الفصل 7
الجزء السابع
بعد يومين من خروج ام محمد ونورة من المستشفى كان بيت احمد الشامسي هادي على غير العاده وكانت القايله والعاده انهم يجتمعون عقب الغدا عشان يتخبرون عن الاحوال والعلوم.. ام محمد كانت في غرفتها ترتاح وكانت شيخه وياها.. نورة كانت راقده في غرفتها بعد ما خذت دواها اللي يرقدها رقاد اهل الكهف ..
نواف وعليا وعمر خذهم ابوهم يمشيهم وعبدالله على غير العاده كان يالس في الصاله يلعب بلاي ستيشن بروحه.. دخل عليه نواف وعيسى وخالد.. سلم عليهم ويلسوا.. خالد كان مرات يروح ويا عبدالله العزبه بس اغلب الاحيان كان يطلع وياه المول ولا أي مكان عشان خالد ماكان يحب سوالف البر وايد ..
عبدالله: هااه منو يبى ينغلب؟
نواف: المفروض تقول منو يبى يفوز هههههههههه
خالد: هيه والله صدقت يا نواف هههههههههه
عيسى: يالله انا بجرب وبلعب وياك.. بس شرط الخسران العشا على حسابه
عبدالله: خلاص تم يالله بسم الله
خالد: هاه عبوود نبى مطعم غاوي هالمرة مب نفس هاذيج المرة عزمتنا على كيما وجباتي هههههههههه
عبدالله: وشو بلاها الكيما والجباتي؟ نعمه والحمدلله خخخخخ
نواف: خلاص انا بختار المطعم شو رايكم ؟
عبدالله: لا لا دخيلك عشان تفلسوني .. توني قابض المصروف انا . .. ابى اعدل البانشي
عيسى: خلاص خلاص انا عازمنكم على العشاههههههههه وهقتو الريال
خالد: عيسووه يبى ينقذ عبيد هههههههه
عبدالله: اكيد انت بتعزمنا لانك انت الخسران ويو هههههههه
وتموالشباب يضحكون ويسولفون وبعدين نزلت ام محمد ووياها شيخه قعدوا الشباب يسولفون وياها وينكتون ويحاولون يطلعون ام محمد من جو الكآبة اللي كانت فيه بعد اللي سواه فيها ولدها البكر محمد.. كان نواف يطالع السما من دريشة الصاله ويفكر في اللي املكت قلبه سارة.. واللي مستعد يسوي أي شي بس عشان يفوز بقلبها.. بعد شوي شاف نواف سيارة عمه ناصر داخله بيتهم وقال في خاطره : افففف يالرزة .. شو يايبهم هذيلا الحين
شيخه: امايا قوم عمي ناصر وصلوا
ام محمد: حياهم الله .. نواف سير دخلهم يالله
شيخه: يالله شباب سيروا ودو عمكم ناصر ميلس الريايال وقومو بهم
نواف يغمز حق الشباب: عيسى.. خالد.. عبيد .. يالله روحنا
ام محمد : ويييين؟
نواف وهو يمزح: بنسير الكوفي مواعدين الشباب
عبدالله ما كان يدري شو السالفه : أي شباب؟!!
خالد دز عبدالله وهمس في اذنه : يالغبي اسكت شوي
شيخه:هههههههههههه نواف عن الحركات يالله عاد .. سير دخل عمي الميلس
نواف وهو يتافف: ان شاءالله الحين بسير
طلعو الشباب برى عشان يسلمون على عمهم ناصر.. عقب ما نزل العم ناصر من السيارة نزلت ام طارق وبناتها مها وامنه ..وامنه ما شالت عينها من على نواف.. لانها من زمان ماشافته وكان شكله يسكت ..كانت تقول في خاطرها: والله احلو واستوى شكله روعه.. انا الغبيه اللي رفضته .. اما اختها مها فكانت منزله راسها وما رفعت عيونها من على الارض
نواف وهو ايواايه عمه: مرحباا الساع بعمي ناصر .. شحالك ؟
بوطارق: بخير الله يسلمك .. شحالك . وشو ام محمد الحين ؟
نواف: بخير الحمدلله .. شحالج عموه ؟ وشحال طارق؟
ام طارق: بخير فديتك كلنا بخير
نواف: عمي اقرب في الميلس
وعقب ما مرو الشباب من عند امنه ومها اللي كنت تمشي بسرعه بسرعه عشان تلحق على اختها وامها اللي سبقوها داخل.. كانت بتتخرطف وبتطيح على ويهها بس خالد كان واقف ومسكها من ايدها..
