الفصل 5
[٢٠/٢، ٩:٠٨ م] null: *؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم حب البنات`*
*❴🔢❵الـــبـــــــــــ❴6️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
Stories 📖:
#حب_البنات
#فيلوفوبيا
#الجزء_العاشر
شادن
و مين قال أنه الحياة سهلة؟ و مين قال أنها ما بتبكي الواحد بدل المرة ألف، و بتناوله بدل الصفعة صفعات.
أنا من جهتي تأقلمت مع هالحقيقة، و صرت قادرة بعد كل صفعة أنهض، لو بعد حين، بس المهم أني عم أنهض و كمل مصارعة مع الحياة.
لأنها سواء اعترفنا أو لا، دار اختبار، و الإختبار مراحل و مستويات، و كل شخص بتجي الأسئلة حسب مستواه.
و مثل ما في ناس قادرة تكون بمستوى أعلى من عمرها بالدراسة، كمان في ناس بالحياة مستوى امتحانها أعلى من عمرها.
القبول لهالحقيقة و التعامل معها بيخلق نوع من الراحة، لأنك بتطلع من دور الضحية، و بتصير بدور المسؤول ، بتطلع من كونك برغي بلعبة، بيدق شطرنج، للعقل المفكر، و اللعبة كلها.
رب العالمين دائماً بيختبرنا، و أنا شخصياً عم حاول أختار الجواب المناسب، لأنه مافي جواب صح مية بالمية.
قررت وافق على الياس، بس...قبل كان لازم مهد لأخواتي و خبرهن، و احترت...كيف بوسط خذلانهن و فشلهن العاطفي، بدي قول أني رح أنخطب للرجل يلي بحبه و بيحبني.
أوقات مجرد نجاحك بشي بسيط، وسط فشل محيطك بيحسسك بالذنب بدون مايكون الك ذنب فعلياً، و لكن فرط تعاطفي معهن عم يخليني حس أنه سعادتي مو وقتها، ولازم أجلها شوي.
فكرت أني قبل ما أعلن قبولي، لازم أتعرف على أهله، و بناءً على طبيعة اللقاء و إحساسي، إما بكمل أو بوقف، أنا بآمن بالإشارات الربانية كتير، وبحس لقائي مع عيلته رح يكون فيه إشارات لكمل أو أبعد.
حملت جوالي لأطلب الياس، لكني شفت أدهم مشارك حالة عالواتس، بناتي....متصورين بمدينة ملاهي، و معهن بوالين على شكل شخصياتهم الكرتونية المفضلة ، ضحكاتهم عذبة كتير، و السعادة بعيونهم.
مبسوطين بدوني ؟
ياترى بيشتاقولي مثل ما بشتاق الهم؟
صحيح أني عم شوفهم بالخفاء من بعيد لبعيد، بس مافي شي بيضاهي اللمسة و الحضن و الرائحة.
تشكلت غصة بحلقي، وين رايحة أنا؟ معقول عم حيد عن هدفي الحقيقي...أني أجمع مصاري لأقدر وكل محامي، و رجعهم لحضني.
خطبتي مع الياس رح تلهيني، و حبي له رح يشغل بالي فيه، و أنا بالي مع بناتي، بناتي عندي أغلى من أي رجال بالكون، حتى لو كان الياس.
بس يمكن......مو يمكن أكيد، مارح لاقي مثله يسندني و يوقف معي.
بدون وعي كامل، طلبت أدهم، بعد كم رنة رد عليي، و بهدوء:
_ ألو نعم
قلت بارتباك:_ كيفك أدهم
_ منيح
بلعت ريقي:_ أدهم، بقدر شوف البنات؟
_ شو المناسبة؟
تسارع نفسي:_ مافي مناسبة، اشتقت لهم، الله يخليك، اسمح لي شوفهم لو ساعة بس.
ضحك بسخرية و سماجة:_ غريب، كيف لما بدك شي بتتحولي لقطة بريئة، بتستخدمي نبرة طفولية، على أساس رح تلين قلبي، طول عمرك هيك على فكرة.
هزيت رجلي بتوتر:_ شو لزوم هالحكي؟
زفر نفس طويل و قال:_ لذكرك أني حافظك متل كف إيدي. رح أسمح لك تشوفيهم، بالحديقة العامة، بكرا الساعة 3 العصر.
ضحكت، أوشكت على البكاء، قلت بلهفة:_ طيب، مارح أتأخر
قال بحزم:_ عملي حسابك، نص ساعة مو أكتر
_ طيب، طيب
_ سلام.
أخيراً....بعد سنتين و شوي، رح شوف بناتي! الفرحة ما وسعتني، حسيت قلبي طاير، طلعت من غرفتي و رحت لعند أخواتي يلي كانوا بالصالة، كل واحدة شاردة بفضاء، قلت بفرح عارم:
_ يابنات، أدهم....أدهم سمح لي شوف بناتي! بكرا....بكرا العصر!
صحيوا من شرودهم، ريم نهضت و عانقتني، ولكن رشا بقيت محلها، فجلسنا جنبا و عانقنها كل وحدة من جهة، قلت لها ممازحة:_ شو رشروش؟ مابدك تروحي معي بكرا؟ مو مشتاقة لسنا و ملاك؟
طلعت فيني، قالت بعيون باهتة:_ لا....روحي أنتي و ريم.
احتضنت وجهها و قلت:_ كرمالي، طلعي من هالحالة بقا، صدقيني ألف رجال بيتمنى رضاكي!
أومأت مجيبة، قالت بعدها بصوت مبحوح:_ ما اتصل فيني، ولا طيب خاطري، لهالدرجة أنا رخيصة عنده؟
قالت ريم بمكابرة:_ بالناقص منه لك أختي، رامي ما بيستاهل ضفرك
التفتت لريم و قالت:_ صحيح رفضتي كريم؟
ابتسمت ريم بحزن، و أومأت موافقة، فأردفت رشا:_ سهل عليكي، ما تقربتوا من بعض، ماحسيتي بالدفا بقربه، ولا حتى سمعتيه عم يتغزل فيكي، ما دللك و لا حن عليكي، ولا حتى اهتم بمرضك و صحتك.
لكن ريم قالت بجدية:_ لو كان عمل كل هدول بدافع الشفقة، فأنا ما بدي ياهم!
انفعلت رشا و نهضت و قالت بصوت مرتفع:_ مو شفقة! ماحدا بيعمل كل يلي عمله رامي شفقة!
رامي بيحبني، بس هو مو مدرك، مفكر حاله بيحبها، بس هو بيحبني أنا!
همت ريم لتنطق و أنا بعرف ردها الحاد شو هو، سكتتها، وقلت لرشا بهدوء:_ طيب حبيبتي، إذا أنت شايفة هيك، متل مابدك.
قالت بعنفوان:_ أي، رح تشوفو أنه كلامي صح.
تركتنا و دخلت، و بقيت مع ريم، و الصمت معنا.
بعد دقايق تنهدت ريم، فتحت جوالها، و قربته مني بدون أي كلمة، كانت حالة واتساب لكريم،
جناح الطائرة و السماء مغلفة الصورة، و تحته اقتباس:
" هل أرحل عنك و قصتنا أجمل من عودة نيسان"
تأملت الشاشة للحظات، و بعدها نظرت لريم، لقيتها مبتسمة، مبتسمة بوجع غريب، أنا ماشفت ابتسامة مسقية بالدموع هيك، قالت بحرقة:_ استعجل كتير بالسفر، الظاهر كان ناوي يهرب من زمان.
زفرت و قلت:_ أوقات الواحد بيفكر الهروب حل
ضحكت بسخرية:_ توقعت كل شي، إلا أنه رجال يهرب مني.
التفتت و قلت لها بجدية:_ يمكن لأنك أكبر من أحلامه، و واقعه ضيق عليكي، فالهرب حل مثالي بوضعه.
اراحت ظهرها و سندت راسها لظهر الكنبة، و قالت بعفوية:_ بتعرفي شادن، بصراحة: مابتوقع أني أنساه بسهولة، أو بطّل حبه.
وضعت راسي على حجرها و قلت:_ مو مطلوب منك تبطلي تحبي، مطلوب منك بس تكوني واعية و حذرة، مع أنه صعب يجتمع الحذر و الحب، لكن حاولي.
قالت و هي عم تمسح على شعري:_ الغريب أني مو زعلانة منه، زعلانة من التوقيت، كل شي بيننا كان صح بس مو بوقته.
سكتت للحظات و كملت:_ أنا كنت مستعدة راهن. بس رشا كسرتني، رجعتني خطوات للخلف.
نهضت و نظرت لها بإعجاب:_ عم تتجاهلي الوجع؟ و لا عم تجمليه؟
ضحكت ضحكة قصيرة :_ عم أسخر منه! صحيح أنا بحب كريم، و سفره رح يحسسني بالوحدة أكتر من أي وقت، و وجوده حولي و اهتمامه الغير مباشر فيني و فترة تواجده بحياتي أحلى فترة بعيشها.
بس ما رح أسمح لنفسي أنكسر ببعده، رح قاوم و أضحك على الوجع و حوله لنكتة، حتى الوجع يستسخف نفسه، هي مو نهاية الكون، و الحياة ماشية و مكملة، و إذا كان في نصيب بيجمعنا، رح نجتمع لو بآخر الدنيا.
ابتسمت بشكل موارب وقلت:_ رح تنطريه؟
رفعت أكتافها و قالت:_ مافي شي بيلغي حبي له.
رجعت تمددت على حجرها و قلت:_ بتعجبني فلسفتك
تنهدت و قالت:_ نحن من أول حياتنا انجبرنا عالحلول الوسط، بفكر فينا، أنا و أنت و رشا، ولا مرة أنصفتنا الحياة تماماً، دائماً كنا بالوسط، يلي بيرضي الكل إلا نحن
و وضعي مع كريم ما هو إلا حل وسط.
سكتت و تابعت بتمسيد شعري، كانت السما مغيمة، و النار عم ترقص جوا المدفأة و للهيبها صوت محبب، والدفء بدأ ينتشر بيننا، قالت بعد برهة، بهدوء و راحة بحديثها:
_بتعرفي شادن؟ أوقات....بتحسي أنه هالشي إلك، متل لما نشوف قطعة تياب حلوة، بتعجبنا و منحس أنها بتشبهنا و منعرف أننا رح نشتريها و تكون النا
و أنا، بحس هيك تجاه كريم، مو لأني بحبه ، بس عنجد بحسه إلي،بحس رح يجي يوم و نكون سوا
يمكن... أنا عم أضحك على حالي بهالكلام، عم هون على حالي.
بس عالأقل صار عندي أمل بشي، صار عندي دعوة أدعيها كل يوم، وشخص فكر فيه قبل ما نام.
شادن أنا كنت أتمنى حب و تحققت أمنيتي، وكريم بسفره ريحني صدقيني، ماعدت حس أني عدوّة لزوجته و بنته.
بيكفيني أعرف أنه بيحبني و بحبه، والباقي تفاصيل.
قلت بخفة:_ نسخة ريم جديدة؟
ضحكت وقالت:_ تحديث اضطراري.
ضحكنا سوا، حتى سألتني:_ و أنت شو أخبار الياس؟
نهضت و قلت :_ بما أنك مو مكتئبة متل ماظنيت، رح خبرك
ابتسمت و قالت:_ لا تقولي، خطبك؟
جاوبت بحماس:_ أي!
رفعت حاجبها وقالت:_ و إن شاء الله طفشتيه بفزلكتك؟ بلشتي تحكي له عن مخاوفك و أحزانك و آلامك!
ضربتها على كتفها بخفة:_ سكتي، ما كان في داعي أحكي، لحاله عرفهن كلهن.
قالت بسخرية:_ الله، صهري الجديد فهيم زمانه!
قلت بنزاقة:_ بيكفي سخرية، والله فهم لحاله و قال أنه رح يوقف معي، و مابتهمه الظروف و لا المجتمع ولا حتى أهله.
رفعت حواجبها وقالت:_ و إيمتى لحق يحبك هالقد؟
قلت بغرور:_ مشان تعرفي أختك مو قليلة.
