الفصل 10
*روايات وقصص يمنيه 📚🖋️*
*روايه [#نزيف_القلب💔]*
#للكاتبة_ريشة_الطاووس
*بارت رقم [ 10 ]*
*اعمل توجيه للروايه لحفظها وتفاعل بايموجي لطيف لنستمر [ 📖🖊️]*
ندى: وجدان عد اروحش ونرجع ندور انا وإيمان
وجدان: لا ليش عد اسير معاكن
ايمان: ذاهو قبل كنتي تشتي تروحي
وجدان تنهدت: لا إله إلا الله محمد رسول الله سهل عد احاول اتغلب على النوم
ايمان وندى: مشكورة
ندى: اذاً بسم الله نمشي الطريق على طول ونسأل إيمان طلعي صورته
إيمان: طيب طلعت الصورة وتعلم وجدان هاه شوفي اذا بسرتيه اتكلمي
وجدان تشوف ملابسه وضربات قلبها تتسارع ماقدرت توصل نظراتها لوجهه لفت وجهها: قولي ايش كان لابس وخلاص
إيمان: امم ثوب رمادي وصندل بُني صح ياندى
ندى: ايوه وشال ابيض
وجدان: ساابر
ندى مع نفسها مدري ليش حاسة ان وجدان فيها شي تخبيه بقلبها تجاه أمين قلبي يحس الله يستر بس الله يحفظك يا أمين
زكريا: وين نسير الآن
أمين: نسير نقلب ابوها دكيه بمكان عام منتزه يكون قريب من الخط
زكريا: على الرغم من ان انا تاعب بس على سبك عنسير
أمين: مش نص تعبي انا تاعب اكثر منك
زكريا: والله صدق كيف شعورك لما ابوك تصرف معك بهذي السرعة
أمين: كيف شعوري هههه الله يسامحك اكيد شخبط شخابيط لخبط لخابيط
زكريا: تستاهل وانت للمه شليت الزلط
أمين: لك كسر لحقوك ولقفك فهمت انا ماشليتها مدري من شلها
زكريا بصدمة: ماااهوو مش انت كان من هو
أمين: الله اعلم اهاه تعال هذا مكان حلو فيه ملاهي ومنتزه تعال نفتهن
زكريا: الله الله والمكان يلا راحوا أمين جلس فوق كرسي استراحة ورجع تمدد فوقه بتعب
زكريا: اتجه ناحية الكرسي الثاني وبدأ يخزن
ندى وقفت السيارة: اووف ياربي تعبت
وجدان: وانا اكثر وكمان خايفة من امي عتموتني
إيمان: ان شاء الله ما يوقع شي
ندى بغضب: امش مش طبيعية امش بغير عقل اكيد بغير عقل
إيمان: ندى مالش صلِ على النبي
ندى: اللهم صلِ وسلم على نبينا محمد آسفة ياوجداني بس امش ظالمة معش وتحسسني باشياء كثيرة
وجدان ودموعها تنزل وتشتي تغير الموضوع: يلا إيمان نسير ندور هانك يمكن نبسره
إيمان: يلا يلا ندى ونزلين
وجدان تمشي وماسكة يد ايمان بخوف
إيمان يارب نشوفه وصلين المكان المقارب لأمين
ندى: وجدان انتِ ارتاحي هانا واحنا نسير نلف بذاك المكان وانتِ لا تتحركي طيب
وجدان: تمام بس اسرعين انا خايفة
ندى وايمان طيب ومشين ويلفين يمين وشمال ويسألين ذا ويعلمين صوره لذا لكن دون اي فائدة
وجدان واقفة وتشوف يمين وشمال يارب ابسره ونخلص
أمين قام من فوق الكرسي ويشوف بنات واطفال وناس عجبه المنظر وجلس يتفرج
وجدان وتشوف يمين وشمال
أمين شافها ومع نفسه ااااح اااح ذي البنت تشابه الاميرة حقي وعيونه تشوفها يحاول يتجنب بس مشاعره تخونه وعيونه تغزي عليها بغير اذن الرياح تهب وملابسها تطير
وجدان رفعت يدها تمسك البرقع من الريح
أمين لفت انتباهه يدها والخاتم عليه فص احمر مع نفسه هي والله هي يارب ماجت تفعل هانا معقول سـ** لالا مستحيل طيب ليش هي هانا وبذا الوقت مابتفعل انا لازم اعرف اذا هي او مش هي لازم اقرب منها واغطي وجهي على سب ماتعرفنا غطى وجهه وقرب منها
