الفصل 2
[٢٠/٢، ٩:٠٧ م] null: *؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم حب البنات`*
*❴🔢❵الـــبـــــــــــ❴2️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
Stories 📖:
#حب_البنات
#فيلوفوبيا
#الجزء_الثالث
ريم
صباح جديد و أمل عم يلوح، ريم، صبية عمرها 29 سنة، فرصها بالحب قليلة و بالزواج أقل، لأننا بمجتمع بيعتبر مجرد تخطي البنت لعمر 25 شهادة انتهاء صلاحية.
لكنها بتعتبر عمرها رقم عنيد، و ماله علاقة أبداً بعمر قلبها.
ريم للآن عم تتتظر الحب و تبحث عنه، و رفضت بشكل قطعي أي خاطب تقليدي، ولطالما كان ردها الممزوج بضحكة ساخرة: ( ما متنا لكن شفنا يلي ماتوا)
هي بتقصد كل بنت. تزوجت بشكل تقليدي و ما أثمر زواجها، وقضت عمرها عم تلعب دور الزوجة كواجب مو كإختيار.
بتعرف.. أو بتظن أنها بتعرف، أن الحب قبل الزواج ضرورة مو رفاهية.
الحب هو العذر الوحيد يلي بيخلينا نتقبل العيوب، و حتى نحبها، و بدونه كل غلط بيتحول لجرح، و بالنهاية طاقة الاحتمال بتنتهي.
بتعرف كمان ولو ما اعترفت، أنه تفكيرها مو قانون كوني، و أن كتير زيجات تقليدية نجحت و أثمرت و عاشت عمر كامل. لكنها ما كانت عم تبحث عن نجاح اجتماعي.
ريم بحثت عن رجل يشعرها أنه وجودها إضافة مو حاجة.
دخلت المحل يلي اصبح بيتها الثاني، اخدت مكانها المعتاد، و البن بفنجان القهوة عم يرقص على صوت جورج.
ماكانت صاحبة هواية، وموهبتها الوحيدة هي قدرتها على الإقناع، وهاد يلب ثبتها بشغلها.
انفتح الباب، و رن الجرس النحاسي فوقه، لترفع وجهها و تتلاقي عيونها بعيون كريم، حست بحرارة مفاجئة، و أن أنفاسها صارت أسرع، لكنها تمالكت نفسها و رحبت فيه بابتسامة:_ أهلا وسهلا، عم تدور على شي معين؟
توقف مكانه و إيديه بجيوب معطفه الأسود، قال بجدية:_ عم دور...بس مابعرف على شو.
ضحكت بخفة و قالت:_ هيك بتعلق معي، المحل مخصص للزباين يلي بيعرفوا شو بدهم.
لوى شفافهه بابتسامة مقلوبة:_ يمكن بدي أعلق معك،
صمت للحظات:_ بتسمحيلي أعزم حالي على فنجان قهوة؟
سعلت بخفة، و نظرت عبر الواجهة للشارع، هون أصحاب المحلات بيعرفوها، و شربه للقهوة معها رح يحرجها كتير، ابتسمت بمجاملة وقالت:_ بعتذر منك، صاحب المحل مابيسمح بهالشي.
رفع حاجبيه، اقترب من الطاولة و لمس شال من الصوف وقال وهو عم ينظر لها:_ من المرة الماضية في اغنية لفيروز معلقة براسي.
قطبت حاجبيها و نصف ابتسامة على فمها:_ شو هي؟
جاوب بابتسامة جانبية و نظرة حذقة:_ نحن والقمر جيران
خجلت، ابتلعت ريقها و تمسكت بكوب القهوة، قالت بصوت خفيض:_ أنا مابسمع فيروز لأنها خطيرة، بتخلي الواحد يحن لأشياء مابيعرفها.
أجابها بابتسامة واسعة:_ وهذا بالضبط سبب حبي الها، على كلٍ مارح أحرجك بالقهوة، حبيت بس مر و شوفك، أنا بشتغل قريب من هون.
أخرج بطاقته و وضعها على الطاولة:_ هاد رقمي، و تذكري أنك مديونة بفنجان قهوة لأنك خجلتيني، بالاذن.
خرج و لحقه رنين الجرس و بقيت ريم بمكانها مأخوذة فيه، معقول بعد كل هالانتظار يجي الحب هيك؟ سلس و سهل وعفوي؟
تأملت البطاقة، اسمه الكامل....محاسب...رقمه الخاص، يعني ترك الكرة بملعبها وترك القرار الها.
رجع قلبها يرجف و خبت البطاقة بجيب معطفها و علت صوت جورج:
" أنت و أنا ياريت عنا كوخ مخبى بفي الحور و الكينا"
سألت نفسها:_ شو رح تعملي يا ريم؟ رح تتصلي؟ إيمتى؟ و رح توفي الدين يلي عليكي؟
مافكرت كتير بالجواب، ابتسمت و ارتشفت من القهوة، و القلب عم يحلم ببكرا.
شادن
هالمرة وضعي مختلف، و الطريق متغير و قلبي عم يدق، ليش ؟
بالعادة يلي بيقرأولي إناث و متعودة على تبادل الآراء بيني و بينهم، لكن يكون القارئ رجل و صاحب نظرة ثاقبة...هي جديدة.
فجأة رن براسي سؤال رشا (إذا عرف أنك مطلقة رح يبقى على ماهو؟)
لكني نفضت عني هالترهات و أقنعت نفسي أنه تعامله طبيعي. وصلت للدار، مشيت بهدوء و إيدي شادة على ملف الرواية، سلمت على السكرتيرة و انتظرت خمس دقايق قبل ما تدخلني.
هالمرة كان ناصب طاولة جنب المكتب، و مجهز اللاب توب، وفنجانين قهوة، رحب فيني بنفس الابتسامة.
_أهلا وسهلا كاتبتنا.
جاوبت بخجل:_ أهلا فيك استاذ
_المرة الماضية ماعرفتك باسمي، أنا الياس.
قلت باستغراب:_ دار الريان؟ ظنيتها على اسمك
ضحك بخفة وجلس مكانه:_ هذا اسم أخي المتوفي، الحقيقة هو شهيد و حبيت خلّد اسمه بأكتر طريقة بيحبها.
لمس شي بداخلي، معقول في رجل بيفكر بهالطريقة؟ كنت مفكرة بس أبطال الروايات عندهم إحساس، و الرجال الحقيقين مالهم فيه صلة.
ابتسمت بشكل بسيط:_ الله يرحمه
_تسلمي، خلينا نبلش شغلنا.
جلست على الكرسي الفارغ خلف الطاولة، و كانت المسافة بيننا جيدة، فتح اللاب توب على ملف روايتي و بدأ حديثه بكل مهنية:
_ عندك الاستهلال ممتاز، لكن... كنت بحب اكتر لو وضحتي شوي عن خلفية البطل قبل ما تبدأي الحدث الرئيسي.
قلت بجدية:_ استاذ، هي طريقتي بالكتابة، أنا بشوف من الممل للقارئ أنك تقله شو وصل البطل لهيك حالة، و ليش ارتكب فعلته بالاول، لازم نشد القارئ بالحدث و بعدين نسرد خلفياته.
ابتسم و يده موضوعة على لحيته و عيونه على الشاشة:_ متل مابدك، بس تذكري أني على تواصل مع شريحة قراء كبيرة و متنوعة.
نظرت له مباشرة:_ نحن اتفقنا التغيير شكلي مو جوهري، وحضرتك عم تمس جوهر القصة
أومأ بموافقة هادية:_ طيب لاتنفعلي، ما عم طالبك تغيّري روح النص، عم طالبك تساعدي القارئ يدخل عليه بدون ما يمل.
سحبت نفس ببطء، و حسّيت إني فجأة مو كاتبة جايّة تناقش عملها… حسّيت إني عم دافع عن طفلتي.
_ أنا بخاف كتير من الشرح الزايد، بخاف يقتل الغموض.
رفع عينه من اللابتوب و ثبتها عليّ، نظرة قارئ قبل ما تكون نظرة مدير:
_ و أنا بخاف من الغموض لما يصير حاجز.
أكمل بهدوء مهني ما فيه ذرة مجاملة:
_ شادن، النص تبعك ذكي، بس ذكاؤه عالي النبرة. القارئ أحيانًا بده إيد تمسّكه أول خطوة، مو أكتر..
_ يعني بدك تمهيد… مو تفسير؟
ابتسامته هالمرة كانت انتصار صغير.
_ بالضبط
سجلت ملاحظتي على ورقة جانبية، ارتشف من قهوته و أشار لفنجاني، وقبل ما نكمل رن هاتفي، نظرت
"أدهم"
قلت بهدوء:_ ضروري رد
_خدي راحتك
فتحت الخط و فورًا أجاني صوت بنتي سنا، عم تبكي و تتنهد، وصوت بكاء ملك كان واضح كمان.
ما تمالكت حالي وقلت بصوت مسموع:_ شوفي ماما؟ شو صاير؟
جاوبتني سنا:_ ماما بابا ضربنا!
كأنها رمتني على بير عميق، نهضت و وقفت جنب الشباك، بس نبرة صوتي بقيت على حالها:_ ليش ضربكن؟
قالت سنا:_ لأنه أخدنا 5 بالإملاء
جاوبتها بانفعال:_ و إذا أخدتوا خمسة؟ أنتوا صغار و عم تتعلموا!
لكنها بكيت أكثر و قالت:_ ضربنا بالحزام!
صدح صوتي:_شو؟؟
انتبه الياس و التفت ناحيتي، لكني ما اهتميت و قلت بعصبية:_ عطيني أبوكي
كانت أعصابي عم ترجف، و فقدت السيطرة على نفسي، و انهلت عليه بالصراخ مجرد ماسمعت صوته:_ أنت كيف بتضرب بنات صغار؟ شو مشكلتك؟ عم تحااربني فيهم!
قال بعجرفة ولؤم:_بناتك مايعين، درستهم بدل المرة ألف و مع هيك جابوا علامات متدنية وهاد جزائهم
تحولت نبرتي للرجاء:_حرام عليك، هدول ماببفهمو، طول بالك عليهم، بعدين أنت بتعرف انه وضعهم......
ترددت، بلعت الكلمة لكنه كمل عني:_ كملي....وضعهم مو مستقر، لأنه أمهم الكاتبة المخضرمة قررت تتركهم تلحق أحلامها ، فضلت حالها عليهم!
يكون بعلمك أني ماعاد أسكت لهم وسايرهم، و رح تشوفي أنت وياهم من اليوم و رايح.
صرخ على البنات متقصد يسمعني:_ فوتوا على غرفتكم يلا!
و سكر الخط بوجهي.
رجعت لمكاني، وحسيت شي بداخلي عم ينهدم، ماحسيت أني عم أبكي إلا لما نزلت دمعتي على الورق، و الياس كان ساكت، محترم يلي صار، و اكتفى أنه يناولني منديل.
مسحت دموعي و كابرت وابلتعت رغبتي بالانهيار، قال بعد برهة صمت:_ اعتبريني ما سمعت شي
ماقدرت أرفع راسي، ألف كلمة جواتي لكن ولا وحدة شقت طريقها للخروج، بقيت ساكتة.
