الفصل 3
[٢٠/٢، ٩:٠٨ م] null: *؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم حب البنات`*
*❴🔢❵الـــبـــــــــــ❴4️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
Stories 📖:
#حب_البنات
#فيلوفوبيا
#الجزء_السابع
صوت أنثوي مبحوح:
" أنا عم موت كل يوم ألف موتة و أنت معها! عم أختنق كلما تخيلتكم سوا! حس فيني"
_ أنت يلي لازم تحسي فيني، شو أعمل خبريني؟ مااااعم أقدر ماعم أقدر أتخلى عنها بهالبساطة!
" و أنا؟ حبيبتك...روحك..بتتخلى عني؟"
_ قلت لك خلينا نتزوج بالسر
" ليش شو ناقصني لنتزوج بالسر؟ بأي عين بدك ياني خبر أهلي أنك جاية تخطبني بالسر؟"
_ شو الحل؟؟!!
" الحل أنها هي تتركك، خليها تجي منها مو منك، هيك بتريح ضميرك"
_ كيف؟
" مابعرف...شغل عقلك، أنا بحبك كتير...بحبك أكتر من حالي، مستعدة أعمل كل شي و نكون مع بعض"
شادن
الحب
هو الخطيئة البشرية الأزلية، الحب أوقات بيكون مصدر سعادة، و بالغالب هو مصدر شقاء، لكن الشقاء محبوب، الانسان بطبعه بيميل للتعب و للحزن، ليش؟ ماعندي جواب.
مرق شهر....و بدأت سنة جديدة
سنة ماحدا كان بيعرف أنها محملة بالدموع، من أول يوم فيها المطر ما وقف، و كانون الثاني حزين، يمكن لأنه الثاني مو الأول!
بتبدأ فيه حياة جديدة، و مع ذلك هو الثاني
تماماً مثل ريم.....ريم قررت تكون الثانية، ولو أنها ما أفصحت عن قرارها، و لكني بشوف لمعة عيونها لما تحكي لنا كل يوم المسا، كيف كريم بيمرق من جنب المحل بسيارته، معلي صوت جورج وسوف، كيف اذواقهن الموسيقية توافقت بشكل غريب على اغنية " جرحونا برمش عين"
بعرف أنها ماعم تكذب بشأن إهمالها لمكالماته و رسائله، لكن عيونها بتحكي بلغة الحب بمجرد ذكر اسمه.
ولو أني بسمع أنينها كل ليلة، و بشوف آثار الدموع على عيونها الصبح. ولو أني شهدت تحول لون بشرتها الابيض الحليبي، لصفرة القمح الشاحبة.
لكن حالتها مخالفة تماماً لكلام جورج:"دور عالحب تلقى بوجوده الدنيا حلوة"
أو يمكن...الدنيا حلوة صارت بعيونها، لمجرد وجود كريم فيها
بحركات المراهقين يلي بيعملها، سلل الورد يلي بتوصل على البيت كل يوم، علب الشوكولا الفاخرة، و الكثير الكثير من أغاني جورج.
من قلبي تمنيت لو يستمرفيهن الحال هيك، و يكون هالطيش هو آخر الحب، لكن هيهيات....الحب بيبدأ هيك و بينتهي برغبة قاتلة بالوصال.
رغم أنه جماله بعذابه....لكن العاشق بيموت بحسرة المعشوق!
أما رشا
فهي يوم عن يوم عم تذوب أكثر برامي، و أنا آسفة جداً لأنها عم تتماهى مع رغباته.
حذرتها بدل المرة ألف....لكن شو العمل إذا كان القلب متعلق؟
التعلق هو الحب السام، الحب القاتل
و نادر جداً يلي بيحب بدون ما يتعلق، برغم كل شي...مابشوف ريم متعلقة بكريم، هي فقط مستمتعة بالحالة
أما رشا ..متعلقة برامي لآخر حد، و هذا التعلق....مع الأسف رح يهلكها.
و رامي...آه من رامي، و كأن اهتمامه اللطيف مخبي سم بيهدد روحها.
أنا صرت أعمل يلي عليي، و ماعاد سمحت له يختلي فيها لحظة ببيتنا، ولكن مشاويرهم سوا هي يلي مخوفتني، خاصة أنه بياخذها لبيت أهله، ورشا ماعاد تطرقت للأمر أبداً
مثل كأنها أصبحت زوجته فعلاً، و صار واجبها مطاوعته وحتى فرض عليها!
من كل قلبي خايفة عليها، لأنها بنتي أكثر ماتكون اختي.
الخوف المتعارف عليه أنها تكون فريسة لخطيبها، و الخوف الأكبر أنها تذوب شخصيتها...تفكيرها، عقلها و إرادتها، لصالحه هو!
هيك الحب بيعمل بالانسان؟ إطلاقاً....مستحيل
هذا الحب الأعمى...الحب الجارف...الحب المفخخ
يلي من كل قوتي بتمنى خلص أختي منه، صرت على قناعة أنها غلط تتزوج رامي، غلط تتزوج رجل مستعدة تتنازل له عن كل شي مقابل تصرفات حانية و شوية اهتمام.
مو هيك الزواج بيقوم و لا هيك الحب.
أنا تزوجت و بعرف الزواج الصحي كيف لازم يكون، لكن أختي منجرفة تجاهه
و مع الأسف أبونا مو سائل عنا، و مافي حدا قادر يجبرها تتركه
صحيح أنا ضد سلطة الرجل على المرأة، شو ماكانت صفته بحياتها، لكن أوقات فعلاً بتصير الأنثى بحاجة أب، و (أب حصراً)....يفرض سلطته عليها.
لأن عواطفها الجياشة بتحجب عنها المنطق، و الأب المفروض يكون صوت العقل لأولاده.
و أنا....
أنا ولأول مرة بيعتمل بصدري شوق لحدا غير بناتي.
لكن مستحيل حط من قدر نفسي و أتحجج أي حجة لزوره بمكتبه.
رغم أني عم لاحظ منه اهتمام، مرة بيبعت لي رواية أقرأها و أعطيه رأيي، مرة بيتحجج بسير طباعة الرواية ليتصل فيني، و مرة بيقول أنه قرر يشارك بمعرض دمشق الدولي للكتاب و قدم ملف الدار و ناطر القبول.
يعني اهتمامه واضح، بس المشكلة فيني مو فيه
مع أني سعيدة و حاسة لأول مرة أني مهمة، بس أنا حياتي مو سهلة، و وجود رجل فيها رح يزيد تعقيدها، إضافة أني بخاف من ردة فعل أدهم، بخاف يحرمني حتى اسمع صوت بناتي
لهيك و رغم المشاعر الحلوة....كان ضروري أبقى بعيدة خطوة، مابدي أتورط بشي أكبر مني.
اليوم جمعة، و الصباح مشمس على غير عادة كانون، كانت ريم واقفة خلف واجهة البرندة، لما مرق كريم بسيارته، و طبعاً صوت جورج عم يصدح:
"دقيت بابي انفتح
مسيت قلبي انشرح
خليبت أيامي فرح
بوجودك هنا روحي"
وقفت خلفها، راح كريم ، التفتت لي و كملت دندنة بسعادة غامرة:
" خليك بقلبي لاتروح
مر العالم خوف جروح
بعطيك عيوني والروح
لا تروح"
قربت مني و عانقتني و كانت السعادة متجلية بعيونها، قلت لها بمحبة:_ هالقد الحب حلو لك ريم؟
جلست على الكنبة، تحت شعاع الشمس ، نظرت لي حتى انعكس لون الشعاع بعيونها العسليات و قالت:_ صدقيني..الحب أحلى إحساس بالكون
جلست مقابلها و تحولت نبرتي للجدية:_ بس أنت بتعرفي شو عم تعملي ؟
رفعت حاجبها و قالت بنص ابتسامة:_ ماعم أعمل شي، أنا مستمتعة باهتمامه فيني وبس
قلت بصوت جاف:_ و مرته؟
جاوبتني بنزاقة:_ أنت جاية تعكري صباحي؟ رح جاوبك مشان يرتاح ضميرك، أنا ما عم أحكي معه، و لا عطيته أمل، هو يلي عم يحاول معي حتى بس طلع فيه، و حتى النظرة ما عطيته ياها
و على قولة جوليا بطرس:
نهضت و تمايلت مع كلماتها: " أنا ما وعدته....أو بعدته..ولا قلتله الأمل ضعيف"
انبسطتي ست شادن؟
تنهدت و قلت بسخرية: يعني تاركتيه يتقلب على جمر النار؟
قالت بابتسامة رضا:_ أنت عيني
جاوبتها:_ هيك مابيصير، هيك ما بتبرئي حالك، هو حابك و أنت لا معترضة و لا صاددتيه، يعني عم تبعتي له رسالة مشفرة عنوانها الطريق سالك.
زفرت ريم بانفعال:_ لا إله إلا الله،إذا هو بيحبني، أنا قله لا تحبني؟ الحب مو بالإيد و القلب إذا حب ما بينسى و لا منقدر نوقف هالحب
مو على اساس أنك كاتبة و بتفهمي بالمشاعر؟
أنا يا ست....ما بدي أتورط معه بعلاقة، بس.....مابدي سد الباب بوجهه، مو أنت قلتي اختبر شجاعته؟
ليكني عم أختبرها، لشوف وين رح يوصل!
