الفصل 1
8
*؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم حب البنات`*
*❴🔢❵الـــبـــــــــــ❴1️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
[20/2، 11:02 ص] H.A.R: Stories 📖:
#حب_البنات
#فيلوفوبيا
#الجزء_الآۆلْ
الحب، البرد، الصباح، القهوة، صوت المطر، و الكتابة، أشياء ساكنة قلبي و بتشبهني كتير.
كيف يعني انسانة بتشبه الحب و البرد و الكتابة؟
ماعندي جواب، بس بحس أني انخلقت معهن، بعرف أني مخلوق من طين، لكنني بحس أني مخلوق أثيري، مخلوق أجمل و أحلا وأرق من ماهيته الحقيقية.
مع أنه ظروفي كانت قاسية، قاسية لدرجة كان لازم أقسى و أنسى طبيعتي الخفيفة و صير أصلب من الحديد.
بس جواتي، بأعمق نقطة بقلبي، أنا أرق من نسمة، مو مدح بنفسي لا، أنا كتير رقيقة، وجرحي سهل كتير.
للحظات بتخيل لو كانت جروح قلبي و روحي مرسومة على جسدي، كنت خريطة ندوب!
بس الحمدلله القلب مخبى و مغطى عن العيون، وإلا كنا تعايرنا فيه و بجروحه الكتيرة و العميقة.
حملت أغراضي و طلعت من غرفني بعد غرقي بأفكاري، و كانوا أخواتي منتظرينني.
رشا، ريم، و أنا شادن.
واضح أنه أمي و أبي اجتمعوا على حب الغزلان، فسمونا على اسمائهم.
رشا الصغيرة، و ريم صاحبة البشرة شديدة البياض، و أنا شادن...الغزالة القوية.
كانون بمزاجه الحزين حكم على صباحنا بالبكاء، و في أجمل من دموع كانون؟
قالت رشا بحماس:_ اليوم رامي جاية يسهر عندنا.
تململت ريم:_ سهرة خيالية ناطرتنا.
جاوبتها رشا:_ لاتحكي على خطيبي، رامي مافي منه.
ضحكت عليهم و قلت:_ أهلا وسهلا فيه، اليوم رح اقبض سلفة من دار النشر، و بجبلك معي ضيافة ظريفة.
قامت رشا و حضنتني بامتنان:_ لك الله يخليلي ياكي.
زفرت ريم بحزن، فلكزتها رشا قائلة:_ لاتزعلي رمروم، بكرا الحب بيدق بابك.
خرجت ريم عن رزانتها وقالت:_ القصة مابدها لف و دوران، قلبي ناطف على ما حب و أنحب، رشا الفصعونة سبقتني، و أنتي شادن جربتي حظاتك، إلا أنا! لك مشتهية أمشي تحت المطر و أمسك إيد حبيبي.
دندنت رشا لتغيظها:_ وكتير عبالي شو خطر...نمشي سوا تحت المطر...متل فراشات الزهر..و نطير!
ابتسمت و كان بنفسي كمل مناوشاتهن يلي ما بتخلص، لكن رنين هاتفي قاطعني و قاطعهم، هديك المكالمة يلي كل يوم بتشعل نار بقلبي، و بتطفي نار تانية.
سكتوا أخواتي و فتحت الخط، ليظهر على الشاشة أحلى وجهين، و أغلى وجهين على قلبي، كانوا بناتي، سنا و ملك.
ضحكت، وبادلوني الضحكات، و هن مرتديين ملابس المدرسة و عم يتجهزوا.
سنا: كيفك ماما؟
جاوبتها بابتسامة تحتها غصات:_ مشتاقتلك يا روح الماما، كيفك أنتي، وكيفها ملوكة؟
قالت ملك: مشتاقينلك ماما، بابا قال مسموح نحكي شوي قبل المدرسة.
قلت: أي حبيبتي، البسوا منيح، وكونوا الأوائل، بدي أرفع راسي فيكن
كان صوت أبوهم مسموع، أمرهم ينهوا المكالمة، تبدلت وجوههم و شفت بعيون ملك هديك الدمعة المخباية، قالوا بهدوء:_ باي ماما
بس ملك نادت بصوت عالي قبل ما ابوها يسكر الخط:_ بدي شوفك ماما!
انقطعت المكالمة، و بهت وجهي، و خنقتني الغصة.
من يوم طلاقي و أنا محرومة منهم، مابشوفهم إلا لحظات قصيرة بمكالمة فيديو و بس....
انحرمت ريحتهم، و دفئ حضنهم. اشتقت لملس بشرتهم على شفايفي، و كفي تمسح شعرهم الناعم، و جدولات صغار أعملهم بإيديي.
