الفصل 5
5 )
+! الساعه 7 الصبح .. في بيت بو هزاع +!
هزاع يالس ويا ابوه فالصاله .. و يسولفون قبل لا يزهب الريوق ..
بوهزاع : هااه متى بتتخرج إن شاء الله عسب نفرح بك و انيوزك
هزاع ( بصوت متواني ) : توه الناس على العرس
بو هزاع : انا ادريبك انك حاط عينك على بنت عمك شميم بس ابوها ما بيوزك
هزاع ( بحسره ) : هيه ادري و هذا هوه اللي قاهرني فالسالفه بكبرها
بو هزاع : الله يخفف عنك يا ولدييه و ينولك اللي فبالك
هزاع ( و الكدر مبين في ويهه ) : آمين .. انزيين ابويــه .. انا من زمان فخاطريه اتخبرك عن شي .. بس متردد .. ادريبك بتردني
بو هزاع ( بابتسامه عسب يطمنه ) :افاا عليك بس .. مآ عآش من يردك .. يالله اتخبر عن اللي فخاطرك هزاع : شوه سالفة القطاعه اللي بينك و بين عمي بو عمر .. لاني حاولت جمن مره اتخبرك لكنك ما ترد عليه .. و بصراحه اكثر تتهرب مني
بو هزاع ( بتنهيده طويله ) : هيييييييه يا هزااع .. شوه بقولك ؟؟ انته فتحت عليه يرح جديم
هزاع ( بابتسامه ) : خلاص ابوويه لو هالسالفه بتضايجك طبها و اعتبرنيه ما تخبرتك و لا سألتك لا تشل هم يالغالي .. اهم شي عندي رااحتك
بو هزاع : لا أنا بخبرك لانه حقك تعرف .. جوف هذا الله يسلمك واحد ينقال له بو يمعه و هو تاجر معروف و له باع فالسوق .. عاد انا و عمك بو عمر فتحنا النا شركه .. بالشراكه امبيني و بينه .. و الحمدلله يتنا أرباح ما نتوقعها في فتره بسيطه .. و هالشي كله لانا كنا ملتزميين مع الكستمرز و ما نسوي الا اللي يريحه و نوفي برمستنا وياه .. و نافسنا هالريال و مب بس جذه الا طوفناه و صارت شركتنا متفوقه على شركته و زود .. تم بو يمعه ورانا انا و عمك يبا يشتريها عنا و بجيمه خياليه بعد على ما يقوولوون بس نحن كنا نرفض .. و كان يسوي هالشي عسب ايتم هوه روحه و بس ذيب السوق و محد اينافسه ..
هزاع : يالله بالستر شوه هالحسد .. الهدرجه الأنانيه مآكله قلبه !!
بو هزاع : و أكثر .. المهم اكملك .. بعدها بفتره عرض علينا انه ايدش شريك ويانا و تمينا انا و عمك ندرس السالفه .. بس انا ما كنت متحمس للفكره
هزاع : انزيين .. و عمي شوه كان رايه ؟؟
بو هزاع : عمك رحب بالفكره .. و يوم قلت له ليش .. اتعلث انه اسم بو يمعه كبير و له وزنه فالسوق .. قلت له انه نحن الحمدلله .. بنينا النا اسم فالسوق و مب محتايين حد .. رد اتعلث انه الارباح بتزيد بالخص انه ريال له خبره فالسوق و التجاره و اجدم مني و منه فهالمجال و له مكانه و هيبه بين التجار
.. و انا بعد رمسته هااي وافقت معني مب مقتنع بالسالفه لكني اعرف خويه ربي يهديه عنيد و راسه يابس و يحب انه رمسته بس هييه اللي تمشي ..
هزاع : انزيين و بعديين ..
