الفصل 7
الجزء السابع:
صادق:اوف ،،واخيرا افتكينا
باقر:وهالعله صاحبه؟
ماجد:وش دراك يمكن يطلع عكس صاحبه
باقر:انشوف
ـــــــــــــــــــــــــ ـــــــــــــــــــــــــ
سماهر في غرفة ليال اتطالع الأغراض اللي جابهم لها اخوها
سماهر:ماشالله عنده ذوق اخوي
ليال ماكانت معاها وكانت سرحانه
سماهر رفعت راسها:باروح اسبح انا الحين
ومازالت ليال سرحانه
راحت لها سماهر وقعدت جنبها وضربتها بخفيف على يدها
ليال:هيه بسم الله الرحمن الرحيم شفيش انتي؟
سماهر: انا لو انتي؟
ليال:انا مافيني شي
سماهر:مو ناويه اتقولي لي شنو فيه ثامر؟
ليال نزلت راسها وبدون ما تتكلم
سماهر:شوفي انا الحين مو طايقه حالي عشان ريحة الأكل باقوم اسبح وبعدين
راجعه لش
ليال:انا باقوم اسوي المهلبيه و الشوربه ماباقي شي على الا`ذان
سماهر:شوفي ليال منتي مجبوره اتقولي لي شنو فيه ثامر،،،هدا شي يختص بثقتش
فيني
وراحت على طول دخلت الحمام قبل ماتنطق ليال بأي كلمه
ـــــــــــــــــــــــــ ــــــــــــــــ
اتصل على غاده الي تغازل نادر و علاء عند الكراج
غاده: وش بعد؟
مازن: انهي المهمه.. ولا باسوي فيش شي.. الله يستر عليش
و قفل الخط قبل تتكلم
مازن:مسا الخير
ام مازن:مسا النور
ابتسم مازن الى سامي
ام مازن:شو ماتبون تباركون لاخوكم؟
تغريد:على شنو؟
مازن:لالالا يما لاتقولي الحين
ام مازن:خايف يعني اهلها يردونك؟وقتها ادا ردوك يصير خير،،،واصلا وش فيها
لو اخوانك عرفوا،،هدول اهلك مو غريبين
مازن:قولي صج انكم فضيحه
تغريد:مازن؟
مازن:هلا؟
تغريد:احسك رجعت مثل قبل،ماعدت غبي وتافه ولا شي
مازن:مقبوله منش لكن ياويلش
ام مازن:سمعوني الحين،،،،،اخوكم مازن توه يخطب سماهر بنت خالته
سامي انصدم من هالخبر،،صحيح انه كان يدري انه في يوم من الايام بيصير لكن
حس بشي داخله مايتحمل الخبر:لا سماهر ماتاخدها
تغريد: ليش تبيها؟؟
سامي بعصبيه:لا مابيها،،،،،،،،،،لكن في نفس الوقت ماأبيها الى اخوكم مازن
مازن وبكل هدوء اتقرب الى سامي:طيب وليش؟
ـــــــــــــــــــــــــ ـــــــــــــــــــــــــ
طلعت سماهر من الحمام واتوجهت للمرايا وجففت شعرها بالفوطه ومشطته ورفعته
على شكل ديل حصان
ليال:غريبه اول مره اشوفش اتسوي تسريحة شعرش كدا........بالعاده غير وحركات
سماهر:صليتي انتي؟
ليال:اي
سماهر:كذابه ماصليتي،،اصلا مامداش انا توني داخله الحمام
ليال:ههههههههاي ساعه ونص بالحمام واتقولي توش
سماهر طالعت الساعه ضحكت على حالها:ههههههههههه مانتبهت والله
ـــــــــــــــــــــــــ ـــــــــــــــــــــــــ
ماجد:شباب مو كأن احمد مرتاح كدا وصاحبه عيسى بعيد عنه؟
باقر:بروح له
صادق:ياولد الحلال اقعد مكانك ،،ماتقدر الا تتنقرش في الناس؟
باقر:ياشيخ شنو بسوي له انا؟
قام باقر وقعد جنب احمد
باقر:السلام
احمد ابتسم بالخفيف:وعليكم
سكت اشوي واتكلم احمد:كنت غبي يوم ماشيت عيسى،،لعب فيني لعب
باقر:شلون؟
نزل احمد راسه وغمض عينه وكانه يتدكر شي صعب عليه يتدكره من شدة المه
احمد:كنت عايش احلى عيشى...الأهل راضيين عني...ولي اصحاب يامحلاهم ومحلا