انكشفت قدامه قبل أواني، و قصتي الحزينة انفضحت أوراقها، بلشت الخواطر تهاجمني، أحزاني كلها نهضت بهاللحظة، غمضت عيوني، حاولت أتمالك حالي لكن وين المهرب إذا الانسان حاصرته أفكاره؟
كيف الواحد بيطلع من راسه و بينسى أفكار عم تتناوشه و تفترسه، حسيت شريط حياتي عم ينعاد براسي و يتكرر و يتكرر، و كل هاد تزامن مع وجع بصدري ، و المهرب كان الكلام، فانفلتت جملتي بدون تركيز:
_ صرلي سنتين ماشفتهن.
زفر و سكر اللاب توب و التف لجهتي، قال بنبرة مدروسة:_ صدقيني إذا بقلك أني حاسس فيكي، أنا عندي أخت مطلقة، و كل مطلقة هي بطلة قصتها، وأنت بالذات...محاربة. و هذا مو مديح أو مجاملة بالعكس، أنت واضح من أي تجربة طلعتي، وبالاساس إنهاء زواج فاشل بيحتاج شجاعة كبيرة، فكيف بأنثى أنهت تجربة فاشلة، و نجت من علاقة مؤذية، و بدأت طريق جديد و نجحت فيه.
الكتابة مانها أمر سهل و لا بسيط، و تألقك فيها دليل عمقك، فلاتستهيني بنفسك، ولا تسمحي لعاصفة تحنيكي، أو كلام عابث من زوجك السابق يخليكي تتراجعي عن يلي وصلتي له.
رفعت راسي و نظرت له وهو عم يحكي، الدموع الباردة تمسكت برموشي، و حسيت بكلامه كأنه سلسبيل بعد نهار كامل من العطش.
ابتسم ببساطة و كمل:_ أنا رجل وبفهم تصرف طليقك، مجرد وسيلة ضغط لتفكري ترجعي.
ارتجفت ذقني وقلت بحزن:_ بس هدول قطعة مني، مابيصير يضغط عليي فيهم.
أكمل بهدوء أكبر:_ ولأنهم قطعة منك، لازم خطواتك تكون ثابتة و واثقة، حتى يجي الوقت يلي تسترجعيهم فيه بسرعة.
التفت و فتح اللاب توب و قال:_ الشجاعة أنك تكملي و أنت مكسورة، وقتها بس بيكون للنجاح لذة مختلفة.
غريب، الياس غريب، فكرت للحظة أنه رح يبدأ دور الرجل الشرقي المنقذ ، ورح يعرض مساعداته المختلفة و مو بعيد يكون عنده ابن عم محامي و يوكل لي اياه بقضية حضانتي على حسابه.
هاد الواقع، كل رجل بيعرف انه أمامه انثى مطلقة بيتحول لمنقذ، لفارس على حصان أبيض.
يمكن مو وقت السخرية بس هاد الامر لطالما استفزني، كون المطلقة_بنظر المجتمع_ جناح مكسور و بحاجة حدا يسندها.
لكنه نسف هالنظرية، و انهى حديثه و رجع للشغل، و بمنتهى. المهنية و لا كأنه دار بينا حديث، خاص نوعاً ما، يمكن مو خاص، مابعرف.
رجع يناقشني، ويحكي بنقاط و تفاصيل ماكنت منتبهة الها بالرواية، و ببطء قدر يلهيني عن وجعي، و اندمجت بالحديث، متجاهلة أنين قلبي يلي ما سكن.
مرقت الجلسة بسلاسة، و انا عم سجل ملاحظاتي و أشطب و ناقش بعقل حاضر.
ما بنكر اني استسغته، الحل الامثل بعد كل انهيار أننا ننحي عواطفنا شوي، نخدرها، ننيمها، و نسمح للعقل يتولى الريادة، ريثما تكون هديت فورة المشاعر.
وهذا بالضبط يلي عمله معي.
انتهت جلستنا فحملت أوراقي و شرعت بالمغادرة، فقال:_ خدي أسبوع ، عدلي يلي اتفقنا عليه، موعدنا الاسبوع القادم بنفس الوقت.
أومأت موافقة، و ارتسمت ابتسامة على فمي، و أنا على الباب استوقفني:_ شادن...يلي عم تعمليه هلق، رح تشكري نفسك عليه لاحقاً.
هزيت راسي، و طلعت، مو أخف...مو أقل حزن، بل متصالحة أكتر مع نفسي و مع خطتي للنجاة.
رشا
رشا، الطالبة النجيبة..صاحبة العلامات العالية،يلي رغم خطبتها لرامي و انشغال قلبها بالحب، عقلها بقي مركز بمستقبلها.
خرجت من محاضرتين متواصلتين منهكة، و كانت بأمس الحاجة لكوب نسكافيه يعدل مزاجها.
و بطريقها للخروج لاحظت وجود رامي مع اخته، واقفين عند الباب و على مايبدو الحديث الداير بينهم جدي.
ما قدرت تمنع ابتسامتها من الظهور و اقتربت بخطوات سريعة و قلبها عم يرفرف لرؤية رامي.
قالت بفرح:_ نورت الجامعة
التفت لها رامي، ابتسم و رد:_ منورة بوجودك، كنت عم قول لرباب تناديكِ لنروح على بيت أهلي سوا، أمي عازمتك عالغدا.
ردت بخجل:_ عازمتني؟ بس أنا....
اقترب و مسك يدها وقال:_ مابدها بس، خبري أخواتك أنك رح تتأخري
قالت رباب:_ أي رشا، أمي مشتاقتلك و عاملتلك محاشي رح تاكلي ايديكِ وراهم.
زفرت بهدوء، و بعدها أومأت مجيبة و خرجت معهم، كانت سيارة رامي مركونة بمكان قريب، فأحضرها و اتجهت لبيت أهله معه و مع أخته.
رامي كان طبيعي، و كذلك رباب، حست لوهلة أنه ترحيبهم و إصرارهم على روحتها مبالغ فيهم، لكنها تجاهلت إحساسها و ركزت أكثر على سعادتها بوجودها معه.
وصلوا بيت أهله، وصوت أم رامي سبقها:_ يا أهلا وسهلا بكنتي، نورتينا.
و بعد لحظات ظهرت، وجهها البشوش، خدودها الممتلئة و ضحكتها الدافية، احتضنت وجه رشا و قالت:
_يسعدلي هالمسا، أهلا وسهلا
ابتسمت رشا بخجل، و نقلت عيونها لرامي يلي بادلها الابتسامة و سبقها بالدخول، بينما تولت أمه إدخالها
جلست على طرف الكنبة و حقيبتها بحضنها، تراقب عيلة رامي يلي فجأة صارت منهم.
أمه و أبوه و أخته....و هو.....هو يلي احتل قلبها كله، كيف بيقعد، كيف بيحمل هاتفه و سرعة نقره على شاشته، كيف بيدخن و كيف بيمازح أبوه، كان عالمها، باختصار شديد، رامي عالمها كله.
بين الحين و الآخر كانت عيونهم تلتقي، بنظراتها لهفة لا تقاس، و نظراته لحد الآن عجزت عن تفسيرها.
على الأكل كانت الطاولة عامرة، محاشي و سلطة و مقبلات،و رامي جنبها ، منتبه لها و لأكلها، و يملي صحنها قبل ما يفضى، و يسكب لها من كل صنف حتى اتخمت.
كان دائماّ مدللها بإسراف، ينتبه لأصغر تفاصيلها، و كأنه بيعرفها من يوم ولدتها أمها.
بعد الأكل انصرف كل واحد من العيلة ليعمل شي، و بقيت معه لوحدها بغرفة الضيوف، ناولها فنجان الشاي، ولأول مرة بيجلس جنبها و بيحيط كتفها بذراعه، استغربت، سرت حمم بجسدها و احمروا خدودها، و قلبها آه من قلبها.
لكنه ماتوقف عند هالحد، فرفع يده و احتضن وجنتها بباطن كفه الدافي، و لف وجهها ناحيته، رفعت مقلتيها فوجدت نظراته مركزة على عيونها، قال بنبرة منخفضة:_ أنتِ كتير بتعنيلي.
ابتسم، ودنا من جبينها و قبله قبلة طويلة، كانت خجولة جداً، لكنها لمحت بعيونه لمعة غريبة لما ابتعد عنها، رغم ابتسامته، عيونه....قالت شي ثاني.
قالت بصوت ناعم:_ رامي.
أعاد النظر لوجهها بابتسامة و رد:_ ما أحلى اسمي بصوتك.
وضعت كفها البارد فوق كفه وقالت:_ مابيصير نقعد هيك، اهلك ممكن يفهمونا غلط.
ضحك بخفة:_ أنت حلالي، خطيبتي، ماحدا بيقدر يحكي كلمة.
_بس....أنا بخجل لو حدا شافنا.
ابتعد عنها شوي وقال:_ ماعملت شي انا، رشا... أنت رح تكوني زوجتي، لازم تتعودي على قربي منك، مابدي يصير عرسنا و أنت لسا بتخجلي مني و بتخافي، أنا.....مستحيل آذيكي.
ردت بنبرة خافتة:_ أنا واثقة فيك
وقبل ما تكمل كان معانقها، شد يديه حولها، وهمس لها:_ مابدي أكثر من هيك، هيك احسن.
غمضت جفونها و ابتسمت ، وبادلته العناق الدافي، ابتعد عنها بعد لحظات و شغل سيجارة فتجرأت و عانقت ذراعه و ميلت راسها على كتفه، و سعادة غامرة سرت داخلها، كيف لا؟ و اجمل لحظات الحب هي لحظات الوصال.
#يتبع
Stories 📖:
#حب_البنات
#فيلوفوبيا
#الجزء_الرابع
شادن
مرق الاسبوع بسرعة، بين تنقيح و تعديل على روايتي، و قصص اخواتي يلي ما بتخلص.
بالحقيقة... أنا مخلصة للكتابة بشكل رهيب، حتى لو كتبت سطر واحد باليوم، فالمهم عندي أنه أصابعي تلامس الحروف، و روحي تحلق بفضائها الكتابة.
و رغم إخلاصي الها، إلا أني بسرق الوقت سرقة لأكتب، مابين دراستي و بناتي و أخواتي و البيت، بجاهد لخصص ساعة هدوء أكتب فيها.
أنا ما انولدت كاتبة، و لا فكرت بيوم تكون الكتابة هدفي، لكن... مع ضغوط الحياة المستمرة، كانت الحروف تناديني، وبشكل لا ارادي تحولت من كتابة المذكرات لكتابة الروايات والقصص.
و متل ما الابداع بيولد من رحم المعاناة، انولدت قصصي من رحم حياتي الصعبة.
أنا بطبيعتي حساسة جداً، و يمكن قصتي مقارنة بقصص مأساوية تكون لطيفة، لكنها بنظري كانت العكس تماماً.
موعدي مع الياس بكرا الصبح، لأنه سبق و اتصل فيني وطلب مني روح لعنده بكير، بحجة انشغاله بعد الظهر.
و بسهرتنا المعتادة، كانت رشا عم تهمس لريم آخر تطوراتها الغريبة مع رامي، و ويضحكوا مثل مراهقتين صغار.
جلست معهن، و سألت رشا:_ أي خبرينا وين وصلتي مع السيد رامي؟
جاوبت رشا بعدما شبكت أصابعها:_ شادن... لاتحسسيني أني عم أغلط، رامي زوجي شرعاً.
قالت ريم مدافعة:_ اي ستي، رامي زوجها، وبيحق له.
