الفصل 29
29
يوم جديد ..
فتحت عيونها بشويش , لفت يمينها ويسارها , عضت شفايفها بقوة نايمة في الصـالة اللي قدام جناح صقر , وقّفت بتوتر لـو أحد شافها وش بيقول عنها , حطت يدها على راسها ..
توجهت بسرعه لـ الجناح , فتحت الباب دخلت بسرعه وهي تقفل الباب ..
الحمدلله أنها عدت على خير ولا أحد أنتبه لها , خصوصاً أبوه ..
جلست على الـسرير وهي تناظر الغرفة بنظره بانورامية , ماهو موجود ..
أنسدحت على الـسرير وظهرها يعورها من النومة المعكوسه ..
رفعت نفسها من على الـسرير ..
دعكت عيونها بيدينها , وجهت نظرها لـ دورات المياة وهي تحس أن فيه أحد ..
طلع من الحمام وهو عليه بنطلون الثوب المكسر فقط ..
ناظر فيها وهو يقول : وين ذلفتي ..
شيهانة تناظر فيه , فقط لابس بنطلون تنحنحت كذا مره بتوتر
ناظر فيها , فهم قصدها ..
توجهه لـ التسريحة متجاهل نحنحتها : وين كنتي
شيهانة بتوتر من شكله : ..كنت .. أحم ... نايمة في الصالة ..
لف عليها وهو رافع حاجبه : ليه ..
شيهانة أخذت نفس وهي صاده عنه : ..غفيت .. ما امداني
صقر قرّب منها وهو يقول : مره ثانيه قبل لا تغفين ..تأكدي أنك في الغرفة ..
شيهانة وقّفت وهي تقول : البس فنيلتك لا يدخلك برد ..
صقر ناظر فيها , لـحد ما دخلت دورات المياة ..
صد بوجهه وهو ياخذ فنيلته من الدالوب ..
لبس ثوبه , أخذ غترته , وربطها على راسه بشكل "عَصَابة "
طلعت من دورات المياة , وهي تحاول أنها ما تشوفه , او تحط عينها بعينه ..
صقر لف عليها وهو يقول : في الـدولاب فيه ثوب أبيض فيه كبك أسود .. عطيه الخدامة تغسله قبل المغرب ..
شيهانة لفت عليه , رفعت حاجبها وهي تقول : ليه ما تسويه بنفسك .. وش دخلني فيك
صقر لفّ عليها وهو يقول : أرجع المـغرب ألقاه على السرير جاهز
شيهانة بغضب : أنت وش شايفني .. خدامـ.......
صقر قرب من عندها وهو يناظر فيها , قال بصوت يميل الى الـخافت : ألقاه جاهز ..
أنلجمت من قربه لها , وجهه قريب لـ وجهها ..
لف بظهره خارج برا الـغرفة ..
شيهانة تتنحنح : أحـــم .. احـــم .. لا تتوترين عادي جداً .. تصير مع كل الناس ..
جلست على الـسرير وهي تتذكر شكل جسمه , رفعت حاجبها بـ اعجاب ..
شهقت بصوت مسموع : شيهانة يا كلبه وش تفكرين فيه .. قليلة أدب وش يعني جسم رجال طبيعي , نفس كل الرجاجيل .. بس الواحد يدخل نادي يصير جسمة حلو .. بس .. نفس جسم عادل عادي ..
وقّفت متوجهه لـ شنطتها اللي على الأرض , تبغى ترتبها في الدولاب , لكن ماهو وقته الحين ..
وش تلبس , لو أنها بلحالها في البيت كان جلست بالبجاما , لكن لينا و رنا موجودين غصب عليها لازم تلبس , تذكرت لبس لينا ورنا , فساتين قطنية لـ تحت الركبه بـ تقريباً خمسه سانتي , بتلبس مثلهم ..
و قوت ماهي مقصره جايبه لها كل فساتينها اللي من هذا النوع ..
أخذت فستان قطني بنك لـ تحت الركبه .. بـ اكمام قصيره ..
توجهت لـ السرير نطلت الـفستان على الـسرير ..
رفعت بلوزتها , وقبل لا تفصخها
أنفتح الباب
وقّت بجمود , ما كان متوقع يدخل ويلقاها تبدل ...
لفت للباب بسرعه , نزّلت بلوزتها بتوتر واضح على وجهها
صقر و التوتر واضح عليه : ما تعرفين تقفّلــــين الباب ..
شيهانة بلعت ريقها : وانت .. ما تعرف تطق الباب
دخل الـغرف وهو عاقد حواجبه , أخذ بوكه و جواله وطلع وهو يصفق بـ الباب ..
شيهانة بغضب : وجع يوجعك ...
جلست على الـسرير , غمضت عيونها بقوة , لايكون شاف شي ..
يالله ..
توجهت للباب قفلته مرتين , بعدها لبست فستانها ,
توجهت لـ التسريحة , فرقت شعرها اللي يوصل لـ أعلى خصرها بالنصف , حطت الجهة اليسرى ورا اخذنها واليمنى خلتها , بشكل عادي ..
تعطّرت بعطرها , و لبست سلبر الـبيت حقها , وفتحت باب الغرفة متوجهه لـ الدور الـتحتي ..
البيت لمباته طافيه , الساعه الآن عشر الـصبح ..شكلهم ما يقومون هذا الوقت .. من يومها شيهانة ما تنام الليل لكن تقوم الـصبح , ماتدري كيف نظام نومها هذا ..
شغلت الأنارة , وفتحت التلفزيون , حطت على قناة مكه , بداية الصباح حلو ان صوت القران ينتشر في البيت..
توجهت لـ المطبخ , ركبت القهوة العربية اللي مستحيل تستغني عنها في بداية صباحها , أحتارت وين مكان الفحم
دخلت عائشة وهي تقول : وش تسوي يا بنتي ..
لفت شيهانة على عائشة وهي مبتسمه : ... أدور فحم ..
عائشة طلعته لها من الدرج : تفضلي ..
شيهانة أبتسمت : انتي شكلك صوماليه صح ..
عائشة أبتسمت لها : فعلاً يا بنتي .. بس أني من عمري عايشة هنا
شيهانة بحب , ذكرتها بروزانا :.......
عائشة : ارتاحي وانا بـ أسوي القهوة ..
شيهانة : خلاص جهزت .. انا بـ اكملها ..
حطت الفناجين و الـتمر ..وبخرت الصالة
وطلت وفي يدها الـقهوة ..
حطتها على الطاولة .. جلست على الـكرسي وهي تقهوى
دخل أبو متعب وهو يقول : السـلام عليكم
شيهانة ابتسمت : وعليكم الـسلام صبحك الله بالخير يا عم
جلس ابو متعب وهو يبتسم : جعل صباحك نور يا بنتي ..
شيهانة مدت له فنجان قهوة : سم
أخذ أبو متعب القهوة وهو يقول : سم الله عدوك .. قمت الصبح واشوف كن فيه شي متغير في البيت العادة محدن يقوم هالوقت الا انا .. اثرك قايمة يا بنيه ..
شيهانة ابتسمت : اغلب الوقت يا عم اقوم هالوقت .. تعودت من زمان اقوم مع ابوي و اقهوية
ابو متعب : الله يحفظه لتس يا ابوتس ..
شيهانة : تسلم يا عم ..
وقّف أبو متعب وهو يقول : .. الا وين صقر يا شيهانة ..
شيهانة : طلع قبل تقريبا نص ساعه ..
أبو متعب هز راسه : حافظه ربي .. انا بتوكل على اشغالي .. فمان الله
شيهانة : فمان الكـريم ..
طلع أبو متعب من الـصالة ..
