الفصل 3
الجزء الثالث ...
ياترى ..يادنيــــــا..
لوين بــــــــتوديــــــنا ؟!
للأمـــــــان ؟
ولا >بهالشقى< ترمينا ؟!
بعد مرور أسبوعين ...
"أخيرا جات عطلة الأسبوع , من جد انهلكت من المحاضرات , امممممم طيب ايش أسوي ذحين , أها لقيتها خليني أتصل على ساره وشوق ونخرج كلنا مع بعض "
أخذت جوالها ودقت على شوق
شوق : " الو هلا روناء "
روناء : " أهلين يادبه , اسمعي فاضيه اليوم؟ "
شوق : " أكيد فاضيه ليش في عندك خرجه ؟"
روناء : " يس , بس الخرجه حتكون جماعيه "
شوق : " لاتقولين ساره بتخرج معانا "
روناء : " ايوه , أمانه ياشوق لاترفضين عشان خاطري الله يخليكي "
شوق " بس ...."
روناء تقاطعها : " لابس ولاشي , ولا انا مالي خاطر عندك؟ "
شوق :" مو كذه والله " بعد تفكير قالت : " خلاص أوكي بس بشرط "
روناء : " اشرطي زي ماتبغين وطلباتك اوامر "
شوق : " اليوم تنامين عندي "
روناء : " بس أخوانك ؟!"
شوق : " لاتخافين ريان أصلا مو في جده راح مع أصحابه للطايف ورامي بيروح استراحه مع أصحابه وحتى أبويه مسافر يعني أبدا ماعندك عذر "
روناء : " هههههههههههه خلاص أوكي جهزي نفسك بأمرك الساعه 9 "
شوق : " اوكي بس خليني أقول لامي واذا وافقت أرسللك رساله , يلا تشااااااو "
روناء : " تشااااااااو "
وقفلت الخط ودقت على ساره واتفقت معاها ..
راحت للمطبخ تدورلها أكل , يالله صارت تنسى تآكل ومره مهمله نفسها , شافت هناك أمها , طنشت أمها وراحت للثلاجه..
أم روناء : " جعانه ؟!"
روناء بدون نفس : " ايوه ليش عندك مانع ؟!"
أم روناء : " لا بس تبغين أسويلك شي ؟!"
روناء : " لاشكرا " وشمقت فيها
أم روناء : " روناء عيب احترميني شويه أنا أمك مايصير تكلميني كذه "
روناء وهي تصرخ : " لا بدري توك تعرفين انك أمي , وينك من أول ؟ ها ؟ وينك لما كنت أنضرب وأنهان ؟! وينك ؟!"
أم روناء والدموع بعيونها : " أنا ......."
روناء تقاطعها : " للأسف انتي وحده ضعيـــــــــــــفه , تعرفين يعني ايش ضعيفه ؟ , حتى كلمة أم كبيره عليكي
عاجبك كذه ؟ سديتي نفسي عن الاكل , أوف عيشه تقرف "
وخرجت من المطبخ تاركه أمها تتحسر على بنتها اللي ضاعت من يدها , واللي مستحيل بيوم ترجع لحضنها ..
أم روناء بصوت هامس مرتجف : " الله يسامحك يامحمد , الله يسامحك "
ساره : " انت كل مره تقول اليوم , متى ياياسر أنا تعبت "
ياسر : " ياقلبي حاولي تفهميني , لازم أختار الوقت المناسب عشان أكلم أهلي وفي البدايه لازم أمهد للموضوع "
ساره : " طيب متى ؟ "
ياسر : " ياقلبي أصبري "
ساره : " ياسر انت تحبني ؟!"
ياسر : " والله اني أحبك ومستحيل أستغنى عنك , تصدقين أنا ماني قادر أتخيل حياتي بدونك "
ساره بفرح : " من جد "
ياسر : " أكيد ياقلبي يلا حياتي أنا مشغول ذحين ولاتنسي موعدنا بكره "
ساره : " بس ياياسر احنا غلطنا ولازم مانكمل في الغلط "
ياسر : " ساره انتي مو واثقه فيني ؟!"
