مجنون ساره - الفصل 21 - بقلم فاتنة دبي - مكتملة | روايتك

هند وهي توها واصله البيت وهي بسيارة سالم سالم : ها يا عمري شو ان شاء الله استانستي اليوم هند بابتسامه : وايد الظهره كانت حلوه سالم : ومتى تبينا بعد نطلع .. هند : ما ادري على هواك ..بس على الاقل خلا يمر كم يوم عسب خالد ما يسولي سالفه سالم عصب: هذا خالد مادري بلاه عليه .. ليش يكرهني هند : لا لا حبيبي منو قال .. بس هو يخاف عليه ويحب دايما يهتم فينا سالم : وابوج مب موجود هند : ابويه ما يقر في البلاد .. اكثر شي عنده اشغال برع .. يعني تقدر تقول بيزنيز مان .. سالم : اها عسب جي اخوج قايم فيكم مثل ابوكم هند : تقدر تقول جي .. سالم : اوكي حبيتي عيل اشوفج على خير هند تفتح الباب تبى تنزل : ان شاء الله على خير مع السلامه سالم : مع السلامه حبيبتي هند وهي داخله البيت .. شافت خالد يبى يطلع وشاف هند وشاف الساعه .. هند : السلام عليكم خالد : وعليكم السلام .. شو تاخرتي عن الوقت خذتني اكثر عن ساعتين هند وهي تتحرطم : ما حسيت بالوقت .. خالد : يالله نمشيها لج يا هند .. توج مالجه ومن حقج .. بس عاد الطلعه ما تكون دايمه اوكي هند وهي تبى تروح غرفتها : زييييين هند وهي تتحرطم بداخلها : اففففففف متى تزوج يا خالد وافتك منك .. او ليش اترياه هو يتزوج .. متى انا اتزوج وافتك من التحكم ..لاني اذا اتريت خالد يتزوج اكيد بتريه وايد .. شكله ما يفكر بالزواج من بعد زواج حبيبة القلب ساره . .. خالد وهو راكب السياره متضايج وايد .. ويقول في نفسه : وينج يا ساره من زمان ما ادري عنج .. اخاف نسيتيني ونسيت الوعد اللي بينا ..ماعرف ليش عندي احساس انج ماعدتي تفكرين فيه مثل قبل بس كيف اتاكد انج بعدج تحبيبني ومتذكره الوعد ممممممممم هي عندي حل .. خالد اتصل في نوره عشان يسالها عن ساره .. خالد : مرحبا الساااااع نوره وهي تتعشى في المطعم ويا عبدالله : مراحب هلا والله باخويه خالد يتسم : هلا فيج يا احلى اخت .. شو شكلج برع نوره : هي والله طالعه ويا عبدالله خالد : اها زين عيل ما ابي اخرب عليج ..بس اقول نوره باجر يمكن اتين بيتنا ابيج بسالفه نوره : خير خالد : لا ما في شي..سالفه وايد عاديه .. نور ه: خلاص يا اخويه بستاذن من ريلي وبييكم ان شاء الله خالد : ان شاء الله على خير ..زين عيل اترياج واذا ما قدرتي اتين خبريني اوكي ..بس حاولي دخييييلج ترى ابيج ضروري نوره : ولا يهمك اخويه صدق بحاول خالد : يالله سلمي على النسيب نوره : الله يسلمك اخويه . خالد : فامان الله نوره : فمان الله الكريم نوره بعد ما صكت من خالد .. نوره : عبدالله عبدالله وهو يشرب العصير: هلا يا عمري نوره : اول شي قبل ما انسى ترى خالد يسلمك عليك عبدالله يبتسم : الله يسلمه من كل شر..وثانيا نوره : وثانيا خالد يباني باجر اروحلهم عادي اروح عبدالله : اكيد حبيبتي اي مكان يفرحج روحي .. نوره : تسلم يا روحي -------------------------------------------------------------------------------- اشواق وهي راده بيتهم وتحط الاغراض .. وهي يوم اطلع ملابسها واغراضها من شطنتها شافت قلم فهد وابتسمت وتنهدت : ااااااااااااااااه متى اشوفك يا اللي سحرتني .. اشواق بعد ما خلصت وحطت الاغراض في الكبت ( الخزانه ) اتصلت في بنت عمها فاطمه فاطمه وهي يالسه ويا اهلها : هلا باشواق اشواق : هلا فيج ..اقول فطيم .متى بنروح عند ساره وفهد فاطمه رافعه حوايبها : انتي من صدقج اشواق : لا عيل من جذبي .. هيييه اكيد من صدقي .. فاطمه : حشى تونا ياييبن من السفر ما مدالنا نرتاح .. اشواق : والمعنى فاطمه : اشواقوو عقلي شويه تعرفين يوم حد اييه من السفر لازم الضيوف اييون ويزورونهم يعني تبين اودر الضيوف واروح مب حلوه اشواق: عيل متى تبينا نروح فاطمه : اتريي بعد كم يوم يعني 3 ايام اشواق : بللللللللللللللللللل وايد ما اقدر اتريه فاطمه : والله قدرتي تتريين وانتي مسافره ما تقدرين تتريين كم يوم اشواق : بعد شو اسوي امري لله ... اتريه ..