رفعت حاجبي مستنكرة:_ و أنت من إيمتى بتدافعي عنه؟
تكتفت ريم وقالت بابتسامة ماكرة:_ من وقت ما بلش يحسس أختي أنه بيحبها عنجد.
وجهت كلامي للتنتين:_ ليش الحب الحقيقي مقرون بالتواصل الجسدي؟ يعني إذا ما عبر عنه بهي الأفعال مابيكون بيحبها؟
جاوبت ريم بجدية:_ لا، لأن الرجل مو مثل المرأة، و هاد التواصل هو تطور طبيعي للحب، الرجل بيعبر عن حبه بالأفعال.
كملت بسخرية:_ شو مفكرتيه بطل من رواياتك ليعبر عن حبه بطرقك المفزلكة؟
حبيبتي الواقع مختلف، بالحياة الرجال بيعبر عن حبه بهي الأشياء، لهيك أنا مشجعة رشا و بدي ياها تبطل تخجل منه.
ضحكت باستهزاء، فتحت اللاب توب و قلت و أنا عم أنظر للشاشة:_ هاد الكلام لما تكون زوجته و ببيته، مو خطيبته و ممكن بأي لحظة يصير شي يفرقهن عن بعض، و تكون الفاس وقعت بالراس و ماعاد يفيدها ندم!
قالت رشا بنزاقة:_ بعيد الشر! ليش عم تحكي هيك؟ رامي مستحيل يتركني، هو كتيربيحبني، و كلامك هاد.... هو...هو...
ميلت راسي و نظرت لها:_ كملي...انعكاس لتجربتي بالزواج الفاشل.
جاوبتني بخفوت:_ أي صحيح، أنا بفهم خوفك عليي بس هاد مابيعني أنك تسقطي تجربتك على تجربتي.
هزيت راسي بقلة صبر:_ أنا عليي أنصحك، الرجال مالهم أمان، و الحب الحقيقي مفقود بأيامنا هي، و على فرض كان موجود عند رامي، ففي دلائل كتيرة عليه غير هي التصرفات.
قفزت من مكانها لجنبي و قالت بفضول:_ متل شو؟
لكن ريم قالت:_ على أساس جربتي الحب الحقيقي لتعرفي؟ لك شادن اصحي من أوهامك،الحب يلي برواياتك مو موجود بالواقع!
بلحظتها سكرت اللاب توب و قلت لريم:_ و كريم؟ شو بتصنفي مشاعرك تجاهه؟
تبدلت ملامح ريم، وقالت باقتضاب:_ إعجاب، مو أكثر
ضحكت و قلتلها:_ أنا براهنك، أنه بعد ما تعزميه على فنجان القهوة رح يتغير كل شي، و تجي لعندي وضحكتك لورا أذنيكي و تقولي لي بلشت حبه يا شادن!
ضحكت ريم و قالت:_ يمكن ما انطر لبعد عزيمة القهوة
ضربت على جبيني وقلت:_ أخواتي رح يجننوني ياربي.
ضحكنا ثلاثتنا، على نفسنا، وعلى مشاعرنا المرهفة زيادة، و على توقنا الرهيب للحب، يمكن لإحساسنا بالحرمان منه، يمكن لأنه كل واحدة فينا بحاجة الشعور بالاحتواء بعدما نبذونا والدينا،و التفت كل واحد فيهم لحياته.
ضحكات قصيرة انتهت برنين هاتفي و اسم امي على الشاشة، فتحت الخط و ظهرت مقابلنا، وجهها مرتاح، شعرها منسق، و ملابسها فاخرة، ماعدا البيت الفخم وراها.
_ مرحبا يا بنات، طمنوني عنكم.
نظرنا ببعض بابتسامة متواطئة، و جاوبناها على التتالي. سردنا حديث صغير مع أمنا، سطحي بما يكفي، و بعيد كل البعد عن حديث أم و بناتها، و المكالمة كانت قصيرة، لأنه زوجها ناداها لتتعشى معه، و كانت أصوات أخواتنا الثنين مسموعة لعندنا، فأنهت المكالمة و راحت لشأنها.
دقائق قليلة كل كم يوم، مع أمنا أو أبونا، بتحسسنا أننا خرجنا من إطار حياتنا الطبيعية و عشنا بقالب منكرهه، قالب المنتصف، لا إلى هؤلاء ولا إلى هؤلاء.
كأننا مننتمي لبعضنا و بس.
بعد ما سكرت الخط، خيّم صمت قصير. صمت متعوّدين عليه.
الصمت يلي بيجي بعد ما نعمل دور البنات (التمام) قدّام أهلنا، ونرجع لحقيقتنا من جديد.
قلت بهدوء: _ تأخر الوقت… بكرا عندي موعد بكير.
أومأوا، وكل وحدة انسحبت لعالمها.
بيتنا الصغير تقسم لثلاث عوالم متوازية:
ريم وقلبها على عتبة احتمال
رشا وقلبها غارق بالأمان
وأنا… قلبي عم يحاول يضل ثابت.
تمدّدت عالسرير، حدّقت بالسقف.
فكرت بقدّيش الإنسان ممكن يكون محتاج فكرة (الحب) أكتر من الحب نفسه.
كيف بنغضّ الطرف عن الإشارات الصغيرة، مو لأننا ما منشوفها…
بل لأننا ما بدنا نشوفها.
رشا
الصبح و مع تثاؤب الشمس و نشر شعاعها بأرجاء المدينة، كانت رشا سابقة أخواتها بالخروج من البيت، لأنه رامي صار كل يوم ياخدها مشوار صغير بالسيارة قبل الجامعة.
بمعطفها الأحمر الياقوتي، و شعرها المموج، وقفت على عتبة البناء تنتظره، و على الوقت اجا.
فتحلها الباب بابتسامة عريضة، وركبت جنبه ليدور السيارة و ياخذها لمكانهم المفضل.
بالأحرى مكانه هو، على قمة جبل كاشفة المدينة، فرشا كان عندها رهاب المرتفعات، و لكنها تحاملت على نفسها كتير، وتجاهلت خوفها من الوقوف على الحافة، بس حتى تكون معه.
وصلوا للمكان، فأطفأ السيارة و ما نزل، شغل الراديو ليصدح صوت فيروز، كتقليد صباحي أبدي، من وقت غنت فيروز لأول مرة، و حتى نهاية الزمان.
" وقلتلك يا جاري احميني من الهوا
نحن بالبراري تربينا سوا
ما تاري سوا... أنت و هالهوا
اتفقتوا عليي و ماعندي خبر
لا تعتب عليي أخرني القمر"
قال رامي:_ ما أحلا صوت فيروز، خاصة بالشتاء.
جاوبت رشا بصوت حاني:_ وجودك بيحلي كل شي بعيوني رامي.
ابتسم لها، و امسك يدها، وقرب ليخطف منها قبلة، لكنها و فجأة بعدت عنه، فبهت و استغرب، قال:_في شي رشا؟
شدت شفاهها و قالت بقلب مرتجف:_ ماعاد في مطرح للكلام بيننا، يعني أنت صاير كل ماشفتني بدك.....
أزاح طرف غرتها وقال بهدوء:_ من شوقي الك.
رفعت أكتافها:_ بس أنا حابة نحكي، ندردش، افتح لك قلبي و تفتح لي قلبك.
زفر و ابتعد، شغل سيجارة و قال:_ افتح لك قلبي... رشا...افهميني، أنا بالي مشغول، شغل و مشاكل و تجهيز البيت و هم العرس، يعني أنا بشوفك هالساعة لأنسى همي، و روق معك.
ابتلعت ريقها و أمسكت يده:_ منروق بس نفضفض لبعض، في كتير كلام أنا حابة قلك ياه.
نظر لها بطريقة مختلفة، نظرة عيونه حملت معاني عصيت عليها، قال:_ رشا...لازم تفهمي أنه الرجال مابيحب يحكي، و أنا شخصياً ما بعرف عبر عن مشاعري أو همومي، و ببساطة مابنسى مشاكلي إلا هالساعة يلي بقضيها معك، لهيك بلا ما تعكرينا.
جاوبته بنبرة مشوبة بالحزن:_ بس أنا بدي نحكي!
زفر بعصبية، دور السيارة و قال:_ شكلك اليوم مزاجك منكد و بدك تنكديني معك،رح وصلك على الجامعة.
انكفئت على نفسها، وساد الصمت بينهم لبقية الطريق، و كأنه نسمة باردة شقت طريقها لقلبها.
ما لقت شي تقوله، و احتارت كيف تعبر له عن افكارها، ففرض الصمت نفسه، حتى انها نزلت لجامعتها بدون ما تسلم عليه.
بقيت على المقعد بالحديقة و ما رغبت أبداً بالدخول لمحاضرتها، ليرن هاتفها بعد حوالي ساعة، و كان رامي المتصل، قال بنبرة دافية:_ أنا آسف إذا انفعلت معك من شوي
قالت بهدوء:_ ولا يهمك، بتصير
_ بس رشا، لازم تفهمي شي، أنا زوجك ولازم ترضيني.
سألت بسذاجة:_ كيف يعني أرضيك؟
_ مابعرف رشا، سألي أخواتك، سألي رفقاتك، نحنا العلاقة يلي بيننا مو عابرة، و هي الأشياء بتصير بين أي تنين، و أنا بس بدي منك تنسيني، تنسيني همي.
قالت بأناة:_ ليش حبيبي الهم بينتسى هيك؟ أنا بعرف الهم بيخف لما نحكي عنه، و نلاقي حدا يسمعنا و يستوعبنا
جاوبها بانفعال:_ قلتلك الرجال غير، الرجال مابيحب يحكي، فهميني بقا!
ردت بخضوع:_ خلص لا تعصب، بوعدك أتفهمك، و حاول أرضيك.
_طيب، بشوفك اليوم المسا؟
ضحكت بخفة:_ بعزمك على العشا ببيتنا
زفر براحة و تغيرت نبرته :_ تمام، شو جبلك معي؟
جاوبت بابتسامة عريضة:_ أنت كريم و أنا بستاهل
_تكرم عيونك، يلا بشوفك.
سكرت الهاتف، و فرحت مثل الطفل بتصليح شي كسره، و كأنها نجت من مأزق، أو انحلت أعظم مشكلة بحياتها.
تأملت صورته على شاشة الهاتف، لحيته، عيونه، ابتسامته، كل شي فيه بيذوب قلبها مثل السكر بالمي.
لكن...صوت خافت همس بعقلها، معقول تذوبي انتِ فيه؟ مستعدة تذوبي شخصيتك بس لتتماهي مع رغباته؟
و مين بيجاوب على اسئلة عقله؟ العاشق خاصة....بيضع العقل طي التجاهل و بيكمل بعشقه حتى آخر رمق، و هذا كان حال رشا، العشق حكمها و تمكن منها بالكامل.
ريم
توجهت للمحل بكير، جلست خلف الطاولة و عينها على الشارع المسقي بالمطر، و الحركة الخفيفة للناس، هدوء الصباح بيزرع داخلها سكينة لا توصف.
المحلات المفتوحة قليلة، و الباقيين لسا عيونهم مغمضة، والصبح عم ينظر للمدينة بعين نصف مفتوحة.
قلبها نبض بسرعة، و كريم محتل فكرها من لحظة فتحت عيونها، تتصل أو لا؟ ماقدرت تحسم قرارها.
