قلوب تتراقص على انغام الالم - الفصل 33 - بقلم ROoOnQ - مكتملة | روايتك

الجزء الـ|[33]|ـثالث و الثلاثون .. .. . فتح الباب و دخّلها .. اختنق صوتها:ميااااااف ..!! تلفت حوله و شغل الأنوار .. رمى المفاتيح على المدخل .. تلفتت حولها .. هدوء المكان زادها خوف .. تراجعت خطوتين لوراء و هي تشوفه يقرب منها .. همست:مياف وش بتسوي ..؟! مسك يدها و جرها وراه .. دخلها لـ غرفة النوم .. رماها بكل خفة على السرير و مد يده سحب الصورة من على التسريحة .. و رفعها عند عيونها بالضبط .. حست بنفسها بخف الريشة و هي تطير من دفعة وحدة من يد مياف الثقيلة .. من على الأرض للسرير .. غرقت فـ دموعها و هي تدفن وجهها بين كفوف يدها .. و كأنها تحمي نفسها بيدها .. دقيقة .. ثنتين .. ثلاث .. نزلت يدها المرتجفة من على عيونها و كلها خوف .. خذا نفس أخيرا .. يرغم انه فـ موقف القوة لكنه أكثر توتر منها .. .. بانت الصورة قدامها بعد ما كانت الدموع مغشية عيونها .. مدت أصابعها المرتجفة و سحب الصورة .. همست بكل تلقائية:أمي ..!!! زفر بكل راحة .. مشى بخطوات هادية و جالس على طرف السرير .. قريب منها .. زادت ملامح الصدمة على وجهه و عيونها معلقة فـ الصورة .. خذا نفس من جديد:كانت عايشة هنا .. –بعد تردد واضح:مع أبوي .. لفت عليه مصدومة:عمي ..! هز رأسه بالنفي:لاء .. أبوك .. بلعت ريقها .. و بصوت مبحوح من الصياح:أنت وش تقول ..؟! مياف و عيونه على الصورة:أبوي كان متزوج من أمك .. صار بينهم أشياء كثيرة ما أعرفها بس فـ الأخير افترقوا .. و سالفة إن أبوي عمك كانت مجرد كذبة .. جمان بكل توتر:ليه كذب علي ..! و بعدين وش اللي يثبت كلامك .. مياف:مدري ليه .. بس الشيء اللي متأكد منه إن أبوي غلطان لأنه طول عمره يغلط و بس و محد يحاسبه .. و يمكن لأنه عارف أنك ما راح تسامحينه استحي يقول لك الحقيقة من أول لقاء بينكم .. جمان بكل إصرار:ما جاوبت على سؤالي .. وش يثبت لي أنك صادق .. رجع يوقف .. مد يده لـ درج يسار التسريحة .. سحب الملف و رماه فـ حضنها .. صور .. عقد زواج .. شهادات ميلاد .. و الكثير ..!! رخت يدها و الأوراق تنتثر حولها .. ارتسمت فـ عيونها نظرة توهان .. قرب منها و بـ نبرة هامسة أقرب للترجي:جمان ... أبوي دخل غيبوبة و محد يدري متى بيطلع منها .. إذا تبين ترجّعين حياتك لازم تسمعين كلامي .. لمعة الدموع فـ عيونها:لا أم و لا أب .. وش الحياة اللي تبيني أرجّعها ..! زفر بكل ضيق:تبين تعيشين فـ الشارع أجل ..؟! هزت رأسها بالنفي:أكيد لاء .. ارتسمت فـ عيونه نظرة تساؤل:أخواني و خوات مجتمعين فـ الفلة .. خلينا نروح .. بلعت ريقه بكل خوف .. و بكل الأحوال ما بيدها خيار غير أنها تطاوع مياف بكل شيء .. .._.._.._.._.._.. مشى بكل هدوء و هو يتأمل الناس حوله .. دخل غرفة بسام اللي تركها من نص ساعة .. وقف لـ ثواني مستغرب:بسام وش مقومك من سريرك ..؟! لف عليه .. رمش .. بعيونه مرة .. ثنتين و ثلاث .. همس:عادل .. قرب منه عادل و بكل تردد:بسام .. تشوف ..! اتسعت ابتسامته:أشوفك بس موب واضح .. ابتسم و الفرحة تلعثمة:ممممم .. موب .. مهم أهم شيء تشوف ..!!! رجع يجلس على طرف السرير:مدري يمكن يتهيأ .. لي .. مشى لعند الباب بكل سرعته:رايح أنادي الدكتور .. .._.._.._.._.._.. جالسين جنب بعض .. نوف:طيب وش صار عقب ..؟! جنى و بصوتها نبرة خيبة أمل:خذينا العنوان و رجعنا .. نوف:و ليش ما رحتوا على طول ..! زفرت بكل ضيق:أسألي أمك ..! الجازي:يعني حلوة نطب على الناس كذا ..؟! سكتوا ثنتينهم .. محد يقدر يرد .. حتى لو ظلوا يتناقشون معها لـ بكرة هي اللي معها الحق فـ الأخير.. خذت نفسها و هي ترخي جسمها على الكنبة:الظهر بدق عليهم .. و بتفق نزورها المغرب ..! وقفت و هي ترفع عبايتها معها:أنا رايحة أنوم .. حيلي منهد .. وقفت نوف مع جنى:و أنا بعد .. ناظرت فيهم بكل ضيق:أجلس لحالي يعني ..! ناظروا بعض بكل تردد و رجعوا يجلسون .. .._.._.._.._.._.. ركضت تفتح الباب لأخوها .. صرخت فيها دينا:بنت شوي شوي لا تنكسرين علينا .. نبي نسافر فـ هالصيفية .. ناظرتها وهج بكل لوم:و أنتي هذا اللي همك ..!! تنحت وسن وهي تشوف أخوها واقف و جنبه وحدة غريبة ..! ابتسم:وش فيك .. ما تبيني أدخل ..؟! تراجعت خطوتين لوراء .. دخل مياف و راءه جمان .. .. وقف الكل متفاجأ .. و محد خطر فـ باله فكرة غير أنها .."زوجته" .. .. سلمى بكل استغراب:من هاذي مياف ..؟! ابتسم و هو يقدمها:حياك جمان .. سكرت وسن الباب وراهم .. و كملت طريقها معهم .. مياف .. جمان .. وسن .. جلسوا جنب بعض على نفس الكنبة .. مشاري بكل حماس:مياف ..!-رجع يسكت .. لف نظرة عليه .. استغرب من ملامح أخوه .. و سكوته فجأة .. رجع يلف على خواته:هاذي جمان .. أختنا .. وقف عبد المجيد:اييش .. تستهبل أنت ..؟! خذا لفة بنظرة على وجوه أخوانه و خواته .. نفسها .. ملامح و نظرة الصدمة .. كمل بكل خوف:تذكرون .. نورة زوجة أبوي .. وهج بكل توتر:مياف وش اللي تبيه أنت بالضبط .. لما كشفت السالفة شفت وش صار فـ البيت .. الحين لو درت أمي أنك جبت بنتها لهنا .. متوقع وش بتكون ردت فعلها ..! دينا:الحمد الله أنها رايحة لـ زواج .. بنت أبو عبد المحسن ..! نطق أخيرا بعد ما كان نصيبه من كل جلستهم الصمت .. محمد:وش فيكم شبيتوا فـ مياف ..