قلوب تتراقص على انغام الالم - الفصل 34 - بقلم ROoOnQ - مكتملة | روايتك

الجزء الـ|[34]|ـرابع و الثلاثون .. .. . جلست جنب خالتها بعد ما قدمت لهم القهوة .. و هي للحين ما استوعبت اللي قاعد يصير .. أم راكان:ما شاء الله تبارك الرحمن أنتو بنات نورة ..! ابتسمت الجازي:ايه يا خالة .. أكيد كنتي تعرفين أمنا .. أم راكان:و الله هي مرتين اللي شفتهم فيها .. بس ما شاء الله كانت على طول تذكر الله .. زفرت ليان بكل ضيق .."الحين خالتي وش تقرب لهم" .. جنى:تعرفين عنها شيء ..؟! أم راكان:من أمكم ..!! لا والله .. بس هي كانت صديقة أختي سمر الله يرحمها .. الجازي بكل صدمة:توفت .. همست جنى:الله يرحمها .. الجازي:طيب ما تدرين شيء عن البنت اللي كانت معها ..!! أم راكان:قصدكم أختكم ..! جنى بكل حماس:تعرفينها يعني ..؟! أم راكان:أكيد بعرفها .. يعني أختنا بتجيب وحدة غريبة عندها و ما يكون عندنا علم ..! الجازي:طيب وينها الحين ..؟! أم راكان:سمر توفت من 11سنة .. فـ حادث سيارة على طريق الشرقية .. و محد من الأهل رضى يأخذ جوري عنده ..! جنى:جوري .. بس هي اسمها جواهر ..!! زفرت بكل ضيق:سمر الله يسامحها .. غيرت اسمها و سجلتها باسم زوجها الله يرحمه .. الجازي:طيب بعد الحادث وش صار ..؟! أم راكان:دخلوها ملجأ أيتام و عاشت هناك بس .. قاطعتها ليان بكل صدمة:لحظة ..-لفت على جنى:موب هاذي سالفة جوري صديقتك .. نظرة توهان بانت بعيون جنى .. طقت وعد الباب بكل هدوء و دخلت .. :السلام عليكم .. أم راكان:خير وش جايبك ..؟! ناظرة امها بنص عين:فيه وحدة عند الباب .. سألت عنك و عن ليان ..! –بكل ضيق:اليوم معجبيكم كثير ..؟! وقفت ليان:أنا بروح أشوف من هي ..؟! لفت جنى على الجازي:أكيد أنها تقصد جوري صديقتي .. أنا أعرف عنوانها و هي عايشة هنا .. أم راكان بكل استغراب:ايه صحيح و أنا شفتها بـ زواج ليان .. جنى:أجل هي .. دخلت ليان و تنحنحت:احم .. احم .. التفت الكل عليها مستغرب ..! ابتسم جوري بكل إحراج:السلام عليكم .. آسفة جيت من غير ما اتصل ..! .._.._.._.._.._.. بشاير:لا تخافين .. نص ساعة و كل شيء قاضي .. وسن:يا بعد عمري و الله إني قلته محد غيرك بيخلص موضوعي .. ابتسمت:افا عليك بس .. كم سوسو عندنا ..-رفعت عيونها جمان:إلا أختك وش فيها ما تتكلم .. – همست:طرمة ..! ابتسمت وسن:لاء وش دعوة .. بس مستحية منك .. ابتسمت بشاير:وش تستحين خلاص .. دامني صديقة وسن بصير صديقتك .. و إلا ..؟! ابتسمت لها جمان .. بشاير:شكله ما في أمل تنطقين ..-لفت على وسن:ريم مسوية بارتي جامعة فيه البنات بمناسبة نجاحها .. بتجين صح ..؟! وسن:لااا .. مستحيل للحين ما ذاكرت للقدرات .. بشاير:وش تذاكرين .. مجنونة أنتي ..؟! وسن:لا يا عمري .. أنا أبي أدخل الجامعة بمجهودي .. يكفي اللي صار مع ديم بنت أبو صالح .. بشاير:ايه والله ما يسوى عليها طاحت بيد مراقبة نذلة .. وسن:المراقبة تسوي شغلها الغلطة غلطت ديم .. بشاير:خلاص غيري الموضوع لا تسممين أفكاري .. دخلت عليهم:هاااي .. ابتسمت بشاير:هلا بالزين كله .. دينا و هي تتصنع الحياء:يا ربيه مستحيلين وين ما أروح أنمدح ..! ناظرت فيها وسن بطرف عينه:تجاملك .. موب صدق .. بشاير و هي تبتسم:يوه حرام عليك خليها تستانس شوي .. ههههههههههههههه .. ناظرت فيها دينا بكل غيض:دوبا .. ما تستاهلين العزيمة لـ برا .. بشاير بكل حماس:عزيمة وين ..؟! دينا:وين برا فـ الحديقة .. بشاير بخيبة أمل:حسبتك تتكلمين من جد .. دينا:لا صدق .. وهج مسوي باركينج برا .. وسن:يا حبها للـ باركينج ..!؟ دينا:ايه و الله أنك صادقة .. بس و الله تغير جو .. اليوم جايبة أشياء عجيبة تشويها .. بشاير بكل تردد:و أخوانك برا ..؟! دينا:تستهبلين شايفتنا بيت أبو عبد المحسن ..!! بشاير:لو علي عادي أجلس مع أخوانك أخوان صديقتي ما فيها شيء .. بس أمي إذا عرفت يا ويلي .. ناظرت فيها وسن بكل غيض:يصير خير تجلسين معهم .. دينا:يا الله قوموا كملوا سوالفكم برا .. أمي و وهج لحالهم هناك .. وقفت بشاير و مشت مع دينا لـ برا:أختك سلوم وينها ..؟! دينا:ما جت على قولتها موب حلا ..! بشاير:خسارة مشتاقة أسمع محاضراتها .. .. وقفت وسن حتى تلحقهم .. :جمون يا الله وش فيك متسمرة فـ الكرسي ..؟! جمان بكل خوف:مدري ..! جرتها مع يدها:يوه صرت أحس إن أمي العجوز الشريرة ..؟! مشت معها بكل خوف:بس و الله خايفة .. وسن:لا تخافين أمي من النوع اللي بس تحقر .. و صراحة هاذي وحدة من مميزاتها .. جمان و هي تلمح الجلسة فـ الحديقة ..:وشلون يعني ..؟! وسن:يعني لما أحد يدوس لها على طرف أو يضيقها تتصرف و لا كأنه موجود .. بس هالشيء حلو لأنها ما راح تتمشكل معك .. ابتسمت و هي تقرب منهم:هاااااااااااي ... وهج و عيونها على الشواية:بدري ..! جلست هي و جمان:وش بدري .. من دقيقة بس طلعت دينا مع بشاير .. بشاير بكل حماس:واااااااااااو .. شكل الشوي خطير .. ابتسمت لها وهج .. و رفعت عيونها على وسن:قربت أخلص قومي جيبي البطاطس من جوا أكيد سونيا خلصت منه .. رجعت توقف وسن:أووك .. حاولت جمان تبتسم .. حتى تريح ملامح وجهها المشدودة بسبب أعصابها المتوترة .. ما عطتها مجال .. رفعت عينها على زوجة أبوها .. اللي جالسة بكل هدوء تتصفح المجلة و كأنها بعالم ثاني .. غير اللي قاعدين فيه بـ هاللحظة ..! قربت منها دينا