الفصل 13
روايــة #صغار_العم
الحَـــلْـــقـــة الــثــالــثــة عــشـــر 🌸
سنابل : صوت دوشة لوطه ولا ؟
سلسبيل : ايه صح
نجاة : انى نازلة ووه كان ما جدكم عملها
هناء : فكينا يا ماما ترا
فتحت الباب و نزلت تجري هي و نجاة
سلسبيل نزلت وراهم
سنابل : دقيقة و نجي
خشت للحمام و نزلت لحقتهم
اول ماخشت لقتهم كلهم يبكو و متفركسين
جت لسلسبيل : خيرهم ؟؟
سلسبيل راعشة : جت كتيبة مسلحة رفعو محمد
سنابل انصدمت و جسمها صقع : ع ع علاش ؟
سلسبيل : قالو رفعوه في مكان محمود ابصر شن مداير من عملة
سنابل من الرعشة فقدت وعيها و طاحت
سلسبيل شهقت : هيييييه
نجاة جتها تجري : خيرهااااا
سلسبيل : شورها مريضة غر قيميها معاي يا ماما
قاموها نجاة و سلسبيل للدار بدون مايحسو بيهم الباقي
__
ازهار تبكي و تخبط على صدرها : ووه عليا وليدي رفعووه وين بنلقاه بسس
حلومة راعشة معاها : معادش تخبطي على روحك يركبك مرض تقعدي تعاني ؛ اذكري ربي و ان شاء الله يروح بالسلامة
ازهار : كيف تبيتي نهدا يا اللاّي كيييف و ولدي مقيوم ! غر وين بنلقاه بس وين .. اكيد معاش بنشوفه خلاص تو يعذبوه و يقتلوه ااااه وووه عليا ووه
احمد يبكي خايف : اسكتي يا ماما 😭
هناء شدت احمد : ماتخافش اكيد خوك شوية و يجي
احمد : لالا اللي يخطفوه معاش يروح الا لو ندفعو فلوس نعرف انى
العارف شبحله و سكت
ازهار منهارة : ااااه يا حميدا وينك .. وين رفعوك و خليتني بروحي يا كبديييي
سعاد : ولدك محمود شديه و اقتليه بيجيب اخرة خوه ف جرايره
روان فنصت ف سعاد : في مكان ماتدوي هكي ادعي لربي يرجعلنا محمد بالسلامة والله ماناقصين حني
سعاد : نقول في الحق امالا عاجبك اللي صاير ؟
روان : قوليه في وقته مش توا
العارف متغشش و ساكت
هناء فتحت تليفونها : تو نتصل بِ بابا يجي بالك يقدر يعرف عليه حاجة
سعاد شبحتلها : حتى يوسف خدي مني التليفون و طلع بالك مشالهم
روان : وين بيمشيلهم و هو ماعرفش حتى كتيبة شني
العارف : كلمو عماد يروح
حلومة : لاااا ردو بالكم تقولوله حتى كان اتصل ماتوضحولاش بالك حميدا يرجع
ازهار تبكي و ماتسمعش فيهم
____________
يوسف ف الشارع يتكلم ف التليفون : روح يا **** خوك ابصر وين طارو بيه و انت تنسرف
محمود مصدوم : هاني جاي سكر سكر
و سكر عليه الخط
يوسف كتب رقم صاحبه مهاب و اتصل بيه ..
____________
سنابل مغمضة عيونها و تبكي
نجاة اديرلها في الصنة : سنابل ؟ نوضي يا بنيتي شن جاك اللطف ؟
سلسبيل تشوفلها و ساكتة
سنابل تبكي : ماما .. محمد ضاع يا ماما
نجاة سكتت
سنابل مغمضة عيونها و دموعها ينزلو : ااه يا ماما رفعوه قبل مانشوفه
نجاة شبحت لسلسبيل : خيرها تهلوس باسمه
سلسبيل تلخبطت و جت تقعمز ف سنابل : نوضي
سنابل فتحت عيونها و شبحتلها : سلسبيل 😭
نجاة طلعت من الدار بدون ماتكلمها
سلسبيل ضبطت سنابل : ماما زبطاتك نوضي و امسحي دموعك
سنابل تبكي : ياريتني نزلتله الصبح وقت طلب 😭 كان مايموت و انى ماقلتلاش اني نحبه يا سلسبيل 😭
سلسبيل : اسكتي و معاش تفاولي عليه
خشت هناء : سنابل ؟؟ خيرك !
