الفصل 5
" الفصل الخامس "
الصبح الساعة 8..تيي الخدامة تصحي هبة....
الخادمة:مدام هبه..مدام هبة..
هبة(تفتح عينها):نعم؟
الخادمة:مدام الساعة 8..
هبة:اوكي..زهبي الريوق عقب ساعة..
الخادمة:حاضر..
قامت هبة وراحت تغسل وجهها ولبست ملابسها الرياضة وراحت تسوي تمارين رياضية وتتمشى في الحديقة لمدة ساعة..وعقب راحت غرفتها وتسبحت ولبست بنطلون وبادي..وراحت غرفة هلا....
هبة:هلا..هلا قومي بسج رقاد..
هلا(تتغطى باللحاف):خليني ارقد..حرام عليج..امس تمينا سهرانين لين الصبح..
هبة:معليه..قومي ابيج..
هلا(تفتح عينها):خير؟
هبة:أبي اروح مركز المساج..
هلا:ليش؟
هبة:انت ناسية ان هذا من ضمن المخطط..
هلا:اوكي عطيني ساعة وبيي..
هبة:لا..الحين نروح..لازم نمشي مثل ماخططنا له..نزلي معاي نتريق ونروح..بعدين انا حاجزة لازم اروح على الموعد..
هلا:اوكي..انت سبقيني على الريوق وانا بيي..
في مكتب فهد...
فهد:اشلون يعني ماني فاهم..
يوسف:طال عمرك..انا لي راي يختلف عن راي المهندس سيف..
فهد:ليش؟..على اساس ان احنا اتفقنا في امور المشروع ومحد منكم اعترض..
يوسف:انزين الدنيا قاعدة تتطور وفي اشياء تزيد وتنقص..والمنطقة اللي قلت لك عنها هي فعلا محتاجة تغيير..وتبادل في بعض الاماكن..
فهد:معليه يايوسف..انا مومقتنع باللي قلته..اللي أبيه منك انك تسوي لي فكرتك في مخطط خاص فيك..وعقب تعال اشرح لي اياه..
يوسف:حاضر..بس متى بتكون موجود؟
فهد:انا موجود من ألحين لين الساعة 2..والعصر ماني جاي..يمكن مريت الشركة على التسع..وباجر الصبح الساعة 10 لين 12 بكون موجود..
يوسف:خلاص بحاول أخلص المخطط اليوم..تامرني بشي ثاني؟
فهد:أي..
يوسف:خير طال عمرك؟
فهد:يوسف..عندنا صفقة مع إحدى الشركات في البحرين..ومحتاجين حد يكون هو المسؤول عن هذا المشروع يعني يكون المتحدث الرسمي عنا هناك..لأني أنا مااقدر اتواجد في الفترة الجاية..والوالد مايقدر يسافر..فاأنا اخترتك انت..وابيك انت اللي تروح مكانا..ايش قلت؟
يوسف:أنا؟!!
فهد:أي..
يوسف:بس هذي مسؤولية كبيرة يااستاذ فهد..
فهد:أدري..وانت قدها يايوسف..المناقصة تم توقيعها امس والوالد راح يشرح كل شي يخص المناقصة..(يمد يده)..وهذي أوراق المناقصة..أدرسها عدل..وعلى الساعة 5 العصر لازم تكون في مكتب الوالد علشان تتفقون..
يوسف:إن شاء الله..عن اذنك..
راكان:ماشاء الله عليه..شكله واحد فاهم وذكي..
فهد:أي..
راكان:بس ايش معنى اخترتوا يوسف حق هالمناقصة؟
فهد:احسن واحد اقدر اثق فيه..
راكان:اشوفك بسرعة وثقت فيه..
فهد:والله هالريال عجيب..جربته وايد علشان جذي وثقت فيه..
راكان:قولي..انت ليش بتداوم باجر..مو على اساس باجر عرسك؟
فهد:بلا..بس في شغل لازم اخلصه..
راكان:وخالتي مااحنا رايحين لها؟
فهد:بلا..بس مب الحين خلها العصر..لأن عقب ساعة ونص عندي اجتماع مهم..
في مكتب خالد...يرن تليفونه....
