الفصل 3
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵فتاتي.لليلة.tt* 🫀
*❴🔢❵☟الـــبـــــــــــ❴3️⃣❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
ضل معن سهران كل الليل وهو عم يفكر بزينة ماتوقع يرجع يشوفها رغم انو هالشي مازعلو بالعكس هو فرح كتير انو لاقاها مع انو ماكان يدور عليها لكن تجدد الأمل عندو بشوفتها .
صار معن ورفقاتو كل يوم يروحو عالكافيه وكان معن مايضيع ولا فرصة للروحة لحتى يلتقي بزينة ويشوفها .
وبليلة وهو بالكافيه تحجج انو بدو يغسل ايديه ليضطر يروح للمطبخ لحتى يوقف قريب منها .
راح للشب اللي بيعمل الأراجيل وقلو ...
معن: ....يعطيك العافية ...معلش بدي غسل ايديي وين روح....غير الحمام مابحب غسل بالحمام .
الشب: ياهلا ...اي فيك تغسل هون بالمطبخ .
راح للمطبخ وكاتت زينة عم تجلي وقف جنبها واخد وقت وهو عم يغسل ايديه وكان كل الوقت واقف جنبها وعينو عليها وهي مو منتبهة عليه انو هو .
لحتى طلب بدو ينشف ايديه ...
معن: ....معلش ...بدي شي نشف ايدي فيه.
اتطلعت فيه واتفاجأت انو هو اللي كان عم يغسل وهي مو منتبهة، خجلت وقت جبرها تحط عينها بعينو وعطتو المنشفة وهو عم ياكلها وهو قريب كتير منها ...اما هي واقفة متل الضايعة ماقدرت تتحرك او تحكي شي وعينها بالأرض.
كانت زينة كل ماخجلت اتحط ايدها عشعرها وتزيحو ورا ادانها بحركة عفوية ، ومعن يراقبها بكل حركاتها وقت تمشي وتتحرك وتقعد وتحكي .
بهديك الليلة دخل عالكافيه شب وكان باين عليه سكران ومو دريان السما من العما ، وقت حطت زينة طلباتو للشب مسكها من ايدها وصار يحاول يشحطها لبرا المحل وهي تشد بأيدها منو مابدها تصرخ وتشلق الناس عليها ، انتبه معن عليه وقام متل المجنون وبعد زينة عنو ودفشو وصار يضربو بلا وعي لحتى فار الدم من تمو وانفو ولولا ما رفقاتو مسكو والا كان فرط الشب بين ايديه .
بعدت زينة بهاللحظة وحطت ايديها عتمها عم تبكي مو متخيلة انو لو هالموقف صار معها وهي بمكان تاني وماعندها حدا يخلصها من هالوحش شو كان رح يصير فيها .
بعدو رفقاتو عنو واجا صاحب المحل وقلعو للشب وصار يهدي بمعن وشكرو عاللي عملو مع زينة .
معن بعصبية : انت كيف فيك تشغل بنات عندك .....هالشغلة مو شغلة بنات .
الرجال: ....رووووق شوي معن ...انا بشغل بنات لأن ماعندي القدرة ادفع للشب كتير البنت بترضى بالقليل بس الشب مسؤولياتو كتيرة ومابيرضى بمبلغ بسيط .
راح معن صوب زينة وعيونو عم يقدحو شرار مسكها من ايدها وشد عليها: .....مابصير تشتغلي واتدوري وتلفي بين الشباب، هالشغل مو الك يازينة مو الك مشان الله روحي من هون روحي زينة.
صارت زينة تبكي اكتر وبعدت عنو وطلب منها صاحب المحل ترجع عالبيت لأن اصلا خلص دوامها وطلب من الشب اللي بيشتغل معها يوصلها هي وكاميليا عبيوتهن.
حست برعشة قوية وقت حطت راسها عمخدتها واتزكرت اللي صار معها بالكافيه انو لو صار اللي صار معها وهي لحالها ماكانت هلأ صارت بالبيت ، وبنفس الوقت ماعرفت كيف ابتسم تمها وتوردو خدودها لما تزكرت معن كيف قام متل النمر وضرب الشب وعيط عليها انو تترك الشغل ...طردت هالأفكار من راسها وتعبت كتير وهي عم تفكر لحتى نامت .