تنهدت، وصدري أصبح مثل سجن داخله طير عم ينوح، حملت أغراضي و رحت على جامعتي.
أنا و أخواتي عايشين لوحدنا، أمي و أبي مطلقين و كل واحد عنده حياته.
بالبداية عاشت أمي معنا بعد الطلاق فترة، وبعدين إجاها النصيب و تزوجت، بقيت أنا مع أخواتي بهالبيت يلي سجله أبي باسمنا، بعدما طلق أمي و هاجر على كندا و صار عنده حياة و عيلة ثانية.
كان عمري 16 سنة وقت تطلقوا و أخواتي ريم 15 و رشا 8 سنين.
أمي تزوجت بعد ثلاث سنين و تركتنا ثلاث صبايا لوحدنا بوجه الحياة و الدنيا، صحيح هي سنة الكون، وصحيح هي من فترة للثانية بتتصل فينا أو بتبعت هدايا و مصروف، حالها حال أبي.
و أكيد الحياة بوجود الأم و الأب مختلفة، لكننا حنينا على بعض و ربينا بعض، حتى كبرنا، متعودين أننا سلاح لبعض،وسند حقيقي، و اليوم بعد 14 سنة، مازلنا متمسكين ببعض.
توجهت على جامعتي بالمواصلات، جامعتي...يلي كانت سبب من أسباب طلاقي، لكنها أكتر ما أغاظ زوجي السابق.
الطريق طويل، بيتيح فرصة يومية للغوص بالأفكار، و الذكريات، و الحنين الثقيل.
بيقولوا أن أغلب الأولاد لوالدين مطلقين بيتطلقوا مستقبلًا، أو مابيحظوا بعلاقات مستقرة، و بصراحة هالكلام صحيح، و انطبق عليي، بس جُل ما بتمناه أنه ماينطبق على أخواتي، و أكفي أنا لكون مثال حي على هالكلام.
نزلت من الباص، ودخلت الحرم الجامعي يلي أغلب طلابه أصغر مني بسنين، حتى طلاب التخرج.
بس طبيعي، أنا توقفت بمحطة وقت طويل، و هلأ رجعت كمل مشواري دراستي.
ريم موظفة مبيعات بمحل ألبسة أطفال، مع أنها متخرجة، بس فرص العمل القليلة دفعتها تكون بهالوظيفة.
متل كل صباح، دخلت على المحل و شغلت أغاني جورج وسوف القديمة، و بلشت تنظيف.
صوت جورج، و بخار القهوة المتطاير، والبلاط اللامع، و ألبسة الأطفال حولها، كان هذا عالمها الصغير، يلي بتقضي فيه سواد يومها.
و كأنها انخلقت لهي الوظيفة، بتجيد التعامل مع الأطفال، و كذلك بتريح الأمهات لما يتعاملوا معها، و مبيعات المحل زادت أضعاف من يوم استلمت الشغل. و رغم بشاشتها و دماثتها،إلا أنه الحب للآن ماطرق بابها، مع انها لطيفة و خفيفة الظل، وعندها من الجاذبية قدر كبير، لكن الحب كان يمرق من جنبها و يتجنبها كأنها شفافة ، و زاد شوقها له يوم بعد يوم.
"سيدي أنت الحب نعمة
جاية لنا من السما
معاها أحلا نسمة
للناس المغرمة"
مقطعها المفضل دائمًا، بتغنيه و قلبها متلهف لهديك النبضة الخارجة عن الإيقاع، و بتتخيل شكل حبيبها البعيد جداً بنظرها.
ريم هي الأقل تأثرًا بافتراق والديها، مع أنها تشاطرت جزء من المسؤولية مع شادن.
فما كانت الكبيرة صاحبة العبء ولا الصغيرة المحتاجة للدعم، كانت دائمًا بالوسط، بالمنطقة الرمادية.
و رغبتها بأنها تكون مرئية، تكاثفت على مدى السنين، حتى صارت حاجة ملحة، و كان بنظرها الحب هو السبيل لتشعر بوجودها.
ولا مرة طلبت حب استثنائي، هي فقط رادت تكون مختارة.
و بهالصباح الرتيب، و الشارع مبلل، والبرد عم ينفذ من كل مكان، و جورج عم يغني "حلف القمر".
كانت ريم عم ترتب أحد الرفوف لما انفتح الباب، التفتت وقابلت الزبون بابتسامتها البشوشة: _أهلا، كيف فيني ساعدك؟
سألها عن فستان لبنت خمس سنين، دلته على طلبه، بدون كلمة زايدة، لكنه قال بعد برهة صمت:_ ممكن تختاري أنت؟
نظرت له باستغراب، لكن ابتسامتها بقيت معلقة على فمها، و تناولت الفستان و أعطته إياه، فقال:_ ذوقك حلو.