خالد: سلمتي
مها شلت ايدها من ايد خالد ونزلت راسها والويه احمّرررر ولحقت امها واختها
خالد كان واقف ويطالعها وهي تدخل جان يقول في خاطره : اكييد هاي مها .. ياويلي انا على المها .. صدق انها مها
من بعيد كان عيسى مطلع راسه من باب الميلس ويزاعج على خالد: خلّووود .. شو تسوي هناك ؟ سير خلهم يسوون القهوه
خالد: افف انزييين الحين بسير
بعد ما دخلو الحريم وسلمو على ام محمد وتحمدو لها بالسلامه سالت مها عن نورة وطبعا هي الوحيده اللي سالت عنها لان امها واختها كانو ما يحبون نورة ..
مها: وينها نوااري؟
شيخه: فوق فديتها .. صبري بخليهم يزقرونها..جاانيت
جانيت: يس مام
شيخه: سيري ازقري نورة من فوق .. قوليلها خل تنزل
جانيت: اوقي مام
فوق.. نورة كانت توها ناشه من الرقاد وصلت وتسبحت ومشطت شعرها.. كان الكل يحسد نورة على شعرها الكستنائي ..الناااعم و الغليظ .. هو صح انه ماكان طويل وايد بس كان غلظه روعه.. وهي مووليه ماكانت مهتمه فيه بس تمشطه وترفعه
يلست نورة على السرير تفكر في اشياء وايد وفجأة طرى على بالها جرح الزمن وشافت الكمبيوتر.. قالت في خاطرها : من زمان ما دخلت النت .. خلني اجيك ايميلي واشوفه اذا رد ولا لا
وهي تبطل ايميلها فكرت وقالت: هو مب مسويلي أي سالفه . ليش انا مهتمه جييييه ؟
شافت نورة ايميل منه وفرحت واايد اول شي بس يوم بطلت الايميل وقرت اللي فيه بطلت حلجها وسكتت ومن داخل تظايجت واييد.. كان محتوى الايميل (اختيه قطوة.. شحالج؟ مشكورة على ايميلج وعلى سؤالج عني ..بصراحه هي اسباب وايد خلتني اودر المنتدى وماقدر اكتبها هنيه كامله.. وبعدين انا بغيت اكلمج في موضوع مهم ياريت تظيفيني عندج على الماسنجر عشان نرمس على راحتنا طبعا بعد اذنج.. واذا هالشي بيظايقج برايج يالغاليه بس المهم تبقين على اتصال وياي.. اخوج جرح الزمن)
نورة تظايجت من الايميل واايد وقالت في خاطرها : خلني اطبه احسن لي شكله لعّااااب ويبى يلعب علي.. وين انا ووين مشاكل النت . وهنيه سكتت نورة وتذكرت مشاكل النت اللي استوت لها.. هي مشكله وحده .. خلتها تحرم تضيف أي حد مني والطريق.. مشكله علمتها انها ما توثق في أي حد .. وما تعطي قلبها حق أي حد.. تذكرت يوم انها شافت حد غريب ظايفنها ويوم قبلته كان واحد.. ملك قلبها وسحرها بكلامه.. كانت علاقتهم اخويه في البدايه .. عرف عنها كل شي وعرفت عنه وهم ..لانه كان يجذب عليها .. حب انه يلعب بقلبها الحنون شوي.. ويختبرها ويختبر اخلاصها بس هذا مب اختبار انه يتلاعب بقلوب الناس.. وبعد ما اكتشفت نورة الصدق واكتشتفت منو هو الشخص انصدمت صدمه فيه لانها ما كانت حاطه في بالها ان فهد ولد خالتها يسوي فيها جيه بس عشان يختبرها ويشوفها اذا بتنفع تكون زوجه للمستقبل ولا لا ..جواهر وسارة كانو يعرفون بالسالفه وحاولو بعدين انهم يصلحون بين الطرفين بس نورة كان قلبها مكسور ومب متحمله أي جرح ثاني.. وفهد كابر على هالشي ورفض بعد وهو اصلا مب قادر يطري اسمها من اللي سواه فيها.. والحين هو متندم على قد شعر راسه ..سكتت نورة شوي ومرة وحده تخرعت من صوت الباب.. دخلت عليها جانيت
نورة وهي تشهق: بسم الله الرحمن الرحيم .. ويا ويهج زيغتيني يالخسفه
جانيت وهي مب فاهمه نورة شو تقول : نوااري ماما شيخهwant u to come down
نورة: انزين يالله طوفي جدامي .
