الفصل 1
روايــة #صغار_العم
الحَـــلْـــقـــة الأٌولــــى 🌸
(( اللي اول مرة تقرا الرواية فيه مقدمة قبل الحلقة الاولى اقريها باش تفهميها ❤️ ))
يوسف : شن فكره ف المرض توا
هناء بإستفزاز : لأنك جاي 😏 ، و اني نقول علاش يومنا نحس من أوله !!
يوسف تعفلق و زاد ف السرعة
هناء خافت
يوسف بعصبية : و بالمرة نقلب ام السيارة و نموتو باش يكون منحوس ع الكل
هناء تكابر بإنها مش خايفة : ايه ياريت و يطلعونا جنازة وحدة
يوسف شبحلها : ناوية النشاف ؟؟
هناء سكتت و فتحت تليفونها باش تلهىٰ فيه
يوسف : اني روحتلك و تو نعرف كيف نربيك
هناء شبحتله و علت صوتها : هيا ادوي معاي بإحترام 😠 .. تحسابني صغيرة باش تقولي كلام زي هذا !!
يوسف فتح الراديو : نقصي صوتك بلا نفخ راس
هناء متعفلقة : انت حرام الواحد يروف عليك و يجيك ، المفروض خليتك تروح بروحك
يوسف شبحلها : تبيني ننزل ؟
هناء سكتت و شبحت قدامها
يوسف درس السيارة : نازل هي
هناء : خلاص اطلع و انت ماصدقت
يوسف ضحك و طلع بالسيارة : قولي انك ماتقدريش تلزيني
هناء ضحكت ع الجنب : مازال خطوتين ع الحوش مدايرلي روحك تتغلىٰ ؟
يوسف سكت
هناء : غر كلهم ف المستشفى مع اجديده و مافيش غيري يروح بيك كان هذا والله ماجاياتك
يوسف يتأفأف : استغفر الله العظيم
هناء : مش مستاحشة شوفتك ره ...
قاطعها يوسف و علّا صوته : تي خلاص اسكتي الزفت اسكتيييي
هناء سكتت و سكرت الراديو
يوسف شبحلها : خيرك سكرتي امه ؟
هناء : جدك مريض و فاتحلي اغاني ؟؟
يوسف فتح الراديو تاني : هو ماماتش باش نحزنو
هناء سكتت ؛ حطت مرفقها ع المرش و دارت يدها على خدها 😒
_____________________________
أمال طلعت من عند بوها تبكي
جاها عماد : شن حاله توا
أمال : يوصي فيا .. شكله بيتوكل يا اوخيي
اسماعيل ساكت
عماد ضبطها : معاش تفاولي عليه بإذن الله ينوض و يصح
أصيل يشوفلهم : اني نبي نروح قاعد بسروال توته
السنوسي شبحله : خود سيارتي و روح
أصيل وقف و خدي منه المفتاح : سلامات
______________________
نجاة وصلت للحوش و خشت للمربوعة : السلام عليكم
ردو عليها النساوين : و عليكم السلام
سعاد تشوفلها من فوق لتحت 😒
نجاة قربت من حلومة و طبست عليها : ماتغششيش روحك يا اللاّي ان شاء الله بسيطة
حلومة تبكي : ان شاء الله خير يا بنيتي
سعاد تقول ف عقلها ( شن هاللبس و المكياج هذا ؟ باهي تحشمت و مسحاته ف السيارة )
نجاة وقفت : نبدل حوايجي و نجي
و طلعت ف وسط الحوش اتدور ف هناء : هناااء ؟ هنيوه !!
أزهار طلعت من المطبخ : مشت للمطار تروح بيوسف
نجاة تكنطت و قامت حاجبها : ماشية لغادي بروحها ؟؟
( سعاد تسمع فيهم من المربوعة )
أزهار خافت منها : سعاد هي اللي أصرت عليها لان مافيش حد يروح بيه
نجاة علّت صوتها : ولدها مايصيرله شي لو روح بروحه ، و اني لو بنتي تنخطف من نص الطريق و هي ماشيتله شن بينفعني بعدين !!
أزهار سكتت
نجاة و هي ف الدروج راكبة لحوشها اتمتم بروحها : تو نوريها سعاد غر يروحو الناس بس ! تبعت ف بنتي باش يرضىٰ ولدها ...
سعاد تسمع فيها اتمتم طلعت من المربوعة : خيرها ؟؟
أزهار : تعفلقت علاش هناء مشت للمطار
سعاد : و شن بيطرالها !
أزهار : عندها الحق بنتها صغيرة يشوفوها مردف يشدوها وراها
سعاد كشرت وجهها : و النبي فكيني ماهي ديما تنسرف ببناويتها في كل مكان ! جت غر على اليوم بتنخطف ؟؟
ازهار سكتت و خشت للمطبخ اتطيب ف الغدي
____________________________
ركبت نجاة لحوشها و فتحت تليفونها تتصل بهناء ..
هناء نقصت الراديو و فتحت الخط : ايوه ماما
نجاة تكشخ : انتي وين ؟
هناء : شوية و نوصل للحوش
نجاة تصيح : مافيش غيرك يروح بيه المحروس ؟؟ خدي تاكسي ولا روح بيه حد من معارفه
هناء تحشمت و نقصت الصوت من البطمة اللي من الجنب : باهي تمام
نجاة : غر روحي بس تو نوريك الطلوع من غير إستأذان شن شكله
هناء : باي .. و سكرت الخط
يوسف شبحلها : خيرها تعارك فيك
هناء : لا شي
يوسف : اكيد مدايرة عملة و ورقتلك
هناء تتأفف
يوسف ضحك و درس السيارة
هناء نزلت و وقفت تراجي فيه
يوسف خدي شناطيه و شبحلها : تبينا نخشو مع بعضنا ؟
هناء شبحتله ع الجنب : نبي مفتاح السيارة
يوسف مدهولها : يالطيف قداش حاجتك ماتهونش عليك !
هناء خدت المفتاح : المفروض درستها ف القراج مش هني ... و خشت للحوش
يوسف خاش وراها : المرة الجاية حاضر
هناء سكتت
يوسف : شوفيلي الطريق
هناء : خش كلهم ف المربوعة
_____
يوسف خاش : السلام عليكم
سمعاته سعاد جاته تجري : اوسيفه !!
