الفصل 3
*؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم على متن الطائرة`*
*❴🔢❵الـــبـــــــــــ❴3️⃣+4️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
قصص وروايات 📚📖:
#على_متن_الطائرة
#بقلم_رومانتيكا_وياسمينة_الشام_الزهور
الجزء الثالث.........
زين. مرحبا يا جماعة
الجد(أبو زهير). اهلاً زين اتفضل قعود
تطلع ناح أبو زهير زين. معلم المشفى سلمونا جثة المرحوم بتحبو يكون الدفن اليوم
سحب نفس عميق أبو زهير. يا أبني أكرام الميت دفنو لازم نغسلو وندفنو بأسراع وقت والأجراءات كلا جاهزة
زين. متل ما بتؤمر يا بيك
أبو زهير. جاد وأمجد وينهون
تلبك وما عرف شو بدو يحكي حاول يتدارك الموقف زين. الصراحة بعتت وراهون المحكمة للتحقيق يا بيك مافي داعي للخوف هي اجراءات قانونية لأنون كانو بمكان الجريمة
أبو زهير. شووو جريمة!!
حس حالو حكى شي بغير محلو زين. قصدي الحادثة
أم زهير. آاااخ يا حفيدي أخخخ مشان الله هاتولي ابن ضناي بدي أشبع منو وشم ريحتو قبل ما يروح عالأخر
أبو زهير. لاء ما حدا رح يشوفو رح نغسلو وندفنو دغري
أم زهير. الله يوفقك مشان الله خلوني شوفو قبل ما يروح هاد ابن زاهر الغالي الله يرحمو بدي أشبع من ريحتو
أبو زهير. خلصنا زهرة قلت ما حدا رح يشوفو
طلع أبو زهير مع زين ليستلمو الجثة وترك وراه الست زهرة عم تصرخ وتبكي وبنتها زمرد عم تحاول تهديها بس كان الجرح عميق عالكل..
_________
كان قاعد قبال المحقق وساكت ما عم ينطق بولا حرف مكتفي بس بأنو يسمع ويهز براسو وكأنو صايبتو الجمدة من الحادثة
ثابت. أمجد الشافعي من اول ما وصلت لعنا وأنت ساكت ممكن أفهم ليش
أمجد. شو بدي أحكي
ثابت. أنت من المتهمين الخمسة بجريمة قتل أسعد الشافعي لأنك من بين الي دخلت عالحمام بهداك الوقت
أمجد. سيادة المحقق سبب سكوتي جرحي الكبير كتييير الي ولا ممكن تفهمو أنت او حدا غيرك انا أكبر خاسر بين الكل الي مات أخي مانو صديقي ولا أبن عمي هاد قطعة مني ودمي من دمو عطيني سبب واحد ليخليني أقتل اخي الي ما ضللي غيرو بهالدنيي بعد وفاة أهلي
قام عن الكرسي ومشي بأتجاه أمجد ثابت. الورثة مثلاً سبب كتير مقنع متل ما بتعرف هلق صرت الوارث الوحيد للمرحوم زاهر الأخ الاصغر للعائله واغلب أملاكو لألك
شد عقبضة أيد واكتست ملامح وشو الغضب أمجد. يلعن أبو المصاري مستعد أدفع نص ثروتي للشخص الي بيلاقيلي قاتل أخي وهالشي اعتبرو وعد شرف مني لألك لاقيلي قاتل أخي وخود نص ثروتي
ثابت. على كلن التحقيق والعدالة رح يبين هالشي اذا كنت فعلاً بريئ او لاء بس هلق مضطرين نوقفك للتحقيق 3 ايام يا ريت تسلم التياب الي كنت لابسهون يوم الحادثة وتحط بصماتك
______
طلع أمجد من غرفة التحقيق وفاتت بعدو سما قعدت عالكرسي ورجعت ضهرا لورا وكأنو واثقة من حالها نظرلا المحقق نظرة إعجاب بسبب ثقتها الزايدة بحالها
سما. اتفضل حضرة المحقق ليش بعتو ورايي
ثابت. احمم أنسة سما بتعرفي إنك من بين المتهمين الخمسة بجريمة قتل أسعد الشافعي
سما. ممكن أعرف السبب ليش انا من بين المتهمين وانا ما بعرفو للمغدور أصلاً ليش لأقتل حدا ما بعرفو ولا شفتو غير هداك اليوم
ثابت. ممكن تكوني حبيبتو القديمة مثلاً وبدك تنتقمي منو او ممكن كتير انو يكون حدا دافشك عليه وعاطيكي مصاري لتقومي بالجريمة نحنا ما فينا نجزم بشي معين في كتير احتمالات ممكن تخليكي تعملي هيك وخاصه وصلنا اخبار انك اغلب الوقت بالطيارة كنتي عم تحكي مع السيد جاد وباين بتعرفو بعض..