زاد استغرابها، وشعرت باحمرار خديها، أجابته بخجل:_ شكرًا، رح ضبلك ياه.
ناولها المال من محفظته، وقال وهو عم ينظرلها مباشرة:_بتسمعي جورج دائماً؟
أومأت موافقة فقال:_ جورج للسميعة الحقيقيين، بتلاقي أغلب الناس بتسمع فيروز الصبح، بس جورج مابيسمعه إلا كل صاحب ذوق رفيع.
ابتلعت ريقها و خفتت ابتسامتها أمام هالمجاملة،كررت شكره و ناولته الكيس، غادر و شيعته بنظرها، ولما فتح الباب التفت الها للمرة الأخيرة و قال:_ ممكن أعرف اسمك؟
رفعت حاجبيها بشي من الدهشة، أجابت بصوت خافت:_ ريم
ارتفعوا شفاهه بابتسامة جانبية:_ خمنت، أنا كريم، بالاذن.
غادر و تركها بحالة استغراب و دهشة، جلست على الكرسي خلف الطاولة، نبضها متسارع، القهوة بردت و جورج عم يقول:" حتكوني البلسم لجروحي، بالسرالغالي لاتبوحي"
أما رشا، فهي يلي نالت اهتمام شادن كله، على مدى السنوات.
لأنها كانت طفلة و ما أدركت معنى يلي حصل بعيلتهم، وكان لازم تكون شادن أمها البديلة.
لكنها مع الوقت ،و مع غياب الأب عن كل مراحل حياتها، ارتبطت بسنتها الجامعية الأخيرة، بشقيق صديقتها.
كانت خطبة أهل ولكنها أحبته بشكل كبير، و تعلقت فيه جداً،فهو من ناحية أكبر منها بعشر سنوات،و من ناحية ثانية كان عطوف و حنون عليها، فملأ فراغ الأب عندها،و أخذ مكانين بآن معًا، الأب و الحبيب.
أول لقاء بينهم كان صدفة مقصودة،دخلت بيت صديقتها و وضعت حذائها جانبًا، كان البيت دافي، و قليل الإنارة، و مفروش بالسجاد العجمي، و روائح الطبخ مكتنفة الجو.
جلست بغرفة الجلوس مع صديقتها رباب، كانت مدفأة المازوت مشتعلة، و الدفء غامر كل شيء حتى هي.
دخل رامي الغرفة، و صدر للباب أزيز ناعم عند ولوجه، بخطوات هادية سلّم عليها، صوت رجولي واثق و ملامح هادية و ابتسامة مريحة.
سألها عن حالها، عن دراستها و حياتها، كانت اسئلة عابرة و عادية، لكن شعورها أبداً ماكان عادي.
حمل فنجان قهوته و اتجه نحو الشباك ليتأمل الإطلالة ، وهي اكتفت بتأمله من الخلف.
ولما استأذنت للرحيل وصلها بنفسه، و ودعها بابتسامة وادعة و طلب بأنها لما تحتاج أي شي ماتتردد و تتصل فيه.
ماكان إحساس بالحب، بقدر ماهو إحساس بالحماية، بالأهمية......بالأمان.
و بعدها بأسبوع تفاجأت برغبة أم رامي بخطبتها لابنها، و بزيارتهم الرسمية الأولى تم الاتفاق على تفاصيل الخطوبة، و بعدها بأيام كانت خطيبته و حليلته، و مضى على الخطبة ست شهور و رشا عم تحلق بسماء الحب.
شادن
صحيح نحن مالنا إلا بعض، بس كنا كافيين و الحياة بكل صعوبتها ماقدرت تكسرنا.
و رغم كل الظروف، منرجع آخر النهار، منقعد سوا، و منسخر من الحياة،و من الظروف، و كأنها ما بتعنينا.
هي كانت طريقتنا بالتخفيف عن أنفسنا، بالضحك و السخرية، و بكتير أوقات كنا نتفق نعتبر أنفسنا أيتام، و نتناسى وجود أهلنا،لأنه وجودهم بحياتنا موسمي، متل شمس شباط.
ولما يظهر واحد منهم بحياتنا و يرجع يختفي، منكون محصنين من الخيبة و الألم.
يمكن أنا كتير مفلسفة، بس هيك طبعي بحب حلل كل شي، و بحب أوصل لعمق الأفكار و المشاعر، فككها قطعة قطعة حتى أقدر أتعايش معها
و فكرة اعتبار أنفسنا أيتام كانت فكرتي، و بالفعل نجحت و قللت كتير من المشاعر السيئة يلي بتهاجمنا كل حين وحين.
