الفصل 7
*؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم حسنائي الغامضة`*
الموسم الثاني
*❴🔢❵الـــبـــــــــــ❴7️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
قصص وروايات 📚📖:
حسنائي الغامضة
الجزء السابع
أم ماجد:اي ها، الله يرضى عليكي و فرديلي خلقتك شوي مو حلوة يجي و انتي بهالشكل بقول المتل لاقيلي و لا تطعميني
رسمت إبتسامة متصنعة ع وجهها و اطلعت بأمها
ماوي:منيح هيك ماما و لا اكتر
أم ماجد:لا هيك منيح اكتر بفكرك بعمرك مو شايفة ضيف
ضحكت يتعب و هي بتكمل فرم السلطة
أم ماجد: عجلي شوي، مابقوا مطولين
ماوي:...ماجد اخد المكتب؟
أم ماجد:اي اخدو، وقت حكيتو كان عم يوقع عقد الأجار
ماوي:الله ييسر عليه
أم ماجد:امين و يفرحني فيكي و فيه
ماوي:انا خليني شوي عَ جنب وفرحي فيه هلأ
أم ماجد:يلا هانت ان شاء الله المسا حأحكي مع عمتها لرانيا
باعتبار امها الله يرحمها مو موجودة و نحدد موعد الخطبة هاليومين
ماوي:الله يتمملهم على خير
أم ماجد:امين يارب امين
مضي الوقت عم تساعد انها بالمطبخ ع الساعة أربعة العصر كانت ام ماجد عم تحط آخر لمساتها ع طاولة السفرة
ابو ماجد:لو انك ما سكبتي الأكل هلق و نطرتي ليجوا ليقوموا يتأخروا
أم ماجد:لا ما تخاف حكيت مع ماجد قبل ما بلش سكب قالولي رايحين يجيبوا رانيا و جايين فوراً يعني ع وصولهم
قرب منها و هو ببوس راسها
ابو ماجد:مرتي ذكية ياعمي مافي منها تنين والله، اي شو ريحة هالأكلات هي شي بياخد العقل تسلم ايديكي حبيبتي
أم ماجد:الله يسلمك حبيبي لسا هلأ دوق الطعمة كمان
ابو ماجد:مو هالإيدين عملتهم واثق من دون ما دوق
طلعت من المطبخ و هي حاملة المي حطتها ع الطاولة، قربت منهم و هي بتحكي
ماوي:احترموا طيب انو في سنجل بائس موجود
ابو ماجد:سنجل قلتيلي، و بائس كمان
ماوي:اي والله الى ان يأتي ابن الحلال و ينتشلني من هذا البؤس
ابو ماجد:روحي من وجهي ولي مشان ما انا انتشلك نهائياً
أم ماجد:كأنو عم يندق الباب روحي افتحي روحي
ماوي:يلا
طلعت من الصالون بإتجاه باب الحديقة، حطت ايدها ع مسكة الباب اخدت نفس عميق و رسمت إبتسامة ع وجهها لتفتحه، اول ما فتحته طلعوا بوجهها تينا و رانيا لياخدوها بالأحضان
ماوي:يا غليظات لي ما عم تجوا تزوروني
رانيا بتعالي مصطنع:احم احم، متل ما بتعرفوا انو حضرتي جامعة مو فاضية متلكم لهيك دايماً مشغولة ما عندي وقت فاضي
ماوي:طيب متل ما بتعرفي نقبري فوتي، صايرة غليظة كتير هي
تينا:هي من لما صارت ع بواب الخطبة صارت هيك
رانيا:طبعاً طبعاً مشان بلش بختشيبي، ختشيبي، صحي ختشيبي وين؟
ماوي:و لعيي انقبري فوتي سلمي ع حماتك هلأ
رانيا:فتنا فتنا حاج عياط
ماوي:و انتي توتة خانم لي ماعم تبيني
تينا:عم دور ع عريس، حواليكي شي؟
ماوي:المواصفات ؟
ماوي:المواصفات
تينا:180 الطول، جسم رياضي اسمراني بحدود التلاتين عيون ملونة بليز
وطن بإنزعاج واضح:امرك تينا خانم بكرى انشالله بكون عندك
تينا:عم نمزح ولو
ايهاب:لك و ضرب اللي يضربك انتي و هي و هي و هو النا ساعة ع الباب
ماجد:كنت بالعها بالزور ترى نقبروا يلا
دفش ايهاب تينا قدامه و فاتوا لجوا من دون ما يسلم عليها
ماوي:نحنُ هنا ايهاب بيك
ايهاب:طلعي من راسي يا، ساعتين سلام
رجف قلبها مجرد ما حست بقربه منها، فتلت وجهها، لتلتقي عيونهم بعيون بعض و هو مقرّب ليسلم عليها كانت عم تتمايز ملامحه بشوق اجتاح كيانها، اتمالكت نفسها لترسم ابتسامتها من جديد مدت ايدها لتصافح ايده اللي انمدت لتسلم عليها حست برعشة جسده مجرد ما أياديهم لامست بعضها
كان عم يطلع بعيونها بضعف رغبة بالعناق ليروي حاجته الها
بصوت مهزوم نطق
عُبادة:مرحبا ماوية
ماوي:اهلين استاذ اتفضل
سحبت ايدها من ايده لما قرب وطن، التجأت لحضنه لتلملم شتاتها فيه
وطن:كيفك
ماوي:تمام و انت
وطن:الحمد الله
ماوي:اتفضل
ماجد:انتي ما خرج يحطوكي بالإستقبال بنوب، الناس بتوقف معك بالأيام
ماوي:ننن فوت فوت
دخلوا بإتجاه الصالون الأربعة ليبدأوا استقبالهم ام ماجد و ابو ماجد
أم ماجد:يا مية أهلا و سهلا يا ابني نورت
عُبادة:تسلمي خالة
قرب من ابو ماجد و صافحه
عُبادة:مرحبا عمو
ابو ماجد:اهلين يا ابني نورت
ماجد:بابا هاد الأستاذ عُبادة يلي ساعدني بقصة المكتب
ابو ماجد:اتشرفنا يعطيك ألف عافية يا ابني وشكراً كتير الك معروفك مع ماجد مابينتسى والله
عُبادة:و لو عمو ما عملت شي انا و ماجد بيستاهل كل خير
ابو ماجد:تفضل نورّت
دخلوا جوا ليبقى وطن واقف متكتف عند الباب
ابو ماجد: وطن ليش واقف عن الباب
وطن:ناطر حدا يقلي أهلا و سهلا، تفضل يا ابني، نورت، اتفضل يا زبالة يعبرني الدلال اخده الأفندي كله
ماجد:اتفضل يا زبالة نورت منيح ؟!
