بنات الجيران - الفصل 7 - بقلم noufy 1999 | روايتك

البارت (7) يابوي اكتب فيك مــن الشعر ابيات ..... يحلى فيــــــك اجمل واحلى قصيده عساك دايم مني قــريب المسافات ..... لاجلك تهون المسافه لو هي بعيده لاغبت عني عسى ماطول الغيبات ..... ونشوفك كل يوم واعـــــوام مديده دوم على البال ياعــــزيز الصفات ..... كل خطوه فيـــك صح ورايك سديده غيبتك تزيـــد مــن الحـــب عبرات ..... وانتظر كل يـــوم منك اخبار جديده غـــالي ابن غـــالي من غير لفات ..... الله يديمك على المحبه ايام سعيده ارجــــوك لا تبتعد وتزيل كل زلات ..... عن الغالي الي احبه ويامر وازيده ببيت هيفا كانت هيفا وام تركي وتركي واقفين بالحديقة حقت البيت يستقبلون محمد هيفا وهي تبوس راس ابوها : الحمدلله على السلامة محمد : الله يسلمك تركي بعد ما باس راس ابوه : الحمدلله على السلامة محمد : الله يسلمك ام تركي : الحمدلله على السلامة يا ابو تركي محمد : الله يسلمك .. يلا خلونا ندخل جوا بكلمكم بموضوع (دخل الكل جوا البيت وهو محتار .. وش ممكن يكون الموضوع ؟) .................................................. ............................ ببيت منار+مضاوي مضاوي غيرت بيجامتها ولبست بنطلون جينز وبلوزة لونها سكري ومن قدام من فوق فيه فيونكه كبيرة شوي مخططة بالأحمر والسكري ولبست فلات احمر ولمت شعرها على جنب بشريطة حمرا وحطت قلوس ومسكرة نزلت تحت وما لقت ابوها عرفت انه راح للدوام ورقت فوق وراحت لغرفة اختها لقتها جالسة على السرير تكلم وكانت لابسة بنطلون بني وبلوزة بيضا فوقها بلوفر نااااعم وخفيف لونه بيج وعليه نقوش بالبني وفلات بيج ولامة شعرها على ورا بشريطة بنية وحاطة مسكرة وقلوس وطالعه تجنن منار : ايه .. ايه .. ان شاءالله .. من عيوني .. يلا مع السلامة ..(وسكرت الخط) مضاوي : مين كنتي تكلمين ؟ منار : امي مضاوي : هئئئئ .. ليش ما خليتيني اكلمها ؟ منار ببرود : نسيت مضاوي بقهر : افف .. بروح اتصل عليها منار : لا .. لا تتصلين هي قالت لي انها مشغولة مضاوي : افف .. طيب امشي نروح لهيوف منار : اليوم ابوها بيرجع .. ما اتوقع تكون فاضية لنا مضاوي : طيب رنود وفيهو منار : انا كلمت فيهو عشان تجينا .. تقول بيروحون لخالتهم مضاوي : ريامي منار : بيروحون عند جدتهم مضاوي : افف وش ذا الحظ .. ما في احد نروح له منار : شفيك نسيتي غدوش مضاوي : هاه لا بس يعني احس صعبة نروح لها منار : ليش صعبة ؟ .. احنا دايم نروح لها .. جت على ذي المرة يعني ؟! مضاوي : لا بس يعني منار بمقاطعة : لا بس ولا شي .. بعد العصر بنروح لهم مضاوي باستسلام : اوكي منار بتردد : مضاوي مضاوي : هلا منار بتردد : عـ... عمرك حبيتي ؟ مضاوي : نعم !! .. ليش هالسؤال ؟ منار بسرعه : مو لشي انا بس جا في بالي السؤال وسألت مضاوي بتفكير : اممممم .. لا انا ما احب ولا افكر حتى احب منار : يعني بالزواج .. انتي تفكرين باللي يكون عن حب او التقليدي ؟ مضاوي : التقليدي طبعا .. لأن الحب ماراح يكون الا عن علاقات محرمة وانا ما ابي اسوي مثل هالعلاقات منار : مو شرط تكون علاقات محرمة .. يعني ممكن بالصدفة يشوفك واحد ويحبك ومن بكره يخطبك مضاوي : خلاص اذا صارت لي مثل هالصدفة على قولتك .. فكرت احب منار : طيب .................................................. ببيت هيفا (بعد ما دخلو للمجلس وجلسوا) محمد : الكل يعرف غلاتك يا ام تركي ام تركي : تسلم والله محمد : وانتم يا عيالي .. مشالله عليك كبرتوا وفهمتوا تركي وهيفا هزو روسهم بالايجاب محمد : وانا والله اسافر من مدينة لمدينة .. ونادر اشوفكم وصعب اني آخذكم معي بس بنفس الوقت انا احتاج حرمة تراعيني وتطبخ لي .. لأني مو معقولة بأكل من المطاعم كل يوم .. والشرع حلل اربع وانا والله قبل اسبوع تزوجت وحدة طيبة وابيكم تتعرفون عليها هيفا بصدمة : تزوجت !! ام تركي بصدمة : تزوجت علي ؟!! .. انت تتزوج علي يا محمد ! محمد : الشرع حلل اربع يا ام تركي .. وغلاتها من غلاتكم ام تركي بقهر : ومين هذي الي خذيتها علي ؟ محمد : هي الحين بالصالة .. انا قلت للخدم يدخلونها اذا دخلنا ..(بصوت عالي).. لينة..لينة (دخلت لينة عليهم وواضح عليها الخوف تقدمت وجلست جن محمد) محمد : هذي زوجتي لينة ام تركي بقهر : يا خرابة البيوت .. اذا انتي تعرفين ان الرجال متزوج ليش تاخذينه ؟ .. ليـــش ؟!! (لينة نزلت راسها وشعرها الطويل غطا ملامح وجهها الحاده) هيفا اكتفت انها تناظرها نظرات احتقار وحقد تركي كان مو مهتم اذا ابوه بيتزوج او لا .. بس كان اكبر همه ردة فعل امه محمد : انا آخر الأسبوع بسافر لدبي اخلص لي كم شغله وبخليها عندكم .. لأن السفره ما تسوا اني اخذها وهي كلها ثلاث ايام تقريبا ام تركي بعصبية : وتبي تخليها ببيتي ؟ .. نجوم السما اقرب لها من انها تنام ليلة وحدة بهالبيت محمد بحدة : البيت هذا بيتي انا .. وانا الي احدد مين يقعد فين ومين لا ! ام تركي وهي توقف : يا انا يا هي بهالبيت ..(وطلعت من المجلس متوجهه لغرفتها) محمد : لينة .. هذا ولدي تركي .. وهذي بنتي هيفا لينة رفعت راسها وابتسمت لهم .. وهيفا ردت لها الابتسامه بنظرات احتقار عكس تركي الي كانت نظراته لها بارده محمد وهو يقوم : انا بروح اتفاهم مع ام تركي .. وانتي يا لينة اقعدي مع هيفا وتركي تعرفي عليهم تركي وهو يقوم : بالاذن .. انا مواعد الشباب (وطلع ورا ابوه) هيفا كانت تناظر لينة نظرات احتقار,حقد,كره,عتب لينة حاولت تلطف الجو وقالت : انتي كم عمرك هيفا بسخرية : ليش ؟ .. يهمك ؟ لينة انصدمت من الرد بس قررت تجاريها لينة : اكيد يهمني .. يلا قولي لي كم عمرك هيفا من دون نفس : 16 سنة لينة بأبتسامه : يعني انا اكبر من بـ10 سنين .. لأن عمري 26 سنة هيفا ما استغربت صغر عمرها لأن واضح من ملامحها انها بعز شبابها (خلوني اكلمكم شوي عن لينة : 26 سنة انسانة طيبة لأبعد حد وهادية ومسالمة قلبها ابيض مرحه بس هدوؤها يغلب مرحها وجنسيتها سعودية مواصفاتها : طويلة وجسمها حلو بشرتها بيضا وشعرها لونه اسووووود لآخر ضهرها عيونها واسعه ولونها اسووود ورموشها كثيفة حواجبها مرسومة وخشمها سلة سيف شفايفها كانت صغيرة ومليانة بنفس الوقت ولونها احمر كانت ملامحها حاده بس حدتها ما اخفت جملها .. الي كان جمال خليجي) .................................................. ............................ عند تركي بعد ما طلع من البيت راح لبيت ماجد وبدر الي كان عندهم نايف دخل تركي عليهم وسلم وجلس وهم ردوا السلام .. تنهد تركي بعد ما جلس تنهيدة تعب بدر : شفيك ؟ .. المفروض تكون عند ابوك لأنه بيرجع اليوم صح ؟ تركي ببرود : ايه .. بس عنده مشاكل مع الوالده وموب فاضي لنا .. هذا غير مرته الجديدة ماجد بصدمة : تزوج ! تركي ببرود : ايه .. وامي مقهورة وتقول يا انا يا هي بهالبيت .. بس تصدقون شكلها صغيرة .. يعني بالعشرين نايف بقهر : الله يعينكم .. كل مرة ابو لازم تطلع قاسية ونذلة ماجد : لا ما اتوقع توصل لهالدرجة يعني حسستوني اننا بقصة سندريلا .. في ناس كثير لهم مرة ابو كانت مثل الام لهم نايف تنهدت بتعب وقال : خلها على ربك تركي : انا ما تهمني .. الي همني امي الي الحين تحترق قهر بدر : غيروا هالسيرة الكئيبة وخلونا نستانس شوي .................................................. ........... ببيت منار+مضاوي غرفة مضاوي كانت منسدحة على سريرها وتفكر مضاوي :"اذا رحنا بيت غادة اكيد بشوف ماجد وانا ما ابي اشوفه .. مدري ليش حسيت اني كرهته يوم عرف انه حبني افف بس البنت تفرح اذا حبها احد وانا اتضايق .. بس انا بحاول اني ما اشوفه قد ما اقدر .. اصلا مو اكيد ان ماجد يحبني يمكن كنت اتخيل والي صار بالسيارة ذاك اليوم صدفة .. افف بس" .......................................... غرفة منار كانت جالسة تفكر .. بس بمين ؟ .................................................. .................... ببيت هيفا هيفا تركت لينة وراحت لغرفتها .. طلعت الشنطة الي كانت مجهزتها من الدولاب وقالت للخدامة تنزلها جلست على سريرها واتصلت على غادة عند لينة كانت جالسة بالمجلس بعد ما تركتها هيفا .. هي تنتظر احد يوريها البيت لأنها ما تعرفه .. كل الي كانت تسويه انها تتأمل الاثاث و التحف الفخمة الي تزين المكان الي جالسة فيه .. قامت من مكانها وطلعت للصالة وصارت تتأمل الثريات واللوحات والتحف وكل شي كان موجود فيها .. حست نفسها ضايعه بهالبيت الكبير ! .................................................. ................... عند غادة كانت جالسة بغرفتها وتجهز اغراض السهرة عشان البنات .. وقطع عليها جوالها الي كان يرن غادة : الو هيفا : هلا غادة غادة : اهلين .. كيفك ؟ هيفا : الحمدلله .. غدوش انتي فاضية هالأسبوع ؟ غادة : ايه هالأسبوع كله ما عندي شي .. ليش تسألين ؟ هيفا : لا بس ابوي رجع من السفر وانا ما ابي اختلط فيه كثير .. فقلت اجي انام عندك هالفترة بما انك اختي من الرضاعه وانا افتش لأخوانك غادة : اها .. طبعا عادي .. بس لا تنسين اغراض المدرسة هيفا : لا تخافين انا جهزت كل شي غادة : زين .. تعالي الحين اذا تبين لأن منور وداوي بيجون عندي هيفا : خلاص .. دقايق واكون عندك غادة : انتظرك .. مع السلامة هيفا : مع السلامة .................................................. .... ببيت منار+مضاوي دخلت مضاوي على غرفة منار وهي لابسة عبايتها مضاوي : يلا منار .. بنروح لغدوش منار : بس تونا بدري مضاوي : هي تقول تعالو الحين .. لا تنسين ان بكرة مدرسة وما نقدر نسهر عندها منار : ايه صح .. طيب انزلي وانا بلبس عبايتي واجيك مضاوي : اوكي (لبست منار عبايتها .. ونزلت تحت وبعدها طلعت هي ومضاوي لبيت غادة) .................................................. .......... ببيت غادة كانت عندها هيفا .. وشوي ودخلو عليهم منار ومضاوي منار بمرح : السلام عليكم هيفا+غادة : وعليكم السلامة غادة : افسخوا عباياتكم .. ماجد وبدر بالخيمة مع نايف واتوقع تركي مضاوي وهي تفسخ عبايتها : كيفكم ؟ غادة+هيفا : الحمدلله بخير مضاوي وهي تجلس : خسارة باقي البنات ما راح يجون البنات : من جد طبعا غادة كانت لابسة بنطلون اسود وحزام ذهبي وقميض اسود اكمامه كويلة وعليه تطريز بالذهبي وفلات اسود عليه شريطة ذهبية ورابطة شعرها ذيل حصان وحاطة مسكرة وقلةس وهيفا كانت لابسة بنطلون جينز وبلوزة حمرا منقطة بالأبيض نص كم واكمامها شوي منفوشة وفلات احمر عليها شريطة حمرا منقطة بالابيض ولابسة طوق احمر وطالع شكلها طفولي وبريء جلسو البنات يتقهوون ويسولفون وهيفا قالت لهم عن لينة والبنات انصدموا بس ما بينو لهيفا عشان ما تتضايق .................................................. ............. ببيت هيفا عند ام تركي ومحمد ام تركي كانت تبكي وتلم اغراضها بشنطة وطلعت وشافت محمد واقف عند باب الغرفة وقالت له ام تركي : انا بروح لبيت ابوي ومنيب راجعه .. الا اذا طلقتها محمد : قلت لك يا ام تركي .. طلاق منيب مطلق ام تركي وهي تنزل الدرج ومعها شنطتها : وانا منيب راجعه (بعد ما نزلت) شافت لينة جالسة بالصالة ناظرتها نظرات احتقار وعطتها كم كلمة مثل السم وطلعت من البيت (بعد ما نزل محمد) محمد : لينة لينة بحزن : هلا محمد : تعالي اوريك البيت لينة بحسن نيه : بس هم ما يبوني .. وانا ما ابي افرض نفسي عليهم محمد : هذا بيتك مثل ما هو بيتهم .. وكلها فترة ويتقبلونك لا تشيلين هم لينة : ان شاءالله محمد وهو ماسك يدها : تعالي اوريك غرفتك لينة وهي تمشي وراه : اوكي .................................................. ... الحياة اما أن تكون مغامرة جرئيه، أو لا شيء ببيت غادة .. غرفة غادة الساعه : 5 العصر منار : بنات خلونا نتمشى غادة : الشباب موجودين ما اتوقع نقدر منار : موب لازم بالحوش .. خلونا نتمشى بالحارة <<<<<ما تتوب مضاوي : وانتي ما تبتي بعد الي صار لك ؟ منار : ادري .. بس هالمره احنا كثار يعني ان شاءالله موب صاير لنا شي (هيفا+مضاوي+غادة صاروا يناظرون بعض نظرات حيرة) منار : يلا عاد .. بس بنروح للسوبر ماركت القريب ونرجع هيفا بتردد : خلاص انا بروح معك غادة : وانا بعد .. ما في شي نخسره مضاوي تنهدت وقالت : بروح معكم عشان انتبه لهالخبلة (منار) لا تسوي شي وتفضحنا غادة : طيب يلا امشوا نلبس عباياتنا ونطلع مضاوي : بس اخاف خالتي تفقدنا وتعصب اذا درت غادة : لا تخافين امي مو موجودة بالبيت .. بتنام اليوم عند خالتي عشان زوجها مسافر وهي تعبانه مضاوي : اها .. طيب ابوك ؟ غادة بأستهزاء : ابوي ؟ .. ليش من متى ابوي يدري عني ؟ .. اقول يلا بس امشو نطلع البنات وهم يقومون : يلا (بعد ما لبسو البنات عباياتهم وكانوا بيطلعون من البيت جتهم رهف وهي تصارخ) غادة : اسسسكتي فضحتينا رهف : بروح معكم غادة : لا مافي رهف : الا .. واذا ما خذتوني بقول لأمي غادة : طيب بناخذك .. بس ما تقولين لأمي او لأي احد اننا طلعنا من البيت رهف : اوكي (طلعو من البيت وقعدو يتمشون بالحارة شوي بعدين راحوا للسوبر ماركت) هيفا : بنات ناخذ هالنوع ولا هالنوع ؟ مضاوي : لا هذا احـ.......(ما كملت كلامها لان منار كانت تدف العربية حقت السوبر ماركت وتركض وتفحط فيها ورهف راكبة بالعربية ومبسوطه) مضاوي : فشلتنا هالمنار .. شوفي شلون تفحط بالعربية وماخذه راحتها كأنها ببيتها هيفا التفتت عليهم وقعدت تضحك (شوي وتجي غادة تركب مع رهف .. ومنار تدفهم وهم متحمسين وكل الي بالسوبر ماركت يضحكون عليهم) منار وهي توقف العربية : غدوش انزلي وخليني اركب وانتي دفينا غادة وهي تنزل : اوكي (بعدين تبادلت منار وغادة وصارت غادة تفحط فيهم بس انقلبت العربية ومنار طاحت على الأرض ورهف طارت عند العصيرات) منار كانت تحاول تقوم بس مو قادرة من الضحك .. وغادة تضحك عليهم ورهف قاعدة تصيح منار بعد ما خلصت ضحك : امشو نركب مره ثانية غادة وهي تزين العربية : يلا رهف وهي تمسح دموعها : لحضة بركب (بعد ما ركبت منار ورهف صارت غادة تفحط فيهم وراحت لجهة مضاوي وهيفا وصقعت بهيفا صقعة قوية) هيفا بالم : آآآآآآه .. وش ذا المزح يالبقر ! منار وهي تضحك : وانتي دايم تصير الاصابات فيك ؟ هيفا وهي تقوم وحاطه يدها على ضهرها : من هبالكم والله غادة : لا مشاءالله عليك يالمؤدبة .. الي يسمعك يقول مضاوي مضاوي وهي رافعه حاجب : تراني هنا على فكرة منار وهي تنزل من العربية وتنزل رهف : امشوا نحاسب ونرجع قبل ما تغيب الشمس البنات : يلا (خلال ربع ساعه كانوا البنات بالبيت وآذن المغرب وصلوا بعدين رجعوا يكملون سوالفهم) غادة : بنات شفتوا هذاك الي كان واقف يحاسب لنا ؟ البنات : ايه غادة : يجنن يا بنات .. آآآآآه بس ودي اتزوجه مضاوي : ترا فيه بنات هنا ..