اخلاقهم ........لكن اتعرفت على عيسى،،،،،ولعب فيني ،،،خلاني منجرف..مادري
كيف خضعت قدامه..خلاني اتاجر بالمخدرات .......صارت الفلوس اتهل علي من كل
مكان....وهدا اللي خلاني اتعلق بـعيسى...والشي الثاني الي علقني فيه انه
كان مهددني بالقتل لو ابتعدت عنه.........ومابتعدت عنه......ووين
صرت؟....في السجن
باقر:احمد ربك جت على كدا مو اكثر
احمد:لما صادوني الشرطه مالقوا عندي اي شي..لأني وقتها استسلمت الى عيسى
وقلت له يقتلني ابرك من هالعيشه معاه ...لكن وقتها جوا الشرطه ومسكوني على
اني لسا من اتباعه
باقر:خلاص يا احمد عيسى راح و ولى عنا وخلاص اعتبر حالك ماعرفته....وتعال
مع شلتي ترانا حلوين ونعجبك..ماعدنا سوالف مني مناك
احمد ضحك على كلمته
باقر:هههههه اي خلك كدا اضحك الدنيا تضحك لك
احمد:ادا على الدنيا خلاص وبدون محاولات مابتضحك لنا راحت تضحك لغيرنا
باقر:هههههههه وانت الصادق والله
ـــــــــــــــــــــــــ ــــــــــــــــــــــــ
ابو نادر:يلا علاء ...نادر تعالوا ع السفره
علاء لما قعد ع السفره همس الى نادر:نفسي اعرف شنو اللي طبخته اختي؟
نادر قام من ع الرض
ابو نادر:وين ياولدي؟
نادر:أ أ أ باروح اجييب ماي
ابو نادر:كاهو في هنا ماي
نادر:لاخبرك يبا علاء مايخلي قطرة ماي مايشربها
علاء:انا؟
********************
طلع نادر وراح الى عمته ليال واتنحنح عند باب غرفة الطعام
نادر:يالله يالله
حطت سماهر الشيله على راسها وليال طلعت الى ولد اخوها
ليال:آمر؟
نادر:شنو طبختي لنا يالحلوه؟
ليال: قصدك شنو طبخت الحلوه الي داخل
نادر غمز لها:تفهميني
ليال:باختصااااااار طبخت كل شي...ماعدا المهلبيه والشوربه والسلطه انا اللي
مسويتهم
نادر:واجد عليش
راح نادر الى علاء وقال له بخفيف:اختك مسويه كل شي ماعدا المهلبيه والسلطه
والشوربه
بعد الفطور سحبت ليال سماهر بقوه من يدها واخدتها معاها الى غرفتها
سماهر:آآآآآه ألمتي يدي شتبي؟
ليال:يلا عااااااد بقول لش شي عن ثامر؟
سماهر:اممممممم يعني....يلا قولي
ليال:أنا اعرفه من قبل ....و على النت
سماهر:اي؟؟؟
ليال:بافهمش اكثر....كانت من فتره جايتني اضافه ومن ولد ..مادري من وين
بالضبط اخد ايميلي..المهم قلت له اسفه مااكلم اولاد ومن هالكلام ....وبعدها
بيومين جتني اضافه ثانيه وباين من نفس الايميل انه ايميل بنت ...قبلت
الاضافه..ويوم على يوم صرت اكلمها لين ارتحت لها وجدبتني شخصيتها...لين طلب
رقمي وانا مارفضت لأن حتى انا كان ودي اكلمها واسمع صوتها..........اتصلت
علي على طول من اول ماعطيتها الرقم ..رفعته على طول وقلت الو ..واهي ساكته
عني..سكرت التلفون ورحت انا واتصلت عليها....ومن بعدها مارفعت ابدا الا
اليوم الثاني...وهنا الصدمه...انها طلعت ولد مو بنت ....رحت جلست ع النت
عشان ابي احظره بسرعه وطبعا كانت صدمه قويه لي....قبل لاأحظره قال انه كان
من زمان يحبني وبعد ايام ربنا بيجمعنا بادن الله..وقبل لاأسكر حط صورته في
الصوره الرمزيه وقال هدا انا وقال لي اسمه واسم عيلته...
