الفصل 25
روايــة #صغار_العم
الــحـلـقــة الــخامــسَـة و الـعــشــرون 🌸
( الأَخــيــرَة ❤️)
" الجزء الأول "
عصام شاد يوسف ف حجره و ايديه دم : تحمل يا يوسف تحمل
يوسف فتح عيونه و يتكلم داهش : هناء .. هناء يا عصام حطوها في عيونكم ... ردو بالكم عليها
عصام قنط ع الجرح و داهش : اسكت و ماتعبش روحك بالكلام اسكت
__________________
محمود يجري بالسيارة و منهار : لا يارب لااااا ... لا يارب لاااااا ... الا يوسف لا يارب لا لا لا لالا
محمد يجري وراه و يغيرله ف الضي و يكلكس : اوقف يا محموووووود .... اوقفففففف
محمود يجري و مش حاس بيه و هو منهار و مصدوم
فجأة يلقى روحه خاش في الطريق العكسية و تقابله سيارة جاية
محمد يشوف فيه و يعيط : محمووووود !!! اوقف يا محمووودددد
و شاد ع الكلاكس
محمود من سرعته يخش في السيارة و يصير حادث شنيع
محمد يشوف فيه و يعيط : لاااااااا !!!!!!
محمود لادت بيه السيارة في مكانها من قوة الحادث و فقد وعيه
درس محمد سيارته و نزل يجري ؛ فتح على محمود الباب لقاه مغمي عليه راسه طايح ع الدومان و وجهه دم
ايديه ارتبطو و معش عرف يتصرف ؛ شد راسه و قعد يشوفله
نزل صاحب السيارة التانية اللي خش فيها محمود متدمدم
محمد شبحله ......
___________________________
اصيل واقف قدام الخيمة و يتصل بهناء ..
__
سلسبيل شادة في ايد مهاب و راكبة لحوشها
هناء تشوفلها و مبتسمة
سمعت تليفونها يشرين ردت : الو
اصيل متفركس : اطلعيلي نراجي فيك
هناء : يوسف وين
اصيل تلخبط : طلع هو و اشرف و قالي نروح بيك
هناء استغربت : وين مشي توا !!
اصيل سكت
هناء : نتصل بيه ونعاودلك
اصيل علّا صوته : تي اطلعيلي يا هنااااء !!
هناء مستغربة : باهي
و سكرت الخط
سعاد شبحتلها : يوسف اللي كلمك !
هناء : هذا أصيل
سعاد وقفت : انى جيت معاه كان هذا خلينا نطلعو مع بعضنا
هناء : يوسف قالي ماتطلعيش لين تكلميني لكن أصيل قال طلع مع اشرف و انه هو اللي بيروح بيا
سعاد : باهي على كيفه روحي معانا للحوش و بعدين ساهل .. المهم ماتروحيش بروحك
هناء تلبس في عبايتها : اصلاً ماعنديش مفتاح
مرام شبحتلهم و وقفت تلبس هي و اللي معاها
________________
وصلو صحاب يوسف المستشفى و نزلوه مع عصام
________________
وقفت هناء فم الخيمة لقت أصيل واقف يراجي فيها
هناء : اصيل ؟؟؟
اصيل قرب منها : هي اطلعي معاي
هناء طلعت و حست بحركة غريبة ف الشارع بس مافهمتش كويس من دوشة المولدات لان الضي هارب
اصيل : وين مرت عمي ؟
هناء : جاية وراي
اصيل : و حتى مرام بنروح بيها معانا لان عصام طلع
هناء استغربت و ركبت السيارة
أصيل شبح سعاد طالعة هي و مرام و امال
كلمهم : تعالو معاي
سعاد : هاني جاية هي
امال : عمك منعم هني .. انى بنروح لحوشي طول
اصيل سكت و امال ركبت مع راجلها
مرام اتدور بعيونها : عصام وين ؟؟
أصيل قرب منها : غر اركبي السيارة كلهم يشوفولك
مرام : عمك وين !!
أصيل : طلع و وصاني نروح بيك
مرام سكتت و ركبت معاه هي و سعاد
_
هناء ف السيارة فاتحة تليفونها و تتصل بيوسف ..
استغربت انه ماردش عليها
ركبو أصيل و مرام و سعاد و طلعو
هناء شبحت لأصيل : ماقالكش وين مشي ؟
اصيل سكت
هناء علّت صوتها : قولي يا أصيل وين مشي !!! انى سمعت الرجالة شن يقولو لما ركبت السيارة ماتدسش عليا !!
سعاد انشغلت : خيركم ؟؟
هناء : سمعتهم يقولو ان شاء الله ينوض منها إصابته خطيرة
سعاد شهقت : من هو ؟!!!!
اصيل يسوق و ساكت
هناء : اصيييييل !!!!
مرام فاتحة تليفونها و تتصل : حتى عصام نتصل بيه مايردش
هناء شبحتلها : حتى عصام مهناش !!
مرام : اصيل قالي طلع
هناء خافت و شبحت لأصيل : وين مشو ؟؟ .. اصيل تكلم !!
اصيل مرتبك : صاحب يوسف انصاب و رفعوه للمستشفى
سعاد شهقت : ووووه علياا وووه كان ما وليدي طرت فيه حاجة !!!
أصيل سكت
هناء قلبها يدق : مني من صحابه ؟؟
أصيل : مانعرفش اسمه
هناء فتحت تليفونها و عاودت تتصل بيه : انى من الاول قتله فكنا من الرصاص
اصيل سكت و عيونه دمعو
مرام : و صاحبه شن صار فيه ؟؟ مات ولا شنو ؟؟
اصيل شاد بكيته : مش عارف
سعاد تبكي : الحمد لله اللي مش في وليدي ياربي الحمد لله
اصيل شبحلها ف المراية و زاد في السرعة
هناء سكرت تليفونها : علاش مايردش علااش !!
مرام فتحت تليفونها : تو نكلم عصام بالك يرد عليا توا و مرات يوسف مايسمعش فيه من الدوشة
_________
عصام مقعمز ف ممر المستشفى
يخمم و عقله مش معاه
سمع تليفونه يشرين طلعه من جيبه
لقاها مرام رد : الو
مرام : ايوه عصام شن اللي صار ؟
عصام سكت
مرام : صاحب يوسف شن وضعه توا ؟
عصام : صاحب يوسف !!!
مرام : مش الي انصاب صاحب يوسف ؟؟ هكي اصيل قال
اصيل شبحلها ف المراية و تخزرط ان هناء تحس بيهم
عصام : اه ايه ايه صاحب يوسف
مرام : باهي طمنا !! هناء تتصل بيوسف من بكري مايردش و هي مشغولة عليه
عصام : يوسف مشغول توا و مش حايرد قوليلها انه كويس و توا نروحو مع بعضنا ان شاء الله
مرام : باهي الي انصاب وين انصاب بالزبط و شن وضعه
عصام تنهد : انصاب ف صدره و وضعه خطير
مرام تأثرت : لا حول ولا قوة الا بالله ؛ ان شاء الله ينوض بالسلامة
عصام : يارب يارب .. انتي وين توا
مرام : مروحة مع اصيل
عصام : باهي تمام .. يزن خوديه من سنابل خليته عندها
مرام : ايه عارفة
فجأة يخش محمد يجري للمستشفى شاد محمود و يعيط ينادي ع الإسعاف
شبحله عصام انخلع و سكر الخط
مرام سكرت تليفونها و هناء شبحتلها : شن قالك ؟؟
مرام ...
_____
عصام قرب من محمد مخلوع : شن فيه ؟؟؟ خيركم !!!
محمد شبحله داهش : دار حادث
عصام شبح لمحمود وحط ايديه على راسه
حس ف لحظتها انه بيخسر صغار خوته في نفس الليلة و مش قادر ايدير شي
محمد علّا صوته : شن ندير يا عصاااام ؟!!
جو الإسعاف لمحمد خدو منه محمود
المسعف : شن سبب الإصابة ؟
محمد داهش : حادث سيارة
المسعف : و كم عمر المريض ؟
محمد : 19
المسعف خدي بيانات من محمد و مشي ..
محمد قعمز ع الكرسي حط ايديه على وجهه و بدي يبكي
عصام وقف جنبه متوتر
حط ايديه على كتفه و قاله : ماتبكيش بإذن الله ينوضو بالسلامة
محمد شبحله : يوسف !!! يوسف شن صار فيه ؟؟
عصام هز راسه : في العملية توا و ان شاء الله خير
محمد مسح دموعه بسرعة و نزل راسه : يارب
عصام : انت وين اختفيت ؟ و محمود كيف دار الحادث و كيف سمعت بيه ؟
محمد سكت
عصام : نكلم فيك !
محمد غمض عيونه : خلينا نتطمنو عليهم قبل
جي اشرف صاحب يوسف : يبو دم ليوسف من فيكم نفس فصيلته ؟
محمد وقف : شن هي ؟؟
أشرف : +B
محمد : محمود زيه ..؛ مفيش الا محمود
عصام فتح تليفونه : محمود بروحه مرات يبي دم
و اتصل بأصيل ...
أشرف فتح تليفونه : تو نشوف حد من معارفي بالك نحصل
و مشي بعيد يتكلم
عصام : مية مية
اصيل رد : الو
عصام : فصيلة دمك +B ؟
اصيل : ايه
عصام : حطهم و تعالى جري
اصيل : خمسة و نكون عندك
درس السيارة ف القراج و نزلو هناء و سعاد و مرام
هناء ركبت لحوشهم بسرعة و اصيل طلع ماشي للمستشفى
_
هناء اطق ع الباب فتحلها اسماعيل
هناء : بابا !