وجدان تبكي وبهمس: يارب خارجني يارب استرني يارب ارحمني ياليتني ماجيت
أمين: اخ اخ بس تطلع مع شخص والله لااقتله بس مستحيل اكيد وجدان ماهي من ذا النوع يمكن خرجت تفتهن مع اهلها اعوذ بالله من الشيطان
إيمان: خلاص ياندى مش موجود خلينا نروح البنت خايفة من امها مش لازم نضغط عليها اكثر
ندى تبكي: ماشفناه يارب تعبنا رحنا فحوس
إيمان: سهل ربي يحميه من عنده ورجعين
وجدان جلست على الكرسي ومبين انها تبكي: ياربي ليش تأخرين انا شاموت من الخوف
ندى: اها ذاك وجدان جالسة بمحلها تعالي
ايمان وندى ركضين لاعندها
إيمان تضمها لصدرها: للمه تبكي مالش ياعمري
وجدان: تأخرتين وانا خفت وانا لوحدي
أمين: ذي ندى وايمان مايفعلين هانا لازم اقرب أكثر على سب اسمع كلامهن وخطي بخطوات بطيئة ومحد مركز وكأنه شخص ماشي طريق وقف امامهن ورفع التلفوف يعمل نفسه انو يتصل
وجدان: مابسرتنه؟
ندى: لا حاولنا نسأل بس الله اعلم وينه
إيمان تبكي ووجدان تبكي اكثر
ندى جلست جنبهن بالكرسي: هو أمين عنده اصحاب خيرات يكون ببيت اي واحد فيهم
أمين: ياالله مش معقول خواتي ووجدان خرجين يدورين عليا طيب وجدان ليش تبكي معقول تبكي من شاني مسح بكفه على وجهه
ويحس قلبه يتقطع على حال خواته ومن ناحيه مش فاهم ليش وجدان تبكي مسك على قلبه اكيد تحبنا كيف ماتحبنا وانا امووت بس اسمع احد يذكر اسمها والآن كيف افعل لازم اكلم زكريا واخرج لقدامهن على سب ينتبهين
زكريا: ووواوو تعال مالك
أمين راح لاعنده وكلمه
زكريا: وذلحين كيف عتفعل
أمين: عد اخرج لخارج على سب يبسرنا
زكريا: طيب بس ممكن طلب
أمين: تفضل
زكريا: اي واحدة الحب وغمز له
أمين: طالما انك صديقي ما اخبي عليك شوف...
زكريا: اي واحدة الحب وغمز له
أمين: طالما انك صديقي ما اخبي عليك شوف ذيك اللي مبين عليها مفجوعة اللي سحبت العباية هي ذيك واللي حضنتها اختي الصغيرة إيمان قدك تعرفها كانت تدي الصبوح للمحل لما كانت صغيرة
زكريا ذكر يوم ما دخل يدي تلفونه وحصله في المجلس ههه قد كبرت ومع نفسه ان شاء الله نصيبي) ورجع يشوف: وهذيك الحب تبعك كشفك عادها صغيرة
أمين: صغيرتي
زكريا: هيا اخرج خرجت نفسك قدهن خارجات
أمين خطي للخط وبعد الشال من وجهه
ندى تمشي وإيمان ووجدان وراها
أمين: احم احم ممكن طريق يا اخت
ندى مع نفسها امين تأكدت: أميييييين
أمين: روحي انتِ
أمين: الحمدلله انا مش ضايع للمه تخرجين وحدكن والدنيا خوف
إيمان قربت منه: أمين للمه تلفونك مسكر
أمين يضمها: سامحينا كان معطل كهرباء
وجدان تراقب من مسافة بعيدة شوية
أمين يضم إيمان ونظراته عليها ومع نفسه لو تدري خرجتش تدوري على الشخص اللي يحبش ويعشقش كيف خلت قلبه يتعلق فيش اكثر واكثر
إيمان تبعد عنه: يلاه أمين نروح
أمين: وصاحبتش عتفلتيها
ندى: لاما عنفلتها بس هي مستحيه منك وحاولت تبتعد شويه عد اصيح لها الآن
إيمان: لاعد اسير امسكها واديها راحت مسكت بيدها يلا يا قلبي
وجدان تمشي متوتره وتفرك يداتها بخوف
أمين: يلا اطلعين عد اوصلكن
طلعين البنات
أمين: عد اوصلكن لا قدام البيت ولا ازيد أبسر واحدة تخرج لااكسر رجلها
ندى: ليش وين عتسير
أمين: عند صاحبي
