الفصل 19
روايــة #صغار_العم
الحَـــلْـــقـــة الــتــاســعــة عــشـــر 🌸
هناء تسمع ف الكلاكس و ساكتة
تلفتت بتخش للحوش لقت نجاة وراها
جتها تجري ضبطتها و تبكي : مامااا 😭
نجاة مضبطتها وساكتة
هناء منهارة : علاش هكي يديرلي ياماما ؟ .. علاش ظلمني و قهرني في عمري انى والله مادرتله حاجة
نجاة تبكي معاها : ماتغشيش روحك والله الا مانزوجك سيد سيده
هناء تبكي : ااااه يا ماما اااه 💔
نجاة تبكي بلا صوت
هناء : بيسكنها في الحوش الي فرشته و اخترته كله على ذوقي يا ماما ... بنموووت 😭
نجاة تمسحلها على شعرها : ماتديريش ف روحك هكي والله مايستاهلك
طلعو سلسبيل و سنابل يشوفلها و ساكتات
هناء طاحت على ركابها و تبكي : نبي نطلع من هني .. معش نتحمل نشوفه او حتى نسمع اسمه خلاص
نجاة قعمزت قدامها تشد فيها : لا هو اللي لازم يطلع و يعيش بعيد علينا .. ماتخليكش سلبية و تهربي من الواقع لازم تتقبلي الوضع و تعيشي معاه كان هذا مش حاتتعافي منه
هناء تخبط على صدرها و منزلة راسها : هو ظلمني و هانني و بدلني بغيري رانى نموت بالعرق
نجاة سكتت
هناء دوب ماتتكلم : حرقلي قلبي يا ماما .. ناار راكبة فيا مش قادرة نطفيهاا
نجاة تشدلها ف ايديها و تبكي واجعتها بنتها
هناء تبكي و منزلة راسها
نجاة تشوفلها : اشبحيلي ! .. قيمي راسك و اشبحيلي
هناء شبحتلها
نجاة شدتها من وجهها : ماتخليش روحك ضعيفة و مكسورة بسبب واحد نذل زيه
هناء تحرك ف راسها و منهارة ف البكي
نجاة تقيملها ف شعرها من وجهها : لازم تكوني قوية و توقفي على رجليك ..؛ نوضي اغسلي وجهك و عيشي حياتك طبيعي و نحيه من راسك صدقيني هو الخاسر و حايجيك في يوم نادم تحت رجليك
هناء تسمعلها و تبكي
نجاة توقف فيها : نوضي هنيوه و اركبي معاي هيا
هناء وقفت و دمعوها ينزلو
خششتها امها الداخل و ركبتها للحوش
سلسبيل و سنابل يشوفو و يبكو بلا صوت ؛ واجعتهم اختهم و الحالة اللي هي فيها و ساكتات
_____________________
سعاد ف السيارة : اوقف على محل بناخد شكلاطة
السنوسي : علاش لمن ماشية ؟
سعاد : ولدك يبيني نخطبله
السنوسي تفاجأ و شد فرينو : شن هو ؟؟
سعاد شبحتله : اوسيفه يبي يتزوج
السنوسي تعفلق : و بكل صحة وجه ماشية انتي ؟؟؟
سعاد : و شن فيها ؟
السنوسي لف بالسيارة و رجع : والله ماك ماشية ولاك عافسة خطوة
سعاد علّت صوتها : لوااه ؟؟ على خاطر بنت خوك اللي طلعت ماتستاهلاش اووه ؟؟
السنوسي متعفلق : سكري فمك يا سعاد خير مانمشي بيك لحوش بوك طول
سعاد : خلاص وانت قلتها حطني عند امي هي
السنوسي زاد حمق ؛ عفس ع البنزينة بقوة و رفعها لحوش امها
___________________________
يوسف مقعمز ف شقته بروحه يدخن و متضايق
يتذكر ف نظرات هناء و كلامها ليه لما هو متعصب عليها و ضميره يأنب فيه
انى كنت واثق فيها لكن اللي شفته عمالي قلبي
لو ايميلها طلع مهكر و هي مظلومة كيف حتى الرسايل انبعتو من رقمها ؟!
كيف الصور وصلو لغيرها !
زعما باعتتهم لوحدة من صاحباتها قبل و فبركتلها موضوع زي هذا !!
يحرك ف راسه و تفكيره مشوش : انى لازم نفهم و الا حانهبل
طفي دخانه و فتح تليفونه يتصل بهناء ..
هناء تليفونها يشرين ف دارها و هي ف الحمام مريضة
يوسف شاد التليفون : ردي !!
فصلت المكالمة و يوسف قعد يتصل مرة و تنين و ثلاثة ماتردش
اتضايق و لوح التليفون بحداه و قعد يفكر
_______
هناء ف الحمام ترجع
نجاة شادتها و عيونها مدمعات
هناء دوب ماتتكلم : شديني مافياش جهد
نجاة شادتها : هذا كله من البكي والله ماكويس ليك تاكلي ف بعضك
هناء ترجع و تبكي واجعتها روحها
نجاة : هناء ؟
هناء دوب ماتتكلم : معادش فيا حيل قيميني
نجاة وقفتها تغسلها ف وجهها ع اللاوندينو
هناء تذكرت يوسف لما غسلها وجهها
نجاة تشوفلها : خلاص هي شدي روحك و امشي لسريرك
هناء : صدمني لما قالي يحبني و قهرني لما سيبني
نجاة شدتها من ايدها تمشي فيها لدارها : توا ارتاحي و معش تفكري فيه
__
يوسف لما ماردتش عليه زاد اتضايق ؛ خش ع السجلات و دور على رقم أمجد اللي كلمه منه و اتصل ..
_
أمجد سمع تليفونه يشرين طلعه من جيبه و شافه لقاه رقم غريب
رد : الو
يوسف : الو أمجد !
أمجد سمع صوته خاف و سكت
يوسف : الووو ؟؟
أمجد سكر الخط و حطه في قائمة الحظر
يوسف عاودله تاني عطاه انه ف الحظر
شك فيه و تعفلق : تلعب معاي يا ****
فتح على رقم مهاب و اتصل ..
بعد شوية مهاب رد : ايوااا
يوسف : تعالالي ف الشقة توا
مهاب : تي وينك يا راجل ليا اسبوعين نكلم فيك رقمك مسكر و حتى جيتك ف الحوش ولد عمك قالي انك مهناش
يوسف علّا صوته : تعالى يا مهاب و بلا كتر كلام
مهاب استغرب : شن فيه ؟ ان شاء الله خير !
يوسف متعصب : بتجي ولا ماكش جاي !!!
مهاب : باهي برو نص ساعة و نكون عندك
________________
أمجد يتصل بأروى ..