اسماعيل استغرب : شن جابك ؟
هناء : صار موضوع طويل عريض
اسماعيل يشوفلها : شن اللي صار ؟
( و شرين تليفونه )
لقاه عصام رد : الو
عصام : تعالى للمستشفى و ماتحسس حد من اللي معاك
اسماعيل انشغل : علاش شن صار ؟
عصام : تجي و تعرف استعجل يا اسماعيل و مدابيك معاك السنوسي
اسماعيل : ان شاء الله خير
سكر الخط و شبح لهناء : خشي انتي
هناء تشوفله : نبيك بنقولك حاجة
اسماعيل يدخل فيها للحوش : بعدين بعدين
هناء خشت و سكرت الباب
لقت سنابل مقعمزة ع الكنبة و منهارة بالبكي
هناء : سنابل ؟ خيرك ؟!
سنابل شبحتلها و ناضت ضبطتها : الحوش فضي علياااا 😭
هناء سكتت
سنابل تبكي : ماعمرنا تفارقنا انى و سلسبيل
من يومنا مع بعضنا هي توأمي و نصي التاني😭
هناء دمعت : هذي سنة الحياة حتى انتي بتتزوجي و بتعيشي باقي عمرك مع راجلك
سنابل : لكن انى مش توا .. هي استعجلت بزواجها شن صار لو زادت سنة ولا اثنين
هناء ابتسمت وشبحتلها : انتي بروحك كان تلقي تتزوجي محمد اليوم قبل غدوا
سنابل سكتت
هناء تمسحلها ف دموعها : اليوم كان يوم خطوبتك المفروض طايرة من الفرحة مش قالبتيها نكد
سنابل : و انتي شن جابك توا ؟ المفروض في حوشك مش هني
هناء تنهدت و قعمزت : ياناري صاحب يوسف انصاب في العرس و رفعوه المستشفى
سنابل انصدمت : حيييي مسكيييين
هناء : ايه ربي ينوضه بالسلامة وجعني مع اني مانعرفاش من يكون
سنابل : مش وقته الليلة
هناء : الله غالب
سنابل : قصدك الدخول تفركس !
هناء : لالا ؛ حتى مهاب ركب لحوشه و هو مايندريش ..؛ صارت الربكة بعد ماخش
سنابل سكتت
هناء : باهي اللي ماصارتش من الاول كان هذا سلسبيل رعشت و ماتمت فرحتها
سنابل ضحكت : زعما شن ادير توا 😍
هناء ضحكت و ضربتها بالمخدة : قليلة ادب
سنابل تضحك : باهي اللي جيتي ع الأقل تونسيني الليلة
هناء : ماما وين ؟
سنابل قعمزت بحداها : ف الدار ترقد في يزن
هناء : باهي خليها تتعود ع الشدان باش بعدين نلقى من يشدلي
سنابل ضحكت و طبست على بطن هناء تكلم في البيبي : امتى بتجي و تنوري عيلتنا يا حبيبة قلب خالتك انتي ؟ .. تجي و نشدك و نبوس خديداتك البودريات ! و نبوس ايدياتك الناعمات زي ايديات خالتك
هناء تسمع فيها و تضحك
سنابل توشوش : تجي و نديرو قروب واحد انى وياك باش نشيبو روس محمد و يوسف
هناء : انتي اللي بتضيعيها من اول عمرها عارفة
و سمعو باب الحوش يطق
سنابل ناضت و فتحت
مرام : وين وليدي ؟؟؟
سنابل : باهي اللي تفكرتيه 😂
مرام ضحكت : قلت نركب نغير قفطاني و بعدين ننزل ناخده
هناء شبحتلها : خشي خيرك ف الباب
مرام خشت : شنو قرمة ؟؟
سنابل : كيف بنبدو نقطعو 😂
طلعت نجاة من دارها شادة يزن : على قد مادرتله ماباش يرقدلي
مرام خداته منها : سامحيني تعبتك
نجاة : مافيش اجميل
مرام : شنو مافيش حد من العيلة بات عندكم ؟
نجاة : لالا .. انى مانحبش جو الحوسة و البيتان ياسر في عرس هناء ..؛ المرة هدي فهمو بروحهم
مرام سكتت و هناء تحشمت
سنابل فتحت تليفونها : انى بنشوف روان تجي تكسد معانا ...
نجاة شبحت لمرام : شن جو الدخول
مرام .....
_________
روان تتكلم ف التليفون : ماما قاعدة بروحها مانقدرش ننزل و نخليها
سنابل : خوتك و بوك وين
روان : احمد راقد و محمد و محمود مازال ماروحوش و بابا يمكن لوطا مع اجديده
سنابل : امممم .. باهي لو روحو انزلي باتي معاي
روان : اليوم كانت خطوبة خوي خليني نقرم و نقطع العروسة شوية مع ماما
سنابل تضحك : ياباردة
روان ضحكت : خلاص كان روحو بكري تو ننزلك
سنابل : حتى كان متأخر تلقيني ساهرة
روان : ان شاء الله كنتنا 😂
سنابل ضحكت : باي
روان : تشاو
و سكرت الخط
طلعت من دارها لقت امها واقفة تتكلم في التليفون مع محمد
ازهار : وينك انت و خوك ؟؟
محمد سكت و ماعرفش شن يرد عليها
ازهار : الو !
محمد خدي نفس : ساهرين مع الشباب و بنعطلو شوية
ازهار : روح انت وياه و فكني من تقوبيع الليل متعكم كان يسمع بوكم يبدا يعارك
محمد سكت
ازهار : تسمع فيا ولااا ؟؟ اليوم خميس روحو و فكونا من المشاكل
محمد : باهي يا امي حاضر ساعة و نجو ارقدي انتي
ازهار : ماتعطلوش
و سكرت الخط
روان : خيرك ؟
ازهار شبحتلها : سهور الليل ف الشوارع مانحباش و خوتك و تسكير الدماغ عاد
روان : فوتيهم اكيد ف راس الشارع مش بعاد
ازهار : انى خايفة على محمود تعرفيه متع مشاكل و مايهنيش ف روحه يعني لو جي حد من المردف و ناشبهم بينط فيه طول
روان : معاه محمد ماتخافيش عليه
ازهار متضايقة : مايكبر و نزوجه لين الشيب يعبي راسي
روان ضحكت : اهو محمد بيكبرك قبل وقتك بعد ماجابلك كنة
ازهار : يكبر عينه حانقعد ديما ست الصبايا
روان : هههههههههه
____________________________
وصل اصيل المستشفى لقي عصام يراجي فيه
أصيل : ها شن صار
عصام شده من ايده و خش بيه : يوسف محتاج دم خش حلل بسرعة
__
محمد واقف مع أشرف
اشرف : كلمت راجل اختي جاي حتى هو
محمد : باهي كويس لان محمود حتى هو يبي دم
سكت شوية و قال : حي ع النسوة !! بوي زيهم مش عارف كيف نسيته
و فتح تليفونه يتصل بيه ..
خشو اسماعيل و السنوسي مشغولين
لقو محمد واقف جوه
اسماعيل : شن فيه من اللي مريض ؟؟؟
محمد بدي يحكيلهم ف الي صار ..
___________________________
04:00 ص
سلسبيل طلعت من الحمام لقت الضي مازال هارب و المولد مسكر
شبحت لمهاب : علاش الحوش ظلام
مهاب : المولد تسكر توا
سلسبيل تكنطت : الجو رطوبة اليوم اكيد بنسخنو
مهاب كرها من ايدها و قعمزها ع السرير : انتي كيف دوشتي توا حاولي تسترخي و ترقدي مش حاتحسي بـ النو
سلسبيل اتكت بحداه و حطت راسها على صدره : انى مانتحملش الرطوبة و النو نقلق طول
مهاب : انتي تعبتي اليوم غمضي عيونك و ارتاحي
سلسبيل غمضت عيونها : قلبي مش مرتاح نحس في روحي ابصر كيف من غير اماليا
مهاب شبحلها : من اول ليلة هكي ؟
سلسبيل ضحكت : مش متعودة نبعد عليهم
مهاب حط ايده على شعرها : و من الليلة ان شاء الله معادش تقدري تبعدي عليا 😚
سلسبيل شبحتله و ضحكت ..
________________________
هناء راقدة في دار خواتها على سرير سلسبيل و تفكر مش جايها نوم
تتصل بيوسف مازال مايردش عليها
_
عصام شاد تليفون يوسف في ايده و متردد يرد عليها ؛ سكره و حطه في جيبه
_
هناء سكرت تليفونها و زادت انشغلت : باهي حتى لو صاحبه مريض مش معقولة مايكلمنيش بكل ؛ مش للدرجة هادي !!