ترا ما له ذنب الغلط غلط أبوي .. وهج:بس هو جاي يكملها ..!! مشاري بكل عصبية:يعني نقط أختنا فـ الشارع عشان أمي .. وش هالكلام اللي ما يرضي لا رب و لا شرع ..! وهج بكل ضيق:يعني كلكم ضد أمي .. سلمي بتردد واضح:لاء كلنا مع الحق .. نظرة صدمة و تفاجاء .. وجهتها عيون وهج و دينا لأختهم .. سلمى:محمد و مشاري و مياف .. على حق .. هي فـ الأخير اختنا و من دمنا .. موب عشان أبوي طايح فراشه و أمي هي اللي تتحكم .. نسكت على الظلم .. دينا:تدرين لو رجعت أمي و سمعت هالكلام .. أقلها تشب حريقة فـ البيت .. انفتح الباب بكل هدوء ... ترقب .. خوف .. قلق .. ملامح شملت وجوه الكل حتى جمان نفسها .. نزلت أم محمد الطرحة اللي ما غطت غير نص شعرها ..:مساء الخير .. همس الكل:مساء النور .. وقفت دينا و بكل قلق:مام .. ما كأنك راجعه بدري ..؟! زفرت بكل ضيق:زواجهم يطفش و العروس ما شفناها .. أنا وش رايحة لغير كذا .. عدلت طرف تسريحتها:اووف أنا طالعه لـ غرفتي .. –مشت خطوتين لـ قدام .. رفعت وحدة من رجولها على الدرج .. لكنها حست بشيء موب طبيعي .. رجعت تلف على بناتها و أولادها و هي تحس بـ خلل فـ عددهم .. طاحت عينها على جمان .. تسارعت أنفاسها و هي تشوف نفس اللي الإنسانة اللي نغصت عليها عيشتها قبل 18 سنة .. لكنها نسخة مصغرة ..! ما فكرت كثير و توصلت لـ أنها .."بنتها" .. قربت منهم أكثر:من هاذي ..؟! ابتسمت وسن بعد ماكنت نظرة التأمل واضحة بعيونها المعلقة فـ جمان:هاذي أختي ماما .. تعمقت نظرة الصدمة فـ عيونها:نعم ..! وقف مياف ووقفت معه جمان:أختي جمان .. أختي من أبوي .. ارتسمت على وجهها ابتسامة استهزاء:أكيد بتكون من أبوك .. بس أنا قايلته .. رجعتك هاذي وراها سر ..؟! مياف بكل إندفاع:لما دخلت لهالبيت من جديد .. ما كنت اعرف عنها أي شيء .. قاطعته بكل عصبية:اسمعني زين .. كلها كم يوم و أبوك الهمّ يريحني من وجوده فـ هالدنيا .. دينا بكل عصبية:مام .. وش هالكلام ..؟! كملت كلامها و شرارة الشر تطاير من عيونها:أبوك راح يموت و طاري هاللي ما تتسمى راح يموت معه ..-رفعت أصبعها و بكل احتقار:و وجود هالانسانة راح يموت بعد .. وقف مشاري و أعصابة تتوتر أكثر من كلام أبوه:لو ما صار اللي صار لأبوي .. كان ألحين هو اللي واقف هنا جنب جمان .. اتجهت أنظار الكل لـ مشاري .. كمل كلامه بكل توتر:أبوي زارها هي و أمها من كم أسبوع .. و كان مخطط يجيبها لـ هنا .. بس ما الله كتب ..! ناظرت فـ عيالها بكل غيض .. الكل ضدها .. محد يفكر يقول كلمة .. يثبت بها وقفته جنبها .. رفعت فستانها الطويل و كملت طريقها لـ فوق .. راقبت وهج أمها بكل خوف .. دينا بنفس خوفها:لازم أحد يطـ .. قاطعها محمد و هو يطلع الدرج:خلوها لي .. زفر عبد المجيد بكل ضيق:مبسوطين حضرتكم .. مياف .. وسن .. جمان .. سلمى . وجهوا نظرة استغراب لـ مشاري .. مياف:ليش ما قلت لي ..؟! مشاري و هو يجلس و الكل يجلس معه:ما كان أبوي يبي أحد يعرف ..حتى محمد ذراعه اليمين فـ الشركة ما كان يدري ..! وهج:على الأقل قلت لوحدة مننا .. نعرف نتصرف مع أمي لما يجي أبوي لهنا .. مشاري:و الحين أبوي ما جاء و مياف هو اللي هنا مع جمان .. وروني وش بتسون ..؟! سلمى بكل هدوء:خلاص محمد بيتفاهم مع أمي .. أصلا ما بيدها شيء هاذي رغبة أبوي الحين و هي تدري أنها ما راح تقدر على شيء .. دينا بكل ضيق:هذا اللي قدرتي عليه ..-لفت على وسن:و أنتي يا مس وسن .. ساكته ساكته .. و يوم تكلمتي بغيتي تفجرين علينا قنبلة فـ البيت .. ناظرتها وسن بطرف عينها رجعت تلف على جمان .. و الابتسامة ترتسم من جديد على وجهها:كم عمرك الحين ..؟! ابتسم بكل إحراج:قريب بدخل الـ 19 .. وسن بكل حماس:خلصتي الثانوي .. أنا هالسنة خلصت .. ؟! جمان و الخوف بصوتها من نظرة الكل لها:ايه .. بس مدري عن نتيجة .. وسن:يوه .. ليه صار لها أسبوع نازلة فـ النت و اختبار القدرات بعد أسبوع .. مياف بكل ضيق:أمها توفت الأسبوع الماضي .. ارتسمت نظرة الحزن بعيون وسن .. :سوري .. إحساس بالذنب تملك .. وهج و دينا و حتى عبد المجبد .."لا أم و لا أب و بعد ما نبي يكون لها أخوان" .. كتمت وهج هالكلمة بخاطرها .. وسن رجعت تتكلم بحماس:خلاص بعد العشاء .. اطلع لك نتيجتك .. دينا بكل لوم:يا فضيك يا أختي .. من يفكر بالعشاء بوقت مثل كذا .. ناظرتها وسن بكل غيض:نموت من الجوع يعني ..؟! ..-رجعت تلف على جمان:عطيني رقم سجلك و إلا ما تعرفينه .. جمان بكل حماس .. و هي تتناسى وجود الكل:لا حافظته و صمّ بعد .. طلعت جوالها من جيب بنطلونها .. :أيوه .. عطيني الأرقام .. جمان:01 ... ****** .. وسن بكل استغراب:نفس رقمي .. بس الرقمين الأخيرين يفرقون .. وفر بكل راحة .. مشاري:طبعا لأنكم خوات و مولودين فـ نفس السنة .. وقف مياف:مشاري بغيتك بكلمة رأس .. .._.._.._.._.._.. زفرت بكل ضيق .. و سماعة التلفون على أذنها:الله يهديك بس .. روحي نومي من غير وسوسة ..؟! ريناد بكل خوف:ليان وش وسوسته .. أقولك ما سمعت صوته من الظهر صدقيني فيه شيء .. فركت ليان جبينها بكل توتر:اليوم كلمني على المغربية .. بس هو ما يبيك تقلقين لأنك طول الوقت تسألينه أسأله توتره و هو خايف يقولك شيء و تقعدين طول ليلك تفكرين فيه ..!! ريناد بنبرة شك:جد ليون ..؟! ليان بكل ضيق:أكذب عليك يعني .. زفرت بكل ضيق:لاء .. بس .. ليان:شفتي شلون توترين الواحد .. يا ريناد .. بسام محتاج لـ راحة .. و أنتي كذا تشغلينه عليك أكثر .. زفرت بكل ضيق:خلاص خلاص .. بنوم و أحاول أنسى السالفة ..-بكل تردد:آسفة أشغلتك .. ناظرت فـ ساعتها:لا عادي .. راكان للحين تحت .. يا الله بسكر لا يطب علي و أنا على التلفون .. ابتسمت ريناد:تصحبين على خير .. ليان:تلاقين الخير ..-نزلت سماعة التلفون و بنفس الوقت رفعت جوالها .. زفرت بكل ضيق و هي تطلب رقم بسام .. هزت رجولها بك توتر"وينك ليه ما ترد ..!!" .. نزلت الجوال بكل ضيق ..:بكتب له رسالة لو يقراها له صديقه موب مهم .. أهم شيء ما تنكشف كذبتي على ريناد ..! فتحت مسج جديد .."