اروى ردت : الو
أمجد : ها يا ****
اروى تعصبت : تحشم و احترم نفسك
أمجد : ولد خالك اتصل بيا شن يبي مني ؟؟؟
اروى انخلعت : علاش كلمك 😲
أمجد متعفلق : وين نندري عليه علاش يتصل ؛ غيّب أيام و توا تفكرني
اروى سكتت
أمجد : تي كيف نديرله هوا ؟
اروى : كان عاودلك رد عليه مرات يبي يستفسر منك على هناء و دير روحك عادي
أمجد : تي شن تقولي انتي حطيته ف الحظر طول
اروى علّت صوتها : امالا علاش راد عليه من الاول !!
أمجد : رقمه قعد ف الجهاز اللي تكسر ؛ التليفون هذا جديد مش مسجله فيه
اروى سكتت و حكت جبهتها
أمجد : الوو
اروى : باهي تمام ، تو الليلة نمشي نبات ف حوش جدي و نفهم كل شي اذا كان صدق هناء ولا يبيك انت و خلاص
________________________
09:00 م
سعاد طلعت من حوش البنية اللي بتخطبها و ركبت سيارة خوها ميلاد
ميلاد شبحلها : باهي اللي طلعتي
سعاد مبسوطة
ميلاد طلع بالسيارة : ها كيف كان الجو
سعاد : والله ناس ماشاااااااء الله
ميلاد شبحلها : مسرع عرفها ولدك باش حتى خطبها ؟ امالا سيب بنت عمه على خاطرها ؟
سعاد : هو كان يبيها من الاول غر هناء ذهبتله شيرته و توا فاق على عمره
ميلاد : امالا اتصلي بيه و قوليله شن صار
سعاد : لالا روح بيا لحوشي و تو نهدرزله غادي
____________________________
هناء متكية ف سريرها و تحس بألم ف بطنها
سلسبيل : هناء ؟؟
هناء تتألم : نعم
سلسبيل تشوفلها : خيرك ؟
هناء مغمضة عيونها : شي تاعبة شوية
سنابل : باهي اشبحيلنا شوية نبوك
هناء : شن تبو
سنابل : ماعرفتيش من فتح الفيس متعك غيرك ؟؟
هناء : لا .. غيرت الباسورد و خلاص
سلسبيل : باهي هاتي نشوفوه حني
هناء شبحتلها : كيف
سنابل : خشي ع الفيس و شوفي من اللي فتح حسابك غيرك
هناء : كيف هادي ؟
سلسبيل خدت تليفون هناء و مدتهولها : افتحيه
هناء فتحاته بالبصمة بلا ماتركز و مدتهولها
سلسبيل شافت مكالمات يوسف تلخبطت
خشت ع الفيس و جت بحداها : شوفي توا كيف تقدري تعرفي من خش ع حسابك
هناء تشوف و ساكتة
جت سنابل بحداهم : اتدنولي شوية
سلسبيل وسعتلها و سنابل خشت بينهم
سلسبيل فاتحة على فيس هناء
فتحت إعدادات الحساب و خشت ع الأمان و تسجيل الدخول
طلعلها المكان الذي سجلت دخولك منه
و لقت الأجهزة المفتوح بيهم الحساب من قبل
هناء تشوف و ساكتة
سلسبيل : شوفي هذا اسم تليفونك اخر واحد
سنابل و هناء يشوفو
سلسبيل : و هذا مني Sony X-peria Z 3
هناء استغربت : مانعرفش
سنابل : ديري تسجيل خروج منه بسرعة
سلسبيل : درت
هناء ساكتة
سنابل : حني كلنا ماعندناش سوني ؛ يا جالاكسي يا ايفون
هناء تفكر : حتى صاحباتي مافيش وحدة عندها جهاز هكي
البنات سكتو
خش اصيل و قرب من هناء : مساء الفُل ع الأحلى من الكُل
هناء شبحتله
اصيل تلوح ع السرير : شن جوها ؟
سلسبيل عيطت : رجلييييي 😩
هناء ابتسمت : تمام
اصيل متكي على مرفقه يشوفلها
هناء ساكتة
اصيل : تنوضي معاي ؟
هناء : وين
اصيل : نديرو مشوار مليح و نجو
هناء : لالا ماخاطريش في الطلوع
اصيل وقف : تي البسي عباية ع السريع و اطلعي
هناء : يا أصيل ماخاطريش
سنابل : ايه ايه خلينا نطلعو بالله عليك
أصيل شبحلها : من قالك بتطلعي ! قلت هناء بس
سنابل علّت صوتها : علاااااش
اصيل دفها من وجهها : معش تنّعري يا حلوفة
هناء تضحك
سنابل : نبي نطلعععع
اصيل و هو طالع من الدار : هناء تلقيني لوطا نراجي فيك
هناء وقفت : هي هاتو التليفون
سلسبيل سارحة و تفكر
هناء : نكلم فيك !!
سلسبيل شبحتلها : خليه شن بتديري بيه
هناء كشرت وجهها : صدقتي اصلاً بنلوحه على وجهه غر نشوفه
سنابل ساكتة
هناء لبست عبايتها و وشاحها و طلعت من الدار
لقت نجاة مقعمزة تتفرج ع التلفزيون
نجاة تشوفلها : وين ماشية
هناء : اصيل يبيني نطلع معاه
نجاة ابتسمت : باهي كويس غيرو جو
هناء ابتسمت و طلعت
سكرت الباب وراها و نزلت بسرعة مابتش تشوف لحوش يوسف
_________________________
اروى مع امها في السيارة ماشية لحوش جدها
امال تسوق : علاش ماتبيش ؟ حتى بوك عاجبه الموضوع
اروى : لالا فكوني مايمشيش معاي
أمال : قالت عمتك انهم ناس كويسين غر شوفي الولد بالك تغيري رايك
اروى شبحتلها : ماماااا !! مستحيل نعيش ف الجبل و راهو نظامهم خمار و تقعميز ف الحوش من الصبح لليل ؛ و انى عندي الجامعة نبي سنين باش نتمها
امال : على كيفك
اروى : هذا ماناقصني الا خمار !! انى لتوا مش مقتنعة بالحجاب تبيني نغم روحي ؟
امال : مرات ولدهم تفكيره مش زيهم و عادي عنده اللبس الكاجول و القراية
اروى تتحرك بصبعها : لالالالا .. و راهو حتى كبير عليا نزبطهم العيلة هادي كلهم كبّوريين
امال سكتت
اروى شبحتلها : بتباتي معاي حتى انتي ؟
امال : لا وين نبات و غدوا الصبح عندي عملية
اروى سكتت
أمال : حقا شن حال اخت أمجد ؟ من اللي طلعت من المصحة معادش سمعت عليها حاجة
اروى : اكيد باهية لو صارت حاجة ف البنية راهو سمعنا
امال : اتصلي بعدين و اسألي عليها البنية حالها يقطع القلب تبيلها باش تشد صحتها
اروى : تو تكبر و يصير منها هلبا حالات زيها شن جاتك جديدة الحالة هادي توا ؟
امال : ماهي ايتيّمة واجعتني
اروى سكتت
امال درست : خلي ننزلو للسوق هذا و بعدين نحطك ف حوش جدك
____________________________
يوسف قاعد ف الشقة و معاه مهاب
مهاب فاتح تليفونه : قداش الرقم
يوسف مدله التليفون : هاك خوده بروحك
مهاب خداه منه و بدي يسجل ف رقم أمجد باش يطلعه في برنامج كاشف الأرقام
يوسف : متأكد يطلع حتى اللقب ؟
مهاب مدله التليفون : ايه ؛ تي مش عادي بكل يا راجل انى بعتهولي ولد اختي حتى لما يتصل بيك رقم غريب يطلعلك اسمه و لقبه ف المكالمة
يوسف : مية مية
مهاب يشوف للتليفون : اهوا طلع
يوسف يشوف معاه : اتصل بيه بسرعة
مهاب سكر البرنامج و اتصل بأمجد من رقمه ..
