الفصل 23
روايــة #صغار_العم
الـحـلــقــة الــثَالــثـة و الـعــشــرون 🌸
محمود يشوف لساعة ايده و متوتر : فاتت ساعة و نص مش جاية معناته !!
تعفلق و ركب موطوه ؛ و هو طالع شاف هناء و يوسف جايين
خلّا القراج مفتوح و طلع بسرعة متعفلق 🔥
يوسف خش بالسيارة و درس الداخل
هناء شبحتله : مش بتمشي لامك ؟
يوسف : لين نتطمن عليك خشيتي الداخل
هناء ابتسمت
يوسف باسها ف خدها
هناء خافت : لاااا يشوفك حد 😳
يوسف حضنها : طز ف الكل
هناء ضحكت : مش هكي عاد
يوسف قرب منها تاني
هناء خافت ؛ نزلت من السيارة و خشت تجري
يوسف ضحك و طلع
_
هناء راكبة في الدروج و مبسوطة ؛ فتحت باب حوشهم و خشت لقت خواتها مقعمزات ع الكنبة
هناء رايقة : هلووو 😍
سلسبيل شبحتلها
سنابل : وين وين وين ؟؟
هناء ضحكت : تم إلقاء القبض عني
سنابل : و كيف تم الإفراج ؟
هناء : تم و خلاص
سلسبيل : و اخيراً رضيتي عليه
هناء تضحك
سنابل : نبي التفاصيـــل
هناء خاشة لدارها : مش شورك
و سكرت وراها الباب
سلسبيل ساكتة
شبحتلها سنابل : وين سارحة ؟
سلسبيل : نفكر كيف بنقابل محمود
_______________________
محمود واقف بموطوه ع الكورنيش و يفكر ..
اكيد تحب حد مادامها مانزلتش
لكن لالا .. مرات هي تفاجأت و ماعرفتش تتصرف او ممكن تحشمت مني .. عندها الحق اني صدمتها الموضوع يبي وقت باش تستوعب
......
عقد حواجبه : لازم نعرف شن كانت اتدير مع مهاب بروحها !!
__________________________
02:00 ص
يوسف خش بسيارته للقراج و نزل
لقي الضي هارب قعمز ف الجنان يدخن
فتح تليفونه و اتصل بهناء ...
_
هناء متكية ف سريرها تليفونها سايلنت مش حاسة بيه لانها مغمضة عيونها
يوسف اتصل مرة و تنين و تلاثة ماتردش عليه استغرب
طفي دخانه و وقف : وينها هادي !
قام راسه يشوف لبلكونتها لقي الباب مفتوح و الستار يتحرك من نسمة الهواء
حط تليفونه في جيبه و جاب سلوم من المخزن
حطه على حيط البلكونة و ركب ..
_
هناء مازالت متكية ؛ تضرب فيها النسمة و مسترخية ف الظلام
فجأة تحس بحد حاط ايده على خدها
فتحت عيونها و انخلعت : بسم الله
يوسف ابتسم
هناء ركزت فيه و قعمزت بسرعة : انت شن جابك !!
يوسف : قلت مادامك ماترديش خليني نركب نشوفك
هناء وقفت : تليفوني سايلنت
و شبحت للباب لقاته مسكر
فتحت فلاش تليفونها و حطاته ع الكمدينو : معقولة تخش عليا توا ف الليل !!!
يوسف يشوف للتليفون : هذا اللي خديتيه ف مصر ؟
هناء : ايه
يوسف شده يشوف فيه : وين الاول
هناء سكتت
يوسف شبحلها : استعمليه هو و ماتزعلينيش منك
هناء : مش عطتهولك سنابل ؟
يوسف : لالا !
هناء سكتت
يوسف : قصدك رديتيه معاها ؟
هناء فتحت القجر لقاته قاعد في مكانه
يوسف يشوفلها : شن اديري
هناء شبحتله و مازالت ساكتة
يوسف قرب منها : شن رايك ننسوا اللي فات ؟
هناء ابتسمت : نسيته
يوسف ابتسم و شدها من خصرها
هناء توجعت و نحتله ايديه : اي بطني
يوسف شبح لبطنها : ننسا فيها ؛ مازال ماتبيش تبرأ ؟
هناء سكتت
يوسف شبحلها و حط ايده على ذقنها : اسف هنو
هناء تشوفله و ساكتة
يوسف : اسف على كل وجع كنت انى سببه
هناء حطت ايدها على يده و ابتسمت
يوسف : غدوا نبيك تفضي يومك على حسابي
هناء : شن المناسبة ؟
يوسف : بدون مناسبة
هناء : مانقدرش عندي حلقة
يوسف تكنطا و نحّا ايده : قصدك بتخدمي رسمي ؟
هناء قامت حاجبها و شدت ضحكتها
يوسف يشوفلها : ردي عليا
هناء : شروطي اللي قلتهم قدامك امبكري لازم ترضىٰ بيهم
يوسف : لا مش حانرضىٰ
هناء : مادامك جيت و حبيتني هكي لازم ترضىٰ بيا كيف ما انى
يوسف : لكن انى عندي أسباب تخليني نمنعك انك تسوقي و تخدمي و تطلعي بلبس كاجول
هناء قامت حواجبها : و شن هما الأسباب ؟؟
يوسف : اولاً خايف عليك من الخطف ..؛ يعني توقعي يقيموك من السيارة او انتي و السيارة في اي مكان و في اي وقت .. و مافيش حد من الناس يقدر يتكلم او يدير موقف
هناء عقدت حواجبها
يوسف : تانياً لبسك نبيك تغيريه لاني مانقدرش نتخيل واحد من كلاب الشوارع يبدا يناشب فيك و يسمع فيك في كلام مايصلحش
هناء : لبسي مستور و مش ملفت للنظر باش نسمع الكلام اللي تقصده
يوسف : الشعب هذا مايميزش بين الملفت و المش ملفت عندهم الكل ملفتات للنظر فا الأحسن انك تلبسي عباية باش تريحيني ولو شوية
هناء سكتت
يوسف : ثالثاً انى مش ضد فكرة انك تشتغلي ؛ لكن خدمة الإذاعة ماخشتليش راس .. يبدا الشعب كله يسمع في صوتك و تهدريزك و متشوقين باش يشوفوك
هناء ساكتة
يوسف : و من غير رسايل الصبح اللي يبدو يتخابطو و يصبحوا عليك ف الراديو
هناء تسمع فيه و ساكتة
يوسف : خيرك ساكتة
هناء تنهدت : ان شاء الله مايصير الا الخير
يوسف هز راسه و سكت
هناء : توا لازم تطلع
يوسف قعمز ع السرير : مازال
هناء تشوفله : خيرك قعمزت نووض
يوسف شدها من ايدها و وقفها قدامه : هكي لزان عيني عينك ؟
هناء : مانبيش حد يحس بيك عندي
يوسف : من بيحس ف هالليل
هناء : ماتندريش مرات حتى بابا يجيني فجأة ؛ فكنا من المواقف المحرجة
يوسف وقف : باهي تمام
هناء شافت للبلكونة : انت كيف ركبت ؟ نقزت من بلكونتك !
يوسف حرك راسه : بالسلوم
هناء انصدمت : هيييه تو يشوفووه 😨
يوسف : عادي وين المشكلة
هناء : انت بايعها هلبا ره
يوسف قرب منها : نبيع الدنيا كلها على خاطرك بيبي
هناء ابتسمت و وخرت
يوسف قرب منها تاني : شن تفاهمنا هنو
هناء توخر : تفاهمنا في شنو
يوسف يقرب : تبيني نعاود تاني
هناء وخرت ع الشكماجة : خليك بعيد
يوسف قرب من وجهها : تفاهمنا في غدوا ؟
هناء حطت مرافقها ع الشكماجة و وخرت راسها : مانعرفش
يوسف مقرب منها يحرك في خشمه على خشمها : مع ساعة خمسة العشية راجي مني مكالمة
هناء قلبها يدق : ريحتك دخاان
يوسف ..
هناء دفاته من وجهه : يوسف لااا !
يوسف ضحك و وخر
هناء : هيا اطلع
يوسف : نخش لداري و نتصل بيك ماترقديش
هناء : به
يوسف طلع للبلكونة و نزل
و هناء قعدت واقفة تشوف فيه من داخل : مجنون
_
بعد شوية يوسف ركب من الدروج و خش لحوشهم
لقي السنوسي فاتح الراديو و متكي
يوسف : بوي !
السنوسي شبحله : ها جيت
يوسف : خيركم مش فاتحين المولد مخليين العمارة مظلمة
السنوسي : مالياش هلبا كيف طافيه قلت دوشة ع الجيران
يوسف سكت
السنوسي : كنت عند امك ؟
يوسف : ايه و خليت خالتي بايتة معاها
السنوسي : انحرمت من العرس في جرة الطيحة
يوسف : الله غالب
و قعمز هدرز مع بوه شوية و بعدين خش لداره
اتكّا ف سريره و اتصل بهناء ..
هناء ردت : الو
يوسف : اه يابيبي
هناء : في سريرك توا ؟
يوسف : ايه
هناء : الحمد لله ماشافك حد
يوسف ضحك : شن بيقولو يعني نديرو في حاجات عيب 😏
هناء تحشمت : بطل قلة ادب
يوسف : والله من شن خايفة
هناء : لتوا مفيش حد يعرف بإني رجعتلك تبيهم فجأة يكبسونا في دار وحدة و فالليل متأخر !
يوسف : نفهم منك انك ماتبيش تقولي لحد ؟
هناء سكتت
يوسف يهمسلها : هل تريدين ان نعشق بعضنا سراً و نوهم العالم اننا أعداء كما تفعل أمريكا و داعش ؟
هناء ضحكت
_________________________
تاني يوم 🌹
03:00 م
سلسبيل نزلت الجنان بتحاول تفتح المولد
على خشة محمد : شن اديري
سلسبيل شبحتله : انت جيت جيت و النبي افتحه
محمد جي بحداها و قعد يولع فيه
خش محمود من الشارع
سلسبيل تلفتت شافاته تلخبطت
محمود خش الحوش بدون مايكلمها
محمد ولع المولد : لما يجي الضي اطفيه انتي اني شوية وطالع
سلسبيل شبحتله : به
و خشت لحوش حلومة من المطبخ قعمزت بروحها لان الحوش فاضي
_
محمود راكب ف الدروج لقي سنابل تكنس
سنابل شبحتله و تفكرت كلام الرسالة اللي بعته لأختها سكتت
محمود تردد قبل مايسألها : امس سلسبيل شن كانت ادير مع مهاب بروحها ؟
سنابل انصدمت و تلخبطت : اها !!
