الفصل الرابع
روايه(يوم من حياتي)
〰️〰️〰️〰️〰️〰️〰️〰️〰️〰️
...
البارات4
〰️〰️〰️〰️〰️〰️〰️〰️〰️〰️
دخلت كلية حقوق واتخرجت وكنت الاولى على دفعتي وبلشت روح على السجن اطلب مراجعة اضابير المساجين المهملين كنوع من التدريب ولفت انتباهي اسم سليم الشافعي السجين رقم 221 الموجود بالمنعزله طول فترة سجنه
جاسم : عم تتوضح قدامي الامور
ساميه : كيف يعني
جاسم: لما وقعت على الورق يلي عرضه عليي جمال واني جاسوس توقعت اتعرض لتعذيب وتحقيقات مالها نهايه
ساميه : ايه
جاسم : ايه بس ماعاد شفت جمال من هداك اليوم وما حدا حقق معي ماكنت شوف الا عماد وصفوان يلي جابوني اول مره لهون كانو يراقبوني لاسبوع وبس شافوني هادي وملتزم بالاتفاق تركوني وراحو وانتي كنتي اول حدا بيزورني خلال هالسنين
ساميه : جمال ماعاد طلع من بيته لامر غامض وعم يباشر اعماله عن طريق الاتصالات وعماد وصفوان من زلم جمال
جاسم : ليش ماعاد طلع من بيته
ساميه : والله مابعرف هدول كتير غامضين
تنهد جاسم ب اسى وقال… . ان شاء الله بتوصلي للحقيقه وبتحققي العداله
ساميه : ياااارب
#####
تاني نهار كانت ساميه متل عادتها طالعه لعند جاسم
عم تتطلع بمرايتها لاحظت سياره عم تلاحقها وتقرب منها
دعست بنزين وحاولت تبعد وتهرب بس السياره عم تقرب اكتر واكتر وساميه عم تاخد نفسها بصعوبه وتزيد سرعتها
فجأه اختفت السياره وساميه لسه مسرعه اطلعت من المراي الاماميه لتتأكد انها خلصت من يلي كان ملاحقها
ساميه وهي تمسح وجهها اوووووف ياربي نفدت بس مين يلي عم يلاحقني وليش
مالحقت تكمل كلمتها تفاجئت بشاحنه قدامها ضربت بريك وصارت السياره تفتل فيها وصدمت بشجره
ساميه… ااااااااااااااااااااااااااااااااااااه
######
كان قاعد بمكتبه عم ينفث دخان من سيجارو
حسن : شو صار معكم خلصتو عليها
عماد : كله تمام سيدي ضليت ماشي وراها بالسياره لاشتت تفكيرها وصفوان طلع قدامها بالشاحنه وصدمت بشجره
شد حسن على السيجار يلي ب ايدو : يعني بعدها عايشه
عماد : سيدي انا متأكد مارح تنفد منها اطمن سيدي،واعتبر ساميه الله يرحمها
حسن : مابدي اعتبر شي انا مشغل معي بهايم قلتلكم خلصوا عليها يعني بتخلصوا عليها
جمال : ابي ليش بدك ياها تموت خلص هي مارح تقدر تجي هلأ عموعد الجلسه وبهيك المحكمه رح تحكم لصالحنا
حسن بغضب : ياغبي ساميه بتكون بنت ماجد
جمال : شوووووووووو ! ! !
طمني دكتور كيفا بنتي 😭
الدكتور : حضرتك والدتها
ام ساميه : ايه ايه كرمال الله طمني عليها
الدكتور : بصراحه ممكن مارح تصدقي كلامي لهيك شرفي معي ياخانوم
مشيت ام ساميه ورا الدكتور بخطوات سريعه ودقات قلبها ماعم تهدي واخيرا وصلت لغرفة بنتها واشرلا الدكتور تتفضل بالدخول
بلعت ريقها وفاتت بخطوات بطيئة خطوات ثقيله هي ساميه يلي قدامي معقووووووول يااااربي دخيل اسمك ياربي دخيل اسمك وهجمت على بنتها تحضنها وتبوسها وهي مو مصدقه حالها من الفرحه
ام ساميه : ماعم صدق عيوني ياربي الف حمد وشكر لكرمك ورحمتك غمرتني برحمتك ياحنان يامنان
ساميه : اهدي امي ليكني قدامك مافيني شي هه عم اتحرك متل القرده
ام ساميه : والله من فرحتي بسلامتك يا امي… وقت وصلني الخبر انو سيارتك متعجنه ماتوقعت اني رح شوفك بحياتي
الدكتور : حمدلله عسلامتها ياخانوم هي رعاية الرب حمتها ومن حسن حظها وقت صار الاصطدام انفتح قدامها كيس الهوا وحماها متل مانك شايفه بنتك سليمه معافاه بس في شوية رضوض بجسمها ورح نعملا صور وتحاليل لنطمن على كفائه باقي اجزاء الجسم
مسحت ام ساميه دموعها وبقيت تشكر الله يلي سلم بنتها الوحيده
ام ساميه : كتر خيرك ابني الله يجزيك الخير
الدكتور : ولو ياخانوم واجبنا
قطع حديثهم طرقه على الباب
الدكتور : تفضل
دخل شاب اسمر طويل ووسيم عيونو وساع فيهم نظره حاده
الشاب : حمدلله عالسلامه انسه ساميه انا الرائد خالد جاي لاخدافادتك ازا وضعك بيسمح
ساميه : شكرا سلمك الله مممم مابعرف والله .. شو دكتور
خالد: وهو موجه كلامه للدكتور
شو دكتور بقدر هلأ اخد افادة الانسه ساميه
اطلع الدكتور بساميه ورد .. اي طبعا حضرة الرائد .. خد راحتك بالازن .. طلع الدكتور
اطلعت ام ساميه بوجه هالشاب وكأنها مشبهه عليه
ام ساميه بقلبها ممكن شي حدا من معارف ماجد الله يرحمه انا متأكده اني شايفته بس وين
طيب بنتي انا بره ازا احتجتي شي اندهيني
هزت ساميه راسها واشرت لخالد يتفضل يقعد
سحب خالد الكرسي وقعد
خالد : ايه انسه ساميه احكيلي كيف صار معك الحادث
ساميه : بصراحه كان في عجقة سير وانا حاولت اطلع من بين السيارات والهيئه كنت مسرعه ومانتبهت للشاحنه يلي خلتني انحرف عن طريقي
خالد :………………
ساميه : اي وبعدا ضربت سيارتي بشجره وصار يلي صار
خالد : بس يا انسه ساميه شهود العيان اكدو انه كان في سياره عم تلاحقك
ساميه : ها .. لا لا محدا كان عم يلاحقني
خالد بشك : متأكده
ساميه : اي اكيد متأكده يوه
خالد بقلبه : ليش مابدها تبلغ عن عماد وصفوان معقول مابتعرفهم او يمكن خايفه منهم !!!