يوسف ضحك و ضبطها
سعاد مضبطاته و تبكي : طيب فيا ياوليدي اللي ريتك ، طيب فيك روحتلي
يوسف باس راسها : ربي يخليك ليا و يطولي ف عمرك
هناء تشوفلهم و مبتسمة
سعاد تبوس فيه و تبكي : خلاص راهو معاش فيه سفر ، لا بريطانيا لا غيرها
يوسف يضحك : حتى انى قاعدلك ديما
و باس ايدها
جت أزهار تسلم عليه : اوسيفه ؟ الحمد لله على سلامتك
يوسف شبحلها و سلم عليها : الله يسلمك مرت عمي
ازهار : كيف حالك ؟ آنستنا
يوسف : كويس بشوفتكم
سعاد ضبطاته تاني : اااه هذا وين دبت فيا الروح يا اوسيفه
يوسف مضبطها : لو تعرفي قداش مستاحشك يا امي
سعاد : ربي مايغيبك عليا انى و اوبيك
يوسف : ولا ايغيبكم عليا يارب
سعاد شبحتله : اركب و ارتاح ف دارك هونا موتيتهالك من امس
يوسف : لالا اما نوم توا نبي نشوف حناي و نسلم عليها و بعدها بنمشي لجدي
سعاد : تو اناديهالك ( و خشت للمربوعة )
هناء : قول امّيمه شن حناي 😏
يوسف شبحلها : بنقول اللي ايريحني حناي ولا جداي
هناء عوجت فمها و طلعت لسانها
يوسف قام حواجبه : اكبري
هناء تكنطت
أزهار ضحكت : قاعدين تتناقرو لتوا ؟ راكم كبرتوا خلاص
يوسف شبحلها : ماهي تحب تناشب و تاكل على راسها
هناء متكنطية : انى ركبت ( و ركبت لحوشهم )
يوسف سكت و قعد يشوفلها .. يقول ف عقله ( والله و كبرت و صار منها )
جاته حلومة : اوسيفه الغالي جيييي
يوسف تلفتلها و ضحك : كيف حالك حناي
حلومة ضبطاته : الحمد لله على سلامتك ؛ نورت الحوش
يوسف باس راسها : منور بوجودك انتي و جدي
حلومة بدت تبكي : اييييه اسمله على جدك يا وليدي
يوسف مضبطها : ان شاء الله ينوض بالسلامة ماتاكليش بعضك
حلومة تبكي : بو صغاري هذا كيف تبيني ماناكلش بعضي
يوسف : الله غالب ادعيله انتي بس
حلومة شبحتله : ترا نشوفك ؟
يوسف ضحك
حلومة : ماشاء الله درت شناب و وليت راجل طول بعرض مصلي ع النبي
يوسف تحشم : الله يسلمك
سعاد : ايه ريتيه يا اللاّي ! تو بنزوجوه بعد عمه على طول
ازهار ضحكت : غر خلوه يوصل و ياخد نفس
يوسف ضحك
____________________________
نجاة تكشخ : علاش ماتصلتيش بيا و استأذنتي ؟؟
هناء : مافيها شي خيرك انتي ؟
نجاة : تسمعيلي ف كلام سعاد ؟ و كان انخطفتي وين بنلقوك ؟
هناء : الطريق مونسة و زحمة مافيها شي
نجاة : اخرلك مرة تطلعي بلا شوري فاهمة ولا لا
هناء تكنطت : ممكن معاش تكشخي ؟ راني مش صغيرة
نجاة : بتقعدي ف نظري طول عمرك صغيرة ، هي ماعندهاش بنات هذا علاش مش حاسة باللي حاساته اني توا
هناء ضحكت و جت باستها : باهي يا نجوته اسفه معاش تحرقي دمك
نجاة سكتت
هناء : تو المرة الجاية نتصل بيك
نجاة ضربتها على ايدها : معاش فيه مرة تانية ؛ و اي حاجة تطلبها منك سعاد قوليلها ماما قتلي لا
هناء ضحكت : باهي حاضر
نجاة : فيك مابدلتي حوايجك ؛ بري جيبي خواتك
هناء : مازال على وقت مرواحهم
نجاة : لالا بريلهم قبل الوقت و احصلي عليهم خير ماتلقيهم مروحين بروحهم
هناء ضحكت : باهي شوية و نمشي ، نبي نغير حوايجي لان الجو سخن برا
فتحت نجاة باب الحوش و نزلت
______________________________
01:00 م
ف الحصة الاخيرة سلسبيل متكية صاحبتها أبرار على رجلها ف الساحة تنقيلها ف حواجبها
أبرار : بسرعة قبل ما تكبسنا وحدة من الأبلات
سلسبيل : باهي مازال حاجبك التاني يبي تعديل ؛ لاعبة ف امه تسعة
أبرار : ماني كنت مستعجلة
سلسبيل : مرة تانية معاش تخشي على حاجة ماتعرفيهاش
أبرار : باهي غر بسرعة
_________________________
ركب يوسف لحوشهم حط شناطيه و طلع ؛ تلاقى مع هناء ف الدروج كيف طالعة
( لأن شقتهم مقابلة شقة عمه اسماعيل بو هناء )
يوسف : شورك رجلك و الشارع ماتعرفيش تقعمزي ف الحوش
هناء شبحتله ع الجنب : بالك مش عاجبك !
يوسف سكت و نزل
هناء نازلة معاه : يوسف !
يوسف شبحلها
هناء : حني كبرنا على جو التلقيح خلينا صغار عم و احباب
يوسف حك لحيته : متأكدة ؟
هناء : ايه
يوسف : تم
( و طلعو للجنان )
هناء : بتمشي لجديده ؟
يوسف : ايه
هناء : من بيرفعك ؟
يوسف : بروحي
هناء : اني بنروح بخواتي كان هذا نحطك ف طريقي
يوسف ضحك : ليهم وحشة المختشات
هناء : ديما يهدرزو معاك ع النت عاد
يوسف : جوهم مليح مش زيك نكد
هناء شبحتله ع الجنب 😒
يوسف : ايه شن تشبحيلي ؟ على خاطر لقحتلك ع اللي حاطة صورتها درتيلي حظر طول
هناء : لأنك تستاهل
يوسف : ياسري بلا جو ؛ الدوة ليها ثلاثة سنين
هناء سكتت
يوسف : غر قولي الحق ؛ ماستاحشتينيش !!
هناء شبحتله و ضحكت : على شن بنستاحشك بالله عليك ؟ ريت هالجو الحلو اللي كنت مدايرهولي
يوسف تكنطا و طلع للشارع : تو نمشي بروحي
هناء راكبة لسيارتها : اصلا مانيش موصلاتك 😛
مشي يوسف على رجليه و ماردش عليها
ركبت هناء لسيارتها و ولعتها
فتحت تليفونها تتصل بِ بوها ...
اسماعيل فتح الخط : الو
هناء : بابا ! كيف حال اجديده توا ؟
اسماعيل : تحسن شوية ع الصبح الحمد لله
هناء فرحت : الحمد لله يارب ، شوية و نجي
اسماعيل : لالا مش لازمك الجي
هناء : نبي نشوفه ، نروح بالبنات من المدرسة و نجي
اسماعيل : ماشي ف أمان الله
سكرت هناء الخط و طلعت بالسيارة
لقت يوسف واقف ع الرئيسي يراجي ف تاكسي
ضحكت و وقفت عليه : يوسف !
يوسف شبحلها : شن تبي ؟
هناء : اركب نوصلك
يوسف : تو ناخد تاكسي ماتتجمليش عليا
هناء : تي اركب عاد ! حتى اني بنمشي للمستشفى
يوسف ركب معاها : شن خطر عليك تمشي
هناء طلعت بالسيارة : ريتك سخفت عليك 😂
يوسف شبحلها : تو من هي اللي كانت تقول خلينا صغار عم و احباب ؟
هناء سكتت
يوسف : بالله عليك ماتدوي حرف ، راسي مصدع و تاعب من السفر ماعنديش جواجي للكلام
هناء علت صوتها : راكب معاي و تتشرط ؟؟؟
يوسف تكنطا : لا اله الا الله
هناء شبحتله : خيرك !!
يوسف يكشخ : هناء ! فكينا منه جو المفرخ خير .. ماناش صغار ره
هناء خافت و سكتت
يوسف يستغفر بصوت واطي
هناء تبي تغير الموضوع : شن جو خدمتك ؟
يوسف سكت شوية و بعدين قال : درت انتقالة هني
هناء شبحتله : يعني معاش بتسافر رسمي ؟
يوسف شبحلها : مش قتلك روحتلك و تو نعرف كيف نربيك ؟
هناء تكنطت : يوسف !!
يوسف يولع ف دخانه : هيا اسكتي
هناء شبحتله : اطفيه مش وقته هذا
يوسف ينفخ ف الدخان : علاش مش وقته ؟
هناء : مانتحملاش يحرقلي ف عيوني
يوسف بإستهزاء : ياي
هناء : احترمني عاد
يوسف يدخن و مايردش عليها
___________________________
سلسبيل : تعرفي بعد التنقاية هادي تبي تنظيفة بالفتلة لوجهك تبدي تهبلي
أبرار : تو نقول لبنت جيرانا اديرهالي
جت سنابل : خاطري نروح على رجليا
سلسبيل شبحتلها : كان جدك عملها تو تروحي على رجليك
سنابل : ان شاء الله لا قفطان العرس شريته
سلسبيل : و انى ماخديت شي مازال
أبرار تضحك : خزي يا كلاب 😂
سلسبيل ضحكت : هي نوضي كملت
أبرار ناضت تشوف ف روحها ف المراية : يهبلوو
سلسبيل : صحة صحة
سنابل تشوفلها : وليتي و صار منك 😂
أبرار ضحكت و حطت المراية ف شنطتها : تسلم ايديك
سلسبيل : سلمك
طلعت ابلة الإشراف للساحة شافتهم
أبلة غادة تصيح : شن اديري انتي وياهاااااا
سلسبيل خافت و دست الملقاط ف جيبها
سنابل : مش وقتها الشيت
أبرار : تو بتزبطني وجهي احمر
أبلة غادة جتهم : شن كنتو اديرو ؟؟
( البنات وقفو )
سلسبيل : شي نهدرزو ، عندنا حصة فاضية طلعنا للساحة
أبلة غادة : طلعي اللي ف جيبك بسرعة
سلسبيل خافت : مافي شي ف جيبي
أبلة غادة حطت ايدها ف جيب سلسبيل و طلعت الملقاط
سلسبيل تلخبطت
ابلة غادة : هذا شنوووو !!!
البنات سكتو
ابلة غادة : ماشاء الله ماشاء الله ، هادي امكم مدرسة و هكي ! شن خليتو للباقيات ؟؟
أبرار ساكتة
سنابل تكنطت : شن قصدك !!
أبلة غادة : تنقو ف المدرسة و مدرسة مختلطة زيادة !! و نعم التربية والله !
