الفصل 1
في احد ساحات المدارس الكبيره اللي تضم مرحلتين المتوسط والثانوي ، ووقت الفُسحه بالتحديد ، كانوا واقفين بمنتصف الساحه شلة بنات كبيره ، كانوا هم رعب الطالبات ، ولا احد يتجرأ يناظر فيهم ولا حتى يرفض لهم طلب مهما كانت صعوبته ، من خشونة منظرهم ، وقوة شخصياتهم ،
تكلمت اصغر وحده فيهم بخوف : مـ، ماقدر يالمياء
لميـاء رئيسـتهم واقواهم شخصيه وشكلها مُهيب حدت ع اسنانها : جود ! تراني مشتهيه اضربك من زمان
جود برعب ناظرت لصديقاتها اللي كانوا كلهم مثلها يخافون من لمياء بس وحده فيهم صرخت بوجهها : لمياء ! انا بروح اجيبهم
لمياء : انتي وجه مصايب ياياسمين ماراح يدخلونك الغرفه ، جود بريئه
جود : تكفين لمياء ، كيف تبيني اسرق اوراق الإختبار ماعرف
لمياء : هذي اخر سنه ، ابي اطلع بنسبه حلوه ، ومافي غيرك ، لإن اللي جنبك كلهم راعين سوابق
جود : بـ،
قاطعتها بعصبيه : بتمشين ولا كيف ؟ اذا خلص اجتماع المدرسات وانتي ماصعدتي بيجيك شغلك
جود رجفت : طيب لاتصارخين ، بروح الحين
لفت عنهم وهي تترقب نظرات البنات بحذر ، مشت للإداريه المناوبه ووقفت قدامها بهدوء وادب : استاذه ممكن اروح اجيب فلوسي ؟ نسيتها
الأستاذه : روحي ياجود
جود مرت من جنبها وصعدت للدور الثاني وقفت عند غرفة المعلمات وهي ترجف ، كانت فاضيه لأنهم حاضرين اجتماع عند المديره ، حست احد يضربها وصرخت : ااه
ضحكت : خوفتك ياجبانه ؟
جود : ياسمين ؟ كيف صعدتي ؟
ياسمين : بطريقتي الخاصه ، انتي انتظريني هنا انا بسرق اوراق الاختبار واجي
جود : لالا ، لو تعرف لمياء تموتني
ياسمين : لاتخافين
دخلت بثقه وكأنها تسوي شي عادي ، قعدت تنبش بأغراض المعلمات ودواليبهم ، لمحت من بعيد شي يلمع ، قربت له بدون تفكير وابتسمت لما شافته ، خاتم الماس واضح ان قيمته غاليه ، حطته بيّدها وابتسمت بإعجاب على شكله.
جود من برا كانت واقفه وتراقب بحذر سمعت اصوات تقرّب ، لمحت ظلال وعرفت ان المدرسات رجعوا ، انتفضت خوف.
2
شهقت برعب ودخلت للغرفه وهمست : ياسمين وصلوا ، وصلوا
ياسمين سحبتها بسرعه وتخبوا تحت احدى المكاتب ، جود دمعت عيونها وياسمين تحذرها بصمت ، دخلوا المدرسات وانتشرت اصواتهم وضحكهم.
ياسمين بهمس : اسمعي ابله خنفس وش تقول
جود غطت فمها تمنع شهقاتها.
وحده من المعلمات سحبت كرسيها بتجلس وصرخت لما شافتهم : بسم الله
جود زادت شهقاتها وياسمين سحبتهاوطلعوا وقفوا قدام المدرسات كلهم وساد الصمت بالمكان وكلهم بصوت حاقد : ياسمين ؟
ياسمين : مثل ماتشوفون ، وبعدين اجتماعكم خلص بدري ، كنت بسرق اشيائكم
وحده من المدرسات صرخت بقهر : خاتمــي، ياســراقه
سحبت ايدها بقوه وطلعت خاتمها : ياحقيره ، لوثتيه ليّ ، لو شايفه خير مافكرتي تقربين له ، مستحيل نسكت عنها لازم تنفصل عشان تتوب
بدوا المدرسات يتفقدون اغراضهم ، ياسمين حز بخاطرها لكن ماوضح عليها : كنت بجرب شكله بس ، لو بسرقه اعرف تماماً كيف اسرقه ومتى وبدون لاحد يدري ، وبعدين انتي حاطته ع الطاوله كأنك تقولين ياحرامي تعال اسرق ؟ بصراحه كنت احسبك ذكيّه لكن صدمتيني ياستاذه ساره.