ساره : " الا بس ...."
ياسر : " خلاص خليكي عند كلمتك هذا اذا كنتي تحبيني !"
ساره : " والله أحبك , وخلاص موعدنا بكره "
ياسر : " اوكي ياقلبي يلا انتبهي على نفسك , باي "
ساره : " باي "
قفلت الخط وهي مهمومه , وكل يوم همومها تزيد , صارت ماهي قادره تنام لا ليل ولانهار, حتى السواد اللي تحت عيونها زاد , بس هي واثقه بياسر ومستحيل راح يسيبها , وروناء وعدتها انها راح تكون جنبها ..
من بعد ذاك اليوم اللي صارحت روناء فيه , هي وروناء ماعاد فتحوا الموضوع , كأنه كل وحده فيهم تحاول تتناساه ..
حاولت تطمن قلبها , وراحت تتجهز لانه باقي شويه وروناء تيجي ...
"صدفه" رماها القدر ..
لــ "قلوب" تخاف الغدر ..
ولــــــكن ..تــــــاهت ..
وغرقت في < هالبحر>..
روناء طول الطريق وهي جالسه تفكر باللي حصل بينها وبين أمها , ياترى هل كانت قاسيه عليها ؟ لا خليها أصلا ولا واحد فيهم يستاهل الخير , خلي أمها ينفعها ضعفها ..
مرت وأخذت شوق وراحوا ومروا على ساره وريم ..
ساره بدون نفس وهي تسلم على شوق : " كيفك ؟! "
شوق بدون نفس : " الحمد الله "
ريم : " هاااااااااااي يابطه "
شوق : " ههههه بطه بعينك "
ريم : " ها ياروناء وين رايحين "
روناء : " ريــــــــــد سي مول "
ريم بفرح : " ياسلام "
وتوجهوا على ريد سي ...
رامي يتكلم بالجوال مع أعز أصحابه < سامي >..
رامي : "أخبارك ياقاطع , من زمان عنك "
سامي : "هههههههه والله انا موجود بس انت اللي طاس ومختفي "
رامي : " عارف والله الدوام هالكني , سامع صوت ازعاج عندك . وينك ؟!"
سامي : " والله في ريد سي مول "
رامي : " ياعيني على الدشره "
سامي : "هههههههه حرام عليك تراك ظالمي "
رامي : " ياشيخ علينا ؟!, على العموم مااطول عليك ولاتنسى تيجي في الاستراحه اليوم "
سامي : "أكيد ان شاء الله "
رامي : " مع السلامه "
سامي : " مع السلامه "
..سامي ..
صاحب رامي الروح بالروح , عمره 25 سنه , يشتغل بالاتصالات , طويل , أبيض , وسيم , طول وقته بالثوب والشماغ ومستحيل يلبس جنز وبنطلون ........<< أموووووت انا على الرزه ياشيخ>>
روناء وهي تأشر على فستان :" ها ايش رايكم , حلو ؟!"
شوق وساره بنفس الوقت : " يجننن"
وطالعوا ببعض وشمقوا ,
ريم : " بس سعره مرره غالي "
روناء : " لا انا ماراح أشتريه بس آخذ رايكم حلو ولا "
فجأه سمعت صوت واحد يقول : " أكيد بيطلع يجنن عليكي "
كلهم التفتوا ناحية مصدر الصوت , والتقت عيون روناء بالعيون اللي محيرتها من زمان
ابتسم وقرب من عندها : " انتي اللي راح تحليه "
ريم : " يالله انت , حنين شوفي هو نفسه "
روناء تطالع فيه وساكته
" ليه انتم تعرفوني ؟!"
ريم : " ايوه قبل اسبوعين شفناك في ...."
"أها صح انا كنت هناك "
ساره تهمس لريم في اذنها : " لايكون أبو العيون ؟!"
ريم : " أيـــــــــــــــــوه هو نفسه "
ساره : " بس يجنن "
شوق : " ايش السالفه قولولي "
ساره : " بعدين "
طالع في روناء اللي الى الآن ساكته : " ليش ساكته "
روناء : " وليش أتكلم في بيني وبينك معرفه ؟!"