ساميه : هاد كل شي سيد خالد
وقف خالد وسكر الدفتر وراح ب اتجاه الباب واول ماوصل للباب لف باتجاه ساميه واطلع فيها بنظره خلتها تجمد مكانها
خالد : ازا هيك بدك ف اي هاد كل شي
بلعت ريقها وحاولت تضبط نفسها
اي اي عم قلك هاد كل شي صار ليش بدي اتستر عحدا حاول يقتلني
قرب خالد لعندها بخطوات بطيئة وركى ايديه على طرف التخت وعيونو مسلطين بعيون ساميه
خالد : بس انا ماقلت انه في حدا حاول يقتلك
ساميه وحست حالها عكت بالكلام : اه اي امبلا انت حكيت انه كنت مطارده
خالد : انسه ساميه انا مهمتي هون اخد افادتك وافتح تحقيق لاحقق العداله بس الضاهر انتي مابدك العداله تاخد مجراها
ساميه : لاااا شو هالحكي انا بس
خالد : انتي طلعتي جبانه ومابتشبهي ابوكي ياساميه
توسعوا عيون ساميه وبقيت صافنه بخالد .. من وين بتعرف ابي
انعدل بوقفتوا وحكا بحزن : ماجد بيك كان قدوتي بهي الحياه كنت بستمد قوتي منه وياما اعطاني دروس الحياه ما اعطتني ياها
ساميه :…… .
خالد : انا وقت قرأت اسمك فكرت انه تشابه اسماء بس لما شفت امك تزكرتها فورا
كانت ساميه مصدومه من كلامه في شي مخوفها معقول يكون من زلم جمال وابوه !! لا لا مستحيل لو هيك القصه ماحكالي انه بيعرف بابا… بس يمكن حكا هيك لاطمنلوا اوووف ياربي انا حاليا مافيي اوثق ب اي حداااا
خالد : هاد كرتي الخاص ازا اتزكرتي شي او حبيتي تحكي اتصلي… بالازن .. وتركها ومشي
كانت ساميه عم تطلع بالفراغ مطرحوا وكلامه عم يرن بدانها شي بداخلها بيقلها هالشخص صادق وشي مخوفها حطت ايدها على راسها وتنهدت ااااااااااه ياربي ساعدني
ام ساميه : اشربي كاسة العصير بنتي الهيئه نشف حلقك من كتر الحكي
ساميه : امي !!ايمت دخلتي !!
ام ساميه : صرلي حصه عم حاكيكي وانتي بغير دنيا
ساميه : اي والله يا امي هالرجال وترني وكركبني تخيلي بيقلي انه بيعرف ابي وفكر انه في تشابه اسماء بس وقت شافك تأكد اني بنت ماجد
ام ساميه : لك اي والله حتى انا كنت بقول لحالي اني شايفته بس مابعرف وين
ساميه : قلي انه كان يتعلم من بابا
ام ساميه : ماعرفتي اسمو الكامل
ساميه : لا… لك استني ليكو الكرت تبعو معي تكه لشوف
امممممم اسمو خالد يوسف المحمد
حطت ام ساميه ايدها على تمها وشهقت… مييييييييييييين !!!
#####
السجين رقم 221 قرب خود اكلك يلا
جاسم ساكن بمكانو ماعم يحكي مع حدا ولا ياكل رجع لطبيعتو قبل ماتضهر ساميه بحياته
كان خايف وقلقان عليها ومستغرب كيف مر 4 ايام وماتجي !!
