الفصل 2
البــــــــــــــــــــــ ـــــ الثـــــانـــــي ـــــــاراتـــ
في بيت ابو زياد ع الغدا
زياد وهو مبتسم: اقول عبير
عبير: نعم
زياد: كيف خطر ببالك الي سويتيه بالموظفين اليوم والله انا ماخطر ببالي غير انك بتفصليهم
عبير بلامبالاه: والله انا قلت لكم عاقبوهم وانتم الي رفضتم
ابو زياد وهو مبتسم ويكلم ام زياد: والله لو شفتي وجيه الموظفين
زياد وكأن منتظر احد يذكره ضحك بكل صوته ومسك على بطنه من الضحك
ام زياد: وش السالفة شوقتونا
عليا: ايه والله قولوا وش صاير
حكى ابو زياد الي صار
عليا: بل بل كل ذا سويتيه حشى مو بنت
عبير: وش قالولك ولا تظنين كل الناس مثلك رقيقات
زياد: وهي صادقة انا وانا رجال ماأظن تخطر في بالي الي سويتيه لو ظليت افكر سنة
ابو زياد: هذا ان دل يدل على ذكائها وخبرتها وفطانة عقلها وان الله اخذ اماانته راح اكون مطمن بوجودها بالشركة
عبير: بعد عمر طويل ان شاء الله
ام زياد بعصبيه: وش جاب سيرة الموت الحين
ابو زياد: الموت علينا حق وان طال الزمن والا قصر بنموت
زياد: محد قال غير كذا وقال يغير الموضوع عبير من الموظفين الجدد الي عينتيهم وكيف من غير مانوقع على اوراق قبولهم
عبير: ههههههه حبيبي انت وقعت على اوراقهم وابوي واعمامي بعد وقعوا
ابو زياد: متى صار وكيف وقعنا واحنا ماندري
عبير: الله يسلم لي عقولكم قبل شهرين اجتمعت فيكم وقلت لكم اني محتاجة موظفين زيادة لقسم المحاسبة سألتوني ليش قلت اني احتاجهم لاتمام حسابات المشروع الي هو مشروع الجمعية الخيرية وانتم وافقتم والعقد كان لمهلة معينة يعني عند انتهاء المشروع يقبضون وينتهي عملهم لكن الي كان مكتوب بالاوراق الي وقعتم عليها انه عقد لمدة سنتين وبما انهم كانو امينين معي في تنفيذ المشروع ابيكم تاكدون توظيفهم في الشركة
زياد: يعي كذبتي علينا
عبير هزت كتوفها: لمصلحة الشركة ولو كان عندي الدليل الملموس كنت خبرتكم بس لاني ماكنت املك الا شكوك متاكدة منها
ابو زياد: عملتي عين العقل يايبه والله انك رفعتي رأسي
زياد: الله الله الحين بس عبير الي ترفع راسك اجل خلها هي الي تسافر وتنجز لكم اعمالكم
ابو زياد يبرر: هي رافعة راسي بس انت ذراعي اليمين الي مقدر استغني عنه
عبير وهي توقف عن طاولة الطعام: الحمد لله ومشت بعدين التفتت اقول زياد اذا تبيني اسافر بدالك ترى ماعندي مانع واقدر اسوي الي تسويه واكثر بعد
زياد: اقول ترى عطيتك وجه زيادة روحي نامي احسن الظاهر الي سويتيه اليوم ماثر على عقلك
عبير: مافي شي ياثر على عبير وعمري ماسويت شي وطلع فيه غلط حتى لو بسيط وبهمس محد سمعه غلطت مره ومابعيدها
ام زياد: خلك من الثقة الزايدة وتصرفات المرجلة الي تسوينها
عبير: والله يايمه لولا ثقتي بنفسي وتصرفات المرجله اللي تقولينها كانت الشركة الحين على المحك وفي وضع يرثى له
ابو زياد: وانا اشهد
ام زياد: ايه شجعها بدال ماتنصحها
عبير: يمه الله يهداك وانا ايش سويت ومشت طالعه لغرفتها فهي بعد الي سوته اكيد محتاجة للراحة خصوصا ان صار لها شهرين ماذاقت الراحة
في بيت ابو ماجد ع الغدا
طبعا اليوم العيله ماعندها غير عبير والي سوته )))والله حاااااله