يوسف : شنو ؟؟
مهاب : اسكت راهو يرد و يسمعك
يوسف سكت
_
أمجد يشوف لتليفونه و متردد يرد
قعد متردد لين فصلت المكالمة
مهاب : مايردش
يوسف : زيد عاودله
مهاب يتصل تاني ..
أمجد يشوف للتليفون و يفكر
لما قريب تفصل المكالمة فتح الخط و قعد ساكت
مهاب علّا صوته : السلام عليكم
أمجد اطمن انه مش يوسف : و عليكم السلام
مهاب فتح السبيكر : سامحني يا خوي ع الإزعاج
أمجد : لا عادي ولا يهمك
مهاب : حضرتك أمجد ال..... ولا ؟
أمجد تخزرط : ايه تفضل
مهاب : ألف ألف مبروك خوي أمجد رقمك كان خاش السحب و ربحت معانا رحلة مجانية لتركيا ؛ تذكرة ليك و التانية لأي مرافق معاك
أمجد يسمع و ساكت
مهاب : حاولنا نتواصلوا معاك من الصبح لكن رقمك خارج التغطية كان
أمجد : ممكن لان الضي كان هارب
مهاب : اها كويس اللي حصلتك توا
أمجد : و الهدية هادي بمناسبة شني
مهاب : بمناسبة افتتاح شركة ...... ( قاله اسم وهمي ) للسفر و السياحة و انت جت من نصيبك
أمجد ضحك
مهاب : ياريت تجينا غدوا الصبح و تستلم جائزتك
أمجد : يا خوي بنحطهالك من الاخير ؛ انتو تكذبوا ع الناس ديما يجوني مكالمات زي اهيا و يطلع شي شي بالتريس
مهاب : ممكن هدوكا شركات وهمية لكن انى حانعطيك النعتة و تفضل ..؛ و لو طلع الموضوع كذب ليك الحق انك ترفع علينا قضية
أمجد : تي اما سفر و تشوف في العملة كيف كالبة توا
مهاب : انت مش حاتدفع شي يا خوي ؛ الرحلة مدفوعة التكاليف لمدة اسبوع
أمجد سكت
مهاب : انت غر تعالى و بعدين تقدر تستفسر على كل شي
أمجد : باهي هات النعتة هي
مهاب : المدينة - شارع المقريف اول ماتوصل لمصرف الجمهورية اتصل بيا حني مكتبنا تحت القواس .. تعالى مع العشرة
أمجد : ان شاء الله و انت طيب
مهاب : في أمان الله
و سكر الخط
يوسف : قولتك يجي ؟
مهاب حط التليفون ف جيبه : كان ماجاش نجيبوه بطريقة تانية
يوسف حك ايديه ف بعضهم : ان شاء الله يطلع كذاب
مهاب : و البنت لو طلعت مظلومة شن ذنبها
يوسف : اقسم بالله مافارقت بالي لحظة ..؛ بالذات اليوم اول مرة تشوفلي بنظرة زي هادي
مهاب سكت
يوسف : حتى وقت كانت تكرهني زمان مادارتهاش
مهاب : معناته شن يبرد نارها يا طيري
يوسف سكت
_____________________
سلسبيل و سنابل مقعمزات ف دار هناء
سلسبيل : لازم نعرفو مني لازم
سنابل : بالك وحدة كانت تبي يوسف و سمعت بيه خطب
سلسبيل : بلا غباء ماهو يوسف كان مسافر امتى لحق حب وحدة و سيبها ؟
سنابل : ايه صح ..؛ خاطري نشوفه هالأمجد هذا
سلسبيل وقفت : هي تعالي ننزلو كساد
سنابل فتحت تليفونها : نشوف حمودي و نلحقك
سلسبيل طلعت و ماردتش عليها
وقفت ف الدروج و اتصلت بيوسف ..
يوسف واقف مع مهاب تحت عمارة شقته شاف تليفونه داره سايلنت
مهاب ركب سيارته : غدوا نمشو بسيارتي باش مايزبطكش
يوسف : عارف ايه
مهاب : هي امالا نتلاقو الصبح
يوسف : مية مية
مهاب طلع و يوسف عاود لسلسبيل ..