طالعت البطاقة من حقيبتها و تأملتها، شتت انتباهها صوت سيارة مسرعة، نظرت لحظة للشارع ، وشي داخلها قال لها تشجعي و اتصلي.
لحظات و كان صوت الرنين بأذنها، أول رنة..الثانية ....قلبها رجف، قالت لنفسها بعد رنتين إذا ما جاوب رح أفصل، الرنة الثالثة.....ألو
وبدل ما يستكين نبضها أسرع زيادة، ارتبكت نبرتها:_ مرحبا
صوته على الجهة الثانية كان مميز، من الأصوات الرجولية الجذابة:_ أهلين، مين؟
ابتلعت ريقها:_ أنا...ريم
_أهلا وسهلا، قالها و بدا الارتياح على صوته.
_معقول تنطريني أسبوع كامل لتتصلي؟
زفرت، وقالت بهدوء:_ بعدك مهتم بعزيمة القهوة؟
_طبعاً، إلي الشرف. إيمتى و وين؟
ارتبكت:_ فاضي هلق؟ في كافيه بالشارع يلي قبل السوق على الزاوية.
_رح تلاقيني ناطرك
_طيب....سلام
سكرت الهاتف، قلبها رح يوقف و كفوفها قطع جليد، لكنها ابتسمت بشقاوة، لملمت اغراضها و نهضت، قفلت الباب الزجاجي و اتجهت للموعد، و قلبها سابق قدميها.
و بالفعل لما وصلت كان منتظرها على طاولة مطلة على الشارع، نهض و ابتسم لها:_ أهلا وسهلا بريم
جاوبته بابتسامة خجولة:_ أهلين فيك
جلسوا، وعيونه مافارقتها لحظة، قال وهو عم يتأملها:_ سبحان الذي خلق لك هالعيون، اسم على مسمى
ابتسمت و لكن بثقة وردت:_ شكراً
_ شكراً الك ،مابوصف لك قديش نطرت تلفونك
سألت بشفة ملتوية:_ ليش؟
ضحك بخفة:_ شو ليش؟ لأنك عجبتيني كتير.
ابتسمت برضا، نظرت للشارع، سألها:_ كيف قهوتك؟
التفتت ناحيته و سندت ذقنها على كفها وجاوبت بثقة:_ سادة، متل الحقيقة.
ابتسم حتى بانوا ضواحكه، طلب القهوة و ابقى على نظراته، هبطت بعيونها على يديه، صمتت لحظات ثم قالت بهدوء:_ أنت.....متزوج؟
قطب حاجبيه، ارتبك، قال:_ لا
ضحكت بخفة:_ لا تكذب، علامة الخاتم على يسارك موجودة، يعني مالك زمان شالحه، و بعدين لاتنسى أنك أول مرة اشتريت من عندي فستان لبنت صغيرة، أكيد رح تكون بنتك.
رفع حاجبه، و وصلت القهوة و ارتفع بخارها بينهم، قال بشوية ضيق:_ ما توقعت تكشفيني بهالسرعة، لكن صحيح، أنا متزوج...زواج تقليدي، بنت خالي و عندي منها بنت.
وبصراحة رغم مرور ست سنين، فأنا ماني سعيد أبداً معها.
ارتشفت من قهوتها، وسألت:_ متوقع أنا أسعدك يعني؟
قال باستغراب:_ ريم أنت كتير صريحة و جريئة.
هزت راسها نافية:_ أنا واقعية، وقصتك من صلب الواقع، الزوج التعيس، يلي لقا فتاة عجبته، ولاحقاً بيكتشف أنها يمكن قادرة تسعده.
سألها بحنكة:_ و قصتك أنت....شو هي؟
جاوبته بسخرية:_ ثلاثينية تبحث عن الحب.
ضحك من قلبه، و ضحكت على نفسها، هي ماعرفت سبب صراحتها معه ، ولكنها بتحب الوضوح فارتأت تكون واضحة جداً، بدون التفكير بالنتيجة.
مسح لحيته و قال:_ عمرك ثلاثين؟
_ 29، بيني و بينها خطوة، وبصير ثلاثينية جادة تبحث عن مطلق أو أرمل
ابتسم و قال:_ أنت غريبة، بهالبساطة بتسخري من حالك؟
قالت بتكلف:_ مو سخرية، هي رشة سكر على الحياة.
أومأ بإيجاب:_ لتحليها، صحيح. طيب شو رأيك نتعرف على بعض؟
قالت بسرعة:_ أنا مو ناقصني وجع قلب، اليوم منتفق نكون أصدقاء، بتحكي لي همومك، بتشكي لي من زوجتك، و أسرار شغلك. بخفف عنك بنكتة، بفنجان قهوة و غنية لجورج وسوف، و شوي شوي بتقلي حبيتك، و مندخل بمتاهة الطرف التالت، و بقلك انا مستحيل أبني سعادتي على تعاسة غيري، و مشاكل و صد و رد، و زوجتك بتكتشف خيانتك، و بالاخر بتقلي خلينا نبعد لأنه الظاهر مافي نصيب.
ضحك ملئ قلبه، و هي ابتسمت بمرارة، رغم سخريتها إلا أنها حزنت شوي، فهو كان عاجبها بحق، و تمنت لو كان سيناريو تعارفهم مختلف.
انتهى من الضحك، و شربوا من قهوتهم بصمت.
نظرت للشارع من جديد، تأملها و شعر بلهفة تجاهها، لأول مرة بتعجبه بنت بهالطريقة، صحيح أنه متزوج لكن زوجته ماكانت بالمواصفات يلي بيفضلها، أو هيك بيحب يقنع نفسه.
أما ريم مختلفة، جذابة و خفيفة الظل ، والاهم أنها جدية، قال بعد شهيق قصير:_ ليش ما نختصر نص المشوار، و تكون علاقتنا جدية؟
قطبت حواجبها:_ كيف يعني؟
اراح ظهره و قال بثقة:_ أنا مستعد أخطبك، و جاهز لطلباتك، و خلي علاقتنا تكون على الملأ، مابيهمني نظرة المجتمع ولا كلام الناس، المهم أني كون مرتاح معك.
قالت باستهجان:_ كيف عرفت انك رح ترتاح معي؟
جاوبها بابتسامة:_ إحساس
تأملت الفنجان و قالت بخفوت:_خطبة فوراً؟ بدون ما نعرف بعض؟
_منتعرف الفترة يلي بتناسبك، و بلحظة بتقوليلي تعال خطبني، بكون عندك
صمتت ...تنهدت بعمق و فكرت لبرهة، رفعت عيونها وقالت بهدوء:_ كريم...عرضك مغري، و كتير حلو أني حس بأني مهمة و مرغوبة لرجل، بس....
تنهدت ثانية و كملت:_ أنا مابرضا كون الخطة ب
و لا بقبل فوت على حياة مليانة أصلاً، أو حتى كون المرأة يلي بترتاح معها و بترجع لحياتك التعبانة، تاركها تعد خسائر.
أنا كان ممكن أقبل لو كنت....
ضحكت بسخرية مريرة:_ مطلق أو أرمل، أما متزوج...فهي صعبة عليي.
يا أما بتتقدم لي و أنت فاضي، أو بلاها وجعة هالقلب
التفتت للنافذة و كملت بشرود:_ بلا ما نمشي بطريق مانعرف نرجع منه.
تجرأ و وضع يده فوق يدها وقال:_ افهميني ريم
قاطعته وقالت بإصرار:_ أنت افهمني، مابقدر كون شريكة برجل
سحبت يدها بهدوء و نهضت، قالت بتحفظ:_ طلعت العزيمة على كسرة قلب، مو على قهوة، بخاطرك.
لحظة إضافية وقفت فيها تتأمل الجلسة الي كانت تتمنى تكون مختلفة،وبعدها مشيت،و قلبها عم يعتصر بصدرها، كانت بتعرف أنها لوبقيت دقايق كمان، كانت رح توافق، لكنها انسحبت لتحافظ على ماء وجهها،و على بيت صغير من الخراب، والقلب؟؟.....مو دائماً القلب مهم.
وصدى صوت جورج داخل عقلها: " و إنه غيري خد مكاني...و إنه قلبك مش عشاني"
رغماً عنها هطلت من عيونها دمعتين، اختصروا وجع دخل لصدرها من نفس الباب يلي دخل منه الحب
شادن
الموعد الثاني. كانت الدار فاضية، توجهت لمكتب الياس و نقرت على الباب بخفة، و دخلت بعد لحظات، هالمرة كان واقف مقابل الشباك، بيده كتاب و بالثانية فنجان قهوة،التفتت و حياني بابتسامة.
شي بداخلي تخربط، بصراحة الكاتبة مابتعجب بحدا بقدر إعجابها برجل قارئ، و هذا المشهد هو المثالي لأي كاتبة.
لباس كلاسيكي، نظارة طبية مدورة، فنجان قهوة و كتاب، و ملامح مليحة و ابتسامة دافية.
كأني عم بالغ؟ طيب.....بس المبالغة هون بمحلها. ابتلعت ريقي و حاولت هدي نبضي و اقتربت كم خطوة.
قال ببشاشة بعدما اغلق الكتاب:_ المنفلوطي، كاتب من الطراز الرفيع.
ابتسمت و أومأت بإيجاب، فأردف: "لا خير في حياةٍ يحياها المرء بغير قلب ، ولا خير في قلبٍ يخفق بغير حب"
كلامه جميل و بيدخل القلب مثل الضو من مصراع باب.
هالمرة كانت ابتسامتي فيها استغراب، فقلت:_ هذا تشبيه كاتب.
قال بتواضع:_ هذا تشبيه رجل أفنى عمره بين الكتب، أنا يا سيدتي بعشق الكتب
شايفة هالمكتبة خلفك؟ قرأت كل مافيها، و عندي بالبيت مكتبة مشابهة، يعني ماصرت مالك دار نشر من فراغ.
مد يده لأجلس على المقعد الجلدي، جلس جنبي و اللاب توب مقابلنا على طاولة منخفضة و فناجين القهوة عم تنتظرنا.
قلت له اثناء انشغاله بفتح ملف الرواية:_ كان أولى انك تصير ناقد، مو ناشر.
ابتسم بشكل جانبي، و جاوبني بدون ما ينظرلي:_ أنا متذوق، بحب عيش متعة الكلمات، وبحب القراءة تسحبني لعالمها.
أما الناقد بيقرأ بعقل يقظ، مثل صياد بغابة، بيشوف الجمال بس ما بيستمتع فيه، لأنه عقله منتظر فريسة ينقض عليها.
أنا القراءة بالنسبة الي مخدر من صنف فاخر جداً، و للمفارقة هو مخدر بمتناول الجميع، لكن ما بيدمنه إلا كل محظوظ.
ضحكت بخفة وقلت:_ أنا بحب القراءة كتير
قاطعني:_ لازم تحبيها و إلا كيف رح تتطوري؟
_بس مو لدرجتك
التفت ناحيتي وقال:_ يمكن لأنك كاتبة، الصنف متشابه ولكن الطعم مختلف
رفعت حاجبي بابتسامة:_ كل الطرق تؤدي إلى روما
ضحك، نظرلي ثواني زيادة، و ثم عاد للرواية، و بدأ النقاش الجدي بيننا.