ابو ماجد: والله اليوم فاتكم نص عمركم
ماجد: ليه يبه وش صار
ابو ماجد: بنت عمكم اليوم سوت الي مايسؤونه عشر رجال
مرام: عبير
ابو ماجد: اايه عبير من فتره اكتشفت ان الشركة تعرضت لاختلاس
ماجد: كم المبلغ
ابو ماجد: خمسة ملايين
ام ماجد بدهشة : خمسة ملايين وكيف وضع الشركة الحين
مشعل: خمسة ملايين وانتم وين
ابو ماجد: والله احنا نايمين ولولا عبير كان احنا الحين مفلسين
مهند يتريق: وش سوت بنت العم
ابو ماجد بعصبية: بنت العم لها اسم المهم اكتشفت المختلسين وراقبتهم بكميرات فيديو واليوم جمعتهم وعرضت لهم فعايلهم ع شاشة العرض والله لو شفتم وجيههم وضحك
ماجد: وش سويتم فيهم
ابو ماجد: تركنا الامر لعبير عطت كل واحد اكثر من كف
مهند بصدمة: ضربت رجال
مرام: لا بنت عمي اكيد جنت
ابو ماجد: والله عملت عين العقل لا وسلمتهم للشرطة مع الكميرات
مازن: يخلف عليهم بخير دام عبير بالسالفة
مرام: وانت صادق والله
ابو ماجد: انتم لو سمعتوها وهي تقول ويقلد صوتها والله لاخليهم يحرمون يدخلون مكان عبير تمشي فيه
الكل مات من الضحك على ابوهم
ماجد بضحكه: والله هالعبير مو سهلة ابد
ام ماجد: والفلوس قدرتم تاخذونها
ابو ماجد وكانه تذكر: اايه بعد لو شفتوها وهي تقول الفلوس بحساب من فيكم واخذت بطاقته واعطت زياد وقالتله يحولها لدار الايتام
ام ماجد: الله ماشاء الله عليها عبير بكل شي شاطرة
مازن وهو يوقف: مرام تلعبين معي بلستيشن
مرام: اقول ولي عني بروح انام راسي يعورني
ام ماجد بخوف: وش فيك يمه
ماجد: اوديك المستشفى مرامي
مرام: لالا مافيني شي بس صداع بنام شوي واصير تمام
ابو ماجد: البنت مافيها الا العافية روحي نامي يبه
مرام: يالله عن اذنكم
ام ماجد: اكيد انتي بخير
مرام وتضم امها من ورى: والله مافيني الا العافيه
ام ماجد: طيب يمه روحي نامي
مرام: صحيني المغرب عندي امتحان وطلعت
البيت الكبير
ابو فهد: والله ورفعت رؤؤسنا الله يبيض وجهها
ام فهد: هذي ماهي سوات مرره ايش لها بتصرفات الرجال
خالد: يمه والله انه مافي مثل عبير الله يحفضها
ابو فهد: تستاهل مكافأة والله
ام فهد: ماخرب البنت الا انتم
خالد ماكان حاب يتغدا والغدا كان باقي ماجهز فحكى لهم اللي صار لان ابوه سال ولا هو ناوي ينام
بعد ماحكى راح نام وترك النقاش بين والديه مستمر
في بيت ابو زياد في غرفة زياد بالتحديد الساعة خمس العصر
زياد صحي على صوت تلفونه
زياد بصوت نائم:الووو
: صحى النوم يالكسلان
زياد: انت وش تبي فيني حتى نومي ماتخليني اكمله
: اقول لا يكثر نص ساعة وانا عند الباب ياويلك اذا ماشفتك واقف مستنيني
زياد: خلاص خلووود بطيت اذني اسكت
خالد: طيب يالحبيب شوي ومارك سااااااااااااامع
زياد وبعد السماعه عن اذنه: وجع انشاء الله لعدوينك وش فيك قلنا خلاص باخذ دش وانزل زين
خالد: ايه الحين انتي شطوره يالله حبيبتي اذا عطيتك رنه انزلي
زياد بتريقة: ان شاء الله حبيبي
خالد بضحكه: يالله باااااي
زياد: باااي
زياد قام اخذ له دش ونزل ينتظر عمه شاف امه وابوه بالصاله
زياد: السلام عليكم
ابو زياد: هلا وش فيك كان احد ملطشك
زياد بقهر من خالد: والله من اخوك النشبه حتى النوم مايرتاح الا اذا ازعجني مادري وش سويت له