" لا مافي بس مايمنع انه يكون فيه بالمستقبل ولا عندك مانع ؟!"
روناء : " ايوه عندي مانع , يلا يابنات "
وجات بتمشي راح مسك يدها وقال : " لحظه بس "
وحاولت انها تسحب يدها من يده بس ماقدرت , لانه ماسكها بقوه
وراح أخذ الفستان وطلب مقاس سمول منه , واشتراه , وأعطاه لرونـــاء وحط في الكيس ورقه , كل هذا وهو ماسك يدها ..
" مايستاهل هذا الفستان أحد يلبسه الا انتي .., والرقم في الكيس , فكري واتمنى انك ماتخيبي ظني , اسمي بندر "
وراح وتركها بدون حتى مايسمع ردها ..
روناء واقفه متنحه ..
ريم وشوق وساره : " وااااااااااااااو يالله "
ريم : " جنااااااااااان ياناس "
ساره : " ياحظك ياروناء "
شوق : " ايوه والله من جد جنتل مان "
ريم : " متى راح تتصلي عليه ؟!"
روناء وهي معصبه : " ومين قالكم أصلا اني بأتصل عليه ؟!"
كلهم تفاجأوا منها
شوق : " ليه انتي هبله تضيعين واحد زي كذه من يدك ؟"
ريم : " من جد غبيـــــــــه واحد فيه كل المواصفات طول وبياض وجسم وأهم من هذا كله فلـــــــوس "
روناء : " مادري ماني مرتاحه ليه "
ساره : " بطلي هبل , كلميه ياغبيه ومنتي خسرانه شي , وعلى سالفة منتي مرتاحه ليه لاتركبين معاه السياره وقابليه في مكان عام ولاتخليه يعرف أي شي عنك "........<<كذا الصداقه ولا بلاش تعلموا منها ياهووو >>
روناء بقلبها : " مو هنا المشكله ياساره "
ريم تصفق لساره وتقول لروناء : " شوفي كيف الناس يفكروا وتعلمي "
شوق : " بصراحه كلام ساره صح "........<<لا هذي يبغالها حفله شوق وساره يتفقون على نفس الشي ؟! شي عجيــــــــــــب >>
روناء بعد تردد : " خلاص أوكي لمانرجع لبيت شوق أكلمه "
ريم : " كذه انتي تعجبيني , اسمعوا انا جعت خلونا نتعشى "
البنات : " اوكي "
وطلعوا فوق للمطاعم , ساره وروناء راحوا يطلبون أكل , وريم وشوق جالسين على الطاوله ويلعبون بالجوال
شوق : " دوبا شوفي هذا سامي صاحب أخويه رامي "
ريم : " من جد؟! أصلا شوفي جالس يأشرلك بالجوال , انتي فاتحه البلوتوث ؟"
شوق : " ايوه , أها جالي بلوتوث , شكله هو "
ريم : " ايوه هو بس انتبهي لما تكلميه بعدين تبينين انك أخت رامي "
شوق : " لاتوصي حريص "
وتعشوا البنات ووصلوا ساره وريم لبيتهم وراحوا شوق وروناء لبيت شوق ...
هذي بداية ..\\هـــــم \\..
وحنا ولا داريين !
وهذي بداية ..\\ألـــم \\..
وحنا غافلييــــن !
جلسوا شويه مع أم شوق , بس سلطان وليان صدعوا راسهم , كل بعد شويه يتضاربون ..
وطلعوا فوق في غرفة النوم ..
أشواق : " بنات والله فيني رقص , يلا خلوني أجيب جوالي ونرقص "
شوق : " لا الله يخليكي الا جوالك لاتجيبيه "
روناء : " ليش ؟!"
شوق : " كله أغاني موضي الشمراني وأشواق السامري وخرابيط مصريه تصدع الراس الله لا يوريكي "
روناء : "هههههههههههههههههه "
أشواق : " أقول اسكتي بس , أجل ايش تبغيني أحط , لازم أحط شي أحرك خصري عليه " وقامت تحرك خصرها عند شوق ..