استاذه ساره عصبت : قسم بالله ماتعدي هالحركات ياياسمين
جود : استاذه والله ماكنا نقصد
ياسمين ضحكت : ياغبيه ، لو ساكته افضل ، كيف ماكنا نقصد وحنا جايين نسرق ، استغفر الله بس
المدرسات عصبوا على ياسمين واخذوها للإداره واكلت انواع العقوبات.
ياسمين وهي توقع على تعهد : خلصوني عندكم شي اوقع عليه ولا امشي ؟
المديره : بنجلدك
مدت ايدينها : يالله جلدي
المديره : قدام الطابور
ياسمين : انا مشهوره ماله داعي تشهروني اكثر
المديره بإستحقار : مستانسه بوقاحتك ؟ قدامي يالله
مشت ياسمين وجود جنبها تبكي ، وقفوا قدام الطوابير وبدت المديره تقول مشكلتهم.
ياسمين بهمس : ياغبيه ، ليش ماهربتي لما شفتيهم
جود : ماقدرت اخليك ، الحين وش يفكنا من لمياء
ياسمين : انا احلها
المديره معصبه : ارجعي طابورك ياجود ، ياسمين تعالي
ياسمين تقدمت لها وفتحت ايدينها وجلدتها اربع جلدات ولاتحرك فيها ساكن.
مرت استاذه ساره ومدت لها الخاتم : اشبعي فيه
ياسمين حست بإهانه لكنها ابتسمت واخذته : ينفعني ، يجيب لي اربعين الف وانا جالسه
ارتفع ظغطها ماتوقعت انها تاخذه بس حبت تهينها : واطيه صدق
رجعت طابورها واستقبلتها عصبية لمياء وكل الشله عليها.
ياسمين ابتسمت : جود لاتبكين
لمياء : بتبكين كثير انتي وياها
ياسمين : جود ارفعي راسك بوريك شي
جود ناظرت فيها وهمست ياسمين : اخذت الأوراق
جود انصدمت : كيف ؟
لمياء استانست : صادقه
ياسمين : اي ، اوهمتهم اني رايحه اسرق اغراضهم الخاصه وبلشوا فيها ، نسوا اوراق الإمتحانات.
3
ياسمين : اي ، اوهمتهم اني رايحه اسرق اغراضهم الخاصه وبلشوا فيها ، نسوا اوراق الإمتحانات
جود : يمه ياسمين احبك
لمياء : فديت الذكاء ، لو ماني متأكده انك ثعلب ماخاويتك ، وينهم
ياسمين : بمكان امن
صعدوا ومروا من غرفة المدرسّات وياسمين لمحت المستخدمه معاها قهوه ومسكتها : ام ناصر تفضلي
ام ناصر استغربت وهي تشوف الخاتم اللي مدته لها ياسمين : وش هذا
ياسمين : خاتم هديه مني لك ، بمناسبة نجاحي ، ماتقبلينه ؟
ام ناصر ابتسمت : يامال العافيه
ياسمين : قهوي اول شي استاذه ساره ، يالله باي
جود : ياربي وش سويتي ؟ بتموتينها
ياسمين : تستاهل
ام ناصر دخلت وقهوت استاذه ساره اول شي واخذت منها الفنجال واول ماشربت لمحت الخاتم بيدها من قوة لمعته نزلت الفنجال بقهر : الله ياخذها ، حقيره ، مو متربيه ، اااه بس
ياسمين وجود سمعوا صرختها وكلامها ضحكوا وهربوا بسرعه وماكانوا يناظرون قدامهم فجأه جود صدمت ببنت ، كانت تشرب مويا وانكب كله عليها شهقت : الله ياخذك ماتشوفين
جود : الله ياخذك انتي ، في احد يشرب بهالزحمه ، تقلعي بس
سحبت ياسمين ورجعوا للفصل ، والبنت حمر وجهها من القهر : ماكون رغد اذا مارديتها لك ، طلع لك لسان ياجود ، شاده ظهرك بقروب الصايعات اللي معاك ، يصير خير
وصلت ياسمين وجود للفصل وكانت لمياء تنتظرهم على نار ، دخلوا بسرعه وطلعت ياسمين الورقه من داخل قميصها وكانت مخليتها بحجم اصبعها ، جابوا باقي البنات كتاب عشان يطلعون اجوبة الأسئله.
فتحت الباب استاذتهم ساره معصبه وصرخت : ياسمين !