سماهر بدهشه:معقوله؟؟؟
ليال:هدا الي صار
سماهر:بتوافقي الحين لو لا؟
ليال:انتي شتقولي؟
سماهر:مادري بس بصراحه احس هللي صار شي عادي
ليال:بافكر
ـــــــــــــــــــــــــ ـــــــــــــــــــــــــ
علاء في مجلس بيت ابو نادر:ابي اختي
نادر: ولا خاطفينها؟
علاء:مو حظرتكم حرمتوني منها يوم
نادر:حشا ماصارت هدي ..وبعدين ليش مستعجل عليها؟
علاء:يووووووه اشتقت لاختي شفيك؟
نادر:هههههههههههاي اصلا الحين رايحين السوق يعني مابتصير معاك بعد
علاء:عجل روح الى عمتك قول لها
نادر:الحين
ـــــــــــــــــــــــــ ــــــــــــــــــــــــ
احمد كان طالع عشان التحقيق الي مسويينه له ورجع واهو مبتسم
باقر:امممممم اكيد براءه
احمد:ههههههه وين انا و وين البراءه؟
ماجد:عجل ليش الابتسامه ماليه وجهك؟
راح احمد وقعد جنب باقر وطالع فيه:لأن هالعله اللي قاعد جنبي بيقدر يزور
ابوه
باقر:هههههههههههه انا ازور ابوي؟مسجون وازور ابوي؟ماقلت ابوي بيزورني قلت
انا
احمد:عجل بكيفك..المهم ان انت المفروض بتطلع اتزور ابوك الحين وفي هالوقت
في المستشفى ....لكن الله يعينك ع الشرطه اللي بيمشوا معاك واحد يمينك و
واحد يسارك
باقر:احمدوه اتكلم بجد
احمد:والله العظيم اتكلم بجد
قام باقر وحضن احمد
ماجد:صادق طالع المصالح وش اتسوي
احمد:مو يعجبك التنفس برا السجن وتنحاش؟
ماجد:هههههههههه يسويها
باقر:وجهك اسويها..اصلا مااقدر افارقكم ادا بنحاش باخدكم معاي
ماجد:دخيلك...بس ابي انسجن سنه واطلع مابي الفتره اتزيد لاني انحشت
ـــــــــــــــــــــــــ ـــــــــــــــــــــــــ
سماهر وليال في المجمع.. ونادر وعلاء مع بعض
ليال:افف سماهروه تعبتيني كل هدا اكسسوارات؟
سماهر:شسوي كل ماشفت محل الاقي عنده شي حلو
ليال:تعبتيني
جات الى سماهر وحده من وراها وضربتها على كتفها
سماهر اختلعت ودارت وجهها
سماهر:روعوه؟
روعه:جنيه..كيف عرفتيني؟
سماهر:من عبايتش
روعه:سماهر تعالي معاي داك المحل فيه اشياء كثير حلوه
سماهر:لااااا الحين بنطلع من السوق خلاص
روعه:لا بس هدا المحل بس
سماهر:اهاا فهمت عشان ديك يعني؟يلا انروح
دخلو سماهر وليال وروعه
وسماهر دخلت بدون ماتطالع بلوحه المحل ولما دخلت شافته محل ولد خالتها
سماهر:ههههههه
روعه:شفيش؟
سماهر:لحظه بس
اما سامي بهالوقت كان يطالع في روعه من بعيد لبعيد لأنه عرفها
سماهر:هاااااي سامي؟
