الفصل 6
روايــة #صغار_العم
الحَـــلْـــقـــة الــسادســة 🌸
يوسف يدوي مسكر سنونه : فاهمة ولا لا 😠
هناء هزت راسها
يوسف يتكلم بصبعه : و مازال تقابليه بلا حجاب حايصير شي مش حايعجب الكل ؛ حانقلب ام الحوش باللي فيه
هناء : يوسف !
يوسف : نراجي فيك اكثر من ساعتين و ف الاخير نلقاك مع المنذر ؟
هناء : ماهو ..
قاطعها يوسف : هيا خشي للحوش و معادش تنزلي
هناء كيف بتتكلم ...
يوسف يفنص فيها : كلمة وحدة هيا
هناء خشت الحوش و هي ساكتة
يوسف مسح على وجهه و لحيته بإيديه : استغفر الله العظيم .. و خش لحوشهم
______
هناء واقفة ورا الباب ؛ ساخنة و قلبها يدق بسرعة
ماقدرتش تناقشه او تعاركه لان قاعدة مأثرة فيها الصدمة
مروحت على وجهها بيدها و خشت لدارها
______
المنذر خش للمربوعة و رقد
________________
01:00 ص
العارف يلود ف الحوش و يسكر ف اللامبات 💡
جاته حلومة : خيرك يا حاج اتظلم علينا
العارف : نقصوا الضي وراي فاتورة هكي طولها تبي الدفع
حلومة : تو على هاللامبا بتأثر ؟
العارف : و سكرت حتى بومبة البير معادش تخلوها مفتوحة تصرف
حلومة سكتت 😡
________
عماد ساهر مع مرته و صغاره ف الحوش لكن لاهي فِ التليفون بالمسجات
ازهار تحدد ف بدلة عماد : خيرك ماقعمزتش مع خالتك لما روحنا
عماد عيونه ف التليفون : كنت تاعب من اللطان بيك ف المحلات علاش يعني
ازهار تكنطت و سكتت
محمد يشوف لبوه كيف لاهي ف التليفون و ساكت
ازهار : حميدا طلع بدلتك العربية خليني نحددهالك باش تلبسها غدوا
محمد شبحلها : رفعتها للمغسلة و وتيتها
محمود طلع من الحمام : هداكا مفيش مشي للفاتحة اهو قلتهالكم من توا
عماد شبحله : على مني تحكي ؟
محمود : على احمد اني حالفله ع الجنان و حنتني ؛ طلعله من تاني يوم لكن تو نعرف كيف نمكر فيه
عماد شبح للتليفون : اصلاً مش رافعه فكنا من وجيجه
ازهار : عيب عليكم تحرموا فيه وهو فرحان يراجي فيها و يخي خش رقد بكري من الفرحة
و شبحت لمحمد : اهو حميدا يرفعه انتو مايهمكش فيه
محمد عيونه ف بوه و ساكت
طلعت روان من دارها شادة لبستين : ماما اما هي اللي نلبسها
محمود شبحلها : هدا شنو ؟
روان : حوايج
محمود : عارفعهم حوايج امالا شلايك !
روان ضحكت : بنلبس وحدة من اللبستين هادو لكن حايرة
ازهار : البسي البلوزة الخضراء حلوة
محمود فنص فيها : و هادي امتى بتلبسيها
روان : ف وقت الفاتحة
محمود : لالا مفيش
روان عوجت فمها : و علااااش !!
محمود : قصيرة شن علاش 😠
روان : تي اني مش طالعة بيها للشارع خيرك ؟ بنقعد بيها ف الحوش وقت اللي بيجو الناس
محمود : بنلقاك لابستيها بنشركها عليك
روان شبحت لأمها : ماما ادوي كلمة
ازهار : خيرك على اختك مازال صغيرة تلبس اللي يعجبها
محمود : اني قلت مفيش يعني مفيش
محمد شبحله : و انت شن ليك علاقة فيها ؟ تلبس اللي يريحها
محمود علّا صوته : والله تلبس حاجة ضيقة ولا مشحوطة نهارها احرف فوق راسها اهو قلت
روان : لما تتزوج احكم ف مرتك 😒
محمود : تو نشوفو من يمشي كلمته
عماد وقف و طلع من الحوش
ازهار استغربت : وين ماشي ف هالليل
محمد شبحلها و سكت
روان تصيح : انت مادخلكش فيا شن نلبس ماناقص غير تلبسني حجاب
محمود فنص فيها : اصلا بتلبسيه قريب
روان عيطت : لااااا مستحيل 😩
محمد : معاش تعلي صوتك خيرلك يا فرخة
روان شبحتله : اسمعه شن يقول
محمد شبح لمحمود : حقا يوسف قال ان جاك أيوب امبكري
محمود استغرب : أيوب ؟
محمد : ايه و قال معاه ولاد مارتاحلهمش
محمود هز راسه : امالا كان خاطره ياكل كفوف و يروح ، ياريتني حضرته
ازهار : فكنا من المشاكل ف العرس يا ولدي
محمود شبحلها : هو جي لعندي مامشيتلاش
محمد : متعاركين امالا ؟
محمود : كان ناقص رباية و ربيته لكن شكله مازال يبي
محمد و هو طالع : قعمز و ريح روحك بلا مشاكل يا راجل
محمود عض لسانه و سكت
ازهار : وين ماشي حتى انت ؟
محمد بيلحق بوه : شوية و نجي
و سكر الحوش
________
عماد فتح سيارته ف الشارع و قعمز فيها يهدرز ف التليفون
_______
سنابل : غر و راس امك انزلي معاي
سلسبيل : لالالا مش حاتتكرر العملة هديكا ف جرت الشاورما قريب ضعنا
سنابل : المرة هادي ف الجنان من تالي غر هيا بالله عليك
سلسبيل : و كان يشوفنا حد ؟
سنابل : ان شاء الله ربي يسترنا
( آدم يتصل )
سنابل ردت : الو
آدم : تي وينك من بكري نراجي
سنابل : خمسة دقايق و نجيك
آدم : اوكى غر بسرعة
سنابل : تي باهي 😒 ... وسكرت الخط
سلسبيل : بري بروحك اني مش نازلة توا
سنابل شدتها من ايدها : والله الا ما تنزلي معاي الله
سلسبيل تتأفف : تعرفي كان يشوفنا حد بنفرمط فيك و نقول انتي
سنابل ضحكت : مستحيل اديريها
_______________
هناء ف دارها متكية ف سريرها وتفكر في كلام يوسف ليها و تصرفاته معاها و مبتسمة
ناضت وقفت قدام دولابها ؛ فتحاته و بدت توتي في لبسها لتاني يوم
فتحت القجر تشوف ف مكياجها : ايييي الماسكرة بتم و الفاونديشن ريحوه الكلبات هدوكا 😒
شافت للزمالطوات : اييييي حتى نسيت ماخدتيش أسيتون للزمالطو
سكرت القجر و قعدت تشوف شن ناقصها من حاجات باش تطلع تشريهم
_______________
يوسف متكي ف سريره و يسمع فيها تقربج من ورا الساس ؛ فتح تليفونه بيجرب يتصل بيها لقي الحظر قاعد 😑
تكنطا : توا هادي كيف بنتصرف معاها ؟!