ببيت معن كان معصب ومتدايق كتير من اللي صار وانو شاف كيف الرجال عم بميلو بفكرهن وعيونهن عليها والشاطر اللي بدو يلفت انتباهها وهالشي لاحظو معن بوجودو بالكافيه ووجودها وهي تروح وتجي قدامهن عم تشتغل شغلها ولاحظ بأكتر من مرة شباب يتركولها ارقامهن عالطاولة وهي ماتقبل تاخدهن وتعمل حالها مو شايفتهن ...وهالشي كان يرضي اكيد لأن بيعرف حقيقة اخلاقها وبيعرف انو البو وفكرو وعقلو مع مين واقعين وبيعرف انها انضف واطهر من انها تقبل بأي علاقة عابرة ومو شرعية ..
مرق اسبوع تاني بعد الحادثة اللي صارت لزينة بالكافيه وكانت زينة تستنى جيتو لمعن بالدقيقة وتجن ازا بيتأخر شوي ماكانت بتعرف ليه هيك عم يصير معها وكانت خايفة تكون حبتو وتعلقت فيه ،والا لأنها ماكانت قريية من رجال متل قربها من معن وقت تزوجها واصلا مابعمرها كانت مع رجال لا من قريب ولا من بعيد ....مشاعرها متضاربة من جهة مشتاقة تسمع صوتو وتحاكيه ومن جهة تانية زعلانة منو عاللي عملو معها وانوهو السبب بخراب حياتها .....اوووووف اوووف يازينة شو ناطرك شو جاييكي من بعيد ما بتعرفي كلو رح يجيكي بس بوقتو اكيد .
تقوى : لك يازينة ياحبيبة البي لك شو عم يجعك مشان الله فهميني .
بيوم بوقت العصر طلعت زينة من غرفتها وراحت عالبلكونة واستأزنت البنات ...
زينة بوجه شاحب وتعبان : صبايا من بعد ازنكون فيي آخد كم عرق نعنع من هون ...
تمارة : خير زينة ليه هيك وشك مرضانة شي .
زينة : تعبانة شوب وحاسة بنفخة بمعدتي ...فيي اخد عرق نعنع وآكلو بلكي برتاح وبروق .
تمارة : اكيد عيوني اكيد خدي قد مابدك ....بدك اعمللك شي خبريني .
زينة ايدها عمعدتها : ....كتر خيرك مابدي شي هلأ بروق .
وبهداك اليوم ماقدرت زينة تروح عشغلها كل ماقامت تتعب وتدوخ واقنعوها البنات انو ماتروح واتصلت هيام برفيقتها كاميليا وخبرتها انو زينة تعبانة ومارح تقدر تروح عالشغل .
تاني يوم زد وجع معدتها اكتر واكتر والسبب جوعها اللي ماكانت تسيطر عليه ماعندها شي تاكلو وكانت بطبعها خجولة كتير ومافيها تطلب من حدا رغيف خبز ، فضلت تبقى بالوجع ولا تكسر نفسها لحدا وتحسس اللي حواليها انو مامعها تاكل وتاخد صدقة وحسنة من حدا .
ربطت شال عمعدتها ليخف وجعها وجوعها ومددت حالها عالتخت وصارت تبكي بوجع وبألب مقهور وتقول بحالها( ياربي ماعم اتحمل افرجها عليي يارب مافيي مو قدرانة جوعانة وريحة الأكل اللي برا عم تموتني عالبطيء ومافيي خبرهن انو مامعي ادفع معهن لآكل عحسابهن ياربي مافيي عيش عالة عالناس كل مين همو عقدو ..اااااخ ياربي هونها عليي ) .
دقت هيام الباب عليها وفتحتو : زينة حبيبتي تعي اتغدي معنا والله حابين نشوفك شي مرة معنا عالسفرة قومي دخيل عينك قومي .
زينة: ...كتر خيركن بس والله معدتي كتير واجعيتني ومافيي آكل شي هلأ بزيد وجعها اكتر كلو انتو صحة وعوافي .
تركتها هيام وراحت ماحبت تضغط عليها واااخ لو يعرفو شو سبب وجعها لهالمسكينة ماكنتو تركتوها .
المسا دخلت لعندها تقوى لتشوفها وشافتها نايمة وتعبانة كتير حتى وهي نايمة كان التعب باين عليها ومسطر خطوطو بملامحها .
وقت فاقت دورت بغرفتها عشي تاكلو لقيت ربع رغيف اكلتو ناشف وشربت معو كاسة مي لتسكت جوعتها شوي .
هديك الليلة كانت صعبة كتير عزينة بس اخف شوي من الليلة اللي قبلا .
