الفصل 5
"*"الجزء الخامس"*"
بعد ما تلبست نورة وتكشخت دقت حق عيسى عشان يوديها لانه عبدالله كان ماخذ الدريول ورايح العزبه وهالشي خلى نورة متنرفزة ههههههههه ويوم وصلها عيسى بيت وعد قبل ما تنزل سالها ..
عيسى: نوراي ..
نورة: لبيه
عيسى : شو اسمها ربيعتج ؟
نورة بخبث: هههههههه وعد ليش؟
عيسى : عندها اخو اسمه احمد؟
نورة: مممم اظني .. عيسووه يالله بنزل تاخرت شو بغيت ؟
عيسى :هههههه مابغيت شي بس اسال لان اخوها ربيعي يالله نزلي ودقيلي يوم تبين ترجعين..
نورة: صدق انك سالفه ..ههههههه انزين يالله ..الله يحفظك
دخلت نورة وسلمت على وعد وامها وبعدين روحو غرفة وعد وخبرتها نورة عن جرح الزمن ..
وعد بكل برود : ممممم انتي ليش جيه ملقوفه خليه وهو بيرد من نفسه.. وبعدين تعالي انتي من متى تهتمين حق وااحد مب انتي ما تداانين هالحركات ههههههههه
نورة: جب جب.. هذا وراه سالفة انزين وما بكون نورة اذا ماعرفتها وشو قصدج يا مسودة الويه هاه انا بس حبيت اعرف سالفته فقط لا غير
وعد: هههههههه انزين انزين يالعيارة انتي
نورة: ههههههههههههه انزين خبريني شو بعد ؟ شخبارج وشو مسويه ؟
وعد: مممم هيه ماخبرتج اخويا احمد بيرجع الاسبوع الياي
نورة: أي احمد ؟
وعد: نوروووه بلاج مخرفه ... احمد اخويا الكبير اللي يدرس في ايرلندا
نورة: ههههه هيه اللي ياب نسبة حلوه ويدرس برى.. توه عيسوه يسال عنه
وعد: هيه هذا هو بيرجع عقب اسبوعين من ايرلندا والله اشتقتله
نورة:ليش بيرجع؟
..وعد: قال برجع عشان ابط جبد وحده اسمها نورة الدبه
نورة:هههههههههههههههههههه� �هههههههههه وياويهج لا صدق ليش؟
وعد : ههههههههه والله يقول مليت من العيشه هناك وتصدقين انه باقي له سنة ويخلص.. بس هو عاند وقال برد البلاد بكمل هنيه ..
نورة: اهااا ان شالله يرجع لكم بالسلامه ..
وقعدو نورة ووعد سوالف وضحك وعلى الساعه 8 رجعت نورة البيت
= = = = = = < في بيت العم ناصر >= = = = = =
كان بو طارق قاعد في الصاله ويا ام طارق وبنتهم مها وامنه
بوطارق: امنه هاه شو قلتي
امنه وهي مستغربه : عن شو؟
بوطارق: عن نواف ولد عمج
امنه : ابويااا انا قلت من قبل اني ماباه والحين اقولك هالكلمه ماباه
ام طارق: امنه يابنتي ترى نواف ما ينعاب و...
بوطارق: خليها على راحتها يا ام طارق .. الزواج مب بالغصب
امنه تقوم وتبوس راس ابوها: الله يخليك لي يابوياااا
بوطارق: ويخليج لي يا احلى بنت ..
هنيه مها كانت ساكته وتقرى كتاب وتطالعهم من بعيد ويوم سمعت هالكلمه انجرحت منها وايد لانها عرفت قدرها عن ابوها اللي دايما يفرق بينها وبين امنه..
= = = = = = < في دبي وفي بيت الخاله وديمه>= = = = = =
كان الكل متجمع في اليلسه اللي في الحوش ..جواهر كانت يالسه وترمس وما سكتت من يوم ما يت من فوق هي وسارة واخوها الصغير مايد
فهد: بس بس الله يخليج سكتي شوي صدعتيني
جواهر: هههه ليش تباني اسكت خلني اسولف حق ابوي.. انزين ابويا بعدين المدير مالنا يته عصبه في ظهره وهو يالس يهزبنا ههههه ومرة وحده سكت وتيبس في مكانه ونحن نطالعه و...