ولين ما اييه هاليوم بروح اشتري حقهم هديه فاطمه مستغربه : هديه ؟ ليش اشواق : عسب يكون عندنا عذر يا حلوه .. يعني يمكن ساره تستغرب يوم بتعرف انا نبى نييه بيتهم وبالذات انا بقولها اني ابيها وابي فهد وياها وعسب ما تشك ..بقولها مسويه لكم مفاجاه شهر عسلكم وبعطيهم الهديه اثنينتهم عسب ما تشك وهني بلعب لعبتي فاطمه: صدق طلعتي داهيه ..وشو قصدج انج بتلعبين لعبتج على شو ناويه اشواق بخبث: بتعرفين يوم بنروح هناك .. فاطمه : الله يستر (( اشواق مصره على فهد بشكل فظيع وطبعا هذا اكيد اعجاب .. لانها ماعرفت شي عنه وعلى طول حبته .. يمكن اعجاب لانه فهد اللي يشوفه من اول مره ينعجب بجماله وهيئته ورمسته.. بس شو اللي تخططه اشواق )) ساره ردت من بيت امها ..ودخلت غرفتها وهي توها تفصخ العبايه والشيله .. وشافت الغرفه فاضيه يعني فهد بعده ما ياه .. ساره راحت لبست بجامتها الراهيه والحلوه ..وهي تشوف الساعه وتقول في نفسها : مب جنه تاخر فهد فهد ويا مروان في السياره : وييييييييي شوف الوقت تاخرت على ساره مروان وهو يسوق السياره : عادي ما فيها شي هي مب بروحها صح .. فهد : هيه .. ( خذ الموبايل واتصل فيها )) ساره ردت : الو فهد بصوت واطي عشان مروان ما يسمعه : مساء الحب لاغلى حب ف هالدنيا مساء الشوق يا نبع الشوق .. ساره تبتسم : بلاك جي ترمس كانك ترمس عمرك فهد حاط ايده على الموبايل عشان مروان ما يسمعني ما ابي ربيعي يشوفني اتغزل في مرتي حبيبتي ساره : ههههههههههههه .. ليش فهد : ما احب ..احب الغزل لي ولج وبس ساره : يعني عطوك ويه وودوك برع فهد : هيه عطوني ويه بعد ما عصب عليه وما خلا عليه شي .. بس المهم بالاخير طلعوني ساره : زين الحمد لله فهد : اقول يابعد هلي بتنامين الحينه ساره : الصراحه فيه رقاااااااااد ..ناشه الصبح من وقت فهد : افا وانا احاتيج واخر شي ما بتترييني ساره : السموحه بس والله صدق تعبانه ما عليه ان شاء الله باجر بشوفك فهد : خلاص نامي يا عمري نوم العوافي ساره استحت : اوكي يالله عن اذنك فهد: اذنج معاج وتصبحين على الف خير ساره : وانت من هله مروان يضحك : هههههههههههههههههه فهد يشوفه بنظره : ليش تضحك ؟؟ لا يكون قلت نكته وانا ما دري مروان : ما ادري عنك ..ليش جي ترمس ..كانك تبى تنخش عن الشرطه وتخاف حد يسمعك فهد : والله سالفه بيني وبين مرتي وما ابي حد يسمعني مروان: يالله على الحركات .. فهد : ما تنلام يوم بتزوج ان شاء الله بتحس فيه مروان : حاس فيك والله.. بس صدق عليك سوالف حلوه فهد : زين زين سوق ولا ترمس وايد مروان بنظرة حقد " دريول وياك مب ربيعك احمد ربك اني طلعتك فهد/: : بتذلنا يعني ؟ مروان : افا عليك اتغشمر وياك .. وبعد ما فهدطلع ويا مروان اما ساره فردت البيت عشان تنام لانها كانت تعبانه .. فهد وهو ياي الغرفه شوي شوي يدخل عشان ما يزعجها ودخل وشاف الاضاءه الخفيفه وراح عند ساره وشافها نايمه مثل الياهل الصغير بكل حلاه وبرائه فهد ابتسم وهو يشوفها : عسى ربي لا يحرمني منج ومن وجودج يا اغلى ناسي .. وفي اليوم الثانــي منى تكلم هند منى :هندوووه بلا حركات تعالي بيتنا عاد ما تبيني اراويج سيارتي اليديده هند : ماعرف بسال اهلي منى : يالله عاد بلا حركات هند : لا صدق بحاول اكلم اخويه منى بعصبيه : الحينه هوماله خص فيج انتي مالجه يعني ريلج هو اللي يتحكم .. ... يالله اترياج اوكي هند : مممممممممممممم اوكي خلاص ان شاء الله بييج بس استاذن من امي على الاقل منى " اترياج ************************************ خالد وهو ياكل كاكاو ويكلم نوره : يالله عاد بسرعه تعالي نوره : حشى اصبر شويه خالد : والله ابيج بسالفه مهمه وايد بالنسبالي نوره : خلاص قلت لك دقايق واكون عندك .. خالد وهو ماسك الكاكاو اللي بايده : يالله تعالي وبعطيج الكاكاو نوره بدلع : عاد انا مب اي نوع اكل وابيه يديد مب ماكول خالد : ههههههههه فالج طيب بثلاجتي انواع من الكاكاو بس انتي تعالي .. نوره : ان شاء الله بييه يالله باي خالد: بايات فهد وساره ساره فاتحه