مدت شيهانة رجولها , وهي تتذكر الـيوم بيروحون يخطبون لـ عادل ..
مستغربه من موافقه عادل على الـزواج , أكيد أن فيه سبب ..
مستحيل يوافق على الزواج كذا و السـلام ..
كان يحب قوت , وين راح الـحب اللي كان يحبه أياها ..
و فجأه قلب عليها , وكأنها ذابحه له عزيز ..
الله يعلم مافي سرك يا عادل ..
ـــــــــــــــــــــــــ ـــــــــــــــــــــــــ ــ
فتحت عيونها وهي تشوف الـساعه , عشر الصبح ماهي وجهه دوام ..
وقّفت بسرعه متوجهه لـ دورات المياة بدلت وهي غضبانة في داخلها من خالد اللي سفهها ولا قومها حتى ..
تأخرت أمس في الرجعه لـ البيت , ولا نامت الا متأخر ..
لبست وعلطول نزلت لـ الباب , توجهت لـ الشارع العام وقّفت تاكسي وركبت متوجهه لـ الـشركه ..
ـــــــــــــــــــــــــ ــــــــــــــــ
سلّمت من صلاة الظهر ..
وقّفت وهي ترفع شعرها كله لـ فوق ..
طلعت من الغرفة , مرت غرفة رنا قومتها ..
بعدها نزلت لـ الـصالة ...
قالت وهي مبتسمه : ماشاءلله قايمين ..
شيهانة أبتسمت : من عشر الله وكيلك
لينا جلست مقابل شيهانة وهي تصب لها قهوة : ماشاءلله ..
دخلت رنا و وجهها واضح انها توها قايمة من النوم : سلملم ..
شيهانة و لينا : وعليكم الـسلام ..
رنا جلست على الـكرسي وهي تقول بتثاقل : موضي بتجي الـيوم
لينا : امانه ..
رنا : امس دقت علي تقول بتجي ..
شيهانة : موضي هذي اختكم صح
لينا : ايه بس أنها عايشة في الدمام مع زوجها ..
رنا ناظرت في شيهانة : امس لقيتك نايمة في الصاله .. وش فيك
شيهانة ضحكت : صح ..
لينا رفعت حواجبه وهي تبتسم : ليه عاد
شيهانة بصدق : مدري .. خفت من اخوكم ..
رنا : من وش تخافين .. هما ما بينكم شي خلاص عادي
شيهانة : مدري أمس غريب كان .. وطلعت ادوركم طلعتوا نايمين
رنا ضحكت : على أساس أنك انحشتي يعني , مامي ما عرفتي صقر لو بغى شي يجيبه يجيبه لو أنه وين ماكان
شيهانة بغضب : والله .. يسوي اللي يبي ماعلي منه ..
رنا : تشوفين مع الوقت يا مزه ..
لينا تتأمل في ملامح شيهانة : والله تذكريني بـ قمر ..
شيهانة : من قمر ..
رنا ناظرت في لينا : المغنية اللبنانية .. انا اول ما شفتها قلت انها تشبهها نفس قصة الوجهه
لينا : هذي هي .. كأنها شفايفها ..
شيهانة أبتسمت : يا كثر اللي قالوا لي
لينا بـ اعجاب : زيييييينك بس .. قمر والله انك قمر
شيهانة أرسلت لها بوسه في الهواء : حلوك أنتي والله ..
رنا ناظرت في لينا : مامي ..شوفي الغدا جوعانه
لينا رفعت حواجبها : حبيبتي الساعه ثنعش وربع .. اهجدي الغدا وحده ونص
رنا شهقت : وانا بنتظر ساعتين الا ربع
شيهانة ابتسمت في داخلها , يذكرونها بـ نفسها وهي وقوت ..اذا اجتمعوا مع بعض ..
ـــــــــــــــــــــــــ ـــــــــــــــــــــــــ
في الـشركة من ساعتين ..
جالس في مكتبه الـجديد بعد ما أنتشر خبر مساهم خالد في الـشركة , الخبر اللي صدم كل الموظفين , بعدما كان خالد الأـموظف البسيط صار من مالكين الشركة تقريباً ..
للآن ما جت , ولا بانت.. شكلها ما صحت من النوم للأن ..
فجأه أنفتح باب مكتبه دخلت ديم وهي معصبه وبصوت مقهور : ليه ماقومتني قبل ما تروح لـ الشركة
خالد رفع حاجبه : خدامتك الفلبينيه انا ..
ديم أنحرجت من كلمته قالت : موب عن .. بس وش شكلي قدام الموظفين وانا متأخره عن الـشغل ..
خالد ناظر فيها , بعدها قال : ممكن تتفضلين لـان عندي شغل ..
ديم ضربت رجلها في الأرض من القهر , طلعت متوجهه لـ مكتبها
ناظر فيها لحد ما دخلت مكتبها , هذا شكل مدير لـ الشركة , تضرب رجلها في الأرض لانها أنقهرت ..
ـــــــــــــــــــــــــ ـــــــــــــــــــــــــ ـــ
بعد أذان العصر ..
كان واقف قدام تسريحته يعدل نسفه غترته , وهو يحس بضغط شديد في أفكارة , تصرف طفولي اللي سواه و متسرع لـ المليون , أنقهر من تعليق قوت , و بدون وعي منه وافق على الـخطبه ..
مسح وجهه بيده , بسبب حبه لها القوي في السابق صار يتحسس من كل كلمة تقولها له ..
تذكر السبب اللي خلا حبه لـها يصير عدم ..
قبل فترة من الزمن ..
جاي من برا , جايب معه عشا لـ شيهانة وقوت ..
توجهه لـ الصاله وقبل لا يدخل
شيهانة بصدق : والله احسه يحبك ..
قوت بجنون : انهبلتي عادل يحبني انا ..
شيهانة رفعت كتوفها : والله احسه يحبك .. عاد انا مدري عن أحساسي
قوت ضحكت : يا ماما هذا ما عرف وش يعني حب , تبينه يجي ويحبني انا .. و بعدين حتى لو حبني وش بيصير أخر شي .. ولا شي .. في النهاية عادل شخصية غير محببه لي ..
شيهانة بضيق : حرام عليك .. عاددل موب لهذي الدرجة بشع من جوا
قوت بصدق : والله يا شيهانة تربيته وهو متشتت خلته ما يعرف يحب , مره في بيت أبوه , مره هنا , مره بلحاله .. حالته صعبه ..وبعدين انا ما افكر أتزوج واحد ممكن تكون أمه و ابوه منفصلين من قبل لانه ممكن يعكس على شخصيته ويخليه شخص ثاني
شيهانة : هوووب هوووب وقفي وش منفصلين الجوهره الله يرحمها توفت ما تطلقت من نايف , ونايف يا عمري للحين يحبها حتى وهو متزوج منيرة
قوت رفعت كتوفها : مدري .. بس عادل بالنسبه لي نوو . اساساً حتى ما اشوفه على هيئة رجال , أشوفه كأنه طفل .. طفل بجسم كبير ..
كلماتها هذي , كأنها صواريخ تتجهه لـ قلبه بقوة , صاروخ ورا صاروخ , قمبله ورا قمله .. و سكين تغرس ..
صدمته في هذاك اليوم المشؤوم , ضل أثرها فيه كبير لـحد هذا اليوم ..
صحى من الذكرى المشؤومه , وهو يحس أنها خربت كل شي في حياته , حتى في خطبته هذي كانت هي السبب فيها , ما يبغى يسوي شي يرتبط فيه لـ نهاية عمرة وقوت لها دخل فيه ..