بو هزاع : بعديين يا طوييل العمر .. دخل ويانا بو يمعه شريك .. دخل و ليته ما دخل .. من يوم دخلته و الشغل معتفس فوق حدر و ما عاد شرا اول .. و يوم كنت اتعمد اتخبره عن هالشي جدام بو عمر كان يتعلث بانه السوق حاله راكد .. و صرنا يوم نتناقش انا و عمك دووم يتدخل بينا و يصف ويا عمك .. و قام اينقل رمسه امبينا و يفسر رمستيه غلط و على هواه .. و آخر شي انا رحت لاخويه مكتبه و قلت له انه نظام الشغل كله اعتفس من دخل امبينا .. و قاللي و الله هذا هوه شغلنا عايبنك زيين .. مب عايبنك الله وياك .. و انا ما قلت له شي غير الله يسامحك يا خويه .. و فضيت شراكتي وياه و اشتريت كرامتي بهالطريجه .. لانه بو يمعه كان واايد مأثر في عمك .. و بو عمر كان واايد معجب بطريجتة فالشغل و يعتبرهاا الصح .. و صار بو يمعه اقرب له مني و قام ايدس الافكار السودا في راسه لين ما صار عمك ما يطييق طاري واحد اسمه سالم ..
هزاع : امم انزيين .. و بعديين ...
بو هزاع : بعديين اتدهورت حالة الشركه و كان بو يمعه و اهم بو عمر انه الشي اللي يصير طبيعي .. و آخر شي وصلت الشركه لدرجة الافلاس و فهالوقت رد بو يمعه و عرض انه يشتري الشركه .. و وافق بو عمر انه ايبيعه اياها .. و ضمها لمجموعة شركاته .. و نهضت من اول على ايده ..
هزاع : و انته شوه سوييت ؟؟
بو هزاع : انا الحمدلله رضيت بالارباح اللي ظهرت لي من الشركه لما كنا انا و بو عمر شركاء ارواحنا .. و من هالارباح صرت فالخير اللي انا فيه و غديت تاجر من يد و يديد و صارت لي تجارتي الخاصه و الحمدلله اتوفجت .. اما عن عمك فمن ذاك اليوم ما قام يرمسني .. و قاللي انته ظهرت عني عسب تتحداني و الدليل انك كونت لك شغلك الخاص فنفس المجال اللي انا فييه .. و حاولت الغي هالفكره .. لكني للاسف ما قدرت .. لانه بو يمعه مب مقصر تارس راسه عليه .. و بو عمر من النوع المتسرع و العصبي ..
هزاع ( بانفعال ) : حسبي الله عليه يزاه على الله .. جانه سعى امبينكم بالشــر ..
بو هزاع ( بإبتسامه ) : خله عنك .. وينه عن الله .. ربك ما ينسى عباده ..
هزاع : و النعم برب العالمين .. بس صدج قاهرني .. ما يستحي و لا يخيل عنبوه ما يخاف ربه
بو هزاع : ربنا يمهل و لا يهمل .. و صدجني بنرد انا و عمك شرات اول و اخير لانه الدم عمره ما يستوي ماي
هزاع : فهاي صدجت .. ربي اييمعكم من يد و يديد .. و انرد عايلتيين مترابطات شرا اول
بو هزآع : ابغي اقولك يا هزااع انه كل شي في هالدنيآ نصيب .. و محد يآخذ اكثر عن نصيبه .. عشآن جذه .. اتحمل تطمع .. لو لك رزقك ربك بيعطيك ايااه و لو بعد حيين
هزآع ( بإقتنآع ) : ان شآآء الله ..
ابتسم له بو هزاع لانه حس بلي في قلب ولده و انه روحه معلقه فـ شمامي .. و يمكن يستوي عليه شي لو ما خذها .. فهالوقت زقرهم بشكآرهم .. عسب يتريقون .. و نشو ..