نظرت لي بجدية فائقة وقالت:_ خليه يتلوع، و نشوف كيف رح يتصرف
هزيت راسي و قلت بابتسامة متهكمة:_ على أساس لقيتي حل محايد، هي أنانية منك!
لكنها فاجأتني بانفعالها:_ شو رأيك أنطر ليصير عمري خمسين ليجي ختيار يحبني؟؟
كملت بنبرة مقهورة:_ أنا من حقي حب و أنحب! رح يصير عمري30 و فرصي كل يوم عم تنعدم!
و إذا كان متزوج؟
أنا بدي أتمتع بهالحب، بدي عيش نفاصيله كلها
بدأت الدموع تتكاثف بعيونها:_ و إذا قررت أرفض بيكون قلبي حس.....حس باللي حسه غيري من زماااان
و بيكفي تنظير...بيكفي!
و على ذكر الأنانية....لاتنسي مين تطلقت و تركت بنتين صغار و لحقت أحلامها!
صفعتني بجملتها الأخيرة....ركضت لغرفتها و صفقت الباب بعنف، و تركتني مذهولة بما سمعته منها!
وعلى صوت الباب خرجت رشا من غرفتها، قالت بصوت ناعس:_ شو صاير من الصبح؟ ليش عم. تتخانقو؟
ما تمالكت حالي، وقفت و قلت بصوت عالي:_ لأن بهالبيت بس يحكي الواحد بمنطق بيصير عم يوعظ و يتفلسف، بس يكون خايف عليكِ و على أختك بيتعاير بطلاقه
أي انا أنانية! بس انت شو يا ست ريم؟
لما تعلقي رجال فيك وهو متزوج؟
و أنت ياست الحسن....كم مرة قلتلك لابقا تعطي خطيبك وجه؟ كم مرة قلتلك رامي ماله أمان؟
رفعت سبابتي بوجه رشا، و قلت بوعيد:_ يكون بعلمك و علمها، أنا ماعاد أتدخل فيكن شو ما صار معكن!
ماعاد قلكن ما احلا الكحل بعينكن، والله..... إذا بشوفكن عم تغرقوا ما رح أحكي كلمة، لأني حكيت و تعايرت بطلاقي!
بينما وقفت رشا مصدومة، دخلت غرفني بانفعال و لبست معطف فوق بيجامتي و طلعت من البيت، مابعرف لوين، و حتى ماحملت معي غير جوالي، كان المهم عندي أني أطلع من بيناتهم.
وقفت عند مدخل البناء, الشمس ساطعة بوقاحة كأنه ماصار شي، كأنها غير الشمس يلي انعكست على ضحكة ريم من شوي، شديت معطفي و مشيت، و قلبي عم يضرب صدري بقوة.
حكيت مع نفسي:_ أنا عم أنقذكن من حالكن يا مجانين!
مشيت مسافة طويلة و قلبي عم يعتصر وجع، بالنهاية جلست على حافة سور
_ صرتِي تتعايري بطلاقك يا شادن، تاري مو بس أدهم بيفكر هيك، كل الناس بتشوفك أنانية تركت بناتها و ركضت ورا الجامعة و الكتابة
طيب و أنا؟ بناتي الحياة قدامهم، المستقبل الهم، أبوهم مارح يتخلى عنهم، وأنا؟
انا يلي خانني بدال المرة مرات، أنا يلي كنت مهددة بأي لحظة يرميني، غلط؟ غلط أنا اختار أبعد؟
غلط أختار نفسي مرة؟ ليش .. ليش لازم المرأة دائماً تضحي، و تبدي ولادها على نفسها؟
وقت قالوا الناس ما بترحم، صحيح، الناس و نظراتهم و كلامهم و حتى ظنهم فيكِ، مثل مطرقة ضخمة و أنت سندانها، ما بترحم!
رن الجوال برسالة، ريم، ( ارجعي ماكان قصدي)
ضحكت بسخرية، دائماً ما بيكون قصدكن، و دائماً بتخربوا كل شي!
ريم أكثر حدا دعمني بقرار الطلاق، أكثر من رشا بكثير، و مع هيك بلحظة غضب عقلها الباطن قال يلي وعيها بيرفض يقوله.
زفرت بملل، اليوم عطلة و مارح أسترق النظر لبناتي حتى! و بيت رفيقتي بعيد لأقدر روح مشي!
شو أعمل؟
انا بلحظة الحزن الحقيقي و العميق، مابقدر أبكي، بيوجعني قلبي، لكن ما ببكي، حتى الدموع بتعمل عصيان عليي، بسكت....و سكوتي بيطول، وفوضى عارمة بتكون براسي.
مديت ايدي على جيب المعطف لدفيها، حسيت بورقة جواها، أخرجتها و طلعت مصاري
ضحكت بخفة، مصاري بتكفيني لأشتري كاسة قهوة و أركب مواصلات لبيت رفيقتي
انحلت المشكلة!
رفعت راسي للسما، ابتسمت لها، أكيد ربي عارف بحالي، وعارف بكسرة قلبي و خاطري، مع أني متأكدة أني مابنسى مصاري بجيوبي، لكن.....هي قدرته وحده، شكرته، اشتريت قهوتي، و نطرت المواصلات لبيت أماني، رفيقتي الوفية.
ركبت بالباص، و كاسة القهوة ملازمتني، ولسّا سخنة بإيدي. بعد لحظات طلع شخص مستعجل، شق طريقه بين الناس و جلس جنبي مباشرة.
ما كلفت حالي أطلع فيه، أصلاً ما بحب هالمواقف، و نظرة وحدة ممكن تعمل إحراج ما له داعي. ركّزت بالقهوة، و حاولت أتجاهل ريحة الفلافل اللي عبّت الباص… بس معدتي خانتني، كالعادة.
لحظات، و سمعته عم يناديني بصوت متردد شوي:
_ شادن؟
رفعت وجهي، وإذ هو إلياس.
ابتسمت بخجل صادق:
_ أهلين أستاذ.
رد بنفس الابتسامة، بس أهدى:
_ أهلين فيكي.
هي أول مرة منقرب هيك، و هالشي زاد توتري. حسّيت حالي مكشوفة، بلا دروع. ارتشفت من القهوة، و كنت متأكدة إنه عم يراقبني، مو تطفّل… فضول مهذّب.
قال و عينه على بيجامتي:
_ الظاهر طلعتي على عجلة؟
ضحكت بخفة، و نظرت من الشباك:
_ فيك تقول طفشت.
وبعدين التفتت له:
_ بس أنت؟ عندك سيارة… شو مطالعك هون؟
ابتسم، سعل بخفة كأنه عم يجمع شجاعته، و قال:
_ بصراحة؟ مو صدفة أبداً.
توقف لحظة، وبصوت أوطى:
_ شفتك، و لما ركبتي بالباص… لحقتك. ركضت، ومعي كيس الفلافل.
ضحكت غصب عني. مد الكيس باتجاهي:
_ تفضلي، الفلافل ما بتنأكل إلا سخنة.
هزّيت راسي:
_ معي قهوتي، شكراً.
قال بنبرة فيها مزاح خفيف:
_ قرص فلافل، مو عزيمة رسمية… لا تخجليني.
تلاقوا عيوننا لثواني، و بهاللحظة حسّيت بدفء غريب، حب… أمان، مزيج من التنين. سحبت قرص، و هو سحب واحد. أكلنا بصمت قصير، بعده مال ناحيتي وهمس وعيونه عالسائق:
_ شو رأيك ننزل و نتمشى شوي؟
ترددت. قلبي دق، قال بسرعة، كأنه خايف أرفض:
_ وين ما كنتِ رايحة بوصلك، بس التمشاية الصبح حلوة، و الشوارع فاضية.
واضح إنه مصر، و أوضح إني محتاجة هالهدوء. وافقت.
نزلنا، و مشينا من شارع لشارع، و كيس الفلافل بيناتنا لحد ما خلص. حكي خفيف، مزاح بسيط، ضحك بلا تصنّع. مزاجي تغيّر، و نسيت تماماً إني كنت رايحة لعند أماني.
قعدنا بحديقة. شاي، كعك بسمسم، صباح رايق، بستحقه فعلاً.
ابتسامته مريحة، و حضوره ما فيه ضغط.
قال بهدوء صادق:
_ ما كنت متوقع يكون صباحي حلو هيك.
ابتسمت بخجل:
_ تسلم.
ترك الكاسة، و استقام بجلسته. حسّيته متوتر.
قال:
_ أنا ما بحب اللف و الدوران… و يمكن كلامي يجي مفاجئ.
قطبت حواجبي بابتسامة حائرة:_ عم اسمعك
صمت، نظر لأسفل، أول مرة بحسه مرتبك، شهق بهدوء و نظر لي بطريقة صادقة للغاية و قال:
_ صرلي فترة معجب فيكي.
سكت لحظة، وبصراحة مربكة:
_ و حابب أتقرب منك أكتر.
كنت متوقعة هالكلام… بس الواقع غير الخيال، وقع الكلام على سمعي كان بنكهة غريبة، بنغمة جديدة ، و التماس الصدق الرهيب بنبرته و نظراته، خلى قلبي يدق بعنف.
قلت بهدوء:
_ كيف يعني تتقرب مني؟
قال بجدية، بدون مثالية:
_ بعرف وضعك، وبحترمه. و كرمالك، و كرمالي، حابب أتقدم لك.