سما. بحب قلك هالشي مستحيل عندي ولكن حققو عكيفكون ورح تتأكدو انو انا ما دخلني، و لو حكيك صحيح كان ليش لحتى ساعدو وأحكي انو انا ممرضة وما حدا رح يعرف اساساً..
ثابت. ممكن لتزيلي الشبهات عنك لا تنسي انك من الأشخاص الي دخلو عالحمام وقت الحادثة ممكن تبرري هالشي وليش دخلتي عالحمام بوقتا..
سما. حضرة المحقق انا بخاف من الطيارة وقبل وقوع الجريمة صار في أعطال وقالولنا انو ممكن نهبط هبوط أضطراري وهالشي وترني وحسيت بالغثيان فجأه مشان هيك فتت عالحمام استفرغت وغسلت وجهي لاخفف من توتري شوي..
ثابت. على كل حال التحقيقات رح تثبت كل شي يا ريت تسلمي الأشياء المكتوبة بالورقة ورح ناخد بصماتك ومضطرين نوقفك عنا ل 3 أيام
سما. كيف بدكون توقفوني ومافي اي دليل ضدي هاد مو عدل
علا نبرة صوتو ثابت. نحنا شايفين في فوتك عالحمام شو بتسميها
سما. هلق بدكون تحطوني مع المجرمين بسبب فوتتي عالحمام
ثابت. أنسة سما يا ريت تتعاوني معنا هلق رح تجي الشرطية عبير وتاخدك وبعدين شو الي بيثبتلنا انك ما تهربي مثلاً
سكر الدفتر الي قدامو وتطلع بالشرطي الي واقف جمبو بحزم ثابت. خلصنا تحقيق لليوم خود بصمات المضيفة والطيار وخليهون يسلمو الغراض المكتوبة بالورقة وبكرا منحقق معهون
الشرطي. حاضر سيدي
________
((قصر الزهور))
كانت قاعدة بين الزهور وعم يلمعو عيونها الخضر مع أشعة الشمس رافعة راسها لفوق وعم تتنفس بعمق اما هو كان عم يراقبها كتير منيح عم يراقبها من بعيد ويبتسم تلقائياً ما قدر يمنع نفسو من انو يقرب لعندا
أفنان. اهلاً سند قعود
سند. كيف عرفتي انو انا من دون ما تلتفتي
أفنان. ههه من طريقة المشي
أبتسم سند. معناتا صرتي تعرفيني كتيير منيح
أفنان. امم تقريباً بعرف الكل من طريقة مشيتو
سند. ميزة جديدة بعرفها فيكي
التفتت لعندو كانت الكلمات رح تخنقها كانت مترددة تحكي هلق او لاء بس مو قادرة تكتم اكتر من هيك سحبت نفس عميق وشتت نظرها عنو
افنان. لازم نحكي سند
سند. بشو بدنا نحكي أحكي حبيبتي عم بسمعك
كانت عم ترتجف الحروف بين شفتها وكأنو عم تختنق أفنان. سسند نحنا لازم نترك ما بينفع نكمل مع بعض
غمض عيونو وحبس دموعو بين ايديه سند. ليش!!
