24/25
[٢١/٢، ٨:٤٨ م] null: .
البـارت 24 ¤
فـي قلبـي حكـايـة
👌🏻👇🏻 😍
📚 @rewayatyamania 🇾🇪
الدكتور: خرجي مافي نفسش يافرح ولاتكبتي والبكاء مش عيب ولا انو ينقص من الشخص
انا بنفسي تمر عليا مواقف وابكي
فرح بسرته سكتة وبتحاول تمسك دمووعهاا
الدكتور: انتي انوجعتي ويحق لش تبكي ليش بين احس انو بتفكري ان البكاء للضعيف او اللي قلت حيلته
ماعرفتش الا شخصية قوية والبكاء ماعينزلش من قدر شخصيتش
فرح وكأن هي منتظرة لهذا الكلام نزلت دموعها وبكت
الدكتور بسرها وحس براحة انها بكت عشان تخفف شوية من الضغط على نفسها
فرح: ليش ليش كل مااوثق بحد يخون ثقتي ليش ايش فعلت لما يحصل معي هكذا وكل مرة انخذل واقول ماعاد شوثق بحد والاقي نفسي اوثق من اول وجديد وكل ما يتغلق جرح ينفتح جرح ويوجع الاول وكأنني مش فارقة مع حد
وكل ما اقول لقيت اخت سند تكون عدوة وتطعني
ليش هكذا ليش ي دكتور
انت داري كان اللي تقول انو يقرب لها يتصل لاعند امي نص الليل ويقول لها وين هي فرح
واقوم الصبح وامي تسألني: فرح تعرفي احد واقول لها ماشي يماه مابه
وتقول ولاشي
@rewayatyamania المصدر الأول للروايات
ولايوم مريت من غرفتها وسمعتها بتجاوب تلفونها ولانو صوته مرتفع ونص الليل جاوبت بتقول من معي وهو بيقول لها وين هي فرح
انا سمعت الصوت وافتجعت ماعاد قدرت ارقد وفهمت ليش امي كانت تسألني الصبح
ولايوم سألتني وقالت انتي اديتي الرقم حقي لا احد
قلت لها ماشي
صاحباتي بس
قالت هاه انا بسرتها وحاكيتها انني سمعت اللي اتصلها
وهي قالت بكل هدوء وتعرفيه
جاوبتها بكل ثقة ماشي
قالت انا دارية بتربيتي لذلك ماشقلش بعد كلامش شي
وانا سرت المعهد هذاك اليوم وانا في نفسي والله لو واحدة غير امي كانت قتلتني بعد هذا الشي احنا في مجتمع مايرحم مع ان امي امية وماقريت ولاتعرف الكتابة وتلفونها قديم تعرف تجاوب وتتصل بالاتصال السريع بعد ما نفهمها كل رقم لمن لكن الله يحفظها احسن من المتعلمات اللي ممكن لو واحدة ثانية في مكاني وامها متعلمة اقل شي كانت موتتها وشبعتها ضرب لكن امي غير
وصلت المعهد واتفاجأت ان هي غايبة
واللي بتقول يقرب لها جاء لاعندي قال فلانة تسلم عليش ماعاد اشتي اذكر اسمها حتى يادكتور
انا بسرته سكته وبكل ادب رديت الله يسلمها ودخلت الكلاس
كملنا الكلاس وكانت نظراته مش طبيعية
وانا بكل حسن نية كنت افكر انو عيقول لها كيف انا بدونها وماكنت دارية انو بيفكر بشي ثاني وتفكير قذر شبهه
ولايوم اتصل لعمتي وبيقول لها انا احبش وهو راكن انه رقمي لا و ضبح من امي كل ما اتصل تقوله من انت ماتشتي ياقليل الذوق
فقرر يجرب الرقم الثاني ومش داري انو بيوسع الموضوع عليا بس الحمدلله امي وعمتي متفهمات وداريات كيف انا ما اخبي عليهن شي يحصل معي
لذلك واثقات مني
وفي هذك الليلة عرفت انو هو
لما ردت عليه عمتي من وين جبت رقمي وقال من صاحبتش اللي كنت اعتبرها قريبة بس ياحسافة طلعت ماتستاهل الحب والتقدير واكتشفت انش تستاهلي
كل شي
عمتي وقتها عرفت انو واحدة من صاحباتي
والصبح بلغتني باللي حصل معاها
وعرفت ان هي على طول محد كان يقول معه قريبة الا هي
ولما سرت المعهد هذاك اليوم مالقيت حد منهم وقالوا انهم خرجوا