كل هاد وحيرة معن زادت اكتر وقت دخل اول ليلة عالكافيه وماشافها وماكان فيو يسأل حدا عنها رح يستغربو ويستنطقو انو ليه عم تسأل عنها ....وزادت الحيرة اكتر وقت اللي ماراحت تاني يوم عالشغل ، راح لعند كاميليا وسألها : معلش ياانسة فيي اسالك سؤال .
كاميليا: اي تفضل .
معن: رفيقتك زينة الا يومين مو جاية خير في شي .
كاميليا : كمان انت عم تسأل عنها .
معن: ليش في غيري سأل عنها .
كاميليا : هههه هوهو كتير .
معن بضيق: وشو سألوكي .
كاميليا: انو وينها الحلوة وليه مو مبينة والكافيه مالو نكهة بدونا ومن هالحكي .
اتدايق معن من هالكلام ووقتها حس انو يمكن البنت اتطير من ايدو بأي لحظة .
معن : طيب ..مابتعرفي شوسبب غيابها .
كاميليا: امبلى زينة تعبانة الها يومين ...مابدك اعطيك عنوان بيتها .
معن: .....ليش في حدا طلب عنوانها.
كاميليا: ههههههه لك لا بس شايفتك مهتم لهيك قلتلك اعطيك عنوانها .
معن اتطمن : ....لا شكرا بس حبيت اسأل عنها .
كمان بقي بهديك الليلة مرابط وزارع حالو قدام بيتها وقال بلكي طالعة شي مشوار عالدكتور بلكي بلمحها وبتطمن عليها .
دخلت تقوى عليها بالليل لتطمن عليها شافتها مرمية عالأرض وعم تصرخ من وجعها ..
تقوى : ....لك زينة شوبيك مشان الله فهميني شو اعملك ياالبي .
زينة :.....اااااااخ ...ااااااخ معدتي مشان الله ماعاد قادرة اتحمل ياربييييي دخيلك .
دخلت تمارة وهيام عصوتها وهي تصرخ وتبكي.
تمارة راحت وجابتلا دوا لوجع المعدة.
اخدتها زينة وشربت معها مي كتير .
بعد شي ساعتين تلاتة راقت معدتها ونامت .
ضلو البنات قلقانين عليها وقالو ازا ماخفت لبكرا رح ناخدها عالدكتور .
تاني يوم وقت العصر راح معن عبيتها لزينة ليسأل عنها ماعاد عندو صبر...
تمارة فتحت الباب .
معن: مرحبا .
تمارة : ياهلا .
معن: مو هون بيت الانسة زينة؟
تمارة اتطلعت فيه من فوق لتحت: ...اي هو وصلت ..مين حضرتك .
معن: انا زميلها بشتغل معها بالكافيه الها يومين وهاد التالت مابتجي عالشغل قلت لأجي واتطمن عليها .
تمارة : اي اهلا وسهلا بس ...زينة تعبانة كتير والله .
معن: ...معلش ازا مافيها غلبة فيي شوفها .
تمارة : اي اكيد تفضل .
دقت تمارة عباب غرفة زينة وكان معن واقف جنبها ناطر يشوفها .
طولت لفتحت الباب وبعدها بشوي حسو عليها قامت ودورت المفتاح بالباب كانت حاطة ايدها عمعدتها ومنزلة راسها وقت رفعت راسها ولمحت معن فتلت الدنيي فيها ووقعت وتلقاها معن بين ايديه وصرخ بصوت عالي وصار يضربها عوشها بأيدو : زينة ......لك يا زينة ....زينة مشان الله قومي زينة دخيلك لا تروحي قومي ببوس ايدك تقومي .
جنت تمارة عليها ماكان غيرها بالبيت وحاولت تفيقها بالكالونيا لكن مافي نتيجة .
حملها معن وقال لتمارة : انا مافيي اصبر اكتر هلأ رح آخدها عالمستشفى .
لبست تمارة وراحت معو ، حطها بالكرسي الخلفي وقعدت تمارة عندها وحطت راسها عرجلها .
معن عم يسوق ويتطلع لورا كل شوي ويسأل تمارة ازا فاقت او لا والجواب عطول لأ.
وصلو المشفى وحملها بين ايديه متل طفل صغير وصار ينادي للدكتور بصوت عالي .
الدكتور اجا لعندو : خير خير شوفي.
معن : الله يوفقك يادكتور البنت ماعم تفيق والها تلات ايام تعبانة .
الدكتور : من شو بتشكي .
تمارة : من معدتها دكتور شو مابتاخد من ادوية واعشاب ماعم يجيب معها نتيجة .