أفنان. مشاعري اتجاهك باردة ما بحس بشي اتجاهك انت بتعطيني كل شي بتقدر عليه بس انا بالمقابل ما عم بقدر اعطيك شي هالخطبة بالأساس كانت أكبر غلطة لتنيناتنا
سند. ما بدي شي ما بدي تعطيني ولا شي وجودك جنبي لحالو بيكفيني ومع الوقت مشاعرك بتتغير عطيني فرصة لأثبتلك هالشي..
أفنان. جربت صدقني جربت قبل ما أوصل لهون عطيت حالي ألف فرصة لأقدر حبك بس مع الأسف ما قدرت غير شي مشاعري ثابتة من اول ما عرفتك لهلق
سند. متل ما بدك ما فيني أجبرك على شي
كان رح يقوم يمشي ما بقى يقدر اكتر من هيك مسكتو من معصم أيدو
أفنان. سند بتمنى هاد الحكي ما يخبر فيه حدا حالياً بس نتجاوز المحنة الي عم نمر فيها بالقصر منخبرهون تمام
ابتسم بأستهزاء سند. متل ما بدك
أفنان. سامحني!
مشي وتركها حبست وجها بين أيديها وصارت تبكي كانت عم تطلع كل شي جواتها من كبت سند ما بيستحق الشي الي عملتو معو هي بتعرف انو بيعشقها وانها ظلمتو بس ما فيها تعمل شي
كانو رجليها لحالون عم يمشو عالكوخ الصغير الي جمب القصر دقت الباب ونطرت شوي لنفتح
سندس. أفنان انتي منيحة!!
أفنان. تركنا انا وسند
سندس. طيب فوتي خلينا نحكي جوا
فاتت وطبقت الباب وراها
__________
وتبقينَ سندَ روحي الهشة في هذا العالمِ الصلبْ وستبقين زهرتي التي لم تغيرها الفصول ولم يحدثَ بأن تتساقطَ أبداً ...كانت ثابتة بالرغمِ من ثقلِ جروحي عليها ولم يسبقَ أن تنحني يوماً ...كانت وستبقى زهرتي التي لا تموت.
__________
غرفة التحقيق....
ثابت. سجود...يا سجود
سجود. اتفضل سيدي
ثابت. شو كنتي عم تعملي بوقت الحادثة
سجود. كنت قاعدة بالمطبخ سيدي
ثابت. بس نتيجة الطبيب الشرعي بتحكي انك أحد المتهمين بهالجريمة او عالأقل عنصر مساعد
سجود. ممكن توضح سيادة المحقق
ثابت. تبين انو المغدور أخد سم قبل وقوع الجريمة السبب الي خلاه يفقد توازنو ويفوت عالحمام.. طبعاً انتي دخلتي عالحمام بوقتها يعني فينا نقول انك متهمة وبشدة كمان شو تعقيبك على هالأمر..
سجود. انا شو دخلني بالسم ومنين بدي جيبو وشو دخلني بكل الي عم تحكي اصلاً !!
ثابت. ولو أنسة سجود ما حضرتك المضيفة بالطيارة وانتي الي ضيفتي أسعد خلال الرحلة الكل شهد بهالشي وكتير ممكن انك بعد ما أخدتي الأكل من المطبخ حطيتي السم بالصحن وضيفتي ياه ..
سجود. وليش ما تكون الطباخة
ثابت. من المستحيل طبعاً لأنو الطباخة كيف رح تعرف لوين رح يروح الصحن وكيف رح تضمن يوصل أسعد
سجود. طيب ما يمكن يكون هو الي أخد السم أو الي قاعد جمبو حطلو ياه شوفو مين كان قاعد جمبو وحققو معو انا ما دخلني بكل هالقصة الي حطيتوني فيها
ثابت. عكل حال لما تظهر نتيجة المختبر والتحقيقات ألنا حكي تاني
_____
قرب منو بخطواتو الثابتة وربت على كتفو كانت نظراتو لألو نظرات واثقة ومتأكدة كتير منيح
ثابت.. كابتن ماجد...يا كابتن ماجد الطيار انا تقريباً شبه متأكد انو الك أيد بهاللعبة القذرة انت شو بتقول
ماجد. بقول أنو أتهامك باطل
ثابت. اممم واضح كتير
بس معقول هالتكتيك كلو ما تكون أنت وراه يعني مثلاً عطل الطيارة بالوقت الي صارت في الجريمة معقول تكون صدفة مع انو فحصنا الطيارة وتبين أنو ما كان فيها أي عطل اصلاً ...شو رأيك أنت؟!
