الفصل 2و 3
روايــة #صغار_العم
الحَــلْــقــة الثــآنــيــة وُآلَثًــــــــآلَثًــــــــهِ 🌸
هناء : قُبلاتي 💋
اسراء ضحكت : و لكِ أيضاً
سكرت هناء الخط و تلفتت ؛ لقت يوسف وراها انخلعت
يوسف عاقد حواجبه : لمن توزعي ف قبلاتك ؟
هناء شبحتله و ماردتش عليه ؛ خشت لحوشهم و سكرت الباب
يوسف تعفلق و خبط ايده ع الحديد
هناء من ورا الباب : مايكلمش فيا و جاي يحاسب !
_______________________
سلسبيل شادة تليفونها و تبعت ف رسايل من تحت المقعد
سنابل توشوش : شن اديري
سلسبيل بصوت واطي : أيوب يبيني نمشيله ف الفصل التاني
سنابل : فصل شني تو يشوفكم حد
سلسبيل : فصل ثالثة - اول ؛ قالي عندهم رياضة و فاضي توا
سنابل : لوحي عليك
سلسبيل وقفت : جري جري مش حانعطل
سنابل سكتت
مشت سلسبيل للأبلة استأذنت منها على انها ماشية للحمام و طلعت
___________
فصل محمود عندهم حصة فاضية و الولاد مكسدين يهدرزو
محمود : يعني الراجل قالي بالكثير ثلاثة أسابيع و يتم الموضوع
أيوب لاهي ف التليفون : على قداش الراس ؟
محمود : 4000
مراد صاحبهم : خلوها ف عز الصيف احسن ع الأقل البحر مش متحرك ، توا مش مضمون الجو
أيوب سكر تليفونه و وقف
محمود شبحله : ها وين ؟ ماكملناش موضوعنا
أيوب : نازل ندير دورة و جاي
محمود ضحك : دورة متأكد ؟
أيوب ضحك و طلع
محمود طلع دخانه و ولعه
مراد : اطفيه و فكك من الوجيج
محمود : ع السريع
مراد : تنوض معاي ؟
محمود : وين
مراد : نديرو دورة ف الساحة
محمود : نتم اللي ف ايدي قبل
مراد وقف : تي نوض ياراجل قبل ماتجي وحدة من النفاخات
محمود طفي دخانه و وقف
________________
أيوب خش لسلسبيل ف الفصل الفاضي
سلسبيل : وينك لتوا ؟؟؟
أيوب : ولد عمك كان فاتحلي موضوع ماباش يسكت
سلسبيل : حي كان مايورقلنا
أيوب يشوف للباب : لالا خليته مقعمز
سلسبيل : شن تبي فيا هيا ادوي
أيوب قرب منها : شن الأسلوب الجاف هذا ؟
سلسبيل ضحكت
أيوب قرب منها اكتر : مرايف عليك هلبا
سلسبيل وخرت : خيرك تقرب ؟
أيوب بصوت واطي : هاتي بوسة
سلسبيل تعفلقت و عطاته كف 👋
أيوب شد وجهه : خيرك ؟!!
سلسبيل : شن قتلك عليه الجو اهوا 😡
أيوب : بوسة بريئة من الخد ماتفهميش غلط
سلسبيل ضرباته بوكس على كتفه : اصلاً وقفتي و كلامي معاك كله غلط ف غلط
أيوب : نقصي صوتك تو يسمعك حد
سلسبيل كيف بتطلع أيوب شدها من ايدها : باهي اسف معاش نعاودها
سلسبيل سكتت و شبحتله
أيوب : شن المكياج هذا اللي مكترتيه
سلسبيل : باش نسحركم بجمالي 😌
أيوب ضحك
__________
محمود و مراد ف الممر خاطمين
شافتهم ابلة الإشراف ؛ طبعا هي مصرية و كبيرة ف العمر و اسمها حسنية ، تدوي ليبي مكسر بالمصري 😂
أبلة حسنية : تعالى انت ويااااه
محمود شبحلها و ضحك : ازيك يا حسنية ؟
أبلة حسنية : لفصلك انت و هو
مراد : نازلين للحمام
ابلة حسنية جتهم تكشخ : قدامي لفصلك تحررررك مايمشيش معاي الجو هذا
______
سلسبيل سمعتهم : حي على امي صوت محمود 😱
أيوب تخزرط : انتي اقعدي هني و اني نطلع خير مايشوفوك معاي
سلسبيل : تو يشوفوني 😢
أيوب : لالا تو نلهيهم ... و طلع
قعمزت سلسبيل على مقعد و تكت راسها زعميتك مريضة ( ف حالة شافتها ابلة 😉 )
______
محمود : جرا ايه يا حسنية ؟ ما الواد قالك رايحين الحمام اصلو مزنووق 😃
مراد : ههههههههههه
أبلة حسنية تعفلقت : خش لفصلك يا محمود انت وياه و بلا قلة ادب
مراد : خمسة دقايق و نجو
ابلة حسنية شداته من سوريته : قُدامي يلااااا
مراد ضحك : باهي
محمود بإستفزاز : بالراحة ع الواد يا حسنية 😃
ابلة حسنية متعفلقة جاته بتشده حتى هو
محمود بدي يجري و يدوي بالمصري بصوت بنت : لأاااا لأاااا يا متوحششششة
مراد : ههههههههههههه ... و لحق محمود
ابلة حسنية شدت ف الساس داهشة : منك لله يا واد يا محمود انت يوم تاني بتجيب اخرتي
جاها أيوب من وراها : لا باس عليك !!
ابلة حسنية شبحتله و عيطت : خششش لفصلككك 😩
أيوب ضحك و لحق صحابه للفصل
_______________
بعد شوية خشت سلسبيل لفصلها
شبحتلها الابلة : وينك لتوا يا ماما ؟
سلسبيل ع اساس مريضة : تعبت شوية
جتها الابلة : خيرك
سلسبيل : امس كليت جيلاطي مرضني و توا كنت نرجع 😔
البنات يشوفولها و ساكتين
سنابل زرتها الضحكة 😬
الأبلة : تو نقول لنجاة تروح بيك
سلسبيل دوب ماتمشي لمقعدها : لالا توا احسن
((( كذبت الكذبة و صدقت روحها 😂 )))
______________
11:00 ص
طلعت هناء من حوشهم مطلعة قردل بتنشف الدروج ؛ لمت شعرها و ركبت بتبدا من فوق ..
________
سعاد و ازهار ف مطبخ حلومة ايطيبو
سعاد : شفتي الطنجرة يا ازهار ؟
ازهار اتدير ف السلاطة : لالا شوفيها ممكن نزحت
حلومة : نجاة عطلت
ازهار : اليوم عندها هلبا حصص تروح الظهر مع بناتها
سعاد كشرت وجهها : تتهرب بالعاني ؛ عارفة شبانيها مروح مش لازمها المشي
ازهار : مانا قاعدين ساد ؛ شن تبيها اتدير
سعاد : و كان هذا ؟ حتى هي كنة المفروض تعاون و تترس زينا
ازهار سكتت
حلومة : ماتعييش من التفتفيت الزايد ؟؟ خلي المراة تخدم على حالها
سعاد : امتى قعدت ف الحوش يا اللاّي ماهي ديما مهناش كان مش ف المدرسة تنسرف هي و بناتها
حلومة : الهي ف عمرك و بس ماتدخليش ف غيرك ؛ ان شاء الله حتى تبات ف الشارع
_______________________
طلع يوسف من حوشهم شاد ظرف ؛ كيف بينزل لقي هناء ف الدروج قايمة سروالها و تنشف
تحشم ؛ وقف ف مكانه و كح
هناء انخلعت ؛ نزلت سروالها بسرعة و شبحتله
كيف يوسف بينزل هناء عيطت : لاااااااا
يوسف انخلع : خيرك ؟
هناء : والله ماك نازلها لين يجف
يوسف : شن تقولي انتي مستعجل
هناء : امالا انزل حفيان
يوسف فنص فيها : ماناش فروخ ره
هناء تتكلم بِ ايديها : شن تحسابني شغالتك ؟؟مرة نمسح سبيدروك و مرة نمسح ترفيسك !!
يوسف : امالا امسحي هي ... و نزل من الدروج بكندرته
هناء سكرت عليه الطريق بالعصا : تعاند فيا قصدك ؟ والله الا ما اتديره انت
يوسف شد العصا بيده : حولي بلا لعب مفرخ الزفت
هناء تعفلقت : تاعبة فيه من بكري و تجي توا تخليني نعاود ؟
يوسف يشوفلها بإستفزاز : عاوديه شن المشكلة
هناء بعصبية : معاش تحرقلي دميييي 😭
نحّا يوسف العصا من قدامه و نزل
هناء نازلة وراه و تصيح : تعالى نشفه انت ، انى حلفت
يوسف و هو طالع : بري ملحي هونا صيمي ثلاثة ايام
هناء متعفلقة : تعالى نكلم فييييك ...
