الفصل 8
روايــة #صغار_العم
الحَـــلْـــقـــة الــثــامــنـة 🌸
02:30 ص
هناء خشت لدارها و اتكت ف سريرها ، شدت تليفونها و اتصلت بيوسف ..
يوسف رد : الو
هناء : اهلين
يوسف : بيك
هناء : شن الجو
يوسف : باهي الجو
هناء ضحكت : قصدك زعلان انت ؟
يوسف : لالا
هناء : لا والله الا زعلان
يوسف سكت
هناء : تبيتي انقز من البلكونة حتى اني و نرضيك ؟
يوسف علّا صوته : تتسهوكي ؟
هناء سكتت بعدين قالت : حي والله جديات شكلك
يوسف سكت
هناء : مش مستاهل الموضوع انك تزعل الحق
يوسف : انى لما نطلب حاجة مانحبش من يردني فيها حطي الشي هذا في بالك
هناء : يوسف اللي طلبته مايجيش .. كيف تبي تشوفني بقفطاني ؟ امس خشيتلي و مشيتهالك مش ديما عاد
يوسف تكنطا : صار تحسبي فيها انتي
هناء : مش نحسب فيها لكن اللي ادير فيه غلط
يوسف متعفلق : شن رايك تسكري خير مانبدا نلبز معاك ف الكلام
هناء انصدمت و سكتت
يوسف : تسمعي فيا ولا ؟؟
هناء تكنطت : تصبح على خير
و سكرت الخط
يوسف حط التليفون : استغفر الله العظيم
هناء متكنطية : بنبدو ف الجو من جديد مافيش فايدة فيه
يوسف ولع دخانه ، دخن ثلاثة سباسي و عاود اتصل بيها تاني لقي تليفونها مقفل لوح التليفون بحداه و نزل
___________________
سلسبيل و سنابل بايتين عند حلومة مع العيلة
اروى : خيرها هناء رقدت فوق
سلسبيل : قالت تبي تاخد راحتها امس اتضايقت ف الرقدة
سنابل فاتحة تليفونها و تهدرز مع محمد ف الفيس : شن صار معاك ؟
محمد : يتم العرس على خير و نفضىٰ بيه
سنابل : انت وين
محمد : ف الجنان
سنابل : جاية
و ناضت وقفت ، حست بدوخة قوية شدت ف الساس
روان شبحتلها : وين ماشية
سنابل مسكرة عيونها و دايخة
اروى تشوفلها : خيرك ؟
سنابل فتحت عيونها : هديكا الدوخة متع لما توقفي
سلسبيل ضحكت : هادي من علامات الموت المبكر
سنابل ضحكت : بعيد السو
روان : تي وين ماشية به
سنابل : تو نجي .. و طلعت لمحمد
_______
يوسف جي من ورا سنابل و هي كيف تفتح ف الباب : تعالي جاي
سنابل شدت قلبها و شبحتله : خلعتني
يوسف ضحك : شن مطلعك توا
سنابل : ماجانيش نوم بنكسد اني و محمد ف الجنان
يوسف : هناء راقدة ؟
سنابل : مانندريش عليها الليلة باتت فوق
يوسف : علاش خيرها
سنابل : من الاول قالت بتبات ف دارها تبي تاخد راحتها شورها 😉
يوسف سكت
و سنابل طلعت للجنان
لقت محمد مقعمز جت قعمزت معاه ع الطاولة : منذر وين
محمد فاتح الفيس : راقد ؛ هداكا نظام دجاج يرقد بكري و ينوض بكري
سنابل ضحكت : تعشيت ؟
محمد : لالا
سنابل وقفت : تو نجيبلك حاجة تاكلها و نجي
محمد استغرب : فوتي ماعنديش نية
سنابل و هي ماشية : حتى اني بناكل مش ليك انت بس
محمد يشوفلها و يضحك : باه
__________________
هناء طلعت من دارها و نزلت
لقت يوسف مقعمز ف اول درجتين و يدخن
خطمت من بحداه بدون ماتكلمه
يوسف وقف : تعالي
هناء و هي ماشية : شن رايك تفوتني خير ما نبدا نلبز معاك ف الكلام
يوسف شدها من ايدها و جبدها : لما نكلمك توقفي
هناء تتوجع : اي معاش تتقوا عليا
يوسف رخاها : حجابك وين ؟
هناء : خليته ف الحوش 😏
يوسف : علاش مسكرة تليفونك
هناء قامت حاجبها : مش قلتلي سكري ؟ علاش اتصلت تاني ؟
يوسف : بلا استفزاز
هناء : سكرته باش مانعاودلكش
يوسف : كيف
هناء : يعني كان بنخليه مفتوح قلبي مش حايطاوعني نخليك ترقد زعلان و بنتصل بيك ، لكن لما نسكره حانبخل اني نفتحه و نكلمك 😉
يوسف تعفلق : هناء !!!
هناء خشت لحوش جدها و خلاته
يوسف خبط ايده ع الحديد : والله الا مانربيك مازال الوقت
هناء خاشة و تضحك : لازم نمشيه على كيفي
خشت للدار اللي فيها البنات و فتحت الضي : فيه وين نرقد ؟
سلسبيل شبحتلها : شن نزلك توا ؟
هناء : مليت بروحي
اروى شبحتلها : فيه خشي
هناء خشت و رقدت معاهم
روان نعست و بدي ياخد فيها النوم : ما ح حد يرررقدد بححداي اني نتكركب هلبااا
هناء ضحكت : عارفينك تعومي ف نومك
اروى وقفت : ناخد كلينكس من المطبخ و نجي
و طلعت من الدار
سلسبيل جت توشوش ف هناء : حقا محمد عرف بموضوع بوه
هناء انصدمت : كدااااابة 😲
سلسبيل غمتلها فمها : تي اسكتي تو روان تسمعك
________
جهزت سنابل سفرة فيها نواشف و مشروب و كيف بتطلع بيها لمحمد
خشت اروى : وين ماشية بيها
سنابل : من مازال ماسألنيش ؟
اروى ضحكت : انى
سنابل طلعت و ماردتش عليها
وقفت اروى تاخد ف الكلينكس
فجأة خش عليها يوسف من باب الجنان
اروى ضحكت : اهلااا 😍
يوسف : اهلا بيك
اروى : وينك اليوم ماشفتكش
يوسف : مافضيتش الا ف الليل
اروى قعمزت ف الطاولة : اها ربي يعاونك
يوسف : الله يسلمك .. امي رقدت ؟
اروى : ايه من بكري ، تبي حاجة ؟
يوسف : لا خلاص قبل نبيها هي
اروى سكتت
يوسف كيف بيطلع ..