الكبت ( خزانة الملابس) وترتب اغراضها فهد دخل الغرفه يدورها : وينج ساروه انا هني فهد يشوف ساره يالسه علىالارض وترتب ملابسها ..: " شو تسوين ساره : ارتب اغراضي شوي فهد يلس عندها : شو يا عمري مب في خاطرج نروح مكان ويا بعض ساره : والله ماعرف بشوف اذا خلصت اشغالي بعدين فهد : شو رايج نودي الريم ويانا يحليله بروحها ساره تصد: اكيد انا كنت بقولك بعد يحليلها ملت من يلست البيت .. فهد: زين عيل اخليج ويا اغراضج يا بعد ناسي ساره ابتسمت .. هند بعد ما استأذنت من امها راحت عند منى منى وهندبغرفة منى .. منى : ما بغيتي اتين هند : شو اسوي زين مني اقنع امايه منى : ها بشري قولي شو الطلعه وياج ويا سالم هند بدلع : بقولج شو صار .. هند تمت تقول لمنى شو اللي استوى وكيف هي مستانسه بحياتها .. نوره يت واخيرا خالد يسحب ايد نوره : يالله بسرعه تعالي نوره : اصبر خلا افصخ عباتي .. اف لعوزتي اليوم يا خالد خالد : يالله تعالي بسرعه بغرفتي نوره : يالله يايه خالد يالس على السرير ونوره مجابلتنه نوره : ها يا اخويه خير خالد منزل راسه: بصراحه ابي اقولج شي بس ابيج تجاوبني بصراحه مهما كانت نوره : اكيد تفضل قول خالد رفع راسه : نوره .. شو تحسين ساره بدت تنساني وتحب ريلها فهد .. والله مثل قبل تكره وتباني نوره عاقده حوايبها : الحينه هاي سالفتك خالد بحزن : الله يخليج ردي عليه نوره : شوف اخويه انت تبى الصراحه صح خالد هيه اكيد نوره : ساره في ايام ملجتها صدق ماكانت تحبه ابد ودايما تتحرطم منه خالد بخوف : يعني الحينه بدت تحبه نوره : لا ما قلت جي بس هالايام يا خالد ما ترمس عنه موليه ولا تقول مثل قبل متى انفصل عنه ولا شي خالد نزل راسه وبحزن : يعني معقوله نستني نوره : خالد هي لازم تنساك هي متزوجه فكر بعقلك لا تفكر مثل هالمسلسلات خالد وقف من مكانه : اي مسلسلات الله يهديج . حبي لها اكبر من اي شي بهالدنيا نوره: زين وشو الحل خالد : ابي يكون عندي دليل اذا هي نستني ولا نوره : كيف خالد : شوفي يا نوره .ابيج اليوم تعزمين ساره عندنا وتشوفين اذا هي لابسه قلاده .واذا لابسه شوفي كيف شكل القلاده وخبريني الله يخليج نوره مستغربه : والقلاده شو دخلها بسالفتنا خالد : بعدين بخبرج بس انتي سوي اللي قلتلج عليه الله يخليج نوره : فالك طيب الحينه بتصل فيها خالد : فالج ما يخيب اختي .. عيل انا بروح شوي ويا ربيعي محمد وان شاء الله بييه مره وحده عسب ( عشان ) أكحل عيوني بشوفتها ومره وحده عسب اخذ الاخبار منج نوره تحرك راسها : ماشي فايده وياك مصر على حبك خالد ياشر على قلبه : هالقلب مستحيل ينسى اول انسانه بهالوجود نوره : الله يعينك يا اخويه .. خلاص بتصل فيها الحينه خالد : عيل انا بروح وما بتاخر اوكي نوره : اوكي اخويه بحفظ الله نوره وهي تكلم ساره عسب اتيه بيتهم من دون ما تقول لها سبب . ساره : وليش اليوم بالذات نوره : بس جي خاطري اشوفج من مده ما شفتج ساره : مع ان فهد يباني اطلع وياه اليوم نوره : ما بغصبج حبيبتي .. بس يعني حبيت ايلس وياج ساره : خلاص بكلمه عيل ..وبييج ان شاء الله نوره : ردي عليه الخبر اوكي ساره : اكيد ان شاء الله فهد يالس يلعب بموبايله : شو السالفه سمعت اسمي ساره تصد تشوفها : نوره تباني اروح بيتهم فهد : بيت نوره ولا بيت ابوها ساره : قصدي بيت ابوها يعني فهد تضايق لان اذا ساره راحت احتمال كبير تشوف خالد وهو ما يبى هالشي ساره : بلاك ؟؟ فجاه تضايقت فهد : الصراحه ما احب اتسيرين هناك ساره مستغربه : وليش ان شاء الله فهد : لا تنسين ان خالد هناك وانا ....؟ ساره قاطعته : ولا تنسى يا فهد ان مهما يستوي بيكون بيت خالتي اذا خالد موجود هناك ولا لاء ..وبعدين انا بسير عند نوره وامها .. ولا تباني اقطع عن بيت خالتي اللي بعمري ما قاطعتهم من يوم كنت صغيره .. ترى ماعندي الا هالخاله فهد : اعرف هالشي يا عمري ..