فجأة ؛ إلتوت رجلها و طاحت ف الدروج : أأأأي 😩
يوسف سمعها من سقيفة حوش جده ( المدخل )
قعمزت هناء ع الدرجة شادة رجلها و تبكي : خزي عليه مايتحشمش
يوسف خشلها : خيرك ؟
هناء تبكي ماتبيش ترد عليه
يوسف قرب منها لقاها شادة رجلها : قيمي رجلك نشوفها
هناء عيونها مدمعات : مش مستعجل ! برا شن تبي فيا
يوسف : تكابري حتى و انتي طايحة ؟
هناء نزلت راسها و سكتت
يوسف نحالها شبشبها و شد رجلها من جهة المشط : من هني ؟
هناء هزت راسها بمعنى ايه 😢
يوسف يدلك ف رجلها
هناء عيطت : ااااه 😭
يوسف يشوف لرجلها : بسيطة ؛ لفيها بالكافيليا و ماتتحركيش بيها
هناء تحشمت لانها لابسة خلخال ؛ فكت رجلها و وقفت ؛ قامت القردل و ركبت تعكز
يوسف يشوفلها سخف عليها
هناء راكبة و تبكي من رجلها ؛ تقول ف عقلها
( خزي عليه كله منه 😢 )
يوسف جاها : هاتيه القردل عليك
هناء : حول تو نركبه بروحي
يوسف خداه منها و ركب معاها : و الباقي من بيكمله ؟
هناء تتكلم من راس خشمها : تو يجو خواتي يكملوه
يوسف : تبيني ناخد دور معاكم ؟
هناء زرتها الضحكة
يوسف شبحلها : حييه بتضحك !
هناء شبحتله و ضحكت
يوسف ضحك
هناء مسحت دموعها بيدها و وقفت قدام حوشهم
يوسف : افتحي الباب
هناء : هاته القردل تو ندخله اني
يوسف لقي الباب مردود دفه و خش
هناء : نحي كندرتك 😒
يوسف نحّا كندرته و خش للحمام بيحط القردل
هناء تشوفله بشماتة ؛ تقول ف عقلها ( مدايرلي روحه يتجكتر اهو ف الاخير عطل ؛ يعني لو ماعاندش و وقف لين جف الدروج راهو هذا كله ماصارش 😏 )
يوسف جاها : بري لفيها و ارتاحي ف سريرك
هناء تشوفله بإستغراب
يوسف : خيرك ؟
هناء : اها ؟ لا شي
يوسف حط الظرف ع الطاولة : وين حاطينها ؟
هناء : شن هي
يوسف : الكافيليا
هناء : مانعرفش
يوسف : كيف ماتعرفيش ؟
هناء : تو ندورها
يوسف : غر قوليلي وين و تو نجيبها
هناء : اكيد ف دولاب الإسعافات الأولية ف المطبخ
يوسف : كيف بنعرفه اما دولاب
هناء : تلقى بابا ملصق عليه شعار الهلال الأحمر
يوسف ضحك : جو عمي ... و خش للمطبخ
خشت هناء للحمام تغسل ف وجهها و ايديها
__
يوسف طلع من المطبخ شاد كافيليا و ثلج : وينك
طلعت هناء من الحمام تعكز : نعم
يوسف : قعمزي هي
هناء : علاش
يوسف : خلي نلفهالك
هناء تحشمت : لالا صحيت
يوسف شدها من يدها و قعمزها ع الكنبة : اني السبب ف الطيحة ع الأقل نرضيك
هناء ضحكت : ! Gentleman
يوسف قعمز ع الكنبة اللي بحداها و شبحلها : نحاول نكون
هناء سكتت
يوسف شد رجلها و حطها ع الطاولة يديرلها ف الثلج
هناء تتوجع : اي
يوسف : تحملي شوية ، الثلج حايهون عليك
هناء : به 😔
يوسف ينحيلها ف الخلخال : و هذا معادش تلبسيه
هناء تحشمت و سكتت
يوسف حطه ع الطاولة
هناء تشوف لرجلها و تتوجع : انتفخت 😔
يوسف شبحلها
هناء شبحتله 😢 : و استزرقت
يوسف بصوت واطي : اسف
هناء سكتت
يوسف يشوفلها و عيونه قلوب
هناء تحشمت و وجهها انحمر
هزت رجلها : خلاص نحيه اتثلجت
يوسف تحشم : احم .. نحّا الثلج و قعد يلفلها فيها
هناء تشوفله و ساكتة ؛ تقول ف عقلها ( من جهة يهزب و من جهة تانية يحن ؛ غريب )
____
يوسف كمللها و وقف : ان شاء الله لاباس
هناء ابتسمت : لا يوريك باس
يوسف : ارتاحي اليوم مش لازم تنزلي
هناء سكتت
يوسف مشي جنب الباب : ماتبي شي قبل لننزل ؟
هناء : لالا شكرًا
يوسف يلبس ف كندرته : عفوا
هناء : بالله عليك مدلي تليفوني
يوسف لبس كندرته
هناء شافتله : اه خلاص بلاش
يوسف : وين حاطتيه ؟
هناء : ف داري يشحن
يوسف نحّا كندرته و خش : اما وحدة نسيتها
هناء اشرلته بصبعها
يوسف ضحك : على الساس متع داري ؟
هناء : معناها راك تزعجني
يوسف خش للدار خدي التليفون ؛ شاف للشاشة لقاها حاطة صورتها شعرها مفتوح
طلع من الدار
هناء مدت يدها : شكرااا
يوسف مدهولها : كيف حاطة صورتك هكي
هناء تلخبطت : تليفوني عادي
يوسف : عارف تليفونك ؛ افرضي يطيح منك ولا حد تجي عينه عليه و يشوفك بلا حجاب !
هناء سكتت
يوسف فنص فيها : غيريها
هناء ساكتة ؛ هزت راسها بمعنى به
خدي يوسف الظرف متعه و طلع من الحوش و سكر الباب
هناء ضحكت
_______________________
02:00 م
خشت نجاة للمطبخ ف حوش العيلة : السلام عليكم
ردو عليها : و عليكم السلام
حطت نجاة باكو حلويات ع الطاولة : سامحوني عطلت ؛ اليوم زحمة مش طبيعية
سعاد : معليشي معذورة نجوتة حتى انتي تخدمي و مش فاضية
ازهار شبحتلها ع الجنب و سكتت 😒
نجاة : والله لين راسي مصدع
سعاد : بري ارتاحي
نجاة : وين نرتاح ! بنركب نبدل و نجي اكيد عمي قريب يروح
ازهار : ايه على جية
نجاة : هناء نزلت اليوم ؟
سعاد : نزلت الصبحية فطرت معانا بعدين ركبت ؛ قالت عندها حاجات بتديرهم
نجاة : و اللاّي وين ؟
ازهار : خشت اتكت ف الدار
نجاة سكتت و طلعت من المطبخ
سعاد شبحت لأزهار : ريتيها اووه جايبة معاها حلويات واتيات ؛ شمرت ذرعانها و طيبتهم هي ترا
____________________
سنابل : كيف طحتي ف الدروج ؟
هناء متكية ع الكنبة : نجري ورا يوسف لانه رفسلي و اني انشف طحت
سلسبيل ضحكت : و شن قال لما تكردستي
هناء لاهية ف تليفونها : ركبلي القردل و لفلي رجلي
سلسبيل و سنابل شبحو لبعضهم و ضحكو
هناء شبحتلهم : خيركم تضحكو
سنابل : لا شي ؛ غر نتخيلو ف منظرك كيف طحتي
خشت نجاة للحوش
هناء : مامااا
نجاة شبحتلها انخلعت : خيرها رجلك ؟
هناء : طحت 😢
سلسبيل و سنابل يضحكو
نجاة : كيف طحتي ؟؟؟
هناء : زلقت و اني انشف ف الدروج
جت نجاة تشوف ف رجل هناء : بعيد السو على بنيتي
هناء تتوجع : احيي يا ماما معاش تمسيها
نجاة : بوك شوية و جاي تو يكشفلك عليها
هناء : احيييه
نجاة : و انتي علاش منشفة ؟؟ نشفاته ازهار ولا سعاد !