ناض من سريره و فتح البلكونة وطلع ؛ تلفت لبلكونتها يشوف كيف بيوصل فيها ...
__
هناء مطلعة قفطانها اللي بتلبسه ف العرس لونه أخضر 💚 حطاته ع السرير و تشوف شن بتركب عليه من اكسسوارات باش تلبسهم معاه
_______
محمد ف الجنان يدور على بوه مالقاشي
فتح باب الشارع بالشوية و طبس ؛ لقاه مقعمز ف السيارة و شاد التليفون ف وذنه
عقد حواجبه و استغرب
خش للجنان بدون مايكلمه او يحسسه انه شافه
كر كرسي من الطاولة و قعمز يفكر
______
سنابل نازلة ف الدروج : خمسة دقايق بس
سلسبيل معاها : تعرفي تفوتي الخمسة بنمشي و بنخليك
سنابل : به
( و طلعو للجنان )
محمد حس بيهم و تلفت : شن طلعكم ؟
البنات انخلعو
سنابل بصوت واطي : حي على امه مش وقته
سلسبيل : اركبي هي
محمد وقف و جاهم : خيركم نزلتو
سنابل : سلسبيل طاح منها الميموري متعها ورا الحوش نزلنا ندوروه
سلسبيل : هي خلاص فوتيه و خلينا نركبو
سنابل شدتها من ايدها : لاااا لازم ندوروه خير ماتزحم الدنيا غدوا و ينخنب
محمد : اركبو انتو تو ندوره اني و نجيبه
سنابل جبدت اختها و مشت بيها : صحيت تو ندوروه حني
محمد سكت
سنابل تكر ف سلسبيل : بسرعة خير مايلحقنا
سلسبيل : فكينا يا بنت والله الا مايعلق عليك
سنابل : تعرفي آدم الا ما يديرها ليلة حرفة كان ماطلعتلاش ؛ من بكري يتصل
سلسبيل تتأفف : باهي بسرعة
و شبحت لبلكونة يوسف انصدمت : هييييه 😲
سنابل قامت راسها فوق : خيرك ؟
سلسبيل شبحتلها : هذا شن يدير !!
سنابل ضحكت : حيه كان مايشوفه محمد
( يوسف ينقز من بلكونته لبلكونة هناء )
سلسبيل : بري لهيه اجري
سنابل : و آدم ؟؟
سلسبيل تندب ف وجهها : وقت آدم و اختك بتنفضح ان يوسف جايها ؟
سنابل تشوف ليوسف : اكيد هو من راسه ، هناء مش مهبولة باش تناديه ف هالليل
سلسبيل دفتها من كتفها : بري لمحمد بسرعة
سنابل شبحتلها : امالا انتي بري لي آدم
سلسبيل عوجت فمها : نعم ؟!!!!
سنابل : بريله انتي على اساس اني و ماتعطليش
سلسبيل : بري روحي ماناقصني الا هالمعفن مبرد دمه مش عارفة كيف متحملتيه
سنابل ضحكت : اهو نمشي بيه ف الوقت خير من الكساد
سلسبيل ادف فيها : باهي بري لمحمد بسرعة خير مايشوف يوسف
______
هناء حست بصوت من البلكونة استغربت
قربت من الباب و قعدت تشوف
يوسف يطق بالشوية : افتحي شحورتيني
هناء انصدمت : يوسف 😳 !!!
يوسف يطق
هناء مشت تجري تسكر ف باب دارها بالمفتاح و وقفت قدام البلكونة ؛ مترددة تفتحله ولا لا
يوسف بصوت واطي : بتفتحي ولا لا ؟
هناء خدت نفس عميق و فتحت
يوسف خش طول و شبحلها : هذا خوف ولا جكترا ؟
هناء سكرت وراه الباب و هي مصدومة : انت شن ادير ف البلكونة ؟
يوسف حك لحيته : نقزت باش نوصل فيك
هناء مازال مصدومة : لا انت اكيد مش طبيعي كيف تجيني توا ف الليل ؟
يوسف قرب منها و ابتسم : ماهُنتيش عليا ترقدي زعلانة
هناء قلبها دق و وخرت : خليك بعيد و فكني من حركاتك يوسف
يوسف قرب اكتر : علاش خيرهم حركاتي
هناء سخنت و زادت وخرت : يوسف فكني منك والله نطيح
يوسف بصوت واطي : ماتقدريش تقاوميني ؟
هناء سكتت و قلبها يدق
يوسف شدها من خصرها
هناء غمضت عيونها و نحتله ايديه : بالك تحساب روحك ف بريطانيا !