فهد : ساره سكتيها شوي
بو فهد: خلها ترمس هههههه كملي كملي شو استوى في مديركم
جواهر: فهود اذا ماتبى تسمع السالفه خلني اكملها.. وبعدين انت من متى ما تحب سوالفي هاه؟
فهد: ابى اسمعها بس مب الحين انا ما صدقت الاقيكم متعيمين جيه .. ابى اخبركم شي
ام فهد : ههههه خلاص جواهر غناتي بعدين كملي السالفه خل اخوج يرمس شوي
جواهر: افف منك يا فهود والله انت ممل الله يعين اللي بتاخذك ..
ام فهد : اللي بتاخذه بتكون اسعد حرمه في الكون .. بس بس سكتي شوي
سارة : ههههههههههه خلاص جواهر .. فهد شو بغيت ؟
بوفهد : لا تقول تبى موتر يديد .. توك ماخذ هالموتر من كم شهر
فهد : هههههههههههه لا لا مابى موتر .. امايا بغيت لج تخطبين لي..
ام فهد وهي بتطير من الفرح : صدق ؟ صدق يا ولدي ؟ صدق تبى تعرس ... كلوولوووووولوووووش
بوفهد : هههههه هاي الساعه المباركه والله ومنو بنت الحلال اللي تباها ؟
جواهر وسارة : هههههههههههه مابغيت تعرس
فهد: ليش يالس على جبودكم انا ؟ ههههههههههههه
مايد: فهد فهد ابى ارزف في عرسك ..
فهد : ههههههههههههه بترزف يا ميووود .. امايا ابى وحده زينه وشرط شرط انها تكون حلوة
ام فهد : ياولدي الحلاة مب شرط .. اهم شي تكون بنت ناس وطيبه وراعبة بيت تحطك في عينها
جواهروهي تمزح: طاعو هذا يبى وحده حلوه .. اصلا انت تحمد ربك انك بتحصل وحده ترضى فيك
سارة : هههههههه بس عاد جواهر .. اصلا فهد الكل يتمناه
فهد : ههههه هيه فديتني اجنن
ام فهد : ومنو تبى يافهد
سارة : شو رايك بنورة؟
فهد وتغيرت ملا مح ويهه: نورة بنت خالوه موزة؟
سارة : هييييييه هي
ام فهد : فديتها نوراي .. هيه والله يا فهد شو رايك فيها ؟
فهد وهو متردد: لا لا يامايا نورة بعدها صغيره.. توها في اول ثانوي
جواهر: مالت عليك ههههههههههههههه البنت بتكون في الكليه السنه اليايه
فهد: ولو ماعليه بعدها صغيره علي ..
ام فهد وهي متردده وحطت في خاطرها منه : اللي يريحك يا ولدي وانشاءالله نلقى اللي تناسبك..
سارة : انزين ليش ما تبى نورة ..
جواهر: خليييييه هو الخسران والله نورة دانه بس هو ما يعرف قدر الشي الا..
فهد يبى يغير السالفه : بس بس الله يخليكم .. انا الغلطان اللي تكلمت وانتو موجودين ,,
وقام فهد وهو معصب من عندهم وامه وابوه مب عارفين سبب عصبيته وسبب رفضه حق نورة.. بس سارة وجواهر كانو يعرفون شو هو السبب..
بعد مرور اسبوعين من انتهاء نورة من الامتحانات كانت النتيجه شاغله بالها وتفكيرها وايد وكانت نورة محتارة وكله تقول في خاطرها :ليش جرح عطاني ايميله؟ وليش مارد على ايميلي وليش وليش؟ مية سؤال كان في بالها ويقطع حبل افكارها صوت الباب ويوم قامت من على الشبريه شافت نواف ولد شيخه ..
نواف والنوم في عيونه وكان يقرب من شبرية نورة : خالووه نورة ..
نورة: هلا نواف.. بعيد بعيد عن الشبريه ههههههه
نواف: هههه لا مابرقد هنيه بسير غرفتي بس امي وين ؟
نورة: امك في السوق ..