ولما روحت وصلتني رسالة بأنو عيطرح لي هدية في السكرتارية واول ما اوصل المعهد اخذها
عمتي حظرته وكلمتني بكل شي وقالت اغير المعهد وانا رفضت ما كنت اشتي ابين لهم انني خايفة منهم او انو حصل شي
بالعكس اثبت لهم انني قوية واهلي واثقين بي رغم اللي فعلوه معي واللي فعلته صاحبتي بي وخانت ثقتي
وكانت هذه وجع قووي لقلبي ماقدرت انساه يادكتور
الدكتور بيبسرها ومبتسم وبيلاحظ كيف ان هي رجعت تتكلم طبيعي لان هي انفعلت واتنرفزت وخرجت مافي قلبها
شافته بيضحك استغربت؟
مالك يا دكتور
الدكتور: ولاشي بس لحد الآن اقدر اقول اتجاوزتي نوعا ما صدمتش
فرح بصدمة: صدق
الدكتور: اكبر دليل كلامش بدون لعثمة بسبب انفعالش
فرح ودموعها ينزلين
الدكتور: الحمام من هناك سيري غسلي وجهش وخذي نفس الجهد اللي بذلتيه كبير
فرح: مش عارفة كيف اتشكرك يادكتور
الدكتور: ولو هذا واجبي
ولاتنسيش انني كنت سبب في انهيارش
فرح سارت الحمام وماسمعت آخر جملة منه
الدكتور تنهد: وبداية المشوار اليوم نجح
سيف بيدق الباب اليوم تأخرت عند الدكتور
الدكتور: اتفضل
سيف: بيتلفت وين فرح
الدكتور: بتغسل وجهها
سيف بخوف: مابه مالها
الدكتور: مابش شي بس وانا بين اسوي لها التداعي الحر وخليتها تتحاكى عن اللي بداخلها بكت والحمدلله اتحسنت
سيف: وذاحين كيف قد حالتها ي دكتور
الدكتور: الحمدلله التحسن واضح
بس يا اخ...
سيف: سيف اسمي سيف
الدكتور: ايش تقرب لفرح
سيف: عمها وبحسبة ابوها
الدكتور توتر شوية: اشتي اكلمك بشي
سيف: ايش ي دكتور خير
فرح خرجت وبسرت عمها
وابتسمت له
الدكتور بسرها وبيشوف كيف ملامحها بعد البكاء
سيف: مالش؟ بكيتي
فرح: ...
📚 @rewayatyamania 🇾🇪
[٢١/٢، ٨:٤٨ م] null: .
البـارت 25 ¤
فـي قلبـي حكـايـة
للكاتبتين: ياسميـن أحمـد وإلهـام البحـري
👌🏻👇🏻 😍
📚 @rewayatyamania 🇾🇪
سيف: مالش؟ بكيتي
فرح: مابلا انفعلت شوية
الدكتور همس لسيف: لا تحاكيها ليش انفعلت هذا شي خاص
سيف غمز له
فرح بسرتهم سكتة وقالت وين هي امي؟
سيف: خارج
فرح خرجت بعد ماتشكرت الدكتور
سيف: اتفضل يادكتور
الدكتور : به شي اشتي اوضحه لانو فعلاً اخوك مافهمني صح وشاف الموضوع بطريقته هو
سيف بدأ يتوتر: اتحاكى يادكتور لانني بدأت افقد اعصابي
الدكتور: ولاتفقد اعصابك ولاشي
الموضوع ومافيه وبدأ يحكي له كيف طبيعة علاقته بفرح
سيف بهدوء: خير ي دكتور
اخي شخص عصبي وانفعالي فلما شاف موقفكم ماقدر ينتظر تفسير
ووقع اللي وقع
الدكتور: اشتي اعتذر منكم
ومستعد اصلح غلطي بالطريقة اللي تشتوها وترضيكم
سيف: ولابه شي يارجال سوء فهم وانحل وهي تعبت بس بسبب العصبية اللي شافتها من ابوها
الدكتور نزل راسه
سيف كبر الدكتور في نظره: ولاعليك شي يادكتور
الدكتور بشكر وامتنان: استسمح لي من الوالدة
سيف: ابشر ولايهمك خاطرك يادكتور
الدكتور: في حفظ الله
عند فرح:
الحجة فاطمة: حيا ببنتي
فرح بضحكة حضنتها
الحجة فاطمة: كيف بتحسي ذاحين اتحسنتي
فرح : ايوه يماه
الحجة فاطمة: عيجعلش في خير عهدي وبعدي
فرح: الله يجبرني بعافيتش ياروحي الغالي
رغد : ماشاء الله رجعتي تتحاكي ساع اول
فرح : ايوه الحمدلله
رغد بفرحة حضنت بنت اخوها
سيف خرج وبسرهن: هيا عنروح والا وقت المحاجفة