يوسف شدها تاني : انت تحبيني و اني نحبك من شن خايفة
هناء فتحت عيونها و رمشتهم بسرعة : و من قالك نحبك ؟ اعطيني دليل
يوسف : نظرات عيونك ليا ، و صوت أنفاسك لما نقرب منك ، و دقات قلبك اللي نسمع فيها توا
هناء سكتت و وجهها انحمر
يوسف : و غيرتك من أروى 😉
هناء توترت و شدت التيشرت متعها من جهة الرقبة
يوسف : ولما شديتي عطري تشمي فيه
هناء تحشمت و حطت ايدها على فمه : اسسسس
يوسف شد ايدها و باسها ف كفها
هناء متحشمة : يوسف بطل
يوسف شاد ايدها : باهي امتى بتنحي الحظر
هناء : مانعرفش
يوسف ضحك
هناء : هيا اطلع بسرعة
يوسف شبح للقفطان ع السرير : الله 😍
هناء ضحكت : فكنا منه الجو هذا
يوسف شده يشوف فيه : قصدك بتسحريهم بجمالك بالقفطان هذا ؟
هناء فكاته منه : يوسف !!
يوسف : لازم نشوفك بيه
هناء فنصت فيه : زي اللي استانست !!!
يوسف : وين تليفونك ؟
هناء استغربت : علاش ؟
يوسف تلفت للشكماجة لقاه محطوط
خداه و قال : افتحيه
هناء : علاش شن تبي ؟
يوسف : بناخدو سيلفي 😉
هناء فتحاته : عارفاتك شن بدير
يوسف خداه منها ؛ خش على رقمه نحّا الحظر و مدهولها
هناء ضحكت و خداته منه : كنت عارفة
يوسف : من اليوم لما نطلبك نلقاك ؛ مانقعدش انقز من البلكونة زي الخنابة
هناء تشوفله و ساكتة
يوسف حط ايده على خدها : تفاهمنا هنو !
هناء قلبها دق بسرعة : يوسف !
يوسف : نعم يا عيوني
هناء دوب ماتدوي : نحي ايدك مش قادرة
يوسف حاط ايده على خدها و يشوفلها
هناء ترعش و مش قادرة توقف : نحي ايدك راني بنطيح
يوسف : علاش يا قلبي
هناء مروحت بيدها و نزلت راسها
يوسف قاملها راسها بيده : هنو ! خيرك
هناء شبحتله : يوسف انت فاجأتني امس ؛ نبي وقت باش نستوعب
يوسف : ماك ماخليتيليش خيار تاني كل مانبي ندوي معاك تهربي مني مجرد ماتشوفيني ؛ ليا ايام و انى متعذب ف جرتك قلت هكي انسب حل
هناء : علاش به ؟ علاش متسرع
يوسف قام حواجبه : اه لين يخطبك حد و ياخدك من قدام عيوني هذاكا وين نتكلم ؟
هناء وجهها انحمر و تحشمت
يوسف : تي اني مجرد ماتنجاب سيرة الخطبة تتظلم قدامي
هناء ضحكت
__________
سنابل مقعمزة مع محمد ف الجنان و ساكتة
محمد : اختك زي اللي عطلت !
سنابل : بالك قاعدة مالقاتاش خليتها فاتحة الفلاش و اتدور
محمد وقف : خلي نمشي ندور معاها
سنابل شداته من ايده : خليك معاي
محمد شبحلها و شبح لإيدها
سنابل تحشمت و نحتها : نبي نهدرز معاك ف موضوع
محمد قعمز : هذاكا الموضوع ؟
سنابل خدت نفس عميق : لالا واحد تاني
محمد : خلينا ف الاول قبل
سنابل تلخبطت : فوته توا
محمد : نبي نفهم خيرك ! علاش قايلتيلي عليه من الاول لو انتي ماتبيش تتدوي
سنابل : باش نتهرب من الدرس وقتها 😅
محمد : مشيها على حد تاني مش عليا
سنابل : قصدك نكذب ؟
محمد : ايه تكذبي و انتي ابصر شن مدايرة من فالطة و حاصلة ف روحك فا اعترفي خير مانعرف بروحي
سنابل : والله ماصارت الموضوع مايخصنيش لكن قلت نبي نعطيك علم بالك انت تقدر تتصرف
محمد : تي فاش بنتصرف النهار الاحرف ؟ ادوي طول و بلا لف و دوران خيرلك
سنابل ايديها يرعشو متوترة
محمد يشوفلها و يشوف لي ايديها
سنابل : هذاكا اليوم ف الليل سمعت ....