+: عايلة سالم بن هزاع +:
سالم ( بو هزاع ) 44 سنه
عنده من العيال :
هزاع ( 22 سنه ) يدرس في جامعة الشارجه ( كلية القانون ) ( سنه رابعه ) .. و هو يعيش على املين فهالدنيا من عقب رضى ربه و ابوه .. و واحد من هالآمال اتحقق .. دراسته القانون .. اما الامل و الحلم الثاني .. انه يرتبط في بنت عمه شمامي .. و هو مخلي هالشي على رب العالمين .. لانه متأكد انه آخر الصبر الفرج ..
== نبذه عن العايله ==
بو هزاع ريال طيب و ينحط عاليرح يبرى .. متيوز من وحده اسمها ( ظبيه ) و هييه حرمه طيبه وااااااايد .. كانت ثمرة هالزواج .. هزاع .. و من عقب ما يابته امه اتوفت على طول .. لانها تعبت واايد فالولاده .. لكنها قبل ما تتوفى وصت سالم بولدها ... و قالت له ايحطه فعيونه .. و بو هزاع ما قصر نفذ الوصيه حتى انه ما اتيوز عسب ما اييب لولده حرمة ابوو يمكن ما تعامله عدل .. و لكن اللي حاز فخاطره هوه انه مب قادر ايحقق له امنيته في انه يتيوز شمامي .. اما عن شغله فهو صاحب شركتين .. لانه مثل ما قلت الكم قبل .. من انفصل عن اخوه بالشغل .. كون له شغله الخاص فيه .. و نجح وايد فهالمجال .. و اللحينه هوه من رجال الاعمال المهميين فالبلاد
+! الظهر في بيـت بو محمــد +!
{ كل يوم واقول في نفسي خلاص
.. هذا اخر يوم لي في دنيتك
واكتشف ان لا خلاص ولا مناص ..
كني مخلوقٍ بس .. لمحبتك }
بو محمد من عقب ما رد من الصلاه و تغدى ويا حرمته و بنته .. سار يرقد و يريح شوي .. و نفس الشي ام محمد .. تمت طرفه يالسه روحهاا فحجرتها و تذاكر اللي عليهاا و في نفس الوقت معزوفآت كلآسيك و كل شويه يمر طيف حارب على بالها وطت كتابها و نشت سارت صوب مكتبها .. ظهرت البوم الصور اللي يخص العايله .. فيه كل صورهم .. شآفت صور غايه .. ابتسمت و قآلت : فديتج كيف كنتي اتخبليين .. يوم كنتي بيبي .. مغزغزه و كيوووت .. ان شآآء الله بنتج تكون نسخه منج .. و شآفت صور بطي و حآرب .. و تمت تتفكر فيهم .. سبحآن الله نفس الويه نفس الشكل .. بس حارب من كآنو صغار امتن بـ شويه عن بطي .. و محد يفرق بينهم غير هلهم و معاارفهم .. اما فالاطبااع .. فـ فرق السمآ و الارض .. وآحد طيب و وآحد شرآني وآحد قآسي و وآحد حنون وآحد سيده و وآحد صايع .. كآنت كل هالافكآر ادور في بآل طرفه و هي تتطآلع صورهم .. فجأه تمت اتمرر اصآبعهآ ببطء على صورته مآلت التخرج .. و قآلت بهمس : لييش انته قآسي ؟ ليش انا حبيتك ؟ ليش قلبي اختآرك ؟ ليييش انته مآ تحس ؟ ليش انته انآني مآ ترآعي الا نفسك و شو تبآ ( و بدن ينزلن دموعهآ ) : عآيش حيآتك ويآ هآآي و هآآييج .. و انآ من متى اتريآ ابتسآمه منك .. اتمنى اني احس اني شي يسوى في حيآتك .. بس انته كله تتجآهلني .. ( و سكرت الالبوم بعصبيه ) و تمت اتصييح بإنفعآل و تقول : اكرررهك اكرررررهك
بعد دقآيق مسحت دموعهآ و استغفرت .. و على طوول دعت ربها انه ينسي حارب لميا و يهديييه لو مب عشآنهآ عالأقل عشآن امـه .. بتنصدم لو عرفت انه آخر تربيتهآ فيه جذه .. ! ..