_طبعاً أكيد، ولو، يعني خبرتيه بموافقتك؟
جاوبت بتردد:_ لسا، عم فكر أتعرف على أهله قبل ما أعطي جواب، يعني أحسن
_ صح كلامك، روحي و تعرفي و حكمي،وبعدها لكل حادث حديث.
قلت بشوية خجل:_ يعني بتشجعيني؟
_ أكيد حبيبتي، خلي واحدة فينا تسعد عالأقل، مو نبقى 3 عم نندب حظنا
ضحكنا من جديد، على النكتة أو على حالنا،مو مهم، المهم أننا قادرين نضحك لسا.
رشا
تحت المطر الغزير، غير آبهة بشي، محتضنة نفسها، و مستغلة غياب أخواتها عن البيت ، و ماشية.
و نوع من التضحية _ بحسب ظنها_ ، ما ركبت سيارة أجرة، بل قررت تروح مشي، لمقهى رامي.
على عكس الظنون، رشا ما فهمت الرسالة و لا تعلمت الدرس، بالعكس، زاد إصرارها على رامي و وجوده معها، و بما أنه متهرب من المواجهة، قررت تواجهه بنفسها.
وصلت ، و لحسن حظنا كان المكان فارغ، شعر رامي بدخول شخص فخرج من مكتبه و ذهل لرؤيتها أمامه.
تصلب بمكانه، تأملها و شعر وكأنه سكاكين عم تحز بصدره بس لرؤيتها بهالحالة،
الماء عم يقطر من ملابسها، محتضنة نفسها، عم ترتعش، و تنظر له بطريقة موجعة للغاية، ساد الصمت، و كأن صوت أنفاسها هو الوحيد المسموع.
عرف أنها جاية تصالحه، كابر على شعوره بالدونية، قال بحزم:
_ شو جابك؟....روحي عالبيت رشا
هزت راسها رافضة، و مازالت عم ترتعش بشدة،قال بصوت أجش:
_رشا بيكفي، أنا وجودي بحياتك عم يضرك، أنا مابستاهلك!
ما جاوبت، حس أنه محاصر، فكر أنه يقسى عليها لعلها تفهم، يتظاهر بالغضب؟ يمشي و يتركها؟
ماعرف شو يقول، قرر يكون صادق:
_ بيكفي تحسسيني قديش أنا حقير، بترجاكي روحي عالبيت.
تغيرت نظراتها، بدأت تذرف دموعها بصمت، سكت و تأملها، وجهها شاحب، و أصفر ، و البرد.....البرد عم يحتلها...خاف عليها...خاف بجد
شي بداخل صدره استيقظ، مشي للمطبخ و جلب منشفة وبدأ بتنشيف شعرها و وجهها، أرخى يديها عن جذعها، خلع معطفها المبلول و وضعه جنب المدفأة، و ألبسها معطفه، وهي عم تراقبه بصمت، حتى انتهى.
و لما انتهى، بكيت، بدأت بالنشيج. احتار أكثر، كأنه وقع بحفرة نار، نظر لها وقال بصوت خافت:
_ ببوس إيدك لاتبكي
لكنه بكلمته بكاها أكثر، حتى رفعت راسها وقالت أثناء بكائها :_ رامي، لا تفسخ الخطبة، رامي أنا بحبك، و مسامحتك، خليك معي، لو مابتحبني خليك معي.
حفرة نار؟ جحيم؟ وصف قليل على شعوره.
مافي أصعب من أنك تؤذي انسان بشدة و يسامحك بدون ما تطلب السماح، يغفرلك بدون ما تعتذر.
هي أمامه، ماشاف إلا طفلة صغيرة عم تترجاه ما يترك إيدها، بيعشقها ؟ لا
بس بيحبها كتير، حب مختلف عن الحب ، مختلف عن العشق، حب غريب بيخليه مابيقدر يجرحها و يدمرها ، بيخليه مو قادر يتخلى عنها، بيخليه مستعد ينهي قصة حبه الوحيدة و يكون معها بس ليسعدها.
يضحي بسعادته بس حتى ما تبكي هيك، ولا توصل لهالدرجة من الهوان!
بكي....أي رامي بكي بلحظتها، و قرب منها و احتضنها و بكي عليها، و من نفسه و على نفسه.
لأول مرة بحياته بيبكي هيك، ماتخيل يضعف أمامها لهالدرجة، ولكنها أوجعته بشدة، و أرغمته على الانحناء أمامها.
قال وهو معانقها، و بعز انهياره الداخلي:_ أنا آسف، والله العظيم آسف،أنا مابستاهلك.
ما همها الاعتذار، ولا همها شي، هي بدها أمانه، دفئه، احتوائه، حنانه.
و الاعتذار والأسف شكليات، مو مهمين
شو بتتسمى أفعاله غير حب؟ و حضنه هذا و دموعه شو؟ ندمه عن شو بيعبر إلا الحب؟
كلها ظنون ما حسمتها إلا كلمته يلي همسها:_ أنا بحبك، بحبك كتير، و أهون عليي موت، ولا شوفك بهالحالة.
أخيراً إجا الاعتراف الصادق يلي انتظرته شهور، ماعملت شي، و لا أبدت أي ردة فعل، ابتسمت من بعد بكاء طويل، و أبقت راسها على صدره، و استمعت لقلبه الراكض.
جلسوا و مازال راسها على صدره، مسح على شعرها، و أسند ذقنه على راسها، و شعر بنوع من الطمأنينة.
الغريب أنها ما نطقت، بقيت ساكتة وتاركة الريادة إله.
بقي محتضنها مدة، و عقله حسم القرار، رح يكون لرشا، مابيهم أي شي تاني.
تحرك و أخرج جواله، تابعته بعيونها، تقصد انه الشاشة تواجهها. رغد....اتصال.
تسرع قلب رشا لكنها بقيت ساكنة، فكرت أنه ظاننها غفيانة، جاوبت رغد:_ أهلين حبيبي.
سحب رامي نفس، قاوم تسرع قلبه و قال:_ كيفك؟
_ مشتاقة حبيبي
زفر و قال بجدية:_ رغد، أنا ماعاد أقدر كمل معك، بدي ننهي علاقتنا، لأنه......عرسي قريب
صمتت رغد، و رشا عقلها ما استوعب يلي سمعه، لكنها بقيت على حالها رغم الصدمة، وبعد لحظات قالت رغد:_ الظاهر قلبك حن؟
ابتسم رامي، وقال بصوت مرتجف:_ قلبي، قلبي.....اختار رشا. بعتذر منك
قالت رغد بحزن:_ أي موفق بحياتك، الله يسعدك، رشا بنت منيحة و بتستاهلك. مع السلامة.
سكر الخط، رمى الهاتف على جنب، ولف يديه حول رشا. والقلب مابيعلم بحاله غير خالقه.
بقيت رشا ساكنة بين إيديه، كأنها خايفة تتحرك فينهار المشهد، أو تصحى من وهم أخيرًا صار حقيقة.
كانت أنفاسه قريبة، دافية، و صدره لسا عم يعلو و يهبط بسرعة… دليل قرار مو سهل.
رفعت راسها ببطء، تطلعت فيه، مو بفرح المنتصر، ولا بدموع المظلومة، نظرة وحدة بس:
نظرة وحدة أخيرًا حسّت فيها إنها مختارة… مو مُشفَق عليها.
قالت بصوت واطي، مبحوح من البرد و البكاء: _عن جد… اخترتني؟
هز راسه، و كأنه بهاللحظة عم يقنع حاله قبل ما يقنعها: _إي رشا… اخترتك. يمكن تأخرت، بس هذا يلي قلبي قدر عليه.
ابتسمت ابتسامة صغيرة، موجعة، ابتسامة وحدة من النوع يلي بيطلع من قلب تعب.
مدّت إيدها، مسكت قميصه عند صدره، و همست: _المهم ما تتركني.
شدّها عليه أكتر، و قال بحزم ممزوج بخوف: _ما رح أتركك.
لكن…
ولا واحد منهم سمع الصوت الخفي بهالكلمة.
الصوت يلي كان عم يقول: "أحيانًا نحن ما منختار يلي منحبهم…منختار يلي ما منقدر نخذلهم"
و المطر برا كان عم ينزل، يغسل الشوارع…بس ما غسل الحزن يلي تسلل بهدوء لقلوب الاثنين.
لأن اللي صار ما كان نهاية قصة،كان بداية ذنب طويل،
و حبّ…ما انولد من شغف، بل لبس ثوب التضحية.
شادن
ماصدقت حل اليوم التالي ، خبرت الياس عن الموضوع، فأصر يكون حاضر لو من بعيد، مابعرف ليش! بالبداية رفضت و بعدها اضطريت وافق، خبرته عن المكان ليتواجد قبلنا أو بعدنا.
رحت أنا و ريم، و كنت مصمدة شوية مصاري، اشتريت للبنات تياب من محل ريم ، و أكلات طيبة و لعبة لكل بنت، و رحت والفرحة مو سايعتني، و كل الطريق عم نضحك أنا و أختي و نتخيل اللحظة كيف رح تكون.
ماهمني المطر ولا البرد، و قلت أكيد رح توقف المطر، أكيد الغيوم رح تحن عليي و تنزاح و السماء رح توقف بكاء لو نص ساعة بس.
وصلنا الحديقة و قعدنا بمكان مظلل بالقرميد، و كل شوي انظر للساعة ، و آخر مرة رفعت راسي فيها كان الياس جالس مواجهنا.
و سبحان الله، لأنه عالم بحالي و بشوقي ولهفتي، أمر المطر توقف شوي.
و على الوقت، وصلوا البنات مع ابوهم.
وقفت ، و ماقدرت أنطر ليوصلوا لعندي، و ركضت ناحيتهم بكل سرعتي و حضنتهم بقوة
بوستهم ألف مرة، مسكت وجوههم و خدودهم و رغماً عني نزلوا دموعي، أدهم كان واقف وراهم، و ريم ورايي.
من لهفتي، ما لاحظت إلا بعد برهة، بناتي كانوا جامدين، ما بادلوني الحضن ، ماقالوا ولا كلمة واحدة!
قلت يمكن بسبب المدة الطويلة يلي ماشافوني خلالها، جلست على كرسي خشبي و شديتهم لعندي و أخدت الأكياس من ريم، قلت بصوت عم يرجف:_ شوفوا ماما، شوفوا شو جبتلكم!
هي لملااكي، و هي لسنا قلبي و عمري!
ماتحرك جامد، ولا شعرة فيهم ، ما عبروا التياب، حتى عيوني تجاهلوا النظر فيهم!
كابرت على الوجع يلي بدأ يتسلل لداخلي،
طالعت الألعاب و ورجيتهم اياهم، و الغصة بدأت تستحكم صوتي:_ شوفوا ماما، هدول الكن، والأكلات الطيبة الكن، بس ردوا عليي! حاكوني ماما قولوا أي شي!
جلست ريم جنبنا وقالت:_ شو ياخالتي، ماما مشتاقتلكن!، ما اشتقتولها أنتو؟
البنات بقيوا ساكتين، قالت ريم:_ طيب و أنا...خالتو رمروم؟ ما اشتقتولي، ما حابين نلعب غميضة متل زمان؟
ملاك ، وجهها الأبيض الحلو، بدأ يتحول للأحمر، وشوي شوي قلبت شفتها و صارت تبكي ، تركتني و ركضت لعند أبوها، تمسكت برجله و بكيت، و بعد لحظات حتى سنا نزلت عن حضني بهدوء و بعدت عني وراحت لأبوها و بقيت أنا مذهولة، و الدمعة واقفة على طرف عيني.
ما تمالكت حالي، وقفت بانفعال و قلت له بغضب:_ شو عامل بالبنات؟ ليش هيك مجافييني!
جاوبني ببرود قاتل:_ ولا شي، يلا بابا خلينا نمشي.
صرخت بوجهه:_ شو فيهن بناتي! شو معبي براسهن عليي؟!
ضحك بسماجة و قال أثناء مغادرتهم:_ سلميلي على صاحب دار النشر
و غادر وهو عم يسخر مني، قعدت بانهزام على الكرسي، و قطرات المطر بدأت ترتمي على الأكياس، ببطء بينقر الراس!