تفاجأت. مو بالكلام… بالسرعة.
قلت بتأنّي:
_ بس أنا ما بعرف عنك شي.
ابتسم، و بابتسامته قلق خفيف:
_ لهيك الخطبة بتكون فترة تعارف. بلا التزامات، بلا ضغط.
وأضاف:
_ وإذا حسّيتي أنك ما ارتحتي… منوقف بكل احترام.
رفعت حاجبي:
_ يعني علاقة شرعية، وإذا صار توافق منكمل؟
_ تماماً.
شادن، أنا ماني صغير، و لو ماني متأكد من مشاعري ما بقدم خطوة، أنا لابدي أتسلى و لا حب بهدف الحب نفسه، أنا بدي علاقتنا تكون جدية، مبنية على الاحترام، التفاهم، و أكيد الحب المتبادل
صمت لثواني، أشاح بنظره للحديقة، و عاد للنظر الي وقال:_ أنا...فعلاً عم أشعر تجاهك بمشاعر جديدة عليي، ويعني....
لوى شفاهه و كمل:_ عندي احساس أني مو شخص عابر بالنسبة الك، ف...شو المانع؟
ابتسمت، تنهدت، وأخذت قضمة من الكعكة. الكلام كان حلو… يمكن حلو زيادة عن اللزوم.
قال بهدوء أخير:
_ فكري. القرار إلك. و بأي حال، شغلنا ما رح يتأثر.
أومأت.
داخلي كان فوضى: ارتباك، خجل، وخوف.
أول مرة حدا بيقرب مني بهالوعي… وبهالاحترام.
سطعت علينا شمس الضحى، قال بخفة لطيفة:_ شو رأيك وصلك و روح على صلاة الجمعة؟
إلا إذا حابة تروحيها عليي
ضحكت بخفة، قلت بتلقائية:_ يعني...مستعد تفوت شي مهم كرمالي؟
اتسعت ابتسامته هالمرة، لكن جاوب بتحفظ:_ خلي الأيام تكشف لك، وبعدين...بصراحة تامة، أنا مارح أكشف أوراقي إذا ما كنا مخطوبين
رفعت حواجبي، وابتسمت، الثقل حلو كتير، عقولة المثل ( التقل صنعة) و الياس متقن صنعته، مشينا لجنب السيارة من جديد، و وصلني على البيت، صحيح أني نسيت زعلي من أخواتي، لكن بمجرد رؤيتي لباب البيت تكركبت من جديد.
تمالكت نفسي و دخلت، كانوا بالصالة ، ريم شكلها بكيانة، و رشا مو أحسن، بس تجاهلتهم، وكملت لغرفتي، أغلقت الباب بهدوء، و طيران للاب توب، حسيت برغبة عارمة بالكتابة، فتحته و بدأت أنقش يلي أملاه عليي قلبي!
يمكن صار فيني قول:" قلبي المغروم"
#يتبع
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
[٢٠/٢، ٩:٠٨ م] null: *؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم حب البنات`*
*❴🔢❵الـــبـــــــــــ❴5️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
Stories 📖:
#حب_البنات
#فيلوفوبيا
#الجزء_الثامن
كيف بيتصرف الانسان لما يحب؟
يعني شو بيميز تصرفات المحب الحقيقي...عن الانسان المدعي؟ أو المتعود؟
و كيف ممكن عاشق يميز إذا كان عم يتم خداعه...أو هو على بر الأمان؟
الفكرة أننا لما نعشق، صعب كتير نكشف الكذب أو المواربة أو حتى التمثيل.
الحب مو أعمى، الحب بيعمي، البصر و البصيرة مع بعض
و للهائم بالحب....صعب كتير يلاقي الحقيقة، أو حتى يفكر أنه في وجه ثاني للحبيب هو مابيعرفه.
بالمقهى الخاص برامي، رشا و ريم، بدون شادن
تبعاً للخلاف الحاصل، فهي نأت بنفسها عنهم كم يوم، نوع من العقاب يمكن.
صحيح قلبها طيب، ولكنها بتآمن جدًا أن أي تجاوز ، بيستحق تاخد موقف، و بالمواقف شادن الأولى.
بهاليوم الممطر، ترافقوا الأختين للمقهى، نوع من التسلية و تغيير الجو، أخذوا طاولة بالزاوية جنب الشباك، و عيون رشا ما فارقت خطيبها ولا لحظة، لحد ما جلس معهم.
_ أهلا و سهلا، نور المحل
قالت ريم:_ بوجودك صهري
قال لرشا باهتمام:_ بس قهوة طلبتو؟ ياعيب الشوم هيك بتقومي بواجب اختك؟
جاوبت بخجل:_ ماخطر لي
قال باستنكار لطيف:_ ولو، أنت خطيبتي، يعني كلمتك بتمشي هون، رح وصي على غدا من برا و نتغدى سوا
قالت ريم:_ مافي داعي، فنجان قهوة بيكفي
_ أنتوا ضيوفي، لازم قوم بالواجب
و بالفعل، نهض و طلب الأكل و رجع للجلوس معهم، قال لرشا:_ وصيتلك على فاهيتا، بعرفك بتحبيها
جاوبت بابتسامة:_ شكراً حبيبي
رد لها الابتسامة، فقالت ريم:_ إيمتى ناويين تحددوا العرس صهري؟
نظر لريم بغرابة، و رشا التقطت النظرة، سرعان ما تدارك نفسه وقال:_ على تخرج رشا ، ان شاء الله.
أومأت ريم موافقة، فغير الموضوع:_ ليش شادن مو معكن؟
جاوبت رشا بنبرة حزينة:_ متخانقين
لكزتها ريم ، فضحك رامي بخفة و قال:_ ماهان عليكي ست ريم؟ لا تخافي أنا ما بوشي بالأسرار
بس يعني كل الأخوات بيتخانقوا
كملت رشا:_ صرلنا 3 أيام، و هي محاربتنا
قالت ريم بنفاذ صبر:_ الله ربي، رشا عم تبالغ، هو خلاف صغير بس شادن بتكبر الأمور.
قال رامي بجدية لرشا:_ شايفك متأثرة.... أنت معلقة بشادن، مافيكي تزاعليها
أومأت موافقة، فاستسلمت ريم و تنهدت:_ لا تنسى أنه مالنا غير بعض، و شادن هي الأم الحنون، ماحدا بيقدر على زعلها.
اراح ظهره و قال:_ لازم تكونوا غلطانين غلطة كبيرة معناها.
صمتوا التنتين، كيف ممكن يبوحوا بسبب الخلاف؟
فكرت رشا ، شو تقول؟ أنت سبب زعل أختي مني؟ أنت يلي مقابل أحصل على رواقك هذا و حنيتك هي، عم أقبل كون زوجة قبل أواني؟
شردت ، مهما كانت عم تتنازل له، فشعورها ممزوج بين الواجب و الضغط، و بذل الحب لأجله.
شعور ما له مسمى، بتحبه و بتحب قربه، لكن أوقات بيتحول القرب لأسر، لقيد، لأوامر تلقائية مجبرة تنفذها، مو لأنه بيغضب إذا ما نفذت، أو لأنه بيزعل، لا.
لكن لأنها صارت تشوف الحب مشروط بالقرب، و مشروط بالرضا و الرضوخ لطلباته، و كأنها إذا اعترضت رح تبقى بدون حب، أو تشعر بالتقصير، مع أن الواقع عكس هيك تماماً.
ما فيك تكون مقصر بشي مو مطلوب منك بالأساس، و القلب يلي ما بيحب، بيشوف أقل عطاء من الطرف الثاني.....بيشوفه حبل خانق
فكان الأولى فيها تبعد، ترفض، تختار راحتها و بالتالي تريح رامي، فهي ما بتعرف أنها بمسايرتها له عم تضيق الخناق عليه أكثر، رغم أنه هو المبادر، و لكنه لطالما شعر بالتأنيب، و لطالما شعر أنه واقع بحفرة عميقة، و ماعم يعرف كيف يطلع!
صوته صحاها من شرودها، وصل الغداء، تغدوا و ماخلي الأمر من مزاحه هو و ريم، و نكاتهم السخيفة، بينما هي، كانت مستمعة، تقرب له فنجان القهوة، تمسح القهوة يلي نضحت من الفنجان على الصحن، تعطيه كاسة المي، وهو منغمس بالحديث مع أختها.
بالنهاية قرروا المغادرة، سبقتها ريم بخطوات، بينما توجهت لعنده، بزاوية المقهى، وقفت مقابله، تبادلوا النظرات، رفعت يديها و عدلت ياقة معطفه، نزلتهم بهدوء ناطرة يمسكهم، قالت وقلبها راكض:_ شكراً رامي
قال بابتسامة:_ على شو؟
لوت شفاهها و رفعت اكتافها:_ على كل شي
قرر يكون ألطف، رفع يده و زاح غرتها و قال:_ ما بينفع تكوني لطيفة هالقد!
قالت:_ ليش؟
ابتلع ريقه، وقال:_ لطفك بيخليني حس أني....
صمت، ماقال: جبان، ابتلعها، فابتسمت و كملت عنه:_ ضعيف؟
رفع حاجبه:_ يمكن
قالت بهدوء:_ رامي، أنا كتير بحبك، أنت كل شي عندي، اوعدني ماتبعد عني
سحب نفس ثقيل، و كأنه بحاجة وعد يخنقه أكثر، ازدرد ريقه و قال بصوت مبحوح:_ بوعدك
ابتسمت برضا و قالت:_ عم استناك بكرا، سلام.