+! عقب اذان العصر .. في بيت المرحوم سهيل بن بطي +!
حارب يالس فالصاله يطالع التيلفزيون روحه .. و بطي و حرمته فوق .. و ام بطي صلت العصر و ردت رقدت لانها تعبانه شويه من زود المراكض فالاسواق على آخر الايام ويا بنتها .. المهم .. دشت طرفه الصاله و سلمت ..
طرفه : السلام عليكم ..
حارب : و عليكم السلام و الرحمه .. شحالج ؟
طرفه : بخير الحمدلله .. انته شحالك ؟
حارب : يسرج الحال ..
طرفه : عيل وينها امايه ؟
حارب : فحجرتها .. تعبانه شويه ..
طرفه ( بخوف ): بسم الله عليها .. اشبلاها ؟؟ رب ما شر ؟؟
حارب : ما شر .. بس تعرفين توه مخلص العرس و كانت الوالده قبل دووم فالأسواق و تتشرى لـ غويه .. فـ تعبت اللحينه .. يعني ارهاق بس
طرفه : ايوااا .. سلامتهاا ما تشوف شر ..
حارب : الشر ما اييج ..
طرفه : انزيين انا بسير الهااا .. بسلم عليهاا و بروح عقب
حارب : اوكيي .. براحتج
{ صفقوله حبيبي صفقوله و بحراره ..
يطلع الاول حبيبي فالنذاله و الحقاره }
روحت طرفه صوب حجرة عمتها و دقت الباب بس محد رد عليها .. عرفت انه عمتها غاطه فالنوم .. سارت صوبها و وطت عليهاا .. حبتهاا على راسها و يبهتها .. و ظهرت عنها .. ردت صوب الصاله .. و سمعت حس حارب و هو يرمس فالموبايل .. و عرفت من اسلوبه انه يرمس بنت .. انحبست دمعتهآ في عينها .. و غصبن عنها مرت صوبه و اطالعته بنظره كلها تلويم .. و مشت .. فهالوقت سكر حارب بسرعه و زقرها ..
حارب ( و هو يسير صوبها ) : طرفـــه ...
طرفه ( و هييه عاطتنه ظهرها ) : نعم ..
حارب : نعم الله عليج .. شو فييج ؟
طرفه : ما فييه شي ..
و ظهرت عنه سارت صوب الحديقه .. سار حارب وراها و هو معزم يعرف شوه فخاطرها و فبالها ..
طرفه : نعم .. ليش لاحقني ؟!
حارب ( و هو عآقد حيآته ) : اول شي قلت لج مليون مره .. لا ترمسيني جذه .. و ثاني شي ممكن اعرف شوه فيج ؟؟ و شعنه اطالعتيني جذه قبل لا تظهرين ؟؟
طرفه ( و هييه تحاول تتهرب ) : انآ ؟ متى اطالعتك اصلاً ؟؟
حارب ( و هوه يطالعها بطرف عينه ) : انتي ادرى
طرفه ( بانفعال ) : انزيين خلاص .. السمووحه منك الشيخ .. لو غلطنا عليك يوم اطالعناك ..
بعد شوه تبآ ؟
حارب ( و هو يرص على ضروسه) : لا ترمسيني بهالاسلوب ..!!!!
طرفه : ...............................
حارب : اللحينه خبريني اشبلاج ؟؟ ليش متغييره من جمن يوم ؟؟
طرفه : لا متغيره و لا شي .. يالله انا بسير اللحينه اسمحلي ..
حارب : صبري انا ما خلصت كلامي لين اللحينه
طرفه : و انا مابآ اسمع شي ..
حارب ( بعصبيه ) : ابآ اعرف شي واحد بس .. ليش هالغرور كله ؟!
طرفه ( و هييه تبا تقهره ) : كوز مآ يخصك .. و بعديين انآ مآ فييه هالصفه
حارب : مبين ..
