الفصل 11
البارت الحادي عشر ..
كابر على ضعفك ، تظاهر بالصلابه ولو كنت هشاً من الداخل ، إبحث بداخلك عن قوتك ، انت يا صديقي لست بقليل حيلة إلا إن جعلت نفسك خائباً.
ماقدرت ارجع انام .. صليت وجلست على سجادتي .. سمعت صوت جوالي استغربت من يتصل هالوقت !؟ شفت رقم رباب .. رديت وسمعت صوتها تبكي طلعت للحوش عشان مايسمع ليث وقفلت باب الزجاج عشان لو بيدخل اشوفه ..
هديتها ووعدتها هالاسبوع قبل لاسافر بنروح انا وياها نكشف عند دكتوره على "عذريتها" مافيه الا هالحل .. مدري ليش حاسه إنه مجرد تحرش !!؟
شفت ليث يناظر لي من ورى الباب وعاقد حواجبه ..ارتبكت واستاذنت منها وقفلت .. دخل علي وهو يقول بهدوء :
من تكلمين هالوقت ..؟
ابتسمت وقلت شهلا فديتها .. حط رأسه على رجولي وهو يهمس :
خليني اكمل نومتي هنا لاتصحيني الا 6
1 مساء ،،
اليوم محاضراتي كثيره وبجلس ل3 العصر واحس اني تعبانه .. ومن الحلم ضآيق خلقي كل دقيقه استعيذ منه .. المصيبه الحلمين مرتبطين فبعض !! يارب احفظني واحفظ اهلي وزوجي لي ..
استغربت ان ليث ماارسل يتطمن ولا سأل عني .. بس اكيد مشغول فديته ... ارسلت له اساله وينك ! كنت حابه اعرف انه بخير عالاقل ولاجاء رد ..
اخذت قهوتي وطلعت لمحاضرتي الثالثه بحماس ..
فآخر المحاضره جاني اتصال من رقم غريب . استغربت وانقبض قلبي خفت امي فيها شي ..، استأذنت من الطالبات وطلعت .. رديت بهدوء وسمعت صرخة سما او ربا وحده
منهم
: فجررر الحقي ليث بيموت يتهاوش مع رجال بحوشنا ..
طار عقلي وخفت ..دخلت الم اغراضي واعتذر عن المحاضره شفت رباب طلعت وراي وهي ترجف : خير فجر طمنيني وجهك مخطوف
مدري كيف علمتها .. وماقصرت دقت على ابوها وجاء اخذني معها للبيت .. دخلت تحت على طول وانا اشوف ربا قدامي تبكي .. خفت ووقفت اترقب كل حرف يطلع من فمها ..
ربا : بسرعه ليث بيموت ..الرجال ضربه بسكين انا انتظرك مع السواق امي وسما مو هنا راحوا معه ..
استأذنت من رباب وابوها وانا اشكرهم لكن رفضوا الا يلحقونا ..
طول الطريق وانا ابكي واردد بصوت عالي :
يارب مافقد ليث .. يارب مافقده .. ياربببب احفظه لي وللي فبطني ..
شفت ربا ترسل بالواتس .. استغربت ذا وقته .لفت علي وقالت : عرفت رقم غرفته
هزيت رأسي وانا اشاهق .. خلاص متاكده ان
حلمي تفسر ! بس يارب مو موت يارب اي شي الا الموتتت .. تذكرت نومته على رجولي الصباح .. كأنه يودعني .. اخخخ ياوجع قلبي
دخلنا وقالت لي ربا رقم الغرفه .. ركضت لها وانا اشاهق ،،
فتحت الغرفه .. شفت رجال جالس عالكرسي وإصاباته خفيفه .. لحظه ذا الرجال اللي ضربه ليث قدام بيتنا !! ذا مآجدددددددددددد ؟؟؟؟؟
Like
اروى الا likes this.
لامارا غير متواجد حالياً أضافة تقييم إلى لامارا تقرير بمشاركة سيئة رد مع اقتباس إقتباس متعدد لهذه المشاركة الرد السريع على هذه المشاركة
قديم 21-09-15, 10:01 AM #24
لامارا
مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
الصورة الرمزية لامارا
? العضوٌ??? » 216
? التسِجيلٌ » Dec 2007
? مشَارَ?اتْي » 87,661
? نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي
صرخت عليه بدون وعي : وين زوجي ! وينه ذبحته يا****** ذبحته !!