اروى : قعمز شوية
يوسف شبحلها : علاش
اروى : نهدرزو
يوسف : مرة تانية ان شاء الله توا تاعب
اروى : غر هيا قعمز و راس اوسيفه
يوسف : تبي حاجة ؟
اروى : هو الصراحة فيه موضوع و نبي ناخد رايك فيه
يوسف : موضوع شني
_____________________
سنابل حطت السفرة ع الطاولة و قعمزت
محمد سكر تليفونه و شبحلها : يسلمو ايديك تعبتك
سنابل : تعبك راحة صحتين
محمد ضحك : سلمك
سنابل : شن جوك اليوم خير امس ؟
محمد بدي ياكل : ايه العرس غيرلي جوي
سنابل : به قولي شن ناوي بتدير
محمد تأفأف : يعني مقعمزة معاي على خاطر الموضوع هذا ؟ كان هدا خودي السفرة و خشي
سنابل تلخبطت : لا والله لا كان تبي نغيرو الموضوع عادي ره
محمد : غيريه
سنابل : افتح انت موضوع
محمد شبحلها : المنظر اللي طلعتيلي بيه امس غيريه
سنابل : علاش
محمد : مش لعمرك
سنابل ضحكت : اني نحب اللوكات اللي هكي
محمد : اني عطيتك رايي و خلاص
سنابل : باهي اقنعني برأيك
محمد : انتي قاعدة صغيرة لاحقة ع الجو هوا
سنابل : باهي كيف تبيني نكون ؟
محمد : انى مانفهمش فيه جو البنات لكن نقصي من المكياج ، خليك على طبيعتك مفيش داعي تكتري انتي ماشاء الله عليك مش محتاجة بكل ، ديري بسيط يزيد يبرز جمالك و تم
سنابل تلخبطت ؛ حكت جبهتها و دارت روحها سارحة
و محمد تلخبط و شد المشروب يشرب فيه
_________
سلسبيل : اروى عطلت ولا
هناء : بالك جتها مكالمة
سلسبيل : ريتيها امبكري كيف تتجكتر ؟
هناء ضحكت : كيف
سلسبيل : حاسبة روحها وين ، حتى لما تسلم ع الناس بتشنفيخ
هناء : تي فوتيها اني لا مدورتها ولا شايلتها من ارضها
و ناضت وقفت
سلسبيل : وين ماشية حتى انتي
هناء : نشرب و نجي
______
يوسف : به و اني علاش تاخدي ف رايي ؟
اروى : قلت نقولك باش تسأل على الولد
يوسف قام حواجبه : و بوك وين ؟ مادام يبي يخطبك المفروض بوك هو اللي يسأل مش اني
اروى تكنطت لكن ماتبيش توضح : بابا نتحشم ندويله
يوسف سكت
اروى تقول ف عقلها .. ( المفروض يدير ردة فعل توا و يقولي ماتوافقيش )
يوسف : ان شاء الله خير
على خشة هناء
اروى : يعني نعبىٰ عليك ف الموضوع
هناء تكنطت لما لقتهم مع بعض
يوسف : انتي ابعتيلي كل شي ف مسج باش نعرف كيف نوصله
اروى : اوكى اني يومين و نكلمك
هناء عقدت حواجبها : شن هو اللي بتبعتهولك
يوسف شبحلها : انتي شن نزلك توا ؟
اروى تليفونها شرين ف جيبها هزاز و ناضت انسحبت من جنبهم
طلعت من المطبخ و طلعت التليفون من جيبها : اوف قريب يوسف ورقلي اني نتكلم ف الليل
هناء تفنص ف يوسف : ماتتهربش من سؤالي بسؤال
يوسف : موضوع يخصها
هناء : وانت شن خصك فيها ؟ ولا عند الرورو ماتقدرش ؟؟
يوسف زراته الضحكة
هناء تتكلم بصبعها و متعفلقة : اخر مرة نلقاك معاها بروحك و خصوصا ف الليل خير ما حتى انت تشوف شي مايعجبكش
يوسف شدها من ايدها : شن هو الشي اللي مايعجبنيش ؟
هناء تفك ف ايدها : حول غادي
يوسف قربها ليه : شن هو اللي مايعجبنيش
هناء بإستفزاز : خير ماتلقاني حتى اني مع منذر
يوسف تعفلق ؛ فنص فيها و يدوي مسكر سنونه : ردي بالك تستخدمي الأسلوب هذا معاي ياهناء لعند هني مانرحمكش
هناء خافت و سكتت
يوسف يفنص فيها : و معاش تنزلي ف عقابات الليل بروحك مادامك ركبتي تقعدي ف مكانك للصبح
هناء : و علاش انت نازل ف ...