ام زياد: من حبه لك
زياد: والله لمصلحته
خالد: احم احم
ام زياد ضبطت طرحتها: تفضل ياخالد حياك
دخل خالد:السلام عليكم
ابو وام زياد: وعليكم السلام
خالد: كيف حالك ياام زياد
ام زياد: بخير عساك بخير انت وش اخبارك وش اعلومك وايش اخبار الوالد والوالدة صار لك فتره ماتمر
خالد: العذر والسموحة ام زياد والله مشاغل الدنيا ويلتفت ع زياد كيفك حبيبتي
زياد ينعم صوته: هلا حبيبي انا تمام انت كيفك
خالد: من شفتك ياقلبي وانا بخير
زياد: حبيبي انت وش رايك نطلع
خالد: انتي تامرين امر والله يالله عن اذنكم
ام وابو زياد وهم ميتين من الضحك عليهم: اذنكم معكم
في السياره
زياد: ممكن اعرف مصحيني من النوم وين بتوديني
خالد: وش فيك حبي بنروح نتمشى
زياد: انطم
خالد: افااا انا خلودي حبيبك تقولي انطم
زياد: خالد والي يعافيك ودييني كوفي ابي قهوه راسي راح يتفجر
خالد وبدا الجد: ليش من متى نائم
زياد: عقب الغدا
خالد: طيب وماكفاك
زياد: الا بس مصدع
خالد: والله انا جوعان وابي اتغدا
زياد: ليش جدتي وينها عنك
خالد: امي صحتني للغدا وانا رفضت لاني كنت نعسان
زياد: الا اخبار جدي وجدتي صار لي يومين ماشفتهم
خالد: بخير يسئلون عنك المهم الحين بتتغدا معي ولا لا
زياد: لا تطمن بتغدا حدا يحصله عزيمة غدا ويرفض
خالد يتغشمر: ومن قال اني عازمك حبيبي كل واحد يدفع عن نفسه
زياد: اجل انا مابي
خالد: بكيفك وصلو للمطعم وتغدو وطلعو صلاة المغرب صلوا وراحو يتمشون
في بيت ابو ماجد ام ماجد طلعت تصحي مرام دخلت الغرفة
ام ماجد: حشى مو غرفة ثلاجة وتوجهت للمكيف وطفته وبعدها توجهت للسرير تصحي مرام مرام يمه قومي وصارت تهزها من كتفها مرام مرام قومي يمه الناس صلو وانت نائمه
مرام: طيب طيب ورجعت تغطت
ام ماجد سحبت البطانيه: يالله بسرعه مو عوايدك تنامين لها الوقت
مرام: يمه والله مو قادره اقوم يمه اتركيني
ام ماجد بخوف حطت ايدها تتحسس حرارة بنتها: يمه بنتي انتي حرارتك مرتفعة قومي بسرعة صلي وانا بكلم ابوك او اخوك نوديك المستشفى
مرام بسرعة: لالالا مافيني الا العافيه الحين اتروش واصير زينه
ام ماجد: طيب قومي واذا مانزلت حرارتك يكون بمعلومك بوديك غصب عليك
مرام وقامت بصعوبه ودخلت الحمام وامها طلعت اغرفتها
مرام: وش فيني اففف وش هالصداع والدوخه ياربي ودخلت تحت الدش وبعدها طلعت لبست وصلت ورتبت كتبها واخذت الي عليها فيه امتحان ونزلت الصالة لقتها فاضيه جلست ع الكنبة وفتحت الكتاب تبي تذاكر بس داهمها النوم بسبب حرارتها المرتفعة
شوي ودخل ابو ماجد وماجد ومشعل ومهند ومازن
مازن اول ماشافها ركض لها: مراااااااامي
مرام فتحت عيونها بصعوبه وطالعة في مازن ورجعت غمضت
مازن : مرام خلاص يكفي نوم قومي وحط يده على خدها وصرخ على دخلة ابوه واخوانه للصاله
ماجد: خير ليش تصارخ
مازن ويأشر على مرام: مرام
ابو ماجد: وش فيها مرام واقترب الكل منها
مازن بصدمه: حاااااااااره
ماجد حط ايده يتحسس: مشعل بسرعة جيب مفتاح السيارة من فوق وانت وياشر لمازن جيب عبايتها بسرعه
ابو ماجد: مرام مرام يبه ويضرب ع خدها بخفيف مرامي مرام
مرام وتحاول تفتح عيونها: هههممم
ماجد: مرامي فتحي عيونك حبيبتي