طلع بسرعه متوجهه لـ جده قال : جدي .. أبو نواف يعرف سبب جيتنا
لف أبو نايف بشياكته اللي ما تبين عمره أبداً وكأنه رجل في الأربعين وليس رجل على مشارف الـستين : يعرف أنا بنجيه ...وراك
عادل : قصدي يـ أبوي .. يعرف أني بخطب بنته الليلة
أبو نايف : لا يا ولدي .. بس يعرف أننا بنجيه
أرتاح عادل , قال بصدق : كنسل كنسل ..
أبو نايف رفع حاجبه : وش اللي كنسل كنسل
عادل جلس على الكنب وهو يقول : الخطبه ذي كنسلها
أبو نايف بغضب : طلب هو من المطعم عشان أكنسله
عادل وقّف وهو يبوس راس أبوه : يبه .. نخيتك ما نخيت الرخوم .. لا تفتح الموضوع ذا مره ثانيه .. مالي في هالخبطه .. وقرار اخذته وانا متسرّع ..
دخلت قوت وعليها المصلى وفي يدها البخور : يبه .. والله اني اخاف على كشختك ذي تدخل ويحسبونك أنت المعرس
أبو نايف بضيق : هذي هي تكنسلت يـ أبوتس
قوت بعدم فهم : وش اللي تكنسل
أبو نايف : الشيخ عادل .. ما يبي يتزوج .. كنسلنا الخطبه
قوت ناظرت في عادل , بعدها ناظرت في جدها : .. لا حول ولا قوة الا بالله ..
طلع أبو نايف من الـمجلس بغضب تام ..
قوت ناظرت في عادل : وش اللي صار
وقّف عادل وهو متوجهه لها : شي أنتي دخلتي فيه , مانيب موافق عليه
ناظرت فيه بعدم فهم : وش قصدك
عادل ناظر فيها لـ أول مره , نظراته تتحدث عن كرهه عميق في قلبه
طلع من الصاله ..
قوت ضلت واقفه لـ ثواني تستوعب كمية النظرات اللي حست بحرارتها...
جلست على الـكنبه بتوتر , على كثر الـمصايب اللي تصير بينه وبينها لكن لاول مره تحس بحراره النظرات هذي ..
ـــــــــــــــــــــــــ ــــــــــــــــ
hadeel11, اطلانتس and سراااااااب like this.
دخلت الغرفة , متوجهه لـ دولاب صقر , اخذت الـثوب وعطته الخدامة اللي تنتظرها عند الباب ..
سكّرت باب الغرفة وهي متوتره من لقاء موضي .. اللي ما تدري عن طبيعتها أبداً ..
أنطق الباب ..
توجهت لـ الباب وفتحته , دخلت لينا وهي تقول : شيهانة .. موضي تقول أن حمواتها بيجون معاها .. يعني .. فيه عزيمة هنا
شيهانة عضت شفتها التحتيه : تصدقين ما جبت ملابس .. ما ادري وش ألبس .. طيب كم حماوتها ..
لينا : تخيلي كم حرمة ... 12 حرمة .. جايين لـ الرياض يزورون جدهم اللي في المستشفى
ضحكت شيهانة وهي تقول : يبي لك تتسنعين ..
لينا بتوتر : المشكله انها تقول على الـسبع بيكونون في الـبيت .. كلمت صقر وقلته يوصي على ذبيحه .. بس امور الحلا هذي الاشياء مدري وش اسو
شيهانة : ما عليك .. انا بتولاها .. خلاص روحي أجهزي وانا بتولا كل شي
لينا بفرحه : الله يوسع لك
شيهانة : طيب رنا وين
لينا : هذيك مامنها رجا خليها في عالما .. يالله انا بطلع الحق ارتب الاشياء قبل يجون
طلعت لينا , واخذت جوالها شيهانة.. طلبت لها حلا من الأنتسقرام و وبيوصلها اللساعه ست ..
اتصلت على قوت عشان ترسل لها فستان من بيتهم , لكن قوت ما ترد ..
فففففففف ..
انسدحت على الـسرير , غفت عينها ..ونامت ..
ـــــــــــــــــــــــــ ـــــــ
في غرفة لينا , بعد ما تأكدت أن كل شي مرتّب أخذت شاور ..
طلعت ونشفت شعرها , لبست فستان نيلي ماسك على جسمها لحد تحت ركبتها بـ اكمام طويلة بدون ساده , كعب فضي ..
حطت شعرها على جنب , توجهت لـ التسريحة حطت روج وردي
بعدها طلعت متوجهه لـ غرفة رنا , دخلت على رنا وهي تقول : ما خلصتي
رنا لابسه بنطون أسود خصر مرتفع , و بقصه وسيعه , و بدي أسود مرسوم على جسمها وشعرها مسويته عميلة فرنسيه لـ نفسه و النصف الثاني تاكرته مفكوك , سموكي أسود , وروج أحمر خمري ..
شهقت رنا أول ما شافتها : خيييييييييييير .. وش المكياج ..بس روج أنهبلتي
لينا خافت منها : بسم الله .. بحط بحط .. جايه بحط مسكره و بلاشر
رنا ضرربت رأسها بجنون : تعالي هنا .. تعالي
قرّبت لينا من رنا وهي تضحك بخوف : بسم الله تخوفين
جلّست رنا لينا على الـكرسي وسوت لها ميكب خفيف , شادو بني على طرف العين , بيج في وسط العين , آيلاينر و كحل داخل العين ماسكرا ورسمت حواجبها .: بس أنتهينا ..
لينا ناظرت في نفسها بـ اعجاب : مرسي حبيي ..
رنا بتعب : ان شاءلله تفهمين عاد .. وين شيهانة
لينا : تصدقين ما سمعت صوتها من الـيوم ..
بروح أشوفها ..بس اخاف صقر فيه
رنا : لا صقر توه اتصل فيني يقوم بجي بعد ساعه ..روحي شوفيها
توجهت لينا لـ غرفة صقر
طقت الباب
فتحت عيونها , وهي تحس بنعاس .. ناظرت في جوالها فزت بسرعه وهي تشوف الساعه سبع الا ربع , حتى صلاة المغرب راحت عليها
توجهت لـ الباب وفتحته
لينا بصدمة : ما لبستي
شيهانةعضت شفايفها : راحت علي نومه وش اسـ..
رن جوالها توجهت لـه , ردت ..كان المندوب معه الحلا ..
شيهانة : الحلا جا ...
توجهت لـ بوكها أخذت فلوس
لينا : بنت رجعي الفلوس لـ البوك انا بدفع
شيهانة ناظرت فيها : تستهبلين انا اللي طالبه انا اللي بدفـ...
لينا توتر شيهانة : تاخرتي مررره خلصي البسي و تمكيجي وترى منتي دافعه شي ويالله بروح باي
طلعت لينا ما خلت مجال لـ شيهانة تتكلم ..
توترت شيهانة ما تدري وش تلبس ..
طلعت بسرعه متوجهه لـ رنا
دخلت الغرفة وهي تقول : رنا .. الحقيني ..
رنا ناظرت فيه : وش فيك
شيهانة : ما جبت ملابس حقت عزايم .. وراحت علي نومه ما قلت لـ قوت ترسل ملابسي .. انقذيني بـ أي شي لحد ما اتروش واجي
رنا وقفت وهي تقول : انا لها .. روحي وانا بجهز كل شي
فتحت رنا دولابها تناظر فيه , وش فيه شي جديد شاريته و ما أحد شافه أبتسمت رنا بخبث , وهي تطلع لـ شيهانة فستان أحمر ضيق طويل
ماسك على الـجسم نص الظهر طالع , وفتحت الصدر جداً وسيعه ...
طلعت كعب فضي لها ..
توجهت شيهانة لـ غرفتها , تروشت .. ونشّفت شعرها ..
في اللحظات اللي زي كذا الواحد يحمد ربه أن شعره ناعم ..