ماجد. عادي كتير ممكن تصير معنا نحنا الطيارين كتير أحياناً منشك انو في عطل بالطائرة وما بيطلع في شي يعني مافي شي غريب
ثابت. ويا ترا بتشكو بوقت الجريمة ومن لما تشكو بتحذرو العالم لحتى تخاف
ماجد. صدفة
ثابت. رُب صدفة متكتكة عالمزبوط على كل حال متل ما قلت للي قبلك التحقيق رح يبين كل شي انتظرو يوم المحكمة ورح تظهر الحقيقة
________
اجا يوم المحكمه بعد ايام من التوتور والخوف والحزن يلي شهدتو عائلة قصر الزهور
نزلت من السيارة الست زهرة بعبايتها السودة وحاطة عليها كاب من الريش الأسود كانت عم تمشي بخطوات عشوائية جمبها عيلة آل الشافعي ومتملكها الغضب عالآخر كانت عم تطلع عالكل بنظرات مو مفهومة
احفادها وجوزها أبو زهير كان الكل عم يتحاشاها
أم زهير.. هيك لكن حفيدي مات قتل وأخو وابن عمو متهمين بقتلو وانا آخر من يعلم بالأمر والله شي حلو...حلو كتيير
زمرد. أمي قلنالك ما كنا بدنا نشغل بالك وأسعد الله يرحمو صرلو أقل من أسبوع متوفي
أبو زهير. خلصنا بقى لفوها سيرة صرلكون من اول ما طلعنا بالسيارة وانتو بهالموضوع خلص الجلسة رح تبلش خلونا ندخل عاد
دخلوا على قاعة المحكمة وجلسوا بالمقاعد الأمامية كان الكل عل أعصابو عم يشوفو أحفادهون جاد وأمجد من ورا الحديد وما قادرين يحكو شي غير ينتظرو الحكم وشو رح يصير فيهون
القاضي. حكمت المحكمة وبالأستدلال بجميع الأدلة والحقائق التي وردتنا بعد التحقيق في البصمات على كأس المغدور والعثور على زر قميص المتهم في أرض الجريمة ودعسات حذائه ورائحة عطره التي قطعت الشك باليقين
وبعد شهود راكبين من ركاب الطائرة تم تبريئ جميع المتهمين بأستثناء متهم واحد من الخمس متهمين واعترف شخصياً بأنهُ القاتل
وجهو نظرهون عالخمس متهمين ونبضات قلبهون عم تتسارع بشدة ليعرفو مين هو القاتل الي تجرأ يقتل أسعد الشافعي !!!
جاد، أمجد، سما، المضيفة سجود ولا الكابتن ماجد
كان النبض عم يزيد والتوتر عم يشتد
التفت الكل لعند القاضي لحتى ينطق ويقول مين هو القاتل!...#يتبع
#على_متن_الطائرة
#بقلم_رومانتيكا_وياسمينة_الشام_الزهور
الجزء الرابع...........
وجهو نظرهون عالخمس متهمين ونبضات قلبهون عم تتسارع بشدة ليعرفو مين هو القاتل الي تجرأ يقتل أسعد الشافعي !!!
جاد، أمجد، سما، المضيفة سجود ولا الكابتن ماجد
كان النبض عم يزيد والتوتر عم يشتد
التفت الكل لعند القاضي لحتى ينطق ويقول مين هو القاتل!