وجلست جنبها .. همست:وش فيك تراها موب وحش ..؟! ابتسمت جمان:ما أحب أكون ثقيلة على أحد .. دينا:يوه لا تسمعك وهج تعطيك وحدة من محاضرات سلمى .. خذت نفس براحة .. ابتسمت و هي تحاول تدخل نفسها بجوهم:وش فيكم تتكلمون عن سلمى كذا ..!! دينا:يا أختي وش نسوي فيها ... المدرسة و المثاليات الزايدة مأثرة عليها .. تحسسك كانها جاية من العصر العباسي .. علماء و أدباء .. تصددددع الرأس .. ابتسمت جمان:العلم شيء حلو .. دينا:أوكي ما قلنا شيء بس لكل مقام مقال بعد .. مو معقولة جمّعة عائلية و وناسة و ضحك و تطلع الأخت تعطيك محاضرة .. ابتسمت بإحراج:فـ هاذي صدقتي .. رجعت تطلع وسن من البيت و سونيا وراها شايلة صينية الأكل .. ناظرت فـ دينا بكل غيض:خير وش مجلسك مكاني .. دينا:لـ صار باسمك تعالي حاسبيني ..؟! لفت عنها بكل غرور .. نزلت نظرها على جمان:تعالي ساعديني نجهز الطاولة .. قربت بشاير و سرقت كم حبة بطاطس:الله كل هذا عشان جمان .. شكلي بعتزل .. ابتسمت وهج:ما عليك عشانها توها جاية .. بكرة هوشات معها و لا لـ صاروا يطلعون السوق مع بعض ..!! بدل ما تكون حرب ثنائية بين دنو و وسون .. بتصر ثلاثية .. لفت بشاير عليها:ايه والله .. الله يعينك يا وهوج .. مرت وسن من جنبها و دفتها مع كتفها .. بشاير بكل غيض:وجع كتفي أبيه .. ناظرتها وسن بنص عين .. وهج و هي ترتب الأكل فـ الصحون:و أنتي مصدقة إني بجلس معهم برجع لـ بيتي الله يخليه لي .. .._.._.._.._.._.. أم بدر بكل ضيق:ما صحت أختك للحين ..؟! ريتاج بكل طفش:يمة تراك سألتيني عشرين مرة .. أم بدر:ردي علي و بس ..! زفرت بكل ضيق:لاء .. للحين .. أم بدر بكل خوف:كلميها .. هزيها ..!! موب معقولة من أمس للحين نايمة .. ريتاج بكل ضيق:صار لها يومين ما نامت و اليوم نامت 12 الظهر خلاص خليها ترتاح .. زفرت بكل ضيق و هي ترفع بيالة الشاي .. دخل و رمى مفاتيحه على الكنبة بكل ضيق:السلام عليكم .. أم بدر:و عليكم السلام وين كنت ..؟! ريان و هو يرمي بكل ثقلة على الكنبة:كنت فـ الشركة ..؟! ام بدر:بس اليوم جمعة ..! ريان:رحت اخلص كم شغلة قبل السفر ..!! أم بدر:و أخوك بدر وينه من ثلاث أيام ما شفته لا على غداء و لا عشاء و لا حتى فطور .. ريان:قبل شوي شفته فـ الشركة ..! ريتاج و عيونها على التلفزيون:كل يوم يطلع ثمان الصبح و يرجع ثنتين آخر الليل ..! أم بدر بكل عصبية:وين يروح ..! ريان بكل ضيق:أروح و أرجع على الشركة القاها هناك على طول .. أم بدر و عصبيتها تزبد:معسكر فيها يا ربي لا هو و لا ريناد بيجيبون لي السكر و الضغط ..! ريتاج:الله يهديك يمة .. بدر من يومه و قلبه على شغلة و ريناد أكيد بسبب الحمل أعصابها متوتر و نومها معفوس .. تنهدت بكل ضيق:الله يصبر قلبي بس .!! خذا نفسه بكل تعب .. رفع عينه على أخته:جنى بتروح معنا ..؟! هزت رأسها بالنفي:كلمتها أروى اليوم قالت موب رايحة مشغولة مع أهلها .. ام بدر:لقت أهلها ..؟! زفرت بكل ضيق:لاء .. بس لاهية مع أختها يدورون خواتهم .. أم بدر:الله يسامح عمتك .. تنهد بكل ضيق:الله يسامح الجميع .. وقفت أم بدر:قومي شوفي أبوك فـ مكتبه قولي له بنحط العشاء .. وقفت ريتاج:إن شاء الله يمة .. .._.._.._.._.._.. ابتسم عادل:افا بتبيعني ..! رد له بسام الابتسامة:لا و الله بس الأهـ .. قاطعه:لا وش دعوة أمزح معك .. أنت سافر مع أهلك و أنا أروح مع اهلي بوقت ثاني .. بس هاه لا تنسى تدعي لي .. بسام:افا عليك .. أكيد ما راح أنسى هالشيء .. أصلا دعوتي لك شيء قليل .. أرد به جميلك علي .. عادل و الإحراج بصوته:الناس لبعضها و الكل بالله .. بسام:تسلم .. ريح جسمه على الكرسي:تراني حجزت التذاكر على طيارة بكرة العصر .. بسام:زين ما سويت .. .._.._.._.._.._.. جالسة قبالها .. دافنة يد أختها بأحضان يدها .. بعدت خصلات شعرها عن وجهها الذبلانة .. تأملتها و نظرة الحزن بعيونها .. .. جالس قبالهم .. يتأمل حالهم .. زفر بكل ضيق و همس عبدالعزيز:فجر خلينا نمشي ..؟! همست بصوت مخنوق:ما فتحت عيونها ..؟! عبدالعزيز بقلة صبر:ما سمعتي الدكتور وش قال ..؟! كانت هلكانة تعب شيء طبيعي نومتها كل هالوقت ..! هزت رأسها بالنفي:مستحيل أتحرك من مكاني و أنا ما سمعت صوتها ..! عبدالعزيز:فجر و بعدين ..؟! فجر بكل عصبية اختلط بحزنها اللي خلا دموعها تخونها و تنزل:عبد العزيز حرام عليك .. أسبوع ما شفتها و الحين تعبانة مستخسر فيني هاكم ساعة ..!؟ عبد العزيز بنفس عصبيتها:فجر أنتي اللي حرام عليك ..! الزيارة انتهت من زمان و الدكتور سمح لنا نجلس عشانك ..! خلينا نطلع لا تصير له مشاكل بسببنا .. مسحت دموعها و بكل ضيق:خلاص بنطلع .. بس خمس دقايق .. بكل عناد:و لا نص دقيقة .. تنهدت بكل ضيق .. وقفت و عدلت عبايتها .. غطت أختها زين و طبعت بوسة على جبينها .. وكلها أمل تشوف عيونها و تسمع صوتها بكرة .. زفر بكل ضيق و هو يمشي و يراقب خطواتها الثقيلة و هي تمشي قدامه .. طلعوا من الغرفة أخير .. زفر بكل راحة:قدامي يالله .. تنهدت بكل آسى .. تقدمته بتطلع من المستشفى صح .. لكن فكرها و قلبها و كل إحساسها باقي هنا .. ضغط زر اللفت .. و تمنى يرمش بعيونه و يلاقي نفسه قدام بيتهم .. زقر بكل ضيق و هو يتذكر إن يوم إجازته الوحيد قضاه كله بالمستشفى و من غير أي فايدة .. انفتح اللفت .. .. اثنين راكبين اللفت .. كل واحد منهم بزاوية .. ع اليمين نزل الكاب على وجهه أكثر و نزل و هو يتجنب عيون عبد العزيز .. لأنه ما يبيه يعرف ملامح .. زفر مياف بكل راحة و هو يتجازو أخت و أخو غزل بكل سهولة .. رغم عدم معرفتهم به لكن إحساس الغلط ما يختلف بأي مكان ..! .. .. ركبوا اللفت .. فـ يسار اللفت .. دكتور واضح من شكله .. النظارات الطبية و البالطو .. كان مندمج فـ القراءة لـ درجة أنها ما انتبه لـ وقفت اللفت .. رفع عينه على رقم الدور .. لف على يمين:عفوا .. بس ممـ..