حطت سلسبيل ايديها ف نصها : هيا احترمي نفسك و ادوي كويس خير ماتشوفي وجهي التاني
أبلة غادة انصدمت و فنصت فيها : قدامي للإدارة تحركي 😠
سلسبيل : والله ماني متحركة ؛ اصلاً مش عارفة كيف حاطينك ابلة إشراف و انتي لا أسلوب لا احترام ؛ تحطي ف ايديك ف جيوب الناس زي الحيوانة
أبلة غادة مصدومة : بنديرلك استدعاء ولي امر و يجيني بوك نتفاهم معاه مش امك
سنابل حطت ايديها ف نصها : بووووي ؟؟؟ اكيد تحلمي
ابلة غادة فنصت فيها : انتي ماندويش معاك ندوي مع اختك
سنابل : اختي توأمي و اللي يمسها يمسني فااااهمة ؟؟ 😠
سلسبيل تحرك ف صبعها و تتكلم بإستفزاز : تبي بوي الدكتوررر بجلالة قدره و هيبته يجي يدوي معاك انتي ؟ ايسيب شغله و حالات المرضى اللي عنده و يجي يدوي مع وحدة مريضة و متخلفة زيك ؟؟
أبرار مصدومة : عيب يابنات
أبلة غادة وجهها مقلوب : انتو خلاص دقيقة وحدة معاش تقعدوها ف المدرسة من غدوا ملفاتكم و الشارع انتي و اختك ( و خشت للإدارة )
سلسبيل و سنابل ضحكو 😂
( الجرس ضرب 🔔 )
أبرار خافت : حيي عليكم
سنابل : تي ماتقدر ادير شي ؛ تو تجيها ماما تغبرلها المدرسة باللي فيها
سلسبيل : هي اطلعي اكيد جت
( وقف يوسف ف باب المدرسة )
سنابل شافاته : هذا يوسف ولا نتخيّل ؟
سلسبيل تلفتت : والله الا هو
لبسو شناطيهم و مشوله
يوسف ضحك : التوأم المختلف !
سلسبيل ضبطاته : الحمد لله ع السلامة
يوسف : الله يسلمك
سنابل ضبطاته : الحمد لله ع السلامة ولد عموو
يوسف يضحك : الله يسلمك
سنابل : ليك وحشة برو
هناء تشوفلهم من السيارة و مصدومة : حي الكلبات كيف يبوسو فييييه 😧 !!!
يوسف : ليكم اكثر والله
سلسبيل : جاي بروحك ولا مع ماما ؟
يوسف : جيت مع هناء
سنابل ضحكت : غريبة 😂
يوسف ضحك : هي اطلعو مازال بنمشو لجدي
( طلعو البنات معاه )
سلسبيل : امشو بروحكم حني نبو نروحو
يوسف : علاش ؟ شوفو جدك معانا
سنابل : ماهو نبو ماما ف موضوع مهم لازم نروحو ف اقرب وقت
يوسف : موضوع شني المهم للدرجة هادي
سلسبيل : تعاركنا مع ابلة و نبو ندوولها حني قبلها هي
يوسف ضحك و ركب للسيارة
( البنات ركبو )
هناء تلفتتلهم : غريبة ماعطلتونيش
سنابل : ماهو كنا ف الساحة من بكري
هناء تلفتت القدام و طلعت بالسيارة
سلسبيل : روحي بينا قبل
هناء : لالا مانقعدش ماشية جاية زي السراق
يوسف شبحلها : زي شني ؟
هناء سكتت
يوسف شبح قدامه : يالطيف من هاللسان
هناء : تو كلمتك ؟؟؟
سلسبيل ضحكت : مازال تتعاركو ؟ ياسرو عاد لآمتى بتقعدو هكي
هناء : خلوه قاعد غاير مني
يوسف شبحلها : كيف غاير منك
هناء : من يوم جيت ع الدنيا و انت تكرهني ؛ يا ليه جيت بنت بعدك و خديت الغلي من العيلة و خصوصا من اجديده ، هذا علاش كنت ديما تضرب فيا و ماتحبنيش
يوسف يشوفلها و قايم حواجبه
هناء شبحتله : و على فكرة انت لتوا قاعد هكي و العيلة كلهم عارفين
يوسف : اما انتي جو ! مافيش منها الدوة بكل
هناء ضحكت : باهي به
سنابل : توا المهم روحي بيناااا
هناء : علاش ؟
سلسبيل : تي روحي بينا و خلاص يا هناااء
هناء استغربت : باهي
_____________________________
أصيل خاش للحوش : ماما ؟؟
تلخبط و كح : امي ؟؟ ياااام !!
جاته نجاة : نعم
أصيل : يوسف وصل ؟
نجاة : ايه و مشي لجدك
أصيل : خسارة تخاطينا نبي نشوفه
نجاة : بعدين تو تتلاقو ، اركب أفطر و غير حوايجك وجهك رايح اصفر
اصيل ضحك : راعش
نجاة ضحكت : ايه بكل
أصيل : معطلين النساوين هني ؟
نجاة : بما ان سمعو بجدك حاله باهي تو يروحو بعد شوية
اصيل : ماهم قايسو على وقت الغدي ماظنيتش ينوضو
نجاة فنصت فيه : اركب و بلا كثر دوة
اصيل ضحك و ركب
___________________________
يوسف : فيا ما مشيت و جيت ، لازم ناخد سيارة ف اقرب وقت
هناء : خود متع اجديده
يوسف يشوف للسيارة : لالا عجبتني هادي
هناء : مش مفكرة نبيعها
يوسف : اصلاً السواقة بتنسيها
هناء شبحتله : كيف كيف ؟
البنات ضحكو
يوسف : شن منظرك و انتي تنسرفي من مكان لمكان بروحك ؟
هناء انصدمت و سكتت
يوسف : امبكري غر مابيتش نديرهالك عربية و نهزبك انك جاية بروحك للمطار
سلسبيل و سنابل انصدمو : للمطار !!
هناء تكنطت
يوسف : ايه جت بروحها روحت بيا
البنات سكتو و شبحولها
درست هناء السيارة قدام الحوش و هي ساكتة
( نزلو سلسبيل و سنابل يجرو لأمهم )
هناء شبحت ليوسف : ممكن تدوي معاي بإحترام ؟
يوسف شبحلها : ندوي بجديات ؛ ماعندناش بنات يسوقو و يطلعو بروحهم اهو قلتهالك من توا
هناء متعفلقة : انت شن دخلك فيا ؟؟؟ اذا كان بابا راضي و هو اللي شاريلي السيارة
يوسف : اني قلتلك
هناء بإستهزاء : حسستني انك دافع فيها الرقاق
يوسف علّا صوته : تبي الناس يقولو بنتهم ماتنفعش ! طولها و طول عصاتها ؟؟
هناء قامت حواجبها
يوسف : و امبكري لما شافوك صحابي الله اعلم ف شن فكرو
هناء انصدمت : كيف !
يوسف : انتي فاهمتيني شن نقصد
هناء مصدومة : تقدر تقوللهم بنت عمي جت تروح بيا
يوسف : اه و هما بيصدقو ان مافيش ذكر قدر يجيني الا انتي و يقولو ..... ( و سكت )
هناء عيونها دمعو : انت واحد ماتتحشمش ياريتني درت حادث و متت قبل لانجيك و نسمع منك الكلام اهوا
يوسف سكت
هناء : اني جيتك لان امك أصرت عليا نروح بيك .. سخفت عليك قلت تو يقعد يدور من يروح بيه و هو تاعب
يوسف ساكت
هناء : لكن فعلا طلعت حرام فيك الخير ... و نزلت من السيارة تبكي
يوسف نزل و لحقها : هنااء !
خشت هناء للحوش تجري و مابتش ترد عليه
سنابل واقفة ف السقيفة مع امها و اختها ؛ شافت هناء استغربت : خيرك تبكي ؟؟
يوسف خاش وراها : هنااء !
خشت هناء لدار الدروج اللي ف السقيفة و ركبت لحوشهم تجري
سنابل شبحتله : خيركم ؟
يوسف شبحلها : مفتاح سيارة بوي وين ؟
نجاة اشرتله ع المفتاح : اهوا كيف حطه أصيل
يوسف خداه و كيف طالع ..
كلماته نجاة : علاش هناء تبكي ؟؟
يوسف شبحلها : مش عارف .. و طلع من الحوش
سلسبيل : ابصر شن دارلها
نجاة : توا قولولي خيركم ؟؟
سنابل بدت تبكي : ابلة غادة اليوم هزبتنا و نزلت فيك
نجاة استغربت : كيف ؟
سلسبيل تبكي : لقتنا مقعمزات مع أبرار ف الساحة لان عندنا حصة فاضية لا بينا لا علينا جت تهزب ؛ قالت مش متربيات و امكم ابلة هكي اديرو امالا شن خليتو للباقيات
نجاة انصدمت : متأكداااات ؟؟
سنابل تبكي : ايه و لو مش مصدقتينا اسألي أبرار شاهدة و حني يشهد علينا ربي ماقلنالها كلمة يا ماما
نجاة : نهارها أغبر غدوا ، تو تشوف
سلسبيل : و قالت تبي بابا يجيها تتفاهم معاه مش انتي ، و قالت بتعطينا ملفاتنا و الشارع
نجاة عقدت حواجبها : تو نشوفو من اللي ياخد ملفه و يطلع ،، نهارها احرف اسود على راسها .. طلعت مانعرفش نربي !!