سلسبيل ردت : الو
يوسف : اهلين
سلسبيل : نبيك تعطيني رقم الولد اللي كلمك
يوسف : هكي بدينا حني ؟ مافيش حتى كيف حالك ؟
سلسبيل : انت غر لوم روحك ع اللي درته في اختي تلوم عليا انى توا ؟؟
يوسف سكت
سلسبيل : اخر ماتوقعت منك انك تكذبها و اتطلعها خاينة
يوسف : سلسبيل ؛ اللي ريته و قريته مش شوية حطي نفسك مكاني و تفهمي ردة فعلي
سلسبيل : انت لو تحبها حق راك صدقتها و وقفت معاها مش مخليها منهارة من يوم سيبتها و هي بروحها مش فاهمة شي
يوسف تنهد
وسلسبيل سكتت
يوسف : انى مش ساكت قاعد ندور فيه اللي جاني و مش حانرتاح لين نعرف مني اللي وراه
سلسبيل : ابعتلي رقمه في مسج حتى انى نبي نتأكد
يوسف : علاش شن بتديري
سلسبيل : ابعتهولي و خلاص
يوسف : لا مش حانبعتهولك لين تقوليلي
سلسبيل : شاكة في وحدة ممكن تكون هي اللي باعتاته
يوسف : مني
سلسبيل : تي ابعتهولي يا يوسف و خلاص بعدين تو نقولك
يوسف : ماشي تشاو
سكر الخط و بعتلها الرقم ف مسج
سلسبيل فتحت المسج و سجلت الرقم
_____________________________
هناء و اصيل على شط البحر ياكلو في جيلاطي
هناء تتفرج ع البحر و ساكتة تتفكر لما عامت مع يوسف ف الليل و متنكدة
أصيل مقعمز بحداها : فاش تفكري
هناء تكت راسها على كتفه و تنهدت
أصيل سكت
هناء : محلاه الجو
أصيل : رومانسي بكل اها
هناء سكتت
أصيل يبي يغير الموضوع : تي كولي الجيلاطي بيذوب دافع فيه دم قلبي
هناء ابتسمت و شدت الكاشيك تاكل
__________________
سنابل و محمد واقفين ف الدروج
سنابل تشوف لجرح فمه و متأثرة : جرحك احييه محره
محمد قرب منها وشبح لفمها : داويهولي
سنابل تشوف فوق : معاش تقرب
محمد سكت و قعد يشوفلها
سنابل شبحتله : خلينا ننزلو لمربوعة امّيمه
محمد قرصها من جنبها : خلينا هني احلى
سنابل ضحكت و فنصت فيه : بطل
محمد قرصها تاني : و لو مابطلتش ؟
سنابل تضحك : ياسررر
محمد قرب منها : هاتي وحدة خت فت نبطل
سنابل هربت و نزلت تجري
محمد لحقها ؛ شدها من ايدها و قربها ليه : شن رايك ناخد منك بالغصب
سنابل طلعت لسانها : والله ماك قادر
محمد مقرب منها و يشوف لعيونها : ماتتحدينيش خيرلك مدايرها من قبل
سنابل قلبها يدق : محمد فكني منك
محمد يدويلها ف وذنها : حبيبتي مستاحشك هلبا
سنابل توشوش : محمدددد
على نزلة محمود : احم احم
سنابل و محمد شبحوله
محمود : يالله يالله
خطم من بحداهم و خش لحوش جده
محمد يشوفله : تربىٰ و اخيرا !
سنابل ضحكت و هربت لحقت محمود
محمد ضحك و ركب لحوشهم
___
ازهار مقعمزة اتطبق في الحوايج و بحداها احمد يلعب بالبليستيشن
احمد : ماما هيا نبي كاكاو
ازهار : باهي قتلك اصبر
احمد يتأفف : من بكري و انتي تقولي باهي راهو نديره بروحي
ازهار علّت صوتها : مش تشوف فيا شن ندير ؟؟ اصبر نتم اللي ف ايدي و نديرلك
احمد تكنطا و سكت
خش محمد : السلام عليكم
ازهار شبحتله : و عليكم السلام
محمد قعمز بحداها : بوي وين
ازهار : اكيد ف الجامع هو امتى يقعد
محمد ضحك : ربي يقوي إيمانه
أحمد علّا صوته : محمد تعالى اربحهالي المرحلة هادي ماقدرتهاش
محمد شبحله : فوتني ماعنديش جواجي
أحمد : غر بالله عليك نخش الحمام و نجي
محمد خدي منه اليد و بدي يلعب
أحمد ناض و مشي للمطبخ
ازهار : محمود وين ؟
محمد يلعب : و انى راكب تلاقيت معاه ف الدروج خاش لحوش جدي
ازهار : اه به ..؛ والله كل مايطلع نقعد حاطة ايدي على قلبي خوك طايش و ديما بمشاكله
محمد : لكن جدع و يهني ماينخافش عليه
ازهار تنادي : رواااان ؟؟ ..؛ روان !!!
جتها روان : نعم
ازهار : تعالي قيمي حوايجك
روان خدتهم منها : انى بننزل لوطا
___
أحمد حاط بكرج الحليب ع النار و يصب ف الكاكاو
دار كاشيك و تنين و ثلاثة و أربعة
و يشوفله : زعما نزيده ؟؟
و زاده زوز كواشيك
خدي السكر صب منه و خلاه يغلي لين فاج و تبزع ع الغاز
احمد تخزرط طفي النار و قعد يمسح و يمرمد
__
محمد : ريحة شياط ولا ؟
ازهار تشم : حي على امه الفرخ هذا !!
و ناضت تجري للمطبخ
احمد شبحلها خاف : سامحيني بالله عليك
ازهار شدت فردة شبشبها و جاته : تبي تحرق روحك ؟؟؟
احمد يدور ع الطاولة و ازهار تجري وراه
أحمد : والله اسف جي في خاطري هو
ازهار متعفلقة : كنت نمسح فيه الغاز علاش تشقي فيا يا احمد علاااش ؟؟
خش محمد للمطبخ : خيركم
ازهار شبحتله : شدهولي
احمد يبكي و يتكلم بصبعه : يا ماما علاش هكي والله الا اسف انى نمسحه 😢
محمد ضحك : هما حركات البراءة
ازهار فنصت فيه : تضحكله ؟!
احمد هرب و خش للدار سكر على روحه
ازهار متعفلقة : اللي كاتبله بالشقاء يقعد طول عمره شاقي
و جت تمسح ف الغاز
محمد قرب منها وباسها : ماتزعليش روحك زهورة تو نمسحه انى
ازهار شبحتله : ياريت اللي ف الحوش عندهم ربع حنيتك
محمد خدي منها الفوطة : طالع لزهورتي لمن طالع يعني
ازهار ضحكت : يا خوفي لما تتزوج تنساني بس
____________________
سلسبيل تقلي في بطاطا في مطبخ حلومة و محمود واقف بحداها
سلسبيل : يعني العركة سببها الفلوس
محمود ياخد ف البطاطا و ياكل : ايه ؛ ف الاول ماباش يعطيني لين خزرطته
سلسبيل : برا اشريلك بيهم موطو هيّج بيه خيرلك
محمود ضحك : هكي قولتلك
سلسبيل : ايه ايه و ركبني هيّج بيا 😍
محمود ضحك و خدي بطاطا
سلسبيل ضرباته على ايده : تحشم مصحك
محمود خدي كمشة
سلسبيل حذفت عليه الفوطة : ياسرر
محمود طالع يضحك : صحتين على قلبي
سلسبيل ضحكت و شبحت للطاوة
خشت سنابل
سلسبيل شبحتلها : وين كنتي
سنابل : مع اميمة ف الدار
سلسبيل توشوش : حصلت رقم أمجد
سنابل : منين ؟؟
سلسبيل : من يوسف
سنابل خدت بطاطا تاكل فيها : كيف صار ؟؟؟
سلسبيل حمقت : تي تحشمو عاااااد انى نقلي و نتبشمط و انتو تاكلو هكي !!!
سنابل عوجت فمها : تي باهي اسكتي
سلسبيل سكتت
سنابل : علاش خديتي الرقم
سلسبيل : شاكة ف وحدة عندها سوني و الله مافي غيرها اتديرها
سنابل : مني !!!