محمود : مافيش داعي نعاود السؤال
سنابل : امتى ؟
محمود : قلتيلي امتى ؟ معناها طالعة معاه اكتر من مرة !!
سنابل : لاااا قصدي ساعة قداش لاني مانندريش
محمود ركب و ماردش عليها
سنابل تشوفله و تفكر .. حي معناته شافها و هذا علاش بعتلها المسج !!
فجأة تسمع صوت محمد راكب و يتكلم ف التليفون ؛ انخلعت
حطت المكنسة و البالة ف حوشهم و فكت شعرها
شدت خصلاتها من فوق بشدادة الشعر و ساوت حوايجها بسرعة
(( على خاطر البرستيج 😉 ))
محمد ركب تلاقى معاها و هو يتكلم ف التليفون
سنابل ابتسمتله
محمد سكر التليفون و قرب منها : شن اديري
سنابل : شي كيف بننزل
محمد : شن عندك بعدين
سنابل : ولا حاجة
محمد : يعني مش ماشية للعرس
سنابل : اكيد تبصر ؟
محمد ضحك و قرب منها يهمسلها ف وذنها : نحط امي في المزين و نجيك
سنابل شبحتله و ابتسمت
محمد غمزها : جهزي روحك
سنابل : لشني
محمد : عندنا مشوار
سنابل : باهي و اصيل ؟
محمد : مزرد في غنيمة و طلع من الصبح
سنابل : بديتو تتكلمو ؟
محمد : لالا سمعت من الشباب
سنابل شبحت لرقبة سورية : ساوي رقبتك معوجة
محمد : ساويها انتي
سنابل كيف بتساويهاله ...
محمد شدها من خصرها : توا الحوش شبه فاضي ندير فيك مانبي
سنابل خافت : محمد فكنا
محمد حرك راسه بمعنى لا
سنابل تفك ف روحها : راهو والله نعيط
محمد قنط عليها : عيطي ترا
سنابل فنصت فيه و ضحكت : حول خلاص
محمد يبوس فيها ف خدها
سنابل ادف فيه و مصدومة : محمددد شن ادير !!
على ركبة هناء ؛ شافتهم ضحكت
محمد شبحلها و تلخبط ؛ ساوا رقبة سوريته و ركب
هناء تشوفله و تضحك
سنابل شبحت لهناء و وجهها انحمر
هناء شبحتلها : هذا وين تأكدت ان ولاد هالعيلة سخيفين الأدب 😂
______________________
سلسبيل مقعمزة ف مطبخ حلومة و تفكر
اتصل بيها يوسف ردت : الو
يوسف : انتي وين
سلسبيل : في حوش اميمة
يوسف : شوية و اطلعيلي ف الجنان باش تعطيني اللي قتلك عليه
سلسبيل : تمام نراجي فيك
سكرت الخط و وقفت
خشت عليها سنابل تحرك ف ايديها : كان نقولك حي علييييك
سلسبيل خافت : خيرك
سنابل : امس محمود شافك مع مهاب
سلسبيل انصدمت : احلفي 😱
سنابل : والله
سلسبيل : ووووه 😩 .. راهو قال هادي صايعة
سنابل : لازم تدوي معاه و تفهميه علاش روح بيك
سلسبيل : مش حيصدقني
سنابل : ديري اللي عليك و خلاص
سلسبيل تنكدت
______________________
عصام مع مرام ف حوش اماليها : هيا نوضي معاي و ياسرنا زعل
مرام : انت هنتني يا عصام كيف تبيني نروح و ننساهالك بالساهل
عصام : حطي روحك في مكاني كيف تبيني نتصرف ترا ؟
مرام سكتت
عصام : و انى مالزيتكش و ماكنتش نبيك تطلعي انتي تصرفتي من راسك
مرام شبحتله و عيونها دمعو : حتى انت مش مقدر تعبي و وحمي ؛ كل مرة تجيبلي في واحد تبيني نغذيه و انى يالله نقدر ندير غداي و نضم حوشي
و سكتو شوية
عصام قرب منها و حط صبعه تحت عينها : سامحيني حبيبتي
مرام بدت تبكي
عصام : عندك الحق ؛ ممكن انى ثقلت عليك
مرام : انى قعدت نطلب من ماما باش مانحشمكش قدام ضيفك بس
عصام : و توا جيتك باش نردك لحوشك و نعتذر منك
مرام سكتت
عصام : الحوش من غيرك فاضي و مجاوب عليا بكل
مرام حضناته و تبكي : كيف تخليني ايام لا دورتني ولا كلمتني و انى نراجي فيك ؟
عصام : قلت نخليك تاخدي وقتك
مرام شبحتله : و تهون عليك مرتك الحامل ملوحة بروحها !
عصام : من قالك انى مانندريش عليك ، كل يوم نجي و ندوي مع امك و نجيبلك في اللي ناقصك
مرام انصدمت : انى ماكنتش نعرف
عصام : امالا امك مابتش تحكيلك
مرام سكتت
عصام : هيا جيبي شنطتك و خلينا نروحو حبيبتي
مرام : راجيني شوية نتكلم مع ماما
عصام : ماتزعليهاش منك بسببي ؛ هي مابتش تقولك قالت لسبب خاص بينكم
مرام سكتت .. ( ان شاء الله غر ماحشمتنيش معاه ع التطييب !! )
مرام : شن هو السبب ؟
عصام : مابتش تقولي عليه و انى احترمت رغبتها
مرام سكتت
عصام باسها : هيا مرومتي
مرام ابتسمت : باهي لحظات و نجيك
______________________
05:00 م
يوسف مقعمز ف سيارته
فتح تليفونه و اتصل بهناء ..
هناء ردت : اهلين حبيبي
يوسف ابتسم : اااه ليا هلبا ع الروقان و الحب هذا
هناء ضحكت
يوسف : وين انتي
هناء : كيف طلعت من الدوش
يوسف : احييه
هناء تلخبطت : وانت
يوسف : ف السيارة نراجي فيك
هناء : علاش تراجي فيا
يوسف : مش تفاهمنا انك تفضيلي روحك ؟
هناء سكتت
يوسف : جهزي روحك و انزلي
هناء : و ماما !
يوسف : سيارتها مهناش هيا انزلي
__________________________
سنابل في دارها تلبس في وشاحها : مش عارفة وين رافعني
سلسبيل : و انى بنقعد بروحي ؟ حتى هناء طالعة مع يوسف
سنابل : كلمي محمود ينزل و ادوي معاه
سلسبيل سكتت
سنابل خدت شنطتها و كيف طالعة : كان ماما روحت من المزين و دورتني تصرفي
و طلعت تجري من الدار لبست سبيدروها و نزلت
لقت محمد نازل شبحلها : اهلااا
سنابل ابتسمت : عطلتك ولا
محمد يشوف لحوايجها : السروال هذا مايمشيش حاله اركبي غيريه
سنابل شبحت لروحها : علاش خيره
محمد : ضيّق
سنابل : مش هلبا حسيته عادي
محمد فنص فيها : مانقعدش نعاود و نكرر ؛ قلت غيريه يعني بتغيريه
سنابل تكنطت : امالا مانيش طالعة هي
و ركبت الحوش
محمد ركب وراها و وقف ف عتبة حوشهم : تعالي
سنابل خشت لدارها و ماردتش عليه
محمد علّا صوته : نكلم فيك وله !!
طلعت هناء من دارها شافاته : اهلااا
محمد شبحلها : اهلا بيك
هناء : خش خيرك واقف هني
محمد : بالله ناديلي سنابل
هناء ضحكت : دقيقة هي
و خشتلها ف الدار : سنابل محمد يبيك
سنابل متعفلقة : قوليله مش جاية
هناء استغربت : خيركم ؟ كنتو عسل معسل 😂
سنابل ساكتة
سلسبيل : قاللها غيري السروال ضيق طرمت شواربها عليه
هناء شبحتلها : عنده الحق هذا معاش يلتبس
محمد من برا الدار : شن صار يا هناء ؟!!
هناء جاته : خشلها انت قالت مش جاية
محمد تكنطا : من معاها ؟
هناء : خش سلسبيل بس
لبست شوزها و نزلت ليوسف
محمد خش لسنابل : تتكلمي بجديات انتي ؟
سنابل مقعمزة على سريرها و قالبة وجهها : ايه
سلسبيل طلعت من الدار و خلتهم
محمد يشوف لسنابل ؛ قرب منها و قعمز على ركابه قدامها
سنابل شبحتله : شن تبي لاحقني
محمد شد ايدها : انى فاش زعلتك باش تخشي و تخليني واقف ؟
سنابل فكت ايدها : لإنك فنصت فيا و عليت صوتك
محمد شد ايدها و باسها : اسف يا عمري مش قصدي نزعلك
سنابل سكتت
محمد : هي نوضي و خلي يومنا يمشي حلو لان الفرصة هادي معاش تتكرر
سنابل : يعني مانغيراش ؟
محمد وقف ؛ فتح دولابها و قعد يشوف ف حوايجها
سنابل تحشمت : لا سكر فيه حاجات خاصة 😳
محمد ضحك و طلع سروال جينز : البسي هذا ؛ شايفه عليك من قبل مش ضيق
حطه ع السرير و طلع من الدار
سنابل تكنطت : اوفففف 😤
__________________________
هناء مع يوسف ف السيارة : وين بنمشوا ؟
يوسف : نوصلو و تعرفي
هناء ابتسمت و فتحت المسجل : شن عندك دسكات ؟
يوسف : شوفي القجر
هناء فتحت القجر و طلعت منه دسكة شغلتها
انفتحت اغنية عمرو دياب " جماله "
يوسف علّا الصوت و بدي يغني معاها
هناء شبحتله و ضحكت : من امتى تسمع للأغاني هادو و انت من يومك تحب الأجنبي
يوسف شبحلها : من الي تعلقت بيك بديت نسمع لأي شي ليه علاقة بالحب
هناء ابتسمت و حطت ايدها ورا راسه تخربشله ف شعره
يوسف : فكينا نديرو حادث هكي
هناء ضحكت
__________________________
سلسبيل بعتت مسج لمحمود بإنه ينزلها في حوش حلومة ..؛ و نزلت تراجي فيه
محمود فرح وقت قري المسج و بعد شوية نزل
سلسبيل شبحتله و سكتت
محمود وقف معاها وهو ساكت
سلسبيل متلخبطة : سنابل قتلي انك شفتني وقت اللي روح بيا مهاب
محمود عقد حواجبه و سكت
سلسبيل : علاش ماكلمتنيش وقتها ؟
محمود : مابيتش نفسد عليك
سلسبيل : شن هو اللي بتفسده عليا ؟
محمود سكت
سلسبيل : راهو مافي شي بيني و بينه انت فاهم غلط
محمود : شن اللي بنفهمه وقت اللي نشوفك مروحة معاه عقابات الليل !!