-رجع يسكت وهو يدقق فـ ملامح الرجال اللي واقف قباله .. رفع عبد العزيز عيونه .. حتى يعرف وش كان يبي منه الدكتور .. الدكتور حسن:عبد العزيز ..! ابتسم بكل تلقائية:حسن ..-قرب منه و سلم عليه بكل حرارة:شـ أخبارك وينك وش الدنيا بك ..؟! ابتسم حسن:الحمد الله بخير .. عسى ما شر وش تسوي هنا ..؟! عبد العزيز:أختى مريضة وجينا نزورها .. حسن بكل خوف:أختك ..؟! عبدالعزيز:لا تخاف .. أختي الصغيرة .. ابتسم بكل إحراج:ما تشوف شر .. وقف اللفت يقطع حوارهم .. حسن:حياك فـ مكتبي ..؟! عبد العزيز و هو ينزل و فجر وراه:لا أنا من الفجر هنا و بعدين لازم أرجع الأهل للبيت .. ابتسم:خلاص .. بس لازم توعدني أشوفك مرة ثانية .. عبد العزيز:لا تخاف أختي مطولة هنا .. أشوفك بكرة إن شاء الله .. حسن:عطني رقم غرفتها حتى أشوف إذا بيدي شيء أسويه .. هز رأسه بالنفي:ما تقصر بس اللي فيها بعيد عن تخصصك ..؟! حسن:ما تشوف شر وش فيها ..؟! زفر بكل ضيق:سالفة طويلة لما أشوفك مرة ثانية نتكلم فـ هالموضوع .. حسن:على خير ان شاء الله .. رفع يد يسلم و هو يبعد عنه:مع السلامة .. حسن و هو يراقبه يبعد مع فجر:فـ أمان الله .. .. . .. قبلها بـ دقايق .. فـ الدور الثاني و بالتحديد فـ غرفة غزل .. فتحت عيونها أول ما سمعت صوت الباب يتسكر .. زفرت بكل راحة و هي متطمنة أنهم ما شكوا فيها أنها صاحية .. جلست و هي تحس بدوخة .. زفرت بكل ضيق من هالتعب .. تنهدت و هي تتذكر كلام أختها .."سمعت الدكتور وش يقول .. سرطان و إلا بالدم يعني يمكن يجي بكرة و ما أقدر أشوفها خلني أجلس بعد ...! ".. همست بصوت مخنوق:سرطان ..!!!! انفتح الباب بكل هدوء .. ارتبكت و توترت أكثر .. سكر الباب و دخل .. ابتسم أول ما التقت عيونه بعيونها المترقبة .. زفرت بكل راحة:مياف .. قرب منها و بكل ضيق:الحمد الله ما ناموا عندك كان أنتظرت لحد بكرة ..! ريحت ظهرها على ظهر السرير:حتى أنا تعبت من التمثيل .. أحس بجسمي تصلّب ...-نفضت المفرش و نزلت رجولها .. مد يده حتى يساعدها توقف:ليش تمثلين ..! رجعت ترخي يده و تسحبها من أحضان يده .."أصحى وش أقول لهم .. و إلا كيف أبرر لهم غيبتي و غيبت تركي" .. قاطعها و هو يعلي صوته:غزل فيك شيء ..؟! هزت رأسها بالنفي:لا بس ما أبي أقوم خلاص برجع أنوم ..-رجعت تدخل لـ سريرها من جديد .. غطاها زين و قرب كرسيه أكثر حتى يكون أقرب:هااه ما قلتي ليه تمثلين ..؟! زفرت بكل ضيق و هي تريح رأسها على المخدة:مدري حسيت ما عندي شيء أقوله لو جلست معهم .. مياف:وش قصدك ..؟! خذت أنفاسها بكل توتر:سمعتهم كثير يتكلمون عن تركي شكله ما رجع .. خفت لو صحيت و سألوني وش ممكن أقول لهم ..! مياف بكل ضيق:قولي لهم الحقيقة .. قولي لهم اللي سواه فيك ...؟! هزت رأسها بالنفي:أنت مستوعب وش ممكن يصير لو قلت اللي صار ..!! مياف و أعصابه تنشد أكثر:خلهم يعرفون حقيقته هالحقير اللي ما .. قاطعته:مياف ..!!! .. مهما كان هو فـ الأخير ولد خالي ..! خذا نفس يهدي أعصابة:للحين موقفة معه ..؟! غزل بكل ضيق:لا معه و لا مع الحق .. أنا خايفة من المشاكل اللي بتصير ..! اختنق صوتها:و خاصتن إني ممكن أموت وقتها وش فايدة كلامي .. زفر بكل ضيق:دريتي ..؟! اختنق صوتها أكثر و لمعة الدموع بعيونها:سمعتهم يتكلمون ..! مسح على رأسها بكل حنان:غزل حبيبتي اللي فيك و لا شيء و إن شاء الله أنك راح تتعافين منه .. هزت رأسها بالنفي:فـ الأخير سرطان ..! مياف:و من قال لك إن الناس تموت بسببه .. الحين الطب تطور و كل شيء تغير .. لفت كلها لـ جهته .. قربت رأسها له و كلها أمل توصل لـ صدره .. سمحت لـ شهقاتها تطلع .. اختنق صوتها:مياف ما أبي أموت ما أبي أموت .. ضمها له و هو يضعف أكثر بسبب دموعها .. بلع ريقه حتى يضيع العبرة اللي خنقته .. همس بكل راحة لعله يساعدها تهدى:غزل وش فيك .. كل الدكاترة يقولون حالتك سهلة و علاجك مضمون إن شاء الله .. دفنت رأسها أكثر و هي عاجزة عن التحكم بعبراتها:محد يعيش بعد السرطان محد ..!!! زفر بكل ضيق:أذكري الله يا غزل .. .._.._.._.._.._.. ساعات طويلة .. أو قصيرة لكنها مرت غير عند الكل .. سلام الحار و أخذ بالأحضان و الدموع أكثر حرارة .. ابتسمت و اللون الأحمر يغطي عيونها بسبب الدموع .. جنى بكل لوم:قلت لك أن قلبي كان حاس .. مسحت دموعها و تحكمت فيه أخيرا .. جوري بصوت مبحوح:الحمد و الشكر لك يا رب .. اتسعت ابتسامة الجازي أكثر:ايه و الله الف حمد و شكر له اليوم قطعنا نص الطريق .. مسحت أنفها المحمر بسبب الصياح .. ليان و هي تبتسم:الله يهيدكم بس صيحتونا معكم .. وعد و دموعها تنزل غصبن عليها:من كان بيتوقع كل هذا ..!! أم راكان و هي تقاوم عبراتها لأخر لحظة:كلها أقدار ربك .. وعد:يعني ما لقيتوا غير بيتنا – كملت بكاها بكل تلقائية .. ضحكت ليان عليها .. محد تأثر قد وعد:هههههههههههه .. وعود يبيلك صورة .. بتطلع إبداع .. ناظرتها بطرف عينها:الله يسامحك بس .. الجازي و هي توقف:يالله إنا لازم نمشي .. جنى بنبرة أقرب للترجي:بدري ..! الجازي بكل إحراج:أي بدري .. طولنا .. أم راكان:بدري يا بنتي ؟؟! هزت رأسها بالنفي:إنا قلنا جاين على قهوة بس .. و الحمد الله تسهلت الأمور .. و بعدين جوري زوجها ينتظرها برا .. جوري بكل إحراج:ايه صح نواف واقف برا .. ليان بكل لوم:الله يهديك بس ليه ما قلتي له يدخل مع راكان و عمي ..؟! وقفت جوري:لا هو مشغول .. و أنا قلت له بقابل خالتي وهو كم سؤال و بطلع .. أم راكان بكل لوم:تعشو على الأقل ..! الجازي:خيركم سابق ..