الفصل 1
Part 1
في مخطط يجمع أربع بيوت وبين كل بيت بداخله باب يفصل بين هذه البيوت حتى يتيح لهم دخول البيت الآخر دون الحاجه للخروج إلى الشارع
وفي كل بيت منهم يجمع عائلة افرادها لا تعلم عما يدور في الخارج من حريه
.
.
.
.
في بيت من هذه البيوت
بيان سألت بإستغراب من اختها الي لابسه عبايتها ومغطيه وجهها بطرحه ومغطيه نفسها من فوقها لتحتها ومو باين منها شي حتى عيونها وكفوفها
: هي بنت وين رايحه ؟
لفت بدور لأختها : وين بروح يعني لغير بيت عمك ؟!
بيان : كان قلتي لي اروح معك والله طفشانه ، بعدين انتي غبيه بتروحين بدوني ؟ والله لو يشوفك ابوي طالعه لوحدك ينحرك وينحرني معك ، اصبري بلبس وبجي معك
بدور تأففت بصوت مسموع : افففففف وش هالتخلف والعيشه
بيان بلا مبالاه لحديث اختها وتصعد الدرج واردفت بإبتسامة سخريه : مسويه انك كنتي عايشه بتفتح وترفيه من انولدتي للحين ، هه
جلست بدور تنتظر اختها تنزل وهي طول الوقت كانت تفكر
نزلت بيان واتجهوا لبيت عمهم
بدور بهمس : اقول بيان !!
بيان : هممممم
بدور : انا فكرت في شي يطلعنا من الي حنا فيه
بيان : وشهو ؟! مع اني اعرف ان ما عندك ما عند جدتي
بدور تجاهلت سخرية اختها : شرايك نقول لأبوي اننا نبي نروح نزور امي واذا رحنا مانرجع ونظل عند امي ، واذا يبي عنده المحاكم واكيد حنا الي بنربح القضيه لأن الخيار لنا نعيش عند امي ولا ابوي
بيان شهقت : وش تقولين انتي !! انهبلتي !!
بدور : و الي يعيش مع اهلك يظل فيه عقل اصلا ؟! والله اتمنى اني صرت بنت عمي عبد الرحمن ولا ع....
بيان ضربتها على يدها تبيها تسكت لانهم دخلوا حوش بيت عمها وكان ولد عمها ( سلطان ) جالس برى
نزلوا روسهم وبسرعه دخلوا للبيت ومنها لغرفة بنت عمهم ( وجدان )
كانت وجدان جالسه ترسم بطفش
لفت على صوت فتحة الباب وشافت بنات عمها داخلين عندها : مداهمه هي مداهمه ؟ ترى من الادب طق الباب
فتحت بدور الغطا بقهر من ردة فعل اختها على كلامها : كلي تبن انتي الثانيه
وجدان لفت لبيان : وش فيها ذي قافله معها ؟!
بيان وهي تخلع البسوس : تخيلي وش تقول لي !! تقول نروح نزور امي وبعدين تلعب على ابوي ونعيش معها ولا نرجع
وجدان بتأييد : احسن لكم ، على الاقل انتوا عندكم حل لهالسجن الي عايشين فيه موب انا !!
