الفصل 6
رهين : هذا واهوا لي الحين ما شرف البيبي صرت غليظه لو ولدتي شبتسون
رنا صرخت عليها : رهييييين .. شوبكي اليوم بتزني كتييير
رهين : انا الحين ازن كتير .. عيل منو اول كان يقول اني حس البيت !!
رنا عطتها كف : بل ما تحترميني شوي .. خلي عندك ذووق لما تتكلمي معي .. واعرفي مين عم بتحاكي قبل ما تنطقي بكلمه فهماانه
رهين حدهااااا مصدومه ومو مستوعبه اللي صارر لها " هذي امي اللي مدلعتني آخر دلع واللي كانت تحضني بحضنها وانا صغيره لما ابوي يزفني اذا كسرت شي ! .. هذي امي رنا ؟؟ .. هذي امي اللي كانت تتحمل هذرتي لما كنت صغيره ولين كبرت !! .. لا لا هذي مو امي اللي اعرفها " رهين حست بغصه بقلبها وخافتها العبره
رهين : مسامحتج يما
وراحت غرفتها وقفلت على نفسها الباب ودفنت نفسها بالمخده وقعدت تبجي
رهين " ياربي انا شسويت عشان جذي تعاملني امي .. شاللي خلاها تقلب علي "
:: غرفة سبيجه ::
العنود : يلا سبوج انا بمشي تأخرت
سبيجه : افف قعدي شوي تو النااس
العنود : اي تو الناس ؟ .. الساعه 8 وامي ماترضا اطلع بروحي وارد بعد الـ8 .. خو تعرفين امي تخاف علي
سبيجه : لا وااي ما اعبر على الدلع
العنود : هههههههههههه
سبيجه : لحظه لحظه .. قبل لاتروحين لاتنسين الشحن مالج
العنود : ايييي صح
سبيجه : انا بقول حق عادل ييبه لج وبروح غرفة برور اييب لج صورنا ايام الثانوي اوكي
العنود : يلا بسررعه ان تأخرتي ياوليج
طلعت سبيجه وراحت حق عادل وقالت له يودي الشحن لها واهيا راحت غرفة ابرار
عادل دش الغرفه لان الباب كان مبطل وكانت العنود قاعد تلعب بفونها
عادل : سلام
العنود : هلا عادل
عادل : هذا الشحن .. مشكوره عنود
العنود : العفو ماسويت شي
عادل : بتروحين الحين ؟
العنود : اي !
عادل : تبين اسايرج لي البيت
العنود : لا عادي انا متعوده
عادل : اممم على راحتج ديري بالج بالطريج الحين زحمه ،انا استأذن وابتسم لها
العنود ردت له الابتسامه ونزلت راسها وحدها منحرجه ومستانسه من داخل
سبيجه ردت الغرفه ومعاها الصور ..
سبيجه : احممم .. ها عادل عطيتها الشحن ؟
عادل توهق : ها .. اي عطيتها يلا انا بروح
سبيجه طالعت العنود وطولت واهيا تطالعها
العنود : لا تطالعيني جذي شسويت انا
سبيجه : الله يهداج خليتي اخوي مسبه
العنود : جب انا شكو ..
سبيجه : يعني بتقنعيني انكم ماسولفتو كلش ..
العنود : اي بس عطاني الشحن وانتي يتي
سبيجه : امممممم وطالعتها بنص عين بس على عبط .. هاج الصور طلعي عليهم ورديهم ابيهم تراااا
العنود : اوكي يلا باي ( وباستها وطلعت )
:: عند رهين ::
رهين واهيا تبجي داخت ونامت على وضعها .. وقعدت بروحها بعد ربع ساعه .. فقامت من النوم غسلت وييها وخذت شور ولبست وطلعت برا الغرفه مالقت امها وماكان في احد بالبيت الا اهيا استغربت ان امها راحت وخلتها .. وهالشي اول مره تسويه .. لان طول عمرها ماهان عليها انها تخليها بروحها بالشقه وتطلع حتى لما كبرت رهين .. وخذت سويج السياره ( نسيت لا اقولكم ان رهين كملت الـ18 وخذت الليسن وابوها شرى لها سياره يديده ) وما قالت الا "ماتوقعت توصلين بهالقسوه يما "
وركبت السيااره وراحت البحر ..
