أرواح تسكن مشارق الشمس لا تحجبها سحائب اليأس - الفصل 4 | روايتك

الجزء الرابع السبت الـ 7:00 صباحا صباح جديد و إشراقه لشمس على أرجاء الدنيا تبعث الأمل والحب والنشاط في سكان الأرض و تحثهم على العطاء و العمل بكل إخلاص لرؤقي بأوطانهم .... كل شي رجع مثل ما كان في البيت نواف رجع لظهران أمس بالليل و سط دموع أمه وجدته و دعواتهم له فهد و منال بها لوقت في المدرسة ما في بالبيت إلا هي و جدتها صاحين و أمها إلي دخلت تنام بحكم إنها قضت ليلها بالبكاء على رجوع نواف صباح اليوم غير على هند من صلت الفجر ما رجعت نامت حست بنشاط عجيب يسري بجسمها نزلت تجلس مع جدتها و تأخذ أخبارها .. أم محمد\ وش فيها بنتي اليوم ما نامت زين ؟ هند\ لا حمد لله جدتي نمت زين أمس نمت من بدري يمكن الساعة 11 وأحس اني شبعانه نوم أم محمد\ الحمد لله خوفي إن بك شي و ماتبين تقولي لي هند\ وأنا اقدر اخبي عليك شي الله يهديك بس ما في إلا العافية لا تشيلين هم أنتي أم محمد\ زين والله اجل قوميني أطلع بالحوش بمشي بالشمس قبل تحمى عليه وأنا جدتك قامت هند تسند جدتها \ بمشي معك اليوم إلا جدتي ما قلتي لي لسى تحسين بوجع بركبك ؟ أم محمد\ والله يا بنيتي يروح ويرجع شكله إلا من هالمكيف إلي شغال ليل نهار هند\ لا جدتي مكيف غرفتك أنا مهديته لك اقل درجة لكن البلاء من السيراميك إلي يمسك البرودة وأنتي تمشين عليه بأذن الله اذا كتب لي وظيفة وجاني راتب افرش لك الغرفة بفرش أحسن لك أم محمد\ يالله يأرب كان طيور الأرزاق مع هالصبح طارت تكتب لبنيتي فيها الرزق إلي يغنيها ويشغل وقتها و يستر عليها هند\ أمين يأرب إيه هذي الدعاوي إلي تفتح النفس مع هالصبح ...... ************** الخبر الساعة 7:30 صباحا فسيارة سعود الوضع متأزم مثل كل يوم سبت في دوامهم ... يوسف\ يا أخي بفهم ليش تخلينا نداوم أول ناس أنت مفكر حنا حراس الأمن وإلا عمال النظافة إحنا مهندسين فاااهم ايش يعني مهندسين سعود حفظ هالاسطوانه كل سبت فقرر يتجاهله و يغير السالفة : تبي فطور قبل نوصل الشركة أوقف لك ؟ يوسف\ توها ماما سعود معطيتني كوب حليب و شابورة شبعان سعود\ ههههههههههه تطنز أنت وجهك لا والله أمر لك تأخذ سندوتشات فطاير شي يوسف\ وأنت ؟ سعود\ لا الحمد لله ألان شبعان لجعت أرسل و احد من عمال النظافة يجيب لي من الكفتريا إلي برا يوسف\ أجل لأرسلت لك احد خله يمر ع مكتبي مالي نفس الحين سعود\ إن شاء الله يلا وصلنا أنزل يوسف وهو يطالع ساعته ويحطها قدام عيون سعود\ ثمان إلا عشر شوف قبل الدوام بعشر دقائق قول بس وش أسوي امسح الممرات يعني ؟ سعود وهو كاتم ضحكته على شكل يوسف المعصب : لا مسح مكتبك يومين و الغبار عليه خخخخ يوسف\ امش بس امش شكلك اليوم مصبح على وجه بنت من ورأي سعود وهو يمشي لداخل الشركة و يتذكر الحلم إلي صحاه من الفجر والبنت الصغيرة بحضن أمه صحيح وجه أمه كان تعبان لكن ملامح البنت و ابتسامتها وصوت أمه تقول له هذي ملكك يا سعود خلته يا خذها بحضنه و يمسح على رأسها بدون ما يسال أمه ليش تعبانه ؟ و كيف جاته هالبنت ؟ : الله يرزقني يا أخي ....... ****************** غطت عيونها بيدها من حرارة الشمس صحيح الوقت لسى بدري و الساعة تسع الصباح لكن هذي هي شمس الصيف بجده حرارتها تبدأ من شروقها لغروبها \ جدتي قومي ندخل حرقتنا الشمس أم محمد\ أي والله يا بنيتي خليني ادخل اغسل لصلاة الضحى وأنتي شوفي أمك أخاف إلا ضغطها ارتفع وهي نايمه هند\ لا إن شاء الله ما عليها شر بس هي تعرفين ما نامت أمس زين بطريق هند و جدتها للبيت و قريب من الباب إلي كان مفتوح سمعوا صوت التلفون يرن والي نادرا ما يدق الصباح و مايكون إلا من مدرسة منال أم محمد\ روحي يمه شوفي من عسى أختك ما صار لها شي ضيق خاطرها هند و ببالها الله يستر \ إن شاء الله راحت هند الصالة تجري بتلحق التلفون و يدها على قلبها يأرب ما صار لمنال شي يأرب رفعت الخط على أخر رنه وهي تلهث \ الوو المتصلة \ السلام عليكم هذا بيت هند محمد الـ ....... هند\ و عليكم السلام إي أنا هند أي خدمه المتصلة\ أنتي مقدمة عندنا على وظيفة في وحدة الرعاية و جأت من نصيبك لان معدلك ممتاز مع باقي المتقدمات ياليت تشرفينا بكرة لجل نجرب شغلك و نوقع معك العقد إذا الله كتب هند بلحظة ما عرفت شو تقول ما بين فرح وأمل جديد أشرق قدامها قدمت أوراقها بكل مكان مستشفيات مراكز تأهيل دور رعاية جمعيات خيرية لدرجة إنها نست تقريبا نص العناوين إلي قدمت فيها \ عفوا أختي ممكن تعطيني العنوان بتفصيل و رقم تلفونكم و بكون بكرة عندكم بأذن الله المتصلة\ اوكيه خذي العنوان شارع الـ ……. سجلت هند العنوان ورقم التلفون بورقة وشكرت المتصلة بلطف وسكرت منها و الفرحة ما هي شايلتها أخيرا بعد كم سنه دراسة بعد ليالي قضتها سهر وتعب تنتظر هذا اليوم أخيرا بتحس نفسها إنسانه تعطي و تنجز في هذا الوطن والاهم عندها بتغير روتين حياتها و تقضي على الملل و الفراغ إلي تعاني منه شافت جدتها واقفة بأول الصالة تطالعها بحيرة وقلق توها دعت لي قبل ساعة و استجاب الله دعائها هذا هو رزقي أنكتب لي به اليوم قربت منها مبتسمة و باستها على رأسها : استجاب الله دعائك يالغالية هذا رزقي أنكتب لي و بكرة بروح و إذا ربك كتب وقعت معهم العقد أم محمد وعيونها تدمع بفرح\ الحمد لله الحمد لله يا يمه الله ما يخيب عباده الصابرين الله يكتب لك فيه الراحة و الرزق الحلال هند\ أمين يا نور البيت بس ليش الدموع تكفين امسحيها خليني افرح بدون ما أشوف دموعك مسحتها أم محمد بطرف شيلتها \ هذي دموع الفرح يا يمه أنا فرحانة لك وأنا أشوفك مبسوطة هند\ الله لا يحرمني منك يالغالية قولي أمين أم محمد\ أمين يأرب ولا منك أنتي و إخوانك يا نظر عيني هند\ اجل أنا بطلع أصلي لي ركعتين اشكر ربي على فضله وأمر على أمي و ابشرها تبين شي يا الغالية أم محمد\ لا يمه سلامتك بروح أصلي الضحى وادعي ربي لين أمك تنزل تحت . هند\ زين الله يتقبل منك ......... ***************** بالخبر الساعة 10:30 صباحا واقف من خمس دقائق على الباب يطالعه و هو ما رفع رأسه عن مكتبة و أوراقة هذا أكثر شي يعجبه في يوسف حرصه و جديته بعملة صحيح يمل و يتضايق من قومت الصبح بدري لكن من يدخل المكتب ينسى كل شي و يخلص عمله بكل أمانه ...... سعود\ يا أخي في بنت بريطانيه وقفت على باب مكتبك ربع ساعة وش تبي ؟ يوسف بعد ما نزل النظارة إلي يستخدمها لما يقرءا و أعطى سعود نظرة بطرف عينه ورجع يقلب أوراقة : روح اسألها ما هو أنت إلي شفتها ؟ سعود\ وأنت ما شفتها يعني ؟ يوسف\ إلا و قالت لي تبي المهندس المزيون إلي عندنا قلت لها ما اعرفه سعود\ كان خليتها تجي عندي طيب شوف وش زيني أكيد تقصدني يوسف\ أقول شكل ما عندك شغل و جاي تزعجني عندي شغل روح مكتبك وبعدين بنت وش يدخلها عندنا يا أخي هذا المبنى سعوده بالكامل ما تشوفه كئيب و مظلم بدون بنات سعود\ ههههههههه كل هالا نوار و مظلم الله يهديك قم خلنا نفطر و نرجع نكمل شغل يوسف\ ليش ما بترسل ذاك الهندي غفور مدري وش اسمه يجيب لك ؟ سعود\ لا أخذت إذن من رئيس القسم نفطر و نرجع نفسي مفتوحة للأكل و أبيه حار ما يجيبه غفور إلا و برد يوسف وهو يوقف ويحط جواله و محفضته بجيبه\ يابعد قلبي والله و اخذ لي إذن معك و جالس ساعة تهذر على راسي قم خلني أشم هواء و أكل بنفس سعود\ تعرف ما اقدر أروح مكان إلا معك تصدق ما اتهنى بالأكل إلا وأنت تأكل منه يوسف\ هههههههه حرمتك على غفلة سعود بضحكة بدون نفس\ هههههه بنروح الكفتريا إلي هنا و راي شغل كثير والله يوسف\ ماشي على أمرك يا عم ..... راحوا سعود و يوسف يفطرون وكل واحد شايل بقلبه هم الدوام متى يخلص و يرجع البيت ينام و يرتاح .... ******************* جده الساعة 8:20 مساء جالسة على سجادتها بعد ما صلت العشاء و بيدها المصحف سمعت دق على الباب خلصت الآية و سكرت المصحف : ادخل دخل فهد و سكر الباب و راه : خلصتي صلاة ؟ هند وهي تنزل شرشف صلاتها و لفته مع السجادة : إيه خلاص خلصت بغيت شي ؟ فهد\ إيه بسالك من بيوديك بكرة ؟ هند\ أبو منذر من غيره دقيت عليه و بيجيني الصبح بعد ما يوصل بنته الجامعة فهد\ و الله مدري وين نروح بدون هذا الرجال هند\ أبو منذر جارنا من زمان و يعرف ابوي من أول ما تزوج أمي و سكنوا هنا يعني يعرف البئر و غطاءها فهد\ الله يجزاه خير إلا معك فلوس تعطيه على المشوار ترى أخر مرة يوم رحت معه اشتري أغراض البيت حلف ما يأخذ مني شي هند\ لا تخاف بعطية قبل أروح بعدين أغراض البيت تشتريها معه وقت هو ما يروح يشتري أغراض بيته يعني ما يحسبه عليك مشوار لكن أنا يحسبه علي ترى هذا رزقه هو و عياله يا فهد ( أبو منذر جار بيت أبو نواف و تقريبا في عمره كان يشتغل بوظيفة حكومية لكنه اخذ تقاعد مبكر واشتغل على سيارته ليموزين و صار يوصل أهل بيت أبو نواف وين ما طلبوا و مرة كان يأخذ عليهم حق المشوار و مرات ما يأخذ إلا من هند إلي تحلف عليه يأخذ الفلوس قبل ما تطلع مشوارها ) فهد\ أنتي من يقدر عليك حتى أبو منذر يقول لي أختك تعطيني الفلوس و هي ما ركبت السيارة ودي أقول لها ما اني أخذها و أنتي زي بناتي لكن أخاف أنها تبطل من مشوارها هند\ هههههه يقولك كذا فهد\ إي والله كم مرة قالي لحظة صمت هند ببالها عارفة إن فهد جاي يسال عن شي غير كذا و متأكدة كمان هو عارف إن ما احد يوصلهم غير أبو منذر لكن بتخليه براحته لين يقول إلي بخاطرة بالجهة الثانية فهد ماهو عارف كيف يبدأ و يسألها مهما كان هو الولد و هي البنت لكن تضل هي أخته الكبيرة ما يبي يقول لها شي يضايق خاطرها لكن هي شرفة و عزه مايبي يوصلها شي يمس عفتها و طهرها تشجع و بلع ريقه \ هند هند\ لبيه فهد\ لا تفهميني غلط لكن أبي أتطمئن عليك المركز إلي تشتغلين فيه في معكم رجال ؟ هند ابتسمت و كأنها تأكد له أنها مرتاحة لسؤاله و كانت محتاجه حد يسألها و يحسسها بخوفه عليها \ تبي الصراحة في و ما في فهد\ كيف ؟ هند\ المدير رجال وفي قسم مخصص أو دور كامل للمرضى الرجال لكن أنا اشتغل بقسم كله حريم موظفاته و المرضى فيه و مالي دخل في قسم الرجال ولا أشوفهم هم فوق و إحنا تحت فهد\ كذا ارتحت هند\ ليش أبو الشباب ما أنت واثق في أختك فهد\ إلا والله لكن تعرفين حاجة في نفس يعقوب قضاها هند\ زين دامك ارتحت قوم افتح كتبك أحسن لك أبي أشوفك دكتور فهد\ هههههه أنتي من تبين تشوفين دكتور أنا و إلا منال حددي هند\ ههههههههه لا انتم الاثنين فهد وهو يوقف بيروح غرفته\ زين بروح أذاكر عشان أصير لك دكتور مخ و أعالجك هند\ ههههههههههههه ليش وش شايفني خبله وإلا مجنونه ؟ فهد\ لا متقلبة ههههههههه هند\ الله يسعدك بس سكر الباب معك فهد رافع حواجبه\ طرده ذي ؟ هند\ ههههههههههه محترمه بس طلع فهد من عند هند إلي طالعت السرير من الفجر صاحية ولا نامت شكله مغري بحجم التعب إلي تحسه حتى الغرفة ثلج من المكيف تمددت عليه و تغطت ما كان عندها وقت تحلم و تتمنى أو حتى تخطط لبكرا غمضت عيونها و استسلمت لنوم بهدوء ...... *************** الخبر الساعة 10:00 مساء الهدوء في الشقة شبه قاتل حتى التلفزيون صورة بدون صوت و سعود جالس قدامه لكن عيونه تطالع الفراغ و تفكيره بجده عند أمه إلي كل يوم يكلمها لكن ما يرتاح إلا لما يشوفها و يبوسها و يشم ريحتها و أخواته و مشاكلهم أم فارس و طيبة قلبها إلي تسبب لها مشاكل حتى مع زوجها إلي يشكي دائم من سذاجتها و تصديقها لكلام الناس عنه وعن أهله و أم عزام إلي مصائبها و لسانها محد يسلم منه لا قريب ولا بعيد الكل يبعد عنها و يتقي شرها حتى زوجها اليوم يوسف نائم ببيت أهله بعد ما اتصلت عليه أخته المغرب تبيه يجي بسرعة أكيد صاير بين أمه و أبوه خلاف الله يهديهم خمس و ثلاثين سنه لهم متزوجين ما فهموا بعض و المشاكل كل يوم تكبر بينهم و يدفعون ثمنها عيالهم تنهد من خاطرة على الأقل يوسف أهله قريب منه و متى ما اشتاق لهم راح يشوفهم و يتطمئن عليهم لكن أنا بيني و بين أهلي مشوار أكثر من ألف و خمس مئة كيلو ما بينا إلا تلفون الله يسرها علي و يعيني على هالغربة و يرزقني ببنت الحلال إلي تريحني و تطعمني الذرية الصالحة أبتسم و هو يتذكر و جه البنت إلي شافها بحلمه يا الله شو حلوه لو فعلا تصير بنتي ضحك على حاله و وين وصل به تفكيره قام سكر التلفزيون و دخل غرفته ينام و يرتاح لدوامه بكرة ......... أمانينا بـ ليل الغربة حلم ,, تصحى معه طيور الأمل ,, بجناحها كل الألم ,, وتغريدها ترانيم تنشد لنا أحلا ,, نغــــــــم