سلسبيل شبحتلها و سكتت
سنابل تبكي
هناء قعدت تشوفلها و ساكتة
________
يوسف يتكلم في التليفون : بالله قول لخوك يدوره انى مانعرف حد في الكتايب خليه يسأل عليه بالك نقدرو نوصلو فيه
مهاب : انت ماعرفتش اسمهم ؟؟
يوسف : لالا ماكتروش حتى الدوة
مهاب : عندي عمي ماسك الدوريات تو نكلمه
يوسف : بالله بسرعة نراجي فيك
مهاب : تم تم هي سكر
سكر يوسف الخط و كيف بيخش الحوش لقي محمود جاي يجري
محمود داهش : شن صار
يوسف شده من ايده و ركبه ف السيارة : اركب بسرعة
محمود : خيرك ؟
يوسف ركب و طلع يجري : اليوم ماتروحش بكل لين نشوفو خوك شن يصير فيه
محمود : باهي شن اللي صار ؟؟
يوسف : جو ملتمين بتيوتات سألو عليك ولما عرفو انك مهناش رفعو خوك ف مكانك
محمود مصدوم : من هما !
يوسف علّا صوته : وين نندري عليهم انى .. باهي اللي حاضر و ريته
محمود سكت و قعد يفكر
يوسف : شن مداير من فالطة باش جوك للحوش ؟؟
محمود تفكر صاحب المحل تعفلق : دور السيارة و ارجع
يوسف : علاش
محمود علّا صوته : ارجع بسرعة تو نقولك
يوسف : انت لازم تختفي توا خير مايشوفوك و يجوك
محمود يعيط : هذا ال**** متع الدخان تعاركت معاه مفيش غيره يديرها
يوسف شبحله : اما محل ؟؟
محمود : ارجع بيا اني الي لازم ننشد مش محمد
يوسف : غر قول وين مكانه المحل و انى تو نتصرف
_________________
هناء : نوضي ابكي فوق فكيك من الشهدرة
سنابل : لااا 😭
سلسبيل : هيا نوضي اركبي معاي
سنابل تبكي : لالا مانيش متحركة من هني لين محمد يجي
سلسبيل سمعت صوت اصيل : حي على امك اصيل جي تو يشوفك يورقلك
سنابل : خليه يورق بنمووووت 😭
سلسبيل وقفتها : اطلعي معاي بسرعة
سنابل دوب ماتمشي و تبكي
هناء تشوفلها و ساكتة
ركبتها سلسبيل للحوش و دخلتها لدارها
_________________
06:30 م
يوسف روح الحوش لقي زحمة ناس ماقدرش يخش
وقف ف الجنان لقي اصيل مقعمز على كرسي ؛ متكي مرافقه على رجليه و شاد راسه
يوسف : ماصار شي ؟
اصيل قام راسه و شبحله : لالا حتى الكاميرات متع محلات الشارع ماداروش فايدة
يوسف سكت
أصيل وقف : بوي وين ؟
يوسف : طلع هو و بوي ماشيين لواحد ممكن يفيدنا
اصيل متوتر و خايف : ان شاء الله خير ان شاء الله خير
يوسف : انى خايف يعذبوه او يقتلوه
اصيل : حتى انى هذا اللي نخمم فيه ... محمود وين
يوسف : دسيته عند اشرف صاحبي قلت خير مايجوه حتى هو
اصيل : احسن مادرت
يوسف شرين تليفونه
طلعه من جيبه و رد : ايوه اشرف
اشرف : تعالى لولد عمك مداير العار
يوسف : خيره ؟
أشرف : يعيط يبي يروح
يوسف تكنطا : تي اربطه و سكر عليه بالقفل و خليه يعيط للصبح
اشرف : مية مية
يوسف سكر الخط : شانك حالة الزفت
اصيل : خيره
يوسف : يبي يروح الحمار
اصيل : وليت لمحل الدخان حتى انى لقيته قاعد مسكر
يوسف : هارب الكلب معناها رسمي مافيش غيره
طلعت هناء للجنان : يوسف
يوسف شبحلها
هناء قربت : شن صار معاك
يوسف : مازال ماصار شي
هناء : مرت عمي مريضة نبو حد يرفعها للمستشفى
يوسف شرين تليفونه لقاه مهاب