انتهى دوامي الجامعي و كان المفروض يوصلني إشعار تحويل سلفة من دار النشر، أي أنا كاتبة.
حطيت أقدامي على طريق وعرة و عم أمشي ولو ببطء، اعمالي عم تبيع، و هاد التعاقد الثالث مع نفس الدار.
تأخر الإشعار و محلات الصرافة رح تسكر، و القلق بدأ يطرق براسي.
جلست على مقعد بحديقة الجامعة و بدأت حبات المطر الناعمة تداعب وجهي، رفعت الهاتف و طلبت رقم موظفة التعاقدات، أجابتني فورًا:_ أهلاً آنسة شادن
سعلت بخفة و قلت:_ أهلاً، حبيت استفسر عن تأخر تحويل السلفة لحسابي.
قالت الموظفة بنبرة لطيفة ممزوجة بالجدية:_ منعتذر منك على التأخير، و لكن مدير الدار طالبك، كان لازم خبرك قبل بوقت بتمنى تعذريني، و ياريت تحاولي تكوني بالدار خلال نص ساعة قبل ما يغادر المدير.
تجمد عقلي لثواني، مدير الدار؟ معقول ناوي يرفض الرواية؟
فوراً تذكرت وعدي لرشا بالضيافة، و تخيلت ملامحها الحزينة لما رح ارجع خاوية،و تنجبر تضيف خطيبها كاسة شاي يتيمة، مثلنا!
بلعت ريقي و خبرت للموظفة بقدومي، و طلبت انها تحجزلي موعد مع المدير، و تمنيت لو عندي جناحات لأقدر طير و أوصل على الدار بأسرع وقت، و أعرف المدير ليش طلبني.
#يتبع
[20/2، 11:02 ص] H.A.R: Stories 📖:
#حب_البنات
#فيلوفوبيا
#الجزء_الثاني
أمام الواجهة الزجاجية الكبيرة، واليافطة المعلقة والمكتوب عليها بخط النسخ:" الريّان للطباعة والنشر".
سحبت نفس و دفعت الباب بهدوء و دخلت، صحيح أني أجيت من قبل و لكني ماقابلت المدير، و توقيع العقد كان عن طريق مدير العلاقات العامة.
ريحة الورق معبية المكان، و صور مكبرة و معلقة على الجدران لإصدارات الدار، و منها الأعمال الأكثر مبيعًا على مستوى الوطن العربي.
المكان أشبه بمتحف، يتصدر فيه مكتب سكرتيرة المدير، و أبواب مكاتب الموظفين موزعة على الجانبين، مشيت بأناة و خبرت السكرتيرة عن موعدي، فاتصلت بالمدير و أعلمته بوصولي و سمحت لي بالدخول.
نقرت على الباب بخفة، و دخلت لغرفة المدير، بعدما قال لي:تفضلي.
شهقت بهدوء و دخلت، الجدار الأيسر عبارة عن مكتبة ضخمة محتلة الحائط كله، كتب كثيرة منها بلي قرأته و منها يلي تمنيت أكتب مثله، و الأكيد أني حلمت يكون اسمي بين مجموعة هالاسماء الكبيرة.
مكتب المدير بصدر الغرفة، المفروشة بسجادة بيضاء!
كيف سجادة بيضاء بمكتب المدير مابعرف!، ولكنها أكيد أضفت طابع خاص، كان منكب على ورقة ما و ماسك القلم بيده اليسار، ولما شعر أني مواجهه رفع رأسه و حياني بابتسامة خفيفة وقال:_ أهلاً آنسة شادن، تفضلي.
أشار لي لأقعد مواجهه بينما وضع قلمه و نظر لي مباشرة و أصابعه متشابكين ببعضهم.
شكله بيوحي أنه بآخر الثلاثين، و ابتسامته هي ابتسامة قارئ، مو مدير و محرر أبدًا.
مافيني أنكر ارتباكي و الخواطر المختلفة يلي اعتلجت بصدري، لكني تمالكت نفسي، وحاولت اظهر هادئة قدر الإمكان.
قال لي:_ مافي داعي للارتباك، الرواية ما انرفضت.
زفرت براحة و ارتخوا اكتافي شوي، أردف:_ بصراحة أنا متابع أعمالك معنا، وخليني قلك أنه قلمك واعد جداً.
ابتسمت بخجل وشكرته بصوت أقرب للهمس.
قال بجدية:_ لكن يا آنسة شادن، خلينا نقول أنه نصك بحاجة شوية تهذيب، حتى نحصل على موافقة كاملة من الرقابة، بدون ما ينقص منه حرف.
