بين السراب و الحب نظرة - الفصل 6 | روايتك

الجزء السادس: مازن حب يتصل على خالته ويتطمن مره وحد من سالفة سماهر: مازن:هلا خاله ام ماجد:هلا والله بولد اختي مازن:شو سماهر درت باللي صار بسالفة خطوبتها؟ ام ماجد:اي مو لله داق،لا والله ياولدي للحين ماتكلمت لها عن شي،افضل لو اقول لها واحنا في ايران احسن مازن:والله انتو الحريم الي عندكم خبره وانا اللي تسويه موافق عليه ـــــــــــــــــــــــــ ـــــــــــــــــــــــــ في اليوم التالي: قعد سامي من النوم وراح يغسل ومن بعدها راح الصاله سامي:صباح الخير ابو مازن:الا مساء الخير سامي واهو يقعد ع الكنبه بتعب:معليش يبا بس كنت تعبان البارح مازن:يبا ابي فلوس عشان اشتري سيارة جديده ابو مازن:وسياراتك الثنتين وشفيهم؟ مازن:وحده مليت منها والثانيه بالورشه ومابي اركبها واللي خربها واحد غيري ووجه نظره الى سامي بخبث:عايفنها خلي اللي خربها يركبها مابيها سامي نزل راسه باستهزاء:زين والله فيك كرم مازن:ها يبا شقلت؟ ابو مازن:قلت لا وادا سياره ماتبيها اظن فيه سياره ثانيه وادا كنت بشتري سياره فبشتريها لاخوك لانه ماعنده سياره مازن:اخر كلام؟ ابو مازن:ايوه اخر كلام وادا تبي سياره اشتريها من راتبك عجل ليش تشتغل وتاخد راتب؟حق السهر والمسخره؟ مازن:عن ادنكم رايح غرفتي راح مازن واهو مقهور ويطالع اخوه بحقد اما سامي نزل راسه وابتسم ابتسامة النصر ـــــــــــــــــــــــــ ـــــــــــــــــــــــــ ليال من العصر بالاسواق من مجمع لمجمع ومن محل لمحل نادر:اوووووووووف تعبتيني ليالوه رجلي ألمتني ليال:وجع انا عمتك لاتكلمني كدا نادر:وانا اكبر منش ارأفي بحالي انا الي صايم وانا اللي افر بهالاسواق؟ماصارت هدي!!اوعي ياعمه ترا جايين يتقدموا لش هم مو ليله الخطوبه هدي ليال:ادري،،بس اتصدق يا نادر نادر بتعب:شنو؟ ليال:احس هالمره غير نادر:من اي ناحيه؟ ليال:خطوبتي ،مع اني ماشفته ولا اعرفه ولا شي حتى اسمه مالي علم به للحين الا اني مرتاحه لهالشي وحاسه اني بوافق نادر:اولا اسمه ثامر ليال ناظرت نادر لثواني نادر:شنو؟ليش اتطالعي كدا ليال:لا ولا شي كمل مشي نادر:وثانيا مادري بصراحه انا لما شفته بالديوانيه ارتحت له كثير لكن عيبه انه خجول ماتستاهليه ليال:اسكت ابرك لك وقفت ليال عند مكان جلابيات :واااااااو شوف نادر حلوه صح؟ نادر:حلوه مره لكن ماتستاهل اتكون الى مناسبه عاديه مثل المناسبه تبعش ليال:لالالا ابيها لازم يشوفوني متكشخه نادر:بس الظاهر انها غاليه واجد ليال:عادي ابيها اتسوقت ليال وماخلت شي بالمجمعات ماأخدته دخل نادر البيت بتعب وقعد نادر:ابوي ترا اختك هدي ماينطلع معاها اسواق ابو نادر:ههههههه من قدها؟خلها تستانس اشوي نادر:يبا فلستني .. ابو نادر:ها ليال؟ان شالله على تفليس ولدي خلصتي كل شي؟ ليال :الحمد لله خلصت كل شي ابتسمت بخجل وراحت نادر:ياعيني توه الخجل نازل ابو نادر:اووووه يانادر يعني بنت بتنخطب وشتبي موقفها؟انت بكبرك لو خطبت بتستحي مابالك بها هي بنت ؟ وقت الفطور ليال:ياربي مايمديني افطر نادر:وليش؟ ليال:ابي اتعدل من الحين ابو نادر:يااختي وين كوين يجون!!قعدي فطري يلا عاد عشاني نادر:يلا اشوف قعدي والا اخليش ماتشوفي وجوه النسوان اللي بيجوو واخلي الرجاجيل بس هم اللي يشوفوا شغلهم ليال:لالالا خلاص باكل وانا ساكته ـــــــــــــــــــــــــ ـــــــــــــــــــــــ مازن من بعد الفطور راح لغرفته ((آآآآآآآه احوالي كلها اتغيرت،،ماكنت كدا،،كانت اخلاقي غير عن كدا بكثير شاللي وصلني لهالمواصيل؟عايش ومعيش الناس معاي بالحقد؟لالا هدي مو حاله ،،لازم اتغير وارجع مثل ماكنت،،هاللي اسويه مو زين)) ـــــــــــــــــــــــــ ــــــــــــــــــــــ ليال:نادر اتصل على صاحبك اخو سماهر نادر باسغراب مخلوط بعصبيه خفيفه ونظرات تساؤل:وليش؟ ليال:بسم الله،اقول اعقل بس لاتفكر بعيد،،ابي اخته كل ماأدق عليها ماترد نادر:اهااا،،تتحدي اني اخد الجوال وبس ادق عليها ترفعه؟ ليال:لا والله؟اعقل بس تبيها اتكفخني؟ نادر:اووووووه لاتخافي ماباكلمها بس ترفعه على طول بعطيش اياه ليال:اوكي انشوف وانشوف يدك الي فيها بركه لوين بتوصلنا عطت ليال نادر الجوال نادر:وشو اسمها في جوالش؟ ليالقلب فاضي) نادر:وليش يعني؟و وش عرفش ان كان قلبها فاضي او لا؟ ليال:ههههههاي سماهروه تحب؟وينها و وين الحب يلا يلا اشوف خلصني مستعجله من اول رنه رفعته سماهر واهي معصبه اشوي:ماصارت هدي ليالوه!!ماحد يوقف اشوي جنب المرايا يتعدل؟اديتينا ماصارت في خمس دقايق بس القا 4 اتصالات وثنيتين كول مي نادر من سمع كلامها او بالحرى صوتها ابتسم وقال بصوت فيه شفافيه:اسف سماهرمن سمعت صوته انصدمت وسكرته على طول ليال:ياخبل شسويت انت؟ ام لها نادر من على الكنبه واللي كانت اهي واقفه وقال بخبث:انا خبل؟ ليال:الحين البنت وش بتقول؟ عطاها نادرالجوال وراح :اسف بس مااقدر اخفي حبي،يمكن اتهزها مشاعرها اشوي وتعرف اني احبها ليال:مجنون،،ياألله شسوي وياها الحين؟ اتصلت مره ثانيه ورفعته سماهر بعد تردد طويل وبدوت ماتتكلم ليال((احسن شي اسوي حالي ماأدري عن الموضوع)):ألووووو؟ سماهر ارتاحت:هلا والله ليال:متى بتجي سماهر؟ سماهر:الحين البس عباتي عشان اجي ليال:ان اتاخرتي ياويلش سماهر:هههههه ولا يهمش بكون وياش لين اتملي مني ـــــــــــــــــــــــــ ـــــــــــــــــــــــــ علاء:الا تعال وش صاير بين هدي عمتك ويا اختي؟اشوف طالعه لينا بسوالف جديده!! نادر:والله شوف!انت صاحبي وماأخبي عليك شي،،بصرحه جايين خطاب لعمتي و قالت عمتي تبيها عشان اتساعدها علاء:لييييييييش؟لايكون تبون اهل المعرس يحطون عيونهم على اختي؟ نادر:لالا تخاف مجرد اتساعدها وبس ،،تدري عمتي مالها احد!! ـــــــــــــــــــــــــ ـــــــــــــــــــــــــ _*&@بعرفكم على عائله خطيب ليال@&*_ _ أم و أب ثامر_ _ ثامر_ & وعمره 23 سنه&وسيم كثير و طيوب لكن عيبه انه في اغلب الأوقات خجول و اهو الولد الوحيد& _ شجون_ & إخت ثامر واصغر منه وعمرها 20 ونفس الشي البنت الوحيده ************************ ********************* **************** ثامر كان لابس الثوب والشماغ ثامر واهو يطالع حاله في المرايه:ها يمه شرايش فيني؟ ام ثامر واهي اتقوم لولدها واتبخره وبابتسامه مو واسعتها من الفرحه:قمر شجون:اي من قدك ياشيخ؟امي بتدلعك الحين ام ثامر:جاينش الدور ان شالله ونفرح فيش انتي بعد ثامر:كح كح يما خلاص شيلي البخور فطست ام ثامر:خلاص استنا اشوي بس بقرا عليك المعودتين طالعت فيه اخته شجون وغمزت له ـــــــــــــــــــــــــ ـــــــــــــــــــــــــ سماهر:ليالوه ياعمري عروووس ماشالله تبارك الله ليال:وانتي بعد ترا حلوه سماهر:ماعليش مني الحين عليش من حالش ياهبول ،،احسش في ليلة حفله خطوبتش او جلوات مو بس خطبه عاديه ليال بخجل:لازم نتكشخ ـــــــــــــــــــــــــ ــــــــــــــــــــــــ في وقت زياره عائله ابو ثامر ابو نادر:هلا والله بالغاليين حياكم تو مانور البيت دخل ابو ثامر وسلم على ابو نادر وحضنه ابو نادر:حياك يالغالي البيت بيتك ومن بعدها سلم نادر على ابو ثامر وسلم ثامر على ابو نادر وحبه على راسه ابو نادر:حيا الله معرسنا هلا والله اتفضل ومن بعدها سلم ثامر على نادر وسلامهم المفضل طبعا وبوستهم(على الخشم)بالرغم من انها عاده مو سعوديه... بس شباب ـــــــــــــــــــــــــ ـــــــــــــــــــــــــ في غرفة ليال: ليال:سماهر روحي انتي لهم الحين وبعدين انا اتشجع واطلع سماهر:طيب نزلت سماهر لهم وسلمت عليهم وجلستهم بالصاله ام ثامر:من انتي يابنتي؟ماعلمي بــليال عندها خوات سماهر:انا صاحبتها سماهر ام ثامر:الله يخليكم لبعض سماهر:عن ادنكم دقايق ام ثامر:ادنش معاش لما طلعت سماهر شجون:يما شوفيها حلوه ام ثامر:صلي على محمد لا تحسدي البنيه شجون:اللهم صلي على محمد وال محمد طلعت سماهر واهي منحرجه وحاسه حالها مابتقدر اتقوم بالواجب بشكل زين .. لو هي مطرشه أمها احسن مو عدله كذا راحت على طول سماهر الى ليال سماهر:الله يقطع ابليسش والله اني منحرجه مو حاسه حالي اتكلم معاهم عدل ليال نزلت راسها بضيقه خلق:اسفه ماكان قصدي يوم اطلب منش تجي اتساعديني اني احرجش سماهر:اووووه يا ليال!!اقول... انا اونتي واحد لا تخافين لو انا انخطبت باسوي لش نفس الي سويتيه لي ،،يلا اشوف نزلي سلمي عليهم و ودي لهم العصير ياحلوه ليال:استحي سماهر:يعني انا الي مو مستحيه؟؟