خشت اروى : هاااااي
البنات شبحولها و سكتو
اروى تضحك : شن جوكم
سنابل : الحمد لله تمام
خشت روان : اووه كلكم هني !!
_____________________________
هناء : هيا خلينا نروحو
اصيل وقف : هيا
هناء وقفت و مشو للسيارة
ركبت تنفض ف رجليها : عندك امية ؟
اصيل ركب ولع السيارة : لالا ... وطلع بيها
هناء : غر عطشت
اصيل : تو نوقف ناخدلك
هناء : خاطري ف سفرة مليحة
اصيل شبحلها : وين
هناء : مصر تونس تركيا اي تركينة
اصيل : بوي ماشي لمصر عنده مؤتمر بعد غدوا الصقي فيه
هناء شبحتله : ماقاليش !
اصيل : انتي كنتي ف غيبوبة معاش هدرزتي مع حد
هناء : امالا بنمشي معاه لازم نسافر
___________________________
02:00 ص
البنات سلسبيل و سنابل و روان قعدو بايتات ف حوش حلومة مع اروى و الضي هارب
روان ساخنة تمروح بيديها : وووه عليا وووه بنمووووت
سنابل تمروح بالمروحة : نبي نفتح المولد خلاااص
اروى شرين تليفونها طلعت للجنان تتكلم
سلسبيل : انوضو نفتحوه ؟
روان : ايه ياريت ع الأقل نبردو شوية بالمكيف و بعدين نسكروه
ناضو هما الثلاثة و طلعو من الدار
يلاقيهم العارف : وين ماشيات ؟
البنات شبحوله
العارف : وين طالعات
سنابل : بنفتحو المولد
العارف : شن هو ؟؟؟ خشي ارقدي انتي وياها و ريحي روحك
روان حمقت : علاااااش ولينا نقطرو راهو
العارف : خشي شلفطي بِ المية ولا تمرغدي ع الزليز تو تبردي
سلسبيل : تو هذا كلام يا اجديده !!!
العارف : وحدة تفتحه نهارها احرف ؛ النافطة ناقصة ف البلاد
روان : تو يجيبها حد من الولاد ماتخممش فيها
العارف فنص فيهم : خشي لفراشك انتي وياها خيرلك
البنات خشو يتأففو
العارف خش لداره و اتكّا ف سريره
حلومة تمروح : الله يعطيهم قصة ف ايديهم تبلفطنا
____
روان متعفلقة : اوف اوف اوفففف
سنابل : نبي اميه مسقعة انى
روان وقفت : انى عطشانة تو نجيبلك معاي
و مشت للمطبخ
سلسبيل توشوش : نبي تليفون اروى باش نتأكد
سنابل : قصدك شاكة فيها هي ؟؟
سلسبيل : مافيش غيرها
__________
روان فتحت الثلاجة و طلعت المية
و هي طالعة من المطبخ سمعت صوت توشيش اروى من الجنان
ضربها الفضول تسمعها ؛ حطت المالقي ع الطاولة و طلعت من باب الجنان تمشي على روس صوابعها
اروى تتكلم مع أمجد : لالا هناء قاعدة ماتكلمش فيه
............
اروى : يعني نحي الحظر و شوفه شن يبي منك مرات بيزيد يستفسر عليها ؛ يوسف هكي نظامه لما يبي يعرف حاجة يحب يعرفها كاملة
روان تسمع فيها و مصدومة
خشت تجري للبنات و قالتلهم شن سمعت
__________________
تاني يوم 🌹
10:30 ص
يوسف و مهاب مع بعض ف السيارة يراجو في أمجد يجيهم
يوسف : عطل الزفت شكله مش جاي
مهاب : كانه طماع تو يجي
يوسف : الموعد فات من نص ساعة اتصل بيه
مهاب : تي اصبرلك شوية يا راجل خيرك متصربع بالك عالق ف الزحمة
يوسف : زحمة شني و اليوم سبت
مهاب : نزيدو شوية و نتصل بيه
يوسف سكت ؛ ولع دخانه و يقعد يدخن فيه
بعد شوية أمجد اتصل بمهاب
مهاب شاف تليفونه : هذا هو
يوسف شبحله : رد بسرعة و افتح المايك
مهاب رد و فتح السبيكر : الو
أمجد : ايوه صباح الخير
مهاب : صباح النور ..؛ من معاي !
أمجد : انت اتصلت بيا امس و قلت إني ربحت رحلة سفر
مهاب : ااه ايه عرفتك أمجد
أمجد : اني وصلت توا للمقريف وين مكتبكم ؟
مهاب نزل من السيارة : انى قدام المصرف
أمجد : حتى انى قريب عليه
مهاب : انى كيف درست و مكمل على رجليا اهو تو نوقف نراجيك
أمجد : تم
مهاب : تلقاني لابس سورية بيضاء
أمجد : نشوف فيك .. لابس نظارات ولا ؟
مهاب : ايه
أمجد جاي على رجليه اشرله بيده : اهو مقابلك انى
مهاب سكر الخط و قعد يراجي فيه
_
يوسف مقعمز ف السيارة يشوف و مش قادر يصبر
لبس طاقيته و قعد يراجي
______
مهاب يسلم ع أمجد : اهلين كيف الحال
أمجد يسلم : الحمد لله كيف أمورك انت
مهاب : اهو ماشية حال الجري و اللهيد ؛ الدنيا هكي تبي و ان شاء الله نلحقو
أمجد : اي والله
مهاب : هي نمشو للمكتب !
أمجد يشوف : وين ؟
مهاب ماشي للسيارة : من هني تفضل معاي
أمجد ماشي معاه : قداش ليكم فاتحين
مهاب حك لحيته : شهر ونص
يوسف شافهم جايين سحب مسدسه و حطه ف خصره
لما مهاب و أمجد قربو من السيارة ؛ مهاب أشر ليوسف بيده
يوسف فهمه و نزل
قرب منهم و جي من جنب أمجد ؛ حطله المسدس ف جنبه
أمجد انخلع و شبحله
مهاب سحب مسدسه من خصره و حطه ف جنب أمجد
أمجد خاف : خيركم
يوسف شاده من ايده و يدوي بالشوية : اركب السيارة بلا صوت و شهدرة خير ماتموت
أمجد متخزرط : شن تبو مني ؟
مهاب : بنسفروك لتركيا
فتح باب السيارة ركبه و ربطله ايديه وسكر عليه الباب
أمجد خايف تلفت بظهره بيفتح الباب لقاه مسكر بالتأمينة
ركبو يوسف و مهاب و طلعو بالسيارة بسرعة
أمجد يعيط : شن فيه خيركم !!!!