وطن:غلييظ، شوفو عمو
ابو ماجد:غيور افندي اخد الدلال كله، عطي لغيرك شوي
وطن:كمان انت عمو، رموشة تعي مالي غيرك
أم ماجد:فوت تؤبرني فوت، حاكم الوحوش بلشوا اكل
دخل لجوى ليشوف تينا و ايهاب و رانيا قاعدين ع الطاولة و مبلشين اكل
ابو ماجد:صحة و هنا يا ولاد و انتو يا ولاد اتفضلوا، قاعد ع راس الطاولة و عُبادة
وطن:الكم كم سنة مو اكلين حتى مفجوعين هالفجعة
ايهاب: بتعرف انا و الأكل حكاية غرام والله
تينا:و انا أكلات خالتو راما ما بقدر قاومهم والله ريحتهم بتنعنش قلب قلبي
رانيا:اما انا حماتي حياتي بتزعل اذا اعتبرت حالي ضيفة
ماوية : حماتي حياتي قلتيلي تقلي شوي قبل الخطبة ولا ماعندك ياه؟
رانيا بضحكة : بزمانك كنتي محتاجتي كتير قمت عرتك ياه وما رجعتي لهلأ
ضحكات الشلة اتعالت لما فهموا قصدها عن ايامها هي وعُبادة ..
ماجد : على شو عم تضحكوا ؟
إيهاب : عَ حرب الكنة وبنت الاحمى الي بدأت من هلأ
تينا : حضري حالك خالتو من هلأ عَ فك الخنايق وتنتيف الشعر الي حيصير
ام ماجد : ههههه هي تتيسر قصتهم عَ خير وبسرعة وانا جاهزة بستعين فيكي وقتا اذا صعب علي الوضع كتير
تينا : وانا جاهزة
إيهاب : اما انا بجي بتفرج
ابو ماجد : ما تواخذنا يا ابني بس يعني طلابك وبتعرفهم عطول شاضيين الدنيا بكلامهم واصواتهم
عُبادة : ههههه ولايهمك عمو متعود عليهم ذاتاً
ماجد : صحي بابا بدي أسألك
ابو ماجد : خير ؟
ماجد : ابو عماد الي ببيع خبر
ابو ماجد : شبو ؟
ماجد : خاتمين محلو بالشمع الاحمر ليه شفتو ونحنا جايين
ابو ماجد : اله اسبوع هلأ لشفته
ماجد : اي والله
ابو ماجد : اجا الأمن من اسبوع شحطه عَ بيت خالتو وختملو ياه
وطن : ييي ليه شو عامل ؟
ابو ماجد : اله شهرين ونص تلاتة تقريباً الناس صفوف صفوف عند عَ الخبز أوقات الدور عم يصل لراس الحارة من فوق
ماجد : صح انتبهت الله يباركلو
ماوي : هههههه الله يباركلو ! اي سماع سماع كمالة السيرة
أبو ماجد : اخر شي الناس دبحت بعضها كل يوم والتاني علقة الها اول ما الها اخر ع الخبز ، شكو فيه الامن مدري حدا مشتكي مابعرف المهم اخدين عينة من الخبز فحصوها ولا ابن الكلب عم يحط نسبة مخدرات خفيفة فيا
اجتاحت الصدمة وجوه الكل وهنن بيسمعوا السيرة ..
ماجد : عنجد عم تحكي ؟؟؟
ابو ماجد : اي والله مشان هيك تاري كل هالمدابح على خبزه ، شمعوله المحل بعدا وشحطوه
وطن : يالطيف الناس شو صايرلا
عُبادة : الناس من الجوع رح تاكل بعضها لسا ، متله متايل والشاطر صار بدو يسبق الكل ليحوش رزقه وأرزاق الي حواليه والكل هالأيام عم يلاقي الحرام اسرعله وأسهله ليبلش تلقيط برزق هالدروايش والمعترين
ماجد : الحرب خربت النفوس
عُبادة : الحرب خربت صح بس مو النفوس الحرب كشفت النفوس ابن الحلال جوا الحرب وبراتها بضلو ابن الحلال وابن الحرام كان ابن حرام من قبل بس الحرب كشفتلو المستور مو اكتر
اتطلع فيه بإعجاب كبير وهو بيردله
ابو ماجد : معك حق يا ابني الحرب كشفتها مو اكتر ، التهينا بِ مؤيد ومعارض مع وضد علم اخضر ولا أحمر وتركنا ولاد الحرام يسرحوا ويمرحوا عَ كيفهم ..