( و ف اللحظة هادي عماد فتح باب الشارع و خش )
سنابل سكتت و شبحتله هي و محمد
عماد استغرب : شن اديرو هني
محمد عاقد حواجبه : نراجي فيك
عماد : شن تبي فيا
سنابل ساكتة
محمد : نزلت دورتك مالقيتكش
عماد تلخبط : اه طلعت دخنت قدام الحوش
سنابل ف عقلها .. ( على من تكذب يا معفن ! ... الرصيد معاش يمشي حاله الراجل شكله عرسه قرب لازم نفضحوه )
محمد ماصدقاش و يشوفله من تحت لفوق : ااه به
عماد : هيا خش انت وياها
محمد : شوية و خاشين نراجو ف سلسبيل اتدور ف الميموري متعها طايح ورا الحوش
عماد هز راسه و خش
محمد تكنطا و عرف ان بوه يكذب
____
سلسبيل فوق السلوم : شن هذا كله ؟
آدم مدلها شكارة كبيرة : شكلاطة ليك ياعيوني عارفك تموتي فيها
سلسبيل على اساس سنابل : شكرًا هلبا 😍 ديما كتر
آدم ضحك : حاضر انتي غر اطلبي بس
سلسبيل : اني نطلب لكن اختي غبية ( زلقت )
آدم استغرب : كيف !
سلسبيل تلخبطت : قصدي نتحشم نطلب منك 😅
آدم : اي حاجة تخطر ف بالك اطلبي مني طول ماتتحشميش انتي حبيبتي و حبي و كل حياتي
سلسبيل زرتها الضحكة : تسلم تسلم
آدم قام حواجبه : شن هالجفاف هذا قولي تسلم حبيبي تسلم يا قلبي يا عيوني
سلسبيل انقرفت منه : تسلم حبيبي 😒
آدم : خيرك اليوم مش سنابل اللي نعرفها
سلسبيل كيف بتتكلم زلق بيها السلوم
سلسبيل بتطيح : لااااااااا 😩
( السلوم قال قرباااااااع و الشكلاطة تشرتعت )
آدم تخزرط و طبس عليها : يا سااتر يا ساتر
سلسبيل تتوجع : ااه يا ظهريييييي 😭
سمعتها سنابل مشتلها تجري : حي على امها طاحت
محمد : منين طاحت .. ( ومشي لحقها )
آدم مطبس عليها : ننزلك ؟؟
سلسبيل تتوجع : تي برا روح يعطيك جدري يرفعك مش وقتك
جت سنابل تجري : خيرك شن اللي طيحك
آدم من فوق السور يحساب سنابل هي سلسبيل : بالله قيمي السلوم من عليها يا سلسبيل بسرعة
سنابل شبحتله على اساس سلسبيل : و انت قاعد واقف ؟؟!! تي برا روح 😡
جي محمد من وراها و هي ماتندريش
آدم شافه ؛ خاف و نزل بسرعة
سلسبيل مازال طايحة و تتوجع : ماهو كله منك يا قردة تخلي فيا نوقف ع الولد ف مكانك
سنابل : باهي غر نوضي بسرعة اكيد محمد جاي
محمد تكنطا : يعني تجرو بيا يا بهيمة انتي وياها ؟؟
البنات شبحوله و انصدمو 😲
محمد يفنص : خشي انتي وياها قدامي خير مانمد ايدي عليكم 😡
سلسبيل : قيمو السلوم من عليا 😩
سنابل قامت السلوم و وقفت اختها
محمد والع : خشي الداخل بسرعة 😡
سلسبيل تلقط ف الشكلاطة متشرتعة : باهي هانا خاشين
سنابل تجبد فيها : هيا نوضي مش وقته
سلسبيل تلقط : دقيقة بس هادي اخر طرف
محمد متعفلق : تي خشي يلعن ... ( عض لسانه و سكت )
البنات خاشين : تي باااااهي
محمد علّا صوته : والله الا لما نوريك يا سنابل نعرف كيف نتصرف معاك
خشو البنات يجرو و ركبو لحوشهم
محمد متعفلق : خزي عليها تجري بيا و هي كانت مدايرة موعد !! تستغفل فيا !
_______________
هناء : هيا اطللللع
يوسف : باهي شوفيلي الطريق بنطلع من الباب
هناء قامت حاجبها : كيف ماخشيت تطلع
يوسف قرب منها : نهون عليك انقز و نطيح ف الجنان ؟
هناء سكتت
يحرك ف صبعه على خدها : يتكسر حبيبك و يقعد مُقعد ف كروسة ؟
هناء ابتسمت : بعيد السو عليك
يوسف ابتسم : ماتشوفي سو
هناء : باهي راجيني هي
كيف بتطلع يوسف جبدها ليه : شن رايك نشبع منك قبل 😉 ؛ تعويض ع الايام اللي فاتو
هناء ضرباته بوكس خفيف ف بطنه : بلا قلة ادب
يوسف شد بطنه و ضحك و هناء فتحت الباب
طبست لقت خواتها كيف خاشات و يوشوشو
جتها سنابل توشوش : يوسف روح ؟؟
هناء انصدمت : و انتو منين عرفتو ؟؟
سلسبيل : ريناه كيف نقز
هناء وجهها انحمر : بيبدا يحشم فيا
سنابل : اااحححح يا بختك 😍
هناء ضحكت : خزي ماتتحشميش
سلسبيل : قاعد الداخل هو ؟
هناء : ايه ، عسولي ع الديار راهو يطلع حد لان بيروح من هني
البنات : به
وحدة وقفت قدام دار نوم امها و بوها و التانية وقفت قدام دار اصيل
هناء ولت ليوسف : هيا اطلع الطريق آمنة 😂
يوسف ضحك و طلع
لقي البنات انصدم 😳
سلسبيل دارتله باي بيدها 😂
يوسف وجهها ولاّ احمر و طلع من الحوش : يا عليك حشمة الزح
فتح حوشهم و خش
لقي سعاد ساهرة ف وسط الحوش : امي !
سعاد شبحتله : نعم
يوسف : خيرك ساهرة لتوا
سعاد تتفرج ع التلفزيون : ماجانيش نوم قلت نشوف شوية البرنامج هذا عجبني
يوسف سكت
سعاد استغربت : انت امتى طلعت من دارك و نزلت ؟
يوسف تلخبط : من بكري
سعاد انصدمت : بسم الله الكريم !! امتى يا ولدي و اني من بكري مقعمزة ف مكاني من اللي خشيت لدارك !