بيان : ومواقفه على غباءها بعد !! انتي تدرين أن حنا مسموح لنا نزور امي مره بالشهر بس ، لو سوينا كذا مستحيل يسكتون عنا ابوي وجدي وبياخذونا غصب واكيد بيحرمونا من امي
سكتت وجدان شوي وبعدها همست بأسف وهي تناظر بدور : صح كلامها
بيان ابتسمت بألم لبدور : خلك على مجنونك لا يجيك الي اجن منه
وجدان : اصلا حنا متعودين على الحياه ذي ولا عمرنا فكرنا نتخلص منها لان مافي حل ، بس انتي وش الي خلاك تقولين هالكلام ؟
بدور بغبنه : لان حنا صايرين جهلاء ما نعرف عن شي بزمنا هذا ، ولما البنات يتكلمون عن البرامج والسفرات والبلدان والافلام احس نفسي طالعه من كهف مدري عن شي ولا اعرف شي ، اذا بالله عليك حتى النت ما وافقوا يجيبوه الا عشان البحوث والمشاريع " ابتسمت بسخريه " ولا ومن زود الثقه يجلس يفتش على السجل يتأكد اذا كنا دخلنا مواقع من هنا ولا هنا ، وجوالاتنا كل يوم يفتشها عشان يتأكد اننا مو محملين البرامج الي عند اخوي
وجدان تنهدت بضيق : كل الي ساكن هنا سوا وكلنا مثلك
بدور : لا بنات عمتي مب كذا مب مثلنا
بيان : مثلنا بس اشوى منا لان زوج عمتي الله يرحمه كان يعزز في عمتي ثقتها ببناتها ، يعني الفرق بيننا وبينهم هي الثقه
وجدان : لو تثق فيهم كان سمحت لهم يشاهدون افلام او يحملون البرامج هذا اقل شي
بدور : ضحكتيني ، تبيها تثق فيهم ، خلهم يوثقون في العيال عشان يوثقون فينا ، اجل عمرك شفتي رجال وش طوله وش عرضه وابوه مسوي له حسابات في البرامج بس عشان يراقبه !! ولا ساعات يمسك جواله دون علمه يفتشه ، ولازم يكون عارف الرمز ، مين الي يسوي كذا ؟؟ البنات الحين ومايسوون لهم كذا فما بالك العيال !!
وجدان انسدحت على السرير وهي تاخذ نفس : اتمنى اني اروح اعيش في بيت عمي عبد الرحمن
بيان : نفس كلام الخبله ذي
.
.
في بيت بعيد عن بيوت ابطالنا لكن له علاقه قويه بينهم الا انه يوجد خلاف بينه وبين احد من اصحاب احدى هذه البيوت
ساره : يبه تكفى تكفى اعزمهم والله مشتاقه لهم
عبد الرحمن ( ابو مشاري ) : والله لو علي كان عزمتهم بس الخوف يوصل خبر لجدك
ساره : يبه ترى جدي يدري انك كل فتره والثانيه تعزم عمومي وعمتي بس يسوي نفسه مايدري
ابو مشاري : عارف هالشي بس خايف بعد سكوته هذا يقول لهالوضع ستوب
ساره : يبه يلا يلا عاد ، ما اشتقت لأخوانك ؟
ام مشاري بعد صمت طال : اعزمهم ي ابو مشاري شوف كيف البنت متشفقه على بنات عمومها
ابو مشاري سكت شوي : خلاص تم
ساره نقزت وهي تصرخ : ييييسسس
مشاري الي توه داخل وسلم على راس امه وابوه : وش فيها ذي !!
ام مشاري ابتسمت له : ابوك بيعزم عمومك
مشاري : انا بس ابي اعرف شي واحد ، انتي كيف تقدرين تسولفين مع بنات عمومك وهم مو نفس جوك ولا يعرفون الي انتي تعرفيه ، شلون تقدرين تتواصلين معهم !!