فحصها الدكتور بعناية بناء عطلب معن وعمللها صورة لمعدتها بالألتراساوند وبين انو معدتها خاوية فاضية مافيها شي ومعدتها عم تفرز احماض من قلة الأكل عم تسببلها وجع اكبر من الجوع .
الدكتور: الصبية قديه الا مو آكلة .
تمارة : الها كم يوم ماعم تقبل تاكل ...خير دكتور شغلت بالي وانت عم تفحص وتسأل طمني الله يخليك .
الدكتور: البنت عندها جفاف وعندها انيميا هيك فحوصاتها عم تقول وهبوط حاد بالسكر والأهم انو معدتها عم تاكل بعضها .
تمارة : ...شوووو كيف يعني عم تاكل بعضها .
الدكتور: ...مو المقصود انو عم تاكل بعضها حقيقة هي كلمة بتنقال مجازا انو المعدة عندها فاضية وعصارة معدتها عم تعمللها وجع شديد بسبب قلة الأكل .
تمارة : والله يادكتور هي ماكانت تقبل تاكل شي .
الدكتور: يابنتي البنت مو بس من يومين ماعم تاكل البنت واضح انو الها فترة مو آكلة شي ليكي جفن عينها ابيض لسانها ابيض وشها اصفر والأنيميا اكبر دليل وهبوط السكر والضغط كلو دليل انو البنت معدتها واجعتها من الجوع.
طلب من الممرضة تحطلها المغذي بأيدها وتحط معو مضاد حيوي ...وطلب منها كل ماخلص تحط غيرو لتقدر البنت تقوم وتصحصح.
معن بخوف وقلق: ...انسة تمارة ...ايمت اخر مرة اكلت معكن .
تمارة : الها ساكنة معنا تقريبا شهر ونص بس ولا مرة اكلت معنا وكل مانقلها تعي عدي وتغدي معنا بتقول اكلت ومو جوعانة .
بهالوقت اجو عالمشفى تقوى وهيام بعد مااتصلت فيهن تمارة وخبرتهن عن وضع زينة انو تأزم كتير ...وسمعو حديث تمارة ومعن مع الدكتور .
اكدت تقوى وهيام عكلام تمارة انو دائما زينة ترفض تاكل معهن ..
معن خطرلو يسأل : معلش اسأل سؤال وماتقولو عني مجنون او مو وقتو هالسؤال لأنو رح اربطلكن اياه بجوابكن اي .
هيام : تفضل .
معن: ...اجار الغرفة قديه كل وحدة بتدفع .
هيام : 85.
معن: وزينة قديه بتاخد من شغلها بالكافيه .
تمارة : مابنعرف ماسألناها ولا مرة ...فيك تفهمنا شو دخل هي بهي .
معن: روقي علي شوي .
هيام: لشو بدك توصل .
معن : لازم نعرف بالأول قديه زينة بتاخد راتبها .
تمارة : مو انت قلتلي انك بتشتغل معها ليه مابتسأل صاحب الشغل .
معن : ااااه لأ مو حلوة انا اسأل .
هيام : انا هلأ بسأل كاميليا اكيد بتاخد متلها ..
طالت موبايلها واتصلت بكاميليا وسألتها قديه بياخدو هي وزينة وسألتها ازا بياخدو متل بعض او لأ .
سكرت الخط معها وجوابها قبل لتقولو كان باين عوشها انو في شي .
معن : شو قالتلك.
هيام : قالت بياخدو 90 .
معن : ....هاد اللي بدي اعرفو واللي رح يأكد كلام الدكتور انو زينة مابتاكل منيح لأنو مابضل معها مصاري تشتري اكل يابنات ...يعني اللي بضل معها مابجيبو شي .
تمارة وقعت عالكرسي وصارت تبكي وتطلع بزينة : ليش ...ليش يازينة ياما قلنالك تعي شاركينا سفرتنا تعي واقعدي واسهري معنا وكنتي دوم تقولي مو جوعانة ومو عبالي اسهر تاريكي ياعيوني عم تكابري عحالك وتحرمي حالك من كل شي ...بس ليش ...ليش .
جنت هيام وتقوى وبكيو عوضعها وعحالها كتير واللي جن اكتر معن انو كل اللي عم يصير لزينة بسببو .
راح لعند الدكتور واترجاه يعمللها كل الازم وخبرو مايقصر معها .
مرقو ساعتين وهي عحالها تفيق وترجع تنام متل الدايخة مو واعية ومو حاسة عشي لكن طمنهن الدكتور انو منيح انها بتفيق دليل انو بلش جسمها يستجيب للمغذي وللعلاج ..وطلب منهن يعملولها اكل وخصوصي شوربات وعصائر لتقدر تاكل وتقوم .