قاطعها يوسف : اركبي توا هي
هناء تفك ف ايدها : انت ماليكش علاقة بيا
يوسف طلعها من المطبخ يكر فيها للدروج و يوشوش : اركبي قدامي بلا صوت خير ماندير العار
هناء متعفلقة مش قادرة تتكلم
اول ماخشو للدروج علّت صوتها : تي أأأي ايديييييي 😩
يوسف : بلا عياط
هناء : اطلقني خلاص
يوسف راكب بيها : مانيش طالقك لين تخشي
هناء فكت ايدها و ضرباته بمرفقها على بطنه : برا للرورو متعك
و ركبت تجري
يوسف شد بطنه : باهي يا هناء تو نوريك
هناء وقفت قدام الحوش ؛ شبحتله و طلعت لسانها
يوسف ركبلها يجري
هناء خافت خشت للحوش بسرعة و سكرت الباب
يوسف مالحقش عليها تعفلق
__________________
محمد يشوف لسنابل و ساكت .. ( نوضي خشي بالله عليك مش ناقص )
سنابل : شن جو الجامعة
محمد طلع دخانه بيولعه : ماشية ، الامتحانات قريب
سنابل فكت منه الدخان : فوته توا
محمد قام حواجبه : علاش ؟
سنابل : شن منظري نخش للبنات ريحتي دخان
محمد ضحك : به
سنابل : نبي نقرا هندسة حتى اني ، شن رايك ؟
محمد : يا ودي فوتيها خيرلك
سنابل : علاش خاطري فيها
محمد : امالا من درس هداكا اليوم ساعتين و اني ندوي شي شي
سنابل ضحكت : بالي كان مش معاي وقتها
محمد : راهي صعبة و موادها نفخ
سنابل : عادي انت ساعدني و اعطيني دروس خصوصية
محمد ضحك و وقف : شن رايك تخشي ترقدي
سنابل ضحكت و وقفت
محمد قام السفرة و خش هو وياها للمطبخ من باب الجنان
سنابل : حطها ع الطاولة تو نغسلها
محمد حطها و كيف بيطلع ..
فجأة سنابل حست بدوخة و شدت ف الكرسي
الكرسي تحرك و دار صوت
محمد تلفت
سنابل شادة راسها و مطبسة
محمد جاها : خيرك
سنابل دوب ماتدوي : حسيت الدنيا لادت بيا
محمد قعمزها ع الكرسي : بالك هبوط
سنابل : مش عارفة .. ممكن لأني ماكليت شي اليوم
محمد : انتي حتى توا ماكليتيش معاي
سنابل سكتت
محمد : دقيقة بس
دارلها امية و سكر و مدهالها : اشربي هاذي بالك تولي كويسة
سنابل : لالا مانبيش
محمد يشرب فيها : هيا بلا دلع
سنابل تشرب منه و ساكتة
محمد حط الطاسة : صحة
سنابل : سلمك
و ناضت وقفت
محمد : بري اتكي و ارتاحي شكلك ف جرت المكياج ماكليتي شي اليوم
سنابل ضحكت : لهيت ف روحي بس
محمد : تبي اناديلك سلسبيل ؟
سنابل : لالا مش للدرجة هادي حسيت روحي احسن
محمد : به
سنابل تلم ف شعرها : تصبح على خير
محمد يشوفلها : و انتي بخير
طلعت سنابل من المطبخ
و محمد نفخ نفسه و طلع من باب الجنان
__________________
10:30 ص
سعاد واقفة قدام حوش عصام شادة الفطور و اطق
بعد شوية فتحلها عصام
سعاد مبتسمة : صباحية امباركة يا عريس
عصام ضحك : الله يبارك فيك
و خدي منها السفرة : علاش متعبة روحك
سعاد : تعبكم راحة انت زي وليدي
عصام حط السفرة ع الطاولة و جي لسعاد : خشي خشي تفضلي
جت مرام من ورا عصام لابسة روب قصير فوق الركبة و كله شفاف : عصومي من اللي يطق
عصام تلخبط وجهه ولا احمر
سعاد تشوفلها 😳
مرام ابتسمت : خويلة سعاد 😊 صباح الخير
سعاد مصدومة : ص ص صباح النور 😟
عصام وجهه احمر : تفضلي سعاد خشي
سعاد شبحتله : لا يا عصومة انتو عرسان خودو راحتكم .. و نزلت
عصام سكر الباب و شبح لمرام : كيف تطلعي هكي ؟
مرام : عادي شن فيها اني ف حوشي
عصام : ف حوشك الداخل مش تطلعي ف العتبة بالمنظر هذا و زيادة ماتندريش منو اللي يطق
مرام تكنطت : تو على خاطر مرت خوك تعارك فيا ؟ هي اللي ركبتلي ف صباحية عرسي المفروض تتحشم و تزيد شوية للظهر
عصام تكنطا : لانها جايبتلنا الفطور طلع الحق عليها ؟
مرام زعلت : علاش تعارك فيا توا 😢
عصام : ف الحوش هذا خودي احتياطك لازم لبسك يكون مستور مانبيش حد يدوي عليك كلمة
مرام : يعني اني لبسي ماينفعش ؟؟
عصام : لا اله الا الله
مرام خشت للدار : أفطر بروحك امالا
عصام لحقها : توا علاش زعلتي كلامي مافيشي حاجة غلط
مرام تبكي : من اول يوم تبكي فيا علاش هكي يا عصام ف مكان مايكونو احلى ايام عمري تنكد عليا من اولها
عصام حضنها : اسف حبيبتي مش قصدي نزعلك اني قلتلك الكلام هذا لمصلحتك
مرام تبكي : مصلحة شني !
عصام شبحلها : سعاد صح زي اختي الكبيرة لكن عندها لسان يالطيف يعني توقعيها تشهدر بيك انها شافاتك ع الله و اسمع يللي ماتسمع
مرام سكتت
عصام : و حطي في بالك ان الحوش معبي ولاد و رجالة لازم تكوني متحجبة و لبسك طويل
مرام ساكتة ؛ هزت راسها بمعنى به
عصام يمسحلها ف دموعها : هيا حبيبتي خلينا نفطرو ورانا يوم طويل
مرام : ماخاطريش
عصام ضحك و قامها طلع بيها : مش على كيفك نبيك تاكلي باش تسمنيلي شوية 😉😘
مرام ضحكت
____
سعاد نازلة من الدروج وجهها مقلوب
لاقتها هناء : مرت عمي صباح الخير
سعاد جتها تجري : كان نقولك يا هنيوه كان نقولك
هناء خافت : شن فيه ان شاء الله خير !