وكأن المساس بنصي هو مساس بشخصي، قلت بنبرة مدافعة و مشدودة:_ بس أنا ماخرجت عن الأعراف أستاذ
ضحك بخفة:_ أنت عندك جرأة بطرحك، والجرأة محمودة لكن ضمن حدود، و أنا عم أحكي عن أسئلتك الوجودية و التفكير الوجودي عند شخصية البطل عندك، خليني أعطيكي مثال.
أخرج ملف الرواية و وضع نظراته الطبية و بدأ يقرأ بصوت مرتفع، سردي على لسان البطل.
مافيني أنكر إعجابي بنفسي و بتفكيري و بعرف أني تجرأت بطرحي لهيك أسئلة، ولكن يلي تحرك جواتي شي مختلف
أول مرة بسمع كلماتي بصوت غير صوتي، و بشوف حدا مهتم بتفاصيلها، و حتى واصل للعمق يلي تمنيت حدا يوصله، كان مركز بالقراءة، و مخارج حروفه سليمة جداً، و نبرة صوته مابين الحدة و الرخامة أعطته جاذبية مضاعفة.
بالنسبة للكاتب؟ هي لحظة انتصار حقيقية!
هي اللحظة بتشبه تماماً لحظة اندفاع المخدرات بجسد المتعاطي!
فكيف إذا كان القارئ محرر؟ و كان المسؤول الأول عن طرح عمله بالسوق و عنده نظرة بتجمع الأدب و التحليل و النقد و التسويق!
يمكن بالغت، بس الأكيد أني بهاللحظة قلبي دق! أي قلبي دق بعد غيبوبة طويلة كتير.
انتهى من القراءة و مازلت على حالي، وضع نظارته جانبًا بعناية و أعاد النظر لي وقال:_ شادن، إذا سمحتي لي شيل الكلفة، النص قوي كتير، لكنك لازم تراعي أنه القارئ العربي مو جاهز لكل هالأسئلة دفعة واحدة.
برأيي لازم نعدل شوي بشكليات النص حتى ياخد الموافقة المطلوبة.
قلت بنبرة صلبة كأنه عم يقلي رح يعدل على صفات واحدة من بناتي:_ يعني التعديل شكلي مو جوهري؟
ابتسم بشكل بسيط:_ لو كان جوهري كنت رفضته، لازم تعرفي أننا كدار مناخد بيد الكاتب و منساعده بكل قوتنا، لكن بالمقابل لازم يكون هو جاهز لهي المساعدة.
نهض عن المكتب و اتجه للمكتبة و سحب كتاب و ناولني ياه و قال:_ صاحب هالكتاب انرفض 3 مرات، بس لأن عقله سابق زمانه
لحدما استوعب أنه التهذيب مابيضر فيه ولا بابنه ، أردف بضحكة:_ و ابنه هو الكتاب.
ضحكت بخفة، يبدو أنه المدير بيفهم عقلية الكاتب تماماً، نظرت للكتاب و الاسم، كان من أشهر كتاب العصر، لدرجة أني طالما تمنيت كون مثله أو مكانه حتى.
عاد المدير لمكانه و قال:_ لذلك إذا حابة اسمك يلمع، بدك تساعديني نشد روايتك و نقص شوي من جناحها حتى تقدر تطير و تعلي، فالطير ما بيحترف الطيران إلا لما ينقص جناحه.
ناولني ملف روايتي، و أنا مازلت على حيرتي الداخلية، و انبهاري الغير مقصود و أعتقد الواضح بشخص هالمدير.
قال برزانة:_ إذا بتحبي منشتغل سوا على التعديل، لأني حابب أشرف بنفسي، و حابب راهن على روايتك هي بالمعارض القادمة.
ابتلعت ريقي:_ سوا؟
استند لظهر كرسيه:_ إذا ماعندك مانع، بكرا بنفس الموعد
صمتت و ظهر عليي عدم الارتياح، فقال بسرعة:_ إذا مانك جاهزة منأجل.
نقلت نظراتي بينه و بين الملف و الرواية المعروفة بين يديي، سحبت نفس و قررت كون شجاعة، وقلت:_ موافقة.
ابتسم بشكل جانبي و فتح درج مكتبه و أخرج منه ظرف أبيض وقال:_ تمام، و هي سلفة من حسابك مقدمًا.
وضعت ماكان بيدي و أخذت الظرف من يده، و انتبهت لأصابعه الملطخة بالحبر، شكرته و استأذنت بالانصراف.
طلعت من الدار و داخلي عاصفة غريبة، و قوية لدرجة أني حسيت بضعف بأوصالي.