يلايلا قدامي ليال:طيب بس باشوف حالي في المرايه وبنزل.. انتي الحين اتقدمي عني سماهر:طيب بس لاتتاخري *********************** ابو نادر يغمز لولده عشان يقوم يجيب الشاي والقهوه قام نادر على طول وكانت سماهر بالمطبخ اتجهز العصير والحلا عشان النسوان دخل نادر المطبخ وراح يشرب ماي وبدون مايدقق باللي قدامه:ليال سوي بالسريع الشاي و القهوه سماهر من سمعت الصوت انصدمت وطالعت وراها حط نادر الكاس بالمغسل وكان بيرجع للمجلس..انتبه للي واقفه جنبه:سماهر؟؟ سماهر لا شعوريا ظلت واقفه مكانها ولمست على شعرها تتحسس حجابها الي مو عليهاوراحت على طول الى غرفة ليال سماهر:اشوف قدامي انتي يلا روحي للنسوان ليال:وش فيش باين عليش الخوف؟ سماهر:لا والله ولا شي انتي وش دراش غير عن هالمرايه اللي سنه واقفه جنبها ليال:خلاص خلاص نازله الحين نادر كان لسا واقف مكانه ومنصدم ((ياألله الحين انا ابي الشاي والقهوه،اوه كاهم اكيد للرجال مو للنسوان))اخدهم وراح دخل بهم المجلس و صورة سماهر لسا بمخيلته نزلت ليال وراحت اتسلم على ام ثامر وبنتها شجون ام ثامر:حيا الله عروستنا ياهلا والله ليال بخجل:الله يسلمش وسلمت من بعدها على شجون وطلعت على طول عشان تجيب لهم العصير وكانت سماهر وراها وماسكه الحلويات ولما رجعوا ام ثامر:احنا مانبي انكثر عليكم ونزعجكم ونفس الوقت نخجلكم لكن انتوا اكيد عارفين ليش احنا جاين هنا سماهر ابتسمت وطالعت في ليال اللي كانت منزله راسها من الخجل ام ثامر:احنا جاين نخطب ليال الى ولدنا ثامر ليال لما قالت ام ثامر كدا حست قلبها طبووول ام ثامر:واحنا بنعطيكم الفرصه اللي تبون اتفكرون فيها وارجوا انه قبل العيد بيوم اتخبرونا ادا ماعليكم امر وطلعت ام ثامر من شنطتها صوره الى ولدها ثامر ومحطوطه في ظرف و ورقة معلومات عن الخطيب وعطتها الى سماهر ـــــــــــــــــــــــــ ـــــــــــــــــــــــــ بعد ماطلعوا عائله ابو ثامر راح نادر لغرفته ورما حاله بقوه على سريره ((سماهروووه طلعتي قمر بزيااده،،ياويل حالي ياويلي)) ـــــــــــــــــــــــــ ــــــــــــــــــــ ليال:سماهر؟؟؟ سماهر واهي منشغله بالحوسه في شنطتها: هممم؟ ليال نزلت راسها:سماهر انتي كفيتي و وفيتي معاي غناتي سماهر:شهالكلام ليال احنا مابينا هالكلام ابدا ومهما صار فاهمه؟ ليال بحياله:سماهــر؟؟ سماهر:عيونها ليال:نامي معاي الليله ساهر:مجنونه انتي ؟ ليال:ليش؟ سماهر:بيتكم كله رجاجيل وتبيني انام معاش؟ ليال:لا اصلا مثل ماتشوفي اولا البيت كبير و هالطابق مقسوم قسمين قسم لي وقسم الى نادر يعني مرح يشوفش احد وادا تبي مرح نطلع من الغرفه ابدا والله سماهر:امممم اشوف راي اهلي اول بعدين اقرر ليال:اممم يعني انتي مبدئيا موافقه؟ سماهر:yes why not ليال قامت حضنتاها:وااااااااي سماهر:حراميه ليال:هههههههه ـــــــــــــــــــــــــ ــــــــــــــــــــــ نادر جالس مع علاء بعد ماجوا يطلبون عمته وطبعا بعد ماشاف نور عينه سماهر وكالعاده مسويين جلسه في الكراج كل واحد بكرسيه رن جوال علاء.. علاء:هلا سماهر؟ سماهر:يااهلين ،،،علاء انا بانام في بيت عمة صاحبك نادر علاء:نعم نعم نعم؟ سماهر:بسم الله شفيها يعني علاء:اولا لاأمي ولا أبوي بيرضوا ،،وثانيا البيت كله رجال وش لش اتنامي هناك؟ نادر وقتها مستغرب وين بتنام هالبنت وشنو صاير؟واي بيت اللي كله رجاجيل علاء:لا يعني لا سماهر:علاء اسمع لحظه امي وابوي قلت لهم وقالوا لي عادي وادا على ان البيت كله رجاجيل فــأنا مو هبول عشان أطلع واقعد ويا الرجاجيل يعني باكون في غرفتها فهمت ياعاقل؟ علاء:اي اتقولي الى امي وابوي وبعدين تجي لي انا ؟؟خلاص روحي سماهر:طيب تجيب لي بكره العصر ثياب؟ و عاد لاتنسا روحه السوق علاء:اوكي،،يلا باي سماهر:باي بعد ماسكر علاء: نادر:وين بتنام؟ علاء:في بيتكم،،شوف مو تستعبط واتروح مكان هي قاعده فيييييييه!!!! نادر: اشرب شيشتك وطمننا باسكاتك بس ـــــــــــــــــــــــــ ــــــــــــــــ سماهر:ليالوه ماتبي اتشوفي صوره ثامر؟ ليال بخجل:شلون ماأشوها أكيد باشوفها سماهر:شفتها يوم انتي اتروحي لاخوش من اشوي بس نصيحه لاتشوفيه مو حليو يلوع الكبد ليال:يلا عاااااد؟ سماهر:هههههه امزح عطتها الظرف الي فيه الصوره واخدته ليال و طلعت الصوره لما شافت ليال الصوره بان عليها ملامح الخوف والانهيار سماهر:ليال شفيش؟ رمت ليال الصوره ع الارض وانبطحت على سريرها سماهر:ليال؟شنو؟شفيه شصاير؟ ليال ببحه الصياح:اتركيني ابي انام سماهر:مو قبل ماتتلكمي خوفتيني ليال بعصبيه:قلت لش ابي انام سماهر:طيب طيب خلاص نامي ابتعدت عنها سماهر وبراسها الف سؤال وسؤال ـــــــــــــــــــــــــ ـــــــــــــــــــــــــ سماهر قعدت من النوم ماشافت ليال في الغرفه ((فشله انزل الحين بدق على جوالها يمكن عندها تحت)) ليال:ماأحلى التطور سماهر:ههههه ،،ياخبول ليش تركتيني ونزلتي؟ ليال:شسوي فيش ماتقعدي بسرعه انتي،،طفشتيني قلت انزل اسوي الفطور سماهر:في احد تحت؟ ليال:لا سماهر:دقايق وانا عندش في المطبخ لبست سماهر عباتها و نزلت لها سماهر:ها شخبارش الحين من بعد البارح نزلت ليال راسها:تمام سماهر:وخري وخري انا بكمل كل شي نادر راح صوب باب المطبخ وتنحنح:يالله يالله سماهر اتغطت نادر:سماهر اخوش برا يبيش طلعت سماهر التهويه لأخوها وسلمت عليه علاء:شتسوين؟ سماهر:اطبخ علاء:تطبخين؟ماأصدق ،،انتي بالبيت بالويل الحلا اتسوينه سماهر:والله ياحبيبي لان امي ماترضا اتخلينا نلمس شي من الاكل وانسويه،،فهمت الحين؟اما اختك عندها مهارات ماشاء الله علاء:انشوف!!انا الليله بفطر هنا ،،يلا خدي ملابسش سماهر:مشكووووور ـــــــــــــــــــــــــ ــــــــــــــــــــــــ ضحى*عاشقة ماجد* و*معشوقة ماجد* ((كيف اتحولنا للنسيان حبيبي؟