جانيت: لا لا انتا في Change ملابس بعدين روحي
نورة: تبيني اتكشخ حق منو عمووه؟ جان حقج اوقي ههههههههه
جانيت وتضرب نورة على ايدها بمزح : ur uncle naseer is here and his family
نورة وهي مبطله حلجها: قووولي والله؟ غربلج الله والله اذا تتمصخرين وياي برقعج.. ادريبج تحبين تسوين هالمواقف فيني تتذكرين يوم خالوه وديمه هاااه هههه
جانيت كانت توها من سنة في بيت بو محمد بس كانت تحب تمزح ويا نورة وايد ونورة تستانس عليها لانها راعية سوالف بعد ..
جانيت: no no ههههههههه انا مافي يمزح
نورة: انزين الحين بتلبس وبنزل يالله جلبي ويهج ..
جانيت: what do u mean ?جلبي وااايهش؟
نورة: ويهش هاه ههههههههه صدق انج سالفه .. جلبي ويهج mean I love u
جانيت وهي تبتسم : ahaa Isee thanx sweetie
نورة كانت لابسه بجامه وشكلها جنها ياهل راحت وطلعت لها تنورة وبلوزة وتلبست وعدلت شعرها ونزلت تسلم عليهم.. وكانت بعدها تفكر في سالفة جرح وتتعوذ من ابليس وتقول خلاص مالي خص فيه ..
بعد ماروح العم ناصر واهله كانو الشباب يالسين في ميلس الريايل وكل واحد حالته حاله ..
نواف سرحان يفكر في سارة ويخطط كيف بيخطبها وكيف بيقول حق اخوها فهد ؟!
خالد كان في عالم ثاني عقب ماشاف مها .. دخلت قلبه من اول نظرة بينه وبينها
اما عيسى فكان مهمووم ويفكر في حاله وفي ابوه اللي مفشله في كل مكان وجدام كل الناس..
عبدالله هو الوحيد اللي كان يالس ويطالع اشكالهم
عبدالله: واااااااااااههههههههههههه ههه طاعو الاشكال والله انكم تحف.. اييه بلاكم مسطلين جيه ..
عيسى وهو مب حاس باللي حواليه : عبدالله اسكت شوي الله يخليك وخلني في حالي
خالد: يا عيسى .. خله يولي ليش تتلوم في عمرك وهو مب هامنه شي في هالدنيا
عيسى: خالد .. هذا اللي خله يولي ابوي .. وبيتم ابوي لين ما اموت وله حق علينا ولنا حق عليه..
عبدالله: حوووه ايييه لا تقومونها ظرابه الحين ..
نواف: عيسى.. خالد .. خلاص
عيسى: نواف ترى انا عزمت احمد على العشا ويانا اليوم
نواف: الله احلى كلام .. شو رايكم نسير المطعم الهندي .. اللي تحت في المول
خالد: اكل هندي ؟ لا لا الله يخليكم .. عبيد ذبحني بالاكل الهندي هههههههه
عبدالله: ويا ويهك .. لا لا .. شو رايكم نسير العزبه وهناك ان اسويلكم احلى مجبوس
نواف: ههههههههههه ياهالعزبه .. عبيد انت سير انصب لك خيمه في البر وعيش فيها احسن لك ههههههه
خالد: نواف اصبر اصبر هههههههههه اونه مجبوس .. مجبوس في البر ؟ وااههههههههههه عبيد انت نكته
عبدالله: ههههههههه يالله زين يوم اني نكته على الاقل انفع مب نفسك هامة اكل.. اكل أي شي مني والطريج خخخخ
خالد: بس عاد عن الفظايح خخخ
عيسى:هههههههه... يالله شباب قمنا الريال يتريانا في المول .. وبعدين بنسير المطعم
الشباب: يالله ..
= = = = = = < في دبي في بيت الخاله وديمه>= = = = = =
جواهر كانت رايحه الميلس ويا اخوها الصغير مايد تساعده وتشل وياه العابه ..
جواهر: ميوود ويا ويهك تعبتني ويا هالبلاي ستشين .. اخر مرة اتييبها الميلس
مايد: جواهر.. اول شي هاي دريم كاست .. ثاني شي فهد اللي اييبهم هنيه عشان يلعب ويا هزاع
جواهر: مالت على فهود وهزاع .. انت سير ود القير داخل وانا بلحقك باللعبه يالله تعبت الله يغربل ابليس
مايد: انزين
كان فهد متصل حق هزاع وموصنه انه يسير بيتهم ويترياه في الميلس لين ما يرجع من شغله عشان يبى يتعشى وياه ..