( البنات سكتو )
نجاة : خلاص توا برو اركبو خير ماتسمعنا سعاد و تشهدر بينا قدام الناس
____________________________
هناء خشت لدارها ؛ نحت وشاحها و قعمزت على سريرها متعفلقة : خزي ع العقلية المتخلفة .. ياريتني مامشيتله ولا ريت وجهه .. هذا الاستكراد شوية فيه .. تو نشوفو من اللي يمشي كلامه .. مداير روحه يسترجل عليا على خاطر ماعنداش خوات !! اني اللي بنسترجل عليه
اتكت على مخدتها و تبكي : غر شن جيبه بس مبرد دمه .. معقولة يطلعني وحدة ماتنفعش 😭؟؟
____________________________
يوسف ف الطريق ماشي للمستشفى : لبزت معاها هلبا ف الكلام ... مايجيش هكي من اولها .... لكن لازم تحط ف بالها قبل ماتكتر عليها الدوة
___
خش لبركيدجو المستشفى و درس السيارة و نزل ..
خش لقي عمامه مقعمزين
جاه السنوسي و ضبطه : الحمد لله ع السلامة
يوسف مضبطه : الله يسلمك بوي ، كيف حالك ؟
السنوسي : شوفة عينك الحمد لله
( و ناضو عمامه يسلمو عليه و يرحبوا بيه )
________________________
05:00 م
محمد يطقطق على حوش عمه اسماعيل ✊
جت سلسبيل فتحت : ها حمود
محمد : وينها هديكا
سلسبيل ضحكت : راقدة
محمد خش : بري نوضيها
سلسبيل : و النبي فكني منها نومها رزين
محمد : توا انوضها اني و نوريها لعب الصغار شن شكله ؛ تخلي فيا نكذب على امك
سلسبيل تضحك
محمد : خشي شوفيها قبلي
سلسبيل : تي خش مافي شي
محمد خش للدار : سنابل !!
سنابل غارقة ف النوم
محمد شبح لسلسبيل : جيبيلي اميه
فتحت سلسبيل شنطة المدرسة ؛ طلعت منها شيشة امية و مدتهاله
محمد فتحها و بدي يبخ ف سنابل 💦 : نوضي اوقفي
سنابل انخلعت : هيييييييي 😩
محمد : تخلي فيا نكذب معاك ياللي ماتتحشميش ؟
سنابل قعمزت و مازال داهشة : علاش بليتني يا حمااار
محمد يبخ فيها تاني : باش مرة تانية معاش تعاوديها
سنابل تصيح : خلااااااص بليتني كلني
حدف محمد الشيشة عليها و طلع
سلسبيل تضحك : حلوة فيك 😂
سنابل : خزي عليه خلعني 😢
_______________________
هناء ف دارها متكية و فاتحة الفيس
جاها إشعار فايبر من رقم غريب : اسف
هناء استغربت و ردت : مني ؟
الرقم : ولد عمك
هناء قعمزت تدوي بروحها : يعني خدي شفرة و بيبدا ف النفخ !
يوسف يقول ف عقله .. ( هيا ردي )
هناء عطاته seen و ماردتش عليه
يوسف سكر تليفونه و وقف : قداش نكره امه الجو اللي ادير فيه الزفت
______________
طلع أصيل من الحمام و مشي يلبس ف سبيدروه جنب الباب و يتكلم ف التليفون : وين نتلاقو ؟؟ .... ايه ايه عندي سيارة ... ماشي برو نص ساعة و نكون عندك غر عندي مشوار قبل ... ماشي هي سلامات
سمعاته هناء من دارها طلعت تجري : تعالى جاي تعالى
أصيل فتح الباب و طلع يجري بمفتاح سيارتها
هناء لحقاته ف الدروج و تصيح : تعالى و هات المفتاح يا اصيل خيرلك !!!
أصيل نازل من الدروج يجري : ساعة و نجي هنيوه
شدت هناء فردة سبيدرو و حذفتها عليه من فوق
و فجأاااة : .......
_________________________________________________________
( Flash back )
يوسف سكر تليفونه و وقف : قداش نكره امه الجو اللي ادير فيه الزفت
حط تليفونه ع الشكماجة و فتح دولابه يطلع ف حوايجه ؛ لبس سروال كحلي و سورية عنابية و كندرة كحلة و نزل من حوشهم ..
و هو طالع ف الجنان تفكر ان خلّا تليفونه فوق : باهي اللي قاعد لوطا و ماطلعتش
ولّا للحوش
و هو خاش للدروج لقي اصيل طالع يجري
و فجأة اتطيح عليه فردة سبيدرو من فوق ؛ انخلع : احيييه هذا شنو ؟؟
هناء سمعاته انصدمت : هييييييه 😲 ، حي على امك ياهناء
يوسف سمعها و شبحلها فوق : جايك جايك
هناء خافت ؛ خشت للحوش و سكرت الباب بسرعة
يوسف ركبلها و وقف قدام الباب يطقطق : افتحي الباب خيرلك
هناء ترعش : سامحني و راس يوسف
يوسف : افتحي يا هناء
هناء سكتت
يوسف : لأخر مرة نقولك افتحي
فتحت هناء الباب : سامحني مش قصدي نجيبها فيك 😢
يوسف يشوفلها و عاقد حواجبه : زعما شن انديرلك ؟
هناء غمضت عيونها : سوري
يوسف سكت و قعد يشوفلها
هناء فتحت عيونها
يوسف : شوفي حوايجي كيف وسختيهم
هناء تشوف لحوايجه : عادي خود وايبس و امسحهم
يوسف : والله ؟
هناء سكتت
يوسف : علاش تخلي فيا نخش نبدل تاني و اني مستعجل الزفت ؟
هناء : بالله عليك سامحني والله ماقصدتك ، انت طلعت فجأة
يوسف قام حاجبه : لو تبيني نسامحك عندي شرط
هناء استغربت : شرط شنو ؟
يوسف : عندي سبيدرو يبي المسح امسحيهولي
هناء قامت حواجبها : تبصر ؟!!
يوسف : مانبصرش
فتح حوشهم و خش ، خدي تليفونه و طلع معاه السبيدرو
هناء تشوفله و تقول ف عقلها .. ( هذا اكيد يتسهوك ! )
يوسف جاها و مدهولها : هاك شدي
هناء خداته منه : و علاش ماتديراش انت ؟ اعتبر روحك مسافر
يوسف : بريطانيا بلاد نظيفة ماتوسخش ف الأحذية
هناء : وانت امتى لحقت تخمره ؟
يوسف : نروح نلقاه ممسوح و محطوط قدام الحوش
هناء عقدت حواجبها : ديره بروحك
يوسف و هو نازل : يجيب ربي و نلقاه زي ماهو ياهناء
هناء تتأفف و تدوي بروحها : يحسابني شغالته !! ... باهي خيره ماغيرش حوايجه ؟ معناها يتزعبن عليا !!