رجع معن لعندها وجاب معو اغراض لزينة بيلزموها ...وطلب من البنات يروحو ويعملولها الأكل متل ماقال الدكتور وانو رح يبقى حدها ووقت بتفيق وبتصحصح بخبرهن .
رجعو الصبايا عالببيت وضل معن معها .
كان معن عم يتطلع من الشباك وقت فاقت زينة حس عليها انو عم تتحرك ،قرب منها اكتر وقعد عالكرسي حدها ومسك ايدها .
فتحت عيونها وكانو مغبشين ولما انتبهت عمعن ضلت صافنة وتأكدت انو اللي شافتو عباب غرفتها كان معن ومو حلم .
زينة بصوت مبحوح: .....انت شو جابك لهون .
معن بلهفة: .....حمدالله عسلامتك ياعيوني ...كيف حاسة حالك هلأ .
زينة: ....وين انا هي مو غرفتي .
معن: ....انتي بالمشفى تعبتي كتير وجبتك لهون.
زينة: وين البنات.
معن: راحو عالبيت يعملولك شوربة متل ماقال الدكتور.
زينة: ..وانت شو عم تعمل هون ليش اجيت لعندي عالبيت .
معن: ...الك يومين مو رايحة عشغلك انشغل بالي عليكي واجيتك عالبيت لأتطمن عليكي .
زينة :....هههه انشغل بالك عليي ..من ايمتا .
معن : زينة كرمال الله مو وقتو هالحكي ...المهم صحتك هلأ.
زينة: ....معن
وقت نادتو بأسمو بصوتها الناعم وعيونها الحلوة الدبلانة قشعر بدنو وسرح بعيونها بحب وشوق كبير .
كملت زينة: معن الله يخليك روح من هون اتركني لملم حياتي بهدوء .
معن : زينة بترجاكي هلأ بدي منك تخفي وترتاحي وتروقي وبعدها بنحكي .
دارت وشها عنو ونزلت دموعها : ماضل شي نحكي فيه مابدي يرجعو رفقاتي ويلاقوك هون بلا ما يفكرو فيي بشي مو منيح .
معن: ..مابهمني اللي بدو يحكي يحكي .
زينة اتطلعت فيه نظرة غضب: اكيد مابدو يهمك لاني زينة الموضوع مابهمك ، لأني مو مهمة ماهيك .
معن: روقي ليه هيك عصبتي والله ماهاد اللي قصدتو .
زينة : انت بتقصد اللي بدك اياه
وبتعمل اللي بدك اياه وبتتحكم بحياة البنات كيف مابدك ..صح .
معن: لا والله انا مو هيك لا تظلميني ،ورب العباد مابعمري لمست بنت سواء بالحلال او الحرام الا انتي والله العظيم ...زينة
بدي قلك عشي .
ماردت عليه وضلت بارمة وشها فيه.
معن : زينة انا رديتك .
اتطلعت فيه عوسع عيونها: ...كيف يعني رديتني.
معن: ..رديتك يعني رجعتك لعصمتي ...يعني رجعتي هلأ مرتي .
زينة: .....ههه ههه كيف يعني هيك ومين قلك اني موافقة ارجعلك .
معن: موضروري توافقي.
زينة : كيف يعني موضروري وافق مو لازم قول مرة تانية اني موافقة قدام الشيخ .
قعد جنبها عالتخت وحط ايدو ورا ضهرها بعناق صغير وعيونو معلقين عليها ومسك ايدها وباسها : انا قبل لأجي لهون رحت للشيخ اللي كتب كتابنا بتتزكري ...وقلتلو اني طلقتك وقلتلو اني بدي رجعك وكنت بدي منو يحكي معك ويقنعك ، قام سألني ازا خلصتي العدة والا لأ قلتلو انو لسا باقي عشر ايام وبتخلص العدة قلي انو بصير تردها لعصمتك بدون كتاب جديد وبدون ماتخبرها او تاخد رأيها بس وقت تردها لازم تخبرها لحتى تعرف وماتنكر انك طلقتها ولحتى ماتتزوج غيرك بعد العدة ولحتى تتثبت الطلقة بالمحكمة .
زينة مصدومة بكلامو : .....معقول هالحكي ...
معن: اي ياعيوني والله ماعم كزب عليكي وازا بدك باخدك لعند الشيخ لتسمعي هالكلام منو ولتتأكدي فيكي تفتحي عالفتاوى بالنت وتسألي هيك سؤال هيك قلي الشيخ .