طلّعت مكياجها , تمكيجت بسرعه , آيلاينر عريض بدون شادو ورموش كثيفه من الأطراف , بلاشر بني فاتح جداً .. كنتورنق ..
رسمت حواجبها ,..رسمت شفايفها بمحدد أحمر , وحطت روج مايل لـ الأحمر مات ..
رجّعت شعرها على ورا , اخذت معطر الـجسم , رشت على جسمها
و عطر الـشعر عطرت شعرها .. لبست روبها الـطويل ..
طلعت من الغرفة متوجهه لـ غرفة رنا
فتحت الباب وهي تقول : خلصت وين الـفستان
رنا أبتسمت وهي تقول : يا قمالو.. شوفيه معلقته على المنكان ..
شيهانه أخذت الفستان , دخلت دورات المياة ولبسته , انصدمت من كثر ماهو عاري بالنسبه لها , صدرها باين وظهرها من ورا أغلبه طالع ..
و مبيّن تفاصيل جسمها بشكل دقيق ..
مستحيه تقول لـ رنا أنه ما اعجبها من كثر ماهو عاري , وفي نفس الوقت مستحيه تقول لها انها تبي تغيره , طرار ويتشرط ! ...
أخذت نفس عميق , شكلها صدق كأنها عروس توها متزوجه
ناظرت في شعرها ماهو معجبها كثير ..
رجعته على ورا كله عشان يغطي ظهرها اللي طالع ..
طلعت لـ رنا وهي متوتره من شكله عليها
رنا ناظرت فيها , قالت وهي مشدده على كلماتها بـ اعجاب : يطير العقل عليك ..
شيهانة أبتسمت لها :........
رنا : البسي الكعب هذا بيطلع حلو ..
شيهانة : بلبسه , بس وش رايك أخلي شعري كذا ..
رنا , قربت منه, فرقت شعرها لـ النص , خلصت جزء منه على قدام والجزء الثاي ورا : كذا أحلا بكثير .. باقي لك حلق و خوا..
شيهانة تقاطعها : عندي .. بلبسها و أجي ..
رنا هزت راسها : اوكي ..
طلعت شيهانة متوجهه لـ الغرفة ..
أبتسمت بـ اعجاب , أنوثه جبّارة , أكثر من أنه جمال .. غريبة مقاومة صقر لـ شيهانة
طقت راسها وهي تعض شفايفها , سمعت صوت صقر قبل شوي ..
دخلت لـ الغرفة بشويش , وهي تحس أنها تقريباً مفصخه ..
الظهر كله طالع , والصدر تقريباً مابقى شي منه , وش بقى اكثر !
توجهت لـ شنطة يدها تاركه فيها حلق ألماس ناعم .. أخذته ولبتسه ..
لبست ساعتها و اسوارها .. شافت جوالها يرن , اخذت جوالها وحطت السماعات في أذنها أبتسمت وهي تشوف أسم قوت على الـجوال : هلا والله و مهلّي ..
أخذت مناكيرها الحمراء من شنطتها , جلست على السرير حطت رجل على رجل , وهي تمنكر اظافرها : وينك يا بنت واحشتني
طلع من الحمام بعد ما تروّش ..
أنلجم وهو يشوفها قدامه جالسه على الـسرير , تكلّم قدامه ..
تصلّبت عيونه عليها , وكأن البقعه اللي تحته فيها كل جاذبيه الأرض اللي ماخلته يمشي من مكانه ,
أنوثه طاغيه , ريحه عطر منشره في المكان ..
ناظر فيها بالتدقيق الـقوي , من رأسها لـ أسفل قدمها ..
شافها تنزل السماعات من اذنها , وتحاول تنشف مناكيرها بالهواء
وقفت وهي تنشف مناكيرها
لفت لـ جهة الحمام , طاحت عينها على اللي واقف يناظر فيها
تصلّب هي الأخرى .. بلعت ريقها وصوت قلبها بدأ يبان من قوّة النبضات ..
صقر وكأنه صحى لـ نفسه : انتي ... وش هاللبس ..
شيهانة أخذت المخده بسرعه وهي تحطها عليها : انت .. من متى كنت هنا ..
صقر ناظر فيها من جديد من فوقها لـ تحتها
شيهانة بتوتر : ... ما عندي ملابس سهره .. يعني ملابس رنا هذي ما كنت .. اقصد ماعندي ملابس سهره ..
صد بوجهه بسرعه وهو يتوجهه لـ خارج الـغرفة بروبه اللي عليه حق الشاور ..
جلست على الـسرير بتوتر و قلبها يطق يطق ..
جلس في الصاله الـخارجيه , ولو كان , فهو في النهاية رجل , وعزوبي !
طلعت رنا من غرفتها , متوجهه لـ الدور الـارضي ..
لمحت أخوها في الصاله بـروح الشاور ..
ضحكت بصوت غير واضح , شكله شافها وهي لابسه الفستان ..
نزلت بسرعه لـ لينا تحكي لها اللي شافته
لينا ضحكت : الله يقطع بليسك
رنا ضحكت : والله لو تشوفين صقر .. اول مره اشوفه بروب الحمام برا ..
لينا تحمست تشوف شيهانة : تحمست أشوفها
رنا : روحي شوفيها والله ما ينلام قمر
لينا ضحكت : ياربي .. منك كلبه وعوبه .. امسكي ودي الحلا لـ الصاله.
......
في الغرفة فوق
مسحت جبهتها بتوتر ..
وقّفت وهي تحاول أن تكون واثقه من نفسها بقوة..
..
في الصاله ..
وقّف وهو يحاول أن يتمالك نفسه , ولا يحسسها بـ توتره القوي بسبها
توجهه لـ الغرفة فتحها دخل الـغرفة وهو يشوف ثوبه معلّق على الدالاوب
أخذ ثوبه وهو يتصدد عن النظر فيها ..
دخل دورات المياة , لبس ثوبه و طلع
لقاها جالسه على السرير معطيته ظهرها
شيهانة " مافيه شي عادي , اساساً هوو ما تفرق معه .. عادي طبيعي .. طبيعي " :..........
صقر قال بصوت مسموع : وش مجلسك لـحد الحين .. ليه ما تنزلين
شيهانة وقّفت وهي تلف عليه : بنزل ..
صقر تعوّذ من أبليس في خاطره , صد بوجهه وهو يقول : هاللبس اللي انتي لابسته .. لا أشوفك فيه مره ثانيه ..
شيهانة بتوتر : اساساً ملابسي ما...
صقر يقاطعها : لا أشوفك فيه وبس ..
شيهانة لبست خواتمها , وهي تتجاهل كلامه ..
لبس شماغه الأبيض حط العود الخاص فيه , تعطّر من عطره , توجهه لـ الباب
وقّفت متوجهه لـ الباب
لف وهو يشوفها خلفه , بعدها فتح الباب وهو يقول : تستري ..
شيهانة بغضب تخفي فيه توترها : وش شايفني مسويه ..
سكّر الباب بقوة لف عليها وهو يقول بغضب : متفصخه ..
شيهانة توترت بشده , رجعت كل شعرها لـ ورا وهي تتنفس بسرعه : بـ اطلع وخر
لاحظ حركتها المتوترة , ناظر فيها وههو يصارع في داخله كم هائل من الأنوثه , فتح الباب بسرعه وطلع متوجهه لـ الدرج وشيهانة خلفه
واقفه تصور سناب جات ,
أول ما لمحت صقر نازل و شيهانة جمبه تنزل , صوّرتهم فيديو وهي معجبه بـ الثنائي اللي تحسهم لايقين مره على بعض ..