كانت عم تراقب الحديث الي بدأ يدور و يتوسع بين أبوها وعُبادة ، وإعجاب أبوها الواضح بكلام وجهات نظر عُبادة بخصوص المواضيع الي بدأوا يتناقشوا فيها .. هالشي ماعمل جواها إلا غضب كبير من المساحة الي بدأت تتكون بعُبادة داخل عيلتها ..
ماجد : اووو بلشنا بالجوع طلعنا بالسياسة واقتصاد والفقر والمجاعات الدولية والاحاديث الي بتوجع الراس خلونا مبسوطين بهالقعدة ياجماعة
ابو ماجد بضحكة : خلونا مبسوطين بهالقعدة ولا لانك مو فهمان شي من شي
عُبادة : هدول جماعة الهندسة عمو برى الارقام والخطوط الهندسية والمخططات المدينة بيغرقوا دغري
ابو ماجد: ههههههه بهي معك حق
ماجد: لحظة لحظة كأني شامم ريحة كبتي برى سيد عُبادة ؟؟
عُبادة : ولو انت الخير والبركة
وطن : دودّ الاخ
ابو ماجد : هيك شكلو خلص إبني منكمل حديثنا بعد الغدا حاسس ابني حينجلط لانو
عُبادة : ههههههه تمام عمو
ماجد : الله يسامحك بابا فوراً كمان بدلتني انت
إيهاب : سمعوا سمعوا شوي
ابو ماجد : تفضل ايهاب بيك
مسك الخبزة وهو عم يتفحصا من فوق لتحت
إيهاب : مايكون نحنا كمان اكلين خبز من عند ابو عماد مأدمنين ومالنا خبر
وطن : هو رح تأدمن وماتحس ع شي لانو
إيهاب : بجوز
ابو ماجد : لا لا تخاف من اكتر من سنة مافات شي من محله عَ البيت
رانيا : على هوا مابذكر عمو كنتو صحاب كتير وكنت دائماً توصينا ناخد غراضنا منه مو ؟
ابو ماجد : اي بعدين صارت مشكلة بيني وبينه وقطعناه نهائي
إيهاب : مشكلة شو
تينا : نطق حشري افندي
إيهاب : قال انتي اصلح يعني
ابو ماجد : لا تبلشوا ها ، طلب ايد ماوية من شي سنة لإبنه وأنا رفضت قام اخد عَ خاطره ورحت بعدا بدي جيب غراض من عنده قال ماعندو ياهم وهنن موجودين فهمت انو بدو يقطع من وقتا مادست محله
حطت المعلقة من ايدها واتطلعت فيه بإستغراب
ماوي : ايدي انا لابنه ؟؟
ماجد : اي ليه هالقد مستغربة ؟
ماوي : مو ممكن لانو ايدي المطلوبة وانا مالي علم بالسيرة ؟
ابو ماجد : ليه لازم يكون !
اجت عينها بعينه شافت الغيرة الي وضحت على ملامحه والانزعاج الي بان من جِدالها بهيك موضوع ..
روح العاشقة الي جواها حركتها لتستفزه حتى تشوف غيرة محبوبها عليها ..
حكت وهي بتستلذ بحروفها وعيونها بتراقب ملامحه الي حتتفجر بصمت أثر كلمتها ..
ماوي : طبعاً لازم يكون انا الي انطلبت ايدي عماد شب منيح كان احتمال وافق عليه
لعبت على وتره أكتر شي صعب يتحكم فيه .. غيرته عليها ماخفت ولا ممكن تنقص رغم البُعد الي بينهم .. ضغط على ايديه بقوة وهو عم يرسم ابتسامة صفرا على وجهه كادت تتفجر من البركان الي ولعان جوّا قلبه .. حاول بصعوبة السيطرة على نيرانه لحتى ماتفضحه أمامهم ، لكن سُرعان ما إجا كلام أبوها يطفي بركانه وابتسامته الصفراوية تتحمل لإبتسامة شماتة فيها ..
ابو ماجد : والله انسة ماوية هيك موضوع انا أول الناس الي معني فيه إذا ماقيّمت الشخص انا وشفته مُناسب من جميع النواحي لأمنه على بنتي وحط إيدي بإيده بالبداية وحسب ان ما شفته كُفئ لهالشي مافي داعي يوصل الك بنوب
زادت ابتسامته لما شاف الانزعاج غمر وجهها من كلامها أبوها لانه ماسمحلا تغيظه اكتر على العكس شمته فيها ..
كملت كلامها من دون ماتحكي شي وهي عم تحاول ما تلتقي عيونهم ببعض بعد ماشافت شماته فيها ..