و بعد حوالي ساعة، استند لظهر الكرسي، نظر لي و الفنجان بين يديه،قال:_ قولي لي شادن، ليش بتكتبي؟
رفيت بجفوني أكثر من مرة، سحبت نفس و جاوبت بروية:_ لأني بعرف طوع الكلمات، و بنتبه للتفاصيل، و لأني بحب الكلام المكتوب أكثر من المحكي، و بالكتابة بقدر أحكي أفكار كثيرة، صعب تنقال بصوت عالي.
ارتشف من القهوة، قال:_ جواب حلو، بس بارد
قطبت حاجبي:_ بارد؟
اومأ بإيجاب:_ جواب كاتبة شاطرة، بس مو حقيقية.
مابنكر، داس على كبريائي بجملته، فكان لازم لاقي رد يلجمه،صمتت لبرهة و قلت:_ يا سيد الياس، أنا بكتب لأني مابعيش إلا من خلال الكتابة، لأني برسم المشاعر على الوجوه و بعطيها صوت بكلماتي، بكتب لأن الانسان لازم ينكتب لينفهم، ولأن سنيني القليلة بهالكون، بتنعطى عمر اطول لما أكتب.
ابتسم بخفة، انحنى تجاه اللاب توب و قال:_ هيك تعلمتي أنه الجمهور مانه بحاجة الحياد، بل بحاجة الصدق، لأن الكتابة هي آخر ما تبقى من الصدق بعالم كاذب.
الجلسة القادمة هي الأخيرة، وبعدها بتروح الرواية على المطبعة.
_طيب، أنا بستأذن
_ إذنك معك
نهضت و مشيت ببطء ناحية الباب، يمكن كنت منتظرة منه تعقيب، أو شي مجاملة، لكني حصلت على الصمت.
مابعرف ليش حسيت بانزعاج، رغم أني افحمتهه بردي لكني نزعجت من تراجعه خطوة، ياترى بيحق لي انزعج؟
و لاعم اتمادى بأفكاري و مشاعري؟
بكل الأحوال أنا بأي حق عم فكر بهالطريقة؟ أين الثرى من الثريا؟
أنا مجرد كاتبة مغمورة، شهرتي محدودة و طيريقي طويل و وعر، وهو بأوج نجاحه و عنده مكانة اجتماعية رفيعة.
يبدو أني بالغت بتقدير نفسي، ابتسمت بأسى، وشقيت طريقي نحو الجامعة.
#يتلع
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
`
[٢٠/٢، ٩:٠٧ م] null: *؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم حب البنات`*
*❴🔢❵الـــبـــــــــــ❴3️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
Stories 📖:
#حب_البنات
#فيلوفوبيا
#الجزء_الخامس
شادن
اليوم ثلاثي الأخوات مو تمام، ريم من وقت دخلتها و هي معكرة حتى رفضت تتغدا، و رشا كانت مرتبكة قبل زيارة رامي، و أنا مابنكرأني تأثرت بوصف الياس الي بالبرودة، ومو اي برودة لا...قال كاتبة باردة!
الساعة 7 اندق الباب، و كالعادة هرولت رشا لتفتح لرامي، كان اللقاء طبيعي جداً، مصافحة طويلة و ابتسامة دافية جداً من رشا
دخل وسلم عليي:_كيفك شادن؟
جاوبت بابتسامة:_ أهلين صهري، تفضل.
قعد بمكانه المعتاد، تلفت حوله و سأل:_ شو وينها الوسوفية ماني شايفها؟
بذات اللحظة فتحت ريم باب غرفتها، كانت بملابس النوم و لافة حولها شالها الصوف الابيض، قالت:_ ليكني هون، كيفك رامي؟
جلست مواجهه، و تربعت على الكنبة. نظر لها بإمعان و شعر انها على غير العادة، فضحك و مازحها:_ تاخديلك سيجارة تروقي راسك؟
جاوبت بصوت جاف:_ ليش لا؟
شهقت رشا بتلقائية:_ ريم بدك تدخني؟
زمت ريم شفاهها، طالعت أختها، و نكاية فيها مدت يدها لرامي ليناولها سيجارة و قداحة، وشغلتها و هي عم تنظر لرشا.
قال رامي:_ اليوم مانك على بعضك، شو القصة؟
نفثت ريم الدخان وقالت:_ أكلة كراش عاطفي
بينما ضحك رامي من قلبه، و رشا ابتسمت، نظرت لأختي بتأمل، عرفت أنها بتقصد كريم ، وأن الموضوع أكبر من مجرد (صدمة عاطفية)
جلست جنبها و رشا أخدت مكانها جنب رامي، ريم مانها مدخنة، لكنها ظهرت كواحدة فعلاً، كانت تسحب الدخان لصدرها و تحبسه جوا كأنها متقصدة تحرقه، و بعدها تنفثه بحرقة واضحة.
قالت رشا بمرح:
_ شو رمروم؟ فرديها مافي شي مستاهل
جاوبها رامي بمزاح:_ مستقلة وحدة بعمر ريم تاكل كراش عاطفي؟
نظرت لهم ريم بحدة، قالت بنزاقة:_ وحدة بعمري؟ على أساس أنت بالروضة؟
ضحك وقال:_ صحيح أني أكبر منك، بس على الاقل خاطب، مرتبط....مو متلك ياحسرة، لهلق ماحدا دق بابك
قلدته بصوت رفيع وقالت:_ والله أنا مابيعبي عيني مين ماكان، وإلا كنت هلق جارة ورايي ثلاث أولاد.
قال بسخرية:_ ألف الحمدلله، نحن فيكي مو خالصين كيف بثلاث نسخ؟
سحقت السيجارة بالمنفضة وقالت:_ أنت مانك ناوي على خير اليوم
جاوبها بابتسامة:_ عم نهز الورد لك ريم
قالت رشا:_ العشا سخن ياجماعة
رد رامي:_ يلا منتعشا كلنا سوا، لاتزعلي ريم بكرا بيجيكي سيد سيده
ابتسمت ريم بمجاملة، و تعشت بعد إصرار من رامي، و بقيت سهرانة معهم، أما أنا دخلت لغرفتي.
فتحت اللاب توب، و بدون شعور لقيت أصابعي عم تنقاد خلف الحروف.
" كلنا نرتدي الأقنعة، نخفي بابتسامات و مجاملات و مزحات صغيرة تلك الملامح البكّاءة ، أو وجوهاً غاضبة دوماً، أو حتى نلبس عدسات تخفي نظرات مختلسة، كلنا ممثلون بارعون، لا أحد مستثنى"
و أنا عم أكتب خطر ببالي الياس، يا ترى هذا وجهه الحقيقي ولا قناع؟
ليش قفز لخيالي؟ فعلاً مابعرف
أنا ماجربت قبلاً الانجذاب لرجل، أكيد عشت مشاعر المراهقة و الحب الطفولي من طرف واحد، لكن الانجذاب الحقيقي تجاه رجل ماعرفته إلا تجاه الياس.
اي صار فيني أعترف أني معجبة فيه! معجبة فيه بإرادتي، بمشاعر حرة، و باختياري.
مع أدهم كان الموضوع معقد، فهو كان يستخدم معي أساليب تخليني فكر أني بحبه، أو معجبة فيه، لاسيما أنه شديد الوسامة.
أدهم انطبق عليه المثل( مو كل شي بيلمع ذهب) ، الذهب الحقيقي جوا، مو بالشكل و الأناقة و العطر الثقيل.
الذهب بالجوهر، و طريقة التفكير، و المعاملة، بهدول ادهم كان حديد صدئ.
أما عن أساليبه .... فهي ملتوية، وقمة بالنذالة، فهو كان يعرف تماماً عطشي للمشاعر، فتلاقيه بعد مشكلة كبيرة بيننا، و يكون فيها متمادي بالتطاول اللفظي و النفسي و الجسدي عليي، يعتذر و يراضيني بكلمتين من خارج قلبه، و يأكدلي أهميتي عنده، فأرضى و صدق انه بيحبني و ظن أني بحبه، وهيك بيروي جزء من عطشي و بيتركني متلهفة ليرويني مرة ثانية، على اعتبار ماعندي مصدر ثاني يعطيني مشاعر.
لكنني ماقدرت كمل بالكذب على نفسي أكثر، أنا كاتبة و بعرف النفس البشرية و خباياها، و عدا أني قارئة و بثقف نفسي دوماً
و لما تأكدت أنه بيستعمل معي أساليب الشخصية النرجسية ليبقى متحكم فيني، قررت أطلع من حكمه و من تحت سيطرته، و أستعيد ما استطعت من نفسي الحقيقية.
زواج دام ست سنين، دمرني حرفياً، دمر كل شي حلو بداخلي، قضى على ثقتي بنفسي و طحن مشاعري ، و نهب قوتي.
صحيح مضى سنتين على طلاقي منه، لكن ندوبي مازالت موجودة، و آثاره عليي ما انمسحت عن آخرها.
لكنني و مع كل ذلك، قلبي بيدق بحضرة الياس.
باغتتني ابتسامة حالمة، عند ذكر اسمه ولو. بيني وبين نفسي، لكن ..... بناتي...حياتي..وضعي؟
رشا
بعد ذهاب رامي، وقفت رشا بصالة البيت، قلبها عم يدق بسرعة، لاسيما أنه نظر لها أكثر من مرة و غمز على ريم لتصرفها، لكنها تظاهرت بعدم الفهم، و تبسمت كلما تلاقوا عيونهم.
دخلت غرفتها، و تأملت نفسها، رفعت شعرها و انزلت خصلتين و ابتسمت.
فتحت الخزانة و أخرجت منها قطعة ملابس، لبستها و تأملت نفسها مجددًا....سألت نفسها:_ ليش عم تفكري ترضيه حتى وهو غايب؟
فجأة رن هاتفها و كان رامي، ردت ببشاشة:_ أهلين حبيبي.
قال بسرعة:_ اشتقتلك
ضحكت بخفة:_ لحقت...من شوي كنا سوا
قال باقتضاب:_ اي بس ما اخدنا راحتنا هالمرة، ريم ما تركتنا ولا ثانية
رجف قلبها كأنها ارتكبت ذنب، حاولت تبرر:_ وين المشكلة حبيبي؟ ريم كانت مزعوجة و حبت تروح عن نفسها معنا
_ مافي مشكلة، بس انا اجيت لشوفك انت، اتغزل بجمالك، احضنك، معقول انطر اسبوع لسا؟
تحولت نبرة رشا للجدية:_ رامي... أنت ليش بتحبني؟
قال باستفهام:_ شوقصدك؟
انفعلت:_ أنت بتحب جسمي، مابتحبني!
قهقه وقال :_ ليش جسمك و أنت مو واحد؟
ردت بعصبية:_ طبعاً لا! جسمي غير شخصي. شخصي هو تفكيري و كلامي و شخصيتي، جسمي هو....جسمي!
انت واحد أناني... بتحب حالك من خلالي، مابتحبني أبداً
ضحك بخفة:_ أبداً أبداً؟
ردت بعناد:_ ولا ذرة!
زفر نفس طويل وقال:_ أنا آسف إذا فهمتيني غلط، أنا فكرت أني عم أتقرب منك، بس خلص حقك عليي، تصبحي على خير.
_رامي...رامي..ستنا شوي!
لكنه ما انصاع لها و سكر الخط، و هي أنبت نفسها:_ مجنونة...هيك زعجتيه؟ شو جسمي و شخصي و هالكلام الفاضي!