ابو ماجد: مرام يبه فتحي عيونك الا وبدخلت ام ماجد
ام ماجد اول ماشافتهم متجمعين حولها خافت: وش فيها يمه بنتي
مرام تحكي بصعوبه: مافيني شي
ماجد: لاتخافين يمه بس حرارتها مرتفعة شوي وبوديها المستشفى الحين
ام ماجد: انا قلت لك من الاول خلينا نوديك بس انتي الي عندتي الله يهديك
ماجد: ليش من متى حرارتها مرتفعه
ام ماجد: مدري بس انا طلعت عندها اذان المغرب لقيتها مصخنة قلت خلي ابوك او اخوك يودينك المستشفى بس هي عندت وقالت مافيني شي الا وبجيت مشعل ومازن
ماجد: بسرعة روح شغل السيارة يمه ساعدي مرام تلبس العبايه
ام ماجد ساعدت مرام وماجد حملها وطلع فيها المستشفى مع مشعل
وصلو المستششفى وماجد حمل مرام ونزلوا ومشعل تقدم يطلب نقالة مع ان مرام جسمها صغير وسهل حملها
وصلت النقاله واخذوها لداخل
الدكتور: وش فيها
ماجد: حرارتها مرتفعة
الدكتور شاف الخوف بعيون اخوانها وحب يطمنهم: تطمنوا انشاء الله مافيها الا العافية
ماجد ومشعل اكتفوا بهز روسهم
الدكتور راح وبعد ساعة من قلق وخوف اخوانها طلع الدكتور
ماجد وهو يجري للدكتور: هاه دكتور طمني
الدكتور: تطمنوا قدرنا ننزل حرارتها احمدو ربكم لو تاخرتوا بعد شوي كان لاسمح الله صار معها تشنج او حتى جلطة
ماجد: الحمد لله يعني الحين صارت تمام
مشعل: تقدر تطلع
الدكتور: الحمد لله الحين تمام وتقدرون تخرجونها بس بكرة لازم تراجع
ماجد: انشاء الله اقدر ادخل واشوفها
الدكتور: ايه تفضلوا ودخلوا اول ماشافوها صارو يتحركون بخطوات سريعة
مرام وهي تضحك عليهم: وش فيكم ترى انا مو طايرة
ماجد وصل عندها وضمها لصدره: الحمد لله ع سلامتك يالغالية
مرام: الله يسلمك
مشعل يباعد ماجد ويضمها: خوفتينا عليك
مرام: لو ادري اني غالية هالكثر عندكم كان مرضت من زمان
ماجد: لا والله يعني انتي ماتدرين انك غالية
مرام: الا ادري بس حبيت اتغلى
مشعل: الظاهر اعجبتك جلست المستشفى وماتبين تطلعين
مرام بفرح: يعني سمحو لي اطلع
ماجد: اوووه نسيت اتصل ع الي في البيت اطمنهم طلع جواله ودق انتم اجهزو وانا انتظركم برى
مرام: حاظر بابا وضحكو كلهم وطلع ماجد وبعد شوي طلعوا مرام ومشعل
ماجد: خلاص نمشي
مرام: ايه بابا
ماجد وهو يضحك: مرامي تقدرين تمشين ولا اشيلك
مرام بسرعه: لا لا اقدر
مشعل: يالله امشوا وطلعوا بعد ساعة الا ربع وصلو البيت ونزلوا ودخلو البيت مازن اول ماشافهم ركض وضم مرام
مازن وهو يبكي: مرام انتي بخير صح
مرام وهي تشد على ضمته: ايه حبيبي انا بخير شوفني مافيني الا العافيه
مازن بعد شوي من حضنها وظل يتأملها: طيب ليش مارديتي علي لما كنتي نائمه ع الكنبة
ماجد: كانت تعبانة شوي والحين صارت بخير اقوى منك بعد
مازن بفرح طفولي: ههههههههاي لا هي بنت يعني انا الاقوى
ام ماجد بقلق: وشلونك يمه الحين وش قالو لك
ماجد: مافيها الا العافيه بس خفضو لها حرارتها وكتبو لها شوية ادوية شريناها وجينا مرامي يالله ع غرفتك لازم ترتاحين
ابو ماجد بشك: اكيد انتي بخير يبه
مرام: والله بخير لا تشغلون بالكم فيني
ابو ماجد وهو يحب ع راس بنته: انشاء الله تكونين بخير يالله ع غرفتك والعشاء بيوصل لعندك