فتح الخط بسرعة : ايوه
مهاب : تعالى في مقر ( .... )
يوسف : جايك
سكر الخط و طلع يجري
هناء استغربت : زعما شن قاله
اصيل : طلعيها اني تو نرفعها
خشت هناء للمربوعة و وقفت ف العتبة : هي نوضي مرت عمي اصيل تو يرفعك
ازهار متكية مش قادرة تشد حيلها : لا لا مانبيش نمشي لي ولا مكان خلوني
نجاة مقعمزة بحداها : لا مش على كيفك انى تو نرفعك
و شبحت لهناء بصوت عالي : هنااااء هاتيلي عبايتي و مفتاح سيارتي فيسسسع
هناء انخلعت : باهي ماما خيرك !
و ركبت لحوشهم
نجاة شبحت لروان : بسرعة جيبي لأمك حاجة تلبسها تحركي
ركبت روان لحوشهم تجري
أمال مقعمزة متغششة : ياروحي عليك يا حميدا والله ماتستاهل .. ربي يكون معاك و يحفظك منهم
اروى مقعمزة و ساكتة
امال : المشاكل بدت كلها بالسلاح ان شاء الله يسلم منهم
ازهار ساكتة و تبكي
سعاد بصوت واطي : والله كان محمود ولدي الا ما نتبرأ منه و مايقعدلي ف حوش
نجاة سمعتها و فنصت فيها : اللي رجليه ف المية مش زي اللي رجليه ف النار
سعاد : مانا غاطسين فيها كلنا النار
نجاة : تو كان قامو يوسف نشوفوك كيف تعيطي و تخبطي زي المهبولة
سعاد : انى ولدي مش مشكلجي باش ينطب
نجاة : حتى محمد نفس الشي يعني لو يوسف اللي فتحلهم رآهم شفطوه و منعوا
حلومة تبكي : ياسري انتي وياها بلا تفتريش زايد حشمتونا قدام الناس مش وقته
جت روان شادة عباية امها : هيا ماما نوضي ألبسي
خدتها منها نجاة تلبس ف ازهار
________________
هناء واقفة على سنابل : كبدك ذابت من البكي
سلسبيل : ريقي جف و انى ندويلها
سنابل متكية ف سريرها و تبكي
هناء : بدل ماتبكي نوضي شدي المصحف اقريه ولا صلي و ادعيله باش يرجع بالسلامة
سلسبيل شافت لهناء : شن شادة ف ايدك ؟
هناء : عباية ماما بترفع مرت عمي ازهار المستشفى
سلسبيل : ارفعو حتى هادي
هناء طلعت و ماردتش عليها
________________
08:00 م
يوسف وصل المقر لقي مهاب يراجي فيه
نزل من سيارته متوتر و قلبه مشغول : شن صار
مهاب : عندك علم ان ربي كتبله عمر جديد
يوسف : كيف
مهاب : عمي لحق عليه ف اخر لحظة ؛ لقاهم كيف رافعينه لمقرهم التاني و اللي يمشي غادي اقراله فاتحة يا برو
يوسف حط ايديه على وجهه : الحمد لله .. وينه عمك ؟
مهاب : قاعد الداخل قالوله لولاك مانا راحمينه لانهم اللي داخل كلهم يعرفوه
يوسف : تي هما رفعوه ف مكان خوه علاش بيصفوه هو
مهاب : هادو ميليشية مايعرفوش لا ظالم ولا مظلوم ؛ المهم عندهم يقتلو يبدا لحمهم ياكل فيهم لين يطقو باش يستريحو .. القتل عندهم زي الإدمان
يوسف : لا حول ولا قوة الا بالله ؛ القصص هادي كنت نسمع بيها بس و ماصدقتش لين ريت بعيوني
مهاب : ولد عمك التاني ربيه و قوله يهني روحه
يوسف : بارك الله فيك يا مهاب لولاك راهو الولد راح من بين ايدينا مش عارف كيف بنشكرك
مهاب : تي عيب يا هومي حني عشرة عمر و زي الخوت مابيناتناش الشكر
يوسف ابتسم : اصلي والله
مهاب ضحك
يوسف شبح لباب المقر : خلينا نخشوله