_شادن_
أول مرة بيدخل الزعل بيني و بين أخواتي، 3 أيام، ماحكينا كلمة مع بعض خلالهم، يمكن بسببي لأني آخدة موقف، ويمكن لأني بحاجة هالصمت، ماني بحاجة تدخلات و لا نصائح!
طلب الياس حيرني، ماعطيته حق ولا باطل. وهو ما ضغط عليي، ولا حتى حاول يعرف جوابي، و هذا صعب الأمر عليي، لأنه تاركني أختار بحرية مرة ثانية، و أنا ماني متعودة أختار، متعودة على الفرض، طبيعي لما انحط امام الاختيار، حس بجبن!
أي جُبن....
بعدما هديت فورة مشاعري و رفرفة الفراشات بصدري، صار لازم فكر بجدية، و الجدية هي حد السيف بقصتي.
أول ماخطر ببالي بناتي، كيف رح تكون ردة فعلهم؟ كيف رح أتحول بنظرهم من أم بيحبوها، لأم بيكرهوها؟
هن يلي رح يكون الهم نصيب بالثمن، ثمن أي" غلط" بحسب رأي الناس.
و أدهم، القاضي غير المعلن بحياتي، بمجرد معرفته رح يفتح عليي جبهة، و رح يدس بعقل بناتي أفكار، ما أنزل الله بها من سلطان، عني أنا!
رح يتأكدوا أني تركتهم لعيش و أتزوج، مستحيل يفهموني بيوم.
رح يشوه صورتي كأم!
ماعدى أني ماعاد أحلم بظفرهم، ماعاد أسمع صوتهم حتى بخيالي!
أدهم قاسي، و ردة فعله رح تكون عنيفة.
و أهل الياس؟
أول شي رح يقولوه: " أنت عازب، ليش تاخد مطلقة؟ و عندها بنات؟"
الياس صفحته لسا نظيفة، و أنا ملف كامل
" زواج، طلاق، حضانة"
رح يشوفوا ماضيي قبل ما يشوفوني، رح يسمعوا كلمة " مطلقة" قبل اسمي، و رح أتحاكم بدون ما تنسمع شهادتي!
وبين هالمعمعة براسي، كان في صوت عنيد، حلو، كان موقفه معي عم ينعاد، و ابتسامته الدافية غامرة صدري!
لمين أرضخ؟ لصوت قلبي؟ ولا لأحكام كتير قاسية رح تنزل فيني؟
و الياس.....كم مرة رح يمرق بحياتي مثله؟ أكيد مارح يتكرر
رن هاتفي، كان هو، قلبي تسرع، لكني رديت، رديت لأني حسيت حالي أضعف من أني أختار.
قال برصانته المعتادة:_ مسالخير
جاوبت بنبرة غالب عليها الحزن:_ مسالنور
صمت لحظات، قال:_ يبدو أني ماكنت لازم أتركك تفكري كل هالفترة لوحدك
تساءلت:_ ليش؟
قال بتأني:_ واضح من نبرتك أي متاهة دخلتي.
غلبتني ابتسامة، قلت:_ و المخرج عندك؟
جاوب بصوت دافي:_ ماعندي مخرج، بس عندي أمان.
ضحكت بخفة لخفف من خجلي:_ كيف يعني ؟
صمت ثواني، قال بعدها:_ بعرف كل شي عم يدور بذهنك، لاتنسي أني ابن هالمجتمع و بعرف كل عقده.
ابتسمت و مازحته:_ بلكي ماكنت عم فكر بهالكلام؟ بلكي أنا قلبي متردد؟
ضحك وقال:_ بكون قلت مقدمة بايخة و تفلسفت عالفاضي
ضحكت بدون صوت:_ لا ، مقدمتك بمحلها.
تنهد بارتياح فقلت:_ شكلك كنت قلقان؟
قال بثقل:_ يعني شوي، قلت بتصل بسلم عليكي، و بلكي نبرة صوتك بتخبرني شي
_ وشو خبرتك نبرتي؟
_ أنك خايفة
قلت بصدق:_ خايفة، مو منك، لكن من كل حواليك
صمت مجدداً، فسألت بتلقائية:_ بتفكر كتير قبل ما تحكي؟
جاوب بذكاء:_ الحجر بمحله قنطار، و بعدين أنا مابدي أضغط عليكي. بس.....شادن.....أنا مستعد أعطيكي أمان الكون كله، أنا رح وقف جنبك و بضهرك، و كون معك نعم الرجل.
أنا ماتزوجت لهلق مو لأني مغرور أو عندي مواصفات قياسية، بس لأني ما لقيت العمق يلي كنت أنشده حتى قابلتك، أنا مابتهمني الأعراف، ولا بيهمني المجتمع، ولا حتى طليقك و كل رعونته، ولا رح اسمح لهم يوقفوا ضدي
يمكن ما أقدر غيرهم، بس بقدر وقف معك و وكون حدك.
عبثت بغطاء السرير، كان في إحساس بداخلي غريب، و رغبة بالبكاء، و رغبة أكبر أني أقدر قول له كل شي خايفة منه، لكني سكتت، وهو سكت.
بقينا كم دقيقة ساكتين و الخط مفتوح، حتى بالنهاية قال:_ عم استنى جوابك
قلت بلهفة:_ الياس
_ نعم
قلت بصدق موجع:_ إذا ارتبطنا رح تتعذب معي، أنا مليانة جروح.
قال بصبر:_ بوعدك أني كون صبور، حتى تشفى كل جروحك.
بلعت ريقي.
_ و إذا تعبت؟ إذا صار خوفي أقوى من مشاعري؟
تنفّس، سمعت النفس قبل الكلمة:
_ منوقف. منهدى. ومنكمّل إذا بدنا نكمّل. أنا ما عم أشتريكي ولا آخذك على ضمانتي… عم اختارك.
سكتت لحظة وقلت:_ عطيني وقت
قال بتأني:_ معك، كل الوقت.
_ بخاطرك، الياس
_ مع السلامة
سكر الخط، و بكيت، أي بكيت من قلبي، لأني متأكدة أني بحبه، و أنه بيحبني
لأن الحب يلي انتظرته و تمنيته كل عمري، من طفولتي، لمراهقتي و حتى أثناء زواجي، إجا، أي إجا بس محفوف بالمشاكل، و هالمشاكل ذنبي مو ذنبه، من طرفي أنا!
حتى بالحب، الحظ ترصدلي ، و وقف بوجهي متل عادته، وقال كلمته: لا!
تغطيت كلي حتى وجهي، غمضت عيوني مو لنام، بس مابدي شوف الحياة كيف ماشية و أنا واقفة مطرحي.
ريم
3 أيام تغيبت فيهم عن المحل، و امتنعت عن الخروج حتى للشرفة، او الطلة من شباك، كل هذا بس لتحاول تخرج كريم من تفكيرها، ولكن ...البعد بهيك حالة بيصير شقاء، و بيتملئ بالشوق و الحنين
يعني علاج بيسبب ردة فعل عكسية.
فما زادها إلا لوعة تجاه كريم، يلي رغم يقينها بوجوده كل ليلة جنب زوجته، و رغم أحتراقها الداخلي لكونها الها الاسبقية بحياته، و رغم كتير لحظات بتشعر أنه الغيرة عم تحرقها، لكنها ماقدرت تتراجع، أو تشيل فكرة حبها له، أو توقف مشاعرها الجياشة تجاهه.
أما كريم:
باليوم الأول....لقا الشرفة خاوية، و المحل فاضي، و خط ريم مغلق، فهم....فوراً، إنها عم تحاول تنسى، فقال لنفسه يمكن، يمكن أنا كمان أنسى.
كريم مو لعوب، ولذلك كان شعوره بالذنب خانق، فأول ما قررت ريم ترجع خطوة، فكر يحاول معها كمان، و تنتهي الحدوتة يلي ما بلشت.
بيومها رجع بكير، صوت أغاني هادية، أغاني ما بتمت لحالة زوجته بصلة، هذا دليل عدم إحساسها فيه من الأصل، ولا إحساسها بأن قلبه هرب من قفصها.
دخل المطبخ كانت عم تحضر قهوتها، قال:_ مسالخير، اليوم رجعت بكير.
ردت بهدوء بعدما جلست على طاولة المطبخ، و بعدما صبت الفنجان:_ أي منيح، جوعان؟
ما عجبه ردها_ يلي موجديد_ لكنه قال بعدما جلس مواجهها:_ شو رأيك نطلب أكل من برا؟ مو جاية على بالي الطبخ.
نظرت له، نظرة خاوية:_ أنا أكلت قبل شوي، اطلب إذا بدك.
" قبل شوي" " بعد شوي" " مبارح"، أزمنة بتخص كل وقت إلا هاللحظة!، و دائماً موجودة بأجوبتها، خذلته فبهت و نهض صب لنفسه صحن من طبخها، وخرج للصالة و أكله بارد.
انزعاج عارم اجتاحه، لكنه قاومه، قال لنفسه:_ أنت مزعوج لأنك ما شفت ريم، مرتك كل يوم هيك، مافي شي جديد. مرتك مالها ذنب، انسى و اهدى.
لعب مع بنته، و نام بكير، حتى زوجته سهرت تتابع مسلسلاتها، متجاهلة وجوده تماماً.