سعاد : عرايس اخر وقت والله ماعاد يعرفو يستحو
هناء استغربت : تقصدي على مرام انتي ؟
سعاد : ايه .. ركبت بنعطيهم الفطور طلعتلي ورا عصام بروب شفاف
و تقلد فيها بصوتها : عصومي من اللي يطق
هناء ضحكت بصوت عالي : و عصام شن قال 😂
سعاد : وجهه ولا احمر مسكين حشماته
هناء تضحك : معليشي بالك تحسابني انى ولا وحدة من البنات
سعاد : مهما كان المفروض تتحشم
هناء : قاعدة صغيرة معليشي تو تتغير
سعاد : شن صغر فيها و هي عمرها 24
هناء تضحك 😂
سعاد : خلي بالله نخش لحوشي نحوس على روحي قبل مايروح عمك السنوسي و مايلقاش الغدي
هناء : اكيد مطيبين لوطا
سعاد تفتح ف حوشها : حتى و كان عمك لازم يبي الغدي من ايدياتي كان هذا يغبرلي يومي
هناء ف عقلها .. ( ايه بكل اللي يسمع يقول حق 😒 )
سعاد خشت : و الليلة بايت ف الخمس قال
هناء خشت معاها : علاش ؟
سعاد : بيشري خرفان من صاحبه
هناء : اه .. مرت عمي شن بتلبسي اليوم
سعاد : عندي قفطان لبسته مرة وحيده ف عرس ولد خوي بنلبسه قاعد اجديّد
هناء : حي مش شايفاته ترا وريهولي
سعاد : خشي للدار تلقيه على سريري محطوط
هناء خشت للدار تشوف ف القفطان : هييييه 😲 هادي خيرها ؟ ماتشوفش ف المحلات شن ينزلو !!
خشت عليها سعاد : شنو قنين ؟
هناء بإبتسامة : محلاه
سعاد ابتسمت
هناء : لكن امس لبستي ملون و حتى اليوم بتلبسي ملون ؟
سعاد : خير مانلبس واحد شايفيني بيه
هناء : تعرفي فيه محل جايب بضاعة تهبلللل .. شن رايك تاخدي منه قفطان
سعاد : لالا اما قفطان توا ؟ ماعنديش وقت تو نلبس اللي عندي وخلاص
هناء : انتي غر ماشفتيهمش والله يهبلو .. شن رايك نمشو انى وياك نختارو واحد قنين اتطيحي بيه سلفاتك كلهم 😍
سعاد ضحكت
هناء : و بعدها نمشو للمزين و من غادي لغادي للصالة
سعاد تضحك : مش عارفة
هناء ضحكت : خلاص تفاهمنا ؟؟
سعاد : يجي اوسيفه و نقوله يرفعنا
هناء : نمشو بروحنا خير ماعنداش وسعة بال 😒
_______________
01:30 م
ناضت سنابل من نومها و طلعت من الدار ، لقت محمود واقف يراجي ف الغدي
محمود شبحلها : نضتي يا خميرة
سنابل بعين وحدة : خميرة عينك
محمود : نايضة توا خميرة امالا شني
سنابل شدت راسها : مريضة شوية
محمود : سلسبيل وين
سنابل : مش عارفة نضت لقيتها مهناش
محمود : قوليلها مش حاننسهالك
سنابل : شن هي
محمود فنص فيها
سنابل : اه باهي فهمت
ازهار جايبة السفرة لمحمود : قول لخوك ماتمشيش بعيد باش يرفعني للمزين بعدين بوك قال مش فاضي
محمود خدي منها السفرة : باهي عارف
و طلع للولاد
سنابل ركبت لحوشهم تلاقت مع محمد نازل : صباح الخير
محمد : صباح القايلة
سنابل ضحكت
محمد وقف معاها : كيف حالك اليوم ؟
سنابل : حاسة بشوية دوخة نضت بالسيف
محمد حط ايده على جبهتها : باهي ماعندكش حرارة
سنابل تحشمت : الموضوع دوخة بس مش بردة
محمد : لازم تفطري و تاكلي خير ماتزيد
سنابل ابتسمت : حاضر
محمد ابتسملها و نزل
_______________
هناء لبست و نزلت ف الجنان شادة شنطتها فيها حاجاتها اللي بترفعهم معاها للمزين و تراجي ف سعاد تنزل
ولاد العم ف الشارع مع منذر ينحّو ف الخيمة
هناء تشوف ف الساعة ف تليفونها : خيرها عطلت هادي
و طلعت للشارع
شافها خوها اصيل : ها وين !
هناء : مشاوير 😁
و ركبت لسيارتها بتولعها
السيارة سخنت و بدت تنطفىٰ
هناء استغربت : خيرها هادي توا
جاها منذر : كنها ؟
هناء شبحتله : مش عارفة علاش تنطفىٰ
منذر فتح الكوفينو و قعد يشوف فيها
هناء تكلم فيه من الروشن : ها شني ؟
منذر جاها : فيه حداكي اميه ؟
هناء تشوف بحداها : لالا
منذر : السيارة تبي امية
هناء : اياح مش وقتها
على جية يوسف ؛ شاف منذر واقف على هناء تكنطا
درس السيارة و نزله : تفضل ؟
منذر شبحله : اها يوسف جيت ؟
يوسف عاقد حواجبه : لا ماجيتش
منذر : كنك عليا يا راجل كل ما تحقني يرقالك ؟
يوسف فنص ف هناء : وين ماشية
هناء ساكتة
منذر : توا نخش جوا نجيب امية
و خش للجنان
يوسف متعفلق : اني شن مقايلك يا بنت ؟؟ ولا ماتفهميش لين نخبطه قدامك و نخليه طروف !!