خالد:آلو..وعليكم السلام....انا في الدوام.......الحين؟!!...اي بس انا مااقدر.....وايش عنده الدكتور معتذر؟..........تحملي لين الساعة 2 لأني مااقدر امرج الحين......قلت لج مااقدر.......لاطبعا مالج حق تطلعين مع حد من ربعج......قعدي ذاكري لين ماامرج...ياللا سكي وراي شغل..مع السلامة..
في بيت بويوسف....تدخل سلوى البيت مع محمد......
محمد:السلام عليكم..
بويوسف:وعليكم السلام..
سلوى(تقط الشنطة على الارض وتقعد):أفف..تعبت من الدراسة..
بويوسف:ليش يبه؟
سلوى:كل يوم كويز..كويز..ذبحونا..
بويوسف:شنو هذا كويز؟
محمد(يضحك):كويز يبه يعني امتحان..
بويوسف:شتسوين يايبه لازم تدرسين علشان تخلصين..الله يوفقج..
ام يوسف(تيي):هلا والله بعيالي..اشوفكم قاعدين شالسالفة؟
محمد:بنتج..
ام يوسف:اشفيج سلوى؟
سلوى:يمه انا تعبت من الدراسة..ودوني مكان..ابي اطلع العب اسافر..
بويوسف:وين تبين تروحين؟
سلوى:يبه ودنا حديقة الحيوان..
محمد:شالي يوديج هناك؟
سلوى:في خاطري..يبه ودنا..
بويوسف:خلاص باجر اوديكم..
سلوى(استانست)
ام يوسف:ياللا قومي الحين بدلي ملابسج علشان بنتغدى..
سلوى(خذت الشنطة وقامت):ان شاء الله..
ام يوسف:وانت محمد..ماتبي تتغدى؟
محمد:أكيد بتغدى..ولامن يفوت غداء الوالدة..
بويوسف:يوسف مارد؟
ام يوسف:لا..
محمد:تحصلونه في الدرب..
في السيارة.....
خالد:اشفيج مطنقرة؟
وديمة:مافيني شي..
خالد:لاوالله..شوفي عمرج في المنظرة وبتعرفين يعني شنو مطنقرة..اشفيج؟
وديمة:قلت لك مافيني شي..
خالد:ودوم تحجي..
وديمة:ماكو بس تعبانة من الدوام..والجو قاعد يصير حر..
خالد:عن الجذب دكتوركم كان معتذر وين تعبانة من الدوام..
وديمة:خالد اشفيها لو خذت الليسن؟
خالد(طالعها بنظرة):فيها ونص..من متى عندنا بنات يسوقون؟؟
وديمة:اشفيها لو اسوق..هذي بنت عمتي تسوق..
خالد:والله انا ماعلي من عيال عمتي ولا خالتي..انا علي من خواتي..
وديمة:ياسلام..يمكن تزوجت وحده تسوق..ايش بتسوي؟
خالد:والله مافيها خير تسوق وانا زوجها..تنسى انها تعرف تسوق..
وديمة:يااخي اشفيها..كل بنات الديرة يسوقون..وبعدين من زود طلعاتنا..كلها من الجامعة لين البيت ومن البيت لين الجامعة..
خالد(عصب):وانا مقصر بهالشي؟
وديمة:لا..بس مااحب اتعبك معاي..
خالد:شوفي وديمة هالسالفة بالذات ماابي اسمعها مرة ثانية سمعتي؟
وديمة:أي عاد ليش؟
خالد:اللي اقوله يمشي..
وديمة(طنقرت مرة ثانية ولفت وجهها صوب الدريشة)
في بيت بوعبدالله.....
عبدالله(يقوم):تسلم الايادي اللي طبخت..خوش أكله..
ام عبدالله:عليك بالعافية حبيبي..
عبدالله:حسنة ساعدي امي..
حسنة:ان شاء الله..
عبدالله يغسل يده ويروح يقعد وياكل موز....
ام عبدالله:متى بتروح تجيب اختك من الجامعة؟
عبدالله:عقب الصلاة ان شاء الله..
ام عبدالله:انزين يمه..اسمع ابي اقولك شي..
عبدالله:خير؟
ام عبدالله:احنا الليلة معزومين بيت عمك ناصر..
عبدالله:معزومين؟!!
ام عبدالله:أي يقول لام العيلة وعازمنا..
عبدالله:وان شاء الله انتوا رايحين؟
ام عبدالله:أي لازم نروح..مايصير هذا عمك اللي عازمنا..