باليوم الثاني:
اشترى لها حلويات بتحبها، قابلت مبادرته بابتسامة، بس ابتسامة.
راقبها و هي عم تاكل، نفس رفعة الشعر من سنين، نفس لون الشعر حتى، نفس العطر، نفس البهوت.
هي امرأة طبيعية، ولكن لأنه كريم مو طبيعي، شعر أن كل شي فيها باهت.
و بالسهرة، تناول مصاري و أعطاها ياهم:_ بكرا نزلي عالسوق، جيبي تياب، عطورات، مكياج، يعني دللي حالك شوي.
تناولتهم و قالت باستغراب:_ خزانتي معباية، و ماني محتاجة شي.
زفر بانفعال، قال بعتاب:_ لكن اهتمي بحالك شوي، غيري لون شعرك، طريقة لبسك، قميص النوم هاد ارميه و البسي شي ملفت.
قطبت حواجبها، قالت:_ أنا ماني مقصرة بحق حالي كريم، وإذا مو عاجبك هاد شأنك، أنا عاجبني حالي كتير و مقتنعة كتير بلون شعري و طريقة لبسي، بعدين...فكر أنت تهتم بحالك، و تغيرلي هاللبس الرسمي، أو تشبشب حالك شوي، مبين أكبر مني بعشرين سنة!
ابتلع ريقه و قال:_ أنت دائماً جاهزة تهاجمي؟ متأثرة بالدراما يلي بتتابعيها كتير؟
زوجك عم يقلك الفتي نظري، شو يعني؟ شغلي مخك شوي!
نهض بانفعال، لكنها جاوبت ببرود:_ والله ياكريم، الرجال يلي بيحب مرته، بيحبها بكل حالاتها، إذا بتكون لابسة تياب مهرية، بيشوفها أحلا وحدة، ويلي مابيحب إذا بتلبس جواهر...مارح تلفت نظره
لهيك: " ياقلبي لاتتعب قلبك".
روح نام كريم، تصبح على خير.
مافهمت نداء الاستغاثة، مافهمت شو مغزى كلامه. لكن معذورة، المرأة اليائسة من الحب بتتحول لمرأة شرسة، مرأة متخذة وضعية الدفاع دائماً، والأدهى إذا تعلمت تحب نفسها، و تكفي نفسها، و استغنت عن الحب من أي مصدر خارجي، بوقتها ماعاد يفيد الكلام و لا المحاولات، لأنها وصلت لبر الأمان، الأمان الحقيقي، الاكتفاء، و عدم الحاجة لرجل يحسسها بقيمتها، لأنه قيمتها محسوسة و مو مرتبطة بنظرة رجل أبداً
زوجة كريم، ناجية بمجتمع مريض، معافاة بوسط مليان عقد، تشافت منه و من الحاجة للحب، وتعلمت كيف تكون هي كفاف نفسها، و ماعاد يهمها إذا لفتت نظرة أو لا، لأنها مقتنعة أنها حلوة بكل حالاتها.
بالوقت يلي كان فيه كريم غرقان بالمسؤوليات، و عم يداري قلبه المحتاج للعاطفة.
كانت زوجته اكتشفت أنه وجود العاطفة بينهم ضرب من الخيال، فبدأت تشتغل على شفائها و حاولت تحمي نفسيتها من ضغط الزواج البارد.
هذا الصدع خلق من بداية زواجهم، و كريم اليوم ماعم يحاول يصلح شي انكسر فجأة، بل زواج انتشرت الصدوع بأرجائه، و الإصلاح مستحيل.
باليوم الثالث:
مرق جنب المحل من جديد، و جنب البيت، و ريم مختفية.
بشغله فتح جواله على اسمها، كتب "اشتقتلك" و مسحها، " كيفك" رجع مسحها، رجع الجوال لجيبه، وقال لنفسه:_ هالحب غلط، هي عم تحاول تصلح، و أنت ساعدها و حاول تبعد.
رجع للبيت محمل بالأغراض، كانت زوجته بالصالة و البيت هادي، و بنتهم لاهية بألعابها، باس البنت، وجلس بجانب زوجته و قال:_ خلينا نطلع نتغدى برا
نظرت له لثواني:_ جاية رفيقتي لعندي، إذا بدك خود بنتك و روح
هز رجله ليكتم انفعاله:_ اعتذري منها، في مطعم بوسط البلد كتير أكله طيب.
لكن الزوجة هي يلي انفعلت:_خلصنا كريم! شو صاير لك هالكم يوم؟
رفع حاجبيه:_ صاير لي، صايرلي أني حابب حس أني مو ضيف ببيتي
ابتسمت بشكل جانبي:_ بعد حين و مين و سبع سنين، منيح تذكرت، سيدي مو مهم، مانك ضيف هذا بيتك، و إذا كان على المعنى الثاني لكلامك، قلت مبارح: ياقلبي لا تتعب قلبك.
سكت كريم. مو لأن ما عنده رد… لأن كل الردود انكسرت.
طلع فيها. امرأة واقفة على أرض صلبة.ما عم تهينه،ولا عم تستجديه، ولا حتى عم تعاتبه.
بس… ما عاد محتاجته.
وهذا أخطر شي ممكن يصير لرجل.
قال بصوت واطي، شبه مهزوم:
_ أنا ما عم أطلب حب مستحيل… أنا بس عم أطلب شعور.
رفعت كتافها:
_ الشعور ما بينفرض.ولا بينصنع.
وقف و مشي كم خطوة بالصالة،رجع:
_ بتعرفي شو الوجع؟مو إنك ما بتحبيني… الوجع إني ما عدت فارق معك.
نظرت له ببرود نظيف:
_ والله تعلمت عيش بدون انتظار، و العين بالعين.
وهيك سكتته. مو بصراخ ولا بفضيحة.
سكتته بالاكتفاء.
نزل من البيت، المطر خفيف،ولا خطر له يفتح المظلة.
مشي حتى وصل للسوق، لمواجه المحل، نفس المكان يلي كانت تطل منه ريم.
نفس البلاط، نفس البرد.
نظر بالمكان الفاضي وقال بصوت خافت :وأنا؟ أنا وين أروح بهالعطش؟
مدّ إيده لجيبه،طلع الموبايل،كتب أخيرًا: "ريم…يمكن فيكي عاليوم الرابع، بس أنا حاولت، و انهد حيلي بالمحاولة"
رشا
باليوم التالي، و متل عادتها جهزت سفرة معتبرة، حلويات و كيك مزين، ببساطة اليوم عيد ميلادها.
لبست فستان شتوي غاية بالنعومة، فردت شعرها الكستنائي الطويل، و اكتفت بلمسة مكياج خفيفة و انتظرته، و على وقته وصل.
عيونه حكت حكاية انبهار بجمالها، معايدة دافية، و هدية غالية، و سهرة خالية من المقاطعة.
_ هذا أحلى عيد ميلاد بحياتي
قالتها بعيون عم تشع امتنان و محبة
جاوب بهدوء:_ عقبال المية سنة، رشا.
ابتسمت:_ بتحبني؟
ابتلع ريقه:_ بحب كل شي معك
عادت السؤال:_ أنا...بتحب رشا؟
ابتسم و أزاح غرتها:_ أكيد
تسرع قلبها:_طيب قولها
_ شو هي؟
توسعوا حدقاتها:_ قول أنك بتحبني.
زفر نفسه، شهق واحد طويل، قال:_ بحبك
رن هاتفه برسالة، فتحها بسرعة، و قبل ما يرجعه لجيبه، قربت منه رشا، سحبت الجوال و تظاهرت بإطفاءه و قالت:_ اليوم مافي حدا يقاطعنا
قال بإحراج:_ رسالة شغل مو أكتر.
_ شو بتحب ضيفك؟
_ يلي بدك ياه
قطعت من الكيك، وضعت القطعة بصحن و تكفلت بإطعامه، أكل....و العرق تندى على جبينه، رن الجوال "تامر شغيل" ، لاحظت نظراته و سرعته لسحب الجوال من يدها، لكنها وقفت و بعدت عنه،
ما وقف....جلس...راقبها، و انتظر العاصفة، فتحت الخط، و صمتت.
_ ألو...وينك حبيبي، أكيد سهران مع الدرة النفيسة، طمني عجبتها هدية عيد ميلادها؟
ألو....رامي.....رامي....وينك؟
على الفور غرقوا عيونها بالدموع، ناولته الجوال بيد مرتجفة، سكر الخط و رجع ينظر لها نظرة المجرم للقاضي.
جلست هالمرة بعيد عنه، قالت بصوت مخنوق:_ افتح الجوال و عطيني ياه
ارتبك، ماعرف يرد ولا كيف يبرر، كانت عم ترتعش مثل عصفور تحت المطر، قالت مرة ثانية:_ يلا...عطيني ياه
طاوعها، وهو عارف انه خلص خسر، خسر كل شي، دخلت على محادثاته، بعدما عرفت الاسم المنشود، قرأت كتير من كلامه ، غزله، شوقه، عذابه ، حبه الكبير، لبنت ثانية مسماية باسم شاب.
كلام عنها هي، عن عذابه بخطبته الها، عن شفقته عليها، كل شي إلا أنه بيحبها!
بهاللحظات كانت عم تتهدم بصمت، صروح عم تنهار جواتها، و رياح عاتية عم تعصف بصدرها
و رامي صامت، عم يدخن، و ينتظر ردة فعلها.