يوسف تلفتله و شد عليه المسدس : اسكت ولا نطربقلك راسك
أمجد سكت و قلبه يدق بسرعة
بعد شوية مهاب وقف السيارة بعيد جهة البحر و شبحله
أمجد يشوف ليوسف وصوته يرعش : شن تبي مني ؟
يوسف : احكيلي بالتفصيل من ليه مصلحة يبعتك ليا
أمجد بلع ريقه : ماني حكيتلك كل شي
يوسف تعصب و فنص فيه : ماتلعبش معاي راني مانرحمش
أمجد شبح لمهاب
مهاب : لو تبي تروح على رجليك قول و حني حانخلوك تمشي ف حالك
أمجد سكت و قعد يشوف للمسدس
يوسف يحرك فيه بِ ايده : خاطره يسافر للمقبرة توا شكله
مهاب : تي تكلم الزفت و بلا تضييع وقت
أمجد خايف ؛ خدي نفس و بدي يحكي : ...........
يوسف يسمعله و مصدوم
مهاب ساكت
أمجد : و انى لولا الظروف والله ماكنت حانقبل ولا ندير حاجة
يوسف غمض عيونه و دمه يغلي على أروى
أمجد : و الرسايل كانت هي اللي تبعت فيهم من ورا خطيبتك و حتى الصور خانبتهم منها
يوسف شبحله و ضربه بإيده على وجهه و فيها المسدس
أمجد داخ لان الضربة قوية
يوسف فتح الباب و نزل
مهاب يصيح : وين ماشي ؟؟؟ و هذا شن نديرله
يوسف شبحله : تصرف فيه زي ماقتلك
مهاب طلع بالسيارة
و يوسف خدي تاكسي ماشي لحوشهم
مهاب اتصل بواحد يعرفه يخدم ف كتيبة باش يتلاقى معاه و يعطيه أمجد يربيه
____________________________
سنابل راقدة ف فراشها و تعس على اروى امتى تنوض
سلسبيل توشوش فيها : عطلت ف النوم انوضوها و خلاص
سنابل : لالا مازال
روان بحداهم : تليفونها كان يشرين نقوللها تنوضله ؟؟
سلسبيل : به نوضيها انتي
روان جت جنب اروى : اروى ؟؟؟ اروى !
اروى شبحتلها : ايوا
روان : تليفونك يشرين
اروى شبحاته لقتها امها اللي متصلة ؛ سكراته و غمضت عيونها
سلسبيل و سنابل تكنطو
روان : نوضي هيا خلي نحطو الفطور اميمة من بكري تنادي
أروى قعمزت تلم ف شعرها و تتأفف : ماتخلوش الواحد يرقد مبردكم
سنابل قعمزت : نبي نصور سناب خسارة سنابي ماباش يطلع الفلتر اللي نبيه
سلسبيل : اروى عندها منه اهي تعطيك صوري منها
اروى ساكتة
روان : ايه اعطينا نصورو منه رورو
اروى فتحت تليفونها و مدتهولها : هاك صوري بيه بس مش نلقاك منزلتيها ف سنابي
سنابل خداته منها : هبلت امالا باش يشوفوني الشرادم اللي ضايفتيهم
اروى ناضت و مشت للحمام
سلسبيل فرحت : يس يس 💪
ناضت بسرعة و سكرت باب الدار بالمفتاح
روان : افتحي المكالمات بسرعة
سنابل فتحت المكالمات و بدت تشوف
لقت مكتوب ماجدة : زعما هو ؟؟
سلسبيل : خشي ع الرقم بسرعة
سنابل خشت عليه و سلسبيل عيطت : هو هو 😲
البنات انخلعو
روان : من هو
سلسبيل : رقم أمجد هو اللي خديته من يوسف
سنابل حمقت : حي عليها المسخة !!! والله ماني راحمتها
اروى جت بتفتح الباب لقاته مسكر
بدت اتطقطق : افتحو ✊
روان : حي على امها مش وقتها
سنابل توشوش : راجو مازال لين ندير دورتي ف التليفون
اروى : افتحو نبي التليفووون !
سلسبيل : باهي نبدلو ف حوايجنا شوية
اروى توترت : مديهولي و بدلي
روان علت صوتها : تي اصبري
سنابل تشوف ف الرسايل : الكلبة تكلم فيه على يوسف
و خشت ع الفايبر لقت محادثة هناء فتحتها
شهقت : هيييييه 😲
سلسبيل : خيرك ؟
سنابل : هي اللي باعتة الصور من تليفون هناء معناته ؛ لان هناء مستحيل تبعتلها صورها
روان تشوف : اما يوم مبعوتات !
سنابل : تاريخ الفضانية هذا
سلسبيل حامقة : هيا سكري نبي نقتلهااا 😤
سنابل : والله ماهي راياته لين تجي عمتي تشوفه
اروى اتطقطق : افتحوووو 😡
جو البنات ورا الباب و فتحولها
اروى خشت : عامين باش تفتحو !
سلسبيل سكرت الباب بالمفتاح
و سنابل نقزت على اروى
اروى طاحت و انخلعت : خيرك ؟؟
سنابل تضرب فيها على وجهها : و تقولي خيرك يا كلبة ؟؟
روان قعمزت على بطن اروى و تريّشلها ف شعرها : تبي تفرقي بين هناء و يوسف ؟؟ توا حني اللي بنفرقو جسمك من بعضه
سلسبيل واقفة : حولووووو 😡
البنات شبحولها
سلسبيل : خلوهاليييييي
روان حولت و جت سلسبيل نقزت عليها
و بدو يضربو فيها هما الثلاثة 👊👋👊
و اروى تعيط : امييييييييمه تعاااااااالي 😭
سنابل تضرب فيها كفوف : كولي على وجهك يا حيوانة يا واطية 👊👋👊👋
سلسبيل شدت رجلها تعض فيها
اروى تعيط : ااااااااااه 😭😭 حولوووووو
روان شادتها من شعرها و تحرك ف راسها يمين و يسار : تحسابي ربي مش حايكشفك يا حمارة يا شيطانة !!
( متلاقيات عليها هما الثلاثة و مش راحمينها )
__________________
هناء جت لأمها ف الدار : انى ننزل نجيب خبزة و نجي ؛ اصيل مش حاينوض و يشري توا
نجاة : باهي و مش تقعدي لوطه ! اركبي نفطرو انى وياك
هناء : به
مشت جنب الباب لبست شبشبها و طلعت
و هي كيف نازلة ف اول درجتين لقت يوسف راكب
وقفت ف مكانها و قلبها دق بسرعة
يوسف شبحلها تفاجأ : هناء !
هناء ولت بسرعة
خشت لحوشهم و سكرت الباب
يوسف وقف قدام الحوش متلخبط و ايديه يرعشو
فتح حوشهم و خش : امي ؟؟؟ يااااام ؟
سعاد من المطبخ : جيت يا اوسيفه
يوسف خشلها : لما قلتلي سمعتي هناء تتكلم امتى بالزبط !