معقول الحين نسيتني ومو قاعد تنشد غير حالك ومصيبتك؟ وانا ويني؟انا اللي كنت حياتك وعمرك كله،،،وين مكاني الحين؟ آآآآآآآه ياماجد ليش كدا تنساني وتعدبني،،وانت بنفسك تبيني انساك؟ مهبوله انا انساك؟)) فادي:ضحى وشفيش ماتكلميني؟ ضحى:هاا؟وش تبغا؟ فادي:امي تبغاش راحت ضحى الى أمها ضحى:نعم يما؟ ام ضحى:سكري الباب وتعالي ضحى سكرت الباب وراحت الى امها:نعم؟ ام ضحى:كيف حال بيت ابو ماجد؟ ضحى:هالاشياء انتو النسوان الخابرين به مو انا يما ضحى:انا قصدي ماجد،،وماجد من اختصاصش مو من اختصاصي ضحى نزلت راسها:مادري يما،،،اصلا من يوم انسجن ماجد وانا مالي نفس احد حتى سماهر وباقي صاحباتي ماأقعد معاهم ام ضحى:وليش؟ ضحى:من ضيقة الخلق ام ضحى:وبتبدي الحين تبكي؟شوفي يا ضحى ،،،،ام ماجد كلمتني ع التلفون اتقول انها ناويه تنتظر لين يطلع ماجد من السجن وتخطبش له،،،واللي قال لها اهو ،،كلمها ع التفون وقال لها هالشي،،،،طبعا مايحتاج اسالش عن رايش الحين ،،،بس بسألش لما يتقدمون لش رسمي ـــــــــــــــــــــــــ ـــــــــــــــــــــــــ ماجد واصحابه صادق وباقر،،واعدائهم عيسى و احمد ماجد:ماحسيت بحلاوة رمضان صادق:ولا انا باقر:ومن وين بنحس بالحلاوة واحنا هنا؟ ماجد:مو هدا المقصود صادق:اقول لك شي،،مو كأننا كلنا الثلاثه بنطلع مع بعض في نفس الوقت؟ باقر:صح..بس انت بتطلع بتطلع مو انا و ماجد صادق:وكيف؟ ماجد:انا و باقر بيقللوا المده عشان القرآن اللي بيرحمنا وان حفظناه كله بيقللوا المده الى النص باقر:الله عاد على تحفيظهم،،اللي يشوفهم يثبتوا معانا بالحفظ ماجد:اي والله نحفظ من جهه ويقيمونا وبعدها نحفظ الجزء الي بعده وننسى اللي كنا حافظينه من قبل وهم ولا داريين اصلا باقر:يلااا اهم شي بعد 6 شهور او بالكثير سنه ونطلع قام لهم عيسى واتقرب لهم وكان احمد نايم عيسى:هيه انتو قوموا اطبخوا لنا شي صادق:بعد شوي بيجيبوا لنا اكل عيسى:مابي من طباخهم ابي من طباخكم انتو باقر:وليش مو انت اللي تطبخ لنفسك عجل؟ عيسى:بكيفي انا آمر وانهي وانتو تمشوا ورا الي اقوله باقر:لا ياشيخ؟ عيسى:اي ليش في اي مانع يمنع؟ صادق: احنا مو خادمين لك ولأشكالك اتقرب له عيسى ومسكه من بلوزته:نعم؟عيد اللي قلته؟ ماجد:الله يهديك بس عيسى:شايفني مجنون عشان الله يهديني؟ ماجد:هالكلمه مو شرط للمجنون هالكلمه للكل صادق:هيه انت اتركه عيسى:انت ولي عني لا يجيك الدور جا لهم الشرطي:خير خير باقر:وين يجي الخير وهالزفت هدا معانا؟ عيسى يكلم الشرطي:وانت شدخلك جاي لنا؟يلا اشوف اقلب وجهك راح له الشرطي وطلع عيسى معاه بالغصب الشرطي:فاكر بتشوف الخير هنا؟والله اوديك حبس انت الوحيد الي فيه ويرتاحون اللي هنا وانا استريح من بلاويك اللي كل يوم طالع بها لنا للرواية بقية Like