يارب مايكون صاير معك شي ساميه 😔
#####
اخيرا رجعت عالبيت يووووه حاسه جسمي مكسر من النوم الطويل على ضهري الله يسامحك امي قلتلك انا منيحه
ام ساميه : يعني مو من حقي اطمن عليكي ياشمعة حياتي
باست ساميه ايد امها وشمتها وضمتها… لك بعشق كل شي فيكي يا احلا واحن ام بكل الدنيا
ام ساميه : ههههههه اااخ منك ومن السانك الحلو يالله بنتي خليني ساعدك لتتسطحي على تختك
ساميه وهي عم تهرب من امها : دخيلك ماااااابدي والله انا منيحه ليكي هه شوفي كيف عم اركض ونط
ام ساميه : يوه يوه والله مابيصير هيك بنتي ارتاحي يرضى عليكي
ساميه: امي بدي اخد دوش وروح اطمن على جاسم
ام ساميه : يمين عظيم مابتتحركي من البيت انتي بدك ياني موت ناقصه عمر
ساميه : بعيد الشر عن قلبك امي بس انا
ام ساميه : بدون بسبسه انا قلت لٱ يعني لٱ
حاولت ساميه تقنع امها بس بدون فايده وبالاخر اخدت شور ولبست بيجامه وبلشت تدقيق بالملفات لتجهز حالها للمرافعه قدام المحكمه
###
السجين رقم 221 قرب خود اكلك
السجان… شو قصتك يا 221 صرلك اسبوع ماعم تاكل
جاوب السجان صوت انثوي
لانك بتناديلو 221 وهو الو اسم متلك متلو ولازم تحترمو
رفع جاسم راسو بس سمع صوت ساميه وراح يركض لعند الباب
جاسم : اخيرا اجيتي خير شبها ايدك ليش لونك مخطوف ووجهك اصفر كنتي مريضه صاير معك شي
ساميه : هههههه رووووق عليي ولو شبك انفتحت فرد مره
السجان بضحك : الحمد لله سمعنا صوتك 211
ساميه : 😡
السجان : قصدي يا سليم بيك ههههههه يالله بالاذن
فاتت ساميه لعند جاسم وبلشت تفرد بالاكل يلي جايبتو معها وهو واقف بعيد ومتكتف عم يبتسم ويراقبها
ساميه : مطول وانت صافن فيي
جاسم : وين كنتي
ساميه : اي تعا ناكول هلأ ورح خبرك كل شي صار معي
بلشو ياكلو وساميه تشرح لجاسم كيف صار الحادث والسياره يلي طاردتها والشاحنه و كل التفاصيل
ساميه : ايه بس هي يلي صار معي
جاسم :…… .
ساميه : هلوو بست جاسم وين شردت
جاسم : يعني كان ممكن تموتي !!!
ساميه وهي عم تكت ايديها وتمسح تمها اممم اي ممكن بس الحمد لله قدر ولطف وليكني قدامك مافيني شي
جاسم: ساميه
ساميه : اي جاسم قلي
جاسم : انا ماعاد بدي اطلع من هون خلص اسحبي القضيه وماعاد تفتحيها ابدا
ساميه بغضب : شوووو بعد ماوصلت اللقمه للتم بدك ياني انسحب بعتزر منك جاسم رح كفي باللي بلشت فيه ولو على حساب حياتي
وقفت وتوجهت للباب
ساميه : اوقات بنفكر بعواطفنا مو بعقلنا بعرف انك خايف علي بس اطمن انا ربي معي وب اذن الله رح انجح
جاسم :…………… .
سامية : بتعرف مين قابلت بالمشفى
جاسم : مين… ..؟
ساميه : شخص اسمو خالد يوسف المحمد
جاسم : ايه
ابتسمت ساميه بتحدي وكملت كلامها
هاد ياسيدي بيكون اخو جمال من امه
جاسم : اهااا وعلى شو ناويه
ساميه : حاليا طالعه لاقابله انا حاسه اني رح استفيد منه
جمال : بلاها ساميه خلص خلي كل شي لموعد المحكمه
ساميه : خوفك عليي عم يحبطني انا رايحه جاسم بشوفك يوم الجلسه ان شاء الله…... سلام
جاسم : القدير يحميكي
###
وصلت ساميه الكافتيريا يلي تواعدت تلتقي فيها بخالد
حجزت طاولة واشرت للجرسون يجيبلها فنجان قهوه
خالد : خليهم تنين لو سمحت
ساميه : اهلين سيد خالد
خالد : كيفك انسه ساميه
ساميه : نشكر الله تمام .. وانت
خالد : تمام… . ايه طلبتي تقابليني
شبكت ساميه ايديها ببعض وحطتهم تحت دقنها
بصراحه جيت لاسمعك
خالد : كيف
ساميه : بصراحه ماما خبرتني انك بتكون اخو جمال من امو
طبعا هالشي لازم يخوفني لانه الدم بيحن بس
خالد : انا دمي مو نجس
ساميه : العفو مو هيك قصدي
خالد : ولا يهمك بس انا فعلا مابعتبر هالشخص اخي ولابيشرفني هوي وكل عيلته
ساميه : ليه تركت بيت عمتي لما صار عمرك 10 سنوات
حنى خالد صارو للكرسي وارتسمت ابتسامة لطيفه على وجهو
خالد : هههههه الضاهر تزكرتني منيح الخاله سهيله
ساميه : هههههه هيك شي اصلا من لما شافتك بالمشفى شبهت عليك ووقت قلتلها اسمك عرفتك فورا
خالد : انا ولدت على هي الدنيا ما بعرف ابي وامي
ساميه بجديه : ايه
خالد : ابي مات مقتول وعمري سنتين وامي اول ماخلصت العده كانت حرم السيد حسن الراشد او متل مابيسمي حالو حسن الجبل
ساميه : الجبل ؟؟؟
خالد : ايه هوي بيعشق قوة الجبال وبيلقب نفسه انه متل الجبل
غمضت ساميه عيونها وشدت على ايدها بس فورا اخدت نفس لحتى ماتضهر لخالد شي
خالد : للاسف امي كانت عشيقة حسن الجبل يعني فيكي تحكي التنين خانوه لابي
ساميه : يعني حسن قتل ابوك
اخد رشفه من فنجان القهوة وحكا بكل برود ايه
ساميه : لهيك اشتغلت ضابط مو
خالد : تقريبا
ساميه : اها طيب كمل كلامك
خالد : لما صار عمري 3. سنوات اجت ماما نرجس (عمة ساميه ) واتبنتني
ساميه : ايه
خالد : ومن يومها صارت ماما نرجس كل حياتي اهتمت فيي وربتني لصار عمري عشر سنوات بوقتها كنتي طفله بعمر سنتين تجي مع امك وابوكي وكنت لاعبك كتير وياما اكلت بهادل لاني وسخت تيابك بالشوكولا
احمر وجه ساميه ونزلته ع الارض… انا لليوم بحب الشوكلا
خالد : شو ماكبرتي رح تبقي طفله بعشق الشوكلا
ساميه : ماجاوبتني لي تركت بيت عمتي
خالد : ابدا وقتها اجا عمي الله يرحمه من كنده واخدني معه بس انا مانسيت الست اللي ربتني والرجل اللي كان اللي بمقام ابي ساميه : قصدك بابا
خالد : ايه… .. وهلأ دورك تحكي انسه ساميه
ساميه : شو بدي احكي
خالد : ليش ماقدمتي شكوى ع الناس يلي حاولو يئزوكي
ارتبكت ساميه وتلعثمت . اه لا مو صحيح انا خبرتك بالتحقيق كل شي
خالد : خايفه مني
ساميه : لا لشو خاف منك بس هاد يلي صار
وقف خالد ورفع ايدو للجرسون سحب محفظته وحط الحساب ليطلع
ساميه : لوين
خالد: بتعرفي شو مشكلتك
ساميه :…… .