كان في صوت براسي عم يكرر كلماته: (نقص شوي من جناحها… حتى تقدر تطير)
مين بيحكي هيك؟
ومين بيفهم وجع الكاتب وهو عم يحاول يخلّي نصه يعيش بدون ما يخونه؟
وقفت عند محطة الباص، شدّيت معطفي عليّ، وقلت لنفسي بنبرة حازمة:
لا تكبّري الموضوع شادن. هو مدير دار نشر… مثقف… لبق… وبيعرف يحكي مع الكتّاب.
بس قلبي ما اقتنع. ولا عقلي.
طلعت بالباص، جلست جنب الشباك، والمطر عم يرسم خطوطه المرتجفة.
فتحت هاتفي، رسالة من رشا:
(طمنيني… قبضتي؟)
ابتسمت.أخيرًا ابتسامة كاملة. كتبت لها:
(قبضت… ورح أرجع محمّلة ضيافة، وخلي خطيبك يحضّر معدته.)
رشا
مساء كانوني بامتياز، بارد حد الصقيع، بس مين بيهتم للبرد و الحبيب على الطريق؟ ماحدا!
رتبت رشا الطاولة أكثر من مرة، تأكدت من مظهرها و غير تسريحة شعرها حتى أصبحت بأكثر شكل بيرضي ذوق رامي، رشت من عطرها اللطيف و انتظرت بصالة البيت.
كانت شادن مقابل التلفاز، عم تراقبها بمحبة أم مو أخت، و قلبها عم يدعي أنها تنال كل الهنا و السعادة بالكون.
رن الجرس، و هبت رشا لتفتح الباب بابتسامتها العفوية و المحببة.
كان رامي بمعطفه الداكن، وقامته الطويلة، و عينيه البنيتين .... بمثابة كون رشا الخاص.
_مساء الخير
جاوبته بفرح، دخل و ناولها كيس معبى بالأطايب و قال:_ جبتلك أكلاتك البتحبيهم، و كترت نسكافيه لعيونك.
ضحكت وردت بهمس:_ يسلمو ايديك حبيبي.
دخل و كأن البيت بيته، سلم على شادن باحترام، و مازح ريم فور أن وقعت عينه عليها:_ ريم، عم يقولو جورج وسوف توفى.
كبتت ضحكتها وقالت:_ بعيد الشر عنه، بعدين لو مات الفن ما بيموت.
قال بسخرية:_ عظمة على عظمة ياست.
أخذ مكانه المعتاد، و دخلوا الأخوات ليتركو رشا براحتها معه، جلست بجانبه، بدون ما تلتصق فيه، مسافة كافية لتحتلها ريحة عطره، و بعيدة بما يكفي لحفظ الحدود بينهم، برغم أنه رامي ماتجاوز حده بيوم، لكنها كانت دائماً متحفظة بشأن أي تواصل جسدي بينهم.
مسك يدها و قال :_ طمنيني عنك، كيف الدراسة؟ وضعكم بالبيت كيف؟
جاوبت بحياء:_ منيح، دراستي منيحة، و بالبيت الله يخليلنا شادن.
ابتسم بهدوء:_ مسكينة شادن، بتعاطف معها كتير.
باغتته بالسؤال:_ و أنا؟
شد قبضته على يدها وقال:_ أنت...شعوري ناحيتك مابقدر أحكي عنه، يعني بحس أني مسؤول عنك، بحس أنك متل طفلة إذا تركت إيدها بتضيع، أنتي بصراحة حيرتيني معك، مابعرف كيف بدي أوصفلك شعوري تجاهك.
بهتم لأمرك كتير، و بزعل على زعلك و مابحب شوفك ناقصة شي، بحس أني لازم كون الجدار يلي بتستندي عليه بدون مايميل أبداً.
احمروا وجنتيها و قالت ببراءة:_ يمكن هاد هو الحب؟
ابتلع ريقه :_ الحب كلمة كبيرة كتير، أكبر من أنها تنوصف بحروف.
نظرتله بعيونها الواسعتين، بكل مافيهم من براءة، و قالت بصوتها الناعم:_ أنا بعرف أني بحبك، و بحبك كتير كمان، أنت أماني بهالدنيا.
كان قلبه عم يضرب صدره بعنف، "أمان" كلمة أعمق و أكبر من الحب، وهو بيعرف هالشي تماماً، و بيعرف قديه حلو و صعب بنفس الوقت أنك تكون أمان لشخص.
سحب نفس و قال:_ شفتي المسلسل مبارح؟
قالت بحماس:_ شفت، يا الله رامي ماكان بدي البطل يموت!