شوق : " أقول انتي يلا لوسمحتي فارقينا "
أشواق : " يعني طرده ؟! أفاا أشواق تنطرد ؟! ماتوقعتها منك "
شوق : " يلا يلا بره بره "
ودفتها بره الغرفه وقفلت الباب
أشواق بصوت عالي من ورى الباب: "اني أعترض وأعلن أعتراضي بصوت عالي "
روناء : " ههههههههههههههههههههههههه هه خطيره هذي البنت "
شوق بصوت واطي : " أي خطيره انتي الثانيه قصدك مهبوله "
أشواق من ورا الباب : "انتي المهبوله "
شوق وهي مفجوعه : " بسم الله الرحمن الرحيم انتي كيف تسمعي ؟ "
أشواق : " ههههاااااااااااااي ياحبيبتي أنا أشواق مو حيا الله , يلا يادببه حسابكم معايا بكره "
شوق تطالع من فتحة في الباب صغيره : " الحمدالله خلاص راحت , يلا "
روناء وهي مستغربه : " يلا ايش ؟!"
شوق : " يلا اتصلي على بندر "
روناء : " أووووف مالي خلق له "
شوق : " يلا أمانه عليكي "
روناء بطفش : " طيب "
وأخذت جوالها وأخذت الورقه ودقت عليه ..
عطاها مشغول ورجع يدق عليها
شوق : " يالله قلتلك جنتــــــــــــل مــــــــــااااان "
روناء : " أقول اسكتي بس ...ألو "
بندر : "أهليــــــــــن , كيفك ؟!"
روناء : " الحمد الله "
بندر : " عساه دوم مو يوم , ها ياروناء كيف طلع الفستان على مقاسك ولا لا ؟ "
روناء : " لاجا على مقاسي "
وسكتت فجأه .وقالت : " لحظه انت ايش دراك باسم روناء ؟!"
بندر : " سمعت وحده من صاحباتك اللي معاكي تناديكي بهالاسم وعرفت انه اسمك "
روناء ومخاوفها تزيد : " بس ولا وحده منهم قالت روناء "
بندر : " الا اجل كيف عرفت ؟!"
روناء وهي مره مو متطمنه : " اها يمكن ..على العموم انا ذحين بأنام بكره ان شاء الله نتكلم "
بندر : " اوكي أستناكي "
روناء : " طيب . يلا مع السلامه "
بندر : " مع السلامه "
وقفلت الخط بسرعه وطالعت في شوق وعيونها كلها خوف ..
شوق : " عادي بس عرف روناء ماهو عارف اسمك كامل "
روناء وهي تحاول تطمن نفسها : " على قولك , تدقين على مين ؟!"
شوق وهي ماسكه جوالها : " على سامي اللي حكيتلك عنه في السياره صاحب رامي "
روناء: " شوق انتبهي لايعرف انتي مين ويوديكي في مشاكل "
شوق : " لا تطمني "
روناء : " طيب أنا بأنام "
شوق : " أوكي "
ونامت روناء ,وشوق راحت للسطوح عشان ماتزعج روناء, و دقت على سامي وجلست تسولف معاه الى الفجر ......<ماشاء الله عليها ماتضيع وقتها ابدا>>
فتح الباب بشويش ومر بالصاله , وطلع الدرج وهو يادوب يشوف لان الانوار كلها مطفيه , أصحابه جلسوا فوق راسه الا يجيب الديفي دي ويجيب الافلام اللي عنده , مر على غرفة شوق , وفكر انه يستهبل عليها , فتح الباب لقى الانوار كلها مطفيه والغرفه ثللللللللللللللللج , ولقاها على السرير متغطيه بالبطانيه ومو باين منها شي , راح الين عندها ومسكها وحط يده على فمها وهي تحاول تفك نفسها منه أو تصرخ ومو قادره , همس بصوت واطي : " ولا همسه ولانفس فاهمه " وهي تتلوى وتدفه , و ماقدر يمسك ضحكته وفكها وقال وهو ميت من الضحك : " أنا رامي يالخوافه ههههههههههههه,,,,,,"" ووقف ضحكته أول مالفت وجهها ..