استغربت من جمعتهم ، انصدموا ماكانوا حاسبين لهاللحظه ، فجأه وحده منهم طاحت وصرخوا كلهم : ليِنـا ، استاذه ساعدينا لينا مادري شفيها
دخلت بينهم وجلست عندها : لينا ردي علي شفيك
لينا فتحت عيونها وشافت ياسمين تغمز لها يعني خلاص خبينا الورق.
فزت لينا : ها ، شفيكم
الأستاذه : عسى ماشر تحسين بشي ؟
لينا : لا استاذه بس دخت
جود : اسم الله عليك لنا ساعه نحاول نصحيك
قامت لينا واستاذتهم اتجهت لياسمين بهدوء : ممكن اعرف وين بتوصلين بتصرفاتك ؟
ياسمين : لا مو ممكن
الأستاذه كشرت بوجهها وطلعت.
دخلت عليهم رغد ومعاها علبة مويا فتحتها وكبتها كلها على جود وصرخت.
مسكتها لمياء بقوه : خير وش عندك
رغد نزلت ايدها بقوه : شخصيتك ماتمشينها علي ، اللي يغلط علي اغلط عليه
لمياء : امشي الحين ماني فاضيه لك ، يجيك شغلك بعدين
رغد : ماخفت والله ، انقلعي عني ، وانتي جود مو عشانهم وراك تغلطين ع الناس ، بيجي يوم وتبقين لحالك حتى سمعتك بتروح ، لاتخلين الأشكال هذي تضيّعك
طلعت وتركتهم ، ورجعوا يحفظون الأجوبه ، ولمياء تتوعد برغد.
4
وقت الطلعه ، كانوا البنات واقفين ينتظرون سوّاقهم ووقفت عندهم سياره لونها اسود فخمه تدل على انّ اللي راكب فيها من الطبقه الراقيه.
جود : وين لمياء ؟
لينا : رجعت تجيب حاجه
جود دخلت تدورها ، والبنات شهقوا بإعجاب لما نزل صاحب السياره ، وقف عند الحارس يتكلم معاه ورجع ركب وعيون البنات مارمشت ابد ، كان عادي لكن في بنات شافوه بنظره ثانيه.
لينا : فتح الباب عشر ثواني وجمدني مكيّف سيارته ماشاءالله
ياسمين : يجنن يابنات ، حسيت بأنوثتي لما مر من جنبي
لينا : كادي وش فيك ساكته
كادي " صديقتهم " : تحت تأثير الخقه حالياً
ركبت معاه بنت وخلت الباب مفتوح وركبت بنت ثانيه ولاقفلت الباب.
ياسمين : شكلهم ينتظرون احد
كادي : ماشاءالله شكل كل المدرسه معاه
عند جُود دخلت وحصلت لمياء واقفه وتهز رجولها وشكلها تنتظر احد : لمياء السواق بيوصل اطلعي
لمياء : مالك شغل ، انتظروني
جود طلعت وووقفت قدام الباب بحيث لمياء ماتشوفها ، انصدمت من اللي سمعته.
لمياء لما شافت رغد بتطلع مسكتها وحشرتها ع الجدار : قدّ كلامك اللي قلتيه لجود ؟
رغد بثقه : اكيد ، اتركيني لايصير لك شي ماتوقعتيه مني
لمياء : ليش ماتعترفين فيني كـ بنت عم ؟
رغد : انتي صيري بنت اول ، بعدين اقول للناس هذي بنت عمي ، لكن بحالتك هذي ماتشرفيني
جود طلعت مصدومه ، ماتوقعت لو قليل انهم بنات عمّ.
لمياء : انتي بكل حالاتك ماتشرفيني ، ولا هذا موضوعي ، لاتتدخلين بجود يارغد مابي اضرك وانتي بنت عـ،
سكتت شوي وابتسمت : انتبهي لحركاتك
دخلت وحده من البنات : رغد اخلصي علينا ، فيصل له ساعه ينتظر
طلعت استاذه ساره : رغد ! وش تسوين مع هذي ؟
رغد : ولاشي مشينا يالله.
طلعت معاها وساره طلعت جوالها وارتفع ظغطها : مو وقته هالزفت ، يقول سيارته بنشرت ولا راح يجيني
رغد : انا بروح مع فيصل تجين معانا ؟
ساره : لافشله
رغد سحبتها وركبوا السياره : معانا ساره
ساره : السلام عليكم ، شخبارك فيصل
فيصل : ياهلا والله
سمعوا شهقات والتفتوا وراء بإستغراب : فرح ليش تبكين ؟
ساره : رغد وش فيها فرح ؟
رغد بتعب : وش دراني
فيصل : فرح صاير لك شي ؟
فرح : عشان صديقتي نقلت ماراح اشوفها بكرا
راحوا وهم يسولفون ، ياسمين وصديقاتها بحالة صدمه.