سامي بصدمه:سماهر؟؟؟
سماهر:اي سماهر
سامي:من الي واقفه معاها ؟
سماهر:اي وحده فيهم؟
سامي:اللي عباتها فيها لون برتقالي
سماهر:صاحبتي
سامي:طلعت نفسها اللي احبها
سماهر:استحي على وجهك ..يلا يلا باي
سامي:تعالي
سماهر:نعم؟
سامي:بتصل عليش الليله بتكلم معاش
سماهر:عارفتك شتبي..باي
رجعت سماهر الى ليال و روعه وكانت روعه منقهره من سماهر لانها كلمت سامي
وسبقتها ليال بالسؤال:تعرفيه؟
سماهر واهي اتناظر روعه:ولد خالتي
بهالوقت روعه ابتسمت وحست انها بتعرفه من سماهر اكثر
ـــــــــــــــــــــــــ ـــــــــــــــــــــــــ
باقر رجع للسجن وباين على عينه انه كان يبكي وفي حال لايحسد عليها
وكان يمشي بتمايل من التعب وشوي ويطيح
كانوا ماجد و احمد وصادق مستغربين من حاله
قام له احمد وبسرعه صار جنبه :شفيك باقر
باقر من كثر تعبه رما حاله على الارض وحط يده على وجهه:آآآآآآه شسويت انا
في ابوي؟عدبته يا احمد عدبته....
وزاد صياحه
صادق:باقر اتكلم بوضوح شصاير؟
باقر بانهيار شديد وشده في الصوت:ابوي مات فهمتو الحين ؟
ونزل راسه وخفف من حدة صوته:توني داخل المستشفى..قلت لهم عن ابوي ...قال لي
توه مات من 5 دقايق...
ورجع الى نبرته العاليه:ليش يايبا مانتظرت اتشوفني ليش؟
صادق:خلاص باقر هدي الله يخليك هدي
باقر:وشلون اهدي؟ابوي مات قبل مابشوفني ويفرح بشوفتي..ابوي مات قبل لاأشوفه
وافرح لشوفته....ابوي مات وخلاني وحيد بدنيتي...من لي الحين وانا مقطوع من
شجره؟ من لي غير نفسي؟
ماجد: باقر أبوك يكفيه منك ركعتين له و الدعاء بالرحمه ..والقرآن..اراف
بحالك اشوي وادعي له
ـــــــــــــــــــــــــ ـــــــــــــــــــــــــ
سماهر راحت لبيتهم و على طول اخدت شنطة السفر وعدلتها
اتصل عليها سامي
سماهر:هلا
سامي:يااهلين بالغلا
سماهر:اممممم عرفت مطلبك..روح روح مشغوله
سامي:وش الي شاغلش يا حظي؟
سماهر:اجهز شنطة السفر
سامي:طيب انا مابي شي ماباخد من وقتش اكثر من 3 دقايق
سماهر:بسرعه شتبي؟
سامي:شنو اسم صاحبتش؟اقصد الحبوبه اللي حبيتها
سماهر:اثقل عاد سامي.ماباقول اسمها عيب
سامي:يلا عاد
سماهر:لا عيب
سامي:مره اتصدقي؟استفدت من اتصالي الحين
سماهر:واجد استفدت..انا سماهر وماتستفيد مني؟مايصير
سامي:روحي مابيش
ومن بعدها على طول اتصلت عليها روعه
سماهر:ياألله توه مسكر مني ولد خالتي والحين انتي؟