مهاب : تي اما تخش ! فكك ياراجل عمي كاذب عليهم على اساس ولد اخته و يلخبط فيهم بالكلام
يوسف سكت
مهاب : كان يكلم فيا قبل ماتجي قالي شوية و طالعين
بعد شوية طلع محمد هو و طارق عم مهاب
__________
09:00 م
خشت نجاة للحوش مدخلة ازهار هي و اصيل
__
السنوسي و اسماعيل خشو للحوش و قعمزو ف الجنان
السنوسي متغشش : والله ماني عارف كيف بندير ولا كيف بنتصرف
اسماعيل : و المشكلة ان عماد مهناش ، الولد ف رقبتنا
السنوسي حمق : تو نوريه الفرخ محمود كله منه يخلي فينا راعشين و يبهدل ف خوه .. غر يروح بس بنمسح بيه الارض
اسماعيل : و بالك اللي تعارك معاهم مردف و حطوه ف راسهم ؟ يعني مرات مش هو اللي غالط
السنوسي يحك ف ايديه على بعضهم : ماهو ناقص ربااية كان هذا مايديرش المشاكل
يوسف فتح باب الشارع و خش هو و محمد
السنوسي تفاجأ و وقف : روحت !
اسماعيل تلفت
محمد قرب من عمامه
اسماعيل و السنوسي : الحمد لله على سلامتك
محمد : الله يسلمكم
السنوسي : شن اللي صار معاك و كيف جيت ؟؟
محمد : ريت الموت بعيوني ياعمي ؛ كان مش من يوسف راهو يعزو فيكم الناس
السنوسي شبح ليوسف : خيرك ماقلتش انك لقيته ؟
يوسف : مابيتش ندوي لحد قلت لين يطلع
اسماعيل : باهي شن اللي صار تكلمو !!
احمد طلع للجنان : محمددد ؟
محمد شبحله و احمد جاه يجري ضبطه
خش أصيل فرح : اوووه الحمد لله ع السلامة
____________
هناء واقفة جنب جدها ف داره : يا اجديده خود الحبة مش كويس تقعد لتوا بلا دواك
العارف متغشش : ماعنديش نية يا هناء خليه توا
هناء فتحت الحبة و مدتهاله : هيا على خاطري انى خودها
العارف خداها منها و شرب المية
هناء : ماتهملش روحك يا اجديده ، كلنا متأثرين و متغششين على محمد لكن هذا دواء و لازم تاخده ف وقته
العارف متكي ف سريره و ساكت
هناء : تبي حاجة ؟
العارف هز راسه بمعنى لا
هناء : لو تبي اي حاجة ناديني
العارف : سكري الباب وراك
هناء طلعت و سكرت الباب
العارف يفكر .. ( لو فروخ الحرام بيطلبو فدية كيف بندير ؟؟ ندفع ولا لا ؟؟ .. محمد روحه غالية لكن الكلاب مايطلبوش الا ف ارقام تجلط )
__
هناء لقت ازهار مقعمزة ف المربوعة : مرت عمي كيف حاسة روحك توا ؟
ازهار مازالت متغششة
نجاة : دارولها تغذية حسيتها احسن توا
العيلة كلهم ملتمين جنب ازهار و ساكتين الا سنابل قاعدة تبكي ف سريرها و مانزلتش
فجأة خش احمد يصيح : محمد جيييييي
ازهار فرحت و وقفت : الحمد لله ياربي وليدي رجعلي
خش محمد : السلام عليكم
و خشو عمامه و يوسف و اصيل وراه
ردو عليه العيلة : و عليكم السلام
حلومة فرحانة : حميدا جي الحوش ضوي
جاته امه اتضبط فيه و تبكي
محمد مضبطها : فكينا من البكي يا امي
ازهار تبكي مش قادرة تتكلم
محمد شبحله و يمسحلها في دموعها : هاني روحتلك و مافيا شي قدامك خلاص
شدها من ايدها و قعمزها
العيلة كلهم فرحانين بيه و يتحمدوله على سلامته
__
سلسبيل وشوشت هناء : انى بنركب اناديها
هناء شدتها من ايدها : مش توا اصبري
سلسبيل : مش شفتيها شن صاير فيها !!