اكيد فيه شي تاني و مايبوش يقولولي
قعدت تتقلب في مكانها و متضايقة
حست بيها سنابل شبحتلها : خيرك ؟
هناء شبحتلها : نحس في روحي مش مرتاحة
سنابل قامت راسها و فتحت السهارة : كيف مش مرتاحة
هناء : اول مرة نبات برا حوشي
سنابل ضحكت : فكينا من الجو عاد ، حني ماصدقنا بتي عندنا بعد ماتزوجتي بديري جو مش قادرة نبعد على راجلي ؟؟ 😂
هناء حطت ايدها على بطنها : ندوي بجديات .. قلبي مش متطمن من ناحية يوسف و حتى بنتي نفس الشي مش مرتاحة من بكري تتقلب تبي بوها
سنابل ضحكت و قعمزت تلم في شعرها : ايوااا بدينا ف الدلع 😂
هناء قعمزت : يوسف مايردش عليا يا سنابل زعما خيره
سنابل : حتى محمد كلمته مايردش اكيد مشغولين مع الراجل .. خليه و معش تتصلي بيه خير مايعاركك
هناء سكتت
سنابل وقفت : مدامنا ساهرين نمشي ندير سفرة مليحة و نكسدو عليها
هناء وقفت : به
سنابل مشت المطبخ و هناء خشت الحمام
____________________________
سلسبيل خداها النوم شوية و ناضت لقت روحها ساخنة
قعمزت تلم في شعرها و تمروح بيديها
مهاب حس بيها شبحلها : خيرك
سلسبيل : بنموت من النو خلاااص
و ناضت للحمام
مهاب لبس تيشرت و نزل الجنان بيشوف المولد لقي النافطة تامة
خش و ركب لحوشه
___
غسلت سلسبيل اطرافها و وجهها و طلعت من الحمام
خش مهاب الحوش لقاها راقدة ع البرسلين
ضحك : نوضي 😃
سلسبيل شبحتله : خلينييييي بنموت من السخونية خلااص
مهاب : نزلت توا بنفتح المولد لقيت النافطة تمت لان مفتوح من الصبح
سلسبيل قعمزت : خلاص معش فيها خلااااص
مهاب سكت
سلسبيل : بنرقد ف السيارة
مهاب : سيارة شني !!
سلسبيل مكشرة وجهها : انى معش نقدر نتحمل يا مهاااب 😩
مهاب : باهي شن تبيني نديرلك يا عيوني اصبرليك شوية اكيد الضي قريب يجي
سلسبيل خشت لدارها : خشش سيارتك للجنان و افتحلي المكيف يا اما بنموتلك الليلة
مهاب : لا اله الا الله .. معقولة عروسة تبات في السيارة ؟
سلسبيل تلبس في عبايتها : من قالك ماديرش احتياطك لـ لحظة زي هادي !!
مهاب قرب منها ..
سلسبيل وخرت : نو يا مهاب والله نوووو 😭
مهاب تكنطا : استغفر الله العظيم 😤
و خدي مفتاح سيارته : نشرينلك انزلي
سلسبيل سكتت و طلعت وشاحها تلبس فيه 😒
مهاب فتح الحوش و نزل
___________________________
سنابل وتت السفرة و فتحت تليفونها بتناشب سلسبيل
لقت تليفونها مقفل : خزي سخيفين الأدب 😒
خشت عليها نجاة : ماجاش خوك ؟؟
سنابل سكرت تليفونها وشبحتلها : لالا
نجاة بصوت واطي : كان نقولك شن الي صار
سنابل خافت : شني ؟
نجاة متنكدة : كلمني بوك قال محمود دار حادث و ف المستشفى توا
سنابل رعشت و شدت وجهها : و شن صارله ؟!!!
نجاة متأثرة : مسكين عنده كسور في رجله اليمين و ايده الزوز و متدمدم .. قالو احتمال تكون إصابته خطيرة لكن مازال مش متأكدين لين تطلع الصورة
سنابل رعشت و شدت راسها : ووووه علينااااا ووووه يا مامااااا
نجاة : و مش هكي و بس الكارثة الكبيرة ان يوسف هو اللي انصاب مش صاحبه
سنابل زادت رعشت و طاح منها التليفون : هييييييييييه 😱
نجاة فنصت فيها : اسكتي راهي تسمعك اختك
سنابل بدت تبكي : يا لها من ليلة مغبرررررة
خشت هناء للمطبخ : خيركم ؟
نجاة شبحتلها : شن نوضك توا ؟
هناء : ماجانيش نوم
سنابل : و يوسف شن صار فيه يا ماما قولي ؟؟؟
هناء جسمها صقع و قلبها دق : خيره يوسف !!
سنابل سكتت
نجاة شدت هناء من ايدها و قعمزتها ع الكرسي : مافيه شي قعمزي بس
هناء تكنطت و وقفت : معش تعاملوني زي الصغيرة تكلمو و قولولي خيره يوسف !! انى من الاول مش مرتاحة
و علّت صوتها و هي ترعش : يعني لو هو اللي انضرب قولولي و ريحولي بالي ماتخلونيش زي الأطرش ف الزفة
نجاة سكتت
هناء ترعش : تكلمي يا ماما ماتحرقيليش اعصابي اكتر !!
نجاة : هو صح انضرب لكن وضعه كويس
هناء انصدمت و حطت ايدها على فمها و ترعش
نجاة : ماترعشيش روحك هو كويس
هناء بدت تبكي : لالالا انتي تكذبي عليا .. يوسف اكيد بيموت و بيخليني بروحي
و طلعت من المطبخ بسرعة
نجاة لحقتها : وين ماشية ؟؟
هناء خشت للدار تلبس في عباية : بنمشيله
نجاة تشد فيها : وين بتطلعي في الفجر بروحك .. قعمزي و راجي بوك لين يجي ماتمشيش
هناء تبكي و ادف فيها : حولي ايدك يوسف بيموت و انى مانندريش علييييه
نجاة خدت منها العباية : استهدي بالله يا بنيتي مش كويس ليك اللي اديري فيه ، راجي الصبح يطلع و انى نرفعك غر ارتاحي بس
هناء تبكي : كله مني يا ماما كله مني ..؛ انى اللي فرضت عليه نمشو للعرس و هو ماكانش راضي
نجاة عيونها دمعو : ماتلوميش روحك اللي صار مقدر و مكتوب و ادعيله ينوض بالسلامة
هناء خدت منها العباية تلبس : اني مستحيل نقعد دقيقة و راجلي بين الحياة و الموت
خدت وشاح و طلعت من الدار
مشت جنب الباب تلبس في كندرتها
نجاة وراها : وين ماشية تعالي هنييييي
هناء منهارة ؛ خدت مفتاح سيارتها و فتحت الباب و نزلت تجري
نجاة شبحت لسنابل : الحقيها فيسسسع مابين لبست عبايتي و نزلتلها
سنابل نزلت تجري لهناء : هناااء ؟؟ ...؛ هناااء !!
هناء تبكي و ماتسمعش فيها ؛ ركبت السيارة و ولعتها
سنابل ركبت معاها : راجي ماما بتمشي معاك
هناء تبكي : انزلي يا سنابل خير مانمشي بيك
سنابل علت صوتها : معقولة بتطلعي بروحك الوقت هذا و انتي حامل ؟؟؟ يا انزلي يا اما راجي ماما المهم ماتمشيش بروحك و انتي ليك هلبا ع السواقة
هناء تصيح : انزلي يا سناااابللللللل !!!
سنابل سكتت و نزلت
عفست هناء ع البنزينة و طلعت تجري
فتحت تليفونها تتصل بـ بوها و تبكي ..
اسماعيل تردد قبل مايرد : الو
هناء تبكي : انتو في اما مستشفى ؟
اسماعيل : لا تطلعي و لا اتعبي روحك اقعدي ف الحوش لين نجيك
هناء تبكي : انى في الطريق
اسماعيل غمض عيونه و شد راسه : شن طلعككك تواااا !!!!
هناء : بتقولي ولا لا ياباباااا ؟؟؟
اسماعيل تكنطا : استغفر الله العظيم .. في المستشفى اللي نداوم فيها
هناء سكرت الخط و لوحت التليفون بحداها : كله مني كله منييييي 😭 .. يارب اشفيه و عافيه يارب .. يارب ماتورينيش فيه شر يارب
______________________
خشت سنابل الدروج لقت نجاة نازلة
نجاة : اختك وين ؟
سنابل : مشت
نجاة علت صوتها : كيف تخليها تمشي بروحها كييييف 😡 ؟؟ عبيت عليك ولااااا ؟؟
سنابل خافت : بالشوية تو امّيمه تنوض
ركبت نجاة تجري خدت مفتاح سيارتها و نزلت
سنابل وراها ف الجنان : ماما نمشي معاااك ؟؟؟
نجاة تصيح : خشي لحوش جدك لعند مانجي خششششي
سنابل سكتت و خشت لحوش حلومة
لقت العارف مخلوع من صياح نجاة
العارف : هذي مني اللي تعيط !!
سنابل : ماما
العارف : خيرها تلعلع شن فيه ؟!
سنابل : ماقعدت غير انت يا اجديده تعالى نقولك
قعمزاته ع الكنبة و بدت تحكيله بالشوية
العارف رعش : لا حول ولا قوة الا بالله .. لا حول ولا قوة الا بالله
سنابل سكتت و قعدت تفكر ف محمود .. ( اكيد دار الحادث بسبب سلسبيل 😔 )
___________________________
وصلت هناء المستشفى لقت بوها و عمامها واقفين مع دكتور يوسف
الدكتور : حني نحينا الرصاصة و لكن وضعه مازال مش مستقر و مازال فيه خطورة على حياته لان مكان الإصابة قريب من القلب و الوضع حرج جدا
السنوسي متغشش : يعني شنو تقصد يا دكتور خليك واضح ولدي بيعيش ولا لا ؟؟
الدكتور : بنكون معاك صريح ؛ الأعمار بيد الله حني بنراجو لين يتجاوز 48 ساعة ولو فاتو و ماصار معاه شي هكي ممكن نتطمنو
السنوسي سكت حط ايده ع الساس و نزل راسه و بدي يبكي بلا صوت
هناء تسمع فيهم و ساكتة
تلفت اسماعيل و جاها : تعالي معاي ماتقعديش هني
خداها و دخلها لمكتبه
هناء ساكتة و مصدومة من كلام الدكتور
اسماعيل مدلها امية : اشربي مني
هناء شبحتله : بابا ! .. الكلام اللي قاله الدكتور على يوسف ولا على حد تاني ؟
اسماعيل سكت
هناء دمعت : انى مانبيش بنتي تتيتم من قبل ماتجي للدنيا و انى نترمل في اول عمري
اسماعيل حط الميه و دار ايده وراء كتفها : تفائلي خير و خلي إيمانك بالله قوي
هناء تبكي
اسماعيل : ان شاء الله ينوض بخير و سلامة انتي ادعيله بس
هناء : ياارب
و استمرت في البكي و اسماعيل يهدي و يصبر فيها
فجأة تخش نجاة : هنااااء !!!