طرفه : صدق و الله ؟ .. ( و هي تحيس ثمهآ ) : ابا اروووح .. ( و مشت )
حارب ( و هو يوقف جدامها ) : انا ادري انج اطالعتيني بهالنظره لانج اتغارين عليه .. " كان حارب يبآ ينتقم منها عاللي سوته ذاك اليوووم "
طرفه اتغيرت تعابير ويهها 360 درجه .. فججت عيونهآ على وسعهن و ردت بصوت مبحوح : انـا ..
حارب ( قطع عليهآ ) : انتي غلطآنه و اكبر غلطآنه لو تتحسبيني جااهل بلي فخاطرج من صوبي ( و يآشر على صدره ) : انا متجآهل .. و فيه فرق ..
طرفه ( و هي تحآول تتمآسك ) : شو تقول انته ؟!!
حآرب : اونج مآ اتعرفيين ؟ طرفه انا ادري انج ..
طرفه ( و هييه تقطع عليه ) : بــــــس ( و مشت تبا اتروح عنه )
حارب ( و هو يوقف جدامها و يقبضهاا من جتوفها و يقربها منه ) : شوفي انا اعرف انج اتحبيني
( و يحط عينه فعينها ) : لو خفيتي هالشي .. لكنه يبين في نظرة عيونج و يكون في علمج .. انا اعرف من زمآن بس .. بكيفي متجاهل السالفه
طرفه ( و هييه تحس بعمرها بتموت بين ايدييه ) : ودرني .. انا ما احبك .. ما ادانيييك
حارب ( بابتسامه رجوليه بحته فيها صلابه و تحدي ) : انتي متأكده من رمستج ؟؟
طرفه ( بكلمات متقطعه ) مـ ـتـ ـأكـ ـده
حارب ( و هو يهمس الها ) : و حياتج حتى لو حلفتيلي بقوولج جذابه
طرفه ( و هييه حاسه بخوف و ضعف جدامه ) : ودرني بسك عااد .. قلت لك ما أحبك شوه
تبا مني بعد ؟؟
حارب : هااي الرمسه اللي قلتيهاا توج جذب .. و انا اباا الصدج و لا شي غيره ..
طرفه ( و دموعها بدن ينزلن على خدها ) : حارب ودرني حرام عليك ..
حآرب ( بغرور ) : قوولي انج اتحبيني .. ادريبج انج تحبيني ليش اتكآبرييين ؟
طرفخ ( و هي تحآول تتفجج منه ) : فج عني .. مابآ حد يمر و يشوفك قابضني .. بعديين شوه بيقولون عنـا ؟!!
حارب ( بثقه ) : يقولوون اللي يقولونه انا ما يهمني حد ..
طرفه : بس انا يهموني .. ( و حطت ايدهآ على ايده عشآن اتفجج عمرهآ ) و كملت : اقولك ودرني بلآك مآ تفهم .. و الا تتحسبني وحده من الزبآله اللي اترمسهن و بتذلني ..؟ يكون فعلمك ترا هاي مب رجوله منك .. و انا ....
حارب ( و هو يقطع عليها بإنفعال ) : جــــــــب .. اقوولج جب و لا كلمـه ..
حارب ما استحمل كلماتها الاخيره ابدن و حس انها اتطاولت عليه .. و رفع ايده يبا يصفعها .. اما طرفه فانكمشت على نفسهاا و حطت ايدهاا على ويهها .. حارب نزل ايده على طول يوم شاف شكلهاا
طرفه ( بصوت واطي و مبحوح من الصياح ) : حراام عليك انا ما استاهل انك تسوي فيني جذه .. انا ما احبك .. اكرهك .. ( و بصوت اعلى ) اكرهــــــــك اتعرف شو يعني اكرهك !!
حارب ( و هو توه بيحط ايده على جتفهآ ) : طرفه انآ ..