هناء توشوش : لو بتنزل توا بتدير العار قدامهم اصبري لين كل واحد يركب لحوشه
سلسبيل سكتت
محمد وقف : وين جدي ؟
امال : خشله ف داره مسيكين مايندريش عليك
محمد يدور ف سنابل بعيونه اتضايق .. ( وينها !! المفروض اول وحدة نلقاها تراجي فيا !! )
خش لجده ف الدار و سلسبيل ركبت لحوشهم تجري
هناء جت عينها ف عين يوسف
يوسف طلع و قعمز ع الكنبة وسط الحوش
اروى لحقاته و قعمزت بحداه : يوسف شن الجو
يوسف شبحلها : تمام شن مدايرة ؟
اروى : الحمد لله تمام
جت هناء و قعمزت معاهم
اروى تكنطت : يوسف بتفتح نت الليلة ؟
يوسف عيونه ف التلفزيون : لالا
اروى : ماهو نبيك في موضوع
هناء تكنطت : شورك مواضيعك مايتموش
اروى شبحتلها : ايه شن بديري هي 😊
هناء قلبت وجهها و سكتت
اروى : نتصل بيك بعدين و نقولك اوكى يوسف ؟
يوسف : ان شاء الله خير
اروى ضحكت
هناء : صوت عمتي تنادي عليك
اروى شبحتلها : ماسمعتش
هناء : انى سمعت
اروى ناضت و مشت للمربوعة
هناء شبحت ليوسف : ماتردش عليها لما تتصل
يوسف شبحلها : ماتدويش معاي ولا كلمة
هناء : علاش ؟
يوسف وقف و ركب الدروج
هناء لحقاته ؛ ركبت معاه و هي ساكتة
يوسف يشوفلها و متكنطي منها
هناء كيف بتفتح باب حوشهم : انى ماغلطتش فيك باش تتعفلق مني
يوسف كيف بيخش لحوشهم شبحلها : قداش ليك عندك علم ان قبلوك ف الشغل ؟
هناء تلخبطت : يومين
يوسف قرب منها و فنص فيها : يومين و ماتقوليليش !!