عبدالله(ماكمل الموز وحطاه على الطاولة):يمه..روحة لبيت عمي ناصر مافي..
ام عبدالله:ليش؟
عبدالله:يمه ماابي اعيد واكرر في هالسالفة..انت تعرفين رايي..
ام عبدالله:يايمه ياعبدالله لو مارحنا ترى عمك بيسوي لنا سالفة مالها اول ولاتالي..
عبدالله:خله يسوي اللي يسويه..ياانا ياهو..
ام عبدالله:يمه عبدالله لاتعانده..
عبدالله:الا ابي اعانده..وابي اسوي اللي في راسي..يايمه هذا اللي تسمينه عمنا تراه ظلم ابوي وظلمنا احنا معاه..وروانا الويل عقب وفاة ابوي..وتبيني اخليكم تروحون لعزيمته بكل سهولة ليش؟؟..علشان باجر يسوي كل اللي في خاطره واحنا ساكتين ومانقدر نسوي له شي..
ام عبدالله:يايمه تكفى لاترفض روحتنا..مالي خلق مشاكل وحجي..
عبدالله:يمه اللي يبي يتحجى خله يقول لين مايشبع..وعمي خليه علي..انا اعرف شغلي معاه..(قام)...بروح ارتاح شوي لين الاذان..عن اذنج..
ام عبدالله:الله يهديه..بس اجيب له طاري عمه يشب نار..
حسنة:يمه انا بروح داري انام..تبين شي؟
ام عبدالله(تقعد):لا..
في بيت بوسلمان....
شيخة:أقولج وحده من رفيجاتي كانت رايحة امس ليلة حنة وحده من نسايبهم..تقولي مو ليلة حنة عرس..صارفين من القلب على هالليلة..تقول حتى كانوا طالبين مغنية تغني لهم..
وديمة:عيل في العرس ايش بيسوون؟
شيخة:تقول بييبون مغني بيغني لهم خلف الكواليس..
وديمة:ناس متفرغة..
شيخة:حتى تقول ان الريال غني وعنده خير وايد..
وديمة:تصدقين باجر معزومين على عرس..
شيخة:من عرسه؟
وديمة:مااعرفهم..بس خالد يقول انهم كانوا جيرانا من سنين..
شيخة:وين البطاقة عندج؟
وديمة:لا..تحت في الصالة..
شيخة:بتروحين؟
وديمة:مالي خاطر..بس جدتي تقولي روحي غيري جو..
شيخة:جدتج معزومة؟
وديمة:أي..
شيخة:انزين روحي معاها..
وديمة بس جدتي مب رايحة..تقول مافيني شدة اروح اعراس..
شيخة:انزين انت روحي..
وديمة:اروح بروحي وانا مااعرف حد..ماابي..ايش رايج تيين معاي؟
شيخة:فكرة..بشوف امي وبرد عليج..
وديمة:أقولج اليوم واحنا في السيارة..قلت حق خالد ابي آخذ ليسن..عصب علي..
شيخة:تستاهلين..ايش له تبين الليسن؟
وديمة:أي طبعا اللي يده بالماي ماهو مثل اللي يده بالنار..
شيخة:ايش دخل الماي والنار..يالذكية..لاتطلبين هالشي من اخوانج..صدقيني باجر بتتحسفين انج تعلمتي السواقة..
وديمة:هذا انت تسوقين..
شيخة:انا الحين متحسفة..كل ماابي شي يقولون لي عندج سيارة انت روحي قظي اغراضج..ودي اطلع مرة مع اخوي يقولي عندج ليسن روحي بنفسج انا مشغول..
وديمة:لا عاد مب لهالدرجة..
شيخة:الا لهالدرجة ونص..انت لأنج مب مجربة ماتعرفين..سمعي الحجي وخلي عنج هالسوالف اللي مامنها فايدة..وخلي اخوانج هم اللي يودونج المكان اللي تبينه..ادري انج تتضايقين علشان مرات مايودونج بس تحملي..
غانم يرد البيت...يحصل ام غانم قاعدة جدام التلفزيون....
غانم(بصوت عالي):السلام عليكم..
ام غانم:وعليكم السلام ورحمة الله وبركاته..
غانم(يقعد):ليش قاعدة جدام؟
ام غانم:ماسمعك..