يوسف : طلعت من وراك و انتي ماحسيتيش بيا
سعاد سكتت و قعدت تشوفله
يوسف قعمز بحداها بيغير الموضوع : ماوريتينيش شن شريتي امبكري
سعاد : خديت بدلة
يوسف : شن شكلها
سعاد : معدسة و ملونة بألوان الطيف
يوسف انصدم : بجديات 😳
سعاد : ايه توا غر بوك راقد كان هذا وريتهالك
يوسف : شن بدلة معدسة يا امي مقدمه الموديل اهوا
سعاد : لالا غر انت ماريتهاش والله على محلاها نااااازكة ع الاخر
يوسف شبح للتلفزيون و سكت
_________________
سلسبيل شرتعت الشكلاطة ع السرير : تفضلووو 😍
هناء شهقت : هييييييه 😲 هادي منين
سلسبيل : العصا السحرية 😍
سنابل ضحكت 😂
هناء مصدومة : لا انتو رسمي ماتخافوش
سنابل : انتي ع الحال هذا مش حاتعيشي حياتك
سلسبيل : عرق الحشمة مفيش عند يوسف تو يقويلها قلبها 😉
هناء سكتت و فتحت الشكلاطة تاكل
_______________
تاني يوم 🌹
12:30 م
حلومة مقعمزة مع اختها و العويلة ف الدار و الكناين ايطيبو ف الغدي
سعاد تبوخ ف الكسكسي : ريتوها نجمية ام مرام كيف قالت بتجيب العيلة كلها للمحضر !
ازهار توتي ف الفاكهة : ايه قالت تبي أربعة طاولات
سعاد : مصح وجهها ماتتحشمش المفروض تعزم الكبار الكبار بس مش تجيبهم عراية و لابس
نجاة مقعمزة ع الكرسي و مدايرة رجل على رجل : عادي خليهم يجو و يتفرجو والله جايبتلكم فرقة من الاخير حاتولّع المحضر
سعاد قلبت وجهها و سكتت
ازهار : تعرفو كنت نبي نصدر لكن اختي طلعتهالي من النية قتلي البسي قفطان احلى سايروني باش نلبسها
نجاة : ايه صح كلامها اختك شن صدرة ؟ اني شريت قفطان ماكسي من (.....) مصممة أزياء بنلبسه
و كشرت وجهها : اما صدرة هادي ماتمشيش معاي
سعاد : والله اني خديت بدلة للدخول تهبللل تحل العين المغمضة
ازهار ضحكت : اوصفيهالنا
سعاد بِ ثقة : تو تشوفوها غدوا
نجاة غمزت ازهار و ضحكو
__________________________
هناء لبست سروال جينز مع بلوزة بيضاء و وشاح حرير مزخرف ؛ مكيجت ع السريع و طلعت
جتها سنابل : وين ماشية
هناء : بناخد مكياج ناقص
سنابل : ارفعيني معاك
هناء : باهي بسرعة تلقيني ف السيارة
سنابل : عشرة دقايق و نجيك
خشت للدار لقت سلسبيل متكية و فاتحة الفيس
سلسبيل : وين ماشية
سنابل فاتحة دولابها : بنطلع مع هناء بتاخد حاجات
سلسبيل : محمد مش حايخليك تطلعي زي امبكري لما ردك من الباب 😂
سنابل : مبرده الحيوان 😒 شن فيها كان مشيت للغذائية
سلسبيل : تي يا حمارة هو حرمك على خاطر امس
سنابل شبحتلها : بالحق !
سلسبيل : الحمد الله ع السلامة باهي اللي فهمتي
سنابل : حي على امه مصح وجهه
سلسبيل : البسي النظرات على اساس اني و اطلعي
__
نزلت هناء و طلعت للجنان لقت المنذر واقف و يدخن
المنذر شبحلها : اهلااا
هناء ابتسمت : اهلا بيك شن الجو
المنذر : تمام شن دايرة
هناء : الحمد لله
المنذر : تي وينك امس خشيتي جوا و معادش شفتك
هناء تلخبطت : كنت تعبانة و ركبت
المنذر : سلامتك
هناء ابتسمت و سكتت
المنذر : طلعت بدري غيرت جو ف المنطقة بدل الفراغ اللي انا فيه
هناء بمجاملة : كويس
المنذر : طالعة ؟
هناء : ايه
المنذر : عادي كان نعدي معاكي ؟
هناء انصدمت : تمشي معاي !!