روعه:جد؟اتصل عليش؟يسأل عني؟
سماهر:اتصدقي شيقول عنش؟يقول انش ام عيون زايغه
روعه:لا والله ؟انا ولا هو؟
سماهر:ههههه امزح معاش شدعوا
روعه:طيب شنو كان يبي؟
سماهر:يسألني عن اسمش بس ماقلته له
روعه:هو شنو اسمه؟
سماهر:ياشيخه؟انا اسمش ماقلته تبيني اقول اسمه؟
روعه:هو ولد عادي
سماهر:حلمش انطق بحرف من اسمه بعد
روعه:يلا عااااااد حبيبتي
سماهر:تحلمي
روعه:متاكده؟
سماهر:ايوه
روعه بعصبيه:باي
سماهر حبت اتزيد عصبيتها:هههههه باي
ـــــــــــــــــــــــــ ـــــــــــــــــــــــــ
علاء دخل غرفة سماهر واهي منشغله بتعديل شنطة السفر
علاء:سهورتي؟
سماهر:هممم؟
جلس علاء جنب شنطتها:ألله..كل هدا؟
سماهر:لعلمك كل هللي محطوطين ولا شي... بالنسبه لي الحين ولا حطيت شي
علاء:حطيتي عطوراتش وكريماتش والاكسسوارات
سماهر: اكيد
علاء:ابد ماتنسيهم انتي بعد؟اللي يشوفش يقول رايحه تسكنين بصاله افراح مو
رايحة اتسافرين
سماهر:ماأستغني عن جمالي
علاء:ألله عليش
سماهر:جهزت شنطتك؟
علاء:لسا تو الناس
سماهر:لاتنسا اتحط الجل بس
علاء:افا عليش
سماهر:طيب ممكن طلب؟
علاء:اطلبي
سماهر:ابي وحده من الصور اللي عندك حق صاحبتي صبا
علاء:وليش؟
سماهر:كدا..وووووو يمكن اوريها اياها
علاء:اوووك
سماهر: بتصير معانا في السفر
علاء:والله؟
سماهر:والله
ـــــــــــــــــــــــــ ــــــــــــــــــــــ
فــيـ يومـ العيــد:
سماهر اول وحده صحت من النوم ..راحت عى طول تتروش وتلبس الجديد والعطر
ماليها من فوق لتحت
طالعت حالها في المرايه وابتسمت
اتدكرت اخوها ماجد وزالت منها الابتسامه ...نزلت منها دمعه وحاولت تمحيها
بسرعه وراحت الى اخوها علاء بغرفته تبي تنقرشه عشان يقعد واهو مقهور
سماهر واهي تشيل البطانيه من عليه بكبره:ياحظي اقعد اليوم عيد وانت نايم؟
علاء:اووووووه ابي انااااام
سماهر:مافي..يلا اشوف قوم ..قدامي يلا
علاء:هاتي البطانيه بردت
راحت سماهر وطفت المكيف:وهدا بعد عشان تقعد
علاء:سماهر ترا بدبحش،،انا بالويل اليوم قعدت ورحت اصلي صلاة العيد
سماهر:خيابتك يالخايب....خد البطانيه ونام بس خمس دقايق وتقعد وكاهو الساعه
المنبه قدامك وباشغلها وانت عارف انها مزعجه زين؟
راحت سماهر اتصلت على ليال
ليال:هااااااااااااي
سماهر:هايات ...كيف الحال؟
ليال:تمام ..كل عام وانتي بخير
سماهر:وانتي بصحه وسلامه .من العايدين السعيدين
ليال:يارب...