ضحك عليها:_ جمال الحبكة أنه يموت يافهمانة، وين العبرة إذا ما مات؟
لكنها عاندت وقالت:_ العبرة أنه يعيش، يتغلب على المرض و حبيبته تبقى معه و يتزوجو و تكون النهاية سعيدة مو حزينة و كلها مقت!
قال لها بعدما زاح غرتها عن عيونها:_ بالعكس، العبرة أنه يموت و يترك أثر من بعده ما يموت أبدًا، ماشفتي كيف تركلها ثروته و ساعدها تعيد دراستها بدون ما تكون معيلة لعيلتها؟ هو حررها و مات، وهاد أحلى و أهم من بقاءه حي، لأنه لو عاش رح يقيدها، فهو اختار يموت و يحرر نفسه و يحررها معه، و هاد مكمن الحب و العبرة و الجمال.
اتسعت ابتسامة رشا وقالت:_ مستحيل شو بحب فلسفتك و نظرتك للأمور، عنجد طلع موته أحلى و أنسب، أنا مافكرت فيها هيك.
تغيرت نبرته للأعمق و قال:_ النهاية الحزينة بتصنع بطل أقوى، و أصلاً النهايات الحزينة هي للأقوياء بس، الضعفاء بيقنعوا حالهم بأنهم حصلوا على النهاية السعيدة إنما هي بتكون فراغ، نهاية عادية مو أكتر.
تابعته بعيون هايمة، ماكانت عم تسمع فلسفته بقدر ما عم تحفظ نغمة صوته و إيماءات وجهه.
ما كانت الزيارة طويلة، لكنها كانت بمثابة نفس نضيف بتاخده رشا كل أسبوع، بيساعدها تكمل 7 أيام قادمة لتقابله مرة ثانية.
و مانسي مثل كل مرة يحاول يعطيها مصروفها و ترفض بعفة و حياء، و يودعها بقبلة على جبينها و توصيات كتير إنها تقصده شو ما احتاجت.
غادر وتركها مستندة للباب، و قلبها عم يضخ سعادة بدل الدم، و إحساس غامر بداخلها بأنها محتواة و محمية و محبوبة، بأنها الأولى و الوحيدة.
خفت صوت خطواته على الدرجات فدخلت رشا و كانوا أخواتها مفترشين الأرض، مجهزين أكواب الشاي و منتظرينها، فانضمت الهم و تغطت بالبطانية المشتركة.
التفتت للخلف و أخذت من الكيس يلي أحضره رامي شوية أكلات و وضعتهم على الأرض، لتبدأ السهرة رسمياً.
قالت شادن:_ هاتوا لنشوف كيف كان يومكن؟
قالت ريم بحماس:_ هلأ منعرف أنه رشا شافت رامي، و الاسبوع الجاية طويل و رح تشتاق كتير، وهو الأمان و السند
استنكرت رشا:_ كأنك أخدتي دوري؟
رفعت ريم الكوب بكلتا يديها وقالت بابتسامة:_ هذا لأنه عندي خبر جديد و أحلى
انشد انتباه الأخوات، فأكملت بنفس الابتسامة المتحمسة:_ اليوم اجا زبون على المحل، بيطير العقل!
و الحلو أكتر أنه جامل ذوقي بالملابس، و بالاغاني، و سألني عن اسمي قبل ما يروح
استندت لكتف شادن و قالت بصوت رقيق:_ حاسة الحب قرب يا شادن، بيطير العقل
مسكت يد أختها و وضعتها محل قلبها:_ شوفي قلبي كيف عم يدق! هي اول مرة بحس هالاحساس.
ضحكت رشا من قلبها، بينما تبسمت شادن وقالت بهدوء:_ منقول ان شاء الله يكون حب بيستاهلك.
سألت رشا وهي تمضغ حبة شوكولا:_ و أنت شادن؟ مافي شي جديد؟
تنهدت و أجابتها وهي عم تتأمل كوب الشاي و البخار الصاعد منه:_ اليوم قابلت مدير الدار.
تجلست ريم و قالت بصدمة:_ لاتقولي الرواية انرفضت!
تبسمت بخفة و أجابتها:_ لا، هو قال حابب يساعدني لنعدل عليها شوي، حتى ماترفضها الرقابة.
اقتربوا منها و لمعت عيونهم بحماس، قالت رشا بعفوية:_ اي؟ شو الانطباع؟ كيف لقيتيه؟ حلو؟ عزابي ولا متزوج؟
اردفت ريم:_ احكي لنا شادن، حاسة بعيونك في حكي.
تنهدت شادن، ثم قالت:_ هو لبق و مثقف، وفيكن تقولوا وسيم، بس.....هذا كل شي.
شردت للحظات، فأمسكت ريم يدها وقالت:_ شادن...صرلك سنتين مطلقة، من حقك تعيشي حياتك.