زينة: ...يعني هلأ شو .
مسكها من دقنها وجبرها تتطلع فيه : يعني هلأ انتي مرتي قدام الله وخلقو كمان .
زينة: ..رديتني مشان ليلة تانية ؟
معن جن من كلامها: ..لأ لأ يازينة والله مو مشان ليلة انا رديتك عطول .
زينة : عطول ....متأكد يعني مارح تاخد حاجتك مرة تانية واتطلقني كمان مرة .
معن: ..لك لا والله رديتك عطول ..(حط راسو عراسها ومسكها من وشها) زينة بدي ترجعي عبيتك بدي رجعك معي وثبت زواجنا بالمحكمة بوعدك بهالشي .
ماكان طالع بأيدها شي الا انها تقبل وترضخ للواقع اللي انفرض عليها .
اجا ليحكي مع فوتة البنات للغرفة.
قام معن وقعد عالكرسي ، خجلت زينة واتطلعت بمعن نظرة بتقلو فيها انو شايف شو عملت وشو رح يحكو علي .
ومزبوط البنات اتطلعو بزينة وبمعن النظرة اللي قصدت تقولها لمعن .
وقتها اتدخل معن وقال: لا تفكرو
فينا شي مو منيح ....انا وزينة تزوجنا .
تمارة : .....نعم ...ايمتا هالحكي صار .
معن اتدارك حالو انو شو قال وانو رح يقولو ايمتا ووينو الشيخ وكيف صار ومتى .
معن: هلأ من شوي جبت الشيخ وتزوجنا ماهيك حبيبي.
زينة اضطرت تمشي معو بكلامو وقالت: ...مزبوط معن تزوجني من شوي .
ارجاهن معن ورقة العقد اللي كانت معو وكان دائما حاططها بمحفظتو لكن البنات ماانتبهو لتاريخ العقد ارتاحو مبدئيا وباركولهن وسألو ازا رح يعملو حفلة عرس ...لكن الرفض اجا من زينة بحجة انو مالها حدا يفرح معها .
هيام: لك زينة نحنا رفقاتك بنفرحلك والله وقادرين نعملك احلى عرس .
معن: تكرمو صبايا كرمال زينة بعمل اللي بدها اياه ازا وافقت ماعندي مانع.
زينة بضيق : ...ماشي الحال بس بدون حفلة بنتعشى سوا وبنقعد وبنحكي .
هيام : ...لحظةةةةةة عسيرة الأكل فيكي تفهمينا شو صار معك وشو سبب وجع معدتك.
زينة ارتبكت: ..ااااه بجوز التهاب .
تمارة: لك زينة لسا عم تخبي علينا لك نحنا رفقاتك صحي مو من زمان بنعرفك بس يشهد الله انو حبيناكي كتير حاج تخبي علينا ..واصلا عتبنا عليكي كبير .
زينة: ....عتب شو .
تمارة: هيك يازينة بتضلي كل هالوقت موجوعة وتعبانة بسبب الجوع ومابتخبرينا لك عشو لكان اسمنا عيلة وحدة بييت صغير ماشفتينا قديه زعلنا عليكي وقت تعبتي لك ماشفتينا كم مرة اجيناكي وطلبنا منك تتغدي وتتعشي معنا وكنتي ترفضي بحجة انك آكلة او مو جوعانة .
هيام : ليه هيك زينة لو اجيتي وخبرتينا انو بدك مساعدة مثلا او انك جوعانة كنا رح نقلك لأ يعني.
معن وقت شافها متلبكة شفق عليها وقرر يحكي بدالها: ...صبايا شو رأيكن نأجل موضوع العتاب لبعدين بس لتتحسن صحتها وقتها ادبحوها بس خلوها تاكل هلأ شو رأيكن.
زينة اتطلعت فيه نظرة حزينة انو كل ياللي انا فيه انت سببو يامعن.
زينة وعم تبكي وتوجه الحكي للبنات:.....صبايا انا مابدي تزعلو مني اوتعتبو عليي انا فضلت ابقى جوعانة وتعبانة ولا اطلب كسرة خبز من حدا لأسباب كتيرة ومنها اني ماتعودت اطلب شي من حدا وخصوصي الأكل وتاني شي انو مابدي اتعود كل يوم والتاني اطلب شي وحس حالي عالة عليكن او عغيركن وانا بعرف حالي شو هي امكانياتي وانو مامعي ادفع معكن بالأكل وراتبي محدود ومعروف شو هو ولوين رح يروح وشي تالت انا مافيي اكسر نفسي واطلب شي حتى لو كان هالشخص قريب عليي صعبة مابتطلع مني بنوب ...لهيك الله يخليكن ماتزع
تقوى : كل اللي قلتي حلو ومابيطلع الا من بنت عندا عزة نفس قوية ، بس كنتي رح تروحي حالك بعنادك هاد وقسيتي عحالك كتير والله اعلم لو كنتي عايشة لحالك شو كان رح يصير فيكي وهيك مو صح بنوب والا انا غلطانة .