القاضي. تم تبريئ المتهمين الأربعة سما شعراوي ،ماجد الأحمد، سجود الشيخ وجاد الشافعي وسيتم محاكمة المتهم أمجد الشافعي بتهمة قتل اخيه لينال ورثة ابيه بأكملها بعد اعترافه شخصياً رفعت الجلسة حتى أشعار آخر
بالجهة المقابلة تلونت الوجوه واعترتها صدمة غريبة بين تصديق وتكذيب للخبر حفيد آل الشافعي يقتل اخوه اول مره بيصدفهون هيك شي ناس عم تصرخ وناس عم تبكي وطبعاً الجو ما بيخلى من بعض الشماتات
التفتو الكل لعند الست زهرة اول ما شافوها وقعت عالأرض بطولها صارو يصحوها بس من دون فائدة حملوها وطلعو فيها عالسيارة بسرعة بعد شوي لحقوهون جاد وسما
جاد. تيتا شو صرلك حدا يرد عليي تيتا شبها
قاطعتهون سما. لو سمحتو ممكن تخلوني شوفها انا ممرضة
أبو زهير. أكيد...أكيد اتفضلي
قربت منها وحطت ايدها عقلبها سما. معكون عطر بالسيارة
فتح زين تابلو السيارة وطالع منو علبة عطر صغيرة
زين. اتفضلي
رشت شوي عأيدها وقربتها من أنف الست زهرة لتحاول تصحيها بعد خمس دقايق بلشت تستعيد وعيها وهي عم تهلوس
جاد. ستي انتي منيحة
زهرة. آخخ يا حفيدي أخخ آخخ يا ابن ضنايي
التفتت سما لعند الكل لتوجهلون كلامها
سما. لا تخافو الهيئة كان نازل ضغطها شوي لا تقلقو مافي شي خطير بس الأفضل تقيسولا ضغطها وتعملولا تحليل الدم الهيئة ما عم تتغذا منيح واهم نقطة خلوها تبعد عن الزعل
أبو زهير. اكيد ان شاء الله
سما. وهلق عن اذنكون انتبهو على صحتها منيح
جاد. اتفضلي خلينا نوصلك
سما. مافي داعي حكيت مع أخي وهو جاي عالطريق
أبو زهير. طيب منتشكرك كتير بنتي ما قصرتي
سما. ولو عمو اهلا وسهلا انا بالخدمة دائماً
مشيت وتركت وراها أثر حلو بقلوب الكل متل الغيمة البيضة بنهار صافي بتجي بسلام وبتروح بسلام التفتو الكل عليها بأعجاب
زمرد. لطيفة هالبنت
جاد. كتيير
وقف الكل بنبرة حازمة وبنظرات صارمة أبو زهير. انتبهو عليي كلكون الي صار من شوي بالمحكمة ما بدي لا أنس ولا جن يخبر فيه فهمتو أمجد بأمريكا عم يكمل رسالة الماجستير لانو ما اتحمل الحياة بعد أخو فهمتو
جاد. بس جدي شو مشان الي كانو بالجلسة
أبو زهير. الي كانو بالجلسة بخرسهون بطريقتي قسماً بالله ما أسمع حرف واحد طالع لتشوفو شي بعمركون ما شفتو مفهوم
الكل. مفهوم
_________
دخلو آل الشافعي عالقصر برجوع جاد معهون كانت الخيبة مرسومة على وجوه الكل من دون ما ينطقو ب ولا حرف كان في حزن مكبوت بقلوبهون على أحفادهون التنين واحد منهون صار تحت التراب وواحد تاني بين قضبان السجن
كل الي بالقصر هجم على جاد وصارو يهنو بسلامتو خبرهون انو أمجد ما رح يرجع عالقصر حالياً لأنو متأثر بموتت أخو وما بدو شي يذكرو فيه
دخلت الست زهرة على جناحها الخاص مع كيس أدوية جديد كان جاد ساندها على كتفو حطها عالكرسي وقعد عالأرض قبالها
زهرة. مين هي البنت الي كانت عم تحاول تصحيني هناك
جاد. وحدة كانت معنا بالطيارة وكانت عم تحاول تساعد أسعد الله يرحمو حققو معها ورجعنا التقينا
زهرة. اممم باينتا محترمة هالبنت كان لازم أتشكرها
جاد. كيف صرتي انتي هلق
سحبت نفس عميق زهرة. كيف بدي كون يعني!
