18/19
[٢١/٢، ١:١٥ ص] null: .
البـارت 18 ¤
فـي قلبـي حكـايـة
👌🏻👇🏻 😍
📚 @rewayatyamania 🇾🇪
خالد: هههه الحمدلله بسرتها بعيني لاصدقت احد ولا احد قال لي شي
سيف: اينه هذا وقع
خالد: في الجامعه سرت ابسرها ووو وحكى له ماوقع
سيف: سمعت منها سألتها
خالد: ماشي كيف ازيد اسمع منها وقد بيقول انو خطيبها مالك بعقلك او مجنون
سيف: يا اخي
خالد قاطعه: ولا اشتي اسمع شي كلمة وعشر سوا
جامعة مابش وخرجة ودخلة مابش
تجلس مرزوعه في البيت لوما ابسر خبرها وياخوفي بس تكون وطت راسي وخرجت معه
سيف: عيب عليك لاتنساش ان هي تربية امك
وربتها احسن تربية
خالد: من قال لك ماقلت شي على امي فعلت اللي عليها بس الغلط عند بنتي بسرتها مرة كبيرة بتضحك عليها
سيف: ليش مش انت واثق من بنتك؟
خالد: مابش ثقة وهجعني
سيف بسر لاعنده وقام رجع لاعند فرح
الحجه فاطمه كانت تمسك يد فرح وتحببها فرح: قوا وانتي امي وابي تحاكي قولي اي حاجه بردي قلبي
فرح بقهر وغبنه طارحه راسها على الجدر ودموعها مثل البرد
سيف دخل للغرفه وجلس جنبها وبيمسح دموعها بيده: فرح تحاكي دافعي عن نفسش انا واثق فيش اكثر من نفسي عارف انه ما ادى لش فرصة تقولي شي بس تحاكي انا عتسمعش انا عتدي لش فرصة
فرح شهقت شهقه قويه وطرحت يدها على قلبها
ونطقت كلمة واحده (( قلللبي)) ودوخت
سيف: فرح فرررررح
الحجه فاطمه ببكاء: قوا يا سيف أبسر ماتفعل لبنتي بنتي عتموت بين أيدينا
رغد: قوم قوم نشلها المستشفى
سيف: لبسيها الحجاب سوا
رغد بترفع لها الطرحة وبسرت الدبوس في رقبتها
وصاحت سييف وبكيت من الخوف عليها
الحجه فاطمه: مالها مالش صحتي مالبنتي
رغد: مالها شي يمه قومي ننزل وهو عيحضنها واشرت له يبعد الدبوس
نزلين وخالد في الدرج
سيف وقلبه يوجعه بعد الدبوس حق الحجاب من رقبتها ونزل دم حضنها في يده: حسبي الله فيك يا خالد ونزل
الحجه فاطمه: الله يحرق قلبك يا خالد مثل ماحرقت قلبي على فرح
خالد: بين اقول لش بنتي
الحجه فاطمه: كانت بنتك زمان ماذلحين هي بنتي انا الذي ربيتها انت رجمتها وسرت تتزوج وسمعت كلام مرتك وفلتني انا وخواتك وبنتك
رغد: خلاص يمه هيا ابردي لش الكلام مايفيد مع شخص وصل بنته للموت وعاد عنده جراة يقول بنتي
خالد: انتي اسكتي
رغد: واذا ما سكت ماعتفعل عتضربني ساع مافعلت بفرح مايضرب المكلف الا شخص ناقص الرجولة ونزلت هي وامها
وسيف بعدهن
خالد: وين عتشلها هات بنتي والله لذبحها
سيف دهفه ونزل: لو انت رجال جي بعدي أقسم بالله لا اطرحك بالرصاص وانت اخبر
مش تفلتها وتنذقها وتجي تقول بنتي لو انت واثق منها عتسألها مابه ومن هو مش تفعل هكذا ياقليل العقل
خالد: مشو على وجهك
سيف: ماشتفاهم معاك ذاحين لنا خبر معك انا واخوتك ونبسر
وشل فرح المستشفى
@rewayatyamania المصدر الأول للروايات
عند فيروز بتسمع مابيوقع وهي مبرقطة تشتي تدرى ماوقع بس مش ساطية من خالد قد حلف عليها يمين
قدو وقت الظهر وصلوا عيالها من المدرسة
بنتها: يماه ابي هانا يعني قد الغداء جاهز انا جاوعة
فيروز مطننه وبتفكر: يمكن مسكها مع واحد او ماله لوما قلب عليها هكذا
عمر: وووو اماه مالش مطننة وين ابي
فيروز: هاه مالكم
عمر: مالنا شي بنقول ابي هانا
فيروز: ايوه هوذك في المكان جالس لا احد يدخل لاعنده هو ضابح
بنتها: ناهي يماه شاسير ابسر مابه في المطبخ
فيروز: اجلسي عاد اسير انا
بنتها: تمام
فيروز: سيروا انتم بدلوا وانا عتجهز غداء قطبه
فيروز في المطبخ جهزت الغداء الصباح كانت ناويه تسير عند ام فادي لكن زوجها روح وماسارت
حميت الحيمشة من الصبح
كنت عاد اسير مع ام فادي ولا وقع حق الوساطة لكن سهل
.