هناء انصدمت : خيرك على الولد ماغلط ف شي سيارتي سخنت تبي امية و وقف يشوفلي فيها
يوسف فتح عليها الباب : انزلي مافيش طلوع بروحك
هناء تسكر ف الباب : حول شن ادير
يوسف يدوي مسكر سنونه : انى قايلك من قبل ان معاش فيه طلوع بروحك ولا ؟
و فتح الباب : انزلييييي 😡
هناء : استغفر الله العظيم
و نزلت من السيارة
طلعت سعاد للشارع : هيا نمشو
يوسف شبحلها : ماشية معاها انتي ؟
سعاد : جيت و جابك ربي يا اوسيفه امالا وصلنا انت
يوسف : وين ؟
هناء قالبة وجهها 😒
سعاد : بنمشو لمحل و بعدين حطنا ف المزين
يوسف فنص ف هناء : باهي اركبو
و ركبو معاه للسيارة
طلع المنذر شاد الميه ف ايده : تأخرت عليكي هنيوه ؟
يوسف شافه من المراية ؛ غبرها وراه و طار بيهم بسرعة 🔥
المنذر : كنه هضا 😟
_______________
سنابل متكية ف سريرها : راسي دايييييخ
سلسبيل : نوضي وتي حاجاتك وقت
سنابل : مش قاااادرة
سلسبيل : شوية تانية نسمعو ماما تلعلع بترفعنا للمزين
نجاة من برا الدار : باهي يا معفنة طلعتلك نلعلع صار ؟؟ كان مشيتي صحة يا قردة
سلسبيل : نبصر نبصر نجوتة 😅
نجاة : والله ماك ماشية لا انتي لا اختك انطمرو هني و ديرو شفاشيفكم بروحكم
سلسبيل تكنطت : يعطيني بكشة ف فمي لساني ديما فاضحني 😒
و شبحت لسنابل : كيف بنديرو توا ؟
سنابل : شعرنا ساهل نعرفو نديروه و المكياج نكسدو عليه شوية تانية
______________
عصام واقف ف الدروج قدام حوشه : مرومتي هيا وقت عليك
مرام تلم ف شنطتها ف المدخل : دقيقتين بس
عصام : مش واتية من امس ؟ شن اديري توا
مرام تسكر ف الشنطة : كنت نتأكد من حاجاتي بس
و طلعت قدام الحوش
عصام خدي منها الشنطة و نزلو : امتى نجيك للمزين
مرام : تو نتصل بيك
عصام : احححح مش قادر نصبر 😍
مرام ضحكت : اسكت مش وقتك توا
عصام يدغدغ فيها من جنابها : قدامي عسل زي هذا كيف تبيني نقاومه
مرام وجهها انحمر و ضحكت : ياسر يشوفنا حد
عصام مازال يدغدغ فيها و يضحك
على ركبة محمود ؛ شافهم تلخبط : يالله يالله .. و نزل راسه
مرام تحشمت
عصام ضحك : اهلين
محمود ضحك ؛ و هو راكب : عقب لليل يا معلم
مرام انصدمت 😳 فنصت و دارت ايدها على فمها
عصام ضحك : برا يا ..... ( و سكت قدام مرام )
__________________
ازهار واقفة مع اسماء بنت نورية : بالله هنيني على اللاّي لبسيها انتي ، اني بنطلع توا
اسماء : ماعليك فيها اطمني يا خيتي
ازهار ضحكت : سلمها ياربي .. هي بالسلامة توا
اسماء : بالسلامة
__________________
يوسف يسوق : وينه المحل ؟
هناء : درس اهو وصلناله
يوسف درس و نزلو سعاد و نجاة للمحل : السلام عليكم
صاحب المحل رد السلام
هناء و سعاد يشوفو ف القفاطين
خش يوسف : السلام عليكم
صاحب المحل شبحله : و عليكم السلام
هناء فنصت فيه و سكتت
يوسف وقف جنب الباب و يشوفلها
سعاد طلعت قفطان اسود مشجر : شوفي هذا ؟
هناء شبحت للقفطان : لالا فيه احلى منه
و قعدت اتدورلها
طلعت قفطان لونه سكري طويل و مطروز شوية من جهة الصدر : شوفي هذا حلو يطلع عليك
سعاد شداته : لالا بسيط هلبا مانحبش هكي
هناء : ماهو هادي الموضة توا ، المعدس و المشجر هلبا بدي شلافطي
سعاد ساكتة
هناء : انتي غر خشي جربيه حايطلع تحفة و مع اديري تسريحة بسيطة و مكياج مدامي تطلعي وااااو 😍
سعاد اقتنعت : باهي بناخد برأيك و نشوفو شن يقولو بعدين
هناء ضحكت : تي بتهبليهم بيه
سعاد ضحكت و خشت لحجرة القياس
يوسف قرب من هناء : بعد المحل هذا وين بتمشو
هناء نافخة عليه ماتبيش تشوفله : مش قتلك امك للمزين ؟
يوسف : جايبة خمار ؟
هناء شبحتله و عوجت فمها : نعم !!!
يوسف : اظني سمعتيني
هناء ضحكت ع الجنب : اكيد لا
يوسف هز راسه و سكت
هناء : وانت علاش نازل ورانا ؟ مش عارف ان محل نساوين ؟
يوسف : الدنيا قايلة مافيشي حد غيركم
هناء سكتت
يوسف : و لما امي تخش تقيس تقعدي بروحك مع صاحب المحل !
هناء بصوت واطي : ياربي اعطيني الصبررر
يوسف فنص فيها : خششي شعرك و هو لازم ايبيّت
هناء دخلت شعرها و سكتت
سعاد فتحت الباب : هنااااء ؟؟ تعالي يا هناء
يوسف تكنطا : بري سكتيها شهدرت بيك
هناء ضحكت و مشتلها : ترا نشوووف
سعاد : شن رايك
هناء تشوفلها : تهبلي يا مرت عمي 😍
سعاد تشوف لروحها ف المراية : حسيته مش لعمري
هناء : لا والله الا ماشي معاك يجنن
و شبحت ليوسف : يوسف تعالى شوية
يوسف جاها : ايوه
و طبس على امه ؛ ضحك : تي شن هذا كله 😍
سعاد ضحكت : عجبك !