سعاد تلخبطت : تو انت عرفتها على حقيقتها و تمت شن تبي فيها اما يوم
يوسف متعفلق : علاش تكذبي عليا ياام ؟!!!
سعاد خافت : انى ماكذبتش عليك
يوسف خدي طاسة و كسرها : اني اليوم عرفت كل شي انتو تكذبو عليا باش ماناخدهاش .. كنتي تخططي مع اروى باش يصير اللي تبيه
سعاد : شن تقول يا ولدي والله ماصارت
يوسف يعيط : علاش تحرقيلي في دمي ياام !!
سعاد : مش انى اللي سمعتها تتكلم اروى هي الي قالت
يوسف انصدم : اروى !!!
سعاد : ايه البنية خافت تقولك قلت انى نقولك ف مكانها
يوسف حط ايديه على وجهه و بدي يعيط : و توا وين بنلقىٰ امها اروى ؟؟!!!
سعاد : تلقاها لوطه برا اسألها و تأكد
_________________________
هناء واقفة ف دارها تسمع ف عياط يوسف و تبكي
جت لشناطي بتاتها تكر فيهم لبرا الحوش
و بدت اتطيح فيهم من الدروج يتكركبو
يوسف فتح باب شقتهم و طلع حامق لقي هناء تبكي و اتطيح ف الشناطي وقف ف مكانه مصدوم
هناء شبحتله خشت لحوشهم بدون ماتكلمه
سكرت الباب و قعمزت تبكي : ااه ياربي ريحني من اللي انى فيه
جتها نجاة : شن صوت التقربيع هذا ؟
هناء شبحتلها و تبكي : انى من اليوم معاش نبيه ولا عاد نبي نشوفه .. خلوه يطلع من هني ولا انى اللي بنطلع و نعيش بروحي
نجاة : خلاص معاش تسحني روحك كبدك ذابت يا بنيتي .. نوضي من العتبة مش كويس تقعمزي فيها
هناء دوب ماتتكلم : معاش قادرة نوقف ؛ وقفيني انتي
نجاة شدتها : خيرك
هناء شدت بطنها من الوسط تتألم و تبكي : ااااه مش عارفة
_______
يوسف يسمع فيها تبكي و يشوف للشناطي و قلبه يتقطع
تفكر اروى نزل بسرعة و خش لحوش جده
لقي حلومة و عصام يطقو ع البنات
حلومة : افتحي انتي وياها خيركم ؟؟؟
العارف واقف : خيرهم كلبو ؟ شن يديرو هادو !!
اروى تعيط و البنات مازال يضربو فيها
عصام يخبط : افتحي الباب انتي وياها خير مانكسر امه !!!
روان رخت شعر اروى و فتحت الباب
عصام خش : خيركم شن اديرو ؟؟؟
جي نحّا اروى من بين ايدين سلسبيل و سنابل
يشوفلها و مصدوم : هبلتو ولا شني ؟؟؟
اروى تبكي و وجهها دم : شوف شن دارو فيا يا عصام 😭
سلسبيل حامقة : مازال نبي نقتلها حولووو 😡
حلومة خشت راعشة : بسم الله الرحمن الرحيم .. شن جاكم اللطف خيركم !!!
سنابل خدت حلومة و طلعتها برا : تعالي يا امّيمه تو نقولولك
خش يوسف للدار متعفلق : كلكم اطلعو و خلوني انى و اروى
عصام شاد اروى شبحله : شن فيه ؟
اروى خافت و جت ورا عصام
يوسف : نبيها ف موضوع اطلعو يا عصام هيااا
عصام : موضوع شنو يا راجل شوف البنت حالتها كيف
يوسف : اطلعلي انت وياهم هيا
عصام خدي البنات و طلع
يوسف سكر الباب بالمفتاح و شبحلها
اروى تبكي : يـ يـ يوسف 😢
يوسف ينّحي ف السبتة من سرواله
اروى خافت : شن بتدير ؟ 😰😢
يوسف تني السبتة و بدي يجلد فيها
اروى تعيط و حلومة راعشة برا : يا حي عليا هذا شن ايديرلها
روان تضحك : يجلد فيها الكلبة
العارف عاقد حواجبه : تكلمو يلعن فيتكم شن فيه ؟؟
سلسبيل بدت تحكي ف اللي صار : .........
__________________________
هناء متكية ف سريرها و سارحة
نجاة بحداها : شن رايك نطلعو انى وياك
هناء : وين
نجاة : وين تبي انتي
هناء شبحتلها : ارفعيني عند خالتي
نجاة : باهي نوضي وتي روحك
هناء قعمزت
نجاة : حتى لو تبي تباتي عندها اقعدي
هناء ناضت و فتحت دولابها اتطلع ف حوايجها : غدوا بنسافر مع بابا اما بيتان
نجاة : كان نلقى نمشي معاك لكن خواتك مايتخلوش بروحهم
هناء ساكتة
نجاة وقفت : نحط طنجرة الغدي ع النار و نطلعو هي
__________________________
سلسبيل : هي اللي طلعت مدايرة كل شي
حلومة و العارف ساكتين و مصدومين
عصام تعفلق و مشي يطق ع الباب : افتح يا يوسف
يوسف يضرب ف اروى و حامق : باعتة صورها لذكر يا **** تخلي واحد ماتعرفاش تنكشف عليه يا ******
و يزيد يجلد فيها
اروى تعيط : خلاص سامحني خلاااااااص 😭
عصام يطق و يصيح : افتح الباااااااب !!!!!
يوسف لوح السبتة من ايده و فتح الباب داهش
عصام خش و شد اروى من ايدها : اوقفي
اروى فاشلة من الطريحة من قادرة توقف
عصام يوقف فيها : اوقفييييي
يوسف يشبحلها : معاش نبي نشوف وجهها الكلبة هادي
و طلع الشارع
عصام يكر ف اروى : للسيارة تحركي
اروى داهشة : نبي تليفوني
سنابل : والله ماك واخدتيه تو تاخديه من عمتي
عصام يكر فيها : اطلعي قدامي
ركبها ف سيارته روح بيها و رجع
___________________________
مرام فاقت من النوم لقتها ساعة 1 ونص الظهر
انخلعت و قعمزت : حي عليا من عصام قال يبي الغدي بكري اليوم
ناضت بسرعة و خشت الحمام
و هي طالعة من الحمام عصام فتح الباب و خش
مرام خافت و شدت ف الساس : عصاااام
عصام انخلع و جاها : خيرك ؟؟
مرام داروحها مريضة : اليوم تاعبة هلبا مش قادرة نوقف
عصام شدها يمشي فيها : كيف حاسة روحك
مرام دوب ماتتكلم : دوخة و ترجيع من الصبح حتى الغدي ماقدرتش نديره
عصام تكّاها ع السرير : معليشي حبيبتي المهم صحتك
مرام تبكي : انى تعبت من الوحم امتى نجيب و نرتاح
عصام باس جبهتها : ربي ينوضك بالسلامة اهم شي اهتمي بصحتك بس
مرام غمضت عيونها
___________________________
هناء لبست حوايجها و جت لنجاة ف المطبخ : شن اديري
نجاة شبحتلها : شكشكت امبكبكة ع السريع تو نقول لخواتك يركبو يوقفو عليها
هناء : باهي انى سابقاتك
خدت مفتاح سيارة نجاة و مشت تلبس ف كندرتها
__________
البنات راكبات ف الدروج لقو الشناطي طايحات شهقو 😲😲
سلسبيل : حييييي زعما شن صاااار !!!
