وأنتي يمه ما حلا لك تكلمين إلا وأنا أتابع المباراة وطاه أقل بشوي ورجعت أمه تكلم
هلا جود أيش كنتي تقولين قبل شوي
بندر لفت انتباهه اسم جود وكتم صوت التلفزيون وأخذ يسمع المكالمة
جود:ليه كنتي رافعة صوتك
أم بندر:الله يهدي بندر يتابع المباراة وهو رافع الصوت وما خلاني أسمعك زين إلا كيف حالك وإخوانك وأمك
جود:كلنا طيبين وبخير الله يسلمك وكيف حالك أنتي
أم بندر:الحمدلله طيبين ...أمك قريبة منك
جود:أي لحظة ......نادت أمها وجات لها
وهي تناولها السماعة :هذي خالتي أم بندر تكلمني وهي رافعة صوتها اللي يسمعها يقول أنها تكلم من أمريكا
ماكأنها تكلم من بيتها اللي هو جنب بيتنا ولا يبعد إلا خطوتين
أم ناصر: عيب عليك يا بنت استحي على وجهك ...هلا والله وغلا بهند كيف حالك وحال بندر
أم بندر:الحمد لله حنا طيبين وبخير ... إلا أخبارك أنتي وأخبار أبو ناصر عسى تصلحت الأحوال
أم ناصر مهي عارفة ترد وتفضفض لأن البنات جنبها :أحوالنا مثل كل يوم
أم بندر:يعني كيف
أم ناصر:بعدين أقول لك
أم بندر:وليه ما تقولين اللحين
أم ناصر وهي عارفة أن أم بندر ما راح تتركها إلا لما تعرف كل شيء :أنا مشغولة اللحين والعيال جنبي
أم بندر :صرفيهم
أم ناصر:ما أقدر
أم بندر:طيب أنتي قومي عنهم
أم ناصر:بعد ما أقدر راح يحسون بعدين إذا صرت الحالي كلمتك يله مع السلامة
أم بندر:مع السلامة وتراني بنتظرك لا تتأخرين على
والتفتت على بندر اللي جنبها: ليه كلفت على نفسك وكتمت الصوت يعني تشوفني أكلم وترفع الصوت على حده
بندر:يمه وأنتي ما يجي وقت مكالمتك إلا لما أجي أشوف التلفزيون
أم بندر:وأنت ما توك قلت أنك راح تطلع مع طلال
بندر:أي بس ما أعرف وشو اللي أخره ...بروح أكلمه عن أذنك
*****************
نزلت لمى وشافت نهى جالسة بالصالة تقلب في قنوات التلفزيون....
يعني صحتيني من نومي ونزلتيني وفي الأخير نجلس نقابل التلفزيون وين أهل البيت فيه
نهى وهي مازالت تقلب في القنوات:لينا تذاكر والباقي ما أعرف وين راحوا
لمى وعينها على التلفزيون: خلي على الأغنية ذي
خلت نهى على الأغنية ورفعت الصوت ولا حسوا إلا باندماجهم معها ودخولهم الجو وبدأوا يرقصون
%%%%%%%%%
كان شايل الحارة بصوت هرنات سيارته طلع من بيتهم وشافه واقف عند بيت بندر
أنا من أسمع ذا الهرنات أقول طلول عندنا بالحارة ..وأنت يا أخي ما تجوز عن حركاتك
طلال :هلا ناصر يا أخي خل ولد جيرانكم يغير طبعه يحرك أعصابي يله يطلع
جاهم بندر وشافهم واقفين
رفع ناصر راسه وأخذ يناظر السماء
اليوم الشمس من وين طالعة ........أخيرا تنازلت وحنيت علينا وطلعت من بيتكم
طلال:تو بدري كان ما جيت هذا وأنا مكلمك قبل ما أمرك
بندر :خلها على ربك يا ناصر حدي مشغول ..يله أمش معنا يا ناصر بنروح نغير جو
ناصر:لا أنا بروح المحل تجون معي