بسام .. أنا كذبت على ريناد و قلت لها أنك كلمتني و .. .._.._.._.._.._.. "و قلت لي أنك خايفة تسمعها صوتك وتقلق عليك أكثر طبعا ما صار هالحكي .. بس أبيها تنوم و ترتاح .. لأنها على طول متوترة و أنا خايفة على صحتها و صحة البيبي ..! " اتسعت ابتسامته و الحروف تتضح قدام عيونه .. دخل الدكتور بكل حماس:بسااااااام ..! رفع رأسه:خير يا دكتور .. قرب منه و هو يشغل .. مصباحه الطبي .. غمض عيونه بشكل مفاجئي .. اتسعت ابتسامة الدكتور ..:فيه استجابة ..! ابتسم:دكتور .. أشوف بس أحس بمثل الضباب على عيوني .. يزيد و يخف .. ابتسم الدكتور:طبيعي جدا .. بس امش على غرفة الفحص .. أنا لازم أكتب تقريري عنك قبل لا أنهي شفّتي .. .._.._.._.._.._.. مشى معه لـ يسار الصالة .. مشاري بكل استغراب:وش اللي عندك و ما قلته قدامهم ..!! جلس بكل هدوء:وش الأشياء اللي تعرفه عن أم جمان ..؟! ابتسم مشاري:تصدق شفتها .. نسخة من جمان .. –زفر بكل ضيق و ابتسامته تتلاشى:الله يرحمها .. مياف بكل استغراب:صدق .. متى شفتها ..؟! مشاري:المرة الأولى أبوي راح لـ بيتهم و شاف جمان و أمها .. و أنا انتظرته برا .. بس المرة الثانية زرناها بالصبح و سمح لي أبوي أدخل أسلم .. مياف:طيب دامك تعرف طريق بيتهم .. ليه ما رحت تطمن عليهم بعد اللي صار لأبوي .. مشاري بكل تردد:كنت متوتر مع اللي صار لأبوي .. و ما جاء فـ بالي يصير شيء لأم جمان .. بس أمس رحت و سألت و عرفت أنها توفت و وصلت لـ بيت أم عبد الرحمن .. لكنها طردتني شر طردة .. زفر بكل ضيق:لو أقول لك وش صار مع هالأنسانة و جمان تكره الدنيا ..!! مشاري بكل اهتمام:وش صار ..؟! قطع كلامهم صوت رنة جوال مياف .. رد بكل سرعته أول ما لمح الأسم .. ... مياف بكل لهفة:ها بشر ..؟! زفر من وراء السماعة بكل ضيق:طلعت التحاليل .. لازم تجي عشان أقدر أشرح لك .. مياف:خير فيها شيء كايد .. عبد الملك:ما تقدر تقول .. بس محتاجة لعلاج بأسرع وقت ..! مياف:طيب تكلم وش فيها ..؟! تنهد:ما ينفع أبيك تجيني .. مياف:طيب الحين أنا مع الأهل و جمان معي .. عبد الملك بكل لوم:سويتها يعني .. ابتسم مياف:صارت سالفة بس الوضع أهدى من ما توقعت .. .._.._.._.._.._.. نزلت الجوال بكل توتر ..:يارب يقراها .. فتح الباب و دخل لـ شقته بكل هدوء .. وقفت ليان و بعيون كلها ترقب لـ راكان .. استغرب نظرتها:وش فيك ..؟! ابتسمت:تأخرت ..؟! زفر بكل ضيق و هو يقرب منها:حمد قدر يتهرب من أبوي .. و المحاضرة جت من نصيبي .. زفرت بكل ضيق:تستاهل .. وعد أختك قالت عن كل شيء أنت دايم تسكت .. و تخلي نفسك الغلطان .. ناظرها بطرف عينه:ترا موب رايق لك .. يكفي ضغط الشغل فـ الصبح و العصر والحين هوشة حمد و أبوي ..! ليان بنبرة كلها لوم:أنت اللي ضاغط نفسك يعني كان ضروري .. تقبل طلب صديقك .. راكان:كلها يومين.. و بتخلص هالسالفة ..؟! رجعت تبتسم:طيب عقب هاليومين نقدر نكمل شهر العسل صح ..؟! ناظرها بكل استغراب ..:بدري ..! ليان كلها حماس:اليوم لما كنت فـ بيت أهلي .. كل البنات تجمعوا عشاني و قالوا لي أنهم اتفقوا بداية الأسبوع الجاي يسافرون على الشرقية .. بلع ريقه بكل توتر:الشرقية ..؟! ليان:ايه الشرقية ..قريبة و بنفس الوقت نجتمع مع بعض و نستانس .. راكان:بس هذا شهر عسل المفروض نقضيه لحالنا .. ليان بكل إصرار:قدامنا العمر كله إن شاء الله .. و بعدين أنا فكرت نروح أنا و أنت و أهلك .. راكان بكل ضيق:بعد ..! ليان:ايه .. أبوك رجال كبير وينه وين السفر لحاله مع أمك و أختك ..؟! و بعدين أنت عندك رصيد إجازات كافي و فوق هذا كله تفرح قلب وعد المسكينة .. مو معقولة إجازة و تنحبس فـ البيت ..!! زفر بكل ضيق:بسسس ..! ليان:لا بس و لا غيره ما لك أي عذر .. حتى الفلوس عندك ..!! زفر بكل ضيق:خلي هاليومين يعدي على خير ..-وقف:و بعدها نفكر ..-مشى لغرفته و كله أمل هالنقاش ينتهي .. لحقته و بكل لوم:راكان وش فيك أنت وعدتني ..!! .._.._.._.._.._.. هزت رجوله بكل توتر:عبد العزيز قم .. زفر بكل ضيق و هو يبعد المفرش عنه:خير وش فيك ..؟!-رفع راسه للدريشة:حتى الشمس ما طلعت ..! فجر بكل خوف:الشرطة برا يبونك ..!! جلس و بكل خوف:شرطة ..!! .. ليه ..؟! فجر و توترها يزيد:يعني بسأله وش تبي فـ أخوي .. قلت مين قالوا شرطة نبي عبد العزيز الـ**** .. نفض المفرش بعيد عنه .. لبس ثوب البيت بكل سرعته و طلع لهم .. فتح الباب و الخوف واضح على وجه:خير .. .. . رايحة جاية بالصالة .. من يومين ما ارتاح فكرها و الحين تكمل السالفة مع الشرطة ..! زفرت بكل ضيق و هي تهمس .."يا رب استرها ..!" .. .. رجع يدخل ركض لـ غرفته .. لحقته:عبد العزيز وش صاير ..؟! سحب ثوبه من على المعلاق:غزل .. يقولون لقوها فـ مستشفى ..؟! رفعت يدها على صدرها و بكل خوف:وش صاير .. حادث ..؟! هز رأسه بالنفي:لاء .. يقولون هي اللي رايحة لهم ..-طلع من غرفته و لحقته:أنا الحين بروح و أعرف وش السالفة ..!! فجر:وين تروح .. انتظرني البس عبايتي ..؟! زفر بكل ضيق:تستهبلين .. وين تروحين ..؟! فجر:مستحيل ارتاح إلا لما أشوفها .. ما راح تطلع إلا و رجلي على رجلك .. عبد العزيز:بكل ضيق:الوقت متأخر و بعدين أبوي يجلس .. فجر بكل عصبية:أبوي من أمس و هو فـ مزرعة أبو سعد و إلا نسيت ..! .. و الوقت موب عذر .. همس بكل استسلامية:يا الله استعجلي ... .._.._.._.._.._.. صرخت بكل صدمة:الأحد الجاي .. واقفة قدام التسريحة تمشط شعرها .. نهى بكل برود:ايه .. أجل متى تبينه يتم ..؟! زفرت بكل ضيق .. نوف:توقعت يطول شوي .. الخميس على الأقل ..؟! نهى:وش يطول .. مشاري خلص كل أوراقكم .. و بعدين خميس من أحد ما تفرق .. الحين عطلة و كل الأيام مثل بعض .. و ما عندكم أي حجة أنتي وياه ..؟! نوف:بس ما شريت و لاشيء ..!! ناظرتها بطرف عينها:شريت كل شيء