خش يوسف و معاه محمد
يوسف لما شاف هناء مع المنذر تكنطا و عقد حواجبه
هناء تلخبطت و طلعت بسرعة لسيارتها
محمد : منذر ؟ شن الأمور
المنذر : تمام
يوسف لحق هناء ف الشارع
طلعت سنابل للجنان لقت محمد واقف ، لبست النظارات بسرعة
محمد شافها : تعالي تعالي
سنابل شبحتله من بعيد : نعم
محمد اشرلها بصبعه بمعنى خشي
سنابل ابتسمت : اني سلسبيل خيرك 😎
محمد عقد حواجبه : ااه به توكلي
سنابل ضحكت و طلعت للشارع
المنذر : هيا نستأذنك انا يا محمد
محمد شبحله : وين بيها ؟
المنذر : طالع شوية و جاي
___
يوسف واقف مع هناء و متعفلق : اني شن وصيتك ؟
هناء : والله طلعت لقيته بالصدفة
يوسف : تشوفيه تخشي طول
هناء استغربت : علاش به في شن ضايقك الولد
( سنابل جتهم و ركبت للسيارة )
يوسف شبح لسنابل و سكت
هناء : نكلم فيك
يوسف شبحلها : انتي وين ماشية
هناء عاقدة حواجبها : محل
يوسف : محل شني
المنذر طلع : تأخرت عليكي ؟
يوسف شبحله : تكلم ف هناء انت ؟
هناء عضت فمها و سكتت
سنابل تضحك : ولعت يا حي عليها 😂🔥
المنذر : اها بنعدي معاها
يوسف زاد تعفلق : تي اما بتعدي معاها ماتفصلش امي الزح
المنذر انصدم : كنك عليا انت ؟
يوسف علّا صوته : تي شن تقول يا راجل طالع و لاصق ف البنات الزفت ؟ تي برا شوفلك حد تكسد معاه ولا ديرلك حل الزح
المنذر تعفلق : تي اوكى بكل انت راقيلك و جوك مش تمام ! انا هنعدي توا
و مشي على رجليه
يوسف قام ايده : تي برا اقلب وجهك النهارات خير ماندير رقبة
هناء مصدومة و ساكتة
يوسف شبحلها و خبط ع السيارة خبطة خفيفة من السقف : هيا توكلي و ماتعطليش عندك ساعة بس
هناء طلعت بالسيارة و هي ساكتة
و سنابل تضحك 😂
________
04:00 م
ولاد العم واقفين ف الجنان ؛ لابسين بدالي عربية و مجهزين روحهم للفاتحة
يوسف فتح تليفونه و اتصل بهناء ..
هناء ردت : الو
يوسف : تي وينك من بكري نراجي فيك
هناء : و ماهو معاك المنذر 😒
يوسف : و انى من قالك نبيك تطلعي للجنان ؟ توقفي ف الدروج و نجيك
هناء : باهي اوكى
يوسف : و الوشاح ماتنسيشي
هناء : علاش ؟
يوسف : الاحتياط واجب
هناء ضحكت : حاضر
طلعت حلومة من الحوش شادة المبخرة و فرحانة : الصلاة ع النبي عليكم ربي يحفظكم من العين
الولاد ضحكو
يوسف يضحك : الله يسلمك
حلومة : تقرو المعوذات و اية الكرسي قبل ماتطلعو فكونا من العين
محمد : ان شاء الله به
احمد لابس عربي و يلعب بالكورة
محمود شبحله : سيبها خيرلك يا احمد
احمد عطاها تيرو و سكت
طلعت اروى من الحوش هي و سنابل : ماشااااء الله عليكم 😍😍 تهبلوووو
أصيل ضحك : هيا خوديلنا لقطات مع بعضنا
اروى فتحت تليفونها و تصور فيهم
سنابل : العين اللي تدرف بالدم دواها عند ولاد العم 😍
محمد شبحلها و سكت
يوسف ضحك : عاوديها عاوديها 😂
و شرين تليفونه لقاها هناء داره سايلنت و قعد يصور معاهم
هناء ف الدروج : خيره ماردش ؟ .. و نزلت الجنان
المنذر طبس من باب الشارع : هيا يا شباب كان بتعدو معايا انا و عصام
محمود : توكلو انتو تو نجو ف سيارتين
المنذر طلع مع عصام و الرجالة و بعده محمود طلع للشارع
اروى تتدحنس على يوسف : غر خليك واقف مازال بنصورك
( أحمد طلع و لحق خوه محمود )
يوسف يدف فيها بيخش لهناء : تي حولي مش فاضي بيك
اروى تضحك و تلحق فيه : الصورة هادي بس اوسيفه
طلعت هناء و شافت اروى تضحك معاه ؛ عقدت حواجبها و تكنطت
يوسف شافها : شن نزلك ؟
هناء خشت لحوش جدها و ماردتش عليه
يوسف علّا صوته : تعالي نكلم فيك
اروى ساكتة
فجأة خش احمد يعيط : تعالووو بسرعة
يوسف انخلع و تلفت : خيرك ؟
أحمد راعش : محمود مداير عركة مع جماعة و هو بروحه بيناتهم
يوسف طلع يجري و لحقوه محمد و اصيل
اروى و سنابل خافو : ووووه 😱
_____
محمود لايدين بيه جماعة أيوب أربعة نفار و هو فاتح البو خوصة عليهم : اقسم بالله لو فيكم ذكر يقربني الا ما نشكرله جنابه