خشت و سكرت الحوش و هي اتمتم بروحها
____
يوسف طالع من الحوش ينفض ف حوايجه و يضحك : يا اني يا انتي تو نوريك
ركب سيارة بوه و طلع
___________________
جت أمال هي و بنتها أروى لحوش العيلة و خشو لدار المعيشة
أمال : السلام عليكم
ردو عليها العيلة : و عليكم السلام
حلومة : كيف حال بوك توا يا أمال
أمال تنحي ف عبايتها : الحمد لله خير من بكري
حلومة و نجاة : الحمد لله
أزهار : يعني العرس ماشي ان شاء الله ؟
أروى : اكيد ماشي مادامه جدي ناض
أمال فنصت فيها : انتي اسكتي و ماتخشيش ف دوة الكبار
اروى قلبت وجهها و سكتت
نجاة : امبكري اتصلت ام خطيبة عصام قالت مايبوش يأجلو
أمال : شن هو ؟؟
سعاد : قالت كل شي محجوز مايقدروش يلغو الحجوزات و مازال ع العرس شهر
أمال علت صوتها : فعلا مايتحشموش ؛ واحد مشنوق و التاني باله ف الحلوى
أزهار : عندهم الحق العروسة حتى بتاتها مغلف و واتي
حلومة : خلي نشوفو العارف شن يصير فيه ف هاليومين و بعدين ساهل
___________________________
هناء تشوف للسبيدرو : اهو مافيه شي ! على من يدير ف الجو ؟
جتها سنابل : شن تقولي بروحك ؟
هناء : التافه يبيني نمسحله سبيدروه
سنابل استغربت : اما تافه بالزبط ؟ العمارة معبية بالتافهين
هناء : يوسف
سنابل : اااه الا يوسف ماتغطليش فيه اييواه
هناء شبحتلها ع الجنب : و من امتى ولاّ غالي عليك
سنابل ضحكت : من زمان
هناء شبحت للسبيدرو : هو مافيه شي ، نكذب عليه و نقوله مسحته و خلاص
سنابل تشوف للسبيدرو : ديريله مسحة بالوركينة من الجنب جهة الأبيض حسيته يبي
هناء تشوفله : زعما ؟
سنابل : غر راك تكتري ديري شوية جهة الجلد بس
هناء سكتت
سنابل شرين تليفونها ردت : اهلين آدومي .. و خشت لدارها
هناء خدت طرف مبلول و دارت فيه وركينة تمسح ف السبيدرو : أخرتها بديت نمسح ف الشلايك .. هناء بجلالة قدرها تمسح ف الأحذية ! ياعليك وقت وخلاص .. ماهو كله من اصيل خلاني نجري وراه زي المهبولة و ف جرته حاصلة هالحصلة
تمسح بِ غُل و تدوي بروحها : لكن الله يوسف ماهو امبردها الحركة هادي كان ماخليتاش يتآسف عليها
_____
و فجأة تشوف للسبيدرو تلقاه لونه تغير ، خافت : لا ياربييييي 😩
خداته و حطاته تحت المية تغسل فيه : لا وراس امك و بوك لا ، تربح ولي كيف ماكنت مش ناقصة هزايب
شداته تتفرج عليه : يوم منحوس من أوله وااك
جتها سلسبيل : خيرك تعيطي تو يسمعك بابا ينوض
هناء ورتها السبيدرو : شوفي شن درت
سلسبيل : متع مني هذا ؟
هناء : متع يوسف
سلسبيل : هههههههههههه
هناء تعفلقت : وقت ضحكك توا ؟
سلسبيل : عندي فكرة مليحة ؛ نقعيه كله ف الوركينة باش يبدا زي بعضه لون واحد
هناء سكتت و اقتنعت بالفكرة
سلسبيل : و جففيه بسرعة قبل مايروح
هناء : به
خشت للحمام ؛ خدت قردل عباته وركينة و حطت فيه السبيدرو يتنقع ربع ساعة
طلعاته لقاته لونه تغير و تقشر من الجناب
بدت تبكي : ااه ياربي كيف بنرقع الموضوع ؟؟ تو يقول هادي بايرة 😭
فتحت الشيشمة تغسل فيه تاني
سلسبيل تضحك 😂
خشت هناء للمطبخ و فتحت المايكرويف ؛ حطاته فيه باش يجف
سلسبيل عيطت : لااا تو ينحرق
طلعاته هناء بسرعة : كيف الحل به ؟ اكيد قريب يروح
سلسبيل : جففيه بالاستشوار
هناء مشت بيه لدارها تجري تجفف فيه
سلسبيل تضحك : بري لوحيه استرلك
هناء تجفف فيه : لالا اهو مشي حاله ولّا حلو
سلسبيل : اني بننزل ، كملي اللي ف ايدك و الحقيني
هناء : به
___________________________
يوسف ف جنان صاحبه مهاب : متأكد ماطورها مليح ؟
مهاب : تي عيب يابرو ماتخممش
يوسف يشوف لسيارة خو مهاب بيشريها
مهاب : انت خودها اليوم و ارفع قلبها عند اول واحد متع ورشة و لو عجباتك مبروكة عليك
يوسف : عيب شهادتك فيها سادة
مهاب : والله ماتعيبها حاجة السيارة فل الفل ، هو كان يبي يبيعها مشي قتله خليها بالك واحد من الشباب ياخدها و نربحو فيه
يوسف ضحك : مبرد ****
مهاب يضحك
يوسف : خلاص امالا كلم خوك و قوله غدوا نجيب معاي الفلوس و نتم فيها
مهاب : تم
___________________________
أروى : يوسف روح ؟
سعاد مبتسمة : ايه جي اليوم و نورلي الحوش
أمال : جي امبكري ف المستشفى ريناه والله ماشاء الله عليه مزيان هلبا
سعاد فرحانة : ايه ريتيه اوه طالع لخواله
نجاة شبحتلها ع الجنب : من خواله وهو طبق الأصل من بوه و عمامه ؟
سعاد سكتت 😒
ازهار تضحك
أروى : وينه هو ؟ قداش خاطري نشوفه
سعاد : طلع عنده مشوار قال ؛ اكيد على جية
نجاة شبحت لأروى : شن امالا ماتعرفيشي ؟
أروى : نعرفه بالصور بس قداش ليا ماشفتاش من اللي كنت صغيرة و حتى لما جي اخر مرة كنا ف الجبل وقتها عرس بنت عمتي
خش عصام : السلام عليكم
ردو عليه : و عليكم السلام
عصام : خيركم مقعمزات و قالبات وجوهكم تقول عندكم عزي
نجاة ضحكت : شن تبينا نديرو ؟
عصام : افتحو المنظومة و زغرطو ، حسسوني اني عريس
سعاد ناضت تزغرط : روروروروروروروررري
أمال تكنطت : مش بوي مريض ؟؟؟؟
حلومة شبحتلها : بوك ناض و حاله باهي و ان شاء الله غدوا مروح ، خلونا فرحانين بِ اوخييك
عصام ضحك : ايوه هكي نبي الجو
وتلفت لأروى : نوضي افتحي المنظومة
أروى ناضت : شن تبي تسمع
عصام يتحرك بِ ايديه : افتحي زمزامات ! مرسكاوي ! اللي هو
اروى ضحكت و فتحت المنظومة على اغاني فاطمة الحمصة
عصام ضحك : اييييوه اهيا مليحة 😃
خشت سلسبيل لقت الدوشة : شنو اجديده ناض منها ؟
أمال فنصت فيها
ازهار : الحمد لله حاله كويس
سلسبيل ضحكت : باهي نقزها
عصام طلع
نجاة شبحت لسلسبيل : بوك وين ؟
سلسبيل : خليته راقد
سعاد : راقد لتوا ؟
نجاة شبحتلها و فنصت فيها : حتى هو واقف على رجليه من امس و ماسيبش بوه لحظة مابعده الراجل
سعاد سكتت
سلسبيل وشوشتها : نجاة يا مخوفتيهم كلهم 😂
______________________________
09:00 م
العيلة كلهم مقعمزين لوطه عند حلومة
خش يوسف : السلام عليكم
ردو عليه : و عليكم السلام
سعاد ضحكت : جيت يا اوسيفه
حلومة : اوسيفه جي الحوش ضوي
يوسف ضحك و وقف ف العتبة
أروى تشوفله و عيونها قلوب 😍
عصام : ليك هلبا عليها الجمعة هادي اه ؟
يوسف : هلبااا والله ليكم وحشة كبيرة
ناضت اروى تسلم : الحمد لله ع السلامة 😊
يوسف يسلم : الله يسلمك رورو
اروى تحشمت
سنابل : تعرف اسم الدلع متاعها 😂
يوسف : زمان كنا انادو فيها رورو
هناء مقعمزة جنب الباب تسمع و ساكتة ؛ شادة تليفونها لاهية فيه
يوسف بصوت واطي : درتي اللي قتلك عليه ؟
هناء شبحتله و تلفتت لتليفونها
يوسف : نكلم فيك
هناء من راس خشمها : ايه و هونا تلقاه قدام الحوش
يوسف : كويس
ازهار : قعمز اشرب شاهي
يوسف شبحلها : لالا صحة
ازهار : باهي خود من الغريبة هادي قنينة
يوسف : من مدايرها
ازهار : هناء
يوسف هز راسه بمعنى لا و قال بصوت واطي : ماناقصني غير تمزريط هناء
( قاصد انها تسمعه )
هناء سمعاته تكنطت : اسكت يا لساني 😑
و ناضت للمطبخ
يوسف يشوفلها و شاد ضحكته
عماد شبح ليوسف : تميت موضوع الانتقالة ولا مازال ؟
يوسف : تميته من اللي اني غادي
هناء ماشية للمطبخ و تسحن : والله مايتحشم ؛ باهي اللي ماصغرتش عقلي و رديت عليه قدامهم كان هذا درت العار
عماد : باهي كويس افتكيت من الغربة
يوسف : ايه رسمي
اروى تتفرج عليه و ساكتة
يوسف : من قاعد مع جدي ؟
عماد : بوك قعد
أمال : غر وين كان مدسوس هاليوم
ازهار : احمدي ربك انه ناض و مابيشي
أمال : الحمد لله
عماد شرين تليفونه طلع للجنان يرد
يوسف : هي نستأذنكم اني
حلومة : قعمز شوية ماهدرزناش معاك
هناء مقعمزة ع الطاولة ف المطبخ : زعما شن بيقول ع السبيدرو !! .. لكن والله يستاهل و شوية فيه
يوسف : تاعب هلبا يا حناي ؛ يومي كان طويل و مارتحتش بكل .. غدوا ان شاء الله ننزلك و نهدرز عليك
سعاد : ايه عندك الحق ، اركب انت و اني شوية و نلحقك نديرلك عشاك
يوسف : لالا متعشي
حلومة : باهي اركب ارتاح معليشي
جي يوسف باسها : ربي يحفظك
اروى تبتسمله 😊
حلومة : و يحفظك و يفتحها قدامك سلم وليدي
يوسف و هو راكب : تصبحو على خير
ردو عليه : و انت بخير
نجاة شبحت لسلسبيل : خوك وين ماقابلنيش ؟
سلسبيل : طلع من بكري العشية
نجاة : و ماجاش لتوا ؟!