-لفت على جنى:يالله مشينا .. .._.._.._.._.._.. دخلوا البيت مع بعض .. لحقته و بكل فضول .. فجر:من متى و لك أصدقاء دكاترة ..؟! ناظرها بنص عين و هو ينزل شماغه:طايح من عينك ..؟! فجر بكل ربكة:موب قصدي .. بس اللي يسمع سوالفك يقول مرة أصدقاء طفولة .. قرب منها و نظرة خبث بانت بعيونه:وش رايك فيه ..؟! فجر بكل خوف من نظرة و سؤال أخوها:وش قصدك ..؟! عبدالعزيز:يعني كـ زوج مستقبلي ..؟! فجر:قصدك أنه هوو ...! ابتسم:ايه هو .. هو اللي خطبك .. ارتسمت فـ عيونها نظرة توهان .. همس:عجبك و إلا ..؟! ارتبكت للحظة:نعم ..! –ناظرته بكل ضيق:ما بعد لقيت لك عروس عشان أفكر .. –ناظرت فـ باب غرفتها:يا الله تصبح على خير .. عبد العزيز:وين رايحة ما قلتي لي وش رايك ..؟! صرخت من بعيد:لا تنسى الصبح ترجع أبوي للبيت .. –دخلت و سكرت الباب وراها .. رفع عيونه للسماء .."يا رب متى أتزوج عشان تتزوج و أرتاح من همها هي بعد .." تنهد بكل ضيق .." .. مشى لغرفته و هو يهمس لـ نفسه:حتى الزواج مسئولية .. زوجة و عيال آآآخ بس ...! .._.._.._.._.._.. ريتاج و هي تدخل فراشها:احلفي ..! واقفة قبال التسريحة تمشط شعرها:أيه و الله .. ريتاج و هي تريح ظهرها على سرير:بس ما كأنها صعبة تروحون لـ مكة لحالكم ..؟! ريناد:ليه وش فيها ..؟! ريتاج:ما فيها شيء .. بس من بيدلكم الطريق و أخاف تضيعون ..؟! ريناد:ما ضعنا هنا نضيع فـ أطهر أرض .. ريتاج:حتى ولو لازم تفكرون ..؟! ريناد:لا تطيرين الروقان اللي فـ مخ ..-لفت عليها:بتنومين من الحين .. ريتاج:الساعة 11 يا ماما ..!! ريناد:ايه بدري .. العادة تنومين الفجر .. ريتاج:هذا إذا ما وراي سفر بكرة .. !! ريناد:يوووه أنتو بتسافرون الصبح .. و بسام بيجي العصر ..؟! ريتاج و هي تغطي نفسها أكثر:الله يعينك من أمي بكرة .. اليوم بغت تشب حريقة ... وين ريناد صحوها ..!! و لا تحط الحرة فيني ..! ريناد بكل لوم:كان صحيتيني ..؟! ريتاج:أصحيك و أنا ما صدقت أنك نمتي ..! زفرت بكل ضيق:يبي لي أجهز الكلام من الحين عشان أقنع أمي بكرة .. ريتاج بنبرة تحذيرية:يا ويلك إن خربتي السفرة و الله لـ أكرهك يا رنود .. ابتسمت:خفت صراحة ..؟! ريتاج:عاد أنا حذرتك وأنتي بكيفك ..!-رن جوال ريتاج قطع حوارهم .. رفعت الجوال و ردت:خير أرواي ..؟! همست ريناد:عرفت من غير ما تشوف الأسم ..! علت صوتها ريتاج:حاطه لها نغمة .. ايه كنت أكلم ريناد وش بغيتي .. ...... لا تخافين حطيت ..... ابتسمت و ناظرت أختها بكل لوم .. طلعت من الغرفة و اتجهت للمطبخ على طول الجوع ذبحهاااا ..!! .. .. . .. على بعد كم غرفة .. نزلت كوب الشاي بكل ضيق:يا ذا الشغل اللي ما يخلص ..؟! أبو بدر:تبون تسافرون و تستانسون خليني أخلص أشغالي بكل هدوء .. ناظرته بكل غيض .. :الحين أنت مقطع تفسك بالشغل أجل ولدك وش يسوي فـ الشركة ..؟! أبو بدر بكل استغراب:أي ولد ..؟! أم بدر:من غيره يعني بدر ..! أبو بدر:بدر .. وش يسوي فـ الشركة أصلا الحين انتهى دوامه .. ناظرته بكل ضيق:كل يوميطلع من ثمان و ما يرجع إلا ثنتين .. تنهد بكل ضيق و همس:هذا اللي كنت خايفة منه ..! أم بدر بكل فضول:وش اللي مخوفك ..؟! نزل الاوراق من يده ..:بقول بس ما أبي الخبر ينتشر فـ العايلة ..؟! ناظرته بنص عين:من متى أنشر الأخبار ..؟! أبو بدر:أنا أحذرك للحيطة ..؟! أم بدر:تكلم حرقت دمي ..! أبو بدر:ولدك يحب و إن ما خاب ظني يبي يتزوج اللي يحبها .. نظرة توهان ارتسمت فـ عيونها:يحب .. وشلون ما لاحظت و بعدين من هاللي حبها و هو كل يومه فـ الشغل و الباقي فـ البيت .. أبو بدر:هذا أنتي قلتيها فـ البيت ..؟! أم بدر بقلة صبر:ترا مخي كلش مقفل من هي ..؟! أبو بدر بكل ضيق:جنى .. أم بدر و الصدمة تشل أطرافها:جنى ..!! جنى بنت أختك ..؟! أبو بدر:و أختي سابقا .. أم بدر:تمزح صح ..؟! أبو بدر بكل عصبية:هذا وقت مزح .. و إلا ظنك كلام بدر عنها من قبل كذا من مخه و إلا تسلية ..! أم بدر:قصدك أنه يبيها تصير بنت خالته عشان يتزوجها ..!! . –بكل اندفاع:لااء و الف لاء .. الناس وش بتقول بتأكل وجهنا من الحكي .. أبو بدر:عشان كذا خليت جنى تبعد عننا باقرب وقت .. أم بدر:بس المسكينة طلعت من بيت أبو تركي مكسورة الخاطرة ..