فتحت محادثتهم، كلام سطحي، كتير حب من طرفها و كتير كلمة " اشتقتلك" و " بحبك"
بدون رد منه!
تركت الجوال أخيراً، هدي نبض رامي درجة، مابده ياها تفضحه أكثر، مابده تعرف خيانته أكثر و تتعمق فيها لدرجة الغرق، زفر نص نفس، نظرت له رشا و دموعها عم تنسكب بدون إرادة.
قالت بصوت مرتجف:_ حكي لي رامي، من الأول.
قال بضيق:_ مافي شي ينحكى، أنا خاين وبس.
هزت راسها بنفي، و دموعها مازالت عم تنهال:_ الحكي بينك و بينها مابيقول هيك، بيقول أنك حبيتها قبل ما تخطبني.
نظر حوله بضيق، زفر عدة مرات، قال:_ بدك تتركيني اتركيني، أنا مابستاهلك
ضحكت بسخرية مريرة، فقال:_ رشا، أنا نذل بعرف أني نذل، بترجاكي، لا تخنقيني أكثر.
قالت بقهر ممزوج بالغضب:_ قلت لك حكي من الأول!
جاوبها بصوت مرتفع:_ مافي اول ولا تاني!
نظر لها فوجدها على وشك الانهيار، عاد للهدوء:
_حبيت رغد من كم سنة، كانت بنت الجيران، ضلينا نحب بعض فترة طويلة ، قلت لأمي تخطبها و لما شافتها ما عجبتها، بقينا فترة أنا و أهلي بمشاكل، تركت رغد لأرضي أمي، و بعد سنة قررت تخطب لي، و طلعتي بحياتنا، و خطبتك، و بعد ما خطبتك، رجعت لي رغد، بس ماقدرت أتركك ، ماقدرت أتخلى عنك، علقت بين نارين.
صمتت، جسدها عم يرتعش، يديها مضمومين لشفاهها، و عيونها ماعم تكف عن الدمع، بالنهاية قالت بحزم:_طلاع لبرا رامي
كان متوقع تطرده، نهض ليلبس معطفه وقفت بعنف، حملت المعطف و رمته عليه و صرخت بوجهه:_طلاع لبرا! انقلع من بيتي، انقلع من حياتي! انقلع من قلبي!
على صوتها خرجوا ريم و شادن، رامي غادر تارك الباب مفتوح، و رشا ركضت على الطاولة و رمت كل شي فيها على الأرض و بكيت، انتحبت، و أخواتها ركضوا يواسوها، و ماحدا كان حاسس بحجم الدمار جواتها.
#يتبع
#حب_البنات
#فيلوفوبيا
#الجزء_التاسع
شادن
عقد الطفولة، بتبقى ملازمة للانسان طيلة حياته،حتى يقرر يشفى منها، وليقرر يشفى منها لازم يحس بوجودها، تآلمه و تخنقه، وبعدما يشعر يعترف، يعترف أنه عنده صدمات بطفولته،جعلت منه الشخص يلي هو عليه اليوم.
و لكن.... أوقات الاعتراف بيتأخر، بيبقى الانسان بنظرنفسه طبيعي، و كل مافي الأمر أنه طبعه هيك.
و كذا كان الحال بالنسبة لرشا، فهي اعتقدت أنه تعلقها برامي طبيعي، ولا مرة شافته تعلق مرضي، أو حست أنه مو حب صحي و جميل، بالعكس....بنظرها هذا هو الحب بعينه.
مضى عليها أسبوع كامل،بدون طعام إلا فتات، و كل وقتها شاردة، وكأن الشرود بيحل المشكلة.
و أنا قلبي تقطع، أنا بكيت عليها أكثر ماهي بكيت على حالها، مو للخيانة، إنما لألمها و وجعها.
رشا بنتي، و حرماني من بناتي معكوس عليها و حنيتي تجاهها غلابة، و بنتي بهالمرحلة كانت عم تموت بالمعنى الحرفي.
بدأ الموضوع بالمرض، حرارة داخلية اضطرينا نسعفها مرتين بمنتصف الليل لننزلها، وبعدها إعياء بجسدها كله، دوخة و هذيان، و بكاء كتييير.
كنا نتناوب أنا و ريم على السهر لمراقبتها، وياما نصحى على صوت بكاءها.
رشا هشة كتير نفسياً، ضعيفة و ماعندها مقاومة أبداً.
طبيعي.....فأمي و أبي كانوا متنافرين بشكل ما بينوصف، طيلة حياتهم مشاكل، و صراخ،و أوقات توصل للعنف.
انا و ريم طالنا من الطيب نصيب، و تعنفنا بما لا يليق ببنات، ولا تستحقه البنات!
و هذا يلي جعلني أتحمل المسؤولية من صغري، من عمر الست سنين، بعرف أتحمل مسؤولية حالي، و مسؤولية ريم، و بعدها بفترة صارت مسؤولية رشا كمان.
كنا أنا و ريم معتمدين على حالنا بالكامل ، مابذكر بيوم حدا صحي معنا قبل المدرسة، أو وصلنا عالمدرسة، او حتى درسنا، أو ضفر شعرنا
و لما كنا نرجع،كان شغل البيت يتقسم بيننا، و أمنا تطبخ و بس، لأنها غالباً مشغولة بعلاقاتها الاجتماعية.
لكن لما ولدت رشا، الوضع صار كارثي، مشاكل يومية، صراخ كل ليلة، و كأن البيت بعاصفة مو مكوب عليها تهدأ، و رشا وعيت على الشتات، و انعدام الاستقرار ، و انعدام العاطفة إلا مني و من ريم.
حتى بالنهاية قرروا يريحونا و يرتاحوا و ينفصلوا، بوقتها بس جربنا طعم الراحة، الهدوء.
مع أننا ما لعبنا دور البنوة أبداً، كنا و بقينا أكثر من مجرد 3 أخوات، لكن ارتحنا من المشاكل.
و رغم أنه رشا كانت ماتزال طفلة، 8 سنين، أحرج عمر، و أساس المراهقة، والنضج حتى،بس أمنا كمان ما كانت فاضية
اعتبرت الطلاق كرت اخضر لتوطد كل علاقاتها بصديقاتها و جيرانها و معارفها و أخواتها.
نسيانة توطد علاقتها ببناتها.
يلي فيني قوله: رشا عم تموت لأن رامي بنظرها ....أم...أب..بيت...طمأنينة...مخدر لطفولتها.
و انسحابه مؤلم جداً.
و رغم كل تعاطفي مع أختي و غضبي منه، إلا أني بشفق عليه، لأني كنت شوف بعيونه: ضعف، و ألم و حيرة كبيرة
و الحق مو عليه، رغم أنه ضعف أمام حبيبته و أعاد علاقته فيها رغم خطبته، لكن إذا بدنا ننظر للموضوع من زاوية ثانية، رامي كان محب، عاشق، و العاشق صعب يتقبل بديل للحبيب.
و بيبقى الحبيب هو الملاذ الأول و الدائم، مهم تعددت البدائل.
لكن غلطه أنه استمر بالكذبة، استمر باللف و الدوران، كان لازم إما يكون صريح مع رشا، أو أنه يتحمل مسؤولية ارتباطه و ينهي علاقة الحب.
أما البقاء بالمنتصف، فهو للجبناء فقط، و أسوأ قرار اتخذه بحياته.
و بالله، كم علاقة حب تتوجت بالزواج؟ أغلب علاقات الحب بمجتمعنا تحديداً فاشلة، و بتنتهي بالفراق
و أحد أهم الأسباب، رفض الأهل! كأنهم رح يعيشوا حياة أولادهم، و يتحملوا نتيجة اختياراتهم.
كان لازم رامي يقبل هالحقيقة و يتعايش معها، و يبوس إيده على رشا.
الحب يلي أعطته ياه رشا _ لو ماكان صحي_ لايقارن بأي حب ثاني رح يناله.
و لكن.....
يمكن أختي كان لازم تتعرض لهالرضة حتى تقوى و تبدأ تفك عقدها، و تتحرر من سجن التعلق.
لو تزوجت رامي كانت رح تتعذب بينما هو رح يتنعم، فدائماً الخيرة فيما اختاره الله.
و في أشياء و مواقف مهما حاولنا نحكم بمنطقية و نحلل، بتبقى حكمة الله فوق كل منطق ممكن نوصل له، و النتيجة لصالحنا و رح تسعدنا، لو كانت بعيدة عن نظرنا بالوقت الحالي.
وبينما كنت آخدة جانب أختي، ريم قررت تتصرف بمنطقها هي، وبعد أسبوع، خرجت من البيت بعنفوان و الغضب معتريها، و توجهت للمقهى، صعدت الدرجات بانفعال، وقفت عند الناصية و بحثت عن رامي ، و أول ما لمحته، مشيت بخطوات سريعة و بنص المقهى، و أمام أنظار كل الموجودين، ناولته صفعة على وجهه، رنت بآذان السامعين، و طأطأت رأس رامي.
وما اكتفت، بل قالت بغضب:_ أنت مانك رجال!، شقفة ولد مدلل.
رفع رامي وجهه و أمسك زندها و أدخلها عنوة لمكتبه، فلتت يده و قالت:_ عم تسحبني بكل وقاحة كمان؟
قال رامي برجاء:_ وطي صوتك فضحتيني.