صقر دخل وهو يبتسم : لا جت موضي أرسلوا لي صالح لـ المجلس ..
لينا أبتسمت : يا حبك له .. بس أبشر ..
تقدّم صقر لـ الحلا وهو ياخذ وحده : ..
جلست على الـكرسي وهي تعدل شعرها بتوتر , مهما كان صقر ما تقدر تأمن له ..
طلع من الـمجلس وأخر نظره , كانت لـ شيهانة , ناظرها نظره خطّافية وطلع ..
رنا بحماس : صوّرتكم فيديو وانتوا نازلين ياربي تلقون على بعض
شيهانة شهقت : يا نذله
لينا بحماس : وريني بالله
رنا شغّلت الفيديو : امانه شوفي
لينا بصدق : والله العظيم تلقون .. صقر شكله صدق انه ماهو وسيم وسيم لكن رجولي وانتي يا حمارة شكلك أنثويييي مررره , تلقون مره ..
شيهانة وهي تشوف الفيديو , فعلاً لو ماكانت هي اللي في الفيديو كان شهدت على كمية الـتطابق الشكلي بينهم ..
شيهانة : حمااارة ..
لينا : بنات موضي وحمواتها عند الباب ..
وقّفت شيهانة وهي متوتره من لقاء موضي جداً :...........
فتحت لينا الباب وبدأت بالسلام هي ورنا على الضيوف اللي تتنوع اعمارهم من كبيرهم لـ صغيرهم ..
دخلت موضي وهي تناظر في شيهانة من فوق لـ تحت : انتي مرت صقر
شيهانة أبتسمت وهي تقول : ايه
سلّمت موضي على شيهانة ببرود تام , وخلفها الضيوف
جلسوا في الـصاله وعم الهدوء ..الهدوء الكريه ..
بدأت عائشة تصب القهوة لـ الضيوف اللي بدأوا يسولفون مع بعضهم
وكل وحده اكشخ من الثانية بالشكل ..
حماة موضي : وأنتي مرت صقر صح
شيهانة بـ ابتسامة : ايه .. انا زوجته ..
حماة موضي الأخرى : ماشاءلله كم عمرك
شيهانة بتوتر من أسألتهم قالت وهي مبتسه : خمسه وعشرين سنه
موضي تكلّم حماوتها , وبنبره غريبة : عاد تراها موب أول زواج لها هي
حموات موضي أنشدوا لـ كلامها
موضي بشك : ضني أنك يعني قد تطلقتي من قبل
لينا ورنا ناظروا في موضي بـ دهشه شديده
شيهانة ناظرت فيها : صح ..
حماة موضي : عندك منه أولاد عاد
شيهانة بتوتر شديد :لا ..
رنا أبتسمت مجاملة والغضب داخلها يشتعل : تقهووا يا جماعه
حماة موضي تبتسم لـ رنا , بعدها توجهه نظرها لـ شيهانة : عاد وش سبب الطلاق من الأول
شيهانة ناظرت فيها , وبقوتها المعتاده أبتسمت لها وهي تقول : بيحل لك أزمه لو عرفتي .. مهم جداً لـك أنك تعرفين سبب طلاقي من الأول ..
حماة موضي اللي تفشّلت من طريقة شيهانة : لا بس يعني نعرف ..
شيهانة ناظرت فيها وهي مبتسمه : ما يخصك .. ربي ماكتب بيننا الموده
رنا انبسطت من رد شيهانة بشكل كبير , الا ان لينا شالت هم موضي اللي واضح أنها فوّرت من كثر الـعصبيه ..
مر الوقت بالبطيء ..
تعشوا الضيوف الثقال جداً على قلوب الثلاثي ..
بعدها طلعوا
رجعت لينا و رنا بعد ما ودعوا الـضيوف الثقال ..
رنا بكرهه : وع .. يا ثقل دمهم
شيهانة ساكته , ردها اليوم و اللي صار ضيّق مزاجها بشكل كبير :....
دخلت موضي وهي تجلس على الـكرسي , قالت وهي تناظر في شيهانة : وشوله هالأسلوب مع حمواني .. كان صرتي محترمه أكثر
رنا ناظرت في موضي : موضي شدعوه .. حمواتك هم ثقال الطـينة
موضي بوقاحه : اسكتي يا بنت المغربية
رنا وهي ماهي مستغربه رد موضي : بنت نادر .. بنت أبوك .. تكلمي زين عشان ما أصب الـكلام في اذن ابوي وانتي بتعرفين وش يصير
شيهانة ناظرت في موضي , و عن النظره الاولى اللي أخذتها شيهانة عن موضي أنها شخص غير مريح جداً : اصير محترمه أكثر .. ليه ما شفتي طريقتهم معي .. المفروض أنك تقريباً تتأسفين مني على الطريقة الهمجيه اللي تعاملوا معي حمواتك فيها ..
موضي ناظرت فيها وهي تقول : ماقالوا شي , سألوك سبب الطلاق
لينا بتوتر : لا اله الا الله .. انتهى الموضوع
شيهانة : شي ما يخصهم .. ليه اجاوب عليه
موضي بتمتمه : شكلك ما تجيبين عيال ..وربي قرد اخوي فيك
شيهانة ناظرت فيها :لا اله الا الله ..
موضي لـ لحظة قالت : انتي مطلقة ..كيف تزوجك أخوي ..
شيهانة طلّعت جوالها تلعب فيه : قضاء وقدر
رنا ناظرت في شيهانة , بمعنى اسفهيها
موضي تحارش شيهانة: شكله مغصوب عليك يا عيني عينه
شيهانة ناظرت فيه , قالت بتقهرها : لاهو مغصوب علي ولا انا مغصوبه عليه والحمدلله كلنا سمنه على عسل مع بعضنا
وقّفت لينا وهي تفصخ الكعب , صبت لها قهوة وجلست تشرب لها
دخل صقر وهو يقول : الـسلام عليكم
وقّفت موضي متوجهه لـ صقر بسرعه : هلا .. هلا بزين الشباب
سلّم صقر على موضي وتوجهه لـ جانب لينا وجلس مقابل لـ شيهانة
صقر وهو مبتسم : وين صويلح ما شفته
موضي : يا عيني نايم .. تعب من الطريق ونام .. يا عيين وخيتك تحب البزارين , عسى ربي يطعمك منهم في القريب العاجل
أبتسم صقر وهو يقول : آمين ... شلون جلستكم ؟
لينا ورنا يتساسرون في ما بينهم ويأشرون لـ شيهانة اللي كانت تفهم وش يقولون
موضي ناظرت شيهانة :حلوه .. لولا انها خربت شوي
صقر عقد حواجبه : ليه وش اللي خربها
قامت شيهانة بسرعه تنفيذاً لـ طلب البنات , توجهت لـ صقر وهي تبتسم في وجهها , وهو يناظرها بتوتر
جلست جمبه وهي تقول : ابد حبيبي .. مافيه شي خرب .. بس الله يهديهم حموات موضي يسألون اسأله أحرجتني مره وانا رديت عليهم , اتوقع موضي توترت لاني رديت عليهم بس .. هذا كل اللي صار ..
ناظر فيها بتوتر , كيف ملاصقه له , وتناظر فيه بـ ابتسامة خربطت كيانه فوقاً على تحت
موضي تناظر فيهم بتفوّر من جلستهم جمب بعض
صقر هز راسه وهو يحاول ما يبين توتره , قال وهو يوجهه كلامه لـ موضي : وش قالوا ..
موضي بتهويل لـ الأمور : سألوها كم عمرها , وليه تطلقت وهي ردت عليهم بـ اسلوب شين
شيهانة لـفت تناظر في موضي : موضي ... حمواتك يخصهم ليش انا تطلقت .. وبعدين انا قفلت على الموضوع نهائي لاني تزوجت ولا ابي أحد يسألني هالسؤال ثاني مره
صقر وهو يحاول ما يوضح توتره اللي بان تقريباً على ملامحه : وهي صادقه ليه يسألون المره متزوجه ..