إيمان: ياعيباه ماعتروح يا أمين ليش
أمين: مش لازم اعصي ابي
ندى: طيب افتح كون اتصل وطمنا نطمن عليك
أمين: طيب تمام
وقف عد انزل اشتري ماء عاطش
...: تشتي حزامات اساور ساعات
إيمان: ندى عندش زلط في ثلاثة انواع اساور حلوة
ندى: هاه ذي 3000 مامعي إلا هي بكم الثلاثة
...: الواحد بألف وخمس
إيمان: طيب اني عد اشل واحد
ندى: واني كنت بشل واحد لي بس قدو لش ياوجدان وخذتهم وحاسبت
....: شكراً
وجدان: لا والله لش شليهم وانا عد اشتري مرة ثانية سهل
ندى: صدق
وجدان: والله
إيمان: طيب نشل واحد لي وواحد لش ياندى
أمين فتح الباب ودخل: ماهو
ندى: جاء واحد يبيع اكسسوارت بسيطة لاهنا يدل فيهن واشترينا اني وإيمان
أمين: اها سابر وبنفسه ماعد اقدرش اتحاكا ولا اقدر افعل حاجة بس وعد مني لش اني اتزوجش واخليش ملكة انتِ بس اصبري يابنت
إيمان: اسكه البسيهم ياوجدان شابسر كيف يطلعوا على يدش
أمين مد يده من غير مايركزين البنات ودهف المرايه على سب يقدر يشوف يدها
وجدان تلبسهم واحد واحد خلصت وتهمس لـإيمان أبسري مااحلاهم
أمين حس بهمستها ويحاول يشوف من المرايه بس ماقدر يشوف يدها ماتحمل لفت يشوف
وجدان ركزت عليه وغطت يدها
أمين حس على نفسه وقفى ظهره بقهر
ندى تهمس لوجدان: ماشاء الله عليش حاليين عليش خلاص حقش خليهم لش
وجدان: لا لا
ندى: قد حلفت ماهم إلا لش
وجدان: طيب عد ادي لش لزلط لما نوصل
ندى: سهل
بعد دقايق وصلوا ندى نزلت وإيمان وراها
وجدان حانبه ضيعت الجزمة
أمين استغل الفرصة ان هي لسا بداخل السيارة يقدر يكلمها وبدون خجل او اي تردد همس: لها بنت هاتي الاساور
وجدان عرفت انو يكلمها انقهرت وطنشت كلامه وتدور الجزمة
ندى وقفت: مالش شافتها حافية جزمتش وين
هند سمعت صوت السيارة وبدت للشباك وتبسرهم
وجدان قدي عتبكي: مدري مافي إلا حق رجل واحدة
أمين يخبط بيده على سكان السيارة: انا قلت يلا بسرعة
ندى: أمين اصبر الجزمة حق البنت ضايعة خلها على مهلها
وجدان فهمت انه يقصد الاساور
طيب شافتها لبست الجزمة ومع نزلتها ندى مااشتيش الاساور شليهم
ندى: ليش انا قلت تشليهم لش مش ترجعيهم
وجدان: والله بحسهم كبار على مقاس يدي
ندى: طيب أمين هات مفتاح السيارة
أمين مكنها المفتاح وهي مكنت وجدان
وجدان شلت المفتاح وخطيت
ندى: وذلحين كيف وين عتسير
أمين: عاد استأجر مُتر (دراجة نارية) انتِ ادخلي
ندى: مع السلامة انتبه تغلق التلفون على سب اتصل لك واطمئن عليك
أمين: طيب هاتي الاساور على سب اشتري لامي مثلهم شكلهم حاليين
ندى: ماعه صورهم وبعدا من اي حين بتهتم بذي البعاسس؟؟
أمين: ماينفعش مشو علش هاتيهم على سب اشتري مثلهم بالضبط
ندى بقهر: هاه ورجعهم لما تشتري
أمين: طيب ماعاد قال ابي بعد ماسرت من البيت عاد رجع زعل والا مع
ندى تحاول تخفي على أمين: يلا مع السلامة الله يحفظك ويسخر لك ولأي حين عتجلس مطرود
أمين: جوازي بيطلع بعد اسبوع يعني مسافر
ندى تخفي دمعتها: الله يوفقك يارب
أمين: اللهم آمين يارب العالمين يلا ادخلي قولي لامي تدعي لي هي وابي بالله عليش
ندى: طيب ياشيخ من عيوني ودخلت
أمين عيونه تراقبها لين اختفت
ندى: ياااارب...