و لكن ريم ما بقيت ساكتة، لحقته، نادته بصوت عالي، رفعت راسي و نظرت لها، بمجرد ما التفت لعندها، ناولته صفعة، جمدته بمكانه غير مستوعب، قالت بعدها بغضب:_ هي مشان تتعلم تعبي براس طفلتين صغار على أمهم.
لكن أدهم ما بينضرب، رفع يده ليرد لها الصفعة، وقفته و صرخت بوجهه:_ أقسم بالله بشتكي عليك ، عم تتهجم على بنت ؟
نترت يده و رفعت سبابتها مهددة بوجهه:_ ماعاش يلي يئذي أخواتي فهمت؟ و الولد لأمه.....و الباقي عندك!
#يتبع
#حب_البنات
#فيلوفوبيا
#الجزء_الحادي_عشر
ريم
مرق شهرين، والشتاء لساته مصر يرسم كل لوحات حزنه بهالموسم، وكأنه موسمه الأخير و رح تنتهي الشتاءات من الحياة.
خلف الزجاج، وقفت و السماء رامية حبالها للأرض، كفها على الزجاج و أنفاسها الدافية تكاثفت عليه، وجدت حالها بجنون المراهقات، عم ترفع سبابتها و تكتب "كريم" على الزجاج، تتأمل الاسم، تبتسم، و تمسحه بهدوء.
ريم ماكانت بتعرف أنه صوتها حلو، و لابتعرف انه جورج أثر عليها و خلاها تغني بنعومة بدون تنشيز، دندنت وهي محتضنة نفسها:
" تعودنا عليك وفليت
ماعدت علينا طليت
ضحكوا علينا أهل البيت
شمتوا فينا قرايبنا
يا طل علينا مشوار
يا اما و لو انو كاتبنا
دبنا ع غيابك دبنا
خطي حاجة تعذبنا"
تجمعوا بعيونها دموع، بس ما سمحت لهم ينزلوا، و لا سمحت للغصة تخنقها،تآلفت معهم و تعايشت حت صاروا جزء منها.
ولكن يبدو أنه صدى الأغنية وصل لعند كريم، رغم البلاد و المسافات، لقته عم يتصل فيها.
ترددت، قلبها خفق بقوة، بس الشوق غلاب، و بشوية شقاوة،قفلت باب المحل و ردت، و أحلى كلمة " ألو" انصبت بسمعها.
ابتسمت بعذوبة:_ ألو
_ عم تسمعيني؟
ردت بهدوء:_ عم اسمعك
همس:_ اشتقتلك كتير
زفرت نفسها وقالت:_ مو على أساس ....قصتنا خلصت؟
قال ممازح:_ طلع في جزء تاني
غمضت جفونها، سكتوا و مابقي إلا صوت الأنفاس، ليقول بعد دقيقة كاملة:_ ماعم أقدر شيلك من بالي
تنهدت و قالت:_ لا ترجعنا لنفس الدائرة المغلقة، خلينا بعاد أحسن، ماصدقت ارتحت من عذاب الضمير.
قال بخفة:_ و ضميرك ما عم يعذبك مشاني؟
جاوبت بدلال خفيف:_ أنا ما طلبت منك تحبني.
ليقول بإصرار:_ و حبيتك....شو الحل؟
زفرت نفس طويل، همت لتنطق لكنه سبقها:_ شوفي، حالة التخدير بوجودك مو مأثرة عليي هلق، ريم....متل مو أنا مابحب مرتي و هي كمان ما بتحبني، و حبك الي ، مارح يخرب بيتي متل مانك مفكرة.
مرتي مستغنية عني، و مانها بحاجتي كتير، أنا بحياتها فيزا كارد، مو أكتر.
قالت ريم بمكابرة:_ طيب حاول تصلح
ضحك بخفة:_ حاولت ،و عم حاول صدقيني، بس رغم مرور مدة على سفري، صدقيني عم حسها أسعد امرأة بالكون، صارت تضحك و تروح مشاوير، ولا كأني عم أتغرب حتى أمن حياتها و حياة بنتنا
بلحظتها ضحكت ريم بصوت عالي، حتى دفعته هو للضحك،قالت:_ كذبت الكذبة و صدقتها كريم؟
_ ما بتمرقي كلمة؟ يا ستي أنا هربت من حبك، مابنكر، بس بالنسبة الها انا سافرت لأمن حياتنا، و صدقيني الحياة هون صعبة و مابترحم.
سكتت من جديد، رسمت على الزجاج قلب، قال بنبرة أحن:_ الواحد أوقات مابيكون بده أكثر من أنه يحكي مع حدا بيفهمه، أو حدا يسأله : تعبان؟ بس هيك
ريم، أنا بعرف أني عم حاول أسحبك لطريق أنت ما بدك تكوني فيه، بس أنا.... بحس معك بمشاعر ماحسيتها مع حدا.
مرتي يلي أنا وياها عشرة عمر، صدقيني مابحس معها بربع الراحة يلي بحسها معك.
و بفهم منيح أنك رح تقولي : هذا هو سبب ابتعادي عنَك، لأنه مرتك أحق بكل كلمة مني.
انا بعرف دوافعك و بعرف مبرراتك و معك حق بكل كلمة، بس يا بنتي أنا بحبك، بحبك و مابقدر و لا رح أقدر أبعد عنك.
أنت ما بتعرفي شو يعني الرجل يلاقي الأنثى يلي بيرتاح معها، بيكون نفسه معها، بيحكي بدون خوف، بدون مايتردد، بدون ما ينفهم غلط، مابتعرفي شو يعني الرجل قلبه يتعلق.
أنت رفضتيني بدون ماتعرفيني، رفضتيني لظروفي مو لشخصي، و هذا يلي مجنني، يمكن لو قلتي أني ماعجبتك أو فيني صفة او خصلة مو على زوقك، صحيح ما كنت رح أقتنع، بس كان اختلف الوضع.
أما أني انرفض بدون ما انعرف، صعبة كتير، خاصة مع كل شي عم حسه.
تنهدت بصوت مسموع، فتشجع و عرف أنه بدأ يعزف على وترها،كمل بهدوء أكبر:_ وسواء قبلتي أو رفضتي، قلبي حبك و خلص، وتعلق فيكي و انتهى، يعني صار محسوب عليكي.
يمكن ترتاحي من شعور الذنب تجاه مرتي، بس تجاهي...ذنبك كبير، بعدين مو مهم الورق بيقول أنا مع مين، المهم أنك تعرفي أنه قلبي و عقلي و روحي معك، و الورق ماله قيمة.
أمالت رأسها، غمضت جفونها و قالت باستسلام:_ القسمة صعبة ياكريم، و أنا مابدي كون مقام بخط كسر، 2/1!
قال ممازح:_ معناها بدك تكوني إشارة ضرب
كملت بمكابرة:_ بدي كون محايدة، أنا بحبك، و أنت بتحبني، و الباقي على الله.
_ بتحبيني؟
رجف قلبها:_ بحبك
ابتسم:_ وأنا بحبك
قالت بنعومة:_ مابيكفيك تعرف؟
جاوب بصدق:_ بيكفيني، بس من فترة للتانية بدي توكيد.
ضحكت بخفة:_ لفظي ولا معنوي؟
ضحك:_ شفتي ليش بحبك؟ أنا و أنت على موجة واحدة، عكلٍ اختاري التوكيد يلي بيعجبك.
قالت بابتسامة:_ تمام
قلدها:_ تمام.
_ باي كريم
تنهد بعمق:_ باي
سكرت الخط، وضعت الجوال على قلبها و ابتسمت، ابتسامة شقية و مولدنة، لكنها حملت كتير سعادة.
لكن هل الحب لوحده كافي؟ الحب لأجل الحب، بدون وعود بدون التزامات، فقط الانسان يشعر أنه محبوب و على قيد المشاعر، و أنه في شخص عم يفكر فيه، بدون أي مقابل.
ماحدا ببعرف حتى يجرب، لأن لكل تجربة معطياتها و لكل معادلة عناصرها.
مافي حكم جاهز أو قالب ، يخبرنا إذا كان الحب لوحده كافي، أو لازم يقترن بالارتباط الرسمي.
لأن لكل شخص تفكير متفرد، و اكتفاء بيتحقق بشروط مختلفة عن غيره.
شادن
بعد يلي صار، و بعدما انوضعت أمام أول مواجهة مع أدهم ، بدأ الخوف يطوق مساري، مجرد رؤية الجفاء بعيون بناتي، و خوفهم من الكلام معي أو رفضهم و ابتعادهم، حسسني أني مالازم ارتبط بالياس.
فتلقائياً ماعدت اتصلت فيه ولا قابلته، و شلت فكرة مقابلة أهله من راسي، و ركزت على بناتي، و كتابتي و دراستي، و رشا يلي عرسها قرب.
الغريب انه الياس ما جرب يتصل، ولا جرب يقرب مني، و كأن شهادته على الموقف يلي صار، كفته.
و يمكن أنا كان بدي ياه يتصل و يطمني، يحسسني بأنه معي أكثر، الثقل حلو، بس أوقات بيصير عبء.
جهزت لرشا، اشترينا كل مستلزمات الزواج، و رامي جهز بيته، و هي كان قلبها مو مصدق يلي عم يصير، و بالفعل رامي تغير معها، ماعاد قرب منها إلا ليعانقها، و أصر أنها تساعده بتجهيز البيت بكل تفاصيله.
راقبت الفرح بعيونها و من كل قلبي دعيت يكون حقيقي، و يدوم معها لآخر عمرها.
بس أنا ...
أنا أول مرة بحس أني بحاجة الياس، أول مرة بحس أني بدي أتخلى عن قوتي شوي و أضعف.
صعب كتير إحساس أنه في أكتر من طرف عم يتجاذبوني، و أنا مو ملاقية حالي بأي طرف.
مابدي أكتر من أني أسند راسي لشي كتف و أرتاح، بس يقول لي: ارتاحي و أنا بتولى كل شي.
و لهيك و لقلة ثقتي بنفسي، ما اتصلت بالياس لأني خفت يكون تخلى عني، بس...فكرت أتصل بأبي.
أي أبي، بعرف أنه قليل لنحكي و أنه مافي صلة قوية بيننا، بس فكرت جرب
كنت بحديقة الجامعة، رفعت الجوال و طلبته بمكالمة فيديو.
بعد كم رنة جاوب، ابتسمت:_ كيفك أبي؟
_ أهلين أبي، كيفك أنتي؟
حسيت برجفة بصدري، قلت:_ أنا مو بخير، حياتي كتير صعبة، كل شي معقد، و أنا تعبانة.
قال ببرود:_ بيعين الله أبي، الحياة صعبة عالكل، و أنا والله الضغط و السكري هلكوني.
ابتلعت ريقي:_ عليك العافية
حسيت أني غلطت، أنه مو ملجأي، حسيت بالرفض و قلة المسؤولية تجاهي، حسيت بالإهانة، كان عم يحكي عن مرضه، سكرت البيانات و انقطع الاتصال، و أنا قلبي موجوع.
ماقدرت أبكي، و لا أحكي، الدموع بدهم ينهمروا و أنا عم أمنعهم.
مشيت و مشيت، حتى لقيت حالي بدار النشر، دخلت بدون ذرة ثقة بنفسي، بكامل ضعفي، كان الوقت متأخر و الموظفين انصرفوا.
مشيت لعند مكتبه، دقيت الباب، وقال: اتفضل.
دخلت بحياء، كان خلف المكتب عم يقرأ، و مدفأة غاز جنبه، و فنجان قهوة ليساره.
لما رفع راسه، تجمد للحظات وهو عم ينظر لي، و بعدها سكر الكتاب و وقف، قال:_ أهلين شادن، تفضلي.
مشيت ، ماقعدت، وصلت لخلف مكتبه حتى صرت مواجهه، قلت بصوت مرتجف:_ ليش ماعم تتصل فيني؟
ابتلع ريقه، قال بصدق:_ مابدي أضغط عليكي.
زفرت عدة مرات:_ أنت مو دائماً على حق.
قال بشبه ابتسامة:_ ما أخدت فرصة لأعرفك منيح.
خفضت راسي، تعاظم شعوري بالضعف، وبالحاجة للاحتواء، شعوري بالهوان و الألم، لقيت عيوني عم تدمع، شديت أصابعي الباردين على بعض، حسيت بالحاجة أني أخلع قناعي أمامه، و أمامه هو بالذات.