رنا قافطه الوضع : شوفي وجهه صقر .. بيموت الا شوي
لينا ضحكت : خليها توخر عنه أفضل لها ..
رنا : شكلها بتنام عندي الليله
لينا ضحكت بقوة , والكل ناظر فيها
شيهانة وقّفت وهي تتوجهه لـ البنات , ناظرت في موضي وهي تقول : سولفي مع اخوك ..
جلست جمب البنات وهي تقول : الله يقطعكم انتم وفكرتكم .. سويت شي بيجني علي .. احسه بيذبحني الحين .. النومه عندك ترى
ضحكت رنا وهي تقول : توني أقول لـ لينا شيهانة بتنام عندي ..
صقر وللحين ما خرج من تأثير حركتها القوية جداً عليه ..
وقّف وهو يقول : انا بـروح أنام .. تصبحون على خير
رنا صقعت شيهانة : قولي وانت بخير حبيبي
شيهانة بسرعه تنفيذ لـ كلام رنا : وانت بخير حبيبي
لف عليها ناظر فيها , بعدها توجهه لـ الغرفة بسرعه
موضي ناظرت في شيهانة وهي توقف : ما توقعتكم سمنه على عسل لهالدرجة ..
شيهانة أبتسمت : واكثر ان شاءلله
رنا : والمربى ان شاءلله قادم في الطريق
ضحكت لينا وهي تناظر في رنا
موضي طلعت من المجلس متوجهه لـ غرفتها للي في بيت أبوها
شيهانة بتوتر : وش سويت انا الله يخرب بيت العدو .. بنات والله العظيم شكل صقر بيذبحني اليوم
لينا بصدق : بنت .. انتبهي انتبهي موضي تعرف بعلاقتكم .. لانها لو درت الرياض كلها بتدري .. فـ انتبهي لـ سمعتك
رنا بصدق : اسمعي كلامها
شيهانة : اوف .. لهدرجة
لينا رفعت كتفوها : واكثر .. موضي من النوع اللي ما تحب تشوف رجال يدلع زوجته , تبيهم كلهم يعاملون زوجاتهم زي ما يعاملها زوجها ..
شيهانة رجعت على ورا وهي تقول : يا ليل الليل معاها , الله يعينني ..
رنا ضحكت وهي تقول : تبين بجامة
شيهانة ضحكت وهي تقول : انتي عارفة الوضع ما يمديني أدخل الغرفة لاني بـ انشنق
لينا تذكرها : بس حبيبتي ترى ماعندنا مزيل مناكير ..
شيهانة ناظرت اظافرها : لا تقوليين ..
ضحكت لينا وهي تقول : والله ..
شيهانة : بنتظر ساعه لين ينام بعدها بروح ..
رنا وقّفت وهي تقول : تبون قهوه ؟
تقهوو البنات , بدأو يسولفون , وشيهانة نست موضوع صقر بالمره ..
لينا تتثاوب : الساعه ثلاث يا بنات ..
رنا ناظرت في الساعه : يمه ما حسينا ..
وقّفت شيهانة وهي تقول : بروح اجيب الـمزيل , وبجيب بجامتي وبجي عندك ..
رنا وقّفت وهي تقول : لو تأخرتي اكثر من عشر دقايق , بدعي لك من كل قلبي
ضحكت شيهانة وهي تتوجهه لـ غرفتها , أول ما وقّفت قدام الباب توترت , يارب يكون نايم .. يارب يكون نايم ..
فتحت الغرفة بشويش , اللمبات خافته مره , رفعت مستوى اللمبات أكثر ..
سكّرت الباب بشويش , ناظرت تجاه الـسرير منسدح على بطنه ..
مشت بشويش لـ اتجاه الـسريحه , فجأه اللمبات تشغّلت كلها
لفت بسرعه لـ اتجاه السرير , واقف قريب من اللمبات وهو يقول : تأخرتي ..
ـــــــــــــــــــــــــ ـــــــــــــــــــــــــ ـــــــــــــــــــــــــ ــــ
أنـتـهى الـفصل الثاني : الجـزء الـسادس ..
يـارب .. يكون عجبكم ..
أنتظر الـكومنتس ..
hadeel11 and سراااااااب like this.
الـفـصل الثاني : الـجزء السابع..
هُناك ديون لا تُسقطها الأقدار من الأعناق ..
كِـ دين رجُل أحرق عُمر فتاه وَ رحل ..
..
سكّرت الباب بشويش , ناظرت تجاه الـسرير منسدح على بطنه ..
مشت بشويش لـ اتجاه الـسريحه , فجأه اللمبات تشغّلت كلها
لفت بسرعه لـ اتجاه السرير , واقف قريب من اللمبات وهو يقول : تأخرتي ..
شيهانة بلعت ريقها بتوتر : كنت .. سهرانه مع البنات ..
قرّب صقر منها وهو يناظر فيها من فوق لـ تحت : وش سويتوا
شيهانة وقّفت وهي تحاول أن تكون صلبه : نسولف ..
وقّف قبالها وهو يقول : أنبسطتي ؟
شيهانة صدت بوجهها لـ التسريحه تاخذ المزيل , وهي تحاول ما يبان عليها تأثير التوتر : الحمدلله
مسك يدها , لف عليها وهو يقول : وش هالجمال اليوم ؟
شيهانة ناظرت فيه بتصلب تام :..............
حط يده خلف خصرها وهو يقول : كل شي فيك الـيوم حلو .. و الاكثر فستانك ...
شيهانة , أقل ما يقال عنها في داخلها , منهاره بسبب التوتر :..........
صقر حط يدينه الثنتين ورا خصرها و قرّب وجهه من وجهها وخدها شبه ملامس لـ خده : جمال المنظر اليوم .. ما اقدر انساه لو بعد ثلاثين سنه
شيهانة بتوتر تام , واضح على وجهها وبدون ستيعاب حطيت يدها على كتفه وهي شبه مخدره
صقر ناظر في عيونها وهو يقول بصوت واضح : أعجبك كلامي ..
فك يدينه منها و بسرعه الـبرق تغيّرت ملامحه لـ الغضب : وش اللي سويتيه اليـوم
شيهانة رجعت على ورا وهي تقول : مـ.......
صقر بضغب شديد : تحسبين انك بتأثرين فيني , بتخليني أفكر فيك طول الوقت ... غلطانه ... ما أثرتي ولا بتأثرين لـ طول العمر ..
قال وهو يرف أصبعه الـسباب بتحذير : لا تحاولين تسيطرين علي , منتي بقادره لاني قلت لك من قبل وبقولك مليون مره , ما ألمس وحده لمسها واحد قبلي .. فهمتي ولا لا ..
شيهانة ناظرت فيه وبصوت نفس نبرة صوته : ومن قال اني بـ اسيطر عليك , ومن قال اني بـ اثر فيك .. لهدرجة ماخذ مقلب بنفسك .. لهذي الدرجة تشوفني بموت عليك .. صدقني أنت في عيني مافيك ولا ذرة رجوله ..ولا بتأثر علي في يوم من الأيام ..
أخذت المزيل بسرعه , قبل لا تبدأ ثورة كبيرة في البيت وطلعت متوجهه لـ غرفة رنا ..
مسح على وجهه بيده , وكل الكلام اللي قاله كذب , كله كان يعنيه , فجأه سيطرت عليه , أثرت فيه , أعجبته ..