هناء خافت : معادش لقينا فرصة نتكلمو فيها من اللي روحنا من البحر
يوسف : هذا مش عذر
و يتكلم بصبعه : الراديو معاش تفكري فيه اتصلي بيهم و قوليلهم انك بتسيبي خلاص
هناء تكنطت : لا مستحيل
يوسف فنص فيها : شن هو المستحيل ؟ تبي تسّمعي صوتك ف الراديو و تتكلمي مع اللي يسوا و اللي مايسواش و تمشي و تجي بروحك و نسكتلك ؟؟
هناء : يوسف انت من اللي روحت لقيتني نسوق و متخرجة ماتجيش توا تحط عليا شروطك ؛ انى بنقعد نسوق و نخدم الخدمة اللي نبيها و ف المجال اللي اخترته ماتفرضش رايك عليا و تمشيني على كيفك .. حط الشي هذا ف بالك مانبيش نقعد كل شوية نعاود فيه
يوسف متعفلق : و انى ماعنديش مرا تسوق و تخدم ف الراديو و الايام بينا يا هناء
و خش الحوش متعفلق
هناء خشت لحوشهم و قربعت الباب و هي حامقة : برا ملح والله ماك حاكم فيا لو تكون اخر راجل ف الدنيااا 😡
و تخبط برجليها : نكرهه الجو هذا وااك 😭
_____
سلسبيل ف دارها تنوض ف سنابل : سنابل ؟
سنابل من الزعل و البكي خداها النوم
سلسبيل : سنابل نووضي
سنابل شبحتلها و قعمزت : محمد روح ؟
خشت هناء متكنطية ؛ قعمزت جنب خواتها و هي ساكتة
سلسبيل شبحتلها : خيرك ؟
هناء : الدراه اللي عندي يتشرط عليا
سلسبيل ضحكت : توا طلعلك دراه ؟
هناء كشرت وجهها : و النبي اسكتي انتي مش وقتك
سنابل : شن صار ف محمد
سلسبيل شبحتلها : حمودك روح 😍
سنابل فرحت و طلعت تجري من الدار
سلسبيل مشت شدتها : ماتنزليش توا لااا
سنابل ادف فيها : حولي نبي نشوفه
سلسبيل : توا معاه العيلة اصبري يركب و شوفيه
سنابل فتحت الباب و نزلت تجري
سلسبيل تكت راسها عَ الباب و تنهدت : ااااااخ امتى بنعيش حتى انى ؟
و سكرت الباب
___
سنابل وقفت ف الجنان و اتصلت بمحمد ..
محمد فتح الخط : ايوه
سنابل قلبها يدق : تعالالي ف الجنان
محمد : اوكى .. و سكر الخط
___
يوسف يتكلم ف التليفون : اه اشرف
اشرف : شن صار معاكم
يوسف : موضوعه تم الحمد لله
اشرف : باهي الحمد لله ؛ من بكري بالي عندك
يوسف : شن صاير فيه هداكا
أشرف : اهو مقعمز و ساكت
يوسف : ابعته يروح خلاص
_______
سنابل واقفة تراجي و قلبها يدق
بعد شوية شافت محمد جايها
قربت منه بسرعة و حضناته
محمد انصدم و يشوف للرواشن : شن اديري ؟
سنابل تبكي : خفت عليك هلبا
محمد خداها من ايدها و مشي بيها ورا الحوش : تعالي معاي خير مايشوفنا حد
وقف معاها و شدلها ايديها
سنابل صوتها مبحوح من البكي : ماتتصورش شن صار فيا لما سمعت لتوا ايديا يرعشو و قلبي يدق بسرعة
محمد حضنها : سلامة قلبك حبيبتي
سنابل تبكي بلا صوت
محمد يمسحلها ع شعرها : اششش اهدي .. دقات قلبك حاس بيها ف صدري
سنابل مازالت تبكي
محمد : توا علاش تبكي ياعيوني و انى معاك
سنابل شبحتله : نادمة هلبا إني مانزلتلكش الصبح لتوا قريب نموت عليها
محمد يمسحلها ف دموعها : عادي حبيبتي ماتفكريش ولا تاكلي بعضك بكل
سنابل : خلينا نباتو عند امّيمه اليوم
محمد ضحك
سنابل انحرجت : معاش تضحك ندوي بجديات
محمد : تبينا نرقدو مع بعضنا ولا كيف 😉
سنابل تحشمت : لاااا