ياسمين بقهر : ابله خنفس ، ركبت معاه
لينا : تتوقعون وش تصير له ؟
كادي : اكيد من قرابته لأنها ماركبت قدام عشان نقول انه اخوها او زوجها
لينا : دقيقه اللي طلعت معاها كأنه زول رغد اللي جت تهاوشنا اليوم ؟
ياسمين : ايه رغد اخت ابله خنفس ، ياربي مابي اغبط احد بس يجنن
لمياء طلعت وجود تناظر لها مو مستوعبه ان العائله الفخمه اللي قبل شوي اهلها.
5
الساعه 4 العصر ، في احد البيوت الكبيره.
كانت رغد نايمه وصحت على صوت المنبه وقامـت ، توضت وصلت العصر ونزلت لأهلها ،شافت جالسين بالصاله اختها وعد ، وبنات عمها " شوق وفرح ".
سلمت عليهم وجلست : شفيكم متضايقين
وعد : عمتي ام تركي رجعت من امريكا
شوق : وعع جد مالي خلق لها
رغد : ابي افهم ليش كل هالكره لها ؟
فرح : لإنها ملقوفه و تحب تتدخل في كل شي و عليها لسان الله يكفيك شره العن من لسانك
رغد : كولي تبن ، لساني يهون جنب لسانك
شوق : لا واضح طالعين على مين
فرح : الله ياخذها ضايقتني بجيتها ، مادري كيف تقبلوها جيرانها الأمريكان هي وبناتها الغثيثات
وعد : والله بيصير فيه أكشن نلقى أحد نتسلى عليه والله صايرين نزهق
فرح : اي والله نطقطق عليهم شوي
شوق : وعد متأكده ان اللي مضايقك رجعة عمتي ؟
وعد تنهدت : بصراحه لا ، صار لي شهر ماشبكت احد
شوق : الله يقطع الرومنسيه الغبيه اللي فيك
وعد : تدرون شبكت عيال عمي كلهم بدون مايدرون بس واحد ماعطاني وجه
شوق : مين ؟
وعد : سعود
رغد : سعود حنا مو معطينا وجه ، تبين يعطيك انتي ؟
شوق : ع الأقل احمدي ربك ، سعود عايش بينكم ، حنا ريّان ماندري عنه
رغد : وش اخبار مرته ؟
شوق : تشوفينها تقولين هي اسعد انسانه بالدنيا لكن العكس صحيح
وعد : الشرهه على ابوك اللي عطاها لواحد مو كفو
فرح : ماطلبنا رايك بالموضوع
وعد : رايي اقوله بدون طلب
رغد تذكرت لمياء وكلامها ، انسدت نفسها.
➖
تــعــريــف بالشخصيـــات :
عائلـة ابـو سـعـود :
سعود 30 سنه.
ساره 28 سنه.
فهد 25 سنـه ،
اماني 22 سنه.
مشاري 20 سنه.
رغد 18 سنه.
وعد 15 سنه.
➖
عائلة ابو فيصـل ؛
فيصل 30 سنه.
ريان 27 سنه.
سلطان 25سنه.
شوق 20 سنه.
فرح 15 سنه.
➖
ابو سعود وابو فيصل عندهم اخت وحده اسمها دلال " ام تركي " واخوهم الثالث ابو لمياء توفى قبل ثلاث سنوات بقصه غامضه ، وبعدها سافرت لمياء مع امها ومارجعت الا قبل عدة اشهر.
دخل مشاري وهو مكشّر وناظر للبنات بطرف عين : ليش ماقلتوا ان لمياء وامها راجعين
رغد : والله ماندري يامشاري لين شفناها بالمدرسه
مشاري : واطيه قسم بالله ، لهم عين يرجعون بعد اللي سووه ؟
رغد : ماتابوا بعد ، بالمدرسه لمياء مسويه عصابه ومجننه خلق الله
شوق : مالنا شغل فيهم ، كان يربطنا فيهم عمي بس ، وعمي توفى
فرح : الله يرحمه
مشاري : نسيت اقول لكم ، خالي نواف برا يبيكم
وعد صرخت وفزت ولحقتها رغد بحماس ، خالهم الوحيد طلعوا له وركضوا لحضنه ، كان مربيهم ويحبهم بشكل لايُعقل .