جلس على الـكرسي وهو يتنفس بقوة , مسح على وجهها مراراً و تكرارا
بعدها وقّف متوجهه لـ دورات المياة يستعد لـ الصلاة .
..........
طلعت من الـغرفة بسرعه متوجهه لـ غرفة رنا ..
فتحت الباب بسرعه , وسكّرته بنفس الـسرعه
رنا بـ ضحكة خبث : كنت حاسه انك بتجين يا بيبي
شيهانة توجّهت لـ السرير جلست عليه بدون ولا كلـمة :.....
رنا ناظرت فيها : وش صار ..
شيهانة ناظرت في رنا , أخذت نفس وزفرته : ففففففففف
رنا ضحكت بقوة :...........
شيهانة رفعت حاجبها وهي تقول : نعم ..وش هالضحكة
رنا ناظرت فيها : شكلك تحسبين صقر سهل ..
شيهانة ناظرت فيها , تكمّل كلامها
رنا حطت الجوال جنبها وهي تقول : صقر أخوي سهل في أشياء لكنه صعب في أشياء تروّع .. الناس دايم تحبه قبل هو يحبها ..هذا طبعه ..شكله الـيوم عطاك كم كلمة .. صح
شيهانة أنسدحت بجانب رنا وهي تقول : من قالك أني ابيه .. رنا أدري أنك اخته ويمكن ما ترضين هالكلام عليه .. لكن والله العـظيم انا ما أبيه , يعني يكفيني الـلي شفته من الرجال .. ما عاد أبي قربهم ولا أبي شي يصير لي هم فيه طرف , يعني بالمختصر ما ابي اخوك ولا أخوك يبيني
رنا عقدت حاجبها : وش صاير لك مع زوجك اللي قبلك ..
شيهانة ناظرت في رنا وهي تحس بضيقة , قالت بفضفضه : كلهم كلاب خونه , زي الكلاب تعطينهم واخر شي يعضون يدك اللي مديتي لهم فيها ..
رنا بـ استنكار : خونه ؟
شيهانة أخذت نفس وهي تناظر قدامها :........
رنا بـ لطف : وش صاير لـك ..أحكي
شيهانة عدّلت جلسها : الكلام هذا ما يعرفه الا انا وقوت و وحده من صديقاتي .. أقولك بس ما يطلع
رنا جلست مقابل لـ شيهانة : والله العظـيم ما يطلع
شيهانة بتوتر : ..سعد ولد خالتي .. من قبل ما نتزوج وانا وياه نحب بعض , زي ما تقولين حب عفيف طاهر وعيت الدنيا وهو قدامي وهو بعد ,وعا في الدنيا مافيه الا انا قدامه , خطبني و تزوجنا .. سنتين مشت معاه زي العسل , كل سنه أحس أنه يحبني أكثر من السنة اللي قبلها وانا متأكده مليون بالمية أنه يحبني .. ولا عمري في يوم شكيت فيه , ولا لاحظت عليه تصرّفات غريبة , اثق فيه ثقه عمياء , لو وش يسوي ما أكذبه أصدقه في أعظم الاشياء .. وهو ما كان يقصر ابد في الـكلام المعسول , كلام يودي وكلام يجيب .. في يوم ..قمت من نومي حول الفجر مالقيته نايم ..نزلت لـ الـبيت تحت أدوره أستنكرت باب الـفيلا مفتوح طلعت بـ اسكر الباب .. لكن ...
رنا بتأثر غريب عليها , قالت بهدوء : بعدين ..
شيهانة بضيق مبيّن على وجهها : لقيت الملحق مشغله لمباته , طلعت بـ اسكرها ..شفت صدمة عمري .. اللي في حياتي كلها بطولها و عرضها مستحيل اصدقها , شفت مع الـدريشة سعد .. ومعه بنتين , و ..وبينه خمر ..
شهقت رنا وعيونها تعبر عن حزنها :....
شيهانة تكمل سرد : الصدمة في هذا الوقت سكّتتني .. دخلت عليهم وكأن الله أنزل علي سكينه تهدي قلبي , أول ما شافني كأنه أنجن .. طردته من الـبيت و كسرت الخمر ..وبعدها ما قدرت أمسك نفسي , تخيلي انتي معي ولد خالتك , طول عمرك معه من يوم انك طفل , قدوتك في كل شي , عمرك ما تشوفينه يغلط .. عمرك ما تشوفينه يقول كلمة غلط , وبعدها حبيب , بعدها زوج مثل الملاك .. كيف بيكون موقفي .. انتظرت الصبح يصبح .. رحت لـ أهلي وانا مصره في داخلي أتطلق , واني ما اجيب سيرته بـ هذا الموضوع عشان العشرة بس .. بس .. موب عشان شي ثاني تطلقت لكن أحس فيني الحرة .. حرة الخيانة توجع ..توجع .. عوّدت نفسي أني خلاص أدمره داخلي , تعبت .. و يمكن أكثر شي تعّبني أني ما كنت أحبه كثر ما كنت متعوده عليه .. وبس يا ستي ..أنتهى سعد من حياتي ..وهذي القصه اللي ما يعرف فيها احد
رنا ناظرت في شيهانة بتأثر : ليه تضحين بنفسك مع اني اشوفك قوية
شيهانة : فيه فرق بين الـتضحيه و الـمحافظة .. انا حافظت على سمعتي انا , لان عمر الناس ما ينسون سالفة رجال خان زوجته , يمكن ينسون لو ان الرجال سوا أي شي ثاني , بس الخيانة يبقون ذاكرينها , انا مالي في وجع الراس , اهم شي أكون عارفه نفسي من داخلي ..بس هذا يكفيني
رنا أبتسمت وهي تقول : ما ألومك ... والله لو كرهتيهم ما ألومك ..
فجأه أنفتح الباب دخلت لينا وهي تقول : يوووه امانه وش سولفتوا فيه
رنا ناظرت الباب : بسم الله
شيهانة ضحكت وهي تقول : فاتك ..
رنا : اببد حللنا الـوضع السياسي اللي نعيشه , طلعت شيهانة لها نظره في السياسه .. تعالي بنت وش درّاك انها عندي
لينا جلست على طرف الـسرير وهي تقول : الشيخ صقر قبل لا يطلع سألني وينها .. عرفت أنها عندك ..
شيهانة وقّفت وهي تقول :بـ أبدل الفستان هذا اللي جاب لي مصايب الدنيا
رنا بـ تطنز : نامي فيه ..
شيهانة ضحكت وهي تقول : انتي حمارة
لينا بندم : يوه ليتني جايه من قبل شكل فاتني شي
شيهانة توجهت لـ دورات المياة , ورغم كل هذا الـكلام الا ان كلام رنا عن صقر في عقلها بقوة ...
ـــــــــــــــــــ
جالس في سيارته , يتذكر وجهه أبو نواف وهو مستغرب من جيّه آل سلطان " أبو نايف و أولاده " وآل نادر " أبو متعب و أولاده "
بدون طلب , أبو بدون موضوع مهم .. و وجهه جده وهو يحاول التغطيه على الـموضوع ..
شفط من زقارته كمّيه كبيره , بعدها كح بقوة ..
كل هذا بسبب , الـكلام اللي قاله جده الـيوم بسببها , كل ضغوطات الحياة بسببها ..
تذكّر زوجة جدة المغربية مليكة في أكثر لحضات حياته جحيماً
عايش عند جده أبو أمه لـ فتره من الزمن ..
تذكّر تعذيبها له , كلما تهاوشت مع جده تتجهه لـه وكانه آله لـ تطفيه الغضب ..
تطفي على جسده الـدخان اللي تشرب منه بدون علم الـجد , و تجلده بـ الصوط كلما حست بغضب من وجوده , و لمّا حاولت تغرفه في المسبح وقت ماهاوشها الجد لـ معاملتها السيئة مع عادل ..