هو مابيعرف هيك، بنظره جسمك هو أنت!
تنهدت بحزن...بدلت ملابسها و خرجت للصالة، كانت شادن بمكانها منتظرة أخواتها، نظرت لباب غرفة ريم وكان مغلق، فمشت و جلست بمحاذاة شادن، فكرت تخبرها أو لا؟ تستشيرها أو تستشير ريم؟ ريم بتفهمها أكثر، شادن بتلعب دور أمها و بتوجهها و توعظها، بينما ريم بتسايرها.
لمين تقول؟ ولا تكمل بمفردها بدون رأي حدا؟ رامي أكيد مو ناوي يجرحها...مافي شك.
جلست جانب شادن، نظرت الها بابتسامة، كانت مشغولة بالكتابة، سعلت بخفة و قالت:
_شادن، بدي اسألك سؤال
جاوبت بابتسامة:_ قولي حبيبتي.
قالت بتردد:_ إذا الواحد حس أنه غلط، بس مو متأكد، شوبيعمل؟
سكرت شادن اللاب توب، و نظرت لأختها بإمعان وقالت:
_ بيلجأ للمنطق، للصح و الغلط
_ مافهمت عليكِ
ابتسمت بصبر و قالت:_ خليني بسطها، لكل شي بالحياة حد، إذا الشخص المقابل تجاوز حده بدون ماينتبه و أنت ذكرتيه فيه، مابتكوني غلطانة.
قالت رشا ببعض الحزن:_ أنت فهمانة عليي صح؟
مسحت شادن على شعر أختها:_ يبدو أنك ذكرتي خطيبك بحده معك، وهو زعل منك
_ أنا مابعرف ليش انفعلت!
_ من حقك، جسدك ملكك، و أنت بتقرري تعطيه إذن بالاقتراب أو لا، بغض النظر عن الحلال و الحرام، إذا كان هو عم يتحجج بالحلال.
قالت بحزن أكبر:_ حاسة أني خربت كل شي.
ردت شادن بصبر:_ أنت ماخربتي، أنت كسرتي صورة كان مرتاح فيها
_ بس أنا بحبه، مستعدة اعمل كل شي لأرضيه، هو كتير حنون شادن و انا مابدي أخسر هالحنية!
يعني صحيح هو عم يكون جريء شوي، بس هذا ما بيعني أنه بطل يهتم فيني أو يدللني و يحن عليي.
بعدين ...هي الأشياء بتوطد الحب و بتقويه، صح؟
نظرت لها شادن بحذاقة وقالت:_ لكن ليش صديتيه؟
ردت بنزاقة:_ انا ما سألتك لتحيريني أكثر! قولي لي أعتذر أو لا؟
_ تعتذري لأنك بدك ترتاحي؟ غريبة.
حملت الوسادة و ضربت شادن فيها بخفة و قالت بانفعال طفولي:_ ماعاد اسألك، على رأي ريم أنت كتير مفزلكة، هو سؤال و جوابه بسيط عملتيه قضية! تصبحي على خير.
دخلت الغرفة، فتحت واتساب و بعثت لرامي رسالة:
_ رامي، أنا كتير بحبك، أنت أحن حدا عليي، و أكتر حدا بيهتم فيني، آسفة إذا دايقتك أنا أوقات مابعرف شو عم أحكي.
كان متصل ، وصلوا الرسائل لكنه ما فتحهم، بقيت ناطرة يتحول لونهم للأزرق، بالنهاية غفيت و الهاتف مفتوح، و الرسائل ما انقرأت.
ريم
مرق كم يوم و ريم بعدها على حالها، مزاجها معكر، وكلامها قليل، و للآن ما أفصحت لأخواتها عن يلي صار.
بتروح على المحل بكير و بترجع متأخرة، و بتنام بدون أكل، كان كريم بنظرها فرصة حقيقية، ولأول مرة قلبها بيدق لشخص، وبتعجب بشخص، بدون ما يكون في سبب مباشر لهالمشاعر.
وهي المشاعر بتحتاج أسباب؟ الحب حب....مانه بحاجة أسباب و إقناع و مبررات.
ولما بيوقع الشخص بالحب... مهما سأل نفسه ليش؟ مستحيل يلاقي جواب.
المفارقة أنه ريم صاحبة عقل رزين، لكن هالمرة عقلها تنحى و ترك المجال لقلبها، قلبها يلي بدأ يشعر باللوعة.
و ببعد ظهيرة يوم غائم، أثناء مغادرة إحدى الزبونات، دخلت زبونة برفقة طفلة صغيرة، قربت من ريم و سلمت:_ مرحبا
_ أهلا تفضلي
قربت الزبونة كيس بيدها وقالت:_زوجي أخد هالفستان من كم يوم، ممكن بدله بفستان ثاني؟
قطبت ريم حواجبها، أخذت الفستان و كان نفسه يلي اشتراه كريم
رفعت نظرها و طالعت زوجته و بنته، كانت الزوجة من عمرها تقريباً، و الطفلة كتلة من العذوبة.
زفرت نفسها و أخذت تفكر بقصده من هيك حركة، فابتسمت الزوجة و قالت:_ صدقيني بنتي مالبسته غير للقياس، و كان كتير عاجب زوجي بالبداية مابعرف ليش غير رأيه، ممكن تبدليه؟
جاوبتها ريم بجدية:_ بس صار مارق أكثر من اسبوع! بعتذر منك مابقدر بدله
تغير لون وجه الزوجة و قالت برجاء:_ إذا سمحتي، عم قلك ما استعملته أبداً، راعي ظرفي و بدليه.
جاوبت ريم بعناد:_ مابقدر بعتذر منك، أنا موظفة بالمحل و صاحب المحل بياخد جرد يومي و هالفستان انباع من أكثر من اسبوع كيف بدك ياني رجعه لمكانه؟
زفرت الزوجة بيأس وقالت:_ معك حق، مارح أحرجك معي، بالاذن
أخذت الفستان و غادرت.
وقفت ريم خلف الباب وانتظرت حتى بعدت عن المحل و حملت هاتفها و اتصلت بكريم، وبمجرد رده قالت بانفعال:_ ممكن أفهم شو قصدك بهالحركة؟
قال كريم بهدوء:_ ولا شي
فردت بانفعال أكبر:_ فكرك يعني ماني فهمانة عليك؟ بدلي الفستان يعني بدلي رأيك!
ضحك بخفة و قال:_ كنت عارف أنك ذكية و بتلقطيها عالطاير
_ اي ما حزرت و رأيي مارح بدله
بلعت ريقها و قالت:_ بعدين ما خفت أفشي سرك و خبر مرتك كل شي؟
جاوب بثقة:_ لا
قالت بقلة صبر:_ كريم شو بدك مني؟
قال بنبرة صادقة:_ كان بدي أسمع صوتك، عرفت أنه هيك حركة رح تستفزك و تتصلي فيني، لأني مهما حاولت اتصل فيكي مارح تردي علي
و نجحت خطتي و سمعت صوتك
ابتسم بخفة و كمل:_ و شفت شكلك لما تعصبي كمان
فتحت عيونها باستغراب، نظرت عبر الزجاج فوجدته على الرصيف المقابل، عم ينظر لها بطريقة غريبة جداً، قلبها نبض بقوة، كان صوت أنفاسه بأذنها، و عيونه معانقة عيونها، ماقدرت تسكر الخط، قال لها بصوت دافي:_ ماعم اقدر شيلك من بالي، بحياتي ما دق قلبي لبنت هيك!
رعدت السماء و برقت، و انهال سيل من المطر، قالت بحزن:_ كريم، أنا ماني خرابة بيوت، مرتك حلوة وشكلها بريئة، و بنتك صغيرة، بترجاك لاتحطني بهيك مكان
تبللوا ملابسه تحت المطر، قال وهو مازال عم يطالعها:_ مو بإيدي، عم حبك، ماعم اقدر مافكر فيكي.
صدقيني أنا تزوجت مشان الواجب، بنت خالي تيتمت و عاشت ببيتنا و صار واجب عليي أتزوجها لكف حكي الناس عنها و عنا، ما لحقت حب ....زوجوني إياها صغير، و اندفن قلبي بالحياة معها
هي مو سيئة بس انا ماحبيتها! و هالشي سبب و عم يسبب مشاكل كتير بيننا.
لما شفتك قلبي خبط بصدري، حسيت أنك.....أنك اللي بحلم فيها، أنك البنت يلي ناطرها من زمان!
عطيني فرصة ريم، صدقيني بيتي مارح ينخرب و مارح قصر عليهم بشي
بس أنا من حقي كمان حب، من حقي عيش!
صمتت...مالقت رد....هزت راسها نافية و أغلقت الخط و ارخت يدها جانبه
بقي بمكانه كم دقيقة و غادر مخذول، و لما تأكدت من بعده ، استندت للباب و رغمًا عنها بكيت.
ليش الحب لما إجا....كان فيه شريك؟ ليش الحب يلي نطرته كل عمرها إجا صعب لهالدرجة؟
قلبها عم ينبض بشدة و نظراته ماعم تفارق خيالها، لكنها مابتقدر....مابتشوف حالها بهالمكان
بأحسن أحوالها رح تسرق قلبه من انسانة أحق فيه منها....هذا إن ما سرقته و انتهى الأمر.
" على القلوب الهوى سلطان"
صحيح....الحب سلطان جائر، حكم على قلبها بأقسى الأحكام، و أشدها مرارة!
رجعت لكرسيها، لفنجان القهوة البارد، و لجورج وسوف ، ولكن بقلب مدمى.
شادن
اليوم كئيب بامتياز، من صحوتي بناتي مافارقوا تفكيري، الشوق صعب...صعب كتير.
و أنا مشتاقة الهم بكل مافيني، وكان لازم لاقي طريقة تلهيني، تسليني...لأنه مافي شي بينسي الشوق.
بعد خروجي من الجامعة، خطر لي زور صديقتي الوحيدة، فاتصلت فيها و خبرتها عن قدومي لتزودني بعنوانها الجديد.
و أثناء انتظاري على موقف الباص، تفاجأت بتوقف سيارة بيضاء أمامي، وسمعت صوت عم يناديني من داخلها، ارتبكت للحظة، ولما نظرت كان الياس، قال ببشاشة:_ لازمك توصيلة؟
رفضت بخجل:_ لا شكراً، الباص على وصول
_ المطر قوي، طلعي لوصلك احسن ما تنطري تحت المطر
رديت:_ مابدي عذبك استاذ، بنطرالباص
قال بابتسامة:_ مافي عذاب، طلعي، إلا إذا مابتوثقي فيني.
حاصرني بجملته الأخيرة، ازدردت ريقي و تشجعت و طلعت جنبه، قابلني بابتسامة و تحرك.
الدفء بعد برد طويل حلو كتير، هديت أنفاسي و كفوفي الباردين بدأوا يدفوا.
سكتنا و ساد الصمت، و صوت المساحات على الزجاج هو الوحيد يلي كان حاضر بيننا.
حاولت ركز بالشباك، أقنع حالي اني مو مركزة بوجوده معي، بريحته، بصوت أنفاسه، لا ...أنا مركزة بالطريق.
سألني عن وجهتي و خبرته، صمت لحظات وقال:_ كيف الرواية؟
جاوبت بهدوء:_ تقريباً جاهزة
قطب حاجبيه و استفسر:_ تقريباً؟
نظرت ليديي وقلت:_ أوقات بحس أني مو مقتنعة...أو في شي ناقص.