-رجعت تعصب:لايكون هي بعد ..؟! هز رأسه بالنفي:جنى للحين ما استوعبت فكر أنها بنت أختنا شلون تفكر بولدي .. أم بدر بكل لوم:يا ويل قلبك يا أم بدر .. ولدك طاح و محد سمى عليه .. أبو بدر:كان ناوي يتهرب من هالسفرة .. بس ما سمحت له و إن شاء الله يسمع الكلام و يجي .. تنهدت بكل ضيق:يا كبرها عند رب العالمين .. وشلون يفكر فيها و هي عمته ..! أبو بدر:كان متأكد أنها ما تصير له .. أم بدر:طيب وش السوات الحين ..؟! أبو بدر:كلمي ولدك و عقليه و إن ما نفع اخطبي له .. أم بدر:ما ينفع تبيه يفشلنا مع الناس .. ابو بدر:ما لك إلا تكلمين جنى ..؟! أم بدر بقلة صبر:وش أقولها ..؟! أبو بدر:أي شيء لو تخلينها تكلم بدر و تطلب منه ينسى الموضوع .. أم بدر:إذا كلمتها بتتفشل منا و يمكن ما عاد تجي ..!! زفر بكل ضيق:خلينا نفكر .. قدامنا لحد ما تستقر أوضاع جنى .. أم بدر:و متى بتستقر ..!! أبو بدر:كلمت الجازي .. و قالت أنها قربت من مكان أختهم .. يومين بالكثير يلقونها و بعدها يروحون لأبوهم ..! تنهدت بكل ضيق:أنا قايلته هالولد فيه شيء ..! .._.._.._.._.._.. غطت نفسه بالمفرش الحريري:أحلى يوم مر علي من بعد وفاة الوالدة الله يرحمها .. قربت وسن و دخلت جنبها:الله يرحمها .. شفتي شلون لو أنك نازلة من تحت من الصبح كان استانستي أكثر ..!! جمان:لا أكثر من كذا ما أبي ..-رن جوال وسن .. نقزت له و هي تهمس بفرح:ميوف ..-ردت عليه:هلا بالقاطع .. مياف بكل حماس:وينكم البيت فاضي ..؟! وسن بنفس الحماس:أنت تحت ..! مياف:ايه أكيد .. فتحت الباب و بكل حماس:جاينك ..-نزلت الجوال:قومي مياف تحت .. طلعت من السرير و لحقتها .. نزلت بكل حماس و ضمته:وينك انتظرناك كثير .. مياف:ايه واضح و الدليل أنكم ما نمتوا جلستوا تنتظرون .. ضربته على كتفه على خفيف:دب .. و الله انتظرناك كثير بس وهج كانت هنا و كانت تبي ترجع لـ بيتها بدري و بعد كانت بيش هنا صعب نتأخر على البنت .. وصلت جمان اخيرا .. ابتسمت له .. رد لها الابتسامة و رجع ينزل عينه على وسن:الله بيش للحين عايشة .. وسن:وش هالفال ..؟! مياف:خلك منها .. حدي جوعان أبي أي شيء أكله ..!! وسن:مشاري طلب من ماك وجبتين لك و له .. حقتك موجودة أجيبها .. وهو يجلس:يالييييييييييت .. قربت منه و جلست على نفس الكنبة .. راقبت أختها تبعد .. مياف:هاه .. عساك مرتاحة ..؟! ابتسمت:الحمد الله ..-شبكت أصابعها و بكل توتر:أخبار غزل ..؟! زفر بكل ضيق:توني جاي من عندها حالتها صعبة .. بلعت ريقها بكل خوف:وش طلع معه ..؟! تنهد بكل ضيق:سرطان فـ الدم .. شهقت بكل تلقائية .. و رفعت يدها على فمها .. كمل بكل اندفاع:بس عبد الملك طمني عليها و قال إنه أخف أنواع السرطان و علاجه مضمون إن شاء الله .. بلعت ريقها و العبرة تخنقها:علاجها أكيد كيماوي .. زفر بكل ضيق:أكيد هو الشيء الوحيد اللي بيخلصها من هالمرض .. رجعت لهم و بنفس الحماس:و هذا العشاء ووصل .. نزلت الصينية .. تراني حطيت كل شيء بالمكرويف الحين أنت وحظك .. ابتسم لها .. لكن ابتسامته ما اخفت الحزن اللي بعيونه .. تلاشت الابتسامة من على وجه وسن و هي تنقل نظرها بين مياف و جمان ..:وش فيكم ..؟! وجيهكم مو .. ما قدرت تسيطر على نفسه .. خانتها شهقاتها .. وقفت جمان و طلعت ركض لـ فوق .. وسن بكل خوف و هي تراقب جمان:وش فيها ..؟! فرك جبينه بكل توتر:ما فيه شيء ..؟! قربت منه و بكل خوف:مياف وش مخبين علي ..! زفر بكل ضيق:صديقتها مريضة ..! وسن:طيب وش فيها كل الناس تمرض ..! مياف و صوته يختنق:بس هذا موب أي مرض .. سرطان بالدم ..! تسارعت أنفاسها من الصدمة .. رفعت يدها على صدرها:بعد عمري توها صغيرة ..! زفر بكل ضيق .. وقفت و طلعت ركض لـ فوق .. دف الأكل بعيد عنه .. حماس وسن و ابتسامتها هم الشيئين الوحيد اللي فتحوا نفسه .. لكن الحين حس بشهية تنقطع عن الدنيا كلها ..!! .._.._.._.._.._.. منسدحة بأحضان سريرها الواسع مثل كل ليلة .. لكن اليوم غير .. كل مرة تحط جنى رأسها على المخدة تحس بضيق العالم يسكنها و ما تتهنى بأقل حقوقها النوم ..! زفرت بكل راحة و ابتسامتها مو قادرة تفارق وجهها .. هز جوالها .. طارت له .. ردت من غير ما تشوف الرقم:اهليين .. ابتسمت و هي تهز ولدها:حيا الله بأختي .. ريحة جسمها من جديد:ههههههه حيا الله أختي الكبيرة .. جوري:عسى ما صحيتك من نومك ..؟! جنى:وين يجيني النوم .. أنا بس أتحرى متى تطلع الشمس عشان أشوف أبوي .. أحس خلاص هانت ..! جوري بكل تردد:ظنك يعترف فينا ..؟! جنى:اللي فهمته من كلام الجازي و خالي أبو بدر أنه يحب أمي ..! زفرت بكل ضيق:موب شرط ..-علا صوت بكاه .. رفعت ولدها لـ صدرها .. ابتسمت جنى:رشود .. يالبيه و الله اشتقت له .. جوري:الله يصلحه بثر .. جنى:هههه توك ما مر عليك غير أسبوعين ..! زفرت بكل ضيق:الله يسهل .. جنى بكل استغراب:لا يكون نواف عندك و أنتي تاركته ..! جوري:لا لا تخافين اليوم يومه عند دلال .. جنى:صدق .. بديتوا فـ الحساب و العدل .. جوري:أنا ما قلت شيء .. هذا اللي هي تبيه ..؟! جنى:عاد غبية اليوم راجعين من السفر و كيد مرهق .. جوري:و الله أنا بالي مشغول عليه .. ما تتصورين وش قد هي مزعجة تخيلي فـ طريقنا لـ بيت خالتي دقت عليه يجي سبع مرات و فـ طريق الرجعة تسع مرات .. جنى:لا حول و لا قوة إلا بالله من أولها ..-رجعت تبتسم:و أنتي تعدين لها ..؟! جوري بكل لوم:لا و الله أعد لـ صوت الفرامل اللي كل شوي دايس عليه نواف .. جنى:ما عليه خلك بفرحتك فينا و انسيها الحين .. جوري:حتى لو نسيتها هي بتذكرني بوجودها غصب .. بس على قولتك فرحتي بكم بتنسيني إياها و تنسيني الدنيا كلها .. جنى بكل حماس:وش قال نواف لما عرف .. جوري:ما تتصورين وش قد فرح .. مع أنه بارد فـ هالموضوع بس فرح كثير لما عرف .. جنى:الله يفرح قلبك و قلبه دوووم ... جوري:آمين .. بس في شيء أبي أعرفه ..! جنى:وش هو ..!؟ جوري:أنتوا وش ناوين تسون ..؟! جنى:ناوين نروح لأبوي بعد ما نلقاك .. لأن أنا و أنتي الوحيدتين اللي ما تسجلنا باسم أبوي .. جوري:طيب .. وش اللي صار من البداية .. صراحة ما أذكر شيء من كلام الجازي .. ابتسمت:اسمعي .. من قبل قبل لا تنولد أمي ....... .. و استمر الليل يعزف على الألحان قصة الماضي اللي مستحيل تموت بقلوب جوري و جنى و الجازي .. و جمان اللي ما يدرون عنها لحد هاللحظة ..! .._.._.._.._.._.. دلكت وجهها بالكريم للمرة العشرين .. راكان بكل ضيق:خلاص الكريم نشف ..؟! ليان:وش فيك الكريم تركيبته كذا ..! راكان بكل ضيق:أنا هالاشياء تنرفزني .. ناظرته بنص عين:هذا جزاي يعني ... أتكشخ و أتزين لك .. راكان بكل استغراب:نعم وين الكشخة ..؟! قربت منه و جلست على طرف السرير:قصدي أحافظ على بشرتي عشان لـ كبرت ..! ناظرها بنص عين و رجع ينزل عيونه على الجريدة:يصير خير ..؟! ناظرته بكل استغراب:الحين أنت تبين أخلص و اطفي اللمبة و الحين تقرا جريدة ..!! راكان:طار النوم .. بقرا شوي .. غطت جسمها .. و ريحت ظهرها على المخدة .. جلست تراقبه .. دقيقة .. ثنتين .. خمس .. قلب الصفحة:على فكر تراني موب تلفزيون .. ابتسمت:ما في تلفزيون .. خلاص أنت بديل .. رفع عينه و خزها .. لكن ابتسامته كسرت نظرته و خلته يبتسم غصب .. بكل لوم:الحين وش سر الابتسامة ..؟! ناظرته بنص عين:وشو بعد الابتسامة لها مكان بعد ..! بـ ثواني بسيطته تلاشت الشبه ابتسامة اللي كانت على وجهها .. تغيرت ملامح وجهها و ارتبكت:راكان .. وش فيك ..؟! هز رأسه بالنفي و هو يطوي الجريدة:و لا شيء .. الظاهر النوم جاء وقته ..! ليان:قبل شوي طار ..! زفر بكل ضيق و هو يغطي نفسه:عاد هو على كيفي ..؟! نفضت المفرش عن جسمها .. طفت اللمبة و بعد تردد كبير .. طلعت برا الغرفة .. تنهد بكل ضيق من تحت الغطاء ... .._.._.._.._.._.. لوجين بكل حماس:ايه يا عمري اليوم الصبح .. عيسى من وراء سماعة الجوال:صج .. !! مستحيلة أنتي .. لوجين:افا عليك بس .. عرفت الحين قدرك عندي ..؟! عيسى:والله من زمان بس كلامج و أفعالج تحيرني ..!! لوجين بكل دلع:أنا أحب أتدلع عليك شوي .. عيسى:فديت الدلع و سنينه .. بس ما قلتي لي متى بتوصلون بالسلامة ..؟! لوجين:اممم .. طيارتنا اليوم الصبح .. مدري ثمان أو تسع مدري متى بالضبط .. عيسى:طيارة مرة وحدة ..؟! لوجين بكل غرور:ايه تبيني أتبهذل فـ السيارة و إلا أنتظر دوري فـ قطار ..! موب لوجين الـ*** اللي تنزل لـ هالمستوى ..!! عيسى:بس يا عمري أنتوا بتأخذون شاليه وش معنى .. موب المفروض بـ فندق و ع البحر ..؟! لوجين بكل ضيق:لا تذكرني .. هذا اقتراح عمي أبو بدر القروي .. مغير أبو ريتاج .. عيسى:ما عليه لـ صالحنا حياتي .. لوجين بكل غباء:وشلون ما فهمت ..؟! عيسى:أنا أفهمج يا عمري .. لـ صرتي بـ فندق فيه سكيورتي و مراقبة ما راح تقدرين تطلعين معي لكن بالشاليهات و خاصتن مع جمعة كبيرة محد بـ يحس .. لوجين:جد هاذي الميزة الوحيدة .. عيسى:طيب حياتي متى نقدر نطلع ..؟! لوجين بكل حيرة: و الله مدري ..! عيسى:أنتوا كم عايلة ..! لوجين:ثلاثة .. أنا و أهلي بنوصل الصبح و عمي أبو بدر مع عمي ابو تركي بيوصلون الظهر .. عيسى:صج .. قدامنا فرصة الصبح .. لوجين:بالعكس حياتي .. لما أكون مع أهلي راح يراقبوني و خاصتن لأني لحالي .. عيسى:ما أتوقع بيوصلون تعبانين و أنتي متعود ع القعدة لـ الظهر .. لوجين بكل حماس:يب .. خلاص لـ شفت الوضع تمام .. دقيت عليك .. عيسى:أوك حياتي أكيد أنتظرج .. لوجين:يا الله قلبو بسكر على بال ما أرتب شنطتي و أخذ لي شاور و أفطر بتطير الست ساعات الباقية على طيارتي .. عيسى:يا الله حياتي سي يوو .. ابتسمت:سي ياا يا عمري ..-سكرت الخط و ضمت الجوال لـ صدرها:واخيرااا .. أكيد بيأخذني بأحلى لفة على الشرقية و بيعرفني على أصدقائه .. سحبت الفوطة بكل حماس .. دخلت الحمام و هي ترقص .. .._.._.._.._.._.. بكل ترجي:ريان الله يخليك ..!! ريان بكل ضيق و هو يمسح يده بالمنديل من بعد ما توضاء:مستحيل .. أنا أنتظر هالسفرة على أحر من الجمر تجين تقولين لي أجلس ..! ريناد بكل لوم:أفا يعني أنا ما أستاهل .. ريان:و الله تستاهلين و زود بس أنا محتاج لـ هالاجازة من الشغل .. زفرت بكل الضيق و اليأس بدا يتسرب لها .. ريان و تأنيب الضمير يتملكه:طيب كلمي بدر ..! ريناد:بدر وينه من قبل أمس ما شفته ..؟! نزل عيونه على ساعته:العادة يرجع ثنتين الفجر بس دامه ما جاء .. أكيد بتشوفينه بعد صلاة الفجر .. زفرت بكل ضيق:إن شاء الله يرضى .. سحب شماغه و بعد عنها:يا الله بروح المسجد قبل لا يقيم .. ابتسمت له .. و جلست و هي تداري على نفسها ... دقيقة ثنتين و ثلاث .. هلك فكرها من كثر التفكير .. بس طلعت بدر للدرج حمستاها من جديد .. أول لمحته بكل حماس:بدر زين جيت .. قرب منها و التعب هاد حيله .. رمى بثقلة على الكنبة:بغيتي شيء ..؟! ريناد بكل خوف:وين كنت طول هالوقت شكلك تعبان ..؟! بدر بكل تعب:كنت فـ الشركة نمت ساعة و رجعت أكمل الشغل سرقني الوقت و ما حسيت .. ريناد بكل تردد:طيب أنت تعبانة و حيلك مهدود صح ..! زفر بكل ضيق و هو يعدل جلسته:اختصري علي .. و الله مخي موب مستوعب أي شيء .. ريناد:أنت تدري اليوم الظهر رحلتنا للشرقية ..؟ بدر:ايه .. !! ريناد:بسام كلمني و قال لي أنه راجع اليوم العصر بس أنتوا بتسافرون الظهر .. و أخاف أمي تسوي لي سالفة بسبب جلستي لحالي .. بدر:طيب سينيثيا بتكون فـ البيت ..؟! ريناد بكل خيبة أمل:لاء أمي بتأخذها معها .. تقول راح تحتاج .. بدر الله يخليك أجلس معي .. ابتسم:بس كل هالمشوار عشان اجلس معك .. أجلس معك وش عندي .. وبعدين كم ريناد أنا عندي ..؟! ارتسمت الابتسامة على وجهها أخيرا:الله يخليك لي و لا يحرمني منك .. .. انفتح باب الغرفه و طلعوا مع بعض .. أم بدر:ريناد ..! حمد الله ع السلامة توك تصحين .. ابتسمت:صباح الخير يمة .. صباح الخير يبة .. ابتسم و هو ينزل أكمام ثوبه:صباح النور يا أبوك .. – لف على بدر:موب رايح للمسجد .. وقف بكل سرعته:إلا رايح معك بس أتوضاء و الحقك .. أبو بدر و هو ينزل:يا الله لا تتأخر .. لحق أبوه:عن أذنكم .. قربت من أمها:أقول يمة .. راقبت ولدها و هو ينزل:وش فيه أخوك كان تعبان ..! ريناد و هي تراقب بدر مع أمها:ما رجع إلا من شوي .. بس خلك منه الحين .. لفت عليه:خير وش بغيتي ..؟! ريناد:بسام اليوم بيرجع ..!! أم بدر:زين الله يبشرك بالخير .. أنا قلت على ذا الهم و قلة النوم بيرسل لك ورقة طلاقك .. ريناد:الله يصلحك بس يمة وش هالكلام ..؟! زفرت بكل ضيق:طيب وش أسوي فيك أنا الحين ..؟! ريناد:بس هو بيجي العصر .. بكل عصبية:يعني بتجلسين لحالك ثلاث ساعات ..!! ريناد و ابتسامة الانتصار على وجهها:لا بدر بيجلس معي ثم يلحقكم .. أم بدر بكل تردد:لاا لاا .. إلا بدر أنا أبيه يروح معنا .. ريناد بكل صدمة:ليييه ..!! أم بدر:ما تشوفين حاله هالك نفسه بالشغل .. أنا أبيه يروح .. ريناد بكل ترجي:يمه بيلحقكم .. أم بدر بكل إصرار:قلت لك لاء .. تدرين روحي عند جنى ما فيها شيء بنت خالتك .. ريناد بكل حماس:جبتيها و الله .-تلاشى حماسها:بس فشلة بيقولون ما جت عندنا إلا لـ مصلحة و بعدين موب من زود الميانة بيني و بين الجازي .؟! زفرت بكل ضيق:لا تقعدين تسوين فيها رسميات .. خلاص الجازي صارت من أهلنا .. تنهدت بكل ضيق:خلاص بكلم جنى و أشوف .. أم بدر بنبرة كلها تهديد:عاد يا تقنعينها .. يا تروحين معنا و ترجعين بعدين لـ زوجك ..! ناظرت فيها بكل حزن و دخلت لـ غرفتها .. تنهدت بكل ضيق و هي تراقب بنتها .."لو تعرفين وش بلاء أخوك كان فهمتي .. بس السالفة موب ناقصتك بعد ..!" .. .._.._.._.._.._.. رتبت الفطور على الطاولة فـ المطبخ .. استغرب تأخيرها و دخل عليها .. قرب منها و بكل استغراب:بنفطر هنا ..؟! ليان و عيونها على الصحون:ايه بتفطر هنا .. لف على يمينها حتى يقدر يشوفها .. صدت عنه .. راكان:وش قصدك بـ أفطر هنا لحالي يعني ..؟! مشت لـ عند الفرم و جهزت الشاي .. لحقها و بنبرة صوت كلها قلق:ليان وش فيك ..؟! هزت رأسها بـ نالفي:ما فيني شيء .. مسكها مع ذراعها لفها عليه و ثبتها .. تنح لـ ثواني و همس:تبكين ..؟! نزلت عيونها للأرض:عيوني توجعني ..!-حررت نفسها من بين يده .. راكان بكل إصرار:ما سويت شيء يضايقك ..؟! ليان:أنا ما قلت شيء أنت اللي تألف من الصبح .. راكان:طيب .. أمس ما نمتي و الحين ما راح تفطرين على غير العادة .. بعد عيوني تألف ...! زفرت بكل ضيق:هذا أنت قلتها ما نمت من أمس و راسي مصدع عشان كذا ما راح أفطر ..-مشت للباب:تمسي على خير .. جلس حتى يفطر .. حس بشهيته تنقطع .. دقيقة ثنتين ثلاث .. رجع يوقف و توجهه للغرفة .. .. دخلت و جلست على طرف السرير .. دفنت وجهها بين كفوف يدها .. همست فـ خاطرها و هي تحس بعبراتها تخنقها من جديد .."ليان وش فيك صايرة حساسة بالمرة .. هو ما سوا شيء .. لاء كل مرة يسوي نفس الشيء ..! كل مرة أسوي نفسي ما أشوف بس ..-قطع تفكيرها صوت الباب ينفتح بكل قوة .. رفعت رأسه و مسحت طرف دمعة .. كانت بتخونها لكنها فضحتها .. تنهد بكل ضيق و هو يشوفها تصد عنه من جديد .. قرب و جلس جنبها .. دقيقة .. ثنيتن .. ثلاث .. مرت مثل النص ساعة عليهم .. كل واحد غارق بـ فكره و مو حاب يعبر عن اللي داخله .. نطقت أخيرا:أنا تعبت .. تعبت أمثل إني ما أشوف شيء .. زفر بكل ضيق:وش اللي تسوين نفسك ما تشوفينه ..؟! رفعت عيونها عليه:أدري أنك تفكر فيها 24 ساعة .. و كل شيء بحياتنا لها دخل فيه ..!! راكان بكل ربكة:ليان وش .. قاطعته:لما تبتسم تبتسم لها موب لي .. لما تسولف نفس الشيء .. لما تأكل و لما تشرب حتى لما تنوم .. أنت ما تقدر تشوف غيرها .. كل اللي ناقص أنك تغلط باسمي و تناديني باسمها .. راكان بكل عصبية:ليان ..! ليان:ليش تضايقت .. لأنها الحقيقة صح ..! أنت على بالك إني انسانة نازلة من السماء و خالية من الهموم أنا مثلك بعد إنسانة و فـ الأخير راح أنهار .. بلع ريقه بكل توتر .. وش ينطق .. وش يسأل وش ينهي هالحوار عليه ..! حيرته فـ كل ثانية تزيد .. بس كل اللي قدر عليه .. ينسحب .. و يتركها تتخبط فـ همها أكثر و أكثر ..! .._.._.._.._.._.. زفرت بكل ضيق:اوووف تعب .. نزلت أم بسام عبايتها و نظرة الانبهار تملاء عيونها:ما شاء الله تبارك الرحمن تطورت الشاليهات كثير .. لوجين بكل غرور:لو كنا مأخذين فـ شاليها الـ*** ما كان أحسن .. أبو بسام و هو يرمى بثقله على الكنية:حاولت أحجز لكنها مليانة .. جلست جنبه:ما شاء الله عاد الاجازة سوقهم ..؟! لوجين و عيونها تحوم بالمكان:طيب وش نظامكم الحين ..! أبو بسام:بقي ثلاث ساعات على الظهر يعني باقي كثير على وقت طيارة أبو بدر و أبو تركي .. أنا بجلس معكم لحد الظهر .. وقفت أم بسام:أنا منهد حيلي ما تعودت على جلست الصبح ..!