اسماعيل شبحلها و فنص فيها : كيف تخليها تطلع بروحها !!!!
___________________
عماد واقف قدام حجرة محمود و يبكي
جي محمد هو و اصيل
شافهم رشف خشمه و مسح دموعه بسرعة
محمد متضايق : كيف وضعهم توا ؟
عماد متغشش : لتوا مافاقش لا هو ولا يوسف
اصيل شبح لمحمود لقاه راقد و ملفوف بالجبس
اتضايق و قلبه انغص عليه 💔
____________________
06:30 ص
سلسبيل راقدة في السيارة ؛ منزلة الكرسي و مسترخية ف المكيف
مهاب مقعمز معاها و يشوفلها يتأمل في جمالها ❤️
بعد شوية شاف لامبة الجنان ولعت 💡
مهاب : سلسبيل ؟ ... بيلو ؟؟
سلسبيل فتحت عيونها و شبحتله لقاته يشوفلها و عيونه قلوب
مهاب : الضي جي
سلسبيل قعمزت و قامت الكرسي : و اخيراً
مهاب : صباح الورد
سلسبيل شبحتله و ابتسمت : صباح الفل
مهاب : انزلي بسرعة قبل مايفيق حد من العيلة
سلسبيل : به
و نزلو مع بعض
مهاب رجع للسيارة : انى نطلع السيارة برا و نجي
سلسبيل شبحتله : خليها توا
مهاب : لالا تو بيسيقو الجنان غر بيلبزوها
سلسبيل سكتت
مهاب : اسبقيني و تو نجي
سلسبيل : به
و ركبت حوشها
مهاب ركب السيارة تاني و طلعها للشارع
و هو نازل من السيارة و يسكر فيها لاقاه جارهم
عادل شاري خبزة
عادل : صباح الخير عريسنا
مهاب شبحله و ضحك : صباح النور .. كيف الأمور
عادل : الحمد لله .. شن صار ف صاحبك
مهاب استغرب : من صاحبي ؟
عادل : شن امالا ماعندكش علم !!
مهاب : لا والله شن فيه
عادل : امس ف الليل لما صار الرمي انصاب
مهاب انصدم : من فيهم ؟؟
عادل : مش زابط اسمه لكن تقريبا عديلك لان قالو قريب العروسة
مهاب جسمه صقع و خش بسرعة
ركب لحوشه زي المهبول ؛ غير حوايجه و خدي تليفونه
و كيف نازل ..
سلسبيل وراه : شن فيه خيرك ؟؟؟
مهاب طالع يجري : يوسف انصاب امس بنمشي نشوفه
سلسبيل رعشت : ووه عليا عليك يا اوسيفه 😱
___
ركب مهاب لسيارته و طلع يجري
فتح تليفونه و اتصل بأشرف ..
_____________________________
روح محمد للحوش بياخد حاجات لقي سنابل تراجي فيه ف الجنان
سنابل اول ماشافاته جت تجري و حضناته
محمد حضنها و سكر عيونه
سنابل : الحمد لله على سلامته 😔
محمد صوته مخنوق : الله يسلمك
سنابل شبحتله : انت كويس ؟
محمد سكت
سنابل خداته من ايده و قعمزو ف الطاولة
محمد ساكت و مكشر ؛ باين على وجهه الزعل و التعب
سنابل شدت ايده : محمود كيف وضعه توا
محمد : قاعد على نفس الحال
سنابل : باهي اللي روحت ع الأقل ترتاح شوية
محمد : اما راحة .. روحت باش نغير حوايجي و نولي
سنابل : كيف صار الحادث ؟
محمد سكت
سنابل : مش انت كنت في العرس ! من اللي قالك على محمود
محمد : الكلام اللي بنقوله توا نبيه يموت بيننا
سنابل استغربت
محمد : مانبيش حد يسمع بيه لين يفيق يوسف
سنابل : شن دخل يوسف ؟
محمد تنهد : لان محمود هو اللي ضربه
سنابل انصدمت و حطت ايدها على فمها : كيف ضربه !!!
محمد : كان قاصد مهاب في وقت التدريجة لكن مش عارف كيف جت في يوسف
سنابل مصدومة : و فيه حد غيرك شافه ؟؟؟
محمد : ماظنيتش لاني لمحته ف اخر لحظة و وقتها صار ضرب رصاص في الزنقة كلهم يحسابوها طايشة .. و هو بعد ماضربه طلع يجري بالسيارة و انى لحقته
سنابل : باهي كيف صار الحادث
محمد : شكله تهستر من الصدمة سرعته كانت لآخر العداد لين خش في طريق عكسية و رشقها
سنابل تسمع فيه و متأثرة
محمد : تعرفي في لحظتها حسيت قلبي قريب وقف لما شفته بيموت قدام عيوني
سنابل متأثرة : ووه عليا قداش ماحس 😔
محمد : غر ينوض بخير هو و يوسف بعده مانبي شي
سنابل : يارب
محمد : زي ماوصيتك يا سنابل مانبيش حد يعرف لين يفيق يوسف و لو هو بيقوله يقوله
سنابل : باهي حاضر
محمد سكت و نزل راسه يخمم
سنابل وقفت من وراه
حطت ايدها على كتافه و تهمسله : اركب افطر و ارتاح ساعة و بعدين ارجع
محمد هز راسه بمعنى لا
سنابل : واضح عليك التعب و الإرهاق حبيبي
محمد قام راسه : معقولة خوي يقتل ولد عمي !
حني صغار العم اللي مانخلوش شي يفرق بينا !!
حني صغار العم اللي ينضرب بينا المثل كيف نعاملو في بعضنا و نحسبو في روحنا كيف الخوت !!
سنابل : هذا الحب اللي خلاه هكي يدير ؛ و زي ما انت قلت كان قاصد مهاب مش يوسف و بسبب اللي صار دار الحادث
محمد : هادي أنانية مش حب ..؛ محمود من يومه لما يحط شي في راسه يبيه ليه و ملكه و مستحيل يخلي حد غيره ياخده
المفروض لما سلسبيل رفضاته فات الموضوع طول و شاف حياته مش قعد يضغط عليها و كان بيقتل راجلها في ليلة عرسه
سنابل سكتت
محمد : هذا اجرام ..؛ مهاب و يوسف مايستاهلوش النم تي لولاهم راني مقتول ليا وقت
سنابل : بعيد السو عليك معادش تفكرنا بهداكا اليوم
محمد : بالنسبة لمهاب اجميله مستحيل ننكره الراجل .. و وقتها انقمت بسبب محمود و الشي هذا طبعا مستحيل يفكر فيه لانه أناني
سنابل : الله غالب هو هكي طبعه و تفكيره
و فجأة يسمعو صوت عياط الداخل في الدروج
انخلعوا و ناضو يجرو يشوفو من اللي تعيط
__
سعاد تعيط : ووووه علياااا علييكككك يا ولييييدي .. مشيت و خليتنييييي في اول عمرررررككككك
محمد انصدم و جسمه صقع : خيره يوسف ؟؟؟
سعاد تعيط : قتلولي وحيدي وووه عليااا وووووووه
محمد : يوسف ماماتش علاش تفاولي عليه ؟؟؟
سعاد تحرك ف صبعها و تعيط : قتلوه قتلووووه
و تخبط على صدرها : ياربي خودني ولا تحضرني دفينة ولدي ياربيييييييي
محمد تكنطا منها و ركب يجري لقي ازهار و مرام نازلات مخلوعات ع الصبح
خش لحوشهم و ماتكلمش معاهم
سنابل راعشة من سعاد فتحت تليفونها و اتصلت بِ بوها ..
طلعت ف الجنان تتكلم : الو
اسماعيل : ايوا نعم
سنابل : يوسف مات ولا شن ؟؟
اسماعيل : قاعد ف العناية
سنابل : مرت عمي تعيط و تقول قتلوه من اللي قايللها مات ؟؟
اسماعيل تكنطا : بالك السنوسي كلمها و هي فهمت غلط
سنابل حطت ايدها على قلبها و اطمنت
اسماعيل : هيا سكري توا مش فاضي بيك
و سكر عليها الخط
سنابل خشت للدروج لقت نساوين عمامها و حلومة يبكو و راعشين
سعاد : ووه عليك يا ازهار وووه .. ولدك تشقلب بالسيارة و متكسر حتى هو وووه علييييك
ازهار شدت وجهها و رعشت : من قالك ؟؟؟
سعاد تبكي : سنوسييييي
ازهار بدت تبكي و كلها ترعش
على نزلة روان سمعت العياط و الكلام انصدمت و قعمزت ف الدروج
____________________________
08:00 ص
محمود فتح عيونه و يحس بألم في جسمه كله
قعد يشوف يمين و يسار و مش قادر يحرك راسه
بحداه ازهار تقرا في قران و صابرة
شبحتله و قربت منه بسرعة : محمود ؟؟ فقت يمي ؟؟ .. تسمع فيا ؟؟
محمود دوب مايتكلم : يوو يوسسف ! يوسف !