(تقصد رهف) غادة بغباء : ادري اننا بنات .. ليش شايفتنا عيال ؟ مضاوي : ادري اننا بنات .. انا اقصد البنات الي جالسين غادة بنفس الغباء : وش فيهم ؟ مضاوي : منار صغيرة على هالكلام عشان تقولينه قدامها (منار طيرت عيونها) غادة الي فهمت ان مضاوي تقصد رهف : اها .. لا تخافين عليها تعرف اكثر مني ومنك مضاوي بفهاوة : هاه ؟ غادة : ذاك اليوم دخلت غرفتها وشفتها تشوف بعض الصور ويوم شافتني خبتها .. وانا لقافتي ما تسمح لي اسكت يوم دورت بغرفتها وشفت الصور اكتشفت انها صور لاعبين مقصصتها من مجلات بدر وماجد .. بس والله يا عليها ذوق ؟ صدق تعرف تختار مضاوي : هههههههههه .. كل هذا يطلع من تحت راس رهيفه رهف بقرف : وشو رهيفه ؟ .. شوهتي اسمي ..(بدلع).. سميني رهوفه مضاوي بسخرية وهي رافعه حاجب : طيب يا رهوفه منار : اقول بنات البنات : هلا منار : شرايكم نهبل بالشباب زي ذاك اليوم ؟ البنات : لااااااا مضاوي : بعدين نتوهق مثل هذيك المره هيفا : بعدين مالي خلق منار باسلوب يلا يقبل النقاش : يلا عاد البنات باستسلام : اوكي منار : شوفو الخطه الي بنسويها ..(اجتمعوا البنات حوالين منار الي كانت تقول لهم خطتها) منار : خلاص ؟ البنات : اوكي منار : يلا رهف روحي لهم رهف وهي تقوم : اوكي ..(راحت رهف للشباب ودخلت عليهم وقالت لهم انها تبي تسلم عليهم وفعلا سلمت عليهم وقعدت تتميلح شوي على تركي بعدين وهي طالعه سحبت المفتاح بدون ما يحسون وجابته للبنات) رهف : خذو المفتاح منار وهي تاخذه : بنات انتظروني هنا بروح اقفل عليهم وانتي يا غادة جهزي الي قلت لك عليه غادة : اوكي .................................................. عند الشباب كانوا جالسين يسولفون وقطع عليهم رنة جوال نايف نايف : الو .. هلا فيصل ..(وقام عشان يطلع برا الخيمة) .................................................. الحُـبُ رُوحُ الكــوْن لـوْلاهُ لمـا عاشـتْ به الأحْـياءُ بضْـع ثوانـي الحُـبُ ينْبُـوعُ الحيــاة تفجـرتْ مـنْ راحتيْـه سـعـادةُ الأكْـوان عند البنات (نزلت منار مثل الصاروخ لتحت ووصلت قدام باب الخيمة الي كان مسكر وكانت بتمسك الباب عشان تقفلة بس انفتح الباب وطلع منه نايف الي كان يكلم ولا انتبه لمنار .. اما منار ما قدرت تتحرك من الخوف) التفت نايف وراه وانصدم بالملاك الي شافه قدامه منار بارتباك : انـ.... انا ما كنت نايف بمقاطعه : عارف..عارف .. روحي قبل ما يطلع واحد من الشباب ويشوفك منار : بس انا نايف بمقاطعه : قلت لك عارف .. ادخلي بسرعه (راحت منار ركض ودخلت جوا الفله) اما نايف .. آآآه يا نايف من شاف منار نسى انه كان يكلم فيصل الي كان يتكلم بالجوال وينادي باسم نايف وهو رايح باله بعييييد (طبعا فيصل قطع الخط ونايف دخل عند الشباب وجلس معهم بس كان عقله رايح بعيد .. رايح عند منار) نايف :"شكلها من قريب احلا بكثييييير .. عيونها الواسعه الخضرا الي تميل للون الرصاصي ولا شعرها البني ولا خدودها المورده ولا ايش ؟ .. هذي مو انسان هذي ملاك .. بس حرام علي افكر فيها !! .. البنت طلعت قدامي بالغلط وانا افكر فيها صدق اني ما استحي" ............................................... عند منار (دخلت الفله وقلبها يطق بقوة لدرجة انها صارت تسمع صوته .. حطت يدها على قلبها وكأنها تحاول تخليه يوقف ينبض بهالسرعة الجنونية .. شافتها غادة واستغربت حالتها راحت لها وسحبتها وجلستها على الكنب الموجود بالصالة) غادة بخوف : منار بسم الله عليك شفيك ؟ منار بخوف وتوتر وهي بالموت تتكلم : شـ..... شافني غادة : مين الي شافك ؟ منار : نـ..... نايف غادة : هئئئ .. بعدين شسويتي ؟ منار : كــ..... كنت بقول له اني طلعت له بالغلط بس هو قال لي عارف عارف ودخلني الفله غادة : طيب ليش خايفة ؟ .. على بالي هزأك ولا شي منار : لا ما سوا شي بس ..(خذت يد غادة وحطتها على مكان قلبها).. بس قلبي احسه بيطلع من مكانه من قوة النبض غادة : ههههههههههه .. من جد منار بقهر : انتي وين وانا وين غادة بجدية : لا صدق .. ليش كذا يطق ؟ منار : شايفتني ادري يعني ؟ غادة : طيب دقيقة بجيب لك موية باردة منار : ايه تكفين (بعد ما جابت غادة الموية لمنار ومنار شربتها) منار : الحين احسن غادة بنص عين : تصرفك هذا يدل على شي واحد بس منار : وشو ؟ غادة بابتسامه واسعه : انتي تحبين نايف منار الي انقلب وجهها طماطة قالت بصوت عالي وهي منحرجة : غــــــــــــــادة غادة : هههههههههههههه .. يعني صح علي منار بخجل : ايه .. بس لا تقولين لأحد .. لأن حتى فيهو وداوي ما يدرون غادة : اوكي لا تخافين ..(وهي تغمز لها).. والله وصرتي تستحين يا منار منار خدودها ولعت من الاحراج : خلاااااااص غادة : ههههههههه .. بس هو بعد يحبك ؟ منار سكتت لحظة عشان تفكر بعدين قالت : مدري غادة : طيب يلا امشي نروح للبنات عشان ما يشكون منار : بس ترا ما قفلت باب الخيمة غادة : اوكي مو مشكلة نقول لهم اننا غيرنا راينا منار وهي تقوم : اوكي ......................................نهاية البارت...................................... مقتطفات من البارت القادم : 1- .... : والله ..(بضحكه).. حتى بالسوبر ماركت قعدت غدوش تدفني انا ورهف بالعربية وانقلبت وانا طحت على الارض ورهف طارت عند العصيرات 2- .... : شف نايف مو معنى وقاعد يفكر وكل شوي يوزع ابتسامات كأنه موب صاحي 3- .... بقهر : انا ودي اعرف وين حطها ؟ .. ما بقي مكان بالغرفة ما فتشنا فيه !! مين اللي قال هالجمل ؟ انتظر توقعاتكم على احر من الجمر كلمة اخيرة / للشيخ صالح المغامسي حفظه الله حكم وأقوال ونوادر لا تسمعها الا منه ومن جميل قوله: ((مَا ارْتـَفَعَ شَيءٌ إلى السّمَاءِ أعْظَمُ مِنْ الإخْلاصِ ,. وَمَا نَزَلَ شَيْءٌ إلَى الأرْضِ أعْظمُ مِنْ التـّوْفِيْقِ وَبِقَدْرِ الإخْلاصِ يَكُوْنُ التـّوْفِيْقُ )) نسأل الله أن يبارك به وبجهوده وأن ينفع به الإسلام والمسلمين