وتفاجأ بوحده ثانيه ماهي شوق ولا أشواق , وحده تطالعه بعيون مليانه خوف ورعب , وجهها صغير كله براءه , جلس يطالع فيها ومو قادر يشيل عينه ..
فجأه انتبه على نفسه , ونزل عيونه , وقال وهو يطلع بره الغرفه : " آاااسف والله آاااسف حسبتك شوق "
وراح لغرقته وأخذ الديفي دي والافلام وطلع بره البيت , وطول الطريق وهو في السياره , وجه روناء مافارق خياله , كل مايتذكر شكلها وهي خايفه , يبتسم غصبا عنه ..
عند روناء ..
" ياربي فشله والله فشله , بس والله خوفني , يااااااااااااااربي احراااااااج , اممممممم بس بصراحه شكله حلو , وضحكني مره لما انفجع أول ماعرف اني مو شوق "
وغطت وجهها الاحمر بيدها : " ياااااااااااربي من جد احرااااااااااااااج "
دخلت شوق الغرفه ..
روناء : " وينك يامعفنه ؟!"
شوق : " كنت أكلم سامي في السطوح , بس انتي ايش اللي مصحيكي ؟!"
روناء ارتبكت : " ها ؟ لا مافي شي بس عطشت "
شوق : " أها "
وحطت يدها على قلبها ونطت على السرير جنب روناء , وهي تقول : " آااااااه ياقلبي الحقيني ياروناء"
روناء : "ههههههههه سلامات ايش فيه قلبك "
شوق بكل رومانسيه : " دق "
روناء : " هههههههههه لا بالله دق ؟! كويس طمنتيني انك عايشه , يادوباا تكلمي عدل "
شوق : " سامي سااااااااااااامي "
روناء : " وايش فيه سامي "
شوق : " يجننن يهبل كل شي فيه يهبل "
روناء ضربت شوق بالمخده : " يادوبااا اثقلي شوي لا تكوني خفيفه , ولا أنا ليه أتناقش معاكي بالأساس خليني أنام أحسن لي "
شوق : " حرام عليكي خليني أعبر عن مشاعري وأحاسيسي "
روناء : " حرمة عليكي عيشتك قولي آمين , أقول اعقلي بلا مشاعر بلا بطيخ يلا تصبحي على خير "
وتغطت وطنشتها ..
شوق بقهر : " من جد ماعندك رومانسيه , أشك اذا كنتي بنت "
روناء : لا رد
شوق : " روناء روناء يادوباا , طيييييييب أنا أوريكي "
ونامت وهي تحلم بسامي , ياترى أحلامك وين بتوديكي ياشوق ؟!!!!!
- - ارتعش هالقلب - -
- - أول مالمح هالبدر - -
- - وصار هالشوق - -
- - ينتظر منه همس - -
أول ماصحى من النوم على طول راح للبيت..
وهو يسوق السياره بسرعه " يالله ان شاء الله ألحقها قبل ماتروح , ياترى مين هي "
دخل البيت جري وتوجه على الصاله , ولقاها هناك جالسه تفطر مع شوق وأمه , سوى نفسه انه متفاجئ ورجع ورا , وهو يقول " سوري سوري "
روناء ابتسمت في سرها ..
أم شوق راحت الين عنده : " رامي غريبه ليه جاي بدري؟ , مو على أساس بتنام بالاستراحه؟! "
رامي : " مليت , وقلت خليني أرجع للبيت الا يمه مين هذي البنت ؟!"
أم شوق : " هذي صاحبة شوق , نايمه عندنا من أمس "
جا يبغى يسأل عن اسمها وماهو عارف كيف , ولو سأل شوق أكيد بتسوي تحقيق معاه , مافي الا أشواق الهبله ماتعرف تمسك شي كل شي لازم تقوله ..