ماجد حمل مرام: لو بستناكم لتخلصون كلامكم راح تنتكس لازم ترتاح
مرام: طيب نزلني انا مو عاجزه
ماجد: مرامي عارف انك قادره بس حاب ادلعك
مرام وتمسكت فيه: اذا كذا يالله
الكل ضحك عليها وماجد طلعها وحطها ع تختها وغطاها بالبطانية
مرام: شكرا
ماجد: العفوا ماسويت الا الواجب وبعدين انا كم مرامي عندي
مرام بثقة: وحده ومافي غيرها ولا مثلها بالدنيا
ماجد: اكيد مافي الا انت بس ارتاحي الحين وانا بروح اجيب لك العشاء
مرام: ماابي بس ابي انام
ماجد: لا مايصير لازم تاكلين عشان تاخذين الدواء
مرام: ماجد والله مو مشتهيه
ماجد: اقول يالله بلا دلع واكل راح تاكلين ان قلتي ايه وان قلتي لا
مرام: طيب بس بشرط
ماجد: امري تدللي
مرام: تتعشى معاي تعرف اني مااحب اكل بروحي
ماجد: بس كذا من عيوني وطلع يجيب العشاء
في بيت ابو زياد ع العشاء
عبير: اقول زياد انت الحين كملت 27 سنة ودخلت28 ماتبي تتزوج انت وعمي
ام زياد تتريق: طالعو من يتكلم
زياد: انا ادري انتي تزوجي وماعليك مني
عبير بقهر: الحجة مو عليك ع الي شايل همك انت وعمك عساكم لا تزوجتوا
زياد: والله انا للحين مادخلت هالسالفة براسي اذا دخلت دخلتها براس عمي وتزوجنا سوا الا وبدخلت خالد
خالد: انا ياليت تلغيني من حساباتك
زياد: والله انا اقول اذا دخلت براسي
خالد: والله دخلت ولا مادخلت انا مابي اتزوج
زياد: ولا انا
خالد: انت فيه امل تتزوج بس انا لا ومن سابع المستحيلات
ابو زياد: طيب ليش ماتبي تتزوج ليش تبي تحرمني شوفة عيالك قبل مالله ياخذ امانته
خالد: عمرك طويل انشاء الله وجعل يومي قبل يومك
عبير: لا تتعب نفسك مع هالاثنين والله بيشيب راسك وانت باقي مااقنعتهم
خالد: انا زواج مابي اتزوج ابي اظل اعزب حر خالي من القيود طول عمري وممكن تسكرون السيرة لاني مليت تكفيني حنت الوالد والوالدة
ام زياد: معاهم حق حرام عليك تحرمهم من شوفة عيالك
خالد: تبوني اتزوج وانا مابي تبوني اظلم بنت الناس معي
عليا: تبوس ايدها مقلب الي بتاخذك
خالد: شي معروف بس انا مابي ولا بنت بحياتي
عبير: لا يالواثق
زياد: وحد يحصلة خلوووود
ابو زياد: والله لو ودي ازوجكم محد بيوقف بوجهي لا انت ولا هو والتفت لعبير بخبث اقول عبير بكره ايش
عبير: يوم الجمعــــــــــــــــــــ ـــــه في البيت الكبير
ابو زياد: الاربعاء
عبير: ايه يبه
ابو زياد: اجل انا اشوش الوالد عليكم ونشوف من فيكم يقدر يقوله لا
خالد: انا قلت لا وبقول لا وعصب وبعدين ترى الزواج مو غصب موووووغصب وطلع
زياد: الله يهداكم تدرون انه يتضايق من هالسيرة فلا عاد تفتحونها معه وطلع يلحق ع عمه
زياد: خلووووود وقف
خالد: نعم خير وش تبي انت بعد
زياد: افا ترى السالفة كلام بس
خالد: مليت والله مليت من هالسيرة
زياد: امش نجلس وراحو جلسو في الحديقة
زياد وشاك ان في عمه شي: بسألك سؤال وابيك تجاوبني بصراحة من غير عصبية
خالد: قول وش عندك
زياد بتردد وخوف: صحيح انا مابي الزواج الحين بس بحياتي ماعصبت من هالسيرة بالعكس الكلام فيها تسلية
خالد: لانك عاجلا او اجلا راح تتزوج
زياد: وانت بعد راح تتزوج
خالد: الحين ذا هو سؤالك
زياد: لا
خالد: اجل
زياد: انت ليش رافض فكرة الزواج نهائيا مريض فيك شي ناقصك شي