يوسف يتفرج عليها : والله الا ماشاء الله قمر 14 لين ماعرفتكش
سعاد و هناء يضحكو
سعاد : انت هذا فاش فالح غر ف هاللسان
يوسف ضحك و رجع لمكانه
هناء جت بحداه
يوسف : علاش انتي كنتي جايبتيها ؟
هناء شبحتله : ماتحاولش تفتح معاي هدرزة مانسيتش الرورو متعك 😡
يوسف ضحك
فيه زوز نساوين ف المحل يشوفو لهناء و يوشوشو
يوسف شبحلهم و استغرب
جت وحدة من النساوين لهناء : عفوا لو سمحتي 😊
هناء شبحتلها : تفضلي
المرا : مخطوبة يا بنية ؟
هناء تلخبطت و شبحت ليوسف
يوسف تكنطا و شد هناء من ايدها : لا متزوجة يا اختي
هناء انصدمت 😳
المرا انحرجت : اه سامحوني
و مشت على حالها
هناء وشوشت يوسف : شن اللي قلته
طلعت سعاد من حجرة القياس
هناء فكت ايدها من يوسف
يوسف تلفت لأمه و خدي منها القفطان : تو نخلص اني .. انتو اركبو السيارة
سعاد : هات المفتاح
يوسف مدهولها و طلعت هي و هناء
___________________
07:00 م
أصيل واقف جنب الباب : تي هيا انتي وياها خير مانخليكم و نمشي
سلسبيل جت تلبس ف عبايتها : هي اطلع كملت اني
أصيل : و هديكا وين !
سلسبيل : جاية وراي .. هيا انزل
اصيل فتح الباب و نزل
سلسبيل تصيح : سنابل حني نزلنااااا
سنابل واقفة ف دارها شادة ف الساس و دايخة : برو مانيش ماشية
سلسبيل : شنووو
سنابل : برو مانيش ماشية مش قادرة
سلسبيل جتها : متأكدة ؟
سنابل : مش قادرة نوقف راسي دايخ
سلسبيل : لأنك ماتاكلي ف شي
سنابل : برو انتو .. و انى كان بديت باهية تو نلحق مع اميمة بعد شوية
سلسبيل : به لكن لازم تجي مع اميمة باش نهيجو
سنابل : باهي
______________
يوسف وصل قدام المزين و اتصل بأمه ..
سعاد ردت : الو
يوسف : اني وصلت ، واتيات ولا مازال ؟
سعاد : انى واتية لكن هناء مازال شوية
يوسف : باهي اطلعيلي وهي تو نوليلها
سعاد : علاش نديرولك ف طريقين راجينا شوية
يوسف : تي اطلعيلي يا امي
سعاد : باهي حاضر
و سكرت الخط
هناء تمكيج فيها المزينة
جتها سعاد : هنيوه يوسف جي و قالي اطلعي
هناء شبحتلها : اني مازال مش واتية
سعاد : قالي تو يوليلك
هناء : معقولة بيمشي و بيولي !
سعاد : شكله متعفلق مابيتش اناقشه
هناء سكتت
سعاد : خلي نطلعله يحطني و يجيك
هناء : به
______________
أصيل ف السيارة يراجي
ركبت سلسبيل : هيا اطلع
اصيل : اختك وين
سلسبيل : فوتها قالت بتجي مع اميمة
اصيل شبحلها : باهي غطي خليقتك
و طلع بالسيارة
_______________
محمد واقف ف الجنان ؛ اتصل بسنابل ..
سنابل ردت بصوت تاعب : الو
محمد : اهلا
سنابل : اهلين محمد
محمد : شكلك قاعدة مريضة
سنابل : ايه
محمد : قصدك ماكش ماشية ؟ تلاقيت مع سلسبيل بروحها توا
سنابل : مش حانمشي شكلي ، مش قادرة نوقف
محمد : افتحيلي الباب جايك
سنابل : علاش
محمد : هاني راكب
سنابل : به
بعد شوية ركب محمد و طق الباب ✊
جت سنابل فتحت ؛ لابسة عباية فوق قفطانها ؛ مدايرة مكياج بسيط و تسريحة شعرها ذيل حصان
محمد خش و يشوفلها
سنابل قعمزت ع الكنبة دايخة
محمد قعمز على ركابه قدامها : ماكليتي شي ؟
سنابل تشوفله : لالا
محمد : باهي نوضي نرفعك للصالة و ناخدلك حاجة من الطريق
سنابل : خاطري نمشي لكن مش قادرة ، اول مانوقف الدنيا تلف بيا
محمد وقف : هاتي ايدك
سنابل مدتله ايدها
محمد وقفها : وين وشاحك
سنابل : اهوا بحداي
محمد مدهولها و لبساته
شدها محمد من ايدها يمشي فيها للباب : شدي روحك ف الدروج خير ماتطيحي
سنابل : والله ماقادرة
محمد : تو ناخدلك حاجة من الطريق تنشطك
نزلو هما الزوز و طلعو بالسيارة
_____________________
يوسف حط امه ف الصالة و رجع لهناء ، فتح تليفونه و اتصل بيها
هناء ردت : الو
يوسف رايق : هنو حبيبة قلبي
هناء : نعم
يوسف : اطلعيلي انى وصلت
هناء : اوكى
سكرت الخط و ضحكت
يوسف نزل من السيارة و وقف جنب باب المزين
اول مافتحت هناء الباب ..