أيوب : تتمرجل عليا يا عيل ؟؟ اديرني مضحكة صار قدام اللي يسوىٰ و اللي مايسواش ؟؟
جي يوسف يجري : خيركم شن فيه
أيوب تلفتله ؛ و محمود ف اللحظة هادي ضربه بوكس على وجهه
و بدو فيها عراك كلهم 👊👋👊👋
محمد شاف خوه بينهم شد حديدة متع طوبوات امية قدام حوش جيرانهم و خش فيهم هو و اصيل
محمود شاد أيوب ع الحيط خانقه و يعيط بأعلى حسه : جايني برجليك يا ***** روحك زنت و تبي تموت ؟؟؟ 😡
أيوب مخنوق مش قادر يتكلم
محمود خانقه بيد و يضرب فيه باليد التانية
أحمد خايف ؛ واقف من بعيد و يحذف ف الرشاد على صحاب أيوب
يوسف شد واحد من سوريته و يضرب فيه تيروات : تي روح يا عيل انت وياه
أصيل كلي كف من واحد و طاح
تعلفق و ناض وقف : تضربني كف يا كللللب !؟؟؟
( قعمز فوقه و يضرب فيه على وجهه )
____
البنات و النساوين راعشين ف الجنان
حلومة ترعش : يارب احفظهم يارب والله هادي عين و طربقتهم قبل مايمشو
نورية اختها : يا عليك كاينة يارب استرها يارب
اسماء بنت نورية شادة ولدها يعيط و ساكتة
سعاد تعيط : ووه عليا ولدي يوسف معاهم
نجاة فنصت فيها : كلنا ولادنا برا ادعي ان مايصير شي لحد منهم
اروى : ان شاء الله مايصيرش فيها الرصاص كان هدا الا ما ينقلب عزي مش عرس
امال عيطت عليها : تحركي من مكانك و سكري فمك خيرلك
ازهار تبكي : هذا فرخي محمود مايرتاحش لين يجيبلي الجلطة
سعاد : كاني ف مكانك نربطه ف الروشن و نطيح فيه جلد
امال فنصت فيها : قولي كلمة طيبة للمرا ولا اسكتي مش ناقصة
هناء ترعش .. (( ياربي استر كان مايوسف تطرا فيه حاجة 😢 ))
روان : ان شاء الله يمشو طول للفاتحة باش محمود مايشوفش لبستي 😰
سلسبيل تبيّت و تضحك : صحة ليهم تريس و يرفعوا الراس
سنابل توشوش فيها : كله منك يا كلبة هذا أيوب متعك
_________
صحاب أيوب معاش قدرو يكملوا العركة و هربو
اصيل يصيح : روحو يا **** يا *****
محمد جي بحداه : سكر فمك العيلة يسمعو فيك
يوسف شاف أيوب مخنوق جي لمحمود يجري شدله ايديه : تي شن ادير يا راجل
محمود والع هلبا مايشوف في شي قدامه : خليني نقتله الكلب
يوسف فمه دم : تبي ادير رقبه ؟؟ تي هذا عيل اطلق النم يمشي على حاله
محمود مازال خانقه
يوسف يعيط و يفكله ف ايديه : تي قتلك اطلقه
محمود طلقه
أيوب شد رقبته يكح هلبا و داهش
يوسف شده من حوايجه يكركر فيه : مرة تانية معاش تسترجل ع اللي ارجل منك
و عطاه تيرو
أيوب مشي لسيارته و حالته حالة
يوسف شبح لصغار عمامه : هيا للفاتحة انت وياه خير ماتفوتنا
ركب لسيارته هو محمود و طلعو
يوسف : توا نبي نعرف علاش جوك هادو و شن قصتهم
محمود متعفلق : فوت مانبيش ندوي
يوسف شبحله : بعد ماخشينا فيها كلنا ماتبيش تقول ؟؟ هيا نسمع فيك
محمود : ....
___________
محمد ركب لسيارته هو و أصيل و أحمد و طلعو
أحمد فرحان : ريتوني كيف حذفت عليهم الرشاد ؟
محمد ضحك : ايه ريتك هكي نبيك ديما في اي عركة خش طول
اصيل يشوف ف روحه ف المراية : عيني حمراء الزفت خديته كف مليح
محمد شبحله : تي عادي المهم كلو على وجوههم و روحو
اصيل : علاش تعاركو هما شن قصتهم مش كانو صحاب ؟
محمد : اكيد أيوب ملبز لان محمود نعرفه مليح مستحيل يغلط ف صاحب
___________
محمود : و هادي القصة
يوسف تعفلق : المفروض قتلت ***** المسخ
محمود : ماك ماخليتنيش كنت ناوي رقبته اصلا
يوسف : وين نندري على قصته شن هي
محمود : خلاص توا المهم تربىٰ و روح زي الجرو
يوسف فتح قجر الفودرا و طلع كلينكس يمسح ف فمه
___________
سنابل : تي ريناهم ركبو السيارات و مشو
أمال : متأكدات ؟؟ يعني كلهم مافيهم شي ؟
سلسبيل : وااك ياعمتي اتصلي بيهم و اتطمني كان مش مصدقة
روان فرحت : الحمدددد لله محمود مشي و ماشافنيش 😍
نجاة : اصيل كلمني قال انهم تمام
هناء ركبت تجري لحوشهم و اتصلت بيوسف ...