غانم:أقول ليش قاعدة جدام التلفزيون..
ام غانم:مااشوف يايمه..قلت اقرب شوي..تغديت؟
غانم:لا..
ام غانم:قول حق الخدامة تنجب لك الغداء..
غانم:مااشتهي..تعبان وابي انام..
ام غانم:ليش تأخرت؟
غانم:كنت شوي مشغول..(قام)..رايح انام..
دخل غرفته وسك الباب...وفصخ شماغة وغير ملابسه وانسدح على السرير...وقعد يفكر بهمه...يرن تليفونه.....
غانم:آلو..
فهد:قوة..
غانم:الله يقويك..
فهد:وينك من الصبح وانا اتصل فيك..
غانم:كنت شوي مشغول..
فهد:غانم اشفيك؟..من صوتك في شي..
غانم:مافيني شي بس تعبان وابي انام..
فهد:وينك في البيت؟
غانم:أي..
فهد:انزين ابي اشوفك اليوم..
غانم:اليوم مااقدر..
فهد:وباجر انا مااقدر..مايصير لازم اشوفك اليوم..
غانم:صدقني مااقدر..
فهد:عيل فيك شي..
غانم:ياريال انا بخير..ان شاء الله اشوفك باجر في العرس..والحين خلني انام لأني تعبان..في امان الله..(سك الخط)
فهد(استغرب)
راكان:اشفيك؟
فهد:ماادري..اول مرة يكلمني بهالطريقة..
راكان:ياللا ننزل..علشان مانتأخر على مشاويرنا..
نزلوا من السيارة..ودقوا جرس البيت....
راكان:ليكون راقدين؟
فهد:لا مااعتقد..الساعة صارت خمس الا ربع..
جات الخدامة....
فهد:وين ماما؟
الخدامة:ماما مافي..
فهد:وين سعد؟
الخدامة:صبر شوية..
عقب دقايق.....
سعد(يسلم):أخباركم؟
فهد:الحمدلله..
سعد:مادريت انك رديت من السفر..جان جينا نزورك..
راكان:والله انا جاي على السريع علشان عرس فهد..
فهد:اقول سعد الوالدة موجودة؟
سعد:لا والله الوالدة مسافرة..
فهد:مسافرة؟!!..وين؟
سعد:راحت مع الوالد عند جدتي..لأنها شوي تعبانة..
راكان:ومتى بترد؟
سعد:ان شاء الله اليوم في الليل رادين..
راكان:واشلونها جدتك؟
سعد:والله الحمدلله..الله يعينها..حياكم تفضلوا..
فهد:لا تسلم..احنا مشغولين..الساعة جم بتوصل الوالدة؟
سعد:والله ماعندي فكرة..بس احتمال على العشر في الليل يوصلون..
راكان:يوصلون بالسلامة ان شاء الله..
فهد:انزين هي تليفونها مفتوح؟
سعد:لما ترد الدوحة تفتحه..
فهد:خلاص ان شاء الله بيكون بيني وبينها اتصال..سلم عليهم..ياللا في امان الله..
راكان:في امان الله..
سعد:في امان الله..
في السيارة..
فهد:الحين شنسوي؟
راكان:انطر لين ماترد وكلمها..ودني مكان نشرب شي حار..
في سيارة أحمد...
محمد:وين رايح؟
أحمد:بروح اشتري لي طقم غرفة نوم..
محمد:ليش ناوي تتزوج؟
أحمد:لا طبعا..مالي صار عتيج..وابي اغيره..
محمد:توك فكرت تشتري..
أحمد:الرواتب نزلت..والمحل مسوي تنزيلات خلني انتهز الفرصة..
محمد:انت ابوك عنده خير وتنتظر الراتب..صج ماعندك سالفة..
أحمد:انا جذي..بعدين تعال انت ليش ماتشتري لك طقم غرفة نوم مب انت بتتزوج؟
محمد:باشتري بس مب من هالمحل..
أحمد صف السيارة....
محمد:لانطول..علشان نروح نقضى اغراض الكشتة..
أحمد:ماشي..
عبدالله رد البيت حصل امه قاعدة تشرب شاي...
عبدالله:السلام عليكم..
ام عبدالله:وعليكم السلام..اصب لك؟
عبدالله:ياليت..وين البنات؟
ام عبدالله:كل وحده في غرفتها..