بعد لحظات رفع لي وجهي، و أخذ ينظر لي بطريقة غريبة عني، بإبهامه مسح دمعتي، وقال:
_ اسمحي لنفسك تنهاري، و أنا موجود لأجلك
كابرت و قلت:_ مجرد وجودك عقد الوضع، صرت خاف قول أني موافقة.
ابتسم بشكل موارب، مسك يدي وقال:_ الوضع معقد بوجودي و عدمه، على الأقل إذا كنت معك بتستندي عليي، و بحارب عنك شوي.
غمضت جفوني للحظات، بعدها سألت ببراءة:_ أنت بتحبني؟
هالمرة ابتسم من قلبه، قال:_ لا، داخل على طمع.
ضحكني، و كفه شدت على كفي، قال بنبرة هائمة:_ لوعتي قلبي يا شادن، ماتوقعتك صعبة هالقد، قولي أنك موافقة. بدك تحسبيها ضغط احسبيها، أنا بحبك و بدي ياكي توافقي عليي.
مسك يدي الثانية، نقلت نظراتي بين مقلتيه، حسّيت براحة مفاجئة، متل حدا عطشان شرب مي باردة، بس بنفس الوقت… خاف يطلب كاسة تانية
قلت بصوت واطي، أقرب للاعتراف من الجواب:_أنا تعبانة… و يمكن موافقتي هلق بس لأني محتاجة ارتاح شوي.
شدّ على إيدي أكتر، و قال بدون فلسفة:ما تكوني قوية هلق، ولا تاخدي قرار العمر.
بس كوني صادقة
رفعت عيوني لعنده، و لأول مرة ما حسّيت حالي مطالبة أثبت شي، ولا أشرح شي، قلت بعد تردد:_
موافقة…
ابتسم، ابتسامة هادئة، مو انتصار، أقرب للوعد، وقال:_الخوف مو عيب.
ما بعرف كيف ولا ليش، لقيته عم يحضنّي.
حسّيت بصدره يعلو ويهبط، و سمعت أنفاسه، و لأول مرة من فترة طويلة…
سمحت لحالي أرتاح.
رفعت إيدي وحطّيتهم على ظهره، وغمضت جفوني.
السكينة إجت…كانت على شكل استراحة.
همس بأذني:_بوعدك حاول قد ما فيني…و إذا خفتي، خبريّني… مو تهربي.
ما رديت، ماكان عندي شي قوله، يمكن لأني مو متأكدة من شي، لكن ابتسمت، و احتفظت بالللحظة لأطول وقت ممكن.
بعد لحظات بعد عني، نظر بعيوني بابتسامة، رفع كفه و احتضن خدي و قال:_ عم توقعيني بفخ كبير، كنت مفكر غلط أني أفصح عن مشاعري كلها أو رغباتي ،أو حاول أقنعك بحالي.
بس اتضح أني غلطان، و أنك بحاجة كتير صدق لتأمني و تآمني.
شادن....أنا مابدي منك شي، لا تتغيري ولا تتخلي عن أهدافك و أحلامك.
بدي ياكي بس تتعلمي تستندي عليي، أنا بحبك....وحب مو عادي أبداً، و متلهف أسمعك لساعات و أعرفك أكتر و غوص فيكي أكتر، أنتي أنثى ما بتشبه غيرها.
لهيك بس اسمحي لي جيب أهلي و أتقدم لك، خلينا على بينة من البداية، و لأنه إذا بقينا بالظل أدهم رح يقوى عليكي و يتواقح أكثر، لكن النور قوة.
مابعرف ليش رنت بأذني جملة رشا" ماحسيتي بدفاه" الدفء يلي بكفه....رهيب...غريب ...و حلو.
مابعرف ليش عم حس بضعفي! يمكن قوتي انتهت فعلاً، وصار لازمني مصدر قوة جديد.
تنهدت، و أومأت موافقة، و على عكس أبطال الروايات، ما طار من الفرح أو رجع عانقني، اكتفى بالابتسامة، كانت أصدق ابتسامة بشوفها.
رشا
كل شي مثالي و متل ماحلمت و أكتر، البيت و الفرش و أغراضهم، كله من أحلى ما يكون.
كانوا ببيتهم، هي و رامي، عم ترتب أغراض مطبخهم، وهو منشغل بتركيب الثريا بغرفة الجلوس.
انتهت و حضرت فنجانين قهوة و توجهت لعنده، نزل عن السلم و جلس و تناول الفنجان منها بابتسامة لطيفة.
جلست جنبه، تأملته للحظات، وقالت:_ بدي اسألك سؤال
شغل سيجارة و قال:_ سألي
قالت بجدية:_ هداك اليوم، وقت تصالحنا، أنت ليش اخترتني؟
التفت ناحيتها، نظرلها للحظات وقال:_ مابعرف، حسيت أنه يلي بيربطني فيكي، أكبر و أعقد من مجرد حب.
نظرت لفنجان القهوة بصمت، ترك فنجانه و سحب فنجانها من يدها و قال:_ أنت مابتحبي القهوة.
قالت بابتسامة:_ بشربها مشانك
مسك يديها:_ مانك مجبورة تتحملي شي مابتحبيه مشاني.
رفعت أكتافها بصمت:_ هي أنت، عم تتحمل مشاني، بدون ماتعرف ليش.
قطب حاجبيه، فأردفت:_ ياخوفي، إحساسك تجاهي يتبخر مع الوقت، تكتشف أنك ضحيت زيادة. تصحى بيوم ندمان، و تقول ياريت بوقت ماينفعك فيه الندم.
زفر نفس طويل، ضحك بخفة و قال:_ أنت .....مابتعرفي أنت شو بالنسبة الي، عم تتكهني من عندك، و تطلعي بأجوبة لأسئلة براسك، مابعرف لا سببها و لا حتى بعرفها هي.
لكن يلي بعرفه، أنك حفرتي لحالك مكان بقلبي، و مستحيل أندم بيوم لأني اخترتك.
مسح على شعرها وقال:_ شو بدي أكتر من بنت، حلوة و لطيفة و بتحبني قد الكون؟
قالت بنبرة حزينة:_ بس أنت .....ماعدت...قربت مني!
شد شفاهه بندم:_ أنا آسف، أنا شوهت مفهومك عن الحب، صدقيني مافي حاجة قرب منك.
سألت ببراءة و عفوية:_ ليش؟
ضحك عليها بخفة، وقال:_ بتعرفي أنه اسئلتك بتنم عن طيبة زايدة عن الحد؟
_ شو فيها اذا كنت طيبة؟
احتضنها لكتفه وقال:_ مافيها شي، بس بخاف عليكي من هالطيبة، بدي ياكي تكوني أقوى، و يشتد عودك أكتر من هيك.
قالت بابتسامة:_ شو بدي بالقوة و أنت جنبي؟
مسح على شعرها وقال هو عم ينظر عبر النافذة:_ ضروري تكوني أقوى، الدنيا ما بترحم يا رشا.
شدت يديها حوله و قالت بطفولة:_ عندي ياك، أنت قوتي و كل حياتي.
بعدها عنه بهدوء،قال:_ بتزعلي إذا حكينا بصراحة؟
اومأت برفض، فقال:_ أنت متعلقة فيني زيادة عن اللزوم، برغم أنه هالشي بيرضي غروري، بس....مو صحي الك أبداً
زفرت بملل:_ بلشت تحكي متل شادن، ياحبيبي أنا بحبك و متعلقة فيك و مبسوطة بهالشي!
شد شفاهه، ابتسم، مسح على خدها وقال:_ الله يقدرني لأسعدك و عوضك عن كل شي.
قالت بشقاوة:_ بقيان للعرس 10 ايام، هي آخر مرة منقعد سوا فيها، مشان تشتقلي.
قال بنصف ابتسامة:_ رح اشتقلك، أصلاً اشتقتلك من هلق.
شادن
تسارعت الأمور بشكل رهيب، على عكس المتوقع أهل الياس كانوا لطفاء ، و محترمين لأبعد الحدود، أمه و أبوه وقورين، متحضرين، لدرجة حسسوني أنهم فخورين باختيار ابنهم.
ارتحت و شي بداخلي كان مقبوض، ارتخى أخيراً.
وبيوم عقد قراننا، كل شي كان هادي، مرتب، و بدون أي صخب.
لبست فستان شتوي، و تركت شعري مفرود و ما استخدمت إلا القليل من مساحيق التجميل.
أخواتي تجهزوا و كانوا فرحانين كأني أول مرة عم أنخطب، جهزنا ضيافة فاخرة ، وحضروا ضيوفنا مع الشيخ على الوقت.
اليوم.....رح أرسم أولى خطواتي على درب رجل ، و يبدو درب آمن.
كان الياس ببذلة كحلية ، مكوية بعناية، و حامل باقة ورود بيضاء. مابنكر قلبي ارتجف، و ارتبكت كأني أول مرة بشوفه.
و بناتي كانوا حاضرين بذهني كل الوقت، لكني وعدت نفسي و وعدتهم بسري أنه هالخطوة لأجلهم، و وجود الياس رح يعينني على استعادتهم.
جلسنا، وجلس الشيخ بالوسط و أخذ يسجل بيانات هوياتنا، و يدقق بالأوراق.
أنا ليمين الشيخ و الياس ليساره، و كل شوي ينظر لي و يبتسم.
و عائلة الياس كلها كانت موجودة والعيون أغلبها عليي. مما أحرجني كتير.
كأننا مثل ميزان، كفة طابشة، وكفة خاوية، عيلته كلها، و عيلتي مكونة من شخصين و أنا ثالثهم.
قال الشيخ:_ هل تقبلين الياس بن ..... زوجاً؟
نظرت لالياس، انمسحت ابتسامته كأن خاف أني أرفض، بلش قلبي ينتفض، و همس لي صوت براسي: إذا خايفة تراجعي
زفرت و ابتلعت ريقي و قلت بعدما استجمعت نفسي:_ أقبل
قال الشيخ:_ إذاً قولي: زوجتك نفسي على مهرٍ معجله....و مأجله.....،بشهادة الشهود و الله خير الشاهدين
رددت من بعد الشيخ، و التفت لالياس وقال: و أنت قل: و أنا قبلت الزواج بك على المهر المذكور، بشهادة الشهود والله خير الشاهدين.
بصوته العذب، قال الكلمات و كأنها عهود، ختم كلامه بابتسامة، و انتهى الشيخ و قرأنا الفاتحة، و وقعنا على الأوراق.
ارتفعت زغرودة أمه و أخته، و نهض الشيخ و غادر، ليوقف الياس و يمد يده ليمسك يدي ويوقفني مقابله، كانت ابتسامته هالمرة مختلفة، بتشبه النصر، و ابتسامتي بتشبه الراحة.
أمسك يدي التنتين، قرب مني، و قبل جبيني قبلة طويلة، خجلت....ذبت من الخجل خاصة أمام نظرات يلي كانوا معنا.
شغلت ريم أغنية، و اقتربت أمه حاملة علبة الخواتم، لبسني الخاتم الموشى بالألماس، ولبسته خاتمه الفضي المنقش بنقوش ماقدرت ميزها فوراً.
زغردت أمه من جديد، و قربت لتهنينا، و لحقوها أخواته، و ريم ، لكن رشا كانت واقفة على الشباك والقلق بادي عليها.
جلسنا أنا و الياس، و دار بيننا حديث هادي و خافت، همس لي:_ بتستحقي كل لحظة انتظار قضيتها بحياتي
ابتسمت بخجل:_ حتى الغزل عندك مختلف
مسك يدي و وضعها بين كفيه:_ طبعاً.
ابتسمت و ماقدرت اتجنب النظر لرشا، فنظر لها و قال:_ هي رشا صحيح؟
أومأت موافقة، قلبي انقبض، فقال:_ مانها طبيعية
قلت بصوت خافت:_ المفروض خطيبها يكون معنا، بس تأخر.
نظر لي، قال:_ قومي تطمني عليها.
نظرت لأهله لبرهة:_ مو حلوة قدام أهلك.