جاوب بابتسامة:_ طبيعي، هذا حال الكتاب الحقيقيين، و أوقات مهما كنتي مروضة كتابتك، بتتفلت من بين يديك وبتوهمك أنها ناقصة
وقف عند الإشارة، المطر عم يرسم خطوط على الزجاج، قال بهدوء:_ كيف رح ترجعي بهالجو؟
نظرت له، وبادلني النظرة لثواني، و عاد للقيادة، ماجاوبت...مابعرف كيف بدي ارجع.
ارجع من بيت رفيقتي؟ و لا ارجع من طريق المشاعر الغريبة يلي عم تجرني؟
ياترى هو شو قصده؟ أي الطريقين؟
وصلنا أخيراً، شكرته بابتسامة، استوقفني قبل ما أنزل وقال:_ إذا انقطعتي...اتصلي فيني
هزيت راسي موافقة، و نزلت.
مانظرت للخلف من خوفي ليلتقوا عيوننا، كملت وقلبي عم يرجف....معقول يكون حاسس شي تجاهي؟ ولا هو شعور بالواجب تجاه شريكة عمل؟ أول مرة بحياتي بحتار هيك!
وصلت للبناء، ولاحظت انصراف طلاب المدرسة القريبة منه، لكن يلي لفت نظري هو سيارة أدهم، مستحيل أغلط فيها، دخلت وتخبيت بمدخل البناء و راقبت من بعيد، طلعوا بناتي، و كان هو باستقبالهم جنب السيارة.
كانت سنا ماسكة يد ملك، قلبي كان رح يوقف بهاللحظة، بناتي كبرانين، و ضفايرهم طولانة، ضحكت سنا لأبوها لاحظت أنها مبدلة سنيين لبنيين، و ملك كانوا خدودها متل التفاح ( كالعادة)
انحنى ادهم تجاهها و حملها و وضعها بالسيارة من الجهة الثانية ، بينما طلعت سنا لوحدها.
ربط لهم حزامات الأمان و هرول ليحرك السيارة، مرقوا جنب المدخل يلي آواني، و ما انتبهوا لوجودي.
لحظات قصيرة حسيت أنها ردت لي الروح، هدول البنتين حياتي كلها، أملي بالدنيا و أغلى أمنياتي
ابتسمت ابتسامة محملة بالدموع، و صعدت الدرجات لبيت رفيقتي.
أدهم من بعد الطلاق غير عنوان البيت، و مدرسة البنات، حتى ماحاول شوفهم بدون علمه بيوم.
ومين يتخيل أنه صديقتي تنتقل لبيت جديد، ملاصق لمدرسة بناتي!
#يتبع
#حب_البنات
#فيلوفوبيا
#الجزء_السادس
الياس
من اللحظة الأولى، لفتت نظره، مو لشكلها و لا جمالها، ولكنه بأنه فيها شيء يشبه السر
و لكنه و بكل لقاء كان يحاول يسيطر على نفسه قدر الإمكان، لطالما كان هيك، تماسكه فوق كل شي،و إلا ماكان نجح بمجال شغله.
ولكن مع شادن، الأمر مختلف، بلا شعور بتهرب منه ابتسامة قد تبدو الها عادية، أو كلمة، أو نظرة أطول من اللازم.
الجذاب فيها شي أعمق من الجمال أو حتى طريقة التفكير، هي هدوئها جذاب، تجربتها الحزينة المنعكسة على كل ما يصدر منها، و الأكثر...كتاباتها
بتكتب بطريقة متفردة، الرواية عندها مو مجرد مغامرة و أحداث شيقة، هي غوص داخل النفس البشرية، و هذا ما أذهله من اول رواية قرأها لها.
ساحرة بشكل بتقدر تجعله يتعاطف مع أشرارها و يبرر لهم، و حتى أبطالها قادرة تخلق لهم هفوات بشرية، بس لتقول أنه مافي بطل خارق ولا شرير كرتوني، الاثنين بشر، و انسانيتهم بتفرض على القارئ يحترمهم، و يبحر معهم برحلتهم.
كيف بهذا الزمن المائل لتأطير العقل و المشاعر، و المختزل لأغلب المعاني الانسانية فقط بخير مطلق أو شر صرف، كيف بزمن همش المشاعر الأعمق من الحب، قادرة شابة توصل للُب كل هذا و تكتبه؟
هذا ما أذهله فيها قبل لقائها، و بعد لقائها وجد نفسه أمام أحجية تمشي على قدمين، أمام انسانة تشبه الغيمة.
واليوم لما رآها على الموقف، قرر يختبر نفسه، وقف و عرض توصيلها و أصر عليه، حتى انصاعت له.
وتيرة أنفاسه أصبحت أسرع من المعتاد، شد يديه على المقود و ترك الصمت يتسيد الموقف، وللمساحات حرية الرقص على الزجاج.
المسافة قصيرة و القرب أكثر من اللازم، و رائحتها الناعمة اكتنفت السيارة كلها، سحب نفس قصير و سألها عن الرواية مو عن حالها، رافض التعمق المفاجئ.
ولما سألها كيف رح ترجع.... ماكان قصده على الطريق، وهي التقطت الإشارة فصمتت.
و تلك الثواني على الإشارة تمسكت بالنظرة فطالت رغماً عنه، وبالنهاية لما قال لها
" إذا انقطعتي اتصلي فيني" كان بيقصد أكثر مما قال، و أقل مما شعر.
ولما نزلت، وراقب أفولها، اكتشف أنه فشل بالاختبار، و أنه قلبه قرر يعصيه ، و أنها مارح تكون مجرد كاتبة بداره.
كريم
كل شي حوله عم يذكره بريم، هطول المطر، عجقة السير، و برد الشتاء ماعاد يزعجه.
الحقيقة أنه اللقاء الأول ماكان كذلك، فهي لفتت نظره قبل فترة، و أخذ وقت طويل حتى قرر يتحجج بفستان لابنته، ليقابلها وجه لوجه، بدون زجاج عازل بينهم.
يلي فاجأه هو شي واحد.....ليش مرتاح بوجودها؟
ما ابتسمت اكثر. من اللازم، ولا حتى حاولت تلفت نظره.
بطبيعتها و جمالها و عفويتها..سطت على قلبه.
بلحظتها مافكر بزوجته، ولا بالخيانة، أو بخراب بيت
بلحظتها عرف أنه وضع قدمه على طريق زلق،ولكنه بدل مايتراجع قرر يكمل و يمشي للأمام، قانع نفسه أنه خطوة صغيرة ما بتأذي
هو ما بده يكون شرير ، ولا يكسر قلب...هو بس بده يحس و هذا أخطر
لأن الحب لما يجي متأخر مابيعترف بالتزامات...ولا بتقيده حقوق.
ريم ماكانت نزوة....ولا تجربة عابرة. ريم ملأت فراغ بداخله، رجعت له شخص فقده من زمن
رجع لبيته مخذول...و قاصد يتأخر.
البيت هادي، و رائحة طبخ خفيفة وصوت تلفاز منخفض. دخل استقبلته زوجته بفتور.
فتور طبيعي لزواج ناتج عن واجب، ونتيجة رتيبة لمشاكل كثيرة حلها بأغلب الأوقات الصمت المتبادل حتى يمل واحد فيهم ويكسره.
يلي بينهم ماكان محبة....كان عشرة و العشرة مو كافية لتسند زواج موشك على الوقوع.
قالت الزوجة بهدوء:_ تأخرت
أجابها ببرود:_ الشغل كتير و الدنيا زحمة
قلبت قنوات التفاز و قالت:_ سخن لك الأكل؟
جاوب بشرود:_ مالي نفس...فايت نام
قالت الزوجة بامتعاض:_ فوت تفقد بنتك، بوسها و حسسها بوجودك، البنت عم تفقدلك
صمتت لبرهة وكملت بنبرة أحن:_ حتى أنا عم أفقد لك
نظر لها مطولاً، تنهد عدة مرات، باغتها بالسؤال:_ ليش عم تفقدي لي؟
ما تكلفت عناء النهوض، قالت:_ شو ليش؟ أنت زوجي.
ابتسم بمرارة:_ مو لأنك بتحبيني؟ على الاقل قولي بشتاق لك مو بفقد لك...بتفرق كتير.
انفعلت الزوجة:_ صحيح؟ فاقد الشيء لا يعطيه حبيبي.
اومأ بموافقة:_ معك حق، أنا الغلطان. تصبحي على خير.
بدل ملابسه وتوجه لغرفة بنته، قطعة السكر بحياته.
مين قال أنه الرجل مابيشتاق للحب مثل الأنثى؟ ومين قال انه مجرد من المشاعر ؟ هذا حكم مجحف كتير بحقه كإنسان.
كريم كان ملتاع للحب، أكثر من مجرد شوق. الحب كان عنده غاية مو حاجة، و ريم هي يلي أججت مشاعر نامت من زمان.
مو ذنبه أنه قلبه ما دق لزوجته، ولا ذنبها أنها ما حبته، ولا ذنبهم الاثنين أنه النصيب كتبهم لبعض دايس على قلوبهم.
وهو حتى ما جرب يبرر خيانته بحاجته للحب، الخيانة ما بتتبرر وهو مدرك هالشي.
ولكن صاحب الحاجة أرعن، وهو تجاه ريم أكبر أرعن.
الحب يلي تمناه سنين موجود معها، هو متأكد، وإذا على المفاهيم....فالشرع حلل أربعة، و زيجة ثانية لاتعتبر خيانة.
هذا كان مخرجه بكل مرة فكر فيها بريم، زواج ثاني....مجرد التخيل لو لثواني أنه تزوجها بيخليه يشعر بطمأنينة رهيبة، طمأنينة بيشرخها الواقع لنصفين، و بيشعره بضيق موقادر يفسره.
لكن القلب تعلق و خلص....ومو أي تعلق....تعلق بسعادة مفقودة....بحب ممنوع.
رامي
شاب بمقتبل العمر، قررت عيلته تخطب له بنت أصغر منه بعقد.
و للمفارقة، كانت رشا بريئة زيادة عن اللزوم… لطيفة لدرجة تحاصرك،
فانحكم عليه يبقى.
رامي بطبعه حنون، رايق، مرح، بيحب الحياة و مساحاتها الواسعة.
و رشا؟
كانت الزاوية الهشّة بحياته.
الزاوية يلي دخلها بحسن نية…و ماقدر يطلع منها،خصوصًا مع وضعها العائلي.
خطوة واحدة للخلف كانت تعني سقوطها،
و هو ما كان قادر يكون السبب.
«الحب بيجي بعد الزواج»
عبارة أمه الرنّانة، يلي صارت قانون غير مكتوب بحياته.
فكّر…
يمكن القرب الجسدي يسبق القلب، يمكن يسرّع شي مفروض ييجي لحاله.
بس شعوره تجاه رشا ماتغير، ولا تحول لحب.
كان مسؤولية.
كان إحساس إنه لازم يكون سند، حتى لو على حساب نفسه.
أما الحب…
فحكاية تانية تمامًا.
حبها إله، تعلقها فيه، سعيها الدائم ترضيه، كانوا يضيقوا الزاوية أكتر.
كل ما اقتربت، حس حاله محشور.
و كل ما حاول يكون منيح، حس إنه عم يخون شي جواته…
شي ما قدر يسميه.