هناء : تو معقولة نخلي مرت عمي تنشف و انى قاعدة ؟
نجاة علت صوتها : ياخدو دورهم معليشي مش ديما حني ؛ هما يركبوا و يرفسوا و حني انظفو من وراهم ؟؟
_______________
السنوسي خاش للحوش و مدخل العارف : خش ياحاج هي
العارف : وينهم مفيش حد استقبلني
السنوسي : مايندروش عليك وصلت
العارف : كلمهم
السنوسي ينادي : يا سعاااااد
اسماعيل سكر السيارة و خش معاهم
سعاد سمعاته من المطبخ : جو جو .. طلعت تجري من المطبخ
و لحقتها ازهار
سعاد ف الجنان : الحمد لله على سلامتك ، طيب فيك نضت لا سو لا سوية
العارف ابتسم : الله يسلمك
ازهار جت تسلم : الحمد لله على سلامتك عمي
العارف مبتسم : الله يسلمكم و يطول عمركم
جت حلومة : روحت يا حااج
العارف : روحت
حلومة فرحانة : الحمد لله على سلامتك ، نورت الحوش
العارف : منور بوجودكم
السنوسي : هي خلونا نخشو
( و خشو الداخل )
العارف : وين الولاد و الأحفاد ؟
ازهار : الصغار كيف مروحين من المدارس شوية و ينزلو
سعاد : و الولاد مازال ماجوش
العارف : و هنيوه وين ؟؟
حلومة : اكيد شوية و تنزل تراجي فيك على نار
العارف ضحك : كلموها تنزل
ازهار فتحت تليفونها تتصل بيها : تو نكلمها اني
سعاد كشرت وجهها ؛ تقول ف عقلها ( علاش ماسألش على يوسف )
السنوسي : انى نركب شوية و نجي
اسماعيل قعمز : جيبولنا طاصة اميه
__________________
هناء شرين تليفونها ردت : ايوه مرت عمي
ازهار : ايوه هناء !
هناء : نعم
ازهار : جدك جي و يسأل عليك
هناء فرحت : هيا هاني جاية
ازهار : تمام .. و سكرت الخط
هناء وقفت وجعتها رجلها : اااه 😣
نجاة تكلم فيها من الدار : خيرك ؟
هناء : اجديده جي بننزل
نجاة : لالا ماتنزليش برجلك تو تزيد توجعك من الدروج
هناء : نبي نشوفه
طلعو خواتها من الدار
سلسبيل : تبي نقيموك ؟
هناء ضحكت : باش تشقلبوني
سنابل : تو انادو صاحب العملة يجي يقيمك
هناء فنصت فيها : اسكتي تو تسمعك ماما
سلسبيل : اني نزلت باااي
سنابل : راجيني جاية معاك
و طلعو من الحوش
هناء تصيح : استنوني مانقدرش ننزل بروحي 😭
طلعت نجاة من دارها : تو ننزل معاك
____________________________
06:30 م
هناء مقعمزة ف حوش جدها مع العيلة و مادة رجلها
عصام : بندير خيمة كبيرة قدام الحوش و بنسكر الشارع من الطق للطق
العارف : ريح روحك و فكنا من الزحمة و الوجيج
أصيل بصوت واطي : ماك مش هاين عليك تدفع
عصام : والله الا ما نديرها ، ماطلبت من حد يديرلي حاجة كله بنديره بروحي
هناء ضحكت : ايه عصام من حقك
عصام : الواحد بيتزوج مرة ف العمر خلي يدير عرسه مقوم و يتفكره طول عمره
السنوسي : اني عليا الفاتحة
عصام شبحله
اسماعيل خبط صدره : و انى عليا عزومة الغدي كاملة مكملة والله ماتخمم
عصام ضحك : به مليح
و شبح لعماد : هيا اللي بعده
عماد شبحله : شن اللي بعده ؟
العيلة يضحكو 😂
عصام : وصل فيك الدور ، شن بدير ؟
عماد : شن ناقصك انت ؟
عصام : ماناقصني شي ، لكن بالك تطلعلي بموضوع مليح
عماد ضحك بعدين قال : المَوْلد ( التدريجة ) عليا
عصام ضحك : باهي خير من بلاش
محمد ولد عماد : و انى عليا النوبة يا عصام
عصام : اطلع طول
حلومة مبتسمة : يدومكم ليا و نفرح بصغيويرتكم
نجاة : و انى عليا الزمزامات
عصام شبحلها : لالا هلبا هكي معناها العرس جاني بلوشي
نجاة ضحكت : تستاهل
سعاد شبحتلها : ماخترتي الا الزمزامات ؟؟ زايدات 😒
نجاة : خلينا المهم ليك انتي
سعاد تلخبطت
نجاة : و يخي مرات نجيب فرقة مش زمزامات
هناء ضحكت
سعاد : أمال عطلت
ازهار : قالت ديوتي اليوم مش جاية
أصيل : خسارة قبل نبي نعرف شن بتدير لعصام
عصام ضحك : قولو عمي يا كلاب
محمد : مانبوش نكبروك 😂
ازهار ضحكت : اكيد هديتها مليحة معروفة أمال
حلومة : قالت عليها الحلو ف الدخول و المحضر
عصام : امالا اللي حطيتهم اني متع شني ؟؟
نجاة : حق الصالة و العشي
عصام سكت
العارف : هيا انهوا السيرة
عصام شبحله : شنو يا حاج خيرك مرزرز
العارف : شنو ؟
عصام كح : وين هدية ولدك ؟
العارف : ولدي عاطيه حوش
عصام قام حواجبه : اما حوش و اني اللي بانيه و مفرشه بعرقي
العارف : و معلقه ف السقف اوه ؟ ماك بانيه فوق حوش بوك
عصام : تو ربي يرزقني و نطلع منه
العارف : كانش بعد مانطلع منه ف صندوق
( بدو العيلة يقولوله بعيد السو ، بعد عمر طويل و من هالكلام )
حلومة : هيا صلو ع النبي و فكونا من العراك
ردو عليها : عليه الصلاة و السلام
خش يوسف : السلام عليكم
هناء شبحتله و ابتسمت
ردو عليه : و عليكم السلام
عصام : بنطلع و نستقر بروحي و باش حتى نخلي فرصة لغيري
سعاد : من مازال بعدك ؟
عصام شبح ليوسف : مازال يوسف
يوسف : فرصة شني ؟
سعاد فرحت : حصلت حوش يا اوسيفه
يوسف مستغرب : حوش شني ؟
نجاة شبحت لسعاد : غر خلي العريس يتزوج و يتهنىٰ فيه قبل ؛ بعدين فكري لولدك
يوسف يشوفلهم
سعاد : اني نبي نخطبله غر هو يقول باهي بس
يوسف شبحلها : عندك وحدة ف بالك
و كسر عينه على هناء
هناء شبحتلهم و ركزت
سعاد : والله ماكثر ربي غير البنتة انت غر قول باهي و اني نخطبلك ست الستات
يوسف ضحك
حلومة : العيلة معبية بنيات اختار اللي تعجبك
هناء دارت روحها لاهية ف التليفون
سعاد : من العيلة !!!
ازهار : شن رايكم ف أروى ؟؟
هناء ضحكت بِ استهزاء وعيونها ف التليفون
يوسف يشوفلها
اروى خشت : سمعت اسمي
يوسف : هكي رايكم انتو ؟ 😏
هناء شبحتله
سنابل وشوشت سلسبيل : ركزي عليهم
سلسبيل تشوفلهم
حلومة : ايه ايه خود وحدة من العيلة و خلينا عيلة ف بعضنا
أروى فرحت و بدت تبتسم بخجل ☺️
حلومة : اني كان نلقى احفادي كلهم نزوجهم ببعضهم
( محمد شبح لسنابل )
أصيل ضحك : و هناء منو بيها ؟
نجاة شبحتله : تو يجيها سيد سيدكم
هناء شبحتلها و ضحكت
يوسف يسمع و ساكت
سعاد تشوف لأروى و تفكر ف الموضوع
و الجد و العمام ساكتين
حلومة تشوف ليوسف : بنفرح هلبا لو تاخد أروى
يوسف كح و تلخبطت
هناء ماعجبهاش الكلام ؛ حركت يدها باستهزاء : ريت ها السُلالة الملكية اللي ماتبوهاش اتم 😏
و شبحت للتليفون
يوسف انصدم ، شبحلها و قام حواجبه
اروى : هيييه 😳
نجاة فنصت فيها : هناء !
