47/48
[٢٢/٢، ١٠:٣٢ م] null: .
البـارت 47 ¤
فـي قلبـي حكـايـة
👌🏻👇🏻 😍
📚 @rewayatyamania 🇾🇪
فيروز : بيني وبينك كنت عند الطاقة وما ابسر لك الا فرح نازلة من فوق سيارة وفيها رجال وانا ابسرتها لوما سوم راسي
خالد: ايوه وبعدا
فيروز: ابسر لك الا جلست تحاكيه ومدري مه
دخلت للبيت وانا صيحت فوقها قلت لها ماينفعش ومن هو هذا لو احد يبسرها من الجيران ماعيقولوا علينا
خالد: جلست تتجابر معه
فيروز بسرتها فرصة وزيدت: ايوه وبتضحك ومدري ايش
خالد والجن بيطلعوا قدامه: حرام مافلتت
فيروز: قد استغربت لوما قالت اتصلي لابي قلت ماعتقلش هكذا الا وبه شي
خالد ذكر انو هو اللي سمح لها ومسك اعصابه وفي نفسه استاهل اول شي اقلها سيري يوصلش وبعدها اقل والله مافلتت
فيروز: هيا مالك
خالد: ولاشي انا قلت لها انا تسير معه ابوه حاكاني قلنا يروحها ما افعل قلت لاعاد يقول ما اوثق فيه
اسمعي ما اقلش يامرة انا ما اشتيهم يجتمعوا
فيروز: من هم
خالد: ابن المدير وفرح لذلك شكلي شاوافق على ابن صاحبتش اللي حاكتنا امي عليه
فيروز: كل واحد احلى من الثاني
خالد: كيف
فيروز بربكة لاتنكشف نيتها السوداء: قصدي ايوه احسن
خالد: ارجعي خليها تجي عندش وحاكيها تمام
فيروز: قد امك وفت وكفت مدري ماسارت تقول للمرة قد بتبسرني بنص عينها
خالد: ارجعي سبري علاقتش معاها
فيروز عوجت لقفها (فمها): ناهي
خالد: يلا هاه اقوم ابدل شاسير بيتنا سيف قال نجتمع يشتي يتجابر معانا مدري مابه
فيروز: ماقلك شي
خالد: ماشي ماتحاكى
فيروز: يلا خير
خالد سار يبدل وسار صلى امه على طول وطول الطريق بيفكر كيف يبعد فادي وفرح عن بعض ومش داري انو عيقربهم من جهة ثانية
@rewayatyamania المصدر الأول للروايات
عند الدكتور دخلت فرح وهي متشوقة تحكي له
فادي اول مابسرها ابتسم قلبه قبل ملامحه
بادلته فرح الابتسامة
وجلست فوق الكرسي مثل كل مرة
بعد ماسألها عن حالها
فادي: اليوم المجال مفتوح لش قولي لي كم جيتي في الثانوية
فرح بغصة تبدلت ابتسامتها وبان الوجع في ملامحها
فادي كان بيجهز الورق ومابسر ملامحها بسرها طولت رفع عينه لها وبسرها مطننة
افتجع عليها وبنبرة كلها خوف: فرح مالش
فرح وكأن الحادثة بترجع بها لليوم اللي كانت بتذاكر به ووقعت الحادثة
فادي قاطع ذكرياتها واخذ شوية ماء ورش شويه على وجهها
فرح شهقت وبكت فادي بسرها بتبكي ارتاح شوية وفي نفسه المهم انها تخرج شوية من داخلها
فرح بعد نص ساعه وهي تبكي وتتذكر
وفادي ساكت بيخليها تخرج كل الطاقه السلبية المكبوتة داخلها
فادي بلطف: ممكن تشاركيني الشي اللي اتذكرتيه وخلاش توصلي لهذه الحالة
فرح وارتاحت شوية بعد مابكت وكأن هي انتظرت كل هذه السنين عشان تخرج ماداخلها وتحكي لحد اللي وجعها بدأت تقول له:
كنت في الثانوية ممتازة ودرجاتي حالية الحمدلله
ووقت الاختبارات حبيت اذاكر في البلكونة اللي على الشارع دخلت للديوان قلت اغير من نمط المذاكرة كل مرة في مكاني هذه المرة اغير وياريتني ماغيرت وجلست في مكاني وارتزعت فيه
فادي وبيسمعها بكل حواسه ومركز على تغيراتها وهي بتتكلم