هو بيملك مقهى، مشروع عمره، و مع الوقت صار ملاذه الدائم.
بزاوية جنب الشباك، بيجلس...بيراقب العالم...بيكتفي بالمراقبة و كأنه مو جزء من الحياة نفسها
بيرتشف من قهوته المرة، و بيتعمق بالتفكير لدرجة بيفقد الشعور بالزمان و المكان.
رغم ضجة المقهى إلا أنه بيلاقي نفسه فيه.
رن هاتفه برسالة: "بحبك"
ابتسم بمرارة و رد: " و أنا بحبك"
مافي أصعب على الانسان من مقته لنفسه، و رامي بيمقت نفسه جداً، وبيمقت الحظ و النصيب يلي وضعوه بهيك مكان و جعلوه يلعب دور " الخطيب"
بيشتهي لحظة يرجع لنفسه قبل ما يخطب، مو كرهاً برشا و إنما كرهاً بالظروف و بكل شي بيحيط فيهم و بهالعلاقة.
و بيعرف تمام المعرفة أنه لمجرد التفكير بهيك طريقة بيكون عم يظلمها، لكن....مابيده حيلة.
النفس أمارة بالسوء.
شادن
كنت مشغولة بالطبخ، فرحانة وقلبي عم يرفرف لرؤية بناتي، و عم دندن بأغنية هادية وقلب الأكل
انفتح الباب و انصفق بعنف، وبعدها سمعت صوت ريم عم تناديني بصوت عالي، كأنها عم تستغيث.
_ شادن!.....شادن!
تركت الطبخة و هرعت نحوها، كانت واقفة بمنتصف الصالة، أول ما لمحتني ركضت ناحيتي، عانقتني و بكيت.
من سنين ماشفت ريم عم تبكي بهالحرقة، تتنهد من قلبها و دموعها عم تسقي ملابسي.
احتضنتها ، طبطبت عليها و كل خوفي تكون وقعت مصيبة.
سألت بقلق:_ شو في؟ شو صاير لك ريم؟
بعدت عني و نظرت لي بعيون غرقانة دموع، قالت بحزن بالغ:_ أنا بلشت حبه يا شادن! أنا عم حب كريم!
طالعتها بشفقة و فوراً تذكرت جملتي يلي قلتها قبل:" رح تجيني و ضحكتك لورا أذنيكي وتقولي لي: بلشت حبه ياشادن"
زفرت....عرفت بلحظتها أنه أختي وقعت بالحب، و حب صعب و مرير خلاها تجهش بالدموع.
بلعت ريقي و احتضنت كتفها و أخذتها لنجلس سوا، و هي على حالها عم تتنهد و تكفكف دموعها.
قلت بحلم:_ ليش هالقد زعلانة؟ الحب بيزعل؟
قالت بحزن:_ بيزعل لما يكون يلي بتحبيه متزوج!
تمالكت مفاجأتي، ضبطت نبرتي وقلت:_ طيب حبيبتي، لا تقسي على حالك، مو ذنبك إذا كان متزوج.
رفعت عيونها وقالت بانفعال:_ مو ذنبي...ذنبه! طالما متزوج ليش يجي لعندي؟ ليش يتقرب مني؟ ليش يوقعني ليش؟ إذا ظرفه ما بيسمح ليش يتجرأ؟
زفرت و سألتها:_ هو قال أنه بيحبك؟
قالت بشفة مرتجفة:_ قال أنه مستعد يخطبني ، قال مانه خايف من مرته.
بس شادن...أنا ....أنا مابقدر كون هيك!
ابتسمت ببساطة وقلت:_بعرف...ولهيك عم تبكي.
لو كنتي قادرة تكوني هيك، ما كنتي توجعتي. لأن يلي بيكونوا هيك ما بيبكوا من أول إعتراف.
سألت:_ شو أعمل؟
سكتت، كان لازم أختار كلماتي بعناية، ما أجرحها و لا حسسها بالذنب، مسحت دموعها بإبهامي وقلت بروية:_ مو كل حدا قال أنا مستعد أخطب، بيكون مستعد يدفع الثمن. أوقات الرجال بيكونوا صادقين بمشاعرهم، لكن كاذبين بشجاعتهم.
سكتت لحظة و كملت: كريم مو شرير، و يمكن فعلاً يكون مو سعيد بزواجه، و يكون حبك عنجد
بس الضربة على الصدق، والضربة الأكبر.... أنك تبقي بالظل...رهينة قراراته المؤجلة.
مو المشكلة أنك حبيبته و أنه حبك، المشكلة بالقيد على هذا الحب....وهو قيد ضعفه أمام زوجته و عيلته
أرخت ريم جفونها و عضت على شفتها، عرفت أني عزفت على وتر ما أطربها، ولكن هالكلام لازم ينسمع.
قلت بنبرة أهدى:_ أنا مارح قلك كملي و لا قلك اهربي، أنا رح قلك اختبري شجاعته، و لأي مدى قادر يجاهر بصدقه، و قادر يكون صريح مع نفسه و معك و الأهم زوجته.
بدي ياكي تسألي حالك سؤال:
إذا هو اختارك فهل لأنه شجاع؟ و لا لأنه تعب و قرر يعطي نفسه فرصة ليعيش الحب و بعدها يرجع لحياته؟
مسحت على شعرها و قلت:_ أنت يا ريم مابتستاهلي تكوني " قرار صعب"، أنت بتستاهلي حب أسهل و أبسط...و خيار أول.
سكتت ريم.
ولا كلمة… ولا اعتراض… ولا حتى دمعة جديدة.
كانت عيونها مثبتة بنقطة وهمية قدّامها، كأنها عم تحاول تشوف مستقبل ما بدها تعترف إنه مخيف.
الدموع ما نزلت، بس بقيت معلّقة، أثقل من إنها تقع.
أنا فهمت صمتها.
أصعب أنواع الموافقة مو نعم، ولا لا… بل العجز.
قربت منها بهدوء، ما سألت، ما ضغطت.
حضنتها، حضن طويل، حضن أم أكتر منه أخت.
ريم ما ردّت الحضن فورًا، وبعدين… ارتخت….لأنها تعبت.
بعرف أنه النصيحة وصلت...لكن القرار بعيد عن ريم لسا، الحياة هيك، أوقات في دروس لازم نمشي عليها حافيين، ننجرح و ننزف، بس حتى نتعلم.
من حق كل انسان يحب، و أنا بفهم كريم، لأني بيوم كنت محله، كنت محبوسة بزواج تعيس مع رجل ما بحبه، كل الوقت كنت أحلم بالحب، أتمناه و أشتاق له، لأنه من حقي!
و بشكر ربي انه هالحب ما اعترض طريقي و انا على ذمته، و إلا كنت عشت بحرب ضارية، لهيك تشجعت أكثر لأتطلق، مو لأني بدي حب، ولكن لأني خفت....خفت الحب يظهر بحياتي و أتحول لخائنة، كان أسلم أني أتخلص من هالقيد يلي خانقني و مخليني ضعيفة أمام أقل كلمة عابرة ممكن أسمعها من رجل.
و رمم نفسي و أوقف على رجليي، لأقدر أختار حب صحي، مو سام.
أما كريم رغم أني بفهمه، لكني ما ببرر له، الخيانة خيانة ما لها مسمى ثاني، و مابقبل أختي تكون شريكة فيها، ولو أني بعرف أنه عرض الزواج الفوري خلاها محتارة، و جعل عندها دافع للموافقة، لكن بالمقابل هي رح تكون إحدى كفات ميزان، بدل ماتكون الميزان كله.
بعرف أنه الشرع حلل، ويمكن كريم معذور، بل يمكن لازم يتزوج ليعف نفسه و يريح قلبه و ما يتحول من حب حقيقي ظهر فجأة، لنزوات متعددة و خيانات كثيرة.
الرجل صعب فهمه كتير، أنا متيقنة أنه إذا خسر ريم رح يفتش عنها بكل بنت بيقابلها، لأنه عامي بصره و بصيرته عن زوجته و مقتنع تماماً أنه مستحيل يلاقي فيها حبه المنشود.
هيك الانسان ببساطة، بيزهد بالشي يلي بين إيديه، و بيظن سعادته اللي ما بيمتلكه.
إذا تزوج ريم يمكن يظلم زوجته
و إذا ما تزوجها رح يتحول الأمر لكارثة....رح يخون مرة و مرتين و عشرة، لأنه بنظره من حقه يحب، فالمنطق بيقول......
أو يمكن بهيك حالة ما بيجدي التفكير بمنطقية، لأنها أصلا حالة خارجة عن المنطق.
الخيانة بمجتمعنا بالنسبة للرجل عادية و مقبولة وحتى مغفورة، لأنه رجل ببساطة
أما للمرأة فهي خطيئة لا تغتفر، وصمة عار، رغم أننا متساويين بإنسانيتنا، بل حتى المرأة محكومة بعاطفتها أكثر.
القرار متروك لريم، إذا وافقت رح تربح حب، و تدخل نزال لمدى الحياة
و إذا رفضت رح تخسر حب، يمكن ما يجي مرة ثانية.
ريم
جلست على السرير، محتضنة ركبتيها و راسها مسنود عليهم، و رغم مدفأة الكهرباء جنبها، كان قلبها عم يرجف من البرد.
ما فكرت الحب هيك، فكرته حياة ..فرح...خفة...وضحكات كتير.
لكن الحب يلي افتُتح بالدموع، كيف رح يكتب آخر فصوله؟
ياريتها طلبت حب استثنائي، ما تمنت تكون مجرد اختيار، كان لازم تتمنى تكون الوحيدة...و الأولى
لكن شو نفع الياريت، بعدما تحققت أمنيتها الأزلية و اختارها رجل، عم يجر خلفه ظل امرأة و طفلة، و نص بيت.
هي لو امتلكت قلبه كله، لكنها أكيد رح تحظي بنصف حياة، النصف من كل شي
نصف العقل....نصف الاهتمام...نصف الشهر و السنة...مو أكتر من النصف!
و النصف ياترى بيكفي قلبي عانى من شح و قلة و حرمان طيلة حياته؟
ياخوفها توافق و تندم، و ياخوفها ترفض و تبقى عمرها عم تدور عليه بوجوه الناس.
القلب لما حب ما استأذن، والعقل واقف على الزاوية عم يلوح لقلب ناوي يكمل الطريق
إذا وافقت رح تكمل عمرها عم تبرر نفسها، و إذا رفضت يمكن تقضي 30 سنة ليجيها الحب الجديد!
ما بين النعم و اللا، مدت ساقيها و تغطت بغطاء خفيف و غفيت...مو راحة...بل هروب.
و الصبح قدر شعاع الشمس يشق الستاير و يتسلط على عيونها ليصحيها بالقوة، فتحت جفونها، و انسل صوت جورج لسمعها، كان هاتفها عم يرن، التقطته..."كريم"
تأملت الاسم و تنهدت، و لكنها ماحسمت قرارها، فما جاوبت، فصل الهاتف و رن من جديد، فأغلقته و نهضت و رائحة القهوة سحبتها من عالمها الصغير.
كانت شادن بالصالة، والقهوة عم ترسل بخارها بالأنحاء، مشيت لجانب الشباك و راقبت ذهاب الناس لأشغالهم.
الحياة ماشية...غير آبهة بقرار قلبها.
#يتبع
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
`