رهين " ماتعودت اذا تضايقت اجابل البحر .. دايما اذا تضايقت ادفن نفسي بحضن امي وابجي بحضنها واشكي لها همومي .. بس اليوم بجيت بسبتها ومالقيتها عشان ابجي عندها .. ( ودمعت عينها وقعدت تبجي ) "
قعدت تبجي بحرقه بس بدون صوت .. يا عندها واحد وسألها
............. : عسى ماشر اختي ؟
رهين : ............ تبجي
........... : فيج شي ؟ تبين مساعده ؟
رهين : لا مشكور
............ : اختي مايصير جذي تقعدين بروحج وتبجين .. روحي البيت !
رهين " اهوا اكو بيت عشان اروح له " : خلاص مشكور ما قصرت ما احتاج مساعده
......... : اوكي براحتج
رهين زادت بجي .. " وينج يماااا ليش جذي ؟ انا شسويت عشان تجازيني جذي " دق تلفونها بس ماردت عليه
ويرن يرن بس اهيا ماترد رن كذا مره جان تقوم تحطه سايلنت ! ,, وقعدت فتره وقامت .. ركبت السياره وشافت منو اللي كان داق عليها .. والا 7 مس كول من سبيجه بنت عمتها
رهين واهيا تمسح دموعها : شفيها سبيجه !!
عدلت صوتها ودقت عليها ...
رهين : هلا سبيجه
سبيجه : هلا والله
رهين : شفيج داقه علي اكثر من مره ؟
سبيجه : انتي اللي ليش ماتردين ؟
رهين تلعثمت : آآ .. مادري ماسمعته كان سايلنت
سبيجه : اممم اوكي يالله باي
رهين بسرعه : سبيجه !
سبيجه : ها؟
رهين : انتي فاضيه الحين ؟
سبيجه : اي ماعندي شي
رهين : في احد بالبيت ؟
سبيجه : بس عادل .. امي وبرور طالعين وابوي بالشغل .. ليش ؟
رهين : يمكن امرج شوي اوكي
سبيجه : اي حياج حبيبتي
رهين : الله يحيج باي
سبيجه : باي
الــــــــــــســــــــــ ــــعـــــــــوديــــــــ ــــه ..
:: بيت بو مطلق ::
حصه بدارها منسدحه بالفراش بس مو نايمه .. رن التلفون < غلا يتصل بك >
حصه صوتها مخنس : هلا
غلا : هلا فيك .. كيفك حصه ؟
حصه : حمدالله
غلا : وش فيك صوتك متغير ؟
حصه : لا ابد .. بس متمدده بالسرير
غلا : خلاص عيل اكلمك بعدين خليك مرتاحه
حصه : لا والله عادي .. ماني تعبانه .. بس مريحه عادي .. قولي ايش عندك ؟
غلا : اممم .. حصه انا صاحبتي سلوى عرفتيها ؟
حصه : ايوا عرفتها .. وش فيها ؟
غلا : تذكرين لما كانت جايه معي هنا البيت .. هي شافتك وقالت انها شايفتك كذا مره من قبل لما كانت تجي معاي بيتكم من قبل وعجبتيها مرره .. وحبت انها تخطبك لاخوها .. وش رايك ؟
حصه : بسم الله الرحمن الرحيم ! .. غلا وش فيك علي ، الكلام صبيتيه كله مره وحده !!
غلا : هههههه .. مستعجله مررره وودي افرح فيك
حصه : انتي من صدقك تتكلمين ولا قاعد تستهبلين
غلا : حرااام عليك وين استهبل ... هالمواضيع مافيها استهبال يالهبله
حصه : مين قلتي ؟ .. صاحبتك سلوى ؟ .. البيضه القصيره اللي تلبس نظاره ؟
غلا : اييييييوااا عليك نووور .. هذي هي
حصه : غلا فاجأتيني بالكلام
غلا : انتي راضيه ولا لأ ؟؟
حصه : انا عندي اهم شي امي
غلا : راضيه
حصه : ميين خبرك ؟
غلا : انا كلمتها قبل لا اقولك ورضت وقالت ان لازم استشيرك بالاول
حصه : يا حياتي يا يمه .. دام امي راضيه انا موافقه اهم شي امي
غلا : هههههه اوكي عيل اعطي البنت خبر ؟
حصه خذت نفس : اووكي
كان الموضوع بالنسبه لهم سهالات .. لان صج صج ودها تطلع من الجحيم اللي اهيا عايشه فيه !
:: شقة طارق ::
طارق رجع البيت ولقى البيت فاضي ماكو احد ..
طارق : وينهم محد قالي انهم بيطلعون !