ابتسم:_ ما عليكي من أهلي، قومي تطمني على أختك
كأنه الفرج إجاني، مشيت لعند رشا، كانت ناطرة عالشباك، إيديها عم يرجفوا، لمستهن و إذ هن قطع جليد، قلت بقلق:_ رشا، حبيبتي شو فيكي؟
طلعت فيني رشا و ماقدرت تخفي خوفها و دموعها:_ رامي، ما اجا ولا عم يرد على جواله!
تسرب خوفها لقلبي:_ الغايب عذره معه ، لا تقلقي.
أومأت، وعادت للنظر عبر الزجاج، قلبي ما ارتاح أبداً، حتى ريم حست أن الوضع مو طبيعي، وقفت معنا ولاحظت حال رشا.
رن جوال رشا: رامي.
ردت فوراً:_ رامي! وينك أنت حبيبي؟
صمتت.....اكفهر وجهها، و امتقع لونه:_ أي....أنا خطيبته
الي كان على الخط قال كلام، خلا رشا تجلس على الكنبة بانهيار، للحظة حسيت أنفاسها وقفت، وبعدها رجفوا يديها بشكل هستيري، مو رجفة ، ارتعاد، كأن زلزال مر فيها.
وقع الهاتف على الأرض، عرفت أنه مصيبة وقعت، أخذته:_ ألو....رامي؟
تمنيت أسمع صوته، تمنيت من كل قلبي يكون صوته هو يلي على الطرف الثاني، لكن الصوت كان غريب، و بارد.
" رامي تعرض لحادث على الطريق السريع، إصابته كانت جسيمة و ماقدرنا نعمل شي، وصل على المشفى ميت، العوض بسلامتكن"
نزلوا دموعي، و رشا كانت عم ترتعد بطريقة بتخوف، قربت منها، حضنتها، و الكل لاحظ يلي صار، قرب الياس، بس الأصوات كلها غابت، بعدما صرخت رشا، و غابت عن الوعي.
بلحظتها عرفت كيف الأقدار، بتكتب حياة جديدة، و و بتطوي صفحة حياة ، بنفس اللحظة.
#يتبع
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
`
[٢٠/٢، ٩:٠٨ م] null: *؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم حب البنات`*
*❴🔢❵الـــبـــــــــــ❴7️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
Stories 📖:
#حب_البنات
#فيلوفوبيا
#الجزء_الثاني_عشر
شادن
كل شي اختبار، الألم والفرح ، النجاح والفشل، الفقر و الغنى، الحياة و الموت، اختبار!
و رشا تعرضت لأقسى أنواع الاختبار "الفقد" .
و مو أي شخص، رامي يلي اجتمعت تحت اسمه كل معاني وجودها، و لما فقدته قسرياً ، فقدت كل شي معه، أوقات بحلل الموضوع بيني وبين حالي، أنها ماتعلمت الدرس بضربة خفيفة، فكان ضروري تتعلمه بضربة قاسية، و تتخلى عن تعلقها المرضي فيه.
لكني بستغفر و براجع حالي، الأعمار بيد الله، و رامي عمره انتهى، و منيته أجا وقتها.
مافي كلام بيوصف حالها، أيام العزاء كانت عذاب حقيقي، الي و لريم و حتى الياس، حالة انهيار عصبي صابتها.
و رفض قاطع لحقيقة موته، ماتقبلت الأمر لشدة تعلقها فيه.
و متل أي حدا مرق بتجربة الفقد، رشا مرقت بمرحلة: الإنكار.
ببساطة شديدة، أنكرت موته، وما اعترفت على حدوثه من الأساس، أنا بعذرها، و بفهمها، هي تصرفات مو إرادية، عقلها اللاواعي رافض الحقيقة و منكرها.
ثاني أيام العزاء، صحيت بكير على غير عادتها، شربت معنا القهوة، و بقيت ساكتة، حتى نطقت بالنهاية:_ اليوم رامي إجا لعندي بالليل
انذهلنا أنا و ريم، نظرنا لبعض، وبعدها لرشا، قالت ريم:_ كيف إجا؟
لقينا رشا بدأت تنهج، نزلوا دموعها، وقالت:_ مابعرف، كنت ممددة على جنبي، حسيت أنه ورايي و عم يحضني، حسيت بدفا فجأة، وريحته غمرتني، قال لي: لاتزعلي رشا، أنا موجود وما رح أتركك.
نمت بعدها، غفيت بعدما حسيت بأمان لأنه معي.
قمت و حضنتها،ترحمت عليه ريم، قالت رشا بصوت مخنوق:_ رامي ما مات، رامي معي، والله العظيم عم حسه معي طول الوقت. لا تقولي هيك، لا تترحمي عليه، رامي عايش.
مسحت على ظهرها، و طمنتها:_ أي حبيبتي، كلامك صح، روحه معك، أكيد رح تكون روحه معك و حواليكي، مو أنتي حبيبته؟ مو أنتي رشا المدللة عنده؟ أكيد مارح يتركك
هزت راسها، و سكنت.
مددتها على حضني، و قرأت قرآن عليها حتى تهدى سريرتها، وانا قلبي عم يتقطع، قربت مني ريم و همست لي:_ ليش هيك حكيتي؟ بدك تجننيها بزيادة؟
قلت بهدوء:_ لا ، بالعكس هي هيك مارح تحس انها عم تتوهم، و يمكن عنجد تكون روحه حايمة حواليها.
همست ريم بانفعال:_ بيكفي جنان، روحه راحت لربها، لاتشجعي أختك تتمادى بحزنها، لازم تتقبل موته بأسرع وقت!
نظرت لريم، وأول مرة بغضب منها تجاه الموضوع:_ أنا ماني طبيب نفسي! و إذا هي بترتاح بهالكلام رح ريحها
زفرت ريم بتعب:_ هيك عم تأجلوا الوجع مو أكتر
نظرت لرشا الغفيانة وقلت:_ مو مهم، الهم رشا ما تنهار.
مرق أسبوع هادي، و الغريب أنه كان هادي، و رشا رجعت تتصرف بطبيعية، تصحى بكير، تتحمم و تمشط شعرها و تحضر فنجانين نسكافيه، تحطهن على الطاولة و بعدين تبتسم و تقول:_ نسيت، مابيحب يشربها الصبح، بيحب القهوة.
بس ما ترمي الفنجان، ولاتشرب فنجانها، تتركهم و تدخل غرفتها من جديد.
تبتسم و تحكي، بس ابتسامة باردة،متل الشمس بنص الشتوية، بتضوي بس مابتدفي.
ريم كانت متوترة منها كتير، و ياما رغبت بمواجهتها بالحقاىق، لدرجة أنها فكرت تورجيها صورة رامي بعد الحادث، بس أنا منعتها، خفت رشا تفقد عقلها، قلت خليها تعيش المراحل كلها و قد ما طولت أنا معها.
الإنكار ما بيجي فجأة، الإنكار متل ضيف ثقيل، بيتسلل بهدوء و بيتصرف كأنه صاحب البيت.
بمرة دخلت غرفتها لقيتها عم ترتب أغراض، قربت كانوا ثياب لرامي، تذكرت أننا اشتريناهم وقت جهزنا الها، سألتها بابتسامة:_ شو عم تعملي رشا؟
جاوبتني بهدوء:_ عم رتب غراض رامي و علقهن بخزانتي، مابيحب يشوفهم معجوقين.
قلبي وقف! مو لأنها منكرة لموته، لأنها ناطرته يجي!
قلت بصبر:_ حبيبتي رشا، بتعرفي....
رفعت يدها و سكتتني و وجهها للخزانة قالت بهدوء مخيف: _ بعرف شو بدك تقولي، بس خلينا نترك هالموضوع هلق.
وهون فهمت.
هي مو ناسية.
ولا متوهمة.
هي رافضة.
الإنكار ما كان إنو تنسى موته…الإنكار كان إنها تختار تعيش كأنه مؤقت.
كأنها عم تقول: “رح عيش شوي هيك، وبعدين الله بيدبر.”
ولأول مرة، حسيت بخوف حقيقي.
من اليوم يلي تسقط فيه الحقيقة دفعة وحدة.
لأن الإنكار، مهما طال،ما بيشفي…هو بس بيمهّد لضربة أقسى.
وساعتها،ما بعرف إذا رح أقدر أحميها…
ولا حتى أوقف جنبها بدون ما أنهار معها.
و بعدها تحولت من الإنكار للغضب، عرفت هالشي بمواجهة معها، صدفة أو مو صدفة، المهم أنها واجهتني لأول مرة، كان بدي شاحن، دخلت دور بغرفتها، فتحت الدرج و لقيت دفتر صغير، غلافه مهري لكثرة الاستخدام، فتحته وكان خط رشا:
" اليوم رامي تأخر" (تاريخ وفاته)
" رامي اعتذر عن التأخير و جاب لي ورد" (اليوم التالي)
" اليوم أنا و رامي حكينا كتير" ( بعد أسبوع)
" كنت قاعدة مع أخواتي، رامي همس لي " بحبك"
عبارات كتيرة، ذهلتني فعلاً.
رفعت راسي و لقيتها واقفة مواجهي، عم تنظر لي ببرود، خبيت الدفتر كأني سرقت شي مو الي، قالت لي:_ لقيتيه؟
قلت بارتباك:_ كان بدي شاحن و لقيت الدفتر
قربت مني:_ بسجل عليه مشان ما انسى
قلت بارتياب:_تنسي شو؟
_ مواعيدي مع رامي
صمتنا ،تأملتها ،زفرت و قلت بحنان:_ رشا...اليوم بيصر له شهر
قالت بهدوء:_ شهر شو؟
جاوبتها:_ شهر من الحادث
ضحكت، ضحكة مرتجفة، مهزوزة، وبعيون بتشبه كل شي إلا للضحك، قالت بهدوء:_ ليش مصممة نحكي بالموضوع؟
قلت بشفقة:_ لأنك عم تستني حدا مارح يجي
قاطعتني بنظرة حادة، دارتها بنبرة جامدة:_ لاتحكي هيك
قلت:_ رشا....را
قاطعتني بحدة وصرخت:_ قلت لا تحكي هيك!
قربت و خطفت الدفتر و قالت:_ رامي وعدني مايتركني،رامي مابيكذب!
قلت بشوية انفعال:_ الوعد ما بيوقف بوجه الموت
أول مرة بتضربني بحياتها، ناولتني صفعة قاسية، ما آلمتني بقدر ما وجعت قلبي، قالت:_ موت؟
مين قال أنه مات؟ أنتوا شفتوه؟ شفتو الحادث؟ شفتوه عم يموت؟ ولا بس قررتوا انه مات؟
سكتت ،ما كان عندي جواب.
صرخت: _ إذا راح… ليش بحس فيه؟
ليش بشوفه؟
ليش عم يحكي معي؟
قربت منها: _ لأنك موجوعة.
دفعتني: _ لا! لأني بحبه!
وانفجرت بالبكاء. بكاء حاد، مفاجئ، متأخر.
وقعت على الأرض، ضمت ركبتها: _ إذا اعترفت إنه مات…
شو ضل إلي؟
وهون فهمت.
المواجهة الأولى ما كانت عن موته…
كانت عن فراغها بعده.
بعدها،الإنكار ما اختفى… بس تشقق.بطلت تحكي عنه بالحاضر دايمًا.
صار يطلع منها: _ لو كان هون…وبعدين تنتبه، وتعض شفايفها.
بدأ الغضب…مو علينا أول شي. على الأشياء.
كسرت فنجان كان يحبه. صرخت على ريم بلا سبب.
وبيوم…
سمعتها عم تحكي لحالها بغرفتها:
_ ليش رحت؟ليش استعجلت؟ليش وعدتني؟الغضب كان يطلع فجأة،
ويروح فجأة.
مرة قالت: _ الحادث قضاء وقدر.
وبعدها بدقيقة: _ لو ما طلع بهالطريق… لو تأخر خمس دقايق… لو...
صارت تفتش عن مذنب.الطريق ،الساعة، الدنيا.
وبآخر الليل…
كانت تقول بصوت مكسور: _ أنا غلطانة… تعلقت فيه زيادة.
الغضب الحقيقي ما كان صراخ.كان لوم متعب، تدوير بلا نهاية.
وأنا كنت عارفة…نحن هلق دخلنا أخطر مرحلة، لأن الإنكار كان يحميها.
أما الغضب رح يعرّيها تماماً.