عبد الرحمن بحده : مشاري
مشاري رفع حجاجاته : ماقلت شي ، بس يعني هذي الحقيقه
عبد الرحمن تنهد : الله يسامح ابوي بس
مشاري : والله اني اشفق لحال عيال عمومي ما كأنهم عيال مو عاطينهم الحريه ولا الثقه
ساره : والله البنات الي المفروض تشفق لحالهم ، والله مظلومين مره ، ارحمهم ، الحمدلله أن ابوي متفتح
عبد الرحمن نزل راسه وتكلم بصوت واطي : تفتحت بس خسرت ابوي ورى تفتحي هذا
مشاري سكت شوي وتكلم بسرعه يبي يبعدهم من هالجو : الا وين فروس وهنوي ؟! ام مشاري : من صبح الله طالعين ، رايحين المنتجع مع اخوياهم
مشاري : على طاري المنتجعات ودي اضبطكم كذا برحله لمنتجع مع خالاتي وخيلاني
ساره كشرت : مانبي خيلاني بس خالاتي
مشاري : هي وش الي ماتبيهم ، استحي على وجهك
ام مشاري : وهي صادقه مانبيهم ، بس حنا وخواتي ، وخلي خيلانك كل واحد منهم تحت باط زوجته
مشاري بضحكه : افا يمه ، ما توقعتك كذا
ام مشاري : شوف خذها من الاخر اذا بتعزم خيلانك روحوا لحالكم وخلنا انا و وخياتي كل وحده ببيتها
مشارك ضحك : خلاص ولا تزعلون ي بنات ساره ( جدته ) مانبي اخوانكم بس انتوا
ام مشاري هزت راسها برضا : اي ودور لنا واحد كبير وحلو ، مب الي وديتونا له اخر مره خرابه !!
مشاري اشر على خشمه : على هالخشم ، امري تدللي انتي بس ، الا صح يبه متى بتعزم عمومي قلت !!
ابو مشاري وقف : يوم السبت ، بعزمهم على عشا ، يلا انا راكب انام ، وقولوا لفويرس وهوين لا رجعوا شغلهم عندي ، اجل ساحبين على المدرسه عشان المنتجع !! لا وبآخر سنه ، اوريهم شغل الله باكر
ساره : عادي يبه اليوم الخميس مافيها شي
ابو مشاري خزها وقمطت
ام مشاري صدت تسوي نفسها ما تسمع وساره ومشاري كاتمين ضحكتهم على امهم الي ما ترضى على فارس وهاني
.
.
في بيت منصور ( ابو سلطان )
بعد ما طلعوا البنات من عند وجدان نزلت للصاله وشافت اخوها سلطان جالس على جواله
ابتسمت إبتسامة خبث ومشت له وجلست جنبه بتمسكن : سلطان
سلطان : هممممم
وجدان : ابي اطلب منك طلب ممكن !!
سلطان رفع راسه لفوق ياخذ نفس ولف لها : على حسب الطلب
وجدان رفعت يدها وهي تقيس اصبعها بأصبعها الثاني : صغير مره هالقد
سلطان : طيب اطلبي
وجدان تلفتت تتأكد محد موجود يسمعها وبعدها قربت من سلطان تهمس بإذنه : ابيك تعلمني على الاستنا ( الانستا ) ، سمعت البنات اليوم يتكلمون عنه وتحمست ابي اتعلم عليه
سلطان طالعها : اولا اسمه انس...
وجدان بسرعه سكرت فمه : وجع قصر صوتك لا يسمعنا ابوك
سلطان بعد يدها وهو يقصر صوته : اولا اسمه انستا موب استنا ، ثانيا دامك خايفه ليه تطلبي هالطلب !! ثالثا وش تبي فيه انتي وابوك مايسمح لك تحمليه ولا عمي وعمتي يسمحون لبناتهم يحملوه ، وش تسوي فيه
وجدان تنرفزت : اففففف بتعلم عليه بس كذا ، حتى هذا بتحرموني منه بعد
سلطان كسرت خاطره بس مايبي يبين لها وتكلم من طرف خشمه : طيب رحمتك تعالي هنا بعلمك
وجدان ابتسمت ابتسامه عريضه وقربت منه وبدأ يعلمها عليه
وجدان باسته على خده بقوه : شكرا شكرا شكرا ي احلى اخو بالدنيا ذي كلها
سلطان وهو يفرك خده بألم من بوستها القويه : طيب العفو بس اهدا من كذا
وجدان ضحكت وهي توقف بفخر : من قدي تعلمت على الاستنا
سلطان ضحك : انستا انستا لا تفشلينا
وجدان مدت لسانها بفشله : الي هو
سلطان : ترى اسمه انستغرام بس انستا اختصار له
وجدان بعدم مبالاه : المهم اني تعلمت عليه
ركبت وجدان وهي فرحانه وشافت اخوها علي مار وجلست تلعب بشعره ومشت وهي تضحك
علي جلس يحب يده وجه وظهر : الحمدلله والشكر
نزل وشاف سلطان : وش فيها اختك ذي !!