هناء شبحتلهم لقتهم كلهم يفنصو فيها 😒
تلخبطت : نبصر ياعويلة
اسماعيل : مش عيب الكلام هذا ؟ شن جاك ؟
هناء تحشمت : زلقت يا بابا اسفه
العارف اتضايق : نتوقعها من الكل ولا منك ياهناء
هناء متحشمة : حي عليا اجديده زعل
و ناضت بحداه تبوس ف راسه : حقك عليا ؛ هي تسهويكة بس
العارف سكت
هناء ترطب ف الجو : انت عارف اني ماعنديش عليه التلقيح اهوا لكن طلعت بروحها الكلمة
العارف هز راسه و سكت
يوسف : معاش تعاوديها
هناء شبحتله : كله من موضوعك
يوسف سكت .. يقول ف عقله ( زعما شن قصدها بردها ؟ )
عماد جاه تليفون وقف
ازهار شبحتله : نبيك ترفعني لحوشنا
عماد تكنطا : اما حوشكم توا مش وقته
ازهار : ليا فترة معاش ريت امي نبي نمشيلها
عماد : فوتي اليوم مش وقته
بنته روان : علاش مش وقته ؟
عماد شبحلها : عندي مشوار مهم توا
روان : فضي روحك على خاطرها معليشي
عماد فنص فيها : انتي سكري فمك و ماتدخليش
الحلقه الثالثة
( العيلة كلهم شبحولهم )
روان تأشر ع العيلة بيدها : شوف لروحك الله يبارك عويلتك و اماليك كلهم بحداك و كل يوم تشوف فيهم ؛ مش زيها هي اماليها تشوف فيهم مرة ف الوين ! حطها ف طريقك معليشي
عماد تلخبط من كلامها و سكت
روان : تقدر انت تقعد فترة ماتشوفهمش ؟؟؟ أكيد لا !
عماد يفنص فيها
روان شبحت لأمها : هي نوضي ألبسي ماما اهو بيرفعك
أزهار شبحت لعماد
عماد متعفلق : نوضي و ماتعطلينيش
ازهار ضحكت و شبحت لروان : بنت امك .. و ركبت تبدل
روان تضحك : تفضلي ماما ف اي وقت
عماد ساكت
روان شبحتله : ارفعو معاكم احمد فكوني منه
عماد : وينه هو
روان : يلعب بالكلب متعه ف الجنان
حلومة : ملهيه على قرايته الكلب اللي عنده
هناء كشرت وجهها : ووووه ان شاء الله شاري كلب ؟
محمد ضحك : تخافي منه ؟
هناء شبحتله : مانحبهمش الكلاب
روان ضحكت : تي شاريه متع زينة صغيرون
عماد : و النسراف وين ؟؟ قاعد ماروحش اووه !!
روان تكنطت ؛ تدوي مسكرة سنونها : لازم من التشهدير قدامهم ؟؟؟
عماد بصوت واطي : غر يروح بس راسي و راسه .... و طلع للسيارة بيراجي أزهار
روان سكتت و بعتت مسج لخوها محمود ( روح راهو بابا ناويك )
حلومة : روان !
روان شبحتلها
حلومة : كيف تكلمي بوك بالأسلوب هذا مش عيب ؟؟
روان : بصراحة وله ! ولدك هكي يبي
حلومة انصدمت 😳
محمد خوها فنص فيها : روان ! 😠
روان تتكلم بصبعها : معقولة ليها ثلاثة أسابيع مارتش امها و مايبيش يرفعها ؟
حلومة : امها مابيهاش و اكيد تكلم فيها ف التليفون
روان : تو انتي تقدري ماتشوفيش عمتي أمال ثلاثة أسابيع ؟؟ ماهي كل يومين نلقوها مدرسة هني !! و ولادك كل يوم لازم يخشولك و تشوفي فيهم !! ولا حلال عليك و حرام على ماما و اماليها ؟؟
حلومة تكنطت و سكتت
العيلة مصدومين 😳
أروى : كان تسمعك ماما 😒
روان شبحتلها : عادي ماقلتش حاجة غلط
سلسبيل تضحك : ايوا حني روان 👏
السنوسي هز راسه : عليك جيل مغبر معاش يعرف يستحي
اسماعيل و عصام يضحكو 😂
حلومة متكنطية : الحق فيا اني اللي دويت مع وحدة لسانها ملوي على رقبتها
روان و هي طالعة من المربوعة : هكي تبو و شوية فيكم
يوسف ضحك : حي عليها اهيا !
سعاد : كاني امها نديرلها الفلفل ف شورابها
هناء ضحكت : فضيعة البنت هادي ، لسانها اطول منها
يوسف شبحلها : منين بتتسلفه ؟
هناء شبحتله و قامت حاجبها : كان جونا مليح !
يوسف ضحك
العارف وقف : انى تاعب و بنخش نتكّا ، تصبحو على خير
سلسبيل : من توا ؟؟
العارف : ايه .. و مشي لداره
سنابل تشوفله : راك تعتر 😃
هناء ضربتها بالمخدة : تحشمي
سنابل ضحكت : يتحرك ب الريموت
أصيل : اعطوه يومين و تلقوه زي الحصان
محمد شبح لأصيل : شن صار ف السيارة ؟
أصيل : شوية و ماشي نجيبها
محمد وقف : باهي نوض نحطك ف طريقي
أصيل وقف و طلع هو وياه
السنوسي و اسماعيل وقفو و طلعو من المربوعة
عصام وقف و شبح لأمه : اني ساهر مع صحابي الليلة بنعطل شوية
حلومة : مربوحة
عصام و هو طالع : سلامات
( قعدو نجاة و سعاد يهدرزو مع حلومة )
يوسف قعمز جنب هناء
هناء شبحتله : مبروك السيارة
يوسف تلفتلها : الله يبارك فيك
هناء : لقيت احلى من سيارتي ؟
يوسف ضحك : من قالك اني شريت
هناء : سألت عليك عصام مع الظهرية قالي انك ماشي تشري ف سيارة
يوسف : كنتي تبي حاجة ؟
هناء : لا غر فقدتك لما روح اجديده
يوسف ضحك : فقدتيني ؟
هناء تلخبطت : الصبح ماحسبتكش ماشي بتشري سيارة
يوسف : صار الموضوع خت فت
هناء : على اساس كنت حاتقولي يعني ؛ وانت الصبح مش طايقني
يوسف يشوف لعيونها و بصوت واطي : عادي نقولك علاش لا
هناء ابتسمت و سكتت
سلسبيل مقعمزة مقابلتهم : غر شنو صاير ف الدنيا !!
يوسف شبحلها
سلسبيل : و اخيرا ريناكم تهدرزو زي الناس
هناء : باهي غر ماتنُقيش
يوسف ماعدلش عليها و شبح لهناء : شن صاير ف رجلك
هناء شبحتله : الحمد لله
سلسبيل توشوش ف سنابل : اللي صاير مش طبيعي وله
سنابل تشوفلهم : ايه رسمي ؛ كان مايطلع قايمها ف الدروج و بدت تحبه
و ضحكو هما الزوز بصوت عالي : هههههههههههههههه
يوسف شبحلهم : هييه الصوت
سلسبيل : سامحنا خونا ازعجناك 😂
يوسف شبح لهناء : يعني خف الوجاع ؟
هناء : ايه شوية
سنابل توشوش : شوفي توا شن بنقول
سلسبيل : شنو ؟
يوسف : نوضي نرفع نعاينك
هناء تشوف لرجلها ملفوفة : مش مستاهلة
يوسف : نديرولها كشف و صورة
هناء : شافهالي بابا قال مافيش كسر
جت سنابل بحداهم : تعرف رجلها ولت زرقاء هلبا ياروحي
هناء انصدمت و سكتت
يوسف شبح لهناء : والله جديات
سنابل : لما جينا لقيناها تبكي و تعض ف المخدة من الوجاع
يوسف سكت
سنابل : و تقول اااااه شوقني الدروج و تنشيفه يا ماماااااا
هناء تفنص فيها 😳
يوسف شبح لهناء : لما طلعت خليتك تمام ؛ حسيت لما دلكتلك بالثلج برد عليك
سنابل انصدمت و عيطت : دلكتلهااا !!!!
هناء تحشمت
يوسف فنص فيها : خير امك تعيطي !
