بنات الجيران - الفصل 6 - بقلم noufy 1999 | روايتك

البارت (6) قلة الدين و قلة الأدب وقلة الندامة عند الخطأ وقلة قبول العتاب أمراض لا دواء لها (مشت منار والخوف يملا قلبها ومرت من جنبها سيارة فيها شباب ويوم انتبهو لها رجعو السيارة على ورا وصارو يتحرشون فيها وهي ميته من الخوف) الشاب (1) : يا حلو عطنا وجه منار بقوة مصطنعه : اذلف عني لأفقع وجهك الحين الشاب (2) : اموت على القوية انا منار بعصبية : وبعدين معكم ؟ .. انتم ما تشوفون وجيهكم عشان تغازلون ياقليلين الأدب ! الشاب (3) : وش فيها وجيهنا ؟ .. لا يكون ما اعجبت القمر ؟ منار : .......... (مشت بدون ما تعلق ولما حست ان سيارة الشباب وقفت ونزل منها واحد لا اراديا راحت للبيت الي جنبها ورنت الجرس وصارت تطق باب البيت بقوة) .................................................. ............. ببيت فهده+رندى كانوا البنات يسولفون ونسو منار فهده : اقول بنات وين منار ؟ .. كل هذا قاعده بالحوش ؟ شهد : هي مو بالحوش انا كنت راجعه من المطبخ وشفتها تاخذ عبايتها مضاوي : شكلها رجعت للبيت خلوها شوي وترجع (كملو البنات سوالفهم وما فكرو ان منار بطبيعتها الجريئة ممكن تتهور) .................................................. .................................. عند الشباب .. كانوا مجتمعين ببيت فيصل+نايف كل الشباب ما يعرفون وين فيصل .. نايف كان بقمة التوتر حاولو يتصلون على فيصل بس ما كان يرد ! .................................................. ................................... اقسي الأوقات عندما تكون عند أناس نزعت الرحمة من قلوبهم فلا يرحمون ضعفك ولا بكائك عند منار صارت تطق باب البيت الي قدامها بقوة وترن الجرس .. والشاب الي نزل من السيارة كان يمشي بأتجاهها الشاب مسك يدها وقال بكل وقاحة : تعالي معنا يا عسسسل منار بصراخ : اتركني يا حقير (شوي وينفتح باب البيت الي كانت منار ترن الجرس حقه ولا اراديا منار دخلت جوا البيت وسكرت الباب) (طبعا الي فتح الباب كان شاب وكان مستغرب من منار ويناظرها نظرات استغراب) منار كانت تبكي وما استوعبت الي يصير وما تناظر شي قدامها من الدموع الشاب : وش جابك هنا ؟ منار وهي ترتجف من الخوف : كان في شباب يتحرشون فيني ويبون ياخذوني معهم الشاب : اها .. طيب وين اهلك ؟ منار بخوف : اهلي ما يدرون عني الشاب ابتسم بخبث وقال : طيب تفضلي جوا البيت عشان تتصلين عليهم منار : لا الشاب : لا تخافين امي واختي بالبيت (دخلت منار البيت بتردد والشاب دخل وراها) كان اثاث البيت قديم ومكسر وريحة البيت خايسة الشاب قفل الباب الي يودي لبرا .. التفتت منار وقالت بخوف وصوت يرتجف : ويـ...ن امـ....ك واختـ.....ـك ؟ الشاب بأبتسامه خبيثة وهو يقرب من منار : موب لازم تشوفينهم .. احسن نقعد مع بعض شهقت منار بخوف وصارت تركض بالبيت وتهرب منه وهو وراها .. دخلت وحدة من الغرف وقفلت الباب وكانت الغرفة مليانة اكياس وجوا هالأكياس حبوب بجميع الاشكال والالوان وبعض الأكياس كان فيها ابر وبعضا بودرة عرفت منار انها ومليون بالمية مخدرات .. زاد خوفها عن اول لأن اكيد الي بيتاجر بالمخدرات بيكون ما فيه خير .. فتحت شنطتها وصارت تدور جوالها وما لقته .. اكتشفت انها ناسيته وزاد خوفها وصارت تدعي ربها انه يستر عليها الشاب صار يطق الباب بأقوى ما عنده ومنار متكورة على نفسها بزاوية الغرفة وتبكي الشاب بصراخ : افتحي ولا بكسر الباب فوق راسك يا بنت الكلب .. افتحي منار تبكي : ........... الشاب : انا اعرف انك هنا .. افتحي بسرعه ولا بتشوفين شي موب زين منار وهي تبكي : الله يخليك لا تسوي فيني شي .. انا بطلع وما راح تشوف وجهي مره ثانية بس لا تلمسني الشاب بوقاحة : ليش شايفتني غبي ؟ .. تجيني بنت برجولها واتركها تروح .. لا يا قلبي .. الحين بتطلعين ولا شلون ؟ منار تبكي وتدعي بنفس الوقت : ........ .................................................. .... عند البنات مضاوي كانت طول الوقت جالسة ومتضايقة غادة : مضاوي شفيك ؟ .. شكلك متضايقة مضاوي : انا قلبي يعورني .. احس منار فيها شي هيفا : لا ان شاءالله ما فيها شي تلقينها جالسة بحديقة بيتكم ومروقة مضاوي بتوتر : لالالالا .. اختي فيها شي انا متأكدة اختي فيها شي فهده والخوف بدا يدخل بقلبها : خلونا ندق عليها عشان نتطمن ريم وهي تتصل : اوكي (سمعو نغمة جوال يرن وشافو جوال منار على الطاولة) مضاوي الي بدت تبكي : اختي فيها شي انا متأكدة رندى بتوتر : مضاوي لا تبكي ما فيها الا العافية انشالله .. فهده دقي على بيت مضاوي ومنار بسرعه (فهده خذت جوالها واتصلت وردت الخدامة) فهده : روز (الخدامة) وين مس منار ؟ روز : مس منار في بيت مس رندى فهده بتوتر : روحي تأكدي روز : اوكي ..(راحت تدور بالبيت اذا منار موجودة بس مالقتها) روز : مافي موجود فهده : نعم !! ..(سكرت بوجهها والتفت على البنات وجهها واضح عليه الخوف) .................................................. ..... عند منار كانت تبكي وتدعي .. والشاب ما رحم ضعفها .. كانت افكار منار متشتته .. والشاب كانت افكاره خبيثة (صار الشاب يطق الباب بقوة وشوي ويكسره من قوة الطق ومنار تسد اذنها وتبكي ما تبي تسمع صوت الطق .. ما تبي تعرف اذا ممكن شرفها يضيع بلحظة .. بس لأنها تهورت) انكسر الباب ودخل الشاب وهو يناظر منار بنظرات خبيثة .. منار تكورت على نفسها اكثر وصوت شهقاتها يتعالى شافت جنبها حديدة خذتها بسرعه وضربت الشاب فيها مع راسه .. طلعت من الغرفة ركض وحاولت تفتح الباب الي يطلع للحوش بس كان مقفل .. رجعت للغرفة الي كانت فيها وشافت الشاب مغمي عليه وكله دم .. خذت الحديدة وطلعت بسرعه وصارت تطق الباب بالحديدة لحد ما انكسر وطلعت وفتحت باب الشارع وصارت تركض وتركض وتركض لحد ما ابتعدت عن البيت .. زينت لثمتها وصارت تمشي بين الحارت خايفة وتشكر ربها انه ستر عليها شافت ساعتها واكتشفت ان باقي على اذان المغرب 10 دقايق بس .. صارت تمشي وتدور بعيونها الواسعه عن مسجد ولفت انتباهها مسجد راحت له وشافت واحد كبير بالسن يدخله .. اول شي جا في بالها انه الأيمام نادته منار وقالت منار : يا عم التفت الأيمام وصار يناظر منار بأستغراب انهارت منار على ركبها وصارت تبكي الايمام : وش فيك يا بنيتي ؟ منار من بين شهقاتها : ابي مضاوي .. ابي مضاوي الايمام : منهي مضاوي يا بنيتي ؟ منار وهي مستمرة بالبكي : جيبولي مضاوي .. ابي اختي .. ابيها الايمام : بنجيب لك اختك .. بس من انتي ؟ .. وين بيتكم ؟ منار : ما ادري انا ضايعه الايمام : طيب يا بنيتي اهدي .. الصياح مهوب نافعك منار مسحت دموعها وصارت تناظر الايمام بنظرات بريئة الايمام طلع جواله واعطاه لمنار : خذي دقي على اهلك منار خذت الجوالها ودقت على مضاوي .................................................. ........... عند البنات رن جوال مضاوي مضاوي : بنات رقم غريب غادة : ردي يمكن تكون منار (ردت مضاوي بلهفة وقالت) مضاوي : الو منار : مضاوي مضاوي : منــــــار منار وهي تبكي : مضاوي تعالي خذيني ابي ارجع البيت .. تكفين تعالي انا محتاجتك مضاوي بخوف : اهدي يا منار اهدي .. انتي وينك ؟ وانا الحين بجيك منار : ما ادري مضاوي : ما عندك احد تسألينه ؟ منار : الا لحظة .. يا عم احنا وين ؟ الايمام : حي الــ....... شارع الــ........ اول لفه عند المسجد منار : حي الــ....... شارع الــ........ اول لفه عند المسجد مضاوي وهي تسجل الوصف عندها : اوكي الحين بنجيك .. خليك مكانك لا تتأخرين منار : اوكي مضاوي : يلا مع السلامة منار : مع السلامة (سكرت الخط ومدت الجوال للايمام) الايمام : بيجون اهلك ؟ منار : ايه الايمام : طيب روحي للمسجد حق الحريم .. تلقينه مفتوح لاني قلت لهم يفتحونه عشان التنظيف منار : اوكي .. شكرا الايمام : هذا واجب يا بنيتي (راحت منار للمسجد حق الحريم وتوظت وصلت المغرب يوم آذن وجلست تنتظر مضاوي) .................................................. . عند البنات مضاوي : قلت لكم اختي فيها شي غادة : بدق على ماجد يجي ياخذنا مضاوي : بسرعه تكفين غادة : الو ماجد ماجد : هلا غادة غادة : ماجد بسرررعه تعال لبيت رندى وفهده عشان ...... ماجد بمقاطعه : لا تكملين انا مشغول الحين ...... غادة بمقاطعه : ماجد ضروري مضاوي منهارة و........... ماجد بمقاطعه : شفيها مضاوي ؟ غادة : منهارة لان منار ضايعه ماجد : الحين بجيكم البسو عباياتكم غادة : اوكي ..(بعد ما سكرت الخط).. يلا مضاوي البسي عبايتك قامت مضاوي هي وغادة ولبسو عباياتهم ................................................. عند الشباب ماجد وهو يقوم : نص ساعه بالكثير واكون عندكم تركي : ليش وش صاير ؟ ماجد : لا بس منار ضايعه واتصلت على البنات وقالت لهم يجونها وبروح اجيبها نايف لا اراديا : منار ضايعه ؟ احمد بتفكير وهو يتذكر : يعني منار هي الي طلعت من بيتنا ذاك الوقت ماجد : مدري..مدري .. يلا انا بروح لهم نايف وقف وقال : انا بروح معك ماجد بدون اهتمام : يلا بسرعه راح نايف مع ماجد وجابو غادة ومضاوي وراحو للمكان الي فيه منار ماجد بإهتمام : لا تخافين ان شاءالله بنلقاها مضاوي والعبرة خانقتها : ان شاءالله (بعد ما وصلو للمسجد) نزل ماجد من السيارة وشاف الايمام وسأله اذا شاف بنت وقاله الايمام انها بالمسجد حق الحريم .. رجع ماجد للسيارة مضاوي بخوف : وينها ؟ .. ليش ما جبتها معك ؟ ماجد : لا تخافين هي بالمسجد حق الحريم .. انزلو نادوها نزلت غادة ومضاوي وراحو ركض للمسجد حق الحريم وشافو منار .. منار راحت على طول تبكي بحضن مضاوي غادة : يلا خلونا نرجع للسيارة (رجعوا للسيارة وركبوها وراحو لبيت رندى وفهده ونزلو فيه واول ما شافو البنات منار راحو يحضنونها ويعتذرون منها وهي كانت تبكي لأن الخوف من الشاب الي تحرش فيها كان للحين مزروع بقلبها) ريم : اهدي وقولي لنا كل شي بالتفصيل (منار ناظرت شهد ورهف يعني انها ما تقدر تقول وهم موجودين) رندى : شهد .. رهف .. روحو مع الخدامة للبقالة وجيبو لنا حلويات وشبسات شهد+رهف بحماس وهو يركضون : اوكي هيفا : الحين قولي لنا كل شي بالتفصيل الممل منار قالت لهم كل شي من يوم ما طلعت من البيت لحد ما خذوها غادة ومضاوي فهده : الحقير .. لو اني شايفته كان عطيته كف يعدل ملامح وجهه منار وكأنها تذكرت شي : بنات البنات : هلا منار : هو كان تاجر مخدرات البنات بصدمه : نعم !! منار : والله .. الغرفة الي كنت فيها كانت كلها اكياس بودرة وابر وحبوب هيفا : لازم نبلغ عليه غادة : واذا سألونا مين نكون وش بنقول ؟ هيفا : بنقول فاعل خير غادة : طيب يلا اتصلو رندى : بس احنا ما نعرف وين البيت ! منار : انا اتذكر وين البيت رندى : اذا كنتي تعرفين وين البيت .. ليش قلتي انك ضايعه ! منار : انا صدق كنت ضايعه ! .. لأني وقتها كنت ميته من الخوف ونسيت كل شي رندى : اها هيفا وهي تتصل : اسكتو الحين بدق ومنار هي الي بتكلم منار : اوكي منار : الو واحد من المباحث : هلا اختي منار : اخوي انا عندي بلاغ عن تاجر مخدرات الرجال : وش اسمه ؟ منار : ما اعرف الأسم .. بس انا اعرف مكان البضاعه الرجال : وين المكان ؟ صارت منار توصف المكان للرجال الرجال : مين معي ؟ منار : فاعلة خير ...(وسكرت الخط) .............................................. (باليوم الثاني) ببيت منار+مضاوي كانو يفطرون مع ابوهم وهو كان يقرا الجريدة وفجأة قال خالد : لا حول ولا قوة الا بالله مضاوي : شسالفة ؟ خالد : امس مسكوا تاجر مخدرات .. لقوه فاقد الوعي ولما قام اعترف لهم بكل شي .. وبنفس الحي اللي احنا ساكنين فيه منار تقلب وجهها الوان ومضاوي حاولت تغير الموضوع مضاوي : ااااا .. اليوم بجي ابو هيفا صح ؟ منار : ايه خالد باستغراب : محمد بيرجع ؟ منار+مضاوي : ايه خالد : غريبة .. وش عنده جاي بدون مناسبة ؟ مضاوي : مدري .. هيفا تقول بيقعد اسبوع ويرجع يسافر مره ثانية خالد : اها ........................................... ببيت هيفا كان البيت كله حوسه .. والخدم رايحيين جايين ينظفون البيت وام تركي تشرف عليهم .. وهيفا كانت جالسة بغرفة تركي تتكلم معه هيفا : مدري وش بسوي اذا جا ابوي ! تركي : وش بتسوين يعني ؟ .. هيفا .. تراه يظل ابونا حتى لو كان مهملنا هيفا : اعرف .. بس شكلي بجهز لي شنطة واحط فيها كتبي واغراض المدرسة وكل الأشياء الي احتاجها لمدة اسبوع واروح لبيت وحدة من البنات تركي : سوي الي تبينه .. محد ماسكك هيفا بقهر : انت طبيعي تتكلم بهالبرود .. لأنك طول الوقت برا البيت وماراح تفرق معك اذا ابوي موجود او لا تركي بملل : هيفا .. انتي قلتيها بنفسك .. ماراح تفرق معي اذا موجود او لا .. بعدين انا موب فاضيلك .. ما يكفي فيصل الي من امس ما ندري عنه هيفا بصدمه : شفيه فيصل ؟ تركي وهو يقوم : مختفي من امس .. اطلعي بغير ملابسي عشان اروح عند نايف ندور عليه هيفا وهي تطلع من الغرفة : اوكي .................................................. .... ببيت ريم كانت جالسة هي وشهد يناظرون التلفزيون وفارس يتطنز عليهم .. وعبدالعزيز يهبل فيهم كل شوي مغير القناة ريم بعصبية : عزووووووز خلاص عاد عبدالعزيز قاعد يضحك عليها ويعاندها فارس وهو يشد خدود شهد : بزراااااان وربي ما ينقص الا يبكون شهد : آآآآآه .. فك خدودي تراك تعور فارس : ههههههههههههه ريم وهي توقف قالت بحركة طفولية : بروح اشوف المسلسل بغرفتي ..