قربت منه، شذرته بنظراته و قالت بين نواجذها بحقد:_ بتستاهل اكتر من هيك، بتستاهل تتعلق مشنقتك، يا خاين يا كذاب.
استدار و مسح وجهه بيأس وقال:_ ماكنت بدي نوصل لهون! بس كلما كنت أجي لأحكي ، تصعب عليي رشا، لأني بعرف أنها رح تنهار، فسكتت و أنا كل لحظة عم حس بالخسة و النذالة!
شو كان مفروض أعمل خبريني؟
قالت بغضب:_ كان لازم تكون الشي المفروض تكونه، رجال!
قال باستنكار: _ رجال؟ شو تعريف الرجال عندكم؟ أنه يدفن قلبه و يعيش مثل الميت الحي؟
قالت بصوت خفيض:_ لا تعريف الرجال أبسط من هيك، الرجال مو يلي بيحب وحدة و بيكسر الثانية.
نظر لها نظرة ثاقبة، قال بابتسامة متهكمة:_ شوفوا مين عم يحكي.
سقط شي داخل ريم، حست أنه جملتها حاصرتها، لكنها تحولت للدفاع و قالت:_ لاتغير الموضوع، و شأني مابيخصك.
قال ببطئ:_ أنا بعرف غلطي منيح، وبعرف أني دمرت رشا، بس ياترى أنت مدركة لحجم غلطك؟
مدركة أنك عم تصنعي نفس الدمار يلي أنا صنعته؟ و مع انسانة ثانية
ريم أنت مانك بموقع التنظير و لا النصيحة لأنك مو أحسن، لو كانت شادن كنت سمعت منها.
رفعت يدها لتناوله صفعة ثانية، لكنه ردعها و قال:_ لا تتمادي، سكتلك أول مرة.
قالت بنبرة مهزوزة:_ بتبعد عن أختي، مابقا تورجيها وجهك فهمت؟
ارخى يده و قال:_ مو أنت يلي بتحكمي ولا بتقرري، و على كلٍ بحب قلك أني مو جبان، ولا ضعيف، ولا ماحبيت رشا بيوم، فكري بكريم....بتعرفي أنا شو كان موقفي.
تجمدت ريم مكانها.
كريم؟
الاسم نزل عليها متل حجر بمي ساكنة.
شدّت فكها، حاولت ما تبين الارتباك، قالت ببرود مصطنع:_مالك حق تجيب سيرته.
اقترب خطوة:_أنا ما جبت سيرته لأجرحك… جبتها لذكرك إنو كلنا عنا بقع عمياء، و أسهل شي نلبس ثوب الأخلاق و نجلد غيرنا.
ضحكت ضحكة قصيرة، قاسية:_فرق كبير بيني و بينك.
رفع حاجبه:_بالعكس، كفاتنا متساوية، تنياتنا عم نكذب و نجمل الكذبة، و وقعانين بنفس النار
سكتت.
لأول مرة ما لقت جملة جاهزة.
تراجع خطوة، حس لأول مرة إن الأرض مو ثابتة تحته.
فتح باب المكتب، قال بدون ما يلتفت:_قولي لشادن…أنا رح أبعد، مو لأنكم طلبتوا… لأن البقاء هيك جريمة.
و طلع.
بقيت ريم وحدها.
إيدها كانت عم ترجف، مو من الغضب…
من شي أقسى. جملة وحدة علقت براسها بإلحاح موجع:«كلنا عنا بقع عمياء»
و لأول مرة…
ما كانت متأكدة مين الضحية، ومين الجلاد.
ريم
صفعة تلقتها، مؤلمة أكثر من الي ناولتها لرامي بكثير، ياريتها ما راحت له، ولا دخلت حرب الردود معه.
مشيت للمحل، ارتشفت من القهوة المتجمدة، ولأول مرة ما شغلت أغاني، ضجيج راسها كان أعلى بكثير من اي صوت، و صعب يطغى عليه أي نغم.
معقول هي عم تصنع دمار؟ معقول يلي عم يصير برشا، نفسه عم يحصل لزوجة كريم؟
هي شافت بعيونها أثر الخيانة، شافت كيف الأنثى بتتفتت حرفياً لما تنخان، كيف النوم بيجافي عيونها و كيف الدنيا بتسود أمامها و كيف الموت بيقرّب منها كتير.
تبني سعادتك على دمار انسان، جملة نمطية و رنانة و بتنقال كتير، لكن أنك تشوف الدمار و تشهده بأعز ناسك، و تكون شاهد على انهدام و انهيارات كتيرة، هذا هو العذاب بعينه، والعذاب الأكبر انك تعرف بأنك يمكن تكون عم تسبب نفس الوجع لشخص ثاني.
أثناء تفكيرها العميق، و شرودها بالطريق و السيارات و الزباين، رن جرس المحل، معلن عن دخول كريم، لأول مرة من مدة طويلة.
رفعت راسها و التقوا عيونهم، والقلبين خبطوا بالصدور.
_ مرحبا
قالها كريم، و بدأ يتجول بين الألبسة و الرفوف، يتحسس الأقمشة، ينزل علاقة فستان و يعاينه عن قرب، وهي مازالت عم تراقب، بقلب مشدود، و رغبة بالبكاء، و شوق رهيب.
هالمرة راقبت تفاصيله يلي ما سنحت لها الفرصة لحفظها بشكل كافي، بسبب انها لطالما شافته من بعيد.
شكل يديه، لون عيونه، خطوط الشعر بلحيته، حواجبه، ورائحة عطره الأخاذة، طوله الفارغ، كل شي فيه عم يخليها.....مسلوبة العقل.
هذا تأثير الحب، لا محالة.
الغريب أنه ما حكا، ولانظر لها، ولا ابتسم لها، تصرف مثل أي زبون طبيعي، عم يقلب بالملابس و يختار منها.
أجت زبونة، انشغلت معها ريم، و بقي بالانتظار، و كانت هي فرصته و دوره بالتأمل، ولكنه ماقدر يمنع الابتسامة من الطفو على ملامحه.
يمكن كان هذا أطول وقت حظي فيه بقربها، و بنهاية الأمر، غادرت الزبونة، فالتفتت ريم وقالت له:_
اخترت؟
جاوبها بابتسامة جانبية:_ اخترت
حمل كنزة و قرب من طاولتها، وضعتها بكيس بينما أخرج محفظته، ناولته الكيس، فأمسك يده، و تشبث فيها، انتابتها حرارة و حست كأن الأرض انخسفت فيها، قالت بخجل:_ شو عم تعمل؟
لكنه همس:_ اشتقتلك
ما اعطاها فرصة للرد، مد يده لجيبه، و أخرج بدل المحفظة علبة مخملية صغيرة، بلون نيلي جذاب.
وضعها على الطاولة و قربها ناحيتها و فتحها، نظرت للخاتم، كان غاية بالنعومة و الجمال، انذهلت و اتسعوا حدقاتها، نظرت له مجدداً، بصدمة، فقال بثقة:_ تتزوجيني؟
ابتلعت ريقها، وقبل ما تجاوب أردف:_ مو بالسر، قولي أي لجيب أهلي و نخطبك بحسب الأصول، و بعلم مرتي و موافقتها حتى.
و إذا رفضتي، بتكون نهاية قصتنا، أخرج من جيبه إذن سفر لأحد البلدان ، وضعه مقابلها و قال:_ إذا رفضتي بوعدك ماعاد تشوفي وجهي، قدمت على فيزا و طلعت لي، و السفر هو المهرب الوحيد من هالحب يلي كل يوم عم يدمرني أكثر.
القرار الك، يا اما بتجعليني أسعد رجل بالدنيا، أو بتختاري لي الشقاء و الغربة، لأني ما بقدر شوفك كل يوم و ماتكوني الي.
سكتت و هو بعده واقف عم ينظرلها بطريقة، ما شافت رجل عم ينظر لانثى مثلها.
الخاتم عم يلمع بمنتصف الطاولة، و الفيزا مثل تهديد على الجنب الثاني.
و كريم صامت، ماعم يضغط ظاهرياً، لكنه ضغط بكل قوته معنوياً.
سألت حالها:شو عم تعملي؟
سعادتك و سعادته ثمنها حياة ناس، ناس رح ينأذوا إذا مشيتي خطوة غلط.
مرت رشا ببالها، نظرة الصدمة لما المرأة تكتشف أنه قلبها آخر من يعلم بالحقيقة!
الملامح يلي اهتز أمانها، يلي فقدت جزء منها، و الطفولة المسروقة بسبب زوجة أب؟
أنت ريم....أبوك تركك و تزوج، معقول قادرة تخلي طفلة تعيش حياتك؟ تقبلي تكوني سبب حزن طفلة بريئة و تسرقي أبوها منها.
مارح يكون عادل، كذاب! القلب ميال.
و زوجته ما رح توافق! ماشافتها بس كانت مثل ظل ثقيل واقف شاهد على قرارها.
كان الجواب عم يلوح داخلها، عم يخنقها قبل ما تقوله، عم يصعد بالدموع لعيونها، عرفته قبل ما تعرفه و قاله قلبها قبل لسانها.
و الصدق و الحقيقة هي قوتها الوحيدة بهاللحظة
تنهدت و قالت:كريم.... أنا بحبك، بحبك لدرجة أني أتخلى عنك، و أتركك لبيتك و عيلتك.