ازهار فرحت : الحمد لله يارب
و طلعت تجري تنادي على اسماعيل لانه دكتور عظام و هو اللي يتابع في حالة محمود
خش اسماعيل كشف عليه و طلع لعماد
عماد : شن وضعه يا اسماعيل
اسماعيل : بعد ماريت صور الأشعة و الرنين لقيت عنده كسور زي ما انتو عارفين ؛ جسمه يبي راحة تامة لفترة طويلة و .... ( وسكت )
عماد : و شنو ؟؟
اسماعيل : رجله هي الي تاعبة يا عماد .. واحتمال تحتاج لتركيب بلاتين
عماد اتضايق و قلبه انغص على ولده
اسماعيل : الحمد لله على كل حال .. هكي ولا اكثر الحمد لله
عماد : الحمد لله ... والعملية امتى بتصير ؟
اسماعيل : مازال لين يشد صحته شوية
_______
ازهار : محمود ! رد عليا يمي تكلم
محمود بصوت خفيف : يوسف يا امي مات ولا قاعد عايش
ازهار : ياروحي عليك حتى وانت في هالحالة تفكر في ولد عمك !
محمود : ردي علياااا !!!
ازهار : عايش عايش .. اتطمن و ريح روحك ماتتعبش
محمود دمعو ينزلو ؛ متضايق من روحه هلبا و يتعذب من تأنيب الضمير
ازهار جت تمسحله ف دموعه و تبكي معاه : ماتزعلش روحك يا حبيبي .. بإذن الله تتعافو انتو الزوز و تروحوا بالسلامة و تنورولنا الحوش
محمود يبكي : شن صاير فيه يا امي ماتكذبيش عليا
ازهار : والله مانكذب عليك .. هو مازال عايش لكن في العناية
محمود سكت و ياكل في بعضه
___________________________
بعد مرور اسبوعين 🌹
طلع محمود من المستشفى و بدت حالته تتحسن
اما يوسف قاعد في العناية و مازالت حالته مستقرة
____________
11:00 ص
هناء مقعمزة ع الكرسي قدام حجرة العناية تقرا في قرآن و تبكي بلا صوت
جت بحداها أمال : اسمعي مني و روحي للحوش ياهنيوه ، انتي معش مازالك و تجيبي علاش اتعبي في روحك
هناء سكرت المصحف و شبحتلها : مش حانروح و يوسف مازال مافتحش عيونه و اطمنت عليه
امال : حني قاعدين معاه لو صارت اي حاجة نتصلو بيك ارتاحي اليوم بس
هناء تحرك في راسها بمعنى لا و تبكي
امال سكتت
جي اسماعيل شاد قهاوي و عصير
مد لأمال قهوة و هناء مدلها العصير
هناء : مانبيش
اسماعيل : علاش ؟
هناء وقفت : نبي نخش ليوسف
اسماعيل : الزيارة ممنوعة يا بنتي قداش مرة بنعاود
هناء سكتت و تنهدت
_____
09:00 م
خشت هناء ليوسف بالدرقة ع الممرضات
وقفت تشوفله و شادة بكيتها
قربت منه و شدت في ايده : امتى بتنوض و ترجع تنور حياتي من جديد ؟ ..
مش وعدتني نكونو مع بعضنا طول العمر ؟ ..
مش قلت انك مستحيل تسيبني ؟ .. ليك اسبوعين مخليني بروحي و انى من غيرك مش عارفة نعيش .. من غيرك مش قادرة ناخد النفس
حطت ايدها على وجهه : ماتخلينيش نربي بنتنا بروحي حبيبي ..
انى محتاجاتك جنبي
يوسف حس بوجودها جنبه و بدي يسمع فيها
هناء تبكي : هيا نوض و ماتزيدش تحرق قلبي عليككك ..
و فجأة بدت فيها لية الجياب ؛ سكتت و حطت ايدها على بطنها و تشوف ليوسف و تتألم
قعدت في مكانها ساكتة مش متوقعة روحها بتجيب لان ماتعرفش ان هالألم ألم ولادة
خشت عليها ممرضة انصدمت : انتي كيف خشيتي هني ؟؟
هناء شبحتلها و تتوجع : تعاليلي بسرعة
الممرضة استغربت و جتها : فيك شي ؟
هناء شدت فيها : طلعيني ..
تتألم و اتأن : اممممم اااه
الممرضة تمشي فيها لبرا الغرفة : انتي بتجيبي شكلك !!
هناء : ناديلي دكتورة أمال من قسم النساء بسررعة
الممرضة قعمزتها ع الكرسي ف الممر و مشت تنادي في امال
_____
يوسف بدي يفيق و يحرك في ايده
_______________________
بعد مرور ساعتان 🌹
هناء في ممر قسم الولادة تمشي فيها أمال
هناء شادة بطنها و تتألم : معش قادرة يا عمتي 😔
أمال : تحملي شوية هنيوه .. لازم تتمشي باش يسهل عليك الجياب
هناء تبكي و دوب ماتتكلم : خلاص نحس ف روحي بنحطها هني ليا ساعتين و انى نتوجع
امال شبحتلها : لالا لقيتك سبعة سنتيمتر زيدي تمشي شوية لين ينفتح الرحم
هناء : انتي ناوية تولديني ف الممر يا عمتي !!
امال : تحملي شوية يا هنيوه انتي هادية و ماشاء الله عليك خير من الحالات التانية
هناء سكتت ؛ قعدت تتمشىٰ و هي هادية
تسمع في الحالات اللي زيها كيف يعيطو خافت
امال : ماتسمعيلهمش هادو مدايرات وجاع صناعي
هناء داهشة : قصدك حتى انى بنديره ؟
امال : لتوا مافيش داعي
هناء خايفة : راني نموت و مانديراش نعرفه صعب هلبا و وجاعه موت
امال سكتت
هناء وقفت ف مكانها تتوجع و تتكلم بصوت واطي : ياعمتي معش قادرة نتحرك خلاااص
جت نجاة تجري متعفلقة : خيرك ماكلمتينيش يا اماااال ؟؟
امال شبحتلها
نجاة : معقولة بنتي بتجيب و انى مش معاهااا لين يتصل بوها يقولي !!!
امال : باهي خيرك متكنطية هي مازالت ماخشتش
نجاة : لا محلاك اتدخليها و انى اخر من يعلم 😡
امال تعفلقت : نقصي صوتك و بلا دوشة ف المستشفى ماتجيش توا تقعدي تحشمي فينا
نجاة زادت حمقت : نحشم فيك على عوج انتي اديري فيه !!
امال : الأحسن انك تروحي اريح ليا و لبنتك 😡
هناء تبكي : اسكتو اسكتووو 😭 انى بنموت و انتو تتعاركو !! اااه ياربي ساعدنيييي 😭
نجاة شبحتلها و شدتها : خلاص انتي لازم تخشي
خدتها منها امال و دخلتها لغرفة الولادة
و نجاة حاولت تخش لكن منعوها
__________________________
يوسف فتح عيونه و يشوف في المكان
شاف لروحه لقي التغذية في ايده و خيوط جهاز القلب على صدره
استغرب و قعد يحاول يتذكر اللي صارله
_______________
02:00 ص
نجاة مازالت واقفة قدام الغرفة تراجي ؛ معاها سعاد و سنابل و ازهار
سنابل متوترة : ياريتني ماجيت مانحبش نراجي
شبحتلها نجاة و فنصت فيها : انتي اصلاً شن طلعك ؟؟ حتى كان بتجيب بالعملية نقولو .. جاية و مرتشقة زي الشمعة مش ناقصة تنقريزك فوق راسي
سنابل سكتت
ازهار : وسعي بالك يا نجاة ؛ ان شاء الله ربي يسهل عليها و تطلعلك بالسلامة
نجاة : ان شاء الله
سعاد تسمع فيهم و ساكتة ، خايفة تقول كلمة تنط فيها نجاة
نجاة متوترة : لازم نخش بنتي عطلت مفروض جايبة من بكري
طلعت الممرضة تلفتتلها نجاة : شن صار ؟؟
الممرضة مشت و ماردتش عليها
نجاة حمقت و خشت الغرفة
سنابل انصدمت : ماما !! 😳
___
خشت نجاة لقت امال توّلد ف هناء
و هناء تعيط و مازالت ماجابت
نجاة وقفت بحداها : اذكري ربي يا هنيوه
امال شبحتلها و انصدمت : انتي شن اديري هني ؟!!!
شبحتلها نجاة : امالا تبيني نخلي كبدي و مانخشش ؟ الهي فيها و ماتشبحيليش
امال سكتت
هناء تبكي و شادة في ايد امها
نجاة شبحتلها و بدت تبكي معاها
هناء تبكي و داهشة : بنموت يا ماما بنمووووت .. معش نبيه الجياب خلاص ديرولي حلللل
امال : ساعديني يا هناء .. راس البيبي بدي يبان ساعديني باش تسهلي على روحك
هناء تحاول تجيب و تبكي : مش قادرة ماعنديش جهد
فيه ممرضة واقفة معاهم : عليك تزعبين 😒 ديرو شن تبو مع رجالتكم و بعدين عيطو هني
سمعتها نجاة حمقت : شن قلتي يا معفنة ؟!!!!