جاد. تيتا انا بعرفك قوية وتجاوزتي الي أصعب من هيك من قبل بس هي اول مرة بشوفك ضعيفة لهالدرجة
زهرة. لك كيف بدك ياني كون هدول أحفادي قطعة من قلبي وولاد زاهر الغالي الله يرحمو وصاني فيهون وكأنو قلبو حاسو انو رح يصير شي من بعدو
يا قلبي عليهون واحد صفي تحت التراب الله يرحمو وواحد ورا الحديد
جاد. الله يرحمو
زهرة. لك يا ريت بس جدك سمحلي شوفو قبل الدفن لك راح من دون ما شم ريحتو وأشبع منو
ربت على ايدين ستو جاد. طولي بالك ستي رح نتجاوز هالمحنة انا بوعدك
زهرة. بدي توعدني تلاقي القاتل الحقيقي الي حرق قلبي على أحفادي الله ينتقم منو أشد انتقام
جاد. بس ستي المحكمة
قاطعتو زهرة. لاء جاد لاء مو حفيدي الي بيقتل أخو ابداً مو ابن الشافعي بيقتل أخو مشان كم قرش هاد واحد دنيئ بدو يحرق قلبنا و يشوه سمعة العيلة
مسكت كتافو وتطلعت فيه بنظرة حازمة. رح يجي يوم من الأيام تنكشف الحقيقة وعلى أيدك يا جاد الشافعي على أيدك اعتبرها فرصتك لتثبت حالك بالعيلة وبأرض الزهور كاملة
جاد. ليش انا ؟
زهرة. صار عمرك 30 سنة صرت رجال وفيني أعتمد عليك مافي حدا بقدر أعتمد عليه غيرك جدك كبر بالعمر وأبوك وعمك ماتو الله يرحمهون انت بس الي بتقدر ترجع حق ولاد عمك من عشيرة المجدي الأندال
جاد. وشو الي خلاكي توثقي انو هنن ورا هالشغلة
زهرة. ما عنا أعداء غيرهون ولا تنسى انون كانو من بين المرشحين لحكم ارض الزهور مع جدك بدهون ينتقمو منا بأي طريقة ليستلمو الحكم جاد كل الي مطلوب منك انك تتأكد انو هنن ورا هالشغلة
وادا هنن ورا هالشغلة فتأكد ما رح يهنالهون بال ليرجعلهون الحكم من اول وجديد
جاد. مستحيل أسمحلون يتمادو ستي وثقي بهالشي
زهرة. لا تنسى مصير العيلة كلو متعلق فيك يا جاد تمام
ربت على ايدين ستو جاد. تمام يا زهرة خانوم
_______
طلع من جناح الست زهرة وهو عم يفكر بحكيها كتير منيح حاسس راسو رح ينفجر هالهموم والمشاكل عم تكبرو كتير شد على قبضة أيدو وحاول يخفف شوي من غضبو
فات على جناحو وارتكى عالتخت وهو عم يفكر شو بدو يعمل فجأة رن موبايلو وقاطع شرودو أول ما شاف الأسم أبتسم باللاشعور وتذكر هالنسمة اللطيفة الي مرت بالصدفة وما تركت وراها غير الأثر حلو
جاد. اهلاً سما كيفك
سما. الحمدلله تمام دقيتلك لأطمن على ستك يا ترى كيف صارت؟
جاد. اااه اي الحمدلله الحمدلله صارت احسن متل ما قلتي نازل ضغطها شوي أخدناها عالمشفى وعملنا شوية فحوصات ان شاء الله كلو سليم
سما. اي الحمدلله
جاد. عنجد بتشكرك كتير بالنيابة عن ستي وعن الكل هي تاني مرة بتحاولي تساعدينا لازم سميكي فتاة المهمات الطارئة
سما. ما عملت غير واجبي يالله عن اذنك كان بدي بس أطمن على ستك
كان بدو يسمع صوتها اكتر ما بدو ياها تسكر حكى بسرعة قبل ما تفصل الخط جاد. رجعتي تداومي بشغلك
سما. ههه ااااه انا تركت الشغل
جاد. ليش؟
سما. الصراحة تخانقت مع صاحب المجلة صار يسمعني حكي لاني من بين المتهمين بجريمة قتل وقال هالشي بسيئ لسمعة المجلة
جاد. اووف كل هالشي صاير معك خلص لا تزعجي حالك كل شي بيلتقالو حل
سما. ان شاء الله
جاد. طيب شو رأيك تشتغلي عنا بالقصر ستي بحاجة لممرضة تهتم فيها دائماً تقسلا ضغطها وتهتم بأدويتها وانتي ممرضة
سما. بس انا حابة اشتغل بتخصصي الأساسي الي هو صحفية
جاد. فيكي تشتغلي عنا بالقصر مبدئياً لبينما تلاقي شغل لا تنسي انك تلاقي شغل بهالبلد صعب كتير
سما. اممم معك حق خليني فكر فيها شوي
جاد. خدي راحتك
...............................................