روان تشوف و ساكتة
سنابل : تعالو نقيموهم ف حوش امّيمه اكيد معاش تبي تشوفهم
بدو يكرو فيهم البنات لحوش حلومة و حطوهم ف الدار
___________
هناء فتحت الحوش و طلعت ؛ لقت الشناطي مهناش ماهتمتش و نزلت
طلعت الشارع لقت يوسف واقف يدخن
شافاته ولت و خشت لحوش حلومة
يوسف لما شافها قلبه دق و ماعرفش كيف يتصرف
هناء وقفت ف المربوعة بروحها و نحت وشاحها
قلبها يدق و مكشرة وجهها
يوسف لحقها و خش يدور فيها
تلفت للمربوعة لقاها واقفة عاطية بظهرها و ساكتة
يوسف جي من وراها يشوفلها
هناء تاعبة و تتألم من بطنها
يوسف قرب منها و بصوت واطي : انى اسف
هناء سمعاته قلبها دق بسرعة و خنقتها العبرة
يوسف : عارف اني قسيت عليك و ظلمتك بس انى جيتك نادم و نتأسف منك
هناء ساكتة قلبها مغصوص و مازال مجروحة منه
يوسف قرب من شعرها يدويلها ف وذنها : هنو !
هناء نحت راسها و بعدت
يوسف قام راسه و تنهد
هناء عاطياته بظهرها ؛ تتكلم و صوتها مخنوق : مادامك خطبت غيري و بدلتني بيها من قبل ماحتى تفهم اللي صار معش نبي نشوفك ولا تدوي معاي
يوسف انصدم : شنو ؟؟ شن خطبت غيرك !
هناء بهزوة : ديرلي روحك متفاجأ توا
يوسف : انى ماخطبتش من اللي قالك الكلام هذا
هناء تلفتت و شبحتله
يوسف : ماخطبتش غيرك مستحيل ندير هكي
هناء عيونها مدمعات : و انى المفروض نصدقك توا ؟
يوسف شدها من ايديها : انى مش عارف من اللي قالك هكي و كذب عليك لكن صدقيني ماخطبتش غيرك ولا شفت بنت غيرك
هناء نحتله ايديه : بعد من عليا ماتمسنيش
يوسف سكت
هناء نحت دبلتها بِ غل و لوحتها عليه : اطلع من حياتي يا يوسف ؛ خليك ف حالك و اني في حالي .. توا تقدر تعيش مع خطيبتك الجديدة و انت متهني
يوسف قرب منها : ماتكسريليش قلبي بالكلام هذا .. انى مانقدرش نعيش من غيرك
هناء متعصبة و قلبها محروق : مانكسرلكش قلبك ؟؟
ادف فيه من صدره و متعصبة : واللي درته فيا شني ؟؟؟
يوسف ساكت
هناء ادف فيه و عيونها مدمعات : انت قهرتنييي .. حرقتني .. دمرتني يا يوسف .. انت موتتني ف اليوم الف موتة
و تأشر على روحها بيديها و ترعش : و تبيني مانكسرلكش قلبك ؟؟
يوسف ساكت و قلبه يتقطع
هناء متعصبة : مش قلتلي ف لحظة ان اللي بينا تم ؟؟ شن تبي فيا توا !!
يوسف يشوفلها و مقهور : اسمعيني بس
هناء تحرك ف راسها : لما انى نبيك تسمعني و تصدقني انت ماسمعتنيش
يوسف : كاذبين عليك انى ماخطبتش
هناء قامت حواجبها : امك طلعت قدامي و قالت انها بتخطبلك ! و باش تزيد تقهرني طالعة تكلكس ف السيارة
يوسف : والله ماصارت الدوة هادي شن تقولي انتي ؟؟؟
هناء ضحكت بهزوة : هاهاها امك بتخطبلك بالسيف عليك يعني ؟؟ بتغصب عليك وحدة اختارتها هي ؟؟؟ راجل بطوله و عرضه زيك بيكون مغصوب عليه انه يخطب !!
يوسف مصدوم كيف بيتكلم .....
هناء دفاته و طلعت
يوسف وراها : هنااااء
هناء طلعت تجري للسيارة و تبكي
يوسف قعد واقف يشوفلها متدمر و قلبه مغصوص
نجاة نزلت و خشت لحوش حلومة : هنااااء ؟!!
يوسف شبحلها و ركب بسرعة لأمه
فتح الباب و خش : امي !!!!
سعاد متكنطية منه : بتكمل تهزيب ف امك ؟؟
يوسف : انتي قايلة لهناء انك خطبتيلي ؟؟
سعاد : ايه امس مشيت شفتهالك البنية رايحة قمر 14
يوسف تعفلق و بدي يعيط و يكسر ف الحوش : انتي تبي تهبليني ؟!!!! ولا تبيني نهج منك باش ترتاحي !!!
سعاد فنصت فيه : طيح سعدك تكسر ف الحوش على خاطر وحدة رخيصة زي هادي
يوسف يعيط و يكسر : انى غر شن جابني للهم كنت مرتاح من هالعيشة الحرفة هادي
سعاد علت صوتها : تو نزوجك وحدة تنسيك فيها ماتغشش روحك
يوسف وجهه احمر من الغل و بدي يحكيلها ف اللي صار
سعاد انصدمت و سكتت
يوسف : ماشية تخطبيلي من راسك ؟؟؟ هبلتي انتي ؟؟؟؟
سعاد تشوفله و ساكتة
يوسف : والله ماعاد قاعدلك ولاك شايفة وجهي بعد اليوم
طلع و قربع الباب
سعاد حاطة ايدها على صدرها و مصدومة
قعمزت ع الكنبة و بدت تبكي
يـتـبـــع ... 💗
لن أسمح بنقل الرواية دون ذكر المصدر ‼️
________________________
شن رايكم ف حلقة اليوم ؟ و شن تتوقعوا يصير ف الحلقة الجاية ؟؟