سلسبيل انحرجت و بدت تحكيله في اللي صار ...
محمود : يعني يوسف هو الي بعتك معاه ؟
سلسبيل : ايه لان مافيش من يروح بيا و حتى كلمنا محمد قال انه في العرس و مايقدرش يطلع من غادي
محمود : و علاش ماكلمتونيش اني !
سلسبيل ضحكت : امالا بتركبني فوق الموطو ؟
محمود سكت
سلسبيل : ياريت تنحي الفكرة المش كويسة عليا من راسك ، و اسأل حتى يوسف ع اللي صار و هو تو يحكيلك
محمود اطمن : مصدقك مفيش داعي نسأله
سلسبيل ابتسمت
محمود تردد قبل مايسألها : كلمتك ع الفايبر امس علاش مارديتيش عليا
سلسبيل تلخبطت : امتى ؟
محمود : بعد ماروحتي
سلسبيل متلخبطة : ممكن فتحت المسج بدون مانركز لاني لقيت هلبا رسايل من القروبات اللي عندي
محمود سكت
سلسبيل : كنت تبي حاجة ؟
محمود : افتحيها توا
سلسبيل انحرجت و حست بروحها سخنت
محمود يشوفلها : ولا ماتبيش ؟
سلسبيل قلبها يدق : عادي تو نشوفها
و فتحت تليفونها تشوف فيها
محمود يشوفلها و قلبه يدق
سلسبيل غمضت عيونها
محمود لفتها ليه : سلسبيل !
سلسبيل شبحتله و عيونها دمعو من الانحراج
محمود : عارف اني فاجأتك او بالأحرى صدمتك لاني كنت ديما عنيف معاك ؛ لكن هادو مشاعري و معش قادر ندس اكتر من هكي ، حاولت اني نتفاداك لكن ماقدرتش
سلسبيل تسمع فيه و ساكتة
محمود : لو تبي تفكري خودي وقتك ؛ من حقك
سلسبيل : محمود ..
قاطعها محمود : توا ماتقوليلي شي ؛ خودي وقتك في التفكير و ماتستعجليش عندك ثلاثة ايام
سلسبيل سكتت
محمود ابتسملها و طلع من الحوش و ركب
سلسبيل قعمزت ع الكنبة و تكت راسها ع المخدة و بدت تبكي : علاش هكي ياربي علااااش 😭
________________________
سنابل نزلت من حوشهم لقت محمد يراجي فيها في الجنان
محمد شبحلها : هذا كله في سروال ؟
سنابل : عطلت لأني غيرت حتى البلوزة و الوشاح
محمد ضحك : كويس
و كيف طالعين هما الزوز للسيارة
فجأة سنابل تعتر و اتطيح على حاشية باب الشارع
عيطت : اااااه
محمد انخلع و جاها شدها : يا ساتر
سنابل شادة حاجبها و تبكي : اااي 😭
محمد شادها و مخلوع : نحي ايدك خليني نشوفك
سنابل نحت ايدها و بدي الدم يشر
محمد تخزرط و شدلها ع الجرح : جرحك يبي الخياطة
سنابل خافت : لاااااا 😭 ... ااه يا ماما وينك
محمد قامها و ركبها السيارة : معش تعيطي
سنابل تبكي : جمالي تشششوه 😭
محمد ركب السيارة و طلع بسرعة
سنابل تبكي : كله منك خليتني نولي بعد ماطلعت
محمد متضايق : معش تبكي هكي يزيد الجرح يوجعك
سنابل شادة ع الجرح و تعيط : مستحيل نخيطه مستحيييييييل 😭
محمد يشوفلها و يشوف للطريق و متفركس
سنابل : اكيد تشوهت ونبي عملية تجميل 😭
محمد شبحلها : ماتخافيش مش للدرجة هادي
سنابل تبكي بالعبرة : لالا انت تقولي هكي باش اطمني .. و تو معش تحبني زي قبل لاني وليت شينااااا 😭
محمد ساكت و مركز مع الطريق
سنابل تعيط : ااااه راسي دااااااخ 😭
__________________________
يوسف و هناء وصلوا لمصيف فاتح جديد و نزلو
هناء ضحكت : فلاي بورد !
يوسف سكر السيارة و اتصل بصاحبه اللي يخدم في المصيف
يوسف : انى وصلت ... تمام
سكر الخط وقرب من هناء
هناء شبحتله : شن خطر عليك تجيبني هني
يوسف شدها من ايدها و خشو هما الزوز
لقو المصيف فاضي مافيشي ناس و الطاولة اللي محجوزة بإسمهم موجودة و بجنبها ورد و شموع و اجواء رومانسية
هناء ابتسمت : الله ع الجو محلاه 😍
يوسف قعمزها ف الكرسي : تفضلي برنسيستي
هناء ضحكت
يوسف قعمز معاها
هناء تشوف للمصيف : علاش فاضي ؟
يوسف : مازال الافتتاح
هناء : كنت نشوف ف صوره ع الفيس لكن ماتوقعتش انه مازال مافتحش
يوسف : غر عندي واسطة مع الشباب كان هدا ماقدرتش نخش ولا ندير شي
هناء شدتله ايديه : شكرًا هلبا حبيبي احلى مفاجأة
يوسف باس ايدها : تستاهلي ياعيوني
________________________
محمد وصل للمستشفى و فتح على سنابل الباب : هي هاتي ايدك و انزلي بالشوية
سنابل شادة الجرح و تبكي : قيمني مانقدرش نوقف رجلي شكلها انجرحت
محمد قامها في غمره و سكر الباب برجله
سنابل تبكي : انى تشوهت و اكيد حتى انعميت 😭
محمد خاش بيها يجري : مافيك شي حبيبتي الجرح ف حاجبك
سنابل تبكي : لالالالا انت تكذب عليا 😭 عيني مش قادرة نفتحها
محمد خش بيها الداخل ؛ خدوها منه الإسعاف و قعد هو يراجي برا ف الممر
____
سنابل تبكي الداخل : محمددددد !!! 😭
محمد يسمع فيها و مضايق ؛ شاف لروحه لقي سوريته دم
سنابل تعيط : نبي محمددد 😭
الممرضة تشد فيها : اهدي جرحك عميق لازم نخيطوه
سنابل منهارة و ادف فيها هي و الدكتور : نبي محمد معاااااااي
الدكتور تعفلق : مش قادر حتى نكشف عليك بالحالة اللي انتي فيها ؛ اهدي لو سمحتي باش نتمو شغلنا و تروحي
سنابل : نبي محمد 😭
الممرضة تكنطت و طلعت البرا : وين محمد ؟
محمد شبحلها : نعم !
الممرضة شبحتله : ياريت تخش للحالة اللي جبتها ماخلتناش نقربوها و هي تبكي
محمد خش معاها
سنابل شبحاته زادت تبكي : محمد ماتخليهمش يمسونيييي
محمد قرب منها و شدها : اهدي حبيبتي
سنابل : خااااايفة 😭
محمد يوشوش فيها : انى معاك علاش خايفة ؟
الدكتور يشوفله : قريبها ؟
محمد تلخبط : ايه
سنابل شدت فيه بيديها و بدت تهدأ
الدكتور قرب منها يمسح ف الدم
سنابل : اي بالشوية 😢
الدكتور : حاضر غر خليك هادية
سنابل سكتت
الدكتور يبي يلهيها : شن اسمك
سنابل تتكلم بالعبرة : سنابل
الدكتور يعقم ف الجرح : كيف انجرحتي
سنابل : عترت و طحت على الباب
الدكتور دارلها بنج و هي ساكتة
بعد شوية بدي يخيط : باب حديد ؟
سنابل تتوجع : ايه
الدكتور يخيط : ان شاء الله بسيطة
سنابل تتوجع : اااه
محمد شد على ايدها : ارخي روحك
سنابل : حارة يا محمد 😭
محمد يشوفلها و مستاجع عليها : تحملي شوية بس
الدكتور ساكت و مركز مع الخياطة
سنابل تعيط : ااااي 😭
محمد توتر : اششش .. شوية و يتملك
سنابل : غر خليني نعيط يا احميده 😭 انتو مش حاسين بللي نحس فيييييه 😭
الممرضة تضحك
سنابل سمعتها حمقت : انتي اسكتي خير مانوضلكككك
محمد زراته الضحكة و وشوشها : عيب اللي اديري فيه انتي ماكش صغيرة
سنابل شادة على ايديه بالقوة لين خبشاته : خلاص معاش قادرة 😩
محمد يحس ف الخباش و ساكت
بعد شوية الدكتور كمل خياطة و غطّا الجرح
سنابل دهشت و سكتت
الدكتور : لازم تجي يوم بعد يوم اتداوي جرحك و ماتهمليشي
سنابل ساكتة
الدكتور شبحلها : سمعتيني ؟
سنابل ماتبيش ترد عليه
محمد : ان شاء الله
و شبح لسنابل : وريه رجلك خليه يداويها
سنابل حركت كتفها بمعنى لا
محمد قام حواجبه : شن لا خليه يشوفهالك
سنابل : مانبيش تو نشوفها بروحي
محمد شبح لسروالها لقاه دم جهة الركبة
يوشوش فيها : هيا حبيبتي على خاطري خلينا نتطمنو
سنابل شبحتله و عيونها مدمعات : تو يقولي تبي الخياطة حتى هي
محمد : لالا مش خياطة غر مديها هيا
الدكتور شبحلهم : فيه حاجة ؟
محمد شبحله : نبو نشوفو جرح رجلها حتى هو
الدكتور شبح للممرضة : عريلي ع الجرح
الممرضة قربت من سنابل : مدي رجلك
سنابل مدت رجلها و خايفة
محمد واقف بحداها و شادة في ايده
محمد شبحلها : ارخي روحك
سنابل ساكتة
داوالها الدكتور جرحها و ناضت
محمد : شكرًا دكتور بارك الله فيك
الدكتور : الشكر لله
محمد شد سنابل من ايدها وطلعوا ..