بس تعرفين اني اغار ساره قامت من مكانها: يعني شو ما اسير خلاص اقاطعهم فهد : لا انا ما قلت جي يا عمري.. خلاص على راحتج يعني ما بتطلعين ويانا ساره : اسمحلي بس من زمان ما طلعت ويا نوره بروح اسلم عليهم وان شاء الله الايام يايه فهد : خلاص على راحتج ساره : عيل عن اذنك بروح اتلبس فهد بحزن : اذنج معاج حبيبتي (( فهد وايد يغار يوم يعرف ان ساره بتروح هناك ..لانه يعرف ان خالد اكيد بيشوفها ويخاف ساره يوم تشوف خالد تذكر خالد وتتغير عليه ..بس هو ما حب يمنعها لانه مهما كان بيت خالتها ..)) ساره بعد ما تلسبت ولبست لبس مغربي وايد حلو وراقي وبلون البنفسجي مطرز بالذهبي ... وهو من انواع لبسات اليشمك .. ساره وهي لابسه شيلتها وعباتها: يالله عن اذنك يا فهد فهد بابتسامه : الله وياج حبيبتي .. ولا تسرعين ..شوي شوي في الدرب اوكي ولا تبيني اوصلج ساره :لا ماله داعي ..وانت بتطلع فهد : والله ماعرف بشوف ان شاء الله .. ساره طلعت وراحت بيت خالتها وماتعرف ان نوره متفقه ويا خالد .. عشان يتاكدون اذا ساره حبت ريلها فهد وبدت تنسى خالد .. ساره وهي تسلم على خالتها ساره :ها خالو شحالج ؟\ ام خالد : بخير الحمد لله اشحالج انتي يا ساره من زمان ما شفناج ساره : والله مشاغل الدنيا .. ام خالد ( خالة ساره ) الله يكون بعونج نوره يت من فوق : هلا بساره والله ساره بابتسامه : هلا فيج يا بنت خالتي نوره تسلم على ساره : وينج لج وحشه ساره : والله انتو اكثر نوره : امايه عن اذنج بنروح غرفتي اوكي ام خالد : على هواكم حبايبي نوره وساره يالسين نوره : ها شحالج شوحال فهد ساره : والله الحمد لله نوره تبى تشوف قلاده ساره : مممممممممم الصراحه اليوم متكشخه ماشاء الله عليج ساره : تسلمين من ذوقج نوره اونها تبى تعدل لبس ساره وين رقبتها عسب تشوف اذا هي لابسه قلاده ولالاء نوره شافت ان ساره لابسه قلاده بلون لبسها يعني شكل احجار حلوه .. ساره مستغربه : بلاج نوره: قلادتج حلوه ماشاء الله ساره : ما تغلى عليج حبيبتي نوره : تسلمين .. مدام انتي لابستنها كاني انا اللي لابستنها ساره : تسلمين والله نوره : ساره الصراحه ابي اقولج شي بس لا تضايقين ساره : خير نوره : شحالج ويا فهد ..شو ان شاء الله بديتي زينه وياه .. ساره : والله ماعرف شو اقولج بس احس احساسي وياه احسن عن قبل ماعرف .. يعني مب اني احبه ولا اني اكره .. بس لانه طيب ومعاملته حلوه وياي وايد يستحملني نوره : يعني بديتي تحبينه ساره : ما اعتقد اني احبه .. يمكن اعزه او اني تعودت عليه عرفتي... وليش هالسؤال نوره : ها ولا شي بس حبيت اعرف ساره : اها زين وانتي شخبارج ويا عبدالله نوره بابتسامه : الحمد لله زينين .. عبدالله مافي منه بالكون طيب وحنون وايد ساره : عسى الله يخليكم لبعض .. ############################### منى واقفه عند سيارتها : يالله هند تعالي هند : لا لا شو مينونه اطلع وياج بالسياره منى ": بلاج ما بنروح مكان بس باخذج كم دوره وبردج لا تحاتين .. هند : واذا حد شافنا منى : شو يعني انا قلت بوديج الديسكو قلت بودوج كم دوره بالسياره يعني ما بنزلج .. عشان تركبين سيارتي Ford اليديده هند : خايفه اخوي يدري ويذبحني هند : اذا درى حبيبتي قوليله انت مالك خص انا وحده ومتزوجه ومب انت اللي تتحكم فيه زين.. يالله ذبحتيني ويا اخوج هند : زين بس ما نتاخر منى : يالله تعالي انتي عسب تشوفين سواقتي هند ويا منى راحو يدورون بسيارة منى اليديده وطبعا معليه صوت المسجل على الاخر تتحرى عمرها انها بروحها بالشارع ..وتسرع على كيف كيفها .. خالد موقف بشية البترول عشان يترس بترول ولا فجاه ..طافت سياره جدامه وطبعا سياره منى وهند بالسياره منى وهي موقفه سيارتها : ها شو تبين اشتريلج من شيشة ايبكو هند : ما بي شي يالله نرد تاخرنا منى : اييييييييييه انتي بعد وايد خوافه ..خلاص باخذلج على راحتي .. وسياره منى مب مخفيه وايد لانها يديده توها وخالد وهو يرمس بالتلفون فجاه شاف السياره اللي عند يمينه شاف هند فتح عيونه اكثر ولا يشوف هند وهو متاكد بس هو توقع ان هند بالبيت واللي اكدله اكثر شاف منى وهي طالعه من شيشة بترول .. وخالد يعرف شكل منى لانها مره يت عندهم وفتح عيونه ونصدم وعشان يتاكد زياده اذا هي هند اللي بيساره اتصل فيها وقال اذا هي رفعت السماعه يعني هي لانه شكل هند واضح بما ان السياره مب مخفيه ..