سلطان بإبتسامة : علمتها على الانستغرام وفرحانه المسكينه
علي ابتسم وماعلق وبعدها تذكر شي : عمك عبد الرحمن عازمنا بعد يومين
سلطان : ما شاء الله وش المناسبه !!
علي : مدري والله بس شكله اشتاق لأخوانه
سلطان : يجوز
.
.
.
انتهى
رد مع اقتباس
#4
قديم 17-08-17, 06:48 AM
الصورة الرمزية فيتامين سي
فيتامين سي فيتامين سي غير متواجد حالياً
مراقبة عامة ومشرفة منتدى الروايات المنقولة
الشخصيات
.
.
الاب والام ' صالح ' و ' فوزيه '
عندهم ٤ ، ٣ اولاد و بنت واحده
عاشوا في زمن قديم غير عن الأزمان الحديثه مثل كل الأجداد ولكن ذولي مختلفين
ربوا أولادهم على تخلف كبير خوف من زمن عيالهم الي يخوف بالنسبه له وفي بداية حياة عيالهم بعد ماتزوجوا تحكموا بتربيتهم لعيالهم لين ما بدأ تخلف ابوهم ينزرع فيهم وربوا عيالهم على هذا التخلف عدا أصغر عيالهم الي ما قبل بهذا التخلف وهذي الحياه وطلع عن السير وابوه قال إنه تبرأ منه بس هو بين فتره والثانيه يرسل عياله يزورون جدودهم ويعزم اخوانه واخته
.
.
الابن الاكبر : منصور ( ابو سلطان ) شديد بس حنون نوعا ما مع بنته الوحيده
زوجته : وفاء ( ام سلطان ) حنونه مره ومو عاجبتها عيشة اهل زوجها بس متحملتهم وما تقدر تكلم زوجها لأنه بسرعه يعصب على هذا الموضوع
سلطان : عمره ٢٧ حنون مره وطيوب ومزوح وعلاقته مع أخته قويه كثير موظف في فندق لأنه درس فندقه
علي : عمره ٢٥ غامض شوي وهادئ ويحب يقرأ كتب ويألف اشعار وما يخالف ابوه في ولا شي ، صح انه ما يوافقه بس بعد ما يرفض طلبه وكل هذا عشان يتفادى الهواش مع ابوه واحترام له ، موظف في مصنع اقمشه
وجدان : عمرها ١٨ في ثالث ثانوي هي وبنت عمها وعمتها في فصل ومجننين المدرسات ، مرحات وخبلات مره وهي ما تعرف تفرق بين حمد ولد عمها ونواف ولد عمتها وولا تعرف حتى عيال عمها عبدالرحمن وهذا حال كل بنات العايله مايعرفون عيال عمهم والعكس صحيح بما انهم ولا مره اجتمعوا فيهم
.
.