رفع نظره لـ مراية الـسيارة الامامية وهو يشوف حاجبه علامة الـمشرط للحين مع مرور زمن لا يستهان به موجوده ..
حط راسه على الـدركسون , رغم مرور الـسنوات , ما قدر يتجاوز المرحلة , تذكّر صرخاته , صرخاته بـ أسم والده نايف اللي تركه عند جده بدون مبلاه , استنجاده بـ جده , ما كان يوصل له ..
تذكر أظافرها اللي أنغرست في جسم الـطفل الصغير اللي ما تعدى عمره الـخمس سنوات ..
ما أحد أنتبه لها ..
لما أنتقل لـ بيت جده .. في عمر الـ10 سنوات ..
تذكر أول كلمة من طفله عمرها في ذاك الوقت ما يقارب الـثلاث سنوات أو أربع ..
ضحكت , و سخرت منه , بسبب علامة المشرط الـكبيرة اللي على جبهته , و اثار الجروح اللي في يده , ما ينسى حقده الدفين عليها , وكسرطفولته بسبب كلمتها ..
أخذ نفس عميق ..
بعدها نزل من سيارته و غترته على كتفه ..
دخل الـبيت , الشروق بدأ يظهر ..
نزلت من غرفتها متوجهه لـ المطبخ , تاخذ علبه موية ..
طلعت من المطبخ وسكرت الباب
لفت بوجهها , واقف قريب منها
قال وفي نظراته شي غريب : شفتي اللي في حواجبي .. اللي كنتي تضحكين عليه ... شخطت مشرط ..
قوت ناظرت فيه بغرابه , قالت بصوت هادي : أضحك عليه ..
عادل ناظر فيها بـ نظره غير مفهومه : كنتي تضحكين على اشياء واجد , ماتدرين وش كان وراها .. كسّرتي أشياء واجد .. مابنيتي ولا شي ..
قوت ناظرت فيه بعدم أستيعاب : وش قصدك ..
عادل ناظر فيها , والأسى مسيطر عليه : ليه ..انا ما اعرف أحب ؟ .. ليه قلتي علي ما أعرف أحب ... حكمتي علي من متى .. عشاني على قولتك مشتت .. أنا كنت أحبـ....
ناظر فيها , أستوعب اللي قاعد يسويه , رجع على ورا وتوجهه لـ غرفته بسرعه ..
واقفه تسوعب كلامه , نزّلت نظرها لـ الأرض .. وهي تتذكر كلامه , اللي قد قالته هي عنه ..
جلست على الـكرسي وهي تعض شفتها التحتيه , سمعها ..وهي تتكلم عنه ..
رفعت راسها لـ الدرج بضيق , بس في لـحظة عقدت حواجبها , ما كمّل كلامه , أنا كنت أحبـ... يحب من .. عضت لسانها بشويش , لا يكون مثل ما كانت تقول لها شيهانة أنه يحبها , مستحيل هو بالذات عمره ما حبها , كيف يحبها !! لـكن الغريب اليوم حالته ..
هزت راسها تنفض عنها الافكار الـغريبة
وقّفت متوجهه لـ غرفتها , لكن كل مالها وترجع لها الافكار ..
ـــــــــــــــــــــــــ ـــــــــــــــــ
في وآرسو ..
جالس بـ القرب من الكوخ , ومخططاته بدأت تتوضح له أكثر ..
أسبوعين بـالكثير ويكون أبو وليد تحت يدين الـشرطة ..
لابتوبه في حجره , يتابع الـمقطع اللي جابه أبو راشد له بذهول , ماكان متوقع أن أبو وليد بيترك خلفه أي أثر ..
يناظر بصمت الـمذهول ..
في المعسكر ..
مواقف الـطيّارات الحربية , الساعه الثانية والنصف فجراً 2007 سبتمبر يوم 11
أبو وليد واقف عند أحد الطيارات , و رجاله من العسكر منتشرين في المكان لـ مراقبته , وثلاثه من رجال أبو وليد يحشون الـطائرة بـ الـمتفجرات اليدوية ..
أنتهوا من حشوها تماماً و انتهت العملية بسلام , أشرقت الـشمس ..
و هذا هو عبدالعزيز يظهر في الـكاميرا وهو يتوجهه لـ طائرة التدريب لـ يتدرب عليها , قبل لا يركب الـطيرة وهو يتذكر الـموقف جيداً
..
توجه لـ الطيارة الحربية , لـيتدرب الـيوم الاثنين .. بيكون فيه تدريب مكثّف لـ الطيارين الحربين ..
قرّب من الطيارة , قبل أسبوع تماما عُيّن رائد و مبسوط جداً بالرتبه و طول الاسبوع احتفالات ورقص .. لدرجة أن رجله اُصيبت بشد عضلي ..
قبل لا يركب الـطيّارة
توجهه نظره لـ مدربة : للأسف .. شكلني ما أقدر أتدرب اليوم , رجلي أحس فيها بشد عظلي ..
العقيد ناصر سلطان الـ..... مدرب درجة أولى ..
العقيد ناصر ربت على كتف عبدالعزيز وهو يقول : لو غيرك قال لي ان عنده شد عضلي ركّبته غصب .. بس أنت مصدقك .. ناد لي محمد يبدل مكانك
أبتسم عبدالعزيز لـ مدربه الـمتعاون جداً معه : تسلم طال عمرك ..
وجهوا نداء لـ محمد اللي ماكان موجود في ميدان الـتريب ..
جاء من بيته مخصصا لـ التدريب الـيوم ..
ركب الـطائرة ..
أقلع بها , ماهي الادقائق معدوده أنفجرت الطائرة في وسط السماء ...
كُل هذا , كان مسجّل عبر كاميرات المراقبة الـهوائية ..
سكّر اللابتوب , و هذي اللحظات تمر على باله كأنها اليوم حصلت ..
أخذ الـنسخه
وحطها في ظرف .. و معاها فيديو لـ كاميرات المراقبه وهي تصوّر أبو وليد وهو يقتل أحد رجاله و الرجل الأجنبي , وأشرطة فيديو أرسلها لـه أبو راشد تدور عن محادثه بين أبو وليد و أحد أكبر المزورين في السعودية تثبت فيها براءة عبدالعزيز من جديد , و تسجيل أخر يثبت تلاعب أبو وليد في الأوراق الرسمية لـ جمانة ونسبها له , مع وجود صور أصليه لـ بطاقة الـهوية لـ جمانة " .. و شهادة مانع اللي تنص " محاولات الجماعة الارهابيه في أنظمام عبدالعزيز لـ الجماعة لـ قدرته على صنع المتفجرات و رفضه , وطلب أبو وليد من الجماعة قتل عبدالعزيز " و تسجيل صوتي لـ أبو وليد , يكلّم فيه الـعميد ناصر سلطان الـ... و يهدده بالقتل وبعدها بـ اسبوع توفي العميد ناصر , ومعاها أوراق دخول و خروج أبو وليد لـ المملكة قبل الحادث بيوم , وتركه لـ المملكة بعد الحادث بيوم ..
سكّر الـظرف و عطاه أحد رجاله , يرسلها لـ المكان الي بيحسم الأمر ..
أبو راشد , بينه وبين صقر بن سلطان الـ.... اتصالات , يعرفه من بعيد جداً , يعطيه الاخبار , واخر خبر اعطاه لـ صقر أن أبو وليد خلال فتره قصيرة بيكون في الـمملكة , بتنرسل الاوراق هذي لـ صقر و صقر بيتصرف فيها , وبيرجع عبدالعزيز لـ الرياض .. بعد مده كبيرة من الغياب