يوسف فتح الخط : الو
هناء مشغولة : شن صاير فيك ؟
يوسف : تمام
هناء : انت كويس ؟ اكيد مافيك شي ؟
يوسف : ايه ايه
محمود شبحله
هناء : يوسف قولي لو فيك حاجة ماتدسش عليا
يوسف : اوكى لما نروح ساهل
هناء : جنبك حد ؟
يوسف : ايواه بالزبط
هناء : اوكى نراجي فيك
يوسف : سلام .. و سكر الخط
محمود ضحك : لحقت درت كبيدة ف شهر ؟
يوسف ضحك و فتح الراديو
_______________
07:00 م
روحوا الرجالة من الفاتحة و دايرين نوبة قدام الحوش و يرقصوا عليها ولاد العم و ولاد الشارع و المعارف
__
هناء واقفة ف مطبخ حوش جدها و بالها مشغول
أروى تربط ف البيدون متع الرزاطة بالنسترو باش يبعتوه هو و العبمبر لحوش العروسة
سلسبيل : عليك جو على اساس هما مش شاريين يعني 😏
ازهار ضحكت : هادي العادات
خش احمد : يوسف من بكري ينادي قال وين الرزاطة للرجالة برا
ناضت اروى تجري طلعت السفرة
هناء عقدت حواجبها و تكنطت
__
يوسف واقف ف الجنان يراجي
جاته اروى شادة السفرة : هاك يوسف
يوسف تلفت : هاتي هي
اروى ركزت على فمه : اعطيها لحد من الولاد و تعالى
يوسف و هو ماشي : به
خشت اروى جابت معقم و قطن و طلعت
لقت يوسف واقف : جرحك يبي التعقيم
يوسف هز راسه و بيطلع : لالا مش محتاج
( هناء طلعت و وقفت ف العتبة تشوف فيهم )
اروى شداته : غر اقعد دقيقتين مش حانعطلك
فتحت المعقم و داراته ليوسف
يوسف شبح للباب لقي هناء واقفة
هناء قلبت وجهها و ركبت لحوشهم
يوسف خدي القطنة من اروى و طلع : تو نديرها بروحي
_____________
سنابل : انى بنركب نوتي روحي للسهرية فوتوني
نجاة فنصت فيها : مدو معانا الشاهي للناس بعدين اركبو
سلسبيل : اعتبرو ماعندكمش بنات باهي ! هونا جيبو شغالات يوقفولكم غدوا والله ماتعبو علينا نعولوا بقفاطينا
سعاد : الله يرحم ايام كيف كانو العيلة ايد وحدة و يعاونو ف بعضهم
سنابل : تي بالله عليك اذا كانت عمتي مقعمزة تميعد مع الناس و فايتة العوالة حاطين اللوم علينا حني ؟
روان ضحكت : والله الا حق راهو برستيجنا مايسمحش نغسلو الماعين و نحوسو فاخودو احتياطكم
_______________
هناء مقعمزة ف دارها و تسحن ف روحها عيونها مدمعات : اني اللي مشغولة عليه و بالي عنده ف الاخير ياخد الاهتمام من اروى ؟
فجأة شرين تليفونها لقاته يوسف ، داراته سايلنت و خشت للحمام
___
يوسف يتأفف : بنبدو ف النكد من أولها الزفت
__________
08:30 م
سلسبيل و سنابل ف دارهم يمكيجو
سنابل تلبس ف عدسات : عيني دمعت الزفت مابتش تركب العدسة
سلسبيل جتها تركبلها فيها : اشبحي فوق
نجاة اتطق عليهم : نشوف وجهك امكيج هلبا انتي وياها نغسلهولك فاهميييين
سنابل : حاضر ماما 🌚
سلسبيل : تمام ركبتها
سنابل : بالله عليك كملي جميلك كتريلي الكنتور
سلسبيل : لالا خشمك صغر خلاص
__________
هناء لبست قفطانها الأخضر و وقفت ع المراية ادير ف شعرها
خشت عليها نجاة : مازلتي ؟
هناء شبحتلها : شوية و ننزل
نجاة : باهي انى نازلة امالا
هناء : به .. و شبحت للمراية تكمل ف شعرها
_________
يوسف واقف ف داره يتصل بهناء ماتردش
اتصل بسلسبيل ..
سلسبيل ردت : الو
يوسف : بالله كلميلي النكد اللي عندك
سلسبيل ضحكت : من روحتو من الفاتحة قالبة وجهها و خلوقها ف حكة
يوسف : من معاكم
سلسبيل : انى وياها و سنابل
يوسف : افتحي الباب
سلسبيل سكتت 😳
يوسف : الو
سلسبيل : باهي
_______
هناء واقفة ع المراية اتدير ف الروج 👄💄
فجأة يخش يوسف عليها و هي ماتندريش
يوسف يشوفلها بالقفطان و سارح
هناء حست بحد واقف تلفتت و انخلعت : اطلللععععع
يوسف ابتسم : بسم الله ماشاء الله ، وين الزين هذا كله
هناء متحشمة : انت كيف تخش عليا هكي 😳 اطلع برا خيرلك يا يوسف
يوسف قرب منها : تي خلاص ريتك
هناء سكتت
يوسف شدها من خصرها : تبي تحرميني من الجمال هذا كله و نطلع ؟
هناء : برا تفرج على جمال المسعفة متعك 😒
يوسف ضحك : محلاك و انتي غايرة
هناء متعفلقة : انى بالي مشغول عليك و نراجي فيك على نار نلقاك مع رورو متعك !!
يوسف يضحك
هناء : توا شن تبي فيا جايني برا انزل لوطا تفرج عليها
يوسف : خلاص اسكتي
هناء : لا مانيش ساكتة
يوسف يشوف لفمها : تسكتي ولا نسكتك اني ؟
هناء وخرت : حركاتك هادو ديرهم مع الأجنبيات مش معاي 😠
يوسف قرب منها تاني : باهي خلاص اسف لاني زعلتك هنوشتي
هناء سكتت 😒
يوسف : هي اللي جت تتدحنس عليا لا ناديتها ولا شي و بعدين ريتي الزحمة كيف كانت ماقدرتش نخش
هناء قالبة وجهها : به
يوسف شدها من خصرها : هنو اشبحيلي
هناء شبحتله
يوسف : هي وريني ضحكتك
هناء بمجاملة : 😊
يوسف ضحك ؛ لفتها للمراية و وقف وراها : شوفي وجيه قمر زي هذا يتزعّل ؟
هناء ضحكت : لالا
يوسف ضحك و لفتها ليه : الله محلاها الضحكة اللي طالعة من القلب
خشت عليهم سلسبيل : احم اححححم
يوسف و هناء شبحولها
سلسبيل : تي هيا بننزل ره
يوسف : انزلي
سلسبيل : و نخليكم بروحكم 😒
هناء ضحكت : راجيني جاية معاك
يوسف شبح لهناء : نكلمك بعدين تردي
هناء ابتسمت : حاضر
يوسف طلع و سكر الحوش
سلسبيل : تي هيااااا 😩
هناء خدت شنطتها و نزلت معاها
يـتـبـــع ... 💗
اسفة جداً ع التأخير بس الفترة هادي مشغولة هلبا هذا علاش معادش انزل كل يوم ❤️
________