سنابل دوب ماتمشي : مش قادرة نمشي رجلي توجع
_
طلعو من المستشفى و ركبو السيارة
محمد شبحلها : الحمد لله على سلامتك
سنابل تكت راسها على كتفه داهشة من البكي
محمد حط ايده على خدها : و اخيرا هديتي
سنابل غمضت عيونها : نبي نرقد
محمد ولع السيارة : نروحو و ارتاحي في سريرك
سنابل قامت راسها من عليه و اتكت على مسند الكرسي ؛ فتحت مراية الشمسية تشوف في روحها
محمد طلع بالسيارة و شبحلها : ها اطمنتي توا ؟
سنابل سكرت المراية و سكتت
_______________________
هناء و يوسف يتعشوا على ضي الغروب و عازفة الكمان تعزف بحداهم
هناء تضحك : هاذي وين لقيتها
يوسف : استمتعي بوقتك ياقلبي و ماتفكريش
هناء شبحتله : غر صحابك ف المصيف كان هذا رقصنا
يوسف ضحك : خاطرك فيها
هناء : هلبا
يوسف سكت و هناء شبحت للبحر
يوسف خدي من جنبه تاج فيه طرحة و يشوفلها : نتمشو ؟
هناء شبحتله : عادي
و ناضو هما الزوز يتمشو ع الشط و يوسف حاط ايده وراه
هناء : البحر يفكر فيا بأحلى ذكرياتي معاك
يوسف ابتسم : و انى لهذا السبب جبتك هني
شدها من ايدها و وقفو
هناء شبحتله
يوسف لبسها التاج
هناء ضحكت و حطت ايدها عليه : شن هذا
يوسف طلع بوكس صغير من جيبه و شد هناء من ايدها : هنو
هناء شبحت للبوكس ؛ لقاته نفس البوكس متع عيد ميلادها اللي مابتش تفتحه
يوسف فتحه 💍 و شبحلها
هناء تفاجأت : خاتمي !
يوسف يشوفلها : تتزوجيني ؟
هناء شبحتله و دمعت
يوسف ابتسم
هناء : اكيد ❤️
يوسف ضحك و لبسها الخاتم : نوعدك من اليوم تكوني معاي و مافيش اي حاجة تفرق بينا حبيبتي
هناء تشوفله و قلبها يدق : ان شاء الله
يوسف باس ايدها : معش نبيك تنحيه من صبعك بكل
هناء حطت ايدها على لحيته : حاضر حبيبي
يوسف قامها يلود بيها
و بدت الألعاب النارية تضرب 💥
هناء انخلعت و ضحكت
____________________________
نجاة روحت من المزين و خشت لدارها تلبس في قفطانها
_
سلسبيل برا الدار تتصل بسنابل ماتردش : حي عليك حي شن بنقوللها
تتصل بمحمد حتى هو مايردش مخليه سايلنت من لما كانو ف المستشفى
سلسبيل : ديرو العمايل و خلوني حاصلة 😒
طلعت نجاة من دارها : سلسبيل ؟
سلسبيل شبحتلها : نعم
نجاة : وين خواتك ؟
سلسبيل : طلعوا لمحل
نجاة : اما محل و سيارة هناء قاعدة
سلسبيل تلخبطت : مشو مع يوسف
نجاة قامت حاجبها : متأكدة سنابل معاهم ؟!!
سلسبيل خافت : ايه طلعو مع بعض
نجاة : و كيف هناء طلعت مع يوسف هكي ؟ مش ماتبيش حتى تدوي معاه ؟!
سلسبيل تلخبطت : هو لقاهم كيف طالعين أصر انه يوصلهم
نجاة تلبس في عبايتها : به ؛ بوك يراجي فيا لوطا كلميهم يروحو خير مايحس بيهم
سلسبيل : باهي
نجاة : و نروح نلقى الحوش مضموم تسمعي فيا ولا
سلسبيل تشوفلها : تصدقي موسع بالك كيف حتى ماشية المزين و شارية قفطان جديد و هي خلت بنتك في العمليات
نجاة : ماشية على خاطر عمتك مش على خاطرها ؛ و هي كان تشوفي وجهها كيف رايح تقولي عندها عزي ماكأنهاش عروسة
سلسبيل ضحكت : ان شاء الله ماتتهنىٰ
نجاة خدت شنطتها و كيف طالعة : زي ماقتلك اتصلي بخواتك يروحو
سلسبيل : باهي حاضر
____________________
محمد خش بالسيارة لشارعهم لقي اسماعيل واقف لف من الشارع التاني
سنابل شبحتله : علاش خشيت من هني
محمد : بوك واقف قدام الحوش ؛ بنراجيه لين يطلع
سنابل سكتت
_
بعد شوية اسماعيل طلع و محمد خش من القراج و نزل
سنابل حاطة ايدها ع الجرح و مسكرة عيونها
جاها محمد فتح عليها الباب : هي
سنابل شبحتله و مدتله ايدها
محمد نزلها و سكر الباب
سنابل خاشة معاه للدروج دوب ماتمشي : نحس في روحي دايخة
محمد شبحلها
سنابل : و حتى رجلي مش قادرة نركب بيها
محمد : تبي نقيمك ؟
سنابل شبحتله و هزت راسها بمعنى ايه
محمد ضحك و قامها : تدلعي عليا !
سنابل بدت تبكي : لقيت روحك تعاني وله 😢
محمد شبحلها
سنابل تبكي : كنت تبي تغير جوك خليتك غارق بالدم و حاصل فيا ف المستشفيات
محمد : لا ماتقوليش هكي حبيبتي ؛ باهي اللي كنت معاك كان سمعت بيك بعدين راهو مش عارف شن صار فيا
سنابل : و كان مش منك راني ماطحتش
محمد سكت
سنابل : كله منك خليتني نولي و نغير حوايجي
محمد : خلاص حبيبتي مقدر و مكتوب ؛ يعني هكي ولا هكي كنتي حاتطيحي
سنابل سكتت
و محمد ركب بيها
على نزلة عصام رافع مرام للعرس
عقد حواجبه و استغرب : خيركم ؟
محمد تلخبط و بدي يحكيله : ..
مرام لابسة خمار : الحمد لله على سلامتك سنابل
سنابل : الله يسلمك
عصام : و حطها تركب بروحها علاش قايمها
محمد : حتى رجلها انفتحت ماتقدرش تمشي عليها
سنابل ساكتة
عصام : هاتها تو نركبها انى
مرام ضحكت و شداته من ايده : خلاص توا هما شبه وصلو ؛ خلينا ننزلو وقت
عصام سكت و نزل معاها
محمد شبح لسنابل : انتي ولا كأن ؟
سنابل تشوفله : خيرني
محمد : عمك شافك في غمري و مش معدلة كإنك في غمر بوك
سنابل تتدلع : حمودي هيا ركبني للحوش نبي نرقد
_______________
عصام ركب السيارة و طلع هو و مرام
مرام تضحك : محلاهم يهبلو
عصام شبحلها : شن هما اللي يهبلو
مرام تلخبطت : لا شي
عصام : ماخشتليش راس سيرة رجلها مجروحة
مرام : حرام عليك البنية حاجبها مخيط أربعة بونتو و رجلها دم واضح طيحة قوية
عصام : مش عارف حسيت فيه حاجة مش تمام
مرام ضحكت : لالا انت تفكيرك مشي شِمال طول ماتظلمهمش
عصام سكت
__________________________
سنابل اتكت ف سريرها و محمد ينحيلها في سبيدروها
سلسبيل تشوفلها : خسارة يومكم تفكرس
محمد : تتعوض المهم سلامتها
سنابل نحت الوشاح و مداته لسلسبيل : أطفي الضي نبي نرقد
سلسبيل خدت منها الوشاح
محمد وقف : ارتاحي ولما تفيقي اتصلي بيا
سنابل شداته من ايده : لا خليك معاي
سلسبيل ضحكت
محمد : انتي بترقدي شن بندير معاك
سلسبيل : حي عليك شن يحزها توا
سنابل : ع الأقل رضيني لان الطيحة بسببك
محمد قام حواجبه : حي عليها اهيا !
سلسبيل تضحك : لقت فاش تحل عسلها توا
محمد ضحك : لا هي حلاته من بكري
سلسبيل : اكيد دارت العار وله 😂
سنابل تكنطت : هي اطلعو تسهوكو برا 😒
محمد شبحلها : بنوصل امي للعرس مافيهاش كيف نقعد توا
سنابل : خلي محمود يوصلها بسيارتك
محمد : و ماهو بنجيب احمد و روان من حوش جدي
سنابل : و يجيبهم محمود !!!
محمد سكت
سنابل زعلت : خلاص برالهم زينة ..؛ ماهم اهم مني توا و مساكين طايحين و خيطولهم بونتوات
سلسبيل ضحكت و طلعت من الدار
سنابل قلبت وجهها للجهة التانية و سكتت
محمد قرب منها وقعمز بحداها ع السرير : هاني قاعد معاك ياعيوني كله ولا زعلك
سنابل شبحتله : اتكّا معاي 😢
محمد : شن نتكّا معاك !!
سنابل : عادي شن فيها
محمد سكت ؛ ساوا تقعميزته ع مسند السرير و سنابل اتكت عليه
سنابل : داهشة و تعبانة نبي نرقد
محمد : دهشتي لانك بكيتي هلبا
سنابل غمضت عيونها : بكيت لاني نخاف من اليبرا
محمد ضحك
سنابل ضرباته بالشوية على ايده : معش تضحك
محمد يمسحلها على ايدها من فوق : حاضر حبيبتي ؛ توا ارتاحي بس
فتح تليفونه و بعت مسج لمحمود
_________________________
بعد ساعة 🌹
يوسف و هناء وصلو الحوش و خشو من القراج
هناء نزلت شادة ورد
يوسف نزل و وقف معاها : شنو يابيبي
هناء ضحكت : شنو
يوسف : مبسوطة ؟
هناء : هللبا ..؛ كان احلى يوم في عمري
يوسف ابتسم : ان شاء الله دوم مبسوطة
هناء : وياك يارب
يوسف يشوفلها و عيونه قلوب
هناء : مش عارفة كيف بنشكرك مهما نقولك مانقدرش نوافيك .. ربي يخليك ليا
يوسف : و يحفظك ليا يا غلاتي .. مش قدرك ياعمري لو بيدي نجيبلك الدنيا كلها
هناء ابتسمت
_____________________
محمد شبح لسنابل لقاها راقدة
نحالها راسها من عليه و ناض
سنابل شبحتله : وين ماشي
محمد شبحلها : بنطلع
سنابل كشرت : خليك معاااي
محمد باسها ف جبهتها : نركب نغير حوايجي و نجيك
سنابل غمضت عيونها و رقدت
محمد ساوا حوايجه و طلع من الدار
لقي سلسبيل ف المطبخ ادير في كيكة خشلها
سلسبيل شبحتله : و اخيراً طلقاتك
محمد : اقسم بالله تقولي نعامل في بيبي اصغيّر
سلسبيل ضحكت : هي لما تمرض تحب تتدلع و بالذات عليك عاد
محمد ضحك و شرب امية
خشو هناء و يوسف : السلام عليكم
ردو عليهم : و عليكم السلام
هناء رايقة : كيفكم يا حلوين
محمد يشوفلها : شن الروقان هذا
يوسف و هناء ضحكو
سلسبيل هزت راسها ليوسف بمعنى شني و يوسف غمزها
سلسبيل ضحكت و شبحت لمحمد : اركب غير حوايجك و انزل أشرب معانا نسكافيه
يوسف شبحله : منين الدم !