ندى: ياااارب اخي احفظه واجعل طريقه امان كن معه ووفقه
إيمان منتظرة لها عند الباب: يلا لش ساعة انتِ دارية ان ابي مش عارف ولا امي ايش عاد معش للجلوسة
ندى تنهدت: الله يستر وفتحين الباب ودخلين بهدوء
سهام بالصالة رفعت رجل على رجل وبصوت هادئ وتصفق: اهلاً اهلاً وين الصبايا وين راحين؟
إيمان صدددددمة خوف وندم حزن: اماه احنااا
ندى بعدم مبالاة: كنا نتمشي حيف عليش انتِ وابي ماجيتوا معنا وقربت منها وباست راسها
إيمان جتها الشجاعة وقربت لاعند ارجل امها: يمه فدوه لروحش لاتعاقبينا
سهام: ومن قال اني عاد اعاقبكن بصراحة انا ماكنت متوقعة ان انتين تسيرين واحنا كلمناكن ماتطلعين وبالنسبة لابوكن هو نوم تعالين الغرفة حقكن قبل مايصحى ويدرى
ندى: تعالي عد اكلمش
سهام: يلا ودخلين الغرفة
ندى تخلس العبايه: يمه حرام عليكم والله حرام امين بريء
سهام بدأت تحس بخنقة الحزن: بريء والا مش بريء بيظل ابني وفلذة كبدي طمنني ابسرتنه
ندى: لا يمه أمين بريء وانا دورت عليه اني وإيمان ووجدان
سهام بصدمة: وجدااان كيف طلعت معاكن؟
إيمان: انا وندى شلينا السيارة حق ابوها واستأذنا من ابوها انها تجي تونسنا وابوها ماقصر ربي يسخر له ويسهل عمله مثل ماسهل علينا
ندى: ايوه ولو تبسري يمه وجدان كيف كانت مفجوعة وكانت تاعبة من النوم صحيناها وهي كانت نوم والله ظلمناها
سهام: حسبي الله عليكن ليش ماكلمتني؟
ندى: ومن يكمي يكلمش بذيك الساعة وانتِ معصبة
سهام حست بحزن: سامحني كنت قاسية عليكن قولين أمين كيف حاله طمنني
ندى تنهدت: أمين بخير الحمدلله شفناه بالمنتزه وجا وصلنا لاهانا
سهاام: ياالله ليش ياندى ماكلمتيني من حين وصلتين كنت اسير ابسره
ندى: وانا مادراني انش عتكوني راضية عننا كنت احسب انش عتفرمينا فرم لفت انتباههن صوت شخير
سهاام: يو ياروحي انتِ يا إيمان نامت اكيد تعذبتين وصلت تاعبة
ندى: ايوه تعبنا قوي بس وجدان تعبت اكثر وبنفس الوقت كانت تبكي خايفة من امها
سهاام: الله يحميها والله ذي البنت دخلت قلبي بجد
ندى: ادعي لها ان ربي يسخر لها قد في عليها خبر لاخو نوره مرة اخوها زياد
سهاام: ايش خبر من اي حين وانا كنت متفقه انا وابوش نخطبها لواحد من العيال
ندى: ليش ماقدمتم خبر ماذلحين خلاص ادعوا لها ان ربي يسخر لها بابن الحلال ترتاح من امها
سهاام: بصراحة يابنتي والله انا زعلت عليها من اين عنبسر بنت مثلها نعرفها من طبعها وكل شي
ندى: مدري تتم او لا لان وجدان ماتلاحظي عليها ذولا الايام كيف حزينة وشاردة قالت نوره انها مش موافقة وهم يراشوها وادوا لها وقت تفكر
سهاام: يارب ترفض
ندى: لايمه ادعي لها ان الله يختار لها مافيه الخير وبعدا مالي هكذا بين احس ان ذي المرة مش امها
سهاام: من قصدش هند
ندى: ايوه ابسرتي كيف اسيل محملة ذهب وتلفون وكل يوم مشيكه بفستان وملابسها انواع ووجدان ملابسها ماشي الحال ومافي معها غير شويه ماهن ثلث حق اسيل بصراحة شي يخلي الواحد يستغرب
سهاام نزلت دموعها: تدري يابنتي والله تحرق قلبي لما ابسرها تبكي بالسطح والا بالدرج تضربها وتطلعها برع بس وجدان ماتتكلمش