وكنت خايفة من اليوم يلي يتحول فيه الغضب
لسؤال واحد ما إله جواب:
“ليش أنا؟”
و ذروة الغضب تجلت بمواجهة مع ريم، كانت رشا عم ترتب أغراض على الطاولة،أغراض طلبتها بنفسها من أمه و وصلها أخوه لبيتنا
قعدت ريم جنبها وقالت: شو عم تعملي؟
جاوبتها:_ عم رتب
_شو؟
قالت رشا بجمود بيخوف:_ حياته
محفظته، مفاتيحه، ساعته، عطره، قميصه يلي بيحبه.
قالت ريم:_خلينا نلمهم، مافي داعي ترتبي شي.
ضحكت رشا بسخرية:_ كلكن بتعرفوا شو اللي اله داعي إلا أنا
رفعت الساعة بوجه ريم:_ هي الساعة كان يلبسها لأني بحبها! و هاد مفتاح بيتنا
قالت ريم بقوة:_ بيت ما سكنتوه ولا رح تسكنوه!
صرخت بوجهها: لاتحكي هيك! لا تمحيه! لا تلغيه!
انفجر بركانها، رمت الساعة و دوى صوت انكسارها،و رمت المحفظة ، انفتحت و وقعت صورتها منها.
صرخت: _ أنا السبب!أنا تعلقت! أنا خنقته بحبي!
شهقت، كملت: _ لو كنت أقوى…لو ما خليته يكون كل شي…كان هلق عايش!
سحبت ريم نفس، حاولت تمسكها: _ الموت مو عقاب.
صرخت بأعلى صوتها: _ لا! عقاب إلي!
وقعت عالأرض: _ الله أخده مني! ليش ما أخدني أنا؟ليش أنا ضليت؟
الغضب تحول لبكاء…
وبعدين رجع غضب.
رفعت راسها، صرخت للفراغ: _ وعدتني رامي! وعدتني!
ضربت الطاولة.الكرسي وقع. صرخت: _ جبان! تركتني!
سكتت فجأة.كأن الكلمة صدمتها. فتحت عيونها، همست: _ لا…
مو جبان… أنا الجبانة…أنا يلي خفت عيش بدونه.
جلست ريم جنبها، ضمتها.جسدها كان عم يرجف…وسكتت.
ما عاد في صراخ.بس دموع نازلة بصمت، متل مطر تعبان.
عرفت…
الغضب وصل قمته.
وهلق، رح يبلش الوجع الحقيقي.
بعدها....دخلنا مرحلة المساومة، رشا ماعادت حكت عن رامي بصيغة الحاضر، اعترفت بجزء من الحقيقة، أنه راح، بس النص التاني لسا كان بعيد عن اعترافها.
رشا هديت كتير،بطلت تصرخ، وبطلت تبكي، عالاقل قدامنا
أول شي عملته أنها تحجبت،ولما سألتها ليش قالت:_ بلكي الله بيرضا عليي
قلت لها:_ الله مو زعلان منك
قالت بلطفها القديم:_ لا...بس انا زعلانة من حالي.
و بعدها صارت تتهجد، كتير و لوقت طويل، و تتفاوض مع ربها، عن طريق الدعاء، مرة سمعتها عم تقول:_ يارب...إذا هو عندك خليني شوفه
سكتت لحظة و كملت:_ لو بالحلم، لو بدون صوت، بس خليني شوفه، بوعدك كون منيحة
بوعدك ما أعصيك،ولا أغضب، ورجيني رامي يارب!
صارت تتصدق عن روحه، تصوم أغلب الأيام، تحرم حالها من الاكلات الطيبة، و من الابتسامة
كأنها عم تدفع " ثمن".
تحاكي أغراضه:_ شفت رامي، اليوم ماضحكت!
مرة ريم سمعتها عم تدعي:_ يارب، إذا رجعته بوعدك ما أتعلق فيه، بوعدك ما أخنقه ولا حاصره، بوعدك ما قرب منه أكتر من اللزوم، بس رجعه!
قلت لريم: _ هي أخطر مرحلة.
قالت: _ ليش؟
قلت: _ لأنها عم تعطي حالها أمل كاذب، و ما منقدر ناخذه منها…
لأنه عم يخليها تتنفس.
رشا ما كانت بدها رامي يرجع يعيش.كانت بدها ترجع هي…للحظة قبل ما يموت.
وبالمساومة،الإنسان ما بيطلب معجزة…بيطلب تأجيل الوجع.
بس الوجع…ما بيتأجل.
و بمرة و لما الليل كان ساكن كتير، كأنه محترم وجعها، طلعت من غرفتي و كانت بالصالة، بالعتمة، و شعاع من القمر ساجد معها على سجادتها.
هالمرة ماكانت عم تدعي، كانت ساكتة، و بالنهاية رفعت راسها و حطت ايدها على صدرها كأنها عم تثبت قلبها بمكانه، قالت :_ يارب
ماقالت رجعه،ولا ورجيني ياه، قالت:_ أنا تعبت! كون معي، و قويني، وساعدني.
ماقربت منها، ولاحبيت أقطع الصلة بينها وبين ربها، قالت من جديد:_أنا تايهة.....دلني على حكمتك يارب.
شهقت و زفرت نفس مرتجف:_ ماعم فاوض، ولا عم أطلب ترجعه، عم استسلم، خلص أنا استسلمت يارب.
وبعدها بكيت بهدوء، بكاء الطفل الخايف من اللعب على الهاوية.
قربت منها، فقالت لي:_ حسيتي فيه؟
مارديت، فكملت:_ هالمرة سلم عليي وراح
نظرت لي بابتسامة:_ هالمرة حسيته عم يبعد عني
أخيراً....قلبها بلش يفهم، قبل عقلها.
ضمت السجادة على صدرها و قالت:_ يمكن هي آخر مرة بحس فيه.
بعدها دخلنا بمرحلة الاكتئاب
والاكتئاب مو دموع، ولا بكاء و لاغضب ولا مساومة.
فجأة ماعادت صلت متل قبل، تصلي و تقطع، تدعي وتبكي مرة، و مرات كتيرة تنام بالنهار، و تصحى بالليل.
أكل قليل، وصمت كتير ، و شرود ماله نهاية.
صار وجودها بالبيت مثل شبح، حتى صورتها بالمراية ماعادت تعنيها.
تطلع من البيت تمشي بدون هدى، و ترجع وكأنها كانت تايهة.
والكلام صار شحيح كتير
ماعادت ذكرت اسم رامي، ولا حتى جابت سيرته، و حتى أغراضه و ملابسه ماعادت لمستهم.
بمرة قالت:_ مافي شي بيوجع.....ولا شي بيفرح!
حالة سبات رهيبة صابت عواطفها، و أنا و ريم كنا شهود بس، بدون أي قدرة على التغيير أو التدخل.
الاكتئاب بعد الفقد، هو نتيجة الاستسلام ، بعدما حاربت كتير و اعترفت بعجزها عن استرجاع رامي، اكتأبت.
و لما طالت المدة، قررنا نتدخل، عرضنا عليها مشوار صغير، خاصة و أن حر الصيف صار لاذع، ما ابدت رفض أو موافقة، طلعنا على حديقة قريبة، مو كتير حلوة لكن فيها كم شجرة، و كم لعبة للاطفال.
كان المهم عندنا أنها تشوف نور الشمس، و تيقن انه الحياة ماشية و ما وقفت.
جلست و شردت بالأطفال يلي عم يلعبوا، حاولنا انا و ريم نفتح احاديث معها، بدون فائدة، بالنهاية كل واحدة مننا مسكت كاسة قهوتها، و صمتنا.
بعد وقت مابعرف قديش، نطقت رشا بصوت مبحوح:_ الله يرحمه.
نظرنا لها بصدمة، رشا اعترفت بموته و ترحمت عليه، نزل منها دمعتين وقالت:_ رامي راح، خلص. و أنا بقيت.
جملتها حملت مقدار حزن كبير، و مع ذلك ، حاولت ابتسم، مسكت يدها وقلت:_ بقيتي، و نحن هون معك
هزت راسها موافقة، كملت بالنظر للأطفال، و خيط من الراحة تسلل لقلوبنا أخيراً
وهي إجا القبول أخيراً، من بعد عاصفة عاتية، ظنيت للحظة انها رح تقضي على أختي.
الإنكار، الغضب، المساومة، الاكتئاب، القبول، مراحل الحزن الخمسة، مرقت فيهن أختي بالترتيب
و بكل مرحلة كنت قول هي المرحلة الأخطر، لأني بكل مرة كنت شوف نسخة أضعف من أختي.
أنا تركتها تعيش الحزن بحذافيره، و ماحاولت أجبرها تطلع منه، لأن الخروج مو متل الدخول
الخروج مابيتم إلا بعد حرب مع النفس، والعقل، والإيمان.
ست شهور كاملين، عشنا فيهم على أعصابنا، نسينا الحياة و نسينا تفاصيلها، و كل همنا صار رشا.
حتى بناتي ماعدت فكرت فيهم، لأن بكر أمومتي كانت موجوعة كتير،و صدقت وقتها الأعرابية لما سألوها عن أحب أولادها إليها فأول ما قالت( مريضهم حتى يشفى) ، فكانت رشا أحب من بناتي لقلبي.
رشا
كل الغياب يمكن تلخيصه و تجاوزه، إلا غياب النفس بالنفس، والجسد بالجسد، والروح مع الروح.
ولأول مرة رح تتعلم توقف لوحدها، تستند على نفسها، و تغلف داخلها يلي كان هش، بقشرة صلبة لايمكن كسرها.
خرجت من الموت ، امرأة متآلفة مع طبيعة الحياة.....الفقدان.
متعلمة درس بأقسى طريقة ممكنة.
القبول، ماكان راحة، و لا سعادة ولا نسيان، القبول كان نهاية المعركة، و أبداً ما كان نهاية الحزن.
و مهما كان الانسان راضي عن القدر والقضاء، إلا أنه الحزن حق لايمكن تجريده منه
ولكن بيتحول لحزن نبيل.
رامي ما عاد فقد ثقيل تجره على عاتقها و يهلكها، رامي صار ذكرى نفيسة، ساكنة الصدر، ولايمكن تغادره .
ما وقفت فجأة، لكنها أصبحت أخف، ألين، و مطواعة أكثر.
و الرحلة الإيمانية و الروحانية مع هذا الفقد، هي أجمل ماحصلت عليه.
ست أشهر مرقوا ببطء، و أثر الحزن ما انمسح، لكنه صار ألطف، وبعد هالمدة الطويلة، لأول مرة واجهت الواقع، و زارت قبره.
لوحدها، و مع باقة بيلسان ناعمة، و مصحف صغير.
بحجاب أبيض ، و وجه نحيل و ملامح متعبة، و لكن بروح عم تحاول تتماثل للشفاء.
نزلت من سيارة الأجرة و خطت أولى خطواتها للمواجهة الأصعب بحياتها، كل شي ساكن، للأشجار فحيح ناعم يخفف حرارة نسمات الصيف، و القبور متراصفة، بس قلبها عرف الطريق بدون ماحدا يدله.
وصلت، قرأت الشاهدة بروية
" هنا مرقد الشاب رامي......"
ولد في 1992 و توفي في 2025
لمست الحروف، و رغماً عنها ذرفت الدموع، جلست على طرف القبر، والبيلسان بين يديها.
قالت:_ كيفك حبيبي؟ مابعرف إذا عم تسمعني أو لا.
بس بيقولوا الميت بيفرح بزيارة أهله، و أنا من أهلك صح؟
آسفة إذا تأخرت بالزيارة، بس أنا صحيت من الكابوس من جديد، و هلق حتى استوعب عقلي يلي صار.
أكتر شي بيوجع أنه الحياة ماشية، ولازم أنا كمل معها، بدونك.
بس يلي بيعزيني أنك مرتاح محل ما أنت، ويمكن شفت مقعدك بالجنة.
بتعرف أنا بحس أنك من أهل الجنة، أنا سمعت كتير دروس عن الموت ، و تعلمت كتير شغلات ماكنت بعرفها.
رامي، بتعرف في حديث نبوي:" يدخل الجنة أقوام أفئدتهم مثل أفئدة الطير"
ابتسمت بحزن:_ و أنت هيك، قلبك كان رقيق و حنون و لطيف، متل قلب طير.