محمد : سنابل طاحت و رفعت خيطتها
هناء انصدمت : هيييه 😱
يوسف : كيف طاحت ؟
هناء : هي وين توا ؟؟
سلسبيل : راقدة
هناء مشتلها تجري في الدار
يوسف : كيف صار ؟
محمد يحكيله ...
_____
هناء فتحت الضي : سنابل ؟؟
سنابل شبحتلها
هناء قربت منها : ترا نشوفك ؟؟
سنابل قعمزت
هناء تشوفلها و متأثرة : احيييه محرها
سنابل بدت تبكي : قريب متت 😭
__________________________
( يوم عيد الأضحى 🐑 )
08:00 ص
نزلو صغار العم للجنان هما و عمامهم باش يذبحوا
قعمزو سنابل و سلسبيل و روان ف الطاولة و يهدرزو
اصيل يشد ف خروف حلومة هو و محمود
محمود : تي اجبده اجبده
اصيل هرب منه الخروف : مهبول شن بنديرله
محمود لحقه و قعمز عليه
جاهم السنوسي شاد الموس : أربطه و حطهولي هني
عماد و اسماعيل واقفين مع سنوسي و ساكتين
محمد نزل من حوشهم لابس شورت ازرق و تيشرت ابيض ؛ عيّد على أعمامه و جي جنب سنابل
سنابل شبحتله و ابتسمت : كل عام و انت بخير
محمد ابتسم : وانتي بخير ؛ كيف حالك اليوم ؟
سنابل حطت ايدها على الجرح : الحمد لله
محمد وشوشها : تجي معاي ؟
سنابل : وين
محمد شبح للي معاه وشبحلها : ورا الحوش
سنابل فنصت فيه و ضحكت : لا فكنا
_________
هناء طلعت من حوشهم و طقت على يوسف
يوسف فتح : اهلااا
هناء ابتسمت : كل سنة وانت طيب
يوسف : و انتي بألف خير ياعمري
هناء فنصت فيه : عمي تو يسمعك
يوسف : نزل توا
هناء : انزل معاي
يوسف شبح للدروج و جبدها من ايدها دخلها معاه و سكر الباب
هناء مخلوعة و قلبها يدق : خيرك ؟؟
يوسف شدها من خصرها و قربها ليه : مرايف عليك يا قلبي
________________________
حلومة مقعمزة ف حوشها مع كناينها و متغششة : اول مرة الحاج يعيّد بروحه
نجاة : شن خلّا ربي ماعطاه يا اللاّي معيّد ف الحج
ازهار : و حتى سعاد مخلية مكانها مسيكينة
نجاة شبحتلها و سكتت
حلومة : والله مافارقت بالي لحظة حتى هي مسيكينة لا قادرة تنوض ولا تتحرك
نجاة : تحسي السنوسي مش مأثر فيه الموضوع عادي
خشو عصام و مرام : السلام عليكم
ردو عليهم : و عليكم السلام
عصام عيّد على امه و باس راسها
مرام عيدت على سلفاتها و وصلت في حلومة : كل سنة و انتي طيبة اللاّي
حلومة تشوفلها : وانتي طيبة ان شاء الله
عصام يفنص فيها
مرام باست على راسها : ربي يحفظك لينا
حلومة : سلمك و يخليك
عصام طلع للجنان و مرام حطت ايدها على بطنها و قعمزت
____________________
11:00 ص
اروى بنت امال مقعمزة مع عزوزتها و حماواتها تغسل في الدوارة بحنتها و منقرفة
عزوزتها تشوفلها : اغسلي كويس اغسلي كويس 😠
اروى قالبة وجهها و ساكتة
جتها حماتها حطتلها مصارين : مشي أمورك حتى على هادم
اروى تغسل في الكرشة و عيونها مدمعات
_______________________
العمام خشو ياكلو مع حلومة في حوشها و عصام و صغار العم مقعمزين ياكلو في شواء و سلايط و قلاية ع الطاولة في الجنان
هناء مقعمزة جنب يوسف : خيرك ماتاكلش
يوسف شبحلها : نراجي ف حبيبة قلبي توكلني
هناء ضحكت شبحت لصغار عمامها لقتهم لاهيين ؛ وكلاته طرف شواية
شافتها روان ضحكت
سنابل مقعمزة جنب محمد و ساكتة
محمد : وينها السلاطة اللي درتيها
سنابل : مادرتش
محمد قام حواجبه : علاش
سنابل شبحتله : مش قتلي ماديري شي لان البونتوات قاعدات
محمد ضحك و شبحلها : باهي و خلاص
محمود يوشوش ف سلسبيل : الثلاثة ايام تمو
سلسبيل تلخبطت و وقفت : وين الكاتشاب ؟؟؟
و خشت تجري للمطبخ
محمود يشوفلها و ساكت
روان مركزة معاه و ساكتة
اصيل يهدرز مع عصام و مرة مرة يكسر في عينه على محمد و سنابل
احمد شد راس خروف و جابه يبعبع بيه
محمد شبحله : تناشب بيه حد بتاكل كفوف و بتركب
احمد مشي يسطرب بيه و رده في مكانها
_____________________
12:00 م
كناين حلومة في المطبخ يحشو في العصبان و يهدرزو
مرام مقعمزة ع الكرسي بحداهم و تشوفلهم
خشت عليهم حلومة : شن صار معاكم
ازهار شبحتلها : قريب نتمو
نجاة : مرام ! تعالي عاونينا باش فيسع مانتمو
مرام شبحت لظوافرها 💅 و شبحتلها : تعرفي مانتحملش حتى نمسه المصران يقزز فيا
نجاة ضحكت
و حلومة دمها انحرق
خشت هناء عليهم : تبو نعاونكم ؟
ازهار : تبي تحشي معانا قعمزي ع الأقل تتعلمي
هناء : لالالا ؛ لا انى نحبه ولا يوسف ماعندي علاش بنتعلمه
ازهار ضحكت : كان تسمعك سعاد
شبحتلها نجاة : تسمع ولا تملح وين تلقى زيها ؟؟؟
مرام ضحكت : شنو رجعتو انتي ويوسف ؟
هناء طلعت من المطبخ و ماردتش عليها
نجاة : لتوا ماتبيش ترضىٰ عليه تقولي دارولها كتيبة
___________________________
10:30 م
هناء مقعمزة مع صغار العم في حوش حلومة
خش يوسف و وقف ف العتبة : السلام عليكم
ردو عليه : و عليكم السلام
جت عينه في عين هناء غمزها
هناء تلخبطت و تحشمت قدام حلومة
روان ضحكت و وشوشتها : ايوه حني رجعنااا
هناء شبحتلها و ضحكت : الهي في عمرك
روان تضحك
حلومة تشوف ليوسف : قعمز شوية خيرك واقف
يوسف : حاضر به
و قعمز جنب هناء ؛ ماكلمتوش جدي ؟
محمد : بعد الظهر كلمناه شوية و سكر علينا قال رصيده بيفصل
يوسف : و عاودتوله انتو
محمد : يسكر علينا
يوسف ضحك
هناء شبحتله : كنت مهناش ؟
يوسف شبحلها : ايه عند امي
هناء : كيف حالها اليوم
يوسف : احسن بشوية الحمد لله
حلومة تشوفلهم و مبتسمة : صفيتو القلوب ؟
( كلهم شبحولهم 👀 )
هناء تلخبطت و وجهها انحمر
يوسف ضحك : ايه الحمد لله
حلومة فرحت : الحمد لله ..؛ امالا يروح جدكم بنديرو العرس
هناء : خلي مرت عمي تشد صحتها و تنوض بالسلامة قبل
محمود يشوف لسلسبيل و ساكت
سلسبيل توترت : انى بنبات عندك يا اميمة
حلومة : باتي مرحبتين
سلسبيل اتكت ع المندار ؛ تغطت بشرشاف و عطتهم بظهرها
محمود تكنطا و طلع
محمد يوشوش في سنابل : غدوا من بيرفعك
سنابل : بابا
محمد : مابعده شن بيصير فيه
سنابل : تنحاية البونتوات مش زي الخياطة 😒
محمد : نبصر معاك حبيبتي
سنابل : به 😒
محمد : قصدك زعلتي
سنابل : لالا
محمد وشوشها : باهي وريني ضحكتك
سنابل : هاهاها 😊
محمد ضحك : نعرف كيف نضحكك
شبح للي معاهم لقاهم لاهيين قرصها ف جنبها
سنابل انصدمت 😳 و ناضت تجري
محمد ضحك و وقف
حلومة شبحتله : وين ماشي ؟
محمد شبحلها : بنركب نرقد نحس في روحي تاعب
حلومة : باهي ارتاح
محمد : تبي حاجة ؟
حلومة : صحيت سلم ولدي
محمد : سلمك
و شبح لروان : بايتة هني ؟
روان فاتحة النت : ايه
محمد سكت و طلع لحق سنابل
لقاها كيف راكبة ف الدروج
سنابل شبحاته خافت و خشت لحوشهم تجري
محمد ضحك وركب لحوشهم
خش لقي ازهار مقعمزة مع عماد يتفرجو ع التلفزيون و مرقدة احمد على رجلها
ازهار : وين خوتك ؟
محمد : محمود مانندريش عليه وين و روان قعدت لوطا
عماد : انزل ركبها و قلها ياسر منه البيتان لوطا
ازهار شبحتله : خليها تبات تونس امك معليشي
عماد علّا صوته : كلمة و قلتها
محمد : تو ننزلها باهي
و غمز امه بمعنى تعالي
ازهار فهماته : احميده تعالى قيم احمد لسريره
محمد جاها و قام احمد منها
ازهار ناضت و لحقاته
محمد حطه ف سريره و شبحلها : زي الصغيّر راهو ينوض بروحه مش لين نقيموه
ازهار : تبي حاجة ؟
محمد : قعمزي نبيك في موضوع
ازهار قعمزت : شن فيه !
محمد : اسمعي نبي نفتح الموضوع معاك انتي قبل لان عارف بوي و عقليته
ازهار انشغلت : شن درت من عملة ؟! نعرفك مش متع عمايل يا وليدي ياسرني محمود
محمد ضحك : تي مافي شي يا امي خيرك واتية
ازهار : خش في الموضوع طول
محمد سكت شوية و قال : نبي نخطب
ازهار سكتت و قعدت تشوفله
محمد ضحك : خيرك سكتي ؟
ازهار مصدومة : تخطب !!