سنابل سكتت و مازال مصدومة
سلسبيل تضحك من بعيد 😂
يوسف يشوف لهناء : كيف صار ؟ تحركتي بيها ولا شنو
هناء تلخبطت : اها ؟ لالا بعدك زاد الوجاع بس
سنابل شادة ضحكتها و مركزة مع يوسف
يوسف : سلامتك و نتأسف منك مرة تانية
هناء ابتسمت : ولا يهمك مكتوب
جت أروى : يوسف
يوسف شبحلها : نعم
أروى بصوت ناعم : نبي نفتح حكة السبول ماقدرتش ؛ عادي تفتحهالي ؟
يوسف ضحك : عادي
و مشي معاها للمطبخ
هناء تشوفلها : ماقدرتش تفتح الحكة !! شن هـ التزعبين
سنابل : تتدلع عليه شورها ماصدقت
هناء قلبت وجهها : مبردها
سنابل تشوفلها و تضحك
هناء شبحتلها : علاش كذبتي عليه 😠
سنابل : باش يأنبه ضميره لان هو السبب
______
يوسف فتح الحكة : تفضلي هي
أروى : شكرًا ☺️
يوسف وقف بحداها : عفوا
أروى اتطيب ف السبول : شن جوك
يوسف : مليح شن مدايرة
أروى : الحمد لله ، غر القراية مصدعتني
يوسف : شن تقري توا
أروى : ف الطبيات ؛ قاعدة سنة أولى اعداد
يوسف : باهي كويس ، بالتوفيق
أروى : و انت امتى بتتزوج
يوسف استغرب : شني ؟
اروى تلخبطت : قصدي امتى ناوي تخطب اكيد فيه وحدة ف بالك
يوسف سكت
خشت سلسبيل و عيطت : شن اديروووو
أروى : خلعتينييي
يوسف شبحلها : شن قصتكم مع العياط انتي و اختك ؟؟؟
سلسبيل : خيركم هني بروحكم ؟؟
أروى : نطيب ف سبول خاطري فيه
خشت روان : شن ريحة الشياط هادي ؟
يوسف تلفت للطنجرة : شكله لصق
أروى شبحت للطنجرة : حييي انحرق مني
روان بإستهزاء : تقري ف الجامعة و ماتعرفيش اتطيبي سبول ؟؟؟
اروى انحرجت
روان : انى اللي صف السابع نطيب ف فطور خوتي بروحي
يوسف : علميهم يا روان
اروى منحرجة : اكيد نعرف غر لهيت ف الهدرزة
يوسف طلع للجنان يدخن
سلسبيل : بتعاودي تاني ؟
اروى تكنطت : لالا خلاص
و شبحت لروان : علاش التلقيح قدام الولد ؟؟
روان قامت حاجبها : تو تحشمتي من كلامي و ماتحشمتيش من روحك و انتي حارقة السبول !!
و طلعت من المطبخ
اروى متعفلقة : لسانها يبي القصان الفرخة هادي
سلسبيل ضحكت : مربية العمارة 😂
_________________________
12:30 ص
هناء مقعمزة تهدرز مع بوها و امها ف دار المعيشة
اسماعيل : قداش يوم ف الاسبوع
هناء : حلقة كل اسبوع
اسماعيل : باهي على شني البرنامج !
هناء : مواضيع عامة يعني كل حلقة موضوع و نتناقشو عليه
نجاة ضحكت : بتولي مذيعة ف الراديو ؟
هناء ضحكت : لو بابا وافق
اسماعيل : ديري اللي يريحك ؛ بري و تقابلي معاهم و لو لقيتي الجو يناسبك عادي
هناء فرحت : شكرًا هلبا ؛ كنت عارفة انك مش حاتوقفلي فيه الموضوع
اسماعيل : عفوا ؛ لكن كيف بتمشي برجلك
هناء : مازال موعد المقابلة يوم السبت
اسماعيل : باهي كويس ؛ و كيف حاستيها توا
هناء تشوف لرجلها : باهية خير من الصبح
نجاة : باهي اللي درتيلها ثلج كان هذا زادت
هناء سكتت
اسماعيل وقف : تصبحو على خير
هناء : وانت بخير
خش اسماعيل لداره بيرقد
هناء شبحت لأمها : غدوا العشية بنطلع مع صاحباتي متع الجامعة
نجاة : كيف بتمشي برجلك
هناء : عادي تو تبدا باهية
نجاة : و انى غدوا مفكرة نطلع بخواتك يكملوا شري حاجاتهم
هناء : خليها بعد غدوا نبي نمشي معاكم و نشري
نجاة : تو نشوف .. و ناضت لدارها
هناء جاها اشعار فايبر شافاته لقاته من يوسف ابتسمت
يوسف كتب : اهلين
هناء ردت : اهلين بيك
يوسف : خيرك ساهرة لتوا
هناء : النوم طاير ؛ و انت علاش ساهر
يوسف : نحب نسهر من يومي
هناء : ايه صح نسيت 😅
يوسف : شن بتديري غدوا
هناء : ف الصبح قاعدة و ف العشية عندي طلعة مع صاحباتي
يوسف يقول ف عقله ( اكيد ماشية بتتلاقى معاه و دكتها ف صاحباتها )
هناء كتبت : و انت ؟
يوسف رد : بنبدا دوام من غدوا
هناء : غدوا خميس علاش ماتبداش من الأحد ؟
يوسف : عادي مافيش فرق
هناء : ربي يعاونك
يوسف : الله يسلمك ،، تصبحي على خير
هناء : و انت بخير
سكرت تليفونها و شدت الريموت تتفرج ع التلفزيون
______
يوسف سكر تليفونه و قعمز جنب بوه يتفرج ع الأخبار
السنوسي شبحله : غدوا اول يوم ان شاء الله ؟
يوسف : ايه ان شاء الله
السنوسي : و انت طيب
يوسف : امالا وين امي
السنوسي : انظر شن تقربج ف المطبخ
يوسف سكت
السنوسي : قولي يا ولدي
يوسف : انعم
السنوسي : شن رايك تشري شقة ولا قطعة ارض تحط فيها فليساتك خير ماينصرفوا
يوسف : والله حتى اني فكرت فيه الموضوع قبل بنشاورك
السنوسي : والله زين العقل
يوسف : توا نسأل كان فيه شقة قريبة احسن فكني من الاراضي تيرو و بعدين فيها بني و تشحيط قصة
السنوسي : حسب ماسمعت ان ولد عاشور بيبيع شقته كان هدا شوفها
يوسف : علاش بيبيعها
السنوسي : عيلته كبرت و اتضايق الراجل قال بيبيع و بيستاسع
يوسف : عادي به ، لكن اكيد تبي دورة
السنوسي : تبيلها صيانة و تشطيبات
يوسف : ان شاء الله فيها نصيب
جت سعاد شادة فاكهة : شنو امالا حطيتها ف بالك
يوسف شبحلها : بوي دخلها ف راسي
سعاد ابتسمت و قعمزت : هي ف الزين باهية لكن في اليدين لا يا وليدي
يوسف استغرب : زين شني و ايدين شني ؟
سعاد : نقصد على اروى
السنوسي ضحك : تي شن تقولي يا مرا حني ندوو على شقة بيشريها يوسف
سعاد فرحت : يا نهاري مبروك ، ان شاء الله بالصحة عليك
يوسف ضحك : قاعدين ندوو ماصار شي مازال
سعاد : باهي قولي ؛ شن رايك فيها بنية عمتك ؟
السنوسي شبحله
يوسف هز راسه : لالا ماتمشيش معاي فوتيها
سعاد : هي صح مش متحجبة لكن انت حجبها و كان ع الفلاحة و التطييب تو تتعلم
يوسف سكت
السنوسي : بوها حصلة فكينا منه ، حني ماعطيناه أمال الا بالسيف تبي تزيدي تلصقينا فيه ؟؟
سعاد سكتت
يوسف وقف : تصبحو على خير
سعاد شبحتله : خود تفاحة ولا موزة !