.
وقت الغداء :
قربوا الغداء في المكان رهف سيري داعي ابوش
رهف: حاضر
سارت رهف تدعي ابوها
فتحت الباب بعد مادقت عليه: اباه هيا غداء
ابوها بسرها وذكر مافعلت فرح: اخرجي من قبال وجهي عليكن لعنه بنات وعلى من يدي بنات
رهف بسرته سكته
خالد شل صحة الماء وضربها وجت عرض الجدر وهي مبلودة من ابوها: بين اقول اقلعي
فيروز سمعت صوته وافتجعت على بنتها وقامت والجهال قاموا بعدها
وقد رهف بتبكي وحملت للمكان حقها
فيروز وهي بتصيح: مالك على البنت جت تقولك غداء مش تضبح بك فرح وتجي تقلب فوقي انا وعيالي
خالد: اتمسي وخيرة الله على دمش اقلعوا من قبالي ما اشتي ابسر صورة واحد منكم
فيروز: ابسرنا والا ما اشتيت الحجة عندي انا قلنا تجي تتغدا وتجلس مع عيالك قد اسمك هذاك اللي في العمل واصل
خالد قام خرجها وغلق الباب على نفسه وفيروز منصدمة منه ومن تصرفاته
ابنها عمر بسر مافعل ابوه: ماله يماه قالب صورة
فيروز : مدري مافعلت بنته وجاء يقلب علينا
اخطى اخطى يا ابني نبسر مالاختك
ايمن: مافعلت فرح يا اماه
رنا: ماوقع
فيروز: اسكه انسوا ان معاكم اخت اسمها فرح مامنها الا حريق الدم والنثرات
📚 @rewayatyamania 🇾🇪
[٢١/٢، ١:١٦ ص] null: .
البـارت 19 ¤
فـي قلبـي حكـايـة
👌🏻👇🏻 😍
📚 @rewayatyamania 🇾🇪
عند فرح في المستشفى :
وصل عمها للطوارئ في المستشفى
وبدأت الممرضة في اجراءات الاسعافات الاولية لها
وبعد ساعة من القلق على فرح خرج الدكتور من غرفتها
سيف انتبز (قام بسرعة)لاعنده: مافيها يا دكتور
الدكتور: صلِ على النبي مابش فيها شي خطير
بس اشتي اسألك
سيف: الحمدلله..اتفضل يادكتور مابه؟
الدكتور: ايش وقع معاها لما وصلت لاهذه الحالة
سيف: مشاكل عائلية يادكتور
الدكتور وهو بيمشي لمكتبه مع سيف: مهما كان البنت جاها انهيار عصبي والانهيار العصبي مايجي من مشكلة بسيطة البنت محتاجة الآن لراحة تامة وهدوء
سيف: ان شاءالله يادكتور شانتبه لها من عيني
الدكتور: انت ابوها؟
سيف: عمها وبمثابة ابوها
الدكتور: وين ابوها؟
سيف مادري مايقول له اااخ يادكتور وسبب هذا كله هو ابوها وبكذب: مسافر خارج البلاد
الدكتور ووصلوا للمكتب :
اتفضل اجلس اشرح لك حالتها وماتحتاج
سيف: طيب يادكتور
الدكتور: اشتي اوضح لك موضوع تعبها
سيف: مابه يادكتور اقلقتني
الدكتور : ماشكذبش عليك واقولك هي بخيرة صح ان هي بخيرة ومابش فيها اي مرض عضوي بس مرضها اقوى وهو نفسي
سيف: مافهمتش
الدكتور: حالتها الآن محتاجة استقرار وهدوء وراحة ومحتاجة لدكتور نفسي ضروري
سيف بشوية عصيبة: بنتي مش هي مجنونة يادكتور
ملاحظة :
الاغلب يعتقد انو اذا سار لعيادة نفسية واستشار دكتور نفسي معناه انو مجنون وهذا اعتقاد خاطئ... كلنا بنعاني من الاكتئاب والضيق ومازلنا مرتبطين بالواقع ونمارس حياتنا بشكل طبيعي اما المجنون هو شخص غير مرتبط بالواقع ويعتبر شخص ذهاني(مجنون)
اما الشخص العُصابي شخص مرتبط بالواقع بس يعاني من الضيق والاكتئاب والهستيريا وهذا يمثلنا كلنا
بس تجي اوقات الشخص محتاج يفضفض وشخص يفهمه وهذا ما يتم الا بالدكتور النفسي المختص(علم النفس الاكلينكي) تحس انو الكل مش فاهمك لذلك ينصح بزيارة عيادة الدكتور النفسي... هذا الكلام كلام علمي واللي حابب يبحث ويتعمق في الموضوع له الخيار
نرجع للرواية:
الدكتور: محد قال ان هي مجنونة بس منهارة يا اخ...