بعد يومين كان جاد متمدد عتختو وعم يفكر
يا ترى ممكن سما تشتغل عندهن بالقصر شو هالصدف الي عم تجمعهن من دون تخطيط كان عم يبني أحلامو وسارح بخيالو لبعيد لحد ما ندق الباب عليه
جاد. اتفضل
(حسيبة)ام سندس. يا بيك العشا صار جاهز
جاد. ماشي حسيبة شوي وبنزل
بعد ما طلعت فات عالحمام غسل وشو وسرح شعرو عالسريع ونزل لتحت عصالون القصر محل ما بيجتمعو العيلة كان السكون طاغي عالمكان وكأنو هالعيلة ضاعت بهجتها وفقدت ألوان الحياة كانو عم ياكلو بالغصب وكأنو ما حدا الو نفس ياكل
جاد. مرحبا
زمرد. اهلين جاد قعود
زاح الكرسي وقعد كان عم يعبي أكل بصحنو ويحكي جاد. بتتذكرو سما الي ساعدت ستي بالمحكمة من يومين
زمرد. اي هي البنت أم شعر بني تذكرتا
أبو زهير. شبها
جاد. جدي هالبنت تركت شغلها وهي بحاجة لشغل مشان هيك اقترحت عليها تشتغل ممرضة عنا بالقصر وخصوصاً انو نحنا بحاجة لممرضة تعتني بأدوية ستي او ادا لا سمح الله صار لحدا مننا شي
أم زهير. ما قصرت ابني
أبو زهير. اممم مو غلط يكون عنا ممرضة خصوصاً انو أرض الزهور كلا ما فيها دكتورة او ممرضة
ابتسم وتنهد بعمق لما شاف تقبل بيت جدو للموضوع جاد. معك حق
أبو زهير. ما قلتلي هي شو رأيها بالموضوع يا ترى وافقت؟؟
جاد. ما بعرف قالتلي بدا تفكر وصرلا يومين لسا ما ردتلي خبر
أبو زهير. معناتا دقلا وسألها مشان ادا ما وافقت ندور عغيرها
جاد. هلق!
أبو زهير. اي هلق
طالع موبايلو ودق على رقمها كان قلبو عم يرجف وناطر ليسمع صوتها الي أسرو حاول يضبط أنفاسو اول ما سمع صوتها
جاد. كيفك أنسة سما
سما. اهلين استاز جاد تمام أنت كيفك !