يوسف : صحة صحة ... و مشي لداره
سعاد مدت للسنوسي تفاحة
السنوسي خداها منها : الحمد لله اللي الوالد ناض من مرضته و بيمشي العرس على خير
سعاد : اي الحمد لله
السنوسي : تو بنشوف موضوع الفاتحة
سعاد : انت مالقيت ماتقول دبست روحك فيها
السنوسي : خوي الصغير معليشي لو ساعدته ف حاجة
سعاد : هو زي وليدي حق لما خشيت عليكم كان عمره ثلاثة سنين
السنوسي : امالا علاش تنقي توا
سعاد : ماهو بتكلفك
السنوسي : لالا مش هديكا التكلفة
سعاد : و هديكا نجاة ماختارت الا الزمزامات ، هدا فاش فالحة الا ف الدوة الفارغة
__________________
سنابل تتكلم ف التليفون : مانقدرش ننزل توا
آدم : تي نوقف قدام الحوش خودي مني الشكارة و خشي
سلسبيل : قولي باهي و راس امك جعااانة
سنابل نزلت التليفون و فنصت فيها : تحشمي يا حيوانة يسمع فيك
آدم : الووو
سنابل ردت التليفون لوذنها : باهي
آدم : قداش وحدة انتو
سلسبيل ملصقة وذنها ع التليفون : خمسة ؛ خمسة حني
سنابل عطتها كف
آدم ضحك : ماشي ؛ اني ف القهوة اللي ف شارعكم خمسة دقايق و نكون عندك
سنابل : اوكى تمام
آدم : تشاو
سنابل : باي
و سكرت التليفون : حشمتيني يا عار ديما وانتي جعانة
سلسبيل : تبي تفوتي علينا شاورما ياغبية ؟
سنابل : افرضي يشوفني حد و انى خاشة بالشكارة ؟
سلسبيل : ألبسي المصلية و حطيها تحتها
سنابل : بالك محمد يشوفني و يفضح بيا المرة هادي
سلسبيل : تو ننزل معاك
سنابل : انتي عسيلي ف الدروج ؛ و كان حد من الولاد نزل ديريلي تشريينة
سلسبيل : به
طلعو على روس صوابعهم و فتحو الحوش
لمحتهم هناء من الدار استغربت
_____________
عماد يكشخ على صغاره : نوضو ارقدو وراكم مدرسة الصبح
أحمد يتفرج ع التلفزيون : باهي يتم الرسوم هذا بس
محمد مقعمز و فاتح الفيس : راك كبرت على جو الرسومات
روان وقفت و شبحت لبوها : حقا نبيك تعطيني فلوس
عماد شبحلها : فلوس لشني
روان : حق القفطان متع العرس
عماد : ماهو عندك متع العيد
روان علّت صوتها : اما عيد يا بابا اكيد تبصر
محمد ضحك : اما هو المفرفر ؟ 😂
عماد : مانبصرش قاعد يجي عليك البسيه
روان : اولاً مالبستش قفطان ف العيد و ثانياً شن منظري من دون بنات العيلة مانشريش ؟
عماد : زمان عمتك أمال قفطانها متع العيد كانت تلبس فيه ف كل مناسبة ؛ ف العيد و في الميلود و في عيد الطفل و ف الأعراس كلهم ؛ و يقعد زي ماهو كأنه جديد
روان : ههههههه هديكا عمتي مش اني
محمد لاهي ف الفيس : حارمها جدي مسكينة 😂
روان تضحك : شكلها
عماد فنص فيها : بري ارقدي و بلا كثر دوة
روان : مانيش راقدة لين تعطيني كلمة
عماد : تي كلمة شني
روان : نبي حق القفطااااان
عماد : مش شريتي ف الصيف اللي فات و لبستيه ف عرس خالتك ؟
روان : لا هداكا شافوني بيه خلاص
عماد يتأفف : قداش تبي
روان : كُح الف جني
محمد انصدم و شبحلها 😳
عماد عيط : شنو هو ؟؟؟
روان : خيرك رعشت ؟ نبي ناخد زوز
محمد : توا كان قفطان واحد !!
روان : واحد للدخول و واحد للمحضر ؛ و اللي بيفضلو بناخد بيهم الكنادر و الاكسسوارات
عماد مصدوم : الف جني ياللي ماتتحشميش ؟ فرخة مفعوصة قاعدة ماطلعتيش من الدحية !!
روان تكنطت : والله زيني زي باقي البنات ؛ من قالك تجيب بنت ؟؟ البنات كل مايكبرو طلباتهم تزيد تكبر ؛ حط الشي هذا ف بالك
محمد يضحك 😂
عماد : الف جني هلبا يابنتي
روان تتكلم بصبعها : شن تحساب انت ! راهو توا اقل اقللل قفطان ب 300 ؛ و هذا يعتبر ماينفعش و مش حانرضىٰ بيه ؛ و اني بناخد زوز فا احسبهم انت
عماد يشوفلها و مصدوم
روان : و مازال حق المزين
و تلفتت ع الجنب : ايييي نسيته حتى هو
محمد يشوفلها : ماشاء الله 😟 خشيتي حتى ع المزينات ؟
روان شبحتله : شعري طويل من هي اللي بتفضالي بيه
عماد : بري ارقدي يا روان ماتخليش ضغطي يركب
روان : هيا اعطيني كلمة من توا لان بنطلع مع بنات عمي اسماعيل بنشري
عماد سكت
روان : يعني نلقاهم غدوا ع الشكماجة ؟
عماد : الف جني هلبا و اني كيف حاط الف و خمسمية ع السيارة
روان : هاك قلتها ع السيارة مش عليا اني
عماد عقد حواجبه : ماكم تتحركو بيها
روان : انت تتحرك بيها ، كان ع المدرسة نقدرو نشتركو ف باص ! و حني عندنا سيارة محمد لو استحقينا ؛ يعني السيارة انت اللي تتحرك بيها
محمد : روان تحشمي شوية
عماد نتش لسانه و سكت
روان : تفاهمنا ؟؟ غدوا نلقاهم واتيات ؟
عماد : ان شاء الله خير
روان ضحكت : تصبح على خير .. و خشت للدار
عماد متعفلق : نوض يا احمد تمرقد خير مانخبطّك
أحمد ناض يتأفأف
محمد يضحك : الف جني ههههه
عماد شبحله : خوك وين ؟
محمد : من اللي روح رقد طول
عماد : ماعنده وين هارب المسخ تو نوريه
محمد ناض و خش لداره
طلعت ازهار من الحمام : خيرك تكشخ
عماد شبحلها : معاش تخلي فرختك تخالط بنات اسماعيل
ازهار استغربت : علاش خيرهم
عماد : ايهبعو بيها من توا ، تبي الف جني باش تشري شلاتيت العرس
ازهار ضحكت : و مازال حق قفطاني اني
_____________________
سنابل واقفة ف الدروج و توشوش : آدم عطل
سلسبيل توشوش : اكيد على جية اصبري
سنابل شرين تليفونها : اهوا جي
سلسبيل : مادابيك خت فت
سنابل : به .. سكرت عليه و طلعت تجري
قعدت سلسبيل واقفة و تشوف فوق
_____
سنابل فتحت باب الشارع : آدم
آدم قرب منها و مدلها الشكارة : اهلين
سنابل خدتها منه : شكرا
آدم : عفوا
سنابل : هي باي
آدم : غر خليك لحظة
سنابل : نعم
آدم : .....
_________
سلسبيل واقفة لوطه ف الدروج تراجي : وينها شورها ماصدقت
فجأة تسمع صوت حد نازل
خافت و طلعت تجري لسنابل 🏃
_______
سنابل : ههههههه قصدك حلوة حتى بالمصلية
آدم : حتى تلبسي خيشة ف عيني احلى من القمر
سنابل تضحك : الله ع الليبي لما يكون رومانسي
سلسبيل جت تجري : خشي يا قرده فاتحة هدرزة ؟؟؟؟
سنابل انخلعت : هييييه .. و سكرت الباب ف وجه آدم
سلسبيل شدت سنابل من يدها تكر فيها
سنابل مخلوعة : مني اللي نزل
سلسبيل : مش عارفة
( و خشو تحت طاولة متع عشرة كراسي ف الجنان و لبدو )
______
طلع عماد للجنان ؛ جبد كرسي و قعمز ف الطاولة
سلسبيل و سنابل خافو 😲
شدو ايدين بعضهم و سكتو
فتح عماد تليفونه و اتصل ...
سلسبيل توشوش من تحت الطاولة : وين الشاورما ؟
سنابل عطتها كف خفيف و توشوش : سكري فمك يا حيوانة
سلسبيل تشوف للرجلين : زعما مني ؟؟
سنابل ترعش : مش عارفة ؛ كان مايشوفنا
سلسبيل : الضي مطفي مش حانبانو
عماد يتكلم ف التليفون : ايوا
سنابل فنصت ف سلسبيل : ع م ي 😲
سلسبيل عضت فمها و فنصت
عماد : هذا وين قدرت نطلع ... ايه ، كيف حالك ؟
سنابل رمشت عيونها بسرعة و ركزت معاه
عماد : والله دمي انحرق من الفرخة اللي عندي معاش نقدرها
سلسبيل توشوش : هذا ف من يكلم ؟
سنابل فنصت و تقوللها اششش بصبعها
عماد : خليك مني توا و قوليلي كيف اخبارك ؟ .... لا وين ! مافيهاش كيف نجيك توا
سلسبيل انصدمت : يخون فيهااااااا 😲😳
سنابل سكرتلها فمها بيدها : اسسس
______
هناء : وين طلعو ف هالليل ؟
و فتحت تليفونها تتصل بسنابل ...
سنابل حست بتليفونها يهز لقتها هناء تتصل ؛ سكرت عليها
هناء اتصلت بسلسبيل ...