لا كريم، ماني موافقة
تمالكت نفسها بصعوبة، ابتلعت الدموع ، بينما زفر نفس عم يرجف، كملت بصوت مهزوز:
_أنا شفت كيف المرأة بتموت ببطئ لما تنخان، و فعلك هذا خيانة مهما درنا و لفينا، و مابقدر ...مابقدر أغرز سكين بقلب مرأة و أقنعها أنه الشرع حلل، مابقدر غير المفاهيم و لا أكذب على حالي.
بدك تسافر سافر، بس لا تحملني ذنب قرارك.
أنا ما رح كون سبب سعادتك، ولا أرميك للشقا.
أنت حبيت.....
ماقدرت تتمالك نفسها، ذرفت الدموع و كملت:_ و هذا ثمن حبك.
تنهدت بعمق، سحب خاتمه و أعاده لجيبه، و حمل إذن سفره قابض يده عليه، أومأ لها موافق، و خرج بدون أي رد.
الجرس النحاسي رن داخل راسه، غادر المحل بدون ما يلتفت و يشوف ريم الباكية على طاولتها.
اتجه لسيارته و شعور الهزيمة عم ينهش بلحمه.
سكر الباب بقوة، كان بحاجة صوت أعلى من أفكاره، شد على الأوراق حتى التوت عظام يده، أغلق جفونه و قاوم بشدة المشاعر بصدره.
أصعب هزيمة ممكن تنال من الشخص، لما يكون الخصم نفسه! كريم كان عم يحارب نفسه و أفكاره وعقيدته و مبادئه، و انهزم شر هزيمة بقيادة ريم.
هي ما قالت لا، هي بس منعته يكون أسوأ نسخة من نفسه.
تذكر عيونها وهي عم تقول " بحبك"
قديش اشتاق و تعذب ليسعها منها، قديش كان متمني يحضنها بذات اللحظة و ينسى كل شي ثاني.
لكن " بحبك" كانت حكم نضيف، رد قوي لدرجة انه قبل برفضها مقابل حبها.
مساومة غير منصفة، لكنها عادلة.
مر بذهنه صورة زوجته، هو كذب بشأنها و ما خبرها لكنه كان مستعد يخبرها و يقلها أنه قلبه مال لغيرها. وكأن القلوب أطفال صغيرة ما بتتحاسب.
رح تسافر؟ سأل نفسه وهو بيعرف الجواب، أي رح يسافر،حتى الهرب صار على شكل ختم أنيق.
رح يهرب، لأن مافي حل، ويمكن البعد يشفي. ويمكن يشقي.
أما ريم....وضعت راسها على الطاولة، مستسلمة لحزنها، و لصوت جورج:
" ياقلبي مين يداويك
ياقلبي مين حاسس بيك
كل اللي حاصل ليك
من الحب الأولاني
أصل الهوى بيصيب
غدار و طبعه غريب"
شادن
بين رشا و ريم، قلبي نقسم نصين، كأنهن هن بناتي، مو بناتي يلي خرجوا من رحمي.
بهداك المسا، رجعت ريم بعيون منتفخة، و تحسس جيوبها الأنفية كان بأشد حالاته، لدرجة أنه صوتها اختنق و صداعها جعل عروق راسها تنتفخ و تظهر.
بمجد ما شفتها انه التطور خطير، بس مو خطير لدرجة أنه ريم، الانفعالية و القوية، تقعد جنبي بانهزام و تحكي بهدوء لايوصف:
_ أوقات الهزيمة رغم وجعها إلا أنها بتكون نصر مغلف، و اليوم أنا انتصرت على عاطفتي و على ري العطشانة للحب، و خليت أخلاقي تتحكم فيني.
بدأت دموعها تنسكب بدون صوت، و كأنها مجرى نهر متعود على الفيضان بسكوت، كملت:
_ اليوم كريم قال لي: تتزوجيني؟....و أنا رفضت
رفعت عيونها و ابتسمت لي، أكثر ابتسامة حزينة بشوفها بحياتي كلها!
بلعت غصتها و سكتت، و أنا عرفت الكلام يلي بدها تقوله، بدون ما تقوله، قربت منها، حضنتها و حطيت راسها على صدري، فوق قلبي، بلكي تسمع بكاء قلبي عليها، يلي ماقدرت تترجمه عيوني.
ريم يلي عاشت عمر ناطرة هالكلمة تنبع من رجال بيعشقها، رفضتها.
بقدر ماني زعلانة عليها، انا فخورة فيها، لأنها اختارت صح، مهما كان زواجه تعيس مابيعني أنها تحكم عليه بالإعدام.
يلي ( يحيي العظام و هي رميم) قادر يحيي هالزواج، و إذا كان مكتوب له ينتهي، فبيكون مو على يدها.
ريم كانت المرة الماضية منهارة بصوت عالي، أما اليوم لاذت بالصمت، وهذا أصعب حال.
مسحت على شعرها و قلت:_ احزني قد مابدك،و ابكي حتى ترتاحي، من حقك.
خسران الحبيب صعب كتير، و انا حاسة فيكي، بس يلي بدي ياه منك، أنك تحزني بدون ما تغرقي، و تقرري أنك رح تطلعي من هالحزن بيوم، ماتاخديه معك للأبد.
أنتي عملتي الصح، و هالمرار يا اختي مصيره يتحول لحلاوة، ازعلي هلق و اوعدي حالك أنك تروقي مع الوقت.
هزت راسها و دخلت غرفتها و سكرت الباب.
وقفت بالنص، بين بواب الغرفتين، كل واحد مخبي وراه بنت مكسورة، و انا ماكنت أحسن، بس برجع بقول لكلٍ من اسمه نصيب، و أنا انفرض عليي كون قوية.
لقيت الياس عم يتصل فيني، ويعزمني على قهوة، فوافقت، حسيت أني بحاجة شوية نقاهة، لبست بدون تكلف، و طلعت من البيت للمقهى لوحدي رغم رغبته باصطحابي، و هنيك لاقيته.
وقف أول ما شافني، و عجبني أنه ما حاول يصافحني، جلست و أنا من أسبوع لأول مرة بحس براحة خفيفة، قال بلطف:_ شكلك مو بأحسن حال
زفرت بتعب:_ لا والله، أخواتي....كل وحدة عندها عالم خاص، و عالم معقد و مليان شوك، مثل أليس بعالم العجائب ، و بحس أني الراوية بحياتهم ، وضروري أبقى حكيمة كل الوقت.
ابتسم ، طلب القهوة، قال بعدما شابك أصابعه:_ بتعرفي، حلو أنه الرجل يحب كاتبة ، يعني بكل موقف من مواقف الحياة بتاخده برحلة مختلفة، بتحكي المواقف كأنها حكاية، وبتنسج من كل شي قصة.
رفعت حواجبي ، و ماقدرت إلا ابتسم:_ مو قلت أنك مارح تكشف وراقك إذا ما خطبنا؟
أراح ظهره و قال بثقة:_ صحيح، بس هذا مو كشف وراق، هذا من الحواشي، يعني حلو ينقرئ، و إذا ما انقرأ بيبقى الرهان على ذكاء القارئ، و بما أنك مشغولة بدور الراوية، قلت بقرأ لك ياهم.
ضحكت بخفة، وصلت القهوة،حمل كل مين فنجانه، و اكتفينا بالصمت، صمت من النوع البليغ، المليان كلام ما بينقال.
و بعد هالاستراحة الصامتة قال:_ بدي اسألك سؤال، و إذا حبيتي تجاوبي، فبصراحة ، و إذا لا مو مشكلة.
جاوبت بابتسامة:_ تفضل
ابلتع قهوته، اكتست ملامحه بالجدية و قال:_ شو أكثر شي بتحسي كان ناقصك بطفولتك؟
فاجأني السؤال، مسح ابتسامتي، حسيت بهاللحظة أني مو امرأة مقابل رجل، و حتى هو كان عم يسأل الطفلة يلي بداخلي، صمتت، و تركني فكر بهدوء، و ماحاصرني بنظراته حتى
كان عارف أنه الغوص بالداخل طويل و صعب، و خروج الجواب من أصعب ما يكون.
بنهاية الأمر، قلت:_ أكتر شي نقصني أني كون طفلة، ألعب دوري الحقيقي، و مساحتي تكون صغيرة على قدي.
نقصني أني انشاف، و انسمع، ولما أبكي ما ينقال (ياي شو حساسة)، فأنجبر أتعلم أسكت
أني حس بضعفي، ما ألبس ثوب القوة كل الوقت، و الأهم أني مع الضعف حس أني محمية.
ختمت كلامي بابتسامة مو عادية، و نظراته ما كانت عادية، لقيته عم يمسك إيدي بحنو، وبنظرات محملة بالصدق، حتى قال:_أنا شايفك، و سامعك، و قد ما حكيتي مارح قول أنك حساسة، و رح أحميكي ما استطعت، و الضعف مو عار أبداً.
ماسحبت إيدي، حسيت بأمان، حسيت لأول مرة أني بقدر كون على طبيعتي، كون شادن.
ابتسم لي، غمرني بابتسامته، و قلبي دفي كتير، حتى بادلته الابتسامة.
بلحظتها عرفت جوابي، و قراري انسحم، الياس هو يلي لازم أختاره، مثل ما اخترت نفسي ، لازم أختاره لأنه الوحيد يلي شافني.
#يتبع
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
`