جاد. الحمدلله منيح دقيتلك مشان أسألك شو صار معك بخصوص الشغل الي قلتلك عليه
سما. أسفة كتير عالتأخير كنت رح دقلك اليوم وخبرك اني وافقت عالشغل
جاد. حلو كتير ايمتا بتحبي تبلشي؟
سما. ايمت ما بتحبو ممكن بكرا
جاد. تمام تمام بكرا كتير منيح رح ابعتلك العنوان تعي عالساعة تسعة الصبح
سما. ان شاء الله
فصل الخط معها وكانت البسمة واضحة على وشو كتير منيح قد ما حاول يخفيها ما عم يقدر تنحنح وقام عن كرسيو
جاد. قال وافقت ورح تجي بكرا عالساعة تسعة
انا رايح على غرفتي تصبحو على خير
زمرد. شبو هاد
أم زهير. مدري شو شاغل بالو
فات على جناحو وتمدد على تختو الواسع عم يتقلب يمين ويسار وعم يتذكر تفاصيل صغيرة كتير بس كان أثرها بقلبو كتير كبير كان شايف انو القدر الو رأي تاني الصدف الي عم تصير بحياتو مستحيل تكون عن عبث سحب نفس عميق وهو ناطر بكرا على أحر من الجمر
_______
تاني نهار الصبح قام جاد من عن التخت وأشعة الشمس عم تتغلغل بشعرو وعم تلمع مع عيونو توجه للحمام غسل وشو وسرح شعرو عالسريع طالع تيشرت لون أبيض من الخزانة مع بنطلون أسود ولبسون
كان قلبو عم يدق مع دقات عقارب الساعة ضللا 5 دقايق وبتوصل مرقت هالخمس دقايق بطيئة كتير عليه نزل عالدرج بخطوات بطيئة وقلبو عم يرجف كان عم يلمحها من اول الدرج قاعدة مع ستو وعم يحكو توجه لعندهون
جاد. صباح الخير أنسة سما صباح الخير ستي
سما. اهلاً استاذ جاد
أم زهير. صباح النور ابني كنت عم بتشكر سما على موقفها معنا يوم المحكمة
سما. ولو خالتي انا ما عملت غير واجبي
أم زهير. بما انك رح تشتغلي عنا صرتي من اهل البيت مشان هيك يا سما يا ريت تناديلي تيتة او ستي متل ما بينادولي الكل هون
سما. حاضر تيتة متل ما بدك
جاد. ستي ما بتحب كلمة خالة كتير
سما. أسفة ما كنت بعرف
كانت أفنان نازلة عن الدرج وشعرها عم يطير معها بأنسياب وكأنها طايرة متل الفراشة توجهت عصالة القصر اول ما لاحظت انو في حدا غريب
أفنان. صباح الخير
الكل. صباح النور
تطلعت ناح سما ووجهتلا كلامها أفنان. انتِ سما مو هيك
ابتسمت بنعومة سما. اي انا
أفنان. وانا أفنان اختو لجاد
سما. تشرفت فيكي حبيبتي
أفنان. وانا اكتر
بتحبي عرفك عالقصر والي موجودين فيه
سما. اي والله يا ريت
أفنان. من عيوني امشي معي
راحت سما مع افنان وصارو يتفتلو بهالقصر كان شي غريب على سما قصر الزهور كان حلم لألها فوتتو ما عم تصدق انو هلق عم تمشي بين ممراتو
كان القصر متعربش عحيطانو كل أنواع الزهور مشان هيك تسمى بهالأسم وبالرغم من فخامتو من الداخل إلا انو من برا كان كلو حجر أسود قديم وكأنو الحجر الأسود تراث بهالقصر كانت أفنان وسما عم يمشو بهالممرات وعم تحاول افنان تشرح كل شي لسما
____
دخل زين عصالون القصر وهو عم يحاول يجمع أنفاسو كان مقطوع نفسو من الركض التفت لجاد وكان عم يحكي بسرعة رهيبة
زين. معلم...مشكلة كبيرة فوق راسنا يا معلم نحنا انتهينا يا معلم مشان الله عمول شي!...#يتبع
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
`
*للإ اشتراك بكروبات الإناث الكاتب محمود العبدالله*
*بنت بتبعتي صوط للإضافه ع كروب البنات➹🙋♀️🎻ۥ!0996878268 رقمي*
https://chat.whatsapp.com/D7fA5uKrelaADxYSMSzIxw
*اسمك ومن اي محافظة بصوط عشان ضيفك بكروب البنات*
➖➖➖➖➖➖➖➖➖