خذا التلفون ودق على رنا
طارق : الوو رنا ؟
رنا بالسوق : ايه طارق
طارق : انتي طالعه مع رهين ولا شنو ؟
رنا : انا طالعه لحالي ورهين نايمه بغرفتها
طارق : اقولج ماكو احد .. ليش رهين مو وياج ؟
رنا : لا !
طارعصب : شكلج ماتدرين وينها صح
رنا : طارق لا تذنب فيّاَ !! .. ولا تصرخ علي هيييك رجاءً انا ما عملت شي غلط !
طارق : وانا مو قايلج لا تخلينها تطلع بروحها واهيا توها تسوق !؟؟؟
رنا : طارق انا ما عدت استحملها .. خلااص خليها بكيفها البنت كبرت وعارفه شو عم تعمل ما فينا نربيها لهلأ !!
طارق : بس مهما يكون اهيا الحين تحت عيونا وبمسؤوليتنا لو يصير فيها شي انا وياج المسؤولين فاهمه !! ( وصكر الخط )
رنا : افف شو بلاه كماان .. !
بيت بو عادل ::
رهين وصلت بيت عمتها ... وصعدت مع سبيجه فوق دارها
سبيجه : حياالله رهنوو
رهين تبتسم غصب : الله يحيج
سبيجه : محد باط جبدي غيرج
رهين : انا !!
سبيجه : ترى عبالج اذا كنتي متضايقه مايبين عليج ! .. انتي اصلا ويهج يتكلم بروحه بدون لا تتكلمين يعني مفضوحه مفضوحه
رهين : صج والله محد فاهمني غيرج ومحد قلبه على قلبي غيرج ...
سبيجه لمتها : حياااتي والله
رهين لمتها واهيا مختنقه خايفه تنزل دمعتها واهيا قامتتها ماتبي تبجي بقلبها " لاتبجين رهين إذا بجيتي ياويلج لا تبجين " دمعت عينها ماقدرت تمسكها ، نزلت بدون لاتحس لانها مسكتها كثر ماتقدر !!
سبيجه وخرت عنها : رهين شفيج ؟
رهين : انا مخنوووووقه مخنوووقه والله ( وبجت وبصراخ بس كان صوتها مو حيل عاالي ) .. امي وابوي انقلبوا علي مره وحده... محد طايقني بالبيت .. انا شنو ذنبي .. شنو ذنبي اذا امي حملت .. يعني شنو امي حملت وراح يصير عندهم ياهل يديد خلااص مايبوني ؟ ... اي عادي عندهم ليش لأ ؟!... يمكن انا مثل علبة الكلينكس هذي ( ومسكت علبة الكلينكس ) لا خلصوا منها وانتهى اللي فيها خلااص قطوووووهااااااااااا وماعاد لها قيمة ولا اهميه ( وحذفت العلبه )
سبيجه تأثرت حييل بالكلام اللي قالته ولمتها : خلاااص رهيين كافي لا تعورين قلبي اكثر ما اقدر اتحمل اشوفج جذي
رهين هدت : موبيدي والله مو بيدي .. والدليل اني طلعت من غرفتي امي مو موجوده طالعه ومخليتني بروحي بالشقه ! .. وطلعت ومحد عبرني ولا احد فكر يسأل عني ولا يسأل ويني الحين .. ميته ولا حيه ! تقريبا صارلي ساعه ولا ساعتين طالعه من البيت ومحد فكر يرفع السماعه يسأل عني !!
سبيجه سكتت خانها التعبير .. وكلام رهين شل لسانها .. مالقت اي شي تقوله عشان تخفف عليها ولا تحاول تصلح الموضوع
اليوم الثاني ،،
الــــــــــــســــــــــ ـــــــــعـــــــــــــــ ــوديــــــــــــــــــــ ه ..
حصه بدار امها لانها مناديتها بتكلمها عن الموضوع
ساره : يا بنتي انا ابغي لك الخير والله الشاهد
حصه : يما انا راضيه بس لعيونك والله .. لكني خايفه من الحياة الجديده .. خايفه اني ما برتاح مع رجال ما اعرفه ولا اعرف طبايعه وحياته
ساره : ومين قالك انك ماراح تعرفينه ؟ .. بتعرفينه مع العشره يا حصه ... انا بكلم عمك عشان يروح يسأل عن الرجال .. وانشالله خير
حصه : و مطلق ؟؟
ساره : مطلق كلمته ومارد علي بكلمه موافق ولا غير موافق .. كان ساكت
حصه : غريييييييييييبه .. كانت هقوتي فيه انه بيرفض حتى ما نطلع من طوعه ابد
ساره : يا حصه .. ذا اخوك وصدقيني انه حريص لمصلحتك والزواج يا يمه ستر
حصه : لا تحاولــ ..........