ممكن تحتاجينه .. موب أنتي اللي قلتي لي أتقضى عنك ..! جلست على طرف السرير .. بكل خيبة أمل:بس توقعت عقب شهر أو شهرين .. نهى و هي تقرب منها:أي شهرين .. أنتي وياه المفروض تكونون هناك من قبل لأن الدراسة هناك تختلف .. نوف بكل توتر:تتوقعين بتأقلم ..؟! نهى بكل لوم:ما ظنتي بتختلفين معهم .. انجليزيتك .. فوق التمام من هالأغاني الزفت اللي تسمعينها و غير كذا فيه كثير عرب هناك أتوقع ما راح تلاقين مشكلة ..! نوف و توترها يزيد:بس شلون بكمل دراستي و أنا للحين فـ الثانوي .. وقفت:لا تخافين أكيد مشاري تكفل بالموضوع .. قومي ننزل لـ تحت .. نلحق على البنات قبل لا يفقدونا .. ثم خذي لك فـ التأليف ..! زفرت بكل ضيق و هي تمشي وراها بكل استسلام .. .. . .. سهام بكل حماس:حيا الله العروس .. من الحين تغلي و ثقل .. ابتسمت لها نوف و هي تجلس .. نهى بكل ربكة:وش تغليه ..! .. أمس سهرنا فـ غرفتنا خذتنا السوالف على قولتهم و اليوم راحت علينا نومة .. أم سامي:الله يهديكم بس لازم تنظمون نومك و ..-بدت السوالف من قصة النوم إلى ما لا نهاية .. .. قربت أميرة من عند نوف و همست لها:مشاريوه اشغلني أمس عليك .. لفت عليه و بكل استغراب:انا ..؟! ليه ..؟! أمير:مُصر أنك تختارين القصر و كل شيء يخص الزواج .. زفرت يكل ضيق:قلت له أنا إني ما عندي ميول لهالأشياء ..؟! و لا أعرف شيء .. زفرت بكل ضيق:ما عليه يكون درس لك .. بكرة لـ تزوجوا بناتك .. ببتوهقين .. ابتسمت:الله يخلي لي نهوي .. ناظرتها بكل لوم:خلاص بدبر كل شيء لك و أقول لمشاري أنه ذوقك .. ابتسمت:يعجبني ذوقك .. نفخت صدرها بكل غرور:احم .. احم .. لفت عليهم و بكل فضول .. الجوهرة:وش تتساسرون عليه ..؟! أميرة تتصنع العصبية:وحدة و مرت أخوها يسولفون وش مدخلك أنتي ..؟! ناظرتهم بكل غيض:الحمد الله نوف بتسافر و إلا كان بتسحبين علي .. فجرت ضحكة بكل تلقائية:ههههههههههههههههه� �ههههه .. أنا قايلته جوجو خربت و صارت عربجية مصغرة من نوفا .. خزتها بكل غيض:لها الشرف تصير مثلي .. لمى:هههههههههههه .. جنت على نفسها براقش .. الحين نوف على يمينك و الجوهرة على يسارك وش بيفكك منهم .. أميرة تتصنع الخوف:نوفا بعد عمري مرت أخوي .. جوجو حبيبة قلبي أنتي .. ضحك الكل على أميرة .. .._.._.._.._.._.. هزت رجولها بكل توتر:وش هالكلام من أمس و إنا هنا و محد كلمنا ..؟! زفر بكل ضيق:قال لك الدكتورة يبيلها فحوصات و تحاليل أكثر حتى يتأكدون من اللي فيها ..!! فجر:كلامها خوفني زود .. خذا أنفاسه بكل توتر:أرجعك للبيت ترتاحين .. هزت رأسها بالنفي:مستحيل أرجع من غير ما أشوفها على الأقل .. .. طلعت الدكتورة من غرفة غزل و الضيق واضح على وجهها .. قربت منهم:أنتوا أهل المريضة ..؟! فجر:طمنينا يا دكتورة ..؟! الدكتورة بكل ضيق:صراحة أنا ما مسكت حالتها إلا اليوم الصبح .. عبد العزيز:يعني شلون يا دكتورة .. الدكتورة:أنا بخلي الدكتور اللي مسك حالتها ليلة البارحة يفهمكم على وضعها .. لكن أنا بتابعها من اليوم .. بما أنها رغبتها .. فجر بكل توتر:طيب وينه الدكتور ..؟! أشرت لهم على الطريق:من هنا .. .. . .. على بعد كم ممر .. بلع ريقه بكل توتر و الصدمة بعيونها:سرطان ..؟! عبد الملك و عيونه على الورق:عندنا فـ المملكة أغلب الناس تسميه فقر دم و هو أساس نوع من أنواع السرطان و أقلها فـ مستويات الخطورة .. لمعة عيون مياف و الخوف بصوته ..:طيب من متى فيها هالشيء ..؟! زفر بكل ضيق:راجعت ملفها الطبي .. من فترة قريبة دخلت المستشفى و إن ما خاب ظني هذا بداية تحول فقر الدم عندها إلى سرطان .. لكن الدكتورة اللي مسكت حالتها صنفته فقر دم و اكتفت بالمغذيات و الفيتامينات .. كوصفة لها .. زفر بكل ضيق:طيب وش بيصير لها ..؟! عبد الملك:المفروض من شهر أو شهر ونص يبدا نقل الدم لها .. يعني مثل عملية تغير الدم .. حتى تجدد صفائح الدم عندها .. بسسس ..-سكت و التردد واضح على وجهه .. مياف بكل خوف:وش اللي بس ..؟! زفر بكل ضيق:أنا أفضل أنها تبدا بالعلاج الكيماوي .. اضمن لها لأن المرض انتشر بكل مكان بجسمها .. و تبديل الدم كل نهاية شهر راح يعذبها .. مياف:طيب ليه لثتها تنزف وش دخلها بالسرطان ..؟! ابتسم:هاذي من أعراض السرطان اللي قليل اللي يعرفونها .. ع العموم أنا راح أشجع أهلها على العلاج بالكيماوي لأنه الأفضل .. تنهد بكل حزن:لازم تقنع أهله بهالشيء ..! عبد الملك بكل حماس:لازم .. عشانك بس .. ابتسم رغم ملامح الحزن:و علاج الكيماوي كم يأخذ فـ حالتها ..؟! عبد الملك:أنا موب خبرة فـ هالموضوع .. لكن إذا ما خاب ظني بيأخذ ثلاث أسابيع على الأقل .. غير كم جلسة حتى تتأكد من أنها تشافت .. زفر بكل ضيق:عبد الملك الله يـ.. قاطعتهم:دكتور لو سمحت .. لف عليها عبد الملك:خير يا دكتورة ..؟! زفرت بكل ضيق:أهل المريض اللي استلمتها أمس .. من الفجر و هم هنا يبون يعرفون وش صاير على بنتهم ..!! عبد الملك:و ليش ما قلتي لهم ..؟! الدكتورة بكل توتر:أنا بحياتي ما سويت شيء مثل كذا .. و بعدين أنت أكثر خبرة فـ توصيل هالأخبار من غير ما تصدم ..!! زفر بكل ضيق:طيب هم وينهم ..؟! ابتسمت بكل إحراج:فـ مكتبك ..؟! ناظرها بكل لوم:ما شاء الله .. ما في أي مجال للنقاش .. اتسعت ابتسامتها:طول عمرك الخير و البركة .. زفر بكل ضيق و هو يبعد .. و مياف وراه .. .._.._.._.._.._.. جوري بكل لوم:لو أنك مخلينا نروح معها فـ الطيارة كان الحين واصلين ...!! نواف و عيونه على الطريق:وش هذا .. غيره و إلا ايش .. ناظرته بنص عين:أنا أغار ..! ابتسم:طيب نشوف .. جوري بكل غيض:لا يكون بتسكن معنا ..؟! نواف يحرق دمها بكل برود:ايه وش فيها .. !! جوري بكل ضيق:و الله أنا ما أضمن أترك ولدي عندها ..!! نواف:ليش وش شايفتها سفاحة ..!! جوري:مرت الابو .. تظل مرت أبو .. و بعدين أنت ما تسمع هالقصص اللي تشيب الراس اللي تذبح و اللي تكب كلوركس .. نواف:الله .. الله ..!!! .. وش هالكلام الكبير ..!! جوري:لا كبير و لا مبالغة .. بس أنت موب داري عن الدنيا ..!! نواف:أنتي مصدقة .. هي أساسا شارطة تكون فـ بيت لحالها .. جوري بكل تردد:و أنت بتحط لها بيت ..! نواف:لا طبعا .. شقة صغيرة على قدي و قدها .. أنا ما تعبت نفسي و نقلت هنا عشان أصرف الزيادة فـ راتبي على شقة ..! ناظرته بنص عين:هذا اللي يتزوج على ثنتين ..!! نواف بكل لوم:أشوف قناعاتنا تغيرت..؟! جوري:لا قناعات و لا هم يحزنون .. بس اللي يتزوج أكثر من وحدة لازم يعرف أنه داخل فـ خساير مالية ما لها حد .. زفر بكل ضيق:من هالناحية صدقتي .. ابتسمت من وراء النقاب .. دقايق صمت .. صوت المكيف غطاء على الأجواء .. خذت نفسها بكل حماس و مع كذا التردد واضح بصوتها:أقول نواف .. نواف و عيونه على الطريق:خير ..! جوري:أمس دقيت على ليان .. نواف بكل استغراب:من ليان ..؟! جوري:صديقتي اللي أم زوجها تصير خالتي .. نواف:هي موب مسافرة شهر العسل ..! جوري:لا رجعت من يومين عشان شغل زوجها .. نواف:اها .. جوري بكل استغراب:ما سألتني وش المعنى من كلامي ..؟! زفر بكل ضيق:أكيد خذيتي عنوان خالتك .. ابتسمت بكل إحراج:ايه .. نواف:خلاص شوفي يوم فاضي .. أوديك لها .. جوري بكل تردد:وش رايك اليوم ..؟! نواف بكل صدمة:اليوم ..! جوري:ايه .. بنوصل على الظهرية .. و أنت بتأخذ لك ساعة أو ساعتين ترتب وضع دلال و تخلص الكم شغله اللي عندك .. ترتاح ساعتين ثم توديني .. زفر بكل ضيق:لاء اليوم زحمة ما ينفع .. جوري:طيب أروح بتاكسي .. نواف بكل عصبية:وش تاكسيه ..؟! جوري بكل ضيق:لما كنت فـ الشرقية كنت تخليني أروح و أجي مع التكاسي ..؟! زفر بكل ضيق:خلاص إذا فضيت وديتك .. و إذا ماحصل خليها يوم ثاني .. همست بكل استسلامية:إن شاء الله .. .._.._.._.._.._.. وسن و عيونها على شاشة الاب توب بكل تركيز ..:اممممممممم .. جالسة جنبها على السرير .. و لابسة وحدة من بيجاماتها .. جمان و الترقب بعيونها:ها بشري .. لفت عليها وسن بكل صدمة:99 ..!!! ابتسمت بكل راحة:و الله ... الله يبشرك بالخير .. نقزت عليها ضمتها:أختي دفررررة .. اتسعت ابتسامتها و هي تضمها:راح نص الطريق .. بعدت عنها و بكل حماس:لازم نبداء نذاكر للقدرات ..! جمان بكل توتر:بس ما حجزت لي مقعد .. أخاف تكون راحت علي .. سحبت جوالها من على الكامدينة:لا تخافين الحل بيدي ..-فتحت سجل الاتصال و طلبت رقم .. رنة .. ثنتين .. ثلاث .. من وراء السماعة:هلا و الله و غلا و أخيرا حنيتي علينا .. وسن:صباحك سكر بيش .. بشاير:أحلى صباح بصوتك .. أخبارك يالغلا ..؟! وسن بكل حماس:تمام .. بس خلك مني و من أخباري .. بيشو بغيتك فـ خدمة ..؟! بشاير:عيوني لك .. وسن:فيه وحدة .. ما أمداها تسجل قدرات أبيها تختبر معي .. بشاير:و من هاذي اللي سرقت قلبك مني ..!! ابتسمت وسن:أنتي وين و أنا وين ..!! .. هاذي أختي .. بشاير بكل استغراب:أختك .. كل خواتك متخرجات .. و دنو فـ الجامعة ..! وسن:لاا سالفة طويلة .. لازم تجيني اليوم و أقول لك على كل شيء .. المهم تقدرين تدبرين لها مكان .. بشاير:يب شور .. تعرفين القاعة اللي راح نختبر فيها مو أي أحد يدخلها .. و أمي قدها .. بس عطيني رقمها أخلي أمي تسجلها .. وسن:طيب أكتبي عندك .......... .. زادت نظرة الاستغراب فـ عيون جمان .."من جد ما في شيء يصعب عليهم ..!" .. وسن:قلبو .. ثانكس سو متش .. أنا اخليك ألحين .. بشاير:طيب أشوفك العصر .. وسن:اوووكيه .. يالله باي ..-نزلت السماعة و هي تسكر الخط .. رفعت عيونها على جمان:موضوع القدرات و خلصنا منه .. وقفت:يا الله خلينا ننزل نفطر .. حدي جوعانة .. ابتسمت و بكل تردد:لا ما راح أنزل .. جلست على طرف السرير:ليه ..!؟ جمان بكل توتر:للحين ما اعرف وش راي أمك فيني ..؟! وسن بكل ضيق:ما سمعتي محمد امس .. قال خلاص لا عاد أحد يفتح الموضوع مع امي و خلوا كل شيء يمشي طبيعي .. جمان:بس حتى ولو هذا بيتها .. ما لي الحق أجلس هنا ..-بكل لوم:لو إني رحت مع مياف أمس ..! زفرت بكل ضيق:مياف كلها كم أسبوع و يرجع هنا .. و بعدين هذا بيت أبوك و للمعلومية ترها مو بأسم أمي .. عشان تقولين بيتها و حقها و مدري ايش ..! هزت رأسها بالنفي:بس حتى ولو .. ما لي الحق أتصرف بحرية تضايقها ..! وسن بكل ضيق:أووف منك على طول معقدة الأمور ..! طقت الباب و دخلت:صباح الخير .. وسن بكل ضيق:صباح النور .. دخلت دينا و بكل استغراب:وسن معصبة غريبة .. قلت اليوم ما راح نشوف غير الابتسامة دامها لقت غيرنا ..! وسن بكل ضيق:تعالي شوفي جمان .. تقول ما راح تنزل .. دينا بكل استغراب:يوه وش هالكلام .. كل أخواني ينتظرونكم تحت على السفرة .. جمان بكل صدمة:كلهم .. دينا:مع إننا ما نجتمع على طول .. بس أخواني يقدسون الجمّعة على الاكل طبعا عادت أبوي .. الله يقومه بالسلامة .. همست:آمين .. وقفت وسن:يالله قومي .. دينا بكل حماس:يالله خلونا ننزل .. .._.._.._.._.._.. واقفين بالمطبخ يجهزون الفطور .. طيبة بكل إحراج:ما عليه يا وخيتي .. مضيقين عليك أنتي و زوجك .. عايشة بكل ضيق:وش هالكلام يا طيوب و الله لا أزعل عليك ..و بعدين منصور مرتاح بجلستكم هنا .. تدرين أمس قاعد يتحمد رب العالمين .. صح إن الحريق شيء كبير بس خلاه يروح مناوباته و هو مرتاح .. طيبة:صح أنه أغلب وقته برا البيت بس لما يجي لـ هنا .. أحس إننا نكتم حريتكم يكفي وقت الأكل هو مع نايف و أنتي معي ..!! ابتسمت و عيونها على الصحون:خلنا نأخذ إجازة من وجيه بعض .. و بعدين تغير جو .. و الله قعدتكم معي مونستني و مريحة بال منصور .. زفرت بكل راحة:الحمد الله .. بس يا خوفي هالوضع يطول .. عايشة بكل حماس:أبركها من ساعة و الله .. ابتسمت لها:الله يسلمك .. بس صدق شوفي كم يوم مر و للحين الشرطة ما جابت و لا خبر .. عايشة:تبين شوري أكتبي خطاب لـ أمير المنطقة أو الملك بكبره .. طيبة بكل صدمة:من جدك تتكلمين ..