إيهاب بضحكة : كان عطيها عمو وريحنا من خلقتا
ابو ماجد : هو ماكان ناقصني غير اعطي بنتي لواحد مابينزل المشروب من إيده وكل يوم مع بنت شكل وعلاقات مقرفة والعباذ بالله
وطن بضحكة : ههههه متل إيهاب يعني
إيهاب : ننننن متل إيهاب يعني ، حبيبي انا اول شي الحمدلله الحمدلله مابعمري قرّبت من المشروب ولا عرفت شو طعمتو
تينا بضحكة : هو قصده عَ البنات مو عَ الشرب
إيهاب : حتى البنات انا مابعمري لمست وحدة الحمدلله كلهم حكي بحكي لهيك خرسو انتو الجوز
ابو ماجد : والله ولا هي مقبولة سيد إيهاب اذا ماحكيتك فيها مو يعني اني ساكتلك عنها بس تاركك عسى ولعلى تعقل بس النا حديث فيها قريباً ورح تتركا ان ما بكيفك غصب عنك
إيهاب بضحكة : هههههه والله ياعمو هي صعبة شكلا السيرة وراثة عنا بالعيلة ماشفت الوالد من لمّا طلق نزل صورته بالشورت مع مرته الألمانية بعدين طالع هلأ منزلك صورة مع وحدة جديدة مدري صاحبتو مدري مرتو كمان بالشورت اما شو طالعلك بالشورت حكاية بربي ههههههه منظره بموت من الضحك خرفان الحجي شكلو لسا مشقرلك شعراتو ههههه
ابو ماجد : خراس يازفت هاد ابوك بضل مهما عمل مابصير تحكي عنو هيك
إيهاب بضحكة مكتومة : حاضر حاضر عمو يعني انا بس كان قصدي وضحلك انو هي سوسة بالعيلة ناخرة للعضم
أبو ماجد : ولا يهمك بركبلك عضم جديد وعَ حسابي كول هلأ كول
كملوا غداهم بوسط أحاديث وضحكات ما إلها نهاية ..
.
.
بعدا الفدا دخلت ماوية وهي حاملة صينية القهوة تضيفهم ووراها تينا ورانيا عم بضيفوا قطع الكيك ، بإيدين ملبّكة مدت الصينية لتضيفه فنجان القهوة من دون ما تطلع فيه حست بنظراته إلي عم تاكلها ..
عُبادة : يسلم ايديكي ماوية
ماوي : صحة وهنا
كملت توزيع القهوة وقعدت حد إمها ليخلصوا تينا ورانيا ويقعدوا جنبها ..
وطن : الله يارموشة اديه الي مشتهي اكل كيك طيب شغل بيت
ابو ماجد : قول خالة يازفت
وطن : انا وروموشة مامنحب الرسميات لو سمحت عمو
ابو ماجد : انا بفرجيك
ام ماجد : هههههه صحتين وهنا ياروحي تعال كل يوم اعملك كيك
وطن : والله من جهتي عم اجي تقريباً كل يوم بس مالي هالدلال كله
إيهاب : شفتي راما شفتي عطول بقلك عليه أكال نكار متل القط مابتصدقي بتضلك تدلليه اكتر مننا كلنا حتى من بنتك مو هيك ماوي
ماوي : هيك ونص والله
ام ماجد : يفضح عينكم انتو الجوز هداك مابدلله بالمرة وانت عملتني مابدلل غيره
وطن : لا مو هيك بتدلليني بس اليوم الدلال كله كلن لعُبادة بيك
عُبادة : ها حضرتك غيران مني يعني ؟
ابو ماجد : هاد بغار من الكل والله يا ابني لك حتى مني انا لهيك بدك تتعود
عُبادة : مدود من يوم يومه بعرفه
وطن : كبيتوني بزبالة متل ماكبيتو ماجد قبل شوي يعني
عُبادة : نحنا ماحكينا هيك شي صح عمو
ابو ماجد : صح
رانيا : لكن غيران من الرجال وهي اول عزيمة اله ؟
وطن : التهي بخطيبك انتي وسكتي اصلا كلو منك
رانيا : وشو دخلني انا ؟؟
وطن : أكتر من البيض المقلي مابتعرفي تعملي
تينا : سمعتي يا حماتها سمعتي وشهد شاهداً من أهله
ام ماجد : قولك نقلب قبل ما نتورط
تينا : والله أنا برأيي
رانيا بمقاطعة : تضربي منك لرأيك ، بلعيه بلعيه يفضح غينك شو صايرة فتّانة ، اصلاً خطبتنا طويلة بتعلمني خالتو ام ماجد الطبخ مو هيك خالتو ؟
ام ماجد : خلص من عيوني بجرب علمك ماقدرتي منقلب فوراً
رانيا : هلأ هيك خالتو ! الله يسامحك بس
ام ماجد بضحكة : لا ياعمري حتى لو ما اتعلمتي بطبخلك الك واله انا وبطعميكم
رانيا : الله لا بحرمنا منك يا حنونة
ماوي : ها بسم الله بلشنا كولكة
وطن : أول ماقلتي خالتو بتعلمني فكرتك قاصدة خالتو نايا قلت رح نترحم عليك يا ماجد فوراً
رانيا بضحكة : هههههه ولي خالتو نايا منروح فيا انا وماجد سوا
ام ماجد : شو أخبارها صحي غطت فرد غطة
رانيا : على حالها تركيها سبعين سنة بترجعي بتلاقيا هي هي
ماوي : والله اشتقنالها مو ناوية تجي
وطن : مبلا بس لسا ما حددت عَ أساس حتكون موجودة قبل بيومين من خطبة رانيا وماجد أكيد
إيهاب : قبل بيومين ؟ يعني بعد بساعتين من إبتداء الخطبة
رانيا : ههههههه هي اكيد
تينا : مين هي نايا ؟
وطن : أخت المرحومة ماما خالتو يعني بس بالاسم خالتو
إيهاب : اكتر حدا ظريف ولطيف ومجنون متفائل بالحياة عمرها ٤١ سنة بس شكلها لما بتشوفيا تقولي بنت ٢٢ سنة بلا مبالغة وروحها أصغر لسا
تينا : اتشوقت اتعرف عليها
ماوي : فاصلة متلك ومتل إيهاب حتتفقوا كتير بس تشوفيا
تينا : انا فاصلة يا عاقلة ؟
إيهاب : هلأ من جهة تبنا معك حق بس انا عيب ها
ابو ماجد : الله يطعمني قد ما بتعلقوا
ماوي : امييييين بلكي بتاخدنا شي سفرة مرتبة
ابو ماجد : والله انتي فاصلة اكتر منهم
وطن : رموشة شو رأيك مشان انسى موضوع انو الدلال راح لعُبادة تدلليني بأكلة مشتهي عليا كتير
ام ماجد : من عيوني شو عبالك ؟
وطن : بيدا إلي زمان مو أكلها من تحت إيدك
مجرد ما سمعوا بإسمها عيونهم اجت بعيون بعض وذاكرتهم رجعت ليوم اللقاء الاول .. صحاحهم من ذكرياتهم صوت ماجد وهو بيحكي وطن ..