يوسف مدلها شكارة : حطي هذا على وجهك قبل
هناء استغربت : هذا شني ؟
يوسف : خمار ، خشي بسرعة البسيه
هناء تكنطت : مانحباش يغم القلب
يوسف : و راس عيونك ماك طالعة بلاه
هناء خداته منه بِ غُل و خشت تلبس فيه
بعد شوية طلعت تتلمس : تعالى مانشوف في شي
يوسف ضحك و جي شدها من ايدها
هناء : هاك شنطتي حطها ف السيارة
يوسف خداها منها و ركبها للسيارة
و ركب هو و طلع بيها
هناء متكنطية ؛ تقيم ف الخمار شوية و تتنفس
يوسف يضحك : هذا اللي مايسمعش الكلام
هناء ساكتة و تسحن
يوسف : اليوم مش حانطلب منك نشوفك تو نعرف كيف نتصرف
هناء : كان قدرت 😏
يوسف : تو نشوفو من اللي يضحك ف الاخير
هناء : برا تفرج على رورو متعك 😒
_________________________
سعاد يتفرجو عليها العيلة و مصدومين من التغيير
نجاة : والله و صار منك يا سعاد
سعاد : شن رايكم ؟
ازهار تشوفلها : ماشاء الله غزيّلة تبارك الرحمن
سعاد تتجكتر : قلت خلي نغير اللوك اليوم
سلسبيل ضحكت : و اخيراً هرمنا 😂
سعاد شبحتلها : كيف ؟
اروى تضحك : شي شي 😂
حلومة تشوفلها : هادي مني ؟؟
نورية اختها : هذي سعاد مرات السنوسي
حلومة ركزت : اللطف يا ربي !! والله الا هي
بعد شوية وصلت هناء للصالة
كيف بتفتح الباب
يوسف شد ايدها
هناء شبحتله : خيرك
يوسف باس ايدها : نتلاقو بعدين 😉
هناء نزلت و ماردتش عليه
يوسف ضحك و طلع بالسيارة
خشت هناء للصالة و وقفت قدام المراية تنحي ف عبايتها و قلبها يدق
لابسة قفطان ازرق طويل بلا كمام ، مدايرة تسريحة بسيطة و مكياج سموكي
______________
سنابل ف السيارة مع محمد و ساكتة
محمد درس على قهوة و نزل
خدالها عصير فرش و كريب و ركب : كولي توا باش تشدي روحك
سنابل : مش قادرة
محمد فتح الكريب يوكل فيها : هيا كولي
سنابل كلت من ايده
محمد فتح العصير : اشربيه كله قبل مانوصلو
سنابل : يا محمد والله ماخاطري
محمد : غر عندنا العرس كان هذا رفعت عاينتك و درتلك تحاليل
سنابل : اني حتى اماليا مايندروش عليا مريضة
محمد طلع بالسيارة : هيا كولي
سنابل شادة الكريب و تاكل
فجأة شرين تليفونها ..
طلعاته من شنطتها : هاك محمد رد انت
محمد خداه منها و رد : الو
سلسبيل : وينك يا بنت ؟
محمد : شوية و توصل
سلسبيل : انت جايبها ؟
محمد : ايه و مافيش داعي توضحي للي معاك
سلسبيل استغربت : به
و سكرت الخط
محمد شبح لسنابل : قاعدة الدوخة ؟
سنابل : تمشي و تجي
محمد ضحك
______________
سلسبيل شادة روان ف حمام الصالة تمكيجلها
روان : حي عليا من ماما تو توريني
سلسبيل ترسملها ف عينها : وجهك اصفر زي الليمة لازم اتديري شوية
روان : باهي كتريلي احمر خدود
سلسبيل : به .. و طلعيلي الملمع بسرعة
______________
هناء واقفة ف جنب الباب تتصل بسنابل ..
سنابل ردت : ايوه
هناء : وينك ماجيتيش
سنابل : اني وصلت .. اوقفيلي ورا الباب نبيك
هناء : انى جنب الباب اصلا
سنابل : به
و سكرت الخط
درس محمد السيارة قدام الباب : لو تعبتي كلميني نجيك
سنابل ضحكت : شكرًا هلبا ع اللي درته اليوم لولاك راهو ماجيتش
محمد : ولا يهمك .. سلامتك
سنابل : الله يسلمك
نزلت من السيارة و خشت للصالة
هناء شبحتلها : وينك لتوا
سنابل شدت فيها : كنت مريضة هذا وين صحصحت
هناء تشوفلها : غريبة مش مكترة مكياج !!
سنابل ضحكت : اقتنعت بالبسيط
______________
10:00 م
عويشة تغني 🎤 : عصومة يا سمح الطلة .. عصومة يا سمح الطلة نا خايف من العين سمله
البنات يصيحو : حي حييييي 💃👏
عويشة 🎤 : سلملي بات العيلة .. نجيلي بات العيلة .. نجيلي بات العيلة اذا ضاق الخاطر نشكيله
البنات يصيحو : حي حي 😍💃👏
عويشة 🎤 : سلملي بات العيلة ياربي
__
سلسبيل توشوش ف سنابل : شوفي المرا هديكا
سنابل تشوف : اما وحدة
سلسبيل أشرت عليها : هديكا اللي لابسة فستكي
سنابل شافتها : خيرها ؟
سلسبيل : قالو ولدها ذهاب خلي نمشي نرقص قدامها 😍
سنابل ضحكت : خزي 😂
سلسبيل مشت ترقص قدام المرا 💃
__
عويشة 🎤 : يا نجيلي بات عيالي .. نجيلي بات عيالي .. سلملي بات عيالي من السو عليه بسم الله
البنات يرقصو و يصيحو 💃💃👏
عويشة 🎤 : سلملي بات عيالي مدللني و قاهر حسادي 👏
جت نجاة ترقص بكتافها و تخمس بِ ايديها 😌🙌
سعاد تشوفلها و ساكتة 😒
عويشة 🎤 : الغالي درته للعين سند .. درته للعين سند ان شاء الله ساسه ماينهد
جت حلومة ترقص هي و أمال و الكناين 💃👏
عويشة تغني لحلومة 🎤 : ردي بالك يا العزوزة
الفرقة يردو وراها : ردي بالك يا العزوزة
عويشة 🎤 : شبانيك قنيّن بوزه
الفرقة : شبانييييك قنين بوزه