سنابل : هارب من هناء لانه خنب سيارتها
سعاد : شدي ولدك يا نجاة خير مايضيعلك و يصيعلك تقعدي تعاني
نجاة شبحتلها : شن ريتيه مروح سكران ؟؟ ولا يلعب ف القمار ؟؟ اكيد عند صحابه شوية و يجي
سعاد سكتت
سنابل و سلسبيل يضحكو 😂
نجاة تلفتت قدامها : والله الله ، واتية
حلومة : اي صح يا نجاة ولدك مازال صغير تخافيه يخلط على مردف ؛ ديري عشرة عيون
سعاد شبحتلها بشماتة 😏
نجاة : شن يرضع ف صبعه ؟ كبر و راح راجل مصلي ع النبي عليه
عصام : لالا اصيل اصلي و ع الكيف ، اني نعرفه مليح
أمال : ماتسمعيش كلامهم وليدك معروف بأخلاقه و تربيته ماينخافش عليه
نجاة ابتسمت : ايه حتى اني واثقة ف تربيتي
سلسبيل و سنابل شبحو لبعض و سكتو 🌚
__________
يوسف وقف قدام الحوش لقي سبيدروه متغير ؛ استغرب
شده و قعد يشوف فيه
نزلت روان بنت عمه من فوق : يوسف !
يوسف شبحلها و ضحك : اهلااا
روان تسلم : الحمد لله ع السلامة
يوسف ضبطها : الله يسلمك
و قعد يشوفلها : ماشاء الله كبرتي و بديتي عروسة
روان ضحكت : ايه ريت 😂
يوسف يضحك : وينك ماريتكش
روان شدت راسها : تطبيقاات شهرية قريب نهبلللل
يوسف ضحك : ان شاء الله بالنجاح
روان : ان شاء الله
يوسف : نازلة لوطه ؟
روان : ايه ؛ تبي حاجة ؟
يوسف : قولي لهناء عمي من بكري ينادي عليها
روان و هي نازلة : حاضر به
يوسف قعد واقف يراجي فيها
______________________
نجاة : قولي يا سعاد ؟
سعاد شبحتلها : نعم
نجاة فنصت فيها : علاش باعتة بنتي للمطار 😡 ؟؟؟
سعاد تلخبطت : ماهو كلمني السنوسي و قالي شوفي حد يروح بيوسف لان قعد لاهي مع بوه هو و خوته
نجاة عاقدة حواجبها : ماتعرفيش تكلمي خواله ؟؟ ولا اي واحد من ولاد العيلة !!!
سعاد : هنيوه كانت معانا قلت اقرب وحدة
نجاة علت صوتها : اخر مرة تبعتيها من غير علمي اني و بوها
سعاد عوجت فمها : خيرك درتي منها قصة ؟ ماهي تسوق و تطلع بروحها
نجاة : تطلع للمكانات القريبة بس مش للمطار !! طريق خطيرة متع حوادث و خطف
سعاد قلبت وجهها و سكتت
هناء تسمع فيها من المطبخ و تدوي بروحها : خلاص يا ماما اسكتي حشمتيها
نجاة متعفلقة : لو انخطفت بعدين انتي دوريها و جيبيها
ازهار ترطب ف الجو : خلاص يا نجاة اللي صار صار المهم روحت بالسلامة و مافيها شي
نجاة : ماهو باش مرة تانية معاش تتعاود
كلهم يشوفولها و ساكتين 😐
عصام : كان فكرتوني راهو مشيتله غر موضوع الحاج فركسني
سعاد : معليشي اهي هنيوه مشتله 😏
نجاة شبحتلها و فنصت فيها
خشت روان : هناااء ؟
اروى : هناء ف المطبخ
مشت روان للمطبخ
خش احمد ولد عماد : ماما !! اعطيني امية بسرعة
ازهار فنصت فيه : هيا خش و ياسرك لعب ف الشارع ليل
أحمد : باهي ربع ساعة بس
ازهار : هيا خششش
أحمد : باهي غر اعطيني امية ، معاي ولاد الشارع بيشربو
ازهار : برا لأختك ف المطبخ
_______
روان : هناء ؛ عمي ينادي عليك من بكري
هناء وقفت : خيره ماتصلش بيا
روان : مانعرفش
طلعت هناء من المطبخ و ركبت
خش أحمد : عبيلي شيشة اميه
روان علت صوتها : الشيشمة قدااااامك
_____________
يوسف يراجي ف هناء : وينها هادي
هناء راكبة تجري ؛ لقت يوسف واقف تلخبطت
يوسف : هذا شني ؟
هناء : اها ؟
يوسف شاد السبيدرو : هذا نفسه اللي اعطيتهولك !
هناء سكتت
يوسف فنص فيها : تلعبي معاي ؟
هناء : ماهو شن صار ....
قاطعها يوسف : تو نوريك اللعب على أصوله
هناء خافت : نتأسف منك يا يوسف مش قصدي
يوسف هز راسه بإستهزاء : دكيها ف مش قصدك كل مرة
هناء تلخبطت
حط يوسف السبيدرو ف مكانه و خش للحوش
هناء تكنطت : جي من يطيحلي قدري 😓
______________________________
سلسبيل شرين تليفونها ناضت للمطبخ
لحقتها سنابل تجري
سلسبيل كيف بترد ..
سنابل : راجي نبيك
سلسبيل : خيرك ؟
سنابل : ريتي اروى !
سلسبيل : ريتها كيف ؟
سنابل : لما شافت يوسف عيونها قريب طلعو فيه
سلسبيل ضحكت : لالا مالاحظتهاش
سنابل : تعرفي قريب كلااته
خشت اروى : بنات
البنات شبحولها
أروى : ريتوه كيف رايح يهبل 😍
سلسبيل : من هو ؟
اروى : يوسف مني يعني
سنابل : ريحي روحك مرتبط
أروى : من قالك ؟
سنابل : لما نهدرز معاه ع الفيس كان يحكيلي
أروى : اكيد اجنبية و توا روح يعني باي باي
سنابل : لالا قالي ليبية و كانت عايشة غادي حتى هي لان بوها يخدم ف السفارة ؛ و روحت قبله بخمسة شهور
اروى سكتت
سنابل : اكيد تراجي فيه على نار
أروى تشوفلها : متأكدة ؟
سنابل : متأكدة امالا لا ؟؟ يخي شايفة حتى صورها ؛ موريهالي
أروى سكتت
سلسبيل شادة ضحكتها
سنابل : يعني نحيه من راسك ، اكيد روح باش يتزوج
أروى : اني ندير جهدي و خلاص يا صابت يا خابت 😊 ... و طلعت من المطبخ
سلسبيل تضحك : علاش تكذبي
سنابل : وهمية هلبا ممكن لو تدوي معاه يضربها كفوف
سلسبيل : انتي شن دخلك فيها اتدبر راسها
سنابل : شن رايك نلصقوله هناء ؟
سلسبيل : مستحيل ، مايتحابوش و كان يلقو يقتلو بعضهم
سنابل : اني هذا علاش قتلك هكي ، خلي نحببوهم ف بعضهم و نربحو آجرهم
سلسبيل : مش عارفة
سنابل ضحكت : والله نحصلو عليهم جو ، حني شن خاسرين
سلسبيل ضحكت : عادي به هو كساد كساد
____________________________
11:00 م
خش محمد ولد عماد للحوش ؛ لقي خوه محمود واقف ف الجنان من الجنب و عاطي بظهره يدخن
جاه من تالي و شده من عنفقته : شن ادير ؟!