واتصل وشاف هند ماسكه الموبايل وهو يرد ومعصب : هند وينج هند توترت ماتعرف شو تقول: ها انا انا ماعرف انا في بيت منى خالد : والله في بيت منى لا ....وتقصين عليه بعد .. ماعليه دواج في البيت وصك التلفون وهو معصب هند وهي متوتره وماتعرف ان خالد شافها منى ركبت السياره : ها يالله اشتريت لج كل الانواع الحلويات منى شافت هند متوتره وايد وترتجف ..: : بلاج هند وهي تبلع ريجها : خالد اتصل وعصب وسالني وينج قلت له بيت منى وعرف اني اجذب ..اخاف شافني ..يا ويلي شو اقوله منى : والله انج مكبره السالفه ..شوفي اذا قالج قوليله انج معرسه واللي يتحكم فيج هو سالم ريلج . هند : انتي ماتعرفين اخويه ..وايد عصبي منى : لا تفكرين ولاشي قولي اللي قلت لج خالد معصب وهو على طول رد البيت نوره ويا ساره بالغرفه .. ام ساره وام خالد بالصاله خالد دخل وهو معصب على اخره : وين هند ام خالد : باسم الله بلاك لا سلام ولا كلام خالد واصل حده : وين هند ام خالد : هند بيت رييعتها منى خالد : لازم هالحريه بتخرب البنت ..وانتي تعرفين ان منى ااذا زينه ولا لاء ماعندي مشكله اذا سارت بيت رباعتها بس الاهم ان رباعتها على دين واخلاق مب من اي نوع ام ساره : وانت ليش معصب الله يهديك خالد : خالو انا شايف توني هند بالسياره مع منى ..شوفو بدون ما تستاذن ام خالد : هند مع منى برع بالسياره خالد : هيه ونحن خبر خير .. الاخت ماخذه راحتها انا براويها ..خلا ترد هند توها داشه البيت وخالد يالس في الصاله ومعصب يترياها هند دخلت وهي ترتجف : السسس سسس لام عليكم خالد وقف : وين كنتي يا الحلوه هند : كنت بيت ريعتي منى خالد : وما طلعتي بعد هند : لا ما رحت مكان خالد تقرب من هند و صفعها بالقو : وتجذبين بعد .. يعني ما شفتج انا... تروحين وتجذبين بعد ساره ونوره طلعو من الصريخ هند وهي ماسكه ويها وتصيح : وانت شو لك خص اذا طلعت ولا لاء وباي حق تضربني .. ام خالد تحاول تدافع عن بنتها : بلاك يا خالد خالد : لو صارحتني ما بقول شي لا وتتجذب بعد يعني هي تعرف انها غلطانه .. هند وهي تصيح : اروح المكان اللي ابيه كيفي انت ما لك خص فيه خالد يبى يضربها يت امه تمنعه خالد : خليني اضربها خلا تعرف اذا لي خص ولا لاء خالد : حبيبتي انا اخوج وغصبن عنج اتحكم فيج ..وبعدين كيف تروحين ويا ربيعتج هاي اللي ماتعرف لا ادب ولا احترام ومعليه صوب الاغاني على اخر اللي يشوفج وياها بيقول انج مثلها حركات هند : بس انا ما سويت شي بس طلعت وياها بالسياره خالد : على الاقل لازم تستاذنين مني او من ابويه او امايه مب على كيفج يعني مالجه خلاص .. لا تنسين انج عايشه بعدج في البيت لا والاخت تتجذب بعد .. ( ياشر بصبعه ) يا ويلج اذا رحتي مره ثانيه عندها.. هند وهي تصيح ..راحت غرفتها خالد حتى ماحس بوجود ساره راح غرفته من الصوب الثاني ام خالد : لا حول ولا قوه الا بالله نوره : الصراحه خالد معاه حق .. هاي منى ما ارتاحلها لو وحده ثانيه بنقول عادي بس هالنوع من البنات ينخاف منهم ام خالد : دايما المشاكل اتيه على راسنا ساره متفاجاه شوي من الموقف.. نوره تصد تشوف ساره : شو بلاج ساره : حرام هند انضربت قلبي عورني عليها اول مره اشوف خالد بهالعصبيه ... نوره : واول مره حد يضرب هند هند عمرها ما انضربت ..بس اللي سوته غلط ساره : يحليلها والله نوره : عن اذنج يا ساره بروح اهدي اخويه وبييج خذي راحتج ساره : انتي اللي خذي راحتج ترى انا مب غريبه نوره دخلت غرفة خالد وشافته معصب .. نوره : خالد هد اعصابك خالد : هالبنت قاهرتني لا وبعد ما تعتذر تتجذب وتعاند نوره : ماعليه هي ماعرفت باللي تسويه هذا كله من منى ربيعتها حسبي الله عليها .. خالد صد : تعالي سويتي اللي قلتلج عليه نوره : ماشاء الله مانسيت خالد: لا طبعا هي وينها مب في بيتنا نوره : لازم من عصبيتك ما شفتنا حتى خالد : هي كانت موجوده نوره : هي كنا ويا بعض طلعنا من صريخك خالد : فضيحه شافتني بعصبيتي نوره : عادي ما فيها شي خالد : زين بشري شو استوى نوره : ممممممممم الصراحه شفتها لابسه قلاده بنفسجيه بالاحجار خالد : يعني مب قلادتها على شكل القلب فيه حرفها نوره : لاء خالد عصب زياده : يعني صدق مثل اللي توقعته .. نستني نوره : انت شو تقول خالد : نوره الله يخليج ابي اكلم ساره الحينه وضروري نوره : ليش خالد : بعدين بقولج ..