ندى: الله يكون بعونها ويرزقها بابن الحلال عد ارقد يمه باقي للفجر نص ساعة
سهاام: ارقدي ولاتقومي إلا لما تشبعي نوم ولاتنسي صلاة الفجر يمه
ندى: طيب وذلحين خليني ارقد وقلبي مطمئن ابسرت أمين واكثر شي مطمني رضاكي يمه
سهام: الله يحميكم الله يا أمين يحفظك الله يسترك الله يسخر لك
ندى: اهو نسيت اقلش جوازه عيطلع بعد اسبوع وعيسافر لاتنسي ماتدعي له
سهاام: ماهو مسرع يارب احفظ ابني وسخر له
ندى: مش هنا تدعي له ادعي فوق السجادة ياغالية
سهاام تغطيها: بدعي لكم بكل وقت نامي
ندى نامت على طول من شدة التعب
ـہـ٨ـہـ٨ـہہ💔🩹
في الصباح
هند: يا منحوسة قومي قامت عليش القيامة شرق العالم يقوموا من صبح وانتي ترقدي كأنش مش بني آدم
وجدان صحيت بتعب: ياالله امي تصيح لي وانا ماصليت وماعاد تدي لي وقت اصلي ياربي كيف افعل اااخ يدي
هند: والله ماراحت لش عقابش بالسوط انتِ ارقدي بس وخطيت
وجدان تسمعها وجرت للحمام وبكرامة القارئ توضت وخرجت تجري لعند السجادة صلت الفرض وخرجت للديمه وفعلت الصبوح خبز محشي بالبيض وفعلت شاهي وقهوة سكبت القهوة وخرجتها لعند ابوها
هند مصدومة ومع نفسها متى قامت واي حين فعلت الصبوح بس مهما فعلت والله لا اعاقبها مش ذنبها ذنب ابوها الذي يفسح لها تطلع محل ماتشتي
علي: يااا صباح الخير لأحلى وجدان بالكون
وجدان: صباح الفل تفضلوا وطرحت الثلاجة وتحاول تخبي يدها خلف ظهرها
هند: ليش تأخرتي بالنوم اهوو نسيت سرتي تدوري على أمين بنص الليل
وجدان نزلت دمعتها ومع نفسها يالتني مارحت ياريت الارض تنشق وتبلعني
هند: ليش تأخرتي بالنوم اهوو نسيت سرتي تدوري على أمين بنص الليل
وجدان نزلت دمعتها ومع نفسها يالتني مارحت ياريت الارض تنشق وتبلعني
علي لاحظ ان وجدان تبكي وماتحمل: هننند لااسمعش ترفعي صوتش على بنتي لايوقع خبر ثاني بنتي شريفة وما راحت معاهن إلا بعد اذن مني وانا سمحت لها لاني عارف ان بنات الخياط مؤدبات مش هن بنات سووق
هند تضحك بسخرية: اسأل بنتك المحترمة من الذي روحهن لهانا
علي لفت لوجدان: من الذي روحكن
وجدان تبكي ومنزله راسها
علي: من الذي روحكن وضرب وجدان كف انا قلت اذا ابسرتين الولد تتصلين على سب اجي اروحش وضربها الكف الثاني
وجدان تبكي بصمت وبدون ماتدافع عن نفسها
علي مسك فوق الجرح اللي بيدها وعصرها: قولي من اللي روحكن
وجدان صرخت: يدي الله الله يارب رحمتك يدي توجعني والدم بدأ ينزل من الجرح لان علي ضغط عليه بقوة
علي مصدوم: من اينه ذا الدم مافيها يدش
وجدان تبكي بكل صوتها: ياالله يدي بتوجعني ياالله وبصوت متقطع مابذنبي اتعذب مافعلت من اين اتصل مابش معي تلفون انا كنت تاعبة قوي وفيني نوم كنت اشتي اروح ارقد
هند: الله يزيل اثارش ياكلـ... والله تتكلمي لااخلص عليش قومي وتزبطها قومي غسلي الدم من الارض
علي نزلت دمعته ويشوف الدم ينزف من يد وجدان ويشوف اثر الضرب وجهها محمر حس قلبه يتقطع ومستغرب من اين الدم معقول انا عورت يد بنتي لوما انكسرت* بس انا ضغطت عليها وعصرتها يارب ليش انا ظالم لذي الدرجة لاحول ولا قوة إلا بالله