ماجد : اي والله عملت مناحة بس لانو امي كانت بدها تعملا
وطن : هههههههه مع العلم كانت تحبها كتير
ماوي : شو هي ؟
ماجد : البيدا
ماوي : اي وكرهتا وكرهت كلشي بيخصا عندكم مانع !
وطن ': لا أصلاً متل ماقال عمو فاصلة ماعليكي عتب ، المهم رموش في ولا مافي كرمال ماوية خانم
ام ماجد : لا شو بدنا فيها من عيوني التنين بتوصلكم للمدرسة انتو واستاذكم
عُبادة : يسلم ايديكي خالة مافي داعب تعذبي حالك
ام ماجد : ايا عذاب ولو
ربت ابو ماجد عَ كتفه ليحكيله ..
ابو ماجد : شو ابني منيح طلعلك صوت قاعد كانن
عُبادو : لا ولاشي عمو كنت عم اسمع نقارهم بس
وطن : قال عامل فيها العاقل والراكز قدامك يعني أما بغير وقت ياعمر والله لسانه مابفوت لحلقه فاصل متل الجميع
أبو ماجد بضحكة : ههههه هلأ من لما عرفت أنو استاذكم وعم يلعبكم شدّة بالقهوة عرفت هالشي من دون ماتقول
ضحكاتهم تعالت ليكسي الخجل وجهه وهو بشاركهم الضحكة ..
ماجد : خجلتو بابا ليك كيف احمّر وجهه
عُبادة بضحكة : لا عمو القصة مو هيك انا ماكتير صحاب مع الشدّة انا من جماعة الطاولة بس مالقيت قدامي الا هدول ومابيعرفوا يلعبوا غير شدّة قمت صرت ألعب معهم
ابو ماجد : بتلعب طاولة ؟
عُبادة : لاعب حريف كمان مو متل هالولاد هدول دوبهم حتى كم لعبة بالشدة
إيهاب : صرنا ولاد هلأ عُبادة بيك
ابو ماجد : ولاد ونص كمان انت بس يطلعلك شوية شوارب تعا صير رجال عجزت واحد فيكم يتعلمها ماقبلتو ، قومي ماوية قومي هاتي الطاولة
عُبادة : كمان انت بتلعبها عمو
ماجد : وجنت على نفسها براقش عُبادة بيك
عُبادة : على شو ؟
إيهاب : عمو ابو ماجد بس عرف حدا بيلعب طاولة بطلّعها من عيونه
ابو ماجد : قوموا من خلقتي انت وياه احسنلكم وفضّولنا الطاولة
اجت وهي حاملة الطاولة بإيدها كان عم يراقب نيران الغضب الي عم تتطاير من عيونها من دون مايعرف السبب .. حطتها قبالهم وأشرت لتينا ورانيا ليدخلوا عَ غرفتها ..
بعد مدّة من الوقت طلعوا من الغرفة على صوت ضحكات ماجد وإيهاب ووطن القوية
تينا : على شو عم تضحكوا ؟
ام ماجد : عُبادة غلب أبو ماجد
إيهاب بضحكة : هههههه هي أول مرة بشوفه مغلوب عمو انا اسف بس شمتان فيك كتير
ابو ماجد : خراس اصلاً انا قصد خليته يفوز هو
إيهاب : وليه بقا ؟
ابو ماجد : هاد اقل مافيها حق الضيف انو يفوز أما هلأ فردها لفرجيك اللعب عَ أصوله
وقف بِ إتزان واحترام قدامه وهو بيزبط جاكيته حكاله ..
عُبادة : والله كان ودي عمو بس لازم انشي
ابو ماجد : قاعدين لسا بكير ولل خايف من الغلب ؟
عُبادة بضحكة : هههههه لا والله مو هيك بس عندي درس ع المسا ماعاد كتير مطول
ابو ماجد : ايوا الا اذا هيك مارح أشغلك بس تُعاد قريباً ما الك فكّة
إيهاب : يعني حيطلعا من عيونك متل ماقلتلك
ماجد : حرفياً لانو بابا ماصدّق لقى حدا يلاعبه
ابو ماجد : ما حتخرسوا انتو الجوز؟
عُبادة : تركك منهم عمو من عيوني ابمتا ماحبيت وبأيا وقت بعتلي خبر أنا جاهز
وهلأ عن اذنكم يلا تينا
تينا : يلا جاهزة انا
اتشكرهم عَ الزيارة اللطيفة واستأذن ليمشي هو وتينا .. قرّب إيهاب ليقعد جنب أبو ماجد .. لف رجل عَ رجل وسند بإيده على كتفه مُمازح ليحكي
إيهاب : اي حبيب كيف شفتلنا الاستاذ
ابو ماجد : اول شي نزل إيدك عني مشان ماحملك ياها ..