جواهر كانت يالسه في الميلس ..تفكر في هزاع.. ليش انا ما احبه وما ارتاح له .. هو شو سوالي عشان اكرهه واحقد عليه جيه؟ ممممم حرام اظن السوء في الناس يمكن هو طيب وعلى نياته بس انا شوي شكاكه
وهي يالسه تفكر.. انفتح الباب عليها وهي كانت تتحسب اخوها مايد وماسكه الدريم كاست تبى تناولها حقه ولا يطلع في ويهها ذاك الريال الطويل الحنطي الوسيم داخل عليها.. واول ما شافته طاحت منها الدريم كاست وكانت مبطله حلجها ويالسه تطالعه حتى انها ما عدلت شيلتها
هزاع لف ويهه ونزل راسه: احم احم .. درب يا اهل البيت
جواهر طلعت من باب الميلس اللي ورى وهي تربع وهزاع دخل الميلس تم يضحك على شكل جواهر بس دخلت باله وتم يفكر قال: اكيد هاي سارة اللي يسولف لي عنها فهد .. ماشاءالله عليها اخلاق وجمال
جواهر كانت تربع فوق الدري مثل الميانين عشان توصل غرفتها وتسكر على عمرها الباب قبل ما حد يشوف ويهها الاحمر وشكلها اللي كان مرتبك ورايح فيها
دخلت جواهر الغرفه وقفلت الباب وهي تلهث.. هذا هو؟ هزاع؟ هزاع اللي اكرهه؟ يااربي الحين شافني ؟؟ شو بيقول عني ؟ بيقول هاي وحده مب مربايه تتعدس في ميالس الريايل؟ اكيد بيكرهني الحين !!
وفي الميلس ..كان هزاع يالس ويتريا فهد ومبطل التلفزيون دخل عليه مايد وسلم عليه
هزاع: هلا بالريال الصغير .. شحالك ميوود ؟
مايد: الحمدلله انت شحالك هزاعووه؟
هزاع: هههههه بخير .. ولا تقول هزاعوه ويا ارسك انا ريال كبير
مايد: عيل انت لا تقول ميوود انا ريااااال
هزاع: ههههههههه ان شاءالله يالريال . .والنعم فيك والله
هزاع كان في باله انه يسال مايد عن اللي شافها بس استحى وخاف انه يسير ويخبرها في هالاثناء دخل عليه فهد وسلم عليه ويلسو مع بعض
فهد: ميوود .. سير قولهم يحطون العشا لين ما اتسبح واتلبس.. هزاع البيت بيتك ترى كلها ثواني وبرجع
هزاع: تسلم يالغالي .. خذ وقتك وانا اترياك هنيه
نرجع حق العين وتحديدا منزل العم ناصر ..كانت مها يالسه في غرفتها وتقرا روايه و وتتذكر يوم انها بغت تطيح على ويهها ومسكها خالد.. قعدت مها تضحك واستحت.. اما امنه فكانت في غرفتها تتكلم في التلفون ..
امنه: انسى رقمي وانساني اذا تبى لطيفه تعرف بهالسالفه
خليفه: امونتي حبيبي ..سمعيني .. ترى والله بتساعدنا.. انا ابى ايي اخطبج ومحد بيوافق اذا عرفو ان نعرف بعض من قبل
امنه: والله هاي مشكلتك مب مشكلتي.. وبعدين انا ما طلبت منك انك اتيي تخطبني
خليفه وهو منصدم: امنه شو هالرمسه بعد ؟
امنه: هيه اللي سمعته
خليفه: شو قصدج يعني؟
امنه: مادري افهمها نفس ماتفهمها.. يالله انا مشغوله بخليك الحين
خليفه: امنه لا صبري.. انتي قصدج انا نتفارق؟؟
امنه: قتلك افهمها نفس ما تبى.. يالله باااي
وسكرت امنه التلفون في ويه خليفه وتمت تضحك وتقول: باي باي يا خليفه.. واهلييين بنواااف ونزلت تحت.. اما خليفه انهار وماقدر يمسك دموعه يوم اكتشف حقارة حبيبته امنه.. خليفه: ليش جيه؟ انا شو سويت لج يا امنه ليييش؟ والله لاعلمج منو خليفه الكتبي اللي تسكرين في ويهه التلفون ..يوم نزلت امنه تحت لقت ابوها يالس ويا اخوانها سلطان وسعد
امنه وهي تحب راس ابوها: شحالك ابويا ؟
بوطارق: بخير يابنتي دام اني اشوفج مستانسه جيه
سلطان : هااه اموون شو الطاري؟ ليكون طلعت نتاجكم؟
امنه: اولا انا اختك الكبيرة والمفروض تحترمني وتزقرني امنه.. ثانيا نتايجنا ما طلعت بعدها
سلطان: ول ول عليج كليتيني بلسانج.. انزين اسف يا اختي الكبيرة خخخ
بوطارق: سلطان بس عاد ترى هاي الغاليه وما ارضى عليها
سعد: وانا رحت وين؟ انا اخر العنقود المفروض الدلع كله لي
بوطارق: انت صح اخر العنقود بس انت مب امنه
امنه تشققت من كلام ابوها حقها ومدحه الزايد ودلعه حقها اما سلطان وسعد فكانو يحقدون على امنه من كثر ما كان ابوهم يعزها ويحبها ويدلعها دلع زياده عن اللزوم
امنه: ابويا بغيتك في سالفه..