محمد : ايه
ازهار : تخطب شني توا و انت مازال صغير
محمد : انى قلت بنخطب بس مش بنتزوج يعني اكيد مش حاناخدها توا
ازهار سكتت
محمد : نبيك انتي تكلميلي بوي
ازهار : من هي ؟ بنت شكون !!
محمد : سنابل
ازهار فنصت فيه : سنابل سناابل ؟؟؟ سنابل بنت عمك !
محمد : ايه سنابل بنت عمي
ازهار سكتت
محمد : شن رايك فيها
ازهار سكتت شوية و قالت : هي ماشاء الله عليها لكن ..
محمد : لكن شني
ازهار : انتو مازلتو صغار يا احميده بوك و عمك مش حايوافقوا من توا
محمد تكنطا : علاش وين العيب في الموضوع ؟
ازهار : ماقلتش عيب .. اول شي انت مش متخرج و هي مازالت حتى ماكملتش الثانوي ع الأقل تبو عامين تانيات باش تقدرو تنخطبو لبين انت تخرجت
محمد : انى مازالي سنة بس و نكمل و هي حاتكمل قرايتها عادي مش حاتوقف
ازهار تحرك في راسها بمعنى لا
محمد : نبي نعطي فيها حتى كلمة خير مايسمع عمي اني نبيها بطريقة تانية و يكرهني
ازهار : انت صغير ياولدي مازال بكري ع الخطوبة
محمد : هازية عليا ولا كيف ؟؟ خايفة مانكونش قد كلمتي ؟
ازهار : مش هازية لكن تخاف حتى عمك يردك
محمد متكنطي : يا امي قتلك أعطو فيها كلمة بس .. حتى لين بنيت في ارضنا
ازهار اضايقت : قصدك بتسكن بعيد عليا ؟
محمد : امالا وين مفكرة تسكنيني !
ازهار : مش عارفة مافكرتش فيها الحاجة هادي
محمد : توا شن تفاهمنا يا امي ؟
ازهار سكتت
احمد فتح عيونه : قوليله باهي راهو يحبها هلبا
محمد شبحله : انت سكر فمك و ارقد خيرلك
ازهار ضحكت : و من امتى هالحب هذا كله ؟
احمد شبحلها : شكله من زمان
محمد ضربه على رجليه : ارقد يا امسخ
احمد : ااااي
ازهار : بالشوية على اوخييك
محمد شبحلها : هيا يا امي شنوو ؟ بتدوي مع بوي ولا شن يصير ؟
ازهار تنهدت : باهي ان شاء الله
محمد : الليلة
ازهار : الليلة تاعب و ممكن حتى رقد
محمد : امالا امتى يا امي ؟؟
ازهار : خلي يروح جدك قبل ؛ باش تصير الدوة قدامه
محمد نفخ نفسه و سكت
عماد من برا الدار : محمد ؟؟؟
محمد : ايوااه
عماد : انزل ركب اختك
محمد تكنطا : تو نتصل بيها
و فتح تليفونه يتصل بروان ..
روان ردت : الو
محمد : قالك بوك اركبي
روان : علاش شن يبي
محمد : قالك ياسر من البيتان لوطا و اركبي
روان تكنطت : قوله مش بايتة في الشارع
محمد : اركبي قوليله انتي
و سكر عليها الخط
روان تكنطت و ركبت
فتحت الباب و خشت لعماد : علاش تبيني نركب ؟
عماد شبحلها : خشي ارقدي في دارك و ماتناقشينيش
روان متكنطية : علاش ريتني بايتة في الشارع ولا شنو ؟
عماد فنص فيها : اسمعي الكلام وبلا تطويل لسان
روان حامقة : لا مش حانسمع مادام مافيش سبب مقنع
عماد عقد حواجبه : شن عندك لوطا باش تباتي كل ليلة ؟
روان : عندي اميمة واجعتني لانها بروحها
عماد : خشي بلا تفتفيت زايد خشي
روان حطت ايديها في نصها : والله كانك مش احنيّن على امك هداكا شي يخصك
عماد : شنوو !!
روان : انى عاطيتها كلمة بإني نبات عندها لين يروح اجديده مانقدرش نطيحها توا
عماد قام حواجبه : قلتيلي كلمة ؟
روان : ايه
و نزلت تجري لحوش حلومة
عماد لحقها ف الدروج يعيط : روااان !!!
روان خشت لحلومة و ماردتش عليه
__________________________
سنابل في المطبخ توتي في العشي مع امها لبوها و اصيل
نجاة : فوتيه الكورس مش وقته
سنابل : علاش يا ماما ؟؟؟ راهو مدته اسبوعين بس و يعلموا ف المكياج بإتقان
نجاة : به و تعلمتي المكياج ! و بعدين ؟
سنابل : بعدين ندور مزين نأجره و نبدا انمكيج كل مرة في مودل باش ننشهر و هكي ندير زباين
نجاة ضحكت بإستهزاء
سنابل : خيرك تضحكي
نجاة شبحتلها : و قرايتك شن بيصير فيها
سنابل : بنقرا عادي مش حانوقف
نجاة : ولا تفكري ؛ انتي خاشة شهادة ثانوية مافيهاش بصارة .. المفروض تخشي لكورسات منهجية باش تنجحي بمعدل
سنابل تكنطت : علاش تحرمي فيا ؟ باهي مش حانفتح المزين توا لين نكمل المدرسة غر خليني نتعلم بس
نجاة : قلت لا يعني لا
و هي طالعة من المطبخ : جيبي السفرة
______________________________
اروى واقفة على مراية دولابها ادير في بدي لوشن لجسمها بعد الدوش
جاها راجلها منير من وراها يشم فيها و مغمض عيونه
اروى انقرفت منه حولت راسها و شبحتله
منير عقد حواجبه : خيرك كل مانقرب منك تبعدي ! راني راجلك مش واحد غريب
اروى : اليوم تعبانة و نبي نرقد
منير : علاش فاش تعبتي ؟
اروى : نايضة من الفجر و انى نعوّل و نغسل في البطون متع خرفانكم لين حيلي انهد
منير : مش معاك امي و خواتي يعني مش بروحك ؛ شكلك تحبي الدلع و الجو هذا مايمشيش عندنا
اروى تكنطت : لا امك لا خواتك فيهم وحدة عاونتني فالحين غير يتأمرو عليا يحسابوني خديمتهم و يتكلمو بالجبالي باش مانفهمهمش و يقرموني
منير تكنطا : تكلمي على أهلي كويس خير مايصير شي مايعجبكش
اروى علت صوتها : و شن هو اللي بيصير ؟؟ انى مانحبش نسكت ع الحق ولا عندكم كلام الحق وجاع ؟؟
منير شدها من شعرها : لآخر مرة صوتك يعلىٰ عليا فاهمة ولا ؟؟؟
اروى تبكي : اي حول ايدك
منير تقوا عليها و علّا صوته : امي و خواتي تحطيهم فوق راسك .. يقولولك موتي تموتي ؛ يقولولك اشربي المية اللي نغسلو فيها رجلينا تقوليلهم حاضر و تشربيهااا
اروى تسمع فيه و تبكي
منير زاد تقوا عليها : فاهمة ولااااا 😡
اروى حركت راسها بمعنى به
منير كيف بيقرب منها اروى دفاته : حول غادي
منير ضربها كف و طيحها ع السرير
__________________________
01:30 ص
يوسف مقعمز ف الجنان يتصل بهناء ..
هناء كيف بياخدها النوم ردت : الو
يوسف : انى في الجنان انزليلي
هناء بصوت نعسان : حبيبي نبي نرقد ؛ تو نتلاقو الصبح
يوسف : لالا توا مادام الشعب راقد
هناء سكتت
يوسف : هنو !
هناء : باهي حاضر
سكرت الخط و نزلت بدون مايحسو بيها عيلتها
لقاته مقعمز ف الطاولة و عاطي بظهره
جت من وراه و غطتله عيونه بيديها
يوسف ضحك ؛ جبدها من ايدها و قعمزها على رجله
هناء انصدمت 😳 و ناضت بسرعة : هبلت ؟!
يوسف يضحك : باش معش تلعبي معاي اللعب هذا يا بيبي
هناء ضحكت و قعمزت في الكرسي اللي بحداه
___________________________
بعد مرور عدة ايام 🌹
02:30 م
سعاد طلعت من المستشفى و حطوها يوسف و سنوسي في سريرها
سعاد تتوجع : ايييي اي اي
يوسف شبحلها : وجعناك ؟
سعاد تحرك في صبعها بمعنى لا و تتألم
سنوسي شرين تليفونه طلع يرد
يوسف يغطي في سعاد : مرتاحة هكي ؟
سعاد : ماتغطينيش تو نسخن
يوسف نحّا من عليها الغطاء
سعاد تشوفله و عيونها مدمعات واجعتها روحها
يوسف شبحلها و حس بيها متضايقة
قرب منها و شدلها ايدها : حاتتعافي و تنوضي بالسلامة بإذن الله
سعاد تبكي : ان شاء الله
يوسف يمسحلها في دموعها : معادش تبكي ؛ طول ما انى معاك مانبيش دمعة وحدة نازلة على خدك
سعاد : ربي يخليك ليا و يحضرني فرحك
يوسف باس على راسها : امين و يخليك ليا يارب
خش السنوسي : يوسف !
يوسف شبحله
السنوسي : انى ماشي لجدك نص ساعة و يوصل
يوسف : مش بيمشيله عمي اسماعيل ؟
السنوسي : جاته حالة وضعها حرج و ماقدرش يطلع
يوسف : تمام به
السنوسي طلع لقي هناء كيف بتتطقطق ✊
هناء ابتسمت : عمي كيف حالك
السنوسي : الحمد لله
هناء : الحمد لله على سلامة مرت عمي
السنوسي : الله يسلمك .. خشي
هناء ترددت : من فيه معاها
السنوسي : يوسف
هناء سكتت
السنوسي : انى بنطلع توا نروح بجدك
هناء : اها به كويس
السنوسي نزل و هناء خشت
وقفت في عتبة دار سعاد : السلام عليكم
يوسف شبحلها : و عليكم السلام
هناء تشوف لسعاد : مرت عمي ! الحمد لله على سلامتك
سعاد تشوفلها و ساكتة
هناء قربت منها و وقفت بحداها تشوفلها و متأثرة : فرحت برجعتك هلبا عقبال نفرحوا لما تنوضي تمشي على رجليك
سعاد ماتبيش ترد عليها
شبحت ليوسف : اوسيفه جيبلي امية توا وقت دواي
يوسف : حاضر به
و مشي للمطبخ
سعاد شبحت لهناء : جاية تتشمتي فيا ؟
هناء انصدمت : نعم ؟؟!!