التفت علي وقال :
يابنت النآس زوجك مافيه شي انا جيت اعتذر منه لأني مريض وبروح اعالج برا... انا غلطت عليه كم مره واستفزيته بسالفة امه وبسالفتك .. الواحد مايدري يرجع ولا لأ .. لكن زوجك من شافني هجم علي وماعطاني فرصه اتكلم ..ليتني ماجيت وتعنيت !!
رجعت على ورا ..وانا مو فاهمه شي !؟
فتحت الباب بسأل ربا عن ليث لكن شفته قدآمي ببدلته العسكريه .. ووراه كم شرطي ناظرت لوجهه لجسمه ! مافيه اي شي !!
همست بعدم استيعاب : ليث الحمدلله مافيك شي
ناظر لي بصدمه !!! وسحبني بقوه وراه مثل الخروف
..تو فهمت ! انا للأسف ضحية مؤامرة بطلتها ربا !!
دورت رباب وابوها دورت ربا وسواقها لكن ماشفتهم
من طلعنا من المستشفى وهو ساكت ويتنهد بقوة . . حاولت اتكلم لكن من ابي انطق حرف اتذكر الكف اللي عطاني فليلة زواجنا وارجع اسكت ...
توقعت بنروح بيتنا ! بيضربني ! بنتفاهم ! بيحقق معاي .. لكن ذا ماسك خط الرياض ؟؟
نطقت : ليث
ليث : انطمي يالفاجره ..يالخخاينه !! قسم لو اسمع صوتك لأقتلك بهالخط ولااحد داري ..تو عرفت من تكلمين الفجر ياخسارة ثقتي فيك جايه تتطمني على حبيب القلب .. آخ لو مو الجيران فكوني عنه ولا قسم ذابحه ..
سكت .. وماقدرت ابكي ! للحين مو مستوعبه .. ليش ماجد هناك ! ليش ليث هناك ! وين سما وخالته ؟؟
وصلنا اخيرا على اذان المغرب فتح الباب وسحبني .. شفت سعد طالع للمسجد شكله لكن شافنا ورجع بسرعه
سعد : ليث شفيك !!
دفني بالحوش وطلع وترك سعد وعلى رأسه علامات استفهام ...
ماقدرت اوقف .. وانا تعبانه واحس بجوع وعطش .. جلس سعد وهو يحاول يوقفني .. نادى امي اللي جت وجلال الصلاة عليها .. وكان هالشي آخر شيء شفته ..
صحيت شفت الجو مظلم .. ناظرت لساعة جوالي شفتها 10 فالليل .. قمت وتوضيت وصليت .. شفت رسايل واتصالات مسكت جوالي وقفلته ورميته بالخزانه .. طلعت ادور امي ابي افرغ اللي فيني من خيبه وحزن ..
ابي ارتاح بحضنها اللي ماقد احتجته كثر هالوقت ..
حصلت اهلي متجمعين .. سعد ، وامي ، وشهلا وخالتي بعباياتهم ..
دخلت وانا رافعه رأسي .. ناظرت لي امي بشك :
وش سويتي بالرجال ! ! وخليتيه يرميك مثل الزباله ندق عليه مقفل جواله .. تكلمي يابنت
سمعت صوت شهلا : ياعمه خليها ترتاح وتاكل لها شي اول ..
لكن عشان اريحها واريح سعد اللي يراقبني بنظرات غريبه ..علمتهم بكل شيء
وقف سعد وهو معصب مني : غبيه انتتتي غبيه !! لو كلامك صدق كل شي ضدك كل شي !!؟
واخيرا بكيت .. تو احس اني انتهيت .. اذا اهلي شكوا فيني شلون ليث ؟؟
الله لايسامحكم ياربا وماجد .. الله لايهنيكم بحيآتكم ..
******************
..يوم زواج سعد ..
فرحتي ناقصه .. الحمدلله امي وسعد صدقوني لما جاء ماجد لبيتنا وحكى لهم كل شيء .. وانا وريتهم اتصال ربا اللي كان من شريحه بدون إسم .. وخليت ابو رباب يكلمهم .. مانسى وقفتها معاي .. البنت كذبت وقالت انها سمعت مكالمة ربا بس عشان تنقذني .. الله يقدرني واقدر اساعدها ..