تمارة : مزبوط كلام تقو
ى ...يازينة لشو لكان نوجدو الأصدقاء والرفقات والاخوة مو لوقت المحنة والشدة نلاقيهن ليساندونا .
هيام تعاطفت كتير مع زينة وقت شافت دموعها وكانت رح تنهار من زعلهن منها ....لهيك قررت تعطي حالها مجال لتدافع عن زينة بكم كلمة .
هيام: ....لك شوباكون ياصبايا حصل خير والله يجعلها اكبر المصايب وان شاء الله هلأ زينة بترتاح وبتخف وبتطلع بالسلامة وعقولة خطيبها انو وقت تروق بنعاتبها عطريقتنا والا شو زينو.
معن: .....عفوا انسة تصحيح لمعلومتك انا مو خطيبها لزينة انا زوجها لأني مارح خليها ترجع معكن عالبيت رح آخدها معي عبيتي .
تمارة : ....كيف هيك وانتو لسا هلأ تزوجتو والأهم من هاد انو زينة تعبانة هلأ وبدها مين يرعاها وياخد بالو منها .
معن: كتر خيركن انا بعرف انو انتو قلقانين عليها لكن ماتخافو عليها انا بكرة معطل وازا لزم الأمر بعطل كمان كم يوم كرمالا.
زينة: بس معن ....
قاطعها وغمزها : لا بس ولاشي حياتي رح تروحي معي عالبيت ماهيك اتفقنا .
زينة: ....امبلى .
تمارة حست انهن مخبيين شي لهيك اختصرت هي والبنات .
اكلت زينة وتروقت وارتاحت ورجعت مع معن عالبيت .
اول مادخلت نقزها البها وقت اتزكرت كيف اجت لهون اول مرة .
انتبه عليها انو تغيرت ملامحها وحس انو بسبب الي مضى ، قرب منها وحملها باتجاه غرفتو وقتها وقفتو بأيدها انو مابدها تروح لغرفتو نزل راسو واخدها للغرفة اللي كانت تنام فيها لما كانت عندو .
حطها عالتخت وسألها : ليه مابدك تروحي لغرفتنا .
زينة: ......انا هي غرفتي .
معن: شو يعني .
زينة: .....بدي اطلب منك طلب معن .
معن: عيوني الك .
زينة: بدي تتركني نام بالغرفة هي ازا سمحت .
معن: ....هووون ليش هون ..طيب وانا وين بدي نام .
زينة: بغرفتك.
معن: ليش زينة اتتي تعبانة وبدك مين ياخد بالو منك .
زينة: انا منيحة هلأ ماتخاف عليي.
معن: انتي خايفة يصير بينا شي ماهيك.
نزلت راسها بدون تعليق.
اتطلع فيها بحزن كبير انو مو قادر يخليها تثق فيه ...وقال بحالو انو حقها لأني غدرت فيها من قبل اكيد شايفيتني هلأ رجال حقير وواطي .
معن: ....رح اوعدك انو ...انو ماقرب منك ولا آخد منك شي غصب عنك ودون رضاكي .
فتحت عيونها مو مسدقة : جد معن بتوعدني .
معن: اي ياعيوني بوعدك مارح اعمل متل اول مرة رغم اني ميت لآخدك بحضني وضمك ومو القصد شي تاني بس ازا هي رغبتك وبهيك بتكوني مرتاحة خلص مارح اضغط عليكي ....وعموما ازا حبيتي تبقي بالوقت الحالي بهي الغرفة برضو ماعندي مانع المهم انك معي وعم نتشارك كل شي بهالبيت ...الا غرفة النوم .
ابتسمت زينة : شكرا معن .
معن: عشو .
زينة: انك تاركني عراحتي .
معز: والله مابدي الا راحتك .....طيب هلأ انتي لسا تعبانة وصار لازم ترتاحي نامي هلأ وريحي جسمك وينو دواكي (وصار يدور حواليه ) ااه ليكو ، انتي مو هلأ موعد دواكي ماهيك .
زينة: لأ للمسا .
معن: خلص لكان نامي وارتاحي .