سعاد : ولا امك باعتاتك تقيّديلي احوالي و تمشي تعاوديلها شن صاير فيا
هناء : حاشاني من هكي حركات مستحيل نديرها
سعاد سكتت
هناء : جاية باش نتحمدلك على سلامتك و نشوفك لو محتاجة شي
خش يوسف و سعاد سكتت
فتح الدواء يعطيها فيه و يشرب فيها ف الميه
سعاد : الحمد لله ؛ صحيت سلم ولدي
يوسف : صحة
سعاد : سلمك
هناء : لو احتجتو لأي شي كلموني
سعاد : مربوحة
يوسف شبحلها و فنص فيها
هناء : بالسلامة
و طلعت من الدار
يوسف حط الطاسة و لحقها جنب باب الحوش : هنو
هناء شبحتله : نعم
يوسف : ضايقاتك امي بالكلام ؟
هناء ابتسمت : لالا
يوسف : و راس عيوني ماتزعلي منها عارف لسانها مايهنيهاش ؛ مشيها على خاطري و امسحيها في وجهي
هناء حطت ايدها على ذراعه : هي مازالت متضايقة و مأثر فيها وضعها ؛ يعني حتى لو ضايقتني بالكلام انى مش حانزعل مقدرة الحالة اللي هي فيها
يوسف حط ايده على خدها : بنت أصول
سعاد من دارها : يوسف ؟؟ .. يوسف !!!
يوسف : نعم يا امي
سعاد : تعالى نبيك
هناء فتحت الباب و طلعت
بعد شوية ركبو العيلة لسعاد يشوفو فيها و يهووا عليها
_____________________
05:00 م
العارف رجع من الحج و العيلة ملتمين عنده
حلومة فرحانة : آنستنا ياحاج العيد من غيرك ماليهاش طعمة بكل
العارف : الله يآنسك ان شاء الله العام الجاي حيين و من أهل الدنيا نعيدو مع بعضنا
اصيل بصوت واطي : مازال بتحبش للعيد الجاي !
روان سمعاته ضحكت
هناء : ان شاء الله العام الجاي نمشو مع بعضنا اجديده
العارف ضحك : ان شاء الله من مايتمناش
عصام : كيف كانت حجتك ؟ ماتعبتش اوه ؟
العارف شبحله : تعبت شوية في السعي بين الصفا و المروة و بعدين ركبت ف كروسة
جاه احمد : شن جبتلي معاك ؟
العارف شبح لمحمود : نوض جيبلي الشنطة
محمود وقف
العارف : جيبها بس ماتفتحاش
محمود و هو ماشي : تي باهي شن بناكلها ؟
ازهار تحشمت و عضت فمها
جي محمود يكر ف الشنطة : شكلك جايب السعودية كلها
العارف : حطهالي هني
حلومة مبتسمة
محمود حط الشنطة قدام العارف و قعمز جنب سلسبيل
سلسبيل عدلت تقعميزتها و بدت تبعد منه و تقرب جنب سنابل
سنابل وشوشتها : عيب اللي اديري فيه الزفت
سلسبيل توشوش : مش قادرة نستوعب 😢
سنابل : بعدين تو نهدرزو
العارف طلع من الشنطة سواك يحذف فيه على ولاد العم : شد انت وياه
محمد تلقاه منه يشوف فيه و ساكت
محمود : علاش متعب روحك يا جدي ؟؟
العارف : مش قدركم تستاهلو اكتر
محمود حرك راسه بإستهزاء و سكت
اصيل : تي جبتلنا هركة ولا سورية عربية و صلاية شن سواك !! راهو عندنا معجون أسنان نديرو بيه
العارف شبحله : انت غر صلي صلاتك و بعدين اطلب
اصيل تكنطا و طلع
عصام ضحك : علاش حشمته
الكناين يشوفوله و ساكتات
احمد واقف جنب العارف : و انى شن جبتلي ؟؟
العارف عطاه ساعة قومة : هاك شد
احمد خداها منه : و شن تاني ؟
العارف : و سلامتك
احمد تكنطا و سكت
البنات يشوفوله و ساكتات
العارف شبح لروان : تعالي
روان جاته : نعم
العارف مدلها حديدة اكسسوار : شدي هاك
روان خدتها منه و ضحكت
العارف شبح لسلسبيل و سنابل : تعالو انتو الزوز
البنات ناضوله
العارف مدلهم خناق فيه طرفين : واحد ليك و واحد ليها
سلسبيل : تي هذا يلتبس مع بعضه !
العارف : مش انتو توأم ؟ البسوه مع بعضكم
سنابل ضحكت و قعمزت في مكانها
سلسبيل بصوت واطي : عمره مايجيب حاجة مقومة 😒
سمعتها نجاة شبحتلها : احمدي ربي اللي حسبك
العارف طلع لوبان و مده لحلومة : شدي ليك و لكناينك عارفكم تحبو تمضغو
الكناين ضحكو
حلومة دمها انحرق و سكتت
العارف طلع حزام رياضي لمرام : هاك خودي من ايدي
مرام استغربت : هذا شنو ؟
العارف : هذا حزام للبطن يساعدك بعد الولادة
مرام وجهها انسلخ قدام الولاد و حست روحها بيغمى عليها
شبحت لعصام : عصام !
عصام ضحك : خودي منه
مرام خدت من العارف و ركبت حوشها وجهها مقلوب
عصام : و ولادك شن جبتلهم ؟
العارف شبحله و طلع صلايات : هادم ليكم و لأختكم
هناء تشوف و ساكتة
محمد : مازال هناء ماخدتش هديتها
هناء ابتسمت : رجعة اجديده بالسلامة عندي احلى هدية
العارف ضحك : تعالي بحداي هنيوه
هناء ناضت من مكانها و قعمزت جنبه
العارف طلع قماش : شدي مني
هناء خداته منه
العارف : خيطيه قفطان ولا بدلة اللي يعجبك
هناء فرحت : صحيييت
العارف : استني مازال
صغار العم يشوفله و ساكتين 😒
العارف طلع بدلة صلاة و صلاية و سبحة : شدي مني
هناء ضحكت : صحيت سلمك جياب
العارف : الله يسلمك
روان : هاهم الهدايا الملاح بدو يطلعو 😒
العارف شبحلها : مش عاجباتك هديتك اوه ؟؟
روان سكتت و طلعت من الدار
محمود : شن معنى هناء قايمها بيها ؟
هناء ضحكت : شنو غرتو مني ؟
خش يوسف : السلام عليكم
ردو عليه : و عليكم السلام
و خش يسلم على جده : الحمد لله ع السلامة آنستنا
العارف ابتسم : الله يآنسك
و قعمز يهدرز معاه
احمد جي ليوسف : خود هديتك من اجديده
يوسف : باهي بعدين توا مش وقته
العارف : علاش مش وقته خودها توا
و فتح شنطته طلعله منها سواك : شد
يوسف خداه منه و ضحك : شكرًا بارك الله فيك
العارف شبح لأحفاده : شوفو الناس المحترمة اللي تشكر ع الهدية مش زيكم
خشت اروى : السلام عليكم
العيلة شبحولها : و عليكم السلام
صغار العم بدو ينسحبوا من الدار واحد ورا واحد
هناء شبحت ليوسف و ناضو مع بعض
اروى سلمت على جدها و قعمزت : كيف حالكم
حلومة و الكناين : بخير الحمد لله
العارف وقف و طلع من الدار
حلومة : كيف حالك انتي و مولى بيتك
اروى مبتسمة : الحمد لله امّيمه كويسين
ازهار : شن جوك مع امتعاينك خديتي عليهم اوه
اروى : اي واللللله كأنهم اماليا ماشاء الله عليهم مش محسسيني انى كنة بكل
نجاة : و راجلك شن جوك معاه بديتي تحبيه اوه ؟
اروى تلخبطت : راجلي سيد التريس مفيش زيه معيشني أميرة عنده
حلومة ابتسمت : دوم هناك ان شاء الله
اروى شبحتلها : ان شاء الله
حلومة : وين امك مش جاية شكلها
اروى : قالت شوية و توصل
____________________________
07:30 م
سنابل متكية في سريرها تهدرز مع محمد في التليفون ..
محمد : نستأذن منك حبيبتي الشباب وصلو و لازم ننزل
سنابل : مش وقتهم بكل
محمد : اول مانركب نتصل بيك
سنابل : باهي طق عليا نبيك شوية قبل ماتنزل
محمد استغرب : تبي شي ؟
سنابل : ايه
محمد : باهي راجيني جنب الباب
سنابل ابتسمت : به
سكرت الخط و وقفت ع المراية دارت بلاشر و روج وردي و خدت العطر متعها معاها و مشت تراجي فيه
بعد شوية محمد نزل و ابتسملها : تبي حاجة بيبي ؟
سنابل دارت ايدها وراها و ردت الباب : ايه
محمد وقف معاها
سنابل حضناته : حسيت روحي مستاحشاتك
محمد ضحك و حضنها
سنابل شبحتله و دارت ايدها وراها
محمد : و توا عندي الإفراج نقدر ننزل ؟
سنابل : مازال حاجة وحدة بس
محمد : شن هي
سنابل فتحت عطرها بسرعة و بدت تبخ فيه
محمد انصدم : شن اديري ؟!! 😳
سنابل تبخ فيه : باش يعرفو انك كنت مع حبيبتك 😛
محمد وخر و تكنطا : علاش اديري في العمل و انى مستعجل ؟؟
سنابل ضحكت و خشت للحوش
محمد نزل و هو متكنطي ؛ طلع لصحابه و وقف عليهم من روشن السيارة : هي انزلو
صاحبه مالك : اركب معانا نديرو دوره
محمد متخزرط من ريحة العطر : لالا انزلو و خلونا نعكسو ف الجنان
و فتح عليهم الباب
_________________________
يوسف و مهاب مقعمزين ف قهوا
مهاب يشرب في قهوته و ساكت
يوسف : نفكر ندير العرس بعد شهرين شن رايك ؟
مهاب ساكت
يوسف : لكن المدام تبي لين امي تنوض بصحتها .. هي عندها الحق و مدابيا امي تحضر لكن انى مستعجل و مش عارف نحط موعد
و شبح لمهاب : شن رايك انت
مهاب شبحله و سكت
يوسف : ندوي معاك من بكري ياراجل وين متنح ؟!!