عبدالله:يمه ترى احنا طالعين نكشت يوم الخميس..من الساعة 4 العصر..
ام عبدالله:وبتباتون هناك؟
عبدالله:انا ماببات..مااقدر اهدكم بروحكم..بحاول ارد على 12 في الليل..
ام عبدالله:عاد ماابي اوصيك..دير بالك على روحك وماتسوق بسرعة..
عبدالله:ان شاء الله..
خلود تنزل....وتقعد......
خلود:يمه بنروح باجر بيت عمي؟
ام عبدالله(تطالع عبدالله وتسكت)
عبدالله:لاطبعا..
خلود:ليش؟
عبدالله:من متى احنا نروح لهم علشان نروح لهم باجر؟
خلود:انا ايش دراني قلت يمكن رايحين..علشان اشوف ايش بلبس..
عبدالله:قعدوا في البيت احسن لكم..(قام)..بروح اريح شوي..
عقب ماراح عبدالله...
خلود:يمه ليش مب رايحين؟
ام عبدالله:اخوج مب راضي..الله ياستر مايسوي لنا مشاكل مع عمج..
خلود:احسن انا من الاساس ماكنت حابه اروح بيتهم..ورفض عبدالله جى في وقته..وبعدين عمي مايقدر يسوي شي..
الساعة عشر ونص في الليل...يرن تليفون كاملة......
كاملة:يمه نور جيبي لي تليفوني..
نور:ان شاء الله يمه..(تعطيها)
كاملة:السلام عليكم..
فهد:وعليكم السلام..اشلونج خالتي؟
كاملة:الحمدلله بخير..انت اشلونك حبيبي؟
فهد:بخير الله يعافيج..حمدلله على السلامة..
كاملة:الله يسلمك..أخبار اخوك راكان؟
فهد الحمدلله بخير ويسلم عليج..تراه رد الديرة علشان عرسي..
كاملة:سلم عليه..
فهد:يوصل..أخبار ام ريلج؟
كاملة:والله شاقولك..الله يكون بعونها ويشافيها..
فهد:آمين..أقول خالتي..
كاملة:عيوني..
فهد:خالتي ترى عرسي باجر..لاتقولين انج مب جايه؟
كاملة:شاقولك حبيبي..بس انا صج تعبانة من السفر..ومن مرض عمتي ومااقدر احضر..
فهد:خالتي انا بحاجتج في عرسي..
كاملة:تسلم فديتك..الوالدة موجودة ومرت عمك موجودة..وان شاء الله ربي يهنيك ويسعدك بحياتك..هالله هالله بدينك يايمه..
فهد:لاتوصين حريص..بس خالتي تكفين لاترديني انا ابيج تكونين موجودة باجر..
كاملة:بطرش عيالي بس انا اسمح لي..
فهد:يعني ماكو فايدة؟
كاملة:صدقني لو أقدر أيي كنت بييكم على طول..ان شاء الله في الافراح الجايه..
فهد:على راحتج..ماراح اضغط عليج اكثر..بخليج ترتاحين..أكيد تعبانة من السفر......ان شاء الله......مع السلامة..
راكان:شكلها ماوافقت..
فهد(بحزن):أي للأسف..والحل؟
راكان:خل الموضوع علي..
الصبح...
يرن منبه خالد...يقوم ويروح الحمام....الجدة تقوم تزهب الريوق مع الخدامة...في غرفة خالد يمشط شعره..ويلبس الغترة والعقال ويتعدل جدام المنظرة..ويتعطر..وياخذ سويج السيارة والتليفون ويطلع من الغرفة ويمر وديمة....
خالد(يدق الباب):وديمة قمتي؟
وديمة:أي قمت..
خالد:لاتأخرين..لأني مشغول وابي الحق على الشغل..
وديمة:ان شاء الله دقايق وبنزل..
خالد نزل تحت حصل جدته قاعدة وتقرأ قرآن...يحب راسها...
خالد:صبحج الله بالخير..
الجدة:صبحك الله بالنور والسرور..أشوفك اليوم مستانس..
خالد:ادعي لي جدتي..اليوم عندي شي وايد مهم في الشغل..
الجدة:روح يايمه عسى ربي يحفظك من كل شر ويوفقك في كل خطوة تخطيها..ويبعد عنك عيون الحساد..