وهذاك اليوم وانا بين اذاكر في البلكونة وابسرت اللي عمري ماشابسره
فادي سألها بهدوء: ايش بسرتي
فرح اتذكرت ورجعت تبكي
فادي حاول يهديها
فادي: اظن انو هذا كفاية لليوم يافرح اهدأي
فرح: طيب بس
فادي: لابس ولاشي اليوم خرجتي شوية من اللي كان داخلش مكبوت
فرح: ايوه
فادي: وهذا اهم شي عندي
فرح: اقدر اروح ذاحين
فادي: تقدري بس ماقد جاش عمش سيف
فرح: ماعيجيش لانو مجتمع مع اعمومي وابي بالبيت
فادي ماحب يتدخل: طيب خلاص انتظري بس
فرح: معي عمتي عنروح انا وهي
فادي: ماشي شاروحكن انا
فرح: لا مايحتاج
فادي: ماطلبت رأيش انا بين ابلغش
واذا على عمش شاتصله
واخذ التلفون واستأذن من سيف وسمح له بعد ما اقنعه فادي
رغد وفرح بيتجابرين: انا منش صدق بيتصل لسيف
فرح: ايوه والله قال عيتفاهم معه هو
رغد: فيه الخير عادو احسن
فرح بسرتها بنظرة ورغد بتضحك عليها
فوق السيارة
رغد بتجابر فرح: يابنت والله انه حالي ما رأيش نزوجش به وقده مهتم فيش ودكتورش يعني مناسبين لبعض
فرح: اوص صوتش مرتفع يمكن سمعش عيب
فادي سمعهن وبسر لعند فرح في المرايه وكيف ردة فعلها وابتسم
رغد: ماشي ماسمعش وأنتي والله لو قد أذنه إذن ديناصور
فرح ضحكت قوووووي وبصوت مرتفع بغير شعور
فادي في نفسه صوتها جبر خاطر فما بالك بضحكتها يا فادي
وصلين البيت
عند الحجة فاطمة الكل مجتمع وخالد ماقد وصلش
الحجة فاطمة: جبر قلبي بكم الله يوصلنا لوما نتقدم عشان اخوكم ويوافقوا وتكتمل الفرحة
علي: آمين يارب غر خارجوني اي حين عتسيروا تخطبوا
الحجة فاطمة: مالك مستعجل كل شي عيسبر في وقته
رغد: عنسير بعد اسبوع ان شاء الله
📚 @rewayatyamania 🇾🇪
[٢٢/٢، ١٠:٣٢ م] null: .
البـارت 48 ¤
فـي قلبـي حكـايـة
👌🏻👇🏻 😍
📚 @rewayatyamania 🇾🇪
علي: آمين يارب غر خارجوني اي حين عتسيروا تخطبوا
الحجة فاطمة: مالك مستعجل كل شي عيسبر في وقته
رغد: عنسير بعد اسبوع ان شاء الله
علي: اسبوع ليش مالكم
فرح بحق مزح: ماعاد عنسيرش لا بعد اسبوع ولا عنسير
الكل التفت لها باستغراب ليش
فرح: صاحبتي مش موافقه يعني بالغصب
علي: فرح منش صدق او تمزحي
فرح: مابش مزح في هذا الشي خلاص ماتشتيش براحتها
علي تضايق وبصوت مرتفع: اوووف محد يركن عليكن
فرح ارتفع صوت ضحكتها وشهقت من كثر الضحك: لا تصدقش ارجع بين امزح معك
والكل ضحك معها وعلي رجع لها بيمسك بشعرها: مش وقت المزح البايخ يا لغجه
فرح: فلتني يمه قولي له يفلتني وجع راسي
الحجة فاطمة: فلت بنتي بحجر الله لا وجعتها
سيف قام وشل فرح منه: وانت اخبل تصدق بسرعة شلوك
فرح بتخرج لسانها وتحانكه
سيف: ارجع لها والله انها تستاهل
@rewayatyamania المصدر الأول للروايات
في العشية
سيف ودع امه واخوته بعد ماحكى لهم ماوقع واتصلت الحجة فاطمة لام المهندس وبلغتهم بالموافقة بنسبتهم وحددوا يوم الجمعه موعد جية الرجال
رغد بتبسر الكل وفي قلبها غصة ان هي عتفارقهم اذا تم موضوع الخطبة
فرح بتدعي لعمتها ان الله يوفقها ويتمم لها على خير
الحجة فاطمة قلبها بيوجع ان قطعه منها عتفارقها
سعد وخالد اعجبوا بصفات المهندس وموافقين عليه مبدئيا ومنتظرين لجيته عشان يبسروه
علي بيفكر هل عيوافقوا عليه او ماشي