خالد تنهد من قلب
زياد: وش افهم من هالتنهيده
خالد: زياد الله يخليك خل الي بالقلب بالقلب ويجرح ولا يطلع ويفضح
زياد: افا وانا زياد كاتم اسرارك واقولك على كل شي والحين بتخبي علي
خالد: ااااه اااه يازياد لو تدري بالي فيني ولو يدرون ماجابو لي هالسيرة ابد
زياد: قول ترى انا مو بس ولد اخوك انا اخوك وصديقك واعرفك زين وانت مو رافض فكرة الزواج كمبدى لا انت فيه شي مانعك قول ياخوي انت مريض ولا وش فيك بالضبط
خالد: اخ اخ انا ايامي بهالحياة معدودة وكل يوم انتظر الموت كل ليلة اقول اكيد اليوم واذا صحيت الصبح اقول اكيد هذا اخر يوم لي بكرة ماراح اصحى الا في القبر
زياد مصدوم مو مصدق الي يقوله : خالد والي يرحم والديك لا تلعب علي الحين فكني من مزحك
خالد: ياليتني العب يازياد ياليت سكت شوي وبعدها زياد
زياد بسرحاان: سم
خالد: سم الله عدوينك زياد انا وسكت
زياد: انت شنو قول
خالد: انا فيني سرطاان
زياد الصدمة مبينه بعيونه وفاتح فمه مو مصدق
خالد لما شافة مات من الضحك: زياد والله شكلك تحفة انتبه على براطيمك لاتطيح
زياد عصب: انت منتبه على عمرك وش قلت
خالد: ايه منتبه قلت انا مريض با
زياد حط ايدة على فم عمه: بس خلاص لا تعيدها ارجوك وضمه وصار يبكي مثل طفل صغير بيفقد امه
خالد: زياد انا ماقلت لك عشان تبكي انا ابيك تكون شجاع ابيك توقف معاي ابيك تقويني مو تضعفني
زياد بعد نفسه من حضن عمه ومسع دموعه: انت من متى تدري انك مريض وليش ماخبرتني ووش قالو الدكاترة
خالد: شوي شوي علي بقولك كل شي بس انت هد نفسك واوعدني انك ماتقول لاحد مهما صاار
زياد: ليش ماتبي احد يعرف ليش بتخبي ليش
خالد: الحين بتوعدني ولا ماراح اقولك شي
زياد: لا خلاص وعد انت بس قول
خالد: اسمع ومن غير بكى كانك طفل وتنهد تنهيييييده طويييله
من ست شهور تقريبا ظليت فتره الدوخة ملازمتني واحيانا افقد السيطره على نفسي ويغمى علي وبعد ساعة او ساعتين اصحى ولله الحمد ماقد جتني قدام احد المهم قررت ورحت المستشفى وسويت فحوصات واكتشفت اني مصاب بالسرطاان والامر كان متقدم وماله علاج
زياد قاطعه: يعني الحين خلاص مافي ولا علاج ابد
خالد: طيب اصبر خليني اكمل ماكان فيه الا الكيماوي الي يهد الحيل واكون تحت رحمة ربي او عملية نسبة نجاحها 12 بالمية واذا مانجحت ماراح اطلع منها واذا نجحت راح اشفى من المرض موقتا يعني ممكن يرجع مرة ثانية وانا قررت اني اخذ الكيماوي واعيش تحت رحمت ربي وهذا انا عايش عالكيماوي من سته شهور وانا استنى يومي
زياد والدمعة بعينه: بعد عمر طويل ان شاء الله اسمع انت راح تسافر معي الاحد صح
خالد: وهذي فيها كلام ولا تبي الفكة مني
زياد: لا ابيك تروح معي وبعدها نسافر بريطانيا او لندن تسوي فحوصات
خالد: لا يازياد انا خلاص رضيت بحكم ربي
زياد: اللهم لا اعتراض بس انت راح تسوي الفحوصات وبقول للاهل اننا رحنا سياحة وتغيير جو
خالد: ومضبط كل شي بعد لاياخوي نروح نوقع العقد ونرجع
زياد: انت تحلم سفر وبتسافر وتحاليل بتسوي وغير كذا ماعندي
خالد وماحب يزعل رفيق عمره: حاضر اوامر ثانيه يبه
زياد واعجبه الدور: لا يبه سلامتك
وبعدها انفجرو ضحك الاثنين