طرفه ( و هي ترد على ورآ ) : لآ تلمسني لا تحط ايدك علييه .. انته انذل من مآ توقعت ..
حآرب ( بعصبيه ) : انتي دآيمـاً تستفزيني ..
طرفه ( و هي تصييح ) : انا مآ استفزيتك .. غروورك هو اللي خلآك اتسوي جذه .. تبآ كل شي على كيفك .. تبآ اتذل كل حد .. لازم كل شي يمشي على هوآك و الا بتجلب الدنيا !
حآرب ( بلا مبالاه ) : انآ مآ غلطت ..
طرفه صدت علييه واطالعته بنظره كلها ندم .. و روحت عنه .. و تم هوه روحه يفكر في رمستها و لكن رد و قال فخاطره : لازم تتأدب على طولة اللسان اللي فيها ..
كآنت مجموعة افكآر يطرن على بآل حآرب مره ايحس انه كارهنها و انهآ هي السبب لانهآ استفزته .. و مره ايحس انه هو اللي بدى و غلط عليها و اللي قالته كان دفاع عن النفس .. و مره ايحس انه وده يتراجع و يستسمح منها .. و يرجع يكآبر .. و هذآ هو الطبع الغآلب عند حآرب " المكآبره " !
+! في بيت بو عمـر +!
{ لا .. ما تباعدنا الدروب البعد هو بعد القلوب
الدنيا ما اتغير وفي .. مهما فـ مشاكلها نتوه
آآه يالعمر ما عرفت في غيبتـــــك راحه ..
ويــــــن الفــــــرج و الصبر ضيعت مفتاحـه }
شمامي تتمشى فالحوي روحها و تفكر في نفسها و في هزاع .. يالله اشكثر اتحبه و تغليه و ما تتخيل انها تقول كلمة أحبك لحد غيره .. لكن حاز فخاطرها انه القدر معاندنهم و لين اللحينه ما جمعهم .. فهالوقت رن موبايلها و كان المتصل هزاع .. فـ ردت على طول
شمامي : مرحبا الساع
هزاع ( بصوت متواني ) : مرحبا بج زوود
شمامي ( بخوف ) : هزاع .. بلاااك ؟؟
هزاع ( و هو يحاول يخبي اللي فخاطره ) : ما فيني شي .. انتي شحالج ؟؟
شمامي : مب بخير
هزاع : افاا .. رب ما شر ؟؟
شمامي : ابآ اعرف .. بلاك ؟؟ ليش صوتك متواني ؟؟
هزاع ( بتنهيده ) : و الله متكدر .. احس انج بتضيعيين من ايدييه .. مب متخيل انج اتكونين لغيري
شمامي ( و هييه اتحاول انها اتواسيه ) : لا تشل هم .. ان شااء الله انآ بنكون لبعض .. لانه لو اهلنا الله يسامحهم ظلمونا .. فـ الله ويانـا
هزاع : و النعم بالله .. علومج بعد ؟؟
شمامي : اممم دامك متكدر .. علوومي ما تسر ..
هزاع : فديت ويهج انا .. لا اتضايجيين بعمرج و لا تكدرين نفسج .. لا خليت منج انآ
شمامي : ان شآء الله من عيوني ..
هزاع : فديتهن هالعيون .. يعلهن سآلمآت ان شآء الله
شمآمي : ربي يسلمك من الشر
هزآع : هآه بعدهآآ حبيبتي متضآيجه ؟
شمامي ( بإبتسآمه ) : لا خلاص راحت الضيجه .. شوه مسوي في درآستك ؟؟
هزاع : عشانج و لأني وعدتج اني ادرس .. كل شي اوكيه .. و تمام
شمامي ( بدلع ) : شطور ما شاء الله عليك
هزاع : يااا ويل حالي علييييج .. شمووه تدرين خاطريه في شوه اللحينه ؟؟
شمامي ( بإستغراب ) : في شوه ؟؟
هزاع : خاطريه اشوفج لو 5 دقايق .. لو ثانيه .. من زمان مب شايفنج
شمامي : يالله كل هذا شوق؟؟
هزاع : ثرج مآ اتعرفييين قدرج في قلبييه .. و الله انج عآيشه فيني .. في دمي في قلبي في روحي في نبضي و صوتي في همسي في كل شي .. شمآمي انآ رآحت عني اميييه و مآ شفتهآ .. مآبآآج انتي بعد اتروحيين عني .. عشت عمرييه محروم منهآ .. مآبآ انحرم منج انتي بعد .. شمـآ انتي اكثر شي تمنيته في هالدنياا ..