بوطارق: ارمسي يا بنتي ..
امنه: ممممم سالفه خاصه شوي
سلطان: يعني شو؟ تبينا نجلب ويوهنا؟
امنه: ماشاءالله عليك فهمتها على الطاير يالفطين
سلطان: سعد قوم يالله خل نسير نسولف ويا مها ابرك لنا من هالشيفه الخايسه
امنه:جب يا قليل الادب.. انا شيفه خايسه ؟!
بوطارق: سلطان بس يالله سيرو
وسارو سلطان وسعد فوق عند اختهم مها اللي دايما تيلس تسولف لهم وتخبرهم عن الروايات اللي تقراها وهم يستانسون عليها بوطارق: هاه حبيبتي شو بغيتي؟
امنه: ابويا انا فكرت زين في الموضوع
بوطارق: قصدج موضوع نواف؟
امنه: هيييه
بوطارق: انزين؟..
امنه: ابوياخلاص انا موافقه عليه
بوطارق وهو منصدم: بس يا امنه انتي كنتي رافضتنه و..
امنه: ابويا انا قتلك فكرت زين.. وبعدين صدقها امي نواف ريال ما ينعاب بس انا كنت غبيه يوم اني رفضت
بوطارق وهو مبتسم: خلاص عيل..انا برمس محمد عشان اييوون ونحدد موعد حق الملجه شو رايج؟
امنه وهي بتطير من الفرحه : اللي تشوفه يا بويا
= = = = = = < في بيت الخاله وديمه >= = = = = =
هزاع شاف مايد يعدّل لعبته يتافف ويقول بصوت واطي وهو يرمس عمره :ماعليه ان ما خليتج تدفعين فلوسها ما اكون انا الريال..
هزاع: هههههههه مايد منو هاي اللي بتدفعلك؟
مايد وهو معصب: النخله
هزاع مستغرب:!!! ههههه أي نخله هاي اللي بتدفعلك فلوس؟!!
مايد: جواهر اختي
وخبر مايد هزاع باللي صار.. عرف هزاع ان اللي شافها مب سارة بس مع هذا ما وقف عن التفكير فيها وما طلعها من باله ابد.. نرجع حق العين وحق نورة المحتارة ..اللي مجابله شاشة الكمبيوتر وتفكر بصوت عالي: اضيفه ؟ لا ما بضيفه احسن ..مممممم خلاص بضيفه بس أي كلمه مني ولا مناك بلوك وديليت على عينه.. وضافته نورة وقلبها قابضها.. اول ما ضافته كان اون لاين ..جرح يوم شاف ايميلها فرح انها ضافته بس يوم شاف نك نيمها استغرب وضحك.. كان نك نيمها وجه المرايا وهو كان يحب هالاغنيه وايد ..ربع ساعه مرت ومحد فيهم رمس.. نورة تبى ترمس بس مترددة.. وجرح ايده تاكله يبى يبدى.. وتشجع وبدى بالسلام..
جرح الزمن: السلام عليكم ايها القوم ..
وجه المرايا: وعليكم السلام ورحمة الله ايها الفرد..
جرح الزمن : فرد؟ ههههههه حلوة
وجه المرايا: هيه عيل تقولي قوم؟ شو انا عشرة ولا عشرين؟!
جرح الزمن : مادري!! بس عندي احساس قوي انج دبه..