طلال وبندر في نفس الوقت:لالالالالالالالا
ناصر:ول من قلبكم تقولونها .....ليه طيب
بندر:اللبيب بالإشارة يفهم
ناصر:ههه على العموم أنتم الخسرانين .....وإلا هذا جزاي أبي أعلمكم صنعة تفيدكم
طلال :صنعة تفيدنا وإلا تذلنا في محلك مع السلامة يا ولد الخال
راح طلال مع بندر "طلال صديق بندر وفي نفس الوقت ولد منى أخت سلمان أبو ناصر"
ناصر راح سيارته وهو غارق بالضحك
لأنه تذكر أنه مرة أخذهم معه للمحل وكرفهم بالشغل خلاهم يراجعون الحسابات و جرد المحل مرتين معهم
لحد ما خلاهم يكرهون الشغل والروحة للمحل
%%%%%%%
حس بإزعاج غير طبيعي في البيت وصوت التلفزيون واصل عنده في غرفته
ما تحمل الإزعاج وراح يشوف أيش صاير نزل وشاف المشهد
الصالة كانت على قدم وساق بنتين يرقصون والثالثة أصغرهم بكثير تحاول أنها تجاريهم وتقلد حركاتهم
وأما الرابعة واقفة عند الدرج تحاول أنها تسكتهم
لينا:أفففففف منكم أسكتوا وأقفوا عن المهزلة ذي خلوني أعرف أذاكر
لمى:كيفي اليوم عيدي ما صدقت أخلص امتحانات ووسع صدري وانبسط تجييني وتقولين لي طفوه
لينا:طيب أنتي ما تعرفين تنبسطين إلا في وسط إزعاج
نهى:أنتي ما تعبتي من المذاكرة خذي لك فترة راحة وتعالي معنا انبسطي أشوي والمذاكرة تراها ماهي طايرة
لينا توها بترد إلا سمعت صوت تصفيق ::ياسلاااااام عليييييييكم وين حنا قاعدين فيه تظنون نفسكم
بس أنتم اللي في البيت بس فضحتونا عند الجيران
حنا اللي عمرنا ما طلع صوتنا عند سور البيت واليوم أنتي وإياها فاضحينا
انصدموا لما سمعوا صوته وشافوه قدامهم وبصوت واحد رياااااااااان هذا أخر ما يتوقعنه
بسرعة نهى حطت شالها على راسها وتغطت
أما لمى من تأثير الصدمة حطت يدها على فمها ولا قدرت تقول أي شيء
ريان:طفي التلفزيون بسرعة لأجي أكسره على راسكم هذا ويأشر بيده عليها هي ونهى
وأنتم الكبار تسون كذا ما خليتم شيء للصغار ويأشر بيده على لينا ومي
راحت لمى طفت التلفزيون وهو ماشي راجع لغرفته بنات أخر زمن
لينا عطتهم نظرة سخرية ومشت عنهم
ألتفتت لمى لنهى هذا من وين طلع
نهى هزت إكتوفها يعني ما أدري
لمى:ما قلتي أنهم ما هم موجدين
نهى:يمكن هو في غرفته بس حنا ما درينا عنه ....يا ربي فشلة
لمى وهي تجر نهى :عااادي ..قومي نروح نتسلى في شيء ثاني فيني وناسة أبي أطلعها
نهى :وأنتي ماتوبين
لمى :كيفي .... يله تعالي
لمى بنت مرحة وفرفوشية وإجتماعية
لينا شبيهة ريان منظمة ودقيقة وهادئة عندها الدراسة أهم شيء في حياتها
^^^^^^^^^^^^^^^
كان في محله يراجع الحسابات ويدقق فيها من بعد ما سرقه نسيبه وهو ما يثق في أي أحد
سمع تليفون المحل يدق فرفعه:ألو هلا
المتصل:السلام عليكم ممكن أكلم أبو ناصر
أبو ناصر:وعليكم السلام معك بوناصر ...بس ولو مؤاخذة من معي
المتصل :معك أختك بدرية
أبو ناصر................؟؟؟؟؟؟؟؟