محمد يضحك
سنابل : نبي نسهرو مع بعضنا و بعدين انت ارقد ف دار عصام
محمد : مش عارف بعدين ساهل
سنابل شدت ف ايده : نبي تعويض على الرعشة متع اليوم
محمد ضحك : نية بوي هادي
سنابل : شن صار فيه ؟
محمد : قاعد زي ماهو
و حط ايده على خدها : فكينا من عماد توا و خليني فرحان بيك
سنابل ابتسمت : ربي يخليك ليا ولا يوريني فيك سو
________
11:00 م
هناء متكية ف سريرها و فاتحة على رقم يوسف مترددة تتصل ولا لا
خشت عليها سلسبيل : هناء
هناء شبحتلها : نعم
سلسبيل قربت منها : تسايريني لوطا
هناء : علاش
سلسبيل : نسيت شحني بنجيبه
هناء : مشيها على حد تاني اكيد يوسف باعتك
سلسبيل ضحكت : و الله لا
هناء : ماخاطريش ف النزول توا
سلسبيل : قصدك بجديات متعاركين ؟
هناء : فكيني منه المنكدي كل شي لا لا شن هذا فديت
سلسبيل : هو خايف عليك عنده الحق
هناء : شن خايف عليا بلا جو ؛ انى مش البنت الوحيدة اللي تسوق ف البلاد
سلسبيل : ف مكان ماتفرحي ان عندك راجل حزار و يخاف عليك تعاركي فيه و ماتبيش تكلميه ؟
هناء : هذا معقد ماهوش حزار و بعدين لو بنسمع كلامه ف كل حاجة حايفرض عليا شخصيته و انى الا هالحاجة مستحيل نرضاله بيها
سلسبيل : انتي شكلك مسكرة راسك ، المفروض انتي ترضيه لانك مش قايلتيله من الاسبوع اللي فات ع الأقل ريحي ضميرك كان أنبك
هناء سكتت
خشت سنابل : سلسبيل تعالي معاي
سلسبيل شبحتلها : وين
سنابل : بنبات لوطه سايريني
هناء ضحكت : بتباتي بس 😉
سنابل ضحكت
سلسبيل تنهدت : يا قعادي نساير و نتوسط بينكم
هناء ضحكت
طلعو خواتها من الدار و اتصلت بيوسف
يوسف كيف بياخده النوم تليفونه شرين
لقاها هناء ماباش يرد
هناء عاودت تاني ..
يوسف فتح الخط : ايوه
هناء : اوسيفه حبيبي
يوسف زراته الضحكة
هناء : يوسف ؟ رقدت !
يوسف : نسمع فيك
هناء : حبيبي خلينا ننسو الي صار و نولو زي ما كنا
يوسف : متأكدة ؟
هناء : طبعا متأكدة
يوسف : به حلو الكلام
هناء ابتسمت وسكتت
يوسف : يعني موضوع الراديو خلاص نحيتيه من راسك ؟
هناء شقلبت عيونها : سمعت ان عصام غدوا مروح انت بتجيبه من المطار ؟
يوسف : ماتهربيش من سؤالي بسؤال
هناء : لا مانحيتاش من راسي و لتوا متحشمة من القناة ع اللي درته مش قادرة حتى نتصل نتأسف
يوسف : اصلاً بيكونو فصلوك
هناء : فآل الله ولا فالك
يوسف سكت
هناء : حبيبي ؟
يوسف : نعم
هناء : اتصلت بيك باش ترقدني على صوتك
يوسف ضحك : مصلحة صار
هناء : مش مصلحة احتياج
يوسف : البيبي محتاجة مكالمة حب ترخيها ؟
هناء ضحكت : حاجة زي هكي
يوسف : ....
__________
نجاة و اسماعيل يهدرزو ف دار المعيشة
اسماعيل : دوي معاي لما جيناهم ف البحر
نجاة : هو غالي عليا زي وليدي لكن سعاد !!!
اسماعيل : ماك طول عمرك وجهك ف وجهها توا جاتك جديدة ؟
نجاة : مانحبهاش ولا نحب طبعها يا اسماعيل
اسماعيل : انى قلتله الرأي راي البنت لو هناء موافقة انى بنعطيها ليه
نجاة : لا هي شكلها موافقة
اسماعيل شبحلها : امالا داويتلك !!
نجاة : لالا حسيت بيها بس
اسماعيل ...
يـتـبـــع ... 💗