شافها طالعه من الصاله ناداها : "أشواق تعالي هنا "
أشواق : "هاااا"
رامي : " أعوذ بالله , يابنت خليكي رقيقه شويه "
أشواق : " نعـــــــم نعـــــــم , ليه شايفني عندك ولد , لا ياحبيبي انا الرقه تنبع مني وفيني "
رامي :" ايوه واضح , الا أقول أشواق "
أشواق : "اختصر وبدون مقدمات ايش عندك ؟!"
رامي : " مين هذي اللي هناك ؟!"
أشواق :" اها هذي روناء صاحبة شوق أمس خرجوا وتشرطت شوق الا تنام عندها وجات نامت عندنا ".......<<بسم الله الرحمن الرحيم تنفع تشتغل في الأخبارهههههههه>>..
رامي وهومبسوط : " اها طيب يلا اقلبي وجهك "
أشواق وهي مقهوره : " طيب يارامي أنا أوريك "
وراحت عنه وهي معصبه , بس هو طبعا ولا على باله , كان يفكر بروناء , سمع أمه وهي تحاول فيها تجلس بس روناء كانت مصره انها تروح
راح جري عند الباب الخارجي , على امل انه يلمحها , وجلس ينتظر هناك ...
بعد شويه روناء نزلت ومعاها شنطتها وسلمت على الكل وجات بتخرج من الباب الخارجي الا وتنصدم بشخص , لقته رامي ..
رامي ومسوي نفسه متفاجئ : "سوري , سوري "
روناء تعدت من عنده وهي كاتمه ضحكتها , ركبت السياره وبعدها فطست من الضحك عليه
روناء تقلده : "سوري سوري ههههههههههههه على اساس انه متفاجئ بس مادرى انه فاشل بالتمثيل ههههههههههه "
أما رامي كان واقف مكانه وماتحرك , والبسمه على شفاته , وسارح مع خيال روناء
الا فجأه تخبط راسه كوره بقووه , ويطالع الا سلطان يطالع فيه ويضحك , ويقول : " هدددددددف "
رامي وهو معصب ويقرب من سلطان : " هدف ها ؟! أنا أوريك الهدف تعال هنا "
سلطان على طول صار يجري وهو خايف من رامي , بس لسوء حظه رامي حشره في زاويه , ولما فكر ومالقاله مخرج , راح جري وضم رامي وهو يقول : " بحبـــــــــــك وحشتيـــــــني ".....<<متأثر الاخ بأغنية حسين الجسمي >>..
رامي جلس يطالع فيه هو يضحك على اخوه وشاله وجلس يبوسه , ودخله جوة البيت ..
بعد فتره ..
سلطان جالس عند أشواق يقولها بلهجته الطفوليه : " رامي مرررررررره أهبل , بس قلتله بحبك وحشتيني , على طول سامحني هههههههه>>
أشواق : " أها هههههههههه والله وطلعت منت هين ياتوني , طيب انا عندي فكره لو سويتها مو بس بيسامحك الا بيجيبلك حلويات كثيــــــــــــــــــــره "
سلطان وهومبسوط : "والله ؟!"
أشواق : " ايوه تعال أقولك "
رامي بعد ماتروش ولبس ثوبه وجالس يتعطر , الا فجأه يندق الباب وبعدها سلطان يدخل وحاط يده ورا ظهره
رامي : " غريبه من متى سلطان يدق الباب قبل مايدخل ؟! ها ايش عندك ياولد ؟!"
سلطان يرمي يوجه الكاتشاب عليه , ويضغط ...
رامي بعد ماتعدمت ملابسه بالكاتشاب , مسك العقال جا بيضرب سلطان , قام سلطان بسرعه ضمه وهو يقول : " بحبــــــــــك ياحمـــــــــار "
رامي وهو معصب : " حمار كمان ها أنا أوريك "
وراح ضرب المسكين سلطان , وأشواق تسمع صوت بكى سلطان وهي فاطسه من الضحك , وتغني وتهز خصرها : " بحبك ياحمار .آآه , وانا بأزعل أوي لما حد يئولك ياحمااااار "....<<من جد شريـــــــــره بس حلللللوه هههههههههههههههه>>
{صدمه} ..تشتت أنفاسي ..