ظ! عايشة:أي والله .. شفتي ماجدة أخت منصور .. لما توفى زوجها كتبت خطاب للأمارة بسبب ديونه اللي تركها وراه .. و الحمد الله عطوها فوق الـ 60 ألف .. طيبة بكل صدمة:صدق ..! عايشة:ايه والله .. و يمكن فـ حالتك يعطونك أكثر بما أن نايف مُقعد .. طيبة:عاد يا خوفي أقدم هالأسبوع و ما يجيني شيء غير السنة الجاية .. عايشة و هي تقص السفرة:لا والله ماجدة قدمته من هنا أسبوعين إلا و هم مكلمينها .. –رفعت صينية الأكل:بدق عليها اليوم أخليها تكتب لك خطاب و توصله .. طيبة:بس أخاف نثقل عليها ..! عايشة:لا وش دعوة .. أصلا هي على طول تقول لي إن احتجتي شيء دقي علي و هذا وقتها .. أكيد بتفرح .. رفعت صينية الشاي:الله يجزاها و يجزاك كل خير ... ابتسمت لأختها و هي تتقدمها بالأكل .. .._.._.._.._.._.. رفع المرايا للمرة العشرين بعد المية .. ابتسم عادل:ها ما مليت من وجهك .. اتسعت ابتسامة بسام:موب مصدق ..! عادل بكل لوم:قلت لك ما ضاقت إلا فُرجت .. زفر بكل راحة:الحمد الله .. –رجع يتأمل وجهه بالمرايا:أنا لازم أسافر لـ مكة أعتمر شكر لربّ العالمين .. عادل:يا الله و أنا معك .. نزل المرايا:لا أنت أرجع لبيتكم .. أحس أهلك كرهوني قبل لا يعرفوني .. عادل:لا بالعكس .. أمي تفرح من تسمع طاريك و غير كذا مستغنين عن وجودي فـ البيت .. بسام و هو يرجع يرفع المرايا:الله يصلحك بس وش هالكلام ..؟! عادل و هو يضحك:هههههههههههههه .. يا ابن الحلال خلاص اعتق المرايا .. ابتسم:يا أخي أحس وجهي متغير .. عادل:أصلا الواحد و هو مفتح ما يدقق فـ ملامحه و شلون و هو لما يكون ما شاف نفسه من شهور ..!! همس و هو ينزل المرايا:الحمد الله على كل حال .. وقف عادل:يا الله اسمح لي الحين بروح أرتاح .. بسام بكل لوم:الله يهديك من ساعتين و أنا أزنّ عليك .. بس أنت .. ابتسم:خلاص هذا أنا رايح .. يا الله فـ أمان الله .. راقبه و هو يطلع:فـ حفظ الرحمن .. مد يده لـ جواله و رجع يقرا رسالة أخته بكل فرحة .. طلب رقم ريناد بعد تردد كبير .. و ما انتظر كثير لأنها ردت بكل سرعتها .. ريناد بكل شوق و لهفة:هلا و الله .. ابتسم:هلا بك .. عسى ما صحيتك ..؟! ريناد:وين تصحيني أنا ما نمت أساسا .. بكل لوم:يعني كلام ليان صحيح .. ريناد .."كلامها صدق..!" ..:وش قالت لك ..؟! بسام:قالت لك أنك مهملة فـ عمرك .. يعني تبين البيبي يروح من بين يدنا .. ريناد و الضيق يخنق صوتها:بسام وش هالكلام ..؟! خذا أنفاسه و ابتسم:وش أسوي لازم أخوفك على البيبي عشان تخافين على نفسك شيء ..!! بلعت ريقها بكل توتر:متى بترجع ...؟! بسام:امممم .. أنا تقريبا خلصت بس ودي بـ سفره لـ مكة لأني الحمد الله كل شيء كنت أبيه صار و تسهل .. ريناد بكل ترجي:أبروح معك ..؟! بسام:بس ..! ريناد بكل لوم:وشو بعد .. ما تقدر تروح مكة إلا لما تمر على الرياض و إلا كل شيء تسويه لحالك يفرحك أكثر ..!! بسام:لا والله بالعكس .. ريناد:خلاص براحتك .. بس كنت ابي أشوف ردك ..! زفر بكل ضيق:ريناد وش فيك ..!! ع العموم خلاص جهزي نفسك .. متى ما خلصت مريتك و مشينا لـ مكة .. ريناد بكل خيبة أمل:خلاص .. ما يحتاج تمر .. بعطلك..! بسام بكل ترجي:رنود حياتي لا تعقدين الأمور .. و بعدين عندي لك مفاجأة صدقيني لو شفتيها راح تنسين نفسك .. ريناد:ايه ألعب علي من الحين .. بسام:افا بس افا .. ما توقعت أسمع هالكلام منك ..؟! همست و صوتها يختنق:بسام أنا قاعدة أموت فـ اليوم أكثر من مرة و أنت موب حاس فيني ..؟! بسام بكل ضيق:الله يهديك بس وش هالكلام ..؟! ريناد:ما جبته من عندي .. كل أفعالك تقول كذا .. بسام بكل همس:أدري مقصر معك بس لما تشوفين صدقيني كل شيء بيتغير .. بلعت ريقها تضيع عبراتها:طيب يصير خير إن شاء الله .. بسام:طيب حياتي .. أنا لازم أسكر عشان أنتي ترتاحين و أنا بعد .. ريناد:ليش ما نمت أنت بعد ..؟! بسام:لا ما .. قاطعته بكل خوف:عسى بس ما يوجعك شيء ..؟! ابتسم و بصوته نبرة لوم:لاء .. كلام ليان أقلقني عليك و خفت أدق فـ الليل و أصحيك .. ما دريت أنك ما نمتي .. زفرت بكل راحة .. و كلامه يحرك شيء بداخلها:طيب حبيبي أنا بسكر عشان أنت ترتاح بعد .. ابتسم:مع السلامة يا عمري .. نزلت الجوال .. زفرت بكل راحة و لا شعوريا غلبها النوم .. شلون ما ترتاح بعد ما سمعت صوته .. !! .._.._.._.._.._.. عبد العزيز بكل صدمة:سرطان .. اختنق صوتها:طيب يا دكتور وش علاجها ..؟! زفر عبد الملك بكل ضيق:تبديل الدم نهاية كل شهر .. لكن أنا أفضل الكيماوي .. حتى تتخلص من المرض بشكل نهائي ..!! فجر:بس الكيماوي .. يتعب ..؟! عبد الملك:و المرض راح يتعبها أكثر .. زفر عبد العزيز بكل ضيق:و العلاج راح يكلف كثير .. عبد الملك:أنا ما عندي الخبرة الكافية فـ هالموضوع بس أنا استلمت الحالة أمس و عشان كذا مسئولية إبلاغكم هي مسئولتي .. خذا نفس بكل توتر:جزاك الله خير .. وقفت و سبقت أخوها لـ برا .. وقف سلم على عبد الملك و طلع ... ناظر فـ أخته بكل لوم:وش فيك ..؟! اختنق صوتها من الصياح:وش بيصير فيني .. عقب اللي سمعته ..! عبد العزيز:وكلي أمرك لـ رب العالمين .. هذا قضاء و قدر .. زفرت بكل ضيق .. مسحت دموعها من وراء نقابها:باقي من مهرها كثير .. ينفع نستخدمه فـ العلاج .. عبد العزيز بكل ضيق:تستهبلين ما نقدر نوافق على أي شيء .. هي متزوجة و على ذمة رجال .. فجر بكل عصبية:و هالرجال وينه ..!! عبد العزيز و بعيونه نظرة تفكير:صحيح تركي وينه ..؟! فجر:أنا قلبي قارصني من اختفوا فجأة ..!!! زفر بكل ضيق:خلاص الغايب حجته معه .. خليني نطمن على أختك .. فجر بكل لهفة:من جيت و أنا أبي أدخل بس السسترات .. عبد العزيز:خلاص قابلنا الدكتور .. امشي معي ..