نزلهم وهو عم يضحك ..
إيهاب : بأمرك نزلتا
قرّب منه وشده من أدنه بقوة ليصرخ من وجعه
ابو ماجد : نزل مكسورتك ولاه لاففلي رجل عَ رجل وقاعد تقول رفيقي بالحارة نزلها لشوف
وطن : حلوووو عمو الله يقويك
ابو ماجد : الله ياخدك لكن رح تزلغط الا شوي لانو غلبني بالطاولة مو
رانيا : ههههه عمو أعلن النفير العام عليكم
إيهاب : شمتاانة حضرتك مو
رانيا : للأمانة كتير
إيهاب : عمو خلص نزلتا بربك تركلي أدني رح تطير
ابو ماجد : شو خروق تركناك منجي للشب
إيهاب : اي
ابو ماجد : والله باين كتير أكابر مُحترم وخلوق عجبني كتير
ماوي بهمس : لو تسمع الي عندي كان حيعجبك اكتر لسا
ابو ماجد : بس شكلو ماعندهم حلّاق بالحارة ؟
صدى ضحكاتهم ملّى البيت لما فهموا قصده عن شعر عُبادة الطويل ...
وطن بضحكة : هههههههه لا عمو عندن حلّاق بس هاد ستايل الأخ
ابو ماجد : قله يحلقو قله يعني والله لكن شب متله اكابر ومحترم وفهمان رابط شعره متل البنات
وطن : ههههههههه حاضر عمو بقلو
ابو ماجد : اذا ماسمع منك انا بعد كم قعدة معه بحكيلو
ام ماجد : لا دخيلك ابو ماجد تروك الشب بحاله ييي شو دخلك فيه فوت نام ريّح حالك شوي الله يرضى عليك
ابو ماجد : وهو كذالك عن أذنكم يا ولاد
الكل : أذنك معك عمو ..
تركهم ودخل لغرفته لتقرب ام ماجد باتجاه ماجد ورانيا ..
أم ماجد : تعالو معي شوي انتو الجوز في كم شغلة بخصوص الخطبة بدي حكيكم فيها منقعد بالحديقة برى
ماوي : كتيييير حلو ونحنا التلاتة داخلين ندرس
ام ماجد باستغراب : انتوا ؟؟ داخلين تدرسوا ؟؟؟؟؟؟
ماوي : اي ماما اي عنا امتحانات مقررين ننجح هالسنة ونجرّب حياة الجامعة
ام ماجد : ايه الله يقويكم
شحطت إيهاب ووطن ودخلت عَ غرفتها لتسكر الباب بقوة ، كانت واضحة الهم ملامح العصبية والغضب على وجهها ... قرب منها وطن بقلق ليسألها ..
وطن : خير شوفيكي !
ماوي بعصبية : مين الغبي فيكم الي عرّف ماجد وعُبادة على بعضهم ؟؟؟
وطن : مو انا
إيهاب : ولا انا
ماوي : معناها انا
إيهاب : شوفيكي والله مالنا علاقة !
ماوي بغضب : لكن شلون نقبروا شافوا بعض وصاروا صحاب هالقد وماجد بيك عزمه لعنا عَ البيت للسيد الوالد يطير عقله فيه ؟؟؟؟
وطن : والله العظيم صارت صدفة كنا بالقهوة مع عُبادة ماشفنا غير ماجد داخل عَ القهوة والله ماعرفنا شو نتصرف طيب
إيهاب : وماجد حكاله عَ موضوع المكتب واقترح عليه هداك ياخده تاني يوم عند ابن خالته
وطن : وماجد من وقتا عَ اتصال وحكي مع عُبادة لعزمه لهون
ماوي : حسبي الله ونعم الوكيل حسبي الله ونعم الوكيل ، ليش نقبرتوا اخدتوا ماجد عَ ذات القهوة الي بتروحوا عليها مع عُبادة !!!!
إيهاب : بتعرفي انو نحنا من سنين منروح لهنيك وماجد بيعرفها من زمان كتير اصلا منروح عليها معه ، ومن لما صار عُبادة أستاذنا قبل مايصير ايا شي بينك وبينه كمان صار يتردد علينا لهنيك وهلأ لصار والتقوا سوا التنين
وطن : يعني القصة من زمان من قبل علاقتك مع عُبادة
ماوي : وانا هلأ شو بعمل !! معلش افهم ! شو ممكن اعمل ؟؟
إيهاب : بشو ! وين المشكلة بالموضوع ؟
ماوي : لك إيهاب لا تجنني شو وين المشكلة بدك ياه عادي يضل يتردد ع بيتنا بعد كلشي صار بيني وبينه ويتقرب من عيلتي بهالطريقة هي وضل عادي ؟؟؟
إيهاب : بهي كمان معك حق ان عرف ماجد بشي حتخرب الدنيا
ماوي : وانا وانا لك انا بطلوع الروح عم اصمد قدامه وابقى بعيدة عنه والوقت الي عم نلتقيه بالمدرسة قليل لحتى هلأ يفوت عَ بيتي شو رح يصير فيي شو اعمل بحالي !!!