فرح بسرته وضحكت: يلا هيا
وهم في الطريق
مارأيكم نسير نتعشى في مطعم نغير شوية كل يوم في البيت في البيت
فرح: ايوه هيا نلوي لابعدا وبعدها نتعشى
رغد : ايوه يا اخي ضبحنا
سيف بسر امه : هيا ماقلتي يماه
الحجة فاطمة : على ماتشتوا يا ابني
@rewayatyamania المصدر الأول للروايات
عند خالد:
في العمل فوقه عمل حق ثلاثة ايام وبيفعل عمله بكل اخلاص
وصلته رساله من مرته بتطمن عليه ايحين عيروح ابتسم ورد عليها برسالة:
ساعة ان شاءالله واروح لاتخليش الجهال يرقدوا
فيروز وصلتها الرسالة استغربت لما قرتها ليش ما به
ردت عليه برسالة: ليش مابه؟
خالد بسر رسالتها وضحك وفي نفسه الفضول قتلها و بيحاول يكمل عمله بسرعة
شاعوضكم ان شاءالله والله يقدرني افرحكم وكمل عمله وهو بيتوقع كيف عتكون فرحتهم لما يخرجهم
وقت العشاء:
فرح في المطعم مع امها وعمتها وعمها سار يطلب
عند خالد وصل البيت:
وهم متجمعين بيبسروا التلفزيون
خالد: السلام عليكم مساكم بالخير
الكل رد عليه
فيروز بتبسره وفي عيونها سؤال ليش قال تخليهم ذاهنين
خالد فهمها وقال قوموا البسوا يله عنخرج نتعشى خارج
الجهال صاحوا وساروا يبدلوا
فيروز قامت وقالت: خليتيني قلقة وانك تشتي تخرجنا
خالد: او ماتشتي تخرجي
فيروز: مع مع وطارت للغرفة تلبس بسرها خالد وضحك
وصل خالد هو وفيروز وجهالهم المطعم
خالد: عمر ابسر لنا طاولة اقطب
عمر: حاضر يا اباه وبيدور طاولة فاضية ولقي بقعة فاضية
خالد: انا شاعشيكم على ذوقي
رهف بسرت لاعنده وسكتت كانت تشتي تقول انها تشتي بروست
خالد بسرها واشر على عيونه: احلى بروست لاحلى رهف
رهف ضحكت: كيف دريت يا اباه
خالد: بنتي واعرفها
وسار خالد يطلب وابسر اخوه سيف
سيف لمحه وسلم عليه
خالد: مع من جيت؟
سيف: مع فرح وامي ورغد
خالد وهو مطنش لبنته: وامي هانا وين انتوا جالسين
سيف اشر له: هانك في الزاوية
خالد: تمام
طلبوا وسار خالد مع سيف
وعمر بسر عمه ورجع للطاولة وقدو ضابح
فيروز: هيا مالك ياعمر
عمر: انتي دارية يماه ان عمي سيف هانا
فيروز: احلف
عمر: والله ابسرته وهو بيحاكي ابي وسار معه للطاولة
فيروز بهررت: يوه يوه كيف يسير وهو مع مرته
انبع ابسر مابيفعل
عمر سار وابسر من بعيد فرح وجدته وعمته
ورجع: جحفة لنا يماه
فيروز بقلق: مابه
عمر: فرح هانا وجدتي وعمة رغد
فيروز باستغراب: مابيفعلين مع سيف
عمر: بيخرجهن يلوين
فيروز: والله وسبرت لهن وانا قصدي ان مرة عمك هانا يله طز ماعلينا منهم
عمر: كيف ماعلينا منهم هم عيجغروا ابي وعيجي يتقارح فوقنا ذاحين وعتخرج الخرجة من روسنا
فيروز سكتت..
ايمن: ليش مادخلهم ياعمر
عمر ابسر لاعنده: سير سير سلم على اختك هيذك هانك
ايمن: المفروض نسلم عليها هي الكبيرة
عمر: غلق لقفك واهجع
ايمن بسره سكته وطنش
رهف ورنا بيسمعين سكته ومفتجعات ابوهن يقلب
عند فرح بسرت عمها ووجهه مقلوب شويه
فرح بطفولة : طلبت لي ياعم البيتزا صح
سيف ساكت ومن وراه خالد
ابسر امه وسلم عليهم وهي ساكته
خالد: كيف انتي يماه
الحجة فاطمة ساكتة
وفرح بسرته وسكتت
ورغد بتبسره بنص عين
خالد: او غاثية مني
الحجة فاطمة: اخر من قبالي مااشتي ابسر صورتك
سيف: ....
📚 @rewayatyamania 🇾🇪