سألت رشا ببعض السذاجة:_ قولك إذا عرف أنك مطلقة رح يكمل بمساعدتك؟
أنبتها ريم بضربة خفيفة، لكن شادن نظرت لها نظرة محملة بالكثير، رسمت ابتسامة حزينة على ثغرها وقالت:_ هو ما تطرق لوضعي الاجتماعي، وكل يلي بيهمه هي الرواية قديش رح تمثله بالمعارض وتمثل داره، وقال بالحرف أنه مراهن عليها، يعني الوضع مهني بحت،و مابظن كوني مطلقة يأثر على مهنيته معي
وضعت كوب الشاي على الارض و نهضت:_ لاتسهروا كتير، خلينا نوفر شوية مازوت، تصبحوا على خير
غادرت شادن، بينما زجرت ريم اختها:_ أنتي إيمتى رح تتعلمي تحسبي لكلامك؟ شفتي كيف زعلت!
قالت رشا:_شوفيها؟ كلنا منعرف الرجال انه ماعندهم شي لله، بلكي كان معجب فيها و عمل الرواية حجة
جاوبتها ريم بامتعاض:_ سكتي، ذكية كتير ما شاء الله.
شادن
تمددت بسريري، و فتحت جوالي على صور بناتي، تأملتهم و تذكرت موقف كل صورة التقطتها الهم، سنتين كاملين و أنا محرومة منهم، لأني اخترت أنفصل عن أبوهم، هيك بمنتهى البساطة، و متل أي رجل شرقي متعنت، مابيطلق زوجته حتى تتنازل عن كامل حقوقها، بما فيهم الحضانة.
تزوجت أدهم بعمر العشرين، كانت خطبتنا تقليدية و ظنيت أني بحبه، و تم زواجنا بعد الخطبة بشهرين.
بالبداية كان جيد، ولكن مع الوقت بدأ يكشر عن أنيابه، ويظهر وجهه الحقيقي.
كان جامع المجد من اطرافه، البخل و الضرب و الأنانية و التكبر و كتير صفات يطول ذكرها.
أنجبت بنتي الأولى سنا، يلي زادت طين حياتي بلة لأنها بنت، وبعدها بسنة أنجبت ملاك و كمان زاد الوضع سوء، فكل رجل شرقي بيحلم بولي عهده.
و كأنه هو أحد الخلفاء الراشدين و ابنه رح يخلفه من بعده، باختصار عانيت كتير بزواجي، و كان دائمًا يوقف بوجه أحلامي و طموحاتي، جامعتي، هوايتي، شخصيتي، طبعي، طريقة تفكيري، كأني ند أمامه، مو كأني زوجته، فاخترت الطلاق.
و ماطلقني بسهولة أبدًا، كان من الصعب جداً يتخلى عن خادمة و مربية و طباخة و عشيقة بنفس الوقت، لكني حاربت و بعت صيغتي حتى وكل محامي يطلقني منه، وحصلت على الطلاق مقابل تنازلي عن حقوقي.
تركت من خلفي وردتين صغار بحاجة رعاية كبيرة، لكني أقنعت نفسي و أخدت عهد عليها انه البعد مايكون أبدي، و أنهم رح يبقوا بعهدته بينما أوقف على أرض صلبة، وأقدر استرجعهم من جديد.
المفارقة العجيبة انه رغم كل لؤمه معي، كان العكس مع بناته، مايبخل عنهم ولا يرفض الهم طلب، و صبور معهم لابعد حد، هذا طمني عليهم شوي، و زاد حرقتي على نفسي، لأنه معاملته معهم أكدت لي أنه بيعتبرني عدوة و ند، مو شريكة حياة و زوجة.
سكرت الجوال و وضعته جنبي، نظرت على يميني، كنت محتفظة بقطعة ملابس لكل وحدة منهم، حتى كل يوم عانقها و شمها و خفف لوعة الشوق جواتي.
أنا ما تركت بناتي لأني ما بحبهن، تركتهم لأني ما كنت بدي يكبروا ويتعلموا إنو الزواج ذل،
وإنو الصمت فضيلة، وإنو المرأة لازم تنكسر مشان تستمر.
أدهم ما كان زوجي…كان معركة يومية.
وأنا تعبت كون دايمًا المنتصرة الخاسرة بنفس الوقت.
لفّيت البطانية عليّ أكتر، والبرد مو برد كانون…برد فكرة إنك تكوني أم
وقلبك عالطرف التاني من المدينة.
وغفيت بالنهاية، مو لأني ارتحت...لأن التعب ربح جولة إضافية.
#يتبع
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
`
ــــــــــــــــــــــــ/details?id=com.akram.novels