سلسبيل شافت تليفونها سكرت عليها و بعتتلها مسج ( حني ف الجنان شوية و نجو )
هناء قرت المسج : ديما بعمايلكم ، كان مايطلع حد و يعلق عليكم
__
عماد يتكلم : ان شاء الله ياقلبي
سنابل بصوت واطي : يعطيك سكتة ف قلبك 😒
عماد : اني تو نقول بنسافر مع صاحبي ناصر عشرة ايام لتونس
سلسبيل توشوش : بنعيططططط 😭
سنابل تندب ف وجهها و توشوش : تي اسكتي ياحمارة .... دارت تليفونها وضع طيران و فتحت التسجيل
سلسبيل توشوش : لاااا
سنابل تقوللها اسس بصبعها
عماد : امس مشيت ريت الشقة و تفاهمت مع صاحبها ع الإيجار
سنابل تسجل فيه 🔴📱
عماد : انتي ديري حفلتك و اني نجيك ف الصالة و نروحو طول
سنابل مصدومة تقول ف عقلها ( حي على امه الكلللب 😲 )
سلسبيل شدت راسها بِ ايديها و غمضت عيونها
_________________
بعد ساعة 🌹
هناء انشغلت : هادو اكيد مدايرين فالطة .. ناضت فتحت الروشن و طبست ع الجنان مالقت حد ؛ الطاولة مابانتش عليها
سكرت الروشن و نزلتلهم
_________
سنابل سكرت التسجيل و نحت وضع الطيران
سلسبيل توشوش : علاش سجلتيه ؟
سنابل توشوش : توا نقدر نفضحه بالثابت الكلب
سلسبيل : اني اعييت نبي نركب
سنابل : الشاورما نحس فيها قرصت و هداكا من بكري يتصل بيا ؛ وصلوني رسايل المكالمات الفائتة
سلسبيل سكتت ؛ شافت تحتها لقت عودة رقيقة ؛ شدتها و قعدت تنخص ف عمها من رجله
عماد يحك ف رجله و يهدرز ف التليفون
سلسبيل بصوت واطي : تي نوض اركب يا دراه رجليا يبسو
سنابل تضحك : ناكلو هني و خلاص
سلسبيل : لالا نبي نتربع ... و تنخص ف عمها من صوابعه
عماد قام رجله يحك فيها : احيييه شورها ناموسة تنخص
هناء نزلت و فتحت ضي الجنان
عماد انخلع و سكر التليفون
هناء طلعت لقاته مقعمز : عمي ؟؟
عماد وقف : خيرك شن نزلك
هناء تلخبطت : سمعت صوت غريب قلت نشوف شني ، لاني كنت عند امّيمه
سلسبيل : و اخيرا جت و حلحزاته ياريتنا كلمناها من بكري
سنابل تبيّت من تحت الطاولة : شكله بيخش
عماد : بالك سمعتي الباب لما انفتح
هناء اتدور ف خواتها بعيونها : عصام هني ؟
عماد : مش عارف لاني لقيت الباب مفتوح
هناء سكتت
عماد خش معاها و سكر الباب
___
سنابل : سكر الباب !!!
سلسبيل : نخلوه يركب و نكلمو هناء تفتحلنا
___
عماد : هي اركبي
هناء : لا مرات نبات لوطه
عماد سكت
هناء : تبي حاجة عمي ؟
عماد : لالا .. تصبحي على خير
هناء تشوفله : وانت بخير
ركب عماد لحوشه و هناء فتحت الجنان بالشوية و طلعت
طلعو سلسبيل و سنابل من تحت الطاولة
هناء انصدمت : شن اديرو 😳
سنابل اتدخل فيها : خشي تو نحكولك
هناء : بالشوية رجلي 😩
خشو معاها البنات و وقفو لوطه ف المدخل متع حوش جدهم
_________________________
يوسف فتح الحوش و طلع
لقي عماد راكب لحوشه : عمي ؟
عماد تلفت و شبحله : اه نازل ؟
يوسف : ايه بنعكس ف الجنان
عماد : ماشي تصبح على خير
يوسف : وانت بخير
عماد ركب و يوسف نزل
___
هناء انصدمت : هيييييييه 😱 ؛ بجدياااات !!
سنابل : تي اسكتي النهار الاحرف
هناء مصدومة : و ربي طيحه ف ايديكم ؛ ابصر من داعي عليه
سنابل : تو نوريه الماخدة على مرته شن شكلها
هناء سكتت و تلفتت ع جنب مصدومة
سلسبيل : ريتيه الخاين النسونجي
يوسف : من هو الخاين النسونجي ؟
البنات انخلعوا 😲
سنابل دارت الشكارة ورا ظهرها تحت المصلية
يوسف : طلعي شن دسيتي وراك
سنابل تلخبطت : شي
سلسبيل : شن هالعمارة اللي مايرقد فيها حد
يوسف عيونه ف هناء : غر ارقدو انتو
سنابل : باي .. و فنصت ف سلسبيل
سلسبيل فهمتها و ركبو مع بعض يجرو
هناء كيف بتركب : راجوني
يوسف : استني نبيك
هناء شبحتله : نعم
يوسف تلخبط و سكت
هناء استغربت : تبي حاجة ؟
يوسف : شن كنتو اديرو برا ؟
هناء تلخبطت : ماكناش برا
يوسف : والله !!
هناء : كنا عند امّيمه
يوسف : و من امتى سنابل متحجبة ف الحوش ؟
هناء : بالك خطرلها تتحجب 😅
يوسف سكت
و هناء سكتت
يوسف حك شعره : عصام قاعد ؟
هناء : امبكري قال بيسهر مع صحابه
يوسف سكت
هناء : تصبح على خير
يوسف : و انتي بخير
خشت هناء لدار الدروج و ركبت ؛ و يوسف وقف يشوفلها
هناء راكبة تقول ف عقلها ( معقولة عمي بيتزوج على مرته بعد هالعمر ؟ ... حرام عليه مرته والله ماتستاهل )
يوسف يشوفلها و يقول ف عقله ( لازم نلحقها غدوا و نعرف من هو اللي كانت تكلم فيه الصبح )
______________
سلسبيل : كيف بنديرو توا ؟ مرته لازم تعرف
سنابل : خلي تجي هناء و نسألوها كيف
سلسبيل : فكينا من آرائها تو تقول اسكتو و فكونا من المشاكل
سنابل : ريتي يوسف كيف كان يشوفلها توا
سلسبيل ضحكت : انتي اقعدي ركزي ع الناس و خلاص ؛ راك تركزي على روحك
سنابل : كيف
سلسبيل : ديري الحولة توا
سنابل ضحكت
خشت هناء لدار خواتها و سكرت الباب : سمعوني التسجيل بسرعة
سلسبيل فتحت شكارة الشاورما : خلي ناكلو قبل
هناء تشوف للشكارة : هادي منين !
سنابل : آدم جابها هذا علاش نزلنا
هناء شدت وجهها : ماتخافوش !!!