وجه المرايا:بعد!! ردينا حق مغايظ المنتدى؟ والله محد دب غيرك.. يالدب..
جرح الزمن : اوكي اوكي مقبوله منج.. لانها اول مرة ارمسج فيها ..
وجه المرايا: واخر مرة بعد ان شاءالله ..
جرح الزمن: شوووووه؟ ان شاءالله بتسوين لي بلوك؟؟
وجه المرايا:هيه انت مب قلت تباني في موضوع مهم؟.. يالله شو هو الموضوع؟
جرح الزمن: مابخبرج اول شي شو معنى كلامج؟ يعني صدق بتسوين لي بلوك؟
وجه المرايا: وديليت بعد طال عمرك ^_^
جرح كان يغايظ نورة ويغلس عليها زياده بعد.. بس هو عادي عنده اذا سوتله بلوك وديليت لانه بس حب يرمسها في الموضوع المهم ووووبس..
جرح الزمن: يالدبه انا ما سويتلج شي.. بس توني ارمسج وانتي بلوك وديليت؟؟!!
وجه المرايا (وهي معصبه ): دبه تدوووسك يالدرام.. مب منك مني انا اللي ضفتك..
جرح الزمن: ههههههههههه تعالي تعالي.. والله اسف بس حبيت اغلس عليج شوي.. انا صدق بغيت ارمسج في سالفه مهمه..
وجه المرايا: انزين يالله ارمس ..
جرح الزمن:ممكن؟؟!!
وجه المرايا( وهي خلاص طلعت من طورها): اتفضل يالله ممكن ..
وقعدوا يتناقشون في مواضيع تخص المنتدى.. والموضوع المهم انه في ا عضاء كانو يزعجون جرح وكله يطلبون ايميله عشان يسرقونه وهو عرف لعبتهم ويوم عرف انهم بيطلبون من نورة ايميلها حب انه يحذرها ..
وجه المرايا: اهاااا.. الحين فهمت كيف!! ول عليهم ما خلو حد في حاله؟!
جرح الزمن: هيه شفتي.. عشان جيه انا طلعت من المنتدى وشفتهم يحومون حواليج ويبون ايميلج باي طريقه.. فقلت اني بحذرج ..
وجه المرايا: انزين مشكور اخوي على التحذير..
جرح الزمن: العفو اختيه الدبه.. انا سويت اللي علي.. والحين تقدرين تسوين لي بلوك.. وديليت بعد ^_^
وجه المرايا: ان شاءالله ..
جرح الزمن (وهو منصدم):خييبه ..ما صدقتي على الله هههههههههه
وجه المرايا: ممممم بس عندي سؤال قبل ما اتخذ الاجراءات المناسبه وياك ..
جرح الزمن: هههههه انزين اسألي ..يالله شو سؤالج ؟
وجه المرايا:انت خبرتني من قبل في ايميلك انك طلعت من المنتدى عشان اسباب وايد.. ولين الحين انا مب لاقيه سبب مقنع !!
جرح الزمن:مممممم يقول ا لشاعر المخضرم " اللقافه من طبع الدببه"
وجه المرايا(وخلاص احترقت اعصابها): دبه ترقعك على ويهك يالدب.. يالله مبروك عليك البلوك والديليت..
جرح الزمن: هههههههههه حشى انتي ضو بسرعه تشبين.. صبري تعالي..
وجه المرايا: نعم؟ شو تبى؟
جرح الزمن: بخبرج ليش ودرت المنتدى..
وجه المرايا: خلاص مابى اعرف..
جرح الزمن: لا.. لازم تعرفين ..
وجه المرايا: غصب؟ مب غصب يالله ..
جرح الزمن (وهو يكمل ولا همه عصبية نورة): انا ودرته عشان دراستي صعبه شوي ورديت البلاد عشان اكملها ..
وجه المرايا: وخير يا طير.. الحمدلله على السلامه.. يالله
جرح الزمن :ههههههههه الله يسلمج.. انتي شو بلاج كل شوي قلتيلي يالله ويالله ..
وجه المرايا: بسويلك بلوك وديليت..
جرح الزمن : اوكي برايج عيل ..والسموحه منج اذا ازعجتج ولا شي.. ترى الا سوالف يالدبه ..
وجه المرايا: محد غيرك دب.. مع السلامه
جرح الزمن: الله يحفظج ..وعلى طول نورة سوت بلوك.. بس ماهان عليها تسوي ديليت.. ليش؟ !! سؤال يحير ..
نهاية الجزء
Like