خالد : مشكلتك انك جبانه قد ماحاولتي تضهري قويه…
مشكلتك انك بتشكي بكل شي حواليكي وهالشي غلط بعمرها ايد وحده ماصفقت
ساميه : لو سمحت سيد خالد انا بعرف كتير منيح شو بعمل
خلال : وانا بالازن… .. وتركها ومشي
بقيت ساميه دقايق على نفس قعدتها وهي عم تنفخ وتتأفف
اووووف شو هاد كيف بدو ياني اوثق فيه وهوي اخوه لجمال انا مستحيل اوثق بحدا مستحيل وقامت وطلعت من الكافتيريا
ووقفت لتأشر لتاكسي حست بسياره مسرعه جاي بتجاهها جمدت مكانها وحتى صرختها انعدمت
ماعادت تسمع الا صوت الرصاص يلي جاي من كل جهة
وبلحظه كانت ع الارض محتميه بجسم خالد يلي ركض عليها واتصاوب مكانها
رفعت ساميه راسها لتشوف خالد عم ينزف صرخت بكل قوتها
خااااااااالد
*╚══════ღღ══════╝
بهالليل في حدا تعبان .. حدا مالل .. وحدا ضايج....
في حدا دايق خلقو من التفكير .. في حدا موجوع .. حدا عم يبكي .. وحدا عم يضحك.....
بهالليل كل حدا عم يدور ع حالو...بهالليل في حدا ناطر شي
ويمكن حداا مشتاق...ناطر حدا يقلو مشتاق متلك
بهالليل في حدا عم يراقب فلان وعلتان...عم يتحسر ع شي او عم يتمنى شي.....
كل حدا فينا بيوصل لليل وفيه ألف قصة براسو وفيه ألف شغلة حابسها جواتو......
كل حدا فينا قبل ما ينام رح يتفرج على شريط الذكريات
بعدا يا بيتسم يا بتنزل دمعة فرح من عيونو اوبنام على حرقة بتحرق قلبو من جوا 💔💔....
✯✯✯✯
كانت هالليله متل الكابوس على ساميه بقيت ناطره ع باب غرفة العمليات لحتى تطمن على خالد .. افكار بتاخدها وافكار بتجييها ودمعات حايره عم تنزل ع خديها
هدوء المشفى كان مخيف عم تسمع دقات قلبها وانفاسها
يارب احميه يارب 😓
غمرت راسها بين ايديها وبلشت تبكي وهي عم تتزكر يوم موت ابوها ولحظة اتقوص خالد كانت من اقسى اللحظات عليها مابدها تتزكر بتنفض براسها لتطرد منه كل هالافكار البشعه
اطلعت ب ايديها وملابسها يلي نشف عليهم دم خالد وزادت بالبكي
يااااااارب ماعاد قلبي يتحمل دخيل اسمك يارب تحميه
ومن الفراغ المحيط فيها بلشت تسمع صوت خطوات سريعة جاي ب اتجاهها رفعت راسها لتشوف امها وعمتها نرجس
انهارت ساميه بحضن عمتها وبلشت تبكي
نرجس : بنتي ساميه طمنيني كيفو خالد
ساميه : خالد كان رح يموت ياعمتي هوي حماني
نرجس : ااااه يا روحي ياخالد ياريت انا ولا انت ياعمري
ساميه : بعيد. الشر عنك عمتي ان شاء الله يكون بخير ادعيلو عمتي ادعيلو
نرجس بتبكي : خالد لا تترك امك يا روحي ماصدقت وانت ترجع
ام ساميه : وكلي الله بنت حمايي مابيجوز هيك خلونا نقرأ قرآن ليطلع بالسلامه
قعدو كل وحده ومسكوا المصاحف وعم السكون والسكينه المكان
ساميه هاديه ومافي شي بتعملو الا انها تذرف دمعتها بصمت وبتقرأ قرآن… .
الشرطي : انسه ساميه ممكن تتفضلي معي لناخد افادتك
ساميه :………
الشرطي : لو سمحتي يا انسه
ساميه : صدق الله العظيم … وباست المصحف وحطتوا ع جبينها واتطلعت بالشرطي بغضب
مارح اتحرك من هون لحتى اطمن على خالد
اتفهم الشرطي وضعها النفسي وطلب منها تروح لمكتبه بعد ماتطمن ع خالد .. هزت راسها ورجعت لمصحفها ..