-تنهد بكل ضيق و عيونه تتنقل بين أرقام الغرف .. .._.._.._.._.._.. أم تركي بكل ضيق:وشلون يعني ..؟! سلطان بقلة صبر:يعني وش أسوي لك يمة .. قلت لك مابي .. مااااا .. ابي ..! أم تركي:يعني بتقعد كذا زي بيت الوقف ..؟! قاطعها بكل طفش .. أبو تركي:يا بنت الحلال خلي الولد على راحته .. أم تركي:وش على راحته .. البنات كل وحدة تقول الزين عندي .. بيقعد يرفض لين ما عاد يبقلى غير معنسات و عجايز .. زفر بكل ضيق:لا معنسات و لاغيرهم .. الزواج شيء منتهي من حياتي .. أم تركي بكل عصبية:ليه .. لمى آخر وحدة أنولدت بهالكون و إلا ما عاد به عقبها بنات .. سلطان بكل ضيق:الله يهديك بس يمة .. وش جاب طاري هالبنت الحين ..؟! أم تركي:هي من يوم رفضتك و أنت .. قاطعت أمها بكل طفش:يمة حرام عليك .. الرحممممممة .. خلاااص ما يبي يتزوج غصب ..! أم تركي:أنتي اكرمينا بسكوتك .. زفر بكل ضيق:خلكم من سلطان الحين .. كل ما جلسنا فتحتوا هالسيرة و نسيتوني الشيء المهم اللي أبي أقوله .. أروى بكل حماس .. حتى تنهي سالفة سلطان:خير يبه ..؟! أبو تركي:اتفقنا نمشي بكرة للشرقية .. نطق بعد ما كان كلامهم مسببه الملل .. عامر:صدق يبه ..! أبو تركي:ايه .. من أمس بقول لكم .. بس نسيتوني .. وقفت أروى و بكل حماس:بطلع أجهز أغراضي .. ام تركي بكل ضيق:قدامك اليوم كله .. خلك جالسة لحد ما نتغداء و نخلص .. أروى بكل ضيق:أي غداء يمة و أنا توني مفطرة ..؟! أم تركي:بتتغدين يعني بتتغدين موب كل يوم تنحاشين لـ غرفتك .. أروى و هي تركض للدرج:طيب أشوف وش بأخذ و أنزل .. راقبتها بكل لوم .. و زفرت بكل ضيق .. .. . دخلت لغرفتها بكل حماس .. سحبت الجوال و طلبت رقمها .. من وراء السماعة:هلا و غلا .. أروى:هلا بالزين كله هلا بدنيتي و عمري و كلي .. جنى:الله .. الله ..!! كل هذا لي ..؟! أروى:يوه مسترخصة عمرك يعني ..!! جنى:لاء بس ما قد سمعتك تقولين كل هالكلام دفعة وحدة ..! رمت نفسها بكل ثقلها على السرير:خلك م هالحكي لحين .. عماني كلهم اتفقوا يسافرون للشرقية .. جنى:و الله حلو .. الله يهني قلوبكم بالعافية .. أروى:خلي عنك هالكلام .. تراك بتروحين معنا غصب .. جنى:لا وين .. أنا وين و أنتي وين ..؟! أوى بكل ضيق:وش قصدك يعني ..؟! جنى:أنا الحين محتاسة و مشغولة بسالفة أهلي اللي للحين مدري منهم .. و مدري متى بتستقر أحوالي ..؟! أروى:ليش موب على أساس الجازي عندها كل شيء ... جنى:ايه عندها كل المعلومات على قولتهم .. بس ما تعرف أي أحد .. اليوم بنروح لوحدة كانت صديقة أمي و هي تعرف مكان توأمي .. أروى:صدق ..! ونااسة جنو فيه منها ثنتين ..؟! ابتسمت:جد ما اتخيل أشوف انسانة تشبه لي تماما ..!! أروى:ياااي وناسة .. طبعا لـ جمعتي خواتك على قولتك لازم تزورونا بعد أبوي خالك و أنا بنت خالك ..! جنى:ايه أكيد بس يالله تستقر الأمور بعد شهر شهرين .. أروى:وش هالكلام .. أختكم و اليوم بتعرفون طريقها و أبوك ..!-رجعت تسكت:إلا صحيح عرفتي من هو أبوك ..؟! زفرت بكل ضيق:كان ودي نزوره اليوم فـ شغله .. بس تعرفين جمعة و الكل مأجز .. أروى:ايه صح .. طيب ليه ما تروحون له لـ بيته ..؟! جنى:ما نبي نسوي مشاكل .. أمي كانت الزوجة الثانية يمكن محد يعرف عنها ثم نربك أبوي و نقلب بيته ..! أروى:لو كنت مكانكم طبيت عليه فجأة .. بعد أنتوا بناته و خاصتن أنتي حالتك .. خاصة اسمك يبيله تعديل و كل شيء فـ حياتك بيتغير و الواحد ما يضمن عمره .. يعني ما تدرين من اليوم لـ بكرة أبوك يجيه شيء .. جنى:بسم الله عليه .. فال الله فالك .. أروى:من الحين بدينا .. ابتسمت:ايه أكيد أبوي بعد ..! أروى:الله يهنيكم ببعض .. عاد إن شاء الله يتقبلكم و يعترف فيكم ..! جنى:من ناحية العقل بيسوي كذا .. بس صراحة مدري ..؟! أروى:وش اللي ما تدرين .. تلقينه الحين شايب رجله و القبر ما يكفيه كل اللي صار لكم بعد ما راح يعترف فيكم ..!! زفرت بكل ضيق:قلبتي المواجع علي .. أروى:وش مواجعه .. أصلا هالأمور ما راح يرتاح فكرك منها إلا لما تنتهي .. جنى:الله يعين .. رجعت تجلس:على طاري المواجع أخبار لموو صديقتك ..؟! جنى:وش دخل لمى فـ المواجع ..؟! أروى:يعني يقال لك ما تعرفين ..؟! .. لمى و سلطان .. جنى:ايه أخبار أخوك الحين ..؟! أروى:كأنه عقل .. بس مسكين عاف=كره" الزواج .. جنى:ما عليه فترة مؤقته و عقبها هو اللي بيجكم و يطلب تخطبون له .. أروى:تبين الصراحة بعد أمي تزن عليه زن موب طبيعي .. عشانها تدوّر لـ عبد العزيز و كل ما لقت بنت تمنتها لـ سلطان أو عامر .. جنى:كل الأمهات كذا .. –و كأنها تذكرت:يوه ذكرتيني أخبار عامر .. ؟! أروى:بدري .. !! يوم عرف أنك رحتي معك أختك عصب علي .. !! جنى:موب لهالدرجة ..؟! أروى:ريانوه عصب عليه و طلع حرته فيني ..؟! جنى:وش دخل ريان ..؟! أروى:مدري بس اللي فهمته عن عامر و ريان كانوا يبون يطلعون يتمشون معك و اللي فهمته بعد إن ريان بيك فـ موضوع مهم .. زفرت بكل ضيق:آآخ .. عاد أبد موب فاضية . بس أركد و أخلص من هالدوامة .. أدق عليه أشوف .. أروى:خلاص .. صح دوبة ما قلتي أخبار لمى ..؟! فركت جبينها بكل تعب:أمس دقيت عليها .. و الله ما عليها بخير .. أروى:أكيد نست ألمى .. جنى:لا و الله بعد عمري .. للحين كل ما ذكرتها تغير صوتها .. بس الدنيا ما توقف عند أحد .. أروى:الله يرحمها .. جنى:اللهم آمين .. أروى:و يوفق هالمو و يجيب لها ولد الحلال اللي يبعدها عن بال أخوي .. جنى:لا تطمني شكلها بتتزوج قريب ..؟! أروى بكل صدمة:نعم ..! ارتبكت:أقول إن شاء الله .. تعرفين الحين صارت بين أهلها عزايم و طلعات يعني أكيد صارت تنخطب كثير .. أروى:ايه الله يوفقها .. يالله أنا بنزل قبل لا تفضحني أمي .. جنى:عشان ..؟! أروى:تبين أتغدا .. ناظرت فـ ساعتها:يوه احد يتغدا المغرب ..؟! أروى:ما فطروا إلا 11 قبل صلاة الجمعة بشوي .. المفروض يصير عشاء بعد .. جنى:بالعافية على قلبك .. يالله حتى أنا بسكر لأننا بنطلع بعد شوي .. أروى ...:يالله باي .. .._.._.._.._.._.. ناظرت فـ ساعتها بكل ضيق:وينك يا نواف تأخرت ..! رخت جسمها على الكنبة:شكلها لهى مع دلال و نساني ..