نواف بكل بروووود: انزين قوليلها يوم اتيي اني رجعت من بيت ربيعي
نورة: يالله على برودك يا نواف ...ههههههههههههه ذبحتني .. انزين بخبرها يوم ترجع
نواف وشوي وبيطيح عليها : هههههه انزين يالله تصبحين على خير
نورة: حووووه نحن بعدنا العصر الحين واونه تصبحن على خير .. تعال ايلس سولف وياي عشان لا ترقد
نواف: انزين خل ننزل تحت احسن
نورة : اوكي يالله طوف جدامي
ويوم نزلو نورة ونواف حصلو ام محمد يالسه بروحها وقعدوا وياها يسولفون ونورة تحاول تنكت عشان تضحك نواف وتخليه يصحصح شوي ..بعد ساعه من يلستهم دخل عليهم محمد وكان ياي والشر في عينه.. سلم على امه ويوم شاف نورة ونواف قامو وسلمو عليه.. نواف طلع فوق عشان يرقد اما نورة فقعدت وهي منزله عينها في الارض من كثر ماكانت تخاف من محمد ..
محمد : اميي وين نواف ؟
ام محمد : في بوظبي بيرجع باجر
محمد : انزين هو ما خبرج شي عن بنت عمي؟
ام محمد : شي؟ مثل شو؟؟
محمد: يعني ما قال انه ما يباها .. ما رمس عمي من وراي وقال انه ما يباها
نورة تعجبت من شك محمد في نواف والطريقة اللي بدى فيها السالفه ويا امه.. ام محمد من جهة ثانيه كانت منصدمه من كلام ولدها عن نواف وقالت له وهي معصبه: بوعيسى ترى نواف ريال وكبير وفاهم.. وما يسوي هالحركات غير اليهال ..
محمد وخلاااص وصل حده من العصبيه والغيره من معاملة امه حق نواف: الا ياهل ونص بعد.. عيل جيه يفشلني ويا عمي ..
ام محمد : ليش شو سوى ؟ ما قال شي فديته
محمد : بين انه ما يباها
ام محمد : يا محمد ترى الزواج مب بالغصب وهو مب بنت عشان تغصبه
محمد: يعني هو قايل انه مايباها
نورة كانت قاعده وتشهد على هالمعركه بين محمد وامه لدرجة انها صدعت من صراخه وطولت لسانه على امه اللي بعمره ما قدرها ولا سوالها شان ..
محمد: وانتي شو يلسج هنيه .. يالله انجلعي فوووق
نورة وهي مبطله الحلج : ان شاءالله.. وامي؟
نورة خافت على ام محمد لان شكلها كان تعبان وكان شكله الضغط مرتفع عندها
محمد وهو يصرخ في ويه نورة: انتي ما تفهمين اقولج سيري فوق وانتي تقولين امي؟ وبعدين هاي مب امج وتخسين تكون امج امج وحده ابوي ملقطها من الشارع و..
وقبل ما يكمل محمد كلامه اللي كان مثل السجاجين في قلب نورة المسكينه طاحت ام محمد مغمى عليها.. نزل نواف واخوانه عليا وعمر من فوق وهم متخرعين من صراخ نورة وصياحها
نورة: اميييييييييييي.. اميييي ردي علي الله يخليج.. محمد تصرف سو أي شي دخيلك ....
محمد يوم شاف الوضع جيه قسى قلبه زياده وهو شايف امه طايحه على الارض لا حركه ولا نفس ونورة تصيح وتصارخ وطلع من البيت ولا جنه مسوي شي .. ولا جنه مستوي شي في امه ..وهو طالع كان عبدالله توه راد من العزبه
عبدالله : السلام عليك خالي محمد
محمد مشى من عداله ولا جنه واحد طوله سلم عليه.. عبدالله سمع صراخ نورة وهو في الحوش وربع داخل وعرف انه صاير شي فيها ويوم دخل حصلها لاويه على ام محمد وهي تصيح وتصارخ واخوانه الصغار واقفين بلا أي حركه.. كانو منصدمين من هالموقف اللي اول مرة يستوي جدامهم ..
يا ترى شو بيستوي في ام محمد ؟ ومحمد بو قلب قاسي اللي ما حن قلبه على امه شو اللي ينتظره ؟
نهاية الجزء