بعد ساعه من الانتظار طلع الدكتور واتوجهوا بسرعه لعندو
ساميه : طمني دكتور خالد كيفو
نرجس : كيفو ابني كيفوو
ام ساميه : طولو بالكون لنفهم من الدكتور
الدكتور : المريض شو بيكون الكون
نرجس : انا امو
الدكتور : اهلين ياخانوم وحمدلله على سلامته صحيح العمليه كانت صعبه وكان في خطر على حياته لان الرصاصه كانت قريبة كتير من العامود الفقري وخفنا تحصل اي غلطه تتسببلو بشلل
ساميه: يعني وضعوا مستقر هلأ ولا في خطر على حياته
الدكتور : اطمني انسه نحنا شلنا الرصاصه من جسمو ووضعو منيح ومستقر واتعدى مرحلة الخطر
ساميه : فينا نشوفوا
الدكتور : اي طبعا بس لحتى ينتقل لغرفته ويفيق من البنج اطمنوا وضعوا منيح كتير
نرجس : يعني ابني مارح يموت ماتخبي عليي دكتور كرمال الله
ام ساميه : كش برا وبعيد شو هالحكي بنت حمايي لاتفاولي عليه
رجف قلب ساميه من كلمة عمتها وبقيت مسلطه نظرها عالدكتور وناطره يحكي ليطمنها
الدكتور : الاعمار بيد الله ياخانوم نحنا عملنا يلي علينا والباقي على رب العالمين.. والسيد خالد اتجاوز مرحلة الخطر وصحته ممتازه واللي ساعدو يتجاوز الخطر شغلتين بعد رحمة الله طبعا وهنه بنيته القويه وارادتو على الحياه وهلأ بالازن من منكون وحمدلله عسلامته مره تانيه
بعد ليله طويله ورعب وخوف اخيرا ارتاح قلب ساميه وما بقي الا تشوفو لتطمن عليه
طلع خالد على غرفته يلي كانت متحاوطه برجال الشرطه وتوجهت ساميه فورا لمكتب المحقق قدمت افادتها ورجعت لتفوت اخيرا عند خالد
بعد ماصحصح خالد وصار قادر يحكي دخلت لعندو نرجس وركضت عليه بوستو من ايديه وخدو وكانت تضمه وتشمه كأنها امها الحقيقة
نرجس : ياروووحي يا امي الحمد لله اني شفتك بخير
خالد بفرح : الله مايحرمني منك يا امي الحمد لله انا منيح بس انتي مين خبرك اني هون
مسحت نرجس عيونها وقالت بمزح .. مين يعني .. في غير ساميه كنت بدك تنقذها وتروح فيها
ابتسم خالد ودق قلبه بقوه وقت انذكر اسم ساميه حس براحه انها بخير
نرجس : تعي ساميه تفضلي مرت اخي
دخلت ام ساميه وسلمت على خالد وهنته بالسلامه اما ساميه بقيت واقفه بعيد خجلانه من خالد ومن نفسها لانها ماوثقت فيه واعتبرتو متل اخوه جمال
خالد وهو بيطلع بساميه وراسم على وجهو ابتسامه خفيفه…
خالد : انتي منيحه
انفجرت ساميه بالبكي وركضت لعندو مسكتلو ايديه بقوة وهي بتصرخ فيه… انت مجنوووووووون كيف هيك بترمي حالك ع الموت كيييييييف
خالد : وهو عم يمسح ايدو ع شعرها خلص اهدي ليكني قدامك بخير
ساميه : لو كان صايرلك شي لا سمح الله ماكنت سامحت حالي
خالد : بكفي دموع قلتلك انا منيح بدك قوم نط عالتخت لتصدقي
ساميه : بعد فيك حيل تمزح 😒
خالد : هههه شو اعملك لتصدقي اني منيح وكلها كم يوم وبطلع من هون بس بدي منك طلب ساميه
ساميه وهي عم تمسح دموعها .. ايه اطلب
اطلع خالد ب امه وغمزها لتاخد ام ساميه وتتركهم وحدهم شوي
وبعد ماصارو وحدهم اشرلها تجي تقعد بحدو
قعدت ساميه بخجل وكانت متلهفه تسمع خالد شو رح يحكي
خالد : اول شي مابدي تبكي مفهوم
هزت ساميه راسها بخجل : مفهوم
خالد تاني شي بدي منك وعد
ساميه وعد شو
خالد : تكوني بالجلسه جسد ساميه وروح ماجد وقلب خالد
ساميه ب استغراب… كيف ؟؟
خالد : يعني جسدك يحضر الجلسه وروح ابوكي تحكي وقلب يلي يعطي قرارات
ساميه : فهمت عليك خلص بوعدك
خالد : ساميه
ساميه : نعم
خالد : انا هون شبه عاجز بدي تساعديني لاخد تاري من حسن
ساميه : ان شاء الله خالد
صفن خالد بعيونها الدبلانه وكمل كلامه
وقت جيت لعندك عالمشفى لاخد افادتك ماكانت صدفه
ساميه :…………… .
خالد : بصراحه انا بعرف كل تحركاتك ومطلع على قضية سليم الشافعي من اولها
ساميه : قصدك جاسم !!
خالد : لا لا انا بقصد سليم الشافعي بذاته
ساميه : مافهمت وضح اكتر
خالد : شوفي ساميه انا بدي توثقي فيي متل ما انا واثق فيكي
ساميه بعجل… خالد انا
خالد : لو سمحتي خليني اكمل كلامي للآخر
ساميه : تفضل
خالد : انتي رفعتي قضيه على جمال وحسن وهي خطوه ممتازه كتير بس،لازم تعرفي انه حسن عندو اساليب غير قانونيه بتخليه يطلع من القضيه متل الشعره من العجين
واحتمال تستمر هالقضيه سنوات طويله وانا بدي تكسبيها من اول جلسه
ساميه بتوتر : ايه بس
خالد : بدون بس….