(وطلعت وشهد لحقتها) فارس+عبدالعزيز : ههههههههههههههههههههههه .................................................. ........... ببيت غادة كانت تحل واجباتها ورهف عندها تلعب غادة : رهف خلاص اطلعي برا ما اعرف اركز رهف وهي تطلع : افف منك .. انتي اسوأ اخت شفتها بحياتي غادة بملل : انقلعــــــــي رهف وهي تطلع قالت بقهر : بزر غادة رفعت حاجب على كلمتها ورجعت تكمل واجباتها .................................................. ............... ببيت رندى+فهده رندى كانت تفطر مع امها وابوها وجدتها واحمد فهده كانت نايمــــــة وما تدري عن الدنيا .. لو تتفجر كل قنابل العالم ما درت .................................................. ........... أخوي لاضاق الفضاء والدهر شان يبقى على طول الليالي عضيدي أضرب بسيفه هيبة الإنس والجان وأسقيه لامنه ضما من وريدي ببيت نايف+فيصل نايف كان مرهق بكل معنى الكلمة .. والشباب كانوا لمهم عنده احمد : ان شاءالله بنلقاه نايف+الشباب : ان شاءالله (شوي ويرن جوال نايف ويرد) نايف بصوت ملهوف : الو .. فيصل فيصل : هلا نايف .. انت وينك فيه ؟ نايف : بالبيت .. انت وين كنت ؟ .. انا والشباب لفينا الرياض كلها ندور عليك ! فيصل : كنت بالشرقية نايف بصدمة : الشرقية !! فيصل : ايه .. جلست على البحر طول الوقت نايف : وانت وينك فيه الحين ؟ فيصل وهو يناظر الحرم : انا بمكه نايف : مكه ؟ فيصل : ايه نايف : تستهبل ؟ فيصل : لا نايف : طيب ارجع بسرعه فيصل : لا ماراح ارجع نايف : ليش ؟ فيصل : وين اروح وابوي متبري مني ؟ نايف : طيب على الأقل بالرياض تكون قريب مني فيصل بهدوء : بس بمكه يرتاح قلبي .. نايف انا بقعد هالفترة على الأقل بمكة نايف : والجامعه !! فيصل : الي يسمعك يقول اني دافور وما افوت ولا محاضرة .. انا من الاساس ساحب عليها ماراح يضر لو سحبت عليها الحين نايف تنهد وقال : براحتك .. بس وش لون بتصرف على نفسك ؟ فيصل : عندي الي يكفيني .. ولا نسيت ان ابوي كان اهم شي انه يصرف علينا والباقي بالطقاق ؟ نايف : انت ما عندك ملابس ولا شي ! فيصل : اليوم رحت وشريت لي كم بلوزة وبنطلون وفصلت لي كم ثوب نايف : يعني شكلك مطول فيصل : مدري .. بس يمكن اقعد اسبوع وارجع نايف : خلاص مافي مشكلة .. بس اتصل علي كل يوم فيصل : ان شاءالله نايف : مع السلامة فيصل : مع السلامة ..(وسكرو الخط) تركي : هذا فيصل ؟ نايف : ايه فارس : وينه فيه ؟ نايف : بمكه .. بيقعد فيها اسبوع وبيرجع عبدالعزيز تنهد براحة وقال : الحمدلله تطمنا عليه وتأكدنا انه بخير الشباب : الحمدلله ........................................... عند فيصل دخل الحرم بعد ما سكر من اخوه .. صلى تحية المسجد قدام الكعبة وقعد يدعي على مرة ابوه من كل قلبه "وقفة خارج النص" (وكلنا نعرف ان دعوة المظلوم مستجابة والدليل قوله تعالى {ولو أن لكل نفس ظلمت ما فى الأرض لافتدت به وأسروا الندامة لما رأوا العذاب وقضى بينهم بالقسط وهم لا يظلمون} عشان كذا لازم ننتبه من الظلم .. صدقوني في آيات كثيييرة لنصرت المظلوم وجزاء الظالم ولو احطها كلها بتقعدون لين بكره تقرونها فحبيت اختصر عليكم بهالآية .. عموما ان شاءالله ما نكون لا ظالمين ولا مظلومين) ......................................نهاية البارت...................................... مقتطفات من البارت القادم : 1- .... بتردد : عـ... عمرك حبيتي ؟ 2- .... بصدمة : تزوجت علي ؟!! 3- .... بخوف وتوتر وهي بالموت تتكلم : شـ..... شافني مين اللي قال هالجمل ؟ انتظر توقعاتكم .. كلمة اخيرة / العبد ينبغي أن يعلم أن خزائن الله لاتُحصى، وفضله تبارك وتعالى لا يُعد، فليفزع إلى الله جل وعلا، العبد، وليظهر ذلته وفقره ومسكنته إلى الله، وليُصاحب ذلك العمل صالح. للشيخ / صالح المغامسي