سيف: سيف
الدكتور: ايوه يا اخ سيف لذلك محتاجة لدكتور يساعدها وتخرج من الصدمة اللي هي فيها
سيف: خير خير
الدكتور: كل ماتأخرتوا كل ما استصعب علاجها وكثرت جلساتها مع الدكتور النفسي ياحبذا لو تستعجلوا واذا قررتوا به دكتور نفسي ممتاز اعرفه شخصياً فاهم عمله وبيحضر للماجستير صح انو مازال طالب بس ثقافته في مجاله واطلاعه خلته دكتور وبأمتياز
سيف: اطمن الاهل وابلغك يادكتور
الدكتور: ان شاءالله واتذكر كلامي
سيف قام وسار لاعند امه
@rewayatyamania المصدر الأول للروايات
عند فيروز :
طلعت هي وجهالها لاعند رهف
فيروز بسرتها وهي بتبكي حضنتها: مالش ي روحي ماقال لش؟
رهف بتبكي
اخوتها بيبسروها سكته
عمر: مالش يارهف ماقال ابي؟
رنا سارت جنبها وحضنتها
وايمن بيفكر ايش وقع لما ابوه اتصرف هكذا
فيروز مسحت دموعها وبحنان الام: ماقال لش؟
رهف وبتبكي: قااال ااننووو وتبكي
فيروز: خلاص لاتبكيش
رهف: قااال علييككن لعننة بنات وتبكي بقوة
فيروز: حسبي الله عليك ياخالد كيف فعلت ببنتي
ملاحظة :
من الاخطاء الشائعة في الامهات عندما الاب يغضب على احد من ابنائه او يحصل موقف مزعج ايضاً تقوم الام بإلقاء كلمات مسيئة للاب امام الابناء وهذا شيء يولد العقوق لدى الابناء تجاه الاب
ومن المفترض تكون الام هي القدوة الاولى والمعين للابناء للبر تجاه الوالدين
ونحن كجيل قادم مننا من سيكون أب ومنا من ستكون أم لنتخذ طرق تربية سليمة وللنعم ببر ابنائنا مستقبلاً ولنحترم ابائنا وامهاتنا
رهف هدأت شويه: هو ابي يا اماه
فيروز: لابه لكن تلبه لاعاد جاء اب
ايمن: ليش فعل هكذا
رنا: كله بسبب فرح قالت امي
عمر: قلك اخت اخت مه
اخت مايجي منها غير المصايب وشل نفسه وسار مكانه
فيروز: بين اقولكم مابش معاكم اخت اسمها فرح هجعونا
رهف: بس قدهي اختنا يا اماه
فيروز: لاعاد جت اخت ابسري مافعلت بش وكيف خلت ابوش
رهف بحرقة سكتت وقامت تغسل وجهها
رنا وايمن: هيا نتغدا يا اماه
فيروز: يلا هه انزلوا واخطوا اتغدوا
.
.
سيف عند الحجه فاطمة ورغد
الحجه فاطمة: سيف هيا مه ما قال لك الدكتور طمني قلبي بيلهب عليها
سيف جلس جنب رجلها: صلِ على محمد يمه فرح مافيها شي بخيره بس جاها انهيار عصبي بسبب ابوها وبسبب المشكله الذي وقعت معها
رغد: ياقهررري عليش يا فرح جعلي مكسر
الحجه فاطمة: ناهي واي حين عيخرجوها
سيف: ماينفع نخرجها اليوم إن شاء الله غطوة لوما تهدأ حالتها وتوقع احسن
رغد: طيب تمام ومن عيجلس معها عيخلونا كلنا
سيف: ...
📚 @rewayatyamania 🇾🇪