الممرضة خافت : ماقلت شي
امال : هيا يا هنيواااا
هناء تعيط : بنموت يا عمتيييييي 😭 اااه ياربي ساعدنيييي
الممرضة انصدمت ... ( دكتورة امال عمتها 😳 )
نجاة شدتها من حوايجها تكر فيها برا الغرفة : اطلعي يا خايبة يا معفنة يلي ماتخدميش بقلبك و ضميرك
الممرضة ادف فيها : حولي ايدك
نجاة تكر فيها : سمعتك شن قلتي ياقردة 😡 اشكالك حرام فيهم ربع جني يا بهيمة
و طلعتها برا
ازهار و سعاد و سنابل مصدومات 😳
ازهار : شن فيه ؟؟؟
الممرضة مشت و ماقالتش كلمة
نجاة متعفلقة و تعلي ف صوتها : ممرضات البلي هادم يبو التغربيييييييل
و خشت و قربعت الباب
سنابل ضحكت : مفروض يحطوها رئيسة قسم 😂
ازهار ساكتة و مصدومة
ناضت سعاد : نمشي نشوف وليدي خيرلي
و مشت تتكلم بروحها : عليك عار ادير فيه وين ماتمشي هبالها معاها
_______________________
هناء تبكي و شادة ف نجاة
امال : هيا ياهناء ساعديني
هناء تجيب و تفكر في يوسف
خدت نفس عميق و عيطت : يوووسسففففففف !!!!
و جابت بنوتة ❤️
امال ضحكت و قامت البيبي فوق
هناء تكت راسها ع السرير و سكتت داهشة هلبا
نجاة ضحكت : ماشاء الله
هناء تسمع في صوت بنتها تبكي و مش قادرة تقيم راسها
قصت امال الحبل السري و حطتهالها على صدرها : شوفي بنتوك يا هنيوه ماشاء الله تبارك الله
هناء قامت راسها و شبحتلها
نجاة فتحت تليفونها و صورتهم 📷 ❤️
هناء تشوف لبنتها و تبكي : ياريت يوسف معاي و عشنا هاللحظة مع بعضنا 😢
نجاة : ان شاء الله تكون بنيتكم وجه خير عليكم و ينوض بالسلامة
امال : الف مبروك تتربى في عزكم و دلالكم
________________________
سعاد : نهار مبروك عليا ولدي فاااااق
الممرضة : الحمد لله على سلامته
سعاد : نبي نشوفه يا بنيتي خليني نخشله
الممرضة : الدكتور معاه توا راجي لحظات بس و حايطلع لغرفة عادية
سعاد فرحانة : طيب فيا ياربي نهار مبروك مسعود علينا
و فتحت تليفونها تتصل بالسنوسي
________________________
بعد مرور ساعة 🌹
هناء راقدة في حجرتها تاعبة و معاها امها و سنابل
سنابل : مرت عمي ماتندريش على هناء راهو
نجاة : بري قوليلها
سنابل حطت وشاح على شعرها
نجاة : ازهار روحت ولا
سنابل : ايه ؛ بعد ما اطمنت على هناء روح بيها محمد
نجاة تنهدت : فجيوة فيها حتى هي تعاني ف ولدها مسكينة
سنابل سكتت و طلعت من الحجرة
________________________
يوسف راقد في حجرة بروحه و سعاد و السنوسي واقفين قدام الباب
السنوسي فرحان : هناء جابت و ماتقوليليش ؟
سعاد : انى خليتها ف حجرة الولادة مش عارفة شن صار فيها من فرحتي بيوسف نسيت كل شي
السنوسي : تو ننزل لإسماعيل مقعمز لوطا كان جابت تو نركب و نفرح يوسف
جت سنابل : وينكم ندور فيكم ممر ممر
سعاد فرحانة : يوسف فاق و حولوه لغرفة عادية
سنابل فرحت و علت صوتها : الحمدددد لله
و خشتله تجري : يوسف ؟؟
يوسف تاعب ؛ فتح عيونه و شبحلها
سنابل وقفت بحداه : الحمد لله على سلامتك
يوسف ابتسم و دوب مايتكلم : الله يسلمك
و بلع ريقه : وين هناء ؟
خشت سعاد مبتسمة
يوسف : توقعت نشوفها اول وحدة جنبي
سنابل : هناء توا كيف جابت 😍
سعاد فرحت : طيب فيها الحمد لله
يوسف قام راسه : جابت ؟!
سنابل : ايه ؛ جابت لوطا في قسم الولادة .. الف مبروك انت وليت بابا
يوسف : مازال موعدها مش توا !! ..؛ اليوم شني ؟؟
سنابل : اليوم جمعة .. انت كنت اسبوعين ف العناية و الحمد لله هذا وين فقت
يوسف سكت و قعد يفكر
سعاد : مبروك عليك يا اوسيفه تتربى في عزك
يوسف بيحاول يقعمز
سعاد شداته من كتافه : وين نايض ؟
يوسف : بنشوف هناء
سنابل : ليها ساعة جايبة اكيد راقدة توا
يوسف سكت
سعاد : حتى انت تاعب ؛ ارقد و الصباح رباح تو تنزلك هي
يوسف ساكت
سعاد : الدكتور مانع عليك الحركة لان الجرح مابراش حافظ على روحك هاليومين لين تطلع
يوسف : باهي بري اطمني عليها شوفيها كيف وضعها هي و البنية
سنابل : هي و البيبي كويسين ماتخافش عليهم
يوسف شبح لأمه : بري يام
سعاد طلعت من الحجرة و مشت لهناء
خش الدكتور المناوب ليوسف يتطمن عليه و فهمه انه مايتحركش لان جرحه قاعد مالتحمش كويس و احتمال ينفتح
يوسف ساكت و مايبيش يرد عليه
الدكتور طلع و سكر الباب
يوسف شبح لسنابل : تعالي نقولك ......
________________________
07:00 ص
روحت سعاد هي و السنوسي باش يجيبو حاجات ليوسف
و يوسف قعد بروحه
خشت عليه سنابل : يوسف ؟
يوسف شبحلها : شن صار ؟
سنابل دخلت معاها كروسة : ماحصلتها لين اعطيت رشوة
يوسف ضحك : منورة
سنابل قربتها قدامه و ساعداته انه يقعمز
يوسف قعمز ف الكروسة و يتوجع شاد ع الجرح
سنابل تشوفله : انت كويس ؟
يوسف وجهه احمر : تمام تمام ؛ اطلعي بيا قبل مايكبسونا
سنابل : هيا هي
لفتت الكروسة جهة الباب و طلعت بيه
يوسف : تعرفي يحصل علينا الدكتور بتاكلي على راسك
سنابل تمشي بيه : نستاهل ماه 😒
يوسف : انى مش واخد عليك ؛ واخد على سلسبيل ديما قايمة القدر
سنابل ضحكت : و توا جي دوري انى .. حتى و انتو متزوجين حاصلين فيكم
يوسف : هيا افتحي الاسانسير و فمك ساكت
سنابل : أمرك صهري 😂
فتحت الاسانسير و خشو
يوسف : هناء ماقلتيلها شي ولا ؟
سنابل : لالا ؛ من اللي جابت و هي راقدة ؛ مسكينة لا ليلها ليل ولا نهارها نهار من يوم اللي انت انضربت و هي هني بكي و سحن و خلاص
يوسف سكت
سنابل تجس ف النبض : ماشفتش من اللي ضربك ؟
يوسف : كانت الدنيا زحمة و صار الضرب عشوائي جت طايشة
سنابل سكتت و انفتح الاسانسير
طلعت بيه و بدت تجري بالكروسة
يوسف حط ايده ع الجرح : بالشوية
سنابل تجري بيه و توقف فوق حديدة الكروسة من الجنب : باهي صهري
يوسف تكنطا : تي بالشوية يلعن شكلك 😡
سنابل نقصت سرعة الكروسة : باهي تمام
يوسف : بتفضحي بينا الزفت
و لقو وحدة نظافة تنشف : لو سمحتو خلوه يجف و اخطمو
يوسف سكت
سنابل حطت ايدها ف نصها : بالله عليك ؟؟؟!!!!
النظافة : راجو دقيقتين بس
سنابل سكتت ؛ خلتها تتلفت و طلعت تجري بيوسف
يوسف انصدم : شن اديري يا هبلة !!!
النظافة تصيح : حرااام عليييييك اتعبي فياااا هكي ليه علييييك
سنابل تجري بيوسف : سامحينا يا اختي
و سطربت بيه ف الممر
يوسف حاط ايده ع الجرح : تي بالشوية يا .... 😡 ( و سكت )
سنابل دهشت : باهي
و وقفت قدام حجرة هناء
يوسف : خلاص توكلي
سنابل : معاها ماما
يوسف : امالا خشي وزعيها قبل
سنابل : به ... و خشت للحجرة
نجاة شبحتلها : وين كنتي ؟؟
سنابل جتها توشوش : عند يوسف
نجاة : شن حاله بعد ما فاق ؟ .. ماقدرتش نمشيله و نخلي اختك
سنابل : اسكتي هو برا يبي يخش
نجاة استغربت : شن جابه توا و هو مريض ؟
و طلعت بسرعة من الحجرة
لقاته مقعمز ف الكروسة انصدمت : يوسف !!