روحي ازقريها خليها اتيه نوره: مب حلوه بغرفتك شوف اذا تبى تكلمها روح الصاله ترى امايه وام ساره راحو الميلس توهم .. بس اكون موجوده خالد : بس في اشياء خاصه بيني وبينها كيف اتين نوره : يالله الحينه عليه ..ترى ما يستوي اخليكم بروحكم خالد : والله بس بقولها شي ..انتي راقبي الوضع زين نوره : شو نسوي بعد ما نزعلك اليوم روحك معصب ساره وهي يالسه بالصاله نوره يت عندها نوره : اقول ساروه ترى خالد بيكلمج ساره قلبها دق وتوترت : ها ليش نوره : ماعرف بس دقايق بيكلمج وبيطلع ساره : بس انتي تمي مب حلوه بروحنا نوره : انا بروح وبييه براقب الوضع لان الاخ عنده اسرار ساره : بس خالد دخل هو معصب : السلام عليج يا ساره ساره استحت ونزلت راسها : وعليكم السلام خالد بحزن : شحالج يا بنت خالتي ساره : بخير الحمد لله يسرك الحال نوره طلعت وقالت انها بتشو ف ااذا حد بيه ولا لاء خالد : ها ياساره نسيتي الوعد اللي بينا ونسيتي الحب اللي كان بينا ساره رفعت راسها وتشوف خالد : ليش تقول جي خالد : انتي وعدتيني انج تلبسن القلاده دايما لاخر حياتج وهذا دليل على حبج لي .ومدام ما لبستي القلاده معناته انج ناستني ساره : ساكته خالد : شو ياساره وين الوعد انا كنت اترياج .. عسب نكون لبعض واخر شي تنسيني وتنسين الوعد .. نسيتي انا لازم نكون لبعض وانا لبعض لاخر العمر ساره :بس يا خالد انا حاولت بالبدايه والله حتى بشهر العسل اكون قاسيه عليه بس ما شي فايده خالد : قولي انج حبيتيه ساره : لا مب اني حبيته بس هو مستحيل يودرني مهما كان حاولت بكل الطرق ومليت خلاص اعرف ان ما شي فايده خالد : يعني شو .. خلاص بتكونين له .احلامنا تبخرت عشان خاطره ..هو يستانس بحسا ب غيره وانا شو مشكلتي اذا هو مريض نفسي وحبج من اول نظره .. انا حبيتح من الطفوله تعرفين شو يعني .. ساره انتي بداخلي ... والله اني عمري ما حبيت غيرج ..واخر شي ااييه هالنذل وياخذج بكل سهوله ..ونحن شو لنا خص نتعذب وننحرم من بعض بسبته هو .. ساره : شو اسوي خالد : اللي ابيج تعرفينه وما تنسينه يا ساره ان هالانسان اللي عايشه وياه انتي هو سبب فراقنا ..وبعدين لا تنسين انه كان يهددج فيه وفي اعز انسانه عندج اللي هي امج .. ساره سكتت وما قالت شي تذكرت كل شي خالد : تعيشين مع انسان كان في يوم بيحرمج من امج اذا ما خذتيه .و بتعيشين ويا انسان هو سبب عذابي وعذابج ... بتعيشين ويا انسان كان يستخدم التهديد .. قوليلي كيف كيف ساره والدموع بعيونها : شو اسوي زين شو اسوي خالد : اذا صدق تحبيني وتبيني .. حاولي انج تنكدين عليه مره ثانيه بس اقسى عن قبل ..حاولي انج تقللين من رجولته ساره رفعت راسها: كيف يعني خالد : يعني تعاندينه وما تهتمين فيه وسوي اللي هو ما يحب والريال يوم يحس ان كلمته ما تمشي وبالعناد راح يمل بس كوني اقسى عن قبل .. وصدقيني باقل من شهر بيمل من هالشي..ونرد بعض ..ساره ( ياشر على قلبه )) ترى قلبي لين الحينه يذكرج على الاقل تزوجين بسعاده وبحب من طرفين بدل حب من طرف واحد .. وكل ما تشوفينه لا تنسين انه كان يهددج انه ينتقم من امج .. يعني هو بالبدايه كان عدو.ولا تقولين مريض نفسي ترى عادي هو يسوي هالشي عسب ياخذج وقلبج يعورج عليه.. ساره خلا نكمل حياتنا ويا بعض مثل ما كنا نباه ..فكري عدل ..وخلا نرجع لبعض ونكمل حياتنا ساره تذكرت تهديد فهد .. انه يبى ينتقم من امه وكان يبى يؤذي خالد والفضيحه اللي استوت وتذكرت ايامها في المدرسه يوم كانت كله تفكر باليوم اللي تشوف عمرها زوجه لخالد ..