وجدان اتجهت ناحية المطبخ ودموعها كل واحدة تقود اختها يارب انت اعلم بما اخفيه ومايوجع قلبي يارب انت الحكيم وانت احكم الحاكمين يارب انت تعلم لقلبي وتعلم نيتي من الداخل لاقد ظلمك ولاقد وجعت احد يارب ارزقني على قدر نيتي يارب احسنت الظن فيك.. جابت المنشفة وبدأت تنشف الدم من الارض
علي: وجدان آسف يابنتي انا ناسي ان ماعندش تلفون سامحيني
وجدان: لو كنت طلبت مني السماح قبل لحظات كنت سامحتك لاني خلاص رفعت قضيتي للذي لا يسهى ولا ينام وكلت الله هو ارحم من بعض البشر
علي نزلت دموعه بغزارة ونزل لمستواها: وجدان لاتدعي على ابوش لو كان قلبي مش رحيم عليش ماكنت طلبت منش المسامحة انا مش عارف كيف وجعتش
وجدان رفعت راسها واثر الدموع مبللة وجهها وعيونها وابتسمت: يدي مش موجوعه والا قصدك وجهي وابتسمت اكثر لا مش موجوع الموجوع ياغالي هذا وتأشر ناحية قلبها هذا موجوع واحسه ينزف دممممم كل يوم اكثر واكثر وقامت تشتي تخرج
علي: لحظة
وجدان وقفت من غير ماتتكلم
علي: من اللي جرح يدش ذا الجرح بكله؟
هند بخوف: هي جرحتها بالكاويه وانا جيت وهي حانبة وساعدتها صح ياوجدان
وجدان بصوت هادئ: حسبي الله ونعم الوكيل الله اكبر منش ومُطلع على كل شيء ويعلم ماتخفي الصدور
علي فهم انها هند اللي جرحتها اكتفى بالصمت وحاسس بِـندم كبير انه بدأ يظلم بنته استغفر الله العظيم يارب اغفر لي
وجدان خطيت وهي تتألم
هند: والله ماراحت لش عادها تتفلسف
علي شاف وجدان طلعت من عندهم وقرب من هند
هند ارتبكت بخوف: علي حبيبي ما افطرك تعال نفطر
علي مسكها بيد من لقفها وبنبرة تهديد: اسمعي كلامي اللي عد اقوله لش واحتفظي فيه (والله بنتي تزيد تنزل دمعة من عيونها والا تفعلي بها شي لا ادفنش تحت التراب حية)
هند تحاول تفك يدها بس ماقدرت: علي اتركني
علي تركها وشل الكوت واتجه ناحية شغله
هند تمسح على مكان مامسكها علي: هههه والله لااخليك تكرهها واذا ماخليتكم ترموها في الشارع مانا هند ترفع يدك عليا والله مااخليها تتهنى
وجدان بغرفتها: اخ اخ يانوره تمر بي لحظات وأحس أن يغشاها الضباب لانيي عارفه من أحب ولا من أفارق ولا من أعادي حتى أني احس أن في شي يبترُّ جزءً من قلبي واليوم يمر كأنه سنة
نوره: الله كريم ذلحين اسمعي عد اكلمش
وجدان تغمض عيونها: ايوه
نوره: والله لو تزوجتي عترتاحي وتفتهني بدل العذاب والمعاملة هذي فكري والله لايخليش اميرة
وجدان: ومن قلش اني عد ارتاح انا اذا تزوجت امي ماعتفلتني وعتقوي العذاب اكثر
نوره: عتكوني بعيدة وبعدا للمه تفكيرش انها عتزيد اكثر
وجدان: وعدتني ياروحي وعدتني وامي لما تقول شي ما تتراجع
نوره: كيف وعدتش ماهو هذا الخبر صلِ على النبي
وجدان: اللهمﷺ ♥ بس يانوره بالله عليش لا تزيدي تفتشي قلبي وتجرحيني اكثر خلاص الذي فيني يكفيني
نوره: انا آسفة على اسئلتي بس ماعنقول لبيت اهلي وهم مصممين عليش
وجدان: سهل قولي لهم البنت عنيدة ومارضيت
نوره: الله كيف عد اقول لاخي طارق قلبه وهو يتمنى بنت فيها نفس صفاتش
وجدان: في بدلي وفي احسن مني انا مش حالية ولاعندي قلب منفتح للحب والاهتمام لحد على سب يزعل انا عندي قلب...
يتبع ...
*حط تفاعل بذا🔥❤️"*