-تثاوبت:بروح أنوم .. لوجين و هي تتصنع النوم:و أنا بعد ..-لفت على أبوها:أنا أقول يبه لو تروح لـ شاليه الرجاجيل و تنوم هناك أحسن .. أبو بسام:و أترككم لحالكم ..!! لوجين:يبه عادي نقفل الأبواب علينا .. بعد صعبة عيال عماني يجون و يدخلون هنا و أنت موجود .. قصدي خاف تروح علينا نومة و يدخلون هنا .. صعبة ..! زفر بكل ضيق و هو يستسلم لـ رأيها:و أنتي الصادقة ..حتى أنا شكلي بنوم .. ابتسمت لـ أبوها:نوم العوافي يا رب ..-راقبته لحد ما طلع لحقت أمها و شافتها تتمدد على السرير .. قربت و انسدحت جنبها .. خمس دقايق .. عشر .. وصلت للـ الربع .. تأكد أن أمها استغرقت فـ النوم .. رجعت تطلع من السرير بكل هدوء حتى ما تحس أمها عليها .. طلعت فـ صالة و قبل لتوصل لـ نصها .. دقت عليه .. رد بكل حماس:صباح الخير .. همست:صباح السكر حياتي .. عيسى بكل استغراب:وش فيج حياتي ..! لوجين:ما أبي صوتي يصحي أمي .. ابتسم عيسى:وصلتوا .. حمد الله على السلامة .. ابتسمت:الله يسلمك .. و الحين أمي و أبوي ناموا .. بتجي تأخذني و إلا شلون ..؟! اتسعت ابتسامته:ايه يالله جايج .. عطيني العنوان بالضبط .. لوجين:مدري بس اسمها شاليهات الـ *** رقم شاليهنا ** .._.._.._.._.._.. فتحت لها الباب و دخلت .. ريناد و الإحراج واضح بصوتها:السلام عليكم .. جنى و هي تأخذها بالأحضان:و عليكم السلام .. ريناد و عيونها تحوم بالمكان:سوري أزعجتك من الصبح ..!! جنى:حياك .. وش هالكلام بس .. تدرين من زود الحظ الردي صرت أقوم الصبح بدري من غير منبه ..! ريناد وهي تنزل عبايتها:و ليه حظ ردي ..! جنى:قصدي لو كانت أيام دراسة كان الحين فيني نوم .. ابتسمت:من هالناحية صدقتي .. دخلتها المجلس:حياك هنا .. ريناد بصوت هامس:البيت هدوء لا يكون بس جيت بوقت غلط .. ابتسمت و هي تجلس و تجلّسها:لا بالعكس .. بس الجازي تلقينها فـ غرفتها مع هالاوراق و نوف نايمة خبرك نظام العطلة معفوس .. ابتسمت ريناد بكل إحراج:عاد اسمعي أنا ما تعودت أكذب بقول لك وش جابني .. جنى:مو مهم .. جيتك عندي بالدنيا كلها مهما كان السبب .. ريناد:و الله إني مفتشلة من أختك ما صار لك يومين عندها و جيت أزورك .. جنى:يا بنت الحلال عادي ..-وقفت:أروح أجيب لك شيء تشربينه .. ابتسمت لها .. .._.._.._.._.._.. مسحت على رأسها و بنبرة أقرب للترجي:غزل حبيبتي قومي يالله .. دقيقة .. ثنتين .. ثلاث .. ما ردت عليها فقدت فجر الأمل من جديد .. زفرت بكل ضيق و هي تمشي للحمام حتى تتوضا لـ صلاة الظهر .. رن جوالها يستوقفها .. ردت:اهلين .. ريتاج بكل حماس من وراء السماعة:ويننننك ما عاد بقي شيء على الطيارة أنتي معنا ..! هزت رأسها بالنفي:لا موب رايحة .. عندي كم شغله مهمة ..!! ريتاج بكل لوم:وش اللي موب مهم بالحياة .. فجر الله يخليك ارحمي نفسك و عطيها إجازة .. ابتسمت:ما عليه حياتي جد و الله ما أقدر .. ريتاج بكل خوف:عسى أبوك ما فيه شيء ..! فجر:لا هو للحين فـ المزرعة الحمد الله مبسوط و مرتاح هناك .. ريتاج بكل ضيق:أجل وش عندك ..؟! فجر:ما عليه لما ترجعون بـ تعرفين .. زفرت بكل ضيق:بتركك على راحتك موب عشانك عشان بس الطيارة اللي بتقلع بعد شوي .. .. . .. على بعد كم طابق لـ تحت .. زفر بكل ضيق:هذا كل اللي قاله الدكتور .. حسن بكل ضيق:لا حول لا قوة إلا بالله .. هذا ابتلاء من رب العالمين .. عبد العزيز و الحزن بصوته:وش مصبرنا غير كذا ..! حسن:طيب ما قلت لي اسم الدكتور المشرف على حالتها .. عبد العزيز:ما أعرف اسمه نسيته .. بس الحين فيه دكتورة ماسكة حالتها .. حسن بكل ضيق:الله يصبر قلوبكم و يقومها لكم بالسلامة .. همس:اللهم آمين .. قرب منهم و بكل استغراب:عبد العزيز ..! حسن ..!! رفع الدكتور حسن رأسه:اهلن دكتور عبد الملك .. عبد العزيز و هو يسلم عليه:ولد حلال توني أقول لـ حسن عنك بس إني نسيت اسمك .. حسن بكل استغراب:أنت المسئول عن أخت عبد العزيز .. انضم لهم عبد الملك:لا طبعا تخصصي مثل تخصصك بسأانا استلمت الحالة أول ما وصلت و قاعد أشرف عليها بس .. عبد العزيز بكل استغراب:يعني أنتو ..!! كمل حسن عنه:دارسين مع بعض .. ابتسم:اهاا .. .._.._.._.._.._.. ..:و أنا جاي لك فـ الطريق شفت أخوها .. الدكتور:متوهم يعني ..؟! هز رأسه بالنفي:لاء .. أنا متأكد أنه حقيقة .. –بكل ربكة:سألت قالو أنها هنا .. ابتسم له:و كأن رب العالمين كاتب لك عمر معها .. لازم ترجع لها و توضح لـ .. قاطعه:مستحيل .. أنا خايف من ردة فعلها أكيد ما راح تتقبلني ..! الدكتور:أنت أقوى من كذا ... و مثل ما قلت هاذي فرصتك و يمكن تكون الفرصة الأخيرة لك معها ..! .._.._.._.._.._.. صرخت فـ الجوال بكل عصبية:وشلون يعني موب عندك ..؟! أبو بسام بكل عصبية:الحين أنا ما تركتها معك ..! أم بسام:ايه أنا نمت و هي جنبي بس لما صحيت ما لقيتها .. أبو بسام:شوفيها يمكن برا على البحر و إلا طلعت تتمشى من هنا و إلا هناك ..! أم بسام:دورت .. ! ما في أحد ..؟! زفر بكل ضيق:بطلع أدورها حول الشاليهات ..!! .._.._.._.. نهاية الجزء .. "