سلسبيل : المهم بطنا يا ماما
هناء : اعطوني ناكل
سلسبيل خدت زوز : اني هادو ليا
سنابل : طارت النية من الماكلة
هناء : اخر ماتوقعت من عمي ، طلع مايتحشمش
سنابل : بنفضحه غدوا
هناء : لاااا نهارك
سلسبيل ضحكت : قتلك فكينا منها
هناء : علاش تنكدي علينا ف العرس ؟
سنابل سكتت و فتحت الشاورما تاكل
سلسبيل : عندي فكرة
سنابل : شن هي ؟
سلسبيل : نهددوه و ناخدو منه فدية
سنابل ضحكت : حق ، نطلعو منه مصروفنا
هناء : مصح وجوهكم حرااااام 😠
سلسبيل كشرت وجهها : اهي بدت الشيخة فتنة
هناء خبطتها على ظهرها : حيوانة
سنابل : غر خلونا ناكلو و بعدين ساهل
هناء شبحتلها : هذا غر النية طارت
سنابل تاكل : و النبي علاش نرعش ف روحي و هو يبي يتزوج ! شن دخلني فيه
سلسبيل ضحكت : لكن لازم نقرصوه و ناخدو حق ازهار
سنابل : كان نقولو لروان تاخد حق امها ثالث و مثلث
____
طلع اصيل من داره سمع صوت خواته ف الدار مشالهم
هد الباب و خش : علاش فايقااات لتوا ؟؟
البنات انخلعو 😲
سلسبيل : طق عَ الباب يا حمااار
اصيل فنص فيها : شن قلت عليه الكلام اهوا 😠
سنابل : برا ارقد و بلا جو ابو شهاب ياراجل
اصيل : منين الشاورما هادي
البنات تلخبطو
هناء : اني شريتها
اصيل : امتى صار ؟ و خيركم ماتعزموش ؟
هناء : شريتها من الظهر و هونا اجديده روح و ماركبناش بكل ؛ قلت توا جي وقتها
اصيل قعمز و خدي وحدة من الشكارة : شكلها مليحة
سنابل تاكل : مش عادية
اصيل شبح لهناء : منين خديتيها ؟
هناء تلخبطت : تي كول توا شن تبي فيها منين
اصيل : باش لو عجبتني ناخد منها ف الجديد
هناء شبحت لسنابل
سنابل : القهوة اللي ف راس الشارع
اصيل تقزز : ان شاء الله متع عبسي الخمرودجي ؟ 😖
هناء فنصت 😳
سلسبيل تاكل : ان شاء الله فيها لحم قناتش بناكلووو
سنابل تلخبطت : لالا التانية
اصيل : ف شارعنا فيه قهوة وحدة متع شاورما
هناء : تي كول يا اصيل ماتطلعهاش من النية 😤
اصيل فتح الشاورما و بدي ياكل
____________________
يوسف مقعمز ف الجنان يدخن و يفكر ( ردها امبكري مش بلاش واضح تكنطت و ماعجبهاش الكلام .. لازم نعرف مرتبطة ولا لا )
خش عصام بالسيارة للقراج وهو يتكلم ف التليفون
عصام : كيف وصلت للحوش
مرام خطيبته : اوكى يا روحي اول ماتخش لدارك كلمني
عصام شبح يوسف مقعمز : كانش بعد نص ساعة
مرام : اوكى
عصام : سلام
سكر الخط و نزل من السيارة
يوسف شبحله : ها عصوم
عصام : شن الأمور
يوسف : ماشية
عصام جبد الكرسي و قعمز : خيرك بروحك
يوسف مدله سبسي : نخمم هههههه
عصام ضحك و ولع منه الدخان
__________________
____________
تاني يوم
02:30 م
العارف مقعمز ف الشارع قدام حوشه ؛ يتشمس و ايقيّد ف احوال الماشي و الجاي
طلعله أحمد ولد عماد : اجديده خش تغدا
العارف شبحله : شن الغدي
أحمد : كسكسي بالعسلوز
العارف وقف
أحمد شد حديدة طويلة و بدي يلعب بيها
العارف يكشخ : لوح يا فرخ
أحمد موقفها على ايده : شوف اهيا اجديده
العارف : تي لوح من ايدك تو اتطيحها ع السيارة
أحمد قاعد شادها و مايسمعش ف الكلام
العارف دمه انحرق : لوح من ايديك خير ماناديلك بوك
أحمد يحذف ف الحديدة فوق و يتلقىٰ فيها : تقدر اديرها الحركة اهيا ؟؟
العارف يعيط : عمااااد ؟؟؟
أحمد بإستفزاز : بابا فوق مش حايسمعك
العارف جاه بيشده : تعالى
أحمد هرب منه : ماتقدرش تشدني 😛
العارف يعيط : عماااااد
عماد سمع صوت بوه نزل
أحمد يلعب بالحديدة : برا خش تغدا و اني نكمل لعب و نجي
العارف يعيط : يا عمااااد
أحمد يحذف ف الحديدة فوق : خيرك عششت ف عماد ؟؟ توتر فيا يا اجديده
العارف : خلي يجي يربيك
أحمد حدف الحديدة فوق ، بيتلقاها ؛ طاحت منه و جت على مرش السيارة تكسر
العارف : كسرته اووه ! تهنيت عليه ؟؟؟
أحمد خاف : حي عليا من بابا 😰 بالله عليك ماتقولاش
عماد طلع : شن الصوت هذا ؟؟
لقي مرش سيارته مكسر انصدم : من كسره ؟؟؟
احمد يرعش و وجهه مقلوب
العارف : فرخك طيح عليه الحديدة و اني مشيط ريقي من بكري نضبح عليك
عماد شبحله و كيف جاي بيضربه
أحمد تخزرط و خش يجري لحلومة يعيط : يا امّيمه يا امييماااا ؟؟؟
(((( الجملة هادي فكرتني بأحلى ايام ، الله الله 💔 ))))
حلومة جاته مخلوعة : خيرك ؟؟
أحمد لبد وراها و يبكي : بابا بيضربني
حلومة : خيرك شن مداير ؟؟
خش عماد متعفلق : وين مشي الكلب ؟؟
أحمد يبكي : اسف اسف بالله عليك خلاص
عماد يجبد فيه من ورا حلومة : لابدلي وراها تحسابني مش حانضربك ؟!
حلومة تجبد ف احمد : والله ماك ماسه الله
عماد متعفلق : حولي يام من قدامي
احمد يبكي : والله ماعاد نعاودها 😭
حلومة غطت على احمد بِ ايديها : مش شوق مادرتو انت و خوتك زمان ؟؟ معليشي سامحه
عماد : كسرلي مرش السيارة المسخ الله اعلم قداش بنحط ف امه
حلومة : معليشي ياخد سوه
عماد : سو شني يا امي حولييي
احمد قعمز يبكي راعش من بوه
حلومة مغطية عليه بيديها و تضحك : خلاص اضربني اني ف مكانه
عماد سكت و قعد يفنص ف احمد
أحمد سكت و يمسح ف دموعه
حلومة : على خاطري هالمرة فوتهاله
خش العارف : خليه يربيه باش ف الجديد يسمع الكلام
حلومة شبحتله : شوف الوليد شن صاير فيه ؛ قلبه قريب يطلع من الرعشة
عماد سكت و ركب لحوشه
احمد ضبطها : بنبات عندك اليوم 😢
________________________
05:00 م
لبست هناء سروال ابيض عليه جاكيت جينز طويلة شوية و سبيدرو بودري هافت
يوسف واقف ف السقيفة ف حوش جده يراجي فيها تنزل باش يلحقها
طلعت هناء من الحوش لقت روان نازلة : اهلا
روان : شن الجو
هناء تسكر ف الباب : مليح
روان : شكلك طالعة
هناء : ايه بنتلاقى مع صاحباتي
روان : سعدودك ؛ ياريتني زيك متخرجة و مرتاحة
هناء : تو ان شاء الله تتخرجي و ترتاحي
روان : بعد عمر طويل اكيد
هناء ضحكت : نازلة لوطه !
روان نازلة هي و هناء : ايه بنشوف احمد هارب
هناء : شن دار من عملة
روان : كسر مرش السيارة و بابا متعفلق هلبا
هناء : مايبيش يعقل
روان : ايه
هناء : هي باي
روان : باي .. و خشت لحوش جدها
طلعت هناء للجنان لقت كلب أحمد مطلوق
خافت : حي على امك يا هناء
الكلب وقف قدامها و يشوفلها 🐶
هناء جمدت ف مكانها : هيا برا بعيد
الكلب بدي ينبح
هناء خافت : برا مش وقتك 😰
يوسف طلع للجنان و وقف وراها
هناء تخبط برجلها : امشي مانقدرش نجررري 😰
الكلب يحرك ف ذيله و يشوفلها
هناء : هي برا حبيبي بعدين نلعبو بااااهي
يوسف يضحك عليها 😬
الكلب يقرب منها شوية شوية
هناء زادت خافت و بدت توخر : هيا فكنا عاد
الكلب يقرب
و هي توخر : احمدددد 😰
فجأة تخبط ف يوسف وراها انخلعت
يوسف يضحك
هناء شدت فيه و لبدت وراه : ديرله حل بالله عليك
يوسف : خايفة منه و هو كميشة ؟
هناء ترعش : نحيه من قدامي
يوسف : عليا الوضوء مانقدرش نسمه
هناء علت صوتها : كره برجليييييك
يوسف ضحك : تعالى يا احمد ... احمد ؟!
احمد طلع : نعم
يوسف : ارفعه لبراكته
احمد شد الكلب : خايفة منه يا هناء ؟ تي مايدير شي ... و يبوس فيه من وجهه
هناء تقززت : يععع 😖
يوسف شبح لِـ لبستها : ماشية لصاحباتك
هناء : ايه و عطلت راهم يراجو
يوسف : امالا اجري
هناء طالعة لسيارتها : سلام
يوسف سكت يقول ف عقله ( مكياج و لبس مليح على خاطر صاحباتها ؟؟ ) ؛ خلاها طلعت و لحقها
يـتـبـــع ... 💗
_________________
لن أسمح بنقل الرواية دون ذكر المصدر ‼️