الفصل 8
الـفـصل الأول : الجزء الثالث ..
شيءُ إليك يشدني , لَم أدري ماهُو منتهاه , يوماً أراه نِهايتي , يوماً أرى فيه الحياة ..
الساعه 1 الظهر , تسكر شيهانه شنطتها وهي ضايق خلقها
شيهانه بضيق : شلون برجع الحين و انتي موب فيه
قوت فيها الصيحه : شيهانه لا تبكينني اكثر ..
شيهانه اخذت نفس : يمكن اجي اعيش عندك
قوت بفرح : تكفين شيهانه حاولي
شيهانه : بس ابوي ؟ عند مين يجلس
قوت : عند عمتي سارة..
شيهانه : سارة لاهيه في عيالها .. موب مهتمه في أبوي ..
قوت : شيهانه جدي ما عليه ..
شيهانه جلست على السرير : ياربي .. الله يعينني على فراقك
قوت جلست جنب شيهانه : يا شينك شيهانه .. صيحتيني
أبو نايف : عجلي يا شيهانه .. يالله
شيهانه : خلصنا يبه .. يالله
أبو نايف يتصل على عادل : وينك يا عادل
عادل : هذاني , بركب القطار ..
أبو نايف : يالله ننتظرك في المطار ..
عادل : ابشر يا جدي .. اول ما اوصل بجيكم على المطار
سكر أبو نايف من عادل
أبو نايف : يالله يا بنات , نزلنا نسوي تيشك اوت
قوت رفعت حواجبها بـ أعجاب في جدها , رغم كبر سنه الا أن شكله أبداً ماهو على عمره , رجل بصحة تامه , طويل خالي من الشحوم , رغم عدم أحتياجة لـ العصا الا أنها دايم في يده .. لابس بنطلون جينز , قميص سماوي فاتح .. و جاكيت رسمي رمادي ..
نزل أبو نايف ..
قوت بـ أعجاب : لو أن جدي موب جدي تزوجته
شيهانه لفت على قوت وهي تتجاهل كلامها : قوت , تكفين عشان خاطري لا تتمشكلين مع عادل
قوت بنرفزة : تعرفينني يا شيهانه انا في حالي هو اللي يتحرش
شيهانه اخذت نفس : خلاص ما عليك منه اسفهيه .. هو يعتبرك اخته يخاف عليك
قوت شهقت : عادل يعتبرني اخته , صدقتك والله .. ما يواطنني , كأني ماكله حلاله ..
شيهانه بأسف : وش السواة معكم
قوت بقهر : هو لـ حد الحين يحسبني انا الـ...
شيهانه بملل : خلاص اوص .. الله يعينني عليكم
قوت وهي تلبس شنطتها : ماعليك مني و منه , لا تشغلين بالك فينا
شيهانه فتحت شنطتها : امسكي هذي 600 باوند خليها معك
قوت وهي تبتسم : شيهانه , خليها معك , جدي موب مقصر معي
شيهانه فتحت يدين قوت وهي تحطها فيها : اذا حطيتها في يدك لا تردينني
قوت ضحكت وهي تقول : والله يا شيهانه ساعات احسك امي , وانا وانتي ما بيننا الا 3 سنوات
شيهانه ضمت قوت وعيونها تدمع : ياربي كيف بتحمل تبعدين عني
قوت وهي تضم شيهانه : لابدن لابدن تتحملين
فكت شيهانه قوت : يالله نزلنا , لا ابوي يفضحنا
نزلوا شيهانه و قوت لـ الدور الأرضي ..
________________
في فيلا في الرياض ..