نوره دخلت وقطعت عليهم الحوار
نوره : هاااا .. ايييييييش كنتوا تقوولووون ؟
حصه : ماكنا نقول شي عادي نسولف
نوره : اجل ليه سكتو لما جيت ؟
ساره : ههه .. تعالي تعالي يا نوره اجلسي جنبي وبتعرفين ايش كنا نقول
حصه خزت امها بمعنى لا تقولين
ساره بابتسامه : ذي اختك وما فيها شي لو قلت لها .. وبعدين لو ما قلت لها اليوم بتعرف بكره
نوره : وش فيكم يلا انطقوا
وقالت لها ساره القصه من اولها ليي اتلااها
نوره : وبتتزوجين وبتتركيني يالظالمه
حصه بدون نفس : اصلا لي حد الحين ما اتفقنا على شي
ساره : ليه تقولينها وكنك نوايه على نيه
حصه : يما انا وافقت لانك انتي موافقه وراضيه
نوره : بلاااك يالمجنونه تزوجي وافتكي من هالعيشه اللي كنها جحيييم والله
ساره : ههههه شوفي اختك ماخذ الموضوع ببساطه
نوره : بس آآخ انا اوريها غلا .. مخططه وخالصه وما تخبرني
:: شقة طارق ::
رهين نايمه بدارها وماكلمت احد من امس .. ورنا وطارق بالصاله يسولفون
طارق : شنسوي يا رنا .. هالبنت بنتنا وحرام نتخلى عنها بعد ما تعلقت فينا
رنا : يعني بدك تقنع فيّا انو انت بتعاملها احسن من ما انا بعاملها .. وبتدللها مثل قبل !
طارق : وانا خابرج حنوونه عليهااا
رنا : طارق بلا لف ودوران .. انا بعد كم شهر بيجيني بيبي بدي ادلعوه واعيشوه احسن عيشه .. مابدي رهين تحتل كل شي
طارق : إنّا لله .. دلعيه ما قلنا شي .. بس رهين هم مالها شغل يعني
رنا : طارق افهمني ... ابني لما يكبر ما بيحل لرهين .. وبعدين هيك ولا هيك قلبي ما عاد يتقبلها مثل زمان
طارق : الله يهداج يا رنا
يـــــــــــــــــــــوم الــــــــــخـــــمــــــ ـــيــــــــــــــــــس ..
:: بيت بو عادل ::
طبعا كانت يمعتهم بهاليوم والكل متيمع عندهم .. و زايرتهم العنود رفيجة سبيجه وقعدوا معاها سبيجه ورهين وابرار تروح وتيي عليهم .. والكل قاعدين ويجكجكون بالحب وسوالف وكل شوي ييبون الحلو والكيك والفطاير وهذي زوراتهم .. ونهى اهيا اللي قاعد تضيف لانها طبعا صاحبة البيت
العنود قامت راحت عن نهى : عنج عنج خالتي ..
نهى : لا ميخالف قعدي سولفي مع البنات
العنود : لا والله حشى خالتي ارتاحي انا اضيف عنج
نهى تطالع سبيجه وابرار واهيا تعطي صينية الجاي حق العنود : والله المفروض هالدْعَل اللي يضيفون
سبيجه : يماا تعرفين ما احب ريحة الجاي
نهى : وطبعا الثانيه واعليا لاعبه العاب بالمدرسه وريلها تعورها ... كالعاده صح
ابرار : لا إله الا الله .. لا تحسدوون امي مشالله عليها حافظتني صم .. حاسه فيني
نهى : اكلي هوا يالنزغه
وراحت قعدت يم رنا واهيا تطالع عنود
نهى : ياحلوها تهبل سنعه كامله والكامل الله
رنا : اي والله شغووله اسم الله عليها
نهى : تصدقين حاطه عيني عليها .. تهقينها تصلح لعادل ولدي ؟
رنا : ما شالله ما شالله .. هيك بسرعه خططتي لوحدك ههههههههه
نهى : شسوي من اشتغل وانا اكلمه بس مااكو معطيني احلى طااف .. بس كيفه هالمره مااكو .. عاد هالبنت سقطه بلقطه ما راح اطوفها
رنا : اي لا صحيح عنود بنت حلوه ورزينه وكلها اخلااق .. وكمان بتصلح لعادل
نهى : على خير عيل ..