محمود انخلع : اها ؟؟
محمد نحّا منه الدخان : اتدخن يا كلب
محمود : تي هاته جاي بلا جو
قلب محمد السبسي و حرقه ف فمه
محمود شد فمه و عيط : تي خير ***** يا راجل
محمد : علاش اتدخن و تهلك ف روحك من صغرك الزفت
محمود : ماليكش علاقة بيا ألهى ف عمرك بس
محمد شده من حوايجه يكركر فيه : خش الداخل و بلا عار خش
محمود يدفله ف ايديه : بتقول لبوي قوله مش خايف منه
محمد شده و ركبه معاه للحوش ..
__
عماد متعفلق : الزوز ينسرفوا لتوا ؟؟ مايعرفوش يروحو و يقولو عندنا حوش نقعمزو فيه !!!
أزهار : وليدات و تعرف جوهم يحبو يطلعو و يتلاقو مع صحابهم
عماد : و لما يضيعولك قولي معليشي وليدات
روان : توا يا بابا علاش تكشخ و مداير دوشة ؟ هما مهناش و جوهم مليح ؛ تعارك فينا علاااش ؟؟ حني شن دخلنا لما يجو هما عاركهم
عماد سكت
محمد فتح الحوش و خش هو و محمود
عماد وقف : وين كنت يا كلب انت وياه
محمد : اني كنت مع أصيل و القروب متع الجامعة
عماد شبح لمحمود : وانت وين كنت
محمد : كان ف الجنان مقعمز
عماد فنص في محمود : و شن كنت ادير ف الجنان ؟؟
محمود تكنطا و خش للحمام : لو كنا ف الجنان ووه و لو كنا برا ووه !! تبونا نقعمزو زي النتايات ف الحوش و خلاص ؟؟؟ ... و قربع الباب
عماد يكشخ : تقعمز تشد كتاباتك و تقرا يا امسخ ؛ ماكأنكش شهادة تنسرف و تتصيع طول الوقت
محمد و ازهار سكتو
أحمد يلعب بِ البليستيشن : و النبي اضربه يا بابا باش معاش يعلي صوته
عماد : ريحته دخان المسخ
أزهار : ماشميتش
محمد يرقع ف الموضوع : لالا اني اللي كنت معاهم يدخنو و ممكن علقت فيا الريحة
روان ضحكت ع الجنب : معاش تقعمز معاهم ؛ باهي حمودي ! 😏
محمد فنص فيها
_____________________________
12:30 ص
فتح أصيل باب حوشهم و خش
جاته نجاة تصيح : وين كنت لتوااا ؟؟؟
أصيل انخلع : نقصي صوتك
نجاة : قتلك وين كنت !!
أصيل : كنت مع محمد و باقي الشباب
جاته هناء تجري : هات المفتاح
أصيل مدهولها : هاك
هناء فنصت فيه : معاش تحلم انك تشوفه بكل .. و خشت لدارها
نجاة : اخرلك مرة تروحلي ف الوقت هذا فاهم ولااااا 😠
_____________________________
تاني يوم
08:30 ص
نجاة تصيح : بناتي مايكذبوش
أبلة غادة تكشخ : تي حتى صاحبتهم شاهدة ع الكلام اللي قالوه
سلسبيل و سنابل ساكتات
نجاة فتحت باب الفصل متع بناتها : أبرار ترا تعالي شوية
أبرار خافت و مشتلها : نعم ابلة نجاة
نجاة عاقدة حواجبها : حق بناتي لقحو للأبلة ؟!!
أبرار تلخبطت و شبحت للبنات
البنات يفنصو فيها
أبرار شبحت لنجاة : لالا ماقالولها شي
ابلة غادة انصدمت : هيييييه !! تكذبي معاهم حتى انتي ؟؟؟ و الملقاط اللي خديته منكم شني ؟
نجاة شبحت لبناتها : ملقاااط ؟؟
سلسبيل : ملقاط شني يا ماما تو حني نعرفو انّقو ؟؟
أبلة غادة : معاش تكذبي انتي وياهااا
أبرار : اني مانكذبش يا ابلة هما ماقالو شي و الملقاط اللي شديتيه مش مننا ؛ ممكن انتي متلخبطة
ابلة غادة علت صوتها : حيييي ع الكذذذذب !!
نجاة شبحتلها : مش محترمة عمرك ياغادة تكذبي و تتهمي ف البنات ؟؟؟
ابلة غادة مصدومة
نجاة تكشخ : و طلعتيني مانعرفش نربي و تبي تلزي بناتي من المدرسة !!!! اني تو نعرف كيف نتصرف معاك فعلا انتي اللي محتاجة التربية
ابلة غادة بدت تبكي : حرام عليكم تكذبوا فيا
سلسبيل تشوفلها بنظرة شماتة
جت المديرة : خيركم شن فيه ؟
نجاة شبحتلها : اللي حاطتيها إشراف شوفي شن طلع منها
المديرة مستغربة : خيركم ع الصبح !! غادة خيرك تبكي ؟
نجاة تحكيلها ف اللي صار : ...............
المديرة انصدمت : لاااا عيب هكي عاد
ابلة غادة تبكي : اني والله ماغلطت فيهم لكن هما لساناتهم طوال
نجاة تصيح : يلاااا لمي قشيشك و دوريلك مدرسة تانية تكذبي فيها تحررركيييي
المديرة : بالشوية يا نجاة صبح
نجاة : معاش نبي نشوف وجهها خير ماتلقىٰ روحها مفصولة من التعليم
ابلة غادة مشت و مازادت ولا كلمة
المديرة : من قبل يشكولي منها لكن ماتوقعتش توصل بيها الوقاحة للدرجة هادي
نجاة : ريتيها كيف ماتتحشمش !! قالت مانعرفش نربي !!
المديرة شبحت للبنات : خلاص برو لفصلكم
البنات خشو يضحكو
_____________________________
هناء راقدة ف دارها ، حست بحد خش عليها فتحت عين وحدة تشوف مني 👀
لقاته اصيل خاش على روس صوابعه بيخنب المفتاح من قجر الشكماجة
هناء تبيّت عليه و مدايرة روحها راقدة
اسماعيل من برا الدار : اصيل ؟ بتطلع معاي ولا بتمشي بروحك ؟؟
أصيل تكنطا ؛ يقول ف عقله ( تي اسكت مش وقتك )
اسماعيل : هيا وقت عليا بنمشي لجدك
أصيل يفتح ف القجر بالشوية
ناضت هناء بسرعة و شداته من رقبته : شن ادير
أصيل انخلع : نبي الشحن
هناء : على من تكذب ؟؟
اصيل سكت
اسماعيل : تي هيا يا ولدي
هناء : اهو طالعلك
و ادف فيه برا الدار : هيا هيا ؛ توكل بابا يراجي فيك
أصيل و هو طالع : ظلمتيني ياهنيوه قبل نبي الشحن
هناء طلعت معاه : برا شوفلك غيرها ، سيارتي معاش تحلم بيها
اسماعيل : خيركم دوشة ع الصبح
هناء : صباح الخير بابا
اسماعيل : صباح النور
هناء : حطه ف طريقك و معاش تعطيه السيارة حرام فيه
اصيل تكنطا : بلا حفر
هناء : والله شوية فيك
اسماعيل فتح الباب و طلع : تلقاني ف السيارة
اصيل : علاش الجو اهوا يا هناء
هناء : لما تكبر و تولي راجل نعطيهالك بااهي حبيبي ؟
اصيل تعفلق : احترمينا زي مانحترموا فيك
هناء ضحكت و خشت للحمام
_____________________________
سعاد خشت ليوسف ف داره تنوض فيه : اوسيفه ؟
يوسف فتح عيونه
سعاد : هيا نوض سلم ولدي خليني نشبع منك
يوسف شبحلها و ضحك : صباح الخير
سعاد قعمزت ع السرير بحداه : صباح النور و السرور
يوسف قعمز : شن نوضك توا ؟
سعاد : اني من يومي انوض بكري ولا نسيت
يوسف ضحك : مش عارف شورني نسيت
سعاد ضبطاته : والله و نورت حياتي من جديد يا وليدي
يوسف مضبطها : كنت نراجي بالساعة و الدقيقة امتى نروح و نشوفكم
سعاد باساته : ربي يحفظك ليا و يحضرني فرحك
يوسف : و يحفظك ليا يا غالية
سعاد وخرت : هي نوض أفطر معاي
يوسف وقف : خلينا نفطرو مع حناي مستاحشها هلبا
سعاد وقفت : باهي امالا اسبقني و اني تو نوتي الفطور و نلحقك
يوسف : به .. و خش للحمام
_____________________________
طلعت هناء من الحمام و خشت للمطبخ اتدير ف فطورها
ولعت الغاز و حطت عليه الحليب بتدير كاكاو : الفطور حلاوته باللمة ، اييه بالله لو يرجع يوم واحد من ايام الجامعة و نفطر مع صاحباتي .. مش نفطر بروحي ف الحوش و مانلقاش من ايسايرني ؛ لازم نخدم و نلهي روحي بدل هالكساد اللي اني فيه
طفت ع الكاكاو : ننزل نفطر مع اميمه احسن
وتت سفرة الفطور و بدلت حوايجها و نزلت
_________________________
حلومة مقعمزة ف دار المعيشة تتفرج ع التلفزيون
خشت هناء : امّيمه صباح الخير
حلومة ابتسمت : صباح الخيرات
هناء شادة السفرة : قلت ننزل نفطر معاك بدل مانفطر بروحي
حلومة : سلم بنيتي ؛ ماكأنيش عندي كناين مخلييني صايمة لتوا
هناء ضحكت و حطت السفرة : عندك حفيدة خير من عشرة كناين
حلومة : ايه والله صدقتي
هناء وقفت : خلي نديرلك نعناع و نجي
حلومة : تلقيه منشور ف الجنان
هناء و هي ماشية : ايه عارفة
______
يوسف واقف ف الجنان يدخن
طلعت هناء من باب الجنان شافاته : صباح الخير
يوسف شبحلها و ماردش عليها
خدت هناء النعناع و خشت للمطبخ
يوسف يشوفلها و ساكت
حطت هناء المية ع النار : الناس يصبحوا حتى ع اللي مايعرفوهمش !!