لكن ليث ! مافي اي خبر عنه .. وصعب اسأل سعد عنه ... جرحني واهانني ..مايستاهل حتى مجرد تفكيري فيه !!
جتني شهلا وهي تراقبني كل دقيقه من خوفها علي
: ماشاءالله طالعه قمر
ناظرت لها بحزن .. تعبت امثل اني قويه ..وقفت وقمت اشرف على كل شيء الزواج بسيط وبدون طقطقه والضيوف قليل . . لكن ذا زواج سندي فهالحياه ولازم اوقف فيه
طلعت استقبل سعد ومانتبهت للي معاه .. كنت فرحانه بشكله وهو بالبشت ..،
حضنته بحب وبست راسه ويده .. كأنه اكبر مني .. ضحك وهو يحضني بقوه
سمعت صوته : شوي شوي على بعض
التفت بحده لسعد وانا اصرخ : هذا وش جابه هنا !
سحبني له من يدين سعد لصدره ..
وسعد مبتسم ! على وضعنا ..، حاولت افك نفسي منه لكن كلامه الهامس بإذني وقف كل حاجه فيني ..
: مو ميت عليك بس يكفي تحملين هالمسكين مشاكلك وفضايحك .. خليه ينبسط بشهر عسله عالاقل
بعدها فكني بهدوء .. ناظرت لسعد المبتسم ..، وابتسمت له بقوه ودخلت داخل ..
جلست على اول كرسي. . وانا امسك نفسي ماأبكي .. شفت اهل العروس يجهزونها له ..
دخلت عند شهلا اللي كانت تكلم الشغاله تبي تتتطمن على ولدها .. من شافتني جت تركض لي .. كنت مخنوقه مو قادره اتنفس .. سمعت صوتها تصرخ علي ووتترجاني آخذ نفس .. حاولت حاولت والحمدلله اخيرا تنفست طبيعي ..
منسدحه بسريري وشهلا حاضنه يدي ...حالتي النفسيه حطام .. حتى ماغيرت فستاني السكري اللي كان لتحت ركبتي ..ولامسحت مكياجي الناعم جدا .. روج وردي غامق .. ايلاينر ..ماسكرا
ولافكيت تسريحتي الكيرلي .. احس جسمي موقادره احركه ..، حتى اللي فبطني ماعدت اهتم بنفسي عشانه ..!
رجعت اتذكر كلامه .. حقير والله حقير .. كيف يقدر يطيرني للسماء بلحظه ويرجعني للارض بنفس اللحظه !!
يارب بس ابيه يكتشف انه ظالمني .. وبعدها خلاص ماعاد ابيه ..، كرهته .. كرهت كل شي ربطنا فبعض .....
بعد شهر :
صحيت اليوم وانا مرتاحه .. اليوم بتطلع امي من الحداد .. ووعدتني لاطلعت بنروح للشرقيه عشان وظيفتي هناك ..اخذت اجازه هالفتره بدون مرتب ... كل اللي بقى شهرين اصلا ونعطل
سعد وساره للاسف احسهم مو متفاهمين .. مع إن سعد يحاول يخفي عني لكن واضح ان ساره متطلبه ودلوعه ولاهمها راحته ..
تروشت وانا اناظر لكرشتي الكبيره ..امس سويت فحص وطلعت بنت . . انبسطت بقوه ولما سمعت نبض قلبها بكيت .. وانا اوعد نفسي واوعدها بتغير عشانها للأفضل
صليت وقريت اذكاري .. الساعه 9 ومتعوده اصحى هالوقت ... طلعت وشميت ريحة البيض استغربت ان ميري سوته قبل لاقولها لكن دخلت الصاله وشفت سعد وامي جالسين. . سلمت عليهم وابتسمت
ناظر لي سعد وضحك على شكلي وجلس يعلق علي ..
كنت لابسه قميص قطن واسع بدون اكمام اورنج وشعري مسويته ظفيره فرنسيه ويوصل لفخذي ..