فيروز بتفكر كيف تفعل عشان ترجع علاقتها مع ام فادي
منى ونور كالعادة يفكرين بالشي قبل ما يحصل وحسهن عند العرس وماعيلبسين وماعيفعلين
زينب فاقدة لاهلها قوي بس عشان زوجها صابرة لان هي في محافظة ثانية
بسمة بتفكر في الموضوع اللي امها وابوها مشغولين فيه ومارضيوا يحاكوها فقررت تتصل لفرح
فرح كملت تصلي عشاء وجالسة فاتحه الملزمة بتحاول تذاكر بس ماقدرتش كل ماتحاول تركز تذكر ماحصل معاها في الثانوية وتحس بخنقه وضيقة قامت تغسل وجهها وتذكر الله سمعت صوت تلفونها بسرت من اللي بيتصل شافت اسم بسومتي حياتي
فرح: حيا حيا بالقاطعة
بسمة: الله يحييش ياعايبة وانتي والكل مابتتصلي الا اذا اتصلت انا او بتخبي الرصيد لحبيبش وانا مش دارية
فرح ضحكت: ايش من حبيب وايش من طلي انتي ذلحين
بسمة: ايوه ايوه عنقلهم ياطلي
فرح: ايوه ايش اخبار الحريوة حقنا
بسمة بصدمة: حريوة وحقكم من اي حين
فرح: يعني خربت المفاجأة جحفة
بسمة: امانه مابه اتحاكي
فرح: خلاص قريب عتدري
بسمة: هيا للخباله
فرح: قد حاكيتش لليهودة
بسمة: اوووف منش ياوسخه قصدش على عمش صح
فرح بضحكة: ايوه رضي عليش
بسمة ضحكت: اكبر عليش بس وانتي اخذتي مني الموافقه وانا قصدي انش بتزبجي ياوقحة
فرح: احد يزبج بهذه المواضيع يامرة عمي
بسمة ضحكت بقوة: حللتيها قدني من ذاحين ماعرفتش لما وقعتي محترمة وبتداعي ياعمه
فرح: عمى لٱ انا شاداعيش ياعمه
بسمة: شاخلي عمش يربيش
فرح: يعني اعتبر خلاص قد بتبسري نفسش مرة عمي صدق عتسدوا عليا وتتفقوا
بسمة خزت قووي: عليش لعنتي صدق هو عملي قلت اذكرش لكن مش انَتي حق معروف خاطرش
علي دق الباب بيسمعها بتضحك وبيسألها من فرح فعلت كتم وقالت له ان هي بسمة
علي اتراشاها تفتح الاسبيكر
فرح مارضت واتراشها قالت تمام
فتحت الاسبيكر وبسمة بتقلها: هيا وين سرتي
فرح: احم احم اجاوب زوجش
بسمة: ايوه انتبهي له هاه لما اجي
علي ضحك وداخله بيرقص
فرح: اتخيلي لو اقلش انو بيسمعش ماعتفعلي
بسمة: بتدوري احظرش صّح واغلق في وجهش ياوسخة
فرح ضحكت
بسمة: فرح منش صدق بيسمع والا من مقالبش الخبلا ساعش
فرح: انا خبلا
بسمة: من زمان عادش دريتي
فرح: شكرا يا صاحبتي جرحش وصل
بسمة ضحكت وعلي في نفسه سبحان الله والضحكة
فرح اشرت ڵه يخرج وهو مارضي
فرح: اضحكي يا رجل الكلب
علي ضربها في راسها فرح: اااااح
بسمة: مالش او قد بتجنني
فرح: هذا زوجش المستقبلي ضربني لانني قلت لش يارجل الكلب
بسمة قصدها اني بتضحك معاها: فداله والله اللي بيدافع عليا تستاهلي
علي ضحك لما سمعته بسمة
بسمة انصدمت وغلقت التلفون وبتحس قلبها قدو عيخرج ووجهها من كثر الخزا حمرر ساع الطماطيس
فرح طرحت التلفون وهي بتضحك
فرح: حسبك ياعم علي حرام لاتحظرني
علي: تستاهلي
فرح: حاضر من عيني
علي: خرج من مكانها وهو مبتسم وسار
مكانه وبيتذكر نبرات صوتها وضحكتها مسك راسه وقال: هذا وهو الا صوت وضحكة ولعبت فيك هكذا يامعين بس
رغد سمعته وهوبيحاكي نفسه وبصوت مرتفع: الله يزكيك عقلك يا اخي مالك
علي ماسمعها ودخل مكانه
رغد: الولد مدري ماوقع به قد بيحاكي نفسه
📚 @rewayatyamania 🇾🇪