خالد:آآآمين..
الجدة(قامت):تعال تريق..وديمة قامت؟
خالد:أي قامت..
وهم يتريقون....
وديمة(تقعد):من مسوي عصير البرتقال؟
الجدة:انا مسويتها علشانج..
وديمة:واي فديتج جدتي..ثااانكس..مشكورة..(تشرب)
خالد:كلي شي قبل لتشربين العصير على الصبح..
الجدة:أي يمه كلي شي..
خالد(يقوم):بسخن السيارة لاتأخرين..
وديمة:اوكي..
عقب ماراح خالد...
وديمةأقول جدتي..أشوف خالد اليوم غير عن كل يوم..ايش صاير؟
الجدة:والله ماادري يابنيتي..بس ان شاء الله اشوفه دوم مستانس..
وديمة:ان شاء الله..(تاكل)
في السيارة....ومشغلين على الاذاعة...وديمة انتهزت الفرصة...والجو هادي وهم يسمعون البرنامج...عقب ماخلصت لعب بالجوال....
وديمة:خالد..
خالد:نعم؟
وديمة:أبي فلوس..
خالد:كم تبين؟
وديمة:اللي عندك..
خالد(وقف السيارة عند الكلية وطلع بوكه):هاج..
وديمة(تحط الفلوس في بوكها وتاخذ شنطتها وكتبها وتنزل):مع السلامة..
خالد:مع السلامة..
وكمل دربه...وشوي يسمع المذيع وهو يقرأ مسجات الناس....سمع هالمسج....
أهدي وردة الصباح إلى أغلى وأحن أخو بهالدنيا..خالد..وأبي اقوله الله لايحرمني منك..أختك..وديمة..
ابتسم ومسك جواله...
وديمة كانت تمشي تبي توصل الكافتيريا تشتري لها ماي...تسمع صوت المسج...ماقدرت تاخذ تليفونها...لين ماوصلت الكافتيريا وطلبت الماي طلعت تليفونها وقعدت تقرأ المسج...
مرة ثانية لاتعيدينها ..
ابتسمت ودخلت تليفونها وشربت الماي وراحت محاضرتها..
عبدالله يدخل دوامه...يحصل رفيجه بدر في الشغل...
عبدالله:السلام عليكم..
بدر:وعليكم السلام..
عبدالله:اشلونك؟
بدر:الحمدلله..انت اشلونك؟
عبدالله:بخير..امس متى رديت من الدوام؟
بدر:الساعة 3ونص طلعت من الجامعة..
عبدالله:وخلصت الشغل؟
بدر:أي الحمدلله..
جى محمد راعي الشاي والقهوة عندهم علشان يلم الاكواب.....
بدر:محمد أبيك تسوي لي شاي كرك عدل..
محمد:ان شاء الله..انت بعد استاذ عبدالله؟
عبدالله:انا ماابي شي..
بدر:لاتأخر..
عبدالله(يتصل بتليفونه):.......صباح الخير.......اشلونك؟....بخير الله يسلمك...وينك فيه؟......هاا اشلون النفسية؟.....ان شاء الله دوم.....زاهب؟........موفق...والله من صلاة الفجر وانا ادعي لك.......يااخي انت ماينخاف عليك ماشاء الله......انت قدها وقدود.......لاتحاتي اللي تبيه بتحصله ان شاء الله.........ماوصيك اول ماتخلص على طول خبرني.....ولاتنسى طلعتنا....في امان الله..
راكان ينزل تحت يحصل الخادمة....
راكان:وين الريوق؟
الخادمة:المدام طلبت نحط الفطور في الحديقة..
راكان:في حد برع؟
الخادمة:لا..
راكان:اوكي انا رايح اتريق..
راح وقعد...صب له حليب...وقعد يشرب وهو يفكر...شوي الا يشوف امه تيي.....
ام فهد:صباح الخير..
راكان:صباح الورد ياورد..
ام فهد(تقعد):اشوفك قاعد مبجر؟
راكان:أي..قاعد علشان ابي اسولف معاج شوي..
ام فهد(تصب لها شاي):خير؟
راكان:دام ان احنا قاعدين بروحنا ابي اقولج شي..
ام فهد:خير؟
راكان:يمه مايصير خالتي كاملة ماتحضر العرس..تبين الناس شتقول عنا..