وطن : اهدي روحي اهدي الله يرضى عليكي
ماوي : ماني هديانة وانا رح حلّ الموضوع
وطن : شو حتعملي !
اخدت التلفون ومن دون أيا تفكير حطت عَ رقمه ورنتله ..
إيهاب : شو رح تعملي يامجنونة !؟
ماوي : خراس عُبادة زفت إيهاب قصدي
وطن : ههه معصبة كتير سكوت
.
.
اتسطح عَ التخت بتعب ، طالع تلفونه ليشوف اديه الساعة ..
عُبادة : لسا في وقت منيح بلحق أغفالي شوي ..
اتزامن رميته التلفون عَ التخا مع رنة المكالمة .. رجع حمله ليشوف انو هي الي عم تتصل .. بلبكة وفرحة لفحت جسده جلّس حاله وفتح المكالمة
عُبادة : الو
ماوي : مرحبا
عُبادة : اهلين ماوية كيفك !
ماوي : انت لوحدك ؟ بدي حكيك بشي كتير ضروري
عُبادة : اي لوحدي تفضلي شو في ؟
اخدت نفس عميق لتوقع سؤالها على مسامعه ..
ماوي : ليه جيت على عزيمة اليوم ؟
اتوتر من سؤالها كان متوقع شي تاني تماماً كان وكأنه شايف خيوط الصلح بدأت تتغلغل داخلهم لكن سؤالها لاشى هالاحساس ..
عُبادة : ماجد أصر عَ العزيمة كتير ، شكلي كنت ضيف غير مُرحب فيه ؟
ماوي : لا بالعكس ، من ناحية أهلي كنت ضيف مُرحب فيه وكتير كمان لدرجة الهم من لما طلعت بيحكوا عنك وعن اعجابهم فيك
عُبادة : ومن طرفك !!!
ماوي : طبعاً غير مُرحب فيه وكتييير كمان فيي افهم شو الي عم تحاول تعمله !! ليش اتقربت من الاصل من ماجد وقعدت تساعده وهلأ جيت دخلت بيتي واتعرفت عَ اهلي وحببتم فيك فيي اعرف ليش هيك عم تعمل !! اتناسيت كلشي صار بيني وبينك وهلأ عم تدخل لحياتي ولا كأنوا كان في شي بيني وبينك
عُبادة : مو يمكن لأني بدي صلح الي صار بيني وبينك ! مو يمكن لانو بدي ترجعيلي !!
صعقتها كلمته ، وقفت بمكانها ثابتة بلا ولا حركة او صوت .. غمضت عيونها ليمر شريط الذكرى اللئيمة يلي رسخلها إياها بهداك اليوم ، رعش جسدها أول ما اتذكرت اللمسات القاسية الي لمسها ياهم بهديك اللحظات ، ضحكت بسخربة بدموع واستهزاء لوجعها وقهرها منه ايام وشهور جاية مفكر يمحيهم بكلمته هي ..
ماوية بسخرية : ارجعلك !!!
عُبادة : ماوية انا ماعم اقدر انساكي جربت كتير مافيي ماعم اقدر شوفك بعيدة عني وغريبة عني وانتي اقرب مني الي انا بدي صلح الي صار بترجاكي
ماوي : شو بدك تصلح !!! ليش الي صار بيتصلح ؟؟ انت واعي لشو عم تخبص ! سمعان حالك منيح شو عم تحكي ! هيك وبكل بساطة بعد كلشي انت هلأ جاية تصلح وترّجع الي كان ؟ بعدما دمرته انت بإيدك كسرته قطعة قطعة هلأ جاية تصلح ؟؟
عُبادة : ماوية انا بحبك
ماوي : ليش انت بتعرف تحب !! بعدين شو صار حتى هلأ صرت بدك ترجع الي كان بينك وبين وحدة خانتك وكذبت عليك مع وحدة حقيرة خاينة مابتعرف من الحُب الا اسمه ! شو بدك ترّجع مع وحدة لعنتها ولعنة حُبها معها !! مو انا خنتك ! كذبت عليك وعملتك تسلاية الي ! مو انا ماحبيتك ولا بعمري بعرف حبك ! كيف بدك ترجع تكمل معي فهمني ؟؟
بحروفه المكركبة الموجعة بلعثمة مو قادر يتداركها جاوب ..
عُبادة : انا قبلان قبلان بكلشي بس ارجعي لقلبي ، بحبك انا بحبك ومستعد اتقبل كل هاد بس لتكوني قريبة مني
ماوية بعصبية : لك شو بدك تقبل فهمني !!!
عُبادة : قبلان تكوني ضحكتي علي كذبتي علي عملتيني تسلاية الك ، قبلان إني كون مُجرد لعبة بحياتك بس المُهم إني كون بحياتك ماوية المهم كون جزء منها وشو ما بدك تعتبريني ماعندي مشكلة والله انا راضي المهم كون معك ، انا من بعدك اتدمرت ماوي اتدمرت والله اتدمرت ، يمكن يمكن تحبيني يمكن تقدري تتقبليني بحياتك وتكوني معي او اذا ما قدرتي راضي نكمل باللعبة ولا كأني عرفت فيا عنجد المُهم كون ايا شي بحياتك حسنائي ..
جاوبته بحروف مصدومة بحروف عتبانة وموجعة ..
ماوي : يعني لسااتك مصدق الفويسات الي سمعتا ومكذبني انا !! مكذّب كلشي عشته وحسيتو معي ومصدق كلام مابعرف كيف وشلون صار ووصلك !
