ملاذ الأرواح - الفصل الثاني عشر: "هيبة" الملكة - بقلم NAGMA - مكتملة | روايتك

بندقٍ صابت.. وخنجر ما يخون يوم ربعي بالردا باعوا دمي شفت في "صخرٍ" وفاءٍ بالعيون وجيت للوادي.. وجلى الله همّي يا عساف.. اليوم ما تفيد الظنون انتهى الماضي.. وثارك ما يهمّي حامية وادي.. وتحت أمري سكون والخواتم بالوفاء.. تروي فمي قفلت بيبانٍ.. وقطعت الغبون ما يحنّ القلب.. ولا يسيل دمي من بغى نورة.. بيلقى الموت كون ملكة الظلّام.. بـ عزي وسَمّي . . . . . ​بعد ما استلمت نورة الخاتم وبايعوها ملوك السبعة، التفتت لصخر وقالت بصوتٍ فيه نبرة الآمر الناهي: "صخر، نبي ننزل لحدود الوادي.. نبي 'الذيابة' يدرون إن نورة اللي كانوا يلحقونها، صارت هي اللي تملك حبل مشانقهم بكلمة واحدة." ​صخر ابتسم بـ هيبة وفتح لها ممر من ريح؛ ونزلوا بلمحة بصر لين وصلوا للنقطة اللي تفصل بين "الوادي المحرم" وحدود "القرية". كان عساف ورجاله متجمعين بـ خيولهم، يرتجفون ويطالعون الغبار الأسود اللي ثار فجأة قدامهم. ​طلعت نورة من وسط الغبار بـ ثوبها الأسود المهيب وعيونها الرمادية اللي تقدح شرر، وبجانبها صخر اللي طوله صار أطول وهيبته تهز الأرض. عساف أول ما شافها، طاح سيفه من يده وركبته طقت في بعضها: "نورة؟ يا بنت الناس.. حنّا ربعك، وجينا نرجعك لـ..." ​قاطعته نورة بـ صرخةٍ خلت الخيل تجفل وترجع ورا: "اقطع واخص! لا أنت ربعي ولا أنا أعرفك! نورة اللي كنت تبي تكسرها ماتت في ذيك الليلة اللي غدرتوا فيها. اللي قدامك الحين هي 'حامية الوادي'، الملكة اللي ما يمر طير في سماها إلا بإذنها!" ​رفعت نورة يدها اللي فيها الخاتم، وفجأة ارتفع سور من نار سوداء وبرد صقيع، فصل بين القرية والوادي للأبد. "يا عساف، خذ ربعك وذلفوا! وأعلمك من الحين، كل ما هب ريحٍ بـ ريحة الخنجر، عرفوا إنكم تحت رحمتي. واليوم، بواباتنا انقفلت بـ قفلٍ ما يفكه إلا من خلقكم.. ولا عاد بشريٍ يوطي طرف هالرمل!" ​عساف ورجاله انحاشوا بـ ذل ما شافه أحد قبلهم، وصياحهم ملى الوادي وهم يجرّون أذيال الخيبة. نورة التفتت لصخر، وشافت في عيونه نظرة حب واحترام ما قد شافتها من بشر. ​"الحين يا صخر.. انتهى الماضي، وبدأ الحاضر،" قالت نورة وهي تبتسم بـ هدوء. صخر مسك يدها ورفعها فوق: "الشور شورك، والمكان دارك. اليوم نكتب تاريخ جديد لـ 'ملاذ الأرواح'.. تاريخ ما فيه ظلم، ولا فيه غدر، فيه بس ملك وملكة يحمون الضعوف ويذلون الطغاة." ​ومشوا الاثنين في وسط الوادي، والجن الصغار والحيوانات كلها تحيي ملكتها الجديدة، وصار اسم "نورة" أسطورة يتوارثونها الأجيال.. البنت اللي كسرت قيود البشر، وحكمت قلوب الجان بـ شجاعتها.