مد خالد ايدو علق عيونو بعيونها هاتي ايدك ساميه
مدت ايدها ومسكتلو ايدو حاول يسند نفسه بس حس ب الم
ساميه : لك شوووو عم تعمل خليك مرتاح
خالد : ماتفلتي ايدي الا بس تعاهديني
ساميه : على شو
خاد : نفوت هالحرب سوا ونخوضها سوا حتى لو كنت عاجز اتحرك حاليا بس بعرف كيف اخليكي تكسبي بس عاهديني و واعطيني ثقتك
مسكت ساميه ايد خالد ب ايديها التنتين وشدت عليها .. بعاهدك خالد
بعد هيك بلش خالد يشرح لساميه شو تعمل وفهمها كل التفاصيل وهي عيونها بتلمع وبتهز راسها
خالد : اول شي رح تروحي على هاد العنوان وتعملي كل يلي فهمتك ياه وانتبهي ساميه تكوني مراقبه كل تعبنا بيضيع
ساميه : اطمن خالد رح نفذ كلامك بالحرف
قربت عليه وطبعت بوسة ع جبينه
ساميه : شكرا خالد
خالد بخجل : على شو
ساميه : انت اعطيتني معلومات سريه ومهمه وقربت عليي الطريق
خالد : طريقنا واحد وهدفنا واحد ساميه
ساميه : انت هدفك حسن وانا هدفي جمال
خالد : حسن هدفك وعدوك كمان
ساميه : عدوي !!
خالد : حسن هو يلي بعت رجالو ليقتلوكي وهو قاتل ابوكي
شهقت ساميه وماعادت حست عحالها ووقعت ع الارض مغمى عليها
☆☆☆☆
#بالمــحــكمـــــه ♗
المنادي : محكمه
فات القاضي والمستشارين للقاعه وجلسوا ب اماكنهم وبعدها جلس جميع الحضور
ساميه عم تطلع بجاسم وجاسم عم يقويها لتبلش مرافعتها
القاضي : نادي للمدعي عليهم
المنادي حسن وجمال الجبل
خفق قلب ساميه بقوه حست النار اشتعلت بكل جسمها بس سمعت اسم حسن
اطلع الكل ليشوفوا جمال وابوه بس ماكانو موجودين ومن بعيد عيون جاسم لمحت غريمه داخل ع المحكمه والمفاجٱه انه كان فايت على كرسي متحرك مو على رجليه
اندهش جاسم من منظر جمال واتطلعلوا بعين الشفقه رغم كل شي عمله معه
اما ساميه كانت ابتسامتها واضحه وباين عليها الشماته والحقد
اخيرا اتوجه المدعى عليهم لاماكنهم وسط ذهول الجميع سنين طويله جمال مابيطلع من بيته وكان السبب انه مشلول لكن بيبقى السؤال يلي حير الكل كيف انشل !!
بلشت الجلسه .. بسم الله الرحمن الرحيم
القاضي : محامي الدفاع يتفضل
ساميه : شكراً سيدي الرئيس وبلشت مرافعتها بكل قوه وثبات وكأنها بساحة معركه كانت عم تحاور وتجادل اربع محامين لجمال وحسن وماعم تسمح لحد فيهم يغلبها كانت نظرات جاسم تقويها وكلمات خالد تدفعها
ساميه : سيادة الرئيس حضرات الساده المستشارين بعد اطلاع حضرتكم على ملف سليم الشافعي يلي قدمته بالجلسه الماضيه ويلي بيحتوي على اوراق ثبوتيه لسليم الشافعي وصوره من شهادة الوفاه اود تقديم دليل عفوا اقصد ادله جديده لهيئتكم الموقره
شد حسن على قبضته وبلع ريقه وبلش يطلع هو وجمال ببعض
القاضي :اكيد اتفضلي انسه ساميه
ساميه : اسمحلي انده للشاهده تبعي
خفق قلب جــاسم بقوه .. معقول ساميه نكثت وعدها الي واستدعت سمر للمحكمه !!!!