جالسه في المطبخ , تقطع السلطه و الثلاث خدم وراها بدون شغله ولا عمله
دخل أبو متعب : لينا يا ابوك ..ورا ما تعطين الخدم يقصقصونها عنك
لينا وقفت وهي تبوس راس ابوها : الله يخليك لي يبه , ما احبهم يمسكون شي
ابو متعب وهو يناظر في بنته بحنان : الله يخليك لي يا بنيتي , عز الله اختك ما اخذت منك شي هذا وانتي اصغر منها
لينا بحنان : ضعيفة يبه رنا , ما نامت الا متأخر
ابو متعب بضيق : جعلها الضعفه , صار لي اسبوع ونص ما شفتها , مانزلت تسلم علي ولا كأن لها ابو
لينا تصرف الموضوع : يبه .. آآ رنا تعبانه شوي
ابو متعب بقلب الابو الحنون الضعيف : بسم الله عليها وش فيها يا ابوك
لينا : لا لا .. بس تعبانه من الدراسه
ابو متعب عقد حواجبه : وش دراسته يا لينا , حنا في اجازة يا ابوك , اجازة نص الترم
لينا ما تعرف تكذب ولا تعرف ترقع اي شي : مم .. فيه اختبار .. اختبار قدرات الجامعين .. تذاكر له
ابو متعب وهو عارف ان لينا تكذب : يصير خير ..
طلع أبو متعب متوجه لـ مكتبه
لينا لفت على الخادمة عائشة : عايشة , البسي قلفز وكملي تقصيص بروح وارجع
طلعت لينا لـ الدور الفوقي غرفة رنا
فتح اللمبات وهي تقول : رنا .. رنا ... قومي .. ما صليتي الظهر ولا صليتي الفجر شكلك
رنا بـ انزعاج : ازعجتيني .. طفي اللمبات
لينا قربت من رنا وهي ترفع اللحاف : قومي صلي .. ابوي سأل عنك يقول صار له اسبوعين ما شافك .. قومي سلمي على ابوي
رنا بصوت شبه عالي : مقومتني من عز نومي تقولين لي انزلي سلمي عليه
لينا بقهر : ابوي يا حمارة .. هذا ابوي تكلمي زين
رنا بقهر : اطلعي برا بنام
لينا : الصلاااة طيب
رنا بصدق : يا كلـــبة صليت أطلعي ..
لفت لينا بظهرها بـ تطلع ..
رنا : لينا .. ترى واعدت دعاء تجينا اليوم بس مالي خلقها , تصرفي معاها , و احجزي لي في قدرات الجامعين , ما حجزت وخلي ابوي يحول لـ البنك .. وايه بتوصل طلبيه اليوم لي من انستقرام خذي من ابوي الفلوس ولا ادفعيها انتي
لينا ناظرت في رنا بقلة حيلة , طلعت وسكرت الباب ..
نزلت ودخلت المطبخ , من يومها صغيرها ما عمرها حست انها طفله , من يومها كبيرة حتى على اللي اكبر منها , طول عمرها متحمله المسؤولية حتى مسؤولية رنا , كلها على كتوفها , البيت كله على كتوفها , هي حرمة البيت .. ورنا .. مالها اي وجود .. كملت تقصيص السلطه وهي ملانه من كل شي
ـــــــــــــــــــــــــ ــــــــــ
حطت يدها على راسها بألم , مغمضه عيونها , لكن تحس ان الشي اللي تحتها او اللي هي نايمه عليه ابداً ماهو مريح , كأنها نايمه على حصا بس
فتحت عيونها ببطأ , غمضتها بقوة وهي تحس بنور قوي على وجهها , رفعت نفسها بالقوة وفتحت عيونها , ناظرت حولها برعب , عيونها تدور في المكان , بيت شعر , خيمه .. وقفت بسرعه وكأنها مقروصه
تناظر في المكان , نزلت نظرها لـ لبسها عباية .. من لبسها عباية وش جابها هنا , كيف جت هنا ..
جالس جنب بيت الشعر , حاط يدينه في شعره يفكر , اذا قامت وش بيقول لها , بيقول لها الحقيقة مافيه مجال لـ الكذب في حياته , طلع الورقة اللي في جيبه , كيف قدر حامد يزوجهم بهذي السرعه , اساساً هو ما تفرق معاه , لكن البنت اللي داخل وش ذنبها , معقوله مريضة نفسياً
سمع صوت داخل الخيمة , اكيد انها قامت
وقف وهو يدخل الخيمه
ديم برعب وصوت عالي : آآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآ آآآآآآآآآآآآآآآآآآآ