-زفرت بكل ضيق .."هو أساسا قال لي لا تعتمدين" .. تنهدت و لمعة الدموع بـ عيونها .. "الحين نواف ما عاد هو لـ حالي حقيقي .. و إذا استمر موضوع أهلي مجهول .. أكيد راح يبداء يحتقرني" .. مددت جسمها على الكنبة وكلها أمل تغفى مثل ولدها .. رغم تعبها عقب الطريق لكنها لـ حد هاللحظة ما قدرت تنوم بسبب فكرها المشغول .. .. . .. راكب سيارته .. عند باب العمارة .. زفر بكل ضيق و الجوال بأذنه:وبعدين يعني ..؟! دلال من وراء السماعة:أنتي اللي و بعدين معك .. المفروض اليوم تكون عندي .. شلون تطلع و تتركني ..؟! نواف بكل عصبية:قلت لك مشوار مهم .. بوصلها و أول ما أرجعها للبيت بجيك .. زفرت بكل ضيق:ايه من بدايتها أظلمني .. زفر بكل ضيق:دلال يرحم لي أمك .. أنا خلقه حيلي مهدود من الطريق و الشغل لا تكملين علي ..! دلال:ايه قلها .. أنا قلق و ثقل عليك .. هذا و أنا توني أول يوم .. نواف بكل عصبية:ايه قلق و ثقل .. بس أحب أقول لك لو كانت جوري مكانك ما سوت مثلك ..-سكر السماعة فـ وجهها و قفل الجوال .. ريج ظهره على ظهر كرسي السيارة .."أووف يارب خل هاليوم يعدي على خير" .. زفر بكل ضيق وهو يفتح الباب و ينزل .. .._.._.._.._.._.. مدت لها الفنجال:سمّي خالتي .. أم راكان:الله يكف يدياتك عن النار .. ابتسمت ليان لها:اللهم آمين .. ناظرتها و عد و بنبرة صوت كلها غيرة:ايه أنا أجيب لك كل شيء ما فيه غير الله يهديك غصبن عليك و الله يصلحك و إلا يأخذك لـ بيت رجلك و يريحني ..! ناظرتها أمها بنص عين:تعلمي السناعة من مرت أخوك ثم تعالي كلميني ..؟! جلست جنب راكان و هي تنزل ترمس القهوة تحت رجلها .. و الفخر يتملكها .. ابتسم بتلقائية .. كل مرة يفكر بالندم على هالزواج .. أشياء كثيرة تمنعه .. و أكيد يكفيه أن أمه و أبوه مرتاحين و مبسوطين منها .. أبو راكان:وين حمد و زوجته ..؟! وعد و عيونها على شاشة التلفزيون:طلعوا من العصر .. أم راكان:الله يسهل دربهم وين ما راحوا .. سكت الكل .. و بانت على وجهه علامة عدم رضا على هالدعوة .. تكلمت بكل حماس:الله يمة .. شوفي الشرقية شلون تغيرت .. –لفت على أبوها:يبه خلنا نروح لها .. رفعت أم راكان عيونها على التلفزيون:القناة الأولى .. ايه أكيد بمدحونها لك .. بس حر و رطوبة .. وعد بكل حماس:حلاتها بـ حرها .. لف راكان على ليان و بانت نظرة استغراب بعيونه .. همست:التلفزيون بعد ما قلت شيء ..؟! أبو راكان:وش عندك يا أبوك أنت و زوجتك ..؟! راكان:و لا شيء يبه .. ابتسمت بكل خبث رغم خوفها منه بس إحساس تحدي و حماس خلها تتكلم:صار لي يومين أزنّ على راكان عشان نروح للشرقية كلنا .. بس هو يقول أبوي ما يبي .. وعد:يا لبيه فديت توارد الأفكار .. ام راكان:وشووو ..؟! وعد:يعني أنا وياها نفكر بنفس الشيء ..! ناظرتها بطرف عينها .. رجعت تلف على ليان:وين يا يمة تروحون و راكان ماسك مطعم صديقة و شغله ما صار له غير يومين رجع له .. ليان:صديقة راجع بكرة إن شاء الله .. و إجازة العمل للحين ما انتهت .. وعد:ايه يمة نسيتي ولدك عنده إجازات مجمعة من ثلاث سنين ..!! أبو راكان:كان خاطركم بـ هالسفرة .. روحوا أنتوا و كملوا ذا الشهر .. ابتسم راكان بانتصار .. ما نطق بـ ولا كلمة .. لكن رايه هو اللي كان بيمشي لحد هاللحظة على الأقل ... .. ليان بكل حماس:هو صراحة كنا مفكرين نكمل شهر العسل بالشرقية بس قلنا دامها عطله ووعد المسكينة جالسة فـ البيت .. وعد:ايه يبه .. بالله ما أنرحم .. ؟! كلمت ليان:و بعد أنت يا عمي مع خالتي تغيرون جو و خاصتن إن أهلي مسافرين لـ هناك .. ابتسمت أم راكان أخيرا:صدق من بيروح ..؟! ليان و بعيونها نظرة انتصار:كل أعمامي .. عمي ابو بدر و أبو تركي و أبوي .. أم راكان:صدق .. و الله رفقتهم ما تتفوت ..! أبو راكان:خلاص يا أبوك شورك و هداية الله .. ناظرها بكل غيض .. ابتسمت له بكل براءة .. رن الجرس يقطع جو التوتر و الفرحة .. وقفت وعد .. صرخ فيها:على وين ..؟! وقف راكان:أنا بفتح الباب .. وقفت أم راكان:أكيد هذولا الحريم اللي دقوا العصر ..!! .._.._.._.._.._.. وسن بكل ضيق:شفتي كيف ..! وهج بكل لوم:الله يهديك بس يا جمان .. يعني انتي جاية هنا بتحبسين نفسك فـ الغرفة .. تلفتت جمان حولها .. "هالغرفة أوسع من البيت اللي كنت ساكنة فيه حتى" .. ابتسمت بكل إحراج:ما عليه ما أبي أسبب لكم أي إحراج .. و أضيق عليكم فـ جلستكم .. وهج بكل ضيق:يعني تبين مياف يجي و يقلب البيت علينا .. وسن:ايه و الله .. عشان خاطر مياف على الأقل ..؟! زفرت بكل استسلامية:طيب بنزل معكم .. وقفت وسن و بكل حماس:يا الله قدامي .. جمان:أنزلوا و بلحقكم ..؟! وسن:لا يا عمري .. تسوين فيني مثل الصبح ..!! وهج:على الأقل انزلي اجلسي مع وسن وصديقتها ..؟! ضربت على جبينها على خفيف:أوووتش .. نسيت بيش .. ناظرتها بكل لوم:دينا معها عشان كذا أنا ساكتة لك ...-رجعت ترفع عينها على جمان:يالله غيري ملابسك و انزلي ..-ابتسمت لها و هي توقف و تنفذ أوامرها .. .._.._.._.. نهاية الجزء ..