عويشة 🎤 : يلبس ف سروال بعكوزه .. ردي بالك يا العزوزة
الفرقة : ردي بالك يا العزوزة 👏
عويشة 🎤 : اللي راجلها تخاف عليه .. اللي راجلها ؟؟؟
الفرقة يردو وراها : تخاف عليه
عويشة 🎤 : ادير سناسل ف رجليييييييه 😍👏
البنات يصيحو 👏👏
عويشة 🎤 : و حيييييييييي 😍 اي والله اي والله هضا الصح .. هضا الصح 💃
الصالة زحمة ناس و كلهم يرقصو مع الفرقة و قايمين العرس 💃
_____
مرام ف الدار تلبس ف الصدرة : اوف اعييت امتى بنطلع
الزيانة تلبسلها ف الشنبير : وسعي بالك يا عروسة شوية و تطلعي هاني كملت
مرام : نبي ماما ناديهالي خيرها ماجتش
الزيانة : اني مانبيش حد يخش معاي كان هدا نتفركس
مرام : لكن ماما مش حاتديرلك شي نبيها معاي
فجأة طق الباب ✊
مرام فرحت : اكيد ماما
الزيانة فتحت الباب : تفضلي
نجاة خشت : يزيد فضلك
الزيانة شبحتلها : لو سمحتي يا مدام ياريت تطلعي
نجاة تلفتتلها : علاش ؟
الزيانة : مانبيش حد معاي ف الحجرة ياريت تطلعي
نجاة علت صوتها : شنو امالا غرفة إنعاش و اني مانندريش ؟؟؟
مرام ضحكت 😂
الزيانة تكنطت : اني هادي خدمتي كان بنفتح لكل حد معاش نقدر نكمل و بنعطلو اكتر من ما حني معطلين
نجاة شبحت لمرام و ماعدلتش عليها : ماشاء الله تعرف تلّبس
الزيانة واقفة ف الباب : يا مدام نجااااة
نجاة شبحتلها و فنصت فيها : راني مانيش طالعة تحسابيه حوش بوك امالا اتطلعي فيا .. عاجبك باهي مش عاجبك اطلعي تو نكمللها اني
الزيانة : استغفر الله العظيم
نجاة : هدا ما مازال والله تلزيني !!!
مرام : هيا وقت راهووو
نجاة تساويلها ف البيزوان : حسيته معوّج هدا
جتها الزيانة : لو سمحتي معادش تمسي اني قاعدة ماكملتش
نجاة فنصت فيها : امالا اشتغلي كويس هادي عروسة و العين عليها كيف هكي 😡
مرام 😳
_______________
11:00 م
جي عصام للصالة باش يصور بالعربي مع مرام و هي لابسة الصدرة و الجلوة
لقي العارف مقعمز قدام الصالة انصدم : هذا من جابه
محمود : حطه عمي اسماعيل 😂
العارف يشوفله : قولي ياولد
محمود شبحله : نعم
العارف : قداش حقها الصالة هادي
محمود : مش عارف ممكن ستة ولا سبعة لاف
العارف انصدم : شن هو !!!!
محمود يضحك
العارف : كان مشي بيهم للعمرة و رفعني معاه خيرله
عصام شبحله : وانت طيب ان شاء الله
احمد : حتى اني بنمشي يا اجديده
_____________________
01:30 ص
هناء كيف بتخش لدارها جتها سلسبيل تجري : هناء هناء
هناء تلفتت : خيرك
سلسبيل : اجديده تاعب هلبا و قال يبيك
هناء انخلعت : خيره ؟؟
سلسبيل : غر اسكتي راك تنوضي العمارة و ينقلب الحوش عياط .. اطلعي كيف ما انتي و الحقيه
هناء خافت حطت وشاح على كتافها و طلعت
اول ماطلعت من الباب يوسف جبدها من ايدها و دخلها لحوشهم
هناء انصدمت : شن ادير ؟؟
يوسف سكر الباب و شبحلها
هناء ادف فيه : حول اجديده مريض
يوسف قرب منها : ربي يشفيه
هناء عقدت حواجبها : قصدك فيلم ؟
يوسف ضحك
هناء تضرب فيه على صدره : والله ماتتحشم الله تفاول على جدك ف هالليل
يوسف شدلها ايديها : بطلي عاد
هناء قعدت تشوف الداخل : بنطلع قبل مايشوفوني اماليك
يوسف : بوي في الخمس و امي بايتة لوطه 😉
هناء خافت : يوسف فكني منك نبي نروح 😢
يوسف نحالها الوشاح : ترا نشوف حبيبتي
هناء فنصت فيه و جبدت منه الوشاح : برا لرورو و اشبع منها
يوسف تكنطا : اييي علينا من رورو و من سيرة رورو الزفت الاحرف
هناء : شن كنت ادير معاها ف المطبخ و في عقابات الليل ؟؟ و شن هما اللي بتبعتهملك ف مسج ؟؟ اها قول ؟؟؟
يوسف يحكيلها فاللي قالاته اروى ....
هناء : لا ماقتنعتش
يوسف قرب منها : كيف تبيني نقنعك 😉
هناء وخرت : خليك بعيد خير مانعيط
يوسف : و لما بيجو اللي بيسمعوك شن بتقوليلهم
هناء سكتت
يوسف شد خصلتها : معاش تقارني روحك بأروى ، انى لو نبيها او حاطها في راسي راني مشيتلها طول
هناء عيونها دمعو : امالا علاش نشوف فيك معاها ديما
يوسف حط صبعه تحت عينها : اشش مانبيكش تبكي بكل
هناء : باهي جاوبني
يوسف : هي اللي تتلصق ، و بعدين البنت بتنخطب خلاص فوتيها
هناء سكتت
يوسف يحرك ف صبعه على خدها : الوجيه السمح هذا معادش نبيه يكشر
هناء ابتسمت
_____________________
سنابل اتكت ف سريرها : هناء قاعدة معاه ؟
سلسبيل : ايه شوية و بنمشي نقعمز ف الدرجة نراجيها
سنابل شرين تليفونها
لقاته محمد ردت : الو
محمد : اهلا
سنابل ابتسمت : اهلا بيك
محمد : رقدتي ؟
سنابل : لالا مازال
محمد : مابيتش نرقد لين نتطمن عليك
سنابل .....
يـتـبـــع ... 💗
_________________
لن أسمح بنقل الرواية دون ذكر المصدر ‼️