بس وقت شاف ست بالاربعين من عمرها داخله للقاعه ارتاح قلبه وبقي يراقب ساميه ويحول نظرو كل شوي لجمال يلي مو عارف لي هيك صار فيه وياترى وينها سمر 💔
ساميه بكل شموخ : تفضلي سيده مريم للشهاده
مريم رفعت ايدها… اقسم بالله العظيم ان اقول الحقيقه ولاشيئ سوى الحقيقه
القاضي : اسمك وشو علاقتك بالقضيه
مريم : انا اسمي مريم عبدالله الشافعي بنت عم سليم الشافعي وزوجته
كانت هي اول صدمه لحسن وجمال يلي الوانهم ماعادت تتفسر وبلش العرق يتصبب منهم والتوتر واضح عليهم وساميه تطلع فيهم وعم تتلذذ بمنظرهم وهنه متل الجرذان المذعوره يلي وقعت بالمصيده
القاضي : معك اوراق ثثبت نسبك وانك زوجة سليم الشافعي
مريم : اكيد حضرة القاضي وقربت من المنصه وسلمت القاضي كل الاوراق الثبوتيه هويتها وهوية سليم عقد زواجهم ودفتر العيله والنسخه الاصليه من شهادة وفاة سليم وصور شخصيه لعرسهم وحياتهم العاديه سوا
بعد ماتفحص القاضي الاوراق مع مستشاريه
القاضي : الاوراق سليمه وواضحه ساميه بقوه : انا بوجه اتهامي لجمال وابوه بتزوير اوراق غير رسميه واختطاف موكلي وارغامه على التوقيع على تهم لم يقم بها وقتلهم لسليم
القاضي : مادفاعك عن التهم المنسوبه اليك
حسن : هي وحده كزابه ياسيدي انا مابعرف شي
مريم : انت يلي كزاب ومجرم وقاتل
حسن : اثبت عندك سيدي سب وقذف بحرم المحكمه الموقره
القاضي : سكوووووووت
ساميه بهمس اهدى حسن بيك لسه الدف ب اولو 😉
حسن عم يتصبب عرق ويمسح جبينه حس نهايته قربت على ايد بنت ماجد
القاضي موجه سؤاله لمريم
انتي كنتي تعرفي شو كان بيشتغل زوجك وانه في شخص اخر مسجون مكانه
مريم : لا سيدي ماكنت اعرف شي عن شغله سليم كان كتوم بس بعد وفاته لقيت بخزنته هي الاوراق يلي بتثبت لحضرتكم انه كان بيشتغل بالمافيا وتجارة السلاح مع حسن الجبل واشرت لحسن كان يشتغل مع هاد
حسن : كزاااابه انا مابعرف زوجها ولاعمري شفته
القاضي : هدوووووء او بخلي القاعه
مريم : متل ماقلتلك سيدي زوجي كان بيشتغل جاسوس للمافيا لصالح حسن وتجارة السلاح وانا ماعرفت الا بعد وفاة سليم وقت شفت صورهم سوا والاوراق يلي كانت بينهم
وبالنسبه للسجين…
حولت نظرها لجاسم يلي ابتسملها من بعيد… وهي نزلت دمعه من عينها
مريم : اقسم بالله العظيم لو كنت اعرف ب امرو كنت خلصته من زمان سيدي 😔
اطلعت ساميه بجاسم وبعدين حولت نظرها لجمال يلي جمد بمكانو
القاضي : وشو المستندات يلي لقيتيها بخزنة سليم
مريم : كل شي سيدي
القاضي : معك شي يثبت صحة كلامك
مريم اي نعم سيدي هي شيكات خطيه وموقعه بخط اليد خط حسن الجبل وهاد الختم تبعه عليها
شعار الجبل وهي المداليه يلي هداه ياها حسن لسليم كمان عليها شعار الجبل وهون قدامك صورهم سوا بعدة صفقات وحفلات
قاطعت ساميه حديث مريم
ساميه : متل هي المداليه !!!
مريم : اي صح متل هي ليكا معي هون
ساميه : ممكن شوفا
مريم تفضلي
قارنت ساميه الميداليتين ببعض كانو نسخه طبق الاصل من بعض شدت عليهم بقبضتها وتوجهت لحسن وحطتهم قدامه
ساميه .. بتتزكر هي !!
حسن : ل ل لاا
ساميه : وعيونها بتقدح شرر اطلع منيييييح ياحسن هي المداليه كانت ب ايد ماجد وقت قتلته بدون مايرفلك جفن لانه رفض يسلمك اوراق سليم
قربت ساميه منه ..وسحبت جاكيته وهااااااد شوووو هي نفس المداليه معك الضاهر بتهتم ب اناقتك ياجبل
انتفض حسن من مكانو وحاول يهرب من القاعه بس الشرطه حاوطوه فورا ووجهوا عليه مسدساتهم
القاضي : هروبك بيدل انه كل الادله صحيحه انت قاتل سليم الشافعي والمحامي ماجد
ساميه : والغضب تمكن منها وهي بترفع اصبعها بوجه حسن وقااااتل يوسف المحمد والد الرائد خالد المحمد ابن زوجتك
قربت ساميه من حسن وصرخت فيه .. انت انتهيت يامجرم وسرت كرت محروق وهلأ الدور على ابنك
……
فجأه طلع صوت طلقه صدعت جدران المحكمه رافقها صوت جاسم… ساااااااااااااااااااااميااااااااااااااااااااا
✺✺✺✺✺
هدوء عم ارجاء المحكمه ل لحظات انخلط بالدهشه لرؤية مشهد يخطف الانظار… .
بالوقت يلي كانت ساميه عم توجه كلامها لحسن المحاوط بالشرطه بعد محاولته الهرب
ساميه : انت انتهيت حسن انتهيت
حسن : ههههههه انا بنهي مابنتهي
هجم حسن على احد افراد الشرطه يلي كان بيطلع بساميه وهيه عم تصرخ بحسن وسحب مسدسه واطلق طلقه براسه افقدته الحياه فورا
وقع حسن ع الارض ميت تارك وراه ابنه العاجز عم يصرخ ابيييييييييييي
جمدت ساميه بمكانها هيه ماكان بدها هيك كان بدها تشوفو على حبل المشنقة ليش استعجل ليش
فضت الجلسه وتم التحفظ على جمال وهو بحالة انهيار تام
القاضي: يؤجل النطق بالحكم لبعد خمس ايام رفعت الجلسه
و طلب من ساميه يشوفها بعد الجلسه
… .
كانت واقفه عند باب غرفة القاضي عم تستجمع قوتها وتحاول تبين طبيعيه بعد الموقف يلي تعرضتله من ساعه
دقت عالباب بخفه واستنت الرد
القاضي: تفضل
دخلت ساميه لمكتب القاضي يلي اشرلها تقعد فورا
القاضي : انتي تمام
ساميه : ايه الحمد لله .. خير حضرة القاضي ليش طلبت تشوفني
القاضي بجديه : اولا مابدي اللي صار بقاعة المحكمه يحبط عزيمتك
ساميه : اكيد
القاضي : وتانيا يمكن تستغربي من كلامي بس انا احتراما لابوكي ولاني بعرف تفانيه واخلاصه لعمله رح اخبرك شي مهم ماحبيت اطرحه بقاعة المحكمه
بلعت ساميه ريقها وحست بالخوف رجف صوتها .. ب ب بخصوص جاسم !!!