سماهر:اخبار عريسة الغفله ؟
ليال:هههههههههههه امممممم شقووول؟
سماهر:ليش في شي؟
ليال:احم احم ..اي في...بصراحه اهم استعجلوا على الموافقه عشان لو وافقت
انسوي الملكه قبل لاانسافر..وانا وافقت
سماهر:جد؟....مبروووووووووك
ليال:الله يبارك فيش ..والملكه بكره
سماهر:من جد تتكلمي؟
ليال:اي والله..لاتقولي يبي لش اتروحي السوق ولا شي...لاتنسي الفستان اللي
شريتيه من المجمع يوم احنا مع بعض..والاكسسوارات عاد خيرات الله عندش
سماهر:ههههههه اي ادري..بس استعجلتو
ليال:يقولون يبوني لو سافرت اقدر اتواصل معاهم و مع ثامر
سماهر:احم احم..من الحين بيبدي الحب؟
ليال:هههههه ايوه
بعد ماخلصت سماهر مكالمتها مع ليال ركبت الى اخوها علاء
سماهر:فكرت بعد للحين ماقعدت
علاء:ربع ساعه من قعدت وسبحت
سماهر:ربع ساعه؟
علاء:اي
سماهر:ماانتبهت
اتقربت سماهر الى اخوها علاء ومدت له يدها عشان اتسلم عليه
سماهر:كل عام وانت بخير
علاء باستغراب:وانت بالف خير
سماهر: وين عيديتي؟؟
علاء: فااارقي عن وجهي أشوف
سماهر: يالشحي حدك بخيل
ـــــــــــــــــــــــــ ـــــــــــــــــــــــــ
في السجن:
ماجد:باقر حرام اللي اتسويه في نفسك والله حرام
باقر:حرام؟خل اشوف لو انت اللي فقدت ابوك شنو بتسوي
سكت ماجد ونزل راسه
صادق:باقر؟اليوم عيد ...فرح حالك اشوي
باقر:افرح حالي وابوي في القبر؟ابوي في القبر انتو ماتفهمون؟افرح وابوي
مدفون؟افرح وابوي مو موجود؟..افرح وابوي الحين مو ملاحظ العيد؟
قاطعهم الضابط داخل لهم
الضابط:ماجد آل ...... لك زياره
ماجد طلع مع الضابط لين صار في مكان الزياره
ام ماجد اول ماشافت ولدها بكت
راح لهم ماجد وسلم عليهم ومو عارف كيف يتقدم لهم بعد اللي سواه
ماجد:يما؟كل عام وانتي بخير
ام ماجد:ماباكون بخير ياولدي الا وانت قريب مني
ابو ماجد:ام ماجد مو وقت هالكلام الحين
ام ماجد نزلت راسها:ان شالله
ماجد:يبا سامحني
ابو ماجد:لاتعتدر ياولدي المسامح كريم
علاء ونادر حسوا بكهربة الجو
علاء:احم احم لنا الله
ابتسم ماجد:مانتبهت لكم ..وحشتوني يا حمير
نادر يمثل حالة الملل:اوووه بدا السب..علاء خل نطلع مالنا مكان...فمان الله
ماجد:ههههههههههه والله امزح معاكم...وحشتوني
علاء:واحنا مشتاقين لك اكثر والله يا ماجد ..ماتتصور شقد
ماجد:كيف حال سماهر ؟
علاء:تمام
ماجد:سلم عليها وبارك لها بالعيد...وقول لها تعدرني لاني قلت لكم ماأبيها
تجي معاكم..بس ماأتحمل اشوفها
ـــــــــــــــــــــــــ ــــــــــ
في الليل الساعه 9 ونص
سماهر دخلت المجلس وبيدها اغراض للزيارات (الحلا وغيرها)
راحت شافت رجل ممدوده ولون البنطلون نفس لون بنطلون علاء وعرفت انه هدا
علاء وبدون ماتطالع وجهه ابد
حطت الاغراض على الارض واتكلمت وبدون ماترفع راسها وكات اتعدل الاغراض
سماهر:علاء نبي انروح الجبيل ..عسا لو مانرجع بدري..اهم شي نطلع ونستانس
والزيارات للأهل خلصت الحين..ممكن ياأغل- - - ((لا....منو هدا؟يعني انا
ساعه اتكلم ويطلع واحد غير اخوي؟؟))
للرواية بقية