مديت لساني له بطفوليه .. وضحت امي علينا
افطرنا وانا احس سعد متضايق .. اليوم لازم اعرف شفيه ! ندمت اني تدخلت بقرار زواجه .. واهتميت بس بشكل وكشخة العروس ..ونسيت المضمون
جهزت قهوتي وجلست قدامه .. امي نامت بغرفتها والجو يساعد للتحقيق .. وللاسف انصدمت باللي قاله
: ياعمه هاالبنت تافهه !! كل همها كشختها ومنظرها قدام الناس .. تعبت منها تخيلي اتعب ماتحس فيني .. واللي يقهر تحط توبيكات لي بالواتس احبك واموت فيك وانا مسخن جنبها ماهتمت .. خلاص مو قادر استمر معها ..
رديت وانا متضايقه : يمكن البنت يبي لها صبر شوي
: اي صبر الحين زعلانه لها اسبوع ..وايش السبب مدري .. ادق ماترد ارسل ماتردد ... جيت لبيتهم وماحد عطاني وجه
يالله ...... انا التهيت بحياتي ونسيت حياة سعد . . وعدته خير وابتسم لي براحه .. انا وسعد مانرتاح الا نفضفض لبعض وهالشي يخلينا متعلقين فبعض بهالشكل ...
قطع صمتنا اتصال رباب .. كلمتها وانا مبسوطه ان هالبنت بعد تغيرت مثل ماتقول / صارت تشارك اهلها وجباتهم ..جلساتهم ... تنزل للسوق وتهتم بنفسها. . وكونت صداقه لأول مره بالجامعه ... الحمدلله يارب
4 مساء ..
صحيت من قيلولتي .. صليت وكشخت لبست فستان حمل ناعم اخضر ورفعت شعري فوق بتسريحه ناعمه لبست اقراط لولو ناعمه واكتفيت بروج زهر .. جد احس كل مازادت شهور الحمل .. كل ماأصير احلى ابتسمت لنفسي بإيجابيه ..
طلعت وانا اشوف ميري تجهز الحلا اللي سويته قبل لانام .. وريحة الصاله بخور وقهوة احلى ريحه عندي والله .. اليوم عزمت خواتي وشهلا عندنا لأن امي رفضت نطلعها من الحداد بعشاء واحترمنا رغبتها .
من جلست سمعت صوت موضي تهاوش لمياء لانها ضربت اخوها الصغير .. وبعدها صوت شهد اللي تتأفف من ولدها اللي يبي الملاهي ومايبي يجي عندنا
.. إبتسمت من قلب .. هذه حياتي ...
طلعنا للحوش من غربت الشمس وضحكنا مرتفع .. لأول مره انتبه لسوالف خواتي .. مع انها كل حش
موضي : تخيلوا الخبل زوجي لاجت ليلتها يتحمم عندي من قلب ويتعطر ويتزين من صباح ربي كأنه معرس وانا كل عمري متحمله ريحته ولاشكيت .. والله الرجال ماينفع بهم الا كذا
ردت شهد : لا لا انا زوجي اصلا 3 ايام عندها ويوم عندي وبهاليوم كله نايم كانه مغمى عليه ..اهب نفسي اعرف وش مسويتن له !
ضحكت شهلا عليهم . . وانا تخيلت نفسي مكانهم ! هل بتكلم عن معاناتي بهالبساطه .. !؟
سمعت صوت جوالي .. بالصاله .. دخلت اجيبه قبل لايوصلون هالجن له ..
مسكته وطاح مني ..!!
ليث ... يتصل بك
انتهى البارت .. البارت الجاي اتوقع بيكون الاخير ...،
اتمنى توقعاتكم لنهاية القصه ! ولو كنتوا احد ابطال هالروايه .. ايش بتسوون ؟؟
ثاني حاجه .. بروايتي حاولت اعالج قضايا كثيره .. واقتبست بعض احداثها من قصص واقعيه صارت حولي .. وان شاءالله بنجح بتوصيلي لرسالتي وهدفي من هالروايه ...
آخر حاجه .. احنا بأيام فضيله ..استغلوا هالايام بأعمال الخير. . أحيوا سنه رسوله بالتكبير والتهليل
الله اكبر الله اكبر الله اكبرالله اكبر كبيراً والحمدلله كثيراً وسبحان الله بكرةً وأصيلا ..ودي لكم ()