القاضي : بالضبط
ساميه : بس انا قدمت المحكمه كل الادله اللي بتثبت برائة موكلي وانه مو سليم
القاضي : صحيح لكن بيبقى السؤال القوي مين بيكون هالسجين
انتي بتعرفي انه اسمه مسجل مع الوفيات بحادثة الطياره صح
ساميه : اي صح
القاضي : لهيك يابنتي انا حبيت احكي معك لحتى ماتنصدمي بعدين
ساميه بقلق : تفضل عم اسمعك
القاضي : انا من اول جلسه حكيتلك نحنا قضاه والرأي المجرد مالو قيمه نحنا بنعتمد ع الادله الملموسة
ساميه : اي صح
القاضي : المفروض نطقت بالحكم اليوم بس انتي شفتي اللي صار ويمكن هالشي تدبير من رب العالمين
ساميه: العفو منك بس والله ماعم افهم عليك
القاضي : لو نطقت اليوم بالحكم كان السجين رقم 221 رح يتبرأ من تهمة انه جاسوس وعميل بس السؤال ليش استنى كل هالمده وهو ساكت ليش ماحاول يثبت برائته
فهمت ساميه قصد القاضي ونزلت راسها ب اسى
ساميه : انا بعرف هالشي وبعرف هالنقطة مارح تكون من صالح موكلي ورغم انه عندي دليل قوي لاثبت برائته وانه جمال ورا كل هالشي بس مافيي اتي ب اي حركة
القاضي : حتى لو كان الثمن خسارتك للقضيه وسجن موكلك وتوجيه تهمه جديده اله وهي القبول ب انتحال شخصية سليم
غمضت ساميه عيونها وشدت على ايدها هيه بتعرف انه مفتاح خلاص جاسم مع سمر لكنها اعطت جاسم عهد انها ماتذكر اسمها بالقضيه ابدا
ساميه : انا رح حاول حل الموضوع مع موكلي
القاضي : وانتبهي يابنتي من عيلة الجبل صح حسن مات وجمال رهن الاعتقال بس الهم رجال وعيون بكل مكان ومابدي اللي صار بصديقي ماجد يصير معك
هزت راسها ووقفت لتستئزن وتمشي والافكار عم تتجمع براسها
ساميه : في احتمال اخسر القضيه !!
رجع القاضي بالكرسي لورى وحكا بهدوء…
لاتستبقي الامور وتصرفي بحكمه متل ماجد الله يرحمه
☆ ☆ ☆ ☆
ماشيه بالشارع سرحانه بخطوات ثقيله عم تفكر كيف ممكن تقنع جاسم انه مافي حل لينال حريته الا بضهور سمر
اخيرا وصلت ع المشفى.. كان خالد عم يستناها على نار وامها وعمتها نرجس موجودين عندو لينتبهوا عليه
ساميه : مرحبا
خالد : ليييششش اتأخرتي انشغل بالي عليكي
ام ساميه وهي بتحضن بنتها ..حمدلله عسلامتك ياقلبي وين كنتي
نرجس : شو صار معك ساميه وجهك مابيبشر بالخير
كانت ساميه عم تتنقل بعيونها بوجوهم وهي بعالم تاني نزلت منها دمعه ورا دمعه وبعدين انفجرت بالبكي
خالد بقلق : ساميه عم تبكي !!! لك شوووو في شو صار فهميني
ام ساميه : يابنتي احكي شو القصه حاج تبكي
مسحت ساميه دموعها وحكت بصوت مخنوق .. حسن ماستنى حكم المحكمه وقوص حاله بنص القاعه
خالد : ولهيك عم تبكي
ام ساميه : لجهنم وراه
نرجس : اي والله لستين جهنم وراه مابيستاهل دمعة من عيونك
ساميه : انا ماعم ابكي كرمال حسن اصلا اشتفى قلبي وقت شفتو غرقان بدمه
خالد : لكن شو قصتك هاتي لشوف مين بكى استازتنا
ساميه : حكا معي القاضي بعد الجلسه
خالد بإهتمام : ايه
ساميه : بصراحه حسب مافهمت منه والوعد يلي مقيدني جاسم فيه بهيك بكون خسرت القضيه وجاسم رح ينحكم بتهمة التستر والسكوت على اخفاء معلومات والتواطئ مع حسن
خالد : وشو بالنسبه لجمال
ساميه : ازا جاسم مابيسمحلي انكث العهد يلي عاهدتو ياه فجمال رح يطلع منها متل الشعره من العجين لانه مافي اي اوراق او دليل تثبت انه كان شريك ابوه بالاعمال الوسخه وكمان مافي دليل يثبت انه هوي يلي سجن جاسم وهدده غير ضهور سمر وجاسم مابدو مني جيب سيرة سمر بالقضيه ابدا
خالد : اوف وليش مابدو ياها تشهد اذا كانت شهادتها لصالحه
ساميه : احسن شي روح جيب شي نشربه واحكيلك قصة جاسم من طقطق لسلام عليكم
نرجس : خليكي حبيبتي انا بروح بجيبهن انتي اعصابك تعبانه
ساميه : شكرا عمتو
نرجس : ولو يا اميرتي (◕‿◕✿)
قعدت ساميه حد خالد واجت ام ساميه ونرجس ليستمعوا للقصه كامله لانهم تشوقوا الها حتى ام ساميه يلي بتعرف القصه كانت قاعده ومتلهفه لتسمع قصة حب جاسم وسمر من *يـــــتـــ♡ـــــبـــــع*🩵☁️៸࣪⳼᚛_