أطرقت و تساقطوا دموعها على رخام القبر، أردفت بصوت مخنوق:_ هلق كل شي انتهى.
لازم بلش حياة جديدة، مافيها أنت.
هلق عرفت ليش قلت أني لازم كون أقوى، وليش الحياة ما بترحم.
بس بوعدك....أبقى حاملتك بقلبي لآخر حياتي.
تبقى رفيق كل خطوة بمشيها.
نهضت، وضعت البيلسان عند الشاهدة، و انحنت وقبلت الرخام قبلة طويلة، وضعت بعدها جبينها عليه، و ابتسمت ابتسامة مروية بالدموع.
وغادرت ببطء، بدون ماتودعه ولا تقول رح اشتقلك، لأن بعض الوداع لايقال.
و بقي رامي أثر....مابينمحى.
#يتبع
#حب_البنات
#فيلوفوبيا
#الجزء_الثالث_عشر
شادن
بعد فترة بسيطة، قدرنا أنا و أخواتي نستعيد الجلسة المسائية أخيراً، هالمرة الدنيا صيف، و شبابيك البيت كلها مفتوحة،و نحن بصالة البيت ، عم نشرب عصير بارد يروي قلوبنا.
تأملت فيهم، رشا هادية كتير، لدرجة السكون، بتضحك بخفة، و بتحكي بصوت منخفض، آثار جانبية يمكن تشفى مع الوقت، المهم أني عم شوف بعيونها راحة ولو خفيفة
اما ريم، كانت و ما زالت، لطيفة و مرحة و بتقلب كل شي لسخرية و نكتة.
كانت متمددة بحضن رشا، و عم يضحكوا نفس الضحكات القديمة.
كانوا عم يتهامسوا، عن كريم أكيد، و عن تلذذ ريم بثقلها عليه و إهماله، و تلويعه إن صح التعبير.
لساتها على موقفها، و مصرة ما تتورط بعلاقة، اللهم إلا قصة التوكيدات و مكالمة قصيرة كل فترة و الثانية.
مرة بأغنية و مرة بصورة و كتير مرات تطلب مني اكتب الها اقتباسات.
ولساتها عم تحب بس لأجل الحب، بدون كلام، بدون غزل، بدون اشتقتلك، بس طيران بفضاء الحب الواسع.
اندق الباب، تجلست ريم و قمت لأفتح،كان الياس.
الياس يلي حادثة رشا، قربته مننا أكتر مما كنت اتوقع، و صار كأنه أخ كبير لأخواتي، بيجي بأي وقت، ومابيتقيد بموعد زيارة.
بيمزح مع ريم، لدرجة انها فتحت له قلبها و حكت له عن كريم، و قريب من رشا لدرجة انها فعلاً بتحسه أخوها.
أما أنا.....فقلبي كل يوم بيذوب فيه أكتر، وعكس المتوقع....ارتحت بارتباطي فيه لدرجة مابتنوصف.
قرب مني و باس خدي بخفة:_ مسالخير ياحلو
قلت بابتسامة:_ مسالنور، تفضل
دخل وقال ببشاشة:_ مسالخير ياصبايا، والله ماحدا بيقوم
قالت ريم ممازحة:_ أي عزيز من غير قيام صهري
جلس وقال:_ جبت بوظة، تعالوا خدوا النوع يلي بتحبوه
قالت ريم:_ على طول بقول لشادن، صهري مافي منه، بس هي ما بتصدقني
جلست بقرب الياس و قلت:_ عقبال ماقولها و ماتصدقيني
ضحكت بسخرية:_ لا انا مصدقة لاتخافي
قربت و أخذت الها و لرشا، فقال الياس لرشا:_ رشا، هاتي البشارة
قالت بتأهب:_ طلع مرسوم المستنفذين؟
قال بابتسامة:_ اي نعم، صار فيكي تقدمي الفصل يلي راح عليكي
قالت باطمئنان:_ الحمدلله، أخيراً
و بعدها التفت لي، حاوط كتفي بيده وغمز لي، بادلته الابتسامة الخجولة، مد يده لجيبه و أخرج ظرف أبيض، ناولني ياه وقال:_ هي أرباحك من المعارض يلي شاركنا فيها.
أخذت الظرف و تحسسته، كان سميك و كأن المبلغ جيد، قلت بارتياح:_ بيكفوني وكل محامي؟
جاوب بهدوء وثقة:_ لساتك مصرة ما تتركيني أتكفل بالموضوع؟
اومأت بإيجاب، تدخلت ريم:_ والله مابعرف ليش المصاريف للمحاميين، و ليش فوتة المحاكم، أنا عندي حل مافيه وجع هالقلب كله.
قلت:_ أفيدينا يا أم الحلول
تربعت و وضعت ملعقة بوظة بفمها وقالت وهي عم تمضغها:_ ملعوب صغير، منخطف البنات من النادي الصيفي، و بتكوني أنت متفقة مع مهرب،او الياس بيتفق معه، بتاخدي البنات و بتهربي على لبنان و من لبنان على أوروبا، هجرة غير شرعية متل كل هالناس!
و بكل الأحوال أبونا و أمنا كل واحد ببلد، و إذا مابدك أهلك هاتيهن أنا باخدهن و بهرب لعند كريم.
قالت جملة الأخيرة و ابتلعت ضحكتها، اما الياس ضحك و قال:_ والله فكرة، بس شادن مصاري ماعم تقبل تاخد مني، ومصرة ترجعهم بنزاهة و تعب، بدك ياها تخطفهم؟
لوت ريم شفاهها و قالت له:_يعني ما عجبتك خطتي؟
قال بابتسامة:_ عجبتني ، بس إذا نفذنا بصير أنا شريك بجريمة، و شادن بتفقد كاريزما الكاتبة
رماني بنظرة حذقة و ذكية، كمل:_ والبنات بيطلعوا أذكى مننا و بيفضحونا بأول مطار
قلت و أنا عم قلب الظرف بيدي:_ أنا بدي آخدهم وجه لوجه، و أنا واقفة، و بدون لف و دوران
أخذ الياس الظرف مني، وضع جبينه على جبيني و قال:_ رح ناخدهم، بدون ما نكون ساذجين
رجعت ريم تحمست وقالت:_ يعني في حركة؟ ولا بس محاكم؟
استند الياس وقال:_ في حركة، بس بدها ذكاء و صبر
هزت ريم راسها:_ يا سلام، صبر....أحلا كلمة بتاريخ البشرية
قلت:_ الوحيدة المضمونة، شو الخطة الياس؟
قال بثقة:_ أبو البنات مفكر حاله ذكي، و عامل فيها ملاك قدام القاضي ، و برا هو العكس تماماً
مهمل و عنيف، و القضاة مابيحبوا الكذب، لهيك رح نستعمل الشاهد الوحيد ضده
قطبت حواجبي:_البنات؟
أومأ بموافقة، زفرت و قلت:_ مابدي يفكروا أني عم استعملهم سلاح!
قال بهدوء:_ ماعندنا غيرهم، ومع الوقت بيفهموا، لازم نقدم طلب تقييم الحالة النفسية للبنات و نطعن بالحضانة، رح يقعدوا مع مختصين، ويقيموهم بالكلام و الرسومات، والحلو انه الوالدين ما بيكونوا موجودين بهي الجلسات،وصدقيني انا واثق انه البناات باللاوعي رح يخبروا المرشدة انهم بدهم ياكي
و بمجرد ماتطلع النتائج، منطالب بحضانة مشتركة و السكن معك، وقتها القاضي بيوافق حتماً، القضاة بيحبوا المشاركة ، و بيكرهوا النزاع.
صمتت و فكرت بكلامه، قالت رشا بهدوء:_ وهيك منستخدم أسلوب أدهم ضده، مارح يقبل بالحضانة المشتركة و رح يخالف، وقتها المحكمة رح تسحبها منه و تعطيكي ياها، ويمكن ينحرم حتى من حق الرؤية
نظر إلياس لرشا بإعجاب صريح:_بالضبط… هيك.
أدهم ما بيعرف يلعب غير لعبة السيطرة، وأول ما يحس إنو خسرها، رح يغلط.
تدخلت ريم وهي تلوّح بملعقة البوظة:_يعني باختصار ...نخليه يوقع بفخ أخلاقه؟
قال إلياس:_نخليه يوقع بحقيقته.
سكتنا لحظة.
رفعت عيوني لإلياس، بنبرة فيها خوف خفيف ما قدرت خبيه:_وإذا تأذوا البنات نفسياً بهالطريق؟
مال عليّ فوراً، صوته صار أحن:_لا.التقييم النفسي مو أذى، هو مساحة آمنة.
أول مرة حدا رح يسمعهن بدون خوف، بدون توجيه، بدون ضغط.
رشا قربت مني، مسكت إيدي:_شادن…يمكن لأول مرة حدا رح يسألهن شو بدهن فعلاً.
بلعت ريقي.
الفكرة موجعة… بس عادلة.
ضحكت ريم فجأة:_طيب خلص، بعتذر عن فكرة الخطف. بس إذا احتجتوا مهرب بالخطة ب، أنا جاهزة.
ضحك إلياس، وبنظرة جانبية إليّ قال:_شايفة؟أنا محاط بمجرمات محتملات.
ابتسمت رغم كل شي. لأول مرة من وقت طويل، حسيت إنو الطريق قدامي واضح…مو سهل، مو سريع،بس نظيف.
وهاد كان كل يلي بدي ياه.
سكتت رشا للحظات و قالت:_ رح قوم اعمل قهوة، و بدوق صهري من الكيك يلي عملته اليوم
كنت رح انهض لكنها وقفتني بابتسامة خفيفة:_ خليكي مع خطيبك
جملتها حسستني بشي غريب، كأنها عم ترد لي الجميل، أو عم. تكون معي مثل ماكنت معها بيوم.
قعدت و بلشت فكر، ريم تحججت و قامت،وتركونا لوحدنا.
مسك الياس يدي وهمس باذني:_ الغزال الشارد
تنبهت و نظرت له، ابتسمت بحب، رفع يدي لشفاهه و قبلها وقال:_ بحب شوفك شاردة، بس بحب أكتر ...تفتحي قلبك وتحكي لي.
زفرت وقلت:_ مافي شي مهم، افكار ملخبطة
أرخى يده عن كتفي، واعتدل بجلسته، قلت باستغراب:_ لشو هالانكماش المفاجئ
قلد طريقة كلامي:_ مافي شي مهم
ضحكت بخفة، نظر لي، بدون ابتسامة، قال:_ آخ لو أدخل هالعقل
قلت بعذوبة:_ مابيكفي دخلت القلب؟
تنهد وقال:_ لا، بدي عقلك كمان
ميلت راسي بابتسامة:_ بتعرف أني بحكي لك كل شي، لشو الولدنة؟
رفع حاجبيه:_ أنا مولدن؟ إذا قلت أني بدي ادخل عقلك؟
تكتفت بابتسامة حذقة:_ إذا استنيت إذن بتكون مولدن، الباب مفتوح حبيبي.
رجع لجلسته السابقة، احنضن كتفي و شدني لصدره،قال و أصابعه متغلغلة بشعري:
_ أنت أنا
رفعت كفه الثاني و تخللت أصابعي بين أصابعه وقلت:_
" أنا من أهوى و من أهوى أنا...نحن روحان حللنا بدنا"
شد يده عليي وقال :_ بتعرفي أني بغار عليكي
رفعت راسي ، صمتت لثواني:_ من شو بالضبط؟
جاوبني بابتسامة:_ بغار إذا حسيت حدا فاهمك أكتر مني، أو حاسس فيكي أكتر مني، أو بيحبك أكتر مني.
قلت بابتسامة مطمئنة:_ و مين رح يفهمني و يحبني و يحس فيني قدك؟
رجع شدني كأنه عم يخبيني من العالم:_ أخواتك
ضحكت، وضحك على نفسه:_ لاتقولي عني خفيف، أنا بحسدهم لأنهم عرفوكي قبلي.
قلت بهدوء:_ أنت مختلف عن الكل، ماحدا بيفهمني متلك، والعلاقات مابتنقاس بالعمر، بتنقاس بالعمق، و أنت واصل لأعمق نقطة فيني.