.. خوف يحتويني ..
وليه أنا اللي أقاسي ؟!
..قسوه تنهيني !..
روناء جالسه في غرفتها وجالسه تكلم علي ..
روناء : " علي أنا بأتزوج وخلاص ماراح أقدر أكلمك بعد اليوم "
علي وهو مصدووم : "ليه ياحنين وانا , خلاص انا بأتزوجك "
روناء في سرها : " لا ياشيخ ماباقي لا انت يالعجوز اللي كلك شيبه أتزوجك !"
روناء وهي تمثل انها تبكي : " لاياعلي الله يخليك لاتزود علي جرحي أبوي مستحيل راح يوافق اهئ اهئ راح توحشني "
علي ماستحمل وصار يبكي : " اهئ اهئ "
روناء من جد خلاص ماستحملت وقفلت في وجهه وجلست تضحك وبعد ماشبعت من الضحك رجعت اتصلت عليه ..
علي بلهفه وبصوت باين علي انه قطع نفسه صياح : " وين رحتي ؟"
روناء : " معليش ياقلبي بس دخل عليا ابويا , اسمع انا ماراح أقدر أكلمك بعد اليوم بس عندي طلب أخير منك , طلب مرررررررررره صغيرون "
علي : " آمري ياقلي وتدللي "
روناء : " أبغى سبعة ألاف عشان أشتري فستان الزواج , تخيل أهلي يبغوني ألبس فستان حق بنت خالتي مستعمل . اهئ اهئ يرضيك حنوووونتك تلبس شي مستعمل ؟!"
علي ومن قلبه : " طبعا لا خلاص عطيني رقم حساب وانا أحولك عليه "
عطته رقم حساب وقالتله انه رقم حساب وحده من البنات
روناء : " يلا ياعلي الوداع "
علي يبكي بحرقه : "آأأأأأأأأأأأه لاااااااااا اهئ اهئ حنوووووووووووو"
روناء : " اهئ اهئ ياعلي خلاص اهئ باي "
وقفلت وجلست تضحك وتضحك لدرجة خلاص بطنها صار يألمها والدموع بدأت تنزل ..
اتصل بندر أكثر من مره بس ماردت عليه ..
بعد شويه تجي الشغاله تدق الباب ومعاها علبه ..
الشغاله : " مدام هدا رجال قول هدا حق انت "
روناء : " ومين هذا الرجال "
الشغاله :" هدا في سواق "
روناء : " خلاص طيب روحي انتي "
وجلست على السرير , وأول مافتحت العلبه وشافت اللي بداخلها , فتحت عيونها من الصدمه ,وماتت البسمه على شفاتها , وصار كل جسمها يرتجف , وهي مو مستوعبه ,وتقول : " كيـــــــف ؟ كيــــــــــــف ؟"
ساره وياسر في السياره ..
ياسر : " خلاص ياساره صدعتي راسي كل يوم نفس الموال "
ساره : " ياسر انا لازم اعرف الين متى ؟!"
ياسر : " أوووووووف قلتلك يابنت الناس بعدين بعديــــــــــــن "
ساره وهي معصبه : " لا اليوم تكلمها فاهم اليوم , اليوم تكلم أمك ولا والله مايحصللك طيب "
ياسر : " تهدديني ياساره ؟ طيــــــــــب "
وصار يسرع بالسياره ..
ساره : " ياااااااسر هدي السرعه ياياسر "
ووقف فجأه عند برميل زباله في الشارع , ونزل من السياره , وفتح الباب اللي من جهة ساره , وسحبها بقوه من يدها , ورماها بقوه على الارض , وقالها : " هذا مكانك وهذا مقامك زبـــــاله يا زبـــــاله! " وابتسم باستهزاء
وركب سيارته وراح , وتركها لحالها مصدومه ومو قادره تستوعب اللي يصير .......
انتهى الجزء الثالث ...