_______________________
خشت نجاة لفصل بناتها عندها حصة : السلام عليكم
البنات وقفو : و عليكم السلام
((( طبعا المدرسة مختلطة لكن الولاد فصول بروحهم و البنات فصول بروحهم )))
نجاة : صباح الخير
البنات : صباح النور .... و قعمزو
نجاة : هيا من توا اللي مش جايبة كتابها ولا كراستها توقف ع الحيط
البنات سكتو
نجاة : ماخاطريش نشيط ريقي بسرعة
وقفو زوز بنات و معاهم سنابل
نجاة شافتها تلخبطت : نقولكم حاجة ؛ قعمزو قعمزو اصلاً ماخاطريش نعطي حصة اليوم
__________________________
خشت هناء للدار : زعما اجديده امتى يروح
حلومة : اكيد مع الظهرية ؛ عمك السنوسي قال مش حانروح الا بيه
هناء قعمزت : والله رعشني عليه امس
حلومة : كلنا رعشنا يا هنيوه
خش يوسف : السلام عليكم
ردو عليه : و عليكم السلام
يوسف : صباح الخير حناي
حلومة : صباح الخير و الهني
يوسف قعمز : كيف حالك اليوم
حلومة : الحمد لله بخير
هناء تشوفله و تقول ف عقلها ( ماكأنيش مقعمزة قدامه )
حلومة : قدم افطر معانا
يوسف : امي شوية و بتنزل معاها الفطور
حلومة : و خيره هدا مش فطور ؟
يوسف يشوف للسفرة : لالا ماعجبنيش
حلومة شافتله بنظرة تعجب : خيره يا اوسيفه ماهو فطور زي الناس
يوسف : كولي انتي يا حناي صحتين
هناء تكنطت ؛ تقول ف عقلها ( كبري عقلك ياهناء و ماترديش عليه )
حلومة : والله ماعندك حق
يوسف سكت
هناء : خليه براحته يا امّيمه ممكن مستاحش ماكلة امه
يوسف شبحلها و سكت
حلومة ضحكت : اه قول هكي من الاول
خشت سعاد شادة السفرة : صباح الخير
ردو عليها : صباح النور
ناض يوسف خدي منها السفرة : هاتيها عليك
حطها و قعمز
سعاد قعمزت : كيف حالكم اليوم
هناء : الحمد لله
حلومة : الحمد لله ف نعمة
يوسف قدم ياكل من فطور امه : بسم الله
حلومة : و ان شاء الله هذا عجبك ؟؟
يوسف يغيظ ف هناء : اكيد ؛ اهو الفطور اللي يتكل
هناء متكنطية ماتبيش تشوفله
سعاد ضحكت : صحتين على قليبك
حلومة : شن قصدك ؟
يوسف : قصدي ان اللي كنت ناكل فيه ف الغربة لا شي قدام اهوا
هناء ساكتة و تشوف للتلفزيون
يوسف يشوفلها و مركز معاها
حلومة : هذا علاش نحيف معناها ؛ لازم تاكل و تقوي روحك
يوسف خبط بطنه : اما ضعف شوفي الكرشة كيف
هناء شبحتله
سعاد : مازال بنسمنك اكثر اكيد مستاحش ماكلتنا
يوسف ضحك : فكيني ؛ تو بنولي نتمرن فِ الصالة خير مانسرح ف الماكلة
هناء وقفت : صحتين
حلومة : وين ماشية ؟
هناء : بنركب نضم وعندي حاجات بنديرهم
سعاد : زعما اماليك بيتغدو لوطه !
هناء : مانعرفش ؛ على ماما شن تقول
حلومة : اليوم جدكم مروح اكيد يبي العيلة كلها ع الغدي
هناء : بالنسبة ليا بننزل اصلاً نراجي فيه
حلومة ابتسمت
سعاد : امالا ديري كيكة ولا اي حاجة للشاهي
هناء : حاضر به .... و مشت ركبت
يوسف يشوفلها و ساكت
حلومة : وين ازهار اليوم مغطسة
سعاد : بالك قاعدة راقدة تعرفيها تحب ترقد
حلومة : ازهار تحب ترقد ؟؟؟ ماهي زي الماكينة من اللي تنوض و هي تحبش من حاجة لحاجة
سعاد بإستهزاء : غر شن هو اللي ادير فيه
يوسف : غيرولنا الموضوع
حلومة شبحتله : قولي ! علاش هكي دويت قدام البنية كسرت بخاطرها و خليتها تنوض ؟
سعاد شبحتله : من بنية ؟
يوسف : اني دويت عادي ؛ لان رسمي ماخاطريش ف اللي حطاته
سعاد : قصدك على هناء ؟
حلومة : هنيوه وتت فطور و جاباته مشي خش يوسف قلتله قدم أفطر قال لا ماعجبنيش
سعاد شبحتله : مش عيب عليك !
يوسف : تي شن فيها و انتو درتو منها قصة ؛ اذا كانت هي خدتها بجو مليح
سعاد : شن قالت ؟
حلومة : قالت خليه براحته بالك مستاحش ماكلة امه
سعاد شبحت ليوسف : حشمتها عيب عليك
يوسف وقف : اني مش براني عادي
حلومة : كمل فطورك
يوسف : الحمد لله ... طلع من الدار و ركب لحوشهم
_________
هناء واقفة ع الروشن ف الدروج و تتكلم ف التليفون مع صاحبتها اسراء
( Flash back )
( استرجاع لرواية #أصحاب_ونسايب )
وصال لابسة و راقدة ف سريرها تراجي في وليد يطلع
اسراء : بنمشي معاكم وراي بتات
وصال : لا بتات لا اثاث ، مانقعدش نكر فيك وراي تقولي جايباتك من بطني
اسراء جلدتها بِ الشحن : خيرك ؟!!
وصال : ايه شن حركات المفرخ هادي ! طالعة مع صاحباتي تبيني نكرك وراي ريحيني ترا
اسراء : بري ملحي تو نطلع غدوا مع صاحبتي هناء
وصال : به زينة
_____
نرجعوا لرواية #صغار_العم
هناء تتكلم ف التليفون : لينا هلبا معاش تلاقينا من لما تم السيمستر
إسراء : ايه ؛ حتى عزمتك ف اسبوع ولد خوي ماجيتيش ياباردة
هناء ضحكت : يومها جونا ناس ماقدرتش نطلع
اسراء : ........
( يوسف راكب ف الدروج يسمع فيها تتكلم )
هناء : شن رايك نتلاقو غدوا ف كافي
اسراء : عادي به حسام مايقول شي
هناء تلعب بشعرها : ليك وحشة كبيرة يا بيبي
( يوسف واقف وراها و هي ماتندريش ؛ سمع كلمة بيبي عقد حواجبه )
اسراء : و اني شن نقول ياهنو
هناء ضحكت : نلتقي غداً امالا
اسراء : ان شاء الله ، تو نشوف باقي البنات بالك يجو
هناء : حلو الكلام
اسراء : اوكى باي باي
هناء : قُبلاتي 💋
اسراء ضحكت : و لكِ أيضاً
سكرت هناء الخط و تلفتت ؛ لقت يوسف وراها انخلعت
يوسف عاقد حواجبه : لمن توزعي ف قبلاتك ؟
هناء شبحتله و ماردتش عليه ؛ خشت لحوشهم و سكرت الباب
يوسف تعفلق و خبط ايده ع الحديد
يـتـبـــع ... 💗
_________________
لن أسمح بنقل الرواية دون ذكر المصدر ‼️