عُبادة : ماوية فهميني ! مو انتي قلتيلي من مدّة معقول انا ما افهمك ! فهميني هلأ بترجاكي انا ماعم اعرف شو صدّق وشو كذّب ماوية انا ضايع بدونك وبس هاد الي بعرفه ! من يوم ماغبتي عن عيوني ماعم اعرف عيش ! من يوم ماغبتي عن عيوني والتعب والندم والوجع اكلين روحي ، ماوية ماعم اقدر فسر شي ولا افهم شي تعبان وبدي ياكي انتي وبس شو ماكان الكلام صدق ولا كذب ماعاد بهمني بدي ياكي وبس ، بدي ترجعي لعُمري حبيبي بس
بحروف كاسيها الوجع والقهر منه وعليه جاوبته ..
ماوي : تأخرت كتير عُبادة كتير تأخرت حبيبي نطرتك ليالي طويلة كنت على استعداد انسى كلشي عشته معك بهداك اليوم امسك بإيدك وكفي بس انت ماجيت ، جيت هلأ بس جيت متأخر كتير ، انا ماعد بدي ياك بحياتي ولا بأيا شكل ، ابقى بعيد عني وعن عيلتي عُبادة والا بقسملك بكلشي خلقو ربي اني على استعداد روح لماجد وخبره بكلشي بالحرف وساعتها هو حيتصرف ويبعدك عني الله معك
من دون ايا تردد فصلت الخط ورمت التلفون من إيدها لتبدأ بالبُكاء
بصدمة و حزن على حالها قربوا منها التنين وضموها من دون مايفهموا شو الي صار والي عم يصير بينها وبين عُبادة ، غمروها بقوة الهم لتهدا وتحس بوجودهم حدا ..
رمى التلفون على التخت بقهر وهو بيضرب بِ قبضة إيده عَ جبينه بقوة ...
عُبادة : غبيييييييي انت واحد غبييي خليك عايش بنارك هيك بتستاهل بتستاهل غبيي عُبادة انت واحد غبيييييييي
ضربة إيده تحولت لضربات متتالية بإيده التنتين على راسه وهو بيردد كلماته ، صرخة ألم ووجع صرخها وهو بيقلب كلشي بيطلع بوجهه ع الأرض ليقلب الغرفة خلال ثواني فوقاني تحتاني .. اول ما انتهى قعد بأرض الغرفة وسند راسه بتعب عَ الحيط ، لمح صورتها بين الغراض الي وقعت ع الارض .. مدّ إيده وسحبها لاله بدأ يمرر إيده بتعب وعتب على الصورة وهو بيتأملها ..
عُبادة : انا موجوع أضعافك حسي فيي يمكن ع الاقل انتي عارفة الحقيقة مو متلي عم تتخبطي بمليون فكرة ليلك مع نهارك ، بحبك ياغبية بحبك فهمي !!!
.
.
اول ماهديت بدأوا بإصرارهم عليها ليعرفوا الي صار بينها وبين عُبادة ليعرفوا الشي الي هدم الحُب الي ماكان إله مثيل ..
بدأت باسترجاع ذكرياتها الأليمة وهي بتسردلهم تفاصيل الحكاية الي وقعت بينهم ..
كانت قاعدة عَ طرف التخت وهنن بيروحوا وبيجوا قبالها وملامح الصدمة الدهشة كاسية ووجوهم ...
قرب منها وهو بيمسح على شعره بتوتر واستغراب ليسألها ..
إيهاب : لك ليش ما حكيتي ليش بقيتي ساكتة كل هالوقت ليه ماوية ليه !!!!!!!!
اقترب منهم وطن ليقعد حدها ويفتل وجهها ناحه وهو بيحكي بعصبية ممزوجة بصدمته من الي سمعه ..
وطن : شو الي سكتك فهميني شو الي خلاكي تسكتي وواضح انو في حدا بدو يخرب بينكم
إيهاب : ليش ما حكيتيلو ليش مافهمتيه او عَ الاقل كنتي حكيتي لحدا فينا وفهمه القصة وانحلّت بأرضها لك بنتي ليه هيك عملتي!!
وطن : ماوية لك لك انتي سمحتي لسكوتك ينهيكم ينهي الحسناء وقيصرها لك لو حاكية كان كان ماوصلتوا لهون ليش سمحتي انو تنتهوا !!!
شهقاتها المكتومة انفجرت ودموعها رجعت صبّت على خدودها وهي بتجاوبهم بصوت بيرجف من كتر بُكائها ..
ماوي : ماسمعني ماسمع ماعطاني مجال لأحكيله فوراً جنّ صار مخلوق تاني غير عُبادة الي بعرفه والي حبيته فوراً كسرني وكسر كلشي كان بيني وبينه ..
وطن : لك لانك قلتيلو اي صوتي ، لك بنتي فهميني ليه قلتي هالكلمة ليه !! في حدا اصلاً بضل براسه عقل بعد مايسمع هيك شي وفوق منها أكدتيلو انتي انو اي هاد صوتك هاد كلامك ايا عقل حيبقى عنده !!
ماوي : لانو اي صوتي اي صوتي هاد مركب على بعضه فويسات مغيّرة الي كلام انا حاكيته بس ماحكيته هيك مابعرف كيف وشلون بس مركب بطريقة جنونية حتى انا حتى انا شكيت لثواني انو كون حاكية هالحكي عنه بس الي متأكدة منه انو اي صوتي صوتي بس ملعوب فيه ..
يتبع
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
`