شمامي ( و هي متأثره ) : هزآع فديتك .. انآ و الله فآهمتنك .. و و الله مثل مآ تبآني انآ بعد ابآآك من زمآن من كنآ صغآر و لين كبرنآ شويه كنت اسمع من هلنآ انآ لبعض .. لآ تتحسب انه انآ يهون عليه اني اكون حرمة وآحد غيرك .. بس .. صدقني طوول مآ نحن ويآ ربنآ .. الله بيكتبلنآ اللي فييه خيير النآ و بيتصآلحون هلنآ عآجل او آجل ..
هزآع : و النعم بالله .. حبيبتي انتي .. محد يفهمني و يقدر يخفف عني كثرج ..
شمآ : قووول آميييين .. الله لآ يحرمني منك ..
هزاع : آمييييييييييين ( و يضحك ) : ههههه بس بعدني متوله علييج .. و خآطريه اشوفج
شمامي : تعال بعدك شايفني قبل جمن يوم في المول .. و بعد اتقول من زمان مب شايفني يالظالم
هزاع ( بهمس ) : مشكلتييه مآ اشبع من هالوييه ..
شمامي ( بمستحى ) : هزاع ..
هزاع : هههههه عيوونه ..
شمامي : فديت عيونه ..
هزاع ( و هو يزاعج ) : احبج .. قسم بالله احبــــــــــــــــــــــ ـــــج
شمامي : ههههههه
هزاع : هيه ضحكي ضحكي .. شو عليج
شمامي ( بهمس ) : انزيين و انا بعد ..
هزاع : و انتي بعد شو ؟ تحبيني ؟
شمامي : هييه
هزاع : يا ربيييه انزيين انطقيهاا .. قولي حبيبي احبك
شمامي : اللحينه .. مااشي ..
هزآع : افاا .. و ليييش ؟
شمآ : لاني جريبه على الصآله مآبآ حد يسمعني
هزااع : انزييين ما علييه كله بظهره من عينج .. اصبررري بس انتي
شمامي : هههههه يصير خييير .. انزيين فديتك .. اسمحلي بسكر عنك اللحينه .. لاني اسمعهم يزقروني .. يمكن مآمآتييه تبآ شي
هزاع : اوكيي .. الله وياج .. و تحملي بعمرج ..
شمامي : و انته بعد اتحمل بعمرك ..
هزاع : ان شااء الله ..
شمامي : فداعت الله
هزاع : فداعت الرحمن ..
يلس هزاع يفكر .. في ابوه و عمه .. و بنت عمه .. و حبه الها .. و علاقته فيهااا .. و شوه النهايه .. و خطرت على باله المرحومه ( امه ) .. اللي عمره ما شافها و لا حس بحنانها .. و كان يتمنى لو انه له ام تغمره بالحنان و اتحسسه بحبها له .. صح انه ابوه مب مقصر وياه .. لكن اتم الام غيـــررر .. و تنهد و هو يقول : اللهم لا اعتراض على امرك ...
و اطالع ساعته شاف انه مب باجي على اذان المغرب غير 10 دقايق .. نش عسب يتوضى و يلحق ايسير المسيد .. لانه .. لانه يحس براااااااااحه كبيـــره و هو يتمشي لين المسيـد
CUT
to be continued>>>