بعد 3 ايام ..
نهى رايحه غرفة عادل .. وكانت سبيجه طالعه من غرفتها بتنزل تحت
سبيجه : ها يمه جنج رايحه حق عادل ؟
نهى : اي بكلمه بموضوع
سبيجه : شنو ؟
نهى : شعليج انتي روحي شوفي شغلج تيسري
سبيجه : اوكي بروح بس ترى راح اعرف
نهى دخلت غرفة عادل .. بس كان بالحمام قعدت تنطره .. طلع عادل من الحمام ( وانتو بكرامه )
عادل : اووه يما انتي هني
نهى : لا بالصاله ..
عادل : هههههههههههههههه
نهى : شدراني عنك ... انزين اقعد ابيك بسالفه
عادل : آآآآآآآ .. هذي القميدره .... وانا اقول ست الحبايب ما تقعد هالقعده وتنطرني الا اذا اكو شي
نهى : اي عندي سالفه هالكبر بعد ( واهيا تأشر بأيدها )
عادل : يلا نسمع
نهى : اقول عادل .. انت الحين خلاص بعد كبرت وصرت ريال مشالله عليك .. كامل والكامل الله .. متعلم ودارس و وظيفه حلوه اسم الله عليك محامي وباجر انشالله بتكبر وتكبر خبرتك وتصير انشالله مثل ابوك ، ومعاشك بيدك الحمد الله يعني ماعليك قاصر... ويعني .. مثل ما قلتلك صرت ريال واللي كبرك وعلى سنك الحين متزوجين ومعيلين .. وانا قلت لو اشوف لك بنت الحلال اللي تناسبك وتسعدك .. (وبغشمره ) بسك عزوبيه بسك
عادل : اووولله لي هالدرجه مليتوا مني
نهى : لا ما ملينا منك .. بس نبي نشوف ياهل يقوللك يبا
عادل تنهد : شوفي يما .. انا فكرة الزوااج مو حاطها في بالي كللش .. يعني انا توني ما كملت نفسي وانا اساسا مو مستعد نفسيا حق الزواج .. وبعدين حرام شبابي يضيع على الزواج
قطعت سالفتهم طقة الباب
نهى : منو ؟
ابرار : انا
نهى : دشي
دخلت ابرار : اححممم .. اشوف قامت تصير اجتماعات مغلقه من ورانا
عادل : شتبين الحين
ابرار عطته نظره ولفت على امها : يما ابيج تفهميني درس الرياضيات اليوم الابله مسويه نفسها كلش معصبه وقالت الدرس مشرووح .. مادري منو اللي ميت عليها ولا على درسها عاد
نهى : عيييب شهالحجي .. هذا كلام ينقال عن الابله ! .. هذي وانتي ابلتكم رئيسة القسم صج ما تنعطون ويه ...
ابرار سحبت كرسي وقعدت بتسولف مطوله الاخت... منها تسولف ومنها تقهر عادل : ههههههه لااا انتي طاافج اليوم خديجه اللي بصفنا عرفتيها .. هذي خديجه اللي يوم الثلاثا كانوا فاصلينها
قاطعتها نهى : اقول شيلي قشج ونطريني بالصاله
ابرار انقهرت : زين ( وراحت )
نهى لما تأكدت ان ابرار طلعت : ها يما شقلت
عادل : قلت لج مو متهيأ ولا مستعد نفسياً
نهى : صدقني البنيه ذهبه والله ذهبه .. اخذها قبل لا تروح منك
عادل : اهااااااا .. يعني انتو طابخينها ويايين تاخذون رايي بالاخير
نهى : لاااا مو جذي .. بس انا شفت البنيه وحيييل عجبتني، سنع ومنع وياحلوها والله
عادل شك بالموضوع : انتي تعرفينها ؟
نهى : اي اكيد
عادل : وانا اعرفها ؟
نهى : مو شغلك .. بعدين لما تقرر وتستعد نفسيا على قولتك ذيك الساعه بجاوب عليك .. فكر عدل ( وطلعت )
طلعت نهى وخلت عادل بحيرة نفسه منو هالبنت اللي لي هالدرجه عاجبه امي ؟ .. منو هذي اللي امي وصفتها بهالوصف وصلتها القمر ؟ .. لا لا شكلها امي عارفتها زيين .. لا انا رافض ... انا مقرر بنفسي ماراح اخذ غير اللي قلبي مختارها من زماان .. بس من كلامها شككتني