لان خالد وساره حبهم من الطفوله ...تذكرت كل شي وحقدت اكثر على فهد وقررت انها تحاول تكون اقسى من الحجر على فهد لين يودرها وترجع لحلم طفولتها ترجع لخالد وبعد كلام خالد لساره ساره وقفت وهي سرحانه وتبى تروح خالد زقرها ( ناداها ) خالد : ساره ساره صدت وهي متضايجه : خالد بكل حنيه : اعرف ان اللي اسويه غلط ومالي حق اني اطلب منج الانفصال .. بس لو كان هو ياي قبلي ما بقول شي ..بس لا تنسين ان حبنا من الطفوله يعني من زمان واللي يسمعني بيقول لازم استسلم للامر الواقع صح .. بس العاشق واللي مر بتجربة الحب صدقيني بيحس فيه .. يوم انا اكبر بس عشان اخطبج ويوم اخطبج اييه واحد بالتهديد ياخذج مني . صعبه والله .. ولو كنتي تحبينه صدقيني مابعارض هالشي بس المشكله الكبيره ان حبنا متبادل ساره نزلت راسها وماقالت شي .. خالد : ساره اذا انتي تحبينه قوليلي بخليج وياه بس قهر انج ما تحبينه واتمين وياه ترى الدنيا لحظه .. خلينا نعيش بسلام وبحب ..ولو انسان ثاني حبيبته اتزوجت بينساها وبتشوفينه متزوج غيرها بس انا لاني اموت فيج مستحيل افكر بغيرج لين ما اتين وتقوليلي انج ما تبيني .. ساره ماتعرف شو تقول وشو تعلق وتذكرت ان فهد دمر حياة عاشقين اللي قصتهم معروفه بين العايله بان كل واحد يبى الثاني وتذكرت موقف فهد وتهديده وتصرفاته ان خذاها بالغصب ..وهي رايحه .. خالد : ساره اترياج لاخر العمر .. لا تنسين الوعد ساره هي واقفه عند باب الصاله تبى تروح يت نوره مستغربه نوره : ساره وين بتروحين ساره ميوده عمرها شوي تبى تصيح : بروح بيتنا نوره يت عندها : ليش تو الناس توج يايه ساره بحزن : بييه مره ثانيه عن اذنج ساره راحت وهي ضايعه ماتعرف شو تسوي .. نوره قربت صوب خالد وبعجب : شو صار بينكم خالد بجديه : قلت لها منو يكون فهد وشو اللي سواه قبل وانها لازم ترجع لي ..وترجع لحبنا ..وهالانسان اللي عايشه وياه حرمها من الحب نوره فتحت عيونها : يعني انت تبى ادمر حياتها ..والله ما توقعت منك .لو كنتي ادري انك تبى تقولها جي صدقني والله ما خليتك تكلمها .. خالد : ليش اللي اسويه غلط نوره : غلط الا فوق الغلط .اصلا حرام تفكر بانسانه متزوجه هذا اولا ..واعرف ان فهد غلطان بس خلاص هي زوجته وغصبن عليها تحترمه وتصونه.. خالد بعصبيه وبحزن : لانج ما تحسين باللي يصير فيه ..هالانسان حرمني الضحكه والسعاده والحب .. شو تبيني احبه ..انتي يا نوره تحبين ريلج وتحسين بقهر اذا انسانه ثانيه خذته صح نوره : اكيد خالد : عيل انا تخيلي ..ساره كانت خطيبتي يعني جريب نتزوج .. واييه انسان ثاني ياخذها مني ..هاي ولا في الاحلام انتي اكثر وحده لازم تحسين فيه لانج تذكرين يوم كنت في المدرسه كيف كنت العوزج وابهدلج عشان اشوفها وفي كتبي كله حرفها .. وما اطلع من البيت اا ذا عرفت انها بتيه بيتنا مع اني كنت صغير بس حبها بقلبي ..ويوم كبرت فرحت وايد لانه واخيرا اقدر اتزوجها .. يعني صعب عليه يا نوره اشوفها مع انسان ثاني وهي ما تحبه صعبه صعبه نوره راحت عند خالد وحطت ايدها على كتفه : والله حاسه فيك يا اخويه واعرف انك اكثر واحد تحبها وحبك اكبر من كل شي .. بس ساره متزوجه خالد بعصبيه والدموع بعيونه : متزوجه من غير رضاها ليش هو يستانس وانا اتعذب شو ذنبي انا .. شو ذنبنا نحن ..نوره : بس يا خالد خالد : بس يا نوره كافي خليني الحينه ما ابي اكلم حد ..وانا اكيد ان ساره بتكون لي .. غصبن عن الكل ساره وهي تسوق ..تذكرت كل شي وهي تمسح دموعها ساره بخاطرها : صح كلامك يا خالد ..كيف نسيت ان فهد اللي حرمني من حب الاول لا وكان يهدد يعني اذا ما خذته كان بيكون عدو لانه بيهدم حياتي ..وانا السبب بعذاب الانسان اللي حبيته من الطفوله اللي هو خالد كيف نسيت هالشي كيف .. بس لازم اوفي بالوعد واكون اقسى من الحجر ..عسب يودرني فهد ويمل مني وارجع لخالد فهد وهو لابس يبى يطلع ويا ربعه ساره وصلت البيت وشكلها يبين انها تعبانه ومتضايجه ساره راحت غرفتها وشافت فهد .. فهد وهو يتعطر شاف ساره استغرب : ساره حبيبتي ..