الابن الثاني : زهير ( ابو حمد ) شديد مره ومتسلط ومايهمه مصلحة بناته حتى لو كان عارفها بس اهم شي يمشي الي براسه
طليقته : مروى ( ام حمد ) حنونه مره وتحب عيالها كثير كثير وتطلقت لأنها ما تحملت تعيش هذي العيشه وكانت تبي تاخذ عيالها معها تربيهم مثل ماتبي هي بس الجد وعياله ماخلوها وسمحوا لعيالها يزوروها يوم في الشهر ، وهي عايشه في بيت ابوها وامها المتوفين وجالسه في بيتهم مع عائلة اخوها الي يحبوها مره
حمد : عمره ٢٥ هذا رجال كل طالع بما أن ابوه قليل يشوفه ف يفتكره جالس مع عيال عمه ولا يسأل عنه ، بس الشي الي محد يعرفه انه في هذي طلعاته كل جالس مع امه وحتى خواته ما يعرفون ، موظف في شركة مقاولات
بيان : عمرها ٢٠ تخرجت من الثانويه وجلست في البيت مانعينها تكمل دراستها لان البنت عار وعيب تدرس في جامعه وعيب تشتغل وتختلط بالرجال ، عقلانيه وتحكم عقلها كثير وماتحب تطلع عن شور ابوها عشان لا يصير شي لا يحمد عقباه
بدور : عمرها ١٨ بنفس مواصفات بنت عمها وجدان بس هي متمرده اكثر وتحب المغامرات والتحديات بس ما يحصل لها الا في المدرسه الي كل يكتبونها تعهدات ويكتبون لها إحضار ولي امر وهي تفرح عشانها بتشوف امها جايه المدرسه وساعات تفتعل المشاكل عشان بس امها تجي
.
.
البنت الثالثه : سعاد ( ام نواف ) تزوجت وكان شرطها تسكن في بيت ابوها وزوجها وافق وصارت تغذي زوجها بكلام ابوها واخوانها لين ما زوجها اقتنع وصار يطبق هالشي على عياله بس كان عاطنهم ثقه ومايفتش وكانوا أهله دائما يعارضوه ويهاوشوه أن عياله بيتعقدون وكذا بس هو كان يتجاهل ولما توفى انعدمت الثقه في سعاد وصارت مثل اخوانها على عيالها
نواف : عمره ٣٠ مايفكر يتزوج الحين وهو الي يصرف على أهله ويحب خواته كثير ويدلعهم بس مو ذاك الدلع بما أنه تحت جناح اهل امه ، ومواصل لأهل ابوه ويحبهم ، موظف في شركة عمه
نوف : عمرها ٢٢ دائما تستخف بتفكير خواتها وبنات خالها بس داخل نفسها تتمنى تكون نفسهم بس ماتدري ليش ما تقدر وبعض الاحيان تمسك معهم خط
سندس : عمرها ١٨ طبعا صديقة وجدان وبدور فطبعا بتكون مثلهم لكن تميل لشخصية وجدان اكثر
ريتاج : عمرها ١٧ في ثاني ثانوي خبله ودائما مع اختها سندس وبنات خالها بس خبالها ورباشتها اركد منهم بكثير
.
.
الابن الرابع : عبد الرحمن ( ابو مشاري ) طيوب طيوب مره وعايلة زوجته وعيال اخوانه واخته كلهم يحبوه لأنه حبوب ومزوح ومايقصر على عياله بشي وخصوصا حنين
زوجته : جميله ( ام مشاري ) طيبه مره وتحب اهل زوجها بس ما باليد حيله وفلاويه بقوه وماترضى عن عيالها التوأم
مشاري : عمره ٢٣ هذا انسان فاهي بقوه وكل طالع مع اخوياه وما يجلس في البيت ابد ويحب يلعب بأعصاب اخته ساره ويموت على اخته حنين ويدلعها كثير بس برضو يحب يناقرها يدرس في جامعة البترول اخر سنه له
هاني وفارس : توأم متشابه كل واحد نسخة الثاني عمرهم ١٨ في ثالث ثانوي كل جالسين يعلبون على السوني أو جالسين يشاهدون انمي في غرفتهم أو طالعين مع اخوياهم أو يهاوشون ساره وهذي حياتهم
ساره : عمرها ١٧ في ثاني ثانوي هذي انسانه فاهيه مثل مشاري بس في نفس الوقت دلوعه واي شي تسويه ينقلب ضدها
حنين : عمرها ٥ سنوات في الروضه بس عقلها كبير ، محبوبة عائلة امها ، الكل يحبها ويدلعها والكل يموت عليها وعلى لسانها الطويل وكل تجلس مع العيال عشان كذا الكل يحب يناقرها