مهاب سكت شوية و قاله : بالك كان ربي سخر نديروها مع بعضنا
يوسف : قصدك ناوي تتزوج !
مهاب حك لحيته : ان شاء الله
يوسف ضحك : مليح بكل و اخيراً
مهاب : كان شدت في العروسة
يوسف : من تكون هي ؟ مش قايلي عليها من قبل
مهاب تردد و سكت
يوسف تحمس : هاااه تكلم !!
مهاب : الحق انى مازال مش داوي معاها لكن شايفها كم من مرة
يوسف : و علاش مادويتش معاها يا قدر لين اتطير منك ؟؟
مهاب : ترددت
يوسف : وين لقيتها ؟
مهاب : من الاخير يا هومي ! سلسبيل بنت عمك
يوسف انصدم و سكت
مهاب : و ماقدرتش لا ندوي معاك ولا معاها ، خفت تردوني و يبدا موقفي مش مليح معاك
يوسف يشوفله
مهاب : توا انت قولي شن رايك
يوسف سكت شوية بعدين ضحك و خبطه على كتفه : مكبد و ماتقوليش يا *****
مهاب ضحك
يوسف : تم يا طيري خليه الموضوع عليا
مهاب : نبي نطلبك ف طلب لكن فكنا من الخنس و ماديرليش جو الحزارة
يوسف : طلب شني
مهاب : في الاول نبيك تدوي معاها هي ؛ ولو لقيتها موافقة اعطيها رقمي باش ندوي معاها
يوسف سكت
مهاب : انت تعرفني في المليح ان ماعنديش في جو اللعب نبي ندوي معاها و نشوف جونا يركب على بعضه ولا لا
يوسف ساكت
_________________________
هناء عند سعاد جايبتلها عشاها : نوضي تعشي مرت عمي
سعاد شبحتلها : مانبيش
هناء : انتي تاخدي في دواء لازم تاكلي
سعاد : قتلك مانبيش
هناء سكتت
خش السنوسي : علاش ماتبيش تاكلي ؟
سعاد شبحتله : ماخاطريش
السنوسي : مش على كيفك لازم تاكلي و تنوضي تتمشي زي ماقال الدكتور
سعاد كشرت وجهها و سكتت
هناء قعمزتها شوية و بدت توكل فيها : حتى لو ماتبيش لازم تغصبي على روحك على خاطر صحتك
سعاد تاكل منها و ساكتة
___
بعد شوية
سعاد دفت الكاشيك من هناء : خلاص
هناء : زيدي الفم هدا بس
سعاد : قتلك خلاص
هناء وقفت و قامت السفرة : صحة
سعاد سكتت
هناء طلعت من الدار و رفعت السفرة للمطبخ
السنوسي شبح لسعاد : البنت تعامل فيك كيف امها علاش تعاملي فيها بالقسوة هادي ؟
سعاد ماتبيش ترد عليه
خشت هناء : تبي حاجة مرت عمي ؟
سعاد : سلامتك
هناء : تصبحو على خير
السنوسي : وانتي بخير
هناء ابتسمت و مشت لحوشهم
اول ماخشت لقت نجاة تراجي فيها : انى شن قتلك 😠
هناء : على شنو ؟
نجاة : مش قتلك سعاد لا تكلميها ولا تمشيلها ولا ؟؟
هناء : والله حالها يقطع القلب مافيش من يحوس عليها ولا يساعدها لان ماعندهاش بنية
نجاة : انتي مادخلكش فيها بكل فاهمة ولاااا
هناء : ماهي ...
قاطعتها نجاة : انتي لما مرضتي ماخسرتش تقيم التليفون و تسأل عليك و انتي طايحة تمشيلها و تعاني فيها
هناء سكتت
نجاة قعمزت ع الكنبة و هي حامقة
هناء : اصيل وين ؟
نجاة شبحتلها و علت صوتها : وين نندري عليه و هو طول الوقت ينسرف
هناء سكتت
نجاة تصيح : هاتيلي تليفوني فيسسسع
_______________________
يوسف واقف مع سلسبيل في الجنان و يدويلها في موضوع مهاب
سلسبيل تسمعله و قلبها يدق مش مصدقة
يوسف : و لو اني مش واثق فيه مانخليكش تدوي معاه
سلسبيل : يعني موضوعه رسمي ؟
يوسف : ايه ، غر في الاول يبي يدوي معاك و يشوفك موافقة عليه او لا
سلسبيل سكتت
يوسف : شنو ؟
سلسبيل متلخبطة : خليني الليلة نفكر و غدوا نرد عليك
يوسف : تمام به
و ركبت سلسبيل تجري لحوشهم فرحانة
خشت لسنابل ف الدار و بدت تحكيلها
سنابل علت صوتها : شدت 👏😍
سلسبيل تضحك : مش مصدقة
سنابل : و محمود ؟
سلسبيل كشرت وجهها : علاش تفكري فيا توا !
_________________________
بعد مرور عدة ايام 🌹
06:00 م
هناء عند سعاد شادتها و تمشي فيها ف الحوش
سعاد تتمشىٰ و تتوجع : اااه خلاص معاش قادرة
هناء شادتها : غر زيدي اللفة هادي بس
سعاد تتمشىٰ و ساكتة
هناء خشت بيها لدارها : كيف حاسة روحك اليوم ؟
سعاد داهشة : الحمد لله احسن
هناء قعمزتها بالشوية ع السرير و رقدتها : مستريحة هكي ؟
سعاد غمضت عيونها : ايه
هناء تشوفلها : تبي حاجة قبل مانطلع ؟
سعاد : سكري الضي و الباب نبي نرقد شوية
هناء : باهي حاضر
سكرت الضي و الباب
و هي كيف طالعة جبدها يوسف لداره
هناء انخلعت : هيييييه
يوسف سكرلها فمها بيده : اششش
هناء نحتله ايده و توشوش : امتى روحت ؟
يوسف سكر باب الدار : توا
هناء خافت : افتح الباب خير مايجي عمي
يوسف قرب منها : عمك معطل
هناء سكتت
يوسف شرين تليفونه لقاه مهاب : هذا عريس الغفلة
هناء ضحكت : رد
يوسف فتح الخط : الو
مهاب : ها كيف الأمور
يوسف : تمام .. شكلك معطل
مهاب : اسمع احتمال نجي بروحي مش مع العيلة
يوسف : علاش شن صار معاك ؟
مهاب ........
هناء تشوف ليوسف و تضحك ؛ قربت منه و بدت اتدغدغ فيه ف لحيته
يوسف نزل التليفون و وشوشها : شن اديري
هناء ضحكت
يوسف رد التليفون لوذنه : به كمل معاك
مهاب .........
هناء دارت خصلتها بين خشمها و فمها و اتدغدغ فيه ف رقبته بصوابعها 🙊
يوسف بعّد و نزل التليفون : هنووو خليني ندوي كلمتين
هناء تضحك : باهي
يوسف رد التليفون لوذنه و يتكلم : تي عادي يا مهاب مادور شي انت مش براني
هناء قربت منه باساته ف خده و وشوشاته : حبيبي نحبك انى
يوسف انصدم 😳 و شبحلها
هناء ضحكت
يوسف يتكلم : مية مية
سكر الخط و شدها بيده من ورا ظهرها و قربها ليه : الباين ان فيه وحدة خاطرها تتشطين معاي
هناء ضحكت و دفاته
يوسف شادها : شن ندير فيك توا
هناء ادف فيه و تضحك : يوسف حول
يوسف كيف بيقرب ..
هناء دفاته و طلعت تجري
يوسف لحقها : هنو ؟
هناء خشت بسرعة لحوشهم و سكرت الباب
يوسف تكنطا و رجع
_
نجاة : وين كنتي ؟
هناء قلبها يدق : عند اميمة
نجاة تشوفلها من فوق لي لوطا : خشي لأختك قوليلها تخف روحها الناس قريب يخشو
هناء : مهاب جاي بروحه مش مع امه
نجاة : علاش ؟
هناء : حسب مافهمت انه صارلها ظرف و ماتقدرش تطلع
نجاة تنهدت : انى مش راضية عليه من الاول مش عارفة كيف
هناء : يا ماما هي تحبه و هو يحبها وين المشكلة
نجاة : كبير عليها هلبا يابنتي و هي مازالت صغيرة ع الزواج
هناء : العمر مش مقياس ؛ الفايدة في الهني
نجاة : كله من بوك وافق و كبرلها راسها كان هذا تقعمز و تكمل قرايتها زي اختها
سنابل مقعمزة بحداهم و فاتحة النت : انى قاعدتلك لين نتخرج
نجاة : ان شاء الله تغير رايها و تهني روحها
هناء : شكلك نسيتي شن قالتلك !
نجاة شبحتلها
هناء : نسيتي لما قالت كان ماتوافقوش عليه بنهرب معاه ؟
نجاة : ما هذا اللي مسكتني و رابطلي ايديا
سنابل ضحكت بلا صوت تقول في عقلها .. ( عرفنا سلاحنا ضد نجاة شن هو )
هناء : خليها تتزوجه و فكيك منها خير ماتديرلك عفسة هكي كبرها
نجاة سكتت
هناء : هو الولد ماشاء الله عليه كويس و ولد عيلة و ناس مش حاتندمي عليه
نجاة : ان شاء الله
و علت صوتها : اطلعي يا سلسبيل من الدار خيرلككككك
البنات انخلعوا
سنابل جاها مسج من محمد ( انزليلي في مربوعة جدي )
ضحكت ؛ خلت امها خشت للمطبخ و نزلت ❤️
______
سلسبيل تتكلم في التليفون مع مهاب : قداش تبي و توصل
مهاب : ربع ساعة و نكون عندك
سلسبيل ضحكت و قلبها دق
مهاب : تبي حاجة و انى جاي ؟
سلسبيل : سلامتك
مهاب : الله يسلمك
سلسبيل : لما توصل اعطيني علم
مهاب : حاضر غاليتي
سلسبيل : يحضرلك الخير ؛ باي
مهاب : سلام
كيف سلسبيل بتسكر الخط ؛ خش عليها محمود انتظار
خدت نفس و ردت : الو
محمود : و اخيراً رديتي علينا
سلسبيل سكتت
محمود : انى ف الجنان انزليلي
سلسبيل : توا مانقدرش جايينا ناس
محمود : مادخلنيش ف الناس اللي جايينكم انزلي توا
سلسبيل كيف بتتكلم قاطعها محمود : انزليييي
سلسبيل خافت : باهي
سكرت الخط و نزلتله
__
محمود واقف جنب الطاولة و يراجي
نزلتله سلسبيل لابسة جمبسوت أبيض قماشه دانتيل ؛ فاتحة شعرها و مدايرة