غريبه رديتي بسرعه ما كملتي الا ساعه ورديتي ليش ساره شافته وتذكرت كلام خالد وبعصبيه : من دون سبب .. بس ابي ارتاح شويه في البيت ولا ممنوع بعد فهد قرب منها : بلاج حبيبتي ..شكلج مبين انج تعبانه حتى صوتج.. شو كنتي تصيحين ساره بصريخ : مافيني شي .. يعني لازم يكون فيني شي فهد مستغرب : بلاج ساره... ساره : اوووووووووووووووووه وبعدين وياك انت ما تفهم قلت لك مافيني شي ابي ارتاح ..يمكن تخليني وتطلع برع فهد فاتح عيونه واقف مكانه مستغرب ساره بعصبيه : الكلام ما ينفع وياك ..خلا اروح بالغرفه الثانيه وايد احسن ساره طلعت وصكت الباب بالقو فهد فاتح عيونه واقف مكانه ويكلم عمره: لا لا هاي اكيد مب ساره .. فهد راح الغرفه الثانيه اللي ساره موجوده فيها.. فهد يدق الباب : ساره ساره بلاج ..قوليلي شو فيج ساره وهي تصيح : مافيني شي خلني بروحي يا فهد خلني فهد : ساره ساره زين قوليلي بلاج متغيره عليه ساره ما ردت عليه .. فهد وايد مستغرب على طول بركيض راح غرفة الريم الريم تفتح الباب : هلا فهد فهد متوتر : الريم الله يخليج روحي عند ساره وشوفيها بلاها الريم مستغربه : ليش شو صار فهد : ما ادري بلاها تغيرت 180 درجه مب ساره الاوليه ..قبل ما تروح بيت خالتها ما شي احسن منها والحينه ردت اقسى من ايام الملجه روحي شوفيها ترى مهما كان انتي ربيعتها .. يمكن صار شي في بيت خالتها عسب جي متضايجه الريم: والله حيرتني بشوف بلاها ..انت تم مكانك بروح اشوف بلاها وبرد عليك فهد بحزن : زين الله يخليج بسرعه ترى والله احاتي الريم : ان شاء الله ولا يهمك الريم تدق الباب على ساره : ساره انا الريم ساره متسانده على السرير وهي تمسح دموعها : شو تبين يا الريم الريم : ساره فتحي الباب شويه ساره راحت تفتح الباب وهي واقفه عند الباب : خير يا الريم الريم شافت ويه ساره اللي مبين عليه انها صايحه ومتضايجه الريم : بلاج ساره ساره : مافيني شي ..ليش الاخ فهد قالجِ الريم : ساره ليش متضايجه لا يكون صار شي بيت خالتج ساره : ماصار شي ..بس انا متضايجه وما لي نفس اكلم حد الريم : من دون سبب جي بروحج اتضايجتي ..قبل شويه محلاج ساره : الريم دخيلج خليني بروحي ...والله مافيني شي بس ابي اتم بروحي شوي يمكن الريم تهز راسها : على راحتج حبيبتي ترى اذا فيج شي لا تنسين ان عندج ربيعه اللي هي الريم اللي كنتي تخبرينها كل شي بس للاسف تغيرتي عليه ساره صدت صوب ثاني وماعلقت .. الريم راحت عند فهد فهد كان يالس يترياها ويوم دخلت الريم وقف وبسرعه راح عندها : ها شو بشري الريم : ماعرف بلاها طلبت مني انها اتم بروحها فهد : ما حسيتي انها متغيره الريم : الصراحه هيه ..بس يمكن شوي متضايجه واكيد بترد مثل قبل ترى وايد ناس جي فجأه يتضايجون وبعدين يردون عادي فهد : انا اقول يوم تروح بيت خالتها تتغير .. ياريت ما خليتها تروح الريم : يمكن يا فهد نحن مكبرين السالفه بنشوف باجر اذا ترد مثل قبل ولا لاء وبعدين نقدر نحكم عليها ..انت الحينه اطلع ويا ربعك ترى قبل شوي قلت لي انك بتطلع فهد : وين اطلع وساره متغيره ..مالي نفس اطلع مكان الريم : زين اتعشى على الاقل فهد : والله مالي نفس يالريم ..بروح غرفتي الريم : فهد لا تحاتي يمكن اتضايجت من شي ... وان شاء الله باجر بتكون احسن فهد : اتمنى والله ..ما صدقت انها صارت زينه ويايه وبدت تحترمني ..ما ابي اعيش بعذاب ثاني ..والله تعبت تعبت الريم : ان شاء الله ايامك كلها تكون حلوه فهد : ايامي عمرها ماراح تحلى الا بوجود ساره عندي وبحبها .. الريم : الله كريم يالله انت روح ارتاح ..وما بيصير شي فهد طلع من الغرفه وهو متضايق فهد متساند على السرير وبضيج يكلم نفسه : اييييييييييييييييييه ماعرف شو صار فيج ياساره شفت الكره بعيونج ..ماعرف ليش عندي احساس انج بتردين مثل قبل قاسيه بس شو اللي غيرج فجأه.. يالله ابي السعاده تعم بهالبيت ..والله جربت انواع الحرمان من صغري فيارب عطني السعاده مع الانسانه اللي اخترتها وحبيتها ..يارب