يوسف شبحلها
نجاة ابتسمت : الحمد لله على سلامتك طيب فيك و راح الشر ان شاء الله
يوسف ابتسم : الله يسلمك
نجاة : مبروك عليكم البنية تتربى ف عزك
يوسف ضحك : الله يبارك فيك
سنابل طلعت من الحجرة : ندخلك اني ؟
يوسف شبحلها : مافيش داعي
و خش بالكروسة بروحه و سكر الباب
لقي هناء راقدة ع السرير لابسة قفطان قطني بالروب متعه
قرب منها و قعمز جنبها ع السرير
هناء حست بحد بحداها فتحت عيونها
يوسف شاد ع الجرح ؛ مغمض عيونه و وجهه احمر من الألم
هناء رمشت عيونها بسرعة : يوسف ؟
يوسف شبحلها و ابتسم : الحمد لله على سلامتك حبيبتي
هناء قعمزت : ياربي هذا حلم ولا علم !!
يوسف ضحك
هناء قعدت تشوفله و حضناته : الحمد لله اللي ربي استجاب لدعواتي و نضتلي بالسلامة
و قعدت تبكي
يوسف : علاش الدموع توا يابيبي ؟
و شبحلها يمسحلها ف دموعها : انى معاك
هناء تبكي : لو تعرف شن صار فيا في غيابك .. قريب متت عليك
يوسف : اششش بعيد السو عليك حبيبتي
هناء : سامحني لان اللي صار كله بسببي ؛ لو سمعت كلامك و مامشيناش للعرس ره ماصارلك شي
يوسف : معش تقولي هكي هنو اللي صارلي مكتوب من ربي ماتلوميش روحك
هناء سكتت و حضناته تاني
يوسف توجع
هناء وخرت : وجعتك ؟
يوسف ابتسم : لالا
هناء قعدت تشوفله : امتى فقت و انى امس كنت عندك ؟؟
يوسف : مش عارف ممكن من اللي طلعتي مني
هناء : قصدك سمعتني شن كنت ندويلك
يوسف ابتسم : علاش شن قعدتي تقوليلي ؟
هناء : مش مهم ؛ المهم انك نضتلي بخير
يوسف تلفت يدور : وين أميرتي الصغيرونة !!
و طق عليهم الباب
هناء : ايوا ؟
خشت نجاة شادة البنية : جتكم العسولة
هناء ضحكت و مدتلها ايديها : هاتيهالي
نجاة قربت منها و مدتهالها : سمي بالله
هناء خدتها منها : بسم الله
يوسف شد البنية من ايدها و قلبه يدق : ماشاء الله .. اللهم بارك
نجاة : نسخة منك يا يوسف سبحان الله
يوسف يشوف لبنته و يضحك : مازالت مش واضحة
نجاة : والله الا نفس عويناتك و حواجبك
يوسف و هناء ضحكو
نجاة شبحت لهناء : لازم ترضعيها
هناء شبحتلها و سكتت 😥
نجاة ضحكت و طلعت من الحجرة
يوسف شبح لهناء و باس ايدها : شكرًا على اغلى هدية جبتيها ليا يا غاليتي
هناء ابتسمت : ربي يخليك لينا حبيبي
يوسف يشوف لعيونها : و يخليكم ليا ..
قيميهالي نبي نبوسها مش قادر نطبس
هناء قامتها ليه
يوسف باسها و ابتسم : يقولو البيبي ماينباسش لين يتطاعم لكن ماقدرتش
_____________________
نجاة : هيا نوضي معاي بوك يراجي لوطا
سنابل : بالك هناء بتطلع معانا
نجاة : اختك تبي لغدوا باش تطلع هكي عمتك قالت .. خلينا نروحو نرتاحو و باش نوتو حاجات البنية
سنابل : بري انتي و خليني معاها مرات تحتاج لشي
نجاة : تيبسي في مكانك لين يوسف يطلع من الحجرة و اقعدي مع اختك .. تنزلي هني ولا هني نوريك
سنابل تكنطت : راني انخطبت معش تدوي معاي بالأسلوب هذا
نجاة سكتت ؛ فنصت فيها و نزلت
فتحت سنابل تليفونها ع النت تمشي في الوقت بيه و تنعس
________________________
هناء بعد ما رضعت بنتها شرينت لسنابل ف التليفون
سنابل خشتلها : نعم ؟؟
هناء : تعالي ارفعيها
سنابل وقفت بحداها : خليها معانا نبي نشبع منها
هناء مدتهالها : انى تاعبة مانقدرش نحطها جنبي
سنابل وخرت : مانقدرش نشدها
يوسف : نادي وحدة من الممرضات امالا
سنابل طلعت و نادت ع الممرضة ؛ خدت البنية و سكرت الباب
سنابل : لو تبي حاجة ناديني اني برا
هناء : به
طلعت سنابل من الحجرة
و يوسف شبح لهناء
عدل تقعميزته و اتكّا معاها ف السرير
قعد يتألم و مغمض عيونه
هناء تشوفله : حبيبي انت لازم تكون في حجرتك و ماتنوضش
يوسف شبحلها و تكّاها بحداه : تعالي عندي يا عمري مستاحشك قد الدنيا
هناء ابتسمت
يوسف : حطي راسك على صدري
هناء : و الجرح ؟
يوسف : فداك قلبي يا روحي المهم خليك عندي
هناء اتكت عليه و انتبهت انها ماتقربش مكان الجرح
يوسف حط ايده على شعرها و غمض عيونه
هناء : في شنو تفكر فيك اللحظة هادي ؟
يوسف ضحك
هناء : اليوم احلى يوم في عمري ؛ كأن انكتبلي عمر جديد
يوسف باسها : ان شاء الله دوم مش يوم
_______________________
09:00 ص
سنابل تعبت و بدت تنعس هلبا ؛ طقت على هناء ماردتش عليها
تحشمت انها تخش و قعدت اطق ✊
و هناء ماتردش
عدت من واحد للثلاثة و فتحت الباب
لقت يوسف و هناء راقدين و من التعب مش حاسين بشي
تحشمت و طلعت و سكرت الباب
شدت تليفونها و اتصلت بهناء ..
_
هناء شبحت لتليفونها لقتها سنابل ؛ سكرت عليها بالحمرا و شبحت ليوسف
قعدت تتفرج عليه و ماهانش عليها تنوضه
ناضت بالشوية من بحداه ؛ خشت الحمام و بدلت قفطانها
لبست بيجامة قطنية و جت تشوف فيه
يوسف حس بيها و شبحلها
هناء : سامحني نوضتك
يوسف قعمز و شد ع الجرح : ساعة قداش توا خداني النوم
هناء : ساعة تسعة
يوسف ناض و قعمز ف الكروسة بصعوبة
هناء : انت كويس حبيبي ؟
يوسف : تمام ماتشغليش بالك فيا
هناء تشوفله : مفروض انى اللي جيتك مش انت تجيني
يوسف شبحلها و سكت
هناء : سلامتك من كل شر ياروحي
يوسف شد ايدها و باسها : ماتشوفي شر
هناء سكتت
يوسف : كان بتطلعي اليوم اطلعي في حوش العيلة
هناء : مش اليوم طالعة غدوا
يوسف ابتسم
هناء قربت منه و باساته في حاشية جبهته
و فتحت الباب لقت سنابل مقعمزة ع الكرسي و متكية راسها ع الحيط
سنابل : مازال !! 😔
هناء ضحكت : تعالي
سنابل خشت لقت يوسف كيف طالع
سنابل : نوصلك انى !
يوسف : شكرًا منورة
و طلع بروحه
_______________________
بعد مرور عدة أسابيع 🌹
رجعو هناء و يوسف لشقتهم و باديين يجهزوا لأسبوع بنتهم ميرا ❤️
02:00 م
خش يوسف لحوشه شاد حاجات ف ايده
حطهم ع الطاولة و خش لهناء ف الدار
هناء مقعمزة ع السرير شبحتله و ابتسمت : اهلااا
يوسف : اهلا بيك
هناء : هذا شنو اللي جايبه ؟
يوسف شاد بمبلة كبيرة : لعبة لـ ميرا
هناء ضحكت : هي مازالت بيبي وين تفهم باش تجيبهالها
يوسف قعمز بحداها : خليها لين تكبر و تلعب بيها
هناء تشوفله و تضحك
يوسف : شن اديري
هناء : نكتب في المعازيم
يوسف سكت و قعد يناشب في ميرا راقدة جنب هناء
نحالها شخشيرها و قعد يبوس في رجليها و يلعب بصوابعها
هناء : خليها راقدة ماصدقت سكتت و هي من الصبح شادتها عياط
يوسف شبحلها : خليها تعيط و ادير شن تبي الأميرة
و شبح لميرا لقاها تتكسل ؛ قعد يبوس فيها في وجهها و رقبتها
هناء تشوفلها و متأثرة : علاش هكي تخبش فيها بلحيتك !! 😔
يوسف شبحلها : هذا خوف ولا غيرة ؟
هناء : ندوي بجديات شن غيرة
يوسف ضحك و قرب منها : باهي سيبيلي اللي في ايدك و الهي بيا شوية
هناء حطت البيرو : نعم حبيبي
يوسف : مش حاسة انك اهملتيني من اللي جتنا ميرا الأميرة
هناء : معقولة بتغير منها ؟ هي بيبي صغيرونة و اكيد تبي اهتمام
يوسف قرب منها يهمسلها ف وذنها : اني مش واخد عليه الإهمال اهوا
هناء ضحكت : يوسف اتدغدغ فيا
يوسف نحالها شعرها عَ الجنب ....