زينة: كنت بدي اتحمم بس تيابي ببيت البنات .
معن: انا بروح بجيبهن من عندهن ، وقت بتفيقي بكون جبتهن وبتتحممي منيح هيك .
زينة : اي منيح ...انتي لوين رايح هلا .
معن:اول شي بدي روح لعند رفقاتك جبلك غراضك مابتأخر بوعدك ...بدك جبلك شي معي .
عم تهز براسا انو لأ : هآآآ مابدي شي بس ماتتأخر.
معن: بتخافي .
زينة: لأ مابخاف كل عمري لحالي بس لا يجي حدا بغيابك .
معن: لو بدق الباب مليون مرة ماتقومي بنوب، مابيجي لعندي حدا مهم بالنهار وانا معي مفتاح .
زينة: ماشي الحال .
قرب منها وعطاها بوسة عجبينها واتطلع بعيونها وقت قرب منها واشتبكت النظرات بعدها اختصر معن وراح . .
بقيت وقت وهي عم تحاول تنام تعبانة ونعسانة لكن قرب معن منها عامللها قلق كانت خايفة يرجع يغدر فيها من جديد ، لكن اتزكرت خوفو عليها بالمشفى وحست انو سادق معها وانو وعدها انو ماحيصير شي بينهن غصب عنها ، طمنت حالها بكلمتين وقالت يابنت والله انك شفتي السدق بعيونو ونبرة صوتو وطريقة كلامو .
بالطريق معن مرتاح ومبسوط انو زينة حياتو رجعت لعندو وكان هالمرة جدي بعلاقتو معها ووعد حالو متل ماوعدها انو يكون سادق معها بكل شي ،وقرر يقلب طريقة حياتو 180 درجة كرمالها ...وقال انو لازم يخليها تثق فيه .
وصل عبيت البنات وطلب من تمارة اتضب اغراض زينة كلهن وكان ناطرها بالسيارة لتخلص .
بعد وقت قليل طلعت تمارة وعطتو شنتاية زينة .
استغرب معن: ...بس هي غراضا.
تمارة : اي والله هي غراضا بس ....استاز معن عندك مشكلة لو اجيت اناو البنات لنزور زينة عندكن بالبيت .
معن: لااا ولو اهلا وسهلا فيكن بأي وقت انتو رفقاتا لزينة ولاحظت انها بتحبكن كتير ومافيي احرمها منكن لأن مالها حدا وانتو بنات سمعتكن طيبة وبشرفني اتضلو رفقاتها لزينة وماتقطعوها بنوب ...ماتقولو تجوزت يعني ماعاد فيكن تشوفوها بنوب او تقطعوها من زياراتكن الها اصلا بتفرح فيكن.
تمارة: ...بتحبا.
ابتسم معن ونزل راسو: ...بعشقا مو بس بحبا ومابتخيل حالي بدونا .
تمارة: لكان دير بالك عليها واتزكر كلام ربنا فأما اليتيم فلا تقهر.
معن: ....توكلي عألله وان شاء الله زينة بأيدين امينة وبعيوني وروحي .
بعدها رجع معن عالبيت بسرعة لحتى مايتأخر عزينة ، بطريقو اشترى كم غرض للبيت وقال بيرجع بيشتري بعدين .
دخل البيت وراح اول شي لغرفة زينة وشافها نايمة وغرقانة بالنوم وفرح انها قدرت تنام .
تحمم ولبس فانيلا بيضة وبنطلون بيجامة اسود ،مدد حالو عالكنبة بالصالون يتابع الأخبار وبعدها غط بنوم عميق .
بعد تلات ساعات فاقت زينة مرتاحة مابتعرف شوالسبب كانت الشمس عم تعلن عن غيابها ليجي يحل محلها ليل هادي بيبعت بالنفس راحة وطمأنينة .
ركزت منيح واتزكرت انها رجعت لبيت معن .
قامت وطلعت للصالون شافت معن نايم عالكنبة وحاطط ايدو عراسو والتلفزيون شغال عالأخبار بدون صوت .
تركتو لترجع عغرفتها وقفها بصوتو: ...زينة .
زينة جفلت والتفتت لعندو متسندة عالحيط: ...خوفتني فكرتك نايم.
معن قام وهو عم يفرك بعيونو: كنت نايم بس حسيت فيكي قريية فقت .
مشي لعندها ومسكها من ايدها ليساعدها تقعد بالصالون.
قعد عالطالولة قبالها : كيف صرتي هلأ طمنيني.
زينة: ....الحمدلله وين كنت ووين صرت احسن بكتير.
*يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```