ام فهد:ايش تقصد؟
راكان:اقصد..ان الناس مابتخليج بحالج..بيقولون اكيد خوات تهاوشوا علشان جذي اختها ماجات العرس..وانت يايمه بتقعدين تقنعين من ولا من باللي بينج وبين خالتي..ومايندرى الحريم شيقولون من وراكم..وانت ادرى بالحريم وسوالفهم وبالبهارات اللي يزودونها..
ام فهد(صارت تفكر بكلام راكان)
راكان:وبعدين يايمه خالتي وايد متضايقة على مرض ام ريلها..تحصلينها اكيد محتاجة لج تكونين بجنبها..
بوفهد(يي ويقعد معاهم):أشوفك مبجر اليوم؟
راكان:انا دوم مبجر يايبه..(قام)..أخليكم بروح العب شوية رياضة..عن اذنكم..
بوفهد:اشفيج ساكتة؟
ام فهد:أفكر بكلام راكان..
بوفهد:وشنو قالج؟
ام فهد:يقول ان مب حلوة ان كاملة ماتحضر عرس فهد الناس ايش بتقول عنا..وان الحريم مابيخلون شي والا بيقولونه..
بوفهد(قال في نفسه:والله انك ذكي ياراكان عرفت اشلون تخلي امك تغير رايها):كلامه صح..بس انا بسألج سؤال..انت اشلون قلبج طاوعج تهدين اختج كل هالفترة..وانت اللي كنتي معاها على طول..ومستحيل يوم ماتشوفون بعض ولاتكلمون بعض..اسراركم كانت لبعض..معقولة نسيتي هالعشرة اللي بينكم علشان شي مايسوى..يامرة فكري عدل..هذي اختج..وبعدين الظفر عمره مايطلع من اللحم..ترى انت بحاجة لأختج في العرس الليلة بس انت تكابرين..بسج وانت ترفعين خشمج..ترى الاهل عمرهم مايتعوضون..
راحت ام فهد بيت اختها...وسلمت عليها اختها بكل بروود..
ام فهد:اشلونج كاملة؟
كاملة:بخير..
ام فهد:واشلونها ام ريلج؟
كاملة:الحمدلله..الله يكون بعونها..
ام فهد:ليحين زعلانة مني؟
كاملة:انا شوي بس تعبانة من السفر..
ام فهد:بس زعلانة..ادري..أنا آسفة يااختي..سامحيني ماادري اشلون قلت هالكلام..
كاملة:اللي صار صار..
ام فهد:عذريني..صدقيني من يوم ماصار اللي صار وانا متحسفة وابي امرج بس مستحية منج وقلت ماراح تستقبليني..
كاملة:انا بيتي مفتوح للكل..
ام فهد:اعرفج ياكاملة واعرف اخلاقج..تكفين سامحيني..الليلة عرس ولدي العود وانا مالي غيرج بهالدنيا عقب وفاة امي وابوي..محتاجتج تكونين جنبي..صدقيني مااقدر استقبل الناس بروحي..وجودج وايد مهم..ايش قلتي؟
كاملة:مااقدر..ام ريلي تعبانة..ومااقدر احضر عرس..
ام فهد(حبت راسها):كاملة..انسي اللي صار..وكلنا نغلط..وانا طلبت منج السموحة..علشاني..اذا مب علشاني علشان فهد..ماله خاطر عندج؟
كاملة:يااختي ياام فهد..انا مااقدر ايي وام ريلي تعبانة..وفهد حبيبي مثل ولدي..ولاتحسبين اني زعلانة من اللي صار..انا نسيت..
ام فهد:خلاص دام نسيتي تعالي..
كاملة:مااقدر..
ام فهد:محد بيقولج شي..هذا عرس ولدج..ولدج فهد..
انت الاخت في زمان انعدم فيه الاخوة
وانت الصديق اللي يسلب الضيق مني
وانت الام في حنانه لطفل (ن) فاتح فمه
ينتظر سقيا اللبا من صدر حيل يروي
انت الحب والحنان اللي استشيره في ضيقه
( كامله) قلبي وعمري وروحي اللي دووم يمي
(بقلم:صعبة المنال)
بعد الجامعة...وديمة راحت عند شيخة...وتموا الثنتين يتزهبون للعرس...ويسشورون شعورهم ويتمكيجون ويكشخون...