طبع قبلة طويلة على راسي وقال:_ ريحتيني.
بعد لحظات صدر صوت موسيقا من غرفة ريم، كالعادة كانت عم تتسمع على شي أغنية لجورج،لمن يلي فاجأني هو اندماج الياس مع اللحن، و بعد لحظات بلش يدندن مع جورج:
" يلي جمالك نوع تاني
تايه ولقيت فيك عنواني"
ابتعدت عنه و نظرت باستغراب، لكنه نظر بثقة و بابتسامة، حط يده خلف خصري و شدني و كمل:
" قرب أكتر ما انت قريب
خلي الحب ولا مرة يغيب
كل ما فيك بينده ليا
حتى عينيك بتحلم بيا
افتح قلبك ولا تنساني"
اتسعت ابتسامتي، و كان شعوري ممزوج بين الاستغراب و الحب والفرح، قلت:_صوتك حلو، حتى أنت بتحب جورج؟
ابتسم بشكل جانبي:_ شكراً، و بعدبن مين مابيحب سلطان الطرب؟
اومأت موافقة:_ معك حق
ركز نظراته عليي، قال:_و أنت مين بتحبي؟
قلت بشقاوة:_ الياس
قرص أنفي:_قصدي من المطربين
جاوبت بخجل:_ مابتضحك عليي؟
نظر باستفهام فقلت:_ أنا بسمع الكلمة، مو الصوت، بيهمني الكلمة بعدين اللحن آخر شي الصوت
_يعني؟
قلت بلامبالاة:_ بسمع للكل، وبحب أغاني أكتر من مطربين، يعني ماني متل ريم متعلقة بمغني واحد، انا بسمع للكل، جديد و قديم، يعني بحب أم كلثوم، و عبد الحليم، بس أغاني محددة، و بحب مثلاً الشامي.
قال باستهجان:_ الشامي؟
جاوبت بابتسامة:_ أي ، لأنه هو بيكتب أغانيه، بحسهن صادقين كتير و فيهن إحساس حقيقي.
و بحب جورج و جوليا و فيروز و ناصيف و اليسا
ضحك من قلبه، وبالنهاية قال:_ فهمتك، على هالحالة رح تبقي تعدي للصبح
قلت بعفوية:_ أنا بحب الكلمة!
باس خدي وقال:_ و لك دخيل الكلمة و كاتبة الكلمة. قومي هاتي آخر إبداعاتك لنشوف.
قمت، جبت دفتري ، يلي بيعرفني اكتر من حالي، تربعت على الكنبة و قلت:_بتعرفني بس أكتب بقسا
قال بهدوء:_ القسوة الوحيدة يلي بقبلها منك، قسوة الحبر.
صمتت ثواني و بلشت قلب الصفحات، استوقفني:_ لحظة، قبل ما تقرأي
قرب من أذني وقال:_ بدي أسمع النص متل ما بيطلع منك، مو قراءة ، إعتراف
ابتسمت و قلبي رجف للحظة:_ بخجل
رفع حاجبيه:_بتخجلي تقرأي نصوصك؟
لوت شفاههي:_ يمكن بخجل أعترف
هز راسه رافض:_ أنا هيك بدي، يلا ابدأي
زفرت نفس طويل، وبلشت أقرأ، بالبداية كان صوتي منخفض، وببطئ بلش يعلا، وبعد لحظات بلشت اندمج، و حس صدري انفتح للكلمات، وكأنها عم ترجع لمنبعها الحقيقي
هو كان عم يسمع، ماقاطعني، بكل تركيز، و بصمت، و جورج شغال بالخلفية، كل لحظة والثانية كنت آخد عليه نظرة، كان مركز بكل حواسه، و لما انتهيت و سكرت الدفتر، تنهدت و نظرت له، أخذ الدفتر مني وقال:_ أنا بخاف منك
قطبت حواجبي، فكمل:_ عندك قدرة رهيبة ، بتحولي المشاعر لكلام، أنا إذا ضعت منك، بضيع مرتين، مرة لأني ضيعتك، و مرة لأني ضيعت مراية بشوف فيها حالي
ابتسمت بهدوء:_ لا تفترض الأسوأ، أنا بحبك، و الضياع فكرة بعيدة الحصول
لمس وجهي بأطراف أصابعه:_ المشكلة، أنه بعد حصولها مابينفي ورودها، يلي متلك بحاجة معاملة خاصة كتير، لتتمكن جذورك ويصير البعد مستحيل.
ضحكت بخفة:_ أنت بالأصل معاملتك خاصة، على طبيعتها خاصة ،كل يلي عليك تبقى متل ما أنت.
ابتسم بهدوء:_ يا الله، شو بحب عقلك
ريم
كانت عم تتمايل على أغنية جورج،و تغني معه بعذوبة، إحساسها بالحب بيخليها خفيفة، سعيدة لو بس ظاهرياً، و لو كانت بتعرف أنه سعادتها ماهي إلا غلاف لحزن عميق.
بس ريم بتغض الطرف عن هالجزئية، بتعمل نفسها غير آبهة، و بتكمل بتركيز على الحب وحده.
جلست مقابل المراية، مشطت شعرها، وضعت من أحمر شفاه بلون دم الغزال، و كملت دندنة:
"الروح عاشقاك، و بتتمناك
دايماً فاكراك، من قبل لقاك"
رن جوالها، و أكيد كان كريم، ترددت قبل ماتجاوب، لكن الشوق غلبها.
_ ألو
_ يسعد هالمسا
ضحكت بخفة:_ و مساك
سحب نفس و قال:_ شو مزاجك رايق؟
نظرت لنفسها، رفعت حاجبها الأيسر بغرور مصطنع وقالت:_ رايق كتير، نظرة لمرايتي بتنسيني كل همي
ضحك من قلبه، قال:_ بتسمحي تنسيني همي طيب؟
انمسحت ابتسامتها و قلبها اضطرب:_ شو قصدك؟
قال بنبرة صادقة:_ بدي شوفك
خفضت صوت الأغنية وقالت:_ بخاف
_ من شو؟
تغيرت نبرتها:_ تشوفني اليوم، وتصير بدك تشوفني كل يوم، و أنا.....يادوب ماسكة قلبي.
غمض جفونه و مال برأسه كأنه عم يقبض على صوتها:_ و إذا وعدتك؟
قالت بعبث:_ عندك مشكلة بالوفاء بالوعود.
جاوبها بنبرة أقرب للهمس:_ بوعدك أوفي بوعدي، اسمحي لي شوفك، حرام عليكي صار لي 8 شهور ما شفتك، و صوتك بدك واسطة لتسمعيني ياه
زفرت ، نظرت للمرآة، أنبت حالها على جملتها يلي دفعته لهالطلب، وهو عم ينتظر قرارها بصبر ماله حدود، اشتغلت من طرفه أغنية لجورج.
" كنت بشوفك ساكن فيا
صورتك مالية الكون حواليا
ياما حلمت اديلك عمري
حتى العمر ياروحي شوية"
قال بنبرة محملة بالحزن:_ حتى صورة الك تصبرني ماعندي
تنهدت وقالت:_ طيب، بس ما بتطول المكالمة
ابتسم بحزن:_ متل مابدك
تحولت المكالمة لفيديو، ترددت لحظات وبالنهاية تشجعت و رفعت أيقونة الكاميرا،قلبها كان عم يرتعد، أسندت الهاتف لصندوق خشبي، وصمتت مبتسمة ببساطة.
لكن كريم ماكان حاله بيسر أبداً، وضع الهاتف بحيث يظهر نصف جسده العلوي بالكامل.
أمامه فنجان قهوة، و منفضة سجائر ممتلئة، وبيده سيجارة مشتعلة، و عم ينظر لريم بطريقة غريبة.
ما انزاح نظره عنها أبداً، ولا حتى رف بجفونه، سحب نفس عميق و نفخه بهم واضح ، قالت ريم باستغراب:_ من إيمتى بتدخن؟
قال بجدية:_ من وقت ماقررتي تلوعي قلبي
صمتت و احتارت كيف ترد، أطفأ السيجارة و قال:_ حليانة
رسم ابتسامة باهتة على وجهه، نظرت لنفسها على المراية لبرهة، وبعدها قالت بمزاح:_ نسيت أمسح
قال بسخرية:_ معك حق، كتر خيرك رضيتي عني، و حنيتي عليي بهالنظرة، كمان بدي أطمع وشوف على وجهك ذرة مكياج؟ زودتها مو؟
تبرمت بوجهه، قرب وجهه من الكاميرا و همس:_ بحبك
قالت بتصنع:_ أنا مابحبك
_ مو ضروري، المهم أنا بحبك
وضعت يدها تحت ذقنها وقالت:_ احكي لي عنك، كيفك؟ كيف عم تمضي أيامك؟ وليش عم تدخن هالقد؟
زفر بتعب وقال:_ كيفني؟ تعبان كتير، كيف عم مضي ايامي؟ شقا و و تعتير، ليش عم دخن؟ لأنه الله بلاني بأعند بنت بالدنيا، لا رضيانة تكون معي، ولاقادر أبعد عنها، و معلق بحبال الهوى
تنهد بصوت عالي، و صمتت،وهو صمت.
تبادلوا النظرات بهدوء، رنت ساعة الحائط و انتهت الأغنية عنده و اشتغلت واحدة جديدة.
" كلامك ياحبيبي
كلام غير الكلام
بيطمن قلبي دايماً
و بينسيني الآلام"
ابتسمت ريم ، كملت بصوت ناعم:" كلما تشوفني قلي....بتأثر فيا كلي...و أنا بعدك إيه فاضلي...على الدنيا السلام"
زفر بارتياح،غمض جفونه للحظات، قال بعدها:_ أنت حرقة قلبي
ابتلعت ريقها:_ أنا؟
رفع يده، لمس شاشة الهاتف كأنه عم يلمس وجهها، قلبه كاد يتوقف، و الدموع بدأت تتجمع بمقلتيه، قال:_ ماعدت أعرف شو أعمل، مرتي صايرة غريبة، و حتى بنتي قليل لتورجيني ياها، و أنت مافيني لومك على خوفك.
أنا صرت تايه، ماني مع حدا، ولا حدا معي.
ازدرد غصته ، تسرب حزنه عبر الشاشة لريم، وجعها قلبها على حالهم، قاومت الدموع و قالت:_ بلكي إذا أخذتها زيارة ، بيتحسن وضعكم؟
ابتسم بحزن:_ آخذها زيارة؟
ضحك بأسى و سخرية:_ أنت عم تقولي هالكلام؟ ريم....هي بنتي و أمها مرتي.
لامست أصابعها ببعض وخفضت راسها، وقالت:_ بعرف، لهيك فكرت يمكن خطوة صغيرة تحسن حياتك
قال بهدوء:_ رفعي راسك، و تطلعي بعيوني
طاوعته فقال:مابتخافي هي الخطوة تأثر على حبي الك؟
صمتت لدقيقتين، وهو تأملها و دخان السجائر حوله، بالنهاية ابتسمت و قالت:_ لو أثرت، و رجعتوا تتآلفوا مع بعض_ مع أني بشك_ ، بس بيكفيني أنك حبيتني بصدق، و أنك عيشتني مشاعر ما كنت بحلم فيها، بحلوها و مرها
حمل الجوال، بانت ملامحه بصفاء على الشاشة، قال:_ تتزوجيني؟
رفعت رأسها برفض ناعم:_ أنا مابنزل على ضرة
رفع حاجبه :_ مابدي منك شي، بس خليكي معي، أنا بس أحكي معك بحس أني عايش
بادلته الابتسامة، أردف:_ عطيني شوية أمل، خدي عمري كله، و عطيني أمل تكوني الي
غنت له بصوت ناعم:"آه ياويلي من الليالي و البعد و قسوته
لو تعرف إيه جرالي شوف قلبي و لهفته
ياحبيب القلب قلي مين يرضا بغربته"
انتهت الاغنية و سكرت الكاميرا، قال:_ حطي الجوال على اذنك
ولما أطاعت همس:رح تكوني إلي.
انتهت المكالمة بدون وداع ، و بقي صدى كلماتها عم يرن براسه.
#يتبع
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
`