__
فجأة ميرا فاقت و بدت تبكي
هناء شبحتلها و وخرت من يوسف : لالا يا حبيبة مامي انتي .. علاش تبكي ؟
و شدتها عندها
يوسف تكنطا و خبط بِ ايده ع السرير
هناء شبحتله و شبحت لميرا : كيف أستطيع الاهتمام بكم معاً ؟ أحدكم يبكي و الاخر مُتطلب و غيور !
يوسف تقلب على ظهره و سكت
___________________________
سنابل ف الجامعة واقفة مع قروبها و تهدرز
شرين تليفونها لقاته محمد
بعدت شوية و ردت : الو
محمد : انتي وين
سنابل : غر قول كيف حالك
محمد : روحتي ولا مازال
سنابل : مازال
محمد : مية مية
و سكر الخط
سنابل تكنطت : خيره هذا
جتها سلسبيل : مني ؟
سنابل : محمد .. الفترة هادي مش عارفة خيره من لما خشيت الجامعة و هو متغير عليا
سلسبيل : كيف متغير ! بالك مدايرتيله حاجة و مش حاسة بروحك
سنابل : لالا هو مايبينيش نخش لجامعة خاصة و يبيني نقرا ف كليته باش نقعد تحت أنظاره
و تقلد فيه بصوته : ماهو خايف عليك من الضباع
سلسبيل ضحكت بصوت عالي : حسسني اننا ف غابة .. حتى لو قريتي ف كليته تي ماهو بيتخرج و بيخليك بروحك
سنابل : شن بديريله هي ؛ عقلية الليبي تعرفيها كيف
سلسبيل ضحكت
و لمحت مهاب واقف يراجي فيها
خافت : حي على امي شافني نضحك
مهاب يفنص فيها و يأشرلها بمعنى هيا
سنابل ضحكت : مش كان روحتي معاي ؟
سلسبيل : لالا فكيني منك انتي تنسريفك هلبا من اللي خديتي سيارة هناء معش قعدتي ف الحوش
(( مهاب بدي يكلكس ))
سنابل : بريله قريب ينزلك
سلسبيل مشت تجري : هي باي
سنابل : باي
_
ركبت سلسبيل للسيارة : عطلتك ؟
مهاب شبحلها متعفلق : انى شن موصيك على ام الضحك ؟؟؟ ولا انتي ماتفهميش لين نبطلك من الجامعة ؟
سلسبيل : ضحكت مع اختي مش مع حد تاني شن فيها به ؟
مهاب متعفلق : هذا من اول سيمستر هكي !! مازال توري سنونك في مكان مختلط بنحرمه عليك تسمعي فيا ولااا ؟؟
سلسبيل تكنطت و سكتت
مهاب طلع بالسيارة بسرعة و غبرها وراه
شافاته سنابل : اوبااا 😐
فجأة لمحت محمد جي و درس ورا سيارتها
انصدمت : حي على امي 😑
محمد نزل من السيارة و جاها ؛ لقاها لابسة بلوزة و سروال و فوقهم بشت
عقد حواجبه و تكنطا
سنابل ابتسمت : اهلين
محمد يدوي مسكر سنونه : هذا شنو اللي لابستيه
سنابل تشوف لروحها : حاجة طويلة زي ما تبي
محمد متعفلق : تلعبي عليا ؟؟
سنابل تحشمت : محمد مش وقته قدام الطلبة
محمد : نحي الطوبلي اللي مدايرتيه
سنابل : علاش 😳
محمد : نحيه و لفي وشاحك بلاه
سنابل نحت الطوبلي و مدتهوله
محمد طبس و قعد يسكرلها ف البشت من جهة فخادها
سنابل انحرجت و وخرت : شن ادير ؟!!!! 😰
محمد فنص فيها : امالا سكريه انتي
سنابل خافت و خدت منه الطوبلي تسكر فيه
محمد : و توا قدامي للسيارة تحركي
سنابل : نراجي ف أبرار بنروح بيها
محمد ينفص فيها : لا أبرار لا بوعجيلة اطلعي قدامي و ماتخلينيش نفصل
سنابل : عيب البنت عابية عليا ..
محمد علّا صوته : اطلعي قدامي 😡
سنابل سكتت و حمقت
كيف بتمشي معاه ..
جاها زميلها سهيل : سنابل معليشي لحظة
سنابل شبحتله و قلبها دق من الخوف
محمد شبحله لقاه حليوه و كيوت
عقد حواجبه : تفضل شن تبي !!!
سهيل شبح لسنابل : محاضرة امس ماحضرتهاش نبي ناخدها منك لو مافيش مانع !
سنابل كيف بتتكلم ..
قاطعها محمد : حتى هي ماحضرتهاش
سنابل انحرجت و سكتت
سهيل ضحك : لكن قالولي حضرت
محمد فنص فيه و قرب منه يعلي ف صوته : قلنالك ماحضرتهاش تبي نفهمك بطريقة تانية ؟؟؟!!!
سنابل خافت : محمد !!
سهيل : خيرك تعيط انت ؟؟
محمد : لان اللي زيك مايفهمش الا هكي
سهيل تكنطا و بدو يتعاركو 👊👋👊
سنابل خافت : محمددد !!! 😰
محمد فوق سهيل يضرب فيه و مايسمعش فيها
جو الشباب اللي ف الجامعة يحزو بينهم
محمد داهش و يسب و سهيل طايح و يرد عليه
سنابل من الرعشة مشت تجري للسيارة
محمد مسح عرقه بِ ايده و لحقها
سنابل لما شافاته جاي و اطمنت انه مافيه شي ولعت السيارة و طلعت تجري
محمد خبط ايده على سيارته و لحقها
_
سنابل تسوق و ترعش : هذا اكيد هبل و ولّا مش طبيعي اكيد
محمد وراها بالسيارة يسب و يلعن
___
بعد شوية وصلو الحوش و سنابل ركبت تجري قبل مايلحقها ؛ خشت لدارها و سكرت تليفونها
_
محمد ركب لحوشهم متعفلق
لاقاه احمد : محمد ...
محمد قاطعه و علّا صوته : اقلب وجهك من قدامي خيرلك
احمد سكت و نزل لحوش العارف ..
ازهار تشوف لمحمد : خيرك !!
محمد : ماخيرني شي
روان تشوفله : محمد ؟؟
محمد سكت و خش الحمام و قربع الباب
روان انخضت : شن فيه !!
ازهار : ابصر مع من متعارك لان مش من عوايده يتعصب ؛ فرحنا اللي محمود عقل ناضلنا هذا
روان ضحكت : توكة بتوكة 😂
ازهار : تعالي وتي معاي الغدي بوك على جية
روان : به
و سمعت محمود ينادي من داره : رواااان !!!!
روان تكنطت : اهو بيبدا ف الطلبات
ازهار : معليشي اوخييك
روان مشتله ف الدار : ايوا
محمود : جيبيلي الشحن
روان : وراك
محمود تلفت لقاه : اااه به .. جيبيلي البليستيشن و ركبيه هني
روان : احمد مخليه لوطا
محمود سكت
روان كيف بتطلع ..
محمود : جيبيلي نتغدا
روان شبحتله : بابا قريب يجي ؛ راجي نتغدو مع بعضنا
محمود : امالا ديريلي زوز نفاص دحي مابين جي
روان تكنطت و مشت المطبخ : ضروري يخدمني ضروري 😤
شبحتلها ازهار : تحمليه اوخيك الله يعلم بنفسيته كيف
_________________________
احمد ف الجنان مع العارف ساكت و متنكد
العارف يبخبخ بِ المية 💦 شبحله : خيرك امهبّي
احمد : المدرسة بيرفعونا رحلة و انى انحرمت
العارف : علاش انحرمت ؟
احمد : يبو 100 جني و انى ماعنديش فلوس و بابا ماباش يعطيني قالي هلبا
العارف : 100 ؟؟ رافعينكم رحلة ولا سفرة هادم !!
احمد : ماهو المدرسة متكلفة بكل شي ماكلة و مبيت و حتى من حوايج النوم بيشروهم
العارف سكت شوية و قال : وين المكان ؟
احمد : بنخيّمو في غريان
العارف : في الصقع ؟؟
أحمد بدي يتسخفله : انى الوحيد اللي بننحرم 😔 صحابي كلهم ماشيين و يوتو في روحهم توا
العارف يشوفله
احمد : ديما حارميني انى والله الا عقلت 😔
العارف طلع فلوس من جيبه و بدي يعد
احمد فرح و ضحك من عيونه 😍
العارف مدهمله : هاك شد
احمد خداهم منه : صحيت اجديدا
العارف : برا للرحلة و تنزّه فطسة في بوك
احمد ضحك و ركب يجري لحوشهم
خش عصام شاد ولده يزن في غمره : السلام عليكم
العارف شبحله : و عليكم السلام
يزن لما شاف العارف قعد يضحك و يفك في روحه من عصام يبي ينزل
عصام ضحك و رخاه
يزن مشي يجري للعارف و فرحان بِ الميه 💦
العارف ضحك و طبس قامه : دار رجلين و بدي يجري
عصام : مشي بكري مستعجل
العارف : وين كنت بيه
عصام : قبل بنحلقه لقيت الحلاق مسكر
العارف : والله لو تحلقه ماني مسامحك ؛ خلي شعر الولد ف حاله فاش ضايقك
عصام : طول يا بوي و بدي ينزل على عيونه
العارف : خليه انى هكي نبيه
_________
يتبع الجزء الأخر للحلقة البوست اللي بعد هذا 🌹