نور في درب الثأر - الفصل الأول - بقلم لصمتي حكايه | روايتك

بين عايلتين قديم، من عهد الجدود، قام ثار ما انطوى… ثارٍ قديم هدّ الركايز وكسّر هيبة كبار القوم، ما خلّى بين القلوب غير الجمر والضغينه… ثارٍ دمر عايلتين كبار، فرّقهم وصار كل واحدٍ منهم ما يشوف الثاني إلا خصم، دمٍ بدم، وحقدٍ ما برد سنينه… بنتٍ مثل القمر، تخجل العيون لا شافتها… حُسنها ما ينقاس ولا ينحكى، كأنها نورٍ يشقّ عتمة ليلٍ حالك… طلّتها تسرق النظر، وهيبة جمالها تسكّت الكلام، كنها ضيٍّ لاح في دجى، يحيّي الروح بعد ما كانت ضايعه… الكلام يعجز لا جيت أوصف زينها، والعين من هيبتها تخجل لا طاحت بعينها… هي نور صبحٍ لا لاح، يبدّد ظلام الليالي، وإن طلّت، تضيّ الدنيا ولو كانت عتمه حوالي… اسمها نور، واسمٍ على مسمّى، طلتها ضيّ، والقلب لا شافها تهنّى… ~~~~~~~~~~~~~~~~~~~~~~~~~~~♡ يهابه الكلام قبل لا ينقال، وطبعه شين ما هو بهيّن… جماله ربّاني، لكن طبعٍ فيه شدّه وحدّة سنين… ما يعيد كلمته مرتين، لا قال قالوا: سمعًا وطاعة، هيبةٍ تمشي معه، وسكته أبلغ من ألف عبارة… وهالهيبه ما جت من فراغ، ولا هي طبعٍ عابر، خذها من طفولته، يوم فقد أغلى